“ဉာဏ်ပညာ​သည် ကျိုးနွံ​သူတို့နှင့်​ရှိ၏”

“သင်၏​ဘုရားသခင့်​ရှေ့တော်၌ နှိမ့်ချ [“ကျိုးနွံ”၊ က​ဘ] သော​စိတ်​နှင့်​ကျင့်​နေခြင်း​မှတစ်ပါး​အဘယ်​ပူဇော်​သကာ​ကို ထာဝရ​ဘုရား​တောင်း​တော်​မူ​သနည်း။”—မိက္ခာ ၆:၈။

၁၊ ၂။ ကျိုးနွံ​ခြင်း​ကား​အဘယ်နည်း၊ ရောင့်တက်ခြင်း​နှင့် မည်သို့​ကွာခြား​သနည်း။

ထင်ရှားသော​ပုဂ္ဂိုလ် တမန်​တော်​တစ်ပါး​သည် မိမိ​ထံ​အာရုံ​စူးစိုက်​ရန်​မပြု။ ရဲရင့်​သော​ဣသရေလ​တရားသူကြီး​တစ်ဦး​က သူ့ကိုယ်သူ အဖ​၏​အိမ်ထောင်​၌ အငယ်ဆုံး​သော​သူ​ဟု ခေါ်ဆို​သည်။ အသက်ရှင်ခဲ့သမျှ​တွင် အကြီးမြတ်ဆုံး​လူသားက မိမိ​၌ အတိုင်းအဆ​မရှိ​တန်ခိုး​အာဏာ မရှိကြောင်း ဝန်ခံ​သည်။ ဤ​ပုဂ္ဂိုလ်​အသီးသီး​တို့သည် ကျိုးနွံ​ခြင်း​ကို တင်ပြ​ကြသည်။

^၂ ကျိုးနွံ​ခြင်း​သည် ရောင့်တက်ခြင်း​၏ ဆန့်ကျင်ဘက်​ဖြစ်သည်။ ကျိုးနွံ​သူသည် မိမိ၏​အရည်အချင်းများ​နှင့် အရည်အသွေးကို အလွန်အကျွံ​မထင်​ဘဲ အထင်ကြီး​လွန်း​ခြင်း သို့​မဟုတ် ပ​လွှား​ဝ​င့်​ဝါ​ခြင်း​မရှိပါ။ ကျိုးနွံ​သူသည် မာန​ထောင်လွှား၊ ဝါကြွား၊ ရည်မှန်းချက်​ကြီး​မည့်​အစား မိမိ၏​ကန့်သတ်မှု​များ​ကို အမြဲ​သိရှိ​သည်။ ထို့​ကြောင့် သူသည် အခြားသူများ​၏​ခံစားချက်​များနှင့် ရှုမြင်ပုံ​များ​ကို လေး​စား၍ ထိုက်​သင့်​စွာ ထောက်ထား​စာနာ​တတ်​သည်။

၃။ ဉာဏ်ပညာ​သည် အဘယ်​နည်းဖြင့် ‘ကျိုးနွံ​သူတို့၌’ ရှိ​သနည်း။

^၃ အကြောင်းကောင်း​ဖြင့် ကျမ်းစာ​က​ဤသို့​ဖော်ပြ​သည်– “ဉာဏ်ပညာ​သည် ကျိုးနွံ​သူတို့နှင့်​ရှိ၏။” (သု. ၁၁:၂၊ က​ဘ) ကျိုးနွံ​သူသည် ဘုရားသခင်​နှစ်သက်သော​လမ်းစဉ်​ကို​လိုက်လျှောက်​ကာ အရှက်ကွဲ​စေ​တတ်သော ရောင့်တက်​သည့်​စိတ်​ကို ရှောင်ကြဉ်​သောကြောင့် ပညာရှိ​သည်။ (သု. ၈:၁၃; ၁ ပေတရု ၅:၅) ကျိုးနွံ​ခြင်း​၏​ဉာဏ်​ပညာရှိ​ပုံ​ကို ဘုရားသခင့်​ကျေးကျွန် အတော်များများ​၏ ဘဝ​လမ်းစဉ်​က ထောက်ခံ​သည်။ အဖွင့်​စာပိုဒ်​၌​ဖော်ပြ​ထားသော ပုံ​နမူနာ​သုံးခု​ကို သုံးသပ်ကြည့်​ကြ​စို့။

ပေါလု—“အစေအပါ” တစ်ဦး​နှင့် “ဘဏ္ဍာစိုး” တစ်ဦး

၄။ အဘယ်​ထူးခြားသော​အခွင့်ထူး​များ​ကို ပေါလု​ခံစား​ခဲ့​ရသနည်း။

^၄ ပေါလု​သည် အစောပိုင်း​ခရစ်ယာန်​များ​အကြား​၌ ပေါ်လွင်သူ​တစ်ဦး​ဖြစ်​ပြီး ထိုသို့​ဖြစ်​ရခြင်း​ကို နားလည်​နိုင်​ပါ​သည်။ သူသည် အမှုတော်​ဆောင်​ချိန်​အတောအတွင်း မိုင်​ပေါင်း​ထောင်ချီ​၍ ပင်လယ်​ခရီး၊ ကုန်း​ကြောင်း​ခရီး​သွားခဲ့​ပြီး အသင်းတော်များ​စွာ​ကို တည်ထောင်​ခဲ့​သည်။ ထို့​အပြင် ယေဟောဝါ​သည် ပေါလု​ကို အဆင်း​အာရုံများ​မြင်​စေပြီး နိုင်ငံ​ခြား​ဘာသာ​စကား​များ ပြောဆို​နိုင်​သည့်​စွမ်းရည်​ဖြင့် ကောင်းချီး​ပေး​ခဲ့​သည်။ (၁ ကောရိန္သု ၁၄:၁၈; ၂ ကောရိန္သု ၁၂:၁-၅) ကိုယ်တော်​သည် ယခု ခရစ်ယာန်​ဂရိ​ကျမ်း​စာစောင်​များ​တွင်​ပါဝင်​သည့် စာ ၁၄ စောင်​ကို ရေးသား​ရန်​လည်း ပေါလု​အား ဝိညာဉ်​တော်​မှုတ်သွင်း​ခဲ့​သည်။ ပေါလု​၏​ကြိုးစား​အားထုတ်မှု​များသည် အခြား​တမန်​တော်​အားလုံး​၏ လုပ်ဆောင်ချက်များ​ထက် သာလွန်​သည်​ဟု ဆိုနိုင်​သည်​မှာ​ထင်ရှား​၏။—၁ ကောရိန္သု ၁၅:၁၀။

၅။ ပေါလု​သည် မိမိကိုယ်ကို ကျိုးနွံ​စွာ​မြင်တတ်​ကြောင်း မည်သို့​တင်ပြ​ခဲ့​သနည်း။

^၅ ပေါလု​သည် ခရစ်ယာန်​လုပ်ငန်း​၏​ရှေ့တန်း​တွင် ရှိနေ​ခဲ့​ခြင်း​ကြောင့် သူသည် လူအများ​၏​အာရုံစိုက်မှု​၌ ပျော်မွေ့​နေ​မည်၊ အာဏာပြ​နေ​မည်​ဟူ၍ပင် အချို့​က​ယူမှတ်​ကြ​ပေမည်။ သို့သော် ပေါလု​သည် ကျိုးနွံ​သောကြောင့် ထိုသို့​မပြု​ခဲ့​ချေ။ သူသည် မိမိကိုယ်ကို “အညံ့​ဆုံးသော​တမန်​တော်” ဟု​ခေါ်ဆို​ခဲ့​ပြီး ဤသို့​ထပ်လောင်း​ပြောဆို​သည်– “ငါသည် အထက်​က ဘုရားသခင်​၏​အသင်းတော်ကို​ညှဉ်းဆဲ​သောကြောင့်၊ . . . တမန်​တော်​ဟု​ခေါ်ဝေါ်​ခြင်း​ကို​မခံထိုက်။”  (၁ ကောရိန္သု ၁၅:၉) ပေါလု​သည် ခရစ်ယာန်​များ​ကို နှိပ်စက်​ညှဉ်းပန်း​ခဲ့​သူ​တစ်ဦး​အနေ​နှင့် လုပ်ငန်းတော်​ဆိုင်ရာ​အခွင့်ထူး​များ​ကို ခံစား​ရဖို့​မဆို​ထား​နှင့် ဘုရားသခင်​နှင့်​ဆက်ဆံခွင့်​ရှိခြင်းမှာ မခံစားထိုက်သော ကရုဏာတော် ကြင်နာ​မှု​ကြောင့်​သာ​ဖြစ်​ကြောင်း သူ​တစ်ခါမျှ​မမေ့​ခဲ့​ပါ။ (ယောဟန် ၆:၄၄; ဧဖက် ၂:၈) ထို့​ကြောင့် ပေါလု​သည် အမှုတော်​ဆောင်​ရာ​တွင် ထူးကဲ​စွာ​ပြီးမြောက်​အောင်မြင်​ခဲ့​သောကြောင့် သူတစ်ပါး​ထက်သာ​လွန်​သည်​ဟု မယူမှတ်​ခဲ့​ပါ။—၁ ကောရိန္သု ၉:၁၆။

၆။ ပေါလု​သည် ကောရိန္သု​မြို့သား​များနှင့်​ဆက်ဆံ​ရာ​တွင် ကျိုးနွံ​ခြင်း​ကို မည်သို့​တင်ပြ​ခဲ့​သနည်း။

^၆ ပေါလု​၏​ကျိုးနွံ​ခြင်း​သည် ကောရိန္သု​မြို့သား​များနှင့်​ဆက်ဆံ​ရာ​၌ အထူးသဖြင့်​ပေါ်လွင်​သည်။ သူတို့​ထဲ​မှ အချို့​သူတို့သည် အာပေါလု၊ ကေဖ​နှင့် ပေါလု​ကိုယ်တိုင်​ပင် အပါအဝင် ပေါ်လွင်​သော​ဦးစီး​ကြီးကြပ်မှူး​များ​ဟု သူတို့​ယူမှတ်​ထား​ကြ​သူတို့ကို စွဲလမ်း​နေကြ​သည်​မှာ ထင်ရှား​သည်။ (၁ ကောရိန္သု ၁:၁၁-၁၅) သို့သော် ပေါလု​သည် ကောရိန္သု​မြို့သား​များ​၏​ချီးမွမ်းမှု​ကို တောင်းခံ​ခြင်း​သော်လည်း​ကောင်း၊ သူတို့၏​လေးစား​ကြည်ညို​မှု​ကို အမြတ်​ထုတ်ခြင်း​သော်လည်း​ကောင်း မပြု​ခဲ့​ပါ။ သူတို့​ထံ​လည်ပတ်​သောအခါ သူသည် မိမိကိုယ်ကို “ထူးမြတ်​သော​စကား​နှင့် ထူးမြတ်​သော​ပညာ” ဖြင့် မိတ်​မ​ဆက်​ခဲ့​ပါ။ ယင်းအစား၊ ပေါလု​သည် မိမိ​ကိုယ်တိုင်​နှင့် မိမိ၏​အပေါင်းပါများ​နှင့်​ပတ်သက်​၍ ဤသို့​ဆို​ခဲ့​သည်– “ခရစ်တော်​၏ အစေအပါ​ကဲ့သို့​လည်းကောင်း၊ ဘုရားသခင်​၏ နက်နဲ​သော​အရာ​တို့ကို​စောင့်​သော ဘဏ္ဍာစိုး​ကဲ့သို့​လည်းကောင်း သူတစ်ပါး​သည် ငါ​တို့ကို​မှတ်​ပါစေ။” *—၁ ကောရိန္သု ၂:၁-၅; ၄:၁။

၇။ ပေါလု​သည် သွန်သင်မှု​ပေး​သည့်​အခါ​၌​ပင် ကျိုးနွံ​ခြင်း​ကို မည်သို့​တင်ပြ​ခဲ့​သနည်း။

^၇ ပေါလု​သည် ပြင်းထန်​သည့်​ဆုံးမမှု​နှင့် ညွှန်ကြားမှု​ပေး​ခဲ့​ရသည့်​အခါ​၌​ပင် ကျိုးနွံ​ခြင်း​ကို​တင်ပြ​ခဲ့​သည်။ သူသည် ခရစ်ယာန်​ချင်း​များ​ကို မိမိ၏​တမန်​တော်​အခွင့်အာဏာ အရှိန်အဝါ​အားဖြင့်​မဟုတ်ဘဲ “ဘုရားသခင်​၏​ကရုဏာတော် [ကြင်နာ​မှု] ကို ထောက်ထား” ၍ “မေတ္တာ​အားဖြင့်” တောင်းပန်​ခဲ့​သည်။ (ရောမ ၁၂:၁၊ ၂; ဖိလေမုန် ၈၊ ၉) ပေါလု​သည် ဤသို့​အဘယ်ကြောင့် ပြု​ခဲ့​သနည်း။ အကြောင်း​မှာ မိမိကိုယ်ကို ‘သူတို့၏​ယုံကြည်ခြင်းကို​အစိုးရ’ သူ​တစ်ဦး​ကဲ့သို့​မဟုတ်ဘဲ ညီအစ်ကို​များ​၏ ‘လုပ်ဖော်ဆောင်ဖက်​ချင်း’ တစ်ဦး​အဖြစ် အမှန်ပင်​ရှုမြင်ခဲ့​သောကြောင့်​ဖြစ်၏။ (၂ ကောရိန္သု ၁:၂၄) ပထမ​ရာစု​ခရစ်ယာန်​အသင်းတော်က ပေါလု​ကို အထူး​ချစ်​မြတ်နိုး​ခဲ့​ကြ​ခြင်း​မှာ သူ၏​ကျိုးနွံ​မှု​ကြောင့် အမှန်​ဖြစ်​ပေမည်။—တမန်​တော် ၂၀:၃၆-၃၈။

 ကျွန်ုပ်​တို့၏​အခွင့်ထူး​များ​ကို ကျိုးနွံ​စွာ​ရှုမြင်ခြင်း

၈၊ ၉။ (က) ကျွန်ုပ်​တို့သည် မိမိတို့​ကိုယ်ကို ကျိုးနွံ​သည့်​အမြင် အဘယ်ကြောင့်​ရှိ​သင့်​သနည်း။ (ခ) တာဝန်​အတော်အတန်​ရရှိ​ထား​သူတို့သည် ကျိုးနွံ​ခြင်း​ကို မည်သို့​တင်ပြ​နိုင်​ကြ​သနည်း။

^၈ ပေါလု​သည် မျက်မှောက်ခေတ်​ခရစ်ယာန်​များ​အတွက် ကောင်းသော​ပုံသက်သေ​တစ်ခု​ချမှတ်​ခဲ့​သည်။ ကျွန်ုပ်​တို့သည် မည်သည့်​တာဝန်​များ အပ်နှင်း​ခံရ​သည်​ဖြစ်ပါစေ အခြားသူများ​ထက် မိမိ​သာလွန်​သည်​ဟု မည်သူမျှ​မယူမှတ်​သင့်​ချေ။ ပေါလု​က “အကြင်သူသည် ဘာမျှ​မဟုတ်ဘဲ​လျက်၊ ဤမျှ​လောက်​ငါ​ဖြစ်သည်ဟု​စိတ်ထင်​လျှင်၊ ထို​သူသည် ကိုယ်ကို​လှည့်ဖြား​သော​သူ​ဖြစ်၏။” (ဂလာတိ ၆:၃) အဘယ်ကြောင့်​နည်း။ အကြောင်း​မှာ “လူအပေါင်း​တို့သည် [အပြစ်]ကို​ပြု​၍ ဘုရားသခင့်​ရှေ့တော်၌ အသရေပျက်​ကြပြီ။” (ရောမ ၃:၂၃; ၅:၁၂) မှန်ပါသည်၊ ကျွန်ုပ်​တို့အားလုံး​သည် အာဒံ​ထံ​မှ မစုံလင်မှု​နှင့် သေခြင်းကို​အမွေခံ​ခဲ့​ကြ​ကြောင်း ဘယ်​သောအခါ​မျှ​မမေ့​သင့်​ပေ။ အထူး​အခွင့်အရေး​များ​က ကျွန်ုပ်​တို့၏ အပြစ်ရှိ​သော​နိမ့်ကျ​သည့်​အခြေအနေ​မှ ကျွန်ုပ်​တို့ကို​မြှင့်တင်​မပေး​ပါ။ (ဒေ. ၉:၂) ပေါလု​၏​အဖြစ်​တွင်​ကဲ့သို့​ပင် လူသားများ​သည် အခွင့်ထူး​အရာ​၌ ကိုယ်တော့်​အမှုထမ်း​ဖို့​မဆို​ထား​နှင့် ဘုရားသခင်​နှင့်​ဆက်ဆံ​ရေး​ရှိ​နိုင်​ခြင်း​မှာ မခံစားထိုက်သော ကရုဏာတော် [ကြင်နာ​မှု] ကြောင့်​သာ​ဖြစ်သည်။—ရောမ ၃:၁၂၊ ၂၄။

^၉ ယင်းကို​သိရှိနားလည်​လျက် ကျိုးနွံ​သူ​တစ်ဦး​သည် မိမိ၏​အခွင့်ထူး​များ​အပေါ် အ​ကြည်​ဆိုက်​နေခြင်း​သော်လည်း​ကောင်း မိမိ၏​ပြီးမြောက်​အောင်မြင်မှု​များ​ကို ဝါကြွားခြင်း​သော်လည်း​ကောင်း မပြု​ပါ။ (၁ ကောရိန္သု ၄:၇) သွန်သင်ချက် သို့​မဟုတ် ညွှန်ကြားချက်​ပေး​သည့်​အခါ သခင်​တစ်ဦး​ကဲ့သို့​မဟုတ်ဘဲ လုပ်ဖော်ဆောင်ဖက်​ချင်း​အဖြစ်​ပေး​သည်။ လုပ်ငန်း​တာဝန်​အချို့​ကို ထူးချွန်​စွာ​ဆောင်ရွက်​နိုင်​သူ​တစ်ဦး​သည် ယုံကြည်သူချင်း​တို့၏ ချီးမွမ်းမှု​ကို​တောင်းခံ​ခြင်း၊ သို့​မဟုတ် သူတို့၏​လေးစား​ကြည်ညို​မှု​ကို အမြတ်​ထုတ်ခြင်း​သည် တကယ်​မှား​ပေမည်။ (သု. ၂၅:၂၇; မဿဲ ၆:၂-၄) တန်ဖိုး​ရှိသည့်​တစ်ခု​တည်း​သော​ချီးမွမ်းမှု​သည် အခြားသူများ​ထံ​မှ​လာ​ကာ ၎င်းကို​မ​တောင်းခံ​ဘဲ​ရခြင်း​ဖြစ်​သင့်​သည်။ ထိုသို့​ချီးမွမ်း​ခံရ​လျှင်​လည်း ယင်းကြောင့် မိမိတို့​ကိုယ်ကို ထင်​သင့်​သည်ထက် လွန်​၍​မထင်​စေ​သင့်​ပါ။—သု. ၂၇:၂; ရောမ ၁၂:၃။

၁၀။ နိမ့်ကျ​သည်​ဟု​ထင်​ရသူ​အချို့​သည် အမှန်​အားဖြင့် “ယုံကြည်ခြင်း​နှင့်​ကြွယ်ဝ” နေနိုင်ပုံ​ကို ရှင်းပြပါ။

^၁၀ တာဝန်​အတော်အတန် အပ်နှင်း​ခံရသော​အခါ ကျွန်ုပ်​တို့၏​ကြိုးပမ်းမှု​များနှင့် အရည်အချင်းများ​ကြောင့်​သာ​လျှင် အသင်းတော်​တိုးတက်​နေသည်​ဟူသော အမြင်မျိုး​ရှိ​ခြင်း​ငှာ မိမိတို့​ကိုယ်ကို​အလွန်အကျွံ အရေးပေး​ခြင်း​ကို​ရှောင်ရန် ကျိုးနွံ​ခြင်း​က ထောက်ကူ​ပေး​ပါ​လိမ့်​မည်။ ဥပမာ၊ ကျွန်ုပ်​တို့သည် သွန်သင်ခြင်း​၌ အလွန်​ထူးချွန်​ပေမည်။ (ဧဖက် ၄:၁၁၊ ၁၂) သို့သော် ကျိုးနွံ​စိတ်ဖြင့် ကျွန်ုပ်​တို့​အသိအမှတ်ပြု​ရမည်​ကား အသင်းတော်​အစည်းအဝေး​၌ သင်ယူ​ခဲ့​ရသော အကြီးမားဆုံး​သင်ခန်းစာ​အချို့​မှာ စင်မြင့်​ပေါ်​မှ​မဟုတ်​ကြောင်း​ဖြစ်သည်။ သာဓက​အနေ​နှင့် မိမိ၏​သားသမီး​များ​ကို​ခေါ်ဆောင်​ကာ ဘုရားသခင့်​နိုင်ငံတော်​ခန်းမ​သို့ မှန်မှန်​လာ​သည့် ကြင်ဖော်​မဲ့​မိဘ​တစ်ဦး၊ သို့​မဟုတ် မထိုက်မတန်​ဟု အမြဲလိုလို​ခံစားရ​သည့်​ကြား​မှ အစည်းအဝေး​များ​ကို သစ္စာရှိ​ရှိလာ​တက်​သည့် စိတ်ဓာတ်ကျ​သူ၊ သို့​မဟုတ် ကျောင်း​နှင့် အခြား​နေရာများ​တွင် မကောင်း​သည့်​သြဇာလွှမ်း​မိုး​မှုများ ခံ​နေရ​သည့်​ကြား​မှ ဝိညာဉ်​ရေး​ဘက် မှန်မှန်​တိုးတက်​နေသည့် လူငယ်​ကို သင်​မြင်​သောအခါ အားပေး​မခံရ​ပေ​လော။ (ဆာလံ ၈၄:၁၀) ဤ​သူတို့သည် လူတို့၏​အာရုံ​စူးစိုက်​မှု​အောက် ရှိ​ချင်​မှ​ရှိ​မည်။ သူတို့​ရင်ဆိုင်​ရသော သမာဓိ​စောင့်သိ​ခြင်း စမ်းသပ်မှု​များ​ကို အများအားဖြင့် အခြားသူများ​သတိ​မပြုမိ​ကြ​ပါ။ သို့​တိုင် ပို​၍​ပေါ်လွင်သူ​များ​ကဲ့သို့​ပင် သူတို့သည် “ယုံကြည်ခြင်း​နှင့်​ကြွယ်ဝ” နေကြ​ပေမည်။ (ယာကုပ် ၂:၅၊ က​ဘ) အမှန်​မှာ၊ သစ္စာရှိ​ခြင်း​က နောက်ဆုံး​တွင် ယေဟောဝါ​၏​မျက်နှာသာတော်​ရစေသည်။—မဿဲ ၁၀:၂၂; ၁ ကောရိန္သု ၄:၂။

ဂိဒေါင်—သူ့​ဖခင်​၏​အိမ်ထောင်​၌ “အငယ်ဆုံး” သော​သူ

၁၁။ ဂိဒေါင်​သည် ဘုရားသခင့်​ကောင်းကင်တမန်​နှင့် စကားပြော​ဆို​ရာ​၌ ကျိုးနွံ​ခြင်း​ကို အဘယ်​နည်းဖြင့်​တင်ပြ​ခဲ့​သနည်း။

^၁၁ မနာရှေ​အမျိုး​မှ ခွန်အား​ကြီးသော​လူရွယ် ဂိဒေါင်​သည် ဣသရေလလူ​တို့၏​သမိုင်း​တွင် ကသောင်းကနင်း​ဖြစ်နေ​ချိန်​အတွင်း အသက်ရှင်ခဲ့​သည်။ ဘုရားသခင့်​လူမျိုးတော်သည် မိဒျန်​လူ​တို့​လက်​တွင် ခု​နစ်​နှစ်​ဆင်းရဲခံ​ခဲ့​ကြ​ရ၏။ သို့သော် မိမိ၏​လူမျိုးတော်ကို​ကယ်လွှတ်​ရန် ယခု အချိန်တိုင်​လေ​ပြီ။ ထို့​ကြောင့် ကောင်းကင်တမန်​တစ်ပါး​သည် ဂိဒေါင်​ထံ​သို့ ကိုယ်​ထင်ရှားပြ​၍ ဤသို့​ဆို​ခဲ့​သည်– “ရဲစွမ်းသတ္တိ​ရှိသော အချင်း​သူ​ရဲ၊ ထာဝရ​ဘုရား​သည် သင်​နှင့်အတူ​ရှိ​တော်​မူ​၏။” ဂိဒေါင်​သည် ကျိုးနွံ​စိတ်​ရှိသောကြောင့် မမျှော်လင့်​သော ဤ​ဂုဏ်ပြု​ချီးမွမ်း​စကား​ကြောင့် ပီတိ​ဖြစ်​မနေ​ပါ။ ယင်းအစား ကောင်းကင်တမန်​ကို လေးစား​စွာ ဤသို့​ပြော​ခဲ့​သည်– “အို​အရှင်၊ ထာဝရ​ဘုရား​သည် အကျွန်ုပ်​တို့​နှင့် အတူ​ရှိ​တော်​မူ​သည်​မှန်​လျှင်၊ အဘယ်ကြောင့်​ဤ​အမှု​ကြီး ရောက်​ရ​ပါ​သနည်း။” ကောင်းကင်တမန်​သည် ကိစ္စရပ်​များ​ကို​ရှင်းပြ​ကာ ဂိဒေါင်​ကို​ဤသို့​ပြော​ခဲ့​သည်– “ဣသရေလလူ​တို့ကို၊ မိဒျန်​လူ​တို့​လက်​မှ​ကယ်လွှတ်​လော့။” ဂိဒေါင် မည်သို့​တုံ့ပြန်​ခဲ့​သနည်း။  အမျိုးသား​အာဇာနည်​ဖြစ်​ဖို့ အခွင့်အရေး​ယူပြီး တာဝန်​ကို မက်မော​စွာ လက်ခံ​လိုက်​မည့်​အစား ဂိဒေါင်​က ဤသို့​ဖြေဆိုခဲ့သည်– “အို​အရှင်၊ အကျွန်ုပ်သည် ဣသရေလလူ​တို့ကို အဘယ်​သို့​ကယ်လွှတ်​နိုင်​ပါ​မည်​နည်း။ အကျွန်ုပ်​အဆွေအမျိုး​သည် မနာရှေ​အနွယ်​၌ အဆင်း​ရဲ​ဆုံး​ဖြစ်ပါ​၏။ အကျွန်ုပ်သည်​လည်း၊ အဘ​အိမ်ထောင်​၌ အငယ်ဆုံး၊ အညံ့​ဆုံးသော​သူ​ဖြစ်ပါ​၏။” တကယ်​ကျိုးနွံ​ခြင်း​ပါ​တကား!—တရားသူကြီး ၆:၁၁-၁၅၊ သမ္မာ။

၁၂။ ဂိဒေါင်​သည် သူ၏​တာဝန်​ကို​ထမ်းဆောင်​ရာ​၌ ပညာသတိ​ရှိ​ခြင်း​ကို မည်သို့​တင်ပြ​ခဲ့​သနည်း။

^၁၂ ယေဟောဝါ​သည် ဂိဒေါင်​ကို တိုက်ပွဲ​သို့​မစေလွှတ်မီ စမ်းသပ်​ခဲ့​၏။ မည်သို့​အားဖြင့်​နည်း။ ဂိဒေါင်​သည် သူ့​ဖခင်​တည်​သော ဗာလ​ဘုရား​၏​ယဇ်ပလ္လင်ကို​ဖြိုဖျက်​၍ ယဇ်​ပလ္လင်​အနား​ရှိ အာရှရပင်ကိုခုတ်လှဲ​ရန် မှာကြား​ခံ​ခဲ့​ရသည်။ ဤ​တာဝန်​ကို​ဆောင်ရွက်ဖို့ သတ္တိ​ရှိ​ရမည့်​အပြင် တာဝန်​ကို​ဆောင်ရွက်​ရာ​၌ ဂိဒေါင်​သည် ကျိုးနွံ​ခြင်း​နှင့် ပညာသတိ​ရှိ​ခြင်း​ကိုလည်း တင်ပြ​ခဲ့​သည်။ ဂိဒေါင်​သည် လူ​မြင်ကွင်း​တွင်​ပြုလုပ်​မည့်​အစား မည်သူမျှ​အမှု​မထား​နိုင်​မည့် ည​ကို​အကွယ်အကာ​ပြု​၍ ထို​အမှုကို​လုပ်ဆောင်ခဲ့​သည်။ ထို့​ပြင် ဂိဒေါင်​သည် သူ၏​တာဝန်​ကို သတိ​ဝီရိယ​ရှိ​ရှိ​လုံ့လ​ဖြင့် အစပြု​ခဲ့​သည်။ သူ၏​ကျွန်​ဆယ်ဦး​ကို တစ်​ပါ​တည်း​ခေါ်ဆောင်​သွားခဲ့သည်၊ အချို့​သူတို့​ရပ်​စောင့်​စဉ် ကျန်​သူတို့​အကူအညီ​ဖြင့် ယဇ်​ပလ္လင်​နှင့် အာရှရပင်ကိုဖျက်ဆီး​ဖို့​ဖြစ်​နိုင်​သည်။ * မည်သို့​ပင်​ဖြစ်စေ ဂိဒေါင်​သည် ယေဟောဝါ​၏​ကောင်းချီး​ဖြင့် သူ့​တာဝန်​ကို​ဆောင်ရွက်​ခဲ့​ပြီး အချိန်တန်သော် မိဒျန်​လူ​တို့​လက်​မှ ဣသရေလလူ​တို့ကို ကယ်လွှတ်​ရန် ဘုရားသခင်​၏​အသုံးပြုခြင်း​ကို ခံ​ခဲ့​ရသည်။—တရားသူကြီး ၆:၂၅-၂၇။

ကျိုးနွံ​ခြင်း​နှင့် ပညာသတိ​တင်ပြခြင်း

၁၃၊ ၁၄။ (က) လုပ်ငန်းတော်​အခွင့်ထူး​တစ်ခု ပေးအပ်​ခံရသော​အခါ ကျိုးနွံ​ခြင်း​ကို ကျွန်ုပ်​တို့​မည်သို့​တင်ပြ​နိုင်​သနည်း။ (ခ) ညီအစ်ကို အေ. အိပ်ခ်ျ. မက္ခမီလန်​သည် ကျိုးနွံ​ခြင်း​ကို​တင်ပြ​ရာ​၌ ကောင်းသော​ပုံသက်သေ​ကို မည်သို့​တင်ပြ​ခဲ့​သနည်း။

^၁၃ ဂိဒေါင်​၏​ကျိုးနွံ​ခြင်း​မှ ကျွန်ုပ်​တို့​သင်ယူစရာ​များစွာ​ရှိ၏။ ဥပမာ၊ လုပ်ငန်းတော်​အခွင့်ထူး​တစ်ခု ကမ်း​လှမ်း​ခံရသော​အခါ ကျွန်ုပ်​တို့​မည်သို့​တုံ့ပြန်​သနည်း။ ရရှိ​မည့်​ထင်ပေါ်​မှု သို့​မဟုတ် ဂုဏ်​ကို ဦးဆုံး​စဉ်းစား​သလော။ သို့​မဟုတ် တာဝန်​တစ်ခု​၏​တောင်းဆိုချက် များ​ကို ဖြည့်စွက်​နိုင်​မ​နိုင် ကျိုးနွံ​စွာ​ဆုတောင်း​ကာ ဆင်ခြင်​သုံးသပ်​သလော။ ၁၉၆၆ တွင်​မြေကြီး​အသက်တာ ပြီးဆုံး​သွား​သည့် ညီအစ်ကို အေ. အိပ်ခ်ျ. မက္ခမီလန်​သည် ဤ​ကိစ္စ​တွင် ပုံသက်သေ​ကောင်း​ချမှတ်​ခဲ့​သည်။ ကင်းမျှော်စင်​အသင်း​၏ ပထမ​ဥက္ကဋ္ဌ စီ.တီ. ရပ်စဲ​လ်​က မိမိ​မရှိ​ချိန်​၌ လုပ်ငန်းတော်​ကို မည်သူ​တာဝန်​ယူ​မည်​နှင့်​ပတ်သက်​၍ သူ၏​ထင်မြင်ချက်​ကို တစ်ကြိမ်​က​မေးခဲ့​ဖူး​သည်။ ဆက်၍​ဆွေးနွေး​ရာ​၌ သူ​တာဝန်​ယူ​ရန် အတော်ပင်​အဆင်ပြေ​မည်​ဖြစ်သော်လည်း ညီအစ်ကို မက္ခမီလန်​သည် မိမိ​နှင့်​သင့်လျော်​ကြောင်း တစ်ကြိမ်​မျှ​အကြံ​မပြု​ခဲ့​ပါ။ အဆုံး​၌ ညီအစ်ကို​ရပ်စဲ​လ်​က ထို​တာဝန်​ကို​လက်ခံဖို့​စဉ်းစား​ရန် ညီအစ်ကို မက္ခမီလန်​အား​ဖိတ်ခေါ်​ခဲ့​သည်။ နှစ်များ​ကြာပြီးနောက် ညီအစ်ကို မက္ခမီလန်​က​ဤသို့​ရေးသားခဲ့​သည်– “ကျွန်တော်​ကြက်​သေ​သေ​ပြီး​ရပ်နေ​မိတယ်။ နောက်ဆုံး​မှာ သူ့ကို ကျွန်တော်​တတ်နိုင်​သမျှ ထောက်ကူ​ပေး​မယ်​လို့​မပြော​ခင် ဒီ​တာဝန်​ကို​လက်ခံ​ယူဖို့ အလွန်​အလေးအနက်​ထား စဉ်းစား​ပြီး အတော်ကြာကြာ​ဆုတောင်း​ခဲ့တယ်။”

^၁၄ များ​မကြာမီ ညီအစ်ကို​ရပ်စဲ​လ် ကွယ်လွန်​သွားခဲ့​ရာ ကင်းမျှော်စင်​အသင်း​၏ ဥက္ကဋ္ဌ​နေရာမှာ လစ်လပ်​လျက်​ရှိသည်။ ညီအစ်ကို မက္ခမီလန်​သည် ညီအစ်ကို​ရပ်စဲ​လ်​၏ နောက်ဆုံး​ဟောပြောခြင်း ခရီးစဉ်​အတောအတွင်း တာဝန်ခံ​ဖြစ်သော​ကြောင့် ညီအစ်ကို​တစ်ဦး​က သူ့ကို​ဤသို့​ပြော​ခဲ့​သည်– “မက်​ခ်၊ ခင်ဗျား​ကိုယ်တိုင် ဥက္ကဋ္ဌ​နေရာ​ဆက်ခံ​ဖို့ အခွင့်ကောင်း​ရှိနေတယ်။ ခင်ဗျား​ဟာ ညီအစ်ကို​ရပ်စဲ​လ်​မရှိတော့တဲ့​အခါ သူ့ရဲ့​အထူး​ကိုယ်စားလှယ်​ဖြစ်​ခဲ့​တဲ့​အပြင် ခင်ဗျား​ပြော​တဲ့​အတိုင်း​လုပ်ကိုင်​ကြဖို့ ကျွန်တော်​တို့အားလုံး​ကို သူ​မှာ​ထား​တယ်။ အခု သူကတော့​ထွက်ခွာ​သွားခဲ့​ပြီး ဘယ်တော့မှ​ပြန်​မလာ​တော့​ဘူး။ ဆက်​တာဝန်​ယူရ​မယ့်​လူက ခင်ဗျား​ပဲ​ထင်​တယ်။” ညီအစ်ကို မက္ခမီလန်​က ဤသို့​ပြန်​ပြော​ခဲ့​သည်– “ဒီ​ကိစ္စ​ကို အဲဒီနည်းနဲ့​မ​ရှုမြင်​ရ​ဘူး ညီအစ်ကို။ ဒီ​အလုပ်ဟာ သခင်ရဲ့​အလုပ်​ဖြစ်​ပြီး သခင်ရဲ့​အဖွဲ့အစည်း​မှာ ရနိုင်တဲ့​အရာဟာ သင့်တော်တယ်​လို့ သခင်​ယူမှတ်​တဲ့​အရာ​ပဲ​ဖြစ်တယ်; ကျွန်တော်​တော့ ဒီ​အလုပ်ကို​လုပ်နိုင်မှာ​မဟုတ်ဘူးဆိုတာ သေချာတယ်။” ထို့နောက် ညီအစ်ကို မက္ခမီလန်​သည် ထို​အရာ​ကို​ခံယူ​ဖို့ အခြားသူ​တစ်ဦး​အား​ထောက်ခံ​ပေး​ခဲ့​သည်။ ဂိဒေါင်​ကဲ့သို့​ပင် သူ့ကိုယ်သူ ကျိုးနွံ​သော​အမြင်​ဖြင့် ကြည့်မြင်​ခဲ့​ရာ ကျွန်ုပ်​တို့​လည်း ထိုသို့​ကြည့်မြင်​တတ်​သင့်​သည်။

၁၅။ အခြား​သူများကို​ဟောပြောသော​အခါ ပိုင်းခြား​သိမြင်မှု​ကို​အသုံးပြုနိုင်​သော လက်တွေ့ကျ​နည်း​အချို့​ကား​အဘယ်နည်း။

^၁၅ ကျွန်ုပ်​တို့​လည်း မိမိတို့​တာဝန်​ကို ကျိုးနွံ​စွာ​ထမ်းဆောင်​သင့်​သည်။ ဂိဒေါင်​သည် ပညာသတိ​ရှိ၍ မိမိ​အား​ဆန့်ကျင်သူ​တို့ကို မလိုအပ်ဘဲ​လျက် အမျက်မထွက်​စေရန် ကြိုးစား​ခဲ့​သည်။ အလားတူ ကျွန်ုပ်​တို့၏​ဟောပြောခြင်း​လုပ်ငန်း​တွင် သူတစ်ပါးကို​ပြောဆို​ရာ​၌ ကျိုးနွံ​၍ ပညာသတိ​ရှိ​သင့်​သည်။ “မြို့ရိုး​မြို့​ပြ​တို့” နှင့် ‘တွေးဆ​ဆင်ခြင်ခြင်း​များ’ ကို​မှောက်လှန်​သည့် ဝိညာဉ်​ရေး​စစ်ပွဲ​၌ ကျွန်ုပ်​တို့​ပါဝင်​နေကြ​သည်​မှာ မှန်ပါသည်။ (၂ ကောရိန္သု ၁၀:၄၊ ၅) သို့သော် သူတစ်ပါးကို​အထင်အမြင်​သေး​စွာ ပြောဆိုခြင်း၊ သို့​မဟုတ် ကျွန်ုပ်​တို့၏​သတင်းတရား​ကြောင့် စိတ်ထိခိုက်​သွား​စ​ရာ​အကြောင်း မဖြစ်​ပေါ်​စေ​သင့်​ပါ။ ယင်းအစား သူတို့၏​အမြင်ကို​လေးစား​ပြီး နှစ်ဖက်​သဘောတူ​နိုင်​သည့်​အရာ​ကို အလေးအနက်​ဖော်ပြ​ကာ သတင်းကောင်း​၏ အပြုသဘော​ပါ​ကဏ္ဍ​များ​ကို အာရုံစိုက်​သင့်​သည်။—တမန်​တော် ၂၂:၁-၃; ၁ ကောရိန္သု ၉:၂၂; ဗျာဒိတ် ၂၁:၄။

ယေရှု—ကျိုးနွံ​ခြင်း​ဆိုင်ရာ အကောင်းမြတ်ဆုံး​ပုံ​နမူနာ

၁၆။ ယေရှုသည် မိမိ​ကိုယ်တိုင်​နှင့်​ပတ်သက်​၍ ကျိုးနွံ​သည့်​အမြင်​ရှိကြောင်း မည်သို့​တင်ပြ​ခဲ့​သနည်း။

^၁၆ ကျိုးနွံ​ခြင်း​ဆိုင်ရာ အကောင်းဆုံး​ပုံ​နမူနာ​မှာ ယေရှု​ခရစ်​၏​ပုံ​န မူ​နာ​ဖြစ်သည်။ * ကိုယ်တော်​သည် ခမည်းတော်​နှင့် ရင်းနှီးသော​ဆက်ဆံ​ရေး​ရှိ​သော်​ငြား​လည်း အချို့​ကိစ္စရပ်​များ​မှာ မိမိ၏​အခွင့်အာဏာ​နယ်ပယ်​ထက် ကျော်လွန်​ကြောင်း အသိအမှတ်ပြု​ရန် ဝန်မလေး​ခဲ့​ချေ။ (ယောဟန် ၁:၁၄) ဥပမာ၊ ယာကုပ်နှင့် ယောဟန်တို့​၏​မိခင်​က ယေရှု၏​နိုင်ငံတော်​တွင် မိမိ၏​သား​နှစ်ဦး​ကို ကိုယ်တော်​၏​ဘေး​၌ ထိုင်​ခွင့်​တောင်း​သောအခါ ယေရှု​က​ဤသို့​ဆို​ခဲ့​သည်– “ငါ​၏​လက်ယာဘက်၊ လက်ဝဲဘက်​မှာ​ထိုင်​ရသော​အခွင့်​ကို​ကား ငါ​ပေး​ပိုင်​သည်မဟုတ်။” (မဿဲ ၂၀:၂၀-၂၃၊ က​ဘ) အခြား​တစ်ကြိမ်​တွင် ယေရှု​က​အရှိအတိုင်း ဤသို့​ဝန်ခံခဲ့​သည်– “ငါသည် ကိုယ်​အလိုအလျောက် အဘယ်​အမှုကို​မျှ​မပြု​နိုင်။ . . . ငါသည် ကိုယ်​အလို​သို့​မလိုက်၊ ငါ့ကို​စေလွှတ်​တော်​မူ​သော ခမည်းတော်​၏​အလို​သို့​လိုက်​၏။”—ယောဟန် ၅:၃၀; ၁၄:၂၈; ဖိလိပ္ပိ ၂:၅၊ ၆။

၁၇။ ယေရှုသည် အခြားသူ​တို့​နှင့်​ဆက်ဆံ​ရာ​တွင် ကျိုးနွံ​မှု​ကို မည်သို့​တင်ပြ​ခဲ့​သနည်း။

^၁၇ ယေရှုသည် မစုံလင်​သော​လူသားများ​ထက် အရာရာ၌ သာလွန်​တော်​မူ​ပြီး ကိုယ်တော်​၏​ခမည်းတော်၊ ယေဟောဝါ​ထံ​တော်​မှ ပြိုင်ဘက်​ကင်း​သော အခွင့်အာဏာကို ရရှိ​ထား​သည်။ သို့ရာတွင် ယေရှုသည် မိမိ၏​နောက်လိုက်​များနှင့် ဆက်ဆံ​ရာ​၌ ကျိုးနွံ​မှု​ရှိခဲ့​သည်။ ကိုယ်တော်​သည် မိမိ၏​အသိပညာကို အထင်ကြီး​နိုင်​ဖွယ်​နည်းဖြင့် ဖော်ပြ​ကာ သူတစ်ပါးကို မလွှမ်းမိုး​ခဲ့​ပါ။ ကိုယ်တော်​သည် နားလည်​ခံစားမှု​နှင့် စာနာ​ထောက်ထား​မှု​ကို တင်ပြ​ခဲ့​ပြီး​လူတို့၏​လိုအပ်ရာ​များ​ကို ထည့်တွက်​စဉ်းစား​ပေး​ခဲ့​သည်။ (မဿဲ ၁၅:၃၂; ၂၆:၄၀၊ ၄၁; မာကု ၆:၃၁) ထို့​ကြောင့် ယေရှုသည်​စုံလင်​တော်​မူ​သော်လည်း ကိုယ်တော်​သည် စုံလင်မှု​ကို မရ​မ​က​မတောင်းဆို​ခဲ့​ပေ။ တပည့်တော်​များ​ပေးဆက်​နိုင်​သည်ထက် တစ်ခါမျှ ပို​၍​မတောင်းဆို​ခဲ့​ပါ၊ သူတို့​ခံယူ​နိုင်​သည်ထက် သူတို့​အပေါ် တစ်ခါမျှ​ပို​၍​မတင်​ခဲ့​ချေ။ (ယောဟန် ၁၆:၁၂) ထို့​ကြောင့် ကိုယ်တော်​အား စိတ်​လန်းဆန်း​စေ​သူ​အဖြစ် လူအများ​သိရှိခံစား​ခဲ့​ကြ​ရသည်မှာ အံ့အားသင့်​စ​ရာ​မဟုတ်ပေ!—မဿဲ ၁၁:၂၉။

ကျိုးနွံ​ခြင်း​ဆိုင်ရာ ယေရှု၏​ပုံ​နမူနာကို​တုပ​လော့

၁၈၊ ၁၉။ ယေရှု၏​ကျိုးနွံ​ခြင်း​ကို (က) မိမိတို့​ကိုယ်ကို​ရှုမြင်ပုံ​၌ (ခ) အခြား​သူများကို​ဆက်ဆံပုံ​၌ မည်သို့​တုပ​နိုင်​သနည်း။

^၁၈ အသက်ရှင်ခဲ့သမျှ​တွင် အကြီးမြတ်ဆုံး​လူသားက ကျိုးနွံ​ခြင်း​တင်ပြ​ခဲ့​သည်​ဆိုလျှင် ကျွန်ုပ်​တို့​မူ​ကား ပို​၍​ပင်​တင်ပြ​သင့်​ပေ​သည်။ မစုံလင်​သော​လူသားများ​သည် အကြွင်းမဲ့​အခွင့်အာဏာကို မိမိတို့​လုံးဝ​မပိုင်ဆိုင်​ကြောင်း ဝန်ခံဖို့ တွန့်ဆုတ်​လေ့​ရှိကြသည်။ သို့သော် ခရစ်ယာန်​များသည် ယေရှုကို​တုပ​သည့်​အနေ​ဖြင့် ကျိုးနွံ​ဖို့​ကြိုးပမ်း​ကြသည်။ သူတို့သည် အရည်အချင်း​ရှိသူတို့​ကို တာဝန်​ပေးဖို့ မာနကြီးလွန်း​သည်မဟုတ်; အခွင့်အာဏာ​ရှိသူတို့​၏ ညွှန်ကြားချက်​ကို လက်မခံ​လို​သူများ​လည်း မဟုတ်​ကြ​ပါ။ သူတို့သည် ဝိုင်းဝန်း​ကူညီ​စိတ်​ကို​တင်ပြ​ကြ​ပြီး အသင်းတော်တွင် အရာခပ်သိမ်း “တင့်တယ်​လျောက်ပတ်​စွာ” ဖြစ်စေ​ရန် ခွင့်ပြု​ကြသည်။—၁ ကောရိန္သု ၁၄:၄၀။

^၁၉ ကျိုးနွံ​ခြင်း​က အခြားသူများ​ထံ​မှ အကျိုးသင့်အကြောင်းသင့်​မျှော်လင့်​ရန်​နှင့် သူတို့၏​လိုအပ်ရာ​များ​ကို ထောက်ထား​စာနာ​တတ်​ရန်​လည်း ကျွန်ုပ်​တို့ကို​လှုံ့ဆော်ပေး​ပါ​လိမ့်​မည်။ (ဖိလိပ္ပိ ၄:၅) အခြားသူများ​၌​မရှိသော အရည်အချင်း​နှင့် အားသာချက်​အချို့ ကျွန်ုပ်​တို့​၌​ရှိနေ​ပေမည်။ သို့​တိုင် ကျွန်ုပ်​တို့သည် ကျိုးနွံ​သော​သူများ​ဖြစ်​ကြ​မည်​ဆိုလျှင် ကျွန်ုပ်​တို့​ဖြစ်စေ​လို​သည့်​အတိုင်း သူတစ်ပါး​က​ပြုလုပ်​ပေးဖို့ အမြဲ​မျှော်လင့်​ကြ​မည်​မဟုတ်ပါ။ လူတစ်ဦး​စီ​၌ ကိုယ်ပိုင်​ကန့်သတ်မှု​များ​ရှိကြောင်း သိထား​ကာ ကျိုးနွံ​စွာ သူတစ်ပါး​၏​အားနည်းချက်များ​ကို ခွင့်လွှတ်​ပေမည်။ ပေတရု​က ဤသို့​ရေးသားခဲ့​သည်– “အခြားသော​အမှုအရာ​ထက်မက၊ အချင်းချင်း အား​ကြီးသော​ချစ်ခြင်း​မေတ္တာ ရှိကြလော့။ ချစ်ခြင်း​မေတ္တာသည် များစွာသော​အပြစ်​တို့ကို ဖုံးအုပ်​တတ်၏။”—၁ ပေတရု ၄:၈။

၂၀။ ကျိုးနွံ​မှုမရှိ​ခြင်း​သို့ တိမ်း​ညွတ်​သည့် အဘယ်​စိတ်ထား​ကို​မဆို ကျော်လွှား​နိုင်​ရန် ကျွန်ုပ်​တို့​အဘယ်အရာ​ပြုလုပ်​နိုင်​သနည်း။

^၂၀ ကျွန်ုပ်​တို့​သင်ယူ​ခဲ့​သည့်​အတိုင်း ဉာဏ်ပညာ​သည် ကျိုးနွံ​သူတို့နှင့်​အတူ အမှန်ပင်​ရှိ၏။ သို့သော် အသင်​၌ ကျိုးနွံ​မှုမရှိ​ခြင်း သို့​မဟုတ် ရောင့်တက်ခြင်း​ဘက် တိမ်း​ညွတ်​သော​စိတ်ထား​များ​ရှိကြောင်း တွေ့ရှိ​ရ​လျှင် အသို့နည်း။ စိတ်ဓာတ်​မကျ​ပါ​နှင့်။ သို့​ဖြစ်​မည့်​အစား ‘ရောင့်တက်သော​အမှုတို့​မှ​လည်း ကိုယ်တော်​၏​ကျွန်​အား ဆီးတား​တော်​မူ​ပါ။ . . . အပြစ်​သည် အကျွန်ုပ်​ကို​အစိုးမရ​ပါစေ​နှင့်’ ဟု​ဆုတောင်း​ခဲ့​သော ဒါဝိဒ်​၏​ပုံသက်သေ​ကို လိုက်လျှောက်ပါ။ (ဆာလံ ၁၉:၁၃) ပေါလု၊ ဂိဒေါင်​နှင့်—အား​လုံ​တို့​ထက်—ယေရှု​ခရစ် ကဲ့သို့​သော​သူတို့၏ ယုံကြည်ခြင်းကို တုပခြင်း​အားဖြင့် “ဉာဏ်ပညာ​သည် ကျိုးနွံ​သူတို့နှင့်​ရှိ၏” ဟူသော​စကား​၏ မှန်ကန်မှု​ကို ကျွန်ုပ်​တို့​ကိုယ်တိုင် တွေ့ကြုံ​ကြ​ရ​ပါ​လိမ့်​မည်။—သု. ၁၁:၂၊ က​ဘ။

[အောက်ခြေ​မှတ်ချက်များ]

သင်​မှတ်မိ​သလော

• ကျိုးနွံ​ခြင်း​ကား အဘယ်နည်း။

• ပေါလု​၏​ကျိုးနွံ​ခြင်း​ကို ကျွန်ုပ်​တို့​မည်သို့​တုပ​နိုင်​သနည်း။

• ကျိုးနွံ​ခြင်း​နှင့်​ပတ်သက်​၍ ဂိဒေါင်​၏​ပုံ​နမူနာ​မှ ကျွန်ုပ်​တို့​အဘယ်အရာ​သင်ယူ​နိုင်​သနည်း။

• ယေရှုသည် ကျိုးနွံ​ခြင်း​ဆိုင်ရာ အကြီးမြတ်ဆုံး​ပုံ​နမူနာကို မည်သို့​တင်ပြ​ခဲ့​သနည်း။

[လေ့လာ​ရန်​မေးခွန်းများ]

[စာမျက်နှာ ၁၅ ပါ ရုပ်ပုံ]

ပေါလု​၏​ကျိုးနွံ​မှု​က ခရစ်ယာန်​ချင်း​များ​၏ ချစ်ခင်မှု​ကို​ခံစား​စေ​ခဲ့

[စာမျက်နှာ ၁၇ ပါ ရုပ်ပုံ]

ဂိဒေါင်​သည် ဘုရားသခင့်​အလိုတော်ကို ဆောင်ရွက်​ရာ​၌ ပညာသတိ​ကို​အသုံးပြု​ခဲ့

[စာမျက်နှာ ၁၈ ပါ ရုပ်ပုံ]

ဘုရားသခင့်​သားတော် ယေရှုသည် ပြုလေရာရာ​၌ ကျိုးနွံ​ခြင်း​ကို​တင်ပြ