အစ်ဂျီးယန်းပင်လယ်တွင် လူများကိုမျှားခြင်း
အစ်ဂျီးယန်းပင်လယ်တွင် လူများကိုမျှားခြင်း
မြောက်ဘက်နှင့် အနောက်ဘက်တွင် ဂရိကျွန်းကြီး၊ တောင်ဘက်တွင် ကရေတေကျွန်းနှင့် အရှေ့ဘက်တွင် တူရကီနိုင်ငံရှိသည့် အစ်ဂျီးယန်းပင်လယ်သည် မြေထဲပင်လယ်အရှေ့ပိုင်း၏ ဧရိယာအတော်များများကို နေရာယူထားသည်။ ထင်ရှားသောအစောပိုင်းယဉ်ကျေးမှုအချို့စတင်ရာ အစ်ဂျီးယန်းပင်လယ်တွင် ကျွန်းကြီးကျွန်းငယ်အနှံ့အပြားတည်ရှိနေသည်။ နေရောင်အောက်တွင်တလက်လက်ဖြစ်နေသည့် အဖြူရောင်အိမ်လေးများ ဟိုတစ်အိမ်သည်တစ်အိမ်ရှိသော ကျွန်းများ၏ မညီမညာအနားသတ်ထားပုံတို့က ပန်းချီဆရာ၏မျက်စိတွင် “လည်ဆံမွေးဖွားဖွားနှင့်ကျောက်မြင်းများ” ကိုပြေး၍မြင်ယောင်မိစေသည်။
ဤကျွန်းများသည် ကမ္ဘာလှည့်ခရီးများအတွက် ရေပန်းအစားဆုံးဖြစ်လာခဲ့သည်မှာ အံ့ဩစရာမဟုတ်ချေ! ထိုကျွန်းများ၏အသွင်အပြင်လှပမှုကို ထိုတွင်နေထိုင်လုပ်ကိုင်ကြသော အမျိုးသား၊ အမျိုးသမီးများ၏ အဖိုးတန်အရည်အသွေးများက တိုး၍လှပစေသည်။ ဤသူတို့၏လက်တွေ့ကျ၍ ဧည့်ဝတ်ကျေပွန်သောသဘော၊ တစ်ကြိမ်တည်းတွင် ကိုယ့်အစွမ်းအစကိုယ်သုံးတတ်သည့်စိတ်ထားက ထိုဒေသ၏ထူးခြားမှုကို ထပ်ဆင့်ထူးခြားစေသည်။
ကျွန်းသူကျွန်းသားများစွာသည် အစ်ဂျီးယန်းပင်လယ်တွင် ငါးဖမ်းခြင်းဖြင့် အသက်မွေးဝမ်းကျောင်းပြုကြသည်။ သို့သော် အရေးပါသော ငါး “မျှား” ခြင်းနောက်တစ်မျိုးကြောင့် ၎င်းဒေသတွင် အကျိုးများစွာဖြစ်ထွန်းလျက်ရှိသည်။ “လူကိုမျှားသောတံငါ” များဟူသည့် ဘုရားသခင့်နိုင်ငံတော်သတင်းကောင်း၏ ဧဝံဂေလိတရားဟောပြောသူများသည် အစ်ဂျီးယန်းကျွန်းများပေါ်လှည့်လည်ကာ ခရစ်ယာန်တပည့်များဖြစ်စေနေကြ၏။—မဿဲ ၄:၁၈၊ ၁၉; လုကာ ၅:၁၀။
လွန်ခဲ့သော ၁၉ ရာစုခန့်က ခရစ်ယာန်ဧဝံဂေလိတရားဟောပြောသူများသည် အစ်ဂျီးယန်းကျွန်းများသို့ လည်ပတ်ခဲ့ကြသည်။ စီ.အီး. ၅၆ ခုနှစ်ခန့်၌ တမန်တော်ပေါလုသည် သူ၏တတိယခရီးစဉ်မှပြန်လာရာတွင် လက်စ်ဗော့စ်ကျွန်း၊ ခီအော့စ်ကျွန်း၊ စမော့စ်ကျွန်း၊ ကားစ်ကျွန်းနှင့် ရိုဒ်စ်ကျွန်းတို့တွင် ခေတ္တရပ်နားခဲ့သည်။ စိတ်အားထက်သန်စွာအမြဲဟောပြောသူ ပေါလုသည် ကျွန်းသူကျွန်းသားအချို့ကို ဟောပြောခဲ့ရပေမည်။ (တမန်တော် ၂၀:၁၄၊ ၁၅၊ ၂၄; ၂၁:၁၊ ၂) သူသည် ရောမတွင် နှစ်နှစ်အကျဉ်းချခံရပြီးနောက် ကရေတေကျွန်းသို့ လည်ပတ်နိုင်ခဲ့ဖွယ်ရှိပြီး ထိုတွင် ခရစ်ယာန်လှုပ်ရှားမှုကို လုပ်ဆောင်ခဲ့ပေမည်။ ပထမရာစုနှစ်ကုန်ခါနီးတွင် တမန်တော်ယောဟန်သည် ‘ဘုရားသခင်နှင့် ယေရှုခရစ်အကြောင်း သက်သေခံခဲ့သောကြောင့်’ ပတ်မာစ်ကျွန်းသို့ ပြည်နှင်ဒဏ်ခံခဲ့ရသည်။ (ဗျာဒိတ် ၁:၉) မျက်မှောက်ခေတ် သတင်းကောင်းကြွေးကြော်သူများသည် အဆိုပါကျွန်းများတွင် မည်သို့ကြုံတွေ့နေကြရသနည်း။
အကျိုးဖြစ်ထွန်းသောဟောပြောခြင်းအစီအစဉ်များ
ဤကျွန်းစုများတွင် ဟောပြောရခြင်းသည် ခက်ခဲပြီး ဝီရိယစိုက်ထုတ်ကြရ၏။ အကြီးအကျယ်ကြိုးစားလုပ်ဆောင်၍ ကိုယ်ကျိုးစွန့်ဖို့လိုသည်။ အချို့ကျွန်းများသည် တစ်ကျွန်းနှင့်တစ်ကျွန်းဝေးလွန်းသည်။ အထူးသဖြင့် ဆောင်းရာသီအချိန်တွင် ရေလမ်း သို့မဟုတ် လေကြောင်းဖြင့် ကျွန်းအချို့သို့ အလျဉ်းသင့်သလိုသွားခဲ့ကြရပြီး အခြားကျွန်းများသို့ မသွားနိုင်ချေ။ အထူးသဖြင့် မဲလ်တီမီယာ—ရာသီအလိုက် ပြင်းထန်သောမြောက်လေ—တိုက်ခိုက်ချိန်တွင် ပင်လယ်သည် ကြမ်းတမ်းနိုင်သည်။ ထို့ပြင် ဖုန်ထူပြီး လမ်းမခင်းထားသောလမ်းများမှာ သွား၍မရသောကြောင့် ကျွန်းများစွာမှရွာအများစုသည် သီးခြားဖြစ်နေပြီး ရောက်ရန်ခက်ခဲ၏။ အချို့သောရွာများကို လှေငယ်များဖြင့်သာ ရောက်နိုင်သည်။
ဥပမာ၊ အီကာရီးယာကျွန်းကိုကြည့်ပါ။ ထိုတွင်ရှိ အသင်းတော်ငယ်လေးမှ ဘုရားသခင့်နိုင်ငံတော်သတင်းကောင်းကြေညာသူ ၁၁ ဦးသည် ၎င်းကျွန်းနှင့် အနီးအနားရှိကျွန်းငယ်များမှ ရွာအားလုံးသို့ မရောက်နိုင်ကြချေ။ သို့နှင့် စမော့စ်ကျွန်းမှ ခရစ်ယာန်ညီအစ်ကိုညီအစ်မများသည် အီကာရီးယာကျွန်းသာမက ဖော်နဝိုင်ကျွန်း၊ ပတ်မာစ်ကျွန်းနှင့် လစ်ပ်ဆော့စ်ကျွန်းမှလူတို့ကို ဟောပြောရန် ကူညီပေးကြ၏။ မကြာမီက ဤသို့သောနှစ်ရက်ဟောပြောခြင်းအစီအစဉ်တစ်ခုအတွင်း သက်သေခံများသည် မဂ္ဂဇင်း ၆၅၀၊ ဘရိုရှာ ၉၉ စောင်နှင့် ကျမ်းစာနှင့်ပတ်သက်သည့် စာအုပ်ကြီး ၂၅ အုပ်တို့ကို ဝေငှနိုင်ခဲ့ကြသည်! ယေဟောဝါမည်သူဖြစ်ကြောင်း လုံးဝမသိသူများ၊ မိမိတို့နှင့်နေပြီး ကျမ်းစာအကြောင်းပိုမိုသွန်သင်ပေးရန် တောင်းပန်သူများကို တွေ့ဆုံခဲ့ရသောကြောင့် သူတို့အံ့သြခဲ့ကြရ၏။ အမျိုးသမီးတစ်ဦးက သက်သေခံတစ်ဦးကို ဤသို့ပြောခဲ့သည်– “အခု ရှင်တို့ပြန်သွားကြတော့မယ်။ ကျွန်မမှာ ကျမ်းစာနဲ့ပတ်သက်တဲ့ မေးခွန်းတွေအများကြီးရှိနေသေးတယ်။ ကျွန်မကို ဘယ်သူကူညီပေးမှာလဲ။” ခရစ်ယာန်ညီအစ်မက တယ်လီဖုန်းဖြင့် စိတ်ဝင်စားသူကိုဆက်ကူညီပေးမည်ဟု ကတိပြုခဲ့ပြီး ထိုနည်းဖြင့်ပင် ကျမ်းစာသင်အံမှုစတင်ခဲ့သည်။
အီကာရီးယာသို့ နယ်လှည့်ကြီးကြပ်မှူးတစ်ဦး လည်ပတ်ခဲ့သောအခါ သတ္တပတ်တစ်ပတ်အကုန်ပိုင်းနှင့် ကျွန်းတစ်ကျွန်းလုံးသို့ အနှံ့ရောက်ရှိရန်စီစဉ်ခဲ့သည်။ သူသည် စမော့စ်ကျွန်းမှ ဘုရားသခင့်နိုင်ငံတော်ကြေညာသူ ၃၀ ခန့်ကို အကူအညီတောင်းခဲ့၏။ လည်ပတ်ရောက်ရှိလာကြသောညီအစ်ကိုများသည် ဟိုတယ်တွင် နှစ်ညတည်းခိုစရိတ်၊ ငှားရမ်းထားသောကားများနှင့် လေးဘီးတပ်ယာဉ်များစရိတ်တို့ကိုပါ ခံခဲ့ကြရသည်။ နှစ်ရက်တိုင် မိုးသည်းထန်စွာရွာသွန်းခဲ့ပြီး ထိုအပတ်အကုန်ပိုင်း၏ မိုးလေဝသခန့်မှန်းချက်သည် စိတ်ပျက်ဖွယ်ကောင်း၏။ သို့သော် ညီအစ်ကိုများသည် ဒေ. ၁၁:၄ ပါ “လေကိုမှတ်တတ်သောသူသည် မျိုးစေ့ကိုမကြဲ။ မိုးတိမ်တို့ကို ပမာဏပြုတတ်သောသူသည်လည်း စပါးကိုမရိတ်ရာ” ဟူသောစကားကို ပြန်အမှတ်ရကာ ယင်းကို အဟန့်အတားဖြစ်ခွင့်မပြုခဲ့ကြချေ။ နောက်ဆုံး၌ ရာသီဥတုသည် မဆိုစလောက်ကောင်းမွန်လာသည်၊ ကျွန်းတစ်ကျွန်းလုံးသို့ သူတို့၏အရေးကြီးသောသတင်း ရောက်ရှိပြီးနောက် ညီအစ်ကိုများသည် ပျော်ရွှင်ကျေနပ်စွာဖြင့် အိမ်သို့ပြန်သွားခဲ့ကြသည်။
အန္ဒရော့စ်ကျွန်းတွင် နေထိုင်ကြသောကြေညာသူ ၁၆ ဦးတို့သည် ကျွန်းတစ်ကျွန်းလုံးသို့ ရောက်ရှိရန် ကြိုးစားပမ်းစားသွားခဲ့ကြသည်။ သီးခြားဖြစ်နေသောရွာတစ်ရွာသို့ ညီအစ်ကိုနှစ်ဦးရောက်ရှိသောအခါ ရွာသူရွာသားအားလုံးကို ဟောပြောရန် သူတို့ဆုံးဖြတ်ခဲ့ကြ၏။ အိမ်များ၊ လမ်းများနှင့် လယ်ကွင်းများတွင် တွေ့သူတိုင်းကို သူတို့ဟောပြောခဲ့ကြသည်။ ရဲစခန်းသို့သွားရောက်လည်ပတ်ကာ ထိုတွင်စာပေများထားရစ်ခဲ့သည်။ ရွာသူရွာသားအားလုံးနှင့် တွေ့ဆုံပြီးသွားပြီဟုစိတ်ချကာ သူတို့ထွက်ခွာခါနီးဖြစ်နေသည်။ ဗဟိုရင်ပြင်မှ သူတို့ထွက်သောအခါ ဂရိသြသဒေါက်စ်ဘုန်းကြီးလာနေသည်ကိုတွေ့လိုက်သည်။ သူ့ကို သက်သေမခံရသေးကြောင်း သိလိုက်သည့်အတွက် စာအုပ်ငယ်တစ်အုပ်ကို ကမ်းလှမ်းခဲ့ရာ ယင်းစာအုပ်ကို သူဝမ်းမြောက်စွာလက်ခံခဲ့သည်။ သူတို့ကြိုးစားဟောပြောခဲ့ခြင်း၌ မည်သူမျှမကျန်ခဲ့တော့ကြောင်း ယခု သူတို့အသေအချာသိမြင်ခဲ့ကြပြီ!
ကျွန်းသား ၃၈ ဦးသာရှိသော ကရေတေအောက်ရှိ ဂါဗ်ဒါစ်ကျွန်းငယ် (သို့မဟုတ် ကလောဒေ) သည်ဥရောပတောင်ဘက်အစွန်းဆုံးနေရာဖြစ်သည်ဟုယူမှတ်ကြသည်။ (တမန်တော် ၂၇:၁၆) နယ်လှည့်ကြီးကြပ်မှူးတစ်ဦးနှင့် သူ၏ဇနီးအပြင် အခြားဇနီးမောင်နှံစုံတို့သည် ထိုတွင် သုံးရက်သွားရောက်ဟောပြောခဲ့ကြ၏။ ချွေတာသည့်အနေနှင့် ရွက်ဖျင်တဲတွင် သူတို့အိပ်ခဲ့ကြသည်။ ကျွန်းသူကျွန်းသားအားလုံးထံသို့ သတင်းကောင်းရောက်ရှိခဲ့ပြီး ထိုသူတို့သည် စိတ်စွန်းကွက်မှုမရှိကြသောကြောင့် ညီအစ်ကိုများက ဝမ်းသာခဲ့ကြသည်။ ယေဟောဝါသက်သေများအကြောင်း—အကောင်းသော်လည်းကောင်း၊ အဆိုးသော်လည်းကောင်း— သူတို့မကြားဖူးကြချေ။ ခရစ်ယာန်ဘုန်းကြီးအပါအဝင် ဒေသခံလူတို့သည် စာအုပ်ကြီး ၁၉ အုပ်နှင့် ဘရိုရှာ ၁၃ အုပ်လက်ခံယူခဲ့ကြ၏။ လှေငယ်ဖြင့် ကရေတေကျွန်းသို့ သက်သေခံများပြန်သွားသောအခါ ပင်လယ်သည် လှိုင်းလေထန်လာကာ အသက်အန္တရာယ်ရှိခဲ့ကြသည်။ “ကျွန်တော်တို့ အသက်ရှင်လျက် အိမ်ပြန်ရောက်လာကြတဲ့အတွက် ယေဟောဝါကို ကျေးဇူးတင်တဲ့အပြင် ဥရောပတောင်ဘက်စွန်းအကျဆုံးနေရာမှာ ကိုယ်တော်ရဲ့နာမတော်ကို ဂုဏ်တင်ခွင့်ရခဲ့ကြတဲ့အတွက်လည်း ကိုယ်တော့်ကိုချီးမွမ်းကြပါတယ်” ဟုသူတို့ကပြောပြခဲ့ကြသည်။
ပတ်မာစ်ကျွန်းသည် သမ္မာကျမ်းစာ၏နောက်ဆုံးကျမ်းဖြစ်သော ဗျာဒိတ်ကျမ်းကို တမန်တော်ယောဟန်ရေးခဲ့သည့် ကျွန်းဖြစ်သည်။ မကြာသေးမီအချိန်ကအထိ ပတ်မာစ်ကျွန်းပေါ်တွင် ယေဟောဝါသက်သေတစ်ဦးမျှ မရှိသေးချေ။ ထိုကျွန်းပေါ်တွင်ဟောပြောဖို့ စမော့စ်မှညီအစ်ကိုများက အသေအချာအစီအစဉ်ရေးဆွဲခဲ့၏။ ထိုကျွန်းသည် ဂရိသြသဒေါက်စ်ချာ့ခ်ျအခြေစိုက်ရာနေရာဖြစ်သောကြောင့် ပြင်းထန်သောဆန့်ကျင်မှုကြုံတွေ့နိုင်သည်ကို သူတို့ကြိုသိထားကြသည်။ အမျိုးသမီးတစ်ဦးကို သတင်းကောင်းတင်ဆက်နေသော ညီအစ်မနှစ်ဦးအား အိမ်ထဲသို့ ဖိတ်ခေါ်ခဲ့သည်။ မိမိတို့အိမ်သို့ ဤညီအစ်မများကို မည်သူကလွှတ်လိုက်သနည်းဟု ထိုအမျိုးသမီး၏ခင်ပွန်းက ထပ်တလဲလဲမေးခဲ့သည်။ အိမ်တိုင်းစေ့ကို လည်ပတ်နေသည်ဟု ရှင်းပြသောအခါ “အိမ်နီးချင်းတစ်ယောက်ယောက်က ဒီကိုလွှတ်လိုက်တာ မဟုတ်လား” ဟုထပ်၍မေးခဲ့သည်။ ဇိုင်ယာနိုင်ငံတွင်ရှိစဉ်အခါက ယေဟောဝါသက်သေများအကြောင်း သိရှိခဲ့သောဇနီးသည်က ထိုနံနက်ပိုင်းမှအဖြစ်အပျက်ကို ညီအစ်မများအား နောက်ပိုင်းတွင် ရှင်းပြခဲ့သည်။ “ဒီကျွန်းကို သက်သေခံတစ်ယောက်ယောက်လွှတ်ပေးပါလို့ တခြားနေ့တွေမှာဆုတောင်းသလို အဲဒီနေ့မှာလည်း ယေဟောဝါကို ကျွန်မဆုတောင်းနေတယ်။ ကျွန်မခင်ပွန်းကရယ်တယ်။ တံခါးပေါက်မှာ ရှင်တို့ကို ကျွန်မမြင်တဲ့အခါမှာ ကျွန်မအံ့သြခဲ့သလို ကျွန်မခင်ပွန်းလည်းအံ့သြခဲ့တယ်။ အဲဒါကြောင့် ကျွန်မတို့အိမ်ကို ဘယ်သူလွှတ်လိုက်တာလဲလို့ သူထပ်ခါထပ်ခါမေးခဲ့တာ” ဟုပြောပြခဲ့၏။ ထိုအမျိုးသမီးနှင့် ကျမ်းစာသင်အံမှုချက်ချင်းစခဲ့သည်။ တယ်လီဖုန်းနှင့်သင်အံမှုပြုလုပ်ခြင်းသည် ဤညီအစ်မနှင့်စိတ်ဝင်စားသူအမျိုးသမီးအတွက်ပါ ငွေအကုန်အကျများခဲ့သော်လည်း ဆယ်လတိုင် ဤသို့သင်အံမှုပြုလုပ်ခဲ့ကြသည်။ ဤအမျိုးသမီးသည် နှစ်ခြင်းခံပြီးပြီဖြစ်၍ လွန်ခဲ့သောနှစ်ပေါင်း ၁,၉၀၀ ကတမန်တော်ယောဟန်အထီးကျန်ဖြစ်ခဲ့သော ၎င်းကျွန်းပေါ်တွင် ယခုအခါ တစ်ဦးတည်းသောသက်သေခံဖြစ်သည်။
ဆိပ်ကမ်းမြို့များတွင် “မျှားခြင်း”
လည်ပတ်အပန်းဖြေသူများစွာကို တင်ဆောင်လာသော ပင်လယ်ကူးသင်္ဘောများသည် နွေရာသီတိုင်း အစ်ဂျီးယန်းကျွန်းများ၏ဆိပ်ကမ်းများတွင် ရပ်နားကြသည်။ သို့ဖြင့် ယေဟောဝါသက်သေများသည် လူမျိုးများစွာနှင့် ဘာသာစကားများစွာမှလူတို့အား ဟောပြောရန် အခွင့်ထူးရကြ၏။ အသင်းတော်များသည် ဘာသာစကားအမျိုးမျိုးဖြင့် ကျမ်းစာစာပေများကို သိုလှောင်ထားရာ ကြေညာသူများသည် ကမ္ဘာလှည့်ခရီးသည်များကို မဂ္ဂဇင်းထောင်နှင့်ချီ၍ ဝေငှကြရသည်။ အချို့ပင်လယ်ကူးသင်္ဘောကြီးများသည် ဤဆိပ်ကမ်းများသို့ အပတ်စဉ်ရောက်ရှိတတ်ကြသည့်အတွက် ညီအစ်ကိုများသည် ပြန်လည်ပတ်မှုများပြုလုပ်ရန်၊ သင်္ဘောသားအချို့နှင့် ကျမ်းစာသင်အံမှုပြုလုပ်ရန်ပင် အခွင့်ထူးများရရှိနိုင်ကြသည်။
၁၉၉၆ ခုနှစ် နွေရာသီတွင် ရိုဒ်စ်ကျွန်းမှ အချိန်ပြည့်ကြေညာသူညီအစ်မတစ်ဦးသည် သောကြာနေ့တိုင်း ထိုဆိပ်ကမ်းတွင်ဆိုက်သော ပင်လယ်ကူးသင်္ဘောကြီးတွင်အလုပ်လုပ်သည့် ဂျမေကာလူငယ်တစ်ဦးကို သက်သေခံခဲ့သည်။ နောက်သောကြာနေ့၌ ကျွန်းပေါ်တွင်ကျင်းပမည့်ခရိုင်စည်းဝေးကြီးကို တက်ရောက်ရန် ထိုသူအားဖိတ်ခေါ်ခဲ့သည်။ အင်္ဂလိပ်ကျမ်းစာကိုင်ကာ ရှေ့ဆောင်ညီအစ်မသည် အစီအစဉ်တွင်တင်ဆက်နေသည့် ကျမ်းစာအမှန်တရားအချို့ကို သူနားလည်ရန် ကူညီပေးခဲ့သည်။ ထိုလူငယ်သည် စည်းဝေးကြီးတွင် သက်သေခံများပြသကြသော မေတ္တာနှင့်လှိုက်လှိုက်လှဲလှဲကြိုဆိုမှုတို့ကြောင့် အလွန်စိတ်စွဲမှတ်ခဲ့သည်။ သူသည် နောက်သောကြာနေ့တွင် ရှေ့ဆောင်နှစ်ဦးကို သင်္ဘောပေါ်သို့ဖိတ်ခေါ်ခဲ့၏။ ရှေ့ဆောင်များသည် အင်္ဂလိပ်နှင့်စပိန်ဘာသာဖြင့် စာပေများကိုယူဆောင်သွားခဲ့သည်။ တစ်နာရီအတွင်း သူတို့၏အိတ်များတွင် စာအုပ်တစ်အုပ်မျှ မကျန်တော့ချေ။ ထိုဂျမေကာလူငယ်သည် နွေရာသီအကုန်အထိ သောကြာနေ့တိုင်း ကျမ်းစာသင်အံမှုပြုလုပ်ခဲ့သည်။ နောက်နွေရာသီတွင် သူပြန်လာကာ သင်အံမှုပြန်စတင်ခဲ့၏။ သို့သော် ဤအကြိမ်တွင် ဝိညာဉ်ရေးတိုးတက်ဖို့အတွက် သူ့အလုပ်ကိုပြောင်းရန် ဆုံးဖြတ်ချက်ချခဲ့သည်။ ထို့နောက် သူပြန်သွားလေသည်။ အဆိုပါလူငယ်သည် ၁၉၉၈ ခုနှစ်အစောပိုင်းတွင် နှစ်ခြင်းခံခဲ့သည်ကို ရိုဒ်စ်ကျွန်းမှညီအစ်ကိုများ သိရှိသောအခါ တကယ်ဝမ်းသာခဲ့ကြသည်တကား!
စားကျက်ပြောင်းသော “ငါး” ကိုဖမ်းခြင်း
ငါးသေတ္တာငါးများနှင့် ငမန်းဓားလွယ်များစသော စားကျက်ပြောင်းသောငါးများ ပေါကြွယ်ဝမှုကြောင့် အစ်ဂျီးယန်းပင်လယ်သည် ကျော်ကြားလျက်ရှိသည်၊ ထိုငါးများရောက်လာသည့်အခါ ကျွမ်းကျင်သောတံငါသည်များ၏ပိုက်ကွန်များတွင် အဆုံးသတ်ကြသည်။ ထပ်တူပင်၊ အရှေ့ဥရောပနိုင်ငံများစွာမှ ဂရိနိုင်ငံတွင် အလုပ်ရှာရန် ပြောင်းရွှေ့လာသူများ၌ တရားနာလိုသောနှလုံးပိုင်ရှင်များစွာကို ဘုရားသခင့်နိုင်ငံတော်ဧဝံဂေလိဟောပြောသူများ တွေ့ ရှိကြသည်။
ရီဇီးသည် ကင်းမျှော်စင် နှင့် နိုးလော့! စာမျက်နှာများမှ ယေဟောဝါနှင့် ကိုယ်တော်၏ရည်ရွယ်ချက်များအကြောင်းကို ပထမဆုံးဖတ်ဖူးခဲ့ချိန်မှာ အသက်ဆယ်နှစ်အရွယ်ကဖြစ်သည်။ ၎င်းသည် အယ်လ်ဘေးနီးယားတွင်ဖြစ်သည်။ နောက်သုံးနှစ်အကြာတွင် သူသည် မိသားစုနှင့်အတူ ရိုဒ်စ်ကျွန်းသို့ပြောင်းခဲ့သည်။ တစ်နေ့သောအခါ ရီဇီးသည် သူ၏ဌာနေအသစ်တွင် ယေဟောဝါ၏လူမျိုးတော်ကို တွေ့ ရှိရန် ကူညီပေးပါဟု ကိုယ်တော်ထံဆုတောင်းခဲ့၏။ နောက်နေ့၌ပင် သူ၏ဖခင်သည် သူတို့အကျွမ်းတဝင်ရှိခဲ့သော ကင်းမျှော်စင် နှင့် နိုးလော့! မဂ္ဂဇင်းများကို အိမ်သို့ယူလာသည့်အတွက် ရီဇီးအလွန်ပျော်ရွှင်ခဲ့ရသည်။ သူ၏ဖခင်ကို မဂ္ဂဇင်းများပေးသောညီအစ်မနှင့် အဆက်အသွယ်ရပြီး မကြာမီပင် ထာဝရအသက်ရစေသောအသိပညာ စာအုပ်ဖြင့် စတင်လေ့လာမှုပြုတော့သည်။ ရံဖန်ရံခါ တစ်နေ့တည်းတွင် သင်အံမှုသုံးကြိမ်ပြုလုပ်ပေးပါရန် သူတောင်းဆိုခဲ့၏။ နှစ်လအကြာတွင် သူသည် နှစ်ခြင်းမခံရသေးသော ကြေညာသူဖြစ်လာကာ အသက် ၁၄ နှစ်အရွယ် ၁၉၉၈၊ မတ်လတွင် နှစ်ခြင်းခံခဲ့သည်။ ထိုနေ့တွင်ပင် အရန်ရှေ့ဆောင်စလုပ်ခဲ့ပြီး နောက်ခြောက်လတွင် မှန်မှန်ရှေ့ဆောင် သို့မဟုတ် အချိန်ပြည့်အမှုဆောင်တစ်ဦးအဖြစ် နာမည်စာရင်းသွင်းခဲ့သည်။
ကားစ်ကျွန်းမှ ညီအစ်ကိုတစ်ဦးသည် ရုရှားမှ လူအချို့နှင့် သင်အံမှုပြုလုပ်ခဲ့သည်။ ကျမ်းစာသင်အံမှုပြုလုပ်လိုသော မိတ်ဆွေများရှိသလားဟု သူမေးသောအခါမိုင် ၂၀ ခန့်ဝေးသောရွာတစ်ရွာမှ အာမီနီယန်ဇနီးမောင်နှံ လီအိုနာဒါစ်နှင့် သူ့ဇနီးအိုဖီလီယာတို့ထံ သူတို့ကိုညွှန်ပေးခဲ့သည်။ ညီအစ်ကိုများ ရောက်သွားသောအခါအံ့သြခဲ့ကြရသည်။ ထိုအာမီနီယန်ဇနီးမောင်နှံသည် လွယ်အိတ်အပြည့်ရှိ ကင်းမျှော်စင်အသင်းမှထုတ်ဝေသည့် အာမီနီယန်နှင့်ရုရှားကျမ်းစာစာပေများကို ထုတ်ပြခဲ့ကြသည်! သူတို့သည် ယေဟောဝါသက်သေများနှင့် ကျမ်းစာသင်အံမှုပြုလုပ်ခဲ့ကြပြီး နှစ်ခြင်းမခံရသေးသော ကြေညာသူများဖြစ်လာသည့်အထိ တိုးတက်ခဲ့လာသည်ဟု ရှင်းပြသည်။ နိုင်ငံရေးအရေးအခင်းနှင့် စီးပွားရေးအခက်အခဲများကြောင့် သူတို့၏မွေးရပ်မြေမှ ထွက်ခွာလာခဲ့ကြရပြီး ကားစ်ကျွန်းသို့ ရောက်သည်နှင့်တစ်ပြိုင်တည်း ထိုတွင်ရောက်ရှိနှင့်နေပြီးသော လီအိုနာဒါစ်၏မိခင်နှင့်ညီမတို့နှင့် ကျမ်းစာစတင်လေ့လာခဲ့ကြသည်။ သို့နှင့် သက်သေခံများသည် မထင်မှတ်ဘဲ ကျမ်းစာသင်အံမှုသုံးခု—အိုဖီလီယာနှင့်တစ်ခု၊ လီအိုနာဒါစ်နှင့်တစ်ခု၊ သူ့မိခင်နှင့်ညီမတို့နှင့်တစ်ခု—ရခဲ့သည်။ ထို့ကြောင့် တစ်ပတ်လျှင်သုံးကြိမ် မော်တော်ဆိုင်ကယ်ဖြင့်မိုင် ၂၀ သွားခဲ့ရသည်။ လီအိုနာဒါစ်နှင့်သူ့ဇနီးသည် နောက်လအနည်းငယ်တွင် နှစ်ခြင်းခံခဲ့ကြသည်။ ဒေသခံညီအစ်ကိုများ၏ ကိုယ်ကျိုးစွန့်စိတ်ဓာတ်ကြောင့် အကျိုးဖြစ်ထွန်းခဲ့သည်တကား!
ယေဟောဝါကြီးပွားစေ
ဤအစ်ဂျီးယန်းပင်လယ်ရှိ ကျွန်းများပေါ်မှ တက်ကြွလှုပ်ရှားသော ဘုရားသခင့်နိုင်ငံတော်ကြွေးကြော်သူ ၂,၀၀၀ ကျော်၏ မောပန်းခြင်းမရှိ ကြိုးစားအားထုတ်မှုများအပေါ် ယေဟောဝါကောင်းချီးသွန်းလောင်းကြောင်း ထင်ရှားပါသည်။ ယခု ထိုတွင် ယေဟောဝါသက်သေများ၏အသင်းတော် ၄၄ ခုနှင့်အုပ်စု ၂၅ စုရှိသည်။ “လူအပေါင်းတို့သည် ကယ်တင်ခြင်းသို့ရောက်၍ [အမှန်] တရားကိုသိစေခြင်းငှာ” ယေဟောဝါအလိုတော်ရှိသောကြောင့် ထိုအုပ်စုများအနက် နိုင်ငံခြားဘာသာစကားဖြင့် အုပ်စု ၁၇ စုရှိလေသည်။ (၁ တိမောသေ ၂:၄) ထို့ပြင် အထူးရှေ့ဆောင် ၁၃ ဦးတို့သည် အဆိုပါသီးခြားရပ်ကွက်များသို့ ပိုမို၍ရောက်ရှိရန် အားသွန်ခွန်စိုက်ကြိုးစားလုပ်ဆောင်လျက်ရှိကြသည်။
အစ်ဂျီးယန်းပင်လယ်သည် ယဉ်ကျေးမှုထွန်းကားရာနှင့် ကူးသန်းရောင်းဝယ်ရေးအချက်အချာဖြစ်သည်မှာ ရာစုနှစ်များစွာရှိခဲ့ပြီ။ မကြာသေးမီ ဆယ်စုနှစ်များစွာက ၎င်းပင်လယ်သည် ထောင်နှင့်ချီသော ကမ္ဘာလှည့်ခရီးသည်များအတွက် ရေပန်းစားရာအပန်းဖြေစခန်းဖြစ်လာခဲ့ပြီ။ သို့သော် ထို့ထက်အရေးကြီးသည်ကား၊ “လူကိုမျှားသူများ” အဖြစ် ဘုရားသခင့်နိုင်ငံတော်ကြွေးကြော်သူများသည် ယေဟောဝါအား လှိုက်လှိုက်လှဲလှဲချီးမွမ်းကြသည့် နှလုံးရိုးဖြောင့်သူများစွာကို အဆိုပါကျွန်းများပေါ်တွင် တွေ့ရှိခဲ့ကြပါသည်။ သူတို့သည် “[“ယေဟောဝါ၊” ကဘ] ကိုချီးမြှောက်၍ တစ်ကျွန်းတစ်နိုင်ငံအရပ်တို့၌ ဂုဏ်တော်ကို ထင်ရှားစွာချီးမွမ်းကြစေ” ဟူသော ပရောဖက်ပြုချက်ဆိုင်ရာဖိတ်ခေါ်ချက်ကို ထူးခြားထင်ရှားစွာ အတူတကွတုံ့ပြန်ခဲ့ကြပေပြီ။—ဟေရှာယ ၄၂:၁၂။
[စာမျက်နှာ ၂၂ ပါပုံစာ]
(ကားချက်အပြည့်အစုံကို စာစောတွင်ကြည့်ပါ)
အစ်ဂျီးယန်းပင်လယ်
ဂရိ
လက်စ်ဗော့စ်
ခီအော့စ်
စမော့စ်
အီကာရီးယာ
ဖော်နဝိုင်
ပတ်မာစ်
ကားစ်
ရိုဒ်စ်
ကရေတေ
တူရကီ
[စာမျက်နှာ ၂၃ ပါ ရုပ်ပုံ]
လက်စ်ဗော့စ်ကျွန်း
[စာမျက်နှာ ၂၄ ပါ ရုပ်ပုံ]
ပတ်မာစ်ကျွန်း
[စာမျက်နှာ ၂၄ ပါပုံစာ]
ကရေတေကျွန်း