အန္တိအုတ်မြို့တွင် ညှဉ်းပန်းမှုက တိုးပွားစေ

ဖွင့်ပါ

အန္တိအုတ်မြို့တွင် ညှဉ်းပန်းမှုက တိုးပွားစေ

အာဇာနည်အဖြစ် သတေဖန်အသတ်ခံရပြီးနောက် ညှဉ်းပန်းမှု ရုတ်တရက်ဖြစ်ပွားသောအခါ ယေရှု၏တပည့်များစွာတို့သည် ယေရုရှလင်မှ ထွက်ပြေးခဲ့ကြသည်။ သူတို့ခိုလှုံခဲ့သောနေရာတစ်ခုမှာ မြောက်ဘက်မိုင် ၃၅၀ ခန့်ရှိ ရှုရိပြည်၊ အန္တိအုတ်မြို့ဖြစ်သည်။ (တမန်တော် ၁၁:၁၉) နောက်ဆက်တွဲအဖြစ်အပျက်များသည် ခရစ်ယာန်သမိုင်းကြောင်းတစ်ခုလုံးကို အကျိုးသက်ရောက်မှုရှိစေခဲ့၏။ ဖြစ်ပျက်ရာကို နားလည်သဘောပေါက်ရန် အန္တိအုတ်မြို့အကြောင်းကို အနည်းငယ်သိထားလျှင် ကောင်းပေသည်။

ရောမအင်ပါယာ၏မြို့များတွင် ရောမမြို့နှင့်အလက်ဇန္ဒြီးယားမြို့တို့သာ အရွယ်အစား၊ စည်ပင်ပေါကြွယ်မှုနှင့် အရေးပါမှုတို့နှင့်ပတ်သက်၍ အန္တိအုတ်မြို့ထက် သာလွန်ခဲ့သည်။ ရှုရိပြည်၏အဆိုပါမြို့တော်သည် မြေထဲပင်လယ်၏ အရှေ့မြောက်ဘက်ထောင့်တွင် ကြီးစိုးခဲ့သည်။ အန္တိအုတ်မြို့ (မျက်မှောက်ခေတ် တူရကီနိုင်ငံ၊ အန်တကီယားမြို့) သည်မိုင် ၂၀ ဝေးသည့် ၎င်း၏ပင်လယ်ဆိပ်ကမ်း စလူးရှာပိုင်အစ်ရီယာနှင့် ဆက်သွယ်ပေးသည့် သင်္ဘောများသွားလာနိုင်သော အော့ရာန်တီဇ်မြစ်ပေါ်တွင် တည်ရှိသည်။ ၎င်းသည် ရောမမြို့နှင့် ယူဖရေးတီးစ်မြစ်ဝှမ်းကြားရှိ အရေးအပါဆုံးသော ကူးသန်းရောင်းဝယ်ရေးလမ်းကြောင်းတစ်ခုကို ထိန်းချုပ်ခဲ့သည်။ ကူးသန်းရောင်းဝယ်ရေးဗဟိုအဖြစ် အင်ပါယာတစ်ခုလုံးနှင့် အရောင်းအဝယ်ပြုလုပ်ခဲ့ပြီး ရောမကမ္ဘာနေရာအနှံ့မှ ဘာသာရေးအဖွဲ့များ၏ လှုပ်ရှားမှုသတင်းကို သယ်ဆောင်ခဲ့ကြသော လူမျိုးခပ်သိမ်း၏အသွားအလာကိုလည်း တွေ့မြင်ခဲ့ရ၏။

အန္တိအုတ်မြို့တွင် ဂရိဘာသာတရားနှင့် အတွေးအခေါ်ပညာ ထွန်းကားခဲ့သည်။ သို့ရာတွင် “ခရစ်တော်၏အချိန်တွင် လူတို့သည် သူတို့၏ပြဿနာများနှင့် ရည်မှန်းချက်များအတွက် ဘာသာရေးစိတ်ကျေနပ်မှုကို လွတ်လပ်စွာ ရှာဖွေကြသည်နှင့်အမျှ ရှေးဘာသာရေးဂိုဏ်းဂဏများနှင့် အတွေးအခေါ်ပညာများသည် တစ်ဦးချင်းစီ၏ ယုံကြည်ချက်ဖြစ်လာရန် ဦးတည်ခဲ့သည်” ဟုသမိုင်းပညာရှင် ဂလန်ဗီလ်ဒေါင်နီကဆိုသည်။ (ရှုရှိပြည် အန္တိအုတ်မြို့သမိုင်း) လူအများသည် ဘုရားသခင်တစ်ဆူတည်းရှိသည်ဟူသောအယူဝါဒ၊ ဓလေ့ထုံးတမ်းများနှင့် ယုဒကျင့်ဝတ်တို့၌ စိတ်ကျေနပ်မှု တွေ့ရှိခဲ့ကြသည်။

ဘီ.စီ.အီး. ၃၀၀ ပြည့်နှစ်၌ အန္တိအုတ်မြို့တည်ချိန်ကတည်းက ဂျူးအုပ်စုကြီးသည် ထိုတွင် နေထိုင်ခဲ့ကြသည်။ ၎င်းအုပ်စုသည် လူဦးရေ၏ ၁၀ ရာခိုင်နှုန်းထက်မကဖြစ်ပြီး ခန့်မှန်းခြေအရ ၂၀,၀၀၀ မှ ၆၀,၀၀၀ အထိရှိသည်ဟုဆို၏။ ၎င်းမြို့တွင် ဂျူးများနေထိုင်ကြရန် ဆလူးဆိဒ်မင်းဆက်များက အားပေးအားမြှောက်ပြု၍ နိုင်ငံသားအခွင့်အရေးများကို အပြည့်အဝပေးထားသည်ဟု သမိုင်းဆရာဂျိုစီဖတ်စ်ကဆို၏။ ထိုအချိန်၌ ဟေဗြဲကျမ်းစာစောင်များကို ဂရိဘာသာဖြင့် ရရှိနိုင်သည်။ ၎င်းသည် ဂျူးမေရှိယဆိုင်ရာ စိတ်အားကြီးခြင်းတွင် ထောက်ခံသူများ၏ စိတ်ဝင်စားမှုကို နှိုးဆွပေးခဲ့သည်။ ထို့ကြာင့် ဂရိလူတို့တွင် ဘာသာဝင် များစွာရှိခဲ့သည်။ ဤအကြောင်းအားလုံးကြောင့် အန္တိအုတ်မြို့သည် ခရစ်ယာန်တပည့်ဖြစ်စေခြင်းလုပ်ငန်းအတွက် တိုးပွားထွန်းကားသောနေရာဖြစ်ခဲ့၏။

တစ်ပါးအမျိုးသားများကို သက်သေခံခြင်း

ယေရုရှလင်မှ ကွဲလွင့်သွားကြသော ညှဉ်းပန်းခံရသည့် ယေရှု၏တပည့်နောက်လိုက်အများစုသည် ဂျူးများနှင့်သာ သူတို့၏ယုံကြည်ခြင်းကို ဝေမျှပြောပြခဲ့ကြသည်။ သို့သော် အန္တိအုတ်မြို့တွင် ကုပရုပြည်နှင့် ကုရေနေပြည်မှ တပည့်အချို့သည် ‘ဂရိတို့အား’ ဟောပြောခဲ့ကြ၏။ (တမန်တော် ၁၁:၂၀) ဂရိစကားပြောဂျူးများနှင့် ဘာသာဝင်သူတို့ကို စီ.အီး. ၃၃၊ ပင်တေကုတ္တေပွဲမှစ၍ ဟောပြောခဲ့သည်မှန်သော်လည်း အန္တိအုတ်မြို့၌ ဟောပြောခြင်းသည် ထူးခြားပုံရသည်။ ဂျူးများကိုသာ ဟောပြောခြင်းမဟုတ်ပေ။ မှန်ပါသည်၊ တစ်ပါးအမျိုးသားကော်နေလိနှင့် သူ၏မိသားစုသည် တပည့်များဖြစ်နေကြပေပြီ။ သို့သော် ယေဟောဝါထံမှအဆင်းအာရုံရပြီးမှ တစ်ပါးအမျိုးသားများ သို့မဟုတ် လူမျိုးခြားများကို ဟောပြောခြင်းသည် သင့်လျော်ကြောင်း တမန်တော်ပေတရု ယုံကြည်စိတ်ချခဲ့သည်။—တမန်တော် ၁၀:၁-၄၈။

ကြီးမားပြီး ရှေးကျသောဂျူးရပ်ကွက်ဖြစ်သည့်အပြင် ဂျူးများနှင့် တစ်ပါးအမျိုးသားများစပ်ကြား ရန်လိုမှုမရှိသည့် မြို့တစ်မြို့ဖြစ်ရာ ဂျူးမဟုတ်သူများကို သက်သေခံခဲ့ကာ သတင်းကောင်းကို တလိုတလားတုံ့ပြန်ခဲ့ကြသည်။ အန္တိအုတ်မြို့သည် ထိုသို့ဖြစ်လာစေရန် အခြေအနေပေးသဖြင့် “လူအပေါင်းတို့သည် ယုံကြည်” သူများဖြစ်လာခဲ့ကြသည်။ (တမန်တော် ၁၁:၂၁) အယူမှားဘုရားများကို ကိုးကွယ်ခဲ့သည့် ဘာသာဝင်များသည် ခရစ်ယာန်များဖြစ်လာကြသောအခါ အယူမှားဘုရားများကို ကိုးကွယ်ဆဲရှိ အခြားတစ်ပါးအမျိုးသားများကို သက်သေခံရန် ထူးခြားစွာအသင့်ရှိနေကြ၏။

အန္တိအုတ်မြို့၏အခြေအနေများကို ကြားရကြသောအခါ ယေရုရှလင်အသင်းတော်သည် စူးစမ်းရန် ဗာနဗကို စေလွှတ်ခဲ့သည်။ သူ့ကိုရွေးချယ်ခြင်းသည် ပညာရှိရုံမက မေတ္တာရှိရာလည်းကျသည်။ သူသည် ဂျူးမဟုတ်သူများကို စတင်ဟောပြောခဲ့သူအချို့နည်းတူ ဆိုက်ပရပ်စ်ကျွန်းသားတစ်ဦးဖြစ်သည်။ သို့ဖြင့် ဗာနဗသည် အန္တိအုတ်မြို့ရှိ တစ်ပါးအမျိုးသားများကြားတွင် နေသာထိုင်သာရှိလိမ့်ဖြစ်သည်။ သူတို့ကလည်း မိမိတို့လူမျိုးစုနှင့် အကျွမ်းတဝင်ရှိသူအဖြစ် သူ့ကို ရှုမြင်ကြပေမည်။ * သူသည် မိမိတို့လုပ်ဆောင်နေသောအလုပ်ကို ထောက်ခံနိုင်ပေမည်။ ထို့ကြောင့် “သူသည်ရောက်၍ ဘုရားသခင်၏ကျေးဇူးတော်ကိုမြင်လျှင် ဝမ်းမြောက်ဝမ်းသာခြင်းရှိ၍ ထိုသူအပေါင်းတို့သည် ယုံကြည်သောစိတ်နှင့် ဘုရားသခင်ကို မှီဝဲဆည်းကပ်မည်အကြောင်း တိုက်တွန်းနှိုးဆော်” သောအခါ “လူများအပေါင်းတို့သည် သခင်ဘုရားထံသို့ ဝင်စားကြ၏။”—တမန်တော် ၁၁:၂၂-၂၄။

“အန္တိအုတ်မြို့တွင် အစောပိုင်းလုပ်ငန်းအောင်မြင်မှု၏ ဖြစ်နိုင်ခြေအကြောင်းများမှာ ဤမြို့ရှိ ခရစ်ယာန်သာသနာပြုများသည် ယေရုရှလင်မြို့၌ သူတို့ကြုံတွေ့ရသော ဂျူးအယူသီးသူများကို ကြောက်စရာမလိုခြင်း; ထို့ပြင် ရှုရိပြည်၏မြို့တော်ဖြစ်သော ဤမြို့ကို စစ်တပ်မှူးက အုပ်ချုပ်ခဲ့ပြီး (အနည်းဆုံးအဆိုပါအချိန်တွင်) လက်ထောက်ဘုရင်ခံများသည် ထိုဂျူးအယူသီးသူများကို တားမြစ်နိုင်စွမ်းရှိပုံမရသော ယေရုရှလင်မြို့မှာကဲ့သို့ လူအုပ်ရမ်းကားမှု ဖြစ်ပွားစရာအကြောင်းမရှိဘဲ စည်းကမ်းသေဝပ်မှု ပို၍ရှိပုံရသောကြောင့်ဖြစ်မည်” ဟုသမိုင်းပညာရှင် ဒေါင်နီကဖော်ပြသည်။

ဤသို့အခွင့်သာချိန်နှင့် အလုပ်များစွာလုပ်ရန်ရှိနေချိန်တွင် အကူအညီလိုသည်ကို ဗာနဗသိရှိနိုင်ဖွယ်ရှိပြီး သူ၏မိတ်ဆွေ ရှောလုကို သတိရခဲ့ပေမည်။ ရှောလု သို့မဟုတ် ပေါလုကိုမှ အဘယ်ကြောင့်သတိရခဲ့သနည်း။ ပေါလုသည် တမန်တော် ၁၂ ပါးတွင်မပါသော်လည်း တစ်ပါးအမျိုးသားများ၌ တမန်တော်အရာကို ရရှိထားသောကြောင့်ဖြစ်ပေမည်။ (တမန်တော် ၉:၁၅၊ ၂၇; ရောမ ၁:၅-၇; ဗျာဒိတ် ၂၁:၁၄) ထို့ကြောင့် ပေါလုသည် တစ်ပါးအမျိုးသားတို့၏ အန္တိအုတ်မြို့တွင် သတင်းကောင်းကို ကြွေးကြော်ဖို့ လုပ်ဖော်ဆောင်ဖက်ကောင်းတစ်ဦးဖြစ်ရန် အသင့်တော်ဆုံးဖြစ်ပေသည်။ (ဂလာတိ ၁:၁၆) သို့ဖြစ်၍ ဗာနဗသည် တာရှုမြို့သို့သွားပြီး ရှောလုကိုရှာဖွေကာ အန္တိအုတ်မြို့သို့ ခေါ်လာခဲ့သည်။—တမန်တော် ၁၁:၂၅၊ ၂၆; စာမျက်နှာ ၂၆-၇ ရှိလေးထောင့်ကွက်ရှု။

ဘုရားသခင်ညွှန်ကြားမှုဖြင့် ခရစ်ယာန်များဟုအခေါ်ခံခဲ့ရ

ဗာနဗနှင့်ရှောလုတို့သည် တစ်နှစ်ပတ်လုံး “လူများအပေါင်းတို့အား ဆုံးမ . . . ကြ၏။ တပည့်တော်တို့သည်လည်း ခရစ်ယာန်ဟူ၍ ခေါ်ဝေါ်သမုတ်ခြင်းကို အန္တိအုတ်မြို့၌ အဦးခံရကြ၏။” ဂျူးများသည် ယေရှုကို မေရှိယ သို့မဟုတ် ခရစ်တော်အဖြစ် ငြင်းပယ်ကြသောကြောင့် ယေရှု၏နောက်လိုက်များကို ခရစ်ယာန်များ (ဂရိ) သို့မဟုတ် မေရှိယဝါဒီများ (ဟေဗြဲ) ဟူ၍ခေါ်ဆိုခြင်းဖြင့် ကိုယ်တော့်အား တစ်နည်းအားဖြင့် အသိအမှတ်ပြုရာကျမည်ဖြစ်သောကြောင့် ကိုယ်တော်၏နောက်လိုက်များကို ခရစ်ယာန်များဟူ၍ ဦးဆုံးခေါ်ဝေါ်ခဲ့ကြမည်မဟုတ်ပေ။ အယူမှားသူများက အပြောင်အပြက်၊ သို့မဟုတ် မထီးလေးစားသောသဘောဖြင့် သူတို့ကို ခရစ်ယာန်များဟူ၍ အမည်ပေးခဲ့သည်ဟု အချို့ကထင်မှတ်ကြသည်။ သို့သော် ခရစ်ယာန်များဟူသောအမည်ကို ဘုရားသခင်ပေးခဲ့သည်ဟု သမ္မာကျမ်းကဖော်ပြသည်။—တမန်တော် ၁၁:၂၆။

ခရစ်ယာန်ဂရိကျမ်းစာစောင်များတွင် အများအားဖြင့် “ခေါ်ဝေါ်ခဲ့သည်” ဟုဘာသာပြန်ဆိုထားသော အမည်သစ်နှင့်ဆက်စပ်အသုံးပြုခဲ့သည့် ကြိယာသည် သဘာဝထက်လွန်ကဲသော၊ ဗျာဒိတ်တော်၊ သို့မဟုတ် မြင့်မြတ်မှုတစ်ခုခုနှင့်ဆိုင်သော၊ အစဉ်ဆက်စပ်အသုံးပြုလျက်ရှိသည်။ သို့ဖြင့် ကျမ်းပညာရှင်များသည် ယင်းကို “ဗျာဒိတ်တော်သံပေးရန်၊” “ဘုရားသခင်ရေးရာရင်းနှီးမှု၊” သို့မဟုတ် “ဘုရားသခင်မိန့်မှာရန် သို့မဟုတ် သတိပေးဆုံးမရန်၊ ကောင်းကင်မှ သွန်သင်ရန်” ဟူ၍ပြန်ဆိုသည်။ ထို့ကြောင့် ယေရှု၏နောက်လိုက်များကို ‘ဘုရားသခင့်ညွှန်ကြားမှုဖြင့်’ ခရစ်ယာန်များဟုခေါ်ဝေါ်ခဲ့ကြရာ ယေဟောဝါသည် ထိုအမည်ကိုမှည့်ရန် ရှောလုနှင့်ဗာနဗတို့ကို ညွှန်ကြားခဲ့နိုင်ဖွယ်ရှိသည်။

အဆိုပါအမည်သစ်ကို ဆက်၍အသုံးပြုခဲ့ကြ၏။ ယခု ယေရှု၏တပည့်များကို ဂျူးဘာသာရေးအဖွဲ့တစ်ခုအဖြစ် အထင်မမှားနိုင်တော့ချေ၊ သူတို့သည် ၎င်းနှင့် အလွန်ကွဲပြားခြားနားကြသည်။ စီ.အီး. ၅၈ ခန့်တွင် ခရစ်ယာန်များကား မည်သူမည်ဝါများဖြစ်ကြသည်ကို ရောမအရာရှိများက ကောင်းစွာသိရှိကြလေသည်။ (တမန်တော် ၂၆:၂၈) သမိုင်းပညာရှင် တက်စီတပ်စ်အရ စီ.အီး. ၆၄ တိုင်လေသော် ထိုအမည်သည် ရောမပြည်သူပြည်သားများ သုံးလေ့သုံးထရှိသည့်စကားလုံးဖြစ်ခဲ့သည်။

မိမိ၏သစ္စာရှိသူများကို ယေဟောဝါအသုံးပြု

သတင်းကောင်းသည် အန္တိအုတ်မြို့တွင် လွန်စွာတိုးတက်ခဲ့သည်။ ယေဟောဝါ၏ကောင်းချီးနှင့် ယေရှု၏နောက်လိုက်များ ဇွဲရှိရှိဆက်ဟောပြောခဲ့ခြင်းတို့ကြောင့် အန္တိအုတ်မြို့သည် ပထမရာစုခရစ်ယာန်များ၏ အချက်အချာမြို့ဖြစ်လာခဲ့သည်။ ဘုရားသခင်သည် ဝေးလံသောအရပ်ဒေသများသို့ သတင်းကောင်းပျံ့နှံ့သွားစေရန် ထိုနေရာရှိအသင်းတော်ကို ခြေကန်ခုံအဖြစ် အသုံးပြုခဲ့သည်။ ဥပမာ၊ အန္တိအုတ်မြို့သည် တမန်တော်ပေါလု၏ မြေစမ်းခရမ်းပျိုး ခရစ်ယာန်သာသနာပြုခရီးစဉ်အသီးသီး၏ စတင်ထွက်ခွာရာအရပ်ဖြစ်ခဲ့၏။

မျက်မှောက်ခေတ်အချိန်တွင် ဆန့်ကျင်မှုများကြား ဇွဲနှင့် စိတ်ဓာတ်ကြံ့ခိုင်ခြင်းတို့က စစ်မှန်သောခရစ်ယာန်ဘာသာတရားကို ပျံ့နှံ့သွားစေရာ လူများစွာသည် သတင်းကောင်းကိုကြားနာကြရပြီး ယင်းကိုတန်ဖိုးထားကြောင်း ဖော်ပြနိုင်စေခဲ့ပြီ။ * ထို့ကြောင့် သင်သည် စင်ကြယ်သောဝတ်ပြုရေးကို ထောက်ခံနေသောကြောင့် ဆန့်ကျင်မှုကို ကြုံတွေ့နေရလျှင် ယင်းကို ခွင့်ပြုထားရသည့်အကြောင်းရင်းများ ယေဟောဝါ၌ရှိသည်ကို စွဲမှတ်ထားပါ။ ပထမရာစုတွင်ကဲ့သို့ ယနေ့ လူတို့ကို ဘုရားသခင့်နိုင်ငံတော်အကြောင်း ကြားနာစေပြီး ၎င်းဘက်ရပ်တည်ရန် အခွင့်အရေးပေးရမည်ဖြစ်သည်။ ယေဟောဝါ၏အမှုတော်ကို သစ္စာရှိရှိဆက်၍ထမ်းဆောင်မည်ဟူသော သင်၏သန္နိဋ္ဌာန်သည် တစ်ဦးတစ်ယောက်ကို တိကျမှန်ကန်သော အမှန်တရားအသိပညာရရှိစေရန် လိုအပ်သည့် အထောက်အကူပင်ဖြစ်နေပေမည်။

[အောက်ခြေမှတ်ချက်များ]

^ အပိုဒ်၊ 9 မိုးတိမ်ကင်းစင်သောနေ့တွင် အန္တိအုတ်အနောက်တောင်ဘက်ရှိ ကာစ်စီအဲစ်တောင်ပေါ်မှ ကုပရုကျွန်းကိုမြင်နိုင်၏။

^ အပိုဒ်၊ 18 ၁၉၉၉၊ ဩဂုတ် ၁ ကင်းမျှော်စင်၊ စာမျက်နှာ ၉; ၁၉၉၉၊ ဧပြီ ၂၂ နိုးလော့! စာမျက်နှာ ၂၁-၂ [လိပ်]; ယေဟောဝါသက်သေတို့၏ ၁၉၉၉ နှစ်ချုပ်စာအုပ် စာမျက်နှာ ၂၅၀-၂ [လိပ်] ရှု။

[စာမျက်နှာ ၂၆၊ ၂၇ ပါ လေးထောင့်တွက်/ရုပ်ပုံ]

ရှောလု၏ “တိမ်မြုပ်နေသောနှစ်များ”

စီ.အီး. ၄၅ ခုနှစ်ခန့်က အန္တိအုတ်မြို့သို့ ရှောလုမပြောင်းရွှေ့မီ တမန်တော်ဝတ္ထုတွင် သူ့အကြောင်း နောက်ဆုံးဖော်ပြချက်သည် ယေရုရှလင်မြို့တွင် သူ့ကိုလုပ်ကြံရန်ကြံစည်မှုပျက်ပြားခဲ့ပြီး ယုံကြည်သူချင်းများက တာရှုမြို့သို့ သူ့ကို ပို့ဆောင်ခဲ့ချိန်ဖြစ်သည်။ (တမန်တော် ၉:၂၈-၃၀; ၁၁:၂၅) သို့ရာတွင် ၎င်းသည် အစောပိုင်းကိုးနှစ် စီ.အီး. ၃၆ ခုနှစ်ခန့်ကဖြစ်၏။ ရှောလု၏တိမ်မြုပ်နေသောနှစ်များဟု အမည်ပေးထားသော ထိုအချိန်အတောအတွင်း သူအဘယ်အရာကိုပြုလုပ်ခဲ့သနည်း။

ရှောလုသည် ယေရုရှလင်မြို့မှ ရှုရိပြည်နှင့် ကိလိကိပြည်သို့ ထွက်သွားခဲ့ပြီးနောက် ယုဒပြည်ရှိအသင်းတော်များက “ငါတို့ကိုညှဉ်းဆဲဖူးသောသူသည် အထက်က မိမိဖျက်ဆီးသောယုံကြည်ခြင်းတရားကို ယခုမိမိဟောပြောသည်” ဟုကြားသိခဲ့ကြရသည်။ (ဂလာတိ ၁:၂၁-၂၃) ၎င်းဖော်ပြချက်မှာ အန္တိအုတ်မြို့တွင် ဗာနဗနှင့် ရှောလုလုပ်ဆောင်ခဲ့သောအမှုကို ရည်ညွှန်းနေမည်ဖြစ်သော်လည်း ထိုအချိန်မတိုင်မီကလည်း သူအချိန်ဖြုန်းခဲ့မည်မဟုတ်သည်ကား သေချာ၏။ စီ.အီး. ၄၉ တိုင်လေသော် ရှုရိပြည်နှင့် ကိလိကိပြည်တို့တွင် အသင်းတော်များစွာရှိနေပြီဖြစ်သည်။ အသင်းတော်တစ်ခုသည် အန္တိအုတ်မြို့ဖြစ်၏၊ သို့သော် အခြားအသင်းတော်များသည် ရှောလု၏တိမ်မြုပ်နေသောနှစ်များဟု ခေါ်ဆိုကြသည့်အချိန်အတွင်း သူ၏လုပ်ဆောင်မှုများ၏အကျိုးဆက်ဟု အချို့ကထင်မှတ်ကြသည်။—တမန်တော် ၁၁:၂၆; ၁၅:၂၃၊ ၄၁။

ရှောလု၏အသက်တာ၌ ထူးခြားသောအဖြစ်အပျက်များသည် တစ်ချိန်တည်းတွင်ဖြစ်မည်ဟု ကျမ်းပညာရှင်အချို့က ယုံကြည်ကြသည်။ ‘ခရစ်တော်၏အမှုဆောင်’ တစ်ဦးအနေနှင့် ကြုံတွေ့ ခဲ့ရသောအခက်အခဲများစွာကို သူ၏ခရစ်ယာန်သာသနာပြုလုပ်ငန်းချိန်အတွင်း အချိန်နှင့်နေရာသတ်မှတ်ရန် ခက်ခဲပါသည်။ (၂ ကောရိန္သု ၁၁:၂၃-၂၇) ရှောလုသည် မည်သည့်အချိန်တွင် ဂျူးတို့လက်တွင် ငါးကြိမ်တိုင် ၃၉ ချက်အရိုက်ခံခဲ့ရသနည်း။ အဘယ်နေရာတွင် ကြိမ်လုံးဖြင့် သုံးကြိမ်အရိုက်ခံခဲ့ရသနည်း။ အဘယ်နေရာတွင် ‘အကြိမ်ကြိမ်’ အကျဉ်းချခံခဲ့ရသနည်း။ နောက်ပိုင်း၌ ရောမတွင် သူအကျဉ်းချခံခဲ့ရသည်။ သူသည် ဖိလိပ္ပိမြို့တွင် တစ်ကြိမ်အရိုက်ခံရပြီး ထောင်ချခံခဲ့ရသည့် မှတ်တမ်းရှိသည်။ သို့ရာတွင် အခြားအဖြစ်အပျက်များကော အသို့နည်း။ (တမန်တော် ၁၆:၂၂၊ ၂၃) ၎င်းအချိန်အတွင်း ရှောလုသည် “ဘာသာရေးအာဏာပိုင်များနှင့် မြို့ပြအာဏာပိုင်များက ညှဉ်းပန်းကြရသည့်အထိ ဒိုင်အာစပေါရားနယ်ရှိ တရားဇရပ်များတွင် ခရစ်တော်အကြောင်း သက်သေခံနေသည်” ဟုစာရေးဆရာတစ်ဦးက ဖော်ပြသည်။

ရှောလုသည် သင်္ဘောပျက်ခြင်းကို သုံးကြိမ်ကြုံတွေ့ခဲ့ရသော်လည်း ကောရိန္သုမြို့သားများထံ စာရေး၍ သူ၏အခက်အခဲတစ်ခုချင်းစီကို ဖော်ပြပြီးနောက်မှဖြစ်ပျက်သည့် သင်္ဘောပျက်ခြင်းတစ်ခုအကြောင်းကိုသာ သမ္မာကျမ်းစာက အသေးစိတ်ဖော်ပြသည်။ (တမန်တော် ၂၇:၂၇-၄၄) ထို့ကြောင့် အခြားသုံးခုသည် ကျွန်ုပ်တို့လုံးဝမသိရသော ရေကြောင်းခရီးစဉ်များအတွင်း ဖြစ်ပျက်ခဲ့ဖွယ်ရှိသည်။ အဆိုပါအဖြစ်အပျက်တစ်ခုခု သို့မဟုတ် အားလုံးသည် “တိမ်မြုပ်နေသောနှစ်များ” အတွင်းဖြစ်ပျက်ခဲ့လျှင် ယုဒပြည်သို့ သတင်းပြန်ရောက်ဖို့မှာ အံ့ဩစရာမဟုတ်ပါ!

ထိုအချိန်တွင်ဖြစ်ပျက်ခဲ့ပုံရှိသည့် နောက်အဖြစ်အပျက်တစ်ခုကို ၂ ကောရိန္သု ၁၂:၂-၅ တွင်ဖော်ပြထားသည်။ ‘တစ်ဆယ့်လေးနှစ်အထက်က ခရစ်တော်၏တပည့်ဖြစ်သော လူတစ်ယောက်ကို တတိယကောင်းကင်၊ ပရဒိသုဘုံသို့ ချီဆောင်၍ လူမပြောအပ် မပြောနိုင်သောစကားကို ကြားစေခဲ့ကြောင်း ငါသိ၏’ ဟူ၍ရှောလုဆိုခဲ့သည်။ ရှောလုသည် သူ့အကြောင်းကို ပြောပြနေပုံရှိသည်။ ၎င်းကို စီ.အီး. ၅၅ ခုနှစ်ခန့်က သူရေးခဲ့သဖြင့် ထိုနှစ်မတိုင်မီ ၁၄ နှစ်သည် “တိမ်မြုပ်နေသောနှစ်များ” အလယ် စီ.အီး. ၄၁ တွင်ဖြစ်ပေလိမ့်မည်။

ထိုအဆင်းအာရုံက ရှောလုကို ထူးခြားသောထိုးထွင်းသိမြင်မှု အမှန်ရရှိစေခဲ့မည်။ သူ့ကို “တစ်ပါးအမျိုးသားတို့နှင့်ဆိုင်သောတမန်တော်” ဖြစ်စေဖို့အတွက်လော။ (ရောမ ၁၁:၁၃) ၎င်းက နောက်ပိုင်းတွင် သူ၏တွေးတော၊ ရေးသားပုံနှင့် စကားပြောဆိုပုံတို့ကို အကျိုးသက်ရောက်ခဲ့သလော။ ရှောလု ဘာသာပြောင်းပြီး အန္တိအုတ်မြို့သို့ သူ့ကိုခေါ်လိုက်သည့် ကြားနှစ်များအတွင်းအဖြစ်အပျက်တို့က အနာဂတ်တွင် သူထမ်းဆောင်ရမည့်တာဝန်များအတွက် သူ့ကို လေ့ကျင့်ပေးပြီး ရင့်ကျက်စေခဲ့သလော။ ဤမေးခွန်းများ၏အဖြေများသည် မည်သို့ပင်ဖြစ်ပါစေ၊ အန္တိအုတ်မြို့တွင် ဟောပြောခြင်းလုပ်ငန်း၌ ဝိုင်းဝန်းကူညီဦးဆောင်ရန် ရှောလုကို ဗာနဗခေါ်လိုက်သည့်အချိန်တွင် ဇွဲလုံ့လရှိသောရှောလုသည် တာဝန်ကျေပွန်မည့်သူဖြစ်ရန် အရည်အချင်းအပြည့်ရှိသူဖြစ်သည်။—တမန်တော် ၁၁:၁၉-၂၆။

[စာမျက်နှာ ၂၅ ပါ မြေပုံ]

(ကားချက်အပြည့်အစုံကို စာစောင်တွင်ကြည့်ပါ)

ရှုရိ

အော့ရာန်တီဇ်

န္တိအုတ်

စလူးရှာ

အကုပရုပြည်

မြေထဲပင်လယ်

ယေရုရှလင်

[Credit Line]

[စာမျက်နှာ ၂၄ ပါ ရုပ်ပုံ]

အပေါ်– မျက်မှောက်ခေတ် အန္တိအုတ်မြို့

အလယ်– စလူးရှာ၏တောင်ပိုင်းမြင်ကွင်း

အောက်– စလူးရှာ၏ဆိပ်ကမ်းတံတိုင်း

ကင်းမျှော်စင်—လေ့လာရန် စာစောင်