ခရစ္စမတ်ဓလေ့ထုံးစံများ—ယင်းတို့သည် ခရစ်ယာန်နှင့်ဆိုင်သလော
ခရစ္စမတ်ဓလေ့ထုံးစံများ—ယင်းတို့သည် ခရစ်ယာန်နှင့်ဆိုင်သလော
ခရစ္စမတ်ရာသီရောက်လေပြီ။ ယင်းသည် သင်၊ သင်၏မိသားစုနှင့် အပေါင်းအသင်းတို့အတွက် မည်သည့်အဓိပ္ပာယ်ရှိသနည်း။ ဝိညာဉ်ရေးဆိုင်ရာသမယလော သို့မဟုတ် ပျော်ရွှင်ဖွယ် ပွဲတော်ကာလမျှသာလော။ ယေရှုခရစ်မွေးဖွားသည့်အကြောင်းကို စဉ်းစားဆင်ခြင်ရမည့်အချိန်လော သို့မဟုတ် ခရစ်ယာန်စံနှုန်းများကို အလေးမထားရမည့်အချိန်လော။
အဆိုပါမေးခွန်းများကို သုံးသပ်ရာ၌ ခရစ္စမတ်ထုံးတမ်းစဉ်လာများသည် သင်နေထိုင်ရာဒေသအလိုက် ကွဲပြားနိုင်သည်ကို စိတ်ထဲတွင်ထားပါ။ ဥပမာ၊ မက္ကဆီကိုနှင့် အခြားလက်တင်အမေရိကနိုင်ငံများတွင် အခေါ်အဝေါ်ပင် မတူကြချေ။ အင်္ဂလိပ်အခေါ် ခရစ္စမတ်သည် “ခရစ်တော်၏မားစ်ပွဲဟူသော အလယ်ခေတ် ခရစ္စတာစ် မဆား မှဆင်းသက်လာသည်” ဟုစွယ်စုံကျမ်းတစ်စောင်က ဖော်ပြသည်။ သို့သော် အဆိုပါလက်တင်အမေရိကနိုင်ငံများတွင် ယင်းကို လား နားဗီဒါဒ် သို့မဟုတ် သူငယ်တော်ဖွားမြင်ခြင်းဟုခေါ်ရာ ခရစ်တော်ဖွားမြင်ခြင်း သို့မဟုတ် မွေးဖွားခြင်းကိုရည်ညွှန်းသည်။ အချိန်အနည်းငယ်ယူ၍ မက္ကဆီကိုမှ အသေးစိတ်အချက်အချို့ကို စဉ်းစားသုံးသပ်ကြည့်ပါ။ ၎င်းသည် ဤအားလပ်ရက်အချိန်အခါနှင့်ပတ်သက်၍ သင်၏ထင်မြင်ယူဆချက်ကို ရုပ်လုံးပေါ်လာရန် ထောက်ကူပေးနိုင်မည်။
ပိုဆာဒါစ်၊ “ပညာရှိသုံးဦး” နှင့် နာဆီမြန်းတိုး
ပွဲတော်များသည် ပိုဆာဒါစ်ဖြင့် ဒီဇင်ဘာ ၁၆ ရက်တွင် စတင်သည်။ မက္ကဆီကိုပွဲလမ်းသဘင် စာအုပ်က ဤသို့ဖော်ပြသည်– “ပိုဆာဒါစ်အချိန်အခါကား ယောသပ်နှင့်မာရိတို့နှစ်ဦးသား ဗက်လင်မြို့ထဲတွင် လှည့်ပတ်ကာ နောက်ဆုံးတွင် ဖော်ရွေမှုရှိသောတည်းခိုစရာတွေ့ရှိချိန်ကို အမှတ်ရစေသည့် ခရစ္စမတ်အကြိုနေ့မတိုင်မီ အံ့သြနှစ်လိုဖွယ်ကိုးရက်တာကာလဖြစ်သည်။ ခရစ်တော်မမွေးဖွားမီရက်များကို ပြန်လည်သရုပ်ဖော်ရန် မိသားစုများနှင့် မိတ်ဆွေများသည် ညစဉ်စုရုံးကြသည်။”
ထုံးတမ်းစဉ်လာအရ လူတစ်စုသည် မာရိနှင့်ယောသပ်၏ရုပ်ပုံတို့ကို အိမ်ထဲသို့ပင့်ဆောင်ကာ နားခိုစရာ သို့မဟုတ် ပိုဆာဒါစ် အတွက် သီချင်းဖြင့်တောင်းဆိုကြသည်။ အိမ်ထဲရှိလူများက ဧည့်သည်များကို နောက်ဆုံး၌ ဝင်ခွင့်ပြုလိုက်သည့်အချိန်အထိ တုံ့ပြန်သီချင်းဆိုကြ၏။ ထိုနောက် ပါတီပွဲကိုစတင်သည်၊ ထိုတွင် မျက်စိကိုအဝတ်စည်းထားပြီး တုတ်ကိုင်ထားသူအချို့သည် ကြိုးဖြင့်ချိတ်ဆွဲထားသော အလှဆင်ယင်ထားသည့်မြေအိုးကြီးပိုင်နာတာကို တစ်လှည့်စီရိုက်ခွဲဖို့ကြိုးစားကြသည်။ ကွဲသွားသည်နှင့် အိုးထဲတွင်ရှိသည့်အရာများ (ဖယောင်းတိုင်၊ သစ်သီးစသည်တို့) ကို ပွဲကျင်းပသူများက စုသိမ်းကြသည်။ ပြီးနောက် စားကြ၊ သောက်ကြ၊ ဆိုကြ၊ ကကြလေသည်။ ယခုခေတ်၌ သီချင်းဆိုခြင်းနှင့်ရုပ်ပုံများကို ချန်လှပ်ထားကြပြီး ပါတီပွဲသာကျန်ရစ်သည်။ ပိုဆာဒါစ်ပါတီပွဲရှစ်ခုကို ဒီဇင်ဘာ ၁၆ မှ ၂၃ ရက်အထိ ကျင်းပကြသည်။ ၂၄ ရက်နေ့တွင် နော်ချဲဗွဲနား (ခရစ္စမတ်မတိုင်မီည) ကိုကျင်းပပြီး အထူးညစာအတွက် မိသားစုများ ကြိုးစားစုရုံးကြသည်။
နှစ်သစ်ကူးနေ့မတိုင်မီတွင် အလွန်ဆူညံသောပါတီပွဲများကျင်းပခဲ့သည်။ ဇန်နဝါရီ ၅ ရက်နေ့ ညနေပိုင်းတွင် ထရေးစ် ရေးယက်စ် မားဂိုစ် (“ပညာရှိသုံးဦး”) သည် ကလေးများအတွက် ကစားစရာအရုပ်များယူလာပေးသည်ဟူသော အဆိုရှိ၏။ ဇန်နဝါရီ ၆ ရက်နေ့၊ ရော့စ်ကာ ဒဲ ရေးယက်စ် (ကိတ်ဝိုင်း) ပေးဝေသောအချိန်တွင် ပါတီပွဲသည် အထွတ်အထိပ်ရောက်ရှိလာသည်။ ဤမုန့်ကိုစားသုံးသောအခါ တစ်ဦးဦးက သူရသည့် ကိတ်အပိုင်းထဲတွင် သူငယ်ယေရှုပုံဖော်ထားသော အရုပ်လေးကို တွေ့ရှိလိမ့်မည်ဖြစ်သည်။ တွေ့ရှိသူက ဖေဖော်ဝါရီ ၂ ရက်နေ့တွင် နောက်ဆုံးပါတီကို စီစဉ်၍ဧည့်ခံပေးရန် တာဝန်ယူရသည်။ (အချို့ဒေသများတွင် “ပညာရှိသုံးဦး” ပုံဖော်ထားသောအရုပ်သုံးရုပ်ပါရှိသည်။) သင်သိမြင်သည့်အတိုင်း ခရစ္စမတ်နှင့်ဆက်နွှယ်နေသော ပါတီပွဲပြုလုပ်ခြင်းကို ဖော်ပြ၍ဆုံးမည်မဟုတ်။
ဤအချိန်ကာလအတွင်း နာဆီမြန်းတိုး (သူငယ်တော်ဖွားမြင်ခြင်းအခင်းအကျင်း) သည် အထင်ပေါ်ဆုံးဖြစ်သည်။ ယင်းတွင် အဘယ်အရာ ပါဝင်ပတ်သက်သနည်း။ လူအများရှိသည့်နေရာများတွင်သာမက ချာ့ခ်ျများနှင့်အိမ်များတွင်လည်း မြေထည်၊ သစ်သား သို့မဟုတ် ရွှံ့စေးတို့ဖြင့် ပြုလုပ်ထားသောရုပ်ပုံ (အကြီး သို့မဟုတ် အသေး) များနှင့် ထိုအခင်းအကျင်းများကိုပြုလုပ်ထားသည်။ ယင်းရုပ်ပုံတို့ဖြင့် မွေးကင်းစကလေးကိုချီပိုက်ထားပြီး နွားစားခွက်ရှေ့တွင် ဒူးထောက်နေသော ယောသပ်နှင့်မာရိတို့၏ပုံကိုဖော်ထားသည်။ တစ်ခါတစ်ရံ သိုးထိန်းများနှင့် လော့စ် ရေးယက်စ် မားဂိုစ် (“ပညာရှိများ”) လည်းပါရှိ၏။ ဆက်တင်မှာ နွားတင်းကုပ်ဖြစ်ပြီး ယင်းအခင်းအကျင်းကို တိရစ္ဆာန်အချို့နှင့် အားဖြည့်ထားပေမည်။ သို့ရာတွင် အဓိကသရုပ်ဖော်ချက်မှာ စပိန်ဘာသာစကားဖြင့် အယ်လ် နီးညို ဒရော့စ် (သူငယ်တော်ဘုရား) ဟုသမုတ်ထားသည့် မွေးကင်းစသူငယ်ပုံဖြစ်သည်။ ဤအဓိကရုပ်ပုံကို ခရစ္စမတ်မတိုင်မီညတွင် ပြင်ဆင်ထားကြပေမည်။
သူငယ်တော်ဖွားမြင်ခြင်းထုံးတမ်းစဉ်လာများကို အနီးကပ်လေ့လာခြင်း
အများအားဖြင့် ကမ္ဘာတစ်ဝန်းသိရှိကြသည့်အတိုင်း ခရစ္စမတ်ပွဲကျင်းပခြင်းနှင့်ပတ်သက်၍ အမေရိကားနားစွယ်စုံကျမ်း ကဤသို့ဆိုသည်– “ယခု ခရစ္စမတ်နှင့်ဆက်နွှယ်နေသော ထုံးတမ်းအများစုသည် မူရင်းခရစ္စမတ်ထုံးတမ်းများမဟုတ်ဘဲ ခရစ်ယာန်ချာ့ခ်ျကမွေးစားလိုက်သည့် ခရစ်ယာန်ခေတ်မတိုင်မီကနှင့် ခရစ်ယာန်မဟုတ်သောထုံးတမ်းများဖြစ်သည်။ ဒီဇင်ဘာလအလယ်တွင်ကျင်းပသော ရောမပွဲတော်စက်တာနေလီယာသည် ခရစ္စမတ်၏ပျော်ရွှင်ပွဲဓလေ့ထုံးစံများစွာအတွက် စံဖြစ်ခဲ့သည်။ ဥပမာ၊ ဤပွဲကျင်းပခြင်းမှ ခမ်းနားစွာပွဲတော်ကျင်းပခြင်း၊ လက်ဆောင်များပေးခြင်းနှင့် ဖယောင်းတိုင်များထွန်းခြင်းတို့ဖြစ်ပေါ်လာခဲ့၏။”
လက်တင်အမေရိကတွင် အဆိုပါမူလသူငယ်တော်ဖွားမြင်ခြင်း ဓလေ့ထုံးစံများကို အခြားထုံးစံများနှင့် ရောနှောကျင်းပပေမည်။ ‘အဘယ်ဇာစ်မြစ်မှလာသနည်း’ ဟုသင်စူးစမ်းစစ်ဆေးရမည်။ အမှန်ဆိုရလျှင် သမ္မာကျမ်းစာကိုစွဲကိုင်ထားလိုသူအများက ဓလေ့ထုံးစံအချို့မှာ အက်ဇ်တက်လူမျိုးတို့၏ဝတ်ပြုနည်းများမှ ဆင်းသက်လာခြင်းသာဖြစ်ကြောင်း အသိအမှတ်ပြုကြ၏။ မက္ကဆီကိုစီးတီးထုတ် အဲလ်ယူနီဗာဆယ်လ် သတင်းစာက ဤသို့ဖော်ပြခဲ့သည်– “ဂိုဏ်းအမျိုးမျိုးမှ ခရစ်ယာန်ဘုန်းကြီးများက အင်ဒီးယန်းဘာသာရေးပြက္ခဒိန်ပါပွဲတော်များသည် ကက်သလစ်ဝတ်ပြုရေးပြက္ခဒိန်ပါပွဲတော်များနှင့် တစ်ချိန်တည်းကျနေသည့်အချက်ကို အခွင့်ကောင်းယူကာ သူတို့၏ဧဝံဂေလိလုပ်ငန်းနှင့် ခရစ်ယာန်သာသနာပြုလုပ်ငန်းတို့ကို ထောက်ပံ့ရန် အသုံးချခဲ့ကြ၏။ သူတို့သည် ဟစ္စပဲန်နစ်ခေတ်မတိုင်မီကရှိခဲ့သော နတ်ဘုရားပွဲအခမ်းအနားများကို ခရစ်ယာန်နတ်ဘုရားပွဲတော်များနှင့် အစားထိုးခဲ့သည်၊ ဥရောပပွဲတော်များနှင့်ပြုမူလုပ်ဆောင်မှုများအပြင် အင်ဒီးယန်းပွဲတော်များကိုလည်း စတင်မိတ်ဆက်ပေးခြင်းဖြင့် ယဉ်ကျေးမှုပေါင်းစပ်သွားရာမှ မက္ကဆီကန်ဝေါဟာရများ စစ်မှန်စွာပေါ်ထွက်လာလေသည်။”
အမေရိကားနားစွယ်စုံကျမ်း ကဤသို့ရှင်းပြ၏– “သူငယ်တော်ဖွားမြင်တော်မူခြင်းပြကွက်များသည် အစောပိုင်းကတည်းက ခရစ္စမတ်အခမ်းအနားဝင်တစ်ခုဖြစ်လာခဲ့သည်။ . . . ချာ့ခ်ျ၌ သူငယ်တော်ဖွားမြင်ခြင်းသရုပ်ဖော်ချက် [နွားစားခွက်ပုံအခင်းအကျင်း] ကိုစိန့်ဖရန်စစ္စက အစပြုခဲ့သည်ဟု အဆိုရှိသည်။” မက္ကဆီကိုနိုင်ငံ ကိုလိုနီစထူထောင်ချိန်အတွင်း ချာ့ခ်ျများ၌ ခရစ်တော်မွေးဖွားခြင်း အဖြစ်အပျက်များကိုတင်ဆက်သည့် ပြဇာတ်များကို ကခဲ့ကြသည်။ အင်ဒီးယန်းများကို သူငယ်တော်ဖွားမြင်ခြင်းအကြောင်း သွန်သင်ပေးရန် ဖရန်စစ္စကန်ဂိုဏ်းဝင်ဘုန်းကြီးများက ယင်းသို့စီစဉ်ခဲ့ခြင်းဖြစ်၏။ နောက်ပိုင်းတွင် ပိုဆာဒါစ်သည် ပို၍ပင်လူကြိုက်များလာသည်။ ယင်းတို့၏နောက်ကွယ်တွင် မူလရည်ရွယ်ချက် မည်သို့ပင်ရှိပါစေ ပိုဆာဒါစ်ကိုတင်ဆက်ပုံက ယနေ့ ယင်း၏သရုပ်မှန်ကို အထင်းသားတွေ့နေရသည်။ အကယ်၍ သင်သည် အဆိုပါအချိန်အခါအတွင်း မက္ကဆီကို၌ရှိနေပါက အဲလ် ယူနီဗာဆယ် စာရေးဆရာတစ်ဦး၏ ဤဝေဖန်ချက်မှ ပေါ်လွင်သောအချက်တစ်ခုခုကို တွေ့ရှိနိုင်မည်– “သူငယ်တော်ဘုရားမွေးဖွားနိုင်ရန် နားခိုရာကိုရှာဖွေနေကြသောယေရှုမိဘများ ဧည့်သည်အဖြစ်ခရီးသွားနေရသည့်အချိန်ကို အမှတ်ရစေသည့် ပိုဆာဒါစ်သည် မျက်မှောက်ခေတ်၌ ယစ်မူးခြင်း၊ ပေါက်လွှတ်ပဲစားပြုမူခြင်း၊ စားကြူးခြင်း၊ အဓိပ္ပာယ်မရှိပြုမူခြင်းနှင့် ပို၍ပို၍ရာဇဝတ်မှုတိုးများလာခြင်းတို့သာဖြစ်သည်။”
နာဆီမြန်းတိုး အယူအဆသည် ကိုလိုနီခေတ်အတွင်း ချာ့ခ်ျများ၌ မူလကရှင်သန်ခဲ့သောစိတ်ကူးစိတ်သန်းများမှ ပေါ်ပေါက်လာခဲ့သည်။ အချို့သည် ယင်းကို နှစ်သက်သဘောကျကြသော်လည်း ယင်းသည် သမ္မာကျမ်းစာပြောထားရာများကို မှန်ကန်စွာ ကိုယ်စားပြုသလော။ ၎င်းသည် ခြေမြစ်သောမေးခွန်းတစ်ခုဖြစ်၏။ အများအခေါ်ပညာရှိသုံးဦး—အမှန်မှာ နက္ခတ်ဗေဒင်ပညာရှင်များဖြစ်သူ—တို့ ရောက်လာချိန်တွင် ယေရှုနှင့်ကိုယ်တော်၏မိသားစုသည် နွားတင်းကုပ်တွင်မရှိတော့ချေ။ အချိန်အတန်ကြာသွားပြီဖြစ်ရာ ထိုမိသားစုသည် အိမ်တစ်အိမ်တွင် နေနေကြပြီဖြစ်သည်။ သင်သည် မဿဲ ၂:၁၊ ၁၁ ပါမှုတ်သွင်းခံမှတ်တမ်းမှ စိတ်ဝင်စားဖွယ်မှတ်သားစရာ အဆိုပါအသေးစိတ်အချက်အလက်ကို တွေ့ရှိရမည်။ ကျမ်းစာတွင် နက္ခတ်ဗေဒင်ပညာရှင်အရေအတွက်အကြောင်း မဖော်ပြထားသည်ကိုလည်း မှတ်သားထားနိုင်သည်။ *
လက်တင်အမေရိကတွင် ပညာရှိသုံးဦးကို စဲန်တာကလော့စ်၏နေရာတွင် အစားထိုးလိုက်သည်။ သို့ရာတွင် အခြားနိုင်ငံများတွင် ပြုလုပ်သည့်အတိုင်း မိဘများစွာတို့သည် အိမ်၌အရုပ်များကို ဝှက်ထားကြ၏။ ထို့နောက် ထိုပညာရှိသုံးဦးသည် အရုပ်များကို ယူလာပေးဘိသကဲ့သို့ ဇန်နဝါရီ ၆ ရက်နေ့တွင် ကလေးများက ယင်းတို့ကို ရှာဖွေကြလေသည်။ အရုပ်ရောင်းသူများအတွက် အကျိုးအမြတ်များစွာရရှိချိန်ဖြစ်ပြီး စိတ်နှလုံးရိုးဖြောင့်သူများစွာက လုပ်ဇာတ်ဟု ယူဆရာအပေါ် အချို့သည် ငွေအတော်ပင်ရရှိခဲ့သည်။ ပညာရှိသုံးဦးနှင့်ပတ်သက်သော ယုံတမ်းစကားများကို အတော်များများသာမက ကလေးငယ်များပင် အယုံအကြည်လျော့နည်းလာကြသည်။ အချို့က ဤယုံတမ်းစကားကို ယုံကြည်သူများလျော့နည်းလာခြင်းကိုသဘောမကျသော်လည်း အစဉ်အလာနှင့်စီးပွားအကျိုးအမြတ်အတွက်သာ ဆက်ထိန်းလာသည့်လုပ်ဇာတ်ကို မည်သို့မျှော်လင့်နိုင်မည်နည်း။
ခရစ္စမတ် သို့မဟုတ် သူငယ်တော်ဖွားမြင်ခြင်းကို အစောပိုင်းခရစ်ယာန်များ မကျင်းပခဲ့ကြပါ။ ၎င်းနှင့်စပ်လျဉ်း၍ စွယ်စုံကျမ်းတစ်စောင်က ဤသို့ဆို၏– “အများအားဖြင့် ခရစ်ယာန်ဓလေ့ထုံးစံတွင် အမှတ်ရထိုက်သောသူတို့၏မွေးနေ့ထက် သေနေ့ကိုကျင်းပကြရာ အဆိုပါပွဲတော်ကျင်းပခြင်းကို ပထမရာစုခရစ်ယာန်ချာ့ခ်ျတွင် မတွေ့ခဲ့ရချေ။” သမ္မာကျမ်းစာက မွေးနေ့ပွဲကျင်းပခြင်းသည် ဘုရားသခင်၏စစ်မှန်သောဝတ်ပြုသူများနှင့်မပတ်သက်ဘဲ အယူမှားသူများနှင့် ဆက်စပ်ဖော်ပြထားသည်။—မဿဲ ၁၄:၆-၁၀။
မှန်ပါသည်၊ ဘုရားသခင်၏သားတော်မွေးဖွားခြင်းနှင့်ပတ်သက်၍ တကယ့်အဖြစ်အပျက်များကိုသိရှိပြီး ပြန်လည်အမှတ်ရခြင်းသည် အကျိုးမရှိဟု မဆိုလိုပါ။ မှန်ကန်စွာဖော်ပြထားသော ကျမ်းစာမှတ်တမ်းသည် ဘုရားသခင့်အလိုတော် ဆောင်ရွက်လိုသူအားလုံးအတွက် အရေးကြီးသောထိုးထွင်းသိမြင်မှုနှင့် သင်ခန်းစာများကိုပေးသည်။
သမ္မာကျမ်းစာအရ ယေရှုဖွားမြင်ခြင်း
သင်သည် မဿဲနှင့်လုကာခရစ်ဝင်ကျမ်းတို့တွင် ယေရှုမွေးဖွားခြင်းနှင့်ပတ်သက်၍ ယုံကြည်စိတ်ချရသောအချက်အလက်ကို တွေ့ရှိရမည်ဖြစ်သည်။ ကောင်းကင်တမန်ဂါဗြေလသည် ဂါလိလဲနယ်၊ နာဇရက်မြို့မှ အိမ်ထောင်မကျသေးသည့်အမျိုးသမီးငယ်မာရိထံ သွားရောက်လည်ပတ်ခဲ့သည်ဟု ထိုကျမ်းတို့ကဖော်ပြ၏။ မည်သည့်သတင်းကို ကောင်းကင်တမန်ပေးခဲ့သနည်း။ “သင်သည် ပဋိသန္ဓေစွဲယူ၍ သားယောက်ျားကိုဖွားမြင်လိမ့်မည်။ ထိုသားကို ယေရှုအမည်ဖြင့်မှည့်ရမည်။ ထိုသားသည်ကား၊ ကြီးမြတ်သောသူဖြစ်လိမ့်မည်။ အမြင့်ဆုံးသောဘုရား[သခင်]၏သားတော်ဟု ခေါ်ဝေါ်သမုတ်ခြင်းကိုခံရလိမ့်မည်။ သူ့အဘဒါဝိဒ်၏ရာဇပလ္လင်ကို ထာဝရအရှင်ဘုရားသခင်သည် သူ့အားပေးတော်မူမည်။ ထိုသူသည်လည်း ယာကုပ်အမျိုးအနွယ်ကို အစဉ်မပြတ်အုပ်စိုးလိမ့်မည်။ သူ၏နိုင်ငံသည်လည်း ဆုံးခြင်းမရှိရဟုပြောဆို၏။”—လုကာ ၁:၃၁-၃၃။
မာရိသည် ဤသတင်းကြောင့် လွန်စွာအံ့အားသင့်ခဲ့ရသည်။ အိမ်ထောင်မကျသေးသော သူက “ဤအမှုအရာသည် အဘယ်သို့ဖြစ်လိမ့်မည်နည်း။ အကျွန်ုပ်သည် ယောက်ျားနှင့်မဆက်ဆံပါဟု” ပြောခဲ့သည်။ ကောင်းကင်တမန်က “သန့်ရှင်းသောဝိညာဉ်တော်သည် သင်၏အပေါ်မှာသက်ရောက်တော်မူ၍ အမြင့်ဆုံးသောဘုရား[သခင်]၏ တန်ခိုးအာနုဘော်တော်သည် သင့်ကိုလွှမ်းမိုးလိမ့်မည်။ ထိုအကြောင်းကြောင့် ထိုသန့်ရှင်းသောသားသည်လည်း ဘုရားသခင်၏သားတော်ဟု ခေါ်ဝေါ်သမုတ်ခြင်းကိုခံရလိမ့်မည်” ဟုဖြေခဲ့သည်။ ယင်းသည် ဘုရားသခင်၏အလိုတော်ဖြစ်သည်ကို သိရှိပြီးနောက်တွင် မာရိက “အကျွန်ုပ်သည် ထာဝရဘုရား[သခင်]၏ကျွန်မဖြစ်ပါ၏။ ကိုယ်တော်၏စကားအတိုင်း အကျွန်ုပ်၌ဖြစ်ပါစေသောဟု” ပြောခဲ့သည်။—လုကာ ၁:၃၄-၃၈။
ယောသပ်သည် မာရိပဋိသန္ဓေစွဲနေသည်ကို သိရှိပြီးနောက် ကွာရှင်းခြင်းမပြုလုပ်ရန် ကောင်းကင်တမန်က သူ့အား အံ့ဖွယ်ဖွားမြင်ခြင်းအကြောင်း ပြောပြခဲ့သည်။ သို့နှင့် ဘုရားသခင်၏သားတော်ကို ကြည့်ရှုစောင့်ရှောက်ခြင်းတာဝန်ကို လက်ခံရန်တလိုတလားရှိခဲ့၏။—မဿဲ ၁:၁၈-၂၅။
ထို့နောက် ကဲသာဘုရင်သြဂုတ္တု၏အမိန့်ကြောင့် ယောသပ်နှင့်မာရိတို့သည် မှတ်ပုံတင်ရန် ဂါလိလဲနယ်၊ နာဇရက်မှ သူတို့၏ဘိုးဘေးမြို့ ယုဒနယ်၊ ဗက်လင်သို့ မဖြစ်မနေသွားခဲ့ရလေသည်။ “ဗက်လင်မြို့၌ရှိနေစဉ် ဖွားအံ့သောနေ့လစေ့လျှင် သားဦးကိုဖွားမြင်၍ အဝတ်နှင့်ပတ်ရစ်ပြီးမှ ဧည့်သည်တည်းရာဇရပ်၌ သူတို့နေစရာမရှိသောကြောင့် သူငယ်ကို နွားစားခွက်၌သိပ်ထားလေ၏။”—လုကာ ၂:၁-၇။
လုကာ ၂:၈-၁၄ တွင်ဆက်ဖြစ်လာသည့်အမှုကို ဤသို့ဖော်ပြသည်– “ထိုပြည်မှာ သိုးထိန်းတို့သည် ညအခါတောအရပ်၌တည်းခိုလျက် မိမိသိုးစုကိုစောင့်နေကြသည်ဖြစ်၍ ထာဝရဘုရား[သခင်]၏ကောင်းကင်တမန်သည် သူတို့အနားမှာပေါ်လာ၍ ပတ်ဝန်းကျင်၌ ထာဝရဘုရား[သခင်]၏ဘုန်းတော်ထွန်းတောက်သဖြင့် သူတို့သည် အလွန်ကြောက်ရွံ့ခြင်းသို့ရောက်ကြ၏။ ကောင်းကင်တမန်ကလည်း ‘ကြောက်ရွံ့ခြင်းမရှိကြနှင့်။ လူအပေါင်းတို့သည် အလွန်ဝမ်းမြောက်ဝမ်းသာစရာသတင်းကို ငါသည် သင်တို့အားကြားပြောရ၏။ ယနေ့တွင် ဒါဝိဒ်၏မြို့၌ သခင်ခရစ်တော်တည်းဟူသော ကယ်တင်သောအရှင်သည် သင်တို့အဖို့အလို့ငှာ ဖွားမြင်ခြင်းကိုခံတော်မူပြီ။ သင်တို့သည် အဘယ်နိမိတ်ဖြင့်သိရမည်နည်းဟူမူကား သူငယ်သည် အဝတ်နှင့်ပတ်ရစ်၍ နွားစားခွက်၌ သိပ်ထားလျက်ရှိသည်ကို တွေ့ကြလိမ့်မည်’ ဟုဆိုပြီးလျှင် ထိုကောင်းကင်တမန်နှင့်အတူ ကောင်းကင်ဗိုလ်ခြေအများတို့သည် ချက်ချင်းထင်ရှား၍ ‘ကောင်းကင်ဘဝဂ်ဝယ် ဘုရားသခင်သည် ဘုန်းကြီးတော်မူစေသတည်း။ မြေကြီးပေါ်၌လည်း ငြိမ်သက်ခြင်းရှိစေသတည်း။ လူတို့အား မေတ္တာကရုဏာရှိစေသတည်း’ ဟုဘုရားသခင်ကိုချီးမွမ်း၍ မြွက်ဆိုကြ၏။”
နက္ခတ်ဗေဒင်ပညာရှင်များ
အရှေ့ပြည်မှနက္ခတ်ဗေဒင်ပညာရှင်များသည် ဂျူးဘုရင်ဖွားမြင်သောနေရာကို ရှာဖွေရန် ယေရုရှလင်သို့ ရောက်လာကြသည်ဟု မဿဲကျမ်းမှတ်တမ်းက ဖော်ပြသည်။ ဟေရုဒ်မင်းကြီးသည် ယင်းကို လွန်စွာစိတ်ဝင်စားခဲ့သည်၊ သို့သော် စိတ်ထားမှန်ဖြင့်မဟုတ်ချေ။ “‘သင်တို့သွား၍ ထိုသူငယ်ကိုကြိုးစားရှာကြပါ။ တွေ့လျှင် ငါ့ထံသို့ပြန်လာ၍ ငါလည်း ထိုသူငယ်ကိုဖူးတွေ့ပူဇော်ရအောင် ကြားပြောကြပါ’ ဟုမှာထားတော်မူလျက် ဗက်လင်မြို့သို့စေလွှတ်လေ၏။” နက္ခတ်ဗေဒင်ပညာရှင်တို့သည် သူငယ်ကိုရှာတွေ့ပြီး “မိမိတို့ဘဏ္ဍာဥစ္စာတို့ကိုဖွင့်ပြီးမှ လောဗန်နှင့်မုရန်တည်းဟူသော နံ့သာမျိုးကိုလည်းကောင်း၊ ရွှေကိုလည်းကောင်း ဆက်ကပ်ပူဇော်ကြ၏။” သို့ရာတွင် သူတို့သည် ဟေရုဒ်ထံသို့ ပြန်မသွားခဲ့ကြချေ။ “ဟေရုဒ်မင်းကြီးထံသို့မပြန်ရမည်အကြောင်း အိပ်မက်တွင် ဗျာဒိတ်တော်ကိုရ” ခဲ့သည်။ ဘုရားသခင်သည် ဟေရုဒ်၏အကြံအစည်များကို ယောသပ်အားသတိပေးရန် ကောင်းကင်တမန်တစ်ပါးကို အသုံးပြုခဲ့သည်။ သို့နှင့် ယောသပ်နှင့်မာရိတို့သည် မိမိတို့၏သားနှင့်အတူ အဲဂုတ္တုပြည်သို့ ထွက်ပြေးခဲ့၏။ ဘုရင်အသစ်ကို သုတ်သင်ပစ်ဖို့ ကြိုးစားမှုတစ်ရပ်အနေနှင့် ရက်စက်ကြမ်းကြုတ်သော ဟေရုဒ်မင်းသည် ဗက်လင်နယ်မှ သားယောက်ျားများကို သတ်ပစ်ရန် အမိန့်ထုတ်ခဲ့သည်။ မည်သည့်သားယောက်ျားများနည်း။ နှစ်နှစ်နှင့်အောက် သားယောက်ျားများဖြစ်သည်။—မဿဲ ၂:၁-၁၆။
ထိုမှတ်တမ်းမှ မည်သည့်အရာကို ကျွန်ုပ်တို့သိရှိနိုင်သနည်း
ရောက်ရှိလာကြသောနက္ခတ်ဗေဒင်ပညာရှင်များ—အများအပြားရှိနေကြသော်လည်း—စစ်မှန်သောဘုရားသခင်ကို မကိုးကွယ်ကြချေ။ လာ နွယ်ဗာ ဘစ်လလီယာ လာတင်နိုအမေရိကာ (၁၉၈၉ ထုတ်) ဘာသာပြန်ကျမ်းက အောက်ခြေမှတ်ချက်တွင် ဤသို့ဖော်ပြသည်– “နက္ခတ်ဗေဒင်ပညာရှင်များသည် ရှင်ဘုရင်များမဟုတ်ဘဲ ဗေဒင်ဟောသူများနှင့် အယူမှားဘာသာ၏ယဇ်ပုရောဟိတ်များဖြစ်ကြသည်။” သူတို့အထူးအလေးထားသော နက္ခတ်ဗေဒင်ပညာအရ ရောက်ရှိလာခြင်းသာဖြစ်သည်။ ဘုရားသခင်သာ သူတို့ကို သူငယ်ထံ လမ်းပြပေးလိုလျှင် ယေရုရှလင်နှင့် ဟေရုဒ်နန်းတော်သို့ ဦးစွာသွားဖို့မလိုဘဲ တိကျသောနေရာသို့ ပို့ဆောင်ပေးမည်ဖြစ်သည်။ နောက်မကြာမီ ဘုရားသခင်သည် ကလေးကိုကာကွယ်ရန် သူတို့လမ်းကြောင်းပြောင်းဖို့ ကြားဝင်လုပ်ဆောင်ခဲ့သည်။
ခရစ္စမတ်အချိန်၌ အဆိုပါမှတ်တမ်းကို စိတ်ကူးယဉ်ဆန်ဝန်းကျင်အခြေအနေက လွှမ်းမိုးသွားပြီး မာရိနှင့်သိုးထိန်းများကို ကြေညာခဲ့သည့်အတိုင်း ဤကလေးသည် ခန့်ညားထည်ဝါသောဘုရင်ဖြစ်လာရန် မွေးဖွားခြင်းဖြစ်သည်ဟူသည့် အရေးကြီးဆုံးသောဤအချက်သည် မပေါ်လွင်တော့ချေ။ ယေရှုခရစ်သည် သူငယ် သို့မဟုတ် ကလေးတစ်ဦးမဟုတ်တော့ချေ။ ကိုယ်တော်သည် မကြာမီ ဘုရားသခင့်အလိုတော်ကိုဆန့်ကျင်သည့် အုပ်ချုပ်မှုရှိသမျှကို ဖယ်ရှားပစ်ပြီး လူ့ပြဿနာအားလုံးကို ဖြေရှင်းပေးမည့် စိုးစံလျက်ရှိသောဘုရားသခင့်နိုင်ငံတော်၏ ဘုရင်ဖြစ်သည်။ ၎င်းသည် သခင့်ဆုတောင်းချက်မှ ကျွန်ုပ်တို့တောင်းလျှောက်သော ဘုရားသခင့်နိုင်ငံတော်ပင်ဖြစ်သည်။—ဒံယေလ ၂:၄၄၊ ၄၅; မဿဲ ၆:၉၊ ၁၀။
သတင်းကောင်းကို နားထောင်ရန် တလိုတလားရှိသူအားလုံးအတွက် ကယ်တင်ခြင်းရခွင့်လမ်းပွင့်လျက်ရှိသည်ဟု သိုးထိန်းများကို ကောင်းကင်တမန်၏ကြေညာချက်မှတစ်ဆင့် ကျွန်ုပ်တို့သိရှိရသည်။ ဘုရားသခင်၏မျက်နှာသာရရှိသူများသည် “နှစ်သက်တော်မူသောသူ” များဖြစ်လာကြ၏။ ယေရှုခရစ်၏နိုင်ငံတော်အောက်ရှိ ကမ္ဘာတစ်ဝန်းတွင် အံ့ချီးဖွယ်ငြိမ်သက်ခြင်းမျှော်လင့်ချက်ရှိသည်၊ သို့သော် လူတို့သည် ဘုရားသခင်၏အလိုတော်ကို ထမ်းဆောင်ရန် တလိုတလားရှိရမည်ဖြစ်သည်။ ခရစ္စမတ်ရာသီသည် ယင်းသို့သောအကျိုးသက်ရောက်စေသလော၊ ထိုစိတ်ဆန္ဒမျိုးကို ထင်ဟပ်ပြသလော။ သမ္မာကျမ်းစာနှင့်အညီ လိုက်လျှောက်လိုသော ရိုးသားသူအများသည် သိသာရှင်းလင်းသောအဖြေကို သိရှိကြသည်။—လုကာ ၂:၁၀၊ ၁၁၊ ၁၄၊ သမ္မာ။
[အောက်ခြေမှတ်ချက်များ]
^ အပိုဒ်၊ 13 နောက်ထပ်အသေးစိတ်အချက်ကို လျစ်လျူမရှုသင့်– မက္ကဆီကန်နာဆီမြန်းတိုးတွင် ဘုရားသခင်ကိုယ်တော်တိုင် သူငယ်အနေနှင့် ကမ္ဘာသို့ကြွလာသည်ဟူသောအယူအဆဖြင့် ထိုကလေးငယ်ကို “သူငယ်တော်ဘုရား” ဟုရည်ညွှန်းသည်။ သို့ရာတွင် သမ္မာကျမ်းစာက ယေရှုကို ကမ္ဘာပေါ်တွင်မွေးဖွားခဲ့သော ဘုရားသခင်၏သားတော်ဟု ဖော်ပြထားသည်; ကိုယ်တော်သည် အကန့်အသတ်မဲ့တန်ခိုးရှင် ဘုရားသခင်ယေဟောဝါနှင့်မတူ၊ တန်းတူလည်းမဖြစ်ခဲ့ပေ။ လုကာ ၁:၃၅; ယောဟန် ၃:၁၆; ၅:၃၇; ၁၄:၁၊ ၆၊ ၉၊ ၂၈; ၁၇:၁၊ ၃; ၂၀:၁၇ တို့၌ ဖော်ပြထားသော ယင်းနှင့်ပတ်သက်၍အမှန်တရားကို စဉ်းစားသုံးသပ်ကြည့်ပါ။
[စာမျက်နှာ ၇ ပါ လေးထောင့်ကွက်]
အချို့သည် အံ့အားသင့်ကြလိမ့်မည်
စာရေးဆရာ တွမ် ဖလင်းသည် ခရစ္စမတ်အကြောင်းကို နှစ်အတော်ကြာ စူးစမ်းလေ့လာပြီးနောက် သူ၏ ခရစ္စမတ်၏ဆိုးကျိုး စာအုပ်တွင် ဤသို့ဆင်ခြင်သုံးသပ်ခဲ့သည်–
“ယခုအခါ ခရစ္စမတ်ပွဲနှင့်ဆက်နွှယ်နေသော ထုံးတမ်းအတော်များများသည် ခရစ်ယာန်ခေတ်မတိုင်မီက အယူမှားဘာသာထုံးတမ်းများ၏ မူလရင်းမြစ်များမှဖြစ်ကြသည်။ ယင်းတို့မှအချို့သည် လူမှုရေး၊ လိင်မှုကိစ္စ သို့မဟုတ် စကြဝဠာအစီအစဉ်ရှိမှုပညာနှင့်ဆိုင်သော အဓိပ္ပာယ်ထွက်နေရာ ၎င်းတို့၏မူလရင်းမြစ်များကို ပို၍ရှင်းလင်းစွာ နားလည်သဘောပေါက်လာသောအခါ ယဉ်ကျေးမှုဆိုင်ရာအကဲဆတ်သော ခေတ်သစ်ပညာတတ်များသည် ဤထုံးတမ်းများကို စွန့်ပစ်လိုက်စေနိုင်သည်။”—စာမျက်နှာ ၁၉။
ဖလင်းသည် အချက်အလက်များစွာဖော်ပြပြီးနောက် အဓိကအချက်ကို ဤသို့ပြောဆို၏– “ခရစ္စမတ်ပွဲတွင်ပါသောအချက်များသည် စစ်မှန်သော ခရစ်ယာန်ဘာသာတွင် လုံးဝမပါသလောက်ဖြစ်နေရခြင်းမှာ အလွန့်အလွန်မယုံနိုင်စရာကောင်းလှပေသည်။ ကျွန်ုပ်တို့သည် ခရစ်ယာန်ခေတ်မတိုင်မီကအရာများကို ထုတ်ပယ်လိုက်လျှင် ကျန်ရှိရာအများစုမှာ စစ်မှန်သောမူလခရစ်ယာန်ရှိအရာများမဟုတ်ဘဲ ခရစ်ယာန်နောက်ပိုင်းအရာများသာဖြစ်သည်။”—စာမျက်နှာ ၁၅၅။
[စာမျက်နှာ ၇ ပါ ရုပ်ပုံ]
ယေရှုမွေးဖွားခြင်း ကြေညာချက်သည် ဘုရား သခင်၏ရွေးချယ်ထားသော ဘုရင်အဖြစ် ကိုယ်တော်၏အနာဂတ်ကဏ္ဍကို အခြေချပေးခဲ့