ပုံသက်သေကောင်းများ—ယင်းတို့မှ သင်အကျိုး ရရှိနေသလော
ပုံသက်သေကောင်းများ—ယင်းတို့မှ သင်အကျိုး ရရှိနေသလော
“မာကေဒေါနိပြည်၊ အာခါယပြည်၌ ယုံကြည်သောသူအပေါင်းတို့အား သင်တို့သည် ပုံသက်သေပေးသောသူဖြစ်ကြ၏။” တမန်တော်ပေါလုသည် သက်သာလောနိတ်မြို့တွင်နေထိုင်ကြသော သစ္စာရှိခရစ်ယာန်များထံ အဆိုပါစကားများကိုရေးပို့ခဲ့သည်။ ယုံကြည်သူချင်းများအတွက် သူတို့ပြသခဲ့သောပုံသက်သေသည် အမှန်ပင်ချီးကျူးထိုက်ဖွယ်ဖြစ်သည်။ သို့သော် သက်သာလောနိတ်မြို့သားများကိုယ်တိုင် ပေါလုနှင့်သူ၏လုပ်ဖော်ဆောင်ဖက်များ ပြသခဲ့သောပုံသက်သေကို အတုယူခဲ့ကြခြင်းဖြစ်သည်။ ပေါလုက “ငါတို့သည် သင်တို့နှင့်အတူနေသောအခါ သင်တို့အတွက် အဘယ်သို့သောသူဖြစ်သည်ကို သင်တို့သိကြသည်နှင့်အညီ၊ ငါတို့ဟောပြောသော ဧဝံဂေလိတရားသည် သင်တို့၌ စကားသက်သက်ဖြစ်သည်မဟုတ်။ တန်ခိုးနှင့်လည်းကောင်း၊ သန့်ရှင်းသောဝိညာဉ်တော်နှင့်လည်းကောင်း၊ ဝိစိကိစ္ဆာ[စိတ်နှစ်ခွဖြစ်ခြင်း] မရှိဘဲ အမှန်သိခြင်းနှင့်လည်းကောင်း ပြည့်စုံသောတရားဖြစ်၏။ သင်တို့သည် . . . ငါတို့ကဲ့သို့သောသူ . . . ဖြစ်ကြ၏” ဟုပြောဆိုခဲ့သည်။—၁ သက်သာလောနိတ် ၁:၅-၇။
မှန်၏၊ ပေါလုသည် တရားဟောခြင်းထက်မက လုပ်ဆောင်ခဲ့သည်။ သူ၏အသက်တာကိုယ်နှိုက်သည် လှုံ့ဆော်မှုတစ်ရပ်ဖြစ်သည်—ယုံကြည်ခြင်းနှင့် ခံနိုင်ရည်ရှိခြင်း၊ ကိုယ်ကျိုးစွန့်ခြင်းပုံသက်သေပင်။ ဤအကြောင်းကြောင့် ပေါလုနှင့်သူ၏လုပ်ဖော်ဆောင်ဖက်များသည် သက်သာလောနိတ်မြို့သားများ၏အသက်တာတွင် တန်ခိုးပါသောသြဇာသက်ရောက်ပြီး “ကြီးစွာသောဆင်းရဲခြင်း” တွင်အမှန်တရားကိုလက်ခံရန် သူတို့အားလှုံ့ဆော်ပေးခဲ့သည်။ သို့သော် ပေါလုနှင့်သူ၏လုပ်ဖော်ချင်းများသာ ထိုယုံကြည်သူများအတွက် အပြုသဘောပါ ဩဇာသက်ရောက်သူများ မဟုတ်ခဲ့ချေ။ ဆင်းရဲခြင်းကြား ခံနိုင်ရည်ရှိခဲ့ကြသော အခြားသူများ၏ပုံသက်သေသည်လည်း အားပေးမှုတစ်ခုဖြစ်ခဲ့၏။ “ယုဒပြည်၌ ယေရှုခရစ်၏ဘာသာကိုခံယူသော ဘုရားသခင်၏သင်းဝင်သူတို့သည် ယုဒလူတို့လက်မှ ဆင်းရဲခံရသကဲ့သို့ ညီအစ်ကိုတို့ သင်တို့သည် မိမိတို့အမျိုးသားချင်းတို့လက်မှ ထိုနည်းတူခံရသောအားဖြင့် ယုဒပြည်၌ရှိသော တပည့်တော်ကဲ့သို့သောသူဖြစ်ကြ၏” ဟူ၍ သက်သာလောနိတ်မြို့သားများထံ ပေါလုစာရေးခဲ့သည်။—၁ သက်သာလောနိတ် ၂:၁၄။
ခရစ်တော်ယေရှု—အထင်ရှားဆုံးစံထားအပ်သူ
ပေါလုကိုယ်တိုင်ပင် တုပထိုက်သောပုံသက်သေကိုချမှတ်ခဲ့သော်လည်း ခရစ်ယာန်များလိုက်လျှောက်သင့်သည့် အဓိကပုံသက်သေမှာ ယေရှုခရစ်ဖြစ်ကြောင်းကို သူထောက်ပြရန် မပျက်ကွက်ခဲ့ချေ။ (၁ သက်သာလောနိတ် ၁:၆) ခရစ်တော်သည် ကျွန်ုပ်တို့၏အထင်ရှားဆုံးသော စံထားအပ်သူဖြစ်ခဲ့ပြီ၊ ယခုလည်းဖြစ်ဆဲပင်။ “ထိုသို့အလိုငှာ သင်တို့ကိုခေါ်တော်မူပြီ။ ခရစ်တော်သည် ငါတို့အတွက် ခံတော်မူသည်ဖြစ်၍ ခြေ . . . ရာကိုလိုက်လျှောက်စေခြင်းငှာ ပုံသက်သေကိုထားတော်မူပြီ” ဟုတမန်တော်ပေတရုရေးသားခဲ့သည်။—၁ ပေတရု ၂:၂၁။
သို့သော် ယေရှုသည် လွန်ခဲ့သောနှစ်ပေါင်း ၂,၀၀၀ နီးပါးက လူသားတစ်ဦးအနေဖြင့် သူ၏အသက်တာပြီးဆုံးခဲ့သည်။ ယခု ကိုယ်တော်သည် မသေနိုင်သောနာမ်ဝိညာဉ်သားတစ်ဦးအဖြစ် “အလင်းထဲ၌နေတော်မူ” ၏။ ဤနည်းအားဖြင့် ကိုယ်တော်ကို “အဘယ်သူမျှမမြင်ဖူးရာ၊ မမြင်နိုင်ရာ။” (၁ တိမောသေ ၆:၁၆) သို့ဖြစ်လျှင် ကျွန်ုပ်တို့သည် ကိုယ်တော်ကို မည်သို့တုပနိုင်သနည်း။ တစ်နည်းမှာ ယေရှု၏ဘဝအသက်တာအကြောင်းပါ ကျမ်းစာမှတ်တမ်းလေးခုကို လေ့လာခြင်းအားဖြင့်ဖြစ်သည်။ ခရစ်ဝင်ကျမ်းများသည် ကိုယ်တော်၏ဥပဓိရုပ်၊ ဘဝလမ်းစဉ်နှင့် “စိတ်သဘော” တို့ကို ထိုးထွင်းသိမြင်စေသည်။ (ဖိလိပ္ပိ ၂:၅-၈) ယေရှု၏ဘဝအသက်တာမှအဖြစ်အပျက်များကို အသေးစိတ်ဖော်ပြသည်သာမက ခုနှစ်သက္ကရာဇ်စဉ်အတိုင်း ဆွေးနွေးတင်ပြထားသည့် အသက်ရှင်ခဲ့သမျှတွင် အကြီးမြတ်ဆုံးလူသား စာအုပ်ကို ဂရုတစိုက်လေ့လာခြင်းအားဖြင့်လည်း ထပ်ဆင့်၍ထိုးထွင်းသိမြင်နိုင်သည်။ *
ယေရှု၏ကိုယ်ကျိုးစွန့်ပုံသက်သေသည် တမန်တော်ပေါလုအပေါ် တန်ခိုးပါသောအကျိုးသက်ရောက်မှုရှိခဲ့၏။ ကောရိန္သုခရစ်ယာန်များကို သူဤသို့ပြောခဲ့သည်– “သင်တို့စိတ်ဝိညာဉ်၏အကျိုးအလိုငှာ ငါသည် ကိုယ်ဥစ္စာကိုလည်းကောင်း၊ ကိုယ်ကိုလည်းကောင်း ကုန်စေခြင်းငှာ အလွန်စေတနာရှိ၏။” (၂ ကောရိန္သု ၁၂:၁၅) အမှန်တကယ်ပင် ခရစ်တော်ကဲ့သို့ စိတ်ထားမျိုးပါတကား! ခရစ်တော်၏စုံလင်သောပုံသက်သေကို သုံးသပ်စဉ် ကျွန်ုပ်တို့၏ဘဝလမ်းစဉ်တွင် ကိုယ်တော့်ကိုတုပရန် ကျွန်ုပ်တို့လည်း လှုံ့ဆော်ခံရသင့်သည်။
မဿဲ ၆:၂၅; ၈:၂၀) ရုပ်ပိုင်းဆိုင်ရာစိုးရိမ်ပူပန်မှုများသည် သင့်အတွေးအခေါ်၊ အပြုအမူများကို စိုးမိုးနေသလော။ သို့မဟုတ် ဘုရားသခင့်နိုင်ငံတော်ကို သင်ရှေးဦးရှာနေသည်ကို သင်အသက်ရှင်ပုံက ထင်ရှားပြနေသလော။ ယေဟောဝါ၏လုပ်ငန်းတော်အပေါ် သင်၏စိတ်ထားနှင့်ပတ်သက်၍ကော အသို့နည်း။ ကျွန်ုပ်တို့၏စံထားအပ်သူ ယေရှုကဲ့သို့ဖြစ်သလော။ ယေရှုသည် ဇွဲအကြောင်းဟောပြောရုံသာမက ရဲရဲတောက်ဇွဲကို ကြိမ်ဖန်များစွာတင်ပြခဲ့သည်ဟု သမ္မာကျမ်းစာက ဖော်ပြသည်။ (ယောဟန် ၂:၁၄-၁၇) ထို့ပြင် မေတ္တာနှင့်ပတ်သက်၍ ယေရှုတင်ပြခဲ့သည့် ပုံသက်သေသည် အမှန်တကယ်ကောင်းမြတ်လှပေစွတကား! ကိုယ်တော်သည် တပည့်တော်များအတွက် မိမိအသက်ကိုပင် စွန့်ခဲ့သည်တကား! (ယောဟန် ၁၅:၁၃) သင်သည် သင့်ခရစ်ယာန်ညီအစ်ကိုများကို မေတ္တာပြခြင်းအားဖြင့် ယေရှုကိုတုပနေသလော။ သို့မဟုတ် သင်၏မေတ္တာသည် လူအချို့၏မစုံလင်မှုများကြောင့် အဟန့်အတားခံနေရသလော။
ဥပမာ၊ စားဝတ်နေရေးအတွက် ဘုရားသခင်၏ကတိတော်ကို ကျွန်ုပ်တို့ယုံကြည်အားထားသင့်ကြောင်း ယေရှုသွန်သင်ပေးခဲ့သည်။ သို့ရာတွင် ထိုထက်မက ကိုယ်တော်လုပ်ဆောင်ခဲ့၏။ ယေဟောဝါအား ဤသို့ယုံကြည်စိတ်ချကြောင်းကို နေ့စဉ်နေ့တိုင်း ကိုယ်တော်တင်ပြခဲ့သည်။ “မြေခွေးသည် မြေတွင်းရှိ၏။ မိုးကောင်းကင်၌ ကျင်လည်သောငှက်သည် နားနေရာအရပ်ရှိ၏။ လူသားမူကား၊ ခေါင်းချရာမျှမရှိ” ဟူ၍ ကိုယ်တော်မိန့်ဆိုခဲ့သည်။ (ခရစ်တော်၏ပုံသက်သေကို ကျွန်ုပ်တို့လိုက်လျှောက်ရန် ကြိုးစားရာ၌ တစ်ခါတစ်ရံပျက်ကွက်ပေလိမ့်မည်။ သို့သော် “သခင်ယေရှုခရစ်ကို ယူတင်ဝတ်ဆောင်” ရန်ကျွန်ုပ်တို့၏ကြိုးစားအားထုတ်မှုကို ယေဟောဝါနှစ်သက်မည်မှာအမှန်။—ရောမ ၁၃:၁၄။
‘သိုးတော်စုရှေ့မှာ ပုံသက်သေပြသောသူများ’
ကျွန်ုပ်တို့အတွက် ပုံသက်သေဖြစ်နိုင်သူများ အသင်းတော်တွင် ယနေ့ရှိသလော။ အမှန်တကယ်ပင်ရှိပါသည်! အထူးသဖြင့် တာဝန်ထမ်းဆောင်ရန် ခန့်အပ်ခံရသော ညီအစ်ကိုများသည် ပုံသက်သေပြရမည်ဖြစ်သည်။ ခန့်အပ်ခံအကြီးအကဲအသီးသီးတို့သည် “အပြစ်တင်ခွင့်နှင့်ကင်းလွတ်သောသူ” ဖြစ်ရမည်ဟု ကရေတေကျွန်းရှိအသင်းတော်များတွင် အမှုထမ်းဆောင်ပြီး ကြီးကြပ်မှူးများကိုခန့်အပ်ခဲ့သူ တိတုကို ပေါလုပြောခဲ့သည်။ (တိတု ၁:၅၊ ၆) အလားတူပင် တမန်တော်ပေတရုသည် “သိုးတော်စုရှေ့မှာ ပုံသက်သေကိုပြ” ကြရန် “သင်းအုပ်” များကို သတိပေးဆုံးမခဲ့၏။ (၁ ပေတရု ၅:၁-၃) ဓမ္မအမှုထမ်းများအဖြစ် အမှုထမ်းဆောင်နေသူများကော အသို့နည်း။ သူတို့သည်လည်း “သင်းထောက်အမှုကို ကောင်းစွာရွက်ဆောင်သောသူ” ဖြစ်ကြရမည်။—၁ တိမောသေ ၃:၁၃။
မှန်ပါသည်၊ အကြီးအကဲ သို့မဟုတ် ဓမ္မအမှုထမ်းတိုင်းသည် ခရစ်ယာန်ဓမ္မအမှု၏ကဏ္ဍတိုင်းတွင် အထူးကောင်းမွန်သောစွမ်းရည်ရှိလိမ့်မည်ဟု မျှော်လင့်ခြင်းသည် လက်တွေ့မကျပါ။ ရောမမှခရစ်ယာန်များကို ပေါလုက ဤသို့ပြောခဲ့သည်– “ပေးတော်မူသော ကျေးဇူးတော်အတိုင်း ငါတို့သည် အသီးသီးအပြားပြားသောဆုများကို ခံရသည်။” (ရောမ ၁၂:၆) ညီအစ်ကိုများသည် ကဏ္ဍအသီးသီးတွင် တစ်မျိုးစီထူးခြားကြသည်။ အကြီးအကဲများသည် အရာရာတွင် စုံလင်စွာပြုမူပြောဆိုလိမ့်မည်ဟု မျှော်လင့်ခြင်းသည် အကျိုးသင့်အကြောင်းသင့်မဖြစ်ချေ။ ယာကုပ် ၃:၂ တွင်သမ္မာကျမ်းစာက “ငါတို့ရှိသမျှသည် အများသောအားဖြင့် မှားတတ်ကြ၏” ဟုဆိုသည်။ “စကားအားဖြင့် မှားခြင်းမရှိသောသူမည်သည်ကား၊ စုံလင်သောသူဖြစ်၏။ မိမိကိုယ်တစ်ကိုယ်လုံးကို ချုပ်တည်းနိုင်သောသူဖြစ်၏။” သို့သော် အကြီးအကဲများသည် မစုံလင်မှုများရှိလင့်ကစား တိမောသေကဲ့သို့ “စကားပြောခြင်း၊ ကျင့်ကြံပြုမူခြင်း၊ သူတစ်ပါးကိုချစ်ခြင်း၊ ဝိညာဉ်သဘောရှိခြင်း၊ သစ္စာစောင့်ခြင်း၊ စင်ကြယ်ခြင်းအရာမှာ ယုံကြည်သောသူတို့အား ပုံသက်သေကိုပြ” နိုင်ကြပါသည်။ (၁ တိမောသေ ၄:၁၂) အကြီးအကဲများသည် ထိုသို့ပြုလုပ်ကြသောအခါ သိုးတော်စုသည် ဟေဗြဲ ၁၃:၇ တွင်ပါသော ဤသတိပေးဆုံးမစကားကို တလိုတလားလိုက်လျှောက်လိမ့်မည်– “သင်တို့အားဟောပြော၍၊ သင်တို့ကိုအုပ်သောသူတို့ကို အောက်မေ့ကြလော့။ သူတို့သည် အဘယ်သို့ကျင့်ကြံပြုမူ . . . သည်ကို စေ့စေ့ဆင်ခြင်လျက်၊ သူတို့၏ယုံကြည်ခြင်းကိုမီအောင်လိုက်ကြလော့။”
အခြားမျက်မှောက်ခေတ်ပုံသက်သေများ
လွန်ခဲ့သောဆယ်စုနှစ်အနည်းငယ်တစ်လျှောက်တွင် မရေမတွက်နိုင်သောအခြားသူများက မိမိတို့သည် ပုံသက်သေကောင်းများဖြစ်ကြောင်း ဖော်ပြခဲ့ကြပြီ။ တိုင်းတစ်ပါးလယ်ကွင်းများ၌ ခရစ်ယာန်တာဝန်ကို ဆောင်ရွက်ရန် “အိမ်၊ လယ်၊ ညီအစ်ကို၊ နှမ၊ မိဘ၊ သားမယားဟူသော တစ်ပါးပါးကိုစွန့်” ခဲ့ကြသော ထောင်နှင့်ချီသောကိုယ်ကျိုးစွန့်သာသနာပြုများနှင့်ပတ်သက်၍ကော။ (မဿဲ ၁၉:၂၉) နယ်လှည့်ကြီးကြပ်မှူးများနှင့် သူတို့၏ဇနီးများ၊ ကင်းမျှော်စင်အသင်းမရုံးများတွင် စေတနာ့ဝန်ထမ်းများအဖြစ် လုပ်ဆောင်နေကြသော အမျိုးသားများနှင့်အမျိုးသမီးများ၊ အသင်းတော်များတွင် အမှုဆောင်နေကြသော ရှေ့ဆောင်များကိုလည်း စဉ်းစားကြည့်ပါ။ ထိုသို့သောပုံသက်သေများသည် သူတစ်ပါးကို လှုံ့ဆော်ပေးနိုင်သလော။ အာရှမှ ခရစ်ယာန်ဧဝံဂေလိဟောပြောသူတစ်ဦးသည် ကင်းမျှော်စင် သမ္မာကျမ်းစာ ဂိလဒ်ကျောင်း၏ ရှစ်ကြိမ်မြောက်သင်တန်းမှ ခရစ်ယာန်သာသနာပြုတစ်ဦးကို ပြန်ပြောင်းသတိရသည်။ ဤသစ္စာရှိညီအစ်ကိုသည် “ခြင်အုပ်နဲ့ စွတ်စိုအိုက်စပ်စပ်ဒဏ်ကို ခံရပ်ဖို့ တလိုတလားရှိခဲ့တယ်။ . . . သူဟာ အင်္ဂလန်က ဖြစ်ပေမဲ့ သူရဲ့တရုတ်စကားနဲ့ မလေးစကားပြောနိုင်စွမ်းက တကယ့်ကိုစွဲမှတ်စရာဖြစ်တယ်” ဟုသူပြောပြခဲ့၏။ ဤပုံသက်သေကောင်း၏ အကျိုးသက်ရောက်မှုကားအဘယ်နည်း။ “သူရဲ့အေးဆေးတည်ငြိမ်တဲ့စိတ်နဲ့ ယုံကြည်စိတ်ချမှုက ကျွန်တော်ကြီးလာတဲ့အခါ ခရစ်ယာန်သာသနာပြုဖြစ်ချင်တဲ့စိတ်ကို ဖြစ်ပေါ်စေခဲ့တယ်” ဟုထိုညီအစ်ကိုကပြောပြခဲ့သည်။ အဆိုပါညီအစ်ကိုသည် ခရစ်ယာန်သာသနာပြုတစ်ဦးဖြစ်လာခဲ့သည်မှာ အံ့ဩစရာမဟုတ်ချေ။
ကင်းမျှော်စင် နှင့် နိုးလော့! မဂ္ဂဇင်းများမှ ဘဝအတ္ထုပ္ပတ္တိများစွာ၏စာရင်းကို ကင်းမျှော်စင်စာအုပ်စာပေအညွှန်း တွင်ပါရှိသည်။ ယင်းအတ္ထုပ္ပတ္တိများက လောကအလုပ်များနှင့် ပန်းတိုင်များကိုစွန့်ခဲ့သူများ၊ အားနည်းချက်များကိုအောင်မြင်ခဲ့သူများ၊ ဥပဓိရုပ်ပြောင်းလဲခဲ့သူများနှင့် လုံ့လဝီရိယ၊ ခံနိုင်ရည်၊ သစ္စာစောင့်သိမှု၊ နှိမ့်ချမှုနှင့် ကိုယ်ကျိုးစွန့်စိတ်ဓာတ်ကို ပြသခဲ့သူများအကြောင်း ပြောပြသည်။ ဤမှတ်တမ်းများနှင့်ပတ်သက်၍ စာရှုသူတစ်ဦးက ဤသို့ရေးခဲ့သည်– “တခြားသူတွေရဲ့အကြောင်းကို ဖတ်ပြီးတဲ့အခါ ကျွန်မကို ပိုစိတ်နှိမ့်ချစေပြီး ကျေးဇူးသိတတ်တဲ့ခရစ်ယာန်တစ်ဦး ဖြစ်စေခဲ့တဲ့အပြင် ကိုယ့်ကိုယ်ကို အလွန်အထင်မကြီးဖို့ ဒါမှမဟုတ် ကိုယ်ကျိုးမရှာဖို့ ကူညီပေးတယ်။”
ထို့ပြင် သင့်အသင်းတော်ထဲမှ ပုံသက်သေကောင်းများဖြစ်သူ မိသားစု၏ကာယရေးနှင့်ဝိညာဉ်ရေးလိုအပ်ရာများကို အစဉ်မပြတ်ကြည့်ရှုပြုစုပေးသော အိမ်ထောင်ဦးစီးများ; ခရစ်ယာန်ဓမ္မအမှုတွင် တက်ကြွစွာပါဝင်နေကြစဉ် သားသမီးမွေးမြူရေးဖိစီးမှုများကို ကိုင်တွယ်ဖြေရှင်းနေကြရသော ကြင်ဖော်မဲ့မိခင်များအပါအဝင် ညီအစ်မများ; ကျန်းမာရေးချို့ယွင်းလာလင့်ကစား ဆက်၍သစ္စာရှိကြသော သက်ကြီးရွယ်အို၊ မမာမကျန်းဖြစ်နေကြသူများ၏ ပုံသက်သေကောင်းများကိုလည်း မမေ့ကြပါနှင့်။ ဤသို့သောပုံသက်သေများက သင့်ကိုလှုံ့ဆော်ပေးသည်မဟုတ်ပေလော။
မှန်၏၊ ဤလောကတွင် မကောင်းသောပုံသက်သေများ ပြည့်နှက်နေသည်။ (၂ တိမောသေ ၃:၁၃) မည်သို့ပင်ဖြစ်ပါစေ၊ ယုဒနယ်တွင်နေထိုင်ခဲ့ကြသော ခရစ်ယာန်များထံ ပေါလု၏တိုက်တွန်းချက်ကို သုံးသပ်ကြည့်ပါ။ ရှေးသစ္စာရှိအမျိုးသားများနှင့်အမျိုးသမီးများစွာတို့၏ စံထားအပ်သောအပြုအမူကို ပြန်ပြောပြပြီးနောက် တမန်တော်ပေါလုက သူတို့ကို ဤသို့တိုက်တွန်းခဲ့သည်– “ထိုကြောင့်၊ ဤမျှလောက်များစွာသော သက်သေအပေါင်းတို့သည် ငါတို့ကိုဝိုင်းရံလျက်ရှိကြသည်ဖြစ်၍ . . . ငါတို့မျက်မှောက်၌ထားသော ပန်းတုံးတိုင်သို့ရောက်ခြင်းငှာ၊ အားမလျော့ဘဲပြေးကြကုန်အံ့။ ယုံကြည်ခြင်းကို အစအဦးစီရင်၍ စုံလင်စေတော်မူသောသခင်ယေရှုကို စေ့စေ့ထောက်ရှုကြကုန်အံ့။” (ဟေဗြဲ ၁၂:၁၊ ၂) ယနေ့ ခရစ်ယာန်များကိုလည်း ရှေးခေတ်နှင့်မျက်မှောက်ခေတ် ပုံသက်သေကောင်း “များစွာ” ဝိုင်းရံလျက်ရှိသည်။ ၎င်းတို့မှ အသင် အမှန်ပင်အကျိုးခံစားနေရပါသလော။ သင်သည် ‘မကောင်းသောနည်းကို မလိုက်ဘဲ၊ ကောင်းသောနည်းကိုသာလိုက်’ ရန်ဆုံးဖြတ်ထားလျှင် အမှန်ပင်အကျိုးခံစားနိုင်မည်ဖြစ်သည်။—၃ ယောဟန် ၁၁။
[အောက်ခြေမှတ်ချက်များ]
^ အပိုဒ်၊ 6 ကင်းမျှော်စင် သမ္မာကျမ်းစာနှင့် ဝေစာအသင်း၊ မြန်မာမှ ထုတ်ဝေသည်။
[စာမျက်နှာ ၂၀ ပါ ရုပ်ပုံ]
အကြီးအကဲ သို့မဟုတ် ဓမ္မအမှုထမ်းတိုင်းသည် ခရစ်ယာန် ဓမ္မအမှု၏ကဏ္ဍတိုင်းတွင် ထူးချွန်သောစွမ်းရည်ရှိလိမ့်မည်ဟု မျှော်လင့် ခြင်းသည် လက်တွေ့မကျပါ
[စာမျက်နှာ ၂၁ ပါ ရုပ်ပုံ]
အကြီးအကဲများသည် “သိုးတော်စုရှေ့မှာ ပုံသက်သေ” များဖြစ်ကြရ