ကျမ်းစာဖတ်ခြင်း —အကျိုးဖြစ်ထွန်း၍ ပျော်ရွှင်မှုရ
ကျမ်းစာဖတ်ခြင်း—အကျိုးဖြစ်ထွန်း၍ ပျော်ရွှင်မှုရ
‘သင်သည် ကျမ်းစာကို . . . နေ့ညမပြတ်ကြည့်ရှုဖတ်ရွတ်ရမည်။’—ယောရှု ၁:၈။
၁။ ကောင်းနိုးရာရာဖတ်ရှုခြင်းနှင့် ကျမ်းစာကို အထူးပြုဖတ်ရှုခြင်းတို့နှင့်စပ်လျဉ်းသော အကျိုးကျေးဇူးအချို့ကား အဘယ်နည်း။
ဖတ်သင့်ဖတ်ထိုက်သောအကြောင်းအရာကို ဖတ်ရှုခြင်းသည် အကျိုးရှိသောလေ့လာမှုတစ်ရပ်ဖြစ်၏။ ပြင်သစ်နိုင်ငံရေးအတွေးအခေါ်ပညာရှင် မွန်တီစ်ကရူး (ချားလ်စ်-လူးဝစ္စ ဒီ စကန်းဒက်တ်) ကဤသို့ရေးသားခဲ့သည်– “ကျွန်တော့်အတွက်တော့ ဖတ်ရှုလေ့လာခြင်းဟာ ဘဝရဲ့ငြီးငွေ့မှုကို ကုစားရာမှာ အမြဲတစေ သမားတော်တစ်ဦးပါပဲ။ ကျွန်တော်တွေ့ကြုံရတဲ့ ဘယ်ဖိစီးမှုမဆိုဟာ တစ်နာရီလောက်စာဖတ်လိုက်ရင် ပျောက်ပျက်ကုန်တာပဲ။” ယင်းသည် သမ္မာကျမ်းစာဖတ်ရှုခြင်းတွင် အတိုင်းထက်အလွန် မှန်ကန်လှပေ၏။ မှုတ်သွင်းခံဆာလံဆရာက ဤသို့ဆိုသည်– “ထာဝရဘုရား၏တရားတော်သည် စုံလင်သည်ဖြစ်၍ စိတ်ဝိညာဉ်ကိုပြုပြင်တတ်၏။ ထာဝရဘုရား၏သက်သေခံတော်မူချက်သည် ဟုတ်မှန်သည်ဖြစ်၍ မလိမ္မာသောသူတို့ကို လိမ္မာစေတတ်၏။ ထာဝရဘုရား၏နည်းဥပဒေသတို့သည် ဖြောင့်မတ်သည်ဖြစ်၍ စိတ်နှလုံးကိုရွှင်လန်းစေတတ်၏။”—ဆာလံ ၁၉:၇၊ ၈။
၂။ နှစ်ကာလများတစ်လျှောက် ယေဟောဝါသည် သမ္မာကျမ်းစာကို အဘယ်ကြောင့် ထိန်းသိမ်းကာကွယ်ပေးခဲ့သနည်း၊ ယင်းနှင့်ပတ်သက်၍ မိမိ၏လူတို့ အဘယ်အရာပြုလုပ်ဖို့ ကိုယ်တော်မျှော်လင့်သနည်း။
၂ သမ္မာကျမ်းစာ၏အာဘော်ရှင်၊ ယေဟောဝါဘုရားသခင်သည် သမ္မာကျမ်းစာကို ဘာသာရေးများနှင့် လောကရေးရာနှစ်ရပ်စလုံးမှရန်သူများ၏ ပြင်းပြင်းထန်ထန်ဆန့်ကျင်မှုမှ ရာစုနှစ်များတစ်လျှောက် ထိန်းသိမ်းကာကွယ်ပေးခဲ့သည်။ “လူအပေါင်းတို့သည် ကယ်တင်ခြင်းသို့ရောက်၍ [အမှန်] တရားကိုသိစေခြင်း” မှာ ကိုယ်တော်၏အလိုတော်ဖြစ်သောကြောင့် မိမိ၏စကားတော်ကို လူသားအားလုံးရရှိနိုင်စေရန် ကိုယ်တော်စီမံပေးခဲ့၏။ (၁ တိမောသေ ၂:၄) ဘာသာစကား ၁၀၀ ကိုသုံးမည်ဆိုလျှင် ကမ္ဘာသူကမ္ဘာသား ၈၀ ရာခိုင်နှုန်းခန့်ဖတ်ရှုနိုင်ကြကြောင်း ခန့်မှန်းရသည်။ သမ္မာကျမ်းစာတစ်အုပ်လုံးကို ဘာသာစကားပေါင်း ၃၇၀ ဖြင့်ရရှိနိုင်ကြပြီး ကျမ်းစာ၏ တစ်စိတ်တစ်ပိုင်းကို နောက်ထပ်ဘာသာစကားကြီးနှင့် ဒေသအလိုက်စကားပေါင်း ၁၈၆၀ တို့ဖြင့် ဖတ်ရှုနိုင်ကြသည်။ ယေဟောဝါသည် ကိုယ်တော်၏စကားတော်အား မိမိ၏လူတို့ကို ဖတ်ရှုစေလိုသည်။ မှန်ပါသည်၊ မိမိ၏စကားတော်ကိုအာရုံစိုက်သော ကိုယ်တော်၏ကျေးကျွန်များ၊ ယင်းကို နေ့စဉ်ဖတ်ရှုသူတို့အား ကိုယ်တော်ကောင်းချီးပေးတော်မူ၏။—ဆာလံ ၁:၁၊ ၂။
ကြီးကြပ်မှူးများ ကျမ်းစာဖတ်ရှုရန် တောင်းဆိုခံရ
၃၊ ၄။ ယေဟောဝါသည် ဣသရေလရှင်ဘုရင်များကို ဘာတောင်းဆိုခဲ့သနည်း၊ ဤသို့တောင်းဆိုရသည့် အဘယ်အကြောင်းရင်းများသည် ယနေ့ ခရစ်ယာန်အကြီးအကဲများနှင့်လည်း သက်ဆိုင်သနည်း။
၃ ဣသရေလလူမျိုး၌ လူသားရှင်ဘုရင်တစ်ပါး ချီးမြှောက်ပေးမည်ဟု တင်ကူးပြောဆိုချိန်၌ ယေဟောဝါက ဤသို့မိန့်တော်မူခဲ့သည်– “ထိုရှင်ဘုရင်သည် . . . သူ၏ဘုရားသခင်ကိုကြောက်ရွံ့၍ ဤပညတ်တရားစကားတော်အလုံးစုံတို့ကို ကျင့်စောင့်အောင်သွန်သင်မည်အကြောင်း၊ သူ၏ညီအစ်ကိုတို့ကို မထီမဲ့မြင်ပြု၍ မာနထောင်လွှားသဖြင့် တရားလမ်းမှ လက်ယာဘက်၊ လက်ဝဲဘက်သို့မလွှဲမည်အကြောင်း၊ နန်းတော်ပေါ်မှာထိုင်သောအခါ လေဝိသားယဇ်ပုရောဟိတ်၌ရှိသော ဤဓမ္မပညတ်တရားစာကို ရေးကူး၍ လက်ခံစာကို တစ်သက်လုံးစောင့်ရှောက်ကြည့်ရှုဖတ်ရွတ်ရမည်။”—တရားဟောရာ ၁၇:၁၈-၂၀။
၄ ဘုရားသခင့်ပညတ်ပါရှိသောစာအုပ်အား နေ့စဉ်ဖတ်ရှုရန် ဣသရေလလူမျိုး၏ မင်းလောင်းအားလုံးအား ယေဟောဝါတောင်းဆိုခဲ့ရသည့်အကြောင်းရင်းများကို သတိပြုပါ– (၁) “သူ၏ဘုရားသခင်ကိုကြောက်ရွံ့၍ ဤပညတ်တရားစကားတော်အလုံးစုံတို့ကို ကျင့်စောင့်အောင်သွန်သင်မည်အကြောင်း”; (၂) ‘သူ၏ညီအစ်ကိုတို့ကို မထီမဲ့မြင်ပြု၍ မာနထောင်လွှားခြင်းမရှိမည်အကြောင်း’; (၃) “တရားလမ်းမှ လက်ယာဘက်၊ လက်ဝဲဘက်သို့မလွှဲမည်အကြောင်း” ဖြစ်သည်။ ယနေ့ ခရစ်ယာန်ကြီးကြပ်မှူးများသည် ယေဟောဝါအားကြောက်ရွံ့ရန်၊ ကိုယ်တော်၏ပညတ်များကိုနာခံရန်၊ မိမိညီအစ်ကိုချင်း၌ မာနထောင်လွှားမှုကိုရှောင်ကြဉ်ရန်နှင့် ယေဟောဝါ၏ပညတ်တော်များမှ လမ်းလွဲသွားခြင်းကို ရှောင်ရှားရန်မလိုအပ်ပေလော။ ဣသရေလရှင်ဘုရင်များတမျှပင် နေ့စဉ်ကျမ်းစာဖတ်ရှုခြင်းသည် သူတို့အတွက် အမှန်ပင်အရေးကြီးပေသည်။
၅။ အုပ်ချုပ်ရေးအဖွဲ့သည် ဌာနခွဲကော်မတီဝင်များထံသို့ ကျမ်းစာဖတ်ရှုခြင်းနှင့်ပတ်သက်ပြီး အဘယ်အကြောင်း မကြာသေးမီက ရေးသားခဲ့သနည်း၊ ယင်းသို့သောအကြံပြုချက်ကို ခရစ်ယာန်အကြီးအကဲများအားလုံး အဘယ်ကြောင့် ကောင်းစွာလိုက်နာကြရမည်နည်း။
၅ ယနေ့ ခရစ်ယာန်အကြီးအကဲများသည် လွန်စွာအလုပ်များကြရာ နေ့စဉ်ကျမ်းစာဖတ်ရှုခြင်းသည် စိန်ခေါ်ချက်တစ်ရပ်ဖြစ်နေ၏။ ဥပမာ၊ ယေဟောဝါသက်သေများ၏အုပ်ချုပ်ရေးအဖွဲ့ဝင်များနှင့် ကမ္ဘာတစ်ဝန်းရှိ ဌာနခွဲကော်မတီဝင်များအားလုံးသည် အလွန်အလုပ်များသူများဖြစ်ကြသည်။ သို့တိုင် မကြာသေးမီက ဌာနခွဲကော်မတီအားလုံးသို့ အုပ်ချုပ်ရေးအဖွဲ့မှပေးပို့သောစာတစ်စောင်တွင် နေ့စဉ်ကျမ်းစာဖတ်ရှုခြင်းနှင့် လေ့လာမှုအကျင့်ကောင်းများအတွက် လိုအပ်မှုကိုအလေးပေးဖော်ပြခဲ့သည်။ စာတွင်ထောက်ပြထားသည့် ဤအရာသည် ယေဟောဝါနှင့် အမှန်တရားအတွက် ကျွန်ုပ်တို့၏မေတ္တာကိုတိုးပွားစေမည်ဖြစ်ပြီး “ကျွန်ုပ်တို့၏ယုံကြည်ခြင်း၊ ရွှင်လန်းမှုနှင့် အဆုံး၌ဘုန်းစည်းစိမ်ဝင်စားရန် စွဲစွဲမြဲမြဲဆက်ရှိစေဖို့ ကျွန်ုပ်တို့ကိုကူညီပေး” မည်ဖြစ်သည်။ ယေဟောဝါသက်သေများ၏အသင်းတော်များရှိ အကြီးအကဲအားလုံးသည် ထပ်တူလိုအပ်ချက်ရှိကြောင်း ခံစားရကြသည်။ ကျမ်းစာကိုနေ့စဉ်ဖတ်ရှုခြင်းက သူတို့အား ‘ပညာရှိစွာလုပ်ဆောင်ရန်’ ကူညီပေးလိမ့်မည်။ (ယောရှု ၁:၇၊ ၈) သမ္မာကျမ်းစာဖတ်ရှုခြင်းသည် အထူးသဖြင့် သူတို့အတွက် “သွန်သင်ခြင်း၊ အပြစ်ဖော်ပြဆုံးမခြင်း၊ အမှားကိုပြုပြင်ခြင်းနှင့် ဖြောင့်မတ်စွာလေ့ကျင့်ပေးခြင်းတို့အတွက် အကျိုးဖြစ်ထွန်း” သည်။—၂ တိမောသေ ၃:၁၆၊ ပြင်ဆင်တည်းဖြတ်စံတင်ကျမ်း။
လူငယ်နှင့် လူကြီးတို့အတွက် လိုအပ်ချက်တစ်ရပ်
၆။ ယောရှုသည် စုဝေးလာခဲ့သောဣသရေလအနွယ်များနှင့် တစ်ကျွန်းတစ်နိုင်ငံသားတို့ရှေ့၌ ယေဟောဝါမိန့်မြွက်သမျှကို အဘယ်ကြောင့်ကျယ်ကျယ်ဖတ်ရွတ်ပြခဲ့ရသနည်း။
၆ ရှေးအချိန်က ကိုယ်ပိုင်အသုံးပြုရန်အတွက် ကျမ်းစာတစ်စောင်ချင်းစီ မရရှိနိုင်သောကြောင့် စုဝေးလာကြသောပရိသတ်အရှေ့၌ သမ္မာကျမ်းစာကိုဖတ်ရှုခဲ့ကြသည်။ ယေဟောဝါသည် အာဣမြို့ကိုအနိုင်ရခွင့်ပေးပြီးနောက် ယောရှုသည် ဂေရဇိမ်တောင်နှင့် ဧဗလတောင်ရှေ့တွင် ဣသရေလအနွယ်တို့ကို စုဝေးလိုက်၏။ ထို့နောက် ကျွန်ုပ်တို့ကို မှတ်တမ်းက ဤသို့ဖော်ပြသည်– “ပညတ္တိကျမ်း၌ရေးထားသမျှသော ကောင်းချီးမင်္ဂလာစကားနှင့် ကျိန်ခြင်းအမင်္ဂလာစကားတည်းဟူသော တရားစကားအလုံးစုံတို့ကို ဖတ်ရွတ်လေ၏။ ယောရှုသည် မောရှေမှာထားသောစကားတစ်ခွန်းကိုမျှ မချန်မထား၊ မိန်းမ၊ သူငယ်၊ တစ်ကျွန်းတစ်နိုင်ငံသားပါသော ဣသရေလအမျိုးသား ပရိသတ်အပေါင်းတို့ရှေ့မှာ အကုန်အစင်ဖတ်ရွတ်လေ၏။” (ယောရှု ၈:၃၄၊ ၃၅) လူငယ်နှင့် လူကြီး၊ ဇာတိဖွားနှင့် တစ်ကျွန်းတစ်နိုင်ငံသားမကျန် အဘယ်အပြုအမူက ယေဟောဝါ၏ကောင်းချီးကိုခံစားရစေပြီး အဘယ်အရာက ကိုယ်တော်၏ကျိန်ခြင်းခံရလိမ့်မည်ဖြစ်ကြောင်း သူတို့၏စိတ်နှလုံးတွင် ထွင်းထည့်ထားဘိသကဲ့သို့ စွဲမှတ်စေရန်လိုအပ်ခဲ့သည်။ သမ္မာကျမ်းစာကို မှန်မှန်ဖတ်ရှုသွားခြင်းက ယင်းနှင့်ပတ်သက်၍ ကျွန်ုပ်တို့ကို အမှန်ပင်ကူညီပေးလိမ့်မည်။
၇၊ ၈။ (က) ယနေ့ မည်သူတို့သည် “တစ်ကျွန်းတစ်နိုင်ငံသား” ကဲ့သို့ဖြစ်သနည်း၊ ကျမ်းစာကို သူတို့နေ့စဉ်ဖတ်ရှုရန် အဘယ်ကြောင့်လိုအပ်သနည်း။ (ခ) မည်သည့်နည်းများအားဖြင့် ယေဟောဝါ၏လူများအလယ်၌ရှိသော “သူငယ်” တို့သည် ယေရှု၏ပုံသက်သေကို လိုက်လျှောက်နိုင်ကြသနည်း။
၇ ယနေ့ သန်းပေါင်းများစွာသော ယေဟောဝါ၏ကျေးကျွန်တို့သည် ဝိညာဉ်ရေးသဘောအရ “တစ်ကျွန်းတစ်နိုင်ငံသား” များနှင့်တူညီကြ၏။ ယခင်က သူတို့သည် လောက၏စံနှုန်းများနှင့်အညီ အသက်ရှင်နေထိုင်ခဲ့ကြသည်၊ သို့သော် သူတို့သည် မိမိတို့၏အသက်ရှင်နေထိုင်ပုံများကို ပြောင်းလဲပစ်ခဲ့ကြပြီ။ (ဧဖက် ၄:၂၂-၂၄; ကောလောသဲ ၃:၇၊ ၈) ယေဟောဝါ၏စံနှုန်းအရ အကောင်း၊ အဆိုးတို့နှင့်ပတ်သက်၍ မိမိတို့ကိုယ်ကိုမပြတ်နှိုးဆော်ပေးဖို့လိုအပ်သည်။ (အာမုတ် ၅:၁၄၊ ၁၅) ဘုရားသခင့်နှုတ်မြွက်စကားတော်ကို နေ့စဉ်ဖတ်ရှုခြင်းက သူတို့အား ယင်းသို့နှိုးဆော်ပေးသည်။—ဟေဗြဲ ၄:၁၂; ယာကုပ် ၁:၂၅။
၈ ယေဟောဝါ၏လူမျိုးတော်ထဲတွင် ယေဟောဝါ၏စံနှုန်းများအကြောင်း မိဘများ၏သွန်သင်ပေးခြင်းခံရသော်လည်း ကိုယ်တော့်အလိုတော်သည် ဖြောင့်မှန်ကြောင်း သူတို့ကိုယ်တိုင်ယုံကြည်မှုရှိရန်လိုသည့် “သူငယ်” များစွာရှိပါသည်။ (ရောမ ၁၂:၁၊ ၂) ထိုသို့ယုံကြည်မှုရှိရန် သူတို့မည်သို့ပြုလုပ်နိုင်မည်နည်း။ ဣသရေလနိုင်ငံတွင် ယဇ်ပုရောဟိတ်များနှင့် အသက်ကြီးသူတို့ကို ဤသို့ညွှန်ကြားထားသည်– “ဤပညတ်တရားကို ထိုပရိသတ်အပေါင်းတို့ရှေ့မှာ ဖတ်ရွတ်ရမည်။ ယောက်ျား၊ မိန်းမ၊ သူငယ်များ၊ တည်းခိုသောတစ်ပါးအမျိုးသားများတို့သည်ကြား၍ နားလည်သဖြင့်၊ သင်တို့၏ဘုရားသခင် ထာဝရဘုရားကိုကြောက်ရွံ့၍ ဤပညတ်တရားစကားအလုံးစုံတို့ကို စောင့်ရှောက်စေခြင်းငှာ ပရိသတ်တို့ကိုစုဝေးစေကြလော့။ ထိုသို့ပြုလျှင် နားမလည်သေးသောသူငယ်တို့သည်ကြားသဖြင့် . . . သင်တို့ဘုရားသခင်ထာဝရဘုရားကို ကြောက်ရွံ့စေခြင်းငှာသင်ကြလိမ့်မည်။” (တရားဟောရာ ၃၁:၁၁-၁၃) ပညတ်တော်အောက်၌အသက်ရှင်ခြင်းက ယေရှု အသက် ၁၂ နှစ်အရွယ် ငယ်ငယ်ရွယ်ရွယ်နှင့် မိမိခမည်းတော်၏ပညတ်တော်များကို သိနားလည်လိုစိတ်ပြင်းပြခဲ့ကြောင်း ဖော်ပြခဲ့၏။ (လုကာ ၂:၄၁-၄၉) နောက်ပိုင်းတွင် တရားဇရပ်များ၌နားထောင်ခြင်းနှင့် ကျမ်းစာဖတ်ရွတ်မှု၌ပါဝင်ခြင်းမှာ ကိုယ်တော်၏ထုံးစံဖြစ်လာခဲ့သည်။ (လုကာ ၄:၁၆; တမန်တော် ၁၅:၂၁) ယနေ့ လူငယ်လူရွယ်တို့သည် နေ့စဉ်ဘုရားသခင့်နှုတ်မြွက်စကားတော်ကို ဖတ်ရှုခြင်းနှင့် သမ္မာကျမ်းစာကိုဖတ်ရှုလေ့လာသည့် အစည်းအဝေးများကို မှန်မှန်တက်ရောက်ခြင်းဖြင့် ယေရှု၏ပုံသက်သေကိုလိုက်လျှောက်ရန် အားပေးခံရပေမည်။
ကျမ်းစာဖတ်ရှုခြင်း—ဦးစားထားရာ
၉။ (က) ကျွန်ုပ်တို့ဖတ်ရှုသောအရာကို အဘယ်ကြောင့်ရွေးချယ်ရန် လိုအပ်သနည်း။ (ခ) ကျမ်းစာလေ့လာဖို့အထောက်အကူပြုစာပေများနှင့်ပတ်သက်၍ ဤမဂ္ဂဇင်း၏ဦးဆုံးအယ်ဒီတာက ဘာပြောခဲ့သနည်း။
၉ ပညာရှိ ရှောလမုန်ဘုရင်က ဤသို့ရေးသားခဲ့သည်– “ဆုံးမခြင်းကိုခံလော့။ စာများကိုစီရင်၍မကုန်မဆုံး။ စာကိုအားကြီးစွာသင်ကြားလေ့ကျက်ခြင်းအမှုသည် ကိုယ်ကိုပင်ပန်းစေသောအမှုဖြစ်၏။” (ဒေ. ၁၂:၁၂၊ သမ္မာ) ထပ်ဆင့်အချက်မှာ ယနေ့ပုံနှိပ်ထုတ်ဝေထားသော စာပေများစွာကိုဖတ်ရှုခြင်းသည် ကိုယ်ကိုပင်ပန်းစေရုံမက ပွင့်ပွင့်လင်းလင်းဆိုရလျှင် စိတ်ပိုင်းတွင်ဘေးအန္တရာယ်ဖြစ်စေသည်။ သို့ဖြစ်၍ ရွေးချယ်ဖတ်ရှုရန် အရေးကြီး၏။ ကျွန်ုပ်တို့၏ကျမ်းစာလေ့လာမှုဆိုင်ရာစာပေများကို ဖတ်ရှုခြင်းအပြင် ကျွန်ုပ်တို့သည် သမ္မာကျမ်းစာကိုယ်နှိုက်ကိုလည်း ဖတ်ရှုရန်လိုသည်။ ဤမဂ္ဂဇင်း၏ ဦးဆုံးအယ်ဒီတာက ဖတ်ရှုသူများထံ ဤသို့စာရေးခဲ့သည်– “သမ္မာကျမ်းစာသည် ကျွန်ုပ်တို့၏စံနှုန်းဖြစ်ကြောင်း၊ အထောက်အကူစာပေများသည် ဘုရားသခင်ပေး စာပေများဖြစ်လင့်ကစား ယင်းတို့သည် ‘အထောက်အကူများ’ သာဖြစ်ပြီး သမ္မာကျမ်းစာကို အစားမထိုးနိုင်ကြောင်း ဘယ်တော့မျှမမေ့ပါနှင့်။” * ထိုကြောင့် ကျွန်ုပ်တို့သည် ကျမ်းစာအခြေခံစာပေများကို လျစ်လျူမရှုဘဲဖတ်ရှုစဉ် သမ္မာကျမ်းစာကိုယ်နှိုက်ကိုလည်း ဖတ်ရှုရန်လိုသည်။
၁၀။ ကျမ်းစာဖတ်ရှုခြင်း၏အရေးပါမှုကို ‘သစ္စာနှင့်သတိပညာရှိသောကျွန်’ က မည်သို့အလေးထားခဲ့သနည်း။
၁၀ ဤလိုအပ်ချက်ကိုသိမြင်ကာ နှစ်ချီ၍ ယခုထိ ‘သစ္စာနှင့်သတိပညာရှိသောကျွန်’ က ကျမ်းစာဖတ်ရှုခြင်းကို အသင်းတော်တစ်ခုချင်းစီ၌ သီအိုကရက်တစ်ဓမ္မအမှုကျောင်းအစီအစဉ်၏ အပိုင်းတစ်ခုအဖြစ် ထည့်သွင်းပေးထားသည်။ (မဿဲ ၂၄:၄၅) လက်ရှိကျမ်းစာဖတ်ရှုခြင်းအစီအစဉ်သည် ခုနစ်နှစ်ခန့်ကာလအတွင်း ကျမ်းစာတစ်အုပ်လုံးကို ပြီးဆုံးစေသည်။ ဤအစီအစဉ်မှာ လူတိုင်းအတွက် အကျိုးဖြစ်ထွန်းသော်လည်း အထူးသဖြင့် ကျမ်းစာကိုတစ်အုပ်လုံးဆုံးအောင် တစ်ခါမျှမဖတ်ဖူးသည့် လူသစ်များအတွက်အကျိုးရှိ၏။ ခရစ်ယာန်သာသနာပြုများဖြစ်ရန် ဂိလဒ်ကင်းမျှော်စင်သမ္မာကျမ်းစာကျောင်းတက်ရောက်သူတို့နှင့် ဓမ္မအမှုထမ်းသင်တန်းကျောင်းတက်ရောက်သူတို့အပြင် ဗေသလမိသားစုဝင်သစ်များသည် တစ်နှစ်အတွင်း ကျမ်းစာတစ်အုပ်လုံးကိုဖတ်ရှုရန် တောင်းဆိုခြင်းခံရသည်။ သင်သည် တစ်ဦးချင်းဖြစ်စေ၊ မိသားစုလိုက်ဖြစ်စေ မည်သည့်ဇယားအတိုင်းလိုက်ပါစေ၊ ယင်းသို့လိုက်ခြင်း၌ သမ္မာကျမ်းစာဖတ်ရှုခြင်းကို ဦးစားပေးအစီအစဉ်တွင် ထားရှိရန်ဖြစ်သည်။
သင်၏ဖတ်ရှုခြင်းအလေ့အထများက ဘာကိုဖော်ပြသနည်း
၁၁။ ကျွန်ုပ်တို့သည် ယေဟောဝါ၏နှုတ်ထွက်စကားကို မည်သို့နှင့် အဘယ်ကြောင့် နေ့စဉ်မှီဝဲသုံးဆောင်သင့်သနည်း။
၁၁ သင်၏ကျမ်းစာဖတ်ရှုခြင်းဇယားအတိုင်းလိုက်ရန် အခက်အခဲတွေ့နေမည်ဆိုလျှင် သင့်ကိုယ်ကို ဤသို့မေးရန်သင့်လျော်သည်– ‘ငါ့ရဲ့ဖတ်ရှုခြင်း ဒါမှမဟုတ် တီဗွီကြည့်ရှုခြင်းအကျင့်တွေက ယေဟောဝါရဲ့နှုတ်မြွက်စကားတော် ဖတ်ရှုနိုင်စွမ်းအပေါ် အဘယ်သြဇာသက်ရောက်နိုင်သလဲ။’ မောရှေရေးသား၍ ယေရှုထပ်မံမိန့်တော်မူခဲ့သော “လူသည် မုန့်အားဖြင့်သာ အသက်ကိုမွေးရမည်မဟုတ်။ ဘုရားသခင်မိန့်တော်မူသမျှအားဖြင့် အသက်ကိုမွေးရမည်” ဟူသောစကားကိုပြန်သတိရပါ။ (မဿဲ ၄:၄; တရားဟောရာ ၈:၃) ကျွန်ုပ်တို့၏ကိုယ်ခန္ဓာကို ထောက်ပံ့ပေးရန် ကျွန်ုပ်တို့၏နေ့စဉ်အသက်တာ၌ အစာရေစာ သို့မဟုတ် ယင်းနှင့်တူညီသောအရာကို စားသုံးရန်လိုအပ်သကဲ့သို့ ကျွန်ုပ်တို့၏ဝိညာဉ်ရေးရာကိုထောက်ပံ့ပေးရန် ယေဟောဝါ၏အတွေးအခေါ်များကို နေ့စဉ် ကျွန်ုပ်တို့ခံယူဖို့လိုသည်။ ကျမ်းစာကိုဖတ်ရှုခြင်းအားဖြင့် ကျွန်ုပ်တို့သည် နေ့စဉ် ဘုရားသခင့်အတွေးအခေါ်များကို ရယူနိုင်သည်။
၁၂၊ ၁၃။ (က) ဘုရားသခင့်နှုတ်မြွက်စကားတော်အတွက် ကျွန်ုပ်တို့တမ်းတမ်းတတရှိသင့်ကြောင်းကို တမန်တော်ပေတရုက မည်သို့ဥပမာပေး၍ဖော်ပြသနည်း။ (ခ) နို့နှင့်ပတ်သက်၍ဥပမာပေးရာ၌ ပေါလုသည် ပေတရုနှင့်ခြားနားစွာ မည်သို့အသုံးပြုသနည်း။
၁၂ ကျွန်ုပ်တို့သည် သမ္မာကျမ်းစာကို “လူ၏နှုတ်ထွက်စကားကဲ့သို့ မခံမယူဘဲ၊ ဘုရားသခင်၏ နှုတ် [မြွက်စကား] တော်အမှန်ဖြစ်သည်” ဟုလေးမြတ်တန်ဖိုးထားမည်ဆိုလျှင် မိခင်၏နို့ကို တောင့်တသည့်ကလေးတစ်ဦးကဲ့သို့ ကျွန်ုပ်တို့ဆွဲဆောင်ခံရမည်ဖြစ်သည်။ (၁ သက်သာလောနိတ် ၂:၁၃၊ သမ္မာ) တမန်တော်ပေတရုက ဤသို့ရေးသားရာ၌ ထိုနှိုင်းယှဉ်ချက်ကိုဖော်ပြခဲ့သည်– “သင်တို့သည် သခင်ဘုရား၏ကျေးဇူးတော်ကို မြည်းစမ်းကြသည်ဖြစ်၍ . . . ကယ်တင်ခြင်းအလို့ငှာ နှုတ် [မြွက်] တရား၏နို့စစ်အားဖြင့်ကြီးပွားမည်အကြောင်း၊ ဖွားစသောသူငယ်ကဲ့သို့၊ ထိုတရားနို့ကို အလွန်လိုချင်သောစိတ်ရှိကြလော့။” (၁ ပေတရု ၂:၁-၃) ကျွန်ုပ်တို့သည် ကိုယ်ပိုင်တွေ့ကြုံမှုမှ “သခင်ဘုရား၏ကျေးဇူးတော်ကို” အမှန်တကယ်မြည်းစမ်းခဲ့ပြီဆိုလျှင် ကျမ်းစာဖတ်ရှုလိုသည့် တောင့်တစိတ်မှာ တိုးပွားလာပေလိမ့်မည်။
၁၃ ဤစာပိုဒ်တွင် နို့နှင့်ပတ်သက်၍ ပေတရုအသုံးပြုထားသောပုံဥပမာသည် တမန်တော်ပေါလုအသုံးပြုပုံနှင့်ကွာခြားကြောင်းကို သတိပြုသင့်သည်။ ဖွားစကလေးတစ်ဦးအတွက် နို့ရည်သည် လိုအပ်သမျှအာဟာရအပြည့်ရရှိစေ၏။ ပေတရု၏ပုံဥပမာက ‘ကယ်တင်ခြင်းအလို့ငှာ ကြီးပွားရန်’ ကျွန်ုပ်တို့လိုအပ်သမျှအရာအားလုံး ဘုရားသခင့်နှုတ်မြွက်စကားတော်၌ ပါဝင်ကြောင်း ဖော်ပြသည်။ တစ်ဖက်တွင်မူ ပေါလုက ဝိညာဉ်ရေးရာ၌အရွယ်ရောက်ပြီဟု ဆိုသူအချို့တို့၏ မပြည့်စုံသောစားသုံးမှုအလေ့အထများကို ပုံဖော်ရန် နို့သောက်သုံးရန်လိုအပ်ပုံကို အသုံးပြုခြင်းဖြစ်သည်။ ဟေဗြဲအသင်းတော်ရှိခရစ်ယာန်များထံ ပေးပို့သောစာ၌ ပေါလုဤသို့ရေးသားခဲ့သည်– “သင်တို့သည် ကာလကြာသောကြောင့် ဆရာအဖြစ်သို့ရောက်သင့်သော်လည်း၊ ဘုရားသခင်၏ဗျာဒိတ်တော်၌ ရှေးဦးစွာသင်ရသောတရားနုတို့ကို သူတစ်ပါးထံ၌ တစ်ဖန်သင်ရသောအကြောင်းရှိသည်ဖြစ်၍၊ ကြေခဲသောအစာကိုမသုံးဆောင်၊ နို့ကိုသာသုံးဆောင်ရသောသူဖြစ်ကြ၏။ နို့ကိုသာသုံးဆောင်သောသူမည်သည်ကား၊ သူငယ်ဖြစ်သောကြောင့် ဖြောင့်မတ်ခြင်းတရား၌ လေ့လာခြင်းမရှိ။ ကောင်းကျိုးမကောင်းကျိုးကို ပိုင်းခြား၍သိနိုင်သောဉာဏ်ပေးတတ်သော၊ အကြားအမြင် အတွေ့အစမ်းများသောသူတည်းဟူသော၊ စုံလင်သောအရွယ်ရှိသောသူတို့မူကား၊ ကြေခဲသောအစာအာဟာရကို သုံးဆောင်ရကြ၏။” (ဟေဗြဲ ၅:၁၂-၁၄) သမ္မာကျမ်းစာကို ဂရုတစိုက်ဖတ်ရှုခြင်းက ကျွန်ုပ်တို့၏ပိုင်းခြားသိမြင်နိုင်သောဉာဏ်ကို တိုးပွားလာစေရန်နှင့် ဝိညာဉ်ရေးရာများ၌ ကျွန်ုပ်တို့၏ခံတွင်းလိုက်စေရန် များစွာတတ်စွမ်းနိုင်သည်။
သမ္မာကျမ်းစာကိုဖတ်ရှုပုံ
၁၄၊ ၁၅။ (က) ကျမ်းစာအာဘော်ရှင်က ကျွန်ုပ်တို့အား အဘယ်အခွင့်အလမ်း ပေးထားသနည်း။ (ခ) ဘုရားသခင့်ရေးရာဉာဏ်ပညာမှ ကျွန်ုပ်တို့ မည်သို့အကျိုးကျေးဇူးရရှိနိုင်သနည်း။ (ဥပမာများပေးပါ။)
၁၄ အကျိုးဖြစ်ထွန်းမှုအရှိဆုံး ကျမ်းစာဖတ်ရှုခြင်းသည် ဖတ်ရှုခြင်းဖြင့်မစဘဲ ဆုတောင်းခြင်းအားဖြင့်စသည်။ ဆုတောင်းရခြင်းသည် အခွင့်ထူးတစ်ရပ်ဖြစ်၏။ ယင်းသို့စခြင်းသည် သင့်အနေဖြင့် အတော်အတန်နက်နဲသောအကြောင်းအရာပါရှိသည့် စာအုပ်တစ်အုပ်ကိုစတင်ဆည်းပူးလေ့လာလျှင် သင်ဖတ်ရှုတော့မည့်အရာနှင့်ပတ်သက်၍ သိမြင်နားလည်လာရန် ထိုအာဘော်ရှင်၏အကူအညီကို တောင်းခံသကဲ့သို့ပင်ဖြစ်သည်။ ယင်းသည် အလွန်အကျိုးဖြစ်ထွန်းစေနိုင်သည်တကား! ကျမ်းစာ၏အာဘော်ရှင် ယေဟောဝါသည် သင့်အား ထိုအခွင့်အလမ်းပေးထားသည်။ ပထမရာစုနှစ်ရှိ အုပ်ချုပ်ရေးအဖွဲ့ဝင်တစ်ဦးက မိမိ၏ညီအစ်ကိုချင်းထံ ဤသို့ရေးသားခဲ့သည်– “သင်တို့တွင် တစ်စုံတစ်ယောက်သောသူသည် ပညာကိုလိုလျှင်၊ ကဲ့ရဲ့ပြစ်တင်ခြင်းကိုပြုတော်မမူဘဲ၊ ခပ်သိမ်းသောသူတို့အား စေတနာစိတ်နှင့်ပေးသနားတော်မူသော ဘုရားသခင်ကိုတောင်းစေ။ တောင်းလျှင်ရလိမ့်မည်။ သို့ရာတွင် တွေးတောခြင်းမရှိဘဲ ယုံကြည်သောစိတ်နှင့်တောင်းရမည်။” (ယာကုပ် ၁:၅၊ ၆) မျက်မှောက်ခေတ်ရှိ အုပ်ချုပ်ရေးအဖွဲ့သည် ဆုတောင်းခြင်းပါဝင်သောကျမ်းစာဖတ်ရှုခြင်းပြုရန် ကျွန်ုပ်တို့ကို အမြဲတစေတိုက်တွန်းနှိုးဆော်သည်။
၁၅ ဉာဏ်ပညာဟူသည် အသိပညာကိုလက်တွေ့ကျအသုံးချခြင်းဖြစ်သည်။ သို့ဖြစ်၍ သင့်ကျမ်းစာကိုမဖွင့်မီ သင်ဖတ်ရှုစဉ်တွင် သင်ကိုယ်တိုင်အသက်တာ၌ ကျင့်သုံးရန်လိုအပ်သည့်အချက်များကို သတိထားမိရန်ကူညီပေးဖို့ ယေဟောဝါထံ တောင်းခံပါ။ သိရှိလာသည့်အကြောင်းအရာအသစ်များကို ယခင်သိထားရာနှင့် ဆက်စပ်လိုက်ပါ။ ယင်းတို့ကို သင်မှတ်သားထားသည့် “စင်ကြယ်သောတရားစကားပုံစံ” တွင်သွင်းလိုက်ပါ။ (၂ တိမောသေ ၁:၁၃၊ သမ္မာ) အတိတ်က ယေဟောဝါကျေးကျွန်တို့၏ အသက်တာများတွင်ဖြစ်ပျက်ခဲ့သည့် ဖြစ်ရပ်များကိုဆင်ခြင်၍ အလားတူအခြေအနေများအောက်၌ သင်ရှိမည်ဆိုလျှင် မည်သို့လုပ်ဆောင်မိမည်နည်းဟု သင့်ကိုယ်ကိုပြန်မေးပါ။—ကမ္ဘာဦး ၃၉:၇-၉; ဒံယေလ ၃:၃-၆၊ ၁၆-၁၈; တမန်တော် ၄:၁၈-၂၀။
၁၆။ ကျွန်ုပ်တို့၏ကျမ်းစာဖတ်ရှုခြင်းကို ပိုမိုအကျိုးဖြစ်ထွန်း၍ အသုံးဝင်စေနိုင်ရန် အဘယ်လက်တွေ့ကျအကြံပြုချက်များ ပေးထားသနည်း။
၁၆ သတ်မှတ်စာမျက်နှာပြီးဖို့လောက်အတွက်သာ မဖတ်ပါနှင့်။ အချိန်ယူပါ။ သင်ဖတ်သည့်အရာအပေါ် အာရုံနှစ်မြှုပ်ထားပါ။ သိချင်စိတ်ပြင်းပြစေသည့် အချက်အချို့တွေ့သောအခါ သင့်သမ္မာကျမ်းစာ၌ရှိမည်ဆိုလျှင် ပြန်လှန်အညွှန်းများကို ကြည့်ပါ။ ထိုအချက် မရှင်းသေးလျှင် နောက်ပိုင်း၌ ထပ်ဆင့်ရှာဖွေလေ့လာမှုပြုရန် မှတ်သားထားပါ။ သင်ဖတ်ရှုနေစဉ် အထူးသဖြင့် သင်မှတ်ကျုံးလိုသောကျမ်းချက်များကို အမှတ်အသားပြု သို့မဟုတ် ယင်းတို့ကိုကူးယူထားပါ။ သင်သည် မာဂျင်ဘေးတွင် ကိုယ်ပိုင်မှတ်ချက်များ၊ ကိုယ်ပိုင်ပြန်လှန်အညွှန်းများ ထည့်ထားနိုင်သည်။ တစ်နေ့နေ့တစ်ချိန်ချိန်တွင် သင်၏ဟောပြောခြင်းနှင့် သွန်သင်ခြင်းလုပ်ငန်း၌ အသုံးလိုမည်ဟုယူဆသောကျမ်းချက်များအတွက် အဓိကစကားလုံးကို မှတ်သား၍ သင့်ကျမ်းစာနောက်ပိုင်း၌ရှိသော ကျမ်းစာစကားလုံးများအညွှန်းတွင် ဆန်းစစ်ကြည့်ပါ။ *
ကျမ်းစာဖတ်ခြင်းကို ပျော်ရွှင်စရာဖြစ်စေပါ
၁၇။ သမ္မာကျမ်းစာကိုဖတ်ရှုခြင်း၌ ကျွန်ုပ်တို့အဘယ်ကြောင့် ပျော်ရွှင်သင့်သနည်း။
၁၇ ဆာလံဆရာက “ထာဝရဘုရား၏တရားတော်ကိုမွေ့လျော်၍ တရားတော်ကို နေ့ညမပြတ် ဆင်ခြင်အောက်မေ့သောသူသည်” ပျော်ရွှင်သူဖြစ်၏ဟု ပြောခဲ့သည်။ (ဆာလံ ၁:၂) ကျွန်ုပ်တို့၏နေ့စဉ်ကျမ်းစာဖတ်ရှုခြင်းသည် ငြီးငွေ့ဖွယ်အလုပ်တစ်ခုမဖြစ်သင့်ဘဲ အမှန်ပင်ပျော်ရွှင်စရာဖြစ်သင့်သည်။ ပျော်ရွှင်ဖွယ်ရာဖြစ်စေသည့် နည်းလမ်းတစ်ခုမှာ သင်ယူသောအရာများ၏တန်ဖိုးကို အစဉ်သတိရနေခြင်းဖြစ်သည်။ ပညာရှိရှောလမုန်က ဤသို့ရေးသားခဲ့သည်– “ဉာဏ်ပညာကိုရှာ၍ရသောသူသည် [“ပျော်ရွှင်၊” ကဘ] ၏။ ပညာလမ်းတို့သည် သာယာသောလမ်း၊ ပညာလမ်းခရီးရှိသမျှတို့သည် ငြိမ်ဝပ်လျက်ရှိကြ၏။ ပညာကိုကိုင်ဆွဲသောသူသည် အသက်ပင်ကိုရပြီ။ လက်မလွှတ်သောသူသည် [“ပျော်ရွှင်၊” ကဘ] ၏။” (သု. ၃:၁၃၊ ၁၇၊ ၁၈) ဉာဏ်ပညာကိုရရှိရန်စိုက်ထုတ်လိုက်ရသည့် အားထုတ်မှုသည် အမှန်ပင် အကျိုးနပ်ပေသည်၊ အကြောင်းမှာ ယင်း၏လမ်းများသည် သာယာသောလမ်း၊ ငြိမ်ဝပ်၍ ပျော်ရွှင်မှုဖြစ်စေပြီး အဆုံး၌အသက်ကိုရရှိစေသောလမ်းဖြစ်သောကြောင့်တည်း။
၁၈။ ကျမ်းစာဖတ်ရှုခြင်းအပြင် အဘယ်အရာလိုအပ်သနည်း၊ နောက်ဆောင်းပါးတွင် ကျွန်ုပ်တို့ အဘယ်အရာကိုသုံးသပ်ကြမည်နည်း။
၁၈ မှန်ပါသည်၊ ကျမ်းစာဖတ်ရှုခြင်းသည် အကျိုးလည်းဖြစ်ထွန်းပြီး ပျော်ရွှင်စရာလည်းကောင်း၏။ သို့သော် ယင်းသည် လုံလောက်သွားပြီလော။ ရာစုနှစ်ချီ၍ သမ္မာကျမ်းစာကိုဖတ်ရှုခဲ့ကြသော ခရစ်ယာန်ဘောင် ချာ့ခ်ျအသင်းသားများသည် “[အမှန်] တရားကို သိကျွမ်းခြင်းသို့ အဘယ်အခါမျှမရောက်နိုင်” ကြချေ။ (၂ တိမောသေ ၃:၇၊ သမ္မာ) အကျိုးဖြစ်ထွန်းစေသော ကျမ်းစာဖတ်ရှုခြင်းဖြစ်ရန် ကျွန်ုပ်တို့သည် ဆည်းပူးရရှိထားသည့်အသိပညာကို မိမိတို့၏အသက်တာတွင် လက်တွေ့ကျင့်သုံးရန်၊ မိမိတို့၏ဟောပြောခြင်းနှင့် သွန်သင်ခြင်းလုပ်ငန်း၌ အသုံးပြုရန် ရည်ရွယ်ပြီး ဖတ်ရှုရမည်ဖြစ်သည်။ (မဿဲ ၂၄:၁၄; ၂၈:၁၉၊ ၂၀) ယင်းက နောက်ဆောင်းပါး၌ ကျွန်ုပ်တို့သိရှိရမည်ဖြစ်သည့်အတိုင်း ပျော်စရာကောင်းပြီး အကျိုးလည်းရှိနိုင်ရန် ကြိုးပမ်းအားထုတ်မှုနှင့် လေ့လာမှုနည်းလမ်းကောင်းများလိုအပ်သည်။
[အောက်ခြေမှတ်ချက်များ]
^ အပိုဒ်၊ 9 နယူးယောက်၊ ကင်းမျှော်စင်သမ္မာကျမ်းစာနှင့်ဝေစာအသင်းမှ ထုတ်ဝေသည့် ယေဟောဝါသက်သေများ—ဘုရားသခင့်နိုင်ငံတော်ကြွေးကြော်သူများ၊ [လိပ်] စာမျက်နှာ ၂၄၁ ကိုရှု။
^ အပိုဒ်၊ 16 ကင်းမျှော်စင် ၁၉၉၅၊ မေ ၁၊ စာမျက်နှာ ၁၆-၁၇ ရှိ “သင့်ကျမ်းစာဖတ်ရှုခြင်းကို ပိုအကျိုးရှိစေရန် အကြံပြုချက်များ” ကိုရှု။
ပြန်လည်သုံးသပ်ရန်မေးခွန်းများ
• ဣသရေလရှင်ဘုရင်များကို ပေးခဲ့သော အဘယ်သွန်သင်ချက်သည် ယနေ့ကြီးကြပ်မှူးများနှင့် သက်ဆိုင်သနည်း၊ အဘယ်ကြောင့်နည်း။
• ယနေ့ မည်သူတို့သည် “တစ်ကျွန်းတစ်နိုင်ငံသား” နှင့် “သူငယ်” တို့နှင့်တူသနည်း၊ သူတို့သည် သမ္မာကျမ်းစာကို နေ့စဉ်ဖတ်ရှုရန် အဘယ်ကြောင့်လိုအပ်သနည်း။
• သမ္မာကျမ်းစာကို မှန်မှန်ဖတ်ရှုသွားစေရန် ‘သစ္စာနှင့်သတိပညာရှိကျေးကျွန်’ ကအဘယ်လက်တွေ့ကျသောနည်းလမ်းများဖြင့် ကျွန်ုပ်တို့ကို ကူညီပေးထားပြီနည်း။
• ကျွန်ုပ်တို့၏ကျမ်းစာဖတ်ရှုခြင်းမှ စစ်မှန်သောအကျိုးကျေးဇူးနှင့် ပျော်ရွှင်မှုတို့ကို ကျွန်ုပ်တို့ မည်သို့ရယူနိုင်ကြသနည်း။
[လေ့လာရန်မေးခွန်းများ]
[စာမျက်နှာ ၉ ပါ ရုပ်ပုံ]
အထူးသဖြင့်အကြီးအကဲများသည် သမ္မာကျမ်းစာကို နေ့စဉ်ဖတ်ရှုရန်လိုအပ်
[စာမျက်နှာ ၁၀ ပါ ရုပ်ပုံ]
တရားဇရပ်တွင် သမ္မာကျမ်းစာကိုဖတ်ရှုရာ၌ ပါဝင်ခြင်းမှာ ယေရှု၏ထုံးစံဖြစ်ခဲ့