“ခရစ်ယာန်ဘာသာ” ၏ ပြောင်းလဲနေသောအသွင်အပြင်—ဘုရားသခင်လက်ခံနိုင်ဖွယ်ရှိသလော
“ခရစ်ယာန်ဘာသာ” ၏ ပြောင်းလဲနေသောအသွင်အပြင်—ဘုရားသခင်လက်ခံနိုင်ဖွယ်ရှိသလော
သင်၏ရုပ်ပုံလွှာကို ပန်းချီဆရာတစ်ဦးအား ရေးဆွဲစေသည်ဆိုပါစို့။ သူရေးဆွဲပြီးသောအခါ သင်ပီတိဖြာသွားသည်; ပုံတူပန်းချီကားမှာ ပီပြင်လှသည်။ ထိုပုံတူပန်းချီကားကို သင့်သားသမီး၊ မြေးမြစ်တို့ ဂုဏ်ယူဝင့်ကြွားစွာကြည့်ကြမည်ကို သင်စိတ်ကူးယဉ်ကြည့်သည်။
သို့သော် လူမျိုးဆက်အနည်းငယ်လွန်ပြီးနောက် သင်၏မျိုးဆက်တစ်ဦးက ပုံတူပန်းချီကားထဲမှ ကျွတ်ကုန်သည့်ဆံခြည်မျှင်ကြောင်းပုံက သိပ်မတင့်တယ်ဟုယူဆသောကြောင့် ဆံပင်ထည့်ဆွဲလိုက်ပေမည်။ အခြားတစ်ဦးက နှာခေါင်းပုံစံကိုမကြိုက်သောကြောင့် ပုံစံပြောင်းလိုက်ပြန်သည်။ နောက်လူမျိုးဆက်များက အခြား “ပြုပြင်မှုများ” ပြုလုပ်ခဲ့ကြရာ တဖြည်းဖြည်းနှင့် ပန်းချီကားမှာ သင်နှင့်မတူတော့ပေ။ ဤသို့ဖြစ်မည်ဟုသင်သိထားလျှင် မည်သို့ခံစားရမည်နည်း။ သင်ခံပြင်း၍ ဒေါသထွက်မည်မုချ။
ဤပန်းချီကား၏အဖြစ်အပျက်က အချုပ်အားဖြင့် အမည်ခံခရစ်ယာန်ချာ့ခ်ျ၏အဖြစ်အပျက်ကို ဖော်ပြနေသည်မှာ ဝမ်းနည်းစရာပင်။ ခရစ်တော်၏တမန်တော်များသေဆုံးပြီး မကြာမီ ကျမ်းစာကြိုပြောသည့်အတိုင်းပင် “ခရစ်ယာန်ဘာသာ” ၏အတည်ပြုထားသောအသွင်အပြင်သည် ပြောင်းလဲစပြုလာကြောင်း သမိုင်းကဖော်ပြသည်။—မဿဲ ၁၃:၂၄-၃၀၊ ၃၇-၄၃; တမန်တော် ၂၀:၃၀။ *
ကျမ်းစာမူများကို ယဉ်ကျေးမှုအမျိုးမျိုးနှင့် ခေတ်အသီးသီးအလိုက် ကျင့်သုံးခြင်းသည်မမှားပါ။ သို့သော် ခေတ်စားနေသောအတွေးအခေါ်နှင့်ကိုက်ညီဖို့ ကျမ်းစာသွန်သင်ချက်များကို ပြုပြင်ပြောင်းလဲခြင်းမှာမူ တခြားစီဖြစ်သည်။ သို့တိုင် ထိုသို့အမှန်ဖြစ်ပျက်ခဲ့ပြီ။ ဥပမာ၊ အရေးပါသောနယ်ပယ်အတော်များများ၌ ပြုပြင်ပြောင်းလဲခဲ့ရာများကို သုံးသပ်ကြည့်ပါ။
ချာ့ခ်ျနှင့်နိုင်ငံတော်ပေါင်းစည်းခြင်း
ယေရှုက ကိုယ်တော်၏အုပ်ချုပ်မှု သို့မဟုတ် ဘုရားသခင့်နိုင်ငံတော်သည် ကောင်းကင်နှင့်ဆိုင်၍ အချိန်တန်သော် လူ့အုပ်ချုပ်မှုမှန်သမျှကိုဖျက်ပြီး မြေကြီးတစ်ပြင်လုံးကိုအုပ်ချုပ်မည်ဟူ၍ သွန်သင်ခဲ့သည်။ (ဒံယေလ ၂:၄၄၊ ၄၅; မဿဲ ၆:၉၊ ၁၀) ၎င်းသည် လူ့အုပ်စိုးရေးစနစ်များမှတစ်ဆင့် အုပ်ချုပ်မည်မဟုတ်။ ယေရှုက “ငါ၏နိုင်ငံသည် ဤလောကနှင့်မစပ်ဆိုင်” ဟုဆိုခဲ့သည်။ (ယောဟန် ၁၇:၁၆; ၁၈:၃၆) ထို့ကြောင့် ယေရှု၏တပည့်များသည် ဥပဒေကိုလိုက်နာကြသော်လည်း နိုင်ငံရေးနှင့်မပတ်သက်ခဲ့ကြပါ။
သို့သော် လေးရာစု၊ ရောမဧကရာဇ်ကွန်စတင်တိုင်းခေတ်တိုင်လေသော် ခရစ်ယာန်အမည်ခံသူများစွာတို့သည် ခရစ်တော်ပြန်ကြွလာခြင်းနှင့် ဘုရားသခင့်နိုင်ငံတော်တည်ထောင်ခြင်းကို မစောင့်နိုင်မဆိုင်းနိုင်ဖြစ်လာကြသည်။ ထိုအခါ နိုင်ငံရေးနှင့်ပတ်သက်သော သူတို့၏သဘောထားမှာ တဖြည်းဖြည်းပြောင်းလဲလာခဲ့သည်။ “ကွန်စတင်တိုင်းမတိုင်မီက ခရစ်ယာန်များသည် ၎င်းတို့၏အရေးကိစ္စအကောင်အထည်ပေါ်ဖို့ [နိုင်ငံရေး]အာဏာကိုအသုံးပြုရန် မစဉ်းစားခဲ့ကြချေ။ ကွန်စတင်တိုင်းပြီးနောက်ပိုင်းမှ ခရစ်ယာန်ဘာသာနှင့် အမြင့်ဆုံးနိုင်ငံရေးသည် ဒွန်တွဲလာသည်” ဟုဥရောပ—သမိုင်းတစ်ခုဟူသောစာအုပ်ကဆိုသည်။ ထို့နောက် ပြန်လည်ပြုပြင်ထားသော ခရစ်ယာန်ဘာသာသည် ရောမအင်ပါယာ၏ တရားဝင် “ကမ္ဘာလုံးဆိုင်ရာ” သို့မဟုတ် “ကက်သလစ်” ဘာသာဖြစ်လာခဲ့သည်။
ချာ့ခ်ျနှင့်နိုင်ငံတော် ဤသို့ပေါင်းစည်းခြင်းကြောင့် “ခရစ်ယာန်များကိုနှိပ်စက်ညှဉ်းပန်းမှု နောက်ဆုံးလှိုင်းတံပိုးကြီးရိုက်ခတ်ပြီး အနှစ် ၈၀ မျှသာအကြာ အေ.ဒီ. ၃၈၅ တိုင်လေသော် ချာ့ခ်ျကိုယ်နှိုက်က အယူကွဲလွဲသူများကို သေဒဏ်စီရင်စပြုလာပြီး ယင်း၏တရားဟောဆရာများသည် ဧကရာဇ်များနှင့်တန်းတူနီးပါး အာဏာကိုအသုံးပြုနေကြသည်” ဟုလူ့ခေတ်ကြီးစွယ်စုံကျမ်းကဆိုသည်။ ထို့ကြောင့် သက်ဝင်ယုံကြည်စေသည့်နည်းအစား ဓားမိုး၍ဘာသာပြောင်းစေသည့်ခေတ်စတင်လာပြီး ပထမရာစုရှိနှိမ့်ချသော တရားဟောပြောသူများအစား ဘွဲ့ထူးခံ အာဏာမက်သောတရားဟောဆရာများရှိလာသည်။ (မဿဲ ၂၃:၉၊ ၁၀; ၂၈:၁၉၊ ၂၀) သမိုင်းဆရာ အိပ်ခ်ျ. ဂျီ. ဝဲလ်စ်က လေးရာစုမှခရစ်ယာန်ဘာသာ “နှင့်နာဇရက်မြို့သား ယေရှု၏သွန်သင်ချက်များသည် အကြီးအကျယ်ကွဲပြားခြားနား” ကြောင်းရေးသားဖော်ပြခဲ့သည်။ ဤ “အကြီးအကျယ်ကွဲပြားခြားနားမှုများ” က ဘုရားသခင်နှင့် ခရစ်တော်တို့အကြောင်းနှင့်ဆိုင်သော အခြေခံသွန်သင်ချက်များကိုပင် ပြောင်းသွားစေခဲ့သည်။
ဘုရားသခင်ကိုပြန်လည်ပုံဖော်ခြင်း
ခရစ်တော်နှင့် ကိုယ်တော်၏တပည့်တော်များက အစောပိုင်းကျမ်းစာလက်ရေးစာမူများတွင် အကြိမ် ၇,၀၀၀ ခန့်တွေ့ရသည့် ယေဟောဝါဟူသော ကိုယ်ပိုင်နာမတော်ဖြင့်ခွဲခြားဖော်ပြသော “ခမည်းတော်ဘုရားသခင်တစ်ပါးတည်း” သာရှိကြောင်း သွန်သင်ခဲ့ကြ၏။ (၁ ကောရိန္သု ၈:၆; ဆာလံ ၈၃:၁၈) ယေရှုသည် ဘုရားသခင်၏ဖန်ဆင်းခြင်းကိုခံခဲ့ရသည်; ကက်သလစ်ဒူးဝေးဘာသာပြန်ကျမ်းက ကောလောသဲ ၁:၁၅ တွင် ကိုယ်တော်သည် “သတ္တဝါအပေါင်းတွင် သားဦး” ဖြစ်သည်ဟုဆိုသည်။ ထို့ကြောင့် ဖန်ဆင်းခံရသောသတ္တဝါတစ်ပါးအနေနှင့် ယေရှုကဤသို့ပွင့်ပွင့်လင်းလင်းဖော်ပြခဲ့သည်– “ငါ့ခမည်းတော်သည် ငါ့ထက်သာ၍ကြီးမြတ်တော်မူ၏။”—ယောဟန် ၁၄:၂၈။
သို့ရာတွင် တတိယရာစုတိုင်သော် ဩဇာအရှိန်အဝါရှိသည့်တရားဟောဆရာအချို့သည် အယူလွဲဂရိအတွေးအခေါ်ပညာရှင်ပလေတို၏ သုံးပါးပေါင်းတစ်ဆူသွန်သင်ချက်ကို စွဲလမ်းနှစ်သက်ကြပြီး သုံးပါးတစ်ဆူပုံသေနည်းနှင့်ကိုက်ညီရန် ဘုရားသခင်ကိုပြန်လည်ပုံဖော်ကြသည်။ နောက်ပိုင်းရာစုနှစ်များတွင် ဤအယူဝါဒသည် ကျမ်းစာနှင့်ဆန့်ကျင်ပြီး ယေရှုကို ယေဟောဝါနှင့်တန်းတူဖြစ်စေရန် မြှင့်တင်ခဲ့၍ ဘုရားသခင့်သန့်ရှင်းသောဝိညာဉ်တော် သို့မဟုတ် လှုပ်ရှားသောစွမ်းအားကို ပုဂ္ဂိုလ်တစ်ဦးဖြစ်စေခဲ့သည်။
အယူလွဲအယူအဆဖြစ်သည့် သုံးပါးတစ်ဆူကို ချာ့ခ်ျ၏ခံယူမှုနှင့်စပ်လျဉ်း၍ ကက်သလစ်စွယ်စုံကျမ်းသစ်က ဤသို့ဆိုသည်– “၄ ရာစုအဆုံးမတိုင်မီ၊ ‘သုံးပါးတစ်ဆူဘုရား’ အယူသည် အတည်တကျပုံဖော်ခြင်းမရှိသေး။ ခရစ်ယာန်ဘဝနှင့် ၎င်းခံယူချက်ထဲ အပြည့်အဝလက်ခံမထားသေးသည်မှာ သေချာသည်။ သို့သော် ၎င်းပုံဖော်ချက်ပင်လျှင် သုံးပါးပေါင်းတစ်ဆူ တရားသေအယူဝါဒ ဟူသောအမည်ကိုခံယူခဲ့သည်။ တမန်တော်များခေတ်နောက်ပိုင်းဖခင်များဘောင်တွင် ထိုသို့သောအတွေးမျိုး သို့မဟုတ် အမြင်မျိုးနှင့် အနည်းငယ်မျှပင်နီးစပ်သောအတွေးအခေါ်မျိုး တစ်ခုမျှပင်မရှိချေ။”
အလားတူ၊ အမေရိကားနားစွယ်စုံကျမ်းက ဤသို့ဆိုသည်– “စတုတ္ထရာစု သုံးပါးတစ်ဆူအယူဝါဒသည် ဘုရားသခင့်ဇာတိတော်နှင့်ပတ်သက်၍ ရှေးခရစ်ယာန်သွန်သင်ချက်ကို တိကျမှန်ကန်စွာ ရောင်ပြန်မဟပ်ပါ။ ယင်းအစား ထိုသွန်သင်ချက်မှ တိမ်းလွဲခဲ့ခြင်းဖြစ်သည်။” သည်အောက်စဖို့ဒ် သမ္မာကျမ်းစာ အဖော်မွန် စာအုပ်က သုံးပါးတစ်ဆူကို “နောက်ပိုင်းတွင်ပုံဖော်ခဲ့သော အယူဝါဒများ” အနက်တစ်ခုအဖြစ်ခေါ်ဆိုထားသည်။ သို့သော် ချာ့ခ်ျအတွင်းလက်ခံလာသည့် အယူလွဲအယူအဆတို့တွင် သုံးပါးတစ်ဆူတစ်ခုတည်းသာမဟုတ်ပါ။
စိုးလ်ကိုပြန်လည်ပုံဖော်ခြင်း
လူ့ခန္ဓာကိုယ်သေပြီးနောက် မသေနိုင်သောစိုးလ် လူတွင်ရှိကြောင်း ယနေ့လူအများယုံကြည်ကြသည်။ သို့သော် ဤချာ့ခ်ျသွန်သင်ချက်သည်လည်း နောက်ပိုင်းပေါ်လာသည့်အယူတစ်ခုဖြစ်ကြောင်း သင်သိပါသလော။ သေလွန်သူများသည် အိပ်ပျော်နေသကဲ့သို့ “အဘယ်အရာကိုမျှမသိ” ဟူသော ကျမ်းစာအမှန်တရားကို ယေရှုထောက်ခံခဲ့သည်။ (ဒေ. ၉:၅; ယောဟန် ၁၁:၁၁-၁၃) ရှင်ပြန်ထမြောက်ခြင်း—သေခြင်း၌အိပ်ပျော်နေခြင်းမှ ‘တစ်ဖန်ပြန်မတ်တတ်ရပ်ခြင်း’—အားဖြင့် အသက်ပြန်ရရှိကြမည်။ (ယောဟန် ၅:၂၈၊ ၂၉) မသေနိုင်သောအဖြစ်သည် သေခြင်းနှင့်ကင်းလွတ်သောကြောင့် မသေနိုင်သောစိုးလ်ရှိမည်ဆိုလျှင် ရှင်ပြန်ထမြောက်ခြင်းလိုမည်မဟုတ်ပါ။
ယေရှုသည် လူတို့ကိုသေခြင်းမှထမြောက်စေခြင်းဖြင့် ကျမ်းစာသွန်သင်ချက်ဖြစ်သော ရှင်ပြန်ထမြောက်ခြင်းကို ဖော်ပြခဲ့သည်။ လေးရက်ကြာသေနေခဲ့သော လာဇရု၏ဥပမာကိုကြည့်ပါ။ လာဇရုကို ယေရှုရှင်ပြန်ထမြောက်စေခဲ့သောအခါ သူသည် အသက်ရှင်၍ လေကိုရှူရှိုက်နေသောလူသားတစ်ဦးအဖြစ် သင်္ချိုင်းဂူထဲမှထွက်လာခဲ့သည်။ သေခြင်းမှလာဇရုနိုးထလာခဲ့သောအခါ မသေနိုင်သောစိုးလ်သည် ကောင်းကင်ဘုံမှသူ့ကိုယ်ခန္ဓာထဲသို့ လှစ်ခနဲပြန်မဝင်ခဲ့ပါ။ ထိုသို့ဖြစ်ခဲ့မည်ဆိုလျှင် ယေရှုသည် သူ့ကိုရှင်ပြန်ထမြောက်စေခြင်းဖြင့် သူ့အားကျေးဇူးပြုမည်မဟုတ်ပေ!—ယောဟန် ၁၁:၃၉၊ ၄၃၊ ၄၄။
သို့ဖြစ်လျှင် မသေနိုင်သောစိုးလ်သီအိုရီ၏ရင်းမြစ်ကား အဘယ်နည်း။ ခရစ်ယာန်ကျမ်းပညာ၏ ဝက်ဘ်မင်စတာအဘိဓာန်ကျမ်းက ၎င်းအယူအဆသည် “ကျမ်းစာဖော်ပြချက်ထက် ဂရိအတွေးအခေါ်ကြောင့်ဖြစ်ပေါ်လာသည်” ဟုဆိုသည်။ ဂျူးစွယ်စုံကျမ်းကဤသို့ရှင်းပြသည်– “ခန္ဓာကိုယ်ပြိုကွဲသည့်နောက် စိုးလ်ဆက်လက်အသက်ရှင်သည် ဟူသောအယူမှာ ယုံကြည်ချက်ရိုးရိုးကလေးအတိုင်းဖြစ်မည့်အစား အတွေးအခေါ်ပညာ သို့မဟုတ် ကျမ်းပညာရပ်ဆိုင်ရာ တွေးဆမှုဖြစ်သဖြင့် သမ္မာကျမ်းစာတွင် မည်သည့်နေရာ၌မျှ သိသာထင်ရှားစွာသွန်သင်ထားခြင်းမရှိပါ။”
များသောအားဖြင့် မှားယွင်းမှုတစ်ခုသည် နောက်ထပ်တစ်ခုကိုဖြစ်ပေါ်စေလေ့ရှိရာ မသေနိုင်သည့်စိုးလ်သွန်သင်ချက်နှင့်ပတ်သက်၍လည်း ထိုအတိုင်းဖြစ်သည်။ ယင်းက မီးငရဲ၌ထာဝစဉ်ညှဉ်းဆဲခြင်းဟူသော အယူလွဲအယူအဆကိုလမ်းဖွင့်ပေးပါသည်။ * အမှန်မှာ၊ကျမ်းစာက “အပြစ်တရား၏အခကား” ထာဝစဉ်ညှဉ်းဆဲခြင်းဟုမဆိုဘဲ “သေခြင်း” ဟု အတိအလင်းဖော်ပြထားသည်။ (ရောမ ၆:၂၃) ထို့ကြောင့် ရှင်ပြန်ထမြောက်ခြင်းကိုဖော်ပြရာတွင် ဂျိမ်းဘုရင်ဘာသာပြန်ကျမ်းက ဤသို့ဆိုသည်– “သမုဒ္ဒရာသည် မိမိ၌ရှိသောလူသေတို့ကို အပ်ပေး၏။ သေခြင်းနှင့်ငရဲသည် မိမိတို့၌ရှိသောလူသေတို့ကို အပ်ပေးကြ၏။” အလားတူ ဒူးဝေးကျမ်းက “သမုဒ္ဒရာ၊ . . . သေခြင်းနှင့်ငရဲတို့သည် မိမိတို့၏လူသေများကို ပေးအပ်ကြ၏” ဟုဆိုသည်။ မှန်ပါ၏၊ ရိုးရိုးပြောရလျှင် ယေရှုပြောဆိုခဲ့သကဲ့သို့ ငရဲ၌ရှိသူတို့သည် သေလွန်၊ ‘အိပ်ပျော်’ နေကြသည်။—ဗျာဒိတ် ၂၀:၁၃။
ငရဲ၌ထာဝစဉ်အပြစ်စီရင်ခံရခြင်းသွန်သင်ချက်သည် လူများကို ဘုရားသခင်နှင့်ရင်းနှီးကျွမ်းဝင်စေသည်ဟု သင်အမှန်တကယ်ယုံပါသလော။ ဝေးလေစွ။ တရားမျှတ၍ မေတ္တာရှိသောလူတို့၏စိတ်တွင် ယင်းအယူသည် မနှစ်မြို့ဖွယ်အယူအဆပင်! တစ်ဖက်တွင်မူ သမ္မာကျမ်းစာက “ဘုရားသခင်သည် ချစ်ခြင်းမေတ္တာဖြစ်” တော်မူ၏၊ တိရစ္ဆာန်များကို ရက်စက်ကြမ်းကြုတ်ခြင်းကိုပင် ကိုယ်တော်စက်ဆုပ်ရွံရှာ၏ဟု သွန်သင်သည်။—၁ ယောဟန် ၄:၈; သု. ၁၂:၁၀; ယေရမိ ၇:၃၁; ယောန ၄:၁၁။
မျက်မှောက်ခေတ်တွင် “ပုံတူပန်းချီကား” ကို ရုပ်ပျက်စေခြင်း
ယနေ့တိုင်အောင် ဘုရားသခင်နှင့် ခရစ်ယာန်ဘာသာကို ရုပ်ပျက်စေကြဆဲဖြစ်သည်။ ဘာသာတရားဆိုင်ရာပါမောက္ခတစ်ဦးက သူ၏ပရိုတက်စတင့်ချာ့ခ်ျတွင် “သမ္မာကျမ်းစာနှင့် အယူဝါဒ၏အခွင့်အာဏာတစ်ဖက်၌ ကွဲပြားခြားနားသည့် လူ့အတွေးအခေါ်များ၏အခွင့်အာဏာ၊ ခရစ်တော်၏သြဇာအာဏာကို ချာ့ခ်ျကသစ္စာစောင့်ခြင်းတစ်ဖက်၌ ခေတ်ကာလ၏သဘောနှင့်အညီ ခရစ်ယာန်ဘာသာကို ပြန်လည်ပြုပြင်ပြောင်းလဲခြင်းတို့သည် လွန်ဆွဲနေကြ၏ဟု များမကြာမီကဖော်ပြသည်။ ဆုံးဖြတ်စရာကိစ္စမှာ ချာ့ခ်ျအစီအစဉ်ကို မည်သူသတ်မှတ်ပြဋ္ဌာန်းပေးသနည်း၊ . . . သန့်ရှင်းသောကျမ်းစာစောင်လော၊ ခေတ်စားနေသောအဓိကတွေးဆချက်လော။”
ဝမ်းနည်းစရာမှာ၊ “ခေတ်စားနေသောအဓိကတွေးဆချက်” သည် အနိုင်ရနေဆဲဖြစ်သည်။ ဥပမာ၊ ချာ့ခ်ျများစွာတို့သည် တိုးတက်ဟန်ရှိစေဖို့၊ အမြင်ကျယ်ပုံပေါက်စေဖို့ ကိစ္စရပ်အမျိုးမျိုးတွင် မိမိတို့၏အနေအထားကိုပြောင်းလဲခဲ့ကြကြောင်း လူအများသိသည်။ အဖွင့်ဆောင်းပါး၌ဖော်ပြခဲ့သကဲ့သို့ အထူးသဖြင့် ကိုယ်ကျင့်တရားဆိုင်ရာ ကိစ္စရပ်များတွင် ချာ့ခ်ျသည် အတော်အတန်လွတ်လပ်စွာ ဆုံးဖြတ်ခွင့်ပေးလာပေပြီ။ သို့သော် သမ္မာကျမ်းစာက မတရားမေထုန်ပြုခြင်း၊ သူ့မယားပြစ်မှားခြင်းနှင့် လိင်တူမေထုန်ပြုခြင်းတို့သည် ဘုရားသခင့်မျက်မှောက်တွင် ကြီးလေးသောအပြစ်များဖြစ်ပြီး ထိုအပြစ်များကိုပြုကျင့်သူတို့သည် “ဘုရားသခင်၏နိုင်ငံတော်ကို အမွေမခံရကြ” ဟုရှင်းရှင်းဖော်ပြထားသည်။—၁ ကောရိန္သု ၆:၉၊ ၁၀; မဿဲ ၅:၂၇-၃၂; ရောမ ၁:၂၆၊ ၂၇။
အထက်တွင်ကိုးကားထားသောစကားများကို တမန်တော်ပေါလုရေးသားစဉ်အခါက သူ့ဝန်းကျင်ရှိ ဂရိနှင့်ရောမလောကတွင် ဆိုးသွမ်းမှုပုံစံအမျိုးမျိုးပျံ့နှံ့လျက်ရှိသည်။ ပေါလုဤသို့အကြောင်းပြနိုင်ပါသည်– ‘ကြီးလေးတဲ့လိင်ဆိုင်ရာအပြစ်တွေကြောင့် သောဒုံမြို့နဲ့ ဂေါမောရမြို့တို့ကို ဘုရားသခင်မီးရှို့ဖျက်ဆီးခဲ့တာမှန်ပါတယ်၊ ဒါပေမဲ့ အဲဒါက လွန်ခဲ့တဲ့အနှစ် ၂,၀၀၀ ကပဲ! အဲဒါက အမြင်ပွင့်နေတဲ့ဒီခေတ်နဲ့ သက်ဆိုင်မှာမဟုတ်ပါဘူး။’ သို့သော် သူသည် ထိုသို့ကျိုးကြောင်းကိုက်ညီစေရန်မပြုခဲ့ဘဲ ကျမ်းစာအမှန်တရားကိုပေါ့ပျက်စေရန် လုံးဝမပြုခဲ့ပါ။—ဂလာတိ ၅:၁၉-၂၃။
မူလ “ပုံတူပန်းချီကား” ကိုမျှော်ကိုးပါ
ယေရှုသည် သူ့ခေတ်မှ ဂျူးဘာသာရေးခေါင်းဆောင်များကို စကားပြောဆိုရာတွင် ကိုယ်တော်က သူတို့သည် ‘လူတို့စီရင်သောပညတ်များကိုသွန်သင်၍ ဆုံးမသောကြောင့်’ သူတို့၏ဝတ်ပြုရေးမှာ ‘အချည်းနှီး’ ဖြစ်နေကြောင်းပြောခဲ့သည်။ (မဿဲ ၁၅:၉) ထိုကျမ်းပညာရှင်များသည် မောရှေမှတစ်ဆင့်လာသော ယေဟောဝါ၏ပညတ်တော်များကို ထိုခရစ်ယာန်တရားဟောဆရာများပြုခဲ့၍၊ ပြုဆဲရှိကြသည့်နည်းတူ ခရစ်တော်၏သွန်သင်ချက်ဖြစ်သော ဘုရားသခင့်အမှန်တရားအပေါ် ရိုးရာထုံးတမ်း “ဆေး” ကိုပက်ဖျန်းခဲ့ကြသည်။ သို့သော် ယေရှုသည် စိတ်နှလုံးရိုးဖြောင့်သူတို့အကျိုးအတွက် မှားယွင်းမှုမှန်သမျှကို ဖွင့်ဟပြခဲ့သည်။ (မာကု ၇:၇-၁၃) ယေရှုသည် လူကြိုက်များသည်ဖြစ်စေ၊ မများသည်ဖြစ်စေ အမှန်တရားကိုပြောဆိုခဲ့သည်။ ဘုရားသခင့်နှုတ်မြွက်စကားတော်ကို အာဏာပိုင်အဖြစ် ကိုယ်တော်အစဉ်အသုံးပြုခဲ့သည်။—ယောဟန် ၁၇:၁၇။
ယေရှုသည် ခရစ်ယာန်အမည်ခံသူအများစုနှင့် ကွဲပြားခြားနားလှသည်တကား! အမှန်မှာ၊ ကျမ်းစာကဤသို့ကြိုဟောထားသည်– “လူတို့သည် . . . နောက်ဆုံးအသစ်အဆန်းကို တလိုတလားရှိလိမ့်မည်၊ မိမိအကြိုက်နှင့်ညီသော ဆရာများနောက်လိုက်၍ [အမှန်] တရားကိုနာယူကြမည့်အစား ဒဏ္ဍာရီစကားကို လက်ခံကြလိမ်မည်။” (၂ တိမောသေ ၄:၃၊ ၄၊ ယေရုရှလင်သမ္မာကျမ်းစာ။) ကျွန်ုပ်တို့အနည်းအကျဉ်းသုံးသပ်ခဲ့သည့် ဤ “ဒဏ္ဍာရီစကား” တို့သည် ဝိညာဉ်ရေးအရ ဖျက်ဆီးတတ်၏၊ ဘုရားသခင့်နှုတ်မြွက်စကားတော်၏အမှန်တရားမူကား တည်ဆောက်ပေးပြီး ထာဝရအသက်သို့ပို့ဆောင်သည်။ ဤအမှန်တရားကို စစ်ဆေးကြည့်ရန် ယေဟောဝါသက်သေများက သင့်ကိုတိုက်တွန်းပါသည်။—ယောဟန် ၄:၂၄; ၈:၃၂; ၁၇:၃။
[အောက်ခြေမှတ်ချက်များ]
^ အပိုဒ်၊ 4 ဂျုံပင်နှင့် တောပင် ပုံဥပမာနှင့် ကျယ်သောလမ်းနှင့် ကျဉ်းသောလမ်းပုံဥပမာ (မဿဲ ၇:၁၃၊ ၁၄) တွင် ယေရှုဖော်ပြခဲ့သကဲ့သို့ စစ်မှန်သောခရစ်ယာန်ဘာသာကို ခေတ်များတစ်လျှောက် လူနည်းစုသာ ဆက်၍လိုက်စားကြပေမည်။ သို့သော် ကိုယ်ကိုကိုယ်နှင့် ကိုယ့်သွန်သင်ချက်များကို စစ်မှန်သောခရစ်ယာန်ဘာသာ၏အသွင်အဖြစ် ထောက်ခံကြမည့် တောပင်နှင့်တူသောလူအများစု၏ လွှမ်းမိုးမှုကို သူတို့ခံကြရမည်။ ၎င်းအသွင်သဏ္ဌာန်ကို ကျွန်ုပ်တို့၏ဆောင်းပါးက ရည်ညွှန်းနေခြင်းဖြစ်သည်။
^ အပိုဒ်၊ 19 “ငရဲ” ဟူသည် ဟေဗြဲစကားလုံးရှီးအိုးလ်နှင့် ဂရိစကားလုံးဟေးဒီးစ်၏ပြန်ဆိုချက်ဖြစ်ပြီး နှစ်ခုစလုံးက “သင်္ချိုင်း” ကိုဆိုလိုသည်။ ထို့ကြောင့် ဂျိမ်းဘုရင်ဘာသာပြန်၏ အင်္ဂလိပ်ဘာသာပြန်သူများက ရှီးအိုးလ်ကို “ငရဲ” ဟူ၍ ၃၁ ကြိမ်ပြန်ဆိုကြစဉ် “သင်္ချိုင်း” ဟူ၍လည်း ၃၁ ကြိမ်နှင့် “တွင်း” ဟူ၍ ၃ ကြိမ်ပြန်ဆိုခဲ့ကြရာ ဤအသုံးအနှုန်းတို့သည် အခြေခံအားဖြင့် တစ်ခုတည်းကိုဆိုလိုကြောင်းတင်ပြသည်။
[စာမျက်နှာ ၇ ပါ လေးထောကွက်/ရုပ်ပုံ]
ခရစ်ယာန်ဟူသော အမည်၏ဇာစ်မြစ်
ယေရှုသေဆုံးပြီး အနည်းဆုံးဆယ်နှစ်တိုင် ကိုယ်တော်၏နောက်လိုက်များကို “လမ်းစဉ်” နှင့်သက်ဆိုင်သူများအဖြစ် သိမှတ်ကြသည်။ (တမန်တော် ၉:၂၊ ကဘ; တမန်တော် ၁၉:၉၊ ၂၃; ၂၂:၄) အဘယ်ကြောင့်နည်း။ အကြောင်းမှာ၊ သူတို့အသက်ရှင်နေထိုင်ပုံက ‘လမ်းခရီး၊ အမှန်တရားနှင့် အသက်’ ဖြစ်သူ ယေရှုခရစ်ကိုယုံကြည်ခြင်းအပေါ် ဗဟိုပြုထားကြသောကြောင့်ဖြစ်သည်။ (ယောဟန် ၁၄:၆) ထို့နောက် စီ.အီး. ၄၄ နောက်ပိုင်း၊ ရှုရိအန္တိအုတ်မြို့တွင် ယေရှု၏တပည့်တော်များသည် ‘ခရစ်ယာန်ဟူ၍ ဘုရားသခင့်အလိုတော်နှင့်အညီ ခေါ်ဝေါ်သမုတ်ခြင်း’ ကိုခံခဲ့ကြရသည်။ (တမန်တော် ၁၁:၂၆) ဤအမည်ကို အစိုးရအရာရှိများပင်လျှင် ချက်ချင်းလက်ခံ၍အသုံးပြုကြလေသည်။ (တမန်တော် ၂၆:၂၈) ၎င်းအမည်သစ်သည် ခရစ်ယာန်ဘဝလမ်းစဉ်ကို အသွင်မပြောင်းလဲစေခဲ့ဘဲ ခရစ်တော်၏ပုံသက်သေအတိုင်း ဆက်၍တည်ရှိခဲ့ပါသည်။—၁ ပေတရု ၂:၂၁။
[စာမျက်နှာ ၇ ပါပုံစာ]
ယေဟောဝါသက်သေများသည် သူတို့၏အမှုဆောင်ခြင်းလုပ်ငန်းအားဖြင့် ဘုရားသခင့်နှုတ်မြွက်စကားတော်၊ သမ္မာကျမ်းစာသို့ လူတို့ကိုလမ်းပြပေး
[Picture Credit Line on page 4]
ဝဲမှတတိယ– United Nations/Photo by Saw Lwin