ရှင်ပြန်ထမြောက်ခြင်းမျှော်လင့်ချက် အမှန်သေချာ!
ရှင်ပြန်ထမြောက်ခြင်းမျှော်လင့်ချက် အမှန်သေချာ!
“သေခြင်းမှထမြောက်ကြလိမ့်မည်ဟူ၍ . . . အကျွန်ုပ်လည်း ဘုရားသခင်ကိုအမှီပြု၍ မျှော်လင့်ပါ၏။”—တမန်တော် ၂၄:၁၅။
၁။ ကျွန်ုပ်တို့သည် ရှင်ပြန်ထမြောက်ခြင်းတွင် အဘယ်ကြောင့်မျှော်လင့်နိုင်သနည်း။
ယေဟောဝါသည် ရှင်ပြန်ထမြောက်ခြင်းကို ကျွန်ုပ်တို့မျှော်လင့်ကြရန် ခိုင်လုံသောအကြောင်းပေးထားတော်မူ၏။ လူသေများ ပြန်ရှင်လာမည်ဖြစ်ကြောင်း ကိုယ်တော်ကတိရှိထားသည်။ သေခြင်း၌အိပ်ပျော်နေသူတို့နှင့်ပတ်သက်၍ ကိုယ်တော်၏ရည်ရွယ်တော်မူချက်သည် အမှန်တကယ်ပြည့်စုံလိမ့်မည်။ (ဟေရှာယ ၅၅:၁၁; လုကာ ၁၈:၂၇) အမှန်မှာ၊ ဘုရားသခင်သည် လူသေတို့ကိုပြန်ရှင်စေရန် မိမိ၏တန်ခိုးတော်ကို ပြသခဲ့ပြီးဖြစ်သည်။
၂။ ရှင်ပြန်ထမြောက်ခြင်းမျှော်လင့်ချက်က ကျွန်ုပ်တို့ကို မည်သို့အကျိုးပြုနိုင်သနည်း။
၂ သားတော်၊ ယေရှုခရစ်အားဖြင့် လူသေများ ရှင်ပြန်ထမြောက်စေရန် ဘုရားသခင့်ပြင်ဆင်ပေးချက်ကို ယုံကြည်ခြင်းက ဖိစီးမှုခံရချိန်များတွင် သက်သာမှုရရှိစေနိုင်သည်။ ရှင်ပြန်ထမြောက်ခြင်းမျှော်လင့်ချက်ကို စိတ်ချနိုင်ခြင်းက သေရေးရှင်ရေးတွင်ပင် ကျွန်ုပ်တို့၏ကောင်းကင်ခမည်းတော်အပေါ် သစ္စာစောင့်သိနိုင်ဖို့လည်း ကူညီပေးနိုင်၏။ သမ္မာကျမ်းစာ၌ မှတ်တမ်းတင်ထားသော အသက်ပြန်ရှင်လာခြင်းအကြောင်းများကို သုံးသပ်ကြည့်ခြင်းဖြင့် ကျွန်ုပ်တို့၏ရှင်ပြန်ထမြောက်ခြင်းမျှော်လင့်ချက်မှာ ပိုမိုခိုင်ခံ့လာလိမ့်မည်ဖြစ်သည်။ ဤအံ့ဖွယ်ရာအားလုံးမှာ အကြီးမြတ်ဆုံးသခင် ယေဟောဝါထံတော်မှ တန်ခိုးတော်အားဖြင့် ပြီးမြောက်အောင်မြင်ခဲ့ပါသည်။
ရှင်ပြန်ထမြောက်ခြင်းဖြင့် လူသေတို့ကို သူတို့ပြန်ရရှိခဲ့
၃။ ဇရတ္တမြို့မှ မုဆိုးမတစ်ဦး၏သား သေဆုံးသွားသောအခါ ဧလိယသည် အဘယ်အမှုကိုပြုရန် တန်ခိုးရရှိခဲ့သနည်း။
၃ ယေဟောဝါ၏ ခရစ်ယာန်ခေတ်မတိုင်မီကသက်သေခံများ တင်ပြခဲ့ကြသော ယုံကြည်ခြင်းအကြောင်း စိတ်လှုပ်ရှားဖွယ်ပြန်ပြောင်းဆင်ခြင်ရာတွင် တမန်တော်ပေါလုက ဤသို့ရေးသားခဲ့သည်– “မိန်းမတို့သည်လည်း၊ သေခြင်းမှထမြောက်သော မိမိတို့သေသူများကိုရပြန်ကြ၏။” (ဟေဗြဲ ၁၁:၃၅၊ သမ္မာ; ၁၂:၁) သူတို့ထဲမှတစ်ဦးမှာ ခါနာန်ပြည်၊ ဇရတ္တမြို့ရှိ ဆင်းရဲသောမုဆိုးမတစ်ဦးဖြစ်သည်။ သူသည် ဘုရားသခင်၏ပရောဖက် ဧလိယကိုဧည့်ဝတ်ပြုခဲ့ခြင်းကြောင့် သူနှင့် သူ့သားကိုသေစေနိုင်သည့် အငတ်ဘေးတွင် သူ၏ဂျုံနှင့်ဆီမှာ အံ့ဖွယ်နည်းဖြင့်မပြတ်ခဲ့ပါ။ နောက်ပိုင်း ကလေးသေဆုံးသွားသောအခါ ဧလိယသည် အိပ်ရာပေါ်၌ သူ့ကိုထားပြီးလျှင် သူငယ်အပေါ်မှာ မိမိကိုယ်ကိုသုံးကြိမ်ဆန့်လျက် “အကျွန်ုပ်၏ဘုရားသခင်ထာဝရဘုရား၊ ဤသူငယ်၏ဝိညာဉ်ကို တစ်ဖန်ဝင်စေတော်မူပါ” ဟုတောင်းပန်ခဲ့သည်။ ဘုရားသခင်သည် ဝိညာဉ်စိုးလ် သို့မဟုတ် အသက်ကို သူငယ်အထဲပြန်ရောက်စေခဲ့သည်။ (၃ ဓမ္မရာဇဝင် ၁၇:၈-၂၄) ရှင်ပြန်ထမြောက်ခြင်းဆိုင်ရာ ဦးဆုံးမှတ်တမ်းတင်ချက်ဖြစ်သည့် ထိုမုဆိုးမ၏ချစ်လှစွာသောသားကို သူ့ယုံကြည်ခြင်းကြောင့် ဆုပေးခြင်းခံခဲ့ရသည့်အခါ သူ၏ပျော်ရွှင်မှုကို စဉ်းစားကြည့်ပါ!
၄။ ရှုနင်မြို့၌ အဘယ်အံ့ဖွယ်အမှုကို ဧလိရှဲပြုခဲ့သနည်း။
၄ ရှင်ပြန်ထမြောက်ခြင်းအားဖြင့် သေလွန်သောသူကိုပြန်ရခဲ့သည့် အခြားအမျိုးသမီးတစ်ဦးမှာ ရှုနင်မြို့၌နေထိုင်သူဖြစ်၏။ အိုမင်းနေသူ၏ဇနီးသည် ပရောဖက်ဧလိရှဲနှင့် သူ၏လက်ထောက်ကို ကြင်နာမှုပြခဲ့လေသည်။ သူသည် သားတစ်ဦးရခြင်းဖြင့် ကောင်းချီးခံစားရသည်။ သို့သော် နှစ်အတန်ကြာသော် ထိုပရောဖက်ကိုသူဆင့်ခေါ်ခဲ့ရာ သူငယ်သေဆုံးနေသည်ကို တွေ့မြင်ခဲ့ရသည်။ ဧလိရှဲကဆုတောင်း၍ တစ်စုံတစ်ရာကိုလုပ်ဆောင်ခဲ့ပြီးနောက် “သူငယ်အသားသည် နွေးစရှိ၏။” သူငယ်သည် “ခုနစ်ကြိမ်ချေဆတ်၍ မျက်စိကိုဖွင့်၏။” ဤရှင်ပြန်ထမြောက်ခြင်းက မိခင်နှင့်သား နှစ်ဦးစလုံးကို မလွဲဧကန် အလွန်ဝမ်းမြောက်စေခဲ့ပေမည်။ (၄ ဓမ္မရာဇဝင် ၄:၈-၃၇; ၈:၁-၆) သို့သော် “သာ၍မြတ်သောထမြောက်ခြင်း” ဖြစ်သည့် နောက်တစ်ဖန် ဘယ်သောအခါမျှ သေရန်အကြောင်းမရှိသည့် မြေကြီးပေါ်ပြန်ရှင်လာကြသောအခါ အမှန်ပင်ပျော်ရွှင်လိုက်ကြမည်ဖြစ်ခြင်း! ရှင်ပြန်ထမြောက်ခြင်း၏ မေတ္တာရှိသောဘုရားသခင်၊ ယေဟောဝါအား တကယ်ပင်ကျေးဇူးတင်စရာ အကြောင်းပါတကား!—ဟေဗြဲ ၁၁:၃၅။
၅။ ဧလိရှဲသေဆုံးသွားပြီးနောက်၌ပင် အံ့ဖွယ်အမှုတစ်ခု၌ သူမည်သို့ပါဝင်ခဲ့သနည်း။
၅ ဧလိရှဲသေဆုံး၍ မြေမြှုပ်သင်္ဂြိုဟ်ခံရပြီးနောက်၌ပင် ဘုရားသခင်သည် သန့်ရှင်းသောဝိညာဉ်တော်အားဖြင့် သူ၏အရိုးများကို တန်ခိုးရှိစေခဲ့၏။ ကျွန်ုပ်တို့ ဤသို့ဖတ်ရသည်– “ဣသရေလလူတို့သည် လူတစ်ယောက်ကိုသင်္ဂြိုဟ်စဉ်တွင်၊ မောဘတပ်လာသည်ကိုမြင်လျှင်၊ အလောင်းကို ဧလိရှဲသင်္ချိုင်းတွင်း၌ချထားကြ၏။ သေသောသူသည် အောက်သို့ရောက်၍၊ ဧလိရှဲအရိုးတို့ကိုထိသောအခါ၊ အသက်ရှင်ပြန်သဖြင့် မတ်တတ်ထ၏။” (၄ ဓမ္မရာဇဝင် ၁၃:၂၀၊ ၂၁) ထိုသူမှာ အမှန်တကယ်အံ့အားသင့်ပြီး ဝမ်းသာလိုက်မည်ဖြစ်ခြင်း! ယေဟောဝါဘုရားသခင်၏ မပျက်ကွက်နိုင်သောရည်ရွယ်တော်မူချက်နှင့်အညီ ကျွန်ုပ်တို့ချစ်မြတ်နိုးရသူများ အသက်ပြန်ရှင်လာသောအခါ မည်မျှဝမ်းမြောက်ကြလိမ့်မည်ကို စဉ်းစားကြည့်ပါတကား!
ဘုရားသခင့်သားတော်သည် လူသေများကို ပြန်ရှင်စေခဲ့
၆။ နာဣနမြို့အနီးတွင် အဘယ်အံ့ဖွယ်အမှုကို ယေရှုပြုတော်မူခဲ့သနည်း၊ ဤဖြစ်ရပ်က ကျွန်ုပ်တို့အပေါ် အဘယ်အကျိုးသက်ရောက်နိုင်သနည်း။
၆ ဘုရားသခင့်သားတော်၊ ယေရှုခရစ်က ထာဝရအသက်ရရန်အလားအလာဖြင့် လူသေများထမြောက်လာနိုင်ကြောင်း ယုံကြည်ရန်အတွက် ခိုင်လုံသောအကြောင်းများကို ကျွန်ုပ်တို့အား ပေးထားတော်မူ၏။ နာဣနမြို့အနီး၌ ဖြစ်ပွားခဲ့သော ဖြစ်ရပ်တစ်ခုက ယင်းသို့သောအံ့ဖွယ်အမှုသည် ဘုရားသခင်ပေးသောတန်ခိုးတော်အားဖြင့် ဖြစ်နိုင်ကြောင်း ကျွန်ုပ်တို့သိလာစေရန် ကူညီပေးနိုင်၏။ တစ်ခါတွင် လူငယ်တစ်ဦး၏အလောင်းကိုသင်္ဂြိုဟ်ရန် မြို့ပြင်သို့ယူဆောင်လာကြသည့် ငိုကြွေးနေကြသော အသုဘပို့ဆောင်သူတို့နှင့် ယေရှုဆုံတွေ့ခဲ့သည်။ သူသည် မုဆိုးမ၏တစ်ဦးတည်းသောသားဖြစ်သည်။ ယေရှုက “မငိုနှင့်” ဟုသူ့ကိုမိန့်တော်မူ၏။ ထို့နောက် ကိုယ်တော်သည် တလားကိုတို့လျက် “အချင်းလုလင်၊ ထလော့၊ သင့်အားငါအမိန့်ရှိသည်” ဟုဆို၏။ ထိုအခါ သူသည် ထိုင်၍စကားပြောလေသည်။ (လုကာ ၇:၁၁-၁၅) ဤအံ့ဖွယ်အမှုက ရှင်ပြန်ထမြောက်ခြင်းမျှော်လင့်ချက်သည် သေချာကြောင်း ကျွန်ုပ်တို့၏ယုံကြည်စိတ်ချမှုကို အမှန်တကယ်ပင်ထောက်ခံပေး၏။
၇။ ယာဣရု၏သမီးနှင့်ပတ်သက်၍ အဘယ်အရာဖြစ်ပျက်ခဲ့သနည်း။
၇ ကပေရနောင်မြို့ရှိ တရားဇရပ်မှူးတစ်ဦးဖြစ်သော ယာဣရုနှင့်ပတ်သက်သည့် ဖြစ်ရပ်တစ်ခုကိုလည်း သုံးသပ်ကြည့်ပါ။ သူသည် သေလုမြောပါးဖြစ်နေသော မိမိချစ်လှသည့် ၁၂ နှစ်အရွယ်သမီးငယ်ကို လာကူညီပေးရန် ယေရှုထံသွား၍ တောင်းဆိုခဲ့သည်။ မကြာမီ ထိုသူငယ်မ သေဆုံးသွားပြီဖြစ်ကြောင်း သတင်းရလေ၏။ ဝမ်းနည်းပူဆွေးနေသောယာဣရုကို ယုံကြည်ခြင်းရှိရန် အားပေးလျက် ယေရှုသည် လူအုပ်ငိုကြွေးနေရာ သူ၏အိမ်သို့ သူနှင့်အတူ လိုက်လာခဲ့သည်။ ယေရှုက သူတို့ကို “သူငယ်သေသည်မဟုတ် အိပ်ပျော်သည်” ဟူ၍မိန့်တော်မူသောအခါ သူတို့ရယ်မောခဲ့ကြ၏။ အမှန်မှာ သူသည် သေဆုံးသွားပေပြီ၊ သို့သော် အိပ်မောကျနေသူတစ်ဦးကို နိုးထစေနိုင်သကဲ့သို့ လူတို့ကိုလည်း သေရာမှပြန်ရှင်စေနိုင်ကြောင်း ပြသတော့မည်ဖြစ်သည်။ ထိုသူငယ်မ၏လက်ကိုကိုင်လျက် ကိုယ်တော်က “မိန်းမငယ်ထလော့!” ဟုမိန့်တော်မူ၏။ သူသည် ချက်ချင်းထ၍ “မိဘတို့သည်မိန်းမောတွေဝေ” ၍အလွန်ဝမ်းမြောက်ကြသည်။ (မာကု ၅:၃၅-၄၃; လုကာ ၈:၄၉-၅၆) မြေကြီးပရဒိသုတွင် မိမိတို့၏ချစ်မြတ်နိုးရသောသေလွန်သူများ ပြန်ရှင်လာသည့်အခါ မိသားစုဝင်များသည် မလွဲဧကန် “အလွန်မိန်းမောတွေဝေ” ကြပေမည်။
၈။ လာဇရု၏သင်္ချိုင်းဂူတွင် ယေရှု အဘယ်အရာပြုလုပ်ခဲ့သနည်း။
၈ လာဇရု၏သင်္ချိုင်းဂူသို့ ယေရှုရောက်ရှိလာ၍ အဝင်ဝမှကျောက်တုံးကို ဖယ်ရှားစေခဲ့ချိန်၌ သူသေဆုံးခဲ့သည်မှာ လေးရက်ရှိပေပြီ။ ကိုယ်တော်သည် ဘုရားသခင်ပေးသနားသောတန်ခိုးကို မှီခိုအားထားကြောင်း လူတို့တွေ့မြင်ကြစေရန် လူအများရှေ့ဆုတောင်းပြီးနောက် “လာဇရုထွက်၍လာလော့” ဟု ကျယ်သောအသံဖြင့်မိန့်တော်မူသည်။ ထိုအခါ သူထွက်လာခဲ့ပါသည်တကား! သူ၏လက်ခြေတို့မှာ အဝတ်ဖြင့်ပတ်ထားဆဲဖြစ်ပြီး မျက်နှာလည်း ပဝါနှင့်စည်းလျက်ရှိသေးသည်။ ယင်းကြောင့် ယေရှုက “သူ့ကိုဖြေ၍လွှတ်ကြလော့” ဟုမိန့်တော်မူ၏။ လာဇရုအစ်မများဖြစ်ကြသော မာရိနှင့် မာသတို့ကို နှစ်သိမ့်ပေးရန်ရောက်ရှိနေသူများစွာတို့မှာ ဤအံ့ဖွယ်အမှုကိုတွေ့မြင်ကြပြီး ယေရှုကိုယုံကြည်လာကြလေသည်။ (ယောဟန် ၁၁:၁-၄၅) ဤမှတ်တမ်းက ဘုရားသခင့်ကမ္ဘာသစ်တွင် သင်ချစ်မြတ်နိုးရသောသေလွန်သူများ ပြန်ထလာနိုင်မည်ဟူသောမျှော်လင့်ချက်ကို တိုးများလာစေသည်မဟုတ်ပေလော။
၉။ ယခု ယေရှုသည် လူသေတို့ကို ရှင်ပြန်ထမြောက်စေနိုင်ကြောင်း အဘယ်ကြောင့်စိတ်ချနိုင်သနည်း။
၉ နှစ်ခြင်းဆရာယောဟန်သည် ထောင်ထဲ၌ရောက်နေသောအခါ ယေရှုက သူ့ထံ ဤအားပေးစကားပို့ခဲ့သည်– “မျက်စိကန်းသောသူတို့သည် မျက်စိမြင်ရကြ၏၊ . . . သေသောသူတို့သည် ထမြောက်ခြင်းသို့ရောက်ရကြ၏။” (မဿဲ ၁၁:၄-၆) မြေကြီးပေါ် ယေရှုရှိစဉ်က လူသေများကိုရှင်ပြန်ထမြောက်စေခဲ့ရာ ဘုရားသခင်တန်ခိုးအပ်နှင်းခံရသော တန်ခိုးကြီးသည့် နာမ်ဝိညာဉ်ပုဂ္ဂိုလ်တစ်ပါးအဖြစ် ကိုယ်တော်သည် ထိုအမှုကို အမှန်ပင်ပြုလုပ်နိုင်တော်မူမည်။ ယေရှုသည် “ထမြောက်ခြင်းအကြောင်း၊ အသက်ရှင်ခြင်းအကြောင်း” ဖြစ်၏၊ မဝေးတော့သည့်အနာဂတ်၌ “သင်္ချိုင်းများမှာရှိသောသူအပေါင်းတို့သည် သားတော်၏စကားသံကိုကြား၍၊ ထွက်ရမည့်အချိန်ကာလရောက်လတ္တံ့” သည်ကိုသိထားရခြင်းက အမှန်ပင်နှစ်သိမ့်မှုကြီးပါတကား!—ယောဟန် ၅:၂၈၊ ၂၉; ၁၁:၂၅။
အခြားရှင်ပြန်ထမြောက်ခြင်းများက ကျွန်ုပ်တို့၏မျှော်လင့်ချက်ကို အားဖြည့်ပေး
၁၀။ တမန်တော်တစ်ပါး ပထမဦးဆုံးအကြိမ် ရှင်ပြန်ထမြောက်စေခဲ့ခြင်းအကြောင်းကို သင်မည်သို့ဖော်ပြမည်နည်း။
၁၀ ယေရှုသည် မိမိ၏တမန်တော်များကို ဘုရားသခင့်နိုင်ငံတော်ဟောပြောသူများအဖြစ် စေလွှတ်တော်မူခဲ့သောအခါ သူက “သေသောသူတို့ကို ထမြောက်စေကြလော့” ဟုမိန့်တော်မူခဲ့သည်။ (မဿဲ ၁၀:၅-၈) မှန်ပါသည်၊ ထိုသို့ပြုရန် သူတို့သည် ဘုရားသခင့်တန်ခိုးတော်ကို မှီခိုအားထားကြရ၏။ စီ.အီး. ၃၆ တွင် ယုပ္ပေမြို့ရှိ ဘုရားတရားကြည်ညိုသောအမျိုးသမီး ဒေါ်ကာ (တဗိသ) သည် သေခြင်း၌အိပ်ပျော်သွားသည်။ သူသည် ဆင်းရဲသောမုဆိုးမများအတွက် အဝတ်အစားများကို ချုပ်ပေးခြင်းအပါအဝင် ကောင်းမှုများပြုခဲ့ရာ ထိုသူများအတွင်းတွင် သူ၏သေဆုံးမှုက များစွာသောငိုကြွေးမှုကိုဖြစ်စေ၏။ တပည့်တော်များသည် သူ့ကိုသင်္ဂြိုဟ်ရန်ပြင်ဆင်ကြပြီး စိတ်သက်သာရာသက်သာကြောင်းအတွက် တမန်တော်ပေတရုထံ လူလွှတ်၍ဖိတ်ခေါ်ခဲ့သည်။ (တမန်တော် ၉:၃၂-၃၈) သူသည် လူအပေါင်းကို အထက်ခန်းမှထွက်စေပြီးနောက် ဆုတောင်း၍ “တဗိသ၊ ထလော့!” ဟုပြောဆိုသည်။ တဗိသသည် မျက်စိဖွင့်လျက် ထထိုင်လေရာ ပေတရုက သူ့လက်ကိုကိုင်၍ ဆွဲထူလေသည်။ တမန်တော်တစ်ပါး ပထမဆုံးအကြိမ် ရှင်ပြန်ထမြောက်စေခဲ့သော ဤသတင်းက လူများစွာတို့ကို ယုံကြည်သူများဖြစ်စေခဲ့၏။ (တမန်တော် ၉:၃၉-၄၂) ယင်းက ရှင်ပြန်ထမြောက်ခြင်းကို မျှော်လင့်ရန်အကြောင်း ထပ်၍လည်းတိုးများလာစေသည်။
၁၁။ သမ္မာကျမ်းစာမှတ်တမ်း၌ နောက်ဆုံးရှင်ပြန်ထမြောက်ခြင်းအကြောင်းကား အဘယ်နည်း။
၁၁ သမ္မာကျမ်းစာ၌ မှတ်တမ်းတင်ထားသော နောက်ဆုံးရှင်ပြန်ထမြောက်ခြင်းသည် တရောမြို့၌ဖြစ်ပျက်ခဲ့သည်။ ပေါလု၏တတိယအကြိမ်မြောက် ခရစ်ယာန်သာသနာပြုခရီးစဉ်တွင် ထိုမြို့၌ရပ်နားခဲ့သောအခါ သန်းခေါင်တိုင်အထိ သူဟောပြောလေသည်။ မောပန်းနွမ်းနယ်မှု၊ မီးခွက်များစွာ၏အပူရှိန်နှင့် စည်းဝေးရာနေရာ၌ လူအုပ်ပြွတ်သိပ်နေသော အခြေအနေတို့ကြောင့် ဥတုခုအမည်ရှိ လုလင်တစ်ဦးသည် အိပ်ပျော်သွားပြီး တတိယအထပ် ပြတင်းပေါက်မှ ကျသွားခဲ့သည်။ သူ့ကို ‘ပွေ့ချီလိုက်ရာ’ သူသည် သတိလစ်ခြင်းမျှသာမဟုတ်ဘဲ ‘သေနေသည်ကို တွေ့ကြ၏။’ ထိုအခါပေါလုသည် ဥတုခု၏အပေါ်သို့ ကိုယ်ကိုလှဲလျက်ပွေ့ဖက်ပြီးနောက် ကြည့်ရှုနေသူတို့အား “အုတ်အုတ်သဲသဲမပြုကြနှင့်။ သူသည်အသက်ရှိ၏” ဟုဆိုသည်။ ထိုလူရွယ်သည် ပြန်အသက်ရှင်လာပြီဟု ပေါလုဆိုလိုနေခြင်းဖြစ်သည်။ ထိုတွင်ရှိသူတို့သည် “အလွန်သက်သာခြင်းရှိကြ၏။” (တမန်တော် ၂၀:၇-၁၂) ယနေ့ ဘုရားသခင်ကျေးကျွန်များအနေနှင့် ယခင်က သူတို့နှင့်အတူ ဘုရားသခင့်လုပ်ငန်းတော်တွင် တွဲဖက်လုပ်ဆောင်ခဲ့ကြသူတို့သည် ရှင်ပြန်ထမြောက်ခြင်းမျှော်လင့်ချက် ပြည့်စုံခြင်းကြုံတွေ့ရလိမ့်မည်ကို သိထားကြခြင်းကြောင့် များစွာနှစ်သိမ့်မှုရရှိကြ၏။
ရှင်ပြန်ထမြောက်ခြင်း—ကြာမြင့်စွာကတည်းက တည်ရှိခဲ့သောမျှော်လင့်ချက်
၁၂။ ရောမဘုရင်ခံ ဖေလဇ်မင်းရှေ့တွင် ပေါလုသည် အဘယ်ယုံကြည်စိတ်ချမှုကို ဖော်ထုတ်ပြောပြခဲ့သနည်း။
၁၂ ရောမဘုရင်ခံ ဖေလဇ်မင်းရှေ့တွင် ရုံးတင်ခံရသောအခါ ပေါလုဤသို့သက်သေခံခဲ့သည်– “ပညတ္တိကျမ်း၊ အနာဂတ္တိကျမ်းတို့၌ စီရင်ရေးထားသမျှတို့ကို အကျွန်ုပ်ယုံပါ၏။ ဖြောင့်မတ်သောသူ၊ မဖြောင့်မတ်သောသူရှိသမျှတို့သည် သေခြင်းမှထမြောက်ကြလိမ့်မည်ဟူ၍ . . . အကျွန်ုပ်လည်း ဘုရားသခင်ကိုအမှီပြု၍ မျှော်လင့်ပါ၏။” (တမန်တော် ၂၄:၁၄၊ ၁၅) “ပညတ္တိကျမ်း” ကဲ့သို့သော ဘုရားသခင့်စကားတော်အပိုင်းများက သေလွန်သူများ ပြန်ရှင်လာခြင်းအကြောင်းကို မည်သို့ညွှန်ပြသနည်း။
၁၃။ ပထမဦးဆုံးပရောဖက်ပြုချက်ကို ဘုရားသခင်ပေးသောအခါ ကိုယ်တော်သည် ရှင်ပြန်ထမြောက်ခြင်းကို ရည်စောင်ကြောင်း အဘယ်ကြောင့်ဆိုနိုင်သနည်း။
၁၃ ဘုရားသခင်ကိုယ်တော်တိုင် ဧဒင်ဥယျာဉ်၌ ဦးဆုံးပရောဖက်ပြုချက်ကိုပေးသောအခါ ရှင်ပြန်ထမြောက်ခြင်းမျှော်လင့်ချက်ကို ရည်စောင်၍မိန့်တော်မူခဲ့၏။ “စာတန်” တည်းဟူသော “ရှေးမြွေဟောင်း” ကိုပြစ်ဒဏ်ချမှတ်ရာ၌ ဘုရားသခင်ကဤသို့မြွက်ဆိုခဲ့သည်– “သင်နှင့်မိန်းမကိုလည်းကောင်း၊ သင်၏အမျိုးအနွယ်နှင့် မိန်းမ၏အမျိုးအနွယ်ကိုလည်းကောင်း၊ ငါသည်ရန်ငြိုးဖွဲ့စေမည်။ သူသည် သင်၏ခေါင်းကိုကြိတ်လိမ့်မည်၊ သင်သည် သူ၏ဖနောင့်ကိုကြိတ်လိမ့်မည်။” (ဗျာဒိတ် ၁၂:၉; ကမ္ဘာဦး ၃:၁၄၊ ၁၅) မိန်းမအမျိုးအနွယ်၏ဖနောင့်ကို ကြိတ်ခြင်းက ယေရှုခရစ်အား သတ်ပစ်ခြင်းကိုဆိုလို၏။ ထို့နောက်တွင် မြွေ၏ခေါင်းကို အမျိုးအနွယ်ကြိတ်ရမည်ဆိုလျှင် ခရစ်တော်သည် သေခြင်းမှထမြောက်ရပေလိမ့်မည်။
၁၄။ ယေဟောဝါသည် ‘လူသေတို့၏ဘုရားသခင်မဟုတ်၊ အသက်ရှင်သူတို့၏ဘုရားသခင်’ မည်သို့ဖြစ်သနည်း။
၁၄ ယေရှုက ဤသို့ကြွေးကြော်ခဲ့သည်– ‘မောရှေသည် ထာဝရဘုရားကို ‘အာဗြဟံ၏ဘုရားသခင်၊ ဣဇာက်၏ဘုရားသခင်၊ ယာကုပ်၏ဘုရားသခင်’ ဟု ချုံခန်း၌ခေါ်ဝေါ်သောအခါ သေလွန်သောသူတို့သည် ထမြောက်ကြောင်းကို ဖော်ပြခဲ့ပြီ။ ဘုရားသခင်သည် သေနေသောသူတို့၏ဘုရားသခင်မဟုတ်။ အသက်ရှင်သောသူတို့၏ဘုရားသခင် ဖြစ်တော်မူ၏။ ထိုသူအပေါင်းတို့သည် ဘုရားသခင်၌အသက်ရှင်ကြသည်။’ (လုကာ ၂၀:၂၇၊ ၃၇၊ ၃၈; ထွက်မြောက်ရာ ၃:၆) အာဗြဟံ၊ ဣဇာက်၊ ယာကုပ်တို့သည် သေလွန်ကြပြီဖြစ်သော်လည်း သူတို့ကို ဘုရားသခင် ရှင်ပြန်ထမြောက်စေရန်ရည်ရွယ်ထားတော်မူချက်သည် ပြည့်စုံရန်သေချာလွန်းရကာ ကိုယ်တော်အတွက် သူတို့သည် အသက်ရှင်လျက်ရှိသကဲ့သို့ဖြစ်သည်။
၁၅။ အာဗြဟံသည် ရှင်ပြန်ထမြောက်ခြင်းကို ယုံကြည်ရန်အကြောင်း အဘယ်ကြောင့်ရှိသနည်း။
၁၅ အာဗြဟံ၌ ရှင်ပြန်ထမြောက်ခြင်းကို မျှော်လင့်ရန်အကြောင်းရှိသည်၊ အကြောင်းမှာ သူနှင့် ဇနီးဖြစ်သူစာရာသည် အလွန်အိုမင်းပြီး သားသမီးရနိုင်စွမ်းနှင့်စပ်လျဉ်း၍ သူတို့သည်အသေကဲ့သို့ဖြစ်နေသောအခါ ဘုရားသခင်သည် အံ့ဖွယ်နည်းဖြင့် သူတို့၏မျိုးပွားနိုင်စွမ်းအခွင့်ကို ပြန်ပေးခဲ့သည်။ ယင်းသည် ရှင်ပြန်ထမြောက်ခြင်းကဲ့သို့ဖြစ်သည်။ (ကမ္ဘာဦး ၁၈:၉-၁၁; ၂၁:၁-၃ ဟေဗြဲ ၁၁:၁၁၊ ၁၂) သူတို့၏သား၊ ဣဇာက် အသက် ၂၅ နှစ်ရှိသောအခါ သူ့ကိုပူဇော်ရန် အာဗြဟံကို ဘုရားသခင်မိန့်တော်မူခဲ့၏။ သို့သော် အာဗြဟံသည် ဣဇာက်ကိုသတ်မည့်ဆဲဆဲတွင် ယေဟောဝါ၏ကောင်းကင်တမန်က သူ၏လက်ကိုဆီးတားခဲ့သည်။ အာဗြဟံသည် “[ဣဇာက်ကို] သေခြင်းမှထမြောက်စေခြင်းငှာ၊ ဘုရားသခင်တတ်နိုင်တော်မူသည်ကို . . . အောက်မေ့၏။ ထိုသားကို ပုံစကားအားဖြင့် သေခြင်းထဲကရ၏။”—ဟေဗြဲ ၁၁:၁၇-၁၉; ကမ္ဘာဦး ၂၂:၁-၁၈။
၁၆။ ယခု အာဗြဟံသည် သေခြင်း၌အိပ်ပျော်လျက် အဘယ်အရာကိုစောင့်မျှော်နေသနည်း။
၁၆ ကတိထားရာမျိုးနွယ်ဖြစ်သော မေရှိယ၏ အုပ်ချုပ်မှုအောက်၌ ရှင်ပြန်ထမြောက်ခြင်းကို အာဗြဟံမျှော်လင့်ခဲ့သည်။ ဘုရားသခင့်သားတော်သည် လူသားဘဝမတိုင်မီကတည်ရှိရာအပေါ်စီးမြင်ကွင်းမှ အာဗြဟံ၏ယုံကြည်ခြင်းကို သတိပြုခဲ့သည်။ ထို့ကြောင့် လူသားယေရှုခရစ်ဖြစ်လာသည့်အခါ ကိုယ်တော်သည် ဂျူးများကို ဤသို့မိန့်တော်မူခဲ့၏– “သင်တို့အဘအာဗြဟံသည် ငါကြွလာမည့်အချိန်ကာလကိုမြော်မြင်ခြင်းငှာ အလွန်အလိုရှိ၏။” (ယောဟန် ၈:၅၆-၅၈; သု. ၈:၃၀၊ ၃၁) ယခု အာဗြဟံသည် သေခြင်း၌အိပ်ပျော်နေပြီး ဘုရားသခင့်မေရှိယနိုင်ငံတော်အောက်တွင် မြေကြီးပေါ်သို့ ရှင်ပြန်ထမြောက်လာရန် စောင့်မျှော်လျက်ရှိသည်။—ဟေဗြဲ ၁၁:၈-၁၀၊ ၁၃။
ပညတ္တိကျမ်းနှင့် ဆာလံကျမ်းမှ သက်သေခံချက်
၁၇။ “ပညတ္တိကျမ်း. . . တို့၌ စီရင်ရေးထားသမျှတို့” သည် ယေရှုခရစ်၏ရှင်ပြန်ထမြောက်ခြင်းကို မည်သို့ညွှန်ပြခဲ့သနည်း။
၁၇ ပေါလု၏ရှင်ပြန်ထမြောက်ခြင်း မျှော်လင့်ချက်သည် “ပညတ္တိကျမ်း . . . တို့၌ စီရင်ရေးထားသမျှတို့” နှင့်ညီညွတ်သည်။ ဘုရားသခင်က ဣသရေလလူမျိုးကို ဤသို့မိန့်တော်မူသည်– “သင်တို့သည် . . . စပါးကိုရိတ်သောအခါ အဦးရိတ်သောကောက်လှိုင်းတစ်စည်းကို ယဇ်ပုရောဟိတ်ထံသို့ဆောင်ခဲ့ရမည်။ သင်တို့သည် စိတ်တော်နှင့်တွေ့ခြင်းငှာ ယဇ်ပုရောဟိတ်သည် . . . [နိသန်လ ၁၆ ရက်တွင်] ထိုကောက်လှိုင်းကို ထာဝရဘုရားရှေ့တော်၌ ချီလွှဲရမည်။ (ဝတ်ပြုရာ ၂၃:၉-၁၄) စိတ်ထဲတွင်ဤပညတ်ရှိကာ ဤသို့ပေါလုရေးသားခဲ့ခြင်းဖြစ်ပေမည်– “ခရစ်တော်သည် သေခြင်းမှထမြောက်တော်မူ၍၊ အိပ်ပျော်သောသူတို့တွင် အဦးသီးသောအသီးဖြစ်တော်မူ၏။” “အဦးသီးသောအသီး” အဖြစ် ယေရှုသည် စီ.အီး. ၃၃၊ နိသန်လ ၁၆ ရက်နေ့တွင် ရှင်ပြန်ထမြောက်ခဲ့သည်။ နောက်ပိုင်းတွင် ကိုယ်တော်ရောက်ရှိချိန်အတွင်း ‘နောက်အသီးများ’ ဖြစ်သော ကိုယ်တော်၏ဘိသိက်ခံနောက်လိုက်များ ရှင်ပြန်ထမြောက်လာကြလိမ့်မည်။—၁ ကောရိန္သု ၁၅:၂၀-၂၃; ၂ ကောရိန္သု ၁:၂၁; ၁ ယောဟန် ၂:၂၀၊ ၂၇။
၁၈။ ဆာလံကျမ်းတွင် ယေရှု၏ရှင်ပြန်ထမြောက်ခြင်းကို တင်ကူးဟောထားကြောင်း ပေတရု မည်သို့ပြသခဲ့သနည်း။
၁၈ ဆာလံကျမ်းကလည်း ရှင်ပြန်ထမြောက်ခြင်းကို ထောက်ခံသည်။ စီ.အီး. ၃၃၊ ပင်တေကုတ္တေပွဲနေ့တွင် တမန်တော်ပေတရုသည် ဆာလံ ၁၆:၈-၁၁ မှကိုးကား၍ ဤသို့ပြောဆိုခဲ့သည်– “[ခရစ်တော်] ကိုအကြောင်းပြုလျက် ဒါဝိဒ်မင်းက၊ ‘ငါသည်ထာဝရဘုရားကို အစဉ်မပြတ်မျက်မှောက်ပြု၏။ အကြောင်းမူကား၊ ငါ့လက်ယာဘက်၌ တည်ရှိတော်မူသည်ဖြစ်၍ ငါသည်လှုပ်ရှားခြင်းမရှိရ။ ထိုကြောင့် ငါ့စိတ်နှလုံးသည် သာယာခြင်း၊ ငါ့ဝိညာဉ်သည်လည်း ရွှင်လန်းခြင်းရှိ၏။ ထိုမှတစ်ပါး ငါ့အသားသည် မျှော်လင့်လျက် ကျိန်းဝပ်လိမ့်မည်။ အကြောင်းမူကား၊ ကိုယ်တော်သည် အကျွန်ုပ်၏ဝိညာဉ်ကို မရဏာနိုင်ငံ၌ ပစ်ထားတော်မမူ။ ကိုယ်တော်၏သန့်ရှင်းသောသူအားလည်း ပုပ်စပ်ခြင်းကို ရှိစေတော်မမူ။’” ပေတရုက ဆက်၍ “ခရစ်တော်၏ထမြောက်ခြင်းအကြောင်းကို ရည်မှတ်လျက်၊ ထိုခရစ်တော်၏စိတ်ဝိညာဉ်ကို မရဏာနိုင်ငံ၌ပစ်ထားတော်မမူ။ အသားသည်လည်း ပုပ်စပ်ခြင်းသို့မရောက်ဟု [ဒါဝိဒ်သည်] အနာဂတံသဉာဏ်နှင့်ဟောလေ၏။ ထိုယေရှုကို ဘုရားသခင်ထမြောက်စေတော်မူသည်” ဟုပြောခဲ့၏။—တမန်တော် ၂:၂၅-၃၂။
၁၉၊ ၂၀။ ဆာလံ ၁၁၈:၂၂ ကို အဘယ်အချိန်၌ ပေတရုကိုးကားခဲ့သနည်း၊ ယင်းက ယေရှု၏သေခြင်း၊ ရှင်ပြန်ထမြောက်ခြင်းနှင့် မည်သို့သက်ဆိုင်ခဲ့သနည်း။
၁၉ ရက်အနည်းငယ်ကြာပြီးနောက် ပေတရုသည် ဆဲန်ဟီဒရင်ရှေ့မှောက်၌ရပ်ကာ ဆာလံကျမ်းမှ ထပ်မံ၍ကိုးကားခဲ့ပြန်သည်။ ခြေမစွမ်းမသန်သောသူတောင်းစားကို မည်သို့ကုသပေးခဲ့ကြောင်း မေးမြန်းကြသောအခါ တမန်တော်က ဤသို့ဖြေကြားခဲ့သည်– “သင်တို့သည် လက်ဝါးကပ်တိုင်မှာကွပ်မျက်၍၊ ဘုရားသခင်သည် သေခြင်းမှထမြောက်စေတော်မူသော နာဇရက်မြို့သား ယေရှုခရစ်၏နာမတော်အားဖြင့် ဤသူသည် သင်တို့မျက်မှောက်၌ ကျန်းမာလျက်ရှိသည်ကို သင်တို့မှစ၍ ဣသရေလလူအပေါင်းတို့ သိမှတ်ကြလော့။ ထိုသခင် [ယေရှု] ကား၊ ‘သင်တို့သည်တိုက်ကိုတည်လုပ်သောအခါ ပယ်ထား၍၊ နောက်တစ်ဖန် တိုက်ထောင့်အထွတ်ဖျားသို့ ရောက်ပြန်သောကျောက်ဖြစ်တော်မူ၏။’ ထိုသခင်မှတစ်ပါး အဘယ်သူမျှ ကယ်တင်ခြင်းအမှုကို မတတ်နိုင်။ ထိုသခင်၏နာမတော်မှတစ်ပါး ငါတို့ကိုကယ်တင်နိုင်သောနာမတစ်စုံတစ်ခုမျှ ကောင်းကင်အောက် လူတို့တွင်မပေါ်မရှိ။”—တမန်တော် ၄:၁၀-၁၂။
၂၀ ထိုတွင် ပေတရုက ဆာလံ ၁၁၈:၂၂ မှကိုးကားခြင်းဖြစ်ပြီး ယင်းတွင်ဖော်ပြထားရာမှာ ယေရှု၏သေခြင်း၊ ရှင်ပြန်ထမြောက်ခြင်းနှင့် သက်ဆိုင်ပုံကိုပြောခဲ့သည်။ ဘာသာရေးခေါင်းဆောင်များ၏ လှုံ့ဆော်မှုဖြင့် ဂျူးတို့သည် ယေရှုကိုငြင်းပယ်ခဲ့ကြ၏။ (ယောဟန် ၁၉:၁၄-၁၈; တမန်တော် ၃:၁၄၊ ၁၅) ‘တိုက်ကိုတည်လုပ်သူတို့ ကျောက်ကိုငြင်းပယ်ကြခြင်း‘ က ခရစ်တော်၏သေခြင်းကိုဖြစ်စေခဲ့သော်လည်း ‘ထိုကျောက်မှာ တိုက်ထောင့်အထွတ်ဖျားသို့ ရောက်ခြင်း’ က ကောင်းကင်၌ ဘုန်းထွန်းတောက်ခြင်းအဖြစ်သို့ ကိုယ်တော်အား ထမြောက်စေခြင်းကို သရုပ်ဖော်သည်။ ဆာလံဆရာတင်ကူးပြောခဲ့သကဲ့သို့ပင် “ထိုအမှုသည် ထာဝရဘုရား [“ယေဟောဝါ၊” ကဘ] ပြုတော်မူသောအမှုဖြစ်၏။” (ဆာလံ ၁၁၈:၂၃) အဆိုပါ “ကျောက်” ကိုတိုက်ထောင့်အထွတ်ဖျားဖြစ်စေခြင်းက ကိုယ်တော်အား မင်းလောင်းမင်းလျာအဖြစ် ချီးမြှောက်ခြင်းပါဝင်သည်။—ဧဖက် ၁:၁၉၊ ၂၀။
ရှင်ပြန်ထမြောက်ခြင်းမျှော်လင့်ချက်ဖြင့် ထောက်မခံရခြင်း
၂၁၊ ၂၂။ ယောဘ ၁၄:၁၃-၁၅ တွင်မှတ်တမ်းတင်ထားသည့်အတိုင်း အဘယ်မျှော်လင့်ချက်ကို ယောဘဖော်ပြခဲ့သနည်း၊ ၎င်းက ယနေ့ ကျန်ရစ်သူတို့ကို မည်သို့နှစ်သိမ့်မှုပေးနိုင်သနည်း။
၂၁ သေခြင်းမှထမြောက်လာသူတစ်ယောက်ကိုမျှ ကျွန်ုပ်တို့ကိုယ်တွေ့တစ်ခါမျှမမြင်ဖူးခဲ့ကြသော်လည်း ရှင်ပြန်ထမြောက်ခြင်းကို စိတ်ချစေသည့် သမ္မာကျမ်းစာမှတ်တမ်းအချို့ကို ကျွန်ုပ်တို့သတိပြုမိခဲ့ကြပြီ။ သို့ဖြစ်၍ ဖြောင့်မတ်သောသူယောဘ ဖော်ပြပြောဆိုခဲ့သည့် မျှော်လင့်ချက်ကို ကျွန်ုပ်တို့ယုံကြည်မျှော်လင့်နိုင်ကြ၏။ သူသည် ဆင်းရဲဝေဒနာ ခံခဲ့ရသောအခါ ဤသို့တောင်းပန်ခဲ့သည်– “ကိုယ်တော် [ယေဟောဝါ] သည် အကျွန်ုပ်ကို သင်္ချိုင်းတွင်း၌ ဝှက်ထားတော်မူပါစေ။ . . . အကျွန်ုပ်ကိုအောက်မေ့စရာအချိန်ကို ချိန်းချက်တော်မူပါစေ။ လူသည်သေလျှင် အသက်ရှင်ပြန်ပါလိမ့်မည်လော။ . . . အကျွန်ုပ်ကိုခေါ်တော်မူပါ။ အကျွန်ုပ်ပြန်လျှောက်ပါမည်။ ကိုယ်တိုင်ဖန်ဆင်းတော်မူသောအရာကို သနားခြင်းစိတ်ရှိတော်မူပါ။” (ယောဘ ၁၄:၁၃-၁၅) ဘုရားသခင်သည် ‘မိမိ၏ဖန်ဆင်းတော်မူသောအရာကို သနားခြင်းစိတ်ရှိ’ ၍ ယောဘကိုထမြောက်စေရန် အလွန်ပင်အလိုရှိသည်။ ယင်းကား ကျွန်ုပ်တို့အတွက် ကောင်းမြတ်လှသောမျှော်လင့်ချက်ပါတကား!
၂၂ ဘုရားသခင်ကိုကြောက်ရွံ့သော မိသားစုမှတစ်ဦးသည် ယောဘကဲ့သို့ပင် ပြင်းထန်စွာဖျားနာကာ ရန်သူတည်းဟူသောသေခြင်း၌ အရှုံးခံလိုက်ရပေမည်။ လာဇရုသေဆုံးသွားရာ၌ ယေရှုပင် ငိုကြွေးခဲ့သကဲ့သို့ ကျန်ရစ်သူတို့သည် ဝမ်းနည်းငိုကြွေးကြပေမည်။ (ယောဟန် ၁၁:၃၅) သို့သော် ဘုရားသခင်သည် ခေါ်တော်မူ၍ မိမိ၏မှတ်ဉာဏ်တွင်ရှိသောသူတို့ ပြန်ထူးမည်ကိုသိရှိရခြင်းမှာ မည်မျှနှစ်သိမ့်စရာပါတကား! ထိုအခါ သူတို့သည် ဖျားနာ သို့မဟုတ် ချို့ယွင်းလျက်မဟုတ်ဘဲ ကျန်းကျန်းမာမာဖြင့် ခရီးဝေးမှပြန်လာသည့်အလား ဖြစ်ပေလိမ့်မည်။
၂၃။ ရှင်ပြန်ထမြောက်ခြင်းမျှော်လင့်ချက်ကို ယုံကြည်စိတ်ချကြောင်း အချို့မည်သို့ဖော်ပြခဲ့ကြသနည်း။
၂၃ အသက်ကြီးရင့်ပြီး သစ္စာရှိသော ခရစ်ယာန်တစ်ဦး သေဆုံးသွားခြင်းက ယုံကြည်သူချင်းတို့ကို ဤသို့ရေးသားရန် လှုံ့ဆော်ပေးခံခဲ့ရ၏– “သင်၏မိခင်ဖြစ်သူကို ဆုံးရှုံးလိုက်ရခြင်းအတွက် ကျွန်ုပ်တို့၏ တကယ့်အတွင်းထဲမှကိုယ်ချင်းစာနာစိတ်ကို ကျေးဇူးပြု၍လက်ခံပါ။ လှပပြီး အားအင်ပြည့်နေမည့် သူ့ကို ကျွန်ုပ်တို့ပြန်လည်ကြိုဆိုရမည့်အချိန်သည် မဝေးတော့ပါ!” မိမိတို့၏သားကို ဆုံးရှုံးခဲ့ရသော မိဘတို့က ဤသို့ဆိုသည်– “ဂျေဆင် နိုးထလာမယ့်အချိန်ကို ကျွန်တော်တို့ တကယ်စောင့်မျှော်နေတယ်! သူ့ပတ်ပတ်လည်ကိုသူကြည့်မှာဖြစ်ပြီး သူအရမ်းတောင့်တခဲ့တဲ့ ပရဒိသုကိုတွေ့မှာပဲ။ . . . သူ့ကိုချစ်မြတ်နိုးခဲ့တဲ့ ကျွန်တော်တို့တစ်တွေ အဲဒီနေရာမှာရှိနေကြဖို့အတွက်လည်း တကယ့်လှုံ့ဆော်မှုတစ်ရပ်ပါပဲ။” မှန်ပါသည်၊ ရှင်ပြန်ထမြောက်ခြင်းမျှော်လင့်ချက်သည် မုချဧကန်ဖြစ်ကြောင်း ကျွန်ုပ်တို့စိတ်ချနိုင်သည့်အတွက် တကယ်ပင်ကျေးဇူးတင်စရာပါတကား!
သင့်အဖြေကား အဘယ်နည်း
• လူသေများကို ရှင်ပြန်ထမြောက်စေရန် ဘုရားသခင့်ပြင်ဆင်ပေးချက်ကို ယုံကြည်ခြင်းက ကျွန်ုပ်တို့ကို အဘယ်အကျိုးရရှိစေနိုင်သနည်း။
• သမ္မာကျမ်းစာ၌ မှတ်တမ်းတင်ထားသော အဘယ်ဖြစ်ရပ်များက ရှင်ပြန်ထမြောက်ခြင်းကို မျှော်လင့်စေသနည်း။
• ရှင်ပြန်ထမြောက်ခြင်းသည် ကြာမြင့်စွာကတည်းက တည်ရှိခဲ့သော မျှော်လင့်ချက်တစ်ခုဖြစ်ကြောင်း အဘယ်ကြောင့်ဆိုနိုင်သနည်း။
• လူသေနှင့်ပတ်သက်၍ အဘယ်အားပေးမှုဖြစ်စေသော မျှော်လင့်ချက်ကို ကျွန်ုပ်တို့ခံယူထားနိုင်သနည်း။
[လေ့လာရန်မေးခွန်းများ]
[စာမျက်နှာ ၁၀ ပါ ရုပ်ပုံ]
ယေဟောဝါထံတော်မှ တန်ခိုးအားဖြင့် ဧလိယသည် မုဆိုးမ၏သားငယ်ကို အသက်ပြန်ရှင်စေခဲ့
[စာမျက်နှာ ၁၂ ပါ ရုပ်ပုံ]
ယာဣရု၏သမီးကို ယေရှု ထမြောက်စေခဲ့သောအခါ သူ၏မိဘများသည် ပြောမပြနိုင်လောက်အောင် ဝမ်းမြောက်ခဲ့ကြ
[စာမျက်နှာ ၁၅ ပါ ရုပ်ပုံ]
စီ.အီး. ၃၃၊ ပင်တေကုတ္တေပွဲနေ့တွင် တမန်တော်ပေတရုက ယေရှုသည် သေရာမှရှင်ပြန်ထမြောက်ခဲ့ပြီဖြစ်ကြောင်း ရဲရင့်စွာသက်သေခံခဲ့