ယေဟောဝါကျွန်ုပ်တို့ကိုဦးဆောင်နေပုံ

ဖွင့်ပါ

ယေဟောဝါကျွန်ုပ်တို့ကိုဦးဆောင်နေပုံ

“ဖြောင့်သောလမ်းထဲ၌ အကျွန်ုပ်ကိုပို့ဆောင်တော်မူပါ။”—ဆာလံ ၂၇:၁၁။

၁၊ ၂။ (က) ယေဟောဝါသည် ယနေ့ မိမိ၏လူမျိုးတော်ကို မည်သို့ဦးဆောင်နေသနည်း။ (ခ) အစည်းအဝေးများမှအကျိုးအပြည့်အဝရယူခြင်းတွင် အဘယ်အရာပါဝင်သနည်း။

ရှေ့ဆောင်းပါးတွင် ကျွန်ုပ်တို့လေ့လာခဲ့သကဲ့သို့ ယေဟောဝါသည် အလင်းနှင့်အမှန်တရား၏ ရင်းမြစ်ဖြစ်တော်မူ၏။ ကျွန်ုပ်တို့သည် ဖြောင့်မတ်သောလမ်း၌ လျှောက်လှမ်းနေစဉ် ကိုယ်တော်၏နှုတ်မြွက်စကားတော်က ကျွန်ုပ်တို့၏လမ်းခရီးကိုလင်းစေသည်။ ယေဟောဝါသည် ကိုယ်တော်၏နည်းလမ်းတော်များကိုသွန်သင်ပေးခြင်းအားဖြင့် ကျွန်ုပ်တို့ကိုဦးဆောင်တော်မူ၏။ (ဆာလံ ၁၁၉:၁၀၅) ရှေးအချိန်ကဆာလံဆရာကဲ့သို့ ဘုရားသခင့်ဦးဆောင်မှုကို ကျွန်ုပ်တို့ကျေးဇူးတင်စွာတုံ့ပြန်၍ ဤသို့ဆုတောင်းကြသည်– “အိုထာဝရဘုရား [“ယေဟောဝါ၊” ကဘ]၊ ကိုယ်တော်၏လမ်းကို အကျွန်ုပ်အားပြသသွန်သင်တော်မူပါ။ . . . ဖြောင့်သောလမ်းထဲ၌ အကျွန်ုပ်ကိုပို့ဆောင်တော်မူပါ။”—ဆာလံ ၂၇:၁၁။

^၂ယနေ့ ယေဟောဝါသွန်သင်ပေးတော်မူသည့် နည်းတစ်နည်းမှာ ခရစ်ယာန်အစည်းအဝေးများအားဖြင့်ဖြစ်သည်။ ကျွန်ုပ်တို့သည် (၁) စည်းဝေးများကို မှန်မှန်တက်ရောက်ခြင်း၊ (၂) အစီအစဉ်ကိုဂရုတစိုက်နားထောင်ခြင်းနှင့် (၃) ပရိသတ်နှင့်ဆိုင်သည့်အပိုင်းကဏ္ဍများတွင် ပါဝင်ရန်အသင့်ရှိခြင်းအားဖြင့် ဤမေတ္တာပါသောပြင်ဆင်ပေးချက်မှ အကျိုးအပြည့်အဝယူနေပါသလော။ ထို့ပြင် “ဖြောင့်မတ်သောလမ်းထဲ၌” တည်မြဲစေရန် ကျွန်ုပ်တို့ကိုထောက်ကူသည့်အကြံပေးချက်များကို ရရှိသောအခါ ကျေးဇူးတင်စွာတုံ့ပြန်ကြသလော။

သင်၏အစည်းအဝေးတက်ခြင်းကော မည်သို့နည်း

၃။ အချိန်ပြည့်ကျေးကျွန်တစ်ဦးသည် အစည်းအဝေးမှန်မှန်တက်သည့်အကျင့်ကောင်းကို မည်သို့မွေးမြူခဲ့သနည်း။

^၃ဘုရားသခင့်နိုင်ငံတော်ကြေညာသူအချို့သည် ကလေးဘဝကတည်းက အစည်းအဝေးများကို မှန်မှန်တက်ရောက်ခဲ့ကြသည်။ ယေဟောဝါသက်သေများ၏ အချိန်ပြည့်အမှုဆောင်တစ်ဦးက ဤသို့ပြောပြသည်– “၁၉၃၀ ပြည့်လွန်နှစ်များက ကျွန်မတို့ညီအစ်မတစ်တွေ ကြီးပြင်းလာနေတုန်းမှာ အစည်းအဝေးသွားကြမလားလို့ မိဘတွေကိုမေးစရာမလိုဘူး။ ကျွန်မတို့မဖျားဘူးဆိုရင် သွားကြမယ်ဆိုတာသိထားကြတယ်။ ကျွန်မတို့မိသားစုဟာ အစည်းအဝေးမတက်ဘဲမနေခဲ့ကြဘူး။” ဤညီအစ်မသည် ပရောဖက်မအန္နကဲ့သို့ပင် ယေဟောဝါ၏ဝတ်ပြုရာနေရာမှ “မခွာဘဲနေ၏။”—လုကာ ၂:၃၆၊ ၃၇။

၄-၆။ (က) ဘုရားသခင့်နိုင်ငံတော်ကြေညာသူအချို့သည် အဘယ်ကြောင့်အစည်းအဝေးများလွတ်ကြသနည်း။ (ခ) အစည်းအဝေးများကိုတက်ဖို့ အဘယ်ကြောင့်အရေးကြီးသနည်း။

^၄အသင်သည် ခရစ်ယာန်အစည်းအဝေးများကို မှန်မှန်တက်ရောက်သူတစ်ဦးအဝင်လော သို့မဟုတ် အစည်းအဝေးမမှန်သူဖြစ်လာပြီလော။ မိမိတို့အခြေအနေမဆိုးပါဟု ယူမှတ်ကြသော ခရစ်ယာန်အချို့သည် သေချာစေရန် စစ်ဆေးကြည့်မည်ဟု ဆုံးဖြတ်ခဲ့ကြသည်။ အပတ်အနည်းငယ်အတွင်း သူတို့တက်ရောက်ခဲ့သမျှအစည်းအဝေးများကို သူတို့သတိပြုရေးမှတ်ခဲ့ကြသည်။ သတ်မှတ်ထားချိန်အဆုံးတွင် သူတို့၏မှတ်တမ်းကိုပြန်စစ်ဆေးကြည့်သောအခါ သူတို့မတက်မိခဲ့သော အစည်းအဝေးအရေအတွက်ကိုကြည့်၍ အံ့အားသင့်ခဲ့ကြသည်။

^၅‘ဒါအဆန်းမဟုတ်ပါဘူး။ ကနေ့ လူတွေဟာ ဒီလောက်တောင်ဖိစီးခံနေရတော့ အစည်းအဝေးတွေမှန်ဖို့ဆိုတာ မလွယ်ဘူးပေါ့’ ဟူ၍တစ်စုံတစ်ဦးကဆိုပေမည်။ ဖိစီးမှုများပြားချိန်၌ ကျွန်ုပ်တို့အသက်ရှင်နေကြသည်မှာ တကယ့်ကိုမှန်ပါသည်။ ထိုမျှမက ဖိစီးမှုများ မုချတိုးပွားလာပါလိမ့်မည်။ (၂ တိမောသေ ၃:၁၃) သို့သော် ယင်းက အစည်းအဝေးများကိုမှန်မှန်တက်ဖို့ သာ၍အရေးကြီးစေသည်မဟုတ်ပေလော။ ကျွန်ုပ်တို့စားသုံးရန် ကျန်းခံ့သောဝိညာဉ်အစာကို မှန်မှန်မစားရလျှင် ဤအစီအစဉ်စနစ်မှ ဖိစီးမှုများကိုခံရပ်ဖို့ မမျှော်လင့်နိုင်ပါ။ မှန်မှန်ပေါင်းသင်းမှုမရှိလျှင် “ဖြောင့်မတ်သောသူတို့၏လမ်း” ကိုလုံးလုံးစွန့်ပစ်ရန် ကျွန်ုပ်တို့သွေးဆောင်ခံရနိုင်သည်။ (သု. ၄:၁၈) မှန်ပါသည်၊ ပင်ပန်းသည့်နေ့တစ်နေ့အဆုံး၌ အိမ်သို့ပြန်ရောက်သောအခါ အစည်းအဝေးတက်ဖို့ အမြဲစိတ်ပါမည်မဟုတ်။ သို့သော် ပင်ပန်းသည့်ကြားမှ အစည်းအဝေးတက်လိုက်သည့်အခါ ကျွန်ုပ်တို့ကိုယ်တိုင်အကျိုးရရှိကြပြီး ဘုရားသခင့်နိုင်ငံတော်ခန်းမ၌ ခရစ်ယာန်ချင်းများကို တိုက်တွန်းအားပေးကြသည်။

^၆အစည်းအဝေးမှန်မှန်တက်ရောက်သင့်သည့် အရေးပါသောအခြားအကြောင်းရင်းတစ်ခုကို ဟေဗြဲ ၁၀:၂၅ ကအကြံပြုထားသည်။ ထိုတွင် တမန်တော်ပေါလုက “ကာလအချိန်ရောက်လုနီးသည်ကိုထောက်သဖြင့်” အချင်းချင်းစည်းဝေးခြင်းအမှုကို “သာ၍ကြိုးစား” ပြုလုပ်ရန်ခရစ်ယာန်ချင်းများအား တိုက်တွန်းခဲ့သည်။ မှန်ပါသည်၊ ‘ယေဟောဝါ၏နေ့’ နီးကပ်လာနေကြောင်းကို ကျွန်ုပ်တို့မျက်ခြည်မပြတ်ရပါ။ (၂ ပေတရု ၃:၁၂) ဤအစီအစဉ်စနစ်၏အဆုံးသည် အလှမ်းဝေးပါသေးသည်ဟု ကျွန်ုပ်တို့ကောက်ချက်ချကြမည်ဆိုလျှင် အစည်းအဝေးတက်ခြင်းကဲ့သို့သော မလုပ်မဖြစ်သည့်ဝိညာဉ်ရေးလုပ်ဆောင်မှုများအစား ကိုယ်ရေးကိုယ်တာကိစ္စများကို ပြုလုပ်နေပေမည်။ ထိုအခါ ယေရှုသတိပေးခဲ့သကဲ့သို့ ‘ထိုနေ့ရက်သည် ကျွန်ုပ်တို့နှင့်အမှတ်တမဲ့တွေ့ကြုံလိမ့်မည်။’—လုကာ ၂၁:၃၄။

ကောင်းစွာနားထောင်သူဖြစ်ပါ

၇။ အစည်းအဝေးများတွင် ကလေးများအာရုံစူးစိုက်နားထောင်ဖို့ အဘယ်ကြောင့်အရေးကြီးသနည်း။

^၇အစည်းအဝေးများကိုတက်ရုံမျှဖြင့် မလုံလောက်ပေ။ ထိုတွင်ပြောဆိုသည့်အရာကို အာရုံစိုက်လျက် စေ့စေ့နားထောင်ရမည်။ (သု. ၇:၂၄) ကျွန်ုပ်တို့၏ကလေးများလည်း အပါအဝင်ဖြစ်သည်။ ကလေးတစ်ဦးကျောင်းသွားသည့်အခါ သင်ပေးနေသောအကြောင်းကို သူမနှစ်သက်၊ သို့မဟုတ် နားမလည်နိုင်သည့်တိုင် ဆရာကိုအာရုံစူးစိုက်နားထောင်ရ၏။ ကလေးက အာရုံစူးစိုက်နားထောင်ဖို့ကြိုးစားမည်ဆိုလျှင် ထိုသင်ခန်းစာမှအကျိုးရယူနိုင်မည်ကို ကျောင်းဆရာသိ၏။ သို့ဆိုလျှင် ကျောင်းနေအရွယ်ကလေးများကို အစည်းအဝေးစသည်နှင့် အိပ်ပျော်သွားခွင့်ပြုမည့်အစား အသင်းတော်အစည်းအဝေးများတွင် ပေးသည့်ညွှန်ကြားချက်အပေါ် အာရုံစိုက်နားထောင်စေခြင်းသည် မသင့်လျော်ပေလော။ ကျမ်းစာစောင်များ၌တွေ့ရှိရသော အဖိုးတန်အမှန်တရားတို့တွင် “ခက်ခဲသောအရာတချို့” ရှိသည်မှာမှန်၏။ (၂ ပေတရု ၃:၁၆) သို့သော် ကလေးတစ်ဦး၏သင်ယူနိုင်စွမ်းကို ကျွန်ုပ်တို့လျှော့မတွက်သင့်ပါ။ ဘုရားသခင်ထိုသို့မပြုခဲ့ချေ။ ကျမ်းစာခေတ်က ဘုရားသခင်သည် မိမိ၏ငယ်ရွယ်သောကျေးကျွန်များ ‘ကြားနာ၍ နားလည်သဖြင့် ယေဟောဝါအားကြောက်ရွံ့ကာ ဤပညတ်တရားအလုံးစုံကို စောင့်ရှောက်ဖို့’ မိန့်မှာခဲ့၏၊ ထိုအကြောင်းအချို့ကို ကလေးများနားလည်ဖို့ခက်မည်မှာ သေချာသည်။ (တရားဟောရာ ၃၁:၁၂; ဝတ်ပြုရာ ၁၈:၁-၃၀ နှိုင်းယှဉ်။) မျက်မှောက်ခေတ်ကလေးများထံမှ ယေဟောဝါလျှော့၍ မျှော်လင့်ပါသလော။

၈။ မိဘအချို့သည် အစည်းအဝေးများ၌ မိမိတို့သားသမီးများအာရုံစူးစိုက်နားထောင်နိုင်စေရန် မည်သို့ပြုလုပ်ခဲ့ကြသနည်း။

^၈အစည်းအဝေးများ၌ မိမိတို့သားသမီးများသင်ယူကြားနာရာများသည် သူတို့၏ဝိညာဉ်ရေးလိုအပ်ရာများကိုဖြည့်စွက်ပေးကြောင်း ခရစ်ယာန်မိဘများသိကြ၏။ ထို့ကြောင့် မိဘအချို့က ဘုရားသခင့်နိုင်ငံတော်ခန်းမတွင် သားသမီးများလန်းလန်းဆန်းဆန်းရှိ၍ သင်ယူစေရန်အသင့်ရှိဖို့ အစည်းအဝေးမတက်မီ တစ်မှေးအိပ်စေကြသည်။ အချို့မိဘများသည် အစည်းအဝေးညများတွင် သားသမီးများကို ရုပ်မြင်သံကြားကြည့်ခွင့် ကန့်သတ်ချက်ထားခြင်း သို့မဟုတ် ပညာရှိစွာဖြင့် တားမြစ်ခြင်းကို ကျပ်တည်းစွာပြုပေမည်။ (ဧဖက် ၅:၁၅၊ ၁၆) ဤသို့သောမိဘများသည် သားသမီးများ၏အသက်အရွယ်နှင့် စွမ်းရည်အလိုက် နားထောင်၍သင်ယူကြရန် သူတို့ကိုအားပေးလျက် အာရုံမပျံ့လွင့်စေရန် အတတ်နိုင်ဆုံးပြုလုပ်ပေးကြသည်။—သု. ၈:၃၂။

၉။ ကျွန်ုပ်တို့၏နားထောင်ခြင်းစွမ်းရည်ကို တိုးတက်စေရန် အဘယ်အရာကထောက်ကူပေးမည်နည်း။

^၉“အဘယ်သို့ကြားနာရသည်ကို သတိပြုကြလော့” ဟုယေရှုဆိုရာတွင် လူကြီးများအား ကိုယ်တော်မိန့်ဆိုနေခြင်းဖြစ်သည်။ (လုကာ ၈:၁၈) ယခုအချိန်တွင် ထိုသို့ပြုရန် အပြောလွယ်သော်လည်း ပြုလုပ်ရန်မလွယ်ကူပေ။ မှန်ပါသည်၊ စူးစိုက်နားထောင်ခြင်းသည် ခက်ခဲသောအလုပ်ဖြစ်သော်လည်း နားထောင်ခြင်းစွမ်းရည်ကို တိုးတက်စေနိုင်ပါသည်။ ကျမ်းစာဟောပြောချက်တစ်ခု သို့မဟုတ် အစည်းအဝေးအပိုင်းတစ်ပိုင်းကို သင်နားထောင်သည့်အခါ အဓိကအချက်ကိုသီးခြားရွေးထုတ်ပါ။ ဟောပြောသူ နောက်ထပ်ပြောမည့်အရာကို စောင့်မျှော်ပါ။ သင့်ခရစ်ယာန်အမှုဆောင်ခြင်းတွင်အသုံးပြုနိုင်သည့် သို့မဟုတ် သင့်ဘဝအသက်တာတွင် လက်တွေ့ကျင့်သုံးနိုင်သည့်အချက်များကို ရှာယူပါ။ ထိုအချက်များကို ဆင်ခြင်သုံးသပ်စဉ် စိတ်ထဲပြန်သုံးသပ်ဝေဖန်ကြည့်ပါ။ မှတ်ချက်တိုများယူပါ။

၁၀၊ ၁၁။ အချို့မိဘများသည် မိမိတို့သားသမီးများ သာ၍ကောင်းစွာနားထောင်သူများဖြစ်လာကြရန် မည်သို့ကူညီပေးခဲ့ပြီး အထောက်အကူပြုသည့်အဘယ်နည်းများကို သင်တွေ့ရှိခဲ့သနည်း။

^၁၀ကောင်းစွာနားထောင်သည့်အကျင့်များကို ငယ်စဉ်ကတည်းကတတ်ထားလျှင် အကောင်းဆုံးဖြစ်သည်။ အရေးအဖတ်မတတ်မီကပင် အစည်းအဝေးများ၌ “မှတ်ချက်များ” ယူရန် ကျောင်းမနေသေးသော ကလေးအချို့ကို မိဘများတိုက်တွန်းပေးကြသည်။ “ယေဟောဝါ၊” “ယေရှု” သို့မဟုတ် “ဘုရားသခင့်နိုင်ငံတော်” စသည့်ရင်းနှီးပြီးသားစကားလုံးများကို အသုံးပြုသောခါ စာရွက်တစ်ရွက်ပေါ် မှတ်သားစေသည်။ ဤနည်းဖြင့် စင်မြင့်ပေါ်မှပြောလိုက်သည့်အရာကို ကလေးများအာရုံစူးစိုက်တတ်ရန် သင်ပေးသည်။

^၁၁တစ်ခါတစ်ရံ သာ၍ကြီးသောကလေးများကိုပင် အာရုံစူးစိုက်ရန်အားပေးဖို့လိုသည်။ ခရစ်ယာန်စည်းဝေးကြီးတစ်ခုတွင် မိမိ၏ ၁၁ နှစ်အရွယ်သားဖြစ်သူမှာ စိတ်ကူးယဉ်နေကြောင်းသတိပြုမိသည့် အိမ်ထောင်ဦးစီးတစ်ဦးက လူငယ်အားကျမ်းစာတစ်အုပ်ပေးပြီး ဟောပြောသူကိုးကားသည့်ကျမ်းချက်များကို လိုက်ကြည့်စေခဲ့သည်။ မှတ်ချက်များယူနေသောဖခင်က လက်ထဲကျမ်းစာကိုင်ထားသည့်သားကို ဂရုစိုက်ကြည့်နေသည်။ ထို့နောက်တွင် သားလေးသည် စည်းဝေးကြီးအစီအစဉ်ကို သာ၍စိတ်ပါဝင်စားစွာနားထောင်လေတော့သည်။

သင့်အသံကိုကြားစေပါ

၁၂၊ ၁၃။ အသင်းတော်အလိုက်သီဆိုခြင်းတွင်ပါဝင်ရန် အဘယ်ကြောင့်အရေးကြီးသနည်း။

^၁၂ဘုရင်ဒါဝိဒ်က ဤသို့သီဆိုခဲ့သည်– “ကျေးဇူးတော်ကိုချီးမြှောက်သောအသံနှင့်မြွက်ဆို၍၊ . . . အကျွန်ုပ်သည် . . . ယဇ်ပလ္လင်တော်ကိုဝန်းရံလျက်နေပါသည်၊ ထာဝရဘုရား။” (ဆာလံ ၂၆:၆၊ ၇) ယေဟောဝါသက်သေများ၏ အစည်းအဝေးများတွင် ကျွန်ုပ်တို့၏ယုံကြည်ခြင်းကို ကျယ်လောင်စွာတင်ပြပြောဆိုရန် အကောင်းဆုံးအခွင့်အရေးရသည်။ ယင်းကိုပြုနိုင်သည့်နည်းတစ်နည်းမှာ အသင်းတော်အလိုက်သီဆိုခြင်းအားဖြင့်ဖြစ်သည်။ ဤနည်းသည် ကျွန်ုပ်တို့ဝတ်ပြုကိုးကွယ်ရေး၏ အရေးပါသောအခန်းကဏ္ဍတစ်ခုဖြစ်သော်လည်း ၎င်းကို အလွယ်တကူလျစ်လျူရှုမိနိုင်သည်။

^၁၃စာမဖတ်တတ်သေးသောကလေးအချို့သည် အပတ်စဉ်အစည်းအဝေးများ၌သီဆိုမည့် ဘုရားသခင့်နိုင်ငံတော်သီချင်းစာသားများကို အလွတ်ရထားကြသည်။ လူကြီးများနှင့်တွဲပြီး သီဆိုနိုင်သည့်အတွက် သူတို့ဝမ်းသာပီတိဖြစ်ကြသည်။ သို့သော် ကလေးများအနည်းငယ်ကြီးပြင်းလာသောအခါ ဘုရားသခင့်နိုင်ငံတော်သီချင်းများသီဆိုရာတွင် စိတ်သိပ်မပါကြတော့ပေ။ အရွယ်ရောက်သူအချို့လည်း အစည်းအဝေးများ၌သီဆိုရန် တွန့်ဆုတ်ကြသည်။ သို့ရာတွင် လယ်ကွင်းအမှုဆောင်ခြင်းသည် ဝတ်ပြုရေး၏အပိုင်းကဏ္ဍတစ်ခုဖြစ်သကဲ့သို့ သီဆိုခြင်းသည်လည်း ဝတ်ပြုရေးကဏ္ဍတစ်ခုဖြစ်၏။ (ဧဖက် ၅:၁၉) လယ်ကွင်းခရစ်ယာန်အမှုဆောင်ရာတွင် ယေဟောဝါအား အတတ်နိုင်ဆုံးချီးမွမ်းကြသည်။ ချီးမွမ်းသီချင်းများကို လှိုက်လှိုက်လှဲလှဲသီဆိုခြင်းအားဖြင့်လည်း—သာယာသည်ဖြစ်စေ မသာယာသည်ဖြစ်စေ—မိမိတို့၏အသံကိုမြှင့်၍ ကိုယ်တော်အားဂုဏ်မတင်နိုင်ပေလော။—ဟေဗြဲ ၁၃:၁၅။

၁၄။ အသင်းတော်အစည်းအဝေးများ၌ ကျွန်ုပ်တို့လေ့လာသောအကြောင်းကို အဘယ်ကြောင့် အသေအချာကြိုတင်ပြင်ဆင်သင့်သနည်း။

^၁၄ပရိသတ်ပါဝင်ဖို့လိုသည့် အစည်းအဝေးအပိုင်းကဏ္ဍများ၌ တည်ဆောက်မှုပေးသော မှတ်ချက်များပေးသည့်အခါ၌လည်း ဘုရားသခင်အားကျွန်ုပ်တို့ဂုဏ်တင်ကြသည်။ ယင်းက ပြင်ဆင်မှုလိုအပ်သည်။ ဘုရားသခင့်နှုတ်မြွက်စကားတော်မှ နက်နဲသောအကြောင်းအရာများကို ဆင်ခြင်သုံးသပ်ရန်အချိန်လိုသည်။ ကျမ်းစာကို စွဲစွဲလမ်းလမ်းလေ့လာသူတစ်ဦးဖြစ်သည့် တမန်တော်ပေါလုသည် ယင်းကိုသိရှိခဲ့သည်။ သူကဤသို့ရေးသားခဲ့သည်– “ဘုရားသခင်၏ပညာနှင့်ဉာဏ်တော်သည် အလွန်ကျယ်ဝန်းနက်နဲစွတကား။” (ရောမ ၁၁:၃၃) အိမ်ထောင်ဦးစီးတို့ ကျမ်းစာ၌ဖော်ပြထားသည့် ဘုရားသခင့်ဉာဏ်ပညာတော်ကို ရှာဖွေဆည်းပူးရန် မိသားစုဝင်တစ်ယောက်စီကိုကူညီပေးခြင်းသည် အလွန်အရေးကြီး၏။ မိသားစုကျမ်းစာသင်အံမှုပြုချိန်တွင် ခက်ခဲနက်နဲသည့်အချက်များကိုရှင်းပြရန်နှင့် အစည်းအဝေးများအတွက်ပြင်ဆင်ရန် မိသားစုကိုကူညီပေးဖို့ အချိန်အနည်းငယ်ဖယ်ထားပါ။

၁၅။ အစည်းအဝေးများတွင် ပါဝင်ဖြေဆိုရန် အဘယ်အကြံပြုချက်များက ထောက်ကူပေးနိုင်သနည်း။

^၁၅အစည်းအဝေးများတွင် ပိုမိုပါဝင်ဖြေဆိုလိုလျှင် သင်ပြောလိုသည့်အချက်ကို ကြိုတင်ပြင်ဆင်ထားပါ။ စီကာပတ်ကုံးအဖြေပေးစရာ မလိုပါ။ ခံယူချက်အပြည့်ဖြင့်ဖတ်ပြသည့် သင့်လျော်သောကျမ်းချက်တစ်ချက် သို့မဟုတ် စိတ်စေတနာအပြည့်ဖြင့် ကောင်းစွာရွေးချယ်ထားသော စကားလုံးအချို့ပြောဆိုခြင်းကို တန်ဖိုးထားကြပေမည်။ ကြေညာသူအချို့သည် မိမိတို့၏ယုံကြည်ချက်တင်ပြခွင့် လက်မလွတ်သွားဖို့ သတ်မှတ်ထားသောအပိုဒ်မှ ပထမမှတ်ချက်ကို သူတို့အတွက်သီးသန့်ဖယ်ထားပေးရန် သင်တန်းကိုင်သူကိုမှာထားကြသည်။

အတွေ့အကြုံနည်းသူ ပညာရှိဖြစ်လာ

၁၆၊ ၁၇။ အကြီးအကဲတစ်ဦးသည် ခရစ်ယာန်အမှုထမ်းတစ်ဦးကို အဘယ်အကြံပေးချက်ပေးခဲ့ပြီး ယင်းသည် အဘယ်ကြောင့်အကျိုးရှိခဲ့သနည်း။

^၁၆ယေဟောဝါသက်သေများ၏အစည်းအဝေးများတွင် ဘုရားသခင့်နှုတ်မြွက်စကားတော်ကို နေ့စဉ်ဖတ်ရှုဖို့ ကျွန်ုပ်တို့နှိုးဆော်ခံရလေ့ရှိသည်။ ထိုသို့ပြုခြင်းသည် လန်းဆန်းစေ၏။ ပညာရှိသောဆုံးဖြတ်ချက်များချရန်၊ ချွတ်ယွင်းသည့်ပင်ကိုစရိုက် အကျင့်ဓလေ့များကိုပြုပြင်ရန်၊ သွေးဆောင်မှုများကိုငြင်းပယ်ရန်နှင့် ခြေလှမ်းမှားနေလျှင် ဝိညာဉ်ရေးဟန်ချက် ပြန်ညီစေရန်လည်း ကျွန်ုပ်တို့ကိုထောက်ကူပေးသည်။—ဆာလံ ၁၉:၇။

^၁၇အတွေ့အကြုံရှိသော အသင်းတော်အကြီးအကဲများသည် ကျွန်ုပ်တို့လိုအပ်ရာနှင့်သင့်လျော်သော ကျမ်းစာအကြံပြုချက်ကိုပေးဖို့အသင့်ရှိကြသည်။ ကျွန်ုပ်တို့ပြုရမည်မှာ ကျမ်းစာအခြေပြုသည့် သူတို့၏အကြံပေးချက်ကိုတောင်းဆိုခြင်းဖြင့် “ခပ်ယူ” ဖို့သာဖြစ်သည်။ (သု. ၂၀:၅) တစ်နေ့တွင် စိတ်အားထက်သန်သော ငယ်ရွယ်သည့် ခရစ်ယာန်အမှုထမ်းတစ်ဦးက အသင်းတော်၌သာ၍အသုံးဝင်သူတစ်ဦး မည်သို့ဖြစ်လာနိုင်ကြောင်း အကြီးအကဲတစ်ဦးထံမှအကြံဉာဏ်တောင်းခဲ့သည်။ လူရွယ်ကိုကောင်းစွာသိထားသော အကြီးအကဲက သူ၏ကျမ်းစာကိုယူ၍ ခန့်အပ်ခံရသောအမျိုးသားများသည် ‘ကျိုးကြောင်းဆင်ခြင်တတ်သော’ သူဖြစ်ရမည်ဟုဖော်ပြထားသည့် ၁ တိမောသေ ၃:၃ ကိုဖွင့်လိုက်သည်။ အခြားသူများနှင့်ဆက်ဆံရာတွင် အကျိုးသင့်အကြောင်းသင့်ဖြစ်နိုင်သည့်နည်းများကို လူရွယ်အားကြင်နာစွာထောက်ပြခဲ့သည်။ ညီအစ်ကိုလေးသည် သူရရှိခဲ့သောပွင့်လင်းသည့်အကြံပေးချက်ကြောင့် မကျေမနပ်ဖြစ်ခဲ့ပါသလော။ ဝေးလေစွ! “အကြီးအကဲက သမ္မာကျမ်းစာကိုအသုံးပြုခဲ့တဲ့အတွက် ဒီအကြံပေးချက်ဟာ ယေဟောဝါထံတော်ကဖြစ်တယ်ဆိုတာ ကျွန်တော်သိတယ်” ဟုသူရှင်းပြခဲ့သည်။ ဤခရစ်ယာန်အမှုထမ်းသည် ကျေးဇူးတင်စွာဖြင့် အကြံပေးချက်ကိုလိုက်နာခဲ့ပြီး ယခုကောင်းစွာတိုးတက်လျက်ရှိ၏။

၁၈။ (က) ခရစ်ယာန်လူငယ်တစ်ဦးကို ကျောင်းတွင် သွေးဆောင်မှုများငြင်းဆန်ရန် အဘယ်အရာက ကူညီပေးခဲ့သနည်း။ (ခ) သွေးဆောင်မှုများကြုံရသောအခါ အဘယ်ကျမ်းချက်များကို သင်သတိရသနည်း။

^၁၈ဘုရားသခင့်နှုတ်မြွက်စကားတော်သည် ‘လူပျိုတို့၏တပ်မက်ခြင်းစိတ်ကို ကြဉ်ရှောင်’ ရန်လည်း လူငယ်များကိုထောက်ကူပေးနိုင်သည်။ (၂ တိမောသေ ၂:၂၂) မကြာသေးမီက အထက်တန်းကျောင်းအောင်မြင်ခဲ့သည့် ယေဟောဝါသက်သေလူငယ်တစ်ဦးသည် ကျောင်းနေစဉ်နှစ်များတစ်လျှောက် အချို့သောကျမ်းချက်များကိုဆင်ခြင်၍ လက်တွေ့ကျင့်သုံးခြင်းဖြင့် သွေးဆောင်မှုများကိုတွန်းလှန်နိုင်ခဲ့သည်။ နယပုံပြင် ၁၃:၂၀ ၌မှတ်တမ်းတင်ထားသော ဤအကြံပေးချက်ကို သူသတိရလေ့ရှိသည်– “ပညာရှိတို့နှင့်ပေါင်းဖော်သောသူသည် ပညာရှိတတ်၏။” ယင်းနှင့်အညီ ကျမ်းစာမူများကို အလွန်လေးစားသူများနှင့်သာမိတ်ဖွဲ့ရန် သူသတိပြုခဲ့သည်။ သူကဤသို့ဆင်ခြင်ခဲ့သည်– “ငါလည်း သူများတွေလိုပဲ။ မကောင်းတဲ့သူတွေနဲ့ပေါင်းမိရင် ငါ့သူငယ်ချင်းတွေအကြိုက်ကို လိုက်ချင်ပြီး အခက်အခဲတွေ့မှာပဲ။” ၂ တိမောသေ ၁:၈ တွင်မှတ်တမ်းတင်ထားသော ပေါလု၏အကြံပေးချက်ကလည်း သူ့ကိုထောက်ကူပေးခဲ့၏။ ပေါလုကဤသို့ရေးသားခဲ့သည်– “ငါတို့အရှင်ဘုရား၏ သက်သေခံချက်ကြောင့် . . . ရှက်ကြောက်ခြင်းမရှိနှင့်။ . . . ဝမ်းမြောက်ဖွယ်သတင်းတရားနှင့်ဆက်ဆံ၍ ဆင်းရဲ . . . ကိုခံလော့။” ထိုအကြံပေးချက်နှင့်အညီ သူ၏ကျမ်းစာအခြေပြုယုံကြည်ချက်များကို အခွင့်အရေးရတိုင်း ကျောင်းနေဖက်များအား ရဲရဲဝံ့ဝံ့ပြောဆိုခဲ့သည်။ အတန်းရှေ့နှုတ်တိုက်တင်ပြပြောဆိုဖို့တာဝန်ကျသည့်အခါတိုင်း ဘုရားသခင့်နိုင်ငံတော်နှင့်ပတ်သက်၍ ပါးနပ်စွာသက်သေခံနိုင်ဖို့ ပြောဆိုစရာအကြောင်းကို သူရွေးချယ်ခဲ့သည်။

၁၉။ လူငယ်တစ်ဦးသည် ဤလောက၏ဖိအားပေးမှုကို အဘယ်ကြောင့်မတွန်းလှန်နိုင်ခဲ့သနည်း၊ သို့သော် အဘယ်အရာက သူ့ကိုဝိညာဉ်ခွန်အားရစေခဲ့သနည်း။

^၁၉“ဖြောင့်မတ်သောသူတို့၏လမ်း” မှကျွန်ုပ်တို့လမ်းလွဲသွားခဲ့မည်ဆိုလျှင် ဘုရားသခင့်နှုတ်မြွက်စကားတော်က ကျွန်ုပ်တို့၏ခြေလှမ်းကိုတည့်မတ်ဖို့ ကူညီပေးနိုင်သည်။ (သု. ၄:၁၈) ယင်းကို အာဖရိကရှိလူငယ်တစ်ဦး ကိုယ်တွေ့သိရှိခဲ့သည်။ ယေဟောဝါသက်သေတစ်ဦးက သူ့ထံလည်ပတ်လာသောအခါ ကျမ်းစာသင်အံမှုကို သူလက်ခံခဲ့သည်။ လေ့လာနေသောအရာကို သူနှစ်သက်သော်လည်း မကြာမီ ကျောင်းမှမကောင်းသောအပေါင်းအသင်းများနှင့်ပေါင်းမိလေသည်။ အတန်ကြာသော် အကျင့်ယိုယွင်းသည့်ဘဝပုံစံထဲ မျောပါသွားလေတော့သည်။ “ကျွန်တော်ရဲ့ကိုယ်ကိုကိုယ်သိသောစိတ်က အနှောင့်အယှက်ပေးနေတာနဲ့ အစည်းအဝေးတက်တာကို ရပ်လိုက်ရတယ်” ဟုသူဝန်ခံသည်။ နောက်ပိုင်းတွင် အစည်းအဝေးများကို ပြန်စတက်လေသည်။ လူငယ်ကဤသို့ဖွင့်ဟပြောဆိုခဲ့သည်– “ဒါတွေဖြစ်ခဲ့ရတဲ့အဓိကအကြောင်းရင်းကတော့ ဝိညာဉ်ရေးအရ ကျွန်တော်ငတ်မွတ်ခဲ့လို့ပဲ ဆိုတာရိပ်မိတယ်။ ကျွန်တော့်မှာ ကိုယ်ပိုင်လေ့လာမှုလုံးဝမရှိဘူး။ ဒါကြောင့်မို့လို့ သွေးဆောင်မှုကို ကျွန်တော်မငြင်းဆန်နိုင်ခဲ့တာ။ ဒါနဲ့ ကင်းမျှော်စင်နဲ့ နိုးလော့!ကိုစဖတ်တယ်။ တဖြည်းဖြည်းနဲ့ ဝိညာဉ်ခွန်အားပြန်ရလာပြီး ကျွန်တော့်ဘဝကို သန့်စင်စေခဲ့တယ်။ အဲဒါက ကျွန်တော်ပြောင်းလဲသွားတာကို သတိထားမိသူတွေအတွက် သက်သေခံချက်ကောင်းတစ်ခုဖြစ်ခဲ့တယ်။ ကျွန်တော်နှစ်ခြင်းခံခဲ့ပြီး အခုပျော်ရွှင်နေပါပြီ။” သူ၏သွေးသားအားနည်းမှုကို ကျော်လွှားနိုင်ရန် အဘယ်အရာက ဤလူငယ်ကိုခွန်အားပေးခဲ့သနည်း။ ကိုယ်ပိုင်ကျမ်းစာလေ့လာမှုကို မှန်မှန်ပြုလုပ်ခြင်းဖြင့် သူ၏ဝိညာဉ်ခွန်အားကို ပြန်ရရှိခဲ့သည်။

၂၀။ လူငယ်တစ်ဦးသည် စာတန်၏တိုက်ခိုက်မှုကို မည်သို့တွန်းလှန်နိုင်သနည်း။

^၂၀ခရစ်ယာန်လူငယ်တို့၊ ယနေ့ သင်တို့တိုက်ခိုက်ခံနေရကြပြီ! စာတန်၏လျှပ်တစ်ပြက်တိုက်ခိုက်မှုကို သင်တွန်းလှန်နိုင်ရန် ဝိညာဉ်အစာကိုမှန်မှန်စားသုံးရပေမည်။ လူငယ်တစ်ဦးဖြစ်ကြောင်းထင်ရှားသည့် ဆာလံဆရာကိုယ်တိုင် ယင်းကိုနားလည်ခဲ့သည်။ ‘လူပျိုသည်မိမိသွားသောလမ်းကို သန့်ရှင်းစေ’ နိုင်ဖို့ ကိုယ်တော်၏နှုတ်မြွက်စကားတော်ကိုပေးထားသည့်အတွက် ယေဟောဝါအား သူကျေးဇူးတင်ခဲ့သည်။—ဆာလံ ၁၁၉:၉။

ဘုရားသခင်ဦးဆောင်သည့် မည်သည့်နေရာသို့မဆို ကျွန်ုပ်တို့လိုက်ကြမည်

၂၁၊ ၂၂။ အမှန်တရားလမ်းသည် အလွန်ခက်ခဲသည်ဟု အဘယ်ကြောင့်ကောက်ချက်မချသင့်သနည်း။

^၂၁ယေဟောဝါသည် ဣသရေလလူမျိုးကို အီဂျစ်ပြည်မှ ကတိထားရာပြည်သို့ပို့ဆောင်ခဲ့သည်။ ကိုယ်တော်ရွေးချယ်သောလမ်းသည် လူ့အမြင်အရ မလိုအပ်ဘဲခက်ခဲကြမ်းတမ်းဟန်ရှိပေမည်။ မြေထဲပင်လယ်တစ်လျှောက်ရှိ လွယ်ကူဟန်ရှိပြီး သာ၍ဖြောင့်တန်းသည့်လမ်းကို ယေဟောဝါအသုံးပြုမည့်အစား မိမိ၏လူမျိုးတော်ကို ခက်ခဲသည့် သဲကန္တာရလမ်းမှ လမ်းပြခေါ်ဆောင်သွားခဲ့သည်။ သို့သော် အမှန်မှာ ယင်းသည် ဘုရားသခင်ဘက်မှ ကြင်နာမှုပြခြင်းဖြစ်သည်။ ပင်လယ်လမ်းသည် တိုသော်ငြားလည်း ရန်လိုသောဖိလိတ္တိလူတို့၏နယ်မြေကို ဣသရေလလူတို့ဖြတ်လျှောက်ကြရပေမည်။ အခြားတစ်လမ်းကိုရွေးခြင်းအားဖြင့် ယေဟောဝါသည် မိမိ၏လူမျိုးတော်ကို ဖိလိတ္တိလူတို့နှင့်စောစောရင်မဆိုင်စေခဲ့ပါ။

^၂၂အလားတူပင်၊ ယနေ့ ကျွန်ုပ်တို့ကိုယေဟောဝါဦးဆောင်နေသောလမ်းသည် တစ်ခါတစ်ရံခက်ခဲပုံပေါ်ပေမည်။ အပတ်စဉ်လိုလို အသင်းတော်အစည်းအဝေးများ၊ ကိုယ်ပိုင်လေ့လာမှုနှင့် လယ်ကွင်းလုပ်ငန်းစသည်တို့ပါဝင်သည့် ခရစ်ယာန်လုပ်ငန်းဆောင်တာများပြုလုပ်ရန် ဇယားအပြည့်ရှိသည်။ အခြားလမ်းများက လွယ်ကူဟန်ရှိပေမည်။ သို့သော် ဘုရားသခင့်ဦးဆောင်မှုနောက် ကျွန်ုပ်တို့လိုက်မှသာလျှင် ကျွန်ုပ်တို့ရောက်ရန် အစွမ်းကုန်ကြိုးစားနေသော ခရီးပန်းတိုင်သို့ ရောက်ရှိပါလိမ့်မည်။ ထို့ကြောင့် ယေဟောဝါထံတော်မှ အရေးကြီးသောညွှန်ကြားချက်ကို ဆက်လက်ခံယူ၍ “ဖြောင့်သောလမ်း” ပေါ်ထာဝစဉ်ရပ်တည်နေကြပါစို့။—ဆာလံ ၂၇:၁၁။

သင်ရှင်းပြနိုင်သလော

• ခရစ်ယာန်အစည်းအဝေးများကို မှန်မှန်တက်ဖို့ အဘယ်ကြောင့်အထူးလိုအပ်သနည်း။

• အစည်းအဝေးများ၌ မိမိတို့၏သားသမီးများ အာရုံစူးစိုက်နားထောင်ရန် ကူညီပေးဖို့ မိဘများအဘယ်အရာပြုလုပ်နိုင်သနည်း။

• ကောင်းစွာနားထောင်သူတစ်ဦးဖြစ်ခြင်းတွင် အဘယ်အရာပါဝင်သနည်း။

• အစည်းအဝေးများ၌ပါဝင်ဖြေဆိုရန် အဘယ်အရာကထောက်ကူပေးနိုင်သနည်း။

[လေ့လာရန်မေးခွန်းများ]

[စာမျက်နှာ ၁၆၊ ၁၇ ပါ ရုပ်ပုံ]

ခရစ်ယာန်အစည်းအဝေးများကိုတက်ခြင်းက ယေဟောဝါ၏နေ့ကို ကျွန်ုပ်တို့၏စိတ်ထဲထားရန်ထောက်ကူပေး

[စာမျက်နှာ ၁၈ ပါ ရုပ်ပုံ]

ခရစ်ယာန်အစည်းအဝေးများ၌ ယေဟောဝါအားချီးမွမ်းရန် နည်းအမျိုးမျိုးရှိ

ကင်းမျှော်စင်—လေ့လာရန် စာစောင်