ကူညီပေးသူတစ်ဦး လူသားတို့အဘယ်ကြောင့်လိုရ
ကူညီပေးသူတစ်ဦး လူသားတို့အဘယ်ကြောင့်လိုရ
‘ငါ သည် ကြမ်းကြုတ်သောညှဉ်းဆဲသူတစ်ဦး ဖြစ်သည်’ ဟူ၍ ယခင်က မာနကြီးပြီး ကြမ်းတမ်းသူတစ်ဦး ဝန်ခံခဲ့သည်။ သူသည် ပြစ်တင်ကဲ့ရဲ့သူတစ်ဦးဖြစ်ကာ ဘုရားသခင်ကိုကြောက်ရွံ့သော ယေရှုခရစ်၏နောက်လိုက်များအား အကြင်နာကင်းမဲ့စွာ တိုက်ခိုက်နှောင့်ယှက်၍ စော်ကားမော်ကားပြုခဲ့ဖူး၏။ ‘သို့သော်လည်း ကရုဏာတော်ကို ငါခံရပြီ’ ဟု သူကကျေးဇူးတင်စွာ ဆိုခဲ့သည်။ မယုံနိုင်ဖွယ်ဖြစ်သော်လည်း ဤခက်ထန်သော ညှဉ်းဆဲသူသည် သစ္စာရှိခရစ်ယာန်တမန်တော်ပေါလု ဖြစ်လာခဲ့သည်။—၁ တိမောသေ ၁:၁၂-၁၆; တမန်တော် ၉:၁-၁၉။
ပေါလုပြုသကဲ့သို့ လူတိုင်းပြုလုပ်ခဲ့ကြမည်မဟုတ်ချေ။ သို့သော် ကျွန်ုပ်တို့အားလုံးသည် ဘုရားသခင့်စံနှုန်းများကိုမီရန် ပျက်ကွက်နေကြသည်။ အဘယ်ကြောင့်နည်း။ အကြောင်းမှာ “လူအပေါင်းတို့သည် ဒုစရိုက်[မကောင်းမှု] ကိုပြု၍ ဘုရားသခင့်ရှေ့တော်၌အသရေပျက်ကြပြီ။” (ရောမ ၃:၂၃) ထိုထက်ကား ကျွန်ုပ်တို့သည် ဘုရားသခင့်ကရုဏာတော်ကိုခံရရန် အင်မတန်ဆိုးရွားလွန်းသည်ဟု ခံစားမိကာ စိတ်ပျက်ခြင်း၌နစ်မြုပ်နေဖို့ အလွန်လွယ်ကူသည်။ မိမိ၏အပြစ်ပြုလိုသောဉာဉ်ဆိုးများကို စေ့စေ့ဆင်ခြင်စဉ် ပေါလုကိုယ်နှိုက် ဤသို့ဆိုသည်– “ငါသည် ငြိုငြင်သောသူဖြစ်ပါသည်တကား။ ဤအသေကောင်မှ ငါ့ကိုအဘယ်သူကယ်လွှတ်မည်နည်း။” သူ၏မေးခွန်းကို သူ့ဘာသာဖြေဆိုရာ၌ ဤသို့ရေးသားခဲ့သည်– “ငါတို့သခင်ယေရှုခရစ်အားဖြင့် ကယ်လွှတ်တော်မူသောဘုရားသခင်၏ ကျေးဇူးတော်ကြီးလှပေ၏။”—ရောမ ၇:၂၄၊၂၅။
ဖြောင့်မတ်တော်မူသောဖန်ဆင်းရှင်သည် အပြစ်သားများနှင့် မည်သို့ဆက်ဆံနိုင်တော်မူမည်နည်း။ (ဆာလံ ၅:၄) ပေါလု ဤသို့ဆိုခဲ့သည်ကို သတိပြုပါ– “ငါတို့သခင်ယေရှုခရစ်အားဖြင့် ကယ်လွှတ်တော်မူသောဘုရားသခင်၏ ကျေးဇူးတော်ကြီးလှပေ၏။” ဘုရားသခင့်ကရုဏာတော်ကို ခံစားရသူအခြားတစ်ဦးက ဤသို့ရှင်းပြသည်– “တစ်စုံတစ်ယောက်သောသူသည် ဒုစရိုက်[မကောင်းမှု] ကိုပြုမိလျှင်၊ ဖြောင့်မတ်တော်မူသောအရှင်ယေရှုခရစ်တည်းဟူသော ငါတို့အမှုဆောင်သခင်သည် ခမည်းတော်ထံ၌ရှိတော်မူ၏။ ထိုသခင်သည် ငါတို့၏အပြစ်မက၊ လောကီ သားအပေါင်းတို့၏ အပြစ်ဖြေစရာအကြောင်းဖြစ်တော်မူ၏။”—၁ ယောဟန် ၂:၁၊ ၂။
‘ခမည်းတော်ထံ၌ရှိတော်မူသော အမှုဆောင်သခင်’ ဟု ယေရှုခရစ်ကို အဘယ်ကြောင့်ခေါ်ဆိုသနည်း။ ယေရှုသည် အပြစ်များအတွက် “အပြစ်ဖြေစရာအကြောင်း” မည်သို့ဖြစ်သနည်း။
ကူညီပေးသူတစ်ဦး အဘယ်ကြောင့်လိုရ
ယေရှုသည် “မိမိအသက်ကိုစွန့်၍ လူများကိုရွေးခြင်းငှာ” မြေကြီးပေါ်သို့ ကြွလာတော်မူ၏။ (မဿဲ ၂၀:၂၈) ရွေးနုတ်ဖိုးဟူသည် တစ်စုံတစ်ဦး သို့မဟုတ် တစ်စုံတစ်ရာလွတ်မြောက်ရေးအတွက် အဖိုးအခပေး၍ပြန်လည်ဝယ်ယူခြင်း သို့မဟုတ် ပေးဆက်သည့်အခဖြစ်သည်။ “ရွေးနုတ်ဖိုး” ဟုဘာသာပြန်ထားသော ဟေဗြဲစကားလုံး၏ ကြိယာပုံစံက အပြစ်များကို ဖုံးအုပ် ခြင်း သို့မဟုတ် ကျေအေးစေခြင်းဟူသည့်သဘောဆောင်သည်။ (ဆာလံ ၇၈:၃၈) မဿဲ ၂၀:၂၈ တွင်ပါသော ဂရိစကားလုံးကို အထူးသဖြင့် စစ်သုံ့ပန်းများ ရွေးနုတ်ဖို့ သို့မဟုတ် ကျွန်များလွတ်မြောက်စေဖို့ ပေးရသောအဖိုးအခကို ရည်ညွှန်းပြီးအသုံးပြုခဲ့ကြသည်။ တရားမျှတခြင်း၏တောင်းဆိုချက်အတိုင်း တန်ဖိုးတူညီသည့်အရာတစ်ခုအတွက် အခြားအရာတစ်ခုကို အလဲအလှယ်အဖြစ်ပေးဆက်ရသည်။
ပထမဦးဆုံးလူသားသည် ဘုရားသခင်ကိုပုန်ကန်ခဲ့သောကြောင့် လူသားများသည် ကျွန်ဘဝရောက်ခဲ့ကြသည်။ ကမ္ဘာဦးကျမ်း အခန်းကြီး ၃ တွင်ဖော်ပြထားသကဲ့သို့ ထိုစုံလင်သောလူသား—အာဒံ—သည် ယေဟောဝါဘုရားသခင်အား မနာခံသည့်လမ်းစဉ်ကို လိုက်လျှောက်ရန် ရွေးချယ်ခဲ့သည်။ ထိုသို့ပြုခြင်းအားဖြင့် သူသည် အပြစ်နှင့် သေခြင်း၏ကျွန်သပေါက်ဘဝသို့ မိမိကိုယ်နှိုက်အပြင် မမွေးဖွားသေးသည့် သားစဉ်မြေးဆက်များကိုပါ ရောင်းချပစ်လိုက်သည်။ သို့ဖြင့် အာဒံသည် မိမိကိုယ်နှိုက်နှင့် မိမိ၏အမျိုးအနွယ်အားလုံးကို စုံလင်သောလူ့အသက်တာဆုကျေးဇူး လက်လွတ်ဆုံးရှုံးစေခဲ့သည်။—ရောမ ၅:၁၂၊ ၁၈၊ ၁၉; ၇:၁၄။
ရှေးဣသရေလခေတ်တွင် လူတို့၏အပြစ်များဖြေလွှတ်ဖို့ သို့မဟုတ် ဖုံးအုပ်ပစ်ဖို့ တိရစ္ဆာန်ပူဇော်သကာများကို ဘုရားသခင်စီစဉ်ပေးခဲ့သည်။ (ဝတ်ပြုရာ ၁:၄; ၄:၁၀၊ ၃၅) တစ်နည်းဆိုရလျှင် အပြစ်ပြုသူအစား ယဇ်ပူဇော်သောတိရစ္ဆာန်၏အသက်ကို ပေးဆက်ခြင်းဖြစ်သည်။ (ဝတ်ပြုရာ ၁၇:၁၁) သို့ဖြစ်၍ “အပြစ်ဖြေရာနေ့” ကို “ရွေးနုတ်ဖိုးပေးရာနေ့” ဟူ၍လည်းခေါ်ဆိုနိုင်ပေသည်။—ဝတ်ပြုရာ ၂၃:၂၆-၂၈။
သို့သော် တိရစ္ဆာန်များသည် လူတို့ထက်နိမ့်ကျသောကြောင့် “နွား၊ ဆိတ်၏အသွေးသည် အပြစ်ကို [လုံးဝ] မပယ်နိုင်ရာ။” (ဟေဗြဲ ၁၀:၁-၄) အစဉ်အမြဲအပြစ်ဖြေဖို့ သို့မဟုတ် ပယ်ရှားပေးဖို့ လုံလောက်သောတန်ဖိုးရှိသည့် ယဇ်သကာအတွက် အာဒံလက်လွတ်ဆုံးရှုံးခဲ့သောအရာနှင့် တန်းတူညီမျှဖြစ်ရပေမည်။ တရားမျှတမှုချိန်ခွင်လျှာကိုညီစေရန် စုံလင်သောလူသားတစ်ဦး (အာဒံ) ဆုံးရှုံးခဲ့သည့်အရာအတွက် စုံလင်သောလူသားတစ်ဦး (ယေရှုခရစ်) လိုအပ်သည်။ စုံလင်သောလူ့အသက်သာလျှင် ကျွန်အဖြစ်သို့ ကနဦးဖခင်ရောင်းချခဲ့သည့်ချုပ်နှောင်ခြင်းမှ အာဒံ၏မျိုးဆက်ကိုရွေးနုတ်ရန်အဖိုးအခ ပေးနိုင်မည်ဖြစ်၏။ “အသက်အတွက်အသက်” ပေးမှသာ စစ်မှန်သောတရားမျှတခြင်းနှင့် ညီမျှပေမည်။—ထွက်မြောက်ရာ ၂၁:၂၃-၂၅။
အာဒံအပြစ်ပြုပြီး သေဒဏ်ချမှတ်ခံရချိန်တွင် သူ၏မမွေးဖွားသေးသောမျိုးနွယ်သည် သူ၏မျိုးရိုးတွင်ရှိဆဲဖြစ်ရာ သူနှင့်အတူသေဆုံးခဲ့ကြရသည်။ စုံလင်သောယေရှု၊ “နောက်ဆုံးဖြစ်သောလူအာဒံ” သည် စိတ်လိုကိုယ်လျောက် မိသားစုတစ်ခုကို မဖြစ်ပေါ်စေခဲ့ပါ။ (၁ ကောရိန္သု ၁၅:၄၅) စုံလင်သောလူသားယဇ်သကာအဖြစ် ကိုယ်တော်သေဆုံးသွားချိန်၌ မမွေးဖွားသေးသောသူ၏မျိုးနွယ် သူ၌ရှိသည်။ ထို့ကြောင့် ကိုယ်တော်၌ရှိသောလူသားမျိုးနွယ်မှာ ကိုယ်တော်နှင့်အတူ သေဆုံးသွားသည်ဟုဆိုရပေမည်။ ယေရှုသည် အာဒံ၏အပြစ်ရှိသောသေမျိုးဖြစ်သည့်မိသားစုကို မိမိ၏မိသားစုအဖြစ် သိမ်းပိုက်ခဲ့သည်။ မိမိကိုယ်ပိုင်မိသားစုရနိုင်ခွင့်ကို ကိုယ်တော်အရှုံးခံလိုက်သည်။ မိမိ၏စုံလင်သောအသက်ကို ယဇ်သကာအဖြစ်ပေးဆက်ခြင်းဖြင့် ယေရှုသည် အာဒံမှဆင်းသက်လာသော လူသားတစ်ရပ်လုံးကို ဝယ်ယူလိုက်ရာ သူတို့သည် ကိုယ်တော်၏မိသားစုဖြစ်လာကာ ကိုယ်တော်သည် သူတို့၏ “ထာဝရအဘ” ဖြစ်လာလေသည်။—ဟေရှာယ ၉:၆၊ ၇။
ယေရှု၏ရွေးနုတ်ဖိုးပူဇော်သကာသည် နာခံမှုရှိသောလူသားများအတွက် ဘုရားသခင့်ကရုဏာတော်နှင့် ထာဝရအသက်ရရှိစေရန် လမ်းဖွင့်ပေးသည်။ ထိုသို့ဖြစ်ရကား တမန်တော်ပေါလုက ဤသို့ရေးသားခဲ့သည်– “အပြစ်တရား၏အခကား သေခြင်းပေတည်း။ ဘုရားသခင်ပေးတော်မူသော ဆုကျေးဇူးတော်ကား၊ ငါတို့သခင်ယေရှုခရစ်အားဖြင့် ထာဝရအသက်ပေတည်း။” (ရောမ ၆:၂၃) မိမိကိုယ်တော်တိုင်နှင့် မိမိချစ်မြတ်နိုးရသောသားတော်တို့ အလွန့်အလွန်အနစ်နာခံခဲ့ကြရာဖြစ်သည့် ရွေးနုတ်ဖိုးနှင့်စပ်လျဉ်းသော မေတ္တာနှင့် သနားကြင်နာမှုကြောင့် ယေဟောဝါအား ကျွန်ုပ်တို့ကျေးဇူးတင်ချီးမွမ်းခြင်းမပြုဘဲမနေနိုင်ကြပေ။ (ယောဟန် ၃:၁၆) သို့နှင့် ယေရှုသည် ကောင်းကင်အသက်တာသို့ ရှင်ပြန်ထမြောက်ခဲ့ပြီးနောက် ကောင်းကင်၌ ဘုရားသခင့်ထံ မိမိ၏ရွေးနုတ်ဖိုးပူဇော်သကာ၏တန်ဖိုးကို ပေးဆက်ခဲ့သည့်အချိန်တွင် ‘ခမည်းတော်ထံ၌ရှိတော်မူသော အမှုဆောင်သခင်’ အမှန်ပင်ဖြစ်ကြောင်း သက်သေထူခဲ့သည်။ * (ဟေဗြဲ ၉:၁၁၊ ၁၂၊ ၂၄; ၁ ပေတရု ၃:၁၈) သို့သော် ယခု ယေရှုခရစ်သည် ကောင်းကင်တွင် ကျွန်ုပ်တို့၏အမှုဆောင်သခင်ဖြစ်ကြောင်း မည်သို့သက်သေထူနေသနည်း။
[အောက်ခြေမှတ်ချက်များ]
^ အပိုဒ်၊ 12 ကင်းမျှော်စင်သမ္မာကျမ်းစာနှင့်ဝေစာအသင်း၊ မြန်မာမှထုတ်ဝေသော ထာဝရအသက်ရစေသောအသိပညာ၊ အခန်း ၄ နှင့် ၇ ရှု။
[စာမျက်နှာ ၄ ပါ ရုပ်ပုံ]
ယေရှု၏စုံလင်သော လူသားအသက်တာသည် အာဒံ၏သားစဉ်မြေးဆက်ကို ရွေးနုတ်ဖို့ဖြစ်လာခဲ့