အောင်မြင်မှုကို သင်မည်သို့တိုင်းတာသနည်း
အောင်မြင်မှုကို သင်မည်သို့တိုင်းတာသနည်း
အောင်မြင်မှုကို “ချမ်းသာကြွယ်ဝခြင်း၊ နှစ်သက်လက်ခံမှုရခြင်း သို့မဟုတ် ထင်ရှားကျော်ကြားခြင်း” အဖြစ် အဘိဓာန်တစ်အုပ်က အနက်ဖွင့်သည်။ ယင်းသည် ပြည့်စုံသည့်အဓိပ္ပာယ်ဖွင့်ဆိုချက်တစ်ခုလော။ ချမ်းသာကြွယ်ဝခြင်း၊ နှစ်သက်လက်ခံမှုရခြင်း သို့မဟုတ် ထင်ရှားကျော်ကြားခြင်းတို့သည်သာ အောင်မြင်မှုကို တိုင်းတာသည့်အရာများလော။ အဖြေမပေးမီ ဤအချက်ကိုသုံးသပ်ကြည့်ပါ– ယေရှု၏တစ်သက်တာတွင် ရုပ်ပစ္စည်းကြွယ်ဝရန် မကြိုးစားခဲ့ပါ။ လူအများစု၏နှစ်သက်လက်ခံမှုကို ကိုယ်တော်မရရှိခဲ့ပါ; သူ့ခေတ်ရှိ ဝါဒသစ်ထွင်သူများကလည်း ကိုယ်တော်ကို သိပ်အထင်မကြီးကြပါ။ သို့တိုင် ယေရှုသည် အောင်မြင်သည့်လူသားတစ်ဦးဖြစ်ခဲ့သည်။ အဘယ်ကြောင့်နည်း။
ယေရှုကမ္ဘာပေါ်ရှိစဉ် ‘ဘုရားသခင့်ရှေ့တော်တွင် . . . ကြွယ်ဝ’ ခဲ့သည်။ (လုကာ ၁၂:၂၁) ရှင်ပြန်ထမြောက်ပြီးနောက်တွင် ဘုရားသခင်သည် ကိုယ်တော်အား “ဘုန်းအသရေ” နှင့်ချီးမြှောက်ခြင်းဖြင့် ဆုချခဲ့သည်။ ယေဟောဝါသည် မိမိသားတော်ကိုချီးမြှောက်၍ “ဘွဲ့နာမတကာတို့ထက်ကြီးမြတ်သောဘွဲ့နာမကို ပေးသနားတော်မူ၏။” (ဟေဗြဲ ၂:၉; ဖိလိပ္ပိ ၂:၉) ယေရှု၏အသက်တာလမ်းစဉ်သည် ယေဟောဝါ၏နှလုံးကို ရွှင်ပြုံးစေခဲ့သည်။ (သု. ၂၇:၁၁) ကိုယ်တော်၏မြေကြီးအသက်တာ အောင်မြင်ခဲ့ရခြင်းမှာ ၎င်း၏ရည်ရွယ်ချက်အထမြောက်စေခဲ့၍ဖြစ်သည်။ ယေရှုသည် ဘုရားသခင့်အလိုတော်ကိုဆောင်ပြီး ကိုယ်တော့်နာမတော်ကိုဂုဏ်တင်ခဲ့သည်။ တစ်ဖန် ဘုရားသခင်သည် ယေ ရှုအား မည်သည့်စာပေပညာရှင်၊ မည်သည့်နိုင်ငံရေးသမား သို့မဟုတ် မည်သည့်အားကစားအကျော်အမော်မျှ မရရှိဖူးသည့် ချမ်းသာကြွယ်ဝမှု၊ နှစ်သက်လက်ခံမှုနှင့် ထင်ပေါ်ကျော်ကြားမှုတို့ဖြင့် ဂုဏ်ပြုချီးမြှင့်ခဲ့သည်။ ယေရှုသည် မြေကြီးပေါ်အသက်ရှင်ခဲ့သမျှတွင် အအောင်မြင်ဆုံးလူသားအမှန်ပင်ဖြစ်ခဲ့သည်။
ခရစ်ယာန်မိဘများသည် မိမိတို့ကလေးများ ခရစ်တော်၏ခြေရာအတိုင်းလိုက်လျှောက်ကြမည်ဆိုလျှင် ယေရှုကဲ့သို့ ဘုရားသခင်ရှေ့တော်၌ ကြွယ်ဝလာကာ ကြွယ်ဝသောကောင်းချီးများကို ယခုခံစားရပြီး လာလတ္တံ့သောအစီအစဉ်တွင် စဉ်းစားဉာဏ်မမီနိုင်သည့်ဆုကျေးဇူးကိုခံစားရမည်ဖြစ်ကြောင်း သဘောပေါက်ကြသည်။ လူငယ်တစ်ဦးအတွက် ခရစ်တော်၏ခြေရာကိုလိုက်လျှောက်ခြင်း၊ ဖြစ်နိုင်လျှင် အချိန်ပြည့်ခရစ်ယာန်ဓမ္မအမှုတွင်ပါဝင်ခြင်းအားဖြင့် ယေရှုကဲ့သို့လုပ်ဆောင်ခြင်းထက် သာ၍ကောင်းသောနည်းလမ်းမရှိပါ။
သို့သော် အချို့သောယဉ်ကျေးမှုများတွင် ပျံ့နှံ့နေသည့်ဓလေ့ထုံးစံမှာ အချိန်ပြည့်ခရစ်ယာန်ဓမ္မအမှုတွင် လူငယ်များပါဝင်ရန်မဟုတ်ချေ။ လူငယ်တစ်ဦးကျောင်းပြီးသွားသည့်အခါ အချိန်ပြည့်အလုပ်လုပ်၊ အိမ်ထောင်ပြုပြီး အတည်တကျနေထိုင်ရန် မျှော်လင့်ကြပေမည်။ တစ်ခါတစ်ရံ ယင်းသို့သောနောက်ခံများမှလာသော လူငယ်များသည် အချိန်ပြည့်ခရစ်ယာန်ဓမ္မအမှုတွင် ဝင်ရောက်ရမည်ကို လွဲမှားစွာတွန့်ဆုတ်နေကြသည်။ (သု. ၃:၂၇) အဘယ်ကြောင့်နည်း။ ပျံ့နှံ့နေသည့်ယဉ်ကျေးမှုစံနှုန်းများနှင့်အညီနေလိုသည့် ဖိအားကြောင့်ဖြစ်သည်။ ရောဘတ် ဤအတိုင်းပင်ဖြစ်ခဲ့သည်။ *
ယဉ်ကျေးမှုနှင့် ကိုယ်ကိုကိုယ်သိသောစိတ် ဆန့်ကျင်ဘက်ဖြစ်သည့်အခါ
ရောဘတ်သည် ယေဟောဝါသက်သေတစ်ယောက်အဖြစ် ကြီးပြင်းလာခဲ့သည်။ ဆယ်ကျော်သက်အရွယ်၌ သူ၏အကျင့်အကြံနှင့် အပေါင်းအသင်းရွေးချယ်မှုတို့တွင် မနှစ်သက်စရာများရှိနေသည်။ သူနှင့်ပတ်သက်၍ မိခင်ဖြစ်သူသည် စတင်စိုးရိမ်လာသည်။ ထို့ကြောင့် သူ့သားကိုအားပေးကူညီရန် ယေဟောဝါသက်သေများ၏ အချိန်ပြည့်အမှုဆောင်ဖြစ်သော ရှေ့ဆောင်တစ်ဦးကို အကူအညီတောင်းသည်။ နောက်ပိုင်းဖြစ်ခဲ့ရာများကို ရောဘတ်ကရှင်းပြသည်။
“ကျွန်တော့်အပေါ်ပြသခဲ့တဲ့ ရှေ့ဆောင်ညီအစ်ကိုရဲ့ စိတ်ဝင်စားမှုကို ကျွန်တော်တကယ်လေးမြတ်ခဲ့တယ်။ သူ့ရဲ့ကောင်းတဲ့ပုံသက်သေက ကျွန်တော်ကျောင်းပြီးတာနဲ့ အသက်မွေးလုပ်ငန်းအဖြစ် ရှေ့ဆောင်လုပ်ငန်းမှာပါဝင်လိုတဲ့ဆန္ဒကို ဖြစ်ပေါ်စေခဲ့တယ်။ အဲဒီအချိန်မှာ အမေတစ်ခါစိုးရိမ်ပူပန်ခဲ့ရပြန်တယ်၊ ဒါပေမဲ့ တခြားအကြောင်းရင်းတစ်ခုကြောင့်ပါ။ ကျွန်တော်တို့ရဲ့ယဉ်ကျေးမှုမှာ မိန်းကလေးတစ်ယောက်အတွက် ကျောင်းပြီးသွားတာနဲ့ ချက်ချင်းရှေ့ဆောင်လုပ်ဖို့အဆင်ပြေပေမဲ့ ယောက်ျားလေးတစ်ယောက်အတွက် ပထမဦးဆုံး ငွေရေးကြေးရေးအမာခံရှိအောင်လုပ်ဆောင်ဖို့ဖြစ်ပြီး နောက်မှရှေ့ဆောင်လုပ်ငန်းကို စဉ်းစားနိုင်မယ်။”
“ကျွန်တော်အလုပ်တစ်ခုရပြီး ကိုယ်ပိုင်လုပ်ငန်းကိုစတင်လုပ်ကိုင်ခဲ့သည်။ မကြာခင် ကျွန်တော်ဟာ လုပ်ငန်းကိစ္စတွေမှာနှစ်မြှုပ်နေခဲ့ပြီး စည်းဝေးတွေတက်ခြင်းနဲ့ဟောပြောခြင်းကို လုပ်ရိုးလုပ်စဉ်အဖြစ်လောက်သာ တက်ရောက်ပါဝင်ခဲ့တယ်။ ကိုယ်ကိုကိုယ်သိတဲ့စိတ်က ကျွန်တော့်ကိုနှောင့်ယှက်ခဲ့တယ်၊ ယေဟောဝါအမှုတော်ကို ကျွန်တော်ပိုပြီးအပြည့်အဝထမ်းဆောင်နိုင်တယ်ဆိုတာကို သိပါတယ်။ ဒါပေမဲ့ တခြားသူတွေ ကျွန်တော့်ကိုမျှော်လင့်ထားရာတွေကနေ လွတ်မြောက်ဖို့ တကယ့်ကို ရုန်းကန်နေရတယ်၊ ဒါပေမဲ့ ရုန်းကန်နိုင်ခဲ့လို့ ကျွန်တော်ပျော်တယ်။ အခုဆို ကျွန်တော်ဟာအိမ်ထောင်ပြုပြီး ကျွန်တော့်ဇနီးနဲ့ကျွန်တော် လွန်ခဲ့တဲ့နှစ်နှစ်ကတည်းက ရှေ့ဆောင်လုပ်ခဲ့ကြတယ်။ မကြာခင်က ကျွန်တော်ဟာ အသင်းတော်မှာ ခရစ်ယာန်အမှုထမ်းတစ်ဦးအဖြစ် ခန့်အပ်ခံခဲ့ရတယ်။ ယေဟောဝါအမှုတော်ကို နှလုံးအကြွင်းမဲ့၊ အစွမ်းရှိသမျှနဲ့ထမ်းဆောင်ခြင်းက အခု စစ်မှန်တဲ့ကျေနပ်ရောင့်ရဲမှုကို ခံစားရတယ်လို့ ကျွန်တော်အမှန်အတိုင်းပြောနိုင်ပါတယ်။”
ဤမဂ္ဂဇင်းက လူငယ်များကို ဖြစ်နိုင်လျှင် ကျောင်းတက်နေစဉ် လုပ်ငန်းတစ်ခုသင်ယူရန် သို့မဟုတ် အသုံးဝင်သောအရည်အချင်းအချို့ရရှိအောင် သင်ယူရန် ထပ်ခါတလဲအားပေးတိုက်တွန်းလာခဲ့သည်။ အဘယ်ရည်ရွယ်ချက်ဖြင့်နည်း။ ချမ်းသာကြွယ်ဝလာရန်လော။ မဟုတ်ပါ။ အဓိကအကြောင်းရင်းမှာ သူတို့သည် အရွယ်ရောက်သူများအဖြစ် မိမိတို့ကိုယ်ကို ကောင်းမွန်စွာထောက်ပံ့နိုင်ရန်နှင့် ယေဟောဝါ၏အမှုတော်ကို အတတ်နိုင်ဆုံး အထူးသဖြင့် အချိန်ပြည့်ခရစ်ယာန်အမှုဆောင်ခြင်းတွင် ပါဝင်နိုင်ရန်ဖြစ်သည်။ သို့သော် ငယ်ရွယ်သောအမျိုးသားများနှင့် အမျိုးသမီးများသည် ခရစ်ယာန်ဓမ္မအမှု၏အရေးပါမှုကို လျော့နည်းစေသည့် လောကလုပ်ငန်းတစ်ခုကို ကြိုးပမ်းလုပ်ဆောင်ခြင်းတွင် မကြာခဏ ကျော့မိခံခဲ့ရကြသည်။ အချို့သူတို့သည် အချိန်ပြည့်အမှုဆောင်ခြင်းတွင်ပါဝင်ရန် စဉ်းပင်မစဉ်းစားပေ။ အဘယ်ကြောင့်နည်း။
မဿဲ ၆:၃၃ ၌မှတ်တမ်းတင်ထားသော ယေရှု၏ကတိတော်သည် ခရစ်ယာန်များကို အလွန်နှစ်သိမ့်မှုဖြစ်စေသည်။
ရောဘတ်၏ဖော်ပြချက်များက ထိုကိစ္စနှင့်ပတ်သက်ပြီး အတော်အတန်ရှင်းလင်းစေသည်။ ရောဘတ်သည် လုပ်ငန်းတစ်ခုကို တတ်မြောက်သွားသည့်အခါ အလုပ်တစ်ခုကိုစတင်လုပ်ကိုင်ခဲ့သည်။ မကြာမီ သူသည် မည်သည့်နေရာကိုမျှ မပို့ပေးနိုင်သည့် ပုံဆောင်ခြေနင်းစက်ပေါ်ရောက်ခဲ့ရသည်။ သူ၏ပန်းတိုင်မှာ ငွေရေးကြေးရေးအမာခံရှိစေရန်ဖြစ်သည်။ သို့သော် ခရစ်ယာန်အသင်းတော်အတွင်း သို့မဟုတ် အပြင်ရှိသူတစ်ဦးတစ်ယောက်သည် ထိုပန်းတိုင်ကိုအပြည့်အဝမီဖူးပါသလော။ ခရစ်ယာန်များသည် ငွေရေးကြေးရေးဘက် တာဝန်ယူနိုင်သူဖြစ်ရန်၊ မိမိတို့၏ ငွေရေးကြေးရေးဆိုင်ရာတာဝန်များကို ဝီရိယစိုက်ထုတ် ဖြည့်ဆည်းဆောင်ရွက်နိုင်သူဖြစ်ရန် ကြိုးပမ်းသင့်သည်; သို့သော် ဤမရေရာသည့်ကာလတွင် မိမိတို့ ငွေကြေးအမာခံရပြီဟု အမှန်ယူမှတ်နိုင်သည့်အဆင့်ရောက်ခဲ့သူနည်းကြောင်း သဘောပေါက်သင့်သည်။ ယင်းကြောင့်ရောဘတ်သည် ယဉ်ကျေးမှု၏သတ်မှတ်ချက်များထက် သူ့နှလုံးလိုအင်များနောက်လိုက်ရန် ဆုံးဖြတ်ခဲ့သောကြောင့် ပျော်ရွှင်နေသည်။ ယနေ့ သူသည် အချိန်ပြည့်အမှုဆောင်ခြင်းလုပ်ငန်းတွင် ပါဝင်လျက်ရှိသည်။ မှန်ပါသည်၊ အချိန်ပြည့်ခရစ်ယာန်အမှုဆောင်ခြင်းသည် ဂုဏ်ရှိသောအသက်မွေးမှုလုပ်ငန်းတစ်ခုဖြစ်သည်။ ရောဘတ်၌ငြိမ်သက်မှုရှိနေခြင်းမှာ သူပြောပြသည့်အတိုင်း ‘အစွမ်းရှိသမျှ’ နှင့်ယေဟောဝါအမှုတော်ကိုဆောင်ရွက်ခြင်းကြောင့်ဖြစ်သည်။
သင့်ပင်ကိုစွမ်းရည်များကို အကျိုးအရှိဆုံးအသုံးချပါ
ယေဟောဝါသက်သေများတွင် ပင်ကိုအရည်အချင်းရှိသူများစွာရှိသည်။ အချို့တွင် ထူးခြားသောတွေးခေါ်ဆင်ခြင်နိုင်စွမ်း ရှိကြသည်; အခြားသူများမူ ခန္ဓာစွမ်းအားကြီးမားသူများဖြစ်သည်။ ယင်းအရည်အချင်းအားလုံးသည် “ခပ်သိမ်းသောသူတို့အား ဇီဝအသက်နှင့်တကွ ထွက်သက်ဝင်သက်မှစ၍ ခပ်သိမ်းသောအရာတို့ကို” ပေးတော်မူသောအရှင် ယေဟောဝါထံတော်မှဖြစ်သည်။ (တမန်တော် ၁၇:၂၅) အသက်မရှိလျှင် ယင်းအရည်အချင်းသည် တန်ဖိုးရှိမည်မဟုတ်ပေ။
ထို့ကြောင့် ကျွန်ုပ်တို့၏ဆက်ကပ်အပ်နှံထားသော ဘဝအသက်တာများကို ယေဟောဝါ၏အမှုတော်ဆောင်ခြင်းတွင် အသုံးပြုခြင်းသည်သာ သင့်လျော်ပေသည်။ ပင်ကိုစွမ်းရည်ရှိလူငယ်တစ်ဦး ထိုသို့ပြုရန်ဆုံးဖြတ်ခဲ့သည်။ စီ.အီး. ပထမရာစုတွင် သက်ရှိထင်ရှားခဲ့သူဖြစ်သည်။ အထင်ကရမိသားစုဝင်တစ်ဦးဖြစ်ပြီး သူ၏ငယ်ရွယ်ချိန်ကို ကိလိကိပြည်၏ ကျော်ကြားသောမြို့ဖြစ်သည့် တာရှုမြို့တွင်ကုန်လွန်စေခဲ့သည်။ ဂျူးဇာတိဖွားဖြစ်သော်လည်း သူ့ဖခင်ကြောင့် ရောမနိုင်ငံသားအဖြစ်ခံယူခဲ့သည်။ ယင်းက သူ့အား လုပ်ပိုင်ခွင့်များနှင့် အခွင့်ထူးများစွာရရှိစေခဲ့သည်။ သူကြီးပြင်းလာသောအခါ ထိုအချိန်က အကျော်ကြားဆုံး “ပါမောက္ခ” တစ်ဦးဖြစ်သူ ဂါမလျေလထံတွင် ဥပဒေပညာကို ဆည်းပူးခဲ့သည်။ ယင်းက မကြာမီ သူသည် ‘ချမ်းသာကြွယ်ဝမှု၊ နှစ်သက်လက်ခံမှုနှင့် ထင်ပေါ်ကျော်ကြားမှု’ တို့ကို ပိုင်ဆိုင်ရမည့်ပုံရှိခဲ့သည်။—တမန်တော် ၂၁:၃၉; ၂၂:၃၊ ၂၇၊ ၂၈။
ထိုလူငယ်ကားမည်သူနည်း။ သူ၏အမည်မှာ ရှောလုဖြစ်သည်။ သို့သော် ရှောလုသည် ခရစ်ယာန်တစ်ဦးဖြစ်လာပြီး နောက်ဆုံး၌ တမန်တော်ပေါလုဖြစ်လာခဲ့သည်။ သူ၏ မူလရည်မှန်းချက်များကိုဖယ်ရှားလိုက်ပြီး ခရစ်ယာန်တစ်ဦးအဖြစ် သူ့ဘဝတစ်ခုလုံးကို ယေဟောဝါ၏အမှုတော်တွင် မြှုပ်နှံခဲ့သည်။ ပေါလုသည် ဥပဒေပညာရှင်တစ်ဦးအဖြစ် မကျော်ကြားဘဲ သတင်းကောင်းကိုဇွဲရှိစွာဟောပြောသူအဖြစ် ကျော်ကြားလာခဲ့သည်။ ခရစ်ယာန်သာသနာပြုတစ်ဦးအဖြစ် နှစ်ပေါင်း ၃၀ နီးပါးလုပ်ဆောင်ပြီးနောက် ဖိလိပ္ပိရှိမိတ်ဆွေများထံ ပေါလုစာတစ်စောင်ရေးခဲ့သည်။ ထိုတွင် ခရစ်ယာန်တစ်ဦးဖြစ်မလာမီ အတိတ်ကသူ၏အောင်မြင်မှုအချို့ကိုပြန်ဆန်းစစ်သုံးသပ်ပြီးနောက် ဤသို့ဆိုသည်– “ခရစ်တော်ကိုအမြတ်ရနိုင်ရန် . . . ထိုအရာများကို အမှိုက်သရိုက်ကဲ့သို့ [ယေရှုခရစ်တော်] ကြောင့်ငါထင်မှတ်၏။” (ဖိလိပ္ပိ ၃:၇-၈၊ သတင်းကောင်း) သူ့အသက်တာကိုအသုံးပြုခဲ့သည့်လမ်းစဉ်အတွက် ပေါလုနောင်တမရခဲ့ပေ!
ဂါမလျေလထံမှ ပေါလုရရှိခဲ့သည့် ပညာနှင့်ပတ်သက်၍ကောအသို့နည်း။ ယင်းသည် သူ့အတွက်အသုံးဝင်ခဲ့သောအခါရှိခဲ့ဖူးသလော။ ရှိပါသည်! ‘သတင်းတရားဘက်မှ ခုခံချေပကာ ဥပဒေကြောင်းအရ တည်စေရာ၌’ အကြိမ်ကြိမ်အထောက်အကူဖြစ်စေခဲ့သည်။ သို့သော် ပေါလု၏အဓိကအလုပ်မှာ သူ၏အစောပိုင်းကျောင်းပညာရေးက မသင်ပေးနိုင်ခဲ့သောအရာတစ်ခုဖြစ်သည့် သတင်းကောင်းဟောပြောသူတစ်ဦးအဖြစ် အမှုဆောင်ခြင်းဖြစ်သည်။—ဖိလိပ္ပိ ၁:၇၊ ကဘ; တမန်တော် ၂၆:၂၄၊ ၂၅။
အလားတူ ယနေ့ အချို့သူများသည် ဘုရားသခင့်နိုင်ငံတော်အကျိုးစီးပွား တိုးတက်စေရန် သူတို့၏ ပင်ကိုအရည်အချင်းများ၊ စွမ်းရည်များနှင့် ကျောင်းပညာရေးကိုပင် အသုံးပြုနိုင်ခဲ့ကြသည်။ သာဓကအနေနှင့် အေမီသည် ကူးသန်းရောင်းဝယ်ရေးပညာနှင့် ဥပဒေပညာရပ်တို့ဖြင့် တက္ကသိုလ်ဘွဲ့ ရထားသူဖြစ်သည်။ သူသည် တစ်ချိန်က ဥပဒေရေးရာအဖွဲ့တွင် ဝင်ငွေကောင်းသောအလုပ်တစ်ခုရထားသော်လည်း ယခုမူ ကင်းမျှော်စင်အသင်း၏ဌာနခွဲရုံးတစ်ခုတွင် အခကြေးငွေမယူဘဲ စေတနာ့ဝန်ထမ်းဓမ္မအမှုဆောင်တစ်ဦးအဖြစ် အမှုဆောင်နေသည်။ အေမီက သူ၏ယခုအသက်တာကိုဖော်ပြသည်ကား ဤသို့– “ဘဝမှာ အကောင်းဆုံးရွေးချယ်မှုပြုထားတယ်လို့ ကျွန်မယုံကြည်တယ်။ . . . တက္ကသိုလ်က ဘယ်သူငယ်ချင်းတစ်ယောက်နဲ့မှ နေရာချင်းလဲလိုတဲ့ဆန္ဒ ကျွန်မမှာမရှိဘူး။ ကျွန်မရွေးချယ်ခဲ့တဲ့လမ်းကို ကျွန်မဂုဏ်ယူတယ်။ ကျွန်မလိုအပ်ရာနဲ့ လိုချင်တာအားလုံးဖြစ်တဲ့—ရောင့်ရဲပျော်ရွှင်တဲ့ဘဝနဲ့ ပြီးပြည့်စုံပြီးကျေနပ်မှုပေးတဲ့အသက်မွေးမှုအလုပ်တစ်ခုကို ရထားတယ်။”
အေမီသည် စိတ်ငြိမ်သက်မှု၊ ကျေနပ်ရောင့်ရဲမှုနှင့် ယေဟောဝါ၏ကောင်းချီးများကိုရရှိစေသည့်လမ်းစဉ်ကို ရွေးချယ်ခဲ့သည်။ ခရစ်ယာန်မိဘများသည် မိမိတို့ကလေးများအား ထိုသို့ပင်ဖြစ်စေလိုမည်မှာသချာသည်!
ခရစ်ယာန်ဓမ္မအမှုတွင် အောင်မြင်မှု
ခရစ်ယာန်ဓမ္မအမှုတွင်ပင် အောင်မြင်မှုနှင့်ပတ်သက်၍ တော်မှန်သောအမြင်ရှိရန် အရေးကြီးသည်။ လယ်ကွင်းအမှုဆောင်ခြင်းတွင် ပျော်ရွှင်ဖွယ်အချိန်ကိုအသုံးပြုလိုက်သောအခါ၊ ကျမ်းစာစာပေဝေငှလိုက်ခြင်း သို့မဟုတ် နှိုးဆော်မှုဖြစ်သော ကျမ်းစာဆွေးနွေးပွဲများတွင် အိမ်ရှင်များကိုပါဝင်စေနိုင်သည့်အခါတို့တွင် အောင်မြင်မှုရသည်ဟုခံစားရပေမည်။ သို့သော် နားထောင်သောသူကိုတွေ့ရခဲလျှင် ကျွန်ုပ်တို့သည်အချိန်ဖြုန်းနေခြင်းဖြစ်သည်ဟု ယူမှတ်ရန်သွေးဆောင်ခံရနိုင်သည်။ သို့သော် အောင်မြင်ခြင်း၏အဓိပ္ပာယ်ဖွင့်ဆိုချက်တစ်ခုမှာ ‘နှစ်သက်လက်ခံမှုရခြင်း’ ဖြစ်သည်ကို သတိရပါ။ မည်သူ့နှစ်သက်လက်ခံမှုကို ကျွန်ုပ်တို့ရလိုကြသနည်း။ ယေဟောဝါ၏နှစ်သက်လက်ခံမှုသာတည်း။ ကျွန်ုပ်တို့၏သတင်းတရားကို လူများနားထောင်သည်ဖြစ်စေ၊ နားမထောင်သည်ဖြစ်စေ ယင်းကိုကျွန်ုပ်တို့ရနိုင်သည်။ ယင်းနှင့်ပတ်သက်၍ ထိရောက်သောသင်ခန်းစာတစ်ခုကို မိမိတပည့်တော်များအား ယေရှုသင်ပြပေးခဲ့သည်။
ယေရှုသည် “ကိုယ်တိုင်ကြွလေအံ့သော မြို့ရွာအရပ်ရပ်တို့သို့” ဘုရားသခင့်နိုင်ငံတော်ဟောပြောသူ ၇၀ စေလွှတ်ခဲ့သည်ကို သင်ပြန်အမှတ်ရပေမည်။ (လုကာ ၁၀:၁) သူတို့သည် ယေရှုမပါဘဲ မြို့ရွာများတွင် ဟောပြောကြရန်ဖြစ်သည်။ ယင်းသည် သူတို့အတွက် အတွေ့အကြုံသစ်တစ်ခုဖြစ်ခဲ့သည်။ ထို့ကြောင့် ယေရှုက သူတို့ကိုမစေလွှတ်မီ အသေးစိတ်ညွှန်ကြားချက်များပေးခဲ့သည်။ “ငြိမ်သက်ခြင်း၏သား” ကိုတွေ့သည့်အခါ ဘုရားသခင့်နိုင်ငံတော်အကြောင်း စေ့ငစွာသက်သေခံရန်ဖြစ်သည်။ သို့သော်လည်း ငြင်းပယ်ခံရသည့်အခါ စိုးရိမ်ပူပန်စရာမလိုဘဲ မိမိတို့လုပ်ငန်းကိုဆက်လုပ်ရန်ဖြစ်သည်။ သူတို့ကိုနားထောင်ရန်ငြင်းဆန်သူများသည် ယေဟောဝါကိုယ်တော်တိုင်အား အမှန်ငြင်းပယ်ခြင်းဖြစ်ကြောင်း ယေရှုရှင်းပြခဲ့သည်။—လုကာ ၁၀:၄-၇၊ ၁၆။
၇၀ သောသူတို့သည် မိမိတို့၏ဟောပြောခြင်းတာဝန် ပြီးဆုံးသွားသည့်အခါ “ဝမ်းမြောက်သောစိတ်နှင့်” ယေရှုထံပြန်လာ၍သတင်းပို့ခဲ့သည်– “‘သခင်၊ ကိုယ်တော်၏နာမအားဖြင့် အကျွန်ုပ်တို့သည် နတ်ဆိုးကိုပင်နိုင်ပါသည်’ဟု လျှောက်ကြ၏။” (လုကာ ၁၀:၁၇) တန်ခိုးကြီးသော . . . ဝိညာဉ်သတ္တဝါများကို နှင်ထုတ်ခြင်းသည် မစုံလင်သောလူသားများအတွက် စိတ်လှုပ်ရှားဖွယ်ဖြစ်ခဲ့မည်တကား! သို့သော် စိတ်အားထက်သန်သော မိမိတမန်တော်များကို ယေရှုသတိပေးခဲ့သည်– “နတ်ဆိုးကိုနိုင်ရသောကြောင့်သာ ဝမ်းမြောက်ခြင်းမရှိကြနှင့်။ သင်တို့၏နာမည်များသည် ကောင်းကင်စာရင်း၌ဝင်သည်ကို ဝမ်းမြောက်ခြင်းရှိကြလော့ဟု မိန့်တော်မူ၏။” (လုကာ ၁၀:၂၀) ၇၀ သောသူတို့သည် နတ်ဆိုးတို့ကိုနှင်ထုတ်နိုင်သည့်အစွမ်း အမြဲမရှိခဲ့သကဲ့သို့ ခရစ်ယာန်ဓမ္မအမှုတွင်လည်း အပြုသဘောဆောင်သောအကျိုးကို အမြဲမရခဲ့ကြပါ။ သို့သော် သူတို့တည်ကြည်လျှင် ယေဟောဝါ၏နှစ်သက်လက်ခံမှုကို အမြဲရမည်ဖြစ်သည်။
အချိန်ပြည့်အမှုဆောင်များကို သင်လေးမြတ်ပါသလော
တစ်ခါက လူငယ်တစ်ယောက်သည် ခရစ်ယာန်အကြီးအကဲတစ်ဦးကို ဤသို့ပြောခဲ့သည်– “အထက်တန်းကျောင်းပြီးတဲ့အခါ အလုပ်တစ်ခုရဖို့ ကျွန်တော်ကြိုးစားမယ်။ အလုပ်ရှာမရခဲ့ရင်တော့ အချိန်ပြည့်အမှုဆောင်ခြင်းတစ်မျိုးမျိုးကိုလုပ်ဖို့ စဉ်းစားမယ်။” သို့သော် ယင်းသည် ရှေ့ဆောင်ဓမ္မအမှုကိုလုပ်ဆောင်ကြသူအများစု၏ ရှုမြင်ပုံမဟုတ်ပါ။ ရှေ့ဆောင်လုပ်နိုင်ရန်အလို့ငှာ အချို့သူတို့သည် ဝင်ငွေကောင်းသော အသက်မွေးမှုလုပ်ငန်းများရနိုင်သည့် အခွင့်အလမ်းများကို စွန့်လွှတ်ခဲ့ကြသည်။ အခြားသူများမူ စိတ်လှုပ်ရှားဖွယ် ပညာရေးဆိုင်ရာအခွင့်အလမ်းများကို ငြင်းပယ်ခဲ့ကြသည်။ တမန်တော်ပေါလုကဲ့သို့ သူတို့သည် ကိုယ်ကျိုးစွန့်ခဲ့ကြသည်၊ သို့သော် ပေါလု၊ ရောဘတ်နှင့် အေမီတို့ကဲ့သို့ပင် သူတို့သည် မိမိတို့၏ရွေးချယ်ခဲ့ရာအတွက် နောင်တမရကြပေ။ သူတို့သည် မိမိတို့ပေးဆက်နိုင်သည့် အကောင်းဆုံးအရာများကိုပိုင်ထိုက်သောအရှင် ယေဟောဝါကိုချီးမွမ်းရန် သူတို့၏ပင်ကိုအရည်အချင်းများကို အသုံးပြုရသည့် အခွင့်ထူးကို တန်ဖိုးထားလေးမြတ်ကြသည်။
အကြောင်းအမျိုးမျိုးကြောင့် ယေဟောဝါ၏ တည်ကြည်သောသက်သေခံမြောက်မြားစွာသည် ရှေ့ဆောင်နိုင်သည့်အခြေအနေတွင်မရှိကြပါ။ သူတို့တွင် ကျမ်းပေးတာဝန်များကို ထမ်းဆောင်ကောင်းထမ်းဆောင်ရပေမည်။ သို့တစေ ဘုရားသခင့်အမှုတော်ကို သူတို့၏ ‘စိတ်နှလုံး’ အကြွင်းမဲ့ဖြင့်ထမ်းဆောင်လျှင် ယေဟောဝါနှစ်သက်တော်မူသည်။ (မဿဲ ၂၂:၃၇) မိမိတို့ကိုယ်တိုင် ရှေ့ဆောင်မလုပ်နိုင်သည့်တိုင် ရှေ့ဆောင်လုပ်နိုင်သူများသည် ကောင်းသောအသက်မွေးလုပ်ငန်းကိုရွေးချယ်လိုက်ခြင်းဖြစ်ကြောင်း သူတို့အသိအမှတ်ပြုကြသည်။
တမန်တော်ပေါလုက ဤသို့ရေးသားခဲ့သည်– “လော[က]ပုံသဏ္ဌာန်ကိုမဆောင်ကြနှင့်။” (ရောမ ၁၂:၂) ပေါလု၏အကြံပေးချက်နှင့်အညီ ဤအစီအစဉ်၏ ယဉ်ကျေးမှု သို့မဟုတ် လောကစံနှုန်းများက ကျွန်ုပ်တို့၏စဉ်းစားတွေးခေါ်ပုံကို ပုံသွင်းရန်ခွင့်မပြုရပါ။ သင်သည် ရှေ့ဆောင်လုပ်နိုင်သည်ဖြစ်စေ၊ မလုပ်နိုင်သည်ဖြစ်စေ ယေဟောဝါအမှုတော်ဆောင်ခြင်းကို သင့်ဘဝ၏အဓိကထားရာဖြစ်စေပါ။ ယေဟောဝါ၏နှစ်သက်လက်ခံမှုရသည့်ကာလပတ်လုံး သင်အောင်မြင်နေမည်သာ။
[အောက်ခြေမှတ်ချက်များ]
^ အပိုဒ်၊ 5 နာမည်များကိုပြောင်းထားသည်။
[စာမျက်နှာ ၁၉ ပါ ရုပ်ပုံ]
မည်သည့်နေရာကိုမျှ မပို့ပေးနိုင်သော ပုံဆောင် ခြေနင်းစက်ပေါ်တွင် တွယ်ကပ်မနေပါနှင့်