လေ့လာခြင်း —ဆုကျေးဇူးဖြစ်ကာ နှစ်သက်ဖွယ်ဖြစ်
လေ့လာခြင်း—ဆုကျေးဇူးဖြစ်ကာ နှစ်သက်ဖွယ်ဖြစ်
‘ပညာကိုဆက်ရှာဖွေလျှင် ဘုရားသခင်ကိုသိသောဉာဏ်နှင့် ပြည့်စုံလိမ့်မည်။’—သု. ၂:၄၊ ၅။
၁။ ကိုယ်ပိုင်အားလပ်ချိန်၌ ဖတ်ရှုခြင်းက ကျွန်ုပ်တို့ကို မည်သို့သာ၍ပျော်မွေ့စေနိုင်သနည်း။
များစွာသောလူတို့သည် အပျော်သက်သက်အတွက်သာ စာဖတ်ကြ၏။ ကျန်းမာရေးအကြောင်းဖြစ်မည်ဆိုလျှင် စာဖတ်ခြင်းသည် ကျန်းမာရေးအထောက်အကူပြု အပန်းဖြေစရာရင်းမြစ်တစ်ခု ဖြစ်နိုင်သည်။ ခရစ်ယာန်အချို့သည် မိမိတို့၏မှန်မှန်ကျမ်းစာဖတ်ရှုခြင်းအစီအစဉ်အပြင် ဆာလံကျမ်း၊ နယပုံပြင်ကျမ်း၊ ခရစ်ဝင်ကျမ်းများနှင့် သမ္မာကျမ်းစာ၏ အခြားအပိုင်းများကို အလျင်းသင့်သလိုဖတ်ရှုခြင်းမှ အမှန်တကယ်ပျော်ရွှင်မှုရရှိကြ၏။ အလွန်လှပစွာ သုံးနှုန်းတွေးခေါ်ထားပုံက သူတို့ကိုအလွန်ပျော်မွေ့စေသည်။ အခြားသူတို့မူ မိမိတို့၏ကိုယ်ပိုင်အားလပ်ချိန်၌ဖတ်ရန် ယေဟောဝါသက်သေများ၏နှစ်ချုပ်စာအုပ်၊ နိုးလော့! မဂ္ဂဇင်း၊ ဤဂျာနယ်ရှိဘဝအတ္ထုပ္ပတ္တိများ၊ သို့မဟုတ် သမိုင်းမှတ်တမ်းတင်အကြောင်း၊ ပထဝီဝင်ဆိုင်ရာနှင့် သဘာဝဆိုင်ရာလေ့လာမှုများကို ရွေးချယ်တတ်ကြသည်။
၂၊ ၃။ (က) နက်နဲသောဝိညာဉ်ရေးဆိုင်ရာအချက်အလက်ကို အဘယ်နည်းဖြင့် ကြေခဲသောအစာနှင့်နှိုင်းယှဉ်နိုင်သနည်း။ (ခ) လေ့လာမှုတွင် အဘယ်အရာအကျုံးဝင်သနည်း။
၂ အလျင်းသင့်သလိုဖတ်ရှုခြင်းသည် စိတ်ပြေလက်ပျောက်နားနားနေနေ နေခြင်းတစ်မျိုးဖြစ်နိုင်ပြီး လေ့လာမှုတွင်မူ စိတ်ပိုင်းဆိုင်ရာကြိုးစားအားထုတ်မှုလိုအပ်သည်။ အင်္ဂလိပ်ဒဿနိကပညာရှင် ဖရန်စစ် ဘေကွန်ကဤသို့ရေးသားခဲ့သည်– “စာအုပ်အချို့မှာ မြည်းစမ်းရန်၊ အခြားတို့မှာ မျိုချရန်နှင့် အချို့အနည်းငယ်သာ ညက်ညက်ဝါး၍အစာချေဖျက်ရန်ဖြစ်သည်။” သမ္မာကျမ်းစာသည် အမှန်ပင် နောက်ဆုံးအမျိုးအစား၌ပါဝင်၏။ တမန်တော်ပေါလုက ဤသို့ရေးသားခဲ့သည်– “ထို [ခရစ်တော်၊ တင်ကူးပုံဖော်ထားနှင့်သည့် ရှင်ဘုရင်-ယဇ်ပုရောဟိတ်] မေလခိဇေဒက်၏အကြောင်းကို ငါတို့ပြောစရာစကားအများရှိ၏။ သို့သော်လည်း၊ သင်တို့သည် ဉာဏ်နုန့်သောကြောင့် အပြောခက်လှ၏။ ကောင်းကျိုးမကောင်းကျိုးကို ပိုင်းခြား၍သိနိုင်သောဉာဏ်ပေးတတ်သော၊ အကြားအမြင် အတွေ့အစမ်းများသောသူတည်းဟူသော၊ စုံလင်သောအရွယ်ရှိသောသူတို့မူကား၊ ကြေခဲသောအစာအာဟာရကို သုံးဆောင်ရကြ၏။” (ဟေဗြဲ ၅:၁၁၊ ၁၄) ကြေခဲသောအစာကို မျိုချ၍မချေဖျက်မီ ညက်ညက်ဝါးရမည်။ နက်နဲသောဝိညာဉ်ရေးဆိုင်ရာ အချက်အလက်သည် ခံယူ၍စွဲမှတ်မထားမီ အပြန်အလှန်စဉ်းစားဆင်ခြင်ခြင်းလိုအပ်သည်။
၃ အဘိဓာန်ကျမ်းတစ်ခုက “လေ့လာခြင်း” ကို “ဖတ်ရှုခြင်း၊ စူးစမ်းရှာဖွေခြင်း အစရှိသည်တို့အားဖြင့် အသိပညာ သို့မဟုတ် တတ်သိနားလည်မှုရှိလာရန်အလို့ငှာ စိတ်ကိုအသုံးချသည့် လုပ်ရပ် သို့မဟုတ် ဆက်တိုက်အပြုအမူတစ်ခုအဖြစ်” အဓိပ္ပာယ်ဖွင့်ဆိုထားသည်။ ယင်းက သာမန်ကာလျှံကာဖတ်ရှုခြင်း၊ ဖတ်ရှုနေရင်းနှင့် အချို့စကားလုံးများကို မျဉ်းသားကောင်းမျဉ်းသားခြင်းထက်မက သာ၍အကျုံးဝင်ကြောင်း နားလည်ရသည်။ လေ့လာမှုဟူသည် လုပ်ဆောင်မှု၊ စိတ်ပိုင်းဆိုင်ရာကြိုးစားအားထုတ်မှုနှင့် ပိုင်းခြား၍သိနိုင်သောဉာဏ်အသုံးပြုမှုတို့ကို ဆိုလိုသည်။ လေ့လာမှုသည် အားထုတ်မှုလိုအပ်သော်လည်း ယင်းက ပျော်စရာမဖြစ်နိုင်ဟု မဆိုလိုချေ။
လေ့လာမှုကို ပျော်ရွှင်ဖွယ်ရာဖြစ်စေခြင်း
၄။ ဆာလံဆရာ၏စကားများအရ ဘုရားသခင့်နှုတ်မြွက်စကားတော်ကိုလေ့လာခြင်းက ကျွန်ုပ်တို့အား လန်းဆန်းမှုနှင့် ဆုကျေးဇူး မည်သို့ဖြစ်စေနိုင်သနည်း။
၄ ဘုရားသခင့်နှုတ်မြွက်စကားတော်ကို ဖတ်ရှုလေ့လာခြင်းက ကျွန်ုပ်တို့အား လန်းဆန်း၍ အားအင်တိုးစေနိုင်သည်။ ဆာလံဆရာက ဤသို့ကြွေးကြော်ခဲ့သည်– “ထာဝရဘုရား၏တရားတော်သည် စုံလင်သည်ဖြစ်၍ စိတ်ဝိညာဉ်ကိုပြုပြင်တတ်၏။ ထာဝရဘုရား၏သက်သေခံတော်မူချက်သည် ဟုတ်မှန်သည်ဖြစ်၍ မလိမ္မာသောသူတို့ကို လိမ္မာစေတတ်၏။ ထာဝရဘုရား၏နည်းဥပဒေသတို့သည် ဖြောင့်မတ်သည်ဖြစ်၍ စိတ်နှလုံးကိုရွှင်လန်းစေတတ်၏။ ထာဝရဘုရား၏ပညတ်တော်သည် စင်ကြယ်သည်ဖြစ်၍ မျက်စိကိုရှင်းလင်းစေတတ်၏။” (ဆာလံ ၁၉:၇၊ ၈) ယေဟောဝါ၏ပညတ်များနှင့် သတိပေးချက်များသည် ကျွန်ုပ်တို့၏စိတ်ဝိညာဉ်ကိုလန်းဆန်းစေ၍ ကျွန်ုပ်တို့၏ဝိညာဉ်ရေးကောင်းကျိုးချမ်းသာကို တိုးပွားစေကာ စိတ်တွင်းပျော်ရွှင်မှုရှိစေပြီး ကျွန်ုပ်တို့၏မျက်စိကိုရှင်းလင်းစေခြင်းအားဖြင့် ယေဟောဝါ၏ရည်ရွယ်တော်မူချက်များကို ကွင်းကွင်းကွက်ကွက်မြင်စေသည်။ မည်မျှကျေနပ်နှစ်ခြိုက်ဖွယ်ရာပါတကား!
၅။ လေ့လာခြင်းက အဘယ်နည်းများဖြင့် ကျွန်ုပ်တို့ကို ကြီးမားသောပျော်ရွှင်မှုရစေနိုင်သနည်း။
၅ ကျွန်ုပ်တို့၏လုပ်ဆောင်မှုမှ ရလဒ်ကောင်းများကို တွေ့မြင်ကြသောအခါ ယင်းသို့လုပ်ဆောင်ရာ၌ ပျော်မွေ့တတ်ကြသည်။ သို့ဖြစ်၍ လေ့လာမှုကိုပျော်ရွှင်စရာဖြစ်စေရန် ကျွန်ုပ်တို့သည် အသစ်ဆည်းပူးရယူထားသည့်အသိပညာကို အမြန်အသုံးချသင့်သည်။ ယာကုပ်က ဤသို့ရေးသားခဲ့သည်– “လွှတ်ခြင်းနှင့်စပ်ဆိုင်၍ စုံလင်သောတရား၌စေ့စေ့ကြည့်ရှု၍ တည်ကြည်သောသူမူကား၊ တရားနာ၍မေ့လျော့သောသူမဟုတ်၊ အကျင့်ကျင့်သောသူဖြစ်သဖြင့်၊ မိမိကျင့်သောအကျင့်၌ [“ပျော်ရွှင်၊” ကဘ] မင်္ဂလာရှိသောသူဖြစ်၏။” (ယာကုပ် ၁:၂၅) တတ်သိခဲ့သောအချက်များကို ချက်ချင်းလက်တွေ့ကျင့်သုံးခြင်းက အကျေနပ်ကြီးကျေနပ်မှုရစေသည်။ ကျွန်ုပ်တို့၏ဟောပြောခြင်း သို့မဟုတ် သွန်သင်ခြင်းပြုလုပ်စဉ်အတွင်း၌ မေးသောမေးခွန်းတစ်ခုကို ဖြေကြားရန်ဟူသည့် သတ်သတ်မှတ်မှတ်ရည်ရွယ်ချက်ဖြင့် သုတေသနပြုခြင်းသည်လည်း ကြီးမားသောပျော်ရွှင်မှုကိုရစေမည်။
ဘုရားသခင့်နှုတ်မြွက်စကားတော်ကို နှစ်သက်မြတ်နိုးမှုတိုးပွားစေခြင်း
၆။ ဆာလံ ၁၁၉ ကိုရေးသားသူက ယေဟောဝါ၏နှုတ်မြွက်စကားတော်အား သူ၏နှစ်သက်မြတ်နိုးမှုကို မည်သို့ဖော်ပြခဲ့သနည်း။
၆ ရှင်ဘုရင်ဟေဇကိဖြစ်နိုင်သည့် ဆာလံ ၁၁၉ ကိုစီကုံးရေးဖွဲ့သူသည် ငယ်ရွယ်သောမင်းသားဖြစ်စဉ်အခါ ယေဟောဝါ၏နှုတ်မြွက်စကားတော်အပေါ် သူ၏နှစ်သက်မြတ်နိုးမှုကို ဖော်ပြခဲ့သည်။ လင်္ကာဖြင့်သီကုံးဖွဲ့နွဲ့၍ သူဤသို့ဆိုသည်– “ကိုယ်တော်ရှင်၏အထုံးအဖွဲ့တော်တို့ကို နှစ်သက်ပါ၏။ အမိန့်တော်တို့ကို မေ့လျော့မည်မဟုတ်ပါ။ ကိုယ်တော်ရှင်၏ဆုံးမသွန်သင်တော်မူချက်တို့သည် ကျွန်တော်မျိုးအား စိတ်ရွှင်လန်းစေပါ၏။ ကျွန်တော်မျိုးသည် ကိုယ်တော်ရှင်၏ပညတ်တော်တို့ကို နှစ်သက်မြတ်နိုးသည်ဖြစ်၍ ယင်းတို့ကို လိုက်နာစောင့်ထိန်းရာတွင် ရွှင်လန်းအားရမှုရှိပါ၏။ ကျွန်တော်မျိုးသည် ကိုယ်တော်ရှင်၏တရားတော်ကို နှစ်သက်မြတ်နိုးသည်ဖြစ်၍ ကျွန်တော်မျိုးအား သနားတော်မူပါ၊ သို့ပြုလျှင် ကျွန်တော်မျိုး အသက်ရှင်ရပါလိမ့်မည်။ အို ထာဝရဘုရား၊ ကျွန်တော်မျိုးသည် ကိုယ်တော်ရှင် ကယ်တင်တော်မူခြင်းကျေးဇူးကို တောင့်တပါ၏။ ကိုယ်တော်ရှင်၏တရားတော်သည် ကျွန်တော်မျိုးအား ပျော်ရွှင်စေပါ၏။”—ဆာလံ ၁၁၉:၁၆၊ ၂၄၊ ၄၇၊ ၇၇၊ ၁၇၄၊ သတင်းကောင်း။
၇၊ ၈။ (က) ကိုးကားချက်တစ်ခုအရ ဘုရားသခင့်နှုတ်မြွက်စကားတော်ကို “နှစ်သက်မြတ်နိုးပါ၏” ဟူသည် အဘယ်အရာကိုဆိုလိုသနည်း။ (ခ) ဘုရားသခင့်နှုတ်မြွက်စကားတော်အား ကျွန်ုပ်တို့၏ချစ်မြတ်နိုးမှုကို မည်သို့ပြသနိုင်သနည်း။ (ဂ) ယေဟောဝါ၏ပညတ်တော်များကို မဖတ်ရှုမီ ဧဇရသည် မိမိကိုယ်ကိုမည်သို့ပြင်ဆင်ခဲ့သနည်း။
၇ ဆာလံ ၁၁၉ ၌ “နှစ်သက်ပါ၏” ဟုဘာသာပြန်ထားသောစကားလုံးကို ရှင်းလင်းဖော်ပြရာတွင် ဟေဗြဲကျမ်းစောင်နှင့်ပတ်သက်သော အဘိဓာန်တစ်ခုက ဤသို့ဆိုသည်– “အခန်းငယ် ၁၆ ရှိအသုံးအနှုန်းမှာ ဝမ်းသာမှုနှင့် . . . စဉ်းစားဆင်ခြင်မှုတို့အတွက် [ကြိယာများ] နှင့်တွဲဖက်ဖြစ်သည်။ . . . အဆင့်ဆင့်တိုးတက်မှုဖြစ်စဉ်မှာ ဝမ်းမြောက်၍ စဉ်းစားဆင်ခြင်ရာ . . . ၌ ပျော်မွေ့သည်။ . . . ဤကြိယာတွဲက ရည်ရွယ်ချက်ရှိရှိဆင်ခြင်သုံးသပ်မှုဟူသည်မှာ လူတစ်ဦးအား ယာဝေး၏စကားတော်၌ မွေ့လျော်လာစေသည့် နည်းလမ်းဖြစ်သည်ဟူသောသဘောဆောင်နိုင်သည်။ . . . အဆိုပါအဓိပ္ပာယ်၌ စိတ်လှုပ်ရှားမှုဆိုင်ရာဝိသေသလက္ခဏာ ပါဝင်သည်။” *
၈ မှန်ပါသည်၊ ယေဟောဝါ၏နှုတ်မြွက်စကားတော်ကို ကျွန်ုပ်တို့၏နှစ်သက်မြတ်နိုးမှုသည် စိတ်လှုပ်ရှားမှု၏အချက်အချာဖြစ်သော ကျွန်ုပ်တို့၏စိတ်နှလုံးအတွင်းမှ ပေါ်ထွက်လာသင့်သည်။ ကျွန်ုပ်တို့ယခုပင်ဖတ်ရှုခဲ့ကြသည့် ကျမ်းပိုဒ်အချို့၌ အပြန်ပြန်စဉ်းစားခြင်းတွင် နှစ်သက်ပျော်မွေ့သင့်သည်။ ကျွန်ုပ်တို့သည် နက်နဲသောဝိညာဉ်ရေးဆိုင်ရာယူဆချက်ကို တွေးတောပြီး ယင်းတို့ထဲတွင် အာရုံနှစ်ထားကာ တွေးတောဆင်ခြင်သင့်သည်။ ဤတွင် ပြန်ပြောင်းသုံးသပ်ခြင်းနှင့် ဆုတောင်းခြင်းလိုအပ်သည်။ ဧဇရကဲ့သို့ ဘုရားသခင့်နှုတ်မြွက်စကားတော်ကို ဖတ်ရှုခြင်းနှင့် လေ့လာခြင်းအတွက် ကျွန်ုပ်တို့၏နှလုံးများကိုပြင်ဆင်ရန်လိုအပ်သည်။ သူနှင့်ပတ်သက်၍ ဤသို့ရေးသားထားသည်– “ဧဇရသည် ထာဝရဘုရား၏တရားတော်ကို လေ့ကျက်စောင့်ရှောက်ခြင်းငှာလည်းကောင်း၊ ထုံးဖွဲ့ချက်၊ စီရင်ချက်များကို ဣသရေလလူမျိုးတွင် သွန်သင်ခြင်းငှာလည်းကောင်း သဘောထား [“စိတ်နှလုံးကို ပြင်ဆင်ထား၊” ကဘ] သတည်း။” (ဧဇရ ၇:၁၀၊ သမ္မာ) မိမိစိတ်နှလုံးကို ဧဇရပြင်ဆင်ခြင်း၏ ရည်ရွယ်ချက်သုံးခုကိုသတိပြုပါ– လေ့လာရန်၊ လက်တွေ့ကျင့်သုံးရန်နှင့် သွန်သင်ပေးရန်တို့ဖြစ်သည်။ သူ၏ပုံသက်သေကို ကျွန်ုပ်တို့လိုက်လျှောက်သင့်သည်။
ဝတ်ပြုမှုအစီအစဉ်တစ်ရပ်အဖြစ် လေ့လာမှု
၉၊ ၁၀။ (က) ဆာလံဆရာသည် ယေဟောဝါ၏နှုတ်မြွက်စကားတော်ကို အဘယ်နည်းများဖြင့် ဆင်ခြင်အောက်မေ့ခဲ့သနည်း။ (ခ) “[ကိုယ်တိုင်] ဆင်ခြင်အောက်မေ့” သည်ဟုပြန်ဆိုထားသော ဟေဗြဲကြိယာ၏အဓိပ္ပာယ်ကားအဘယ်နည်း။ (ဂ) သမ္မာကျမ်းစာလေ့လာခြင်းကို “ဝတ်ပြုမှုအစီအစဉ်တစ်ရပ်” အဖြစ် ကျွန်ုပ်တို့ယူမှတ်ရန် အဘယ်ကြောင့်အရေးကြီးသနည်း။
၉ ဆာလံဆရာက ယေဟောဝါ၏နည်းဥပဒေသများ၊ ပညတ်တော်များ၊ သက်သေခံတော်မူချက်များကို သူဆင်ခြင်ကြောင်း ဖော်ပြခဲ့သည်။ သူဤသို့သီဆိုခဲ့သည်– “ပေးတော်မူသော [ဆုံးမစကား] ကိုဆင်ခြင်၍ လမ်းခရီးတော်တို့ကို ကြည့်ရှုပါ၏။ နှစ်သက်သောပညတ်တော်တို့အား လက်တို့ကိုချီ၍ အထုံးအဖွဲ့တော်တို့ကို ဆင်ခြင်အောက်မေ့ပါမည်။ ကိုယ်တော်၏တရားကို အကျွန်ုပ်သည်အလွန်နှစ်သက်ပါ၏။ တစ်နေ့လုံး ဆင်ခြင်အောက်မေ့လျက်နေပါ၏။ သက်သေခံတော်မူချက်တို့ကို အကျွန်ုပ်သည်ဆင်ခြင်အောက်မေ့သောကြောင့် အကျွန်ုပ်၏ဆရာအပေါင်းတို့ထက် သာ၍နားလည်ပါ၏။” (ဆာလံ ၁၁၉:၁၅၊ ၄၈၊ ၉၇၊ ၉၉) ယေဟောဝါ၏နှုတ်မြွက်စကားတော်ကို ‘သူကိုယ်တိုင် ဆင်ခြင်အောက်မေ့ခြင်း’ က အဘယ်အရာကိုဆိုလိုသနည်း။
၁၀ “[ကိုယ်တိုင်] ဆင်ခြင်အောက်မေ့” သည်ဟုပြန်ဆိုထားသော ဟေဗြဲကြိယာသည် “တွေးတောဆင်ခြင်သည်၊ တွေးတောသည်” “ကိစ္စရပ်တစ်ခုကို ပြန်၍အသေအချာဆန်းစစ်သည်” ဟူ၍လည်းအဓိပ္ပာယ်ရှိသည်။ “ယင်းကို ဘုရားသခင့်လက်ရာတော်များ . . . နှင့်ဘုရားသခင့်စကားတော်ကို တိတ်တဆိတ်ပြန်ပြောင်းတွေးတောဆင်ခြင်ခြင်းအဖြစ် အသုံးပြုထားသည်။” (ဓမ္မဟောင်းကျမ်းဆိုင်ရာ ဓမ္မပညာသုံးဝေါဟာရစာအုပ်) “ဆင်ခြင်အောက်မေ့” ၏နာမ်သဏ္ဌာန်ကို “ဆာလံဆရာ၏တွေးတောဆင်ခြင်ခြင်း၊” “ဝတ်ပြုမှုအစီအစဉ်တစ်ရပ်” အဖြစ် ဘုရားသခင်ပညတ်တော်ကို “သူ၏ မြတ်မြတ်နိုးနိုးလေ့လာမှု” ဟုရည်ညွှန်းထားသည်။ ဘုရားသခင့်နှုတ်မြွက်စကားလေ့လာခြင်းကို ကျွန်ုပ်တို့ဝတ်ပြုမှု၏အစိတ်အပိုင်းအဖြစ် ယူမှတ်လျှင် ယင်းကို ပို၍အလေးအနက်ထားလာသည်။ သို့ဖြစ်၍ ယင်းကို အသိရှိရှိတာဝန်သိသိ၊ ဆုတောင်းခြင်း၏အကူအညီဖြင့် ပြုလုပ်သင့်သည်။ လေ့လာခြင်းသည် ကျွန်ုပ်တို့ဝတ်ပြုမှု၏ အစိတ်အပိုင်းဖြစ်ပြီး ကျွန်ုပ်တို့၏ဝတ်ပြုပုံ တိုးတက်လာစေဖို့ ပြုလုပ်ခြင်းဖြစ်သည်။
ဘုရားသခင့်နှုတ်မြွက်စကားတော်ကို နက်နက်နဲနဲရှာဖွေလေ့လာခြင်း
၁၁။ ယေဟောဝါသည် မိမိ၏လူမျိုးအား အလွန်နက်နဲသောအကြံတော်များကို မည်သို့ဖော်ပြပေးသနည်း။
၁၁ လေးစားကြည်ညိုကာ ဆာလံဆရာ ဤသို့ကြွေးကြော်ခဲ့သည်– “အိုထာဝရဘုရား စီရင်တော်မူသောအမှုတို့သည်ကြီးမား၍ အကြံအစည်တော်လည်း အလွန်နက်လှပါ၏။” (ဆာလံ ၉၂:၅) သစ္စာနှင့်သတိပညာရှိကျေးကျွန်ပေါ်တွင် လှုပ်ရှားသက်ရောက်နေသည့် “မိမိဝိညာဉ်တော်အားဖြင့်” မိမိ၏လူမျိုးတော်ကို ယေဟောဝါ ဖွင့်ပြပေးတော်မူသည့် နက်နဲသောအကြံတော်နှင့်ပတ်သက်၍ “ဘုရားသခင်၏နက်နဲသောအရာ” ကိုတမန်တော်ပေါလုလည်းပြောခဲ့သည်။ (၁ ကောရိန္သု ၂:၁၀; မဿဲ ၂၄:၄၅) ကျေးကျွန်အတန်းအစားသည် လူအားလုံးအတွက် ဝိညာဉ်ရေးအာဟာရ—လူသစ်များအတွက် “နို့” နှင့် “စုံလင်သောအရွယ်ရှိသောသူ” အတွက် “ကြေခဲသောအစာအာဟာရ” ကို ဝီရိယရှိရှိပြင်ဆင်ပေး၏။—ဟေဗြဲ ၅:၁၁-၁၄။
၁၂။ ကျေးကျွန်အတန်းအစားက ရှင်းပြထားသည့် “ဘုရားသခင်၏နက်နဲသောအရာ” ဆိုင်ရာ ဥပမာတစ်ခုပေးပါ။
၁၂ ယင်းသို့ “ဘုရားသခင်၏နက်နဲသောအရာ” ကို နားလည်သဘောပေါက်ရန် ကိုယ်တော်၏နှုတ်မြွက်စကားတော်ကို ဆုတောင်း၍ ပြန်ပြောင်းစဉ်းစားကာ လေ့လာဖို့လိုသည်။ ဥပမာ၊ ထုတ်ဝေခဲ့ပြီးသောအကြောင်းအရာကောင်းက ယေဟောဝါသည် တရားမျှတကာ တစ်ချိန်တည်းတွင် သနားညှာတာနိုင်ပုံကိုဖော်ပြပေးသည်။ မိမိ၏သနားညှာတာမှုကိုကျင့်သုံးရန် မိမိ၏တရားမျှတမှုကို လျှော့ပေါ့မပေးလိုက်ချေ; ယင်းအစား ဘုရားသခင်၏သနားညှာတာမှုသည် တရားမျှတမှုနှင့် ချစ်ခြင်းတရားတို့၏သရုပ်သကန်ဖြစ်သည်။ အပြစ်သားတစ်ဦးကို တရားစီရင်သောအခါ ဦးဆုံးအနေနှင့် ယေဟောဝါသည် မိမိသားတော်၏ရွေးနုတ်ဖိုးပူဇော်သကာပေါ် အခြေခံ၍ သနားညှာတာမှုပြနိုင်စရာ ရှိ၊ မရှိဆုံးဖြတ်တော်မူသည်။ အပြစ်သားသည် နောင်တမယူ သို့မဟုတ် ပုန်ကန်မည်ဆိုလျှင် ဘုရားသခင်သည် သနားညှာတာမှုမလိုအပ်ဘဲ တရားလမ်းကြောင်းအတိုင်း စီရင်အပြစ်ပေးသည်။ ကိုယ်တော်သည် တစ်နည်းမဟုတ်တစ်နည်းဖြင့် မိမိ၏မြင့်မားသောမူများကို စောင့်စည်းသည်။ * (ရောမ ၃:၂၁-၂၆) “ဘုရားသခင်၏ပညာ . . . သည် အလွန်ကျယ်ဝန်းနက်နဲစွတကား!”—ရောမ ၁၁:၃၃။
၁၃။ ယခုအထိဖွင့်ပြလာသည့် “များပြား” လှသောဝိညာဉ်ရေးရာအမှန်တရားကို တန်ဖိုးထားကြောင်း ကျွန်ုပ်တို့မည်သို့ပြသင့်သနည်း။
၁၃ ဆာလံဆရာကဲ့သို့ပင် ယေဟောဝါသည် မိမိ၏အကြံတော်များစွာကို ကျွန်ုပ်တို့အားမျှဝေထားသည့်အချက်က ပီတိဖြစ်စရာပင်။ ဒါဝိဒ် ဤသို့ရေးသားခဲ့သည်– “အိုဘုရားသခင် အကျွန်ုပ်၌ ကိုယ်တော်၏အကြံအစည်တို့သည် အလွန်ထူးဆန်းကြပါ၏။ အလွန်များပြားကြပါ၏။ ထိုအကြံအစည်တော်တို့ကိုရေတွက်လျှင် သဲလုံးနှင့်အမျှမက သာ၍များပြားကြပါ၏။” (ဆာလံ ၁၃၉: ၁၇၊ ၁၈) ယနေ့ ကျွန်ုပ်တို့၏အသိပညာသည် ထာဝရကာလတစ်လျှောက် ယေဟောဝါဖော်ပြပေးလိမ့်မည့် မရေတွက်နိုင်သောအကြံအစည်များထဲမှ အစအနလေးသာဖြစ်သော်လည်း ယခုအထိ ဖော်ပြပေးခဲ့သော တန်ဖိုးရှိလှသည့် “များပြား” လှသောဝိညာဉ်ရေးရာအမှန်တရားကို ကျွန်ုပ်တို့အလွန်တန်ဖိုးထားကြပြီး ဘုရားသခင့်စကားတော်၏အစုအပုံထဲ သို့မဟုတ် များပြားမှုထဲတွင် နက်သည်ထက်နက်စွာ ဆက်ရှာဖွေကြသည်။—ဆာလံ ၁၁၉:၁၆၀။
ကြိုးစားအားထုတ်မှုနှင့် ထိရောက်မှုရှိသောကိရိယာများလိုအပ်
၁၄။ နယပုံပြင် ၂:၁-၆ ကဘုရားသခင့်နှုတ်မြွက်စကားတော်ကို လေ့လာရာ၌ ကြိုးစားအားထုတ်မှုလိုအပ်ကြောင်း မည်သို့အလေးပေးဖော်ပြခဲ့သနည်း။
၁၄ သမ္မာကျမ်းစာကို နက်နက်နဲနဲလေ့လာရာ၌ ကြိုးစားအားထုတ်မှုလိုအပ်သည်။ နယပုံပြင် ၂:၁-၆ ကိုဂရုတစိုက်ဖတ်ကြည့်လျှင် ဤလိုအပ်ချက်ကို အထင်အရှားတွေ့ရ၏။ ဘုရားသခင်ရေးရာအသိပညာ၊ ဉာဏ်ပညာနှင့် ပိုင်းခြားသိမြင်မှုကိုရရှိရန် ကြိုးစားအားထုတ်မှုလိုအပ်ကြောင်း အလေးပေးဖော်ပြရန် ပညာရှိဘုရင်ရှောလမုန်အသုံးပြုခဲ့သည့် ဆောင်ရွက်မှုပြကြိယာများကို သတိပြုပါ။ သူဤသို့ရေးသားခဲ့သည်– “ငါ့သား သင်သည်ပညာစကားကိုနားထောင်၍၊ စေတနာစိတ်နှင့် ဉာဏ်ကိုရှာဖွေသည်တိုင်အောင် ငါ့စကားကိုနားခံ၍ ငါ့ပညတ်တို့ကို ကိုယ်အထဲ၌ သွင်းမိလျှင်လည်းကောင်း၊ သိပ္ပံအတတ်ကိုခေါ်၍ ဉာဏ်နောက်သို့အသံကိုလွှင့်လျှင်လည်းကောင်း၊ ငွေကိုရှာတတ်သကဲ့သို့ ပညာကိုရှာ၍ ဝှက်ထားသောဘဏ္ဍာကိုစူးစမ်းတတ်သကဲ့သို့ ဉာဏ်ကိုစူးစမ်းလျှင်လည်းကောင်း၊ ထာဝရဘုရားကိုကြောက်သောသဘော၌ကျင်လည်၍ ဘုရားသခင်ကိုသိသောဉာဏ်နှင့် ပြည့်စုံလိမ့်မည်။ အကြောင်းမူကား ထာဝရဘုရားသည် ပညာကိုပေးတော်မူတတ်၏။ နားလည်နိုင်သောဉာဏ်သည် နှုတ် [မြွက်စကား] အားဖြင့်သာဖြစ်တတ်၏။” မှန်ပါသည်၊ အကျိုးဖြစ်ထွန်းသည့် လေ့လာမှုတွင် သုတေသနပြုခြင်း၊ ဝှက်ထားသောဘဏ္ဍာကိုရှာဖွေဘိသကဲ့သို့ တူးဆွခြင်းပါဝင်သည်။
၁၅။ သမ္မာကျမ်းဆိုင်ရာ အဘယ်ပုံဥပမာက ကောင်းသောလေ့လာမှုနည်းလမ်းများ လိုအပ်ကြောင်းကို အလေးပေးဖော်ပြသနည်း။
၁၅ ဝိညာဉ်ရေးအရကုံလုံကြွယ်ဝစေသည့် လေ့လာမှုတွင် လေ့လာမှုနည်းလမ်းကောင်းများလည်း လိုအပ်သည်။ ရှောလမုန်က ဤသို့ရေးသားခဲ့သည်– “ပုဆိန်တုံးသောအခါမသွေးဘဲနေလျှင် အလွန်ပြင်းစွာအားစိုက်ရမည်။” (ဒေ. ၁၀:၁၀၊ သမ္မာ) လုပ်သားတစ်ဦးသည် မထက်သောဖြတ်တောက်ကိရိယာတစ်ခုကို အသုံးပြုမည်ဆိုလျှင် သို့မဟုတ် ယင်းကို ကျွမ်းကျွမ်းကျင်ကျင်အသုံးမပြုတတ်လျှင် သူသည် မိမိ၏အစွမ်းခွန်အားကို အလဟဿကုန်စေ၍ သူ၏လုပ်ဆောင်မှုမှာလည်း အချည်းနှီးဖြစ်သွားပေလိမ့်မည်။ အလားတူ လေ့လာမှုအတွက်အသုံးပြုသောအချိန်မှာ ကျွန်ုပ်တို့၏လေ့လာပုံလေ့လာနည်းများပေါ်မူတည်၍ အကျိုးကျေးဇူးများ လွန်စွာခြားနားနိုင်ပေသည်။ ကျွန်ုပ်တို့လေ့လာပုံလေ့လာနည်း တိုးတက်လာစေသည့် အကောင်းဆုံးလက်တွေ့ကျ အကြံဉာဏ်များကို သီအိုကရက်တစ်ကျောင်းလမ်းညွှန်စာအုပ် သင်ခန်းစာ ၇ တွင်တွေ့ရှိနိုင်သည်။ *
၁၆။ နက်နက်နဲနဲလေ့လာမှုပြုရာ၌ ကျွန်ုပ်တို့ကိုအကူအညီဖြစ်စေရန် အဘယ်လက်တွေ့ကျအကြံပေးချက်များ ပေးထားသနည်း။
၁၆ လက်မှုပညာသည်တစ်ဦး မိမိ၏လုပ်ငန်းစတင်သောအခါ သူလိုအပ်မည့်ကိရိယာတန်ဆာပလာများကို ခင်းချထားရမည်ဖြစ်သည်။ အလားတူ ကျွန်ုပ်တို့သည် လေ့လာမှုစတင်သောအခါ ကျွန်ုပ်တို့ကိုယ်ပိုင်စာကြည့်တိုက်ရှိ လိုအပ်မည်ဖြစ်သောလေ့လာစရာကိရိယာများကို ရွေးချယ်ထားသင့်သည်။ လေ့လာမှုဟူသည် အလုပ်တစ်ခုဖြစ်ပြီး စိတ်ပိုင်းဆိုင်ရာကြိုးစားအားထုတ်မှုလိုအပ်ကြောင်း သတိရကာ သင့်လျော်သောကိုယ်ဟန်အနေအထားကိုလည်း ရွေးချယ်သင့်သည်။ ကျွန်ုပ်တို့သည် စိတ်ပိုင်းဆိုင်ရာနိုးနိုးကြားကြားဖြစ်လိုမည်ဆိုလျှင် စားပွဲတစ်လုံး သို့မဟုတ် စာကြည့်စားပွဲ၌ ကုလားထိုင်ဖြင့်ထိုင်ခြင်းက အိပ်ရာထဲတွင်လှဲ၍ သို့မဟုတ် ဇိမ်ရှိသောဆိုဖာပေါ်တွင်ထိုင်ခြင်းထက် သာ၍ထိရောက်မှုရှိကြောင်း တွေ့ရပေမည်။ အတန်ကြာအာရုံစိုက်လေ့လာပြီးနောက် အညောင်းဆန့်ခြင်း သို့မဟုတ် အပြင်ထွက်၍ လေကောင်းလေသန့်ရှူခြင်းတို့သည် အကျိုးဖြစ်ထွန်းကြောင်း သင်တွေ့ရှိပေလိမ့်မည်။
၁၇၊ ၁၈။ သင်ရရှိနိုင်သော ကောင်းမွန်သည့်လေ့လာမှုအထောက်အကူပြုကိရိယာများကို မည်သို့အသုံးပြုပုံနှင့်ပတ်သက်၍ ဥပမာများပေးပါ။
၁၇ ကျွန်ုပ်တို့သည် ပြိုင်ဘက်ကင်းသော လေ့လာရေးအထောက်အကူပြုကိရိယာများကိုလည်း ရရှိနိုင်ကြသည်။ ယင်းတို့ထဲက ထိပ်ဆုံးမှဖြစ်သောအရာကား သမ္မာကျမ်း၏ ကမ္ဘာသစ်ဘာသာပြန်ကျမ်းဖြစ်ပြီး ယခု တစ်အုပ်လုံးဖြစ်စေ၊ တစ်စိတ်တစ်ပိုင်းဖြစ်စေ ၃၇ ဘာသာဖြင့်ရရှိနိုင်ကြသည်။ ကမ္ဘာသစ်ဘာသာပြန်ကျမ်း၏ စံထုတ်ဝေသည့်စာအုပ်၌ ပြန်လှန်အညွှန်းများနှင့် ရေးသားသူ၊ ရေးသားသည့်နေရာ၊ ခြုံငုံမိသည့်ကာလတို့ကို ဖော်ပြပေးသည့် “သမ္မာကျမ်းစာစောင်များ၏ဇယား” တို့ပါရှိသည်။ သမ္မာကျမ်းစာစကားလုံးများအညွှန်း၊ နောက်ဆက်တွဲနှင့် မြေပုံများလည်းပါရှိသည်။ ဘာသာစကားအချို့တွင် ဤသမ္မာကျမ်းစာကို စာအုပ်ကြီးဖြင့်ပုံနှိပ်ထုတ်ဝေခဲ့ပြီး အညွှန်းကျမ်းစာဟုသိရှိကြသည်။ ယင်း၌ အထက်ဖော်ပြပါ အင်္ဂါရပ်အားလုံးနှင့် ထပ်ညွှန်းပါသည့် အဓိပ္ပာယ်ကျယ်ဝန်းသောအောက်ခြေမှတ်ချက်များအပါအဝင် သာ၍များစွာပါရှိသည်။ ဘုရားသခင့်နှုတ်မြွက်စကားတော်ကို သာ၍နက်သည်ထက်နက်စွာတူးဆွရာ၌ သင့်အား အထောက်အကူပြုနိုင်ရန် သင်၏ဘာသာစကား၌ရရှိနိုင်သောအရာကို သင်အပြည့်အဝအကျိုးရယူပါသလော။
၁၈ တန်ဖိုးမဖြတ်နိုင်သော အခြားလေ့လာရေးအထောက်အကူပြု ကိရိယာမှာ နှစ်အုပ်တွဲ ကျမ်းစာစောင်များအပေါ်ထိုးထွင်းသိမြင်ခြင်း ကျမ်းစာစွယ်စုံကျမ်းဖြစ်သည်။ သင်နားလည်နိုင်သောဘာသာစကားဖြင့် ဤစာအုပ်ကို သင့်လက်ဝယ်ပိုင်ဆိုင်ထားပါက သင်လေ့လာမှုပြုသောအခါ ယင်းသည် အမြဲပင်သင်၏အဖော်ဖြစ်သင့်သည်။ သမ္မာကျမ်းစာအကြောင်းအရာအများစုနှင့်ပတ်သက်သည့် နောက်ခံအချက်အလက်ဖြင့် ယင်းက သင့်ကို ထောက်ပံ့ပေးမည်။ အလားတူအထောက်အကူပြု ကိရိယာတစ်ခုမှာ “ကျမ်းစာတစ်ကျမ်းလုံး ဘုရားမှုတ်သွင်းရာဖြစ်ပြီး အကျိုးလည်းပြု” စာအုပ်ဖြစ်သည်။ သမ္မာကျမ်းစာစောင်အသစ်တစ်စောင်ကို ဖတ်ရှုရန်စတင်သောအခါ ပထဝီဝင်နှင့်သမိုင်းနောက်ခံတို့အပြင် သမ္မာကျမ်းစောင်များ၏ပါဝင်သောအကြောင်းအရာ အကျဉ်းချုပ်နှင့် ကျွန်ုပ်တို့အတွက် ယင်းတို့၏အကျိုးရှိပုံကိုသိရန် “ကျမ်းစာတစ်ကျမ်းလုံး” စာအုပ်ပါ သက်ဆိုင်ရာကျမ်းအကြောင်းကိုဆန်းစစ်လေ့လာသင့်သည်။ မကြာသေးမီက ထပ်တိုးလာသည့်အရာမှာ ပုံနှိပ်စာပေပုံစံဖြစ်သည့် များစွာသောလေ့လာမှုအထောက်အကူပြုကိရိယာများကို ကွန်ပျူတာ၌ကြည့်နိုင်ရန်စီမံထားသည့် ကင်းမျှော်စင်စာကြည့်တိုက်ဖြစ်ပြီး ဘာသာစကားပေါင်းကိုးခုဖြင့် ယခုရရှိနိုင်သည်။
၁၉။ (က) သမ္မာကျမ်းစာလေ့လာရန် ကျွန်ုပ်တို့အတွက် ကောင်းမွန်သောကိရိယာများကို ယေဟောဝါ အဘယ်ကြောင့်စီမံပေးခဲ့သနည်း။ (ခ) လျောက်ပတ်သောကျမ်းစာဖတ်ရှုခြင်းနှင့် လေ့လာခြင်းအတွက် အဘယ်အရာလိုအပ်သနည်း။
၁၉ ကမ္ဘာပေါ်ရှိမိမိ၏ကျေးကျွန်များ ‘ဘုရားသခင်ကိုသိသောဉာဏ်အား ရှာတွေ့’ နိုင်ကြစေရန် ယေဟောဝါသည် ဤကိရိယာအားလုံးကို ‘သစ္စာနှင့်သတိပညာရှိကျေးကျွန်’ အားဖြင့် စီမံပေးခဲ့သည်။ (သု. ၂:၄၊ ၅) ကောင်းသောလေ့လာမှုအလေ့အကျင့်က ယေဟောဝါအား သာ၍သိကျွမ်းလာစေဖို့ ကျွန်ုပ်တို့ကိုကူညီပေးပြီး ကိုယ်တော်နှင့် သာ၍ရင်းနှီးသောဆက်ဆံရေးရရှိစေမည်ဖြစ်သည်။ (ဆာလံ ၆၃:၁-၈) မှန်ပါသည်၊ လေ့လာခြင်းဟူသည် အလုပ်ဖြစ်၏၊ သို့သော် ယင်းသည် ပျော်ရွှင်စရာကောင်းပြီး အကျိုးဖြစ်ထွန်း၏။ မည်သို့ပင်ဖြစ်စေ ယင်းအတွက် အချိန်ပေးရသည်၊ သို့ဖြစ်၍ သင့်အနေဖြင့် ‘ကျွန်တော့်ရဲ့ ကျမ်းစာဖတ်ရှုခြင်းနဲ့ ကိုယ်ပိုင်လေ့လာမှုမှာ အပြည့်အဝအာရုံစိုက်ဖို့ အချိန်ကို ဘယ်ကရနိုင်မှာလဲ’ ဟုစဉ်းစားပေမည်။ ၎င်းကဏ္ဍကို ဤအခန်းဆက်၏ နောက်ဆုံးဆောင်းပါးတွင် သုံးသပ်သွားကြမည်။
[အောက်ခြေမှတ်ချက်များ]
^ အပိုဒ်၊ 7 ဓမ္မဟောင်းကျမ်း ဓမ္မပညာသုံးနိုင်ငံတကာအဘိဓာန်သစ်နှင့် အကျယ်ဖွင့်ကျမ်း အတွဲ ၄၊ စစ. ၂၀၅-၇။
^ အပိုဒ်၊ 12 ကင်းမျှော်စင်၊ ဩဂုတ် ၁၊ ၁၉၉၈၊ စာမျက်နှာ ၁၃၊ စာပိုဒ် ၇ ကိုရှု။ သမ္မာကျမ်းစာလေ့လာခြင်း၏စီမံကိန်းအဖြစ် သင့်အနေနှင့် ထိုလထုတ်မဂ္ဂဇင်းပါ လေ့လာရန်ဆောင်းပါးများအပြင် နယူးယောက်၊ ကင်းမျှော်စင်သမ္မာကျမ်းစာနှင့်ဝေစာအသင်းမှ ထုတ်ဝေသည့် ကျမ်းစာစောင်များအပေါ်ထိုးထွင်းသိမြင်ခြင်း ကျမ်းစာစွယ်စုံကျမ်း [လိပ်] ရှိ “တရားမျှတခြင်း၊” “သနားညှာတာခြင်း၊” “ဖြောင့်မတ်ခြင်း” ဆောင်းပါးများကိုလည်း ပြန်သုံးသပ်နိုင်သည်။
^ အပိုဒ်၊ 15 မြန်မာ၊ ကင်းမျှော်စင်သမ္မာကျမ်းစာနှင့်ဝေစာအသင်းမှ ထုတ်ဝေသည်။ ဤလက်စွဲစာအုပ်ကို သင်ဘာသာစကားဖြင့်မရရှိနိုင်ပါက ကင်းမျှော်စင်– ဩဂုတ် ၁၅၊ ၁၉၉၃၊ စာမျက်နှာ ၁၃-၁၇; မေ ၁၅၊ ၁၉၈၆ [လိပ်]၊ စာမျက်နှာ ၁၉-၂၀ တို့တွင် လေ့လာခြင်းနည်းလမ်းများနှင့်ပတ်သက်၍ ကောင်းမွန်သောအကြံပေးချက်ကို တွေ့နိုင်ပါသည်။
ပြန်လည်သုံးသပ်ရန်မေးခွန်းများ
• ကျွန်ုပ်တို့၏ကိုယ်ပိုင်လေ့လာမှုကို လန်းဆန်းစေ၍ အကျိုးဖြစ်ထွန်းစေရန် မည်သို့လုပ်ဆောင်နိုင်သနည်း။
• ဆာလံဆရာကဲ့သို့ ကျွန်ုပ်တို့သည် ဘုရားသခင့်နှုတ်မြွက်စကားတော်ကို “နှစ်သက်မြတ်နိုး” ၍ “ဆင်ခြင်အောက်မေ့” ကြောင်း မည်သို့ပြသနိုင်ကြသနည်း။
• ဘုရားသခင့်နှုတ်မြွက်စကားတော်ကို လေ့လာရာ၌ ကြိုးစားအားထုတ်ရန်လိုကြောင်း နယပုံပြင် ၂:၁-၆ က မည်သို့ဖော်ပြသနည်း။
• အဘယ်ကောင်းမွန်သောလေ့လာမှုအထောက်အကူပြုကိရိယာများကို ယေဟောဝါစီမံပေးထားတော်မူသနည်း။
[လေ့လာရန်မေးခွန်းများ]
[စာမျက်နှာ ၁၄ ပါ ရုပ်ပုံ]
တိတ်ဆိတ်စွာပြန်ပြောင်းစဉ်းစားဆင်ခြင်ခြင်းနှင့် ဆုတောင်းခြင်းက ဘုရားသခင့်နှုတ်မြွက်စကားတော်ကို ချစ်မြတ်နိုးမှုတိုးပွားလာစေရန် ကျွန်ုပ်တို့ကိုကူညီပေး
[စာမျက်နှာ ၁၇ ပါ ရုပ်ပုံ]
ဘုရားသခင့်နှုတ်မြွက်စကားတော်ထဲ သာ၍နက်နက်နဲနဲတူးဆွရန် ရနိုင်သမျှလေ့လာမှုကိရိယာများကို သင်အပြည့်အဝအသုံးပြုပါသလော