ယင်းကို သင်​ယုံရမည်လော

၁၂ နှစ်အရွယ်​ကျောင်းသား​သည် အက္ခရာ​သင်္ချာ​အခြေခံ​သဘောတရား​ကို နားလည်​သဘောပေါက်​ရန် ကြိုးစား​အားထုတ်​လျက်​ရှိသည်။ သူ၏​ဆရာ​သည် ရိုးရှင်း​ပုံ​ရသော အက္ခရာ​သင်္ချာ​တွက်နည်း​တစ်နည်း​ကို အတန်း​ထဲ​တွင်​တွက်​ပြ​ခဲ့​၏။

“x=y ဖြစ်​ပြီး သူတို့​နှစ်ခုစလုံး​ရဲ့​တန်ဖိုး​ဟာ ၁ ဖြစ်တယ်” ဟု​ဆရာ​က စ​တွက်​ခဲ့​သည်။

‘သိပ်​တော့ မဆိုးပါဘူး’ ဟု​ထို​ကျောင်းသား ယူမှတ်​သည်။

သို့သော် ယုတ္တိတန်​သော​တွက်ချက်​နည်း လေး​ကြောင်း​ပြီး​နောက်​တွင် ဆရာ​က အံ့သြဖွယ်​ကောင်းသော​အဖြေ​တစ်ခု​ကို ဤသို့​ပေး​ခဲ့​သည်– “ထို့​ကြောင့် ၂=၁!”

“အဲဒါကို မှား​ကြောင်း​သက်သေပြပါ” ဟု​ဆရာ​က သူ၏​တွေဝေ​ရှုပ်ထွေး​နေကြ​သော ကျောင်းသား​များ​ကို စိန်ခေါ်​လိုက်​သည်။

ထို​ကျောင်းသား​ငယ်​သည် အက္ခရာ​သင်္ချာ​အသိပညာ​နည်းပါး​ရာ ၎င်းကို​မှား​ကြောင်း မည်သို့​သက်သေပြ​ရမည်ကို မသိ​ရှိ​နိုင်​ခဲ့​ချေ။ တွက်ချက်မှု​အဆင့်​တိုင်း​သည် လုံးဝ​ယုတ္တိ​ရှိ​ပုံ​ပေါက်​ခဲ့​၏။ သို့​နှင့် သူသည် ဤ​ဆန်းပြား​သော​အဖြေကို ယုံ​သင့်​သလော။ အမှန်​ဆို​ရ​လျှင် သူ၏​ဆရာ​သည် သင်္ချာ​ပညာ​တွင် သူ့​ထက်​ပို​၍​ကျွမ်းကျင်​တတ်မြောက်​သူ​ဖြစ်သည်။ သူ​မယုံ​သင့်​သည်​မှာ​အမှန်ပင်! ‘အဲဒါကို​မှား​ကြောင်း ကျွန်တော်​သက်သေ​မပြ​တတ်​ဘူး’ ဟု​သူ့ဘာသာ​သူ​ထင်မှတ်​ခဲ့​သည်။ ‘ဒါဟာ မဖြစ်​နိုင်ဘူး​ဆိုတာ သာမန်​အသိဉာဏ်​က ကျွန်တော့်​ကို​ပြော​နေတယ်။’ (သု. ၁၄:၁၅၊ ၁၈) ဆရာ​သော်လည်း​ကောင်း၊ အတန်းဖော်​တစ်ဦး​တစ်ယောက်​က​သော်လည်း​ကောင်း တစ်​ဒေါ်လာ​ကို နှစ်​ဒေါ်လာ​ပေး​၍​လဲ​မည်​မဟုတ်​ကြောင်းကို သူသိ​ရှိခဲ့​သည်!

အချိန်တန်သော် ထို​အက္ခရာ​သင်္ချာ​ကျောင်းသား​သည် တွက်ချက်မှု​တွင် အမှား​ကို ရှာတွေ့ခဲ့​သည်။ ထို​အတောအတွင်း အတွေ့အကြုံ​က သူ့​အား အဖိုး​မ​ဖြတ်​နိုင်သော သင်ခန်းစာ​တစ်ခု​ကို​သင်ပေးခဲ့​၏။ အင်မတန်​အသိပညာ​ကြွယ်ဝသူ​တစ်ဦးဦး​က သေချာ​အကွက်​ချ​ပြီး မငြင်း​နိုင်​ဖွယ်​ရှိသော ကျိုးကြောင်း​ဆင်ခြင်​စ​ရာ​တစ်ခု​ကို တင်ပြ​လာသော​အခါ​၌​ပင် နားထောင်သူ​သည် ၎င်း​အချိန်တွင် ယင်းကို​မှား​ကြောင်း သက်သေ​မပြ​နိုင်သော​ကြောင့် မိုက်မဲ​သော​ကောက်ချက်​တစ်ခု​ကို ယုံကြည်​လက်ခံဖို့ မလို​အပ်​ပေ။ ထို​ကျောင်းသား​သည် ၁ ယောဟန် ၄:၁ တွင်​တွေ့ရ​သော ကြား​သမျှ​သည် အခွင့်အာဏာ​ရှိသော​ရင်းမြစ်​မှ လာပုံ​ရသောအခါ​၌​ပင် အဆောတလျင်​အလွန်​မယုံကြ​နှင့်​ဟူသော လက်တွေ့ကျ​ကျမ်းစာမူ​ကို အမှန်ပင်​လိုက်နာ​ခဲ့​ခြင်း​ဖြစ်သည်။

၎င်း​က ကြိုတင်​စဉ်းစား​ထားသော​အယူအဆ​များ​ကို တရားသေ​ဆုပ်ကိုင်​ထား​သင့်​သည်​ဟု မဆိုလို​ပါ။ လွဲမှား​သော​အမြင်​သဘောထားများကို ပြုပြင်​ပြောင်းလဲ​နိုင်​သည့်​သတင်းစကားကို လျစ်လျူရှု​ခြင်း​သည် အမှား​တစ်ခု​ဖြစ်၏။ သို့သော် အသိပညာ​ကြွယ်ဝသူ သို့​မဟုတ် အခွင့်အာဏာ​ရှိသူ​ဟု ဆို​သော​သူ​တစ်ဦးဦး​ထံ​မှ ဖိအား​ပေး​မှု​ကို​ရင်ဆိုင်​ရချိန်တွင် သင်တို့သည် ‘ရုတ်တရက်​စိတ်​လှုပ်ရှားခြင်း’ မဖြစ်​သင့်​ချေ။ (၂ သက်သာလောနိတ် ၂:၂၊ သ​မ) အမှန်​မှာ၊ ထို​ဆရာ​သည် သူ၏​ကျောင်းသား​များ​ကို နောက်​ပြောင်​ကျီစယ်​နေခြင်း​သာ​ဖြစ်သည်။ သို့ရာတွင် တစ်ခါတစ်ရံ မရိုးသား​သော​အရာများ​ရှိသည်။ လူတို့သည် လွန်​စွာ “အပြစ်​သို့​သွေးဆောင်ခြင်း​ငှာ​လှည့်ဖြား” နိုင်​ကြသည်။—ဧဖက် ၄:၁၄; ၂ တိမောသေ ၂:၁၄၊ ၂၃၊ ၂၄။

ကျွမ်းကျင်​သူများ​သည် အမြဲ​မှန်ကန်​သလော

ကျွမ်းကျင်​သူများ​သည် အသိပညာ​ကြွယ်ဝသူ​များ ဖြစ်​ကောင်း​ဖြစ်​နိုင်​သော်လည်း နယ်ပယ်​တစ်ခုခု​တွင် အယူအဆ​များ ဆန့်ကျင်​ကြ​ပြီး ထင်မြင်ချက်​များလည်း အမျိုးမျိုး​ပြောင်း​နေတတ်​ကြသည်။ ဥပမာ၊ ဆေး​သိပ္ပံ​နယ်ပယ်​တွင် ရောဂါ​ဝင်​သည့်​အကြောင်းရင်း​များ​ကဲ့သို့​သော အခြေခံ​အကြောင်းအရာ​တစ်ခု​နှင့်​ပတ်သက်ပြီး မပြီး​ဆုံး​နိုင်သော​အငြင်းပွားမှု​ကို သုံးသပ်ကြည့်​ပါ။ “ဖျားနာ​ရခြင်း​မှာ သဘာဝဗီဇ​က သာ၍​အရေးပါ​သလော၊ ပြုစု​ပျိုးထောင်​မှု​က သာ၍​အရေးပါ​သလော​ဟူ​သည့်​အချက်​သည် သိပ္ပံ​ပညာရှင်​များ​ကြား​တွင် အကြီးအကျယ်​အငြင်းပွား​စ​ရာ​အကြောင်း​ဖြစ်နေ​သည်” ဟု​ဟား​ဗက်​တက္ကသိုလ်​မှ ဆေး​ဘက်​ဆိုင်ရာ ပါမောက္ခ​တစ်ဦး​က​ရေး​သည်။ ကျွန်ုပ်​တို့၏​မျိုးရိုး​ဗီဇ​သည် ကျွန်ုပ်​တို့​ရောဂါ​အမျိုးမျိုး​ရလွယ်​ခြင်း​တွင် အဓိကကျ​သော​အပိုင်း​မှ​ပါဝင်​သည်​ဟု သဘာဝ​သြဇာ​ပဓာန​ဝါဒီ​ဟု အခေါ်ခံသူ​များ​က အခိုင်အမာ​ယုံကြည်​ကြသည်။ သို့သော် တစ်ဖက်​အုပ်စု​က​မူ ပတ်ဝန်းကျင်​နှင့်​ဘဝ​ပုံစံ​တို့သည် လူ့​ရောဂါဗေဒ​တွင် ရောဂါ​ဖြစ်စေ​သော အဓိက​အကြောင်းတရား​များ​ဖြစ်သည်ဟု အပြိုင်​ငြင်းခုံ​ခဲ့​ကြသည်။ ယင်း​တို့​နှစ်ဖက်စလုံး​က သူတို့၏​အကြောင်းပြချက်ကို ထောက်ခံ​ရန် လေ့လာမှု​များနှင့်​စာရင်း​ဇယား​များ​ကို ချက်ချင်း​ကိုးကား​ပြ​ကြသည်။ မည်သို့​ပင်​ဖြစ်ပါစေ၊ ၎င်း​အငြင်းပွားမှု​သည် ဆက်​ဖြစ်​နေဆဲ​ပင်။

အကျော်ကြားဆုံး​တွေးခေါ်ရှင်​များသည် သူတို့​ပို့ချ​ပေး​သော​အရာများ​မှာ ပို့ချ​ချိန်​၌ ငြင်း​စ​ရာ​တစ်​ကွက်​မျှ​မရှိခဲ့​လျှင်​ပင် နောက်ပိုင်း​တွင် မှား​ကြောင်း​အကြိမ်ကြိမ်​တွေ့ခဲ့​ရပြီ။ အတွေးအခေါ်​ပညာရှင်​ဘာ​ထ​ရင် ရပ်စယ်လ်​သည် အရစ္စတိုတယ်​ကို “အတွေးအခေါ်​ပညာရှင်​အားလုံး​တွင် ဩဇာ​အ​လွှမ်းမိုး​ဆုံး” ဟု​ဖော်ပြ​ခဲ့​၏။ သို့ တိုင် ရပ်စယ်လ်​က အရစ္စတိုတယ်​၏​အယူဝါဒ​များစွာကို “တက်တက်​စင်​အောင်​မှား​နေသည်” ဟု​လည်း ထောက်ပြ​ခဲ့​သည်။ “မျက်မှောက်ခေတ်​ကာလ​တစ်လျှောက် သိပ္ပံ​ပညာရပ်၊ ယုတ္တိ​ဗေဒ သို့​မဟုတ် ဒဿနိက​ဗေဒ​တို့​မှ လက်တွေ့ကျကျ​တိုးတက်မှု​အားလုံး​သည် အရစ္စတိုတယ်​၏​တပည့်​များနှင့် တစ်ဖက်​တစ်လမ်းစီ​ဖြစ်​ခဲ့​ရသည်” ဟု​သူက ရေးခဲ့​သည်။—အနောက်ပိုင်း​ဒဿနိက​ဗေဒ​သမိုင်း။

“မှားယွင်းစွာ​ခေါ်ဆို​သည့် ‘အသိပညာ’”

အစောပိုင်း​ခရစ်ယာန်​များသည် ဆို​က​ရေး​တီး၊ ပ​လေ​တို​နှင့် အရစ္စတိုတယ်​ကဲ့သို့​သော ဂရိ​အတွေးအခေါ်​ပညာ​ကျော်​တို့၏ တပည့်​များစွာ​နှင့် တွေ့ဆုံ​ခဲ့​နိုင်​ဖွယ်​ရှိသည်။ ထို​ခေတ်​အခါ​က ပညာတတ်​များသည် သူတို့​ကိုယ်ကို​သူတို့ ခရစ်ယာန်​အများစု​နှင့်​ယှဉ်​လျှင် ဉာဏ်ပညာ​အရာ​တွင် သာလွန်​သူများ​ဟု ယူမှတ်​ထား​ကြသည်။ ယေရှု၏​တပည့်​အများစု​သည် “လော[က]ပညာရှိ” မဟုတ်​ကြ​ဟု ယူမှတ်​ခံရ​သည်။ (၁ ကောရိန္သု ၁:၂၆) အမှန်ဆိုလျှင် ထို​ခေတ်​အခါ​က အတွေးအခေါ်​ကျောင်း တက်​ခဲ့​ကြ​သူများ​သည် ခရစ်ယာန်​များ​၏ ယုံကြည်ရာ​များ​ကို “ရူးသွပ်​ရာ” သို့​မဟုတ် “လုံးဝ​အဓိပ္ပာယ်​မရှိ​ရာ” ဟု​ယူဆ​ခဲ့​ကြသည်။—၁ ကောရိန္သု ၁:၂၃; ဖိလစ်။

သင်​သာ အစောပိုင်း​ခရစ်ယာန်​များ​ထဲ​တွင်​ရှိခဲ့​ပါ​မူ ထို​ခေတ်​မှ ဉာဏ်စွမ်း​ထက်မြက်​သော​ပညာတတ်​၏ ဖြားယောင်း​သော​စကား​များ​ကြောင့် စိတ်ထဲ​စွဲမှတ်​သွား​မည်​လော သို့​မဟုတ် သူတို့၏​ဉာဏ်စွမ်း​ကို​ပြ​သောအခါ လန့်ဖျပ်​အထင်ကြီး​သွား​မည်​လော။ (ကောလောသဲ ၂:၄) တမန်​တော်​ပေါလု​၏​အဆို​အရ ဤသို့​ဖြစ်​ရန် အကြောင်း​ရှိ​မည်​မဟုတ်​ချေ။ ယေဟောဝါ​သည် “ပညာရှိ​တို့၏​ပညာ” နှင့် “ဉာဏ်​ကောင်းသော​သူတို့၏​ဉာဏ်” တို့ကို မိုက်မဲ​ရာ​အဖြစ်​ယူမှတ်​ကြောင်း ခရစ်ယာန်​များ​အား သူ​သတိပေး​ခဲ့​သည်။ (၁ ကောရိန္သု ၁:၁၉) သူက “အတွေးအခေါ်​ပညာရှင်၊ စာရေး​ဆရာ​နှင့် ဤ​လောကကို​အပြစ်ရှာ​ဝေဖန်သူ​တို့သည် သူတို့၏​ဉာဏ်ပညာ​အားလုံး​အတွက် ဘာကို​ပြသ​ခဲ့​သနည်း” ဟူ၍ မေးခဲ့​၏။ (၁ ကောရိန္သု ၁:၂၀၊ ဖိလစ်) ပေါလု​ခေတ်​မှ အတွေးအခေါ်​ပညာရှင်​များ၊ စာရေး​ဆရာများ​နှင့် အပြစ်ရှာ​သူများ​အားလုံး​၏ ဉာဏ်ပညာ​မှာ ပြောင်မြောက်​စေ​ကာ​မူ သူတို့သည် လူ့​ပြဿနာ​များနှင့်​ပတ်သက်​၍ မှန်ကန်သော​ဖြေရှင်း​နည်းကို မ​ထုတ်ပေး​နိုင်​ခဲ့ ကြ​ချေ။

ထို့​ကြောင့် ခရစ်ယာန်​များသည် တမန်​တော်​ပေါလု​ပြော​ခဲ့​သော “လူ​အချို့​တို့​မှားယွင်းစွာ​ခေါ်ဆို​သည့် ‘အသိပညာ’ အကြောင်း​နှင့်​ပတ်သက်​၍ အငြင်းပွားမှု” ကို​ရှောင်ရှား​ဖို့ သိရှိ​ခဲ့​ကြ​၏။ (၁ တိမောသေ ၆:၂၀၊ သတင်းကောင်း) ပေါလု​သည် ဤသို့​သော​အသိပညာကို ‘မှားယွင်း’ မှု​ဟု​သမုတ်​ခဲ့​ရခြင်း​အကြောင်း​မှာ ယင်း​တွင် အရေးကြီး​သည့်​အချက်​တစ်ချက်—သူတို့၏​သီအိုရီ​များ​ကို စိစစ်​ကြည့်​နိုင်​သည့် ဘုရားသခင်​မှ​ရင်းမြစ် သို့​မဟုတ် ကိုးကားချက်—မရှိသော​ကြောင့်​ဖြစ်သည်။ (ယောဘ ၂၈:၁၂; သု. ၁:၇) ထို​အရေးကြီး​သည့်​အချက်​ကင်းမဲ့​ပြီး တစ်ချိန်တည်း​တွင် လှည့်ဖြားသူ​ချုပ်​စာတန်​က မျက်စိကွယ်​ထားသော​ကြောင့် အဆိုပါ​အသိပညာကို စွဲမြဲ​စွာ​ဆုပ်ကိုင်​ထား​သူများ​သည် အမှန်တရား​တွေ့ရှိ​ရန် မည်သည့်​အခါ​မျှ​မျှော်လင့်​နိုင်​မည်​မဟုတ်ပါ။—၁ ကောရိန္သု ၂:၆-၈၊ ၁၄; ၃:၁၈-၂၀; ၂ ကောရိန္သု ၄:၄; ၁၁:၁၄; ဗျာဒိတ် ၁၂:၉။

သမ္မာကျမ်းစာ—မှုတ်သွင်းခံ​လမ်းညွှန်​တစ်ခု

ဘုရားသခင်​သည် သမ္မာကျမ်းစာ​တွင် မိမိ၏​အလိုတော်၊ ရည်ရွယ်ချက်​နှင့် မူများ​ဖော်ပြ​ထား​သည်ကို အစောပိုင်း​ခရစ်ယာန်​များ​က မည်သည့်​အခါ​မျှ​သံသယ​မဝင်​ခဲ့​ကြ​ချေ။ (၂ တိမောသေ ၃:၁၆၊ ၁၇) ၎င်း​သည် သူတို့ကို ‘လူ​အဆက်ဆက်​ခံ​သော​နည်း​ဥပဒေသကို​လိုက်၍ လောက​ပညာ​နှင့်​အချည်းနှီး​သော​ပရိယာယ်​အားဖြင့် လု​ယု​ဖျက်ဆီး​ခံရ​ခြင်း’ အဖြစ်​မှ ကာကွယ်​ပေး​ခဲ့​သည်။ (ကောလောသဲ ၂:၈) မျက်မှောက်ခေတ်တွင် အလားတူ​အခြေအနေ​မျိုး​ရှိ​နေပါ​သည်။ ဘုရားသခင်​၏​မှုတ်သွင်းခံ​နှုတ်မြွက်​စကားတော်​သည် လူတို့၏​ရှုပ်ထွေး​ပြီး ဖီ​လာ​ဆန့်ကျင်​သော ထင်မြင်​ယူဆ​ချက်​များနှင့်​မတူဘဲ ကျွန်ုပ်​တို့၏​ယုံကြည်ချက်များ​ကို အခြေပြု​နိုင်​သည့် ခိုင်မာ​သော​အုတ်မြစ်ကို​ပေး​သည်။ (ယောဟန် ၁၇:၁၇; ၁ သက်သာလောနိတ် ၂:၁၃; ၂ ပေတရု ၁:၂၁) ယင်း​မပါ​လျှင် ပြောင်းလဲ​တတ်သော​သဲသောင်​ဖြစ်သည့် လူ့​သီအိုရီ​များနှင့်​အတွေးအခေါ်​များ​ပေါ်​တွင် ခိုင်မြဲ​သော​အရာ​တစ်ခုခု​ကို ဆောက်လုပ်​ရန် ကြိုးစား​ရသည့်​မဖြစ်​နိုင်​ဖွယ်​အခြေအနေ​တွင် ရှိနေ​ပေမည်။—မဿဲ ၇:၂၄-၂၇။

‘ဒါပေမဲ့ နေပါ​ဦး၊’ ဟု​တစ်ယောက်ယောက်​က​ဆို​မည်။ ‘သိပ္ပံ​အချက်အလက်​တွေ​က သမ္မာကျမ်းစာ​ဟာ​မှားတယ်လို့ ဖော်ပြ​နေတာ​ကြောင့် အမြဲတမ်း​ပြောင်းလဲ​နေတတ်​တဲ့ လူသားတွေရဲ့​အတွေးအခေါ်​တွေ​ထက် ပို​ပြီး​ယုံကြည်​စိတ်ချ​လို့​မရဘူး​ဆိုတာ မမှန်ကန်​ဘူးလား။’ ဥပမာ၊ “ကော့​ပါး​နိ​ကတ်​စ်၊ ခက်​ပ​လာ​နှင့် ကယ်လီ​လီ​ယို​တို့​က ကမ္ဘာ​မြေကြီး​သည် စကြဝဠာ​၏​အလယ်ဗဟို​မဟုတ်​ဟူ​သည့်​ယူဆချက်​ကို အတည်ပြု​ရာ​၌ အရစ္စတိုတယ်​ကို​သာမက သမ္မာကျမ်းစာ​ကို​ပါ ဆန့်ကျင်​ခဲ့​ရသည်” ဟု​ဘာ​ထ​ရင် ရပ်စယ်လ်​က​ဆို​ခဲ့​၏။ (ကျွန်ုပ်​တို့​စာလုံးစောင်း​ထား။) ဥပမာ၊ အချက်အလက်​အားလုံး​က ကမ္ဘာ​မြေကြီး​သည် နှစ်ပေါင်း​ဘီလီယံ​နှင့်​ချီ​၍ တည်ရှိ​လာ​ခဲ့​သည်​ဟု​ဖော်ပြ​သောအခါ ကမ္ဘာ​မြေကြီးကို ၂၄ နာရီ​စီ​ကြာရှည်​သည့် ခြောက်​ရက်​အတွင်း ဖန်ဆင်း​ခဲ့​သည်​ဟူ၍ သမ္မာကျမ်းစာ​က​သွန်သင်​သည်​ဟု မျက်မှောက်ခေတ်​ဖန်ဆင်း​ခြင်း​ဝါဒီ​များ​က အခိုင်အမာ​ပြောဆို​ခဲ့​ကြသည်​မဟုတ်ပါ​လော။

အမှန်​အားဖြင့် သမ္မာကျမ်းစာ​က ကမ္ဘာ​မြေကြီး​သည် စကြဝဠာ​အလယ်ဗဟို​တွင်​တည်ရှိ​သည်​ဟု မဆို​ထား​ချေ။ ၎င်း​သည် ဘုရားသခင့်​နှုတ်မြွက်​စကားတော်​အတိုင်း မလိုက်လျှောက်​ကြသော ချာ့ခ်ျ​ခေါင်းဆောင်​များ​၏​သွန်သင်ချက်​သာ​ဖြစ်သည်။ ဖန်ဆင်း​ခြင်း​ဆိုင်ရာ ကမ္ဘာဦး​မှတ်တမ်းက ကမ္ဘာ​မြေကြီး​သည် နှစ်ပေါင်း​ဘီလီယံ​နှင့်​ချီ​၍ သက်တမ်းကြာ​ကြောင်း ထည့်သွင်း​ဖော်ပြ​ထား​သည့်​အပြင် ဖန်ဆင်း​ရာ​နေ့​တစ်နေ့​တိုင်း​သည် ၂၄ နာရီ​ဟု မ​ကန့်သတ်​ထား​ချေ။  (ကမ္ဘာဦး ၁:၁၊ ၅၊ ၈၊ ၁၃၊ ၁၉၊ ၂၃၊ ၃၁; ၂:၃၊ ၄) သမ္မာကျမ်းစာ​ကို ရိုးသား​မှန်ကန်​စွာ​ဆန်းစစ်​ကြည့်​လျှင် ယင်း​စာအုပ်​သည် သိပ္ပံ​ပြဋ္ဌာန်း​စာအုပ်​မဟုတ်သော်လည်း “လုံးဝ​အဓိပ္ပာယ်​မရှိ​ရာ” မဟုတ်​သည်​မှာ သေချာ​ပါ​သည်။ မှန်ပါသည်၊ ယင်းသည် အထောက်အထား​ခိုင်လုံ​သော​သိပ္ပံ​ပညာ​နှင့် လုံးလုံး​ကိုက်ညီ​ပါ​သည်။ *

‘ဆင်ခြင်​နိုင်စွမ်း’

ယေရှု၏​တပည့်​များစွာတို့သည် သာမန်​အဆင့်​ရှိ ကျောင်း​ပညာ​နည်းပါး​နိုင်​ဖွယ်​ရှိသော အမျိုးသား၊ အမျိုးသမီးများ​ဖြစ်​ကြသော်လည်း သူတို့​အသုံးချ​နိုင်​သည့် ဘုရားသခင်​ပေး​အရည်အချင်း နောက်တစ်ခု​ရှိခဲ့​သည်။ သူတို့​အားလုံး​၏​နောက်ခံ​သည် မည်သို့​ပင်​ဖြစ်ပါစေ ဆင်ခြင်​နိုင်စွမ်း​နှင့် စဉ်းစား​တွေးခေါ်​နိုင်စွမ်း​တို့ကို ပေး​ထား​သည်။ ‘ကောင်းမြတ်သော​အရာ၊ နှစ်သက်ဖွယ်သော​အရာ၊ စုံလင်သော​အရာ​တည်း​ဟူသော ဘုရားသခင်​အလိုတော်​ရှိသော​အရာ​သည် အဘယ်အရာ​ဖြစ်သည်​ကို​သိရှိ’ ဖို့​အတွက် မိမိတို့၏ ‘ဆင်ခြင်​နိုင်စွမ်း’ ကို​အပြည့်အဝ​အသုံးချ​ရန် မိမိ၏​ခရစ်ယာန်​ချင်း​များ​အား တမန်​တော်​ပေါလု​အားပေးခဲ့​၏။—ရောမ ၁၂:၁၊ ၂။

အစောပိုင်း​ခရစ်ယာန်​များသည် မိမိတို့၏​ဘုရားသခင်​ပေး ‘ဆင်ခြင်​နိုင်စွမ်း’ ဖြင့် ဘုရားသခင့်​နှုတ်မြွက်​စကားတော်​တွင် ဖော်ပြ​ထား​ရာ​များနှင့်​ညီညွတ်မှု​မရှိသော မည်သည့်​အတွေးအခေါ် သို့​မဟုတ် သွန်သင်ချက်​ကို​မဆို အချည်းနှီး​ဖြစ်သည်ဟု ရှင်းလင်းစွာ​သိမြင်ခဲ့​ကြသည်။ အချို့​ကိစ္စ​များ​၌ သူတို့​ခေတ်​မှ ပညာရှိ​သူများ​သည် “[အမှန်]တရားကို အဓမ္မ​ဖြင့်​ဆီးတား” ကာ ဘုရားသခင်​ရှိကြောင်း​ဖော်ပြ​သော သူတို့​ပတ်လည်​ရှိ​သက်သေ​သာဓက​ကို လျစ်လျူရှု​ခဲ့​ကြ​၏။ ‘ပညာရှိ​သည်​ဟု ကိုယ်ကို​ဆို​လျက်​နှင့် လူ​မိုက်​အဖြစ်သို့​ရောက်​ကြသည်’ ဟူ၍ တမန်​တော်​ပေါလု​က ရေးခဲ့​သည်။ မှန်​၏၊ သူတို့သည် ဘုရားသခင်​နှင့်​ကိုယ်တော်​၏​ရည်ရွယ်ချက်​နှင့်​ပတ်သက်သော အမှန်တရားကို ငြင်းပယ်​ခဲ့​ကြသော​ကြောင့် “အချည်းနှီး​တွေးဆ​ခြင်း၊ သတိ​မရှိသော​စိတ်နှလုံး​မိုက်မဲခြင်း​သို့​ရောက်​ကြ​၏။”—ရောမ ၁:၁၈-၂၂; ယေရမိ ၈:၈၊ ၉။

ပညာရှိ​များ​ဟု​ဆို​ကြ​သူများ​သည် “ဘုရားသခင်​မရှိ” သို့​မဟုတ် “ကျမ်းစာ​ကို​ယုံကြည်၍​မရ” သို့​မဟုတ် “ဤ​နေ့ရက်​များသည် နောက်ဆုံးသော​နေ့ရက်​များ​မဟုတ်” ကဲ့သို့​သော ကောက်ချက်​များ​ကို အဆိုပြု​တတ်ကြ​သည်။ ဤ​ယူဆချက်များ​သည် “၂ ၁” ဟူသော အဖြေ​ကဲ့သို့ ဘုရားသခင်​ရှေ့မှောက်​တွင် ရူးသွပ်​ခြင်း​သာ​ဖြစ်၏။ (၁ ကောရိန္သု ၃:၁၉) လူတို့သည် မိမိတို့​ကိုယ်ကို အခွင့်အာဏာ​ရှိ​သူများ​ဟု မည်သို့​ပင်​ပိုင်စိုးပိုင်နင်း​ဆို​စေ​ကာ​မူ သူတို့သည် ဘုရားသခင်​ကို​ငြင်းပယ်​လျှင်​လည်းကောင်း၊ ကိုယ်တော်​၏​နှုတ်မြွက်​စကားတော်​ကို လျစ်လျူရှု​လျှင်​လည်းကောင်း၊ သာမန်​အသိဉာဏ်​နှင့် ဆန့်ကျင်​နေလျှင်လည်း​ကောင်း သူတို့၏​ကောက်ချက်​များ​ကို သင်​လက်ခံဖို့​မလို​ချေ။ အဆုံးသတ်​သရုပ်​ခွဲ​လေ့လာ​ကြည့်​လျှင် “လူ​ခပ်သိမ်း​တို့သည် သစ္စာပျက်​သော်လည်း ဘုရားသခင်​၏​သစ္စာတော်​သည်​တည်စေ” ခြင်း​သည် အမြဲ​ပင်​ပညာရှိ​လမ်းစဉ်​ဖြစ်သည်။—ရောမ ၃:၄။

[အောက်ခြေ​မှတ်ချက်များ]

[စာမျက်နှာ ၃၁ ပါ ရုပ်ပုံ]

သမ္မာကျမ်းစာ​သည် လူသား​တို့၏ မတည်မြဲ​သော​ယူဆ​ချက်​များနှင့်​မတူဘဲ ခိုင်မြဲ​သော​ယုံကြည်ခြင်းကို​ဖြစ်ပေါ်​စေ

[Credit Lines]

လက်ဝဲ၊ အဲ​ပိ​ကုရု– Left, Epicurus: Photograph taken by courtesy of the British Museum; အပေါ်​အလယ်၊ ပ​လေ​တို– upper middle, Plato: National Archaeological Museum, Athens, Greece; လက်ယာ၊ ဆို​က​ရေး​တီး– right, Roma, Musei Capitolini