ပထမလူသားမောင်နှံထံမှ ကျွန်ုပ်တို့သင်ယူနိုင်
ပထမလူသားမောင်နှံထံမှ ကျွန်ုပ်တို့သင်ယူနိုင်
ဘုရားသခင်သည် ကမ္ဘာဂြိုဟ်ကို ဆန်းစစ်ခဲ့သည်။ လူသားတို့မှီတင်းနေထိုင်ရန် ကိုယ်တော်ပြင်ဆင်ခဲ့ခြင်းဖြစ်သည်။ မိမိပြုလုပ်လေသမျှ ကောင်းသည်ကို ကိုယ်တော်မြင်ခဲ့၏။ အမှန်မှာ ဤလုပ်ငန်းပြီးဆုံးသောအခါ “အလွန်ကောင်းသည်” ဟုကိုယ်တော်ကြေညာခဲ့သည်။ (ကမ္ဘာဦး ၁:၁၂၊ ၁၈၊ ၂၁၊ ၂၅၊ ၃၁) သို့သော် ပြီးပြည့်စုံလင်မှုဖြင့်အဆုံးမသတ်မီ ဘုရားသခင်သည် ‘မကောင်း’ သောအရာတစ်ခုအကြောင်းမိန့်ဆိုခဲ့သည်။ ဘုရားသခင်သည် စုံလင်မှုစံမမီသောအရာတစ်စုံတစ်ခုကိုမျှ မပြုလုပ်ခဲ့သည်မှာမှန်ပါသည်။ ကိုယ်တော်၏ဖန်ဆင်းခြင်း မပြည့်စုံသေးခြင်းမျှသာဖြစ်သည်။ “ယောက်ျားသည် တစ်ယောက်တည်းမနေကောင်း” ဟုယေဟောဝါမိန့်ဆို၏။ “သူနှင့်တော်သောအထောက်အမကို သူ့ဖို့ငါလုပ်ဦးမည်။”—ကမ္ဘာဦး ၂:၁၈။
ယေဟောဝါ၏ရည်ရွယ်ချက်မှာ လူ့ဘောင်အဖွဲ့အစည်းသည် မြေကြီးပရဒိသုတွင် ကျန်းမာ၊ ပျော်ရွှင်၊ ကုံလုံကြွယ်ဝမှုဖြင့် ထာဝရအသက်ကိုမွေ့လျော်ဖို့ဖြစ်သည်။ အာဒံသည် လူသားအားလုံး၏ဖခင်ဖြစ်၏။ သူ၏ဇနီးဧဝသည် “အသက်ရှင်သောသူအပေါင်းတို့၏အမိ” ဖြစ်လာခဲ့သည်။ (ကမ္ဘာဦး ၃:၂၀) ယခုအခါ ကမ္ဘာမြေကြီးသည် သူတို့၏သားစဉ်မြေးဆက် သန်းပေါင်းများစွာဖြင့် ပြည့်လျက်ရှိသော်လည်း လူသားတို့သည် စုံလင်ခြင်းနှင့်အလှမ်းဝေးကွာလျက်ရှိ၏။
အာဒံနှင့်ဧဝဇာတ်လမ်းကို လူသိများကြသည်။ သို့သော် ယင်းသည် ကျွန်ုပ်တို့အတွက် လက်တွေ့ကျသော အဘယ်အကျိုးကျေးဇူးရှိသနည်း။ ပထမလူသားမောင်နှံတို့၏အတွေ့အကြုံများမှ ကျွန်ုပ်တို့ဘာသင်ယူနိုင်သနည်း။
‘လူယောက်ျား လူမိန်းမကိုဖန်ဆင်းတော်မူ၏’
အာဒံသည် တိရစ္ဆာန်များကိုအမည်ပေးသောအခါ ၎င်းတို့၌အဖော်အဖက်များရှိပြီး မိမိ၌မရှိကြောင်းသိမြင်ခဲ့သည်။ ထို့ကြောင့် သူ၏နံရိုးမှ ယေဟောဝါပုံသွင်းထားသော လှပသည့်လူသတ္တဝါကို တွေ့မြင်သောအခါ သူဝမ်းမြောက်ခဲ့သည်။ သူသည် မိမိ၏ထူးခြားသောအင်္ဂါအစိတ်အပိုင်းတစ်ခုဖြစ်ကြောင်း အသိအမှတ်ပြုလျက် အာဒံဤသို့ကြေညာခဲ့သည်– “ယခုဤသူသည် ငါ့အရိုးထဲကအရိုး ငါ့အသားထဲကအသားဖြစ်၏။ လူထဲကထုတ်သောကြောင့် သူ့ကို လူမိန်းမဟုခေါ်ဝေါ်အပ်သည်။”—ကမ္ဘာဦး ၂:၁၈-၂၃။
လူ၌ “အထောက်အမ” လိုအပ်ခဲ့သည်။ ယခု သူနှင့်သင့်တော်သူတစ်ဦးကိုရရှိထားပြီ။ ဧဝသည် သူတို့၏ဥယျာဉ်စံအိမ်နှင့်တိရစ္ဆာန်များကို ကြည့်ရှုစောင့်ရှောက်ခြင်း၊ သားသမီးမွေးဖွားခြင်းနှင့် အဆွေခင်ပွန်းစစ်တစ်ဦး၏ ဉာဏ်ဆိုင်ရာလှုံ့ဆော်မှုနှင့် ထောက်မမှုပေးခြင်းတို့တွင် အာဒံနှင့် အပြစ်ဆိုစရာမရှိအောင်လိုက်ဖက်သောဖြည့်ဖက်ဖြစ်၏။—ကမ္ဘာဦး ၁:၂၆-၃၀။
မောင်နှံစုံတို့၏ သင့်လျော်သောလိုအင်ဆန္ဒမှန်သမျှကို ယေဟောဝါထောက်ပံ့ပေးခဲ့သည်။ ဧဝကိုသူ၏လင်ယောက်ျားထံခေါ်ဆောင်လာပေးခြင်းဖြင့် သူတို့၏ပေါင်းဖက်မှုကို တရားဝင်ဖြစ်စေခဲ့သည်၊ သို့ဖြင့် ဘုရားသခင်သည် အိမ်ထောင်ရေးနှင့် မိသားစုကိုဖွဲ့စည်းတည်ထောင်ခဲ့ရာ လူ့ဘောင်သည် စနစ်တကျဖွဲ့စည်းခံခဲ့ရသည်။ ကမ္ဘာဦးမှတ်တမ်းကဤသို့ဆိုသည်– “ယောက်ျားသည် ကိုယ်မိဘကိုစွန့်၍ ကိုယ်ခင်ပွန်း၌မှီဝဲသဖြင့် ထိုသူတို့သည် တစ်သားတစ်ကိုယ်တည်းဖြစ်ရလိမ့်မည်။” ပထမအိမ်ထောင်သည်မောင်နှံစုံကို ယေဟောဝါကောင်းချီးပေး၍ များပြားစွာမွေးဖွားဖို့ မိန့်ဆိုသောအခါ ကလေးတိုင်း သူ့အားကြည့်ရှုပြုစုသည့်မိစုံဖစုံရှိသော ဂရုစိုက်တတ်သည့်မိသားစုထဲမွေးဖွားလာရန် ကိုယ်တော်ရည်ရွယ်ခဲ့သည်မှာထင်ရှား၏။—ကမ္ဘာဦး ၁:၂၈; ၂:၂၄။
‘ဘုရားသခင့်ပုံသဏ္ဌာန်နှင့်အညီ’
အာဒံသည် ဘုရားသခင့်စုံလင်သောသား၊ ကိုယ်တော်၏ “ပုံသဏ္ဌာန်နှင့်တညီတသဏ္ဌာန်တည်း” ဖန်ဆင်းခံရသူဖြစ်၏။ သို့သော် “ဘုရားသခင်သည် နာမ်ဝိညာဉ်ဖြစ်တော်မူ” သောကြောင့် ခန္ဓာပိုင်းဆင်တူခြင်းမဖြစ်နိုင်ပေ။ (ကမ္ဘာဦး ၁:၂၆; ယောဟန် ၄:၂၄) တိရစ္ဆာန်များထက် လူကိုသာလွန်စေသည့် အရည်အသွေးများတွင် တူညီခြင်းဖြစ်သည်။ မှန်သည်၊ မေတ္တာ၊ ဉာဏ်ပညာ၊ တန်ခိုးနှင့် တရားမျှတခြင်းဟူသော အရည်အသွေးများကို အစကတည်းက လူ၌ထည့်သွင်းထားပြီးဖြစ်သည်။ သူသည် လွတ်လပ်စွာလုပ်ပိုင်ခွင့်နှင့် ဝိညာဉ်ရေးရာစွမ်းရည်တို့ဖြင့် ထည့်သွင်းပေးခြင်းခံခဲ့ရသည်။ မွေးရာပါကိုယ်ကျင့်တရားဆိုင်ရာဉာဉ် သို့မဟုတ် ကိုယ်ကိုကိုယ်သိသောစိတ်က အမှားနှင့်အမှန်ကို ခွဲခြားသိမြင်တတ်စေသည်။ လူ၌အသိဉာဏ်ရှိထားရာ လူသားများတည်ရှိရခြင်းအကြောင်းရင်းကို ဆင်ခြင်သုံးသပ်ရန်၊ ဖန်ဆင်းရှင်၏အသိပညာကို ဆည်းပူးရယူရန်နှင့် ထိုအရှင်နှင့်ရင်းနှီးမှုတိုးပွားရန် တတ်နိုင်စေသည်။ ဤသို့ပြင်ဆင်ပေးခြင်းခံထားရသောကြောင့် ဘုရားသခင့်မြေကြီးဆိုင်ရာလက်ရာတော်ကို စီမံခန့်ခွဲသူအဖြစ် မိမိ၏အခန်းကဏ္ဍကို ပြီးမြောက်စေရန် လိုအပ်ရာမှန်သမျှကို အာဒံရရှိခဲ့သည်။
ဧဝအပြစ်ကျူးလွန်ခြင်း
အာဒံသည် ယေဟောဝါပြဋ္ဌာန်းထားသောတားမြစ်ချက်တစ်ခုကို ဧဝအားချက်ချင်းအသိပေးခဲ့မည်မှာ သေချာသည်– သူတို့၏ဥယျာဉ်စံအိမ်အတွင်း—ကောင်းမကောင်းကိုသိကျွမ်းရာအပင်—မှတစ်ပါး ကျန်သစ်ပင်များမှအသီးများကို သူတို့စားသုံးနိုင်သည်။ ထိုအပင်၏အသီးကို သူတို့မစားရပါ။ သူတို့စားမိပါက စားသောနေ့တွင်သူတို့သေမည်။—ကမ္ဘာဦး ၂:၁၆၊ ၁၇။
မကြာမီ တားမြစ်ထားသောအသီးနှင့်ပတ်သက်၍ ပြဿနာတစ်ရပ်ပေါ်ပေါက်လာသည်။ မျက်မြင်မရနာမ်ဝိညာဉ်တစ်ပါးက မိမိကိုယ်စားပြောဆိုပေးသူအဖြစ် မြွေတစ်ကောင်ကိုသုံးကာ ဧဝထံချဉ်းကပ်ခဲ့သည်။ ပကတိအရိုးခံပုံစံဖြင့် မြွေကဤသို့မေးခဲ့သည်– “သင်တို့သည် ဥယျာဉ်၌ရှိသမျှသော အပင်တို့၏အသီးကိုမစားရဟု ဧကန်စင်စစ် ဘုရားသခင်မိန့်တော်မူသလော။” ဧဝက အပင်တစ်ပင်မှလွဲ၍ ကျန်သောအပင်အားလုံးတို့၏ အသီးကိုစားခွင့်ရှိကြောင်း ပြန်ဖြေခဲ့သည်။ ထိုအခါ မြွေသည် ဘုရားသခင်ကိုဆန့်ကျင်ပြောဆိုလျက် မိန်းမအားဤသို့ဆိုသည်– “သင်တို့သည်ဧကန်အမှန်သေရမည်မဟုတ်။ အကြောင်းမူကား ထိုအသီးကိုစားသောနေ့၌ သင်တို့သည်မျက်စိပွင့်လင်းလျက် ကောင်းမကောင်းကိုသိ၍ ဘုရားသခင်ကဲ့သို့ဖြစ်ကြလတ္တံ့သည်ကို ဘုရားသခင်သိတော်မူသည်။” မိန်းမသည် တားမြစ်ထားသောအပင်ကို ရှုထောင့်တစ်မျိုးဖြင့် စတင်ကြည့်မြင်လာသည်။ “ထိုအပင်သည် စားဖွယ်ကောင်းခြင်း၊ အဆင်းလည်းလှ [“ကြည့်မြင်ရန်အဆင်းလှ၊” သမ္မာ] . . . သောအပင်ဖြစ် . . . ၏။” ဧဝသည် ကောင်းကောင်းလှည့်ဖြားခံလိုက်ရပြီး ဘုရားသခင့်ပညတ်ကိုချိုးဖောက်ခဲ့သည်။—ကမ္ဘာဦး ၃:၁-၆; ၁ တိမောသေ ၂:၁၄။
ဧဝ၏အပြစ်သည် မရှောင်မလွှဲနိုင်ရာလော။ လုံးဝမဟုတ်ပါလေ! သူ့နေရာ၌သင်နေကြည့်ပါ။ စာတန်၏အဆိုသည် ဘုရားသခင်နှင့် အာဒံတို့ပြောဆိုရာတို့နှင့် လုံးဝပြောင်းပြန်ဖြစ်နေသည်။ သူစိမ်းတစ်ဦးက သင်ချစ်ခင်ယုံကြည်သူတစ်ဦးကို မရိုးသားဟုစွပ်စွဲလျှင် သင်မည်သို့ခံစားရမည်နည်း။ ဧဝသည် ခံပြင်းဒေါသထွက်ကြောင်းပြပြီး နားထောင်ဖို့ပင်ငြင်းပယ်ကာ ခြားနားစွာတုံ့ပြန်ခဲ့သင့်သည်။ အမှန်မှာ ဘုရားသခင့်ဖြောင့်မတ်ခြင်းနှင့် သူ့ယောက်ျား၏စကားကို စောကြောရအောင် မြွေကား အဘယ်သူမို့လို့နည်း။ ဦးစီးမှုမူကိုလေးစားစိတ်ဖြင့် ဧဝသည် ဆုံးဖြတ်ချက်တစ်စုံတစ်ရာမချမီ အကြံပေးချက်ကိုရယူသင့်သည်။ ကျွန်ုပ်တို့လည်း ဘုရားသခင်ပေးသည့်ညွှန်ကြားချက်များနှင့် ဆန့်ကျင်သောသတင်းအချက်အလက်ကို ရရှိခဲ့ပါက အလားတူပြုလုပ်သင့်သည်။ သို့သော် ဧဝသည် သွေးဆောင်သူ၏ စကားကိုယုံစားကာ အမှားနှင့်အမှန်ကို မိမိကိုယ်တိုင်ဆုံးဖြတ်လိုခဲ့သည်။ ထိုစိတ်ကူးကို သူကြာရှည်စဉ်းစားလေလေ နှစ်သက်စရာကောင်းလေလေဖြစ်သည်။ မှားယွင်းသောအလိုဆန္ဒကို စိတ်ထဲမှထုတ်ပစ်ခြင်း သို့မဟုတ် သူ၏အိမ်ထောင်ဦးစီးနှင့် ကိစ္စရပ်များကိုဆွေးနွေးခြင်း ပြုမည့်အစား ယင်းကိုစိတ်ထဲသိုထားခြင်းဖြင့် ဤမျှကြီးမားသည့်အမှားကို သူမှားခဲ့လေခြင်း!—၁ ကောရိန္သု ၁၁:၃; ယာကုပ် ၁:၁၄၊ ၁၅။
မယား၏စကားကိုအာဒံနားထောင်
မကြာမီ ဧဝသည် မိမိနှင့်အတူအပြစ်ပြုရန် အာဒံကိုတိုက်တွန်းခဲ့သည်။ သူ၏ပျော့ညံ့စွာလိုက်လျောမှုကို ကျွန်ုပ်တို့မည်သို့ရှင်းပြမည်နည်း။ (ကမ္ဘာဦး ၃:၆၊ ၁၇) သစ္စာစောင့်သိမှုများဆိုင်ရာ လွန်ဆွဲပွဲကို အာဒံရင်ဆိုင်ရလေပြီ။ သူချစ်ရသောကြင်ဖော်ဧဝအပါအဝင် အရာခပ်သိမ်းကိုပေးအပ်ထားသော သူ၏ဖန်ဆင်းရှင်ကို နာခံမည်လော။ သူယခုပြုလုပ်မည့်အရာနှင့်ပတ်သက်၍ ဘုရားသခင့်ညွှန်ကြားချက်ကို အာဒံရှာကြံမည်လော။ သို့မဟုတ် သူ၏ရှေ့ခရီးကို ဇနီးလက်ထဲဝကွက်အပ်လိုက်မည်လော။ တားမြစ်ထားသောအသီးကိုစားခြင်းဖြင့် ရရှိဖို့သူ့ဇနီးမျှော်လင့်ထားရာသည် လှည့်စားမှုသာဖြစ်ကြောင်း အာဒံကောင်းကောင်းသိထားသည်။ တမန်တော်ပေါလုသည် ဤသို့ရေးသားဖို့မှုတ်သွင်းခံခဲ့ရသည်– “အာဒံသည် လှည့်ဖြားခြင်းကိုမခံ၊ မိန်းမသည် လှည့်ဖြားခြင်းကိုခံ၍ လွန်ကျူး၏။” (၁ တိမောသေ ၂:၁၄) ထို့ကြောင့် အာဒံသည် ယေဟောဝါကိုတမင်ဖီဆန်ခဲ့သည်။ ထင်ရှားသည်မှာ အခြေအနေကိုပြုပြင်ရန် ဘုရားသခင်၏စွမ်းရည်၌ ယုံကြည်ခြင်းထက် သူ့ဇနီးနှင့်ခွဲရမည်စိုးသည့်စိတ်က ပို၍အားများနေသည်။
အာဒံ၏လုပ်ရပ်သည် ကိုယ်ကိုကိုယ်သတ်သေသကဲ့သို့ဖြစ်သည်။ ယေဟောဝါသည် သူ့အားကြင်နာစွာဖြင့် ဖခင်ဖြစ်ခွင့်ပြုရာ သူ၏မျိုးဆက်အားလုံးကို သတ်ပစ်ရာလည်းရောက်သည်၊ အကြောင်းမှာ သူတို့အားလုံးမှာ သေဒဏ်စီရင်ချက်အောက် မွေးဖွားလာခဲ့ကြရသောကြောင့်ဖြစ်သည်။ (ရောမ ၅:၁၂) တစ်ကိုယ်ကောင်းဆန်မနာခံမှုအတွက် ပေးဆက်ရမှုကား တန်ဖိုးများလိုက်လေခြင်း!
အပြစ်၏အကျိုးဆက်များ
အပြစ်၏လက်ငင်းအကျိုးဆက်မှာ ရှက်ကြောက်ခြင်းဖြစ်သည်။ မောင်နှံစုံသည် ဝမ်းသာအားရအပြေးအလွှား ယေဟောဝါနှင့်စကားပြောမည့်အစား ပုန်းကွယ်နေခဲ့ကြသည်။ (ကမ္ဘာဦး ၃:၈) ဘုရားသခင်နှင့်သူတို့၏မိတ်ဆွေဖြစ်မှု ပျက်ပြားသွားခဲ့သည်။ မိမိတို့နှစ်ဦးစလုံး ဘုရားသခင့်ပညတ်ကိုချိုးဖောက်ခဲ့ကြောင်း သိရှိခဲ့ကြသော်လည်း သူတို့ပြုလုပ်ခဲ့ရာအကြောင်းမေးမြန်းသောအခါ နောင်တရကြောင်းမပြခဲ့ကြချေ။ တားမြစ်ထားသောအသီးကိုစားခြင်းဖြင့် ဘုရားသခင့်ကောင်းမြတ်မှုကို ကျောခိုင်းခဲ့ကြသည်။
အကျိုးဆက်အနေနှင့် သားသမီးမွေးဖွားခြင်းနှင့်အတူ နာကျင်မှုတိုးများလာမည်ဟု ဘုရားသခင်ဖော်ပြခဲ့သည်။ ဧဝသည် သူ၏လင်ယောက်ျားကိုတောင့်တ၍ အာဒံသည် သူ့ကိုပိုင်စိုးပိုင်နင်းပြုလုပ်မည်။ လွတ်လပ်မှုရရှိဖို့ သူ၏ကြိုးပမ်းမှုက ယင်းနှင့်လားလားကြီးဆန့်ကျင်ရာကို ရရှိစေခဲ့သည်။ ယခုအာဒံသည် မြေ၏အသီးကို ပင်ပန်းစွာစားရမည်။ ဧဒင်တွင် မပင်ပန်းဘဲ သူ၏ဆာလောင်မှုကို အာသာပြေစေမည့်အစား သူ့အားဖန်ဆင်းရာ မြေကြီးသို့မပြန်မချင်း အသက်ဆက်ရှင်ရပ်တည်ဖို့ ကြိုးစားရုန်းကန်ရပေတော့မည်။—ကမ္ဘာဦး ၃:၁၆-၁၉။
နောက်ဆုံး အာဒံနှင့်ဧဝတို့သည် ဧဒင်ဥယျာဉ်မှနှင်ထုတ်ခံခဲ့ရသည်။ ယေဟောဝါဤသို့ဆိုခဲ့သည်– “လူသည် ငါတို့တွင်တစ်ပါးပါးကဲ့သို့ဖြစ်၍ ကောင်းမကောင်းကိုသိတတ်၏။ ယခုမှာ သူသည် အစဉ်မပြတ်အသက်ရှင်ခြင်းငှာ လက်ကိုဆန့်လျက် အသက်ပင်၏အသီးကိုယူ၍စားမည်စိုးရိမ်စရာရှိသည် . . . ။” ပညာရှင်ဂေါ်ဒင်ဝဲမ်က “ဝါကျမှာ အဆုံးမသတ်သေး” ကြောင်းဖော်ပြသည်၊ ဘုရားသခင်၏ကျန်ရှိသည့် အကြံတော်ကို ကျွန်ုပ်တို့ဖြည့်စွက်ရပေမည်—“သူ့ကိုဥယျာဉ်မှနှင်ထုတ်မည်” ဟူ၍ယူမှတ်နိုင်ဖွယ်ရှိလေသည်။ အများအားဖြင့် ကျမ်းရေးသူတစ်ဦးသည် ဘုရားသခင့်အကြံတော်တစ်ခုလုံးကို မှတ်တမ်းတင်သည်။ သို့သော် ဤနေရာတွင် “နိဂုံးပိုင်းကိုချန်လှပ်ထားခြင်းက ဘုရားသခင့်အရေးယူမှု မြန်ဆန်ကြောင်းကိုဖော်ပြသည်။ ကိုယ်တော်မိန့်ဆို၍မဆုံးမီ ဥယျာဉ်မှနှင်ထုတ်ခံလိုက်ရပြီ” ဟုဝဲမ်ကဆက်ပြောသည်။ (ကမ္ဘာဦး ၃:၂၂၊ ၂၃၊ သမ္မာ) ထိုအခါ ယေဟောဝါနှင့် ပထမလူသားမောင်နှံတို့အကြားရှိ ဆက်သွယ်ရေးမှန်သမျှ ရပ်စဲသွားပုံပင်။
အာဒံနှင့်ဧဝတို့သည် ၂၄ နာရီနေ့ရက်တစ်ရက်အတွင်း ကိုယ်ခန္ဓာပိုင်းအရ မသေဆုံးခဲ့ကြပါ။ သို့သော် ဝိညာဉ်ရေးသဘောအရ သူတို့သေခဲ့ကြသည်။ အသက်၏ပင်ရင်းနှင့် အလွန့်အလွန်ကင်းကွာသွားရာ သူတို့သည် သေခြင်းသို့ဆုတ်ယုတ်လာသည်။ သူတို့၏သားဦးကာဣနက ဒုတိယသားအာဗေလကိုသတ်ပစ်သောအခါ သေခြင်းနှင့်ဦးဆုံးရင်ဆိုင်ရာ၌ သူတို့မည်မျှယူကျုံးမရဖြစ်ခဲ့မည်ကို စဉ်းစားကြည့်ပါ။—ကမ္ဘာဦး ၄:၁-၁၆။
ထို့နောက်ပိုင်း ပထမလူသားမောင်နှံအကြောင်း သိပ်မသိရတော့ပါ။ အာဒံအသက် ၁၃၀ တွင် သူတို့၏တတိယသား ရှေသဖွားမြင်ခဲ့သည်။ “သားသမီးများ” ကိုမြင်ပြီးနောက် နောင်အနှစ် ၈၀၀ အကြာ အသက် ၉၃၀ တွင် အာဒံသေဆုံးခဲ့သည်။—ကမ္ဘာဦး ၄:၂၅; ၅:၃-၅။
ကျွန်ုပ်တို့အတွက်သင်ခန်းစာ
ပထမမောင်နှံစုံ၏မှတ်တမ်းက ယနေ့လူ့အဖွဲ့အစည်း၏အခြေအနေ ဆုတ်ယုတ်လာရသည့်အကြောင်းရင်းကို ဖော်ပြသည့်အပြင် အခြေခံကျသောသင်ခန်းစာတစ်ခုကိုပေးသည်။ ဘုရားသခင်ထံမှ အမှီအခိုကင်းရေးအတွက် အရေးဆိုခြင်းမှန်သမျှသည် လုံးလုံးမိုက်မဲ၏။ အမှန်တကယ်ပညာရှိသူတို့သည် မိမိပညာ၌သာကျေနပ်နေခြင်းမဟုတ်ဘဲ ယေဟောဝါနှင့် ကိုယ်တော်၏နှုတ်မြွက်စကားတော်၌ ယုံကြည်ခြင်းကိုတင်ပြကြသည်။ ယေဟောဝါသည် အကောင်းနှင့်အဆိုးကို ပိုင်းဖြတ်တော်မူပြီး၊ မှန်ရာကိုပြုလုပ်ခြင်း၏အကြောင်းရင်းမှာ ကိုယ်တော်အားနာခံခြင်းပေတည်း။ အမှားပြုခြင်းဟူသည် ကိုယ်တော်၏ပညတ်တော်များကို ဖောက်ဖျက်ခြင်းနှင့် ကိုယ်တော့်မူများကို လျစ်လျူရှုခြင်းမည်၏။
ဘုရားသခင်သည်—ထာဝရအသက်၊ လွတ်လပ်မှု၊ ကျေနပ်မှု၊ ပျော်ရွှင်မှု၊ ကျန်းမာမှု၊ ငြိမ်သက်အေးချမ်းမှု၊ ကြွယ်ဝမှုနှင့် အသစ်သောအရာများကိုရှာဖွေတွေ့ရှိမှုစသည့် လူသားများ၌ဖြစ်ပေါ်နိုင်သည့် ဆန္ဒအားလုံးကို ကမ်းပေးခဲ့ပြီး ကမ်းပေးဆဲဖြစ်သည်။ သို့သော် ဤအရာအားလုံးကိုမွေ့လျော်ရန် ကျွန်ုပ်တို့၏ကောင်းကင်ခမည်းတော် ယေဟောဝါအပေါ် လုံးလုံးမှီခိုရခြင်းကို အသိအမှတ်ပြုဖို့လိုသည်။—ဒေ. ၃:၁၀-၁၃; ဟေရှာယ ၅၅:၆-၁၃။
[စာမျက်နှာ ၂၆ ပါ လေးထောင့်ကွက်/ ရုပ်ပုံ]
အာဒံနှင့်ဧဝ—ဒဏ္ဍာရီမျှသာလော
အပြစ်တရားကြောင့် မူလပရဒိသုပျောက်ဆုံးခြင်းဟူသော ယုံကြည်ချက်သည် ရှေးခေတ်ဗာဗုလုန်၊ အာရှုရိ၊ အီဂျစ်နှင့်အခြားလူမျိုးတို့အကြား ပျံ့နှံ့သွားခဲ့သည်။ မှတ်တမ်းအများစုမှာ ၎င်းအပင်၏အသီးကိုစားသုံးသူတို့ကို ထာဝရအသက်ပေးမည့် အသက်ပင်တစ်ပင်အကြောင်းဖြစ်သည်။ ထို့ကြောင့် ဧဒင်၌ဝမ်းနည်းဖွယ်ရာဖြစ်ပျက်ခဲ့ကြောင်း လူသားတို့သတိရကြသည်။
ယနေ့ လူအများက အာဒံ၊ ဧဝတို့နှင့်ပတ်သက်သော ကျမ်းစာမှတ်တမ်းကို ဒဏ္ဍာရီသက်သက်အဖြစ် ပစ်ပယ်ကြသည်။ သို့တိုင် သိပ္ပံပညာရှင်အများစုက လူ့မျိုးနွယ်သည် ဇာစ်မြစ်တစ်ခုတည်းမှဆင်းသက်လာသော တစ်ခုတည်းသောမိသားစုဖြစ်ကြောင်း ဝန်ခံကြသည်။ ဘိုးဘေးတစ်ဦးတည်းကကျူးလွန်ခဲ့သော မူလအပြစ်၏အကျိုးဆက်များသည် လူသားများထံလက်ဆင့်ကမ်းခံခဲ့ရကြောင်းကို ဘာသာရေးပညာရှင်များ မငြင်းဆိုနိုင်ကြပေ။ လူသည် ဇာစ်မြစ်တစ်ခုမကမှ ဖြစ်ပွားလာသည်ဟူသောအယူသည် မူလအပြစ်တစ်ခုကို ဘိုးဘေးများစွာကကျူးလွန်ခဲ့ကြသည်ဟု ဆိုရာကျပေမည်။ တစ်ဖန် ယင်းက ‘နောက်ဆုံးအာဒံ’ ဖြစ်သော ခရစ်တော်သည် လူသားတို့ကိုရွေးနုတ်ခဲ့ကြောင်း မဖြစ်မနေငြင်းပယ်စေပေမည်။ သို့သော် ယေရှုနှင့် ကိုယ်တော်၏တပည့်တော်များသည် ထိုသို့ဝေခွဲမရမဖြစ်ခဲ့ကြပါ။ ကမ္ဘာဦးမှတ်တမ်းသည် ဖြစ်ရပ်မှန်ဖြစ်ကြောင်း သူတို့အသိအမှတ်ပြုခဲ့ကြသည်။—၁ ကောရိန္သု ၁၅:၂၂၊ ၄၅; ကမ္ဘာဦး ၁:၂၇; ၂:၂၄; မဿဲ ၁၉:၄၊ ၅; ရောမ ၅:၁၂-၁၉။