ဘဝ​အတ္ထုပ္ပတ္တိ

နိုင်ငံ​များစွာ​သို့ အလင်း​ဆောင်​သွား​သူ

ဂျော့ခ်ျ​ယန်း​၏​ဘဝ​အတ္ထုပ္ပတ္တိ​ကို ရုသ် ယန်း နစ်​ကို​လ်​စ​န်​ပြောပြ​သည်

“ဒီလို​ဆိုရင် တရားဟော​ပလ္လင်​ပေါ်မှာ ဘာကြောင့်​ဒီလို​ငြိမ်​နေကြ​တာလဲ။ . . . ကျွန်တော်​ရေး​တဲ့​စကား​တွေ မှန်တယ်​ဆိုတာ​ကို သက်သေထူ​ပြပြီး​တဲ့​နောက် ငြိမ်​နေကြ​မယ်​ဆိုရင် ကျွန်တော်​တို့​ဟာ ဘယ်လို​လူစား​တွေ ဖြစ်သွား​ကြ​မလဲ။ လူတွေကို အသိဉာဏ်မဲ့​တဲ့​အခြေအနေ​မှာ ဆက်​မနေ​စေ​ဘဲ အမှန်တရားကို ခယ​တောင်းပန်၊ ဖုံးကွယ်​လျှို့ဝှက်​တဲ့​ပုံစံ​မျိုးနဲ့​မဟုတ်ဘဲ ကြေညာ​ကြရအောင်။”

ဒီ​စကား​တွေ​က ချာ့ခ်ျ​မှတ်တမ်း​စာအုပ်​ထဲ​ကနေ အဖေ့​ရဲ့​နာမည်​ထုတ်​လိုက်​ဖို့ တောင်းဆို​တဲ့ ၃၃ မျက်နှာ​ရှိတဲ့​အဖေ့​နုတ်ထွက်​စာ​ထဲမှာ​ပါ​တဲ့ အကြောင်း​တချို့​ဖြစ်ပါ​တယ်။ ခုနှစ်​က​တော့ ၁၉၁၃ ခုနှစ်​က​ပါ။ အဲ့ဒီ​အချိန်​ကစပြီး နိုင်ငံ​အတော်များများမှာ အလင်းဆောင်သူ​တစ်ဦး​အဖြစ် အမှုဆောင်ဖို့​အကြောင်း​ပေါ်​စေ​တဲ့ ဘဝ​အတွေ့အကြုံ​များတဲ့​လုပ်ငန်း​ကို စ​လုပ်ဆောင်ခဲ့တယ်။ (ဖိလိပ္ပိ ၂:၁၅-၁၆) ကျွန်မ ကလေး​အရွယ်​ကတည်းက ဆွေမျိုး​တွေ​ဆီကနေ အဖေရဲ့​အတွေ့အကြုံ​တွေ​နဲ့ သမိုင်း​အဖြစ်မှန်​တွေ​ကို စုဆောင်း​ပြီး မိတ်ဆွေ​တွေ​အကူအညီ​နဲ့ တစ်ခု​ချင်း​ဆက်စပ်​ပြီး​တော့ အဖေ့​ဘဝ​ဇာတ်ကြောင်း​ကို ပြန်​ပုံဖော်​ကြည့်​ခဲ့တယ်။ အဖေ့​အသက်တာ​ဟာ တမန်​တော်​ပေါလု​နဲ့ ခပ်​ဆင်​ဆင်​ပဲ။ ‘တစ်ပါး​အမျိုးသား​တို့​နှင့်​ဆိုင်သော ထို​တမန်​တော်’ လို​ပါ​ပဲ အဖေဟာ နေရာတိုင်း​ကျွန်း​တိုင်း​မှာ​ရှိတဲ့​သူတွေဆီ ခရီးထွက်​ပြီး ယေဟောဝါ​ရဲ့​သတင်း​ပြောပြ​ဖို့ အမြဲ​အဆင်သင့်​ရှိခဲ့တယ်။ (ရောမ ၁၁:၁၄; ဆာလံ ၁၀၇:၁-၃) ကျွန်မ​ရဲ့​အဖေ၊ ဂျော့ခ်ျ ယန်း​အကြောင်းကို ပြောပြ​ပါ​ရစေ။

အစောပိုင်း​နှစ်များ

အဖေဟာ စကော့တလန်​လူမျိုး ပ​ရက်စ်​ဘီ​တေး​ရီး​ယန်း​ဘာသာဝင် ဂျွန်​နဲ့ မာဂရက် ယန်း​တို့​ရဲ့​သားထွေး​ဖြစ်တယ်။ ၁၈၈၆၊ စက်တင်ဘာ ၈ ရက်​နေ့မှာ​အဖေ​မွေးဖွားပြီး မကြာခင်​မှာပဲ သူ့​မိသားစုဟာ စကော့တလန်​နိုင်ငံ အဲ​ဒင်ဗာ့ဂ်​မြို့ကနေ ကနေဒါ​အနောက်ပိုင်း ဗြိတိသျှ​ကိုလံဘီယာ​ကို ပြောင်း​သွားခဲ့တယ်။ အဖေ့​ရဲ့​အစ်ကို​သုံးယောက်—အလက်ဇန္ဒား၊ ဂျွန်​နဲ့ မာ​လ်​ကန်—တို့​ဟာ အစောပိုင်းက စကော့တလန်​မှာ မွေးဖွား​ခဲ့​ကြတယ်။ နယ်​လီ​လို့​ချစ်စနိုး​နဲ့​ခေါ်​ခဲ့​ကြ​တဲ့ ညီမ​အငယ်​မေရီ​ယန်​က အဖေ့​ထက် နှစ်နှစ်​ငယ်​တယ်။

 ဗြိတိသျှ​ကိုလံဘီယာ​ပြည်နယ်၊ ဗစ်​တိုး​ရီး​ယား​မြို့ကနေ သိပ်​မ​ဝေး​တဲ့ စာ​နစ်​မြို့က စိုက်ပျိုးရေး​ခြံ​တစ်ခု​မှာ ကြီးပြင်း​လာ​ခဲ့​ကြ​တဲ့ ဒီ​ကလေး​တွေ​ဟာ တကယ်​ပျော်​ခဲ့​ကြတယ်။ တစ်ချိန်တည်း​မှာပဲ တာဝန်​သိ​တတ်လာ​ခဲ့​ကြတယ်။ ဒါ​ကြောင့် မိဘတွေ ဗစ်​တိုး​ရီး​ယား​က​ပြန်လာတဲ့​အခါ အိမ်​အလုပ်တွေ​ပြီး​နေပြီး အိမ်​လည်း သပ်သပ်ရပ်ရပ်​ရှိတယ်။

အချိန်​ကြာ​လာတဲ့အခါ အဖေနဲ့ အဖေ့​ရဲ့​ညီအစ်ကို​တွေ​ဟာ သတ္တုတွင်း​လုပ်ငန်း​အပြင် သစ်​လုပ်ငန်း​ကိုလည်း စိတ်ဝင်စား​လာ​ခဲ့​ကြတယ်။ ယန်း​ညီအစ်ကို​တွေ​ဟာ သစ်​ထွက်​ခန့်မှန်း​သူတွေ (သစ်​ထွက်​နိုင်​သည့်​တော​များ​ကို ရှာဖွေ​စစ်ဆေး​သူများ) အဖြစ်​နဲ့ သစ်​ရောင်းဝယ်​သူတွေ​အဖြစ် နာမည်​ကျော်ကြား​လာ​ခဲ့​ကြတယ်။ အဖေက​တော့ ငွေကြေး​ကိစ္စ​တွေ​ကို ဦးစီး​ကွပ်ကဲ​ခဲ့တယ်​လေ။

နောက်ဆုံး​တော့ ဝိညာဉ်​ရေး​ကို​စိတ်ဝင်စား​တဲ့​အဖေဟာ ပ​ရက်စ်​ဘီ​တေး​ရီး​ယန်း တရားဟော​ဆရာ​ဖြစ်​ဖို့ စိတ်​ဆုံးဖြတ်​ခဲ့တယ်။ ဒါပေမဲ့ အဲ့ဒီ​အချိန်​လောက်​မှာ ဇိအုန်​ကင်းမျှော်စင်​ဝေစာ​အသင်းရဲ့ ပထမ​ဆုံး​ဥက္ကဋ္ဌ​ဖြစ်သူ ချားလ်စ် တေ့ဇ် ရပ်စဲ​လ်​ရဲ့ သတင်းစာ​ထဲမှာ​ပါ​တဲ့ တရားဟော​ပြော​ချက်​ဟာ အဖေ့​ရဲ့​အသက်တာကို အကြီးအကျယ်​သြဇာညောင်း​ခဲ့တယ်။ အဲဒီ​ကနေ အဖေ​သိလာ​ရတဲ့​အကြောင်း​တွေ​ကြောင့် အစ​မှာ​ဖော်ပြ​ခဲ့​တဲ့ နုတ်ထွက်​စာ​ကို သူ​ရေးပို့​ခဲ့​တာ။

အဖေဟာ ဝိညာဉ်​မသေနိုင်​အယူ​နဲ့ ဘုရားသခင်​ဟာ လူ့​ဝိညာဉ်​တွေ​ကို မီးငရဲ​ထဲမှာ ထာဝစဉ်​ညှဉ်းဆဲ​တယ်​စတဲ့ ချာ့ခ်ျ​သွန်သင်ချက်​တွေ​မှား​ကြောင်းကို သက်သေ​ပြဖို့ ကျမ်းချက်​တွေ​ကို ကြင်ကြင်နာနာ​နဲ့ ရှင်းရှင်းလင်းလင်း ထောက်ပြ​ခဲ့တယ်။ သုံးပါး​ပေါင်း​တစ်ဆူ​အယူဝါဒ​ကိုလည်း သူ​ပြစ်တင်​ရှုတ်ချခဲ့​ပြီး အဲဒီ​အယူ​ဟာ ခရစ်ယာန်​မဟုတ်တဲ့​သူတွေဆီ​ကနေ အစပြု​ခဲ့​တာ​ရ​ယ်၊ ကျမ်းစာ​က လုံးဝ​မထောက်ခံ​တာ​ကို​ပါ သက်သေပြ​ပေး​ခဲ့တယ်။ အဲ့ဒီ​အချိန်​ကစပြီး ယေရှု​ခရစ်​ကို အတုယူ​တဲ့​အနေ​နဲ့ ခရစ်ယာန်​ဓမ္မ​အမှုမှာ အဖေ​ပါဝင်​ခဲ့​ပြီး ယေဟောဝါ​ရဲ့​ဘုန်း​အတွက် သူ့ရဲ့​စွမ်းရည်​တွေ၊ ခွန်အား​တွေ​အားလုံး​ကို နှိမ့်ချစွာ​နဲ့​အသုံးပြုခဲ့တယ်။

၁၉၁၇ ခုနှစ်​မှာ ကင်းမျှော်စင်​အသင်းရဲ့ ညွှန်ကြားမှု​အောက်မှာ အဖေဟာ အဲ့ဒီ​အချိန်တုန်းက ယေဟောဝါသက်သေ​များ​ရဲ့ နယ်လှည့်​ကိုယ်စားလှယ်​တွေ​ကို​ခေါ်​ခဲ့​တဲ့​အတိုင်း ခရီး​လှည့်​ဆရာ​တစ်ဦး​အဖြစ် စ​အမှုဆောင်ခဲ့တယ်။ ကနေဒါ​တစ်ဝန်း​က မြို့ကြီး၊ မြို့​ပြ​တွေ​မှာ အဖေ​ဟောပြောချက်​တွေ​ပေး​ခဲ့​ပြီး “ဖန်ဆင်း​ခြင်း​ဓာတ်​ပုံ​ပြဇာတ်” လို့​ခေါ်​ခဲ့​ကြ​တဲ့ ရုပ်ရှင်၊ ရုပ်​သေ​အစီအစဉ်ကို တင်ဆက်​ခဲ့တယ်။ အဖေ​ရောက်လာ​တိုင်း ပြဇာတ်ရုံ​တွေ လူ​ကြိတ်ကြိတ်တိုး​နေတာပဲ။ အဖေ့​ရဲ့​နယ်လှည့်​ခရီးစဉ် အစီအစဉ်​ဇယား​ကို ၁၉၂၁ ခုနှစ်​အထိ ကင်းမျှော်စင်​မှာ ဖော်ပြ​ပေး​ခဲ့တယ်။

ဧဝံဂေလိ​သတင်း​ဟော​သူ ယန်းဟာ လူပေါင်း ၂,၅၀၀ ကို​ဟောပြောခဲ့တယ်၊ ခန်းမ​ထဲမှာ လူ​ပြွတ်သိပ်​နေတဲ့​အတွက် လူ​အတော်များများ အထဲ​မဝင်နိုင်​ခဲ့​တဲ့​အကြောင်းကို ဝင်​နီ​ပက်​သတင်းစာ​တစ်စောင်​က ဖော်ပြ​ခဲ့တယ်။ အို​တာ​ဝါ​မြို့မှာ “ငရဲ​သို့​သွားပြီး​ပြန်လာ​ခြင်း” အကြောင်းကို အဖေ​ဟောပြောခဲ့တယ်။ အဲ့ဒီ​မှာ လူကြီး​တစ်ယောက်​က ဒီလို​ပြော​ခဲ့တယ်– “ဂျော့ခ်ျ ယန်း​ဟောပြောပြီး​တဲ့​အခါ ဒီ​အကြောင်းကို သူနဲ့​ဆွေးနွေး​ကြဖို့​အတွက် ဓမ္မ​ဆရာ​အုပ်စု​ကို စင်မြင့်​ပေါ်လာ​ဖို့ ဖိတ်ခေါ်ပေမဲ့ ဘယ်သူမှ​မသွားကြ​ဘူး။ အဲ့ဒီ​အချိန်​မှာ ဒါဟာ အမှန်တရား​ပဲ​ဆိုတာ​ကို ကျွန်တော်​သိခဲ့ရတယ်။”

အဖေ ခရီး​လှည့်လည်​တဲ့​အခါ ဝိညာဉ်​ရေး​လုပ်ဆောင်ချက်​တွေ​ကို အတတ်နိုင်ဆုံး​လုပ်ဆောင်ခဲ့တယ်။ အဲ့ဒီ​နောက် စီစဉ်​ထား​တဲ့ နောက်​တစ်​နေရာကို​ရောက်​ဖို့ က​ပျာ​က​ယာ​ရထား​ပေါ်​တက်​ခဲ့​ရတယ်။ ကား​နဲ့​ခရီး​သွားတဲ့အခါ နောက်​တစ်​နေရာကို နံနက်​စာ​မစား​မီ စောစော​ကတည်းက ထွက်ခွာ​သွား​တတ်တယ်။ အဖေဟာ ဇွဲ​ရှိတဲ့​အပြင် ထောက်ထား​စာနာ​တတ်​တဲ့​သူ​လို့ နာမည်​ကောင်း​ရပြီး သူ့ရဲ့​ခရစ်ယာန်​အမူအကျင့်​နဲ့ ရက်ရောမှု​ကို လူအများ​သိခဲ့ကြတယ်။

အဖေ​တက်​ခဲ့​တဲ့ အစောပိုင်း​ခရိုင်​စည်းဝေး​တွေ​ထဲမှာ အထူး​အမှတ်တရ​ဖြစ်​ခဲ့​တဲ့​စည်းဝေး​က ၁၉၁၈ ခုနှစ်၊ အဲလ်​ဘာ​တာ​ပြည်နယ်၊ အဲ​ဒ်​မွန်​တန်​မြို့မှာ​ကျင်းပ​ခဲ့​တဲ့ စည်းဝေး​ပဲ။ နယ်​လီ​နှစ်ခြင်း​ခံ တဲ့​အတွက် တစ်​မိသားစု​လုံး အားပေး​တက်ရောက်​ခဲ့​ကြတယ်။ အဲ့ဒီ​အချိန်​ဟာ​လည်း ညီအစ်ကို​တွေ​အားလုံး အတူတကွ​ရှိခဲ့တဲ့ နောက်ဆုံး​အကြိမ်​ပဲ။ နှစ်နှစ်​ကြာ​တော့ မာ​လ်​ကန်​ဟာ အဆုတ်​ရောဂါ​နဲ့ ဆုံး​သွားတယ်။ သူ့ရဲ့​ညီအစ်ကို​သုံးယောက်​နဲ့ သူ့​အဖေလို​ပဲ မာ​လ်​ကန်​လည်း ကောင်းကင်​အသက်တာ​မျှော်လင့်ချက်​ရှိခဲ့​ပြီး သူတို့​အားလုံး သေ​တဲ့​အထိ ဘုရားသခင်​အပေါ်​သစ္စာရှိခဲ့​ကြတယ်။—ဖိလိပ္ပိ ၃:၁၄။

နိုင်ငံ​ခြား​လယ်ကွင်းများ​ဆီ​သို့

၁၉၂၁၊ စက်တင်ဘာ​မှာ ကနေဒါ​နိုင်ငံ​တစ်လျှောက် ဟောပြောခြင်း​ခရီးစဉ်​ပြီး​နောက် အဲ့ဒီ​အချိန်တုန်းက ကင်းမျှော်စင်​အသင်းရဲ့​ဥက္ကဋ္ဌ ဂျိုးဇက် အက်ဖ်. ရပ်သဖော့ဒ်​က ကရစ်ဘီယံ​ကျွန်း​တွေ​ကို​ဆက်သွား​ဖို့ အဖေ့ကို​ညွှန်ကြား​ခဲ့တယ်။ “ဖန်ဆင်း​ခြင်း​ဓာတ်​ပုံ​ပြဇာတ်” ကို​အဖေ​တင်ဆက်​ပြသ​ခဲ့​တဲ့ နေရာတိုင်းမှာ လူတွေ​ကောင်းကောင်း​လက်ခံခဲ့​ကြတယ်။ ထရီနီဒက်​ကနေ အဖေ​ဒီလို​စာရေး​ခဲ့တယ်– “နေရာ​ပြည့်ကျပ်​နေလို့ လူ​အတော်များများ ပြန်သွား​ခဲ့​ကြရတယ်။ ဒုတိယ​ည​မှာ အဆောက်အအုံ​ထဲ လူတွေ​ကြိတ်ကြိတ်တိုး​ပဲ။”

အဲ့ဒီ​နောက် ၁၉၂၃ ခုနှစ်​မှာ ဘရာဇီး​ကို​အဖေ​သွားဖို့ တာဝန်ရ​ခဲ့တယ်။ အဲ့ဒီ​မှာ ပရိသတ်​ကြီး​တွေ​ရှေ့ အဖေ​ဟောပြောခဲ့​ရပြီး တစ်ခါ​တ​လေ စကားပြန်​ငှား​ခဲ့​ရတယ်။ ၁၉၂၃၊ ဒီဇင်ဘာ ၁၅ ကင်းမျှော်စင် မှာ​ဒီလို​ဖော်ပြ​ခဲ့တယ်– “ဇွန် ၁ မှ စက်တင်ဘာ ၃၀ အထိ ညီအစ်ကို​ယန်း​သည် စုစုပေါင်း​တက်ရောက်သူ ၃,၆၀၀ ရှိ​လူထု​အစည်းအဝေး ၂၁ ခု; တက်ရောက်သူ ၁,၁၀၀ ရှိ​အသင်းတော်​အစည်းအဝေး ၄၈ ခု​ကို​ကျင်းပ​ခဲ့ပြီ; ပေါ်တူဂီ​ဘာသာ​စကား​ဖြင့် စာပေ​စာတမ်း​စောင်ရေ ၅,၀၀၀ ကို​အခမဲ့​ဝေငှ​ခဲ့​သည်။” “ယခု​အသက်ရှင်​သူ သန်းပေါင်း​များစွာ ဘယ်တော့​မျှ​မသေ​ကြ​ရ” ဟောပြောချက်ကို အဖေ​ဟောတဲ့​အခါ စိတ်ဝင်တစား​နားထောင်သူ အတော်​များတယ်။

၁၉၉၇၊ မတ် ၈ ရက်​နေ့မှာ ဘရာဇီး​အဆောက်အဦ​အသစ်တွေ​ကို​အပ်နှံ​တဲ့​အခါ အပ်နှံ​ပွဲ​ဘရိုရှာ​ထဲမှာ ဒီလို​ဖော်ပြ​တယ်– “၁၉၂၃– ဂျော့ခ်ျ ယန်း​သည် ဘရာဇီး​သို့​ရောက်ရှိ​လာ​သည်။ သူသည် ရီယို​ဒီ​ဂျ​နေ​ရို​မြို့လယ်​တွင် ဌာနခွဲရုံး​တစ်ခု​ကို စီစဉ်​ဖွဲ့စည်း​ခဲ့​သည်။” ကျမ်းစာ​စာပေ​စာတမ်း​တွေ​ကို စပိန်​ဘာသာ​စကား​နဲ့ ရရှိနိုင်​ပေမဲ့ ဘရာဇီး​နိုင်ငံ​ရဲ့ အဓိက​ဘာသာ​စကား​ဖြစ်​တဲ့ ပေါ်တူဂီ​ဘာသာ​စကား​နဲ့​လိုအပ်​နေတယ်။ ဒါ​ကြောင့် ၁၉၂၃ အောက်တိုဘာ ၁ ကင်းမျှော်စင်​ကစပြီး ပေါ်တူဂီ​ဘာသာ​စကား​နဲ့ ထွက်​လာခဲ့တယ်။

အဖေဟာ ဘရာဇီး​မှာ အမှတ်တရ​ဖြစ်စရာ ဆက်သွယ်မှု​အတော်များများ​ရတယ်။ တစ်ခု​က​တော့ သူ့ရဲ့​အိမ်ကို အစည်းအဝေးတွေ​လုပ်ဖို့ အသုံးပြုခွင့်​ပေး​တဲ့ ဂျာ​စီ​င်​တူ ပီ​မဲ​န်​တဲ​လ် ကာ​ဘ​ရာ​လ် လို့​ခေါ်​တဲ့ ပေါ်တူဂီ​သူဌေးကြီး​တစ်ယောက်​ဖြစ်တယ်။ မကြာခင်​မှာ ဂျာ​စီ​င်​တူ​ဟာ ကျမ်းစာ​အမှန်တရားကို လက်ခံခဲ့​ပြီး နောက်ပိုင်း​မှာ ဌာနခွဲ​အမှုထမ်း​ဝင်​တစ်ဦး ဖြစ်လာ​ခဲ့တယ်။ နောက်​တစ်ယောက်​က​တော့ ပေါ်တူဂီ​ဥယျာဉ်မှူး လူငယ်လေး​တစ်ယောက်​ဖြစ်​တဲ့ မဲ​န်​နွယ်​လ် ဒါ စေ​လ်ဗာ ဂျော်​ဒေး​အို​ဖြစ်တယ်။ အဖေ့​လူထု​ဟောပြောချက်ကို သူ​ကြား​ပြီး​နောက် ပေါ်တူဂီ​ကို​ပြန်​ပြီး အဲ့ဒီ​အချိန်တုန်းက ကော်လ်ပေါ်တာ​လို့​ခေါ်​တဲ့ ယေဟောဝါသက်သေ​များ​ရဲ့ အချိန်ပြည့်​အမှုဆောင်​ဖြစ်​ဖို့ လှုံ့ဆော်​ခံ​ခဲ့​ရတယ်။

ဘရာဇီး​နိုင်ငံ​တစ်လျှောက် ဝေးလံတဲ့​နေရာတွေကို မီး​ရထား​နဲ့​အဖေ​သွားပြီး စိတ်ဝင်စား​သူတွေ​ရှာဖွေခဲ့​တယ်။ ခရီးစဉ်​တစ်ခု​မှာ ဘို​နီ​နဲ့ ကာ​တာ​ရီး​နာ ဂ​ရင်း​တို့​နဲ့ အဖေ​တွေ့ဆုံ​ခဲ့တယ်၊ သူတို့နဲ့​နှစ်ပတ်​နီးပါး​နေပြီး ကျမ်းစာ​အကြောင်း​ရှင်းပြ​ပေး​ခဲ့တယ်။ ဒါနဲ့​ပဲ မိသားစု​ထဲ​က ခု​နစ်​ယောက်​လောက် ယေဟောဝါ​ထံ​ဆက်ကပ်​အပ်နှံ​ပြီး နှစ်ခြင်း​ယူ​ခဲ့​ကြတယ်။

၁၉၂၃ ခုနှစ်​မှာ အဖေ​အဆက်အသွယ်​ရခဲ့တဲ့ နောက်​တစ်ယောက်​က စဲ​ရာ ဘဲလ်​လို​နာ ဖာ​က​စ​န်​ဖြစ်တယ်။ ၁၈၆၇၊ ကလေး​ဘဝမှာ သူ့​အစ်ကို အီရက်စ်မပ်စ် ဖ​လူ​တန် စ​မ​စ်​နဲ့​အတူ မိသားစု​လိုက် အမေရိကန်​ပြည်ထောင်စု​ကနေ ဘရာဇီး​ကို သူတို့​ပြောင်းရွှေ့​နေထိုင်ခဲ့​ကြတယ်။ ၁၈၉၉ ခုနှစ်​ကတည်းက သူဟာ ကင်းမျှော်စင်​မဂ္ဂဇင်း​တွေ​ကို စာတိုက်​ကနေ ပုံမှန်​ရရှိခဲ့တယ်။ အဖေ့​လည်ပတ်မှု​က စဲ​ရာ၊ သူ့​ကလေး​လေးယောက်​နဲ့ အန်တီ​စဲလီ​လို့ အဖေ​ခေါ်​ခဲ့​တဲ့​သူတို့​အားလုံး​အတွက် နှစ်ခြင်း​ခံ​ဖို့ အခွင့်အခါ​ကောင်း​ပဲ။ ဒါကို သူတို့​စောင့်မျှော်​ခဲ့​ကြ​တာ အတော်ကြာ​ပြီ။ အဲ့​ဒါ ၁၉၂၄၊ မတ် ၁၁ ရက်​နေ့မှာ​ဖြစ်တယ်။

အဲဒီနောက် မကြာခင်​မှာ တောင်​အမေရိက​က တခြား​နိုင်ငံ​တွေ​ဆီ အဖေ​သွား​ဟောပြောခဲ့တယ်။ ၁၉၂၄၊ နိုဝင်ဘာ ၈ ရက်မှာ ပီရူး​ကနေ အဖေ​ဒီလို​စာရေး​ခဲ့တယ်– “လီ​မာ​မြို့​နဲ့ ကာ​ယာ​အို​မြို့မှာ ဝေစာ​ပေါင်း ၁၇,၀၀၀ ဝေ​ပြီးပြီ။” အဲ့ဒီ​နောက် ဝေစာ​ဝေငှ​ဖို့​အတွက် ဘိုလစ်ဗီးယား​ကို သွားခဲ့တယ်။ အဲ့ဒီ​ကို​သွားတာ​နဲ့​ပတ်သက်ပြီး အဖေ​ဒီလို​စာရေး​ခဲ့တယ်– “ကျွန်တော်​တို့​ရဲ့​ခမည်းတော်​ဟာ ကြိုးစား​အားထုတ်မှုကို ကောင်းချီး​ပေး​နေတယ်။ အင်​ဒီး​ယန်း​လူမျိုး​တစ်ယောက်​က ကျွန်တော့်​ကို​ကူညီပေး​တယ်။ သူ့​အိမ်က အမေ​ဇုန်​မြစ်ဖျား​မှာ​ရှိတယ်။ သူနဲ့အတူ ဝေစာ ၁,၀၀၀ နဲ့​စာအုပ်​တချို့​ကို ယူသွား​ပြီ။”

အဖေ့​ကြိုးစား​မှု​ကြောင့် ဗဟို​အမေရိက​နဲ့ တောင်​အမေရိက တစ်လျှောက်​လုံး​မှာ​ရှိတဲ့ နိုင်ငံ​အတော်များများ​ဆီ​ကို ကျမ်းစာ​အမှန်တရား​မျိုးစေ့ ပျံ့နှံ့​သွားတယ်။ ၁၉၂၄၊ ဒီဇင်ဘာ ၁၊ ကင်းမျှော်စင်​က ဒီလို​ဖော်ပြ​တယ်– “ဂျော့ခ်ျ ယန်း​သည် တောင်​အမေရိက​သို့ ယခု​နှစ်နှစ်​ကျော်​ရောက်ရှိ​နေပြီ။ . . . ဤ​ချစ်လှစွာ​သော​ညီအစ်ကို​သည် မက်ဂျလန်​ရေလက်ကြား​ရှိ ပွန်​တာ အာ​ရေး​နား​စ်​မြို့​သို့  အမှန်တရား​သတင်း သယ်ဆောင်​ခွင့် ရရှိခဲ့သည်။” ကော့စ်တာရီကာ၊ ပ​နား​မား​နဲ့ ဗင်နီဇွဲလား​စတဲ့ နိုင်ငံ​တွေ​မှာလည်း ဟောပြောခြင်း​လုပ်ငန်း​ကို အဖေ​စ​လုပ်ဆောင်ခွင့်​ရခဲ့တယ်။ ငှက်ဖျား​ရောဂါ​ရလာ​ပြီး ကျန်းမာ​ရေး​ထိခိုက်​နေတာ​တောင် အဖေ​ဆက်​လုပ်ဆောင်ခဲ့တယ်။

ဥရောပ​သို့

၁၉၂၅၊ မတ်​လမှာ စပိန်​နဲ့​ပေါ်တူဂီ​မှာ ကျမ်းစာ​ဝေစာ ၃၀၀,၀၀၀ ဝေငှ​ဖို့ မျှော်လင့်​ပြီး ညီအစ်ကို ရပ်သဖော့ဒ် လူထု​ကို​ဟောပြောချက်​ပေးဖို့​အတွက် ကြိုတင်​စီစဉ်​ဖို့ ဥရောပ​ကို သင်္ဘော​နဲ့ အဖေ​ခရီးထွက်​ခဲ့တယ်။ ဒါပေမဲ့ စပိန်​ကို​ရောက်တော့ ဘာသာရေး​သည်းမခံနိုင်မှု​ကို​တွေ့ရ​ပြီး ညီအစ်ကို​ရပ်သဖော့ဒ် ဟောပြောချက်​ပေးဖို့​မသင့်​တော်​ကြောင်း သူ​ပြော​ခဲ့တယ်။

ညီအစ်ကို​ရပ်သဖော့ဒ်​က ဟေရှာယ ၅၁:၁၆ ကို ကိုးကား​ပြီး စာပြန်​ခဲ့တယ်– “မိုးကောင်းကင်ကို​ဆောက်​၍၊ မြေကြီးကို​တည်စေခြင်း​ငှာ​လည်းကောင်း၊ သင်သည် ငါ​၏​လူမျိုး​ဖြစ်၏​ဟု ဇိအုန်​မြို့ကို​ပြော​စေခြင်း​ငှာ​လည်းကောင်း၊ ငါ့​စကား​ကို သင်၏​နှုတ်​ထဲမှာ ငါ​ထားပြီ။ ငါ့​လက်​၏​အရိပ်​နှင့် သင့်ကို​ငါ​မိုး​ပြီ။” အဲဒီတော့ အဖေက “ဒါဟာ ငါ​ရှေ့ဆက်​လုပ်ဆောင်​ပြီး အကျိုးကို​စောင့်ကြည့်ဖို့ သခင်​အလိုတော်​ရှိရမယ်” လို့​ယူမှတ်​ခဲ့တယ်။

၁၉၂၅၊ မေ ၁၀ ရက်​နေ့မှာ ဗာစယ်လိုးနာ​မြို့က နို​ဗီ​ဒါး​ဒီ​စ်​ပြဇာတ်ရုံ​မှာ ညီအစ်ကို​ရပ်သဖော့ဒ်​ဟာ စကားပြန်​တစ်ဦး​နဲ့ ဟောပြောချက်​ပေး​ခဲ့တယ်။ စင်မြင့်​ပေါ်မှာ အစိုးရ​အရာရှိ​တစ်ဦး​နဲ့ အထူး​ကိုယ်ရံတော်​တပ်သား​တစ်ဦး​အပါအဝင် တက်ရောက်သူ ၂,၀၀၀ ကျော်​ရှိခဲ့တယ်။ ဒီလို​အစီအစဉ်ကို မဒရစ်​မြို့​မှာလည်း​ကျင်းပ​ခဲ့​တာ ၁,၂၀၀ တက်ရောက်​ခဲ့တယ်။ ဒီ​ဟောပြောချက်​တွေ​ကြောင့် စိတ်ဝင်စားမှု​ရှိလာ​လို့ ၁၉၇၈၊ ယေဟောဝါသက်သေ​များ​၏​နှစ်ချုပ်​စာအုပ်​ပြော​သလို “ဂျော့ခ်ျ ယန်း​၏​ဦးဆောင်မှုအောက်” စပိန်​နိုင်ငံ​မှာ ဌာနခွဲရုံး​တည်ထောင်​ခဲ့​ရတယ်။

၁၉၂၅၊ မေ ၁၃ ရက်​နေ့မှာ ညီအစ်ကို​ရပ်သဖော့ဒ်​ဟာ ပေါ်တူဂီ​နိုင်ငံ လ​စ္စ​ဘ​န်​မြို့မှာ ဟောပြောချက်​ပေး​ခဲ့တယ်။ တရားဟော​ဆရာ​တွေ​က အစည်းအဝေး​ပျက်​ရအောင် အော်ဟစ်​ဆူပူ၊ ထိုင်ခုံ​တွေ​ကို​ချိုးဖျက်​ခဲ့​ကြ​ပေမဲ့ ရပ်သဖော့ဒ်​ရဲ့​လည်ပတ်မှု​ဟာ အကြီးအကျယ်​အောင်မြင်​ခဲ့တယ်။ ပေါ်တူဂီ​နဲ့​စပိန်​မှာ ညီအစ်ကို​ရပ်သဖော့ဒ် ဟောပြောချက်​တွေ ပေး​ပြီး​တဲ့​နောက် အဖေက “ဓာတ်​ပုံ​ပြဇာတ်” ကို​ဆက်​ပြပေး​ခဲ့တယ်၊ အဲ့ဒီ​နေရာတွေမှာ ကျမ်းစာ​စာပေ​တွေ ပုံနှိပ်​ပြီး ဝေငှ​နိုင်​ဖို့​လည်း သူ​စီစဉ်​ခဲ့တယ်။ ၁၉၂၇ ခုနှစ်​မှာ သတင်းကောင်းကို “စပိန်​နိုင်ငံ​ရှိ မြို့ကြီး​မြို့ငယ်​တိုင်း​မှာ ဟောပြောပြီး​ပြီ” ဆိုပြီး အဖေ​သတင်းပို့​ခဲ့တယ်။

ဆိုဗီယက်​ပြည်ထောင်စု​တွင် ဟောပြောခြင်း

အဖေ့​ရဲ့ ခရစ်ယာန်​သာသနာပြု​တာဝန်​နောက်တစ်ခု​က​တော့ ဆိုဗီယက်​ပြည်ထောင်စု​မှာ​ဖြစ်​ပြီး အဲဒီကို ၁၉၂၈၊ ဩဂုတ်​လ ၂၈ ရက်​နေ့မှာ ရောက်သွား​တယ်။ ၁၉၂၈၊ အောက်တိုဘာ ၁၀ ရက်စွဲ​တပ်​ပြီး​ရေး​တဲ့​စာ​တစ်စောင်​ထဲမှာ ဒီလို​ပါ​တယ်–

 “ရုရှား​ကို​ရောက်​ကတည်းက ‘နိုင်ငံတော်​လာပါစေ’ လို့​နှလုံး​အပြည့်​နဲ့ ကျွန်တော်​တကယ်​ဆုတောင်း​နိုင်တယ်။ ဘာသာ​စကား​ကို ကျွန်တော်​သင်ယူ​နေပါတယ်၊ မြန်မြန်​နဲ့​တော့ မတတ်​နိုင်ဘူး။ ကျွန်တော့်​ရဲ့​စကားပြန်​က တကယ့်ကို​ထူးခြားတဲ့ ဂျူး​တစ်ယောက်​ဖြစ်တယ်၊ သူက ခရစ်တော်​ကို​ယုံကြည်တယ်၊ ကျမ်းစာ​ကိုလည်း မြတ်နိုးတယ်။ စိတ်ဝင်စားစရာ​တွေ့ကြုံမှု​တွေ​ရှိတယ်၊ ဒါပေမဲ့ ဘယ်လောက်​ကြာကြာ​နေထိုင်ခွင့်​ရမယ်ဆိုတာ​ကို ကျွန်တော်​မသိ​ဘူး။ ပြီး​ခဲ့​တဲ့​အပတ်​က ၂၄ နာရီ​အတွင်း ထွက်သွား​ဖို့​သတိပေး​စာ​ရခဲ့ပေမဲ့ ဒါကို​ဖြေရှင်း​နိုင်​ခဲ့လို့ ဆက်နေ​နိုင်​သေး​တယ်။”

အခု ယူကရိန်း​နိုင်ငံ​ရဲ့ အဓိက​မြို့တော်​ဖြစ်​တဲ့ ခါ​ရ်​ကော့ဖ်​မြို့က ကျမ်းစာ​ကျောင်းသား​တချို့​နဲ့ အဆက်အသွယ်​ရခဲ့လို့ နွေးထွေး​တဲ့​အပြန်အလှန်​အားပေးမှု​ကြောင့် ဝမ်းသာ​မျက်ရည်တွေ​ကျ​ခဲ့တယ်။ အစည်းအဝေး​ငယ်​တွေ​ကို ည​တိုင်း သန်း​ခေါင်​အထိ ကျင်းပ​ခဲ့​ကြရတယ်။ ညီအစ်ကို​တွေ​နဲ့ ဒီလို​တွေ့ဆုံ​ခဲ့​တဲ့​အကြောင်းကို နောက်ပိုင်း​မှာ အဖေက ဒီလို​စာရေး​သတင်းပို့​ခဲ့တယ်– “တကယ်​သနားစရာ​ကောင်းတယ်၊ ညီအစ်ကို​တွေ​ရဲ့​စာအုပ်​အနည်းငယ် အသိမ်း​ခံရ​ပြီး အာဏာပိုင်တွေ​နဲ့​လည်း အဆင်မပြေတာ​တောင် သူတို့​ပျော်ရွှင်​ကြတယ်။”

ဆိုဗီယက်​ပြည်ထောင်စု​မှာ အဖေ​ပြုလုပ်​ခဲ့​တဲ့​အမှုဆောင်ခြင်းကို ၁၉၉၇ ခုနှစ်၊ ဇွန် ၂၁ ရက်မှာ​ကျင်းပ​တဲ့ ရုရှား​နိုင်ငံ စိန့်ပီတာ​စ​ဘာ့ဂ်​မြို့က ဌာနခွဲရုံး​အသစ်​အပ်နှံ​ပွဲ​ကို တက်ရောက်​လာတဲ့ သူတွေ​အတွက် အထူး​ဘရိုရှာ​ထဲမှာ ပေါ်လွင်​စေ​ခဲ့တယ်။ အဖေ့ကို မော်​စ​ကို​ကို​စေလွှတ်ခဲ့​ပြီး “ရုရှား​တွင်​ဝေငှ​ရန်​အတွက် လူ​တို့​အဖို့​လွတ်လပ်မှု​နှင့် လူသေများ​အဘယ်​မှာ​ရှိ​သနည်း စာအုပ်​ငယ်​စောင်ရေ ၁၅,၀၀၀ ထုတ်ဝေ​ရန်” အခွင့်​ရရှိခဲ့တဲ့​အကြောင်း ဘရိုရှာ​ထဲမှာ​ဖော်ပြ​ခဲ့တယ်။

ရုရှား​က​ပြန်လာ​ပြီး​နောက် အမေရိကန်​ပြည်ထောင်စု​မှာ နယ်လှည့်​လုပ်ငန်း​လုပ်ဖို့ အဖေ​တာဝန်ရ​ခဲ့တယ်။ တောင်​ဒါကို​တာ​မှာ နယ်​လီ​နာ​နဲ့ ဗာ​ဒါ ပူးလ်​လို့​ခေါ်​တဲ့ ညီအစ်မ​နှစ်ယောက်​ဆီ အဖေ​လည်ပတ်​ခဲ့တယ်၊ နောက်ပိုင်း​မှာ သူတို့ဟာ ပီရူး​မှာ ခရစ်ယာန်​သာသနာပြုတွေ​ဖြစ်လာ​ခဲ့​ကြတယ်။ အဖေရဲ့​မ​နား​မနေ အမှုဆောင်​ရွက်​တာ​ကို သူတို့​ကျေးဇူး​တင်​လေးမြတ်​ကြောင်း ဒီလို​ဖော်ပြ​ခဲ့​ကြတယ်– “အဲ့ဒီ​အချိန်​က​ညီအစ်ကို​တွေ​ဟာ လောက​ပစ္စည်း နည်းနည်း​ပဲ​ရှိကြပေမဲ့ ယေဟောဝါ​ကို​ချစ်တဲ့​စိတ်​အပြည့်​နဲ့ နိုင်ငံ​ခြား​ကို သွားခဲ့​ကြ​တာ ရှေ့ဆောင်​စိတ်ဓာတ် တကယ်​ရှိကြ​လို့​ပဲ။ အဲ့ဒီ​စိတ်ဓာတ်​က သူတို့​ပြုလုပ်​နိုင်​ခဲ့​တာတွေကို လှုံ့ဆော်ပေး​ခဲ့တယ်။”

အိမ်ထောင်ပြုခြင်း​နှင့် ဒုတိယ​ခရီးစဉ်

နှစ်တွေ​တစ်လျှောက်​မှာ အဖေဟာ အွန်​တဲ​ရီး​ယို​ပြည်နယ်၊ မ​န်​နီ​တိုး​လင်း​ကျွန်း​သူ က​လယ်​ရာ ဟပ်​ဘတ်​နဲ့ စာ​အဆက်အသွယ်​ရှိခဲ့တယ်။ ကျမ်းစာ​ကျောင်းသား​တွေ​က ယေဟောဝါသက်သေ​များ​ဆို​တဲ့ နာမည်​ကို​ခံယူ​ခဲ့​ကြ​တဲ့ ၁၉၃၁၊ ဇူလိုင် ၂၆ ရက်၊ ကိုလမ်ဘတ်စ်၊ အိုဟိုင်အို​မှာ​ကျင်းပ​ခဲ့​တဲ့​စည်းဝေးကြီး​ကို အဖေ​တို့​နှစ်ယောက်စလုံး တက်ရောက်​ခဲ့​ကြတယ်။ (ဟေရှာယ ၄၃:၁၀-၁၂) တစ်ပတ်​အကြာမှာ အဖေ​တို့​လက်ထပ်​လိုက်ကြတယ်။ မကြာခင်​မှာပဲ ကရစ်ဘီယံ​ကျွန်း​တွေ​တစ်လျှောက် ဒုတိယ​ခရစ်ယာန်​သာသနာပြု​ခရီးစဉ်​ကို အဖေ​ခရီးထွက်​ရ​ပြန်​တယ်။ အဲ့ဒီ​မှာ အစည်းအဝေးတွေကို​စီစဉ်​တတ်​ဖို့နဲ့ တစ်အိမ်​မှ​တစ်အိမ် အမှုဆောင်ခြင်းမှာ​ပါဝင်​ဖို့ တခြား​သူတွေကို အဖေ​လေ့ကျင့်​ကူညီပေး​ခဲ့တယ်။

အမေကတော့ စူ​ရီ​န​မ်၊ စိန့်ကစ္စ​နဲ့ တခြား​ဒေသ​တွေ​ကနေ  ဓာတ်​ပုံ​တွေ၊ ကတ်​တွေ​နဲ့ စာ​တွေ​ရရှိခဲ့တယ်။ စာ​တွေ​ထဲမှာ ဟောပြောခြင်း​လုပ်ငန်း တိုးတက်​တဲ့​အကြောင်း​နဲ့ တစ်ခါ​တ​လေ အဖေ​ရောက်နေတဲ့​နိုင်ငံ​တွေ​မှာ​ရှိတဲ့ ငှက်​တွေ၊ တိရစ္ဆာန်​တွေ​နဲ့ အပင်​တွေ​အကြောင်းပါ​တယ်။ ၁၉၃၂ ဇွန်​မှာ ကရစ်ဘီယံ​မှာ​လုပ်​ရမယ့်​အလုပ်​ပြီးသွား​လို့ ထုံးစံ​အတိုင်း သင်္ဘော​ကုန်းပတ်​ပေါ်​စီး​ပြီး ကနေဒါ​ကို​ပြန်လာ​ခဲ့တယ်။ အဲ့ဒီ​နောက် အဖေနဲ့​အမေ​ဟာ အတူတူ​အမှုဆောင်ခဲ့ကြတယ်။ ၁၉၃၂/၃၃ ဆောင်းတွင်း​မှာ အို​တာ​ဝါ​အရပ်​က တခြား​အချိန်ပြည့်​အမှုဆောင်​တွေ​နဲ့​အတူ အမှုဆောင်ခဲ့ကြတယ်။

မိသားစု​ဘဝ​အကြောင်း အကျဉ်းချုပ်

၁၉၃၄ မှာ ကျွန်မ​ရဲ့​အစ်ကို ဒေးဗစ်​ကို​မွေးခဲ့တယ်။ သူက​လေး​အရွယ်မှာ​ပဲ အမေ့ရဲ့​ဦးထုပ်​သေတ္တာ​ပေါ်မှာ​ရပ်​ပြီး “ဟောပြောချက်​တွေ” ပေး​တန်း​ကစား​ခဲ့တယ်။ အဖေ့​လို​ပဲ သူ့ရဲ့​အသက်တာ​တစ်လျှောက်​လုံး​မှာ ယေဟောဝါ​အတွက် ဇွဲရှိ​တာ​ကို​တင်ပြ​ခဲ့တယ်။ အဖေ​တို့​သုံးယောက်ဟာ ကနေဒါ​အရှေ့ဘက်​ကမ်းခြေ​ကနေ အနောက်ဘက်​ကမ်းခြေ​မှာ​ရှိတဲ့ အသင်းတော်တွေဆီ အမိုး​ပေါ်မှာ အသံချဲ့စက်​တပ်ထား​တဲ့​ကား​နဲ့ လှည့်ပတ်​ခရီးထွက်​ခဲ့​ကြတယ်။ ဗြိတိသျှ​ကိုလံဘီယာ​မှာ အဖေ​တာဝန်ကျ​တုန်း ၁၉၃၈ ခုနှစ်​မှာ ကျွန်မ​ကို​မွေးဖွားခဲ့တယ်။ အဖေက ကျွန်မ​ကို​အိပ်ရာပေါ်​တင်ပြီး ကျွန်မ​အတွက်​ကျေးဇူး​တင်​ကြောင်း အဖေ၊ အမေနဲ့ ဒေးဗစ်​တို့​က ကျွန်မ​ပတ်ပတ်လည်​မှာ ဒူးထောက်​ဆုတောင်း​ခဲ့​ကြ​တာ​ကို ဒေးဗစ်​မှတ်မိတယ်။

၁၉၃၉ ဆောင်းတွင်း​မှာ ဗဲန်ကူးဗား​နယ်မြေ​က​အသင်းတော်တွေဆီ အဖေ​လည်ပတ်​နေတုန်း အဲ့ဒီ​မြို့မှာ​ကျွန်မ​တို့​နေထိုင်ခဲ့​ကြတယ်။ နှစ်တွေ​တစ်လျှောက် ကျွန်မ​တို့​စုဆောင်း​ထားခဲ့​တဲ့​စာ​တွေ​ထဲ​က ၁၉၃၉၊ ဇန်နဝါရီ ၁၄၊ ရက်စွဲ​တပ်ထား​တဲ့​စာ​ကို ဗြိတိသျှ​ကိုလံဘီယာ​ခရိုင်၊ ဗာနွန်​မြို့ကနေ အဖေ​ရေးခဲ့တယ်။ အဖေက က​လယ်​ရာ၊ ဒေးဗစ်​နဲ့ ရုသ်​လို့​လိပ်မူ​ပြီး “အဖေ့​ရဲ့​အနမ်း​နဲ့ ပွေ့ဖက်မှု​ကို​ပို့​လိုက်တယ်” တဲ့။ အဲဒီ​စာ​ထဲမှာ ကျွန်မ​တို့​တစ်ယောက်စီ​အတွက် အမှာစကား​တွေ​ပါ​တယ်။ စပါး​ရိတ်​စ​ရာ​များနေ​ပေမဲ့ ရိတ်​တဲ့​သူတွေ​နည်းတယ်​လို့ အဖေ​ပြောပြ​ခဲ့တယ်။—မဿဲ ၉:၃၇၊ ၃၈။

ဗဲန်ကူးဗား​မြို့မှာ​တာဝန်​ထမ်း​ပြီး​ပြန်လာ​လို့ တစ်ပတ်​အကြာ အစည်းအဝေး​တစ်ခု​မှာ အဖေ​ရုတ်တရက်​လဲကျ​သွားတယ်။ ရောဂါ​ရှာဖွေ​တဲ့​အခါ အဖေဟာ ဦးနှောက်​မှာ​ကင်ဆာ​အကျိတ်​ရှိတယ်လို့ သိလိုက်​ရတယ်။ ၁၉၃၉၊ မေ ၁ ရက်မှာ အဖေဟာ သူ့ရဲ့​မြေကြီး​အသက်တာ ပြီးဆုံး​သွားခဲ့တယ်။ ကျွန်မ​က ကိုး​လ​ပဲ​ရှိသေးတယ်၊ ဒေးဗစ်​က​တော့ ငါး​နှစ်​ပြည့်​ခါနီး​ပြီ။ ကောင်းကင်​မျှော်လင့်ချက်​ရှိတဲ့ ကျွန်မ​တို့​ချစ်​ရတဲ့​အမေ​ဟာ သူ​သေဆုံး​တဲ့ ၁၉၆၃၊ ဇွန် ၁၉ ရက်​အထိ ဘုရားသခင်​အပေါ်​သစ္စာ​ရှိခဲ့တယ်။

နိုင်ငံ​အတော်များများမှာ သတင်းကောင်း​သယ်ဆောင်​ဟောပြော​ခွင့်​ရတဲ့​အကြောင်း​နဲ့​ပတ်သက်ပြီး အဖေ့​ရဲ့​ခံစားချက်​ကို အမေ့​ဆီ​ရေး​တဲ့ စာ​တစ်စောင်​ထဲမှာ တကယ်​ကောင်းကောင်း​ဖော်ပြ​ထား​တယ်။ စာ​တစ်ပိုင်း​မှာ သူ​ဒီလို​ဆိုတယ်– “ယေဟောဝါ​ဟာ ဘုရားသခင့်​နိုင်ငံတော်​သတင်း​သယ်ဆောင်​တဲ့ အလင်းဆောင်သူ​တစ်ဦး​အဖြစ် ဒီ​နိုင်ငံ​တွေ​ကို​သွားဖို့ စေတနာ​နဲ့​ခွင့်ပြု​ခဲ့တယ်။ သန့်ရှင်း​မြင့်မြတ်​တဲ့​နာမတော် ချီးမွမ်း​ခံရ​ပါစေ။ အပြစ်​အနာအဆာ၊ အရည်အချင်း​မပြည့်မီ၊ အားနည်းချို့ငဲ့​တဲ့​ကြား ကိုယ်တော့်​ဘုန်း ထွန်းလင်း​တောက်ပ​နေတယ်။”

အခု​ဆိုရင် ဂျော့ခ်ျ​နဲ့​က​လယ်​ရာ ယန်း​တို့​ရဲ့​ကလေး​တွေ၊ မြေး​မြစ်တွေ​ဟာ​လည်း မေတ္တာရှင်​ဘုရားသခင် ယေဟောဝါ​ရဲ့​အမှုတော်ကို ထမ်းဆောင်​နေကြပါ​တယ်။ အဖေဟာ “နာမတော်​ကို​ထောက်၍​ပြ​သော​မေတ္တာကိုလည်း​ကောင်း ဘုရားသခင်​သည် မေ့လျော့​သည်​တိုင်အောင် [မတရားသော]အမှုကိုပြု​တော်​မူ​သည်မဟုတ်” လို့​ဆို​တဲ့ ဟေဗြဲ ၆:၁၀ ကို​မကြာခဏ​ကိုးကား​ခဲ့တယ်​လို့ ကျွန်မ​သိခဲ့ရတယ်။ ကျွန်မ​တို့​လည်း အဖေ့​ရဲ့​လုပ်ဆောင်မှုတွေကို မေ့​လို့​မရပါ​ဘူး။

[စာမျက်နှာ ၂၃ ပါ ရုပ်ပုံ]

ညာဘက်​ရှိ​အဖေ​နှင့် သူ့​အစ်ကို​သုံးယောက်

[စာမျက်နှာ ၂၅ ပါ ရုပ်ပုံ]

ညီအစ်ကို​ဝူ့ဒ်​ဝေါ့သ်၊ ရပ်သဖော့ဒ်​နှင့် မက္ခမီလန် နှင့်အတူ​အဖေ (ရပ်နေ)

အောက်​ပုံ– ညီအစ်ကို​ရပ်စဲ​လ်​နှင့်အတူ အုပ်စု​ပါ အဖေ (ဘယ်​စွန်)

[စာမျက်နှာ ၂၆ ပါ ရုပ်ပုံ]

အဖေ​နှင့်​အမေ

အောက်​ပုံ– အဖေ​တို့​လက်ထပ်​သည့်​နေ့

[စာမျက်နှာ ၂၇ ပါ ရုပ်ပုံ]

အဖေ​ဆုံး​ပြီး နှစ်​အနည်းငယ်​အကြာ ဒေးဗစ်၊ အမေ​နှင့် ကျွန်မ