စာရှုသူများထံမှမေးခွန်းလွှာ
စာရှုသူများထံမှမေးခွန်းလွှာ
ရောမ ၁၂:၁၉ တွင် တမန်တော်ပေါလုက “ကိုယ်တိုင်အပြစ်ပြန်၍မတုံ့ကြနှင့်။ အမျက်တော်ကိုအခွင့်ပေးကြလော့” ဟုပြောခဲ့သောအခါ ခရစ်ယာန်များသည် အမျက်မထွက်သင့်ဟု သူဖော်ညွှန်းနေခြင်းလော။
အတိအကျဆိုရလျှင် မဟုတ်ပါ။ ဤတွင် ဘုရားသခင်၏အမျက်တော်ကို တမန်တော်ပေါလုရည်ညွှန်းနေခြင်းဖြစ်သည်။ သို့သော် ခရစ်ယာန်များသည် အမျက်ထွက်လျှင် အရေးမကြီးပါဟု ပြောနေခြင်းမဟုတ်ပါ။ သမ္မာကျမ်းစာက အမျက်မထွက်ရန် ကျွန်ုပ်တို့ကို ရှင်းလင်းစွာသွန်သင်ပေးပါသည်။ မြင့်မြတ်သောသွန်သင်ချက်ဆိုင်ရာ နမူနာတစ်ခုကို သုံးသပ်ကြည့်ပါ။
“အမျက်မထွက်စေနှင့်။ ဒေါသစိတ်ကိုစွန့်ပယ်လော့။ ပြစ်မှားစေခြင်းငှာ တိုက်တွန်းတတ်သောစိတ်မရှိစေနှင့်။” (ဆာလံ ၃၇:၈) “ညီအစ်ကိုကို အထောက်မတန်အမျက်ထွက်သောသူသည် ရုံး၌အပြစ်စီရင်ခြင်းကို ခံထိုက်ပေ၏။” (မဿဲ ၅:၂၂) “ဇာတိပကတိအကျင့်တို့သည် ထင်ရှားကြ၏။ ထိုအကျင့်တို့မူကား၊ သူ့မယားကိုပြစ်မှားခြင်း၊ မတရားသောမေထုန်၌မှီဝဲ [ကာမစပ်ယှက်] ခြင်း၊ ညစ်ညူးစွာကျင့်ခြင်း၊ ကိလေသာလွန်ကျူးခြင်း၊ ရုပ်[ပုံ]ကိုးကွယ်ခြင်း၊ သူတစ်ပါးကိုပြုစားခြင်း၊ ရန်ငြိုးဖွဲ့ ခြင်း ရန်တွေ့ ခြင်း၊ ဂုဏ်ပြိုင်ခြင်း၊ အမျက်ထွက်ခြင်း” တို့ဖြစ်ကြ၏။ (ဂလာတိ ၅:၁၉၊ ၂၀) “ခပ်သိမ်းသောစိတ်တိုခြင်း၊ စိတ်ဆိုးခြင်း၊ အမျက်ထွက်ခြင်း၊ အော်ဟစ်ငေါက်ငေါ်ခြင်း၊ သူ့အသရေကိုပျက်အောင်ပြောဆိုခြင်းတို့ကိုလည်းကောင်း၊ ခပ်သိမ်းသောမနာလိုခြင်းကိုလည်းကောင်း သင်တို့မှပယ်ရှားကြလော့။” (ဧဖက် ၄:၃၁) “ခပ်သိမ်းသောသူတို့သည် နားကြားခြင်းငှာလျင်မြန်ကြစေ။ စကားပြောခြင်းငှာလည်းကောင်း၊ အမျက်ထွက်ခြင်းငှာလည်းကောင်းနှေးကြစေ။” (ယာကုပ် ၁:၁၉) ထို့ပြင် နယပုံပြင်ကျမ်းက အမျက်ထွက်ခြင်း သို့မဟုတ် အသေးအဖွဲကိစ္စများနှင့် လူတို့၏အမှားများအတွက် ဒေါသမထွက်မိစေရန် မကြာခဏသွန်သင်ပေးသည်။—သု. ၁၂:၁၆; ၁၄:၁၇၊ ၂၉; ၁၅:၁; ၁၆:၃၂; ၁၇:၁၄; ၁၉:၁၁၊ ၁၉; ၂၂:၂၄; ၂၅:၂၈; ၂၉:၂၂။
ထိုသို့သောသွန်သင်ချက်များသည် ရောမ ၁၂:၁၉ ၏ရှေ့နောက်စကားနှင့်ညီညွတ်သည်။ ကျွန်ုပ်တို့သည် ဟန်မဆောင်ဘဲချစ်ကြရန်၊ ကျွန်ုပ်တို့အား ညှဉ်းဆဲသူတို့ကိုမေတ္တာပို့ရန်၊ အခြားသူများ၏အကောင်းကိုစဉ်းစားတတ်ရန်၊ အဆိုးကိုအဆိုးနှင့်မတုံ့ပြန်ရန်နှင့် လူတိုင်းနှင့် အသင့်အတင့်ရှိဖို့ကြိုးစားကြရန် ပေါလုက အကြံပြုထောက်ခံခဲ့သည်။ ထို့နောက် သူကဤသို့တိုက်တွန်းခဲ့သည်– “ကိုယ်တိုင်အပြစ်ပြန်၍မတုံ့ကြနှင့်။ အမျက်တော်ကိုအခွင့်ပေးကြလော့။ ကျမ်းစာလာသည်ကား၊ ‘ငါသည် အပြစ်တရားကိုစီရင်ပိုင်၏။ အပြစ်နှင့်အလျောက်ငါဆပ်ပေးမည်’ ဟု ထာဝရဘုရားမိန့်တော်မူ၏။”—ရောမ ၁၂:၉၊ ၁၄၊ ၁၆-၁၉။
မှန်ပါသည်၊ အမျက်ဒေါသကြောင့် လက်စားချေသည့်အပြုအမူများကို မပြုသင့်ချေ။ အခြေအနေများအကြောင်း ကျွန်ုပ်တို့သိရှိထားရာနှင့် တရားမျှတခြင်းအပေါ် ကျွန်ုပ်တို့၏ခံယူထားရာသည် မစုံလင်ပါ။ အမျက်ဒေါသကြောင့် လက်စားချေမည်ဆိုလျှင် အများအားဖြင့် အမှားလုပ်မိပါလိမ့်မည်။ ထိုသို့ပြုခြင်းက ဘုရားသခင့်ရန်သူကြီး စာတန်၏ရည်ရွယ်ချက်ကို အထမြောက်စေပါမည်။ ပေါလုက အခြားတစ်နေရာတွင် ဤသို့ရေးသားခဲ့သည်– “အမျက်ထွက်ရာတွင် အပြစ်မရှိစေနှင့်။ အမျက်မပြေဘဲ နေမဝင်စေနှင့်။ [စာတန်] ကိုအခွင့်မပေးကြနှင့်။”—ဧဖက် ၄:၂၆၊ ၂၇။
သာ၍ကောင်းသောလမ်းစဉ်၊ ပို၍ပညာရှိသောလမ်းစဉ်မှာ မည်သည့်အချိန်တွင်၊ မည်သူ့အပေါ် လက်စားချေရမည်ကို ဘုရားသခင်အား ဆုံးဖြတ်စီရင်စေခြင်းဖြစ်သည်။ ကိုယ်တော်သည် အချက်အလက်အစုံအလင်ကိုသိရှိကာ စီရင်နိုင်တော်မူပြီး မည်သည့်အပြစ်စီရင်တော်မူချက်မဆိုသည် ကိုယ်တော်၏စုံလင်သောတရားမျှတမှုကို ထင်ရှားပေါ်လွင်စေပါလိမ့်မည်။ “အပြစ်တရားကိုစီရင်ရသောအခွင့်၊ အပြစ်နှင့်အလျောက် ဆပ်ပေးရသောအခွင့်ကို ငါပိုင်၏” ဟူသောစကားလုံးများပါသည့် တရားဟောရာ ၃၂:၃၅၊ ၄၁ ကိုပေါလုကိုးကားရာတွင် ရောမ ၁၂:၁၉ ၌ဤအချက်ကိုသူထောက်ပြနေကြောင်း ကျွန်ုပ်တို့တွေ့ နိုင်ပါသည်။ (ဟေဗြဲ ၁၀:၃၀ နှိုင်းယှဉ်။) သို့ဖြစ်သောကြောင့် ဂရိကျမ်းမူတွင် “ဘုရားသခင်၏” ဟူသောစကားလုံးကို မတွေ့ ရှိရသော်လည်း မျက်မှောက်ခေတ်ဘာသာပြန်သူအချို့သည် ရောမ ၁၂:၁၉ တွင် ၎င်းကိုထည့်သွင်းထားကြသည်။ သို့ဖြင့် အဆိုပါနေရာတွင် ဤသို့ဖတ်ရှုရသည်– “ဘုရားသခင်ကို လက်စားချေစေပါ” (ခေတ်ပြိုင်အင်္ဂလိပ်ဘာသာပြန်); “ဘုရားသခင်၏အမျက်တော်ကို နေရာပေးကြလော့” (အမေရိကန်စံတင်ဘာသာပြန်); “အလိုတော်ရှိပါက ဘုရားသခင် ဒဏ်ပေးပါစေ” (ခေတ်အင်္ဂလိပ်စကားဖြင့် ဓမ္မသစ်ကျမ်း); “ဘုရားသခင် အပြစ်ဆပ်ပေးပါစေ။”—(အင်္ဂလိပ်ကျမ်းစာသစ်)။
အမှန်တရား၏ရန်သူများ၏ မတော်မတရားပြုမူမှု သို့မဟုတ် သူတို့၏ညှဉ်းပန်းနှိပ်စက်မှုကိုခံရသည့်အခါ၌ပင် မောရှေကြားခဲ့ရသည့် ယေဟောဝါဘုရားသခင်နှင့်စပ်လျဉ်းသည့် ဖော်ပြချက်ကို ကျွန်ုပ်တို့ယုံကြည်စိတ်ချကြောင်း တင်ပြနိုင်ကြပါသည်– “ယေဟောဝါ၊ ယေဟောဝါ၊ ငဲ့ညှာသောသဘော၊ သနားကြင်နာသောသဘော၊ အမျက်ထွက်နှေးသောသဘော၊ ချစ်ခင်ကြင်နာခြင်းနှင့် သစ္စာကြွယ်ဝသောသဘောရှိတော်မူသော၊ အထောင်အသောင်းသောသူတို့အား ချစ်ခင်ကြင်နာခြင်းတရား ထားတော်မူထသော၊ ပြစ်မှားခြင်း၊ လွန်ကျူးခြင်း၊ ဒုစရိုက်အပြစ်တို့ကို ဖြေလွှတ်သော်လည်း အပြစ်ဒဏ်ပေးခြင်းမှ အဘယ်နည်းနှင့်မျှ ကင်းလွတ်ခွင့်ပြုတော်မမူသော ဘုရားသခင်ဖြစ်တော်မူ၏။”—ထွက်မြောက်ရာ ၃၄:၆၊ ၇၊ ကဘ။