ခပ်သိမ်းသောအရာကို အသစ်ပြုလုပ်ခြင်း—တင်ကူးဟောထားသည့်အတိုင်း
ခပ်သိမ်းသောအရာကို အသစ်ပြုလုပ်ခြင်း—တင်ကူးဟောထားသည့်အတိုင်း
“ပလ္လင်ပေါ်မှာ ထိုင်တော်မူသောအရှင်ကလည်း၊ ‘ငါသည် ခပ်သိမ်းသောအရာကို အသစ်ပြုလုပ်သည်’ ဟုမိန့်တော်မူ၏။ တစ်ဖန်တုံ ကိုယ်တော်က . . . ‘ဤစကားများသည် သစ္စာစကား၊ ဟုတ်မှန်သောစကားဖြစ်၏’ ဟုမိန့်တော်မူ၏။”—ဗျာဒိတ် ၂၁:၅၊ သမ္မာ။
၁၊ ၂။ လူအများသည် အနာဂတ်တွင်အဘယ်သို့ဖြစ်လာမည်ကို စဉ်းစားဖို့ အဘယ်ကြောင့်ချီတုံချတုံဖြစ်ကြသနည်း။
‘မနက်ဖြန်ဘာဖြစ်မယ်ဆိုတာ ဘယ်သူသိလဲ’ ဟုသင်ပြောဖူး သို့မဟုတ် စဉ်းစားဖူးသလော။ အနာဂတ်တွင်အဘယ်သို့ဖြစ်လာမည်ကို မှန်းဆဖို့၊ သို့မဟုတ် မကြာမီဖြစ်ပျက်လာမည့်အရာများကို မစဉ်းမစားကြိုဟောသူများကို ယုံကြည်ဖို့ လူတို့ အဘယ်ကြောင့်ချီတုံချတုံဖြစ်ကြရကြောင်း သင်နားလည်နိုင်ပါသည်။ လူသားများသည် လာမည့်လများ သို့မဟုတ် နှစ်များတွင် မည်သို့ဖြစ်ပျက်လာမည်ကို အတိအကျကြိုပြောနိုင်စွမ်း လုံးဝမရှိကြပါ။
၂ ဖော်ဘီစ် အေအက်စ်အေပီမဂ္ဂဇင်းက လထုတ်တစ်စောင်လုံးတွင် အချိန်အကြောင်း သီးသန့်ဖော်ပြခဲ့သည်။ ထိုတွင် တီဗွီအစီအစဉ်တွေ့ဆုံမေးမြန်းသူ ရောဘတ် ကရင်းဂလီကဤသို့ရေးသားခဲ့သည်– “အချိန်သည် နောက်ဆုံးတွင် ကျွန်ုပ်တို့အားလုံးကို အရှက်ရစေသည်၊ သို့သော် နိမိတ်ဖတ်သူများသည် အချိန်ကြောင့် အရှက်အရဆုံးဖြစ်ကြသည်။ အနာဂတ်ကိုမှန်းဆဖို့ကြိုးစားခြင်းသည် အစဉ်သဖြင့်နီးပါး ရှုံးနိမ့်ရသောကိစ္စဖြစ်သည်။ . . . သို့ဖြစ်လျက်ပင် အဆိုပါကျွမ်းကျင်သူများအမည်ခံသူတို့သည် နိမိတ်ဆက်ဖတ်ကြသည်။”
၃၊ ၄။ (က) အချို့သူတို့သည် ထောင်စုနှစ်သစ်နှင့်စပ်လျဉ်း၍ အဘယ်အပြုသဘောအမြင်ရှိကြသနည်း။ (ခ) အခြားသူတို့မူ အနာဂတ်နှင့်ပတ်သက်၍ အဘယ်လက်တွေ့ကျမျှော်လင့်ချက်ရှိကြသနည်း။
၃ ထောင်စုနှစ်သစ်အပေါ် ဤမျှအာရုံစိုက်နေကြသည်ကိုတွေ့ရှိရရာ အနာဂတ်အကြောင်း တွေးတောစဉ်းစားသူ ပိုများလာသည့်ပုံရှိပေမည်။ လွန်ခဲ့သောနှစ်အစပိုင်းတွင် မက္ခလီးန်စ်မဂ္ဂဇင်းကဤသို့ဆိုသည်– “၂၀၀၀ ပြည့်နှစ်သည် ကနေဒါနိုင်ငံသားအများစုအတွက် ပြက္ခဒိန်ပေါ်၌ နှစ်တစ်နှစ်မျှဖြစ်နိုင်သော်လည်း အမှန်တကယ်ပင်ဆန်းသစ်သော စတင်မှုတစ်စုံတစ်ရာနှင့် တိုက်ဆိုင်ကောင်းတိုက်ဆိုင်နိုင်ပေသည်။” ယော့ခ်တက္ကသိုလ်မှ ပါမောက္ခခရစ္စဒူးနေးက အပြုသဘောမြင်ဖို့အတွက် အကြောင်းရင်းတစ်ချက်ကို ဤသို့ဖော်ပြခဲ့သည်– “ဤထောင်စုနှစ်စတင်ခြင်းသည် အမှန်တကယ်ကြောက်မက်ဖွယ်ကောင်းခဲ့သောရာစုနှစ်နှင့် ကျွန်ုပ်တို့မစပ်ဆိုင်တော့ဟု အဓိပ္ပာယ်ရှိသည်။”
၄ ယင်းသည် ဆန္ဒအတွေးမျှသာလော။ ကနေဒါနိုင်ငံတွင် ဆန္ဒမဲထည့်ရန် တုံ့ပြန်သူများအနက် ၂၂ ရာခိုင်နှုန်းကသာ “၂၀၀၀ ပြည့်နှစ်သည် ကမ္ဘာမြေကြီးအတွက် ဆန်းသစ်သောစတင်မှုတစ်ခုကို ဆောင်ကြဉ်းပေးမည်ဟု ယုံကြည်ကြသည်။” အမှန်မှာ ထက်ဝက်နီးပါးက လာမည့်အနှစ် ၅၀ အတွင်းကမ္ဘာစစ်ဖြစ်သည့် “ကမ္ဘာ့ပဋိပက္ခနောက်တစ်ခုဖြစ်မည်ဟု မျှော်လင့်ကြသည်။” ထောင်စုနှစ်သစ်တစ်ခုသည် ကျွန်ုပ်တို့၏ပြဿနာများကိုဖယ်ရှား၍ အရာခပ်သိမ်းကိုအသစ်မပြုလုပ်ပေးနိုင်ဟု လူအများကခံယူကြကြောင်း ထင်ရှားသည်။ ဗြိတိန်တော်ဝင်အသင်း၏ ဥက္ကဋ္ဌဟောင်းဖြစ်သူ ဆာမိုက်ကယ် အာတီးယားက ဤသို့ရေးသားခဲ့သည်– “ပြောင်းလဲမှုခြေလှမ်းမြန်ဆန်ခြင်းက . . . နှစ်ဆယ့်တစ်ရာစုသည် ကျွန်ုပ်တို့၏ယဉ်ကျေးမှုတစ်ခုလုံးအတွက် အရေးပါသောစိန်ခေါ်ချက်များကို ဖြစ်ပေါ်စေပါလိမ့်မည်။ လူဦးရေတိုးပွားလာမှု၊ သယံဇာတပစ္စည်းနည်းပါးမှု၊ ပတ်ဝန်းကျင်ညစ်ညမ်းမှုနှင့် နေရာအနှံ့ဆင်းရဲနွမ်းပါးမှုစသည့် ပြဿနာများကို ကျွန်ုပ်တို့ကြုံတွေ့နေရကြပြီး အရေးပေါ်ကိစ္စတစ်ခုအဖြစ် ဖြေရှင်းဖို့သာရှိသည်။”
၅။ အနာဂတ်တွင်အဘယ်သို့ဖြစ်မည်နှင့်ပတ်သက်၍ စိတ်ချရသောအချက်အလက်ကို အဘယ်တွင်ရှာတွေ့နိုင်သနည်း။
၅ ‘လူသည် အနာဂတ်ကို ကြိုတင်မသိနိုင်သောကြောင့် အနာဂတ်ကိုလျစ်လျူရှုထားလျှင် မကောင်းပေလော’ ဟုသင်တွေးမိပေမည်။ အဖြေမှာ “ထိုသို့မပြုသင့်!” ဖြစ်သည်။ ရှေ့တွင်အဘယ်သို့ဖြစ်ပျက်မည်ကို လူတို့အတိအကျကြိုမပြောနိုင်သည်မှာမှန်သော်လည်း မည်သူမျှကြိုမပြောနိုင်ဟု မယူဆသင့်ပါ။ သို့ဖြစ်လျှင် အနာဂတ်ကို အဘယ်သူပြောနိုင်သနည်း၊ ယင်းနှင့်ပတ်သက်၍ အဘယ်ကြောင့် အပြုသဘောရှိသင့်သနည်း။ ကျေနပ်ဖွယ်ကောင်းသောအဖြေများကို သတ်သတ်မှတ်မှတ် တင်ကူးဟောကြားချက်လေးခုတွင် ရှာတွေ့နိုင်သည်။ ၎င်းတို့သည် လူအများဆုံးပိုင်ဆိုင်၍ ဖတ်ရှုကြပြီး အထင်လွဲမှားခံရဆုံးနှင့် လျစ်လျူရှုအခံရဆုံးစာအုပ်ဖြစ်သည့် သမ္မာကျမ်းစာတွင်မှတ်တမ်းတင်ထားသည်။ ကျမ်းစာကို သင်မည်သို့ပင်ယူဆပါစေ၊ ၎င်းကိုမည်မျှထိတိုင်သိကျွမ်းပါစေ ဤအခြေခံအချက်လေးချက်ကိုသုံးသပ်ကြည့်ရန် သင့်တော်ပေသည်။ ၎င်းက အလွန်တောက်ပသောအနာဂတ်ကို အမှန်ကြိုဟောထားသည်။ ထို့ထက်ကား ဤအရေးပါလှသောပရောဖက်ပြုချက်လေးခုက သင်နှင့် သင်ချစ်မြတ်နိုးသူတို့၏အနာဂတ်သည် အဘယ်သို့ဖြစ်နိုင်ကြောင်း ဖော်ပြပေးသည်။
၆၊ ၇။ ဟေရှာယသည် အဘယ်အချိန်၌ ပရောဖက်ပြုခဲ့ပြီး သူ၏တင်ကူးဟောကြားချက်များသည် အံ့ဖွယ်ကောင်းစွာ မည်သို့ပြည့်စုံခဲ့သနည်း။
၆ ပထမဆုံးအချက်ကို ဟေရှာယ အခန်းကြီး ၆၅ ၌တွေ့ရသည်။ ယင်းကိုမဖတ်မီ ဤအကြောင်းအရာကို အဘယ်အချိန်၌ရေးသားခဲ့ပြီး အဘယ်အခြေအနေမျိုး၌ရေးခဲ့ကြောင်းစသည့် အနေအထားကိုမှတ်သားလိုက်ပါ။ ဤစကားများကိုရေးသားသည့် ဘုရားသခင့်ပရောဖက်ဟေရှာယသည် ယုဒနိုင်ငံဇာတ်သိမ်းခန်းမတိုင်မီ ရာစုနှစ်တစ်ခုကျော်အချိန်၌ အသက်ရှင်နေထိုင်ခဲ့သည်။ ဇာတ်သိမ်းခန်းမှာ သစ္စာမဲ့ဂျူးများကို ယေဟောဝါ မကာကွယ်တော့ဘဲ ဗာဗုလုန်လူမျိုးအား ယေရုရှလင်မြို့ကိုဖျက်ဆီးစေ၍ မြို့သားတို့ကိုပြည်နှင်ဒဏ်ပေးချိန်၌ ဖြစ်ခဲ့သည်။ ဟေရှာယကြိုဟောကိန်းထုတ်ခဲ့ပြီး နှစ်ပေါင်းတစ်ရာကျော်ကြာပြီးနောက်တွင် ထိုသို့ဖြစ်ပျက်ခဲ့သည်။—၂ ရာဇဝင်ချုပ် ၃၆:၁၅-၂၁။
၇ ထိုပြည့်စုံချက်၏ သမိုင်းဝင်နောက်ခံအနေနှင့် ဟေရှာယသည် ဘုရားသခင့်လမ်းညွှန်မှုဖြင့် မမွေးသေးသောပါရှန်းလူမျိုးဖြစ်သူ နောက်ဆုံးတွင်ဗာဗုလုန်ကိုကျဆုံးစေခဲ့သော ကုရု၏အမည်ကိုပင် ကြိုတင်ဟောခဲ့ကြောင်းပြန်သတိရပါ။ (ဟေရှာယ ၄၅:၁) ကုရုသည် ဘီ.စီ.အီး. ၅၃၇ တွင် ဂျူးများပြည်တော်ပြန်ကြဖို့ အသင့်ပြင်ဆင်ပေးခဲ့သည်။ အံ့ဩစရာမှာ ဟေရှာယ အခန်းကြီး ၆၅ တွင်ကျွန်ုပ်တို့ဖတ်ခဲ့ရသည့်အတိုင်း ထိုပြန်လည်ထူထောင်ရေးကို ဟေရှာယကြိုဟောခဲ့သည်။ ဣသရေလလူမျိုးသည် သူတို့၏တိုင်းပြည်သို့ပြန်ရောက်သည့်အခါ ခံစားနိုင်မည့်အခြေအနေကို သူအာရုံစိုက်ဖော်ပြခဲ့သည်။
၈။ အဘယ်ပျော်ရွှင်ဖွယ်အနာဂတ်ကို ဟေရှာယကြိုပြောခဲ့ပြီး အဘယ်အသုံးအနှုန်းက အထူးစိတ်ဝင်စားဖွယ်ဖြစ်သနည်း။
၈ ဟေရှာယ ၆၅:၁၇-၁၉ တွင် ကျွန်ုပ်တို့ဤသို့ဖတ်ရသည်– “ကြည့်ရှုလော့။ မိုးကောင်းကင်သစ်နှင့်မြေကြီးသစ်ကို ငါဖန်ဆင်းမည်။ အရင်မိုးကောင်းကင်နှင့်မြေကြီးကိုမအောက်မေ့ရ။ နှလုံးမမှတ်မိရ။ ငါဖန်ဆင်းလတ္တံ့သောအရာကြောင့်၊ သင်တို့သည် အစဉ်အမြဲရွှင်လန်းဝမ်းမြောက်ကြလိမ့်မည်။ ယေရုရှလင်မြို့ကိုဝမ်းမြောက်စရာအကြောင်း၊ မြို့သားတို့ကို ရွှင်လန်းစရာအကြောင်းဖြစ်စေခြင်းငှာ ငါဖန်ဆင်း၏။ ငါသည်လည်း၊ ယေရုရှလင်မြို့ကြောင့်ဝမ်းမြောက်မည်။ ငါ၏လူတို့ကြောင့်ရွှင်လန်းမည်။ ထိုမြို့၌ ငိုကြွေးသံနှင့်အော်ဟစ်သံကိုနောက်တစ်ဖန်မကြားရ။” ဂျူးများ ဗာဗုလုန်၌နေထိုင်စဉ်ထက် အမှန်တကယ်ပင် အဆပေါင်းများစွာသာလွန်ကောင်းမွန်သော အခြေအနေများကို ဟေရှာယဖော်ပြခဲ့သည်။ ပျော်ရွှင်ဝမ်းမြောက်ခြင်းအကြောင်းကို သူကြိုဟောခဲ့သည်။ ယခု “မိုးကောင်းကင်သစ်နှင့်မြေကြီးသစ်” ဟူသောအသုံးအနှုန်းကို ကြည့်ကြစို့။ ယင်းသည် သမ္မာကျမ်းစာ၌ လေးကြိမ်ဖော်ပြထားသည့်အနက် ပထမအကြိမ်ဖြစ်ပြီး ထိုကျမ်းချက်လေးချက်သည် ကျွန်ုပ်တို့၏အနာဂတ်ကိုကြိုဟောထားသည့်အထိ တိုက်ရိုက်အကျိုးသက်ရောက်မှုရှိနိုင်ပါသည်။
၉။ ဟေရှာယ ၆၅:၁၇-၁၉ ၏ပြည့်စုံချက်တွင် ရှေးခေတ်ဂျူးများသည် မည်သို့ပါဝင်ခဲ့ကြသနည်း။
၉ ဟေရှာယ ၆၅:၁၇-၁၉ ၏ဦးဆုံးပြည့်စုံချက်သည် ဟေရှာယတိကျစွာကြိုဟောခဲ့သည့်အတိုင်း စင်ကြယ်သောဝတ်ပြုရေးကို ပြန်လည်ထူထောင်သော မိမိတို့ပြည်တော်သို့ပြန်သွားကြသည့် ရှေးဂျူးများနှင့်ပတ်သက်သည်။ (ဧဇရ ၁:၁-၄; ၃:၁-၄) မှန်ပါသည်၊ သူတို့သည် စကြဝဠာအတွင်းရှိ အခြားတစ်နေရာရာသို့မဟုတ်ဘဲ ဤကမ္ဘာဂြိုဟ်ပေါ်ရှိ ပြည်တော်သို့ပြန်သွားကြသည်ဟု သင်သဘောပေါက်ပေသည်။ ထိုသို့သဘောပေါက်ခြင်းက မိုးကောင်းကင်သစ်နှင့်မြေကြီးသစ်ဟု ဟေရှာယပြောသောအခါ သူအဘယ်အရာကိုဆိုလိုကြောင်း ကျွန်ုပ်တို့သိရှိရန်အထောက်အကူရနိုင်သည်။ နော့စ်ထရာဒမပ်စ် သို့မဟုတ် အခြားနိမိတ်ဖတ်သူလူသားများ၏ မသေချာမရေရာသော ပရောဖက်ပြုချက်များကို အချို့သူများမှန်းဆကြသကဲ့သို့ ကျွန်ုပ်တို့မှန်းဆစရာမလိုပါ။ ဟေရှာယအဘယ်အရာကိုဆိုလိုကြောင်း ကျမ်းစာကိုယ်နှိုက်က ရှင်းလင်းစွာဖော်ပြသည်။
၁၀။ ဟေရှာယကြိုဟောထားသော “မြေကြီး” သစ်ကို မည်သို့နားလည်ဖို့ဖြစ်သနည်း။
၁၀ ကျမ်းစာတွင် “မြေကြီး” ဟုဆိုတိုင်း ကျွန်ုပ်တို့၏ကမ္ဘာဂြိုဟ်ကို အစဉ်မရည်ညွှန်းပါ။ ဥပမာ၊ ဆာလံ ၉၆:၁ ကဤသို့အတိအလင်းဆိုသည်– ‘မြေကြီးအပေါင်းတို့၊ ထာဝရဘုရားအားသီချင်းဆိုကြလော့။’ ကျွန်ုပ်တို့၏ကမ္ဘာဂြိုဟ်—ကုန်းမြေနှင့်ကြီးမားကျယ်ပြောသောသမုဒ္ဒရာ—သည် သီချင်းမဆိုနိုင်ကြောင်း ကျွန်ုပ်တို့သိထားကြသည်။ လူတို့မူ သီချင်းဆိုကြသည်။ မှန်ပါသည်၊ ဆာလံ ၉၆:၁ ကမြေကြီးပေါ်ရှိလူသားတို့ကို ရည်ညွှန်းနေခြင်းဖြစ်၏။ * သို့သော် ဟေရှာယ ၆၅:၁၇ က “ကောင်းကင်သစ်” ကိုလည်းဖော်ပြသည်။ “မြေကြီး” သည် ဂျူးတို့၏ပြည်တော်ရှိ လူ့အဖွဲ့အစည်းအသစ်တစ်ခုကို ကိုယ်စားပြုလျှင် “ကောင်းကင်သစ်” ကားအဘယ်နည်း။
၁၁။ “ကောင်းကင်သစ်” ဟူသောစကားစုက အဘယ်အရာကိုဆိုလိုသနည်း။
၁၁ မက်ကလင်းတော့နှင့် စထရောင်းတို့၏ သမ္မာကျမ်းဆိုင်ရာ၊ ဘာသာတရားဆိုင်ရာနှင့် ခရစ်ယာန်သာသနာဆိုင်ရာ စာပေစွယ်စုံကျမ်းက ဤသို့ဆိုသည်– “ပရောဖက်ပြုချက်ဆိုင်ရာအဆင်းအာရုံ မြင်ကွင်းအကြောင်းဖော်ပြတိုင်း ကောင်းကင်သည် . . . အုပ်ချုပ်သည့်အာဏာစက်များ၏ အစုအစည်းတစ်ခုလုံးကိုဆိုလိုသည်၊ . . . ပကတိကောင်းကင်သည် မြေကြီးတစ်ခုလုံးကို လွှမ်းအုပ်စိုးမိုးနေသကဲ့သို့ လက်အောက်ခံများကို အပေါ်မှစိုးမိုးအုပ်ချုပ်သည့်အတွက်ဖြစ်သည်။” “ကောင်းကင်နှင့်မြေကြီး” ဟူသောပေါင်းစပ်စကားစုနှင့်စပ်လျဉ်း၍ ထိုစွယ်စုံကျမ်းက ‘ပရောဖက်ပြုချက်ဘာသာစကားတွင် ၎င်းစကားစုသည် ကွဲပြားခြားနားသော ရာထူးအဆင့်အတန်းရှိသူများ၏ . . . အခြေအနေကိုဆိုလိုသည်။ ကောင်းကင်သည် ပိုင်သအုပ်စိုးမှုဖြစ်သည်; မြေကြီးမှာမူ မြင့်မြတ်သူများ၏အုပ်ချုပ်မှုကိုခံရသည့် အုပ်ချုပ်ခံလူတန်းစားဖြစ်သည်’ ဟုရှင်းပြသည်။
၁၂။ ရှေးခေတ်ဂျူးများသည် “ကောင်းကင်သစ်နှင့်မြေကြီးသစ်” ကိုမည်သို့တွေ့ကြုံခဲ့ရကြသနည်း။
၁၂ ဂျူးတို့သည် ပြည်တော်ပြန်လာကြသည့်အခါ အစီအစဉ်စနစ်အသစ်တစ်ခုဟုခေါ်ဆိုနိုင်သောအရာကို သူတို့ရရှိခဲ့ကြသည်။ အုပ်ချုပ်ရေးအဖွဲ့အသစ်တစ်ခုရှိသည်။ ဘုရင်ဒါဝိဒ်မှဆင်းသက်လာသူ ဇေရုဗဗေလမှာ ဘုရင်ခံဖြစ်ပြီး ယောရှုမူကား ယဇ်ပုရောဟိတ်မင်းကြီးဖြစ်သည်။ (ဟဂ္ဂဲ ၁:၁၊ ၁၂; ၂:၂၁; ဇာခရိ ၆:၁၁) သူတို့က “ကောင်းကင်သစ်” ဖြစ်သည်။ အဘယ်အရာ၏အထက်၌နည်း။ “ကောင်းကင်သစ်” သည် ယေဟောဝါအားဝတ်ပြုရန် ယေရုရှလင်မြို့နှင့် ယင်း၏ဗိမာန်တော်ကို ပြန်လည်တည်ဆောက်ရန် မိမိတို့ဌာနေသို့ပြန်ရောက်ရှိနေကြသည့် သန့်စင်ထားသောလူ့အဖွဲ့အစည်း “မြေကြီးသစ်” ၏အထက်တွင်ရှိသည်။ ထို့ကြောင့် ဤသဘောမျိုးဖြင့် ထိုစဉ်ကဂျူးများနှင့်ပတ်သက်၍ ပြည့်စုံချက်တွင် “ကောင်းကင်သစ်နှင့်မြေကြီးသစ်” ရှိသည်။
၁၃၊ ၁၄။ (က) “ကောင်းကင်သစ်နှင့်မြေကြီးသစ်” ဟူသောစကားစုပါသည့် အခြားအဘယ်ကျမ်းချက်ကို စဉ်းစားသင့်သနည်း။ (ခ) ပေတရု၏ပရောဖက်ပြုချက်သည် ဤအချိန်၌ အဘယ်ကြောင့်အထူးစိတ်ဝင်စားဖွယ်ဖြစ်သနည်း။
၁၃ အဓိကအချက်ကို မလွတ်သွားစေရန်သတိပြုပါ။ ယင်းသည် ကျမ်းစာအနက်ကောက်ဖို့ကြိုးစားခြင်းမဟုတ်သကဲ့သို့ ရှေးခေတ်သမိုင်းကို လှမ်းကြည့်လိုက်ရုံမျှလည်းမဟုတ်ပါ။ “ကောင်းကင်သစ်နှင့်မြေကြီးသစ်” ဟူသောစကားစုပါသော အခြားကျမ်းချက်တစ်ခုကိုကြည့်ခြင်းဖြင့် သိနိုင်သည်။ ၎င်းကို ၂ ပေတရု အခန်းကြီး ၃ တွင်တွေ့ရမည်ဖြစ်ပြီး ကျွန်ုပ်တို့၏အနာဂတ်နှင့်ပတ်သက်သည်ကို တွေ့ရပါလိမ့်မည်။
၁၄ တမန်တော်ပေတရုသည် သူ့စာစောင်ကို ဂျူးများ မိမိတို့နေရင်းပြည်သို့ပြန်ခဲ့ပြီးနောက် အနှစ် ၅၀၀ ကျော်တွင် ရေးခဲ့၏။ ယေရှု၏တမန်တော်တစ်ပါးအနေနှင့် ပေတရုသည် ၂ ပေတရု ၃:၂ တွင်ဖော်ပြထားသော “သခင်” ခရစ်တော်၏နောက်လိုက်များထံ ရေးသားနေခြင်းဖြစ်၏။ ၂ ပေတရု ၃ အခန်းငယ် ၄ တွင်ပေတရုက ပရောဖက်ပြုချက်ကို ယခုအချိန်နှင့် တိုက်ရိုက်သက်ဆိုင်စေသည့် ယေရှု၏ ‘ရောက်ရှိခြင်းကတိတော်’ ကိုဖော်ပြသည်။ ယေရှုသည် ပထမကမ္ဘာစစ်ကတည်းက ဘုရားသခင့်ကောင်းကင်နိုင်ငံတော်ဘုရင်အဖြစ် တန်ခိုးအာဏာနှင့်ရောက်ရှိနေပြီဖြစ်ကြောင်း အထောက်အထားမြောက်မြားစွာရှိသည်။ (ဗျာဒိတ် ၆:၁-၈; ၁၁:၁၅၊ ၁၈) ဤအခန်းကြီးတွင် ပေတရုကြိုဟောခဲ့သော အခြားအရာတစ်ခုကိုထောက်၍ ယင်းသည် အထူးအဓိပ္ပာယ်ဆောင်၏။
၁၅။ “ကောင်းကင်သစ်” ဆိုင်ရာ ပေတရု၏ပရောဖက်ပြုချက်သည် မည်သို့ပြည့်စုံလျက်ရှိသနည်း။
၁၅ ၂ ပေတရု ၃:၁၃ ၌ကျွန်ုပ်တို့ဤသို့ဖတ်ရသည်– “ဖြောင့်မတ်ခြင်းတရားတည်ရာ မိုးကောင်းကင်သစ်နှင့်မြေကြီးသစ်ကို ငါတို့သည် ကတိတော်နှင့်အညီမျှော်လင့်ကြ၏။” ကောင်းကင်ပေါ်ရောက်ရှိနေသောယေရှုသည် “ကောင်းကင်သစ်” တွင်အဓိကအုပ်ချုပ်သူဖြစ်ကြောင်း အသင် သိရှိထားနှင့်ပြီဖြစ်မည်။ (လုကာ ၁:၃၂၊ ၃၃) သို့သော် အခြားကျမ်းချက်များက ကိုယ်တော်တစ်ပါးတည်းအုပ်စိုးမည်မဟုတ်ကြောင်း ဖော်ပြသည်။ တမန်တော်များနှင့် သူတို့ကဲ့သို့သောသူအချို့သည် ကောင်းကင်ဘုံ၌နေရမည်ဟု ယေရှုကတိပေးခဲ့သည်။ သူတို့ကို “ကောင်းကင်ဘုံနှင့်စပ်ဆိုင်သော ဖိတ်ခေါ်တော်မူခြင်းကျေးဇူးကိုခံရသောသူ” ဟုဟေဗြဲကျမ်းတွင် တမန်တော်ပေါလုက ဖော်ပြသည်။ ထို့ပြင် ယေရှုက ၎င်းအုပ်စုမှသူတို့သည် ကိုယ်တော်နှင့်အတူ ကောင်းကင်ပလ္လင်များပေါ်ထိုင်ရလိမ့်မည်ဟု မိန့်ဆိုခဲ့၏။ (ဟေဗြဲ ၃:၁; မဿဲ ၁၉:၂၈; လုကာ ၂၂:၂၈-၃၀; ယောဟန် ၁၄:၂၊ ၃) ဆိုလိုသည်မှာ ကောင်းကင်သစ်တွင်ပါဝင်သူများအဖြစ် ယေရှုနှင့်အတူ အခြားသူများသည် အုပ်စိုးမည်ဖြစ်သည်။ သို့ဖြစ်လျှင် ပေတရုသည် “မြေကြီးသစ်” ဟူသောစကားစုဖြင့် အဘယ်အရာကိုဆိုလိုသနည်း။
၁၆။ အဘယ် “မြေကြီးသစ်” တည်ရှိပြီးဖြစ်သနည်း။
၁၆ ရှေးခေတ်ပြည့်စုံချက်—မိမိတို့၏ပြည်တော်သို့ ဂျူးများပြန်လာခြင်း—ကဲ့သို့ ၂ ပေတရု ၃:၁၃ ၏မျက်မှောက်ခေတ်ပြည့်စုံချက်သည် ကောင်းကင်သစ်၏အုပ်ချုပ်မှုကို လက်အောက်ခံသူများနှင့်ပတ်သက်သည်။ ယနေ့ ၎င်းအုပ်ချုပ်မှုကို ဝမ်းမြောက်ဝမ်းသာလက်အောက်ခံကြသူ သန်းချီ၍တွေ့နိုင်သည်။ သူတို့သည် ယင်း၏ပညာပေးအစီအစဉ်မှ အကျိုးခံစားနေကြပြီး ကျမ်းစာ၌တွေ့ရသော ယင်း၏ပညတ်တော်များကို လိုက်နာဖို့ကြိုးစားကြသည်။ (ဟေရှာယ ၅၄:၁၃) သူတို့သည် လူမျိုးအသီးသီး၊ ဘာသာစကားအမျိုးမျိုးနှင့် အမျိုးအနွယ်ခပ်သိမ်းပါဝင်သော ကမ္ဘာချီအဖွဲ့အစည်းဖြစ်လာသည့်သဘောမျိုးဖြင့် “မြေကြီးသစ်” ၏အခြေအမြစ်ဖြစ်လာကြပြီး နန်းထိုင်ဘုရင်ယေရှုခရစ်ကို လက်အောက်ခံကာ အတူတကွအမှုထမ်းဆောင်ကြသည်။ ထူးခြားချက်မှာ အသင်လည်း ၎င်းတွင်ပါဝင်နိုင်ခြင်းပင်!—မိက္ခာ ၄:၁-၄။
၁၇၊ ၁၈။ အနာဂတ်ကိုစောင့်မျှော်ရန် ၂ ပေတရု ၃:၁၃ မှစကားများသည် အဘယ်ကြောင့်အကြောင်းရင်းရှိစေသနည်း။
၁၇ အနာဂတ်ကိုကျွန်ုပ်တို့ အသေးစိတ်ထိုးထွင်းမသိရသည့်အတွက် ဤမျှဖြင့် ကိစ္စပြီးဆုံးသွားပြီဟု မယူမှတ်ပါနှင့်။ အမှန်မှာ၊ ၂ ပေတရု အခန်းကြီး ၃ ၏ရှေ့နောက်စကားကို သင်ဆန်းစစ်ကြည့်ရာတွင် ရှေ့၌အကြီးအကျယ်ပြောင်းလဲမည်ဟုဖော်ပြသော တင်ပြချက်များကိုတွေ့ရပါလိမ့်မည်။ ၂ ပေတရု ၃ အခန်းငယ် ၅ နှင့် ၆ တွင် ပေတရုသည် ထိုအချိန်ကဆိုးသွမ်းသောလောကကို အဆုံးတိုင်စေခဲ့သည့် နောဧခေတ်ရေလွှမ်းမိုးဘေးအကြောင်း ရေးသားထားသည်။ ၂ ပေတရု ၃အခန်းငယ် ၇ တွင် ပေတရုက အုပ်ချုပ်မှုများနှင့် အုပ်ချုပ်ခံရသူလူထုများပါပါဝင်သည့် “ယခုရှိသောမိုးကောင်းကင်နှင့်မြေကြီး” သည် “တရားဆုံးဖြတ်၍ အဓမ္မလူတို့ကိုဖျက်ဆီးသောနေ့ရက်” အတွက် သီးသန့်ဖယ်ထားခံရသည်ဟု ဖော်ပြသည်။ ယင်းက “ကောင်းကင်နှင့်မြေကြီး” ဟူသောစကားစုသည် ရုပ်ပိုင်းဆိုင်ရာစကြဝဠာကိုမဟုတ်ဘဲ လူသားများနှင့် သူတို့၏အုပ်စိုးမှုများကို ရည်ညွှန်းကြောင်း အတည်ပြုသည်။
၁၈ ထို့နောက် ပေတရုက ယေဟောဝါ၏လာလတ္တံ့သောနေ့ကြီးသည် ကြီးစွာသောသန့်စင်မှုကိုဖြစ်စေပြီး ၂ ပေတရု ၃အခန်းငယ် ၁၃ ၌ဖော်ပြထားသော ကောင်းကင်သစ်နှင့်မြေကြီးသစ်အတွက် ပြင်ဆင်ပေးမည့်အကြောင်း ရှင်းပြသည်။ ထိုအခန်းငယ်၏အဆုံး—“ဖြောင့်မတ်ခြင်းတရားတည်ရာ” ပိုင်းကိုသတိပြုပါ။ ၎င်းက သာ၍ကောင်းလာဖို့ အကြီးအကျယ်ပြောင်းလဲမှုအချို့ ဖြစ်လာရမည်ဟု မဖော်ပြပေလော။ ၎င်းက အမှန်တကယ်သစ်လွင်သောအရာများ၊ ယခုအချိန်ထက် ပို၍ပျော်ရွှင်မှုရှိမည့်အချိန်တစ်ချိန်ရောက်လာမည့်မျှော်လင့်ချက်ကို တင်ပြသည်မဟုတ်ပေလော။ ၎င်းကိုသင်မြင်နိုင်သည်ဆိုလျှင် လူအနည်းငယ်သာသိရှိသော ကျမ်းစာ၌ကြိုတင်ပြောထားသည့်အရာကို သင်ထိုးထွင်းသိမြင်နေပြီ။
၁၉။ လာမည့် “ကောင်းကင်သစ်နှင့်မြေကြီးသစ်” ကို ဗျာဒိတ်ကျမ်းက အဘယ်နောက်ခံဖြင့်ဖော်ပြထားသနည်း။
၁၉ သို့သော် ဆက်၍ကြည့်ကြစို့။ “ကောင်းကင်သစ်နှင့်မြေကြီးသစ်” ဟူသောစကားစုပါသည့် ဟေရှာယ အခန်းကြီး ၆၅ နှင့် ၂ ပေတရု အခန်းကြီး ၃ ကိုကျွန်ုပ်တို့ဆန်းစစ်ခဲ့ကြပြီ။ ယခု ကျမ်းစာတွင် ၎င်းအသုံးအနှုန်းနောက်တစ်ကြိမ်ပါသည့် ဗျာဒိတ် အခန်းကြီး ၂၁ ကိုဖွင့်ပါ။ တစ်ဖန် နောက်ခံအကြောင်းကိုနားလည်ထားခြင်းက ထောက်ကူပေးပါလိမ့်မည်။ ၎င်းမတိုင်မီ အခန်းကြီးနှစ်ခု၊ ဗျာဒိတ် အခန်းကြီး ၁၉ တွင် အထိမ်းအမှတ်သင်္ကေတဖြင့် ကွက်ကွက်ကွင်းကွင်းဖော်ပြထားသော စစ်ပွဲတစ်ခုအကြောင်းဖော်ပြထားသည်ကို တွေ့ရသည်—သို့သော် ဆန့်ကျင်ဘက်နိုင်ငံနှစ်ခုအကြား ဖြစ်သည့်စစ်မဟုတ်ချေ။ စစ်ပွဲ၏တစ်ဖက်တွင်ပါဝင်သူမှာ ‘ဘုရားသခင်၏နှုတ်မြွက်စကားတော်’ ဖြစ်သည်။ ယင်းကို ယေရှုခရစ်၏ဘွဲ့နာမအဖြစ် သင်ကောင်းစွာအသိအမှတ်ပြုလက်ခံပေမည်။ (ယောဟန် ၁:၁၊ ၁၄) ကိုယ်တော်သည် ကောင်းကင်၌ရှိပြီး ဤအဆင်းအာရုံက ကိုယ်တော်နှင့်အတူ ကောင်းကင်တပ်မဟာကိုဖော်ပြသည်။ မည်သူ့ကို ဆန့်ကျင်တိုက်ခိုက်နေခြင်းဖြစ်သနည်း။ ထိုအခန်းကြီးက “ရှင်ဘုရင်” “စစ်သူရဲ” နှင့် ရာထူးအဆင့်ဆင့်ရှိ “အကြီးအငယ်အမျိုးမျိုးသောသူ” များကိုဖော်ပြထားသည်။ ဤတိုက်ပွဲသည် ဆိုးသွမ်းမှုအားလုံးကိုဖျက်ဆီးမည့် ယေဟောဝါ၏လာလတ္တံ့သောနေ့နှင့်ပတ်သက်နေသည်။ (၂ သက်သာလောနိတ် ၁:၆-၁၀) နောက်အခန်းကြီးဖြစ်သော ဗျာဒိတ် ၂၀ က “ရှေးမြွေဟောင်း၊ . . . စာတန်” ဖယ်ရှားခံရခြင်းနှင့် အစပြုဖော်ပြထားသည်။ ယင်းက ဗျာဒိတ် အခန်းကြီး ၂၁ ကိုသုံးသပ်ရန် နောက်ခံအကြောင်းကိုတင်ပြပေးသည်။
၂၀။ ရှေ့တွင် အဘယ်အရေးပါသောပြောင်းလဲမှုရှိကြောင်း ဗျာဒိတ် ၂၁:၁ ကဖော်ပြသနည်း။
၂၀ တမန်တော်ယောဟန်က စိတ်လှုပ်ရှားဖွယ်ဤစကားများဖြင့် နိဒါန်းပျိုးသည်– “ကောင်းကင်သစ်နှင့်မြေကြီးသစ်ကိုလည်း ငါမြင်၏။ အဘယ်သို့နည်းဟူမူကား၊ ရှေးကောင်းကင်နှင့်ရှေးမြေကြီးသည် ရွေ့သွားကြပြီ။” ဟေရှာယ အခန်းကြီး ၆၅ နှင့် ၂ ပေတရု အခန်းကြီး ၃ မှကျွန်ုပ်တို့သိရှိခဲ့ရသည့်အကြောင်းအပေါ်အခြေခံ၍ အသေအချာသိနိုင်သည်မှာ သမုဒ္ဒရာအပါအဝင် ပကတိကောင်းကင်နှင့် ကျွန်ုပ်တို့၏ကမ္ဘာဂြိုဟ်ကို အစားထိုးမည်ဟုမဆိုလိုကြောင်းဖြစ်သည်။ ရှေ့အခန်းကြီးများတွင် တင်ပြထားသကဲ့သို့ ဆိုးသွမ်းသူများနှင့် မျက်မြင်မရအုပ်စိုးသူ စာတန်အပါအဝင် သူတို့၏အစိုးရများသည် ဖယ်ရှားခံရပါလိမ့်မည်။ မှန်ပါသည်၊ ဤတွင်ကတိပြုထားသည်မှာ မြေကြီးပေါ်ရှိလူသားများနှင့်ပတ်သက်သည့် အစီအစဉ်စနစ်အသစ်တစ်ခုဖြစ်သည်။
၂၁၊ ၂၂။ ယောဟန်သည် အဘယ်ကောင်းချီးများရမည်ဟု ကျွန်ုပ်တို့ကိုစိတ်ချစေသနည်း၊ မျက်ရည်သုတ်ခြင်းက အဘယ်အရာကိုဆိုလိုသနည်း။
၂၁ ဤအံ့ဖွယ်ပရောဖက်ပြုချက်ကို ရှေ့ဆက်ကြည့်သောအခါ ယင်းကိုယုံကြည်စိတ်ချနိုင်သည်။ ဗျာဒိတ် ၂၁ အခန်းငယ် ၃ အဆုံးပိုင်းက ဘုရားသခင်သည် လူတို့နှင့်အတူရှိ၍ မိမိ၏အလိုတော်ကိုဆောင်သူများအပေါ် ကိုယ်တော်အာရုံစိုက်မည့်အချိန်အကြောင်း ပြောပြသည်။ (ယေဇကျေလ ၄၃:၇) ဗျာဒိတ် ၂၁ အခန်းငယ် ၄၊ ၅ [သမ္မာ] တွင် ယောဟန်ကဤသို့ဆက်ပြောသည်– “ဘုရားသခင် [ယေဟောဝါ] သည် သူတို့၏မျက်စိ၌မျက်ရည်ရှိသမျှကို သုတ်တော်မူမည်။ နောက်တစ်ဖန် သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ နာကျင်ခြင်းလည်းမရှိရ။ ရှေးဖြစ်ဖူးသောအရာများသည် ရွေ့သွားကြပြီ။ ပလ္လင်ပေါ်မှာထိုင်တော်မူသောသူကလည်း၊ ‘ငါသည် ခပ်သိမ်းသောအရာကိုအသစ်ပြုလုပ်သည်’ ဟု မိန့်တော်မူ၏။ တစ်ဖန်တုံ ကိုယ်တော်က၊ ‘ရေးထားလော့။ အကြောင်းမူကား၊ ဤစကားများသည် သစ္စာစကား၊ ဟုတ်မှန်သောစကားဖြစ်၏’” ဟုမိန့်တော်မူ၏။ စိတ်ဓာတ်မြှင့်တင်ပေးသည့် ပရောဖက်ပြုချက်ပါတကား!
၂၂ သမ္မာကျမ်းစာကြိုပြောသည့်အရာကို ခေတ္တခံစားကြည့်ပါလေ။ “ဘုရားသခင်သည် သူတို့၏မျက်စိ၌မျက်ရည်ရှိသမျှကို သုတ်တော်မူမည်။” ယင်းက အာရုံခံလွယ်လွန်းသော ကျွန်ုပ်တို့၏မျက်စိကိုဆေးကြောပေးသည့် သာမန်မျက်ရည်ကိုလည်းကောင်း၊ ဝမ်းသာ၍ကျသောမျက်ရည်ကိုလည်းကောင်း ရည်ညွှန်းခြင်းမဖြစ်နိုင်ပါ။ ဘုရားသခင်သုတ်တော်မူမည့်မျက်ရည်များမှာ ဆင်းရဲခြင်း၊ ဝမ်းနည်းပူဆွေးခြင်း၊ စိတ်ဓာတ်ကျခြင်း၊ နာကျင်ခြင်းနှင့် ပြင်ထန်းသောဝေဒနာကြောင့် ကျသောမျက်ရည်များဖြစ်သည်။ မည်သို့သေချာနိုင်သနည်း။ ဘုရားသခင်၏ဤထူးခြားသည့်ကတိတော်သည် မျက်ရည်သုတ်ပေးခြင်းနှင့် ‘သေခြင်း၊ စိတ်မသာညည်းတွားခြင်း၊ အော်ဟစ်ခြင်း၊ နာကျင်ခြင်းမရှိရ’ နှင့်ဆက်စပ်ထားသည်။—ယောဟန် ၁၁:၃၅။
၂၃။ ယောဟန်၏ပရောဖက်ပြုချက်က အဘယ်အခြေအနေ၏အဆုံးကို အာမခံထားသနည်း။
၂၃ ယင်းက ကင်ဆာ၊ လေဖြတ်ခြင်း၊ နှလုံးရောဂါနှင့် သေခြင်းပင်ဖယ်ရှားခံရပြီဟု ဆိုလိုနေခြင်းမဟုတ်ပေလော။ ရောဂါတစ်မျိုးမျိုး၊ မတော်တဆမှု သို့မဟုတ် ရုတ်တရက်ကျရောက်သောဘေးကြောင့် ချစ်မြတ်နိုးရသူတစ်ဦးကို မဆုံးရှုံးခဲ့ရဖူးသူ မည်သူရှိသနည်း။ ဤတွင် ဘုရားသခင်က သေခြင်းရှိတော့မည်မဟုတ်ဟု ကတိပေးထားရာ ထိုအချိန်၌မွေးဖွားကောင်းမွေးဖွားလာမည့် ကလေးငယ်သည် လူကြီးဖြစ်လာပြီးနောက်မှ ဇရာထောင်း၍ သေခြင်း၌အဆုံးသတ်ရမည့် အလားအလာရှိမည်မဟုတ်ကြောင်း သိစေသည်။ ထို့ပြင် ဤပရောဖက်ပြုချက်က မှတ်ဉာဏ်ချို့ယွင်းသောရောဂါ၊ အရိုးပွရောဂါ၊ သားအိမ်အကျိတ်ရောဂါ၊ မျက်တွင်းဖိအားလွန်ရောဂါ သို့မဟုတ် အသက်ကြီးသူများ၌အဖြစ်များသော အတွင်းတိမ်တို့ပင်ရှိတော့မည်မဟုတ်ဟုဆိုလိုသည်။
၂၄။ ‘ကောင်းကင်နှင့်မြေကြီးသစ်’ သည် ကောင်းချီးတစ်ရပ်ဖြစ်ကြောင်း မည်သို့သက်သေထူမည်နည်း၊ အဘယ်အရာကို ကျွန်ုပ်တို့သုံးသပ်ကြဦးမည်နည်း။
၂၄ သေခြင်း၊ အိုမင်းခြင်းနှင့် ရောဂါများကိုဖယ်ရှားပစ်ခြင်းနှင့်အတူ စိတ်မသာညည်းတွားခြင်းနှင့် အော်ဟစ်ခြင်းလျော့နည်းသွားမည်ကို သင်လုံးဝသဘောတူပေမည်။ သို့သော် ဆင်းရဲလွန်းခြင်း၊ ကလေးကိုမတော်မတရားပြုမှုနှင့် ဘဝနောက်ခံ သို့မဟုတ် အသားအရောင်ကြောင့် ဖိနှိပ်ချုပ်ချယ်ခွဲခြားဆက်ဆံမှုတို့နှင့်ပတ်သက်၍ကော။ ယနေ့မြင်တွေ့နေကျဖြစ်သည့် ဤအရာများဆက်ရှိနေသ၍ စိတ်မသာညည်းတွားခြင်းနှင့် အော်ဟစ်ခြင်းမှ ကျွန်ုပ်တို့ကင်းလွတ်မည်မဟုတ်။ ထို့ကြောင့် “ကောင်းကင်သစ်နှင့်မြေကြီးသစ်” အောက်တွင် ဘဝအသက်တာသည် ဝမ်းနည်းမှုဖြစ်စေသော လက်ရှိအကြောင်းအရာများရှိတော့မည်မဟုတ်ပါ။ တကယ့်ပြောင်းလဲမှုကြီးပါတကား! သို့သော် သမ္မာကျမ်းစာ၌ “ကောင်းကင်သစ်နှင့်မြေကြီးသစ်” ဟူသောစကားစုပါသည့် လေးကြိမ်အနက် သုံးခုကိုသာ ကျွန်ုပ်တို့သုံးသပ်ခဲ့ကြပြီ။ ကျွန်ုပ်တို့စစ်ဆေးခဲ့သည့်အရာနှင့် ဆက်စပ်၍ ‘အရာခပ်သိမ်းကိုအသစ်ပြုလုပ်’ ဖို့ ဘုရားသခင်၏ကတိတော်ကို ကိုယ်တော်အဘယ်အချိန်တွင် အဘယ်နည်းဖြင့်ပြည့်စုံစေမည်ကို အဘယ်ကြောင့်စောင့်မျှော်စရာအကြောင်းရှိကြောင်း လေးနက်စေသော ကျမ်းချက်တစ်ခုရှိသေးသည်။ နောက်ဆောင်းပါးက ထိုပရောဖက်ပြုချက်အကြောင်းဖြစ်ပြီး ယင်းသည် ကျွန်ုပ်တို့၏ပျော်ရွှင်မှုအတွက် အဘယ်အဓိပ္ပာယ်ရှိကြောင်းဖော်ပြသည်။
[အောက်ခြေမှတ်ချက်များ]
^ အပိုဒ်၊ 10 အင်္ဂလိပ်ကျမ်းစာသစ်က ဆာလံ ၉၆:၁ ကို “မြေကြီးသားအပေါင်းတို့ သခင်ဘုရားအား သီချင်းဆိုကြလော့” ဟုပြန်ဆိုထားသည်။ ခေတ်ပြိုင်အင်္ဂလိပ်ဘာသာပြန်ကျမ်း၌ “ဤမြေကြီးပေါ်တွင်ရှိသူတိုင်း သခင်ဘုရားအား ချီးမွမ်းသီချင်းဆိုကြလော့” ဟုဖတ်ရမည်။ ယင်းက “မြေကြီးသစ်” ဟုဟေရှာယရည်ညွှန်းရာတွင် မိမိတို့၏ပြည်တော်သို့ပြန်ရောက်နေသော ဘုရားသခင့်လူမျိုးတော်ကို သူရည်ညွှန်းနေခြင်းဖြစ်သည်ဟူသည့် နားလည်သဘောပေါက်မှုနှင့် ကိုက်ညီသည်။
သင်အဘယ်အရာမှတ်မိသနည်း
• “ကောင်းကင်သစ်နှင့်မြေကြီးသစ်” ကိုသမ္မာကျမ်းစာကြိုတင်ဟောသည့် နေရာသုံးနေရာကား အဘယ်နည်း။
• “ကောင်းကင်သစ်နှင့်မြေကြီးသစ်” ၏ပြည့်စုံချက်တွင် ရှေးခေတ်ဂျူးများသည် မည်သို့ပါဝင်ခဲ့ကြသနည်း။
• ပေတရုဖော်ပြခဲ့သည့်အတိုင်း “ကောင်းကင်သစ်နှင့်မြေကြီးသစ်” နှင့်ပတ်သက်၍ အဘယ်ပြည့်စုံချက်များရှိမည်ဟုနားလည်ရသနည်း။
• ဗျာဒိတ်ကျမ်း အခန်းကြီး ၂၁ က အဘယ်တောက်ပသောအနာဂတ်ကို ညွှန်ပြသနည်း။
[လေ့လာရန်မေးခွန်းများ]
[စာမျက်နှာ ၁၀ ပါ ရုပ်ပုံ]
ယေဟောဝါ ကြိုတင်ဟောခဲ့သည့်အတိုင်း ဘီ.စီ.အီး. ၅၃၇ တွင် ဂျူးများ ပြည်တော်ပြန်လာကြရန် ကုရုအကြောင်းဖန်ပေးခဲ့