သင်မှတ်မိသလော
သင်မှတ်မိသလော
မကြာသေးမီကထုတ်ဝေခဲ့သော ကင်းမျှော်စင် စာစောင်များကို ဖတ်ရှုရ၍ တန်ဖိုးထားလေးမြတ်ခဲ့ပါသလော။ သို့ဖြစ်လျှင် အောက်ပါမေးခွန်းများကို သင်ဖြေဆိုနိုင်၊ မဖြေဆိုနိုင် စမ်းကြည့်ပါ–
• ကိုရီးယားတွင် ခရစ္စမတ်ကို လက်ခံလာရန် အဘယ်အရာက လွယ်ကူစေခဲ့သနည်း။
ကိုရီးယားနှင့်အခြားနိုင်ငံအချို့တွင် ဒီဇင်ဘာလ၌ မီးခိုးခေါင်းတိုင်မှဆင်းလာပြီး လက်ဆောင်များ ယူလာသော မီးဖိုချောင်ဘုရားဟူ၍ ရှေးယုံကြည်ချက်တစ်ခုရှိခဲ့သည်။ ထို့ပြင် ဒုတိယကမ္ဘာစစ်ပြီးနောက် ယူ.အက်စ်. တပ်သားများသည် ဒေသခံချာ့ခ်ျများတွင် လက်ဆောင်များနှင့်ထောက်ပံ့ပစ္စည်းများကို ဝေငှပေးခဲ့ကြသည်။—၁၂/၁၅၊ စာမျက်နှာ ၄၊ ၅။
• ဟေရှာယ ၂၁:၈ ၏ပြည့်စုံချက်အနေနှင့် ကျွန်ုပ်တို့ခေတ်တွင် အဘယ် “ကင်းစောင့်” ကိုဘုရားသခင်ခန့်အပ်ထားသနည်း။
ကင်းစောင့်အတန်းအစားအဖြစ် အမှုထမ်းဆောင်လျက်ရှိသော ဝိညာဉ်တော်ဘိသိက်ခံခရစ်ယာန်များသည် ကျမ်းစာပရောဖက်ပြုချက်ကို ပြည့်စုံစေသော ကမ္ဘာ့ဖြစ်ရပ်များ၏အဓိပ္ပာယ်ကို လူတို့အား သတိပြုစေခဲ့ကြပြီ။ ထို့ပြင် သူတို့သည် ကျမ်းစာကျောင်းသားများကို ကျမ်းစာနှင့်မညီညွတ်သော အယူဝါဒများနှင့်အကျင့်အကြံများကို ခွဲခြားသိမြင်ပြီးရှောင်ရှားနိုင်ရန်လည်း ကူညီပေးခဲ့ကြပြီ။—၁/၁၊ စာမျက်နှာ ၈၊ ၉။
• “ပိုလန်ညီအစ်ကိုများ” ကားမည်သူတို့နည်း။
သူတို့သည် သမ္မာကျမ်းစာကို လက်ခံနာယူရန်အားပေးသည့်အပြင် သုံးပါးပေါင်းတစ်ဆူ၊ နို့စို့ကလေးကိုနှစ်ခြင်းပေးခြင်းနှင့် မီးငရဲအစရှိသော ရေပန်းစားနေသည့် ချာ့ခ်ျအယူဝါဒများကို ငြင်းပယ်ခဲ့ကြသည့် ၁၆ ရာစုနှင့် ၁၇ ရာစုနှစ်က ပိုလန်နိုင်ငံမှ ဘာသာရေးအဖွဲ့ငယ်တစ်ခုဖြစ်သည်။ အတန်ကြာသော် သူတို့သည် ပြင်းထန်စွာနှိပ်စက်ညှဉ်းပန်းခံခဲ့ကြရပြီး အခြားနိုင်ငံများသို့ ကွဲလွင့်သွားခဲ့သည်။—၁/၁၊ စာမျက်နှာ ၂၁-၃ [လိပ်]။
• ကျမ်းစာပရောဖက်ပြုချက်များကို အနာဂတ်ဗေဒင်ဆရာများ သို့မဟုတ် နက္ခတ်ဗေဒပညာရှင်များ၏ ဟောကိန်းများထက် အဘယ်ကြောင့် ယုံကြည်စိတ်ချနိုင်သနည်း။
ပရောဖက်ဟုဆိုသူများသည် ယေဟောဝါနှင့် သမ္မာကျမ်းစာကို လျစ်လျူရှုကြသောကြောင့် သူတို့ကို ယုံကြည်စိတ်ချ၍မရချေ။ ကျမ်းစာပရောဖက်ပြုချက်များသာလျှင် အဖြစ်အပျက်များသည် ဘုရားသခင့်ရည်ရွယ်ချက်နှင့် မည်သို့သက်ဆိုင်ပြီး သင်နှင့်သင့်မိသားစုတို့အတွက် တာရှည်အကျိုးပြုနိုင်သည်ကို သိရှိစေသည်။—၁/၁၅၊ စာမျက်နှာ ၃။
• နောက်ဆုံးနေ့ရက်များတွင် ကျွန်ုပ်တို့အသက်ရှင်နေကြရကြောင်းတင်ပြသည့် သာဓကအချို့ကားအဘယ်နည်း။
စာတန်ကို ကောင်းကင်မှနှင်ချခြင်း၏ အကျိုးဆက်များကို ကျွန်ုပ်တို့တွေ့မြင်နိုင်သည်။ (ဗျာဒိတ် ၁၂:၉) ဗျာဒိတ် ၁၇:၉-၁၁ တွင်ဖော်ပြထားသော နောက်ဆုံး “ဘုရင်” ၏အချိန်တွင် ကျွန်ုပ်တို့အသက်ရှင်နေကြရသည်။ ဘိသိက်ခံခရစ်ယာန်စစ်များ၏အရေအတွက်သည် လျော့နည်းလာသော်လည်း ကြီးစွာသောဆင်းရဲခြင်းစတင်သည့်အခါ မြေကြီးပေါ်တွင် သူတို့ထဲမှအချို့ရှိနေမည့်ပုံရှိသည်။—၁/၁၅၊ စာမျက်နှာ ၁၂၊ ၁၃။
• ဟဗက္ကုတ်ကျမ်းကို အဘယ်အချိန်ကရေးခဲ့ပြီး ယင်းကို ကျွန်ုပ်တို့အဘယ်ကြောင့်စိတ်ဝင်စားသင့်သနည်း။
ဤကျမ်းစာစောင်ကို ဘီ.စီ.အီး. ၆၂၈ ခုနှစ်ခန့်က ရေးခဲ့သည်။ ၎င်းတွင် ရှေးယုဒနှင့်ဗာဗုလုန်တို့အပေါ် ယေဟောဝါ၏တရားစီရင်ခြင်းအကြောင်းပါရှိသည်။ ထို့ပြင် . . . မကြာမီရောက်ရှိလာတော့မည့် ဘုရားသခင့်တရားစီရင်ခြင်းအကြောင်းလည်း ရေးထားသည်။—၂/၁၊ စာမျက်နှာ ၉။
• အရည်အချင်းပြည့်စုံသောဇနီးများအတွက် မိခင်တစ်ဦး၏ပညာရှိဆုံးမစကားကို သမ္မာကျမ်းစာ၏အဘယ်နေရာတွင် တွေ့ရှိနိုင်သနည်း။
နယပုံပြင်ကျမ်း၏ နောက်ဆုံးအခန်းကြီး ၃၁ တွင်အလွန်ကောင်းသောဆုံးမစကားပါရှိသည်။—၂/၁၊ စာမျက်နှာ ၃၀၊ ၃၁။
• ယေဟောဝါသည် ကျွန်ုပ်တို့ကို “ခရစ်တော်၏စိတ်” ဖော်ပြပေးခဲ့သည့်အတွက် အဘယ်ကြောင့်ကျေးဇူးတင်နိုင်သနည်း။ (၁ ကောရိန္သု ၂:၁၆)
ခရစ်ဝင်ကျမ်းမှတ်တမ်းအားဖြင့် ယေရှု၏အတွေးအခေါ်များ၊ ခံစားချက်များ၊ လုပ်ဆောင်မှုများနှင့် ဦးစားပေးမှုများကို ယေဟောဝါအသိပေးခဲ့ပြီ။ ၎င်းသည် အထူးသဖြင့် အသက်ကယ်ဆယ်ခြင်းနှင့်ဆိုင်သော ဟောပြောခြင်းလုပ်ငန်းကို အလေးထားရာ၌ ယေရှုနှင့်ပိုတူရန် ကူညီပေးနိုင်၏။—၂/၁၅၊ စာမျက်နှာ ၂၅။
• ယနေ့ ဘုရားသခင်သည် ဆုတောင်းချက်များကို ဖြေကြားပေးသလော။
ဖြေကြားပေးပါသည်။ ဘုရားသခင်သည် ဆုတောင်းချက်တိုင်းကို မဖြေကြားပေးဟု သမ္မာကျမ်းစာက ဖော်ပြသော်လည်း အိမ်ထောင်ရေးပြဿနာများကဲ့သို့သော ကိစ္စရပ်များ၌ နှစ်သိမ့်မှုနှင့်အကူအညီတောင်းဆိုသူများကို ကိုယ်တော်နားညောင်းခဲ့ကြောင်း မျက်မှောက်ခေတ် တွေ့ ကြုံမှုများက သက်သေထူသည်။—၃/၁၊ စာမျက်နှာ ၃-၇။
• ဘုရားသခင်၏ခွန်အားကို ကျွန်ုပ်တို့ မည်သို့ရယူနိုင်သနည်း။
၎င်းအတွက် ဆုတောင်းနိုင်ပြီး သမ္မာကျမ်းစာမှ ဝိညာဉ်ရေးခွန်အားရယူနိုင်သည့်အပြင် ခရစ်ယာန်ပေါင်းသင်းမှုအားဖြင့်လည်း ခွန်အားရှိနိုင်ပါသည်။—၃/၁၊ စာမျက်နှာ ၁၅၊ ၁၆။
• မိဘများသည် ခရစ်ယာန်အစည်းအဝေးများမှ ပို၍အကျိုးရရှိရန် သူတို့၏ကလေးများကို မည်သို့ကူညီပေးနိုင်သနည်း။
သူတို့၏ကလေးများကို ကြိုတင်၍ တစ်မှေးအိပ်စေခြင်းဖြင့် လန်းဆန်းနေစေရန် ကူညီပေးနိုင်သည်။ ရင်းနှီးပြီးသားစကားလုံးများ သို့မဟုတ် နာမည်များကိုကြားသည့်အခါတိုင်း စာရွက်တစ်ရွက်ပေါ်တွင် ရေးမှတ်စေခြင်းဖြင့် “မှတ်ချက်များ” ယူစေရန် ကလေးများကိုအားပေးနိုင်သည်။—၃/၁၅၊ စာမျက်နှာ ၁၇၊ ၁၈။
• ယောဘ၏ပုံသက်သေမှ ကျွန်ုပ်တို့သင်ယူနိုင်သည့် အချက်အချို့ကားအဘယ်နည်း။
ယောဘသည် ဘုရားသခင်နှင့်ဆက်ဆံရေးကို ဦးစားပေးခဲ့ခြင်း၊ လူသားချင်းများနှင့် ဆက်ဆံရာတွင် မျှတသောသဘောရှိခဲ့ခြင်း၊ အိမ်ထောင်ဖက်အပေါ် သစ္စာစောင့်သိရန် ကြိုးစားခဲ့ခြင်း၊ သူ၏မိသားစုဝိညာဉ်ရေးအတွက် စိုးရိမ်ပူပန်မှုတင်ပြခဲ့ခြင်းနှင့် စမ်းသပ်မှုခံရချိန်တွင် သစ္စာရှိရှိခံရပ်ခဲ့ခြင်းတို့ဖြစ်သည်။—၃/၁၅၊ စာမျက်နှာ ၂၅-၇။
• သမ္မာကျမ်းစာတွင် ကွယ်ဝှက်ထားသောသတင်းများကို ထိုးထွင်းသိမြင်စေသည့် စကားဝှက်ရှိပါသလော။
မရှိပါ။ လောကစာအုပ်အချို့တွင် စကားဝှက်ဟုထင်မှတ်ရရာရှိသည်ဟု ထပ်တူအဆိုပြုချက်များပြုနိုင်သည်။ သမ္မာကျမ်းစာရှိ စကားဝှက်ဟုထင်မှတ်ရရာများသည် ဟေဗြဲစာမူများတွင် စာလုံးပေါင်းပြောင်းလဲသွားခြင်းဖြင့် အဓိပ္ပာယ်မဲ့သွားနိုင်ပေသည်။—၄/၁၊ စာမျက်နှာ ၃၀၊ ၃၁။