မကြာမီ စိတ်ပျက်အားလျော့မှု မရှိတော့မည့်ကမ္ဘာ
မကြာမီ စိတ်ပျက်အားလျော့မှု မရှိတော့မည့်ကမ္ဘာ
ဘဝသည် တောင်းဆိုချက် များသည်ထက်များလာရာ စိတ်ပျက်ဖွယ်ရာအကြောင်းများ တိုးများလျက်ရှိသည်။ စိတ်ပျက်အားလျော့သောအခါ ကျွန်ုပ်တို့၏စိတ်လှုပ်ရှားမှုကို ထိန်းချုပ်ဖို့ခက်ကြောင်း တွေ့ရပေမည်။ ဘဝကိုမွေ့ပျော်သူပင် အလွန်အမင်းစိတ်သောကရောက်သူ ဖြစ်လာနိုင်သည်! ဥပမာအချို့ကို သုံးသပ်ကြည့်ပါ။
ရှေးအချိန်က ပရောဖက်မောရှေသည် စိတ်ဓာတ်ကျလွန်းသဖြင့် ဘုရားသခင်ထံ ဤသို့လျှောက်ဆိုခဲ့သည်– “စိတ်တွေ့တော်မူလျှင် . . . အကျွန်ုပ်ကို အလျင်အမြန်သေစေတော်မူပါ။ ကိုယ်ဆင်းရဲကို ကိုယ်မသိမမြင်ပါစေနှင့်။” (တောလည်ရာ ၁၁:၁၅) ရန်သူတို့လက်မှ ထွက်ပြေးတိမ်းရှောင်နေရသော ပရောဖက်ဧလိယက– “အိုထာဝရဘုရား ယခုတန်ပါ၏။ အကျွန်ုပ်အသက်ကိုသိမ်းယူတော်မူပါ” ဟုဟစ်ကြွေးခဲ့သည်။ (၃ ဓမ္မရာဇဝင် ၁၉:၄) ပရောဖက်ယောနကလည်း– “အိုထာဝရဘုရား အကျွန်ုပ်အသက်ကိုနုတ်ယူတော်မူပါ။ အကျွန်ုပ်အသက်ရှင်ခြင်းထက် သေခြင်းသည်သာ၍ကောင်းပါသည်” ဟုဆိုခဲ့သည်။ (ယောန ၄:၃) သို့သော် မောရှေ၊ ဧလိယ၊ ယောနတို့တွင် မည်သူမျှ ကိုယ့်ကိုယ်ကိုသတ်သေခြင်းမပြုခဲ့ပါ။ သူတို့အားလုံး ဘုရားသခင့်ဤအမိန့်တော်ကိုသိကြသည်– “လူအသက်ကိုမသတ်နှင့်။” (ထွက်မြောက်ရာ ၂၀:၁၃) ဘုရားသခင်၌ ခိုင်မြဲသောယုံကြည်ခြင်းရှိကာ မျှော်လင့်ချက်မဲ့သည့်အခြေအနေဟူ၍မရှိကြောင်းနှင့် အသက်သည် ဘုရားသခင်ထံမှဆုလာဘ်ဖြစ်ကြောင်းကို သူတို့သိကြသည်။
ကျွန်ုပ်တို့ယခုရင်ဆိုင်ရသော ပြဿနာများကောအသို့နည်း။ စိတ်လှုပ်ရှားမှုဆိုင်ရာဖိစီးမှု သို့မဟုတ် ကျန်းမာရေးချို့တဲ့မှုများအပြင် ရံဖန်ရံခါ မိသားစုဝင်များ၊ အိမ်နီးချင်းများ သို့မဟုတ် လုပ်ဖော်ဆောင်ဖက်များ၏ရက်စက်စွာပြုကျင့်မှုကိုသည်းခံကြရပေမည်။ “အလုံးစုံသော[မတရားမှု]၊ မတရားသောမေထုန်ကိုပြုခြင်း၊ ဆိုးညစ်ခြင်း၊ လောဘလွန်ကျူးခြင်း၊ မနာလိုခြင်း၊ ငြူစူခြင်း၊ လူအသက်ကိုသတ်ခြင်း၊ ရန်တွေ့ခြင်း၊ လှည့်ဖြားခြင်း၊ သူတစ်ပါးကိုမြင်ပြင်းခြင်းတို့နှင့် ပြည့်စုံသောသူ၊ ချောစားသောသူ၊ ဆဲရေးသောသူ၊ ဘုရားသခင်ကိုမုန်းသောသူ၊ ကြမ်းတမ်းသောသူ၊ မာနထောင်လွှားသောသူ၊ ဝါကြွားသောသူ၊ မတတ်ကောင်းသောအတတ်ကိုစီရင်သောသူ၊ မိဘစကားကိုနားမထောင်သောသူ၊ သတိမရှိသောသူ၊ သစ္စာပျက်သောသူ၊ မိဘ သားမယား စသည်တို့ကိုမချစ်သောသူ၊ ရန်ငြိုးထားသောသူ၊ သနားခြင်း . . . စိတ်မရှိသောသူ” များနှင့်ပြည့်နေကြောင်း သမ္မာကျမ်းစာကဖော်ပြသည်။ (ရောမ ၁:၂၈-၃၁) နေ့စဉ်နေ့တိုင်း ထိုသို့သောသူများနှင့်ဝိုင်းရံလျက်ရှိသောကြောင့် ဘဝသည် ဝန်ထုပ်ဝန်ပိုးသဖွယ်ဖြစ်နေပုံရှိသည်။ နှစ်သိမ့်မှုနှင့် စိတ်သက်သာမှုလိုနေသူများကို ကျွန်ုပ်တို့မည်သို့ကူညီပေးနိုင်မည်နည်း။
ကြည်ကြည်ဖြူဖြူနားထောင်ပေးလိုစိတ်ရှိခြင်း
ခက်ခဲဆင်းရဲမှုနှင့် ဆင်းရဲဝေဒနာခံစားရမှုတို့သည် လူတစ်ဦးကို စိတ်ဗယောက်ဗယက်ဖြစ်စေနိုင်သည်။ ပညာရှိတစ်ဦးက ဤသို့ဆိုသည်– “အကယ်စင်စစ် ညှဉ်းဆဲခြင်းသည် ပညာရှိသောသူကို ရူးစေတတ်၏။” (ဒေ. ၇:၇) ထို့ကြောင့် ကိုယ့်ကိုယ်ကိုသတ်သေခြင်းအကြောင်းပြောဆိုသူတစ်ဦးကို အလေးအနက်ထား စဉ်းစားပေးသင့်သည်။ သူ့တွင် စိတ်လှုပ်ရှားမှုဆိုင်ရာ၊ ရုပ်ပိုင်းဆိုင်ရာ၊ စိတ်ပိုင်းဆိုင်ရာ သို့မဟုတ် ဝိညာဉ်ရေးဆိုင်ရာပြဿနာတစ်ခုခုရှိနေမည်ဆိုလျှင် ချက်ချင်းဂရုစိုက်ပေးရန်လိုအပ်ပေမည်။ အဆင့်မြင့်ကုသမှုများနှင့် ကုထုံးများ အမျိုးမျိုးအဖုံဖုံရှိရာ ကုထုံးပုံစံများနှင့်ပတ်သက်၍မူ ကိုယ်ပိုင်ဆုံးဖြတ်ရမည်သာ။
သတ်သေချင်စိတ်ဖြစ်ပေါ်ရသည့်အကြောင်းသည် အဘယ်အရာကြောင့်ပင်ဖြစ်ပါစေ ကောင်းစွာနားလည်ပေးသူ၊ ထောက်ထားစာနာမှုရှိသူနှင့် စိတ်ရှည်သောသူကို ရင်ဖွင့်လိုက်ရခြင်းသည် တကယ်ထူးခြားသွားပေမည်။ မိသားစုဝင်များနှင့် မိတ်ဆွေများသည် ကြည်ကြည်ဖြူဖြူနားထောင်ပေးလိုစိတ်ရှိပါက အကူအညီဖြစ်စေနိုင်သည်။ စာနာစိတ်ပြမှုနှင့် သနားကြင်နာမှုအပြင် ဘုရားသခင့်နှုတ်မြွက်တော်မှ တည်ဆောက်မှုဖြစ်စေသည့် စဉ်းစားတွေးခေါ်မှုများက မျှော်လင့်ချက်ပျောက်ဆုံးနေသူများကို အလွန်အထောက်အကူပြုနိုင်သည်။
စိတ်သောကရောက်သူများအတွက် ဝိညာဉ်ရေးဆိုင်ရာအထောက်အမ
ကျမ်းစာဖတ်ရှုခြင်းသည် အလွန်အားတက်စေနိုင်ကြောင်း သင်သိရှိလာသောအခါ အံ့အားသင့်ပေမည်။ သမ္မာကျမ်းစာသည် စိတ်ကျန်းမာရေးလက်စွဲစာအုပ်တစ်အုပ်မဟုတ်သော်လည်း ယင်းက အသက်တာဘဝကို တန်ဖိုးထားတတ်ရန် ကျွန်ုပ်တို့ကို ကူညီပေးနိုင်သည်။ ဘုရင်ရှောလမုန်က ဤသို့ဆိုသည်– “ရွှင်လန်းခြင်းအမှုနှင့်အသက်ရှင်စဉ်တွင် ကျေးဇူးပြုခြင်းအမှုမှတစ်ပါး အခြားသောအမှုအရာတို့၌ အကျိုးကျေးဇူးမရှိသည်ကို ငါသိ၏။ လူတိုင်း စားသောက်ခြင်းငှာလည်းကောင်း၊ မိမိကြိုးစားအားထုတ်သမျှသောအမှု၌ ပျော်မွေ့ခြင်းငှာလည်းကောင်း ဘုရားသခင်၏ကျေးဇူးတော်ကြောင့်သာ အခွင့်ရှိ၏။” (ဒေ. ၃:၁၂၊ ၁၃) ဘဝကိုအဓိပ္ပာယ်ရှိစေသည့် ကျေနပ်မှုပေးသောအလုပ်အပြင် သာမန်ရိုးစင်းသောအရာများ—လေကောင်းလေသန့်၊ နေရောင်ခြည်၊ ပန်းမန်များ၊ သစ်ပင်များနှင့် ကျေးငှက်သာရကာများ စသည်တို့—သည် ကျွန်ုပ်တို့ပျော်မွေ့နိုင်စေရန် ဘုရားသခင်ပေးထားသော လက်ဆောင်များဖြစ်သည်။
ပို၍ပင်အားတက်စေသည်မှာ ယေဟောဝါဘုရားသခင်နှင့် ကိုယ်တော်၏သားတော်ယေရှုခရစ်သည် ကျွန်ုပ်တို့ကိုဂရုစိုက်သည်ဟူသည့် ကျမ်းစာအာမခံချက်ဖြစ်သည်။ (ယောဟန် ၃:၁၆; ၁ ပေတရု ၅:၆၊ ၇) ဆာလံဆရာက သင့်လျော်စွာဤသို့ဆိုသည်– “ငါတို့၏ဝန်ကို နေ့စဉ်ထမ်းတော်မူသောဘုရားရှင်၊ ငါတို့ကို ကယ်တင်ခြင်းအကြောင်းဖြစ်တော်မူသော ဘုရားသခင်သည် မင်္ဂလာရှိတော်မူစေသတည်း။” (ဆာလံ ၆၈:၁၉၊ သမ္မာ) ကျွန်ုပ်တို့သည် အရေးမပါ၊ မထိုက်တန်ဟု ခံစားရနိုင်သော်လည်း ဘုရားသခင်သည် မိမိထံဆုတောင်းရန် ကျွန်ုပ်တို့ကိုဖိတ်ခေါ်ထားသည်။ အကူအညီအတွက် နှိမ့်ချ၍အရိုးခံစိတ်ဖြင့်တောင်းလျှောက်သူ မည်သူ့ကိုမျှ အထင်အမြင်သေးမည်မဟုတ်ကြောင်း စိတ်ချပါ။
ယနေ့အချိန်တွင် ပြဿနာကင်းသည့်ဘဝမျိုးကို မည်သူမျှ မှန်ကန်စွာ မမျှော်လင့်နိုင်ပါ။ (ယောဘ ၁၄:၁) သို့တိုင် ဘုရားသခင့်နှုတ်မြွက်တော်မှ အမှန်တရားက ကိုယ့်ကိုယ်ကိုသတ်သေခြင်းသည် ပြဿနာများကိုဖြေရှင်းရန် မှန်ကန်သည့်နည်းလမ်းမဟုတ်ကြောင်း များစွာသောသူတို့ကိုပြသခဲ့ပြီ။ “နိုး၍ ထောင်တံခါးများပွင့်လျက်ရှိသည်ကိုမြင်လျှင်၊ နှောင်ဖွဲ့ခြင်းကိုခံရသောသူတို့သည် ထွက်ပြေးကြပြီဟုထင်ရသည်နှင့်၊ ဓားကိုအိမ်မှဆွဲထုတ်၍ ကိုယ်အသက်ကိုသတ်မည်ပြု” သော ကြံရာမရသည့် ထောင်မှူးတစ်ဦးကို တမန်တော်ပေါလုကူညီပေးခဲ့ပုံကို သုံးသပ်ကြည့်ပါ။ တစ်ခဏအတွင်း ထိုထောင်မှူးက သူ၏ပျက်ကွက်မှုအတွက် အရှက်တကွဲဖြစ်ရခြင်း၊ သေရမည့်ရက်ကို အချိန်ဆွဲထားခြင်းထက်စာလျှင် ကိုယ့်ကိုယ်ကိုသတ်သေခြင်းက သာ၍ကောင်းသည်ဟုတွက်လိုက်သည်။ တမန်တော်ပေါလုက– “ကိုယ်ကိုအပြစ်မပြုနှင့်။ ငါတို့အပေါင်းသည်ရှိကြ၏” ဟုဟစ်၍ပြောဆိုခဲ့သည်။ ပေါလုသည် ထိုသို့ပြောပြီးမရပ်လိုက်ပါ။ သူနှင့်သိလသည် ထောင်မှူးကိုနှစ်သိမ့်ပေးပြီး– “သခင်တို့၊ အကျွန်ုပ်သည် ကယ်တင်ခြင်းသို့ရောက်အံ့သောငှာ အဘယ်သို့ပြုရပါမည်နည်း” ဟုမေးသော ထောင်မှူး၏မေးခွန်းကို ဖြေဆိုပေးခဲ့သည်။ “သခင်ယေရှုခရစ်ကိုယုံကြည်လော့။ ယုံကြည်လျှင် သင်နှင့်သင်၏အိမ်သူအိမ်သားတို့သည် ကယ်တင်ခြင်းသို့ရောက်ကြလိမ့်မည်” ဟုဖြေဆိုခဲ့သည်။ ထိုနောက် သူနှင့်သူ့အိမ်သူအိမ်သားများအား ယေဟောဝါ၏နှုတ်မြွက်တော်ကိုဟောပြောပြီး ရလဒ်မှာ– “မိမိလူအပေါင်းတို့နှင့်တကွ ဗတ္တိဇံကိုချက်ချင်းခံလေ၏။” ထိုထောင်မှူးနှင့် သူ့အိမ်သူအိမ်သားများသည် အလွန်ဝမ်းမြောက်ရွှင်လန်းကြပြီး ဘဝအသက်တာ၏ အဓိပ္ပာယ်သစ်ကို တွေ့ရှိခဲ့ကြသည်။—တမန်တော် ၁၆:၂၇-၃၅။
ယနေ့ခေတ် ဆိုးသွမ်းမှုများသည် ဘုရားသခင်ကြောင့်မဟုတ်ကြောင်း သိရှိရသည်မှာ မည်မျှစိတ်သက်သာစရာပါတကား! ကိုယ်တော့်နှုတ်မြွက်တော်က “လောကတစ်နိုင်ငံလုံးကိုလှည့်ဖြား” သူမှာ “စာတန်အမည်ရှိ” နာမ်ဝိညာဉ်ဆိုးဖြစ်ကြောင်း ဖော်ပြထားသည်။ သို့သော် သူ၏အချိန် ကုန်လုပြီ။ (ဗျာဒိတ် ၁၂:၉၊ ၁၂) မကြာမီ ဘုရားသခင်ကြားဝင်ဆောင်ရွက်ပေးခြင်းဖြင့် မြေကြီးသားများအပေါ် စာတန်နှင့်သူ၏နတ်ဆိုးများ ကျရောက်စေခဲ့သည့် ပူပင်သောကမှန်သမျှ ကင်းဝေးတော့မည်။ ထိုနောက် ဘုရားသခင်ကတိထားရာ ဖြောင့်မတ်သောကမ္ဘာသစ်တွင် မျှော်လင့်ချက်ကင်းမဲ့ခြင်းနှင့် ကိုယ့်ကိုယ်ကိုသတ်သေမှုနောက်ကွယ်ရှိအကြောင်းများ ထာဝစဉ်နိဂုံးချုပ်သွားမည်ဖြစ်သည်။—၂ ပေတရု ၃:၁၃။
အကူအညီပေးရန် အသနားခံသူများအတွက် နှစ်သိမ့်မှု
ယခုပင် စိတ်ပျက်အားလျော့နေသူများသည် ကျမ်းစာမှနှစ်သိမ့်မှုရယူနိုင်ပါသည်။ (ရောမ ၁၅:၄) ဆာလံဆရာဒါဝိဒ်က ဤသို့သီဆိုခဲ့သည်– “အိုဘုရားသခင် ကိုယ်တော်သည် ကျိုးပဲ့ကြေမွသောစိတ်နှလုံးကို မထီမဲ့မြင်ပြုတော်မူမည်မဟုတ်ပါ။” (ဆာလံ ၅၁:၁၇၊ သမ္မာ) ကျွန်ုပ်တို့သည် စမ်းသပ်မှုအချို့ကို မလွဲမရှောင်သာတွေ့ကြုံရပြီး မစုံလင်မှု၏အကျိုးဆက်များကို ခံစားရသည်မှာမှန်၏။ သို့သော် ချစ်ကြင်နာ၍ အကျိုးသင့်အကြောင်းသင့်သဘောရှိသည့် ကောင်းကင်ခမည်းတော်၏ တိကျမှန်ကန်သောအသိပညာကိုဆည်းပူးခြင်းက ကျွန်ုပ်တို့သည် ကိုယ်တော့်ရှေ့တော်တွင် တန်ဖိုးရှိသူများဖြစ်ကြောင်း စိတ်ချစေမည်ဖြစ်သည်။ ဘုရားသခင်သည် ကျွန်ုပ်တို့၏ အရေးပါဆုံးမိတ်ဆွေနှင့် သွန်သင်ပေးသူဖြစ်လာနိုင်သည်။ ယေဟောဝါဘုရားသခင်နှင့် ရင်းနှီးသောဆက်ဆံရေးကို ပျိုးထောင်လျှင် ကျွန်ုပ်တို့ကို ကိုယ်တော်ဘယ်တော့မှစိတ်ပျက်စေမည်မဟုတ်။ “ငါသည် သင်၏အကျိုးနှင့်ယှဉ်သောအရာကိုသွန်သင်၍ သင်သွားအပ်သောလမ်းဖြင့်ပို့ဆောင်သော သင်၏ဘုရားသခင် ထာဝရဘုရားဖြစ်၏” ဟုကျွန်ုပ်တို့၏ဖန်ဆင်းရှင် မိန့်တော်မူသည်။—ဟေရှာယ ၄၈:၁၇။
ယေဟောဝါကိုအားထားမှီခိုခြင်းက လူများစွာကို ကူညီပေးခဲ့ပြီဖြစ်သည်။ သာဓကအနေနှင့်– ယာဉ်တိုက်မှုတစ်ခုတွင် သူ၏တစ်ဦးတည်းသောသား ဆုံးရှုံးခဲ့ရချိန်မှ ကြာရှည်စွာစိတ်ကျဝေဒနာခံစားရခြင်းကြောင့် မာရာသည် စိတ်အားလျော့နေသူဖြစ်သည်။ * မွှန်ထူသွားပြီး သူ့ကိုယ်ကို သေကြောင်းကြံခဲ့သည်။ သို့သော် ယခုသူသည် အိမ်အလုပ်များလုပ်ကိုင်ရန် နေ့တိုင်းအိပ်ရာမှစောစောထသည်။ တေးဂီတနားထောင်ခြင်းနှင့် အခြားသူများကိုကူညီရခြင်းကို ပျော်မွေ့နေသည်။ “ဖြောင့်မတ်သောသူ၊ မဖြောင့်မတ်သောသူရှိသမျှတို့သည် သေခြင်းမှထမြောက်ကြလိမ့်မည်” ဟူသောမျှော်လင့်ချက်က ချစ်လှစွာသောသား၏ ဝမ်းနည်းဖွယ်သေဆုံးခြင်းကြောင့်ရသည့် ဝေဒနာအချို့ကိုဖယ်ရှားပေးပြီး ဘုရားသခင်၌ သူ၏ယုံကြည်ခြင်းကို ခိုင်မာစေခဲ့သည်။ (တမန်တော် ၂၄:၁၅) မာရာသည် ကောင်းကင်တွင် ကောင်းကင်တမန်ကဲ့သို့ဖြစ်လိုစိတ် တစ်ခါမှမရှိခဲ့သောကြောင့် ဆာလံ ၃၇:၁၁ ပါစကားများက သူ့နှလုံးကိုထိမိခဲ့သည်– “စိတ်နှိမ့်ချသောသူတို့မူကား ပြည်တော်ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်။”
နောက်ဘရာဇီးလ်အမျိုးသမီး ဆန်ဒရာသည် မိမိ၏သားသမီးသုံးယောက်အတွက် အကောင်းဆုံးမိခင်ဖြစ်လာရန် အလွန်ကြိုးစားအလုပ်လုပ်ခဲ့သည်။ သူဤသို့ဝန်ခံသည်– “ကျွန်မအဖေ ရုတ်တရက်ဆုံးသွားတယ်၊ တစ်ချိန်ထဲမှာပဲ ကျွန်မယောက်ျားက အခြားအမျိုးသမီးတစ်ယောက်နဲ့ ချစ်ကြိုက်နေတာကိုသိလိုက်ရတဲ့အခါ ကျွန်မအရမ်းအလုပ်များခဲ့တယ်။ အကူအညီအတွက် ဘုရားသခင်ထံဆုတောင်းဖို့တောင် သတိမရအားဘူး။” စိတ်ပျက်အားလျော့လာရာ ဆန်ဒရာသည် မိမိကိုယ်ကိုသတ်သေရန်ကြိုးစားခဲ့သည်။ ပြန်စိတ်တည်ငြိမ်လာရန် အဘယ်အရာက သူ့ကို အကူအညီပေးခဲ့သနည်း။ ဝိညာဉ်ရေးရာများကို တန်ဖိုးထားလေးမြတ်ခြင်းဖြစ်သည်။ “အိပ်ရာမဝင်ခင်ညတိုင်း ကျွန်မကျမ်းစာဖတ်တယ်၊ ကျွန်မဖတ်တဲ့အကြောင်းအရာမှာပါတဲ့ လူတွေရဲ့နေရာမှာ ကိုယ့်ကိုယ်ကို ထားလိုက်တယ်။ ကင်းမျှော်စင်နဲ့ နိုးလော့!မဂ္ဂဇင်းတွေကိုလည်း ကျွန်မဖတ်တယ်၊ ဘဝအတ္ထုပ္ပတ္တိတွေက ကိုယ့်ဘဝအခြေအနေမှာ ကျေနပ်ရောင့်ရဲနေစေဖို့ အကူအညီပေးတဲ့အတွက် အဲ့ဒါတွေကို ကျွန်မအထူးနှစ်သက်ပါတယ်။” ယေဟောဝါသည် သူ၏အကောင်းဆုံးမိတ်ဆွေဖြစ်ကြောင်းသိရှိခြင်းကြောင့် သတ်သတ်မှတ်မှတ်အကြောင်းများအတွက် ဆုတောင်းတတ်လာသည်။
စိတ်ပျက်အားလျော့မှု မရှိတော့မည့်အနာဂတ်
လူသားတို့ခံစားနေရသည့် ဆင်းရဲဝေဒနာသည် တဒင်္ဂသာဖြစ်ကြောင်း သိရခြင်းက တကယ့်နှစ်သိမ့်မှုပါတကား! ဘုရားသခင့်နိုင်ငံတော်အုပ်ချုပ်မှုအောက်တွင် ရာဇဝတ်မှု၊ မတရားမှု သို့မဟုတ် စိတ်စွန်းကွက်မှု၏ သားကောင်များ ယခုဖြစ်နေရသည့် ကလေးသူငယ်များနှင့် လူကြီးများသည် ဝမ်းမြောက်ရွှင်လန်းရလိမ့်မည်။ ပရောဖက်ဆိုင်ရာဆာလံကျမ်းတစ်ချက်တွင် တင်ကြိုဟောထားသည့်အတိုင်း ယေဟောဝါ၏ခန့်အပ်ခံဘုရင်ယေရှုသည် “ငတ်မွတ်သောသူအော်ဟစ်သောအခါ ထိုသူကိုလည်းကောင်း၊ ကိုးကွယ်ရာမရှိ၍ ဆင်းရဲသောသူကိုလည်းကောင်း ချမ်းသာပေးတော်မူလိမ့်မည်။” ထို့ပြင် “ဆင်းရဲသောသူနှင့် ငတ်မွတ်သောသူကိုသနား၍ ငတ်မွတ်သောသူတို့၏အသက်ကို ကယ်တင်တော်မူလိမ့်မည်။” အမှန်ပင် “သူတို့အသက်ကို လှည့်စားခြင်းနှင့် ညှဉ်းဆဲခြင်း၏လက်မှ ရွေးနုတ်၍သူတို့အသွေးကို နှမြောတော်မူလိမ့်မည်။”—ဆာလံ ၇၂:၁၂-၁၄။
ထိုပရောဖက်ပြုချက်ဆိုင်ရာစကားတော်များ ပြည့်စုံရန်အချိန်နီးပြီ။ ယင်းသို့သောအခြေအနေများအောက် ကမ္ဘာပေါ်ထာဝရအသက်ရနိုင်သည်ဟူသည့် အတွေးသည် သင့်အတွက် စွဲမက်စရာမကောင်းပေလော။ စွဲမက်စရာဖြစ်လျှင် ဘဝကိုပျော်မွေ့ရန်နှင့် ဘုရားသခင်ထံမှလက်ဆောင်အဖြစ် ဘဝအသက်တာကိုမြတ်နိုးရန် သင့်တွင်အကြောင်းရင်းရှိနေပြီ။ ဤနှစ်သိမ့်မှုဖြစ်စေသည့် ကျမ်းဆိုင်ရာကတိတော်များအား အခြားသူများကိုဝေမျှပေးလျှင် စာနာမှုကင်းမဲ့ပြီး ချစ်ခင်မှုခေါင်းပါးသည့် ဤလောကတွင် အကူညီပေးရန် အသနားခံနေသူတို့၏ဘဝအသက်တာတွင် များစွာသောပျော်ရွှင်မှုကို သင်စွမ်းဆောင်ပေးနိုင်မည်။
[အောက်ခြေမှတ်ချက်များ]
^ အပိုဒ်၊ 15 နာမည်အချို့ကိုပြောင်းထားသည်။
[စာမျက်နှာ ၆ ပါ ရုပ်ပုံ]
ယနေ့ပျော်ရွှင်စရာအချိန်အခါများစွာရှိ
[စာမျက်နှာ ၇ ပါပုံစာ]
စိတ်ပျက်အားလျော့စရာမရှိတော့မည့်ကမ္ဘာကို သင်စောင့်မျှော်ပါသလော