အလျှံပယ်ရက်ရောမှုက ပျော်ရွှင်စေ
အလျှံပယ်ရက်ရောမှုက ပျော်ရွှင်စေ
မေတ္တာရှိသော ခရစ်ယာန်ကြီးကြပ်မှူးတစ်ဦးအနေဖြင့် တမန်တော်ပေါလုသည် ခရစ်ယာန်ယုံကြည်သူချင်းတို့၏အကောင်းဆုံးအကျိုးကို လိုလားခဲ့၏။ (၂ ကောရိန္သု ၁၁:၂၈) ထို့ကြောင့် ကျွန်ုပ်တို့ခရစ်နှစ်၏ ၅၀ ပြည့်လွန်နှစ်များအလယ်ပိုင်းပထမရာစုတွင် ယုဒနယ်ရှိဆင်းရဲသောခရစ်ယာန်များအတွက် ငွေကြေးကောက်ခံရန် သူစီစဉ်ခဲ့ချိန်က ရက်ရောမှုနှင့်ပတ်သက်၍ တန်ဖိုးရှိသောသင်ခန်းစာကို သွန်သင်ပေးဖို့အခွင့်အလမ်းယူခဲ့သည်။ ယေဟောဝါသည် စေတနာပါသောပေးကမ်းမှုကို အလွန်တန်ဖိုးထားကြောင်း ပေါလုကဤသို့အလေးပေးဖော်ပြခဲ့သည်– “လူတိုင်း ကိုယ်အလိုအလျောက်လှူရ၏။ နှမြောသောစိတ်နှင့်မလှူရ၊ မလှူဘဲမနေရဟု စိတ်ထင်နှင့်မလှူရ၊ အကြောင်းမူကား၊ စေတနာစိတ်နှင့်လှူသောသူကိုသာ ဘုရားသခင်နှစ်သက်တော်မူ၏။”—၂ ကောရိန္သု ၉:၇။
အလွန့်အလွန်ဆင်းရဲသော်လည်း အလွန်ရက်ရောကြ
ပထမရာစုနှစ်ရှိ ခရစ်ယာန်အများစုမှာ အထင်ကရလူတန်းစားမှမဟုတ်ကြပေ။ သူတို့ထဲတွင် “တန်ခိုးကြီးသောသူအများမပါ” ကြောင်း ပေါလုသတိပြုမိခဲ့သည်။ သူတို့သည် “ဤလောက၌ မိုက်မဲသောသူ၊” “ဤလောက၌အားနည်းသောသူ” များဖြစ်ကြသည်။ (၁ ကောရိန္သု ၁:၂၆-၂၈၊ သမ္မာ) ဥပမာ၊ မာကေဒေါနိပြည်ရှိခရစ်ယာန်များသည် “အလွန့်အလွန်ဆင်းရဲကြ” ကာ ‘ဆင်းရဲမှုကိုခံ’ ခဲ့ကြရသည်။ သို့ဖြစ်စေကာမူ နှိမ့်ချသောဤယုံကြည်သူမာကေဒေါနိပြည်သားတို့သည် “ထာဝရဘုရား၏လူစုအားကူညီမစမှုတွင်” ငွေကြေးထည့်ဝင်ခွင့်ပြုရန် တောင်းပန်ခဲ့ကြ၏; ထို့ပြင် သူတို့ပေးကမ်းသောအရာမှာ ပေါလုဖော်ပြချက်အရ “စွမ်းအားရှိသမျှထက်ပင်ပို” ခဲ့သည်တကား!—၂ ကောရိန္သု ၈:၁-၄၊ သတင်းကောင်း။
သို့တိုင် ယင်းသို့သော ရက်ရက်ရောရောပေးကမ်းမှုကို ပေးကမ်းသောပမာဏဖြင့် သတ်မှတ်ခဲ့ခြင်းမဟုတ်ချေ။ ယင်းအစား စေ့ဆော်မှု၊ ဝေမျှရန်တလိုတလားရှိမှုနှင့် စိတ်နေစိတ်ထားတို့မှာ အရေးပါခဲ့သည်။ အလှူထည့်ဝင်ရာ၌ ကျွန်ုပ်တို့၏စိတ်သဘောထားနှင့် စိတ်နှလုံးနှစ်ရပ်စလုံးအကျုံးဝင်ကြောင်း ကောရိန္သုခရစ်ယာန်များကို ပေါလုညွှန်ပြခဲ့၏။ သူဤသို့ပြောခဲ့သည်– “သင်တို့၌ရှိသော ထိုစေတနာစိတ်ကို ငါဝါကြွား၍ . . . မာကေဒေါနိလူတို့အား ငါဆိုတတ်၏။ ထိုသို့ သင်တို့စေတနာစိတ်အားကြီးခြင်းအကြောင်းအရာသည် အများသောသူတို့ကို နှိုးဆော်တိုက်တွန်းလေပြီ။” ရက်ရောစွာပေးမည်ဟု သူတို့သည် “မိမိစိတ်ထဲ၌ ကြံစည်ထားသည်။”—၂ ကောရိန္သု ၉:၂၊ ၇၊ သမ္မာ။
‘သူတို့၏စိတ်ဝိညာဉ်က သူတို့ကိုနှိုးဆော်ခဲ့’
တမန်တော်ပေါလု၏စိတ်တွင် ရက်ရက်ရောရောပေးကမ်းထည့်ဝင်ခဲ့သော ရှေးပုံသက်သေရှိခဲ့ပေမည်၊ တစ်ခုမှာ သူအချိန်မတိုင်မီ ရာစုနှစ် ၁၅ ခုကျော်က တောကန္တာရထဲ၌ ဖြစ်ပျက်ခဲ့ရာဖြစ်သည်။ ဣသရေလ ၁၂ နွယ်သည် အီဂျစ်ပြည်၏ကျွန်ဘဝမှ လွတ်မြောက်လာခဲ့ကြသည်။ ယခု သူတို့သည် သိနာတောင်ခြေတွင်ရှိနေကြပြီး ဝတ်ပြုရေးအတွက် တဲတော်တစ်ဆောင်ဆောက်လုပ်ရန်နှင့် ယင်းတွင် ဝတ်ပြုရေးဆိုင်ရာအသုံးအဆောင်များတပ်ဆင်ရန် ယေဟောဝါ သူတို့ကို မိန့်မှာခဲ့၏။ ယင်းက ဥစ္စာအင်ခွင်များစွာလိုအပ်မည်ဖြစ်ရာ ထိုလူမျိုးမှာ ထည့်ဝင်လှူဒါန်းရန် ဖိတ်ခေါ်ခြင်းခံခဲ့ရသည်။
ထိုဣသရေလအမျိုးသားများ မည်သို့တုံ့ပြန်ခဲ့ကြသနည်း။ “မိမိစိတ်နှလုံးနှိုးဆော်သောသူ၊ ကြည်ညိုသော . . . စိတ်သဘောရှိသောသူအပေါင်းတို့သည် ပရိသတ်စည်းဝေးရာတဲတော်လုပ်ဖို့ . . . ထာဝရဘုရားအားလှူသောအလှူကို ဆောင်လျက်လာကြ၏။” (ထွက်မြောက်ရာ ၃၅:၂၁) ထိုလူမျိုးသည် ရက်ရက်ရောရောပေးကမ်းခဲ့ကြသလော။ အတိုင်းထက်အလွန်ပင်! အောက်တွင်ဖော်ပြသောသတင်းကို မောရှေရရှိခဲ့သည်– “ထာဝရဘုရားမှာထားတော်မူသောအလုပ် ပြီးလောက်ရုံမျှမက၊ ပို၍ဆောင်ခဲ့ကြပါပြီ။”—ထွက်မြောက်ရာ ၃၆:၅။
ထိုအချိန်က ဣသရေလတို့၏ ငွေကြေးအခြေအနေကား မည်သို့နည်း။ သူတို့သည် စိတ်ဆင်းရဲနေကြရသည့် ကျေးကျွန်များဖြစ်ခဲ့ကြပြီး ‘ကျပ်တည်းစွာနှိပ်စက်ညှဉ်းဆဲခံရကြ၍’ “အလွန်ဆင်းရဲပင်ပန်း” သောဘဝဖြင့်နေထိုင်နေရသည့် “ညှဉ်းဆဲ” ခံရမှုတို့မှလွတ်မြောက်လာသည်မှာ မကြာသေးပေ။ (ထွက်မြောက်ရာ ၁:၁၁၊ ၁၄; ၃:၇; ၅:၁၀-၁၈) ထိုအချိန်က သူတို့သည် ရုပ်ပစ္စည်းအားဖြင့် ကြွယ်ဝချမ်းသာကြဟန်မရှိချေ။ မှန်ပါသည်၊ ဣသရေလလူမျိုးတို့သည် သိုးနွားတို့ကိုယူဆောင်၍ ကျွန်ခံရသောထိုပြည်မှထွက်ခွာခဲ့ကြ၏။ (ထွက်မြောက်ရာ ၁၂:၃၂) သို့သော် ယင်းပမာဏမှာ များများစားစားမဟုတ်ချေ၊ အကြောင်းမှာ အီဂျစ်ပြည်မှထွက်ခွာပြီးမကြာမီ သူတို့တွင်စားသောက်ရန် အမဲသား သို့မဟုတ် စားစရာမရှိဟု ညည်းညူခဲ့ကြ၍ဖြစ်သည်။—ထွက်မြောက်ရာ ၁၆:၃။
သို့ဆိုလျှင် တဲတော်ဆောက်လုပ်ရန် ထည့်ဝင်လှူဒါန်းသောတန်ဖိုးရှိရာများကို ဣသရေလလူမျိုးတို့သည် မည်သည့်နေရာမှရရှိခဲ့ကြသနည်း။ ယခင်က သူတို့၏သခင်များဖြစ်သော အီဂျစ်လူတို့ထံမှဖြစ်သည်။ သမ္မာကျမ်းစာက ဤသို့ဆိုသည်– “ဣသရေလအမျိုးသားတို့ထွက်မြောက်ရာ ၁၂:၃၅၊ ၃၆။
သည် ငွေတန်ဆာ၊ ရွှေတန်ဆာ၊ အဝတ်တန်ဆာများကို အဲဂုတ္တုလူတို့၌ တောင်းကြ၏။ [အီဂျစ်တို့သည်] တောင်းသည့်အတိုင်းလည်း ပေး . . . ကြ၏။” အီဂျစ်လူတို့ဘက်မှ ဤရက်ရက်ရောရောပေးကမ်းမှုသည် ဖာရောကြောင့်မဟုတ်ဘဲ ယေဟောဝါ၏ကောင်းချီကြောင့်ဖြစ်သည်။ ဘုရားသခင့်မှုတ်သွင်းခံမှတ်တမ်းက ဤသို့ဆိုသည်– “တောင်းသည်အတိုင်းလည်း ပေးချင်သောစေတနာစိတ်ကို ထာဝရဘုရားပေးတော်မူသဖြင့် အဲဂုတ္တုလူတို့၏ဥစ္စာများကို လုယူကြ၏။”—ထိုအချိန်က ဣသရေလလူများ မည်သို့ခံစားကြရမည်ကို မြင်ယောင်ကြည့်ပါ။ ထိုလူမျိုးဆက်သည် ခါးသီးသောကျွန်သပေါက်ဘဝနှင့် ဆင်းရဲချို့ငဲ့မှုကို တစ်လျှောက်လုံးခံခဲ့ကြရ၏။ ယခုမူ သူတို့သည် လွတ်လပ်ခဲ့ကြပြီး ပစ္စည်းဥစ္စာများကြွယ်ဝလာခဲ့ကြသည်။ ထိုပိုင်ဆိုင်ရာမှအချို့ပေးလိုက်ရခြင်းကို သူတို့မည်သို့ခံစားခဲ့ကြရမည်နည်း။ ယင်းတို့ကို သူတို့ရထိုက်၍ရခြင်းဖြစ်ရာ သိုမှီးသိမ်းဆည်းထားခွင့်ရှိသည်ဟု သူတို့ခံစားမိခဲ့ပေမည်။ သို့သော် စင်ကြယ်သောဝတ်ပြုရေးကို ပံ့ပိုးဖို့ငွေကြေးထည့်ဝင်ရန် တောင်းဆိုသောအခါ—စိတ်မပါခြင်း သို့မဟုတ် တွန့်တိုခြင်းမရှိဘဲ ထည့်ဝင်ပေးလှူခဲ့ကြသည်တကား! ဤရုပ်ပစ္စည်းများကို သူတို့ပိုင်ဆိုင်နိုင်ရန် ယေဟောဝါပြုလုပ်ပေးခဲ့ခြင်းဖြစ်ကြောင်း သူတို့မမေ့ခဲ့ကြချေ။ သို့နှင့် သူတို့သည် သူတို့၏ရွှေငွေနှင့် တိရစ္ဆာန်များကို အမြောက်အမြားပေးလှူခဲ့ကြသည်။ သူတို့သည် “ကြည်ညိုသောစေတနာစိတ်” ရှိခဲ့ကြသည်။ သူတို့၏ ‘စိတ်နှလုံးက သူတို့ကိုနှိုးဆော်ခဲ့သည်။’ ‘သူတို့၏စိတ်ဝိညာဉ်က စေတနာစိတ်ကိုနှိုးဆော်သည်။’ အမှန်ပင် “ထာဝရဘုရားအား ကြည်ညိုသောစိတ်နှင့်လှူကြ၏။”—ထွက်မြောက်ရာ ၂၅:၁-၉; ၃၅:၄-၉၊ ၂၀-၂၉; ၃၆:၃-၇။
ပေးကမ်းရန်အသင့်ရှိခြင်း
ထည့်ဝင်လှူဒါန်းသည့်ပမာဏက ပေးကမ်းသူ၏တကယ့်ရက်ရောမှုအသွင်အပြင်ကို ကိုယ်စားပြုဖော်ပြသည်မဟုတ်။ တစ်ခါက ယေရှုသည် ဝတ်ပြုရာအိမ်တော်၏ဘဏ္ဍာတိုက်ထဲသို့ လူတို့ငွေသွင်းချသည်ကို ကြည့်ရှုတော်မူ၏။ ချမ်းသာသူတို့သည် များစွာသောဒ င်္ဂါးပြားများကိုသွင်းချခဲ့ကြသည်၊ သို့သော် ယေရှုသည် တန်ဖိုးအနည်းငယ်သာရှိသော ဒ င်္ဂါးပြားလေးနှစ်ပြားကိုသာထည့်သွင်းသည့် ဆင်းရဲသောမုဆိုးမတစ်ဦးကို တွေ့မြင်ခဲ့သောအခါ စိတ်စွဲမှတ်သွားခဲ့သည်။ ကိုယ်တော်ဤသို့မိန့်တော်မူ၏– “ထိုဆင်းရဲသောမုဆိုးမသည် အခြားသောသူအပေါင်းထက်သာ၍သွင်းချပြီ။ . . . မိမိအသက်မွေးစရာဥစ္စာရှိသမျှကို [သူ] သွင်းချလေပြီ။”—လုကာ ၂၁:၁-၄; မာကု ၁၂:၄၁-၄၄။
ကောရိန္သုမြို့သားတို့ထံ ပေါလု၏အမှာစကားများသည် ယေရှု၏ဤသဘောတော်နှင့် ညီညွတ်ခဲ့သည်။ ဆင်းရဲသောယုံကြည်သူချင်းတို့ကိုကူညီဖို့ အလှူငွေများထည့်သွင်းခြင်းနှင့်ပတ်သက်လာသောအခါ ပေါလုကဤသို့သတိပြုမိသည်– “စေတနာစိတ်သည် အသင့်ရှိလျှင်၊ မတတ်နိုင်သောအမှုကိုမထောက်ဘဲ၊ တတ်နိုင်သောအမှုကိုထောက်၍ နှစ်သက်တော်မူဖွယ်ဖြစ်၏။” (၂ ကောရိန္သု ၈:၁၂) မှန်ပါသည်၊ အလှူငွေထည့်ဝင်ခြင်းသည် ပြိုင်ဆိုင် သို့မဟုတ် နှိုင်းယှဉ်ရသည့်ကိစ္စတစ်ရပ်မဟုတ်ချေ။ လူတစ်ဦးသည် မိမိ၌ရှိသည့်အလျောက်ပေးလှူပြီး ယေဟောဝါသည် ရက်ရက်ရောရောပေးသည့်စိတ်ဓာတ်ကို နှစ်သက်တော်မူ၏။
အမှန်စင်စစ် အရာခပ်သိမ်းကို ပိုင်ဆိုင်သောယေဟောဝါအား ဥစ္စာဓနကြွယ်ဝသွားစေရန် မည်သူတစ်ဦးတစ်ယောက်ကမျှ လုပ်ဆောင်နိုင်မည်မဟုတ်သော်လည်း အလှူငွေထည့်ဝင်ခြင်းသည် ကိုယ်တော်အားချစ်သောမေတ္တာကို ဖော်ကျူးရန် ဝတ်ပြုကိုးကွယ်သူများ ကြိုးစားအားထုတ်နိုင်သည့် အခွင့်အလမ်းတစ်ရပ်ဖြစ်သည်။ (၁ ရာဇဝင်ချုပ် ၂၉:၁၄-၁၇) အလှူငွေထည့်ဝင်ရာတွင် လူသိအောင်ပြရန် သို့မဟုတ် အခြားကိုယ်ကျိုးအတွက်မဟုတ်ဘဲ လျောက်ပတ်သောသဘောထားနှင့်အတူ စစ်မှန်သောဝတ်ပြုရေးကိုတိုးမြှင့်ရန်ပေးကမ်းခြင်းက ပျော်ရွှင်မှုနှင့် ဘုရားသခင်၏ကောင်းချီးမင်္ဂလာကိုဖြစ်စေ သည်။ (မဿဲ ၆:၁-၄) ယေရှု ဤသို့မိန့်တော်မူခဲ့သည်– “အစွန့်အကြဲခံခြင်းအရာထက် စွန့်ကြဲခြင်းအရာသည် သာ၍မင်္ဂလာရှိသည်။” (တမန်တော် ၂၀:၃၅) ယေဟောဝါ၏လုပ်ငန်းတော်၌ ကျွန်ုပ်တို့၏အစွမ်းခွန်အားကိုပေးကမ်းခြင်း၊ စစ်မှန်သောဝတ်ပြုရေးကို ထောက်ပံ့ပေးရန်အတွက် ကျွန်ုပ်တို့၏ရုပ်ပစ္စည်းပိုင်ဆိုင်ရာမှ အတန်အရာကိုဖယ်ထားခြင်း၊ ထိုက်တန်သောသူတို့ကို ကူညီပေးခြင်းအားဖြင့် ကျွန်ုပ်တို့သည် ထိုပျော်ရွှင်မှုကို မျှဝေခံစားနိုင်ကြပါသည်။—၁ ကောရိန္သု ၁၆:၁၊ ၂။
ယနေ့ ပေးကမ်းရန်အသင့်ရှိခြင်း
ယနေ့ ယေဟောဝါသက်သေများသည် “[ဘုရားသခင့်] နိုင်ငံတော်နှင့်ယှဉ်သောဧဝံဂေလိတရားကို” ဟောပြောရာ၌ ကမ္ဘာတစ်ဝန်းတွင်တိုးတက်လာခြင်းကို တွေ့မြင်ကြခြင်းအတွက် ပျော်ရွှင်ပီတိဖြစ်ကြသည်။ (မဿဲ ၂၄:၁၄) ၂၀ ရာစုနှစ်၏နောက်ဆုံးသောဆယ်စုနှစ်တွင် ၃,၀၀၀,၀၀၀ ကျော်သောသူတို့သည် ယေဟောဝါဘုရားသခင်ထံ မိမိတို့၏ဆက်ကပ်အပ်နှံခြင်းကိုတင်ပြရန် နှစ်ခြင်းခံယူခဲ့ကြပြီး အသင်းတော်အသစ် ၃၀,၀၀၀ ခန့်ကိုတည်ထောင်ခဲ့ကြသည်။ မှန်ပါသည်၊ ယနေ့တည်ရှိနေသော ယေဟောဝါသက်သေများ၏အသင်းတော် သုံးပုံတစ်ပုံသည် လွန်ခဲ့သောဆယ်နှစ်အတွင်း တည်ထောင်ခဲ့ခြင်းဖြစ်သည်တကား! တိုးတက်မှုအများစုမှာ အိမ်နီးချင်းများထံလည်ပတ်၍ ယေဟောဝါ၏ရည်ရွယ်တော်မူချက်ကို သူတို့အားပြောပြနိုင်ရန် မိမိတို့၏အချိန်နှင့် ခွန်အားကိုပေးခဲ့ကြသည့် စိတ်ရင်းကောင်းသော ခရစ်ယာန်အမျိုးသား၊ အမျိုးသမီးတို့၏ ကြိုးပမ်းအားထုတ်မှု၏ရလဒ်ဖြစ်သည်။ တိုးတက်မှုအချို့မှာ ဘုရားသခင့်နိုင်ငံတော်ဟောပြောခြင်းလုပ်ငန်း၌ ကူညီပေးရန် မိမိတို့၏နေအိမ်ကိုစွန့်ခွာ၍ အလှမ်းကွာဝေးသောနိုင်ငံရပ်ခြားသို့သွားရောက်ကြသည့် ခရစ်ယာန်သာသနာပြုများ၏ လုပ်ဆောင်မှုကြောင့်ဖြစ်သည်။ တိုးတက်မှုကြောင့် တိုက်နယ်အသစ်များကိုဖွဲ့စည်းခဲ့ရရာ တိုက်နယ်ကြီးကြပ်မှူးအသစ်များ ခန့်အပ်ရန် လိုအပ်လာပြန်သည်။ ထို့အပြင် ဟောပြောခြင်းနှင့် ကိုယ်ပိုင်လေ့လာမှုပြုခြင်း၌ အသုံးပြုရန်အတွက် သမ္မာကျမ်းစာများသာ၍လိုအပ်လာခဲ့၏။ စာအုပ်စာတမ်းများ သာ၍ပုံနှိပ်ရန် လိုအပ်လာခဲ့သည်။ ထို့အပြင် တစ်နိုင်ငံပြီးတစ်နိုင်ငံ ဗေသလအဆောက်အအုံများ တိုးချဲ့ရန် သို့မဟုတ် သာ၍ကျယ်ဝန်းသောဝင်းခြံများဖြင့်အစားထိုးရန် လိုအပ်ခဲ့လေပြီ။ ထပ်ဆင့်လိုအပ်လာသော ဤအရာအားလုံးကို ယေဟောဝါ၏လူတို့ထံမှ စေတနာအလျောက်လှူဒါန်းငွေများ၏အကူအညီဖြင့် ထောက်ပံ့ပေးခဲ့လေပြီ။
ဘုရားသခင်နိုင်ငံတော်ခန်းမများလိုအပ်ခြင်း
ယေဟောဝါသက်သေများ၏အရေအတွက် တိုးများလာခြင်းနှင့်အတူ အထင်အရှားလိုအပ်လာသည့်အရာမှာ ဘုရားသခင့်နိုင်ငံတော်ခန်းမများဖြစ်သည်။ ၂၀၀၀ ပြည့်နှစ်အစပိုင်း၌ ပြုလုပ်ခဲ့သောစစ်တမ်းများက ငွေကြေးချို့တဲ့သော ဖွံ့ဖြိုးဆဲနိုင်ငံများတွင် ဘုရားသခင့်နိုင်ငံတော်ခန်းမပေါင်း ၁၁,၀၀၀ ကျော်လိုကြောင်း ဖော်ပြခဲ့သည်။ အင်ဂိုလာနိုင်ငံကိုသုံးသပ်ကြည့်ပါ။ နှစ်ချီ၍ပြည်တွင်းစစ်များဖြစ်လင့်ကစား ထိုနိုင်ငံသည် နှစ်စဉ် ဘုရားသခင့်နိုင်ငံတော်ကြေညာသူ ပျမ်းမျှအရေအတွက် ၁၀ ရာခိုင်နှုန်းတိုးတက်နေသည်။ သို့သော် ဤကျယ်ပြောလှသည့် အာဖရိကနိုင်ငံ၌ရှိသော အသင်းတော်ပေါင်း ၆၇၅ ခုအနက်အများစုမှာ လေဟာပြင်တွင်သာ စည်းဝေးပြုလုပ်ကြရသည်။ ထိုနိုင်ငံတွင် ဘုရားသခင့်နိုင်ငံတော်ခန်းမပေါင်း ၂၂ ခုသာရှိပြီး ယင်းတို့ထဲမှ ၁၂ ခုသာလျှင် အမိုးပုံစံမျိုးပါရှိသည်။
ကွန်ဂိုဒီမိုကရက်တစ်သမ္မတနိုင်ငံတွင် အလားတူအခြေအနေမျိုး ဖြစ်နေသည်။ မြို့တော်ဖြစ်သော ကင်ရှာစာတွင် အသင်းတော်ပေါင်း ၃၀၀ နီးပါးရှိသော်လည်း ဘုရားသခင့်နိုင်ငံတော်ခန်းမ ဆယ်ခုသာရှိသည်။ တစ်တိုင်းပြည်လုံးအရ ဤနိုင်ငံသည် ဘုရားသခင့်နိုင်ငံတော်ခန်းမပေါင်း ၁,၅၀၀ ကျော် ချက်ချင်းပင်လိုအပ်လေသည်။ အရှေ့ဥရောပနိုင်ငံများတွင် အလျင်အမြန်တိုးတက်လာမှုကြောင့် ရုရှားနှင့် ယူကရိန်းတို့စုပေါင်း၍ နိုင်ငံတော်ခန်းမပေါင်းရာနှင့်ချီလိုအပ်လာသည်။ လက်တင်အမေရိက၌ တစ်မုဟုတ်ချင်းတိုးတက်လာနေမှုသည် ဘရာဇီးတွင် အထူးထင်ရှားပြီး ယင်းတွင် သက်သေခံပေါင်းသန်းတစ်ဝက်ကျော်ရှိနေပြီဖြစ်ရာ ဘုရားသခင့်နိုင်ငံတော်ခန်းမများ ထပ်၍အကြီးအကျယ်လိုအပ်လာသည်။
ယင်းသို့သောနိုင်ငံများတွင် လိုအပ်ရာများကိုဖြည့်စွက်ပေးရန် ယေဟောဝါသက်သေများသည် နိုင်ငံတော်ခန်းမများဆောက်လုပ်ခြင်းအတွက် အရှိန်အဟုန်တိုးမြှင့်ပေးနေသည့်အစီအစဉ်တစ်ရပ်ကို အကောင်အထည်ဖော်ဆောင်ရွက်လျက်ရှိသည်။ အဆင်းရဲဆုံးသောအသင်းတော်များပင်လျှင် လျောက်ပတ်သောဝတ်ပြုရေးအချက်အချာနေရာတစ်ခုကို ရရှိနိုင်ရန် ထိုအစီအစဉ်ကို ကမ္ဘာချီညီအစ်ကိုအသင်းအပင်း၏ ရက်ရက်ရောရောလှူဒါန်းပေးကမ်းမှုဖြင့် ငွေကြေးထောက်ပံ့ခဲ့ခြင်းဖြစ်သည်။
ရှေးဣသရေလအချိန်ကကဲ့သို့ပင် စိတ်ရင်းမှန်သောခရစ်ယာန်များသည် ‘မိမိတို့ဥစ္စာနှင့် ယေဟောဝါအားဂုဏ်တင်ခြင်း’ ကြောင့် များစွာတို့မှာပြီးစီးအောင်မြင်နိုင်ခဲ့သည်။ (သု. ၃:၉၊ ၁၀) ယေဟောဝါသက်သေများ၏အုပ်ချုပ်ရေးအဖွဲ့က ဤစေတနာအလျောက်ပေးကမ်းခြင်း၌ မိမိတို့စိတ်နှလုံးစေ့ဆော်မှုဖြင့် ပါဝင်ကြသူတိုင်းကို အလွန်ကျေးဇူးတင်လေးမြတ်ကြောင်း တစ်ပါတည်းပြောလိုပါသည်။။ ထို့အပြင် အစဉ်တိုးချဲ့လျက်ရှိသော ဘုရားသခင့်နိုင်ငံတော်လုပ်ငန်းကို ထောက်ပံ့ပေးရန် ယေဟောဝါ၏ဝိညာဉ်တော်သည် မိမိလူတို့၏စိတ်နှလုံးကို ဆက်လက်နှိုးဆော်ပေးလိမ့်မည်ဖြစ်ကြောင်း ကျွန်ုပ်တို့ယုံကြည်စိတ်ချနိုင်ပါသည်။
ကမ္ဘာချီတိုးချဲ့မှု ဆက်ဖြစ်ပျက်နေသည်နှင့်အမျှ ကျွန်ုပ်တို့၏အစွမ်းခွန်အား၊ အချိန်နှင့် ဥစ္စာအင်ခွင်များကို ပေးကမ်းရာတွင် ရွှင်လန်းမှုနှင့် လိုလိုလားလားရှိမှုကိုဖော်ပြရန် အခွင့်အလမ်းများ ဆက်လက်ရှာယူကြပါစို့။ ထို့ပြင် ပေးကမ်းခြင်းစိတ်ဓာတ်မှ စစ်မှန်သောရွှင်လန်းမှုကို ကျွန်ုပ်တို့တွေ့ကြုံနိုင်ကြပါစေ။
[စာမျက်နှာ ၂၉ ပါ လေးထောင့်ကွက်]
“ပညာရှိစွာအသုံးပြုပါ!”
“ကျွန်မအသက် ဆယ်နှစ်ပါ။ ကျွန်မပို့လိုက်တဲ့ ဒီငွေနဲ့ စာအုပ်တွေထုတ်ဝေဖို့ စက္ကူ ဒါမှမဟုတ် အခြားအရာတစ်ခုခုကို သင်တို့ဝယ်ယူနိုင်ပါတယ်။”—စင်ဒီ။
“ကျွန်မတို့အတွက် စာအုပ်တွေထပ်ထုတ်ပေးဖို့ သင်တို့ထံ ဒီငွေပို့ပေးရခြင်းကို ကျွန်မနှစ်သက်မိပါတယ်။ ဒီငွေဟာ ကျွန်မအဖေကို ကူညီပေးလို့ရတာကို စုထားတာဖြစ်ပါတယ်။ ဒီအတွက် ပညာရှိစွာအသုံးပြုပါ!”—အသက်ခုနစ်နှစ်အရွယ်ရှိ ပဲမ်း။
“ဟာရီကိန်းမုန်တိုင်းအကြောင်းကြားရလို့ ကျွန်မဝမ်းနည်းမိပါတယ်။ သင်တို့ ဘေးရန်ကင်းမယ်လို့ ကျွန်မမျှော်လင့်တယ်။ ဒီ [ယူ.အက်စ်. ၂ ဒေါ်လာ] ဟာ ကျွန်မစုဘူးထဲက ပိုက်ဆံအကုန်ပဲ။”—အသက်လေးနှစ်အရွယ် အဲလီဆင်။
“ကျွန်တော့်နာမည်က ရူဒီပါ။ အသက် ၁၁ နှစ်ရှိပါပြီ။ ကျွန်တော့်ရဲ့ညီ ရပ်ဖ်က အသက်ခြောက်နှစ်။ ကျွန်တော့်ညီမလေး ဂျူဒစ်ထ်ကတော့ နှစ်နှစ်ခွဲပါ။ [စစ်ဒဏ်ခံရတဲ့နယ်မြေတစ်ခု] မှာရှိတဲ့ ကျွန်တော်တို့ရဲ့ညီအစ်ကိုတွေကို ကူညီပေးဖို့ ကျွန်တော်တို့ရဲ့ သုံးလစာထောက်ပံ့ငွေတွေကိုစုထားပါတယ်။ ဒေါ်လာ ၂၀ ကို ကျွန်တော်တို့စုနိုင်ခဲ့ကြပြီး အခုပို့ပေးလိုက်ပါတယ်။”
“[ဟာရီကိန်းမုန်တိုင်းတိုက်ခတ်မှု ခံခဲ့ရသည့်] ညီအစ်ကိုတွေအတွက် ကျွန်တော်ဝမ်းနည်းပါတယ်။ ကျွန်တော့်အဖေနဲ့အတူ အလုပ်လုပ်တာ ၁၇ ဒေါ်လာရခဲ့တယ်။ ဒီပိုက်ဆံကို ဘယ်တစ်စုံတစ်ရာအတွက် ရည်စူးပြီးပို့တာမဟုတ်လို့ သင်တို့ပဲ ဆုံးဖြတ်လိုက်ပါ။”—ရှစ်နှစ်အရွယ် မဲခ်ကလီးန်။
[စာမျက်နှာ ၃၁ ပါ လေးထောင့်ကွက်]
အချို့သူများလှူဒါန်းရန်ရွေးချယ်ပုံ
ကမ္ဘာချီလုပ်ငန်းအတွက်ပါဝင်လှူဒါန်းခြင်း
များစွာသောသူတို့သည် “ကမ္ဘာချီလုပ်ငန်းအတွက်အလှူငွေ—မဿဲ ၂၄:၁၄” ဟုရေးထားသော အလှူငွေသေတ္တာတွင်ထည့်ဝင်ရန် မိမိတို့၏ငွေကြေးများကို သီးသန့်ဖယ်ထားကြသည်။ အသင်းတော်များသည် ယင်းအလှူငွေများကို ဘရွတ်ကလင်နယူးယောက်ဌာနချုပ် သို့မဟုတ် ဒေသခံဌာနခွဲရုံးသို့ လစဉ်ပေးပို့ကြသည်။
စေတနာအလျောက်ငွေကြေးအလှူငွေများကို Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, သို့မဟုတ် သင့်နိုင်ငံကို တာဝန်ယူပေးရသောအသင်းမ၏ရုံးသို့ တိုက်ရိုက်ပေးပို့နိုင်သည်။ ကျောက်မျက်ရတနာနှင့် အခြားတန်ဖိုးရှိအရာများကိုလည်း လှူဒါန်းနိုင်သည်။ ဤသို့ပေးပို့လှူဒါန်းရာတွင် လုံးလုံးလျားလျားလှူဒါန်းကြောင်းဖော်ပြသည့် စာတိုကလေးပါ ထည့်ပေးသင့်သည်။
ကန့်သတ်ချက်ဖြင့်လှူဒါန်းခြင်းအစီအစဉ်
လှူဒါန်းသူ၏ကိုယ်ရေးကိုယ်တာ လိုအပ်ချက်ရှိပါက ပြန်လည်ပေးအပ်ဖို့ အထူးအစီအစဉ်ဖြင့် ကင်းမျှော်စင်အသင်းသို့ ငွေကြေးလွှဲအပ်ထားပေးနိုင်သည်။ ထပ်မံသိလိုပါက အထက်တွင် ဖော်ပြထားသောလိပ်စာရှိ Treasurer’s Office ကိုစာရေးမေးမြန်းနိုင်သည်။
ပေးကမ်းရန်စီစဉ်ထားခြင်း
ငွေကြေးလုံးလုံးလျားလျားပေးအပ်ခြင်းနှင့် ကန့်သတ်ချက်ဖြင့် ငွေလှူဒါန်းခြင်းအပြင် ကမ္ဘာချီနိုင်ငံတော်လုပ်ငန်းကို အထောက်အကူပြုရန် အခြားပေးကမ်းနည်းများရှိသည်။ ၎င်းတို့တွင် အောက်ပါနည်းများပါဝင်သည်–
အာမခံ– ကင်းမျှော်စင်အသင်းအမည်ဖြင့် အသက်အာမခံကြေးခံစားခွင့်များ၊ အငြိမ်းစားခံစားခွင့်များကို ပြုလုပ်ပေးနိုင်သည်။
ဘဏ်စာရင်းများ– ဘဏ်ရှင်းတမ်းများ၊ ငွေစုစာအုပ်များ၊ အငြိမ်းစားခံစားခွင့်စာရင်း (ပင်စင်စာအုပ်) များကို ဒေသန္တရဘဏ်စည်းကမ်းများအရ ကင်းမျှော်စင်အသင်းထံ အပ်နှံ သို့မဟုတ် ကာယကံရှင် သေဆုံး မှ လွှဲပြောင်းပေးရန် စီစဉ်နိုင်သည်။
အစုရှယ်ယာလက်မှတ်နှင့် ငွေချေးစာချုပ်များ– အစုရှယ်ယာလက်မှတ်များနှင့် ငွေချေးစာချုပ်များကို ကင်းမျှော်စင်အသင်းသို့ လုံးလုံးလျားလျားပေးအပ်လှူဒါန်းနိုင်သည်။
အိမ်ရာအဆောက်အအုံများ– ရောင်းချနိုင်သော အိမ်ရာအဆောက်အအုံများကို ကင်းမျှော်စင်အသင်းသို့ လုံးလုံးလျားလျားဖြစ်စေ၊ လှူဒါန်းသူအသက်ရှင်နေသရွေ့နေထိုင်ရန် အပိုင်းကိုချန်လှပ်၍ဖြစ်စေ ပေးအပ်လှူဒါန်းနိုင်သည်။ ဤသို့ပေးလှူရန် စာချုပ်စာတမ်းမပြုမီ အသင်းမကို အကြောင်းကြားသင့်သည်။
သေတမ်းစာနှင့် လွှဲအပ်စာများ– ပစ္စည်းဥစ္စာ သို့မဟုတ် ငွေကြေးများကို ကင်းမျှော်စင်အသင်းသို့ တရားဝင်သေတမ်းစာဖြင့် အမွေပေးလှူဒါန်းနိုင်သည်။ သို့မဟုတ် လွှဲအပ်စာချုပ်တွင် အသင်းမက အကျိုးခံစားခွင့်ရှိသူအဖြစ်ပါဝင်စေနိုင်သည်။ ဤသို့ဘာသာရေးအဖွဲ့အစည်းကို လွှဲအပ်ရာတွင် အခွန်နှင့်ပတ်သက်သည့် အကျိုးအမြတ်တစ်စုံတစ်ခုကို ဖြစ်ထွန်းစေပေမည်။
“ပေးကမ်းရန်စီစဉ်ထားခြင်း” ဝေါဟာရက အဓိပ္ပာယ်သက်ရောက်စေသည့်အတိုင်း ဤလှူဒါန်းခြင်းနည်းလမ်းများသည် လှူဒါန်းသူဘက်မှ ကြိုတင်စီစဉ်ထားမှုအချို့လိုအပ်ပေမည်။ ပေးကမ်းရန်စီစဉ်ထားခြင်းနည်းလမ်းအချို့ဖြင့် အသင်းမကိုအကျိုးပြုရန် ဆန္ဒရှိသူများအတွက် အကူအညီဖြစ်ဖို့ရန် ကမ္ဘာချီဘုရားသခင့်နိုင်ငံတော်လုပ်ငန်းကို အကျိုးပြုဖို့ ပေးကမ်းရန်စီစဉ်ထားခြင်း ဟုခေါင်းစဉ်တပ်ထားသည့် အင်္ဂလိပ်နှင့် စပိန်ဘာသာတို့ဖြင့် ဘရိုရှာတစ်စောင်ကို အသင်းမက ပြင်ဆင်ပြီးခဲ့ပြီ။ အသင်းမက လက်ဆောင်များ၊ သေတမ်းစာနှင့် လွှဲအပ်စာများနှင့်ပတ်သက်၍ မေးမြန်းခြင်းစာများစွာကို ရရှိခဲ့သည့်အတွက် ပြန်လည်ဖြေကြားရန် ဤဘရိုရှာကို ရေးသားခဲ့ခြင်းဖြစ်သည်။ ယင်းတွင် မြေယာဆိုင်ရာ၊ ငွေကြေးဆိုင်ရာ၊ အခွန်အတုတ်ဆိုင်ရာစီစဉ်ရေးနှင့်ပတ်သက်သည့် ထပ်ဆင့်အကြောင်းအရာများလည်းပါဝင်သည်။ မိမိ၏မိသားစုနှင့် ကိုယ်ရေးကိုယ်တာအခြေအနေများကို ထည့်စဉ်းစားကာ အကျိုးအရှိဆုံးနှင့် အထိရောက်ဆုံးနည်းလမ်းများကို ရွေးချယ်ဖို့ အသင်းမထံ အထူးလက်ဆောင် သို့မဟုတ် သေတမ်းစာနှင့်လွှဲအပ်ပေးရန် စီစဉ်နေကြသော အမေရိကန်ပြည်ထောင်စုရှိ လှူဒါန်းလိုသူများကိုကူညီရန် ရည် ရွယ်ချက်ဖြင့် ရေးဆွဲထားခြင်းဖြစ်ပါသည်။ ပေးကမ်းရန်စီစဉ်ထားခြင်းရုံးမှ ၎င်းဘရိုရှာကိုတိုက်ရိုက်တောင်းခြင်းဖြင့် ရယူနိုင်ပေမည်။
ဤဘရိုရှာကို ဖတ်ရှုပြီး ပေးကမ်းရန်စီစဉ်ထားခြင်းဌာနနှင့် ဆွေးနွေးပြီးနောက် များစွာသောသူတို့သည် အသင်းမကို ကူညီထောက်ပံ့နိုင်ပြီး တစ်ချိန်တည်းတွင် အခွန်ကင်းလွတ်ခွင့်တိုး၍ရရှိခဲ့ပါသည်။ ပေးကမ်းရန်စီစဉ်ထားခြင်းဌာနကို အစီအစဉ်တစ်စုံတစ်ခုနှင့်စပ်လျဉ်းပြီး အကြောင်းကြားသင့်ကာ သက်ဆိုင်ရာစာရွက်စာတမ်းတစ်စုံတစ်ရာကို ရယူထားသင့်သည်။ ယင်းဘရိုရှာတစ်စောင်ကိုလည်းကောင်း၊ ပေးကမ်းရန်စီစဉ်ထားသည့် နည်းတစ်ခုခု၌လည်းကောင်း စိတ်ဝင်စားသူများသည် အောက်ဖော်ပြပါလိပ်စာ သို့မဟုတ် သင့်နိုင်ငံတွင် လုပ်ငန်းကိုစီမံသောအသင်း၏ရုံး၊ ပေးကမ်းရန်စီစဉ်ထားခြင်းဌာနသို့ စာရေး၍ဖြစ်စေ၊ တယ်လီဖုန်းဆက်၍ဖြစ်စေ ဆက်သွယ်သင့်ပါသည်။
ပေးကမ်းရန် စီစဉ်ထားခြင်းဌာန
Watch Tower Bible and Tract Society of Pennsylvania
100 Watchtower Drive,
Patterson, New York 12563-9204
Telephone: (845) 306-0707