ဘုရားသခင့်ပရောဖက်ပြုချက်စကားတော်၌ ယုံကြည်ခြင်းရှိပါလေ!
ဘုရားသခင့်ပရောဖက်ပြုချက်စကားတော်၌ ယုံကြည်ခြင်းရှိပါလေ!
“သာ၍မြဲမြံသောအနာဂတ္တိ [“ပရောဖက်ပြုချက်၊” ကဘ] စကားတော်သည် ငါတို့၌ရှိသေး၏။”—၂ ပေတရု ၁:၁၉။
၁၊ ၂။ မှတ်တမ်းတင်ခဲ့ဖူးသမျှတွင် ပထမဦးဆုံးပရောဖက်ပြုချက်ကား အဘယ်နည်း၊ ၎င်းပေါ်ပေါက်စေခဲ့သည့်မေးခွန်းများမှတစ်ခုကား အဘယ်နည်း။
ယေဟောဝါသည် မှတ်တမ်းတင်ခဲ့ဖူးသမျှတွင် ပထမဦးဆုံးပရောဖက်ပြုချက်၏ရင်းမြစ်ဖြစ်တော်မူသည်။ အာဒံနှင့်ဧဝတို့အပြစ်ပြုပြီးနောက် မြွေကိုဘုရားသခင် ဤသို့မိန့်ဆိုခဲ့သည်– “သင်နှင့်မိန်းမကိုလည်းကောင်း၊ သင်၏အမျိုးအနွယ်နှင့် မိန်းမ၏အမျိုးအနွယ်ကိုလည်းကောင်း ငါသည်ရန်ငြိုးဖွဲ့စေမည်။ သူသည် သင်၏ခေါင်းကိုကြိတ်လိမ့်မည်၊ သင်သည် သူ၏ဖနောင့်ကိုကြိတ်လိမ့်မည်။” (ကမ္ဘာဦး ၃:၁-၇၊ ၁၄၊ ၁၅) ထိုပရောဖက်ပြုချက်စကားများကို အပြည့်အဝနားမလည်မီ နှစ်ရာစုများစွာကုန်လွန်သွားမည်ဖြစ်သည်။
၂ ထိုပထမဦးဆုံးပရောဖက်ပြုချက်က အပြစ်သားများအတွက် စစ်မှန်သောမျှော်လင့်ချက်ကို ကမ်းလှမ်းပေးသည်။ သမ္မာကျမ်းစာက စာတန်အား “ရှေးမြွေဟောင်း” အဖြစ် နောက်ပိုင်းတွင် ဖော်ပြခဲ့သည်။ (ဗျာဒိတ် ၁၂:၉) သို့သော် ဘုရားသခင့်ကတိထားရာမျိုးနွယ်တော်သည် မည်သူဖြစ်မည်နည်း။
မျိုးနွယ်တော်ကိုရှာဖွေခြင်း
၃။ အာဗေလသည် ပထမဦးဆုံးပရောဖက်ပြုချက်ကို ယုံကြည်ကြောင်း မည်သို့တင်ပြခဲ့သနည်း။
၃ ဖခင်နှင့်မတူဘဲ ဘုရားတရားကိုင်းရှိုင်းသူအာဗေလသည် ပထမဦးဆုံးပရောဖက်ပြုချက်ကို ယုံကြည်ကြောင်းတင်ပြခဲ့သည်။ အပြစ်ကိုဖုံးအုပ်ရန် သွေးသွန်းဖို့လိုမည်ဖြစ်ကြောင်း အာဗေလသဘောပေါက်ခဲ့သည်မှာထင်ရှားသည်။ ထို့ကြောင့် ဘုရားသခင်လက်ခံသည့် တိရစ္ဆာန်ယဇ်သကာကိုပူဇော်ရန် သူ့အား ယုံကြည်ခြင်းကလှုံ့ဆော်ခဲ့သည်။ (ကမ္ဘာဦး ၄:၂-၄) သို့တိုင် ကတိထားရာမျိုးနွယ်တော်သည် မည်သူမည်ဝါဖြစ်ကြောင်း နက်နဲရာဖြစ်နေခဲ့သည်။
၄။ ဘုရားသခင်သည် အာဗြဟံကို အဘယ်ကတိပေးခဲ့သနည်း၊ ယင်းက ကတိထားရာမျိုးနွယ်တော်နှင့်ပတ်သက်၍ အဘယ်အရာကိုညွှန်ပြသနည်း။
၄ အာဗေလခေတ်ကုန်လွန်ပြီးနောက်နှစ်ပေါင်း ၂,၀၀၀ ခန့်တွင် ယေဟောဝါသည် ဘိုးဘေးအာဗြဟံအား ဤပရောဖက်ပြုချက်ကတိတော်ကိုပေးခဲ့သည်– “ငါသည် သင့်အား အစဉ်အမြဲကောင်းချီးပေးမည်။ သင်၏အမျိုးအနွယ်ကိုလည်း ကောင်းကင်ကြယ်ကဲ့သို့ . . . အစဉ်အမြဲပွားများစေမည်။ သင်၏အမျိုးအနွယ်အားဖြင့် လူမျိုးအပေါင်းတို့သည် ကောင်းချီးမင်္ဂလာကိုခံရကြလိမ့်မည်။” (ကမ္ဘာဦး ၂၂:၁၇၊ ၁၈) ထိုစကားများသည် အာဗြဟံနှင့် ပထမဦးဆုံးပရောဖက်ပြုချက်ပြည့်စုံမှုကို ဆက်စပ်ပေး၏။ စာတန်၏လုပ်ရပ်များကို ပယ်ဖျက်မည့်မျိုးနွယ်တော်သည် အာဗြဟံ၏မျိုးရိုးမှပေါ်ထွန်းလာမည်ဖြစ်ကြောင်း ထိုစကားများကညွှန်ပြသည်။ (၁ ယောဟန် ၃:၈) ‘ဘုရားသခင်၏ကတိတော်ကြောင့် [အာဗြဟံသည်] ယုံမှားသံသယကင်း’ ခဲ့သကဲ့သို့ “ကတိတော်အတိုင်းမခံစားကြရသေး” သည့် ခရစ်ယာန်ခေတ်မတိုင်မီက အခြားသောယေဟောဝါသက်သေများသည်လည်း ထိုအတိုင်းပင်ဖြစ်ခဲ့သည်။ (ရောမ ၄:၂၀၊ ၂၁၊ သမ; ဟေဗြဲ ၁၁:၃၉၊ သမ) ယင်းအစား၊ သူတို့သည် ဘုရားသခင့်ပရောဖက်ပြုချက်စကားတော်ကို ဆက်လက်ယုံကြည်ခဲ့ကြသည်။
၅။ မျိုးနွယ်တော်ဆိုင်ရာ ဘုရားသခင့်ကတိတော်သည် မည်သူ၌ပြည့်စုံခဲ့သနည်း၊ အဘယ်ကြောင့် ထိုသို့ဖြေသနည်း။
၅ တမန်တော်ပေါလုသည် ဤသို့ရေးသားခဲ့သောအခါ ဘုရားသခင့်ကတိထားရာမျိုးနွယ်တော်ကို ဖော်ပြခဲ့သည်– “ကတိတော်တို့ကို အာဗြဟံနှင့်သူ၏အမျိုးအနွယ်၌ထားတော်မူ၏။ ‘အမျိုးအနွယ်တို့’ ဟု အများသောသူတို့ကိုရည်မှတ်၍ မိန့်တော်မူသည်မဟုတ်။ ‘သင်၏အမျိုးအနွယ်’ ဟု တစ်ယောက်သောသူကိုရည်မှတ်၍ မိန့်တော်မူ၏။ ထိုတစ်ယောက်သောသူကား ခရစ်တော်ဖြစ်သတည်း။” (ဂလာတိ ၃:၁၆) လူမျိုးအပေါင်းကောင်းချီးခံစားရမည့် မျိုးနွယ်တော်တွင် အာဗြဟံ၏အမျိုးအနွယ်အားလုံးမပါပါ။ သူ၏သားဣရှမေလနှင့် ကေတုရနှင့်သူရခဲ့သောသားများမှ ဆင်းသက်လာသူများသည် လူသားများကောင်းချီးခံစားရဖို့ အသုံးမခံခဲ့ရပါ။ ကောင်းချီးနှင့်ဆိုင်သောမျိုးနွယ်တော်သည် သူ၏သားဣဇာက်နှင့် မြေးယာကုပ်တို့မှဆင်းသက်လာခဲ့သည်။ (ကမ္ဘာဦး ၂၁:၁၂; ၂၅:၂၃၊ ၃၁-၃၄; ၂၇:၁၈-၂၉၊ ၃၇; ၂၈:၁၄) “လူမျိုး” တို့သည် ယုဒအနွယ် ရှိလောကိုနာခံကြမည်ဖြစ်သော်လည်း မျိုးနွယ်တော်သည် နောက်ပိုင်းတွင် ဒါဝိဒ်၏မျိုးရိုးမှဆင်းသက်ရန် ကန့်သတ်ထားကြောင်း ယာကုပ်ဖော်ပြခဲ့သည်။ (ကမ္ဘာဦး ၄၉:၁၀; ၂ ဓမ္မရာဇဝင် ၇:၁၂-၁၆) ပထမရာစုဂျူးများသည် မေရှိယ သို့မဟုတ် ခရစ်တော်အဖြစ်ကြွလာမည့်သူတစ်ဦးကို စောင့်မျှော်ခဲ့ကြသည်။ (ယောဟန် ၇:၄၁၊ ၄၂) မျိုးနွယ်တော်နှင့်ဆိုင်သည့် ဘုရားသခင့်ပရောဖက်ပြုချက်သည် ကိုယ်တော့်သားတော်ယေရှုခရစ်တွင် ပြည့်စုံခဲ့သည်။
မေရှိယပေါ်ထွန်းလာ!
၆။ (က) သီတင်း ၇၀ ဆိုင်ရာပရောဖက်ပြုချက်ကို ကျွန်ုပ်တို့ မည်သို့နားလည်ရန်ဖြစ်သနည်း။ (ခ) ယေရှုသည် မည်သည့်အချိန်နှင့် မည်သို့အားဖြင့် “အပြစ်ကိုဖြေရှင်း” ခဲ့သနည်း။
၆ ပရောဖက်ဒံယေလသည် အရေးပါသည့်မေရှိယဆိုင်ရာ ပရောဖက်ပြုချက်တစ်ခုကို မှတ်တမ်းတင်ခဲ့သည်။ မေဒိအမျိုးဒါရိမင်းနန်းစံပထမနှစ်တွင် ယေရုရှလင်မြို့၏အနှစ် ၇၀ လူဆိတ်ညံရာကာလသည် ကုန်ဆုံးလုနီးကြောင်း သူသိရှိခဲ့သည်။ (ယေရမိ ၂၉:၁၀; ဒံယေလ ၉:၁-၄) ဒံယေလဆုတောင်းနေစဉ် ကောင်းကင်တမန်ဂါဗြေလသည် ရောက်လာ၍ ‘အပြစ်ကိုဖြေရှင်းရန် သီတင်းခုနစ်ဆယ်ကို သတ်မှတ်ဆုံးဖြတ်’ ထားကြောင်းဖော်ပြခဲ့သည်။ မေရှိယသည် ၇၀ မြောက်သီတင်းပတ်၏အလယ်တွင် အသေသတ်ခံရမည်ဖြစ်သည်။ “သီတင်းနှစ်ခုနစ်ဆယ်” သည် ပါရှန်းဘုရင်အာတဇေရဇ် ၁ က ‘ယေရုရှလင်မြို့ကို ပြန်လည်တည်ဆောက်ရန် အမိန့်တော်ရှိ’ ခဲ့သည့် ဘီ.စီ.အီး. ၄၅၅ တွင်အစပြုသည်။ (ဒံယေလ ၉:၂၀-၂၇; မောဖက်; နေဟမိ ၂:၁-၈) မေရှိယသည် ၆၉ သီတင်းကြာပြီးနောက်တွင် ပေါ်ထွန်းမည်ဖြစ်သည်။ ၎င်း ၄၈၃ နှစ်သည် ဘီ.စီ.အီး. ၄၅၅ မှစပြီး ယေရှုနှစ်ခြင်းခံပြီး မေရှိယ သို့မဟုတ် ခရစ်တော်အဖြစ် သူ့အား ဘုရားသခင်ဘိသိက်ပေးခဲ့သည့် စီ.အီး. ၂၉ အထိတိုင်လေသည်။ (လုကာ ၃:၂၁၊ ၂၂) ယေရှုသည် စီ.အီး. ၃၃ တွင် မိမိအသက်ကိုရွေးနုတ်ဖိုးအဖြစ်ပေးခြင်းဖြင့် “အပြစ်ကိုဖြေရှင်း” ခဲ့သည်။ (မာကု ၁၀:၄၅) ဘုရားသခင့်ပရောဖက်ပြုချက်စကားတော်ကို ယုံကြည်ခြင်းရှိရန် အမှန်ခိုင်လုံသောအကြောင်းရင်းများပါတကား! *
၇။ ယေရှုသည် မေရှိယဆိုင်ရာပရောဖက်ပြုချက်ကို မည်သို့ပြည့်စုံစေခဲ့ကြောင်း သမ္မာကျမ်းစာကိုအသုံးပြု၍ထောက်ပြပါ။
၇ ဘုရားသခင့်ပရောဖက်ပြုချက်စကားတော်ကိုယုံကြည်ခြင်းသည် မေရှိယကို ခွဲခြားသိမြင်စေသည်။ ဟေဗြဲကျမ်းစာစောင်များတွင် မှတ်တမ်းတင်ခဲ့သည့် မေရှိယဆိုင်ရာပရောဖက်ပြုချက်များစွာအနက် အတော်များများသည် ယေရှုနှင့်ပတ်သက်ကြောင်း ခရစ်ယာန်ဂရိကျမ်းစာစောင်များကိုရေးသူတို့က တိုက်ရိုက်ဖော်ပြခဲ့ကြသည်။ သာဓကအနေနှင့်– ယေရှုသည် ဗက်လင်မြို့တွင် အပျိုကညာတစ်ဦးမှမွေးဖွားခဲ့သည်။ (ဟေရှာယ ၇:၁၄; မိက္ခာ ၅:၂; မဿဲ ၁:၁၈-၂၃; လုကာ ၂:၄-၁၁) သူသည် အီဂျစ်ပြည်မှခေါ်ဆောင်ခံရသည်၊ သူမွေးပြီးနောက် ကလေးများအသတ်ခံရသည်။ (ယေရမိ ၃၁:၁၅; ဟောရှေ ၁၁:၁; မဿဲ ၂:၁၃-၁၈) ယေရှုသည် ကျွန်ုပ်တို့၏အနာရောဂါများကို ယူဆောင်သွားသည်။ (ဟေရှာယ ၅၃:၄; မဿဲ ၈:၁၆၊ ၁၇) ကြိုပြောထားသည့်အတိုင်း ကိုယ်တော်သည် မြည်းကလေးကိုစီး၍ ယေရုရှလင်မြို့ထဲဝင်ခဲ့သည်။ (ဇာခရိ ၉:၉; ယောဟန် ၁၂:၁၂-၁၅) ယေရှုကိုနှက်တိုင်တင်ပြီးနောက် စစ်သားများက ကိုယ်တော်၏အဝတ်ကို တစ်ပိုင်းစီခွဲဝေယူပြီး အတွင်းအဝတ်ကိုမူ စာရေးတံချ၍ယူကြသည့်အခါ ဆာလံဆရာ၏စကားများပြည့်စုံခဲ့သည်။ (ဆာလံ ၂၂:၁၈; ယောဟန် ၁၉:၂၃၊ ၂၄) ယေရှု၏အရိုးများ အချိုးမခံရခြင်းနှင့် ကိုယ်တော်ထိုးဖောက်ခံခဲ့ရခြင်းတို့ကလည်း ပရောဖက်ပြုချက်ကို ပြည့်စုံစေသည်။ (ဆာလံ ၃၄:၂၀; ဇာခရိ ၁၂:၁၀; ယောဟန် ၁၉:၃၃-၃၇) ၎င်းတို့ကား မေရှိယဆိုင်ရာပရောဖက်ပြုချက်များသည် ယေရှုကိုရည်ညွှန်းကြောင်း ဘုရားသခင့်မှုတ်သွင်းခံကျမ်းရေးသူများဖော်ပြခဲ့သည့် ဥပမာအနည်းအကျဉ်းသာဖြစ်သည်။ *
မေရှိယဘုရင်ကိုကြိုဆိုလေ!
၈။ အသက်ကြီးသောသူကား မည်သူနည်း၊ ဒံယေလ ၇:၉-၁၄ တွင်မှတ်တမ်းတင်ထားသည့် ပရောဖက်ပြုချက်သည် မည်သို့ပြည့်စုံခဲ့သနည်း။
၈ ယေဟောဝါသည် ဗာဗုလုန်ဘုရင်ဗေလရှာဇာနန်းစံပထမနှစ်တွင် မိမိ၏ပရောဖက်ဒံယေလအား အိပ်မက်တစ်ခုနှင့် ထူးခြားသည့်အဆင်းအာရုံများကိုရရှိစေခဲ့သည်။ ထိုပရောဖက်သည် ဧရာမသားရဲကြီးလေးကောင်ကို ဦးဆုံးမြင်ရသည်။ ဘုရားသခင့်ကောင်းကင်တမန်က ၎င်းတို့ကို “မင်းလေးပါး” အဖြစ်ဖော်ပြခဲ့ရာ ဆက်တိုက်ပေါ်လာမည့် ကမ္ဘာ့အာဏာစက်များကို အမှတ်သညာပြုကြောင်းညွှန်ပြခဲ့သည်။ (ဒံယေလ ၇:၁-၈၊ ၁၇၊ သမ) ထို့နောက် ဘုန်းထင်ရှားစွာနန်းထိုင်နေတော်မူသည့် “အသက်ကြီးသောသူ၊” ယေဟောဝါကို ဒံယေလမြင်ရသည်။ ကိုယ်တော်သည် သားရဲများကို ပြစ်ဒဏ်စီရင်ပြီး ၎င်းတို့ထံမှ အုပ်ချုပ်မှုကိုနုတ်ယူကာ စတုတ္ထသားရဲကို ဖျက်ဆီးပစ်လိုက်လေသည်။ “အသီးသီးအခြားခြားသောဘာသာစကားကို ပြောသောလူမျိုးတကာတို့” အပေါ်တည်မြဲသည့်အုပ်ချုပ်မှုကို “လူသားနှင့်တူသောသူတစ်ဦး” အားပေးအပ်ခဲ့သည်။ (ဒံယေလ ၇:၉-၁၄) ၁၉၁၄ ခုနှစ်တွင် ကောင်းကင်၌ “လူသား၊” ယေရှုခရစ်နန်းတင်ခံရခြင်းနှင့်ဆက်စပ်နေသည့် အံ့မခန်းဖွယ်ပရောဖက်ပြုချက်ပါတကား!—မဿဲ ၁၆:၁၃။
၉၊ ၁၀။ (က) အိပ်မက်ထဲမှရုပ်တု၏အစိတ်အပိုင်းအသီးသီးက အဘယ်အရာကိုညွှန်ပြသနည်း။ (ခ) ဒံယေလ ၂:၄၅ ၏ပြည့်စုံချက်ကို သင်မည်သို့ရှင်းပြမည်နည်း။
၉ ဘုရားသခင်သည် “ဘုရင်မင်းတို့အား . . . နန်းချ၊ နန်းတင်တော်မူ” ကြောင်း ဒံယေလသိသည်။ (ဒံယေလ ၂:၂၁၊ သမ) ထိုပရောဖက်သည် “နက်နဲသောအရာကိုဖွင့်ပြတော်မူသောဘုရား[သခင်]၊” ယေဟောဝါကိုယုံကြည်စွာဖြင့် ဗာဗုလုန်ဘုရင်နေဗုခဒ်နေဇာ၏အိပ်မက်ထဲမှ ဧရာမရုပ်တုကြီး၏အနက်အဓိပ္ပာယ်ကိုဖွင့်ပြခဲ့သည်။ ၎င်း၏အစိတ်အပိုင်းအသီးသီးတို့က ဗာဗုလုန်၊ မီဒို-ပါရှား၊ ဂရိနှင့်ရောမကဲ့သို့သော ကမ္ဘာ့အာဏာစက်များ၏အတက်အကျကို ညွှန်ပြသည်။ သို့သော် ဘုရားသခင်သည် ကျွန်ုပ်တို့၏အချိန်နှင့် နောက်ပိုင်းအချိန်အထိ ဖြစ်ပျက်လာမည့်ကမ္ဘာ့ဖြစ်ရပ်တို့ကိုလည်းဖော်ပြရန် ဒံယေလကိုအသုံးပြုခဲ့သည်။—ဒံယေလ ၂:၂၄-၃၀။
၁၀ “ပျက်စီးခြင်းသို့မရောက်နိုင်သောနိုင်ငံတစ်ခုကို ထိုမင်းကြီးများလက်ထက်၌ ကောင်းကင်ဘုံရှင်ဘုရားသခင်သည် တည်ထောင်စေတော်မူမည်။ ထိုနိုင်ငံသည် အခြားသောလူမျိုးလက်သို့မရောက်ရဘဲ အထက်ဆိုခဲ့ပြီးသောနိုင်ငံရှိသမျှတို့ကို ချိုးဖဲ့ဖျက်ဆီး၍ အစဉ်အမြဲတည်လိမ့်မည်” ဟုပရောဖက်ပြုချက်ကဆိုသည်။ (ဒံယေလ ၂:၄၅) ‘တစ်ပါးအမျိုးသားတို့၏အချိန်ကာလ’ သည် ၁၉၁၄ ခုနှစ်တွင်ကုန်ဆုံးသည့်အခါ ဘုရားသခင်သည် ခရစ်တော်လက်အောက်ရှိ ကောင်းကင်နိုင်ငံတော်ကို တည်ထောင်ခဲ့သည်။ (လုကာ ၂၁:၂၄; ဗျာဒိတ် ၁၂:၁-၅) ဘုရားသခင့်တန်ခိုးတော်အားဖြင့် မေရှိယနိုင်ငံတော် “ကျောက်” သည် ထိုအချိန်တွင် ဘုရားသခင့်စကြဝဠာပိုင်သအုပ်စိုးမှု “တောင်” မှပဲ့ကွာလာခဲ့သည်။ ထိုကျောက်သည် အာမဂေဒုန်တွင် ရုပ်တုကိုထိမှန်ပြီး အမှုန့်ဖြစ်သည်အထိ ညက်ညက်ကြေစေမည်ဖြစ်သည်။ “မြေကြီးတစ်ပြင်လုံး” ကိုအကျိုးသက်ရောက်မည့် အုပ်ချုပ်ရေးဆိုင်ရာတောင်တစ်ခုအနေနှင့် မေရှိယနိုင်ငံသည် ထာဝစဉ်တည်မည်ဖြစ်သည်။—ဒံယေလ ၂:၃၅၊ ၄၅; ဗျာဒိတ် ၁၆:၁၄၊ ၁၆။ *
၁၁။ ယေရှု၏ကိုယ်ယောင်ထွန်းလင်းခြင်းက အဘယ်အရာ၏အကြိုမြင်ကွင်းဖြစ်သနည်း၊ ထိုအဆင်းအာရုံက ပေတရုအပေါ် အဘယ်အကျိုးသက်ရောက်မှုရှိခဲ့သနည်း။
၁၁ မိမိ၏နိုင်ငံတော်အုပ်ချုပ်မှုကိုရည်စူး၍ ယေရှုက တပည့်တော်များအား ဤသို့မိန်တော်မူခဲ့သည်– “လူသားသည် နိုင်ငံတော်တည်လျက်ကြွလာတော်မူသည်ကို ဤအရပ်၌ရှိသောသူအချို့တို့သည်မမြင်မီ သေခြင်းသို့မရောက်ရကြ။” (မဿဲ ၁၆:၂၈) ခြောက်ရက်လွန်သောအခါ ယေရှုသည် ပေတရု၊ ယာကုပ်နှင့်ယောဟန်တို့ကို မြင့်လှစွာသောတောင်ပေါ်သို့ခေါ်သွားကာ သူတို့ရှေ့တွင် ကိုယ်ယောင်ထွန်းလင်းပြခဲ့သည်။ ထွန်းလင်းသောမိုးတိမ်သည် တမန်တော်များကိုဖုံးလွှမ်းစဉ် ဘုရားသခင်က “ဤသူသည် ငါနှစ်သက်မြတ်နိုးရာ၊ ငါ၏ချစ်သားပေတည်း။ သူ၏စကားကိုနားထောင်ကြလော့” ဟုကြေညာသည်။ (မဿဲ ၁၇:၁-၉; မာကု ၉:၁-၉) ခရစ်တော်၏နိုင်ငံတော်ဘုန်းအသရေဆိုင်ရာ အကြိုမြင်ကွင်းတစ်ရပ်ပါတကား! ယင်းကြောင့် ပေတရုက အလွန်ထွန်းလင်းတောက်ပသော ထိုအဆင်းအာရုံကိုရည်ညွှန်း၍ “ထိုမှတစ်ပါး၊ သာ၍မြဲမြံသောအနာဂတ္တိ [“ပရောဖက်ပြုချက်၊” ကဘ] စကားတော်သည် ငါတို့၌ရှိသေး၏” ဟုပြောဆိုခဲ့ခြင်းပင်။—၂ ပေတရု ၁:၁၆-၁၉။ *
၁၂။ အထူးသဖြင့် ယခုအချိန်သည် ဘုရားသခင့်ပရောဖက်ပြုချက်စကားတော်ကို ယုံကြည်ကြောင်းတင်ပြရန်အချိန် အဘယ်ကြောင့်ဖြစ်သနည်း။
၁၂ “ပရောဖက်ပြုချက်စကားတော်” တွင်ဟေဗြဲကျမ်းပါ မေရှိယနှင့်ဆိုင်သော ပရောဖက်ပြုချက်များသာမက “ကြီးစွာသောဘုန်းတန်ခိုးအာနုဘော်ကိုဆောင်လျက်” ယေရှုကြွလာမည်ဟူသော ကိုယ်တော်၏ဖော်ပြချက်လည်းပါဝင်ကြောင်း ထင်ရှားသည်။ (မဿဲ ၂၄:၃၀) ကိုယ်ယောင်ထွန်းလင်းခြင်းက ဘုရားသခင့်နိုင်ငံတော်တန်ခိုးဖြင့် ခရစ်တော်ဘုန်းထင်ရှားလိမ့်မည်ဟူသော ပရောဖက်ပြုချက်စကားတော်ကို ထောက်ခံသည်။ များမကြာမီ ဘုန်းထင်ရှားလျက် ကိုယ်တော်ပေါ်ထွန်းခြင်းက ယုံကြည်ခြင်းကင်းမဲ့သူများအတွက် ဖျက်ဆီးခြင်းနှင့် ယုံကြည်ခြင်းတင်ပြသူများအတွက် ကောင်းချီးဖြစ်စေပါလိမ့်မည်။ (၂ သက်သာလောနိတ် ၁:၆-၁၀) ကျမ်းစာပရောဖက်ပြုချက်ပြည့်စုံခြင်းက ဤကာလသည် “နောက်ဆုံးကာလ” ဖြစ်ကြောင်း သက်သေထူသည်။ (၂ တိမောသေ ၃:၁-၅၊ ၁၆၊ ၁၇၊ ကဘ; မဿဲ ၂၄:၃-၁၄) ယေဟောဝါ၏အဓိကစီရင်ပိုင်ခွင့်ရှိသူအနေနှင့် ယေရှုခရစ်ဖြစ်သောမိက္ခေလသည် “ကြီးစွာသော [ဆင်းရဲခြင်း]” အတွင်း ဤဆိုးသွမ်းသောအစီအစဉ်စနစ်ကို အဆုံးတိုင်စေရန်အသင့်ရှိသည်။ (မဿဲ ၂၄:၂၁; ဒံယေလ ၁၂:၁) သို့ဖြစ်၍ ဤအချိန်သည် ဘုရားသခင့်ပရောဖက်ပြုချက်စကားတော်ကို ယုံကြည်ကြောင်းတင်ပြရန် အချိန်ဖြစ်သည်မှာအမှန်။
ဘုရားသခင့်ပရောဖက်ပြုချက်စကားတော်၌ ယုံကြည်ခြင်းတည်တံ့စေ
၁၃။ ဘုရားသခင်အပေါ် ကျွန်ုပ်တို့မေတ္တာတည်မြဲနေရန်နှင့် ကိုယ်တော့်နှုတ်မြွက်စကားတော်၌ ယုံကြည်ခြင်းရှင်သန်နေစေရန် အဘယ်အရာကကူညီပေးနိုင်သနည်း။
၁၃ ဘုရားသခင့်ပရောဖက်ပြုချက်စကားတော်ပြည့်စုံချက်များအကြောင်းကို ကျွန်ုပ်တို့သိရှိခါစက အမှန်ပင်ဝမ်းသာပီတိဖြစ်ခဲ့ကြသည်။ သို့သော် ထိုအချိန်နောက်ပိုင်းတွင် ကျွန်ုပ်တို့၏ယုံကြည်ခြင်းသည် လျော့နည်းလာပြီး ကျွန်ုပ်တို့၏မေတ္တာသည် အေးစက်လာပြီလော။ ကျွန်ုပ်တို့သည် “ရှေ့ဦးစွာသော [ချစ်ခြင်း] လျော့” ခဲ့ကြသည့် ဧဖက်မြို့ရှိခရစ်ယာန်များနှင့် မည်သည့်အခါမျှမတူကြစို့နှင့်။ (ဗျာဒိတ် ၂:၁-၄) ယေဟောဝါ၏အမှုတော်ကို ကျွန်ုပ်တို့မည်မျှပင်ထမ်းဆောင်ခဲ့ပါစေ ကောင်းကင်ဘဏ္ဍာကိုဆည်းပူးရန် ‘ဘုရားသခင့်နိုင်ငံတော်နှင့် ဖြောင့်မတ်ခြင်းကို ဆက်၍ရှေးဦးရှာ’ မနေလျှင် ထိုသို့ဖြစ်နိုင်သည်။ (မဿဲ ၆:၁၉-၂၁၊ ၃၁-၃၃) ဝီရိယရှိရှိကျမ်းစာလေ့လာခြင်း၊ ခရစ်ယာန်အစည်းအဝေးများတွင် မှန်မှန်ပါဝင်ခြင်းနှင့် ဇွဲရှိရှိဘုရားသခင့်နိုင်ငံတော်အကြောင်းဟောပြောခြင်းတို့သည် ယေဟောဝါအပေါ်၊ ကိုယ်တော့်သားတော်နှင့် သမ္မာကျမ်းစာအပေါ် ကျွန်ုပ်တို့၏မေတ္တာကို ဆက်လက်တည်မြဲစေပါလိမ့်မည်။ (ဆာလံ ၁၁၉:၁၀၅; မာကု ၁၃:၁၀; ဟေဗြဲ ၁၀:၂၄၊ ၂၅) ယင်းက တစ်ဖန် ဘုရားသခင့်နှုတ်မြွက်စကားတော်အပေါ် ကျွန်ုပ်တို့၏ယုံကြည်ခြင်းကို ဆက်၍ရှင်သန်စေပါမည်။—ဆာလံ ၁၀၆:၁၂။
၁၄။ ဘိသိက်ခံခရစ်ယာန်များသည် ယေဟောဝါ၏ပရောဖက်ပြုချက်စကားတော်ကို ယုံကြည်ကြသည့်အတွက် မည်သို့ဆုချခံကြရသနည်း။
၁၄ ဘုရားသခင့်ပရောဖက်ပြုချက်စကားသည် အတိတ်တွင်ပြည့်စုံခဲ့သကဲ့သို့ အနာဂတ်အတွက် ကြိုပြောထားရာများသည်လည်း ပြည့်စုံလာမည်ဟု ကျွန်ုပ်တို့ယုံကြည်နိုင်သည်။ သာဓကအနေနှင့် ဘုရားသခင့်နိုင်ငံတော်ဘုန်းအသရေဖြင့် ခရစ်တော်၏ရောက်ရှိခြင်းသည် ယခုအမှန်ဖြစ်ပျက်နေပြီ၊ သေသည်တိုင်သစ္စာရှိခဲ့ကြသော ဘိသိက်ခံခရစ်ယာန်များသည် ဤပရောဖက်ပြုချက် ကတိတော်ပြည့်စုံမှုကိုခံစားခဲ့ကြရပြီ– “အကြင်သူသည် အောင်မြင်၏၊ ထိုသူသည် ငါ၏ဘုရားသခင် ပရဒိသုဥယျာဉ်၌ရှိသော အသက်ပင်၏အသီးကိုစားစေခြင်းငှာ ငါအခွင့်ပေးမည်။” (ဗျာဒိတ် ၂:၇၊ ၁၀; ၁ သက်သာလောနိတ် ၄:၁၄-၁၇) ယေရှုသည် ဤအောင်နိုင်သူများအား ‘ဘုရားသခင်၏ကောင်းကင်ပရဒိသု’ တွင် “အသက်ပင်၏အသီးကိုစား” ခွင့်ပေးသည်။ သူတို့သည် ရှင်ပြန်ထမြောက်သည့်အခါ ယေရှုခရစ်အားဖြင့် “လောကဓာတ်တို့၏ဘုရင်တည်းဟူသော၊ ဖောက်ပြန်ပျက်စီးခြင်းနှင့်ကင်းလွတ်တော်မူထသော၊ မျက်မြင်မရ၊ အရူပဖြစ်တော်မူထသော၊ တစ်ဆူတည်းသောဘုရားသခင်” ယေဟောဝါပေးသနားသည့် မသေနိုင်၊ မပုပ်နိုင်သောအဖြစ်ကို ရရှိကြသည်။ (၁ တိမောသေ ၁:၁၇; ၁ ကောရိန္သု ၁၅:၅၀-၅၄; ၂ တိမောသေ ၁:၁၀) ဘုရားသခင်အပေါ် သူတို့၏ထာဝရတည်မြဲသောမေတ္တာ နှင့် ပရောဖက်ပြုချက်စကားတော်၌ မယိမ်းယိုင်သောယုံကြည်ခြင်းကြောင့်ရသော ကြီးမြတ်သည့်ဆုကျေးဇူးပါတကား!
၁၅။ “မြေကြီးသစ်” ၏အုတ်မြစ်ကို မည်သူတို့၌ချခဲ့သနည်း၊ သူတို့၏အပေါင်းပါများကား မည်သူများနည်း။
၁၅ သစ္စာရှိစွာသေဆုံးသွားသောဘိသိက်ခံများသည် ကောင်းကင်ဆိုင်ရာ “ဘုရားသခင်ပရဒိသု” သို့ရှင်ပြန်ထမြောက်ကြပြီးများမကြာမီတွင် မြေကြီးပေါ်ရှိဝိညာဉ်ရေးဣသရေလအကြွင်းအကျန်သည် . . . ဘာသာရေးကမ္ဘာ့အင်ပါယာ၊ ‘မဟာဗာဗုလုန်’ မှလွတ်မြောက်ခဲ့ကြသည်။ (ဗျာဒိတ် ၁၄:၈; ဂလာတိ ၆:၁၆) ဤသူတို့၌ “မြေကြီးသစ်” ၏အုတ်မြစ်ချခဲ့သည်။ (ဗျာဒိတ် ၂၁:၁) ဤသို့ဖြင့် ‘တိုင်းနိုင်ငံတစ်ခု’ မွေးဖွားလာကာ ယင်းကို ယနေ့မြေကြီးအနှံ့တွင် စည်ပင်ဖွံ့ ဖြိုးနေသည့် ဝိညာဉ်ရေးပရဒိသုတစ်ခုအဖြစ် တည်ဆောက်ထားသည်။ (ဟေရှာယ ၆၆:၈) “နောက်ဆုံးသောကာလ” ဖြစ်သည့်ယခုအချိန်တွင် ဝိညာဉ်ရေးဣသရေလ၏သိုးကဲ့သို့သော အပေါင်းပါမြောက်မြားစွာသည် ၎င်းအထဲသို့ တသီတတန်းကြီးဝင်လာနေကြသည်။—ဟေရှာယ ၂:၂-၄; ဇာခရိ ၈:၂၃; ယောဟန် ၁၀:၁၆; ဗျာဒိတ် ၇:၉။
ဘုရားသခင့်ပရောဖက်ပြုချက်စကားတော်၌ လူသား၏အနာဂတ်ကြိုဟောထား
၁၆။ ဘိသိက်ခံများအား သစ္စာရှိရှိထောက်ခံသူများ၏အလားအလာများကား အဘယ်နည်း။
၁၆ ဘိသိက်ခံများကို သစ္စာရှိရှိထောက်ခံသူများ၏အလားအလာများကား အဘယ်နည်း။ သူတို့သည်လည်း ဘုရားသခင့်ပရောဖက်ပြုချက်စကားကို ယုံကြည်ကြပြီး မြေကြီးပရဒိသုသို့ဝင်စားခြင်းအပေါ် သူတို့၏မျှော်လင့်ချက်အခြေပြုသည်။ (လုကာ ၂၃:၃၉-၄၃) ထိုတွင် သူတို့သည် အသက်ကိုထောက်မပေးသည့် “အသက်ရေ စီးရာမြစ်” မှရေကိုသောက်သုံးကြမည်ဖြစ်ပြီး ၎င်း၏ဘေးနှစ်ဖက်တွင်စိုက်ထားသည့် ‘အပင်၏အရွက်များ’ ကြောင့် အနာရောဂါပျောက်ကင်းကြမည်ဖြစ်သည်။ (ဗျာဒိတ် ၂၂:၁၊ ၂) သင်၌ ထိုသို့သောအံ့ချီးဖွယ်မျှော်လင့်ချက်ရှိလျှင် ယေဟောဝါကိုအလွန်ချစ်မြတ်နိုးကာ ကိုယ်တော့်ပရောဖက်ပြုချက်စကားတော်ကို ယုံကြည်ကြောင်း ဆက်၍တင်ပြနိုင်ပါစေ။ သင်သည် ပရဒိသုမြေကြီးတွင်ထာဝစဉ်အသက်ရှင်ကြမည့် အတိုင်းအဆမဲ့ရွှင်လန်းမှုကို ခံစားရသူများထဲတွင် ပါဝင်နိုင်ပါစေ။
၁၇။ မြေကြီးပရဒိသုအသက်တာတွင် အဘယ်ကောင်းချီးများပါဝင်မည်နည်း။
၁၇ မစုံလင်သူလူသားများသည် လာလတ္တံ့သောမြေကြီးပရဒိသုတွင် ရရှိမည့်အသက်တာကို ဖော်ပြနိုင်မည်မဟုတ်သော်လည်း ဘုရားသခင့်ပရောဖက်ပြုချက်စကားတော်က ထိုအချိန်တွင် နာခံသောလူသားများခံစားရမည့် ကောင်းချီးများကို ထိုးထွင်းသိမြင်စေသည်။ ဘုရားသခင့်နိုင်ငံတော်အုပ်ချုပ်မှုသည် အတိုက်အခံမရှိ၊ ကောင်းကင်တွင် ကိုယ်တော့်အလိုတော်ပြည့်စုံသကဲ့သို့ မြေကြီးပေါ်တွင်ပြည့်စုံသောအခါ ရက်စက်ကြမ်းကြုတ်သော လူသားများသာမက တိရစ္ဆာန်များပင် “အချင်းချင်းညှဉ်းဆဲခြင်း၊ ဖျက်ဆီးခြင်း” ပြုကြတော့မည်မဟုတ်ပါ။ (ဟေရှာယ ၁၁:၉; မဿဲ ၆:၉၊ ၁၀) စိတ်နှိမ့်ချသူများသည် မြေကြီးပေါ်တွင်နေထိုင်မည်ဖြစ်ပြီး “များပြားသောငြိမ်သက်ခြင်း၌ မွေ့လျော်ကြလိမ့်မည်။” (ဆာလံ ၃၇:၁၁) “ပြည်တော်၌ များစွာသောစပါးရှိ၍၊ အသီးအနှံသည် လေဗနုန်တောကဲ့သို့ တောင်ထိပ်ပေါ်မှာလှုပ်ရှားလိမ့်မည်” ဖြစ်သောကြောင့် ငတ်ပြတ်သူများရှိတော့မည်မဟုတ်ပါ။ (ဆာလံ ၇၂:၁၆) ဝမ်းနည်းပူဆွေးသည့် မျက်ရည်များကျရတော့မည်မဟုတ်။ အဖျားအနာသာမက သေခြင်းပင်ရှိတော့မည်မဟုတ်ပါ။ (ဟေရှာယ ၃၃:၂၄; ဗျာဒိတ် ၂၁:၄) ဆရာဝန်များ၊ ဆေးဝါးများ၊ ဆေးရုံများ၊ စိတ္တဇဆေးရုံများ၊ ဈာပနအခမ်းအနားများ မရှိတော့သည်ကို သင်မြင်ယောင်နိုင်သလော။ တကယ်ထူးမြတ်သည့်အလားအလာများပါတကား!
၁၈။ (က) ဒံယေလသည် အဘယ်အကြောင်း အာမခံချက်ရရှိခဲ့သနည်း။ (ခ) ဒံယေလ၏ “ဝေပုံ” သည်အဘယ်အရာဖြစ်မည်နည်း။
၁၈ လူသေများ ရှင်ပြန်ထမြောက်လာကြစဉ် လူသားတို့၏သာမန်သင်္ချိုင်းပင် ဗလာကျင်းဖြစ်သွားပါလိမ့်မည်။ ဖြောင့်မတ်သူယောဘ၌ ထိုသို့သောမျှော်လင့်ချက်ရှိခဲ့သည်။ (ယောဘ ၁၄:၁၄၊ ၁၅) ပရောဖက်ဒံယေလတွင်လည်း ထိုမျှော်လင့်ချက်ရှိခဲ့သည်၊ အကြောင်းမှာ ယေဟောဝါ၏ကောင်းကင်တမန်က သူ့အား ဤသို့နှစ်သိမ့်၍အာမခံခဲ့သည်– “သင်မှာမူ၊ သွား၍အဆုံးရောက်သည်တိုင်အောင် မြေမှုန့်၌ ငြိမ်ဝပ်စွာအိပ်နေလော့။ နေ့ရက်ကာလကုန်ပြီးမှ ကိုယ့်ဝေပုံကိုခံရန် ထမြောက်ရလိမ့်မည်။” (ဒံယေလ ၁၂:၁၃၊ သမ္မာ) ဒံယေလသည် သေသည်တိုင် ဘုရားသခင့်အမှုတော်ကို သစ္စာရှိရှိထမ်းဆောင်ခဲ့သည်။ ယခု သူသည် သေခြင်း၌အနားယူနေသော်လည်း ခရစ်တော်အနှစ်တစ်ထောင်အုပ်ချုပ်ချိန်အတွင်း ‘ဖြောင့်မတ်သောသူတို့ ထမြောက်သည်ကာလ’ ၌ “ထမြောက်” လာလိမ့်မည်။ (လုကာ ၁၄:၁၄) ဒံယေလ၏ “ဝေပုံ” သည်အဘယ်အရာဖြစ်မည်နည်း။ ယေဇကျေလပရောဖက်ပြုသော ပရဒိသုပြည့်စုံချက်အရ ယေဟောဝါ၏လူမျိုးတော်အားလုံးသည် မျှမျှတတနှင့် စနစ်တကျခွဲဝေထားသည့် မြေနေရာတစ်နေရာရရှိမည်ဖြစ်ကြောင်း အရိပ်အမြွက်သိရှိရသည်။ (ယေဇကျေလ ၄၇:၁၃–၄၈:၃၅) ထို့ကြောင့် ဒံယေလသည် ပရဒိသုတွင် နေရာတစ်နေရာရလိမ့်မည်၊ သို့သော် ထိုတွင်သူရမည့်ဝေပုံမှာ မြေထက်မကဖြစ်ပါလိမ့်မည်။ ယေဟောဝါ၏ရည်ရွယ်တော်မူချက်အတွင်း သူ၏အခန်းကဏ္ဍပါဝင်မည်ဖြစ်သည်။
၁၉။ မြေကြီးပရဒိသုအသက်တာရရန် အဘယ်အရာတောင်းဆိုထားသနည်း။
၁၉ သင်နှင့်သင်၏ဝေပုံကော မည်သို့နည်း။ သင်သည် ဘုရားသခင့်နှုတ်မြွက်စကားတော်၊ သမ္မာကျမ်းစာကိုယုံကြည်လျှင် မြေကြီးပရဒိသုတွင် အသက်ရဖို့ တမ်းတပေမည်။ ထိုနေရာတွင် သင်ကိုယ်တိုင်ရှိပြီး ၎င်း၏ကောင်းချီးများစွာကိုခံစားနေခြင်း၊ ကမ္ဘာမြေကြီးကိုပြုစုစောင့်ရှောက်နေခြင်း၊ ရှင်ပြန်ထမြောက်လာသူတို့ကို ပျော်ရွှင်စွာကြိုဆိုနေခြင်းတို့ကိုပင် သင်မြင်ယောင်နိုင်ပေမည်။ အမှန်မှာ၊ ပရဒိသုသည် လူသားတို့နေထိုင်ရမည့်နေရာဖြစ်သည်။ ဘုရားသခင်သည် ကနဦးလူသားမောင်နှံကို ထိုသို့သောနေရာတွင်နေထိုင်ရန် ဖန်ဆင်းခဲ့သည်။ (ကမ္ဘာဦး ၂:၇-၉) ကိုယ်တော်ကလည်း နာခံသောလူသားများကို ပရဒိသုတွင် ထာဝစဉ်အသက်ရှင်စေလိုသည်။ သင်သည် နောက်ဆုံးတွင် ပရဒိသုမြေကြီးပေါ်၌အသက်ရှင်ကြရလိမ့်မည့် သန်းပေါင်းများစွာသောသူတို့တွင် ပါဝင်နိုင်ရန် သမ္မာကျမ်းစာနှင့်အညီ ပြုမူနေထိုင်မည်လော။ သင်သည် ကျွန်ုပ်တို့၏ကောင်းကင်ခမည်းတော် ယေဟောဝါကို အမှန်တကယ်ချစ်မြတ်နိုးပြီး ဘုရားသခင့်ပရောဖက်ပြုချက်စကားတော်၌ တည်ကြည်သောယုံကြည်ခြင်းရှိလျှင် ထိုနေရာတွင်ရှိနိုင်လိမ့်မည်။
[အောက်ခြေမှတ်ချက်များ]
^ အပိုဒ်၊ 6 နယူးယောက်မြို့၊ ကင်းမျှော်စင် သမ္မာကျမ်းစာနှင့် ဝေစာအသင်းမှထုတ်ဝေသော ဒံယေလပရောဖက်ပြုချက်ကိုအာရုံစူးစိုက်လော့! အခန်း ၁၁ နှင့် ကျမ်းစာစောင်များအပေါ်ထိုးထွင်းသိမြင်ခြင်း မှ “သီတင်းခုနစ်ဆယ်” ရှု။
^ အပိုဒ်၊ 7 နယူးယောက်မြို့၊ ကင်းမျှော်စင် သမ္မာကျမ်းစာနှင့် ဝေစာအသင်းမှထုတ်ဝေသော “ကျမ်းစာတစ်ကျမ်းလုံးဘုရားမှုတ်သွင်းရာဖြစ်ပြီးအကျိုးလည်းပြု၊” စာမျက်နှာ ၃၄၃-၄ [လိပ်] ရှု။
^ အပိုဒ်၊ 10 ဒံယေလပရောဖက်ပြုချက်ကို အာရုံစူးစိုက်လော့! စာအုပ်အခန်း ၄ နှင့် ၉ ရှု။
^ အပိုဒ်၊ 11 ဧပြီ ၁ ရက်၊ ၂၀၀၀ ကင်းမျှော်စင် တွင်ပါသည့် “ဒံယေလပရောဖက်ပြုချက်ကို အာရုံစူးစိုက်လော့!” ဟူသည့်ဆောင်းပါးရှု။
သင်မည်သို့ဖြေဆိုမည်နည်း
• ပထမဦးဆုံးပရောဖက်ပြုချက်ကား အဘယ်နည်း၊ ကတိထားရာမျိုးနွယ်တော်ကား မည်သူနည်း။
• ယေရှု၌ပြည့်စုံခဲ့သည့် မေရှိယဆိုင်ရာပရောဖက်ပြုချက်အချို့ကား အဘယ်နည်း။
• ဒံယေလ ၂:၄၄၊ ၄၅ သည် မည်သို့ ပြည့်စုံမည်နည်း။
• ဘုရားသခင့်ပရောဖက်ပြုချက်စကားတော်က နာခံသောလူသားများအတွက် အဘယ်အနာဂတ်ကို ညွှန်ပြသနည်း။
[လေ့လာရန်မေးခွန်းများ]
[စာမျက်နှာ ၁၈ ပါ ရုပ်ပုံ]
မြေကြီးပရဒိသုတွင် အသက်ရှင်နေထိုင်ရန် သင်မျှော်လင့်သလော