အတွင်းငြိမ်သက်မှုကို သင်ရှာတွေ့ နိုင်သလော
အတွင်းငြိမ်သက်မှုကို သင်ရှာတွေ့ နိုင်သလော
၁၈၅၄ ခုနှစ်က အမေရိကန်ကလောင်ရှင် ဟဲန်နရီ သရိုးက ဤသို့ရေးသားခဲ့သည်– “လူအများစုသည် စိတ်ပျက်မှုကို ကြိတ်မှိတ်ခံစားနေကြရသည်။”
ထင်ရှားနေသည်ကား သူ့ခေတ်တွင် လူအများစုသည် အတွင်းငြိမ်သက်မှုမရှိခဲ့ကြချေ။ သို့သော် ၎င်းသည် အနှစ် ၁၅၀ နီးပါးခန့်ကဖြစ်သည်။ ယနေ့ အခြေအနေမှာ ထူးခြားသွားပြီလော။ သို့မဟုတ် သရိုး၏စကားများသည် သက်ဆိုင်နေဆဲလော။ အသင်ကိုယ်တိုင်ကော အသို့နည်း။ သင်သည် ကျေနပ်ရောင့်ရဲ၊ ငြိမ်သက်မှုရှိသလော။ သို့မဟုတ် သင်သည် မလုံမခြုံ၊ အနာဂတ်ကိုသေချာမသိ၊ သရိုး၏စကားကိုစကားပြေပြန်ဆိုရလျှင် ‘ကြိတ်မှိတ်ပြီးစိတ်ပျက်’ နေသလော။
ဝမ်းနည်းစရာမှာ ကမ္ဘာပေါ်တွင် လူတို့ကို အတွင်းငြိမ်သက်မှုမရှိစေသောအရာ မြောက်မြားစွာရှိသည်။ အချို့ကို ဖော်ပြကြစို့။ နိုင်ငံများစွာတွင် အလုပ်လက်မဲ့ဖြစ်ခြင်းနှင့် ဝင်ငွေနည်းခြင်းက ဆင်းရဲခြင်းနှင့်တကွ စီးပွားပျက်စေသည်။ အခြားနိုင်ငံများတွင်မူ လူအများသည် မိမိတို့၏ခွန်အားကို ချမ်းသာကြွယ်ဝဖို့နှင့် စည်းစိမ်ဥစ္စာရရှိဖို့အတွက် အဓိကအသုံးပြုကြသည်။ သို့သော် ၎င်းနှင့်ဒွန်တွဲသည့် အပြိုင်အဆိုင်ဘဝပုံစံက အတွင်းငြိမ်သက်မှုကိုမဟုတ်ဘဲ စိုးရိမ်ပူပန်မှုကို ဖြစ်စေလေ့ရှိ၏။ ဖျားနာမှု၊ ရာဇဝတ်မှု၊ မတရားမှု၊ ဖိနှိပ်မှုတို့ကလည်း ငြိမ်သက်မှုကင်းဝေးစေသည်။ လူများစွာသည် ကမ္ဘာပေါ်၌ ဤအတိုင်းဖြစ်နေသည်ကို မလိုလားကြချေ။ အန်တိုနီအိုသည် ဘရာဇီးရှိ ဆော်ပေါလိုမြို့မှ စက်ရုံကြီးတစ်ရုံ၏ အလုပ်သမားခေါင်းဆောင်ဖြစ်ခဲ့သည်။ လူနေမှုအခြေအနေများကို တိုးတက်စေရန်မျှော်လင့်ချက်ဖြင့် သပိတ်မှောက်မှုများနှင့် ဆန္ဒပြပွဲများတွင် သူပါဝင်ခဲ့သော်လည်း ယင်းက သူ့ကိုအတွင်းငြိမ်သက်မှု မရှိစေခဲ့ချေ။
အတွင်းငြိမ်သက်မှုကို သူတို့ရှာဖွေခဲ့ကြ
အချို့က အိမ်ထောင်ရေးသည် သူတို့၏ဘဝတွင် အေးချမ်းမှုအနည်းငယ်ရှိစေမည်ဟုမျှော်လင့်သော်လည်း သူတို့စိတ်ပျက်ခဲ့ကြရပေမည်။ မာကော့စ်သည် အောင်မြင်သောစီးပွားရေးသမားတစ်ဦးဖြစ်ခဲ့သည်။ * သူသည် နိုင်ငံရေးတွင် ပါဝင်လာပြီး စက်မှုထွန်းကားသောမြို့တစ်မြို့၏ မြို့တော်ဝန်ဖြစ်လာခဲ့သည်။ သို့သော် သူ့မိသားစုဘဝမှာ ပြိုကွဲလျက်ရှိသည်။ သူ့ကလေးများသည် အိမ်မှထွက်ခွာသွားကြပြီးနောက် သူနှင့် သူ၏ဇနီးသည် ပြန်ပေါင်းစပ်၍မဖြစ်နိုင်သော သဘောကွဲလွဲမှုများကြောင့် သီးခြားနေခဲ့ကြသည်။
ဘရာဇီးနိုင်ငံ၊ စဗေးဒေါမြို့မှ လမ်းပေါ်နေ ကလေးတစ်ဦးဖြစ်သူ ဂါဇန်သည် စွန့်စားလိုစိတ်ရှိခဲ့သည်။ သူသည် ထရပ်ယာဉ်မောင်းများနှင့် တစ်မြို့မှတစ်မြို့ ခြေဦးတည့်ရာလိုက်သွားခဲ့သည်။ မကြာမီပင် သူသည် မူးယစ်ဆေးစွဲသူတစ်ဦးဖြစ်လာပြီး သူ၏အကျင့်ဆိုးကိုဆက်ရန်အတွက် ခိုးခဲ့ရသည်။ သူအကြိမ်များစွာ အဖမ်းခံခဲ့ရသည်။ သို့သော် ရန်လိုသော၊ အကြမ်းဖက်စိတ်ဓာတ်ရှိလင့်ကစား ဂါဇန်သည် အတွင်းငြိမ်သက်မှုကို တမ်းတခဲ့သည်။ ယင်းကို သူတွေ့ရှိနိုင်ပါမည်လော။
ဗန်နီးယားသည် ငယ်ရွယ်စဉ်တွင် သူ့မိခင်ကွယ်လွန်သွားခဲ့ရာ ဖျားနာနေသောညီမငယ်ကို ပြုစုပေးရခြင်းအပါအဝင် အိမ်ထောင်တာဝန်မှာ ဗန်နီးယားအပေါ်ကျရောက်လာသည်။ ဗန်နီးယားသည် ချာ့ခ်ျတက်သော်လည်း ဘုရားသခင်စွန့်ပစ်ထားသည်ဟု ခံစားရသည်။ သူ့မှာ အမှန်ပင် စိတ်ငြိမ်သက်မှုမရှိခဲ့ချေ။
မာစီလိုဆိုသူသည်လည်းရှိသည်။ ဤသူက အပျော်အပါးအလွန်မက်သည်။ အခြားလူငယ်များနှင့်အတူ ပါတီတက်ပြီး ကခုန်၊ သောက်စား၊ မူးယစ်ဆေးအလွဲသုံးခြင်းကို နှစ်သက်ခဲ့သည်။ တစ်ကြိမ်တွင် ခိုက်ရန်ဖြစ်ပွားမှုတစ်ခု၌ သူပါဝင်ခဲ့ပြီး အခြားလူငယ်တစ်ဦးကို ဒဏ်ရာရစေခဲ့သည်။ ထို့နောက်တွင် သူသည် မိမိပြုလုပ်ခဲ့ရာအတွက် ပြင်းပြင်းထန်ထန်နောင်တရပြီး ဘုရားသခင်ထံ အကူအညီရရန် ဆုတောင်းခဲ့သည်။ ဤသူသည်လည်း စိတ်ငြိမ်သက်မှု ရရှိလိုခဲ့သည်။
ဤဖြစ်ရပ်များက စိတ်ငြိမ်သက်မှု ပပျောက်စေနိုင်သည့် အခြေအနေအချို့ကိုဖော်ပြသည်။ အလုပ်သမားခေါင်းဆောင်၊ နိုင်ငံရေးသမား၊ လမ်းပေါ်နေကလေး၊ အလုပ်ဝန်ပိနေသောသမီးနှင့် ပါတီတက်သူတို့ရရှိလိုကြသော အတွင်းငြိမ်သက်မှုကို သူတို့ရရှိနိုင်မည့်နည်းလမ်း တစ်ခုခုရှိပါသလော။ သူတို့အဖြစ်အပျက်မှ ကျွန်ုပ်တို့အတွက် သင်ခန်းစာတစ်ခုခုရှိနိုင်သလော။ နောက်ဆောင်းပါးတွင် ကျွန်ုပ်တို့တွေ့ရှိကြရမည့်အတိုင်း ထိုမေးခွန်းနှစ်ခုစလုံးအတွက်အဖြေမှာ ရှိပါသည်ဟူ၍ဖြစ်၏။
[အောက်ခြေမှတ်ချက်များ]
^ အပိုဒ်၊ 6 နာမည်အချို့ကို ပြောင်းထားပါသည်။
[စာမျက်နှာ ၃ ပါ ရုပ်ပုံ]
အတွင်းငြိမ်သက်မှုကို သင်တမ်းတပါသလော