သင့်နာမည်ကို ထိန်းသိမ်းပါ
သင့်နာမည်ကို ထိန်းသိမ်းပါ
လူတစ်ဦးဆွဲလိုက်သည့် လှပသောအဆောက်အအုံဒီဇိုင်းများက ထိုသူအား ပြောင်မြောက်သောဗိသုကာပညာရှင်အဖြစ် နာမည်ရသွားစေသည်။ ပညာရေးတွင် ထူးချွန်သောအမျိုးသမီးငယ်တစ်ဦးသည် ထက်မြက်သောကျောင်းသူအဖြစ် လူသိများလာသည်။ ဘာမျှအလုပ်,မလုပ်သူပင် လူပျင်းဟု နာမည်ရလာနိုင်သည်။ နှစ်သက်ဖွယ်နာမည်ရရှိစေခြင်း၏တန်ဖိုးကို အလေးပေးကာ ကျမ်းစာက ဤသို့ဖော်ပြသည်– “နာမည်ကောင်းသည် များစွာသောဥစ္စာထက် သာ၍နှစ်သက်ဖွယ်ကောင်း၏။ ကောင်းသောဂုဏ်သတင်းသည် ငွေ၊ ရွှေထက်သာ၍ကောင်း၏။”—သု. ၂၂:၁၊ အမေရိကန်ဘာသာပြန်ကျမ်း။
အချိန်အတိုင်းအတာတစ်ခုအတွင်း သေးငယ်သောလုပ်ရပ်များစွာဖြင့် နာမည်ကောင်းတစ်ခု ရလာစေသည်။ သို့သော် မိုက်မဲသောလုပ်ရပ်တစ်ခုလေးက ၎င်းကိုဖျက်ဆီးပစ်လိုက်နိုင်သည်။ ဥပမာ၊ လိင်ဆိုင်ရာအကျင့်ပျက်မှုတစ်ခုတည်းနှင့်ပင် နာမည်ကောင်းပျက်ပြားသွားနိုင်သည်။ နယပုံပြင်ကျမ်း၏ ၆ ခုမြောက် အခန်းကြီးတွင် ရှေးဣသရေလဘုရင် ရှောလမုန်က နာမည်ကောင်းကိုပျက်စီးစေနိုင်သည့်အပြင် ယေဟောဝါဘုရားသခင်နှင့် ကျွန်ုပ်တို့၏ဆက်ဆံရေးပျက်နိုင်သော စိတ်သဘောထားနှင့်အပြုအမူများနှင့်စပ်လျဉ်း၍ သတိပေးထားသည်။ ယင်းတို့ထဲတွင် အထူးသဖြင့် ယေဟောဝါရွံမုန်းသည့် မဆင်မခြင်အာမခံခြင်း၊ ပျင်းရိခြင်း၊ လိမ်လည်လှည့်ဖြားခြင်းနှင့် လိင်ဆိုင်ရာအကျင့်ယိုယွင်းခြင်းတို့ပါဝင်သည်။ အဆိုပါအကြံဉာဏ်ကို ဂရုပြုခြင်းသည် ကျွန်ုပ်တို့၏နာမည်ကောင်းကို ထိန်းသိမ်းရန် အထောက်အကူရပါလိမ့်မည်။
မဆင်မခြင်အာမခံမှုများမှ သင့်ကိုယ်ကိုကယ်နုတ်
နယပုံပြင်ကျမ်း၏ ၆ ခုမြောက်အခန်းကြီးတွင် ဤစကားများဖြင့် အစပျိုးထားသည်– “ငါ့သား သင်သည် အပေါင်းအဖော်အတွက် အာမခံမိသော်လည်းကောင်း၊ သူတစ်ပါးနှင့်လက်ဝါးချင်းရိုက်မိသော်လည်းကောင်း၊ ကိုယ့်နှုတ်ခမ်းစကားဖြင့် ကျော့မိသော်လည်းကောင်း၊ ကိုယ်မြွက်သောစကားဖြင့် အဖမ်းခံရသော်လည်းကောင်း ငါ့သား သင်သည် အပေါင်းအဖော်လက်တွင်းသို့ရောက်ပြီးဖြစ်၍ ကိုယ်ကိုနုတ်အံ့သောငှာ ဤသို့ပြုလော့။ အပေါင်းအဖော်ထံသို့ အလျင်အမြန်သွား၍ [“ကိုယ်ကိုနှိမ့်ချလျက်၊” ယုဒသန်] ပူပြင်းစွာနှိုးဆော်တောင်းပန်လော့။”—သု. ၆:၁-၃၊ သမ္မာ။
ဤစကားသည် သူတစ်ပါး၊ အထူးသဖြင့် သူစိမ်းတစ်ရံဆံတို့၏ စီးပွားရေးကိစ္စများတွင် မပတ်သက်ရန် ဆုံးမထားခြင်းဖြစ်သည်။ ဣသရေလလူများသည် ‘ဆင်းရဲ၍ လက်အားလျော့သော သူတို့၏ညီအစ်ကိုကိုမစ’ ရမည်မှာမှန်၏။ (ဝတ်ပြုရာ ၂၅:၃၅-၃၈) သို့သော် စီးပွားရေးလုပ်သော ဣသရေလအချို့သည် ကုန်လှောင်ဈေးကစားရသည့် စီးပွားရေးစွန့်စားမှုများတွင် ပါဝင်လုပ်ကိုင်ခဲ့ကြကာ မိမိတို့အတွက် ‘အာမခံပေး’ ရန်အခြားသူများအား အယုံသွင်း၍ ငွေကြေးအကူအညီယူခဲ့ကြသည်၊ သို့ဖြင့် အကြွေးဆပ်ရန်တာဝန်ရှိလာခဲ့သည်။ ယနေ့ အလားတူအခြေအနေမျိုး ပေါ်ပေါက်နိုင်သည်။ ဥပမာ၊ ငွေကြေးဆိုင်ရာအဖွဲ့အစည်းများသည် အရဲစွန့်ပြီးပေးရသည်ဟု ၎င်းတို့ယူမှတ်ထားသော ချေးငွေတစ်ရပ်ကို ချေးရန်အတည်မပြုမီ လူနှစ်ဦးကလက်မှတ်ထိုးဖို့ တောင်းဆိုပေမည်။ အခြားသူများကိုယ်စား ဤသို့အလျင်စလိုတာဝန်ခံပေးလိုက်ခြင်းသည် မည်မျှမိုက်မဲလိုက်လေစွ! ယင်းကြောင့် ကျွန်ုပ်တို့သည် ငွေကြေးထောင်ချောက်ထဲကျော့ဖမ်းမိသွားနိုင်ရာ ဘဏ်များနှင့် အခြားမြီရှင်များအသိုင်းအဝိုင်းတွင် နာမည်ပင်ပျက်သွားစေနိုင်သည်!
အစတွင် အမြော်အမြင်ရှိရာကျသည်ဟုထင်ရသော်လည်း အသေအချာဆန်းစစ်ကြည့်သော် မိုက်မဲရာကျနေကြောင်းထင်ရှားသည့် လုပ်ရပ်တစ်ခုကို လက်ခံမိလျက်သားဖြစ်၍ အကြံရခက်နေကြောင်းတွေ့ရလျှင်ကော အသို့နည်း။ ဤအကြံပေးချက်မှာ မာန်မာနကို ခဝါချပြီး “အပေါင်းအဖော် . . . ထံသို့သွား၍ ပူပြင်းစွာနှိုးဆော်တောင်းပန်”—ဇွဲမလျှော့တမ်းတောင်းဆို—ရန်ဖြစ်သည်။ ကျွန်ုပ်တို့သည် ကိစ္စရပ်များ ပုံမှန်အခြေအနေပြန်ရောက်စေရန် အတတ်နိုင်ဆုံးလုပ်ဆောင်ရမည်။ ကိုးကားချက်တစ်ခုက ဤသို့ဖော်ပြသည်– “သင့်ကတိစာချုပ်ကြောင့် သင် သို့မဟုတ် သင့်မိသားစုကို မထိခိုက်စေရန် သင်၏ရန်ဘက်နှင့်သဘောတူညီမှုရပြီး ကိစ္စရပ်ပြေလည်သွားသည့်အထိ နည်းကုန်လမ်းကုန်ကြိုးစားပါ။” ယင်းကို အချိန်မဆွဲဘဲပြုလုပ်သင့်ကြောင်း ရှင်ဘုရင်က ဤသို့ထပ်ဆင့်ဆိုသည်– “အိပ်မပျော်နှင့်။ မျက်စိမှိတ်၍မငိုက်နှင့်။ မုဆိုးလက်မှ သမင်ဒရယ်ကိုလည်းကောင်း၊ ငှက်ကိုလည်းကောင်း နုတ်ရသကဲ့သို့ ကိုယ်ကိုနုတ်လော့။” (သု. ၆:၄၊ ၅) ကျော့မိခံခြင်းထက် ဖြစ်နိုင်သောအခါ ဉာဏ်ပညာမဲ့သောအာမခံခြင်းကို ပြန်ရုပ်သိမ်းခြင်းသည် သာ၍ကောင်း၏။
ပုရွက်ဆိတ်ကဲ့သို့ လုံ့လဝီရိယရှိလော့
“အချင်းလူပျင်း ပုရွက်ဆိတ်ထံသို့သွား၍ သူ၏အပြုအမူတို့ကိုဆင်ခြင်သဖြင့် ပညာရှိစေလော့” ဟူ၍ ရှောလမုန်ကသတိပေးဆုံးမသည်။ ကျွန်ုပ်တို့သည် သေးငယ်သောပုရွက်ဆိတ်လေးတစ်ကောင်၏အပြုအမူများမှ မည်သည့်ဉာဏ်ပညာကို ရရှိနိုင်သနည်း။ ရှင်ဘုရင်က ဤသို့ဖြေသည်– “ပုရွက်ဆိတ်သည် ဆရာမရှိ၊ ပဲ့ပြင်သောသူမရှိ၊ မင်းမရှိဘဲလျက်၊ နွေကာလနှင့်စပါးရိတ်ရာကာလ၌ မိမိစားစရာအစာကို ရှာဖွေသိုထားတတ်၏။”—သု. ၆:၆-၈။
ပုရွက်ဆိတ်များ၏ဖွဲ့စည်းတည်ဆောက်ပုံသည် အလွန်အံ့သြစရာကောင်းပြီး အချင်းချင်း ထူးခြားစွာပူးပေါင်းလုပ်ဆောင်ကြသည်။ သူတို့သည် ပင်ကိုအသိဉာဏ်ဖြင့် အနာဂတ်အတွက် ရိက္ခာစုဆောင်းတတ်ကြသည်။ သူတို့၌ “ဆရာမရှိ၊ ပဲ့ပြင်သောသူမရှိ၊ မင်းမရှိ” ချေ။ မှန်သည်၊ ဘုရင်မ,ရှိသော်လည်း သူသည် ဥဥပေးဖို့နှင့် ထိုပုရွက်ဆိတ်အုံ၏မိခင်အနေဖြင့်သာ ဘုရင်မဖြစ်နေသည်။ သူသည် မည်သည့်အမိန့်မျှမပေးချေ။ ဆော်သြပေးမည့်ဦးစီး သို့မဟုတ် စစ်ဆေးမည့်ကြီးကြပ်ရေးမှူးမရှိသော်လည်း ပုရွက်ဆိတ်တို့သည် သူတို့၏အလုပ်ကို မမောနိုင်မပန်းနိုင် မရပ်မနားလုပ်တတ်ကြသည်။
ကျွန်ုပ်တို့သည် ပုရွက်ဆိတ်နည်းတူ ဝီရိယစိုက်ထုတ်လုပ်ဆောင်သင့်သည်မဟုတ်လော။ ကြီးကြပ်ပေးသူရှိသည်ဖြစ်စေ၊ မရှိသည်ဖြစ်စေ အလုပ်ကို ကြိုးစားလုပ်ကာ တိုးတက်ရန် အားထုတ်ခြင်းသည် ကျွန်ုပ်တို့အတွက် ကောင်းကျိုးဖြစ်စေသည်။ မှန်၏၊ ကျွန်ုပ်တို့သည် ကျောင်း၌ဖြစ်စေ၊ အလုပ်၌ဖြစ်စေ၊ ဝိညာဉ်ရေးရာလုပ်ဆောင်မှုများတွင် ပါဝင်နေစဉ်ဖြစ်စေ အကောင်းဆုံးလုပ်ဆောင်သင့်သည်။ ပုရွက်ဆိတ်တို့သည် လုံ့လဝီရိယစိုက်ထုတ်ခြင်းမှ အကျိုးကျေးဇူးရရှိသည့်နည်းတူ ဘုရားသခင်သည် ကျွန်ုပ်တို့အား ‘မိမိတို့ကြိုးစားအားထုတ်သမျှမှရသည့် ကောင်းကျိုးကိုတွေ့မြင်စေ’ လိုတော်မူသည်။ (ဒေ. ၃:၁၃၊ ၂၂၊ ကဘ; ၅:၁၈) ကြည်လင်သောကိုယ်ကိုကိုယ်သိသောစိတ်နှင့် စိတ်ကျေနပ်မှုတို့သည် ကြိုးစားအားထုတ်မှုမှရသော အကျိုးကျေးဇူးများဖြစ်သည်။—ဒေ. ၅:၁၂။
ရှောလမုန်သည် အဖြေမလိုသောဤမေးခွန်းနှစ်ခုကို အသုံးပြု၍ ပျင်းရိသူကို သူ၏လတ်လျားနေခြင်းမှ နိုးထလာရန်ကြိုးပမ်းသည်– “အိုလူပျင်း သင်သည် အဘယ်မျှကာလပတ်လုံး အိပ်လျက်နေလိမ့်မည်နည်း။ အဘယ်သောအခါ နိုးလိမ့်မည်နည်း။” ရှင်ဘုရင်သည် ပျင်းရိသူကို ဤသို့ထပ်ဆင့်ဆိုသည်– “ခဏအိပ်လျက်၊ ခဏပျော်လျက်၊ အိပ်ပျော်အံ့သောငှာ ခဏလက်ချင်းပိုက်လျက်နေစဉ်တွင်၊ ဆင်းရဲခြင်းသည် ခရီးသွားသောသူကဲ့သို့လည်းကောင်း၊ ဥစ္စာပြုန်းတီးခြင်းသည် သူရဲကဲ့သို့လည်းကောင်း ရောက်လာလိမ့်မည်။” (သု. ၆:၉-၁၁) ပျင်းရိသူသည် လတ်လျားလတ်လျားလုပ်နေစဉ် ဆင်းရဲခြင်းသည် တောပုန်းဓားပြကဲ့သို့ ရုတ်ကနဲ ပေါ်လာကာ ရှားပါးမှုသည် သူရဲကဲ့သို့တိုက်ခိုက်လေသည်။ လူပျင်း၏လယ်ယာများတွင် ပေါင်းပင်များနှင့်ဖက်ယားပင်များဖြင့် လျင်မြန်စွာဖုံးလွှမ်းသွားသည်။ (သု. ၂၄:၃၀၊ ၃၁) သူ၏စီးပွားရေးလုပ်ငန်းသည် တစ်ခဏအတွင်း လက်လွတ်ဆုံးရှုံးသွားလေသည်။ အလုပ်ရှင်တစ်ဦးသည် လတ်လျားလတ်လျားနေသူကို မည်မျှကြာကြာ လက်သင့်ခံထားမည်နည်း။ လေ့လာကျက်မှတ်ရန် အလွန်ပျင်းရိသောကျောင်းသားတစ်ဦးသည် ကျောင်းသားကောင်းဖြစ်မည်ဟု မျှော်လင့်နိုင်ပါသလော။
ရိုးသားပါ
အကြမ်းဖျင်းဖော်ပြချက်ဖြစ်သော်လည်း ရပ်ရွာတွင် နာမည်ပျက်စေသည့်အပြင် ဘုရားသခင်နှင့်ဆက်ဆံရေးပျက်စေသော အမူအကျင့်နောက်တစ်ခုကို ရှောလမုန် ဤသို့ဆက်ဆိုသည်– “ဆိုးယုတ်သောသူနှင့် မတရားသောသူသည် ကောက်လိမ်သောစကား၌ ကျင်လည်တတ်၏။ မျက်တောင်မခတ်လျက်၊ ခြေဖြင့်အမှတ်ပေးလျက်၊ လက်ချောင်းတို့ဖြင့်သွန်သင်လျက် ပြုတတ်၏။ ကောက်သောစိတ်သဘောနှင့်ပြည့်စုံ၍ မကောင်းသောအကြံကို အစဉ်ကြံစည်တတ်၏။ သူတစ်ပါးချင်းရန်တွေ့စေခြင်းငှာ ပြုတတ်၏။”—သု. ၆:၁၂-၁၄။
ယင်းသည် လိမ်လည်လှည့်ဖြားသူအကြောင်း ဖော်ပြနေခြင်းဖြစ်သည်။ မုသာပြောသူသည် မိမိ၏မဟုတ်မမှန်မှုကို ထိန်ချန်ထားရန် ကြိုးစားတတ်သည်။ မည်သို့အားဖြင့်နည်း။ “ကောက်လိမ်သောစကား” ဖြင့်သာမက အမူအရာဖြင့်လည်းပါသည်။ ပညာရှင်တစ်ဦးက ဤသို့ဖော်ပြသည်– “ဟန်အမူအရာများ၊ အသံနေအသံထားနှင့် မျက်နှာအမူအရာတို့ကပင် လှည့်ကွက်များဖြစ်သည်; အပြင်ပန်းရိုးသားမှု၏နောက်ကွယ်တွင် ဖောက်ပြန်သောစိတ်ထားနှင့် ရန်လိုစိတ်တို့ကို ဖုံးကွယ်ထားသည်။” ဤကဲ့သို့သော အသုံးမကျသူသည် မကောင်းသောအကြံကို ကြံစည်တတ်၍ အစဉ်ရန်တွေ့ငြင်းခုံနေတတ်သည်။ သူ့အတွက် အခြေအနေများ မည်သို့ဖြစ်ပျက်လာမည်နည်း။
“ထို့ကြောင့် သူ၌ ရုတ်တရက်ဘေးသင့်ရောက်၍ သက်သာရာမရအောင် ချက်ချင်းကျိုးပဲ့ပျက်စီးရလိမ့်မည်” ဟုဣသရေလရှင်ဘုရင်က ဖြေဆိုသည်။ (သု. ၆:၁၅၊ သမ္မာ) မုသာသုံးသူသည် ဖော်ထုတ်ခံရသောအခါ သူ၏နာမည် ချက်ချင်းပျက်သွားသည်။ နောက်တစ်ဖန် သူ့ကို မည်သူယုံကြည်မည်နည်း။ “မုသာသုံးသူဟူသမျှ” ကိုထာဝရဖျက်ဆီးခံရမည့်သူများ၏စာရင်းတွင် ထည့်ထားသောကြောင့် သူ၏နိဂုံးသည် အမှန်ပင်ရစရာမရှိအောင် ကြီးမားသောဘေးဒဏ်ဖြစ်သည်။ (ဗျာဒိတ် ၂၁:၈၊ သမ) “အနည်းနည်းတွင် ရိုးဖြောင့်စွာ ငါတို့ကျင့်ကြံပြုမူ” ကြပါစို့။—ဟေဗြဲ ၁၃:၁၈၊ သမ။
ယေဟောဝါမုန်းတီးရာများကို မုန်းတီး
မကောင်းမှုကို မုန်းတီးခြင်း—မိမိ၏နာမည်ပျက်စေသော အပြုအမူများ မပြုမိအောင် တားဆီးပါသည်တကား! ကျွန်ုပ်တို့သည် မကောင်းမှုကို စက်ဆုပ်ရွံရှာစိတ်ရှိလာအောင် ပြုစုပျိုးထောင်သင့်သည်မဟုတ်လော။ သို့သော် မုန်းတီးသင့်သည့်အရာများကား အတိအကျအားဖြင့် အဘယ်နည်း။ ရှောလမုန်က ဤသို့ဖော်ပြသည်– “ထာဝရဘုရားမုန်းတော်မူသောအရာ ခြောက်ပါးမက စက်ဆုပ်ရွံရှာတော်မူသောအရာ ခုနစ်ပါးဟူမူကား၊ ထောင်လွှားသော မျက်နှာတစ်ပါး၊ မုသာ၌ကျင်လည်သော လျှာတစ်ပါး၊ အပြစ်မရှိသောသူ၏အသက်ကို သတ်သောလက်တစ်ပါး၊ မကောင်းသောအကြံကို ကြံစည်သောနှလုံးတစ်ပါး၊ အပြစ်ပြုရာသို့ အလျင်အမြန်ပြေးတတ်သောခြေတစ်ပါး၊ မုသာစကားကိုပြော၍ မမှန်သောသက်သေတစ်ပါး၊ အပေါင်းအဖော်ချင်း ရန်တွေ့စေခြင်းငှာပြုတတ်သောသူတစ်ပါးတည်း။”—သု. ၆:၁၆-၁၉။
နယပုံပြင်ကျမ်းကဖော်ပြထားသော ဤခုနစ်မျိုးသည် အခြေခံဖြစ်ပြီး မကောင်းမှုအမျိုးအစား အားလုံးနီးပါးနှင့် အကျုံးဝင်သည်။ “ထောင်လွှားသောမျက်နှာတစ်ပါး” နှင့် “မကောင်းသောအကြံကို ကြံစည်သောနှလုံးတစ်ပါး” တို့သည် စိတ်ဖြင့်အပြစ်ကျူးလွန်သည်။ “မုသာ၌ကျင်လည်သော လျှာတစ်ပါး” နှင့် “မုသာစကားကိုပြော၍ မမှန်သောသက်သေတစ်ပါး” တို့သည် နှုတ်စကားဖြင့် အပြစ်ပြုခြင်းဖြစ်သည်။ “အပြစ်မရှိသောသူ၏အသက်ကိုသတ်သော လက်တစ်ပါး” နှင့် “အပြစ်ပြုရာသို့ အလျင်အမြန်ပြေးတတ်သော ခြေတစ်ပါး” တို့သည် မကောင်းမှုပြုခြင်းဖြစ်၏။ အတူတကွငြိမ်းချမ်းစွာနေထိုင်ကြသူတို့ထဲတွင် ပဋိပက္ခဖြစ်အောင် မီးမွေးပေးရခြင်းကို အလွန်နှစ်သက်ကြသည့်လူစားမျိုးကို ယေဟောဝါ အထူးမုန်းတီးတော်မူသည်။ လူတို့၏မကောင်းသောအကျင့်များ ဆက်၍ပင်တိုးပွားလာသောကြောင့် ထိုစာရင်းမှာ ပြီးပြည့်စုံခြင်းမရှိဟူသောသဘောဖြစ်သည်ကို ခြောက်မျိုးမှခုနစ်မျိုးအထိများပြားလာခြင်းက ဖော်ပြ၏။
မှန်၏၊ ကျွန်ုပ်တို့သည် ဘုရားသခင်မုန်းတီးရာများကို စက်ဆုပ်ရွံရှာဖို့လိုသည်။ ဥပမာ၊ “ထောင်လွှားသောမျက်နှာ၊” သို့မဟုတ် အခြားမည်သည့်မာနထောင်လွှားမှုမျိုးကိုမဆို ရှောင်ရမည်။ ထို့ပြင် ထိခိုက်စေသောအတင်းအဖျင်းပြောခြင်းသည် အလွယ်တကူပင် “အပေါင်းအဖော်ချင်းရန်တွေ့” စေနိုင်သောကြောင့် ၎င်းကို မလွဲဧကန်ရှောင်ရမည်။ ကျွန်ုပ်တို့သည် “အပြစ်မရှိသောသူ၏အသက်ကိုသတ်” မည်မဟုတ်သော်လည်း ကြင်နာမှုမရှိသောတစ်ဆင့်စကား၊ မမှန်ကန်သောဝေဖန်ချက် သို့မဟုတ် မုသာတို့ကို လိုက်ဖြန့်ခြင်းဖြင့် အခြားသူ၏နာမည်ကောင်းကို ဖျက်ဆီးပစ်နိုင်သည်မှာ သေချာသည်။
“မိန်းမသည်အဆင်းလှသော်လည်း တပ်မက်သောစိတ်မရှိနှင့်”
ရှောလမုန်သည် သူ၏ဆုံးမစကား နောက်တစ်ပိုင်းကို ဤသို့ပြောခြင်းဖြင့် စတင်သည်– “ငါ့သား အဘ၏ပညတ်စကားကို နားထောင်လော့။ အမိပေးသောတရားကို မပယ်နှင့်။ နှလုံးပေါ်မှာအမြဲချည်၍ လည်ပင်း၌ဆွဲထားလော့။” အကြောင်းကားအဘယ်နည်း။ “သင်သည် အခြားသို့သွားသောအခါ ထိုပညတ်တရားသည် လမ်းပြလိမ့်မည်။ အိပ်သောအခါ သင့်ကိုစောင့်လိမ့်မည်။ နိုးသောအခါ သင်နှင့်နှုတ်ဆက်လိမ့်မည်။”—သု. ၆:၂၀-၂၂။
ကျမ်းစာပဲ့ပြင်သွန်သင်မှုသည် လိင်ဆိုင်ရာအကျင့်ပျက်မှုထောင်ချောက်မှ ကျွန်ုပ်တို့ကို အမှန်ပင်ကာကွယ်ပေးနိုင်သလော။ ကာကွယ်ပေးနိုင်ပါသည်။ ကျွန်ုပ်တို့ကို ဤသို့စိတ်ချစေသည်– “ပညတ်တော်သည် မီးခွက်ဖြစ်၏။ တရားတော်သည် အလင်းဖြစ်၏။ အပြစ်ကိုပြတတ်သော [ဆုံးမ]စကားသည် အသက်လမ်းဖြစ်၏။ ဆိုးသောမိန်းမနှင့်လည်းကောင်း၊ အမျိုးပျက်သောမိန်းမချော့မော့တတ်သော နှုတ်နှင့်လည်းကောင်း လွတ်စေခြင်းငှာ သင့်ကိုစောင့်ဖို့ရာဖြစ်သတည်း။” (သု. ၆:၂၃၊ ၂၄) ဘုရားသခင့်နှုတ်မြွက်စကားတော်၏ ဆုံးမစကားကို သတိရပြီး အသုံးပြုခြင်းဖြင့် ‘ကျွန်ုပ်တို့ခြေရှေ့မှာ မီးခွက်ဖြစ်၍ ကျွန်ုပ်တို့လမ်းခရီးကိုလင်းစေ’ သောအခါ အကျင့်ပျက်အမျိုးသမီးတစ်ဦး သို့မဟုတ် အလားတူ အကျင့်ပျက်အမျိုးသားတစ်ဦး၏ နှုတ်ချိုသောဖြားယောင်းသွေးဆောင်မှုများကို တွန်းလှန်ရန်ထောက်ကူလိမ့်မည်။—ဆာလံ ၁၁၉:၁၀၅။
“ထိုသို့သောမိန်းမသည် အဆင်းလှသော်လည်း တပ်မက်သောစိတ်မရှိနှင့်။ သူသည် မျက်ခမ်းတို့ဖြင့် သင့်ကိုမကျော့မိစေနှင့်” ဟူ၍ ပညာရှိဘုရင်က သတိပေးဆုံးမသည်။ အဘယ်ကြောင့်နည်း။ “အကြောင်းမူကား ပြည့်တန်ဆာမကို မှီဝဲသောယောက်ျားသည် ဆင်းရဲ၍မုန့်တစ်လုံးကိုသာရတတ်၏။ မျောက်မထားသောမိန်းမသည်လည်း မြတ်သောအသက်ကို ဖမ်းတတ်၏။”—သု. ၆:၂၅၊ ၂၆။
ရှောလမုန်သည် မျောက်မထားသောဇနီးကို ပြည့်တန်ဆာမအဖြစ် ရည်ညွှန်းနေခြင်းလော။ ဖြစ်ကောင်းဖြစ်နိုင်ပါသည်။ သို့မဟုတ် သူသည် ပြည့်တန်ဆာမနှင့် ဖောက်ပြန်မှု၏အကျိုးဆက်များနှင့် အခြားယောက်ျား၏မိန်းမနှင့် ပြစ်မှားမှု၏အကျိုးဆက်များကို ခွဲခြားဖော်ပြခြင်းဖြစ်နိုင်၏။ ပြည့်တန်ဆာမနှင့် မှားယွင်းသူသည် “မုန့်တစ်လုံးကိုသာရ” သည့်ဘဝရောက်—မွဲပြာကျသွား—နိုင်သည်။ သူသည် သေစေနိုင်သော အေအိုင်ဒီအက်စ်အပါအဝင် နာကျင်သော သို့မဟုတ် ကိုယ်အင်္ဂါချို့တဲ့စေသော လိင်ဆိုင်ရာကူးစက်ရောဂါများကိုပင် ရရှိနိုင်သည်။ အခြားတစ်ဖက်တွင်မူ၊ သူတစ်ပါး၏အိမ်ထောင်ဖက်နှင့် မှားယွင်းရန်ရှာကြံသူသည် ပညတ်အရ သာ၍ကြီးမားသော ရုတ်ခြည်းအန္တရာယ်ရှိမည်ဖြစ်သည်။ မျောက်မထားသောမိန်းမသည် တရားမဝင်ပေါင်းဖက်သူ၏ “မြတ်သောအသက်ကို” အန္တရာယ်ပြုတတ်၏။ “အပျော်ကြူးခြင်းသည် အသက်တိုခြင်းထက်ပင်မကသည့် . . . အလားအလာရှိသည်” ဟုအကိုးအကားပြုစာအုပ်တစ်အုပ်က ဆိုသည်။ “အပြစ်ရှိသူသည် သေဒဏ်ခံရနိုင်သည်။” (ဝတ်ပြုရာ ၂၀:၁၀; တရားဟောရာ ၂၂:၂၂) ဤသို့သောအမျိုးသမီးသည် မည်မျှပင်လှပပါစေ တပ်မက်သောစိတ်မရှိပါနှင့်လေ။
‘သင့်ရင်ခွင်တွင် မီးကို မပိုက်ဖက်နှင့်’
သူ့သားအိမ်ရာပြစ်မှားခြင်း အန္တရာယ်ကြီးမားမှုကို သာ၍လေးနက်စေရန် ရှောလမုန်သည် ဤသို့မေးခွန်းထုတ်သည်– “လူသည် အဝတ်မလောင်ဘဲ မီးကိုပိုက်ဖက်နိုင်သလော။ ခြေမလောင်ဘဲ မီးခဲပေါ်မှာနင်းနိုင်သလော။” ပုံဆောင်ချက်၏အဓိပ္ပာယ်ကို ရှင်းပြကာ ဤသို့ဆိုသည်– “သူ့မယားထံသို့ဝင်သောသူသည် ထိုနည်းတူဖြစ်၏။ သူ့မယားကိုပြစ်မှားသောသူမည်သည်ကား အပြစ်နှင့်မကင်းမလွတ်နိုင်ရာ။” (သု. ၆:၂၇-၂၉) ဤသို့သောအပြစ်ရှိသူသည် ဧကန်မလွဲအပြစ်ဒဏ်ခံရမည်ဖြစ်သည်။
“မွတ်သိပ်သောစိတ်ပြေစေခြင်းငှာ ခိုးသောသူပင် အပြစ်မလွတ်ရ” ဟူ၍ ကျွန်ုပ်တို့ကို သတိပေးသည်။ သို့သော်ငြားလည်း “တွေ့မိလျှင် ခုနစ်ဆပြန်ပေးရမည်။ ကိုယ်အိမ်၌ရှိသမျှသော ဥစ္စာတို့ကိုလျော်ရမည်” ဖြစ်သည်။ (သု. ၆:၃၀၊ ၃၁) ရှေးဣသရေလခေတ်တွင် သူခိုးတစ်ယောက်သည် သူပိုင်ဆိုင်သမျှအကုန်ပေးလျော်လိုက်လျှင်ပင် ဆက်၍ပေးလျော်ရန်လိုသည်။ * လုပ်ခဲ့သမျှအတွက် ခွင့်လွှတ်စရာအကြောင်းမရှိသော သူ့သားအိမ်ရာပြစ်မှားသူမှာ ပို၍ပင်အပြစ်ပေးထိုက်သူဖြစ်လိမ့်မည်!
“သူ့မယားကို ပြစ်မှားသောသူသည် ဉာဏ်မရှိ” ဟူ၍ ရှောလမုန်ဖော်ပြသည်။ ဉာဏ်မရှိသောသူသည် “မိမိအသက်ကိုဖျက်ဆီးတတ်” သောကြောင့် ကောင်းစွာချင့်ချိန်နိုင်စွမ်းမရှိပါ။ (သု. ၆:၃၂) အပြင်ပန်းအားဖြင့် သူသည် ဂုဏ်အသရေရှိသူဟု ထင်မြင်ရသော်လည်း အတွင်းလူမှာ လျော်ကန်သောကြီးထွားရင့်သန်မှုမရှိချေ။
သူ့မယားပြစ်မှားသူတစ်ဦး ရိတ်သိမ်းရမည့်အကျိုးဆက်များထက်ပင် ပို၍များသည်။ “နာကျင်စွာထိခိုက်ခြင်းနှင့် အသရေရှုတ်ချခြင်းကို ခံရလိမ့်မည်။ သူ၏အရှက်ကွဲခြင်းသည် မပြေနိုင်။ အကြောင်းမူကား၊ ယောက်ျားသည် မယားကိုမယုံသောစိတ်ရှိလျှင် ပြင်းထန်စွာအမျက်ထွက်တတ်၏။ အပြစ်ပေးချိန်ရောက်သောအခါ သနားခြင်းမရှိတတ်။ လျော်ပြစ်ငွေမည်မျှကို ပမာဏမပြုတတ်။ များစွာသောလက်ဆောင်တို့ကိုပေးသော်လည်း စိတ်မပြေတတ်။”—သု. ၆:၃၃-၃၅။
သူခိုးတစ်ဦးသည် ခိုးယူသည့်အရာများအတွက် အလျော်ပေးနိုင်သော်လည်း သူ့သားအိမ်ရာပြစ်မှားသူသည် ပေးချေ၍မရနိုင်ချေ။ သူသည် အမျက်ထွက်နေသောခင်ပွန်းကို မည်သည့်လျော်ကြေးပေးဆပ်နိုင်မည်နည်း။ မည်မျှပင်တောင်းပန်စေကာမူ အမှားပြုသူအတွက် သနားကြင်နာစိတ်ပြန်ရနိုင်ဖွယ်မရှိချေ။ သူ့သားအိမ်ရာပြစ်မှားသူသည် သူ၏အပြစ်အတွက် အဘယ်နည်းဖြင့်မျှ လျော်ကြေးပေး၍မရနိုင်ချေ။ အကဲ့ရဲ့ခံရပြီး နာမည်ပျက်ခြင်းသာ အဖတ်တင်မည်။ ထို့ပြင် သူရထိုက်သောအပြစ်ဒဏ်မှ လွတ်မြောက်ဖို့ အဘယ်နည်းနှင့်မျှ ရွေးနုတ်ရန် သို့မဟုတ် ကျေအေးရန် မရနိုင်တော့ပါ။
ကျွန်ုပ်တို့၏နာမည်ကောင်းကိုပျက်စေပြီး ဘုရားသခင်အပေါ် ကဲ့ရဲ့ရှုတ်ချစရာဖြစ်စေမည့် သူ့သားအိမ်ရာပြစ်မှားခြင်းအပြင် အခြားအကျင့်အကြံ၊ စိတ်ထားတို့နှင့် ကင်းရှင်းစွာနေထိုင်ခြင်းသည် မည်မျှပညာရှိလေစွ! ထို့ပြင် မိုက်မဲသောအာမခံချက်မပြုလုပ်ရန် သတိပြုကြပါလေ။ ဝီရိယရှိရှိလုပ်ဆောင်ခြင်းနှင့် မှန်ရာကိုပြောခြင်းတို့ဖြင့် ကျွန်ုပ်တို့၏နာမည်ကောင်းကို တန်ဆာဆင်ကြစို့လေ။ ကျွန်ုပ်တို့သည် ယေဟောဝါမုန်းတီးရာများကို မုန်းတီးရန်ကြိုးစားအားထုတ်စဉ် ကိုယ်တော်နှင့်လူသားချင်းရှေ့တွင် ကျွန်ုပ်တို့ နာမည်ကောင်းရရှိရန် လုပ်ဆောင်နိုင်ပါစေ။
[အောက်ခြေမှတ်ချက်များ]
^ အပိုဒ်၊ 28 မောရှေပညတ်အရ သူခိုးသည် နှစ်ဆ၊ လေးဆ၊ သို့မဟုတ် ငါးဆ ပြန်လျော်ရန် တောင်းဆိုခံခဲ့ရသည်။ (ထွက်မြောက်ရာ ၂၂:၁-၄) “ခုနစ်ဆ” ဟူသောဝေါဟာရမှာ ခိုးခဲ့သည့်အရာထက် အဆပေါင်းများစွာပိုများနိုင်သော အပြစ်ဒဏ်အပြည့်အဝဟု အဓိပ္ပာယ်ရနိုင်သည်။
[စာမျက်နှာ ၂၅ ပါ ရုပ်ပုံ]
ချေးငွေအတွက် နှစ်ဦးလက်မှတ်ထိုးခြင်းကိစ္စကို သတိပြုပါ
[စာမျက်နှာ ၂၆ ပါ ရုပ်ပုံ]
ပုရွက်ဆိတ်ကဲ့သို့ ဝီရိယစိုက်ထုတ်လုပ်ကိုင်ပါ
[စာမျက်နှာ ၂၇ ပါ ရုပ်ပုံ]
ထိခိုက်စေသောအတင်းအဖျင်းစကားကို မပြောမိရန်ထိန်းပါ