“ငါ့ပညတ်တို့ကိုစောင့်ရှောက်၍ အသက်ဆက်လက်ရှင်လော့”
“ငါ့ပညတ်တို့ကိုစောင့်ရှောက်၍ အသက်ဆက်လက်ရှင်လော့”
သူသည် ငယ်ရွယ်သည်၊ ထက်မြက်သည်၊ “ပုံပြင်ယဉ်ကျေး၍ အသွေးအဆင်းလည်းလှသောသူဖြစ်၏။” သူ့အလုပ်ရှင်၏မယားသည် တပ်မက်လုံးကြီးပြီးအတင့်ရဲသူဖြစ်သည်။ သူသည် ငယ်ရွယ်သောယောက်ျားပျိုအား မချုပ်တည်းနိုင်အောင်တပ်မက်နေရကား နေ့တိုင်း သူ့ကိုသွေးဆောင်ဖြားယောင်းရန် ကြိုးစားလေသည်။ “တစ်နေ့သ၌ ယောသပ်သည် အမှုဆောင်ခြင်းငှာအိမ်ထဲသို့ဝင်၍ အိမ်သားယောက်ျားတစ်ယောက်မျှ မရှိသောအခါ၊ သခင်မက ‘ငါနှင့်အတူအိပ်ပါ’ ဟုဆိုလျက်၊ ယောသပ်အဝတ်ကိုကိုင်ဆွဲ . . . လေ၏။” သို့သော်လည်း ဘိုးဘေးယာကုပ်၏သားယောသပ်သည် မိမိ၏အဝတ်ကိုစွန့်ကာ ပေါတိဖာမယားထံမှထွက်ပြေးလေ၏။—ကမ္ဘာဦး ၃၉:၁-၁၂။
မှန်ပါသည်၊ သွေးဆောင်မှုအခြေအနေမှ လူတိုင်း ရုန်းထွက်ပြေးနိုင်ကြသည်မဟုတ်။ ဥပမာအနေနှင့်၊ ဣသရေလရှင်ဘုရင်ရှောလမုန်တွေ့မြင်ခဲ့သည့် ညအချိန်လမ်းများပေါ်မှ လူငယ်တစ်ဦး၏အဖြစ်အပျက်ကို သုံးသပ်ကြည့်ပါ။ မိန်းမပျက်တစ်ဦး၏ ဖြားယောင်းသွေးဆောင်မှုကိုခံရသောအခါ “နွားသည် အသေခံရာသို့ လိုက်သကဲ့သို့ . . . လူပျိုသည် ထိုမိန်းမနောက်သို့ ချက်ချင်းလိုက်သွား၏။”—သု. ၇:၂၁-၂၃။
“မတရားသောမေထုန်ကို ကြဉ်ရှောင်ကြ” ရန်ခရစ်ယာန်များအား ဆုံးမထားသည်။ (၁ ကောရိန္သု ၆:၁၈) ငယ်ရွယ်သော ခရစ်ယာန်တပည့်တော်တိမောသေထံ တမန်တော်ပေါလုဤသို့ရေးခဲ့သည်– “လူပျိုတို့၏တပ်မက်ခြင်းစိတ်များကို ကြဉ်ရှောင်လော့။” (၂ တိမောသေ ၂:၂၂၊ သမ္မာ) မတရားမေထုန်၊ သူ့သားအိမ်ရာပြစ်မှားမှု၊ သို့မဟုတ် အခြားကိုယ်ကျင့်တရားအမှားများ၏ အရိပ်အယောင်တွေ့ရသောအခြေအနေများနှင့် ရင်ဆိုင်ရသည့်အခါ၌ ပေါတိဖာမိန်းမထံမှ ယောသပ်ထွက်ပြေးခဲ့သကဲ့သို့ ကျွန်ုပ်တို့လည်း ပြတ်ပြတ်သားသားရှောင်ပြေးရမည်။ ထိုသို့လုပ်ဆောင်ဖို့သန္နိဋ္ဌာန်ချရန် ကျွန်ုပ်တို့ကို မည်သည့်အရာကကူညီပေးမည်နည်း။ ကျမ်းစာနယပုံပြင်ကျမ်း အခန်းကြီး ၇ တွင်ရှောလမုန်သည် အဖိုးမဖြတ်နိုင်သော အကြံဉာဏ်အချို့ကို ကျွန်ုပ်တို့အတွက်ပေးထားသည်။ သူသည် အကျင့်မကောင်းသောသူတို့၏ မာယာကျော့ကွင်းများမှ ကျွန်ုပ်တို့ကိုကာကွယ်ပေးသည့် သွန်သင်ဆုံးမစကားများကို ပြောထားရုံသာမက မိန်းမပေါ့တစ်ဦး၏ ဖြားယောင်းသွေးဆောင်မှုကိုခံရသော လူငယ်တစ်ဦးပါဝင်သည့် ဇာတ်ကွက်တစ်ခုကို ကွက်ကွက်ကွင်းကွင်းရုပ်လုံးဖော်ရေးသားကာ သူတို့၏မြှူဆွယ်နည်းကိုလည်း လှစ်ဟဖော်ထုတ်ပေးထားသည်။
‘ငါ့ပညတ်များကို သင်၏လက်ချောင်းများ၌ ချည်ထားလော့’
ရှင်ဘုရင်သည် ဖခင်တစ်ဦးကဲ့သို့ ဤအတိုင်းအကြံဉာဏ်ပေးသည်– “ငါ့သား ငါ့စကားကိုစေ့စေ့နားထောင်၍ ငါ့ပညတ်တို့ကို သင်၌သိုထားလော့။ ငါ့ပညတ်တို့ကိုစောင့်ရှောက်၍ အသက်[“ဆက်လက်၊” ကဘ]ရှင်လော့။ ငါပေးသောတရားကို ကိုယ်မျက်ဆန်ကဲ့သို့စောင့်လော့။”—သု. ၇:၁၊ ၂။
မိမိတို့၏သားသမီးတို့အား အကောင်းအဆိုးနှင့်ပတ်သက်သည့်ဘုရားသခင့်စံနှုန်းများကို သွန်သင်ပေးရန် မိဘများ၊ အထူးသဖြင့်ဖခင်တို့၌ ဘုရားသခင်ပေးအပ်ထားသည့်တာဝန်ရှိသည်။ မောရှေက ဖခင်များအားဤသို့တိုက်တွန်းခဲ့သည်– “ယနေ့ငါမှာထားသောစကားကို နှလုံးသွင်းရမည်။ ထိုစကားကို သင်၏သားသမီးတို့အား ကြိုးစား၍သွန်သင်ရမည်။ အိမ်၌ထိုင်လျက်နေသည်ဖြစ်စေ၊ ခရီး၌သွားသည်ဖြစ်စေ၊ အိပ်လျက်၊ ထလျက်ရှိသည်ဖြစ်စေ ထိုစကားကိုပြောရမည်။” (တရားဟောရာ ၆:၆၊ ၇) တစ်ဖန် တမန်တော်ပေါလုကလည်း ဤသို့ရေးခဲ့သည်– “အဘတို့ကိုယ့်သားသမီးကို စိတ်ဆိုးစေခြင်းငှာ မပြုကြနှင့်။ ယေဟောဝါ၏ ပဲ့ပြင်ဆုံးမခြင်းနှင့် စိတ်သဘောတော်ဆိုင်ရာ စည်းမျဉ်းဥပဒေအရ သူတို့ကိုမွေးမြူကြလော့။” (ဧဖက် ၆:၄၊ ကဘ) ထို့ကြောင့် အလွန်မြတ်နိုးတန်ဖိုးထားအပ်သည့် မိဘတို့၏သွန်သင်ချက်များတွင် ဘုရားသခင့်နှုတ်မြွတ်တော် သမ္မာကျမ်းစာ၌ တွေ့ရှိရသည့် သတိပေးနှိုးဆော်ချက်များ၊ မိန့်မှာချက်နှင့် ပညတ်များ အမှန်ပါဝင်သည်။
မိဘနှင့်ဆိုင်သောသွန်သင်ချက်တွင် အခြားစည်းမျဉ်းများ—မိသားစုစည်းကမ်းများလည်း ပါဝင်ပေမည်။ ထိုအရာများသည် မိသားစုဝင်တို့ ကောင်းဖို့အတွက်ဖြစ်သည်။ မှန်ပါသည်၊ မိသားစုတစ်စုနှင့်တစ်စုတွင် လိုအပ်ချက်များအပေါ်မူတည်၍ စည်းကမ်းအမျိုးမျိုးရှိနိုင်သည်။ သို့သော် မိဘတို့သည် မိမိတို့မိသားစုအတွက် အကောင်းဆုံးအရာကို ဆုံးဖြတ်ရသည်။ မိမိတို့ထုတ်ထားသည့်စည်းကမ်းများသည် များသောအားဖြင့် မိမိတို့၏စစ်မှန်သောမေတ္တာနှင့် စိုးရိမ်မကင်းဖြစ်မှုတို့၏ ဖော်ပြချက်တစ်ခုဖြစ်သည်။ ငယ်ရွယ်သူတို့သည် မိမိတို့အား အကြံဉာဏ်ပေးသည့်အခါ ဤစည်းကမ်းများကို မိဘများ
ထံမှရရှိသော ကျမ်းစာသွန်သင်ချက်များနှင့်အတူ လိုက်နာရန်ဖြစ်သည်။ မှန်ပါသည်၊ ဤကဲ့သို့သော သွန်သင်ချက်များကို “ကိုယ်မျက်ဆန်ကဲ့သို့” ပြုမူရန်ဖြစ်သည်—အစွမ်းကုန်ဂရုစိုက်စောင့်ထိန်းရန်ဖြစ်သည်။ ယင်းသည် ယေဟောဝါ၏စံနှုန်းများကိုလျစ်လျူရှုခြင်းကြောင့်ရသည့် သေစေနိုင်သောအကျိုးဆက်ကို ရှောင်ကွင်းပြီး ‘ဆက်အသက်ရှင်နေ’ ရန်နည်းလမ်းဖြစ်သည်။ရှောလမုန်သည်ဆက်၍ “[ငါ့ပညတ်တို့ကို] သင်၏လက်ချောင်းများ၌ချည်ထား၍ နှလုံးပြားပေါ်၌ရေးမှတ်လော့” ဟုဆိုသည်။ (သု. ၇:၃၊ သမ္မာ) လက်ချောင်းများသည် ကျွန်ုပ်တို့၏မျက်စိဖြင့် အထင်အရှားမြင်နေရပြီး ကျွန်ုပ်တို့၏ရည်ရွယ်ချက်များကို ဆောင်ရွက်ရာတွင် အရေးပါသကဲ့သို့၊ ကျမ်းစာ၏သွန်သင်ပဲ့ပြင်မှု သို့မဟုတ် ကျမ်းစာအသိပညာ၏အကျိုးဖြစ်ထွန်းမှုတို့မှရလာသည့် သင်ခန်းစာများသည် ကျွန်ုပ်တို့ပြုလေသမျှတွင် အမြဲတစေသတိပေးလမ်းညွှန်ချက်တစ်ခုဖြစ်သင့်သည်။ ယင်းတို့ကို ကျွန်ုပ်တို့၏နှလုံးပြားပေါ်တွင်ရေးထွင်းထားပြီး၊ မိမိတို့၏ပင်ကိုအရည်အသွေးတစ်ခုဖြစ်စေရမည်ဖြစ်သည်။
ဉာဏ်ပညာနှင့် နားလည်မှုတို့၏အရေးကြီးမှုကို မမေ့ဘဲ၊ “ဉာဏ်ပညာအား ‘သင်သည် ငါ့နှမဖြစ်၏’ ဟုခေါ်လော့၊ နားလည်မှုကိုယ်နှိုက်ကို ‘အမျိုးတော်သောအမျိုးသမီး’ ဟုခေါ်နိုင်သည်” ဟု ရှင်ဘုရင်က အားပေးတိုက်တွန်းခဲ့သည်။ (သု. ၇:၄၊ ကဘ) ဉာဏ်ပညာသည် ဘုရားသခင်ပေးထားသည့်အသိပညာကို သင့်လျော်စွာအသုံးပြုနိုင်သည့်စွမ်းရည်ဖြစ်သည်။ ကျွန်ုပ်တို့သည် ဉာဏ်ပညာကို အလွန်ချစ်ခင်မြတ်နိုးသည့်နှမကဲ့သို့ ချစ်ခင်စုံမက်မှုရှိသင့်သည်။ နားလည်မှုဟူသည်မှာအဘယ်နည်း။ နားလည်မှုဟူသည် ကိစ္စရပ်ကို ထိုးဖောက်မြင်နိုင်စွမ်းရှိကာ အဆိုကိစ္စ၏ကဏ္ဍရပ်များနှင့် ကိစ္စရပ်တစ်ခုလုံးစပ်ကြား ဆက်နွှယ်မှုများကိုနားလည်ခြင်းဖြင့် ၎င်းကို ရှင်းရှင်းလင်းလင်းသိမြင်နိုင်သည့်စွမ်းရည်ဖြစ်သည်။ နားလည်မှုသည် အလွန်ရင်းနှီးသောမိတ်ဆွေတစ်ဦးအလား ကျွန်ုပ်တို့နှင့်ရင်းနှီးရမည်။
ကျွန်ုပ်တို့သည် ကျမ်းစာဆိုင်ရာလေ့ကျင့်မှုကို အဘယ်ကြောင့်တွယ်ကပ်ထားသင့်ပြီး ဉာဏ်ပညာ၊ နားလည်မှုတို့နှင့်ရင်းနှီးမှုကို အဘယ်ကြောင့်ပြုစုပျိုးထောင်ပေးသင့်သနည်း။ “သူစိမ်းအမျိုးသမီး၏အန္တရာယ်မှ၊ နှုတ်ချိုသော တိုင်းတစ်ပါးသူ၏အန္တရာယ်မှ [မိမိကိုယ်ကို] ကာကွယ်” နိုင်ရန်ဖြစ်သည်။ (သု. ၇:၅၊ ကဘ) မှန်ပါသည်၊ ထိုသို့ပြုလုပ်ပါက အကျင့်ပျက်သူစိမ်းတစ်ဦး သို့မဟုတ် တိုင်းတစ်ပါးသူတစ်ဦး၏ နားဝင်ချိုပြီးသွေးဆောင်ဖြားယောင်းတတ်သော နည်းလမ်းများမှ ကျွန်ုပ်တို့အားကာကွယ်ပေးပါလိမ့်မည်။ *
လူရွယ်သည် ‘ပရိယာယ်များသောအမျိုးသမီးတစ်ဦး’ ကိုတွေ့ဆုံ
ဣသရေလရှင်ဘုရင်သည် သူကိုယ်တိုင်တွေ့မြင်သိရှိရသည့် မြင်ကွင်းတစ်ခုကို နောက်ဆက်တွဲဤသို့ဖော်ပြသည်– “ငါ့အိမ်ပြတင်းရွက်ကြားမှငါကြည့်၍မြင်ရသောအမှုဟူမူကား၊ ဉာဏ်တိမ်သောအမျိုးသားချင်းစုကို ငါကြည့်ရှုစဉ်တွင် ဉာဏ်မရှိသောလူပျိုတစ်ယောက်သည်၊ ထိုသို့သောမိန်းမနေရာ လမ်းထောင့်အနားသို့ လျှောက်သွားသဖြင့်၊ မိုးချုပ်၍ညဦးအချိန် ညနက်သောအချိန်ရောက်သောအခါ ထိုမိန်းမနေရာလမ်းသို့လိုက်လေ၏။”—သု. ၇:၆-၉။
ရှောလမုန်မျှော်ကြည့်ရာပြတင်းပေါက်တွင် သစ်သားမှန်ကူကွက်ပုံဖြစ်သည်—ဖြစ်ဖွယ်ရှိသည်မှာ ပွတ်လုံးများဖြင့် သေချာစွာထုဆစ်ထားသော ပန်းပုလက်ရာများပါရှိသည်။ ဆည်းဆာနေရောင်သည် တဖြည်းဖြည်းမှေးမှိန်လာသည်နှင့်အမျှ လမ်းများပေါ်တွင် အမှောင်ထုကစိုးမိုးလာသည်။ ခုခံနိုင်မှုအားနည်းသောလူရွယ်တစ်ယောက်ကို သူမြင်တွေ့လိုက်ရသည်။ ပိုင်းခြားသိမြင်မှု သို့မဟုတ် စဉ်း
စားဆင်ခြင်ဉာဏ်ကင်းမဲ့ကာ နှလုံးလိုအပ်ချက်ရှိသောသူဖြစ်သည်။ မိမိသည် မည်သည့်ရပ်ကွက်မျိုးသို့ဝင်လာကြောင်းနှင့် ဤတွင် မိမိဘာဖြစ်နိုင်သည်တို့ကို သူသိနေပုံရသည်။ လူရွယ်သည် အမျိုးသမီးအိမ်သို့သွားသည့်လမ်းပေါ်ရှိ “လမ်းထောင့်” နားသို့လာသည်။ ထိုအမျိုးသမီးကား မည်သူနည်း။ သူ ဘာအလုပ်လုပ်သနည်း။ဤမျက်စိရှင်သောဘုရင်က ဤသို့ဆက်၍ဆိုသည်မှာ– “ကြည့်ပါ! ပြည့်တန်ဆာအဝတ်ကိုဝတ်၍ နှလုံးစဉ်းလဲဉာဏ်များသောမိန်းမသည် ထိုသူကိုကြိုဆို၏။ ထိုမိန်းမသည် လျှာကြမ်းအာကြမ်းပြီး အလျှော့မပေးတတ်။ ကိုယ်အိမ်၌ ခြေငြိမ်သူမဟုတ်။ သူသည် ခုပင်အပြင်သွား၊ ခုပင်လူစုဝေးရာနေရာရောက်နေလျက်၊ လမ်းထောင့်အရပ်ရပ်၌ ချောင်းမြောင်း၍ကြည့်တတ်၏။”—သု. ၇:၁၀-၁၂၊ ကဘ။
ထိုအမျိုးသမီး၏ဝတ်စားပုံက သူ့အားမည်မျှရလွယ်ကြောင်းကို ဖွင့်ပြောနေသည်။ (ကမ္ဘာဦး ၃၈:၁၄၊ ၁၅) သူသည် ပြည့်တန်ဆာမကဲ့သို့ အရှက်အကြောက်တရားမဲ့စွာ ဝတ်ဆင်ထားသည်။ ထို့အပြင်၊ ထိုအမျိုးသမီးသည် နှလုံးစဉ်းလဲဉာဏ်များ—သူ့စိတ်ထားသည် “လှည့်စားတတ်” ၏၊ “သူ၏သဘောရင်းမှာ ပရိယာယ်ဆင်တတ်” ၏။ (အမေရိကန်ဘာသာပြန်ကျမ်း၊ နိုင်ငံတကာဘာသာပြန်ကျမ်းသစ်) ထိုအမျိုးသမီးသည် လျှာကြမ်းအာကြမ်းပြီး အလျှော့မပေးတတ်၊ စကားများကာ ခေါင်းမာ၏၊ အာကျယ်ပြီး ကိုယ်ကျိုးရှေ့ရှု၏၊ ရဲတင်းပြီး ဖီဆန်အာခံတတ်သူဖြစ်၏။ အိမ်၌နေမည့်အစား လူအများစုဝေးရာနေရာများကို ပိုကြိုက်၏၊ လမ်းထောင့်များတွင် အမဲဖမ်းရန် ချောင်းမြောင်းနေတတ်၏။ လူရွယ်ကဲ့သို့သောတစ်စုံတစ်ယောက်ကို စောင့်မျှော်နေသည်။
‘များစွာသွေးဆောင်မှု’
သို့ဖြစ်၍ လူရွယ်သည် ကောက်ကျစ်သောအကြံရှိသည့် မိန်းမပေါ့နှင့် တွေ့ဆုံသည်။ ဤအရာသည် ရှောလမုန်၏အာရုံကို ဖမ်းစားခဲ့ရမည်ဖြစ်ခြင်း! သူဤသို့ပြန်ပြောပြသည်– “ထိုလူပျိုကိုတွေ့သောအခါ ရဲသောမျက်နှာနှင့် ဖမ်းဖက်နမ်းရှုပ်လျက်၊ ‘ငါ၌ မိတ်သဟာယပူဇော်သကာရှိ၏။ ယနေ့ငါ့ကတိဝတ်ကို ငါဖြေပြီ။ ထို့ကြောင့် သင့်ကိုကြိုဆိုအံ့သောငှာ ငါထွက်လာပြီ။ သင့်မျက်နှာကို ကြိုးစားရှာ၍တွေ့ပြီ။’”—သု. ၇:၁၃-၁၅။
ဤအမျိုးသမီး၏နှုတ်သည် နားဝင်ချိုသည်။ ရဲတင်းသောမျက်နှာထားဖြင့် ယုံကြည်စွာပြောဆိုသည်။ လူရွယ်အားဖြားယောင်းသွေးဆောင်ရန် သူပြောသမျှစကားလုံးတိုင်းကို သေသေချာချာတွက်ဆထားသည်။ ထိုနေ့တွင် မိတ်သဟာယယဇ်ကိုပူဇော်ခဲ့ပြီး သစ္စာကတိဝတ်ကိုဖြေခဲ့ကြောင်း ထုတ်ဖော်ပြောဆိုခြင်းဖြင့်လည်းကောင်း၊ ဝိညာဉ်ရေးတွင်မလစ်ဟင်းကြောင်း အရိပ်အမြွက်ပေးခြင်းဖြင့်လည်းကောင်း ဖြောင့်မတ်မှုရှိပုံ ပြသသည်။ ယေရုရှလင်မြို့ဗိမာန်တော်ရှိ မိတ်သဟာယယဇ်တွင် အသား၊ မုန့်ညက်၊ ဆီနှင့် စပျစ်ရည်တို့ပါဝင်သည်။ (ဝတ်ပြုရာ ၁၉:၅၊ ၆; ၂၂:၂၁; တောလည်ရာ ၁၅:၈-၁၀) ပူဇော်သကာပြုသူသည် မိမိနှင့်မိသားစုအတွက် မိတ်သဟာယယဇ်တွင်ပါဝင်နိုင်သောကြောင့် သူ၏အိမ်၌ စားသောက်စရာအလျှံပယ်ရှိကြောင်း တင်ပြသည်။ တွေးဆကြည့်နိုင်ရာကား ရှင်းပါသည်– လူရွယ်သည် ထိုနေရာတွင် ပျော်မွေ့ခဲ့ပေမည်။ သူ အိမ်မှထွက်လာခြင်းသည် အထူးသဖြင့် လူရွယ်အားရှာရန်ဖြစ်သည်။ မည်သူမဆို ထိုဇာတ်လမ်းမျိုး ဝင်တိုးလျှင်—ရင်နင့်စဖွယ်ကောင်းလှပေသည်။ ကျမ်းပညာရှင်တစ်ဦးက ဤသို့ဆိုသည်– “တစ်စုံတစ်ဦးအားရှာဖွေရန် ထွက်လာခဲ့သည်မှာမှန်ပါသည်၊ သို့သော် ဤအထူးလူငယ်လေးအတွက်သာ သူအမှန်တကယ်ထွက်လာခြင်းလော။ ရူးမိုက်သည့်ဤသို့သောသူမျိုးသာလျှင် သူ့ကိုယုံကြည်ပေမည်။”
သွေးဆောင်ဖြားယောင်းသူသည် ဝတ်စားမှု အမြင်အာရုံ၊ မြှောက်ပင့်ပြောဆိုတတ်သည့် အကြားအာရုံ၊ ပွေ့ဖက်မှု အထိအတွေ့အာရုံ၊ နှုတ်ခမ်း ရသာရုံတို့ဖြင့် ဆွဲဆောင်မှုရှိအောင်ဖန်တီးပြင်ဆင်ပြီးနောက် ရနံ့အာရုံကိုပါထပ်ဆောင်းပေးထားသည်။ သူဤသို့ပြောသည်– “ငါ့ခုတင်ကို ခြယ်လှယ်သောအိပ်ရာခင်းနှင့်လည်းကောင်း၊ အဲဂုတ္တုပိတ်ချောနှင့်လည်းကောင်း ပြင်ဆင်ပြီ။ ငါ့မွေ့ရာကို မုရန်၊ အကျော်၊ သစ်ကြံပိုးနှင့်ထုံပြီ။” (သု. ၇:၁၆၊ ၁၇) သူ၏အိပ်ရာကို အီဂျစ်ပြည်မှရောင်စုံပိတ်ချော၊ အထူးရွေးချယ်ထားသောအမွှေးနံ့သာများဖြစ်သည့် မုရန်၊ အကျော်နှင့် သစ်ကြံပိုးတို့နှင့် ထုံသင်းစေခြင်းဖြင့် လှပစွဲမက်စွာ ပြင်ဆင်ခဲ့သည်။
“လာပါ၊ နံနက်တိုင်အောင် စုံမက်ခြင်းအာရုံကို ဖျော်ဖြေကြကုန်အံ့။ ချစ်ကြိုက်ပျော်ပါးကြကုန်အံ့” ဟုဆက်ဆိုသည်။ ဖိတ်ကြားချက်သည် နှစ်ယောက်အတွက် သာယာသောညစာစားပွဲတစ်ခုထက်မက တစ်စုံတစ်ရာပိုမည်ဖြစ်သည်။ သူ့ကတိသည် လိင်ဆိုင်ရာပျော်ပါးရန်ဖြစ်သည်။ လူငယ်အဖို့ ဆွဲဆောင်မှုသည် စွန့်စားခန်းဖြစ်ပြီး စိတ်လှုပ်ရှားစရာဖြစ်သည်! ထပ်မံသွေးဆောင်သည့်အနေနှင့် ဤသို့ဆိုသည်– “လင်မူကား၊ အိမ်မှာမရှိ။ ငွေအိတ်ကိုဆောင်လျက် ခရီးဝေးစွာသွားလေပြီ။ လပြည့်နေ့မှ ပြန်ရောက်လိမ့်မည်။” (သု. ၇:၁၈-၂၀၊ သမ) သူ၏လင်ယောက်ျားသည် စီးပွားရေးကိစ္စဖြင့် ခရီးသွားနေသောကြောင့် တော်တော်နှင့်ပြန်ရောက်ဖို့အကြောင်းမရှိ၊ သူတို့အပြည့်အဝလုံခြုံမည်ဖြစ်ကြောင်းကို လူရွယ်အားသေချာစေသည်။ ငယ်ရွယ်သူတစ်ဦးကို ညှို့ယူဖမ်းစားရာတွင် ကျင်လည်လိုက်လေခြင်း! “များစွာသွေးဆောင်ခြင်းအားဖြင့် အလိုသို့ပါစေ၍၊ မြှောက်ပင့်သောနှုတ်ခမ်းနှင့်အနိုင်ရလေ၏။” (သု. ၇:၂၁၊ သမ) ဤမြှူဆွယ်ခြင်းကို တွန်းလှန်ရန် ယောသပ်၏ကိုယ်ကျင့်တရားအစွမ်းအစအဆင့်မျိုးလိုမည်။ (ကမ္ဘာဦး ၃၉:၉၊ ၁၂) ဤလူရွယ်သည် အရည်အချင်းပြည့်မီပါသလော။
‘အသတ်ခံရာသို့သွားသောနွားကဲ့သို့’
ရှောလမုန်ကဤသို့တင်ပြသည်– “ထိုလူပျိုသည် အသတ်ခံရာသို့သွားသောနွားကဲ့သို့လည်းကောင်း၊ ခြေချင်းခတ်၍ဆုံးမခံရန်သွားသု. ၇:၂၂၊ ၂၃၊ သမ။
သော လူမိုက်ကဲ့သို့လည်းကောင်း၊ အသက်[“စိုးလ်၊” ကဘ]အန္တရာယ်ဖြစ်မည်ကိုမသိဘဲ ညွှတ်ကွင်းသို့ဝင်မိသောငှက်ကဲ့သို့လည်းကောင်း၊ အသည်းအဆုတ်ကိုမြားခွင်းသည့်တိုင်အောင်၊ ထိုမိန်းမနောက်သို့ ချက်ချင်းလိုက်သွားလေ၏။”—ဖိတ်ခေါ်ချက်သည် လူရွယ်အတွက် တွန်းလှန်နိုင်အားမရှိကြောင်းပြနေသည်။ ကောင်းသောစဉ်းစားဆင်ခြင်နိုင်စွမ်းမှန်သမျှကို လျစ်လျူရှုကာ ‘အသတ်ခံရာသို့သွားသောနွားကဲ့သို့’ သူ့နောက်သို့လိုက်၏။ ခြေချင်းခတ်ထားခံရသည့်လူတစ်ဦးသည် အပြစ်ဒဏ်မှမလွတ်မြောက်နိုင်သကဲ့သို့ လူရွယ်သည်လည်း အပြစ်ပြုရန် သွေးဆောင်ခံခဲ့ရသည်။ ‘အသည်းအဆုတ်ကိုမြားခွင်း’ သည့်အထိ၊ တစ်နည်းဆိုရလျှင် သေဆုံးရသည့် ဒဏ်ရာရသည့်အထိ အန္တရာယ်ကိုသူမမြင်ပါ။ မိမိကိုယ်ကို သေစေတတ်သော လိင်ဆိုင်ရာကူးစက်ရောဂါရအောင် လုပ်ခြင်းဖြစ်သောကြောင့် ဤသေခြင်းသည် ရုပ်ပိုင်းဆိုင်ရာသေခြင်းဖြစ်နိုင်သည်။ * ဤဒဏ်ရာသည် သူ၏ဝိညာဉ်ရေးရာသေခြင်းကိုလည်း ဖြစ်စေနိုင်သည်; ၎င်းသည် သူ၏ “အသက် [စိုးလ်] ” နှင့်ပတ်သက်သည်။ သူ၏လက်ရှိအခြေအနေနှင့် တစ်ဘဝလုံးသည် အကြီးအကျယ်ထိခိုက်ကာ ဘုရားသခင်ကိုဆန့်ကျင်သည့်အပြစ်ကြီးကို သူပြုခဲ့သည်။ သို့ဖြစ်၍ သူသည် ကျော့ကွင်းထဲသို့ဝင်သွားသောငှက်ကဲ့သို့ သေခြင်းသို့အလျင်စလိုဝင်သွားသည်။
“သူကျင်လည်သောလမ်းခရီးသို့လွှဲ၍မလိုက်နှင့်”
ပညာရှိရှင်ဘုရင်သည် သူမြင်တွေ့ခဲ့ရသည့်အရာမှသင်ခန်းစာထုတ်ယူကာ ဤသို့တိုက်တွန်းခဲ့သည်– “သို့ဖြစ်၍ ငါ့သားတို့ ငါ့စကားကိုနားထောင်၍ ငါမြွက်ဆိုချက်တို့ကို စေ့စေ့မှတ်လော့။ ထိုသို့သောမိန်းမနေရာလမ်းကို စိတ်မငဲ့ကွက်နှင့်။ သူကျင်လည်သောလမ်းခရီးသို့ လွှဲ၍မလိုက်နှင့်။ အကြောင်းမူကား သူသည် လူအများတို့ကိုကျဆုံးစေလေပြီ။ များပြားသောလူတို့ကို သတ်လေပြီ။ သူ၏အိမ်သည် သေမင်း၏ဘုံဗိမာန်သို့ဆင်း၍ မရဏာနိုင်ငံသို့ရောက်သောလမ်းဖြစ်၏။”—သု. ၇:၂၄-၂၇၊ သမ္မာ။
ရှင်းနေပါသည်၊ ရှောလမုန်၏အကြံပေးချက်သည် အကျင့်ယိုယွင်းနေသောလူတစ်ဦးအား သေစေတတ်သောနည်းလမ်းများမှ ရှောင်လွှဲစေပြီး “ဆက်အသက်ရှင်” ရန်ဖြစ်သည်။ (သု. ၇:၂) ဤအကြံပေးချက်သည် ကျွန်ုပ်တို့နေ့ရက်အတွက် အချိန်အခါသင့်လိုက်လေခြင်း! အမဲဖမ်းဖို့စောင့်နေကြသူများ ကျက်စားနေကျနေရာများကို ရှောင်ဖို့အမှန်ပင်လိုအပ်သည်။ ထိုသို့သောနေရာများသို့သွားခြင်းဖြင့် သူတို့၏ပရိယာယ်ကျော့ကွင်းတွင် ကိုယ့်ကိုယ်ကို အဘယ်ကြောင့် အမိခံသင့်မည်နည်း။ အမှန်ဆိုလျှင် သင်သည် “နှလုံးလိုအပ်ချက်” ရှိသောသူ တစ်ဦးဖြစ်စေကာ “တိုင်းတစ်ပါးသား” ကျင်လည်သောလမ်းများသို့ အဘယ်ကြောင့် လျှောက်သွားသင့်သနည်း။
ရှင်ဘုရင်မြင်တွေ့ခဲ့သည့် “သူစိမ်းအမျိုးသမီး” သည် လူရွယ်အား “ချစ်ကြိုက်ပျော်ပါးကြကုန်အံ့” ဟူသောဖိတ်ခေါ်ချက်ဖြင့် သွေးဆောင်ခဲ့သည်။ များလှစွာသောလူငယ်များ—အထူးသဖြင့်မိန်းကလေးများသည် အလားတူနည်းလမ်းဖြင့် အသုံးချခြင်းမခံနေရပေလော။ သို့သော်ဆင်ခြင်သုံးသပ်ပါ– တစ်စုံတစ်ယောက်သည် သင့်အား လိင်ဆိုင်ရာအကျင့်ဖောက်ပြန်ရန် ကြိုးစားဆွဲဆောင်နေပါလျှင် ယင်းသည် စစ်မှန်သည့်မေတ္တာလော၊ တစ်ကိုယ်ကောင်းဆန်သည့် တပ်မက်ခြင်းလော။ အမျိုးသမီးတစ်ဦးအား အချစ်စစ်အချစ်မှန်ဖြင့်ချစ်နေသော ယောက်ျားတစ်ဦးသည် မိန်းကလေး၏ခရစ်ယာန်လေ့ကျင့်ထိန်းကျောင်းမှုနှင့် ကိုယ်ကိုကိုယ်သိသောစိတ်တို့ကို ချိုးဖောက်စေရန် အဘယ်ကြောင့် ဖိအားပေးမည်နည်း။ ထိုသို့သောလမ်းများသို့ “သင်၏စိတ်နှလုံးမလွှဲနှင့်” ဟု ရှောလမုန်သတိပေးဆုံးမသည်။
ဖြားယောင်းသူတစ်ဦး၏စကားများသည် များသောအားဖြင့် နားဝင်ချိုပြီး ကြိုတင်တွက်ဆထားတတ်လေ့ရှိသည်။ ကျွန်ုပ်တို့ဘက်မှ ဉာဏ်ပညာနှင့် နားလည်မှုရှိမည်ဆိုပါလျှင် သူတို့၏အတွင်းကို ထိုးဖောက်မြင်ရန် ကူညီပါလိမ့်မည်။ ယေဟောဝါမိန့်တော်မူထားသမျှသည် ကျွန်ုပ်တို့အတွက် အကာအကွယ်ဖြစ်မည်ကို ဘယ်တော့မျှ မမေ့ကြစို့နှင့်။ ထို့ကြောင့် ‘ဘုရားသခင့်ပညတ်တော်တို့ကိုစောင့်ရှောက်’ ရန်အစဉ်ကြိုးပမ်းကာ ထာဝစဉ်ပင်အသက်ဆက်လက်ရှင်နိုင်ကြပါစေ။—၁ ယောဟန် ၂:၁၇။
[အောက်ခြေမှတ်ချက်များ]
^ အပိုဒ်၊ 11 “သူစိမ်း” ဆိုသည့်စကားလုံးသည် ကိုယ်တော့်ပညတ်တရားကိုကျောခိုင်းခြင်းဖြင့် မိမိတို့ကိုယ်ကို ယေဟောဝါနှင့် စိမ်းစိမ်းကားကားနေသူများနှင့်သက်ဆိုင်သည်။ သို့ဖြစ်သောကြောင့် ပြည့်တန်ဆာမိန်းမကဲ့သို့သော အကျင့်ပျက်အမျိုးသမီးတစ်ယောက်ကို “သူစိမ်းအမျိုးသမီး” တစ်ယောက်အဖြစ် ရည်ညွှန်းထားသည်။
^ အပိုဒ်၊ 24 လိင်ဆိုင်ရာကူးစက်ရောဂါအချို့သည် အသည်းကို ပျက်စီးစေသည်။ ဥပမာ၊ ရောဂါရင့်နေပြီဖြစ်သော ဆစ်ဖလစ်ရောဂါများ၌ ဘက်တီးရီးယားပိုးများသည် အသည်းကို တိုက်ခိုက်ဖျက်ဆီးပစ်သည်။ ဂနိုညောင်းကျရောဂါဖြစ်စေသော ဇီဝသက်ရှိပိုးသည် အသည်းရောင်ရမ်းနာကိုဖြစ်စေနိုင်သည်။
[စာမျက်နှာ ၂၉ ပါ ရုပ်ပုံ]
မိဘတို့၏ စည်းမျဉ်းများကို သင်မည်သို့ သဘောထားသနည်း
[စာမျက်နှာ ၃၁ ပါ ရုပ်ပုံ]
ဘုရားသခင်၏ပညတ်တော်တို့ကို စောင့်ရှောက်ခြင်းသည် အသက်ဖြစ်၏