ကျွန်ုပ်တို့၏ အဖိုးထိုက်အမွေအနှစ်—သင့်အတွက် အဘယ်အဓိပ္ပာယ်ရှိသနည်း
ကျွန်ုပ်တို့၏ အဖိုးထိုက်အမွေအနှစ်—သင့်အတွက် အဘယ်အဓိပ္ပာယ်ရှိသနည်း
“ငါ့ခမည်းတော်ထံကောင်းချီးမင်္ဂလာကိုခံသောသူတို့၊ ကမ္ဘာဦးကပင် သင်တို့အဖို့ပြင်ဆင်သောနိုင်ငံကို လာ၍အမွေခံကြလော့။”—မဿဲ ၂၅:၃၄။
၁။ အဘယ်အရာမျိုးကို အမွေအဖြစ် လူတို့ရရှိခဲ့ကြသနည်း။
လူသားအားလုံး မိမိတို့အမွေရခဲ့သောအရာများ ရှိကြ၏။ အချို့ရရှိခဲ့သောအမွေအနှစ်တွင် စည်းစိမ်ဥစ္စာရှိ အသက်တာပါဝင်ပေမည်။ အခြားသူတို့မှာမူ ဆင်းရဲသည့်ဘဝဖြစ်ပေမည်။ ကိစ္စအချို့တွင် ရှေးလူကြီးများ ကိုယ်တိုင်တွေ့ကြုံခဲ့ကြရ သို့မဟုတ် ကြားသိခဲ့ကြရသောအရာကြောင့် အခြားလူမျိုးစုတစ်စုအပေါ် ခါးသီးသောမုန်းတီးမှုကို အမွေအဖြစ် လက်ဆင့်ကမ်းခဲ့ကြသည်။ သို့သော် ကျွန်ုပ်တို့အားလုံး၌ တူညီမှုတစ်ခုရှိ၏။ ကျွန်ုပ်တို့အားလုံးသည် ပထမဦးဆုံးလူသားအာဒံထံမှ အပြစ်ကိုအမွေအဖြစ်ရရှိထားကြသည်။ ထိုအမွေက နောက်ဆုံးတွင်သေစေသည်။—ဒေ. ၉:၂၊ ၁၀; ရောမ ၅:၁၂။
၂၊ ၃။ အာဒံနှင့်ဧဝ၏သားစဉ်မြေးဆက်အတွက် ရနိုင်ခြေရှိသော အဘယ်အမွေအနှစ်ကို အစအဦးက ယေဟောဝါစီမံခဲ့သနည်း၊ ၎င်းကို သူတို့ အဘယ်ကြောင့်မရခဲ့ကြသနည်း။
၂ မေတ္တာရှိသောကောင်းကင်ခမည်းတော် ယေဟောဝါသည် မူလအစက လူသားတို့ကို ထူးကဲခြားနားလှသည့်အမွေအနှစ်တစ်ခုဖြစ်သော ပရဒိသုတွင်စုံလင်စွာ ထာဝစဉ်အသက်ရှင်ခြင်းကို ကမ်းလှမ်းခဲ့သည်။ ကျွန်ုပ်တို့၏ကနဦးမိဘများဖြစ်သော အာဒံနှင့်ဧဝသည် အစက စုံလင်၍အပြစ်မဲ့ခဲ့ကြ၏။ ယေဟောဝါဘုရားသခင်သည် ကမ္ဘာဂြိုဟ်ကို လူသားတို့အား လက်ဆောင်အဖြစ်ပေးတော်မူ၏။ (ဆာလံ ၁၁၅:၁၆) ကမ္ဘာတစ်ခုလုံး ဖြစ်ပေါ်လာနိုင်သည့်ပုံစံနမူနာအဖြစ် ဧဒင်ဥယျာဉ်ကို ကိုယ်တော်ပြင်ဆင်ပေးခဲ့ပြီး ကျွန်ုပ်တို့၏ကနဦးမိဘများအတွက် အထူးကောင်းမွန်၍ အလွန်စိတ်ဝင်စားဖွယ်တာဝန်ကိုပေးခဲ့သည်။ သူတို့သည် ကလေးများမွေးဖွားရန်၊ ကမ္ဘာမြေနှင့် ၎င်းပေါ်ရှိသစ်ပင်နှင့် တိရစ္ဆာန်သတ္တဝါအမျိုးမျိုးတို့ကို စောင့်ရှောက်ရန်နှင့် ပရဒိသုဝန်းကျင်ကို ကမ္ဘာတစ်ဝန်းသို့ တိုးချဲ့ရန်ဖြစ်သည်။ (ကမ္ဘာဦး ၁:၂၈; ၂:၈၊ ၉၊ ၁၅) ၎င်းတွင် သူတို့၏သားစဉ်မြေးဆက်လည်း ပါဝင်ကြမည်ဖြစ်သည်။ သားသမီးတို့အား လက်ဆင့်ကမ်းနိုင်သော တကယ်ကောင်းမွန်သည့် အမွေအနှစ်ပါတကား!
၃ သို့သော် ယင်းတို့အားလုံးကို သူတို့ပျော်မွေ့ကြရန် အာဒံ၊ ဧဝနှင့် သူတို့၏သားစဉ်မြေးဆက်တို့သည် ဘုရားသခင်နှင့်ကောင်းသောဆက်ဆံရေး ရှိကြရမည်ဖြစ်သည်။ အာဒံနှင့်ဧဝသည် ယေဟောဝါအပေါ် မေတ္တာနှင့် နာခံမှုအကြွေးတင်နေကြသော်လည်း ဘုရားသခင်ပေးသောအရာကို မလေးမြတ်ကြဘဲ ကိုယ်တော်၏ပညတ်ကို မနာခံခဲ့ကြချေ။ ထိုအခါ သူတို့၏ပရဒိသုနေအိမ်နှင့် သူတို့ရှေ့ ဘုရားသခင်ချပေးထားသော ခမ်းနားထည်ဝါသည့်အလားအလာများကို သူတို့ဆုံးရှုံးလိုက်ကြရသည်။ သို့နှင့် သူတို့သည် မိမိတို့၏သားစဉ်မြေးဆက်ထံသို့ ၎င်းတို့ကို လက်ဆင့်မကမ်းနိုင်တော့ချေ။—ကမ္ဘာဦး ၂:၁၆၊ ၁၇; ၃:၁-၂၄။
၄။ အာဒံဆုံးရှုံးခဲ့သောအမွေအနှစ်ကို ကျွန်ုပ်တို့ မည်သို့ရရှိနိုင်ကြသနည်း။
၄ ယေဟောဝါသည် အာဒံဆုံးရှုံးခဲ့သော အမွေအနှစ်ကို အာဒံနှင့်ဧဝ၏သားစဉ်မြေးဆက်တို့ရနိုင်ရန် ကရုဏာသက်စွာပြင်ဆင်ပေးခဲ့သည်။ မည်သို့နည်း။ ဘုရားသခင်သတ်မှတ်ထားချိန်၌ ကိုယ်တော့်သားတော်ရင်း ယေရှုခရစ်သည် အာဒံ၏သားစဉ်မြေးဆက်အတွက် သူ၏စုံလင်သောလူ့အသက်ကို စတေးခဲ့သည်။ ခရစ်တော်သည် ဤနည်းဖြင့် သူတို့အားလုံးကိုဝယ်ယူလိုက်၏။ သို့သော် အဆိုပါအမွေအနှစ်သည် သူတို့၏ပိုင်ဆိုင်ရာ အလိုအလျောက်ဖြစ်မလာပါ။ သူတို့သည် ယေရှုပူဇော်သကာ၏ အပြစ်ဖြေသည့်တန်ဖိုးကို ယုံကြည်ကြောင်းတင်ပြကြကာ အဆိုပါယုံကြည်ခြင်းရှိကြောင်း နာခံမှုတင်ပြကြခြင်းဖြင့် ဘုရားသခင်ရှေ့ မျက်နှာသာရအနေအထားရှိရန်လိုသည်။ (ယောဟန် ၃:၁၆၊ ၃၆; ၁ တိမောသေ ၂:၅၊ ၆; ဟေဗြဲ ၂:၉; ၅:၉) သင့်ဘဝလမ်းစဉ်က ထိုပြင်ဆင်ပေးမှုကိုလေးမြတ်ကြောင်း ဖော်ပြပါသလော။
အာဗြဟံမှတစ်ဆင့် လက်ဆင့်ကမ်းခဲ့သောအမွေအနှစ်တစ်ခု
၅။ ယေဟောဝါနှင့် မိမိ၏ဆက်ဆံရေးကို အာဗြဟံလေးမြတ်ကြောင်း မည်သို့ဖော်ပြခဲ့သနည်း။
၅ ယေဟောဝါသည် ကမ္ဘာမြေကြီးအတွက် မိမိ၏ရည်ရွယ်တော်မူချက်ကို အကောင်အထည်ဖော်ရာ၌ အာဗြဟံနှင့် အထူးတလည်ဆက်ဆံခဲ့သည်။ ဘုရားသခင်သည် ထိုသစ္စာရှိအမျိုးသားကို သူ၏နေရင်းပြည်မှထွက်ခွာ၍ ကိုယ်တော်တိုင်ညွှန်ပြမည့် တိုင်းပြည်တစ်ပြည်သို့ ရွှေ့ပြောင်းသွားစေခဲ့၏။ အာဗြဟံသည် စိတ်လိုကိုယ်လျောက်နာခံခဲ့သည်။ ထိုနေရာသို့ အာဗြဟံရောက်သွားပြီးနောက် ယေဟောဝါကမ္ဘာဦး ၁၂:၁၊ ၂၊ ၇) အာဗြဟံ မည်သို့တုံ့ပြန်ခဲ့သနည်း။ အာဗြဟံသည် သူ၏သားစဉ်မြေးဆက် အမွေအနှစ်ရရှိနိုင်ရန် မည်သည့်နေရာ၌မဆို မည်သို့ပင်ယေဟောဝါညွှန်ကြားပါစေ ဘုရားသခင့်အမှုတော်ဆောင်ဖို့ အသင့်ရှိခဲ့၏။ အာဗြဟံသည် သူ၏နေရင်းပြည်မဟုတ်သောနေရာ၌ သေသည့်အထိ နှစ်ပေါင်း ၁၀၀ ယေဟောဝါအမှုဆောင်ခဲ့သည်။ (ကမ္ဘာဦး ၁၂:၄; ၂၅:၈-၁၀) ယင်းသို့ပင် သင်ပြုလုပ်ခဲ့မည်လော။ အာဗြဟံကို မိမိ၏ “အဆွေ” ဟုယေဟောဝါခေါ်ဆိုခဲ့သည်။—ဟေရှာယ ၄၁:၈။
က အာဗြဟံကိုယ်တိုင်မဟုတ်ဘဲ သူ၏သားစဉ်မြေးဆက်သည် အဆိုပါပြည်ကို အမွေအဖြစ်ရရှိလိမ့်မည်ဟု မိန့်တော်မူခဲ့သည်။ (၆။ (က) အာဗြဟံသည် သားဖြစ်သူကို ပူဇော်ရန်အသင့်ရှိခြင်းက အဘယ်အရာကိုသရုပ်ဖော်သနည်း။ (ခ) အာဗြဟံသည် မိမိ၏သားစဉ်မြေးဆက်ထံ အဘယ်အဖိုးတန်သောအမွေအနှစ်ကို လက်ဆင့်ကမ်းနိုင်ခဲ့သနည်း။
၆ အာဗြဟံသည် မိမိ၏ချစ်လှစွာသောသား၊ ဣဇာက်ကိုရရှိရန် နှစ်ပေါင်းများစွာစောင့်မျှော်ခဲ့၏။ ထိုသား လူပျိုအရွယ်သို့ရောက်လာသောအခါ သူ့ကိုသတ်၍ ယဇ်သကာအဖြစ် မိမိအားပူဇော်ရန် ယေဟောဝါက အာဗြဟံကိုညွှန်ကြားခဲ့သည်။ ဘုရားသခင်ကိုယ်တော်တိုင် သူ၏သားတော်ကို ရွေးနုတ်ဖိုးအဖြစ် ပေးဆက်မည့်အမှုအား မိမိသရုပ်ဖော်အံ့ဆဲဆဲဖြစ်ကြောင်းကို အာဗြဟံမသိခဲ့ချေ; သို့တိုင် သူသည် နာခံပြီး ဣဇာက်ကိုယဇ်သကာအဖြစ် ပူဇော်အံ့ဆဲဆဲတွင် ယေဟောဝါ၏ကောင်းကင်တမန်က သူ့အား ရပ်တန့်စေခဲ့သည်။ (ကမ္ဘာဦး ၂၂:၉-၁၄) အာဗြဟံကို ယေဟောဝါပေးသော ကတိတော်များသည် ဣဇာက်မှတစ်ဆင့် ပြည့်စုံလာလိမ့်မည်ဟု မိန့်တော်မူနှင့်ခဲ့ပြီ။ သို့ဖြစ်၍ သေခြင်းမှထမြောက်ခြင်း တစ်ခါမျှမဖြစ်ဖူးခဲ့သော်လည်း လိုအပ်မည်ဆိုလျှင် ဘုရားသခင်သည် ဣဇာက်ကိုသေရာမှပြန်ရှင်စေနိုင်ကြောင်း အာဗြဟံယုံကြည်စိတ်ချသည်မှာ သေချာ၏။ (ကမ္ဘာဦး ၁၇:၁၅-၁၈; ဟေဗြဲ ၁၁:၁၇-၁၉) အာဗြဟံသည် မိမိ၏သားကိုပင် မနှမြောသောကြောင့် ယေဟောဝါက ဤသို့ကြေညာခဲ့သည်– “သင်၏အမျိုးအနွယ်အားဖြင့် လူမျိုးအပေါင်းတို့သည် ကောင်းချီးမင်္ဂလာကို ခံရကြလိမ့်မည်။” (ကမ္ဘာဦး ၂၂:၁၅-၁၈) ကမ္ဘာဦး ၃:၁၅ တွင်ဖော်ပြထားသော မျိုးနွယ်တော်၊ ကယ်တင်ရှင်မေရှိယသည် အာဗြဟံ၏ဆွေစဉ်မျိုးဆက်မှ ဆင်းသက်လာလိမ့်မည်ဖြစ်ကြောင်း ၎င်းကညွှန်ပြသည်။ လက်ဆင့်ကမ်းရန် အလွန်တန်ဖိုးရှိသော အမွေအနှစ်ပါတကား!
၇။ အာဗြဟံ၊ ဣဇာက်နှင့် ယာကုပ်တို့သည် သူတို့၏အမွေအနှစ်ကို တန်ဖိုးထားလေးမြတ်ကြောင်း မည်သို့ဖော်ပြခဲ့ကြသနည်း။
၇ ထိုအချိန်တွင် ယေဟောဝါဆောင်ရွက်တော်မူခဲ့သောအမှု၏ဆိုလိုရင်းကို အာဗြဟံမသိခဲ့ချေ; “ထိုကတိတော်ကိုအမွေခံရသော အဖော်အဖက်” များဖြစ်လာကြသည့် သူ့သားဣဇာက်သော်လည်းကောင်း၊ သူ၏မြေးယာကုပ်သော်လည်းကောင်း မသိခဲ့ကြချေ။ သို့သော် သူတို့အားလုံးသည် ယေဟောဝါကိုယုံကြည်စိတ်ချခဲ့ကြ၏။ သူတို့သည် သာ၍ကောင်းသောနေရာ—“ဘုရားသခင်တည်ထောင်ပြုစုတော်မူသော အခြေအမြစ်များရှိသောမြို့”—ကို စောင့်မျှော်နေကြရာ ထိုပြည်ရှိ မည်သည့်မြို့-နိုင်ငံငယ်များကိုမျှ အားမကိုးခဲ့ကြချေ။ (ဟေဗြဲ ၁၁:၈-၁၀၊ ၁၃-၁၆) သို့တိုင် အာဗြဟံမှတစ်ဆင့် ရရှိကြမည့် အမွေအနှစ်၏အဖိုးထိုက်တန်မှုကို အာဗြဟံ၏သားစဉ်မြေးဆက်တိုင်း တန်ဖိုးမထားခဲ့ချေ။
ထိုအမွေအနှစ်ကို မထီမဲ့မြင်ပြုသူအချို့
၈။ ဧသောသည် မိမိအမွေအနှစ်ကို တန်ဖိုးမထားကြောင်း မည်သို့ပြသခဲ့သနည်း။
၈ ဣဇာက်၏သားကြီးဖြစ်သူ ဧသောသည် မိမိ၏သားဦးအရာကို တန်ဖိုးမထားခဲ့ပါ။ သူသည် မြင့်မြတ်သောအရာများကို မလေးမြတ်ခဲ့ပါ။ သို့နှင့် တစ်နေ့တွင် ဧသောသည် ဆာလောင်သောအခါ မိမိ၏သားဦးအရာကို ညီဖြစ်သူယာကုပ်အား ရောင်းချလိုက်သည်။ အဘယ်အရာအတွက်နည်း။ တစ်နပ်စာ မုန့်နှင့်ပဲဟင်း ရဖို့အတွက်ပါတကား! (ကမ္ဘာဦး ၂၅:၂၉-၃၄; ဟေဗြဲ ၁၂:၁၄-၁၇) အာဗြဟံအား ဘုရားသခင်ပေးခဲ့သောကတိတော်များ ပြည့်စုံလာလိမ့်မည့်လူမျိုးသည် ဣသရေလဟူ၍ ဘုရားသခင်အမည်ပြောင်းပေးခဲ့သူ ယာကုပ်မှ ဆင်းသက်လာသောလူမျိုးဖြစ်မည်။ ထိုအမွေအနှစ်က သူတို့အတွက် အဘယ်အခွင့်အလမ်းများပွင့်စေသနည်း။
၉။ သူတို့၏ဝိညာဉ်ရေးဆိုင်ရာအမွေအနှစ်ကြောင့် ယာကုပ် သို့မဟုတ် ဣသရေလ၏သားစဉ်မြေးဆက်သည် အဘယ်ကယ်လွှတ်မှုကို ကြုံတွေ့ခဲ့ကြရသနည်း။
၉ ငတ်မွတ်ခေါင်းပါးရာကာလတွင် ယာကုပ်နှင့် သူ၏မိသားစုသည် အီဂျစ်ပြည်သို့ပြောင်းရွှေ့နေထိုင်ခဲ့ကြသည်။ ထိုတွင် သူတို့သည် လူဦးရေတိုးပွား၍ အလွန်များပြားလာကြသော်လည်း ကျွန်များဖြစ်သွားကြ၏။ သို့သော် ယေဟောဝါသည် အာဗြဟံနှင့် ဖွဲ့ခဲ့သောမိမိ၏ပဋိညာဉ်ကို မေ့လျော့တော်မမူခဲ့ချေ။ ဘုရားသခင်သတ်မှတ်ထားချိန်၌ ဣသရေလလူမျိုးကို ကျွန်အဖြစ်မှကယ်လွှတ်၍ အာဗြဟံအား ကိုယ်တော်ကတိပေးတော်မူခဲ့သည့် “နို့နှင့်ပျားရည်စီးတတ်သောပြည်သို့” သူတို့ကို ပို့ဆောင်ပေးတော်မူမည်ဖြစ်ကြောင်း အသိပေးခဲ့သည်။—ထွက်မြောက်ရာ ၃:၇၊ ၈; ကမ္ဘာဦး ၁၅:၁၈-၂၁။
၁၀။ သိနာတောင်တွင် ဣသရေလအမျိုးသားတို့၏အမွေအနှစ်နှင့်ပတ်သက်၍ နောက်ထပ်သာမန်ထက်ထူးကဲသော အဘယ်အမှုများဖြစ်ပျက်ခဲ့သနည်း။
၁၀ ဣသရေလအမျိုးသားတို့သည် ကတိထားရာပြည်သို့ ခရီးနှင်ကြစဉ် ယေဟောဝါသည် သိနာတောင်တွင် သူတို့ကို စုဝေးစေသည်။ ထိုတွင် သူတို့အား ကိုယ်တော် ဤသို့မိန့်တော်မူသည်– “ယခုတွင် သင်တို့သည် ငါ့စကားကိုအမှန်နားထောင်၍ ငါ့ပဋိညာဉ်ကိုစောင့်ရှောက်လျှင် အခြားသောလူမျိုးတကာတို့ထက် သင်တို့သည် ငါပိုင်ထိုက်သော ဘဏ္ဍာတော်ဖြစ်ရကြလိမ့်မည်။ မြေကြီးရှိသမျှသည် ငါ၏ဥစ္စာဖြစ်၏။ သင်တို့သည်လည်း မင်းစည်းစိမ်ရှိသောယဇ်ပုရောဟိတ်မျိုး၊ သန့်ရှင်းသောလူမျိုး ဖြစ်ရကြလိမ့်မည်။” (ထွက်မြောက်ရာ ၁၉:၅၊ ၆) သို့ပြုမည်ဟု လူတို့က စိတ်လိုကိုယ်လျောက်နှင့် တစ်စိတ်တစ်ဝန်းတည်းသဘောတူညီကြပြီးနောက် ယေဟောဝါသည် သူတို့အား မိမိ၏ပညတ်ကိုပေးခဲ့သည်—အခြားမည်သည့်လူမျိုးနှင့်မျှ မပြုခဲ့သောအရာဖြစ်သည်။—ဆာလံ ၁၄၇:၁၉၊ ၂၀။
၁၁။ ဣသရေလအမျိုးသားတို့၏ ဝိညာဉ်ရေးဆိုင်ရာအမွေအနှစ်တွင်ပါဝင်သည့် တန်ဖိုးရှိသောအရာအချို့ကား အဘယ်နည်း။
၁၁ ထိုလူမျိုးသစ်သည် တကယ်ထူးမြတ်သော ဝိညာဉ်ရေးဆိုင်ရာအမွေအနှစ်တစ်ခုကို ရရှိခဲ့သည်တကား! သူတို့သည် စစ်မှန်သောဘုရားသခင် တစ်ပါးတည်းကိုသာ ဝတ်ပြုကိုးကွယ်ခဲ့ကြ၏။ သူတို့သည် အီဂျစ်ပြည်မှကယ်လွှတ်ခံခဲ့ကြရပြီး သိနာတောင်တွင် ပညတ်တော်ရခဲ့သောအခါ၌ အံ့သြဖွယ်ကောင်းသောဖြစ်ရပ်များကို မျက်မြင်ကိုယ်တွေ့ တွေ့မြင်ခဲ့ကြသည်။ ပရောဖက်များမှတစ်ဆင့် “ဘုရားသခင်၏ဗျာဒိတ်တော် [မိန့်မြွက်ချက်] များ” ကိုသူတို့ထပ်ဆင့်၍ လက်ခံရရှိကြသောအခါ သူတို့၏အမွေအနှစ်မှာ ထပ်မံတိုးပွားလာသည်။ (ရောမ ၃:၁၊ ၂) ယေဟောဝါက သူတို့ကို မိမိ၏သက်သေများအဖြစ် သတ်မှတ်ခဲ့သည်။ (ဟေရှာယ ၄၃:၁၀-၁၂) မေရှိယမျိုးနွယ်သည် သူတို့လူမျိုးတွင် ပေါ်ထွက်လာရမည်ဖြစ်သည်။ ပညတ်တော်က ကိုယ်တော်ထံသို့ညွှန်ပြ၍ ခွဲခြားသိမြင်စေလိမ့်မည်ဖြစ်ပြီး ကိုယ်တော်အား သူတို့လိုအပ်ကြောင်းကို လေးမြတ်ရန်ထောက်ကူပေးသင့်သည်။ (ဂလာတိ ၃:၁၉၊ ၂၄) ထိုထက်ကား သူတို့သည် မင်းစည်းစိမ်ရှိသောယဇ်ပုရောဟိတ်မျိုး၊ သန့်ရှင်းသောလူမျိုးအဖြစ် မေရှိယမျိုးနွယ်တော်နှင့်အတူ ပေါင်းဖော်၍ အမှုထမ်းဆောင်ခွင့် ရကြလိမ့်မည်ဖြစ်သည်။—ရောမ ၉:၄၊ ၅။
၁၂။ ဣသရေလတို့သည် ကတိထားရာပြည်ထဲ ဝင်ရောက်ခဲ့ကြစေကာမူ အဘယ်အရာကို မခံစားခဲ့ရသနည်း။ အဘယ်ကြောင့်နည်း။
၁၂ ယေဟောဝါသည် ကတိတော်အတိုင်းပင် ကတိထားရာပြည်သို့ ဣသရေလလူတို့ကို ဦးဆောင်သွားခဲ့သည်။ သို့သော် နောက်ပိုင်းတွင် တမန်တော်ပေါလုရှင်းပြသကဲ့သို့ပင် သူတို့၏ယုံကြည်ခြင်းကင်းမဲ့မှုကြောင့် အဆိုပါပြည်သည် သူတို့အတွက် အမှန်ပင် ‘ချမ်းသာရှိရာအရပ်’ မဖြစ်ခဲ့ချေ။ သူတို့သည် လူမျိုးတစ်မျိုးအနေဖြင့် “ဘုရားသခင်၏ချမ်းသာ” ထဲသို့ မဝင်ခဲ့ကြရချေ။ အကြောင်းမှာ၊ အာဒံနှင့်ဧဝကိုဖန်ဆင်းပြီးနောက် စတင်ခဲ့သည့် ဘုရားသခင်ကိုယ်တော်တိုင်၏ ငြိမ်ဝပ်ရာနေ့ဆိုင်ရာ ရည်ရွယ်တော်မူချက်ကိုမသိ၊ ၎င်းနှင့်အညီ ပြုမူဆောင်ရွက်ရန် ပျက်ကွက်ခဲ့ကြသဖြင့်ဖြစ်သည်။—ဟေဗြဲ ၄:၃-၁၀။
၁၃။ ဣသရေလလူမျိုးသည် မိမိတို့၏ဝိညာဉ်ရေးဆိုင်ရာအမွေအနှစ်ကို တန်ဖိုးထားလေးမြတ်မှု မရှိခြင်းကြောင့် လူမျိုးတစ်မျိုးအနေဖြင့် အဘယ်အရာကိုဆုံးရှုံးခဲ့ရသနည်း။
၁၃ ဇာတိဣသရေလလူတို့သည် မင်းစည်းစိမ်ရှိသောယဇ်ပုရောဟိတ်မျိုး၊ သန့်ရှင်းသောလူမျိုးအဖြစ် မေရှိယနှင့်အတူ ကိုယ်တော်၏ကောင်းကင်နိုင်ငံတော်တွင်ပါဝင်မည့်သူများ၏ အရေအတွက်အပြည့်ကို ပေးဆက်နိုင်သည့်အခွင့်အလမ်းရှိခဲ့သည်။ သို့သော် သူတို့သည် မိမိတို့၏တန်ဖိုးရှိသောအမွေအနှစ်ကို တန်ဖိုးထားလေးမြတ်မှုမရှိခဲ့ကြချေ။ မေရှိယကြွလာသောအခါ ဇာတိဣသရေလအကြွင်းအကျန်သာ ကိုယ်တော်ကိုလက်ခံခဲ့ကြ၏။ ရလဒ်အနေဖြင့် အရေအတွက်အနည်းငယ်သာလျှင် တင်ကူးပြောထားခဲ့သည့် မင်းစည်းစိမ်ရှိယဇ်ပုရောဟိတ်မျိုးတွင် ပါဝင်ခဲ့ကြရသည်။ အဆိုပါဘုရားသခင့်နိုင်ငံတော်ကို ဇာတိဣသရေလလူတို့ထံမှ နုတ်ယူ၍ “နိုင်ငံတော်ဆိုင်ရာအသီးကို သီးအံ့သောလူမျိုးအားပေး” လေသည်။ (မဿဲ ၂၁:၄၃) ထိုလူမျိုးကားအဘယ်နည်း။
ကောင်းကင်ရှိ အမွေအနှစ်တစ်ခု
၁၄၊ ၁၅။ (က) ယေရှုသေဆုံးပြီးနောက် လူမျိုးတို့သည် အာဗြဟံ၏ “အမျိုးအနွယ်” အားဖြင့် မည်သို့ကောင်းချီးစတင်ရရှိခဲ့ကြသနည်း။ (ခ) “ဘုရားသခင်၏ဣသရေလအမျိုး” ၌ပါဝင်သူများသည် အမွေအနှစ်အဖြစ် အဘယ်အရာကိုရရှိသနည်း။
၁၄ ဘုရားသခင့်နိုင်ငံတော်အပ်နှင်းခံရသည့် လူမျိုးမှာ ဝိညာဉ်ရေးဆိုင်ရာဣသရေလ၊ “ဘုရားသခင်၏ဣသရေလအမျိုး” ဖြစ်ပြီး ၎င်းသည် ၁၄၄,၀၀၀ သောယေရှု၏ဝိညာဉ်တော်ဖွားနောက်လိုက်များဖြင့် ဖွဲ့စည်းထားသည်။ (ဂလာတိ ၆:၁၆; ဗျာဒိတ် ၅:၉၊ ၁၀; ၁၄:၁-၃) ထို ၁၄၄,၀၀၀ သောသူအချို့မှာ ဇာတိဣသရေလများဖြစ်ကြသော် လည်း အများစုမှာ တစ်ပါးအမျိုးသားများထဲမှဖြစ်သည်။ ထိုနည်းဖြင့် အာဗြဟံ၏ “အမျိုးအနွယ်” အားဖြင့် လူမျိုးအပေါင်းသည် ကောင်းချီးခံစားရလိမ့်မည်ဟူသော ယေဟောဝါ၏ကတိတော် စတင်ပြည့်စုံလာခဲ့သည်။ (တမန်တော် ၃:၂၅၊ ၂၆; ဂလာတိ ၃:၈၊ ၉) ထိုအစပထမပြည့်စုံချက်တွင် လူမျိုးအပေါင်းမှလူတို့သည် သန့်ရှင်းသောဝိညာဉ်တော်ဖြင့် ဘိသိက်ပေးခံကြရပြီး ဝိညာဉ်ရေးဆိုင်ရာသားများ၊ ယေရှုခရစ်၏ညီတော်များအဖြစ် ယေဟောဝါဘုရားသခင်၏မွေးစားခြင်းကို ခံခဲ့ကြရသည်။ သို့နှင့် သူတို့လည်း အဆိုပါ “အမျိုးအနွယ်” ၏ဒုတိယအပိုင်းဖြစ်လာကြသည်။—ဂလာတိ ၃:၂၈၊ ၂၉။
၁၅ ယေရှုမသေဆုံးမီ ကိုယ်တော်သည် လူမျိုးအသစ်တွင်ပါဝင်ရန် အလားအလာရှိ ဂျူးအဖွဲ့ဝင်များကို ကိုယ်တော်၏အသွေးအားဖြင့် တရားဝင်ဖြစ်လာစေမည့် ပဋိညာဉ်သစ်ကိုဖွဲ့ခဲ့သည်။ တရားဝင်စေမည့်အဆိုပါယဇ်ကောင်၌ သူတို့ယုံကြည်ခြင်းအပေါ်အခြေခံ၍ အဆိုပါပဋိညာဉ်ထဲသွင်းခံရသူများသည် “ထာဝရစုံလင်ခြင်းအကျိုး” ကိုခံစားရလိမ့်မည်။ (ဟေဗြဲ ၁၀:၁၄-၁၈) သူတို့သည် “ဖြောင့်မတ်ရာသို့ရောက်” နိုင်ကြပြီး အပြစ်များခွင့်လွှတ်ခံကြရမည်။ (၁ ကောရိန္သု ၆:၁၁) သို့ဖြင့် သူတို့သည် အာဒံအပြစ်မပြုမီကကဲ့သို့ ဖြစ်လာကြ၏။ သို့သော် ဤသူတို့သည် မြေကြီးပရဒိသုတွင် အသက်ရှင်နေထိုင်ကြရမည်မဟုတ်ချေ။ ယေရှုက ဤသူတို့နေစရာအရပ်ကို ကောင်းကင်တွင် သွားပြင်ဆင်မည်ဟု မိန့်တော်မူခဲ့သည်။ (ယောဟန် ၁၄:၂၊ ၃) သူတို့သည် “ကောင်းကင်ဘုံ၌သိုထားလျက်ရှိသောအမွေ” ကိုရရှိရန် မြေကြီးအသက်တာကို အရှုံးခံကြရသည်။ (၁ ပေတရု ၁:၄၊ ၅) ကောင်းကင်တွင် သူတို့အဘယ်အမှုကိုပြုလုပ်ကြမည်နည်း။ ယေရှုက “[ဘုရားသခင့်] နိုင်ငံအတွက် . . . ငါသည် သင်တို့နှင့်ပဋိညာဉ်ဖွဲ့၏” ဟုရှင်းပြခဲ့သည်။—လုကာ ၂၂:၂၉၊ ကဘ။
၁၆။ ဘိသိက်ခံအတန်းအစားခရစ်ယာန်များအတွက် ထူးမြတ်လှသည့် အဘယ်လုပ်ငန်းတာဝန်ထမ်းဆောင်ခွင့်ရှိသနည်း။
၁၆ ကောင်းကင်မှနေ၍ ခရစ်တော်နှင့်အတူစိုးစံသူတို့သည် အခြားအရာများအပါအဝင် ယေဟောဝါ၏အကြီးမြင့်ဆုံးအာဏာတော်အား ဆန့်ကျင်ပုန်ကန်ရာအားလုံးကို မြေကြီးပေါ်မှပယ်ရှားပစ်ရေး၌ ထောက်ကူလိမ့်မည်။ (ဗျာဒိတ် ၂:၂၆၊ ၂၇) သူတို့သည် အာဗြဟံ၏ ဝိညာဉ်ရေးရာမျိုးနွယ်တော်ဆိုင်ရာ ဒုတိယအပိုင်းအဖြစ် လူမျိုးအသီးသီးမှ လူသားအားလုံးကို စုံလင်သောအသက်တာရရှိစေမည့် ကောင်းချီးခံစားစေကြလိမ့်မည်။ (ရောမ ၈:၁၇-၂၁) သူတို့ရရှိကြသည့် အမွေအနှစ်သည် တန်ဖိုးရှိလှသည်တကား!—ဧဖက် ၁:၁၆-၁၈။
၁၇။ ဘိသိက်ခံအတန်းအစားခရစ်ယာန်များသည် မြေကြီးပေါ်ရှိစဉ် သူတို့အမွေအနှစ်၏ အဘယ်အသွင်အပြင်များကို ခံစားကြရသနည်း။
၁၇ သို့သော် ယေရှု၏ဘိသိက်ခံနောက်လိုက်များဆိုင်ရာ အမွေအနှစ်သည် အနာဂတ်အတွက်သာမဟုတ်ပါ။ ယေရှုသည် အခြားမည်သူမျှမပြုလုပ်နိုင်သည့်နည်းဖြင့် သူတို့အား စစ်မှန်သောဘုရားသခင်တစ်ဆူတည်းဖြစ်တော်မူသော ယေဟောဝါကိုသိကျွမ်းစေတော်မူခဲ့သည်။ (မဿဲ ၁၁:၂၇; ယောဟန် ၁၇:၃၊ ၂၆) စကားအားဖြင့်လည်းကောင်း၊ ပုံသက်သေအားဖြင့်လည်းကောင်း ‘ဘုရားသခင်ကိုကိုးစားခြင်း’ ၏အဓိပ္ပာယ်အပြင် ယေဟောဝါအား နာခံခြင်း၌ အဘယ်အရာပါဝင်ကြောင်းကို သူတို့အား သင်ကြားပေးခဲ့၏။ (ဟေဗြဲ ၂:၁၃; ၅:၇-၉) ဘုရားသခင့်ရည်ရွယ်တော်မူချက်နှင့်ဆိုင်သည့် အသိပညာမှန်ကို ယေရှုသိစေခဲ့ပြီး ယင်းကို အပြည့်အဝနားလည်လာစေရန် သန့်ရှင်းသောဝိညာဉ်တော်က သူတို့ကိုကူညီပေးမည်ဟု အာမခံခဲ့သည်။ (ယောဟန် ၁၄:၂၄-၂၆) ဘုရားသခင့်နိုင်ငံတော်၏ အရေးပါမှုကို သူတို့၏စိတ်နှလုံးထဲတွင် စွဲမှတ်စေခဲ့သည်။ (မဿဲ ၆:၁၀၊ ၃၃) သက်သေခံရန်နှင့် ယေရုရှလင်မြို့မှစ၍ ယုဒပြည်၊ ရှမာရိပြည်၊ မြေကြီးစွန်းတိုင်အောင် လူတို့ကို တပည့်ဖြစ်စေရမည့်တာဝန်အား သူတို့၌ယေရှုအပ်နှင်းခဲ့၏။—မဿဲ ၂၄:၁၄; ၂၈:၁၉၊ ၂၀; တမန်တော် ၁:၈။
လူအုပ်ကြီးအတွက် တန်ဖိုးရှိလှသောအမွေအနှစ်တစ်ခု
၁၈။ အာဗြဟံ၏ “အမျိုးအနွယ်” အားဖြင့် လူမျိုးအပေါင်းတို့သည် ကောင်းချီးခံစားကြရမည်ဟူသည့် ယေဟောဝါ၏ကတိတော် အဘယ်နည်းဖြင့် ယနေ့ပြည့်စုံလာခဲ့ပြီနည်း။
၁၈ ဖြစ်နိုင်ဖွယ်ရှိသည်ကား ဝိညာဉ်ရေးဆိုင်ရာဣသရေလ၊ ဘုရားသခင့်နိုင်ငံတော်၏အမွေခံ “သိုးစုငယ်” ၏အရေအတွက်အပြည့်အစုံကို ရွေးချယ်ပြီးပြီဖြစ်သည်။ (လုကာ ၁၂:၃၂) ယေဟောဝါသည် လူအမျိုးအနွယ်ခပ်သိမ်းမှ လူအုပ်ကြီးကိုစုသိမ်းခြင်းအပေါ် အာရုံစူးစိုက်လျက်နေသည်မှာ ယခု ဆယ်စုနှစ်ချီ၍ရှိပြီ။ သို့နှင့် အာဗြဟံ၏ “အမျိုးအနွယ်” အားဖြင့် လူမျိုးအပေါင်းတို့ ကောင်းချီးခံစားရလိမ့်မည်ဟူသည့် ယေဟောဝါ၏ကတိတော်မှာ ကြီးကျယ်စွာပြည့်စုံလျက်ရှိသည်။ ကောင်းချီးခံစားရသော ဤသူတို့သည်လည်း ယေဟောဝါ၏မြင့်မြတ်သောလုပ်ငန်းတော်ကို ဝမ်းသာအားရဆောင်ရွက်ကြပြီး သူတို့၏ကယ်တင်ခြင်းသည် ဘုရားသခင့်သိုးသငယ်၊ ယေရှုခရစ်အား ယုံကြည်ခြင်းအပေါ် မူတည်နေကြောင်းကို အသိအမှတ်ပြုကြသည်။ (ဗျာဒိတ် ၇:၉၊ ၁၀) ထိုပျော်ရွှင်သောအုပ်စုတွင်ပါဝင်ရန် ကြင်နာစွာ ယေဟောဝါဖိတ်ခေါ်နေခြင်းကို အသင်လက်ခံခဲ့ပြီလော။
၁၉။ ယခုကောင်းချီးခံစားနေကြရသော လူမျိုးတို့မှသူများသည် အဘယ်အမွေရဖို့မျှော်လင့်ကြသနည်း။
၁၉ သိုးစုငယ်တွင်မပါဝင်သူတို့အား တန်ဖိုးရှိလှသောမည်သည့်အမွေအနှစ်ကို ယေဟောဝါကမ်းလှမ်းတော်မူသနည်း။ ကောင်းကင်၌ရမည့် အမွေမဟုတ်ပါ။ မိမိ၏သားစဉ်မြေးဆက်ထံသို့ အာဒံလက်ဆင့်ကမ်းလာနိုင်သည့် အမွေ—တဖြည်းဖြည်းပရဒိသုဖြစ်လာမည့် ကမ္ဘာတစ်ဝန်းလုံးတွင် စုံလင်မှုဖြင့်ထာဝရအသက်ရှင်ခွင့်ရှိမည်ဖြစ်သည်။ ထိုကမ္ဘာပေါ်တွင် “သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိ” တော့ပေ။ (ဗျာဒိတ် ၂၁:၄) ထို့ကြောင့် ဘုရားသခင့်မှုတ်သွင်းခံစကားတော်က သင့်အား ဤသို့ဆိုနေခြင်းဖြစ်သည်– “ထာဝရဘုရားကိုခိုလှုံ၍ ကောင်းသောအကျင့်ကိုကျင့်လော့။ ပြည်တော်၌နေ၍ သစ္စာတရားကိုကျက်စားလော့။ ထာဝ ရဘုရား၌ မွေ့လျော်ခြင်းရှိလော့။ သို့ပြုလျှင် စိတ်နှလုံးအလိုပြည့်စုံရသောအခွင့်ကို ပေးတော်မူမည်။ ခဏကြာပြီးမှ မတရားသောသူသည်မရှိရ။ . . . စိတ်နှိမ့်ချသောသူတို့မူကား ပြည်တော်ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်။ ဖြောင့်မတ်သောသူတို့သည် ပြည်တော်ကိုအမွေခံ၍ အစဉ်အမြဲနေရကြလိမ့်မည်။”—ဆာလံ ၃၇:၃၊ ၄၊ ၁၀၊ ၁၁၊ ၂၉။
၂၀။ “အခြားသိုး” တို့သည် ဘိသိက်ခံအတန်းအစားခရစ်ယာန်များ၏ အမွေအနှစ်အများအပြားကို မည်သို့မွေ့လျော်ကြရသနည်း။
၂၀ ယေရှု၏ “အခြားသိုး” သည် ကောင်းကင်နိုင်ငံတော်၏ မြေကြီးဆိုင်ရာနယ်ပယ်တွင် အမွေရရှိကြသည်။ (ယောဟန် ၁၀:၁၆က) သူတို့သည် ကောင်းကင်၌ရှိကြမည်မဟုတ်သော်လည်း ဘိသိက်ခံများ မွေ့လျော်ခံစားရကြသော ဝိညာဉ်ရေးဆိုင်ရာအမွေအနှစ်အများအပြားကို သူတို့ထံ လက်ဆက်ကမ်းပေးသည်။ စုပေါင်းဘိသိက်ခံခရစ်ယာန်အဖွဲ့ဖြစ်သော ‘သစ္စာနှင့်သတိပညာရှိကျွန်’ မှတစ်ဆင့် အခြားသိုးတို့သည် ဘုရားသခင့်နှုတ်မြွက်စကားတော်တွင်ပါရှိသော တန်ဖိုးရှိလှသည့်ကတိတော်များကို နားလည်လာရကြသည်။ (မဿဲ ၂၄:၄၅-၄၇; ၂၅:၃၄) ဘိသိက်ခံနှင့် အခြားသိုးတို့သည် မှန်သောဘုရားသခင်တစ်ဆူတည်းဖြစ်သော ယေဟောဝါကိုသိကျွမ်းကာ အတူတကွဝတ်ပြုကိုးကွယ်နေကြ၏။ (ယောဟန် ၁၇:၂၀၊ ၂၁) သူတို့သည် ယေရှုယဇ်ပူဇော်သကာ၏ အပြစ်ဖြေရာတန်ဖိုးအတွက် ဘုရားသခင်အား အတူတကွကျေးဇူးတင်ကြသည်။ သူတို့သည် သိုးထိန်းတစ်ပါးတည်းဖြစ်သူ ယေရှုခရစ်၏လက်အောက်တွင် သိုးစုတစ်စုတည်းအဖြစ် အတူတကွအမှုထမ်းဆောင်ကြသည်။ (ယောဟန် ၁၀:၁၆ခ) သူတို့သည် မေတ္တာရှိသော၊ ကမ္ဘာချီညီအစ်ကိုအသင်းအပင်းတစ်ခုတွင် တစ်စိတ်တစ်ပိုင်းပါဝင်ကြသည်။ ယေဟောဝါနှင့် ကိုယ်တော့်နိုင်ငံတော်၏ သက်သေများဖြစ်ရသည့်အခွင့်အရေးကို သူတို့အတူတကွခံယူကြသည်။ မှန်ပါ၏၊ သင်သည် ယေဟောဝါ၏ ဆက်ကပ်အပ်နှံ နှစ်ခြင်းခံပြီးသား ကျေးကျွန်တစ်ဦး ဖြစ်မည်ဆိုလျှင် သင်၏ဝိညာဉ်ရေးအမွေအနှစ်တွင် ဤအရာအားလုံးအကျုံးဝင်ပေသည်။
၂၁၊ ၂၂။ ကျွန်ုပ်တို့၏ဝိညာဉ်ရေးအမွေအနှစ်ကို မြတ်နိုးကြောင်း ကျွန်ုပ်တို့အားလုံး မည်သို့ပြသနိုင်ကြသနည်း။
ဟေဗြဲ ၁၀:၂၄၊ ၂၅) အခက်အခဲကြား ဘုရားသခင့်အမှုကိုဆောင်ရွက်သည်အထိ ထိုအမွေအနှစ်က သင့်အတွက်တန်ဖိုးရှိပါသလော။ ၎င်းကိုဆုံးရှုံးသွားစေနိုင်သည့် လမ်းစဉ်တစ်ခုကိုလိုက်ရန် မည်သည့်သွေးဆောင်မှုကိုမဆို တွန်းလှန်ရန်ခွန်အားရှိစေသည်အထိ သင့်တန်ဖိုးထားလေးမြတ်မှုသည် ပြင်းထန်ပါသလော။
၂၁ ဤဝိညာဉ်ရေးအမွေအနှစ်သည် သင့်အတွက်မည်မျှတန်ဖိုးရှိသနည်း။ ဘုရားသခင့်အလိုတော်ဆောင်ခြင်းကို သင့်ဘဝအသက်တာ၌ အရေးအကြီးဆုံးအဖြစ်ယူမှတ်သည်အထိ တော်လျော်စွာ တန်ဖိုးထားသလော။ ယင်း၏သာဓကအနေဖြင့် သင်သည် ခရစ်ယာန်အသင်းတော်၏ စည်းဝေးအားလုံးကို မှန်မှန်တက်ရောက်ရန် ကိုယ်တော်၏နှုတ်မြွက်စကားတော်နှင့် အဖွဲ့အစည်း၏ဆိုဆုံးမမှုကို နာခံသလော။ (၂၂ ဘုရားသခင်ပေးထားသည့် ဝိညာဉ်ရေးအမွေအနှစ်ကို ကျွန်ုပ်တို့အားလုံး မြတ်နိုးကြပါစေ။ ကျွန်ုပ်တို့ရှေ့တွင်ရှိသောပရဒိသုကို မျက်ခြည်မပြတ်အာရုံစူးစိုက်နေကြစဉ် ယခုပင် ကျွန်ုပ်တို့အား ယေဟောဝါအပ်နှင်းထားသည့် ဝိညာဉ်ရေးဆိုင်ရာအခွင့်အရေးများကို အပြည့်အဝယူကြပါစို့။ ကျွန်ုပ်တို့၏ဘဝအသက်တာကို ယေဟောဝါနှင့် ကျွန်ုပ်တို့၏ဆက်ဆံရေးအပေါ်မူတည်၍ အမှန်တကယ်တည်ဆောက်ကြခြင်းအားဖြင့် ဘုရားသခင်ပေးသောအမွေအနှစ်ကို ကျွန်ုပ်တို့ မည်မျှတန်ဖိုးထားကြောင်း အမှန်သက်သေထူသည်။ ကျွန်ုပ်တို့သည် “အကျွန်ုပ်၏ရှင်ဘုရင်၊ အကျွန်ုပ်၏ဘုရားသခင် ကိုယ်တော်ကိုချီးမြှောက်ပါမည်။ ကမ္ဘာအဆက်ဆက် နာမတော်ကိုကောင်းချီးပေးပါမည်” ဟုကြွေးကြော်သူများတွင် ပါဝင်နိုင်ကြပါစေ။—ဆာလံ ၁၄၅:၁။
သင်မည်သို့ ရှင်းပြမည်နည်း
• ဘုရားသခင်အား အာဒံသစ္စာရှိခဲ့မည်ဆိုလျှင် အဘယ်အမွေအနှစ်ကို ကျွန်ုပ်တို့ထံသို့ လက်ဆင့်ကမ်းခဲ့မည်နည်း။
• အာဗြဟံ၏သားစဉ်မြေးဆက်တို့သည် သူတို့ရရှိနိုင်ကြသော အမွေအနှစ်ကို မည်သို့ ရှုမှတ်ခဲ့ကြသနည်း။
• ခရစ်တော်၏ဘိသိက်ခံအတန်းအစားနောက်လိုက်များဆိုင်ရာ အမွေအနှစ်တွင် အဘယ်အရာပါဝင်သနည်း။
• လူအုပ်ကြီး၏ အမွေအနှစ်ကားအဘယ်နည်း၊ ၎င်းကို သူတို့ အမှန်တကယ်တန်ဖိုးထားကြောင်း မည်သို့ဖော်ပြနိုင်ကြသနည်း။
[လေ့လာရန်မေးခွန်းများ]
[စာမျက်နှာ ၂၀ ပါ ရုပ်ပုံ]
အာဗြဟံ၏သားစဉ်မြေးဆက်သည် တန်ဖိုးရှိလှသောအမွေအနှစ်တစ်ခုရမည်ဟု ကတိတော်ရရှိခဲ့ကြ
[စာမျက်နှာ ၂၃ ပါ ရုပ်ပုံ]
သင်၏ဝိညာဉ်ရေးရာအမွေအနှစ်ကို သင်လေးမြတ်ပါသလော