ဘုရားသခင်ကို နှစ်သက်စေသော တေးဂီတ
ဘုရားသခင်ကို နှစ်သက်စေသော တေးဂီတ
တေးဂီတကို “အနုပညာရှိသမျှတွင် ရှေးအကျဆုံးနှင့် သဘာဝအကျဆုံး” ဟုဖော်ပြခဲ့သည်။ ၎င်းသည် ဘာသာစကားကဲ့သို့ လူတို့ကို တိရစ္ဆာန်များနှင့်ခြားနားစေသော ထူးမြတ်သည့်ဆုကျေးဇူးတစ်ခုဖြစ်၏။ တေးဂီတသည် စိတ်ကို လှုပ်ရှားစေသည်။ တေးဂီတသည် နားဝင်ချိုကာ စိတ်ထဲစွဲကျန်ရစ်နိုင်ပြီး ထို့ထက်ကား ဘုရားသခင်နှစ်သက်စရာဖြစ်နိုင်သည်။
သမ္မာကျမ်းစာဖော်ပြသည့်အတိုင်း ဣသရေလလူများသည် ဂီတအထုံပါခဲ့ကြသည်။ တေးဂီတသည် “ရှေးကျမ်းစာခေတ်တွင် အထင်ကရအနုပညာတစ်ခု” ဖြစ်ခဲ့သည်ဟု အန်ဂါရ်၏ကျမ်းစာအဘိဓာန် ကဆိုသည်။ နေ့စဉ်အသက်တာ၏ အစိတ်အပိုင်းတစ်ခုအဖြစ် သူတို့၏ဝတ်ပြုရေးတွင် သီဆိုခြင်းနှင့် တူရိယာတီးမှုတ်ခြင်းတို့ ပါဝင်ခဲ့သည်။ သို့သော် လူ့အသံကို အဓိကအသုံးပြုခဲ့ကြသည်။
ဘုရင်ဒါဝိဒ်သည် သားတော်ရှောလမုန် ဆောက်လုပ်ခဲ့သော ဗိမာန်တော်ကိုမအပ်နှံမီ တဲတော်၌ “သီချင်းဆိုရာအမှုတော်” ဆောင်ဖို့အတွက် လေဝိသားများမှ ကိုယ်စားလှယ်များကို ခန့်အပ်ခဲ့သည်။ (၁ ရာဇဝင်ချုပ် ၆:၃၁၊ ၃၂) ယေဟောဝါရောက်ရှိခြင်းကို ကိုယ်စားပြုသည့် ပဋိညာဉ်သေတ္တာတော်သည် ယေရုရှလင်သို့ရောက်လာသောအခါ “ထာဝရဘုရား၏ဂုဏ်ကျေးဇူးတော်ကို အလှည့်အတိုင်းချီးမွမ်းစေခြင်းငှာ” လေဝိသားအချို့ကို ဒါဝိဒ်စီစဉ်ခဲ့သည်။ သူတို့၏ချီးမွမ်းကျူးဧခြင်းကို “ခွက်ကွင်း . . . စောင်းတယော . . . တံပိုး” တို့နှင့် တွဲဖက်တီးမှုတ်သီဆိုခဲ့ကြ၏။ “‘ထာဝရဘုရား၏ကရုဏာတော် [သနားခြင်း] သည် အစဉ်အမြဲတည်’ သောကြောင့်ဂုဏ်ကျေးဇူးတော်ကို ချီးမွမ်းစေခြင်းငှာ” ဤသူတို့ကိုခန့်ထားသည်။—၁ ရာဇဝင်ချုပ် ၁၆:၄-၆၊ ၄၁; ၂၅:၁။
“ထာဝရဘုရား [ယေဟောဝါ] ၏ကရုဏာတော် [သနားခြင်း] သည် အစဉ်အမြဲတည်သည်” ဟူသော ထပ်ကျော့ပုဒ်သည် တေးဂီတနှင့် အများဆုံးဆက်စပ်မှုရှိသော သမ္မာကျမ်းစာစောင်ဖြစ်သည့် ဆာလံကျမ်းတွင် အကြိမ်ပေါင်းများစွာပါရှိသည်။ ဥပမာ၊ ဆာလံအခန်းကြီး ၁၃၆ ၏အခန်းငယ် ၂၆ ခုစလုံး၏ပထမပိုင်းကို ၎င်းဖြင့်ဖွဲ့ထားသည်။ “၎င်း၏တိုတောင်းခြင်းက ဆိုရလွယ်ကူစေသည့်အပြင် ကြားသူတိုင်း မှတ်မိနိုင်သည်” ဟုကျမ်းပညာရှင်တစ်ဦးကဆိုသည်။
တူရိယာများကို ကျယ်ပြန့်စွာအသုံးပြုခဲ့ကြကြောင်း ဆာလံသီချင်း၏ခေါင်းစီးများကဖော်ပြသည်။ ဆာလံ ၁၅၀ တွင် ကြိုးနှင့်တူရိယာများအပြင် တံပိုး၊ စောင်း၊ ပတ်သာ၊ ပလွေနှင့် လင်းကွင်းတို့ကို ဖော်ပြထား၏။ မည်သို့ပင်ဖြစ်ပါစေ၊ အဓိကမှာ လူ့အသံပင်ဖြစ်သည်။ အခန်းငယ် ၆ တွင်ဤသို့တိုက်တွန်းသည်– “အသက်ရှိသောသူအပေါင်းတို့သည် ထာဝရဘုရားကို ချီးမွမ်းကြစေ။ ဟာလေလုယ။”
တေးဂီတသည် ကျွန်ုပ်တို့၏ခံစားချက်များကို ဖော်ပြသည့်အတွက် ကျမ်းစာခေတ်က ဝမ်းနည်းပူဆွေးမှုများကို ငိုချင်းများ၊ တတွတ်တွတ်ရွတ်ဆိုချက်များဖြင့် ဖော်ပြလေ့ရှိသည်။ သို့ရာတွင် ဣသရေလ၏တေးစုတွင် အဆိုပါသီဆိုမှုသည် မများချေ။ “ငိုချင်း သို့မဟုတ် မြည်တမ်းခြင်းတွင် တတွတ်တွတ်ရွတ်ဆိုနည်းသည် တေးသံ သို့မဟုတ် စကားအသံထားပြောင်းလဲခြင်းနှင့် နှုတ်ဖြင့်အလေးအနက်ဖော်ပြခြင်းတို့ထက် ပိုသင့်၏” ဟူ၍ ကျမ်းစာစောင်များအပေါ် ထိုးထွင်းသိမြင်ခြင်း ကျမ်းစာစွယ်စုံကျမ်းက ဖော်ပြသည်။ *
ယေရှုမသေမီညက ယေရှုနှင့်ကိုယ်တော်၏သစ္စာရှိတမန်တော်များသည် ဟာလဲဆာလံသီချင်းစာသားများကို အသံအနိမ့်အမြင့်ဖြင့် ယေဟောဝါအား ချီးမွမ်းကျူးဧသီဆိုခဲ့ကြသည်။ (ဆာလံ ၁၁၃-၁၁၈) ယင်းက ယေရှု၏တပည့်တော်များကို သူတို့၏သခင်အား ဆုံးရှုံးရတော့မည့်အဖြစ်ကို ရင်ဆိုင်ရန် ခွန်အားရှိစေလိုက်မည်ဖြစ်ခြင်း! ထို့ထက်ကား၊ သူတို့သည် “ထာဝရဘုရား၏ကရုဏာတော် [သနားခြင်း] သည် အစဉ်အမြဲတည်သည်” ဟူသော ထပ်ကျော့ပုဒ်ကို ငါးကြိမ်တိုင်သီဆိုကြစဉ် စကြဝဠာပိုင်သအုပ်စိုးရှင်ယေဟောဝါ၏ သစ္စာရှိကျေးကျွန်များ ဆက်၍ဖြစ်ကြမည်ဟူသော သူတို့၏စိတ်ဆုံးဖြတ်ချက်မှာ သာ၍ခိုင်မာခဲ့မည်ဖြစ်သည်။—ဆာလံ ၁၁၈:၁-၄၊ ၂၉။
ဧဖက်မြို့နှင့်ကောလောသဲမြို့တို့မှ အစောပိုင်းခရစ်ယာန်များသည် “ဆာလံသီချင်းမှစသော [ခရစ်ယာန်]ဓမ္မသီချင်း” များသီဆိုခဲ့ကြသည်။ အဆိုပါတေးသီချင်းများအပြင် သူတို့၏စိတ်နှလုံးထဲတွင် သီဆိုခဲ့ကြသည့် “ဝိညာဉ်ရေးသီချင်းများ” ကိုထပ်ဆင့်ခဲ့ကြသည်။ (ဧဖက် ၅:၁၉; ကောလောသဲ ၃:၁၆၊ ကဘ) သီချင်းဆိုခြင်း၊ စကားပြောခြင်းတို့ဖြင့် ချီးမွမ်းထောမနာပြုရန် သူတို့နှုတ်ကို လျော်ညီစွာအသုံးပြုခဲ့ကြသည်။ “စိတ်နှလုံးအပြည့်ရှိသည်အတိုင်း နှုတ်မြွက်တတ်၏” ဟူ၍ ယေရှုအတိအလင်းပြောခဲ့သည်မဟုတ်ပေလော။—မဿဲ ၁၂:၃၄။
ဘုရားသခင် မနှစ်သက်သည့်တေးဂီတ
သမ္မာကျမ်းစာတွင်ဖော်ပြသော တေးဂီတအားလုံးကို ဘုရားသခင်နှစ်သက်ခဲ့သည်မဟုတ်။ ပညတ်တော်ဆယ်ပါးအပါအဝင် ပညတ်တရားကို မောရှေလက်ခံယူခဲ့သည့် သိနာတောင်ပေါ်တွင် ဖြစ်ပျက်ခဲ့သောအဖြစ်အပျက်ကို သုံးသပ်ကြည့်ပါ။ တောင်ပေါ်မှ မောရှေဆင်းလာသောအခါ အဘယ်အရာကိုကြားလိုက်ရသနည်း။ “အောင်၍ကြွေးကြော်သံမဟုတ်၊” “ရှုံး၍ငိုကြွေးသံလည်းမဟုတ်၊” “[အခြားသော] သီချင်းဆိုသံ” ဖြစ်သည်။ ၎င်းသည် ဘုရားသခင်၏အမျက်ဒေါသကို နှိုးဆွခဲ့သည့် ရုပ်ဝတ်ပြုရေးနှင့်ဆက်စပ်နေသော တေးသံဖြစ်သောကြောင့် သီချင်းသည် ၃,၀၀၀ ခန့်သေဆုံးခဲ့သည်။—ထွက်မြောက်ရာ ၃၂:၁၈၊ ၂၅-၂၈။
လူတို့သည် တေးဂီတအဖုံဖုံကို ရေးစပ်၊ တီးခတ်၍ ၎င်းတို့ကိုပျော်မွေ့နိုင်ကြသော်လည်း တေးဂီတအားလုံးကို ဘုရားသခင်နှစ်သက်သည်ဟု မထင်မှတ်သင့်ပေ။ အဘယ်ကြောင့်နည်း။ “လူအပေါင်းတို့သည် [မကောင်းမှု] ကိုပြု၍ ဘုရားသခင့်ရှေ့တော်၌ အသရေပျက်ကြပြီ” ဟု ခရစ်ယာန်တမန်တော်ပေါလုကရှင်းပြသည်။ (ရောမ ၃:၂၃) အယူမှားမျိုးပွားရေးထုံးစံများ၊ လူဝိညာဉ်စိုးလ်မသေနိုင်အယူဝါဒနှင့် “ဘုရားသခင်၏မယ်တော်” အနေဖြင့် မာရိကိုးကွယ်ခြင်းစသည်တို့ကိုဖွဲ့နွဲ့၍ ရေးစပ်သီကုံးထားသောတေးသွားအဖြစ် ဆိုလေ့ရှိသည်။ သို့သော် ဤယုံကြည်ချက်များနှင့် အလေ့အထများသည် ကိုယ်တော်၏မှုတ်သွင်းခံနှုတ်မြွက်စကားတော် သမ္မာကျမ်းစာတွင် ဖော်ပြထားရာများနှင့် ဆန့်ကျင်နေသောကြောင့် အမှန်တရား၏ဘုရားသခင်ကို ပမာမခန့်ပြုရာရောက်၏။—တရားဟောရာ ၁၈:၁၀-၁၂; ယေဇကျေလ ၁၈:၄; လုကာ ၁:၃၅၊ ၃၈။
တေးဂီတကို ပညာရှိစွာရွေးချယ်ခြင်း
ရနိုင်ရာထဲမှရွေးချယ်စရာတေးဂီတသည် ခေါင်းရှုပ်စရာဖြစ်သည်။ စီဒီဓာတ်ပြားမျက်နှာဖုံးများသည် အသံသွင်းထားရာအမျိုးမျိုးကို ဝယ်ယူကြရန်ဆွဲဆောင်ဖို့ ပုံများရေးဆွဲထားခြင်းဖြစ်သည်။ သို့သော် ဘုရားသခင်ကိုဝတ်ပြုသူသည် အလိုတော်နှင့်တွေ့လိုလျှင် မှားယွင်းသောဘာသာရေးယုံကြည်ချက်များထည့်သွင်းထားသည့် သို့မဟုတ် အကျင့်ယိုယွင်းမှုနှင့် နတ်ဝိဇ္ဇာအတတ်တို့အပေါ် အာရုံစိုက်စေသည့် အဆိုနှင့်တီးလုံးများကိုရှောင်ရန် သတိထားပြီး ပညာရှိရှိ ရွေးချယ်လိမ့်မည်။
တစ်ချိန်က အာဖရိကတွင် ခရစ်ယာန်သာသနာပြုခဲ့သော အဲလ်ဘတ်သည် ထိုတွင် စန္ဒရားတီးခွင့်သိပ်မရခဲ့ကြောင်းဝန်ခံသည်။ သို့သော် သူနှင့်ပါသွားသော သီချင်းပုဒ်ရေများများပါသောခွေများကို ထပ်ခါထပ်ခါနားထောင်ခဲ့သည်။ အဲလ်ဘတ်သည် ယခု သူ၏ဇာတိမြေကို ပြန်ရောက်နေ၍ နယ်လှည့်ကြီးကြပ်မှူးအဖြစ် ခရစ်ယာန်အသင်းတော်များကိုလည်ပတ်နေရာ တေးသံနားထောင်ချိန် အလွန်နည်းသွားသည်။ “ကျွန်တော်အကြိုက်ဆုံး တေးရေးသူက ဘီသိုဗင်ပဲ။ သူ့ရဲ့သံစုံတေးသွားတွေ၊ ပွဲဖျော်ဖြေမှုတွေ၊ တီးလုံးတွေနဲ့ လေးဦးအဖွဲ့တေးတွေကို နှစ်အတန်ကြာစုဆောင်းခဲ့တယ်” ဟူ၍ သူပြောပြသည်။ ယင်းတို့ကိုနားထောင်ရခြင်းမှ ပျော်ရွှင်မှုအလွန်ရခဲ့၏။ မှန်သည်၊ ယောက်စီယောက်တိုင်းတွင် ကြိုက်နှစ်သက်ရာတေးသံများရှိကြသော်လည်း ခရစ်ယာန်များအနေနှင့် ကျွန်ုပ်တို့သည် ပေါလု၏ဤဆုံးမစကားကို မှတ်ထားရမည်– “သင်တို့သည် စားသော်လည်းကောင်း၊ သောက်သော်လည်းကောင်း၊ မည်သည့်အမှုကိုပြုသော်လည်းကောင်း ဘုရားသခင်၏ဘုန်း တန်ခိုးတော်ကိုထောက်၍ ခပ်သိမ်းသောအမှုကိစ္စကိုပြုကြလော့။”—၁ ကောရိန္သု ၁၀:၃၁။
တေးဂီတနှင့် အပ်နှံခြင်း
စူဇီ၏အနှစ်သက်ဆုံးမှာ တေးဂီတဖြစ်ခဲ့သည်။ “ကျွန်မအသက် ၆ နှစ်မှာ စန္ဒရားစတီးခဲ့တယ်၊ ၁၀ နှစ်မှာ တယောထိုးပြီး နောက်ဆုံး ၁၂ နှစ်မှာ စောင်းတီးခဲ့တယ်” ဟုသူရှင်းပြသည်။ နောက်ပိုင်းတွင် စောင်းပညာကိုလေ့လာရန် အင်္ဂလန်၊ လန်ဒန်မြို့မှ တေးဂီတတော်ဝင်ကောလိပ်ကို စူဇီတက်ခဲ့သည်။ နာမည်ကျော်စပိန်စောင်းပညာရှင်တစ်ဦးထံ လေးနှစ်တိုင်ဆည်းပူးကာ ပါရီပန်တျာကျောင်းတွင် နောက်ထပ်တစ်နှစ်သင်တန်းတက်ပြီး တေးဂီတဂုဏ်ထူးဆောင်ဘွဲ့သာမက စောင်းဒီပလိုမာနှင့် စန္ဒာရားသင်ပြ ဒီပလိုမာရရှိခဲ့သည်။
စူဇီသည် လန်ဒန်မှယေဟောဝါသက်သေများ၏ အသင်းတော်တစ်ခုနှင့် ဆက်သွယ်ခဲ့သည်။ သက်သေခံအချင်းချင်း တစ်ဦးကိုတစ်ဦး စစ်မှန်သောစိတ်ဝင်စားမှုနှင့်မေတ္တာရှိကြသည်ကို သူတွေ့ရှိခဲ့၏။ ယေဟောဝါကို သူတဖြည်းဖြည်းချစ်မြတ်နိုးတတ်လာခဲ့ပြီး ကိုယ်တော်၏လုပ်ငန်းတော်၌ သူ၏ဇွဲကြောင့် ကိုယ်တော်၏အမှုတော်ထမ်းဆောင်နိုင်ရန် နည်းလမ်းများကိုရှာကြံလေသည်။ ၎င်းမှတစ်ဆင့် အပ်နှံခြင်းနှင့် နှစ်ခြင်းခံသည်အထိဖြစ်လာခဲ့သည်။ “တေးဂီတနဲ့အသက်မွေးရတာက ဘဝကိုအပ်နှံလုပ်ရတဲ့အလုပ်ဖြစ်တဲ့အတွက် အပ်နှံထားတဲ့ဘဝဟာ ကျွန်မအတွက်စိမ်းမနေပါဘူး” ဟုစူဇီပြောပြသည်။ ယေရှု၏သွန်သင်ချက်ကို နာခံသည့်အနေနှင့် ဘုရားသခင့်နိုင်ငံတော်သတင်းကောင်း ဟောပြောခြင်းဖြစ်သော ခရစ်ယာန်ဓမ္မအမှုကို သူအာရုံစူးစိုက်လုပ်ဆောင်လာရာ တေးဂီတဖျော်ဖြေမှုအတွက် သူပေးရသည့်အချိန် လျော့နည်းသွားလေ၏။—မဿဲ ၂၄:၁၄; မာကု ၁၃:၁၀။
ယခု တေးဂီတဖျော်ဖြေမှုအချိန် အကန့်အသတ်သာရှိသည့်အတွက် သူမည်သို့ခံစားရသနည်း။ “တစ်ခါတလေ လေ့ကျင့်ဖို့ အချိန်နည်းလို့ စိတ်အလိုမကျဖြစ်ဖူးတယ်။ ဒါပေမဲ့ ကျွန်မရဲ့တူရိယာတွေကို တီးခတ်ပြီး ပျော်နေတုန်းပါပဲ။ တေးဂီတဟာ ယေဟောဝါဆီက ဆုလာဘ်တစ်ခုဖြစ်တယ်။ အခု ကျွန်မရဲ့အသက်တာမှာ ကိုယ်တော်ရဲ့လုပ်ငန်းတော်ကို ရှေးဦးထားတဲ့အတွက် ပိုတောင်ပျော်သေးတယ်” ဟုသူဝန်ခံသည်။—မဿဲ ၆:၃၃။
ဘုရားသခင်အား ချီးမွမ်းသည့်တေးဂီတ
အဲလ်ဘတ်နှင့်စူဇီတို့နှင့်အတူ အခြားယေဟောဝါသက်သေ ခြောက်သန်းနီးပါးသည် ယေဟောဝါဘုရားသခင်အား တေးဂီတနှင့် မှန်မှန်ချီးမွမ်းလျက်ရှိကြသည်။ ၂၃၄ နိုင်ငံမှ ဘုရားသခင့်နိုင်ငံတော်ခန်းမများ၌ ကျင်းပလျက်ရှိသော ခရစ်ယာန်အစည်းအဝေးများတွင် ဖြစ်နိုင်မည်ဆိုလျှင် သူတို့၏အစည်းအဝေးကို ယေဟောဝါအား သီချင်းဆိုပြီးဖွင့်ပိတ်ကြသည်။ ယေဟောဝါဘုရားသခင်ကို ချီးမွမ်းခြင်းငှာ ကျမ်းစာအခြေခံထားသည့်စာသားများကို အသံအနိမ့်အမြင့်တို့ဖြင့် သာယာနာပျော်ဖွယ်တေးသွားများကို သီဆိုကြသည်။
ယေဟောဝါသည် ဂရုစိုက်သောဘုရားသခင်ဖြစ်ကြောင်းကို တက်ရောက်သူအားလုံးတို့က လှိုက်လှိုက်လှဲလှဲကျူးဧသီဆိုကြသည် (သီချင်း ၄၄)။ ယေဟောဝါထံ ချီးမွမ်းသီချင်းဆိုကြသည် (သီချင်း ၁၉၀)။ သူတို့၏တေးသီချင်းများက ခရစ်ယာန်ညီအစ်ကိုအသင်းအပင်း၊ ခရစ်ယာန်အသက်တာနှင့် ခရစ်ယာန်အရည်အသွေးများ၏ ပျော်ရွှင်မှုများနှင့်တာဝန်များကို အသိအမှတ်ပြုသည်။ တေးသွားများကို ရေးဖွဲ့စပ်ဆိုရာတွင် အာရှ၊ ဩစတြေးလျ၊ ဥရောပနှင့် တောင်၊ မြောက်အမေရိကမှ သက်သေခံများအသုံးပြုခဲ့ကြသည့် တေးသံပုံစံအမျိုးမျိုးက သူတို့အတွက် ပိုနှစ်သက်စရာဖြစ်စေသည်။ *
ဆာလံဆရာခေတ်ကရေးခဲ့သော မြင့်မြတ်သည့်တော်ဝင်သီချင်းတစ်ပုဒ်၏ အဖွင့်စကားမှာ ‘ယေဟောဝါအား အသစ်သောသီချင်းကိုဆိုကြလော့။ မြေကြီးသားအပေါင်းတို့၊ ယေဟောဝါအား သီချင်းဆိုကြလော့။ ယေဟောဝါအား သီချင်းဆို၍၊ နာမတော်ကို ကောင်းချီးပေးကြလော့။ ကယ်တင်တော်မူခြင်းတရားကို တစ်နေ့ထက်တစ်နေ့ညွှန်ကြားကြလော့။ ဘုန်းတော်ကို တစ်ပါးအမျိုးသားတို့၌လည်းကောင်း၊ အံ့ဖွယ်သောအမှုတော်တို့ကို ခပ်သိမ်းသောလူမျိုးတို့၌လည်းကောင်း ဖော်ပြကြလော့” ဟူ၍ဖြစ်သည်။ (ဆာလံ ၉၆:၁-၃) ယေဟောဝါသက်သေများသည် သင့်ဒေသတွင် ဤသို့ပြုနေကြပြီး သူတို့သည် ဤချီးမွမ်းကျူးဧခြင်းတွင်ပါဝင်ရန် သင့်ကိုဖိတ်ခေါ်ကြပါသည်။ ယေဟောဝါနှစ်သက်တော်မူသည့် တေးဂီတဖြင့် ကိုယ်တော်အား မည်ကဲ့သို့ချီးမွမ်းရန် သင်ယူနိုင်သည့် သူတို့၏ဘုရားသခင့်နိုင်ငံတော်ခန်းမများတွင် သင့်ကို လှိုက်လှဲစွာကြိုဆိုကြပါလိမ့်မည်။
[အောက်ခြေမှတ်ချက်များ]
^ အပိုဒ်၊ 7 နယူးယောက်၊ ကင်းမျှော်စင် သမ္မာကျမ်းစာနှင့် ဝေစာအသင်းမှ ထုတ်ဝေသည်။
^ အပိုဒ်၊ 22 အဆိုပါတေးသီချင်းများသည် ကင်းမျှော်စင် သမ္မာကျမ်းစာနှင့် ဝေစာအသင်း၊ မြန်မာမှထုတ်ဝေသော ယေဟောဝါအား ချီးမွမ်းကျူးဧခြင်း စာအုပ်တွင်ပါရှိသည်။
[စာမျက်နှာ ၂၈ ပါ ရုပ်ပုံ]
ယေဟောဝါအား ချီးမွမ်းကျူးဧခြင်း