ဘုရားသခင့်နိုင်ငံတော်အမှန်တရား မျိုးစေ့ကြဲခြင်း
ဘုရားသခင့်နိုင်ငံတော်အမှန်တရား မျိုးစေ့ကြဲခြင်း
“နံနက်အချိန်၌မျိုးစေ့ကိုကြဲလော့။ ညဉ့်ဦးအချိန်၌လည်း မကြဲဘဲမနေနှင့်။”—ဒေ. ၁၁:၆။
၁။ မျက်မှောက်ခေတ်တွင် ခရစ်ယာန်များသည် အဘယ်သဘောဖြင့်မျိုးကြဲနေကြသနည်း။
ရှေးခေတ်ဟေဗြဲလူ့အဖွဲ့အစည်းတွင် လယ်ယာစိုက်ပျိုးခြင်းသည် အရေးပါသောကဏ္ဍတစ်ခုဖြစ်ခဲ့သည်။ ထို့ကြောင့် မိမိ၏လူသားအသက်တာတစ်လျှောက် ကတိထားရာပြည်၌နေထိုင်ခဲ့သော ယေရှုသည် သူ၏ပုံဥပမာများတွင် လယ်ယာစိုက်ပျိုးခြင်းအကြောင်းများ ပါဝင်စေခဲ့သည်။ ဥပမာ၊ ဘုရားသခင့်နိုင်ငံတော်သတင်းကောင်းဟောပြောခြင်းကို မျိုးစေ့ကြဲခြင်းနှင့် ကိုယ်တော်နှိုင်းယှဉ်ခဲ့သည်။ (မဿဲ ၁၃:၁-၉၊ ၁၈-၂၃; လုကာ ၈:၅-၁၅) ယနေ့တိုင် လယ်ယာစိုက်ပျိုးသည့် လူ့အသိုင်းအဝိုင်း၌ ကျွန်ုပ်တို့နေထိုင်သည်ဖြစ်စေ၊ မနေထိုင်သည်ဖြစ်စေ ဤနည်းဖြင့်ဝိညာဉ်ရေးမျိုးစေ့ကြဲခြင်းသည် ခရစ်ယာန်များ၏အရေးအပါဆုံးလုပ်ငန်းဖြစ်သည်။
၂။ ကျွန်ုပ်တို့၏ဟောပြောခြင်းလုပ်ငန်းသည် မည်မျှအရေးကြီးသနည်း၊ ယင်းကိုဆောင်ရွက်ဖို့ မျက်မှောက်ခေတ်ပြုလုပ်ခဲ့ရာအချို့ကား အဘယ်နည်း။
ရောမ ၁၀:၁၄၊ ၁၅ ကဤသို့ကောင်းစွာဖော်ပြသည်– “ဟောပြောသောသူမရှိလျှင် အဘယ်သို့ကြားနိုင်မည်နည်း။ လူကိုမစေလွှတ်လျှင် အဘယ်သို့ဟောပြောနိုင်မည်နည်း။ ထိုသို့နှင့်အညီ ကျမ်းစာလာသည်ကား၊ ‘ငြိမ်သက်ခြင်း၏ဝမ်းမြောက်စရာသတင်း၊ ကောင်းကျိုးချမ်းသာ၏ ဝမ်းမြောက်စရာသတင်းကို ကြားပြောသောသူ၏ခြေတို့သည် အလွန်တင့်တယ်စွတကား။’” ဘုရားသခင်ပေးသောဤတာဝန်ကိုကျေပွန်စွာဆောင်ရွက်ရန် အပြုသဘောထားရှိခြင်းသည် တစ်ခါမျှဤမျှအရေးမကြီးခဲ့ဖူးပါ။ ထိုအကြောင်းကြောင့် ယေဟောဝါသက်သေများသည် ကျမ်းစာနှင့် ကျမ်းစာအထောက်အကူပြုစာပေများကို ဘာသာစကား ၃၄၀ ဖြင့်ထုတ်ဝေ၊ ဖြန့်ဖြူးရာတွင် လုံးလုံးအာရုံနစ်မြှုပ်ထားကြသည်။ ဤစာပေများကိုပြင်ဆင်ခြင်းအတွက် သူတို့၏ဌာနချုပ်နှင့် နိုင်ငံအသီးသီးရှိဌာနခွဲရုံးများ၌ စေတနာ့ဝန်ထမ်းသူ ၁၈,၀၀၀ ကျော်လိုအပ်သည်။ ထို့ပြင် ဤကျမ်းစာစာပေစာတမ်းကို ကမ္ဘာတစ်ဝန်းဝေငှရာ၌ သက်သေခံခြောက်သန်းနီးပါး ပါဝင်နေကြသည်။
၂ ဤနောက်ဆုံးအချိန်တွင် ကျမ်းစာအမှန်တရားမျိုးကြဲရာ၌ ပါဝင်ရခြင်းသည် အခွင့်ထူးကြီးဖြစ်သည်။ ဤလုပ်ငန်း၏အရေးပါမှုကို၃။ ဘုရားသခင့်နိုင်ငံတော်အမှန်တရားမျိုးကိုကြဲခြင်းအားဖြင့် အဘယ်အရာကိုပြီးမြောက်လျက်ရှိသနည်း။
၃ ဤကြိုးပမ်းလုပ်ဆောင်မှု၏ အသီးအပွင့်ကား အဘယ်နည်း။ ခရစ်ယာန်ဘာသာ၏ အစောပိုင်းကာလများမှာကဲ့သို့ ယနေ့လူများစွာသည် အမှန်တရားကိုသက်ဝင်ယုံကြည်နေကြသည်။ (တမန်တော် ၂:၄၁၊ ၄၆၊ ၄၇) သို့သော် ဘုရားသခင့်နိုင်ငံတော်ကြေညာသူများ၏ နှစ်ခြင်းယူခါစသူတို့အရေအတွက်များခြင်းထက် သာ၍အရေးကြီးသည်မှာ ဤသို့များစွာသက်သေခံခြင်းကြောင့် ယေဟောဝါ၏နာမတော်ကိုသန့်ရှင်းမြင့်မြတ်စေပြီး တစ်ဆူတည်းသောဘုရားသခင်မှန်အဖြစ် သံသယကင်းရှင်းခြင်းဖြစ်သည်။ (မဿဲ ၆:၉) ထို့ထက်ကား ဘုရားသခင့်နှုတ်မြွက်စကားတော်ဆိုင်ရာအသိပညာက များစွာသောသူတို့၏ဘဝကို တိုးတက်စေပြီး သူတို့ကယ်တင်ခြင်းရဖို့ဖြစ်စေသည်။—တမန်တော် ၁၃:၄၇။
၄။ တမန်တော်များသည် သူတို့ဟောပြောခဲ့သူတို့နှင့်ပတ်သက်၍ အဘယ်အတိုင်းအတာအထိ စိုးရိမ်ပူပန်ခဲ့ကြသနည်း။
၄ တမန်တော်များသည် အသက်ပေးသတင်းကောင်း၏အရေးပါမှုကို အပြည့်အဝအသိအမှတ်ပြုခဲ့ကြပြီး သူတို့ဟောပြောခဲ့သူတို့ကို အလေးအနက်သဘောထားကြသည်။ တမန်တော်ပေါလုရေးသားခဲ့သော ဤစကားများက ယင်းကိုထင်ရှားစေသည်– “သင်တို့ကိုချစ်သောကြောင့် နို့ထိန်းသည် မိမိသူငယ်ကိုကျွေးမွေးပြုစုသကဲ့သို့၊ ငါတို့သည် သင်တို့ကိုနှမြောစုံမက်ခြင်းနှင့်တကွ၊ ဘုရားသခင်၏ဧဝံဂေလိတရားကိုမျှမက၊ ကိုယ်အသက်ကိုပင်ပေးချင်သော စေတနာစိတ်ရှိကြ၏။” (၁ သက်သာလောနိတ် ၂:၈) လူတို့၏အကျိုးကိုအမှန်လိုလားကြောင်း ဤသို့ဖော်ပြရာတွင် ပေါလုနှင့်အခြားတမန်တော်များသည် ဤအသက်ကယ်လုပ်ငန်း၌ များစွာပါဝင်ခဲ့ကြသော ယေရှုနှင့်ကောင်းကင်တမန်များကို တုပနေကြသည်။ ဘုရားသခင့်နိုင်ငံတော်အမှန်တရားမျိုးကြဲခြင်းတွင် ပါဝင်ခဲ့ကြသော ဘုရားသခင်၏ကောင်းကင်ဆိုင်ရာကျေးကျွန်များ၏ အရေးပါသောအပိုင်းကဏ္ဍများကို ပြန်သုံးသပ်ကာ သူတို့၏ပုံသက်သေက ကျွန်ုပ်တို့တာဝန်ကျေပွန်ရန် မည်သို့အားပေးကြောင်း ကြည့်ကြပါစို့။
ယေရှု—ဘုရားသခင့်နိုင်ငံတော်အမှန်တရားမျိုးကြဲသူ
၅။ ယေရှုမြေကြီးပေါ်ရှိစဉ်က အဘယ်လုပ်ငန်း၌ အဓိကအာရုံစူးစိုက်လုပ်ဆောင်ခဲ့သနည်း။
၅ စုံလင်သောလူသားယေရှုသည် သူ့ခေတ်မှလူတို့အတွက် ကာယရေးအရ ကောင်းမွန်ရာများစွာကိုပေးနိုင်သော တန်ခိုးရှိတော်မူ၏။ ဥပမာ၊ ကိုယ်တော့်ခေတ်မှ ဆေးဘက်ဆိုင်ရာအယူအဆလွဲမှားမှုများကို ရှင်းလင်းနိုင်စွမ်းရှိခဲ့သည်၊ သို့မဟုတ် အခြားသိပ္ပံအတတ်ဆိုင်ရာ လူ့နားလည်မှုကို တိုးတက်စေနိုင်စွမ်းရှိခဲ့သည်။ သို့တိုင် ကိုယ်တော်၏အမှုဆောင်ခြင်းအစောပိုင်းကပင် မိမိ၏တာဝန်မှာ သတင်းကောင်းဟောပြောခြင်းဖြစ်ကြောင်း ရှင်းလင်းစွာဖော်ပြခဲ့သည်။ (လုကာ ၄:၁၇-၂၁) ထို့ပြင် ကိုယ်တော်၏အမှုဆောင်ခြင်းအဆုံးပိုင်း၌ ကိုယ်တော်ကဤသို့ရှင်းပြခဲ့သည်– “[အမှန်] တရားဘက်၌သက်သေခံခြင်းငှာ ငါသည်မွေးဖွားခြင်းကိုခံ၍ ဤလောကသို့ကြွလာပြီ။” (ယောဟန် ၁၈:၃၇) ထို့ကြောင့် ဘုရားသခင့်နိုင်ငံတော်အမှန်တရားမျိုးကြဲခြင်းကို ကိုယ်တော်အာရုံစူးစိုက်လုပ်ဆောင်ခဲ့သည်။ ဘုရားသခင်နှင့်ကိုယ်တော့်ရည်ရွယ်ချက်များကို မိမိ၏တစ်ခေတ်တည်းသားများအား သွန်သင်ပေးခြင်းသည် ယေရှုပေးနိုင်ခဲ့သော အခြားမည်သည့်ပညာရေးထက်မဆို သာ၍အရေးကြီး၏။—ရောမ ၁၁:၃၃-၃၆။
၆၊ ၇။ (က) ကောင်းကင်သို့မတက်မီ အဘယ်မှတ်သားဖွယ်အာမခံချက်ကို ယေရှုပေးခဲ့သနည်း၊ ယင်းကို ကိုယ်တော်မည်သို့ကျေပွန်နေစေသနည်း။ (ခ) ဟောပြောခြင်းလုပ်ငန်းအပေါ် ယေရှု၏သဘောထားက သင့်ကိုမည်သို့အကျိုးသက်ရောက်သနည်း။
၆ ယေရှုသည် မိမိကိုယ်ကို ဘုရားသခင့်နိုင်ငံတော်အမှန်တရားမျိုးကြဲသူအဖြစ် ဖော်ပြခဲ့သည်။ (ယောဟန် ၄:၃၅-၃၈) ကိုယ်တော်သည် အခွင့်အရေးရတိုင်း သတင်းကောင်းမျိုးစေ့ကြဲခဲ့သည်။ သစ်တိုင်ပေါ်သေဆုံးခါနီး၌ပင် အနာဂတ်မြေကြီးပရဒိသုဆိုင်ရာ သတင်းကောင်းကို ကြေညာခဲ့သည်။ (လုကာ ၂၃:၄၃) ထို့အပြင် သတင်းကောင်းကိုဟောပြောဖို့ ကိုယ်တော်အလွန်အရေးထားခြင်းသည် ညှဉ်းဆဲရာနှက်တိုင်ပေါ် ကိုယ်တော်သေဆုံးခြင်းနှင့်အတူ အဆုံးမသတ်သွားခဲ့ပါ။ ကောင်းကင်သို့ကိုယ်တော်မတက်မီ ဘုရားသခင့်နိုင်ငံတော်အမှန်တရားမျိုးစေ့ကို ဆက်လက်ကြဲဖြန့်ပြီး တပည့်ဖြစ်စေဖို့ တမန်တော်များအားမိန့်တော်မူခဲ့သည်။ ထို့နောက် ယေရှုသည် ထူးခြား သောကတိတစ်ခုပေးခဲ့သည်။ “ငါသည်လည်း ကပ်ကမ္ဘာကုန်သည်တိုင်အောင် သင်တို့နှင့်အတူအစဉ်မပြတ်ရှိသည်” ဟုကိုယ်တော်ဆိုခဲ့သည်။—မဿဲ ၂၈:၁၉၊ ၂၀။
၇ ဤစကားများဖြင့် သတင်းကောင်းဟောပြောခြင်းလုပ်ငန်းကို “ကပ်ကမ္ဘာကုန်သည်တိုင်အောင် . . . အစဉ်မပြတ်” ထောက်မ၊ ညွှန်ကြား၍ ကာကွယ်ပေးရန် ယေရှုတာဝန်ခံခဲ့သည်။ ယေရှုသည် ကျွန်ုပ်တို့ခေတ်တိုင်အောင် ဧဝံဂေလိလုပ်ငန်း၌ စိတ်ဝင်စားဆဲဖြစ်သည်။ ကိုယ်တော်သည် ဘုရားသခင့်နိုင်ငံတော်အမှန်တရားမျိုးကြဲခြင်းတွင် ကျွန်ုပ်တို့၏တာဝန်ခံခေါင်းဆောင်ဖြစ်၏။ (မဿဲ ၂၃:၁၀) ခရစ်ယာန်အသင်းတော်၏ဦးခေါင်းအနေနှင့် ကိုယ်တော်သည် ဤကမ္ဘာချီလုပ်ငန်းအတွက် ယေဟောဝါရှေ့မှောက်၌တာဝန်ရရှိတော်မူသည်။—ဧဖက် ၁:၂၂၊ ၂၃; ကောလောသဲ ၁:၁၈။
ကောင်းကင်တမန်များ သတင်းကောင်းကြေညာကြ
၈၊ ၉။ (က) ကောင်းကင်တမန်များသည် လူ့မှုရေးကိစ္စများကို အမှန်စိတ်ဝင်စားကြောင်း မည်သို့ဖော်ပြခဲ့ကြသနည်း။ (ခ) ကျွန်ုပ်တို့သည် အဘယ်သဘောဖြင့် ကောင်းကင်တမန်များရှေ့ ပွဲဝင်သောသူများဖြစ်ကြသနည်း။
၈ မြေကြီးကိုဘုရားသခင်ဖန်ဆင်းခဲ့ချိန်၌ ကောင်းကင်တမန်များသည် “တညီတညွတ်တည်းသီချင်းဆို၍၊ . . . ဝမ်းမြောက်သဖြင့်၊ ကြွေးကြော်ကြ” ၏။ (ယောဘ ၃၈:၄-၇) ထိုအချိန်ကတည်းက ဤကောင်းကင်သတ္တဝါများသည် လူ့မှုရေးကိစ္စများ၌ အလွန်စိတ်ဝင်စားကြောင်း တင်ပြခဲ့ကြပြီ။ ဘုရားသခင့်ကြေညာချက်များကို လူသားများထံပို့ဆောင်ရာ၌ သူတို့ကိုယေဟောဝါအသုံးပြုခဲ့သည်။ (ဆာလံ ) အထူးသဖြင့် ကျွန်ုပ်တို့ခေတ်တွင် သတင်းကောင်းပျံ့နှံ့စေရန် သူတို့ကိုအသုံးပြုသည်။ တမန်တော်ယောဟန်ကိုပေးခဲ့သောအဆင်းအာရုံ၌ “မြေကြီးပေါ်မှာနေသောသူတည်းဟူသော အသီးအသီးဘာသာစကားကိုပြောသော လူအမျိုးအနွယ်ခပ်သိမ်းတို့အား ထာဝရဧဝံဂေလိတရားကိုဟောရသော ကောင်းကင်တမန်တစ်ပါးက၊ ‘ဘုရားသခင်ကိုကြောက်ရွံ့၍ချီးမွမ်းကြလော့။ တရားစီရင်တော်မူသောအချိန် ရောက်လာပြီ။ ကောင်းကင်၊ မြေကြီး၊ သမုဒ္ဒရာနှင့် စမ်းရေတွင်းတို့ကို ဖန်ဆင်းတော်မူသောအရှင်ကို ကိုးကွယ်ကြလော့’ ဟု ကြီးသောအသံနှင့်ပြောဆို၍ ကောင်းကင်အလယ်၌ပျံဝဲလျက်ရှိသည်ကို” သူမြင်တွေ့ခဲ့၏။— ၁၀၃:၂၀ဗျာဒိတ် ၁၄:၆၊ ၇။
၉ သမ္မာကျမ်းစာက ကောင်းကင်တမန်များသည် “ကယ်တင်တော်မူခြင်းကျေးဇူးကို အမွေခံလတ္တံ့သောသူတို့ကို ပြုစုစေခြင်းငှာ၊ စေလွှတ်တော်မူသော အစေခံနာမ်ဝိညာဉ်” များဖြစ်၏ဟုဆိုသည်။ (ဟေဗြဲ ၁:၁၄) ကောင်းကင်တမန်များသည် မိမိတို့၏ခန့်အပ်ခံတာဝန်များကို စိတ်အားထက်သန်စွာထမ်းဆောင်နေစဉ် ကျွန်ုပ်တို့နှင့် ကျွန်ုပ်တို့၏လုပ်ငန်းကိုဂရုစိုက်ခွင့်ရရှိကြသည်။ ထင်ထင်ရှားရှားမြင်သာသည့် ဇာတ်ခုံပေါ်ရှိနေဘိသကဲ့သို့ ကျွန်ုပ်တို့၏လုပ်ငန်းကို ကောင်းကင်ပရိသတ်ရှေ့ ကျွန်ုပ်တို့ဆောင်ရွက်နေကြသည်။ (၁ ကောရိန္သု ၄:၉) ဘုရားသခင့်နိုင်ငံတော်အမှန်တရားမျိုးကြဲသူများအဖြစ် ကျွန်ုပ်တို့တစ်ဦးတည်း လုပ်ဆောင်နေခြင်းမဟုတ်ကြောင်း သိရခြင်းက အလွန်အလေးအနက်စဉ်းစားစရာဖြစ်၍ ဝမ်းသာအားရစရာပင်!
ကျွန်ုပ်တို့၏အခန်းကဏ္ဍကို စိတ်အားထက်သန်စွာဆောင်ရွက်ကြ
၁၀။ ဒေ. ၁၁:၆ ပါလက်တွေ့ကျသောအကြံပေးချက်ကို ကျွန်ုပ်တို့၏ဧဝံဂေလိလုပ်ငန်းနှင့် မည်သို့သက်ဆိုင်စေနိုင်သနည်း။
၁၀ ကျွန်ုပ်တို့၏လုပ်ငန်းကို ယေရှုနှင့်ကောင်းကင်တမန်များ အဘယ်ကြောင့်ဤမျှစိတ်ဝင်စားကြရသနည်း။ အကြောင်းရင်းတစ်ခုကို ယေရှုကဤသို့ဖော်ပြခဲ့သည်– “ထိုနည်းတူငါဆိုသည်ကား၊ ဘုရားသခင်၏ကောင်းကင်တမန်တို့သည် နောင်တရသောလူဆိုးတစ်ယောက်၌ ဝမ်းမြောက်ခြင်းရှိကြသည်။” (လုကာ ၁၅:၁၀) ကျွန်ုပ်တို့လည်း ထိုနည်းတူ လူတို့ကိုအမှန်စိတ်ဝင်စားကြသည်။ ထို့ကြောင့် ဘုရားသခင့်နိုင်ငံတော်အမှန်တရားမျိုးစေ့ကို အတတ်နိုင်ဆုံးနေရာအနှံ့ကြဲနေကြ၏။ ကျွန်ုပ်တို့၏လုပ်ငန်းနှင့်ပတ်သက်၍ ဒေ. ၁၁:၆ ပါစကားများကို အသုံးပြုနိုင်သည်။ ထိုတွင်သမ္မာကျမ်းစာကကျွန်ုပ်တို့ကို ဤသို့တိုက်တွန်းထားသည်– “နံနက်အချိန်၌မျိုးစေ့ကိုကြဲလော့။ ညဉ့်ဦးအချိန်၌လည်းမကြဲဘဲမနေနှင့်။ အကြောင်းမူကား၊ အဘယ်အရာသည်အကျိုးရှိမည်ကိုလည်းကောင်း၊ နှစ်ပါးစလုံးတို့သည် အညီအမျှအကျိုးရှိမည်ကိုလည်းကောင်း မသိနိုင်။” သို့သော် ကျွန်ုပ်တို့၏သတင်းတရားကို လက်ခံသူတစ်ဦးရှိလျှင် ငြင်းပယ်သူ အယောက်တစ်ရာ သို့မဟုတ် ထောင်နှင့်ချီ၍ပင်ရှိနိုင်သည်။ သို့သော် ကောင်းကင်တမန်များကဲ့သို့ ကျွန်ုပ်တို့သည် ကယ်တင်ခြင်းသတင်းကို ‘အပြစ်သားတစ်ဦး’ လက်ခံသည့်အခါ အလွန်ဝမ်းမြောက်ကြသည်။
၁၁။ ကျမ်းစာအခြေပြုစာပေစာတမ်းများသည် မည်မျှအကျိုးရှိနိုင်သနည်း။
၁၁ သတင်းကောင်းဟောပြောခြင်းဆိုရာ၌ များစွာပါဝင်သည်။ ဤလုပ်ငန်း၏အရေးပါသော အထောက်အကူတစ်ခုမှာ ယေဟောဝါသက်သေများအသုံးပြုသော ကျမ်းစာအခြေပြုပုံနှိပ်စာစောင်ဖြစ်သည်။ တစ်နည်းအားဖြင့်ဆိုလျှင် ဤစာပေစာတမ်းများသည်လည်း နေရာတကာပျံ့နှံ့သောမျိုးစေ့များနှင့်တူသည်။ အဘယ်နေရာ၌ ယင်းတို့ဖြစ်မြောက်အောင်မြင်မည်ကို ကျွန်ုပ်တို့မသိကြပါ။ တစ်ခါတစ်ရံ စာပေတစ်ခုကို လူတစ်ဦးမဖတ်ရှုမီ လက်ပြောင်းလက်လွှဲဖြစ်ခဲ့ပေမည်။ ယေရှုနှင့်ကောင်းကင်တမန်များသည် အချို့သောအခြေအနေများတွင် စိတ်နှလုံးရိုးဖြောင့်သူတို့အကျိုးအတွက် ထိုသို့ဖြစ်ပျက်ရန် ဖြစ်ရပ်များကိုပင် လမ်းညွှန်ပေးပေမည်။ လူတို့လက်ခံယူထားသောစာပေများနှင့်ပတ်သက်၍ မထင်မှတ်ဘဲ အံ့ဖွယ်အကျိုးဆက်များကို ယေဟောဝါဖြစ်ပေါ်စေခဲ့သည့် အတွေ့အကြုံအချို့ကိုသုံးသပ်ကြည့်ပါ။
စစ်မှန်သောဘုရားသခင်၏လုပ်ငန်းတော်
၁၂။ မိသားစုတစ်စုကို ယေဟောဝါအားသိကျွမ်းလာစေရန် မဂ္ဂဇင်းအဟောင်းတစ်စောင်က မည်သို့အထောက်အကူပြုခဲ့သနည်း။
၁၂ ၁၉၅၃ ခုနှစ်တွင် ရောဘတ်၊ လီလာနှင့် သူတို့၏သားသမီးများသည် မြို့ကြီးတစ်မြို့မှ ယူ.အက်စ်.အေ. ပဲင်စီလ်ဘေးနီးယားကျေးလက်ရှိ ပျက်စီးယိုယွင်းနေသော လယ်သမားအိမ်ဟောင်းတစ်ခုသို့ ပြောင်းရွှေ့နေထိုင်ခဲ့ကြသည်။ ပြောင်းရွှေ့ပြီးမကြာမီ ရောဘတ်သည် လှေကားအောက်တွင် သန့်စင်ခန်းတစ်ခုဆောက်ဖို့ စိတ်ဆုံးဖြတ်လိုက်သည်။ ပျဉ်ချပ်အချို့ကိုခွာပြီးနောက် နံရံနောက်တွင် ကြွက်များသိုလှောင်ထားသော စက္ကူအပိုင်းအစများ၊ သစ်ကြားသီးအခွံများနှင့် အခြားအမှိုက်သရိုက်များကိုတွေ့ရှိခဲ့သည်။ ယင်းတို့အားလုံးအလယ်၌ ရွှေခေတ်မဂ္ဂဇင်းတစ်စောင်ရှိသည်။ သားသမီးမွေးမြူခြင်းအကြောင်းနှင့်ဆိုင်သော ဆောင်းပါးတစ်ပုဒ်ကို ရောဘတ်အထူးစိတ်ဝင်စားမိသည်။ မဂ္ဂဇင်း၌ဖော်ပြထားသော ရှင်းလင်းသည့် ကျမ်းစာအခြေပြုညွှန်ကြားချက်ကို သူအလွန်သဘောကျသွားရာ “ရွှေခေတ်ဘာသာ” ကိုဝင်ကြမည်ဟု လီလာအားသူပြောခဲ့သည်။ အပတ်အနည်းငယ်အတွင်း သူတို့အိမ်သို့ ယေဟောဝါသက်သေများရောက်လာကြသည်၊ သို့သော် ရောဘတ်က မိမိတို့မိသားစုသည် “ရွှေခေတ်ဘာသာ” ၌သာစိတ်ဝင်စားကြောင်း သူတို့ကိုပြောလိုက်သည်။ သက်သေခံများက ရွှေခေတ်မဂ္ဂဇင်းကို ယခု နိုးလော့!ဟူသောအမည်သစ်ဖြင့် ထုတ်ဝေကြောင်း ရှင်းပြခဲ့ကြသည်။ ထိုအခါ ရောဘတ်နှင့်လီလာတို့သည် သက်သေခံများနှင့် ကျမ်းစာကိုမှန်မှန်စလေ့လာကြပြီး နောက်ဆုံးနှစ်ခြင်းယူခဲ့ကြသည်။ တစ်ဖန် သူတို့က မိမိတို့သားသမီးများ၌ အမှန်တရားမျိုးစေ့ကိုကြဲခဲ့ကြရာ ကြွယ်ဝစွာရိတ်သိမ်းခဲ့ကြရသည်။ ယနေ့ ရောဘတ်နှင့်လီလာတို့၏ သားသမီးခုနစ်ဦးအပါအဝင် ဤမိသားစုမှလူ ၂၀ ကျော်တို့မှာ ယေဟောဝါဘုရားသခင်၏ နှစ်ခြင်းခံပြီးသောကျေးကျွန်များဖြစ်နေကြသည်။
၁၃။ ပွာတီရီကိုရှိမောင်နှံစုံတစ်စုံကို အဘယ်အရာက သမ္မာကျမ်းစာ၌ စိတ်ဝင်စားမှုတိုးပွားလာစေခဲ့သနည်း။
၁၃ လွန်ခဲ့သောအနှစ် ၄၀ ခန့်က၊ ပွာတီရီကိုမှ ဝီလျံနှင့်အေဒါတို့သည် ကျမ်းစာလေ့လာခြင်းကို စိတ်မဝင်စားခဲ့ကြချေ။ ထိုမောင်နှံစုံသည် ယေဟောဝါသက်သေများ တံခါးလာခေါက်တိုင်း အိမ်၌မရှိဟန်ဆောင်နေခဲ့ကြ၏။ တစ်နေ့တွင် အိမ်၌ပြုပြင်ဖို့ လိုအပ်သောပစ္စည်းတစ်ခုဝယ်ရန် အဟောင်းဆိုင်တစ်ဆိုင်သို့ ဝီလျံသွားခဲ့သည်။ ဆိုင်မှထွက်ခွာစဉ်တွင် အမှိုက်ပုံးကြီးတစ်ခုတွင် စိမ်းဝါရောင်တောက်တောက်စာအုပ်တစ်အုပ်ကို သူသတိပြုမိခဲ့သည်။ ယင်းကား ၁၉၄၀ တွင် ယေဟောဝါသက်သေများထုတ်ဝေခဲ့သော ဘာသာတရားဟူသောစာအုပ်ဖြစ်သည်။ ဝီလျံသည် ထိုစာအုပ်ကိုအိမ်ပြန်ယူသွားကာ ဘာသာအမှားနှင့်အမှန်မတူကြောင်းဖတ်ရ၍ ဝမ်းသာပီတိဖြစ်ခဲ့သည်။ နောက်တစ်ကြိမ် ယေဟောဝါသက်သေများလာသောအခါ ဝီလျံနှင့်အေဒါတို့သည် သူတို့၏သတင်းတရားကို ဝမ်းမြောက်စွာနားထောင်ခဲ့ကြပြီး သူတို့နှင့် ကျမ်းစာစတင်လေ့လာတော့သည်။ လအနည်းငယ်ကြာပြီးနောက် ၁၉၅၈ ခုနှစ်၊ မြင့်မြတ်သောအလိုတော် အပြည်ပြည်ဆိုင်ရာစည်းဝေးကြီး၌ သူတို့နှစ်ခြင်းယူခဲ့ကြသည်။ ထိုအချိန်မှစ၍လူ ၅၀ ကျော်တို့ကို ကျွန်ုပ်တို့၏ခရစ်ယာန်အသင်းအပင်းဝင်များဖြစ်လာစေဖို့ သူတို့ကူညီပေးခဲ့ကြပြီ။
၁၄။ တွေ့ကြုံမှုတစ်ခုကတင်ပြသကဲ့သို့ ကျွန်ုပ်တို့၏ကျမ်းစာအခြေပြုစာပေသည် အဘယ်အစွမ်းတန်ခိုးရှိသနည်း။
၁၄ ကားလ်သည် အသက် ၁၁ နှစ်သာရှိသည့် လူတေကလေးတစ်ဦးဖြစ်သည်။ သူသည် အမြဲတစေပြဿနာတက်တတ်ဟန်ရှိသည်။ ဂျာမန်မက်သဒစ်တရားဟောဆရာတစ်ဦးဖြစ်သော သူ၏ဖခင်က လူဆိုးများသေသည့်အခါ ငရဲ၌လောင်ကျွမ်းခံရသည်ဟု သူ့ကိုသင်ကြားပေးခဲ့သည်။ ထို့ကြောင့် ကားလ်သည် ငရဲကိုအလွန်ကြောက်ရွံ့ခဲ့သည်။ ၁၉၁၇ ခုနှစ်၏နေ့တစ်နေ့တွင် ကားလ်သည် လမ်းပေါ်၌ ပုံနှိပ်စက္ကူအပိုင်းအစတစ်ခုကို သတိပြုမိခဲ့ပြီး ကောက်ဖတ်ခဲ့သည်။ ယင်း
ကိုဖတ်ရှုရင်း “ငရဲကားအဘယ်နည်း” ဟူသောမေးခွန်းကို အာရုံစိုက်မိသည်။ ၎င်းစာရွက်မှာ ယနေ့ ယေဟောဝါသက်သေများဟူ၍ လူတို့သိကြသော ကျမ်းစာကျောင်းသားများ ကမကထပြုသည့် ငရဲအကြောင်း လူထုဟောပြောချက်အတွက် ဖိတ်စာတစ်စောင်ဖြစ်သည်။ တစ်နှစ်ခန့်ကြာပြီးသည့်အခါ ကျမ်းစာလေ့လာမှုအတော်အတန်ပြုပြီးနောက် ကားလ်သည် နှစ်ခြင်းယူပြီး ကျမ်းစာကျောင်းသားတစ်ဦးဖြစ်လာခဲ့သည်။ ၁၉၂၅ ခုနှစ်တွင် သူသည် ယေဟောဝါသက်သေများ၏ ကမ္ဘာ့ဌာနချုပ်တွင် အလုပ်လုပ်ဖို့ဖိတ်ခေါ်ခံခဲ့ရကာ—ယခုထိတိုင်အမှုထမ်းဆဲဖြစ်သည်။ လမ်းပေါ်မှစက္ကူတစ်ပိုင်းဖြင့် အနှစ်ရှစ်ဆယ်ကျော်ကြာရှည်သည့် ခရစ်ယာန်အသက်တာလုပ်ငန်းတစ်ခုစတင်ခဲ့သည်။၁၅။ ယေဟောဝါသည် သင့်တော်သလို အဘယ်အရာကိုပြုလုပ်နိုင်သနည်း။
၁၅ မှန်ပါသည်၊ ဤအတွေ့အကြုံများတွင် ကောင်းကင်တမန်များပါမပါနှင့် အဘယ်အတိုင်းအတာအထိ တိုက်ရိုက်ပါဝင်ခဲ့ကြောင်းကိုပိုင်းဖြတ်ရန် လူ့စွမ်းပကားဖြင့်မတတ်နိုင်ပါ။ သို့သော် ယေရှုနှင့်ကောင်းကင်တမန်များသည် ဟောပြောခြင်းလုပ်ငန်း၌ တက်ကြွလှုပ်ရှားစွာပါဝင်နေကြကြောင်း၊ ယေဟောဝါသည် ကိစ္စရပ်များကို သင့်တော်သလိုလမ်းညွှန်ပေးနိုင်ကြောင်း မည်သည့်အခါမျှ ကျွန်ုပ်တို့သံသယမရှိသင့်ပေ။ ကျွန်ုပ်တို့၏စာပေများကိုဝေငှပြီးနောက် မည်သို့အကျိုးဖြစ်ထွန်းနိုင်ကြောင်းကို ဤတွေ့ကြုံမှုများနှင့် အလားတူတွေ့ကြုံမှုများက ဖော်ပြသည်။
ကျွန်ုပ်တို့ကို ဘဏ္ဍာတော်အပ်နှင်းထား
၁၆။ ၂ ကောရိန္သု ၄:၇ ပါစကားများမှ ကျွန်ုပ်တို့အဘယ်အရာသင်ယူနိုင်သနည်း။
၁၆ တမန်တော်ပေါလုက ‘မြေအိုးထဲမှဘဏ္ဍာ’ အကြောင်းပြောပြသည်။ ထိုဘဏ္ဍာမှာ ဘုရားသခင်ပေးသည့် ဟောပြောခြင်းတာဝန်ဖြစ်ပြီး မြေအိုးများမှာ ဤဘဏ္ဍာကို ယေဟောဝါပေးအပ်ထားသော လူသားများဖြစ်၏။ ထိုလူသားများသည် မစုံလင်သူများ၊ အစွမ်းအစအကန့်အသတ်သာရှိသူများဖြစ်ကြသောကြောင့် ထိုတာဝန်ပေးအပ်ခံရခြင်းအကျိုးမှာ “တန်ခိုးတော်၏ဂုဏ်အသရေသည် ငါတို့နှင့်မဆိုင်၊ ဘုရားသခင်နှင့်ဆိုင်” ကြောင်းထင်ရှားဖို့အတွက်ဖြစ်၏ဟု ပေါလုဆက်ပြောပြသည်။ (၂ ကောရိန္သု ၄:၇) မှန်ပါသည်၊ လတ်တလောလုပ်ဆောင်နေသောလုပ်ငန်း ပြီးမြောက်စေဖို့ လိုအပ်သောစွမ်းရည်ကို ယေဟောဝါပေးမည်ဟု ကျွန်ုပ်တို့စိတ်ချနိုင်သည်။
၁၇။ ဘုရားသခင့်နိုင်ငံတော်အမှန်တရားမျိုးစေ့ကြဲနေစဉ် အဘယ်အရာကို ကျွန်ုပ်တို့ကြုံတွေ့ရမည်နည်း၊ မည်သို့ဆိုစေ အပြုသဘောထားကို အဘယ်ကြောင့်ဆက်ထိန်းသိမ်းသင့်သနည်း။
၁၇ ကျွန်ုပ်တို့မကြာခဏ စွန့်လွှတ်မှုများပြုလုပ်ကြရပေမည်။ အချို့နယ်မြေများ၌အမှုဆောင်ရခြင်းသည် အနေရခက် သို့မဟုတ် အဆင်မပြေဖြစ်ပေမည်။ လူအများစုမှာ အလွန်အမင်းဥပေက္ခာပြုပုံပေါ်၍ ရန်လိုတတ်ကြသည့် နယ်မြေများပင်ရှိသည်။ ထိုသို့သောအရပ်ဒေသများ၌ အတော်အတန်ကြိုးစားခဲ့သော်လည်း အောင်မြင်မှုမတွေ့ခဲ့ရပေ။ သို့သော် ယင်းသို့သောခက်ခဲလှသည့် အခြေအနေများအောက်တွင် ကြိုးစားရကျိုးနပ်ပါသည်။ သင်ကြဲသောမျိုးစေ့သည် လူတို့ကို ယခုပင်ပျော်ရွှင်မှုပေးနိုင်ရုံမက အနာဂတ်တွင် ထာဝရအသက်ကိုလည်းပေးနိုင်ကြောင်း သတိရပါ။ ဆာလံ ၁၂၆:၆ ပါဤစကားများမှန်ကြောင်း ကြိမ်ဖန်များစွာသက်သေထူခဲ့ပြီ– “မျက်ရည်ကျလျက် ကြဲရန်မျိုးစေ့ကိုဆောင်၍ထွက်သွားသောသူသည်၊ ကောက်လှိုင်းများကိုဆောင်လျက် ရွှင်လန်းသောစိတ်နှင့် အမှန်ပြန်လာလိမ့်မည်။”
၁၈။ ကျွန်ုပ်တို့၏အမှုဆောင်ခြင်းကို မည်သို့မပြတ်အာရုံစိုက်နိုင်သနည်း၊ အဘယ်ကြောင့်အာရုံစိုက်သင့်သနည်း။
၁၈ ဘုရားသခင့်နိုင်ငံတော်အမှန်တရားမျိုးစေ့ကို ရက်ရက်ရောရောကြဲရန် သင့်လျော်သည့်အခွင့်အရေးမှန်သမျှကိုယူကြစို့။ ကျွန်ုပ်တို့သည် မျိုးစေ့စိုက်ပျိုး၍ ရေလောင်းသောသူများဖြစ်ကြသော်လည်း အပင်ကြီးထွားစေသူမှာ ယေဟောဝါဖြစ်ကြောင်း ဘယ်သောအခါမျှမမေ့ကြစို့နှင့်။ (၁ ကောရိန္သု ၃:၆၊ ၇) သို့သော် ယေရှုနှင့်ကောင်းကင်တမန်များသည် သူတို့၏လုပ်ငန်းကို အပြီးဆောင်ရွက်ကြသကဲ့သို့ ကျွန်ုပ်တို့၏အမှုဆောင်ခြင်းကို အပြည့်အဝဆောင်ရွက်ဖို့ ယေဟောဝါမျှော်လင့်တော်မူ၏။ (၂ တိမောသေ ၄:၅) ကျွန်ုပ်တို့၏သွန်သင်ခြင်း၊ ကျွန်ုပ်တို့၏သဘောထားနှင့် အမှုဆောင်ခြင်း၌ ကျွန်ုပ်တို့၏စိတ်ထက်သန်မှုကို မပြတ်အာရုံစိုက်ကြပါစို့။ အဘယ်ကြောင့်နည်း။ ပေါလုကဤသို့အဖြေပေးသည်– “ထိုသို့ပြုလျှင် ကိုယ်ကိုလည်းကောင်း၊ နားထောင်သောသူတို့ကိုလည်းကောင်း ကယ်တင်လိမ့်မည်။”—၁ တိမောသေ ၄:၁၆။
ကျွန်ုပ်တို့ အဘယ်အရာသင်ယူခဲ့ကြသနည်း
• ကျွန်ုပ်တို့၏မျိုးကြဲခြင်းလုပ်ငန်းသည် အဘယ်နည်းများဖြင့် ကောင်းသောရလဒ်များ ဖြစ်ထွန်းစေသနည်း။
• မျက်မှောက်ခေတ်ဧဝံဂေလိလုပ်ငန်းတွင် ယေရှုခရစ်နှင့် ကောင်းကင်တမန်များ မည်သို့ပါဝင်နေကြသနည်း။
• ကျွန်ုပ်တို့သည် ဘုရားသခင့်နိုင်ငံတော်အမှန်တရားမျိုးကြဲသူများအနေနှင့် အဘယ်ကြောင့်ရက်ရောစွာကြဲသင့်သနည်း။
• ကျွန်ုပ်တို့၏အမှုဆောင်ခြင်းတွင် ဥပေက္ခာပြုမှု သို့မဟုတ် ရန်လိုမှုတွေ့ ကြုံရသောအခါ ကြံ့ကြံ့ခံရန် အဘယ်အရာက လှုံ့ဆော်ပေးသင့်သနည်း။
[လေ့လာရန်မေးခွန်းများ]
[စာမျက်နှာ ၁၅ ပါ ရုပ်ပုံ]
ရှေးခေတ်ဣသရေလနိုင်ငံမှ လယ်သမားများကဲ့သို့ မျက်မှောက်ခေတ် ခရစ်ယာန်များသည် ဘုရားသခင့်နိုင်ငံတော်မျိုးစေ့ကို ရက်ရောစွာကြဲနေကြ
[စာမျက်နှာ ၁၆၊ ၁၇ ပါ ရုပ်ပုံ]
ယေဟောဝါသက်သေများသည် ကျမ်းစာအခြေပြုစာပေစာတမ်းအမျိုးမျိုးကို ဘာသာစကား ၃၄၀ ဖြင့်ထုတ်ဝေဖြန့်ဖြူးနေကြ