ချီအာပါ့စ် ကုန်းမြင့်များသို့ ငြိမ်သက်ခြင်း သတင်းကောင်းရောက်ရှိ
ချီအာပါ့စ် ကုန်းမြင့်များသို့ ငြိမ်သက်ခြင်း သတင်းကောင်းရောက်ရှိ
ခအာပါ့စ်ပြည်နယ်တွင် လူတိုင်းမှတ်မိနိုင်သည့် ရက်စက်စွာအစုလိုက်အပြုံလိုက်သတ်ဖြတ်မှုကြီးမှာ နို့စို့သူငယ် ၁၃ ဦးအပါ ခုခံနိုင်စွမ်းမရှိသော တောင်သူလယ်သမား ၄၅ ဦးကို . . . လက်နက်ကိုင်လူတစ်စုက သတ်ဖြတ်မှုပင်ဖြစ်သည်။ ၁၉၉၇၊ ဒီဇင်ဘာ ၂၂ ရက်နေ့၌ ချီအာပါ့စ်ပြည်နယ်၊ အဲခ်တီးယဲလ်ရပ်ကွက်တွင် ဖြစ်ပျက်ခဲ့ရာကို “အဲလ် ယူနီဗာဆယ်လ်” သတင်းစာက ထိုသို့ဖော်ပြခဲ့ခြင်းဖြစ်၏။
ချီအာပါ့စ်သည် မက္ကဆီကိုနိုင်ငံ၏တောင်ဘက်အစွန်းတွင် တည်ရှိပြီး ဂွာတီမာလာနှင့် နယ်ချင်းထိစပ်လျက်ရှိသည်။ ကြာရှည်စွာ ဆင်းရဲငတ်ပြတ်မှုကြောင့် တိုင်းရင်းသားမာယာအင်ဒီးယန်းအုပ်စုတစ်စုသည် ၁၉၉၄၊ ဇန်နဝါရီလတွင် အဲခါဆီတို ဆာပါတီစ်တာ ဒီ လီဘဲရာစ်ယောန် နေရှယ်နယ်လ် (အီးဇက်အယ်လ်အယ်န်၊ အမျိုးသားလွတ်မြောက်ရေး ဆာပါတီစ်တာတပ်) အမည်ဖြင့် လက်နက်ကိုင်ပုန်ကန်ခဲ့၏။ ငြိမ်းချမ်းစွာဖြေရှင်းနိုင်ရန် စေ့စပ်ဆွေးနွေးပွဲများမှာ လိပ်ခဲတည်းလည်းဖြစ်ခဲ့သည်။ သူပုန်နှင့် အစိုးရစစ်သား နှစ်ဖက်စလုံးတို့၏ ရုတ်တရက်တိုက်ခိုက်မှုများကြောင့် သွေးထွက်သံယိုမှုနှင့် သေဆုံးမှုတို့ဖြစ်ပေါ်ခဲ့ရသည်။ ဗရုတ်ဗယက်ဖြစ်မှုကြောင့် ဤဒေသရှိတောင်သူလယ်သမားများသည် လုံခြုံရာသို့ထွက်ပြေးခဲ့ရသည်။
မရေရာမသေချာသော အခြေအနေများအလယ်၌ နိုင်ငံရေးလှုပ်ရှားမှုနှင့်စပ်လျဉ်း၍ ကြားနေခဲ့ကြသည့် ငြိမ်သက်ခြင်းကိုမြတ်နိုးသော အုပ်စုတစ်စုရှိသည်။ သူတို့သည် ဒေသအလိုက်သာမက ကမ္ဘာချီအတိုင်းအတာအထိပါ လူတို့ရင်ဆိုင်နေရသည့်ပြဿနာများကို ဖြေရှင်းဖို့အတွက် ဘုရားသခင့်နိုင်ငံတော်ကို တစ်ခုတည်းသောမျှော်လင့်ချက်အဖြစ် ထက်သန်စွာအာရုံစိုက်ကြသည်။ (ဒံယေလ ၂:၄၄၊ ၄၅) သူတို့ကား အဘယ်သူများနည်း။ ယေဟောဝါသက်သေများဖြစ်၏။ သူတို့သည် ယေရှု၏အမိန့်ကိုနာခံကာ လွန်စွာဝေးခေါင်သော ချီအာပါ့စ်ကုန်းမြင့်များသို့ ဘုရားသခင့်နိုင်ငံတော်သတင်းကောင်းကို သယ်ဆောင်သွားရန် ကြိုးစားလျက်ရှိသည်။ (မဿဲ ၂၄:၁၄) ဤသို့သောအခြေအနေမျိုးအောက်တွင် မည်သို့ဟောပြောနေကြပြီး အကျိုးရလဒ်ကားအဘယ်နည်း။
“ကျွန်တော်ဟာ ယေဟောဝါသက်သေတစ်ယောက်ပါ”
မကြာသေးမီက ဘုရားသခင့်နိုင်ငံတော်ကြေညာသူဖြစ်လာသည့် လူငယ်အဲဒေါ့လ်ဖိုသည် တစ်နေ့တွင် အိုကိုဆင်းဂိုမြို့ရှိ အသံလွှင့်ရုံ၌ အလုပ်လုပ်လျက်ရှိသည်။ ရုတ်တရက် ကျယ်လောင်သောတံခါးခေါက်သံ ကြားရသည်။ မျက်နှာဖုံးစွပ်လူတစ်စုသည် ဝုန်းဒိုင်းကျဲဝင်လာပြီး သူ၏ခေါင်းကို သေနတ်ဖြင့်ချိန်လိုက်သည်။ သူတို့သည် အသံလွှင့်အခန်းထဲသို့ တစ်ဟုန်ထိုးပြေးဝင်၍ စက်ကိရိယာများကို အပိုင်စီးကာ ရေဒီယိုမှတစ်ဆင့် အစိုးရကိုစစ်ကြေညာခဲ့သည်။
လက်နက်ကိုင်လူစုသည် အဲဒေါ့လ်ဖိုဘက်သို့လှည့်၍ မိမိတို့၏လှုပ်ရှားမှုတွင် ပူးပေါင်းပါဝင်ရန် အမိန့်ပေးခဲ့သည်။ အဲဒေါ့လ်ဖိုသည် နှစ်ခြင်းပင်မခံရသေးသော်လည်း “ကျွန်တော်ဟာ ယေဟောဝါသက်သေတစ်ယောက်ပါ” ဟုပြောခဲ့၏။ သူက ဘုရားသခင့်နိုင်ငံတော်သာလျှင် ငြိမ်းချမ်းရေးအတွက် တစ်ခုတည်းသောမျှော်လင့်ချက်ဖြစ်သည်ဟု ရှင်းပြခဲ့ပြီး သူတို့ကမ်းပေးသော ယူနီဖောင်းနှင့်သေနတ်ကို အခိုင်အမာငြင်းပယ်ခဲ့သည်။ သူ၏မားမားမတ်မတ်ရပ်တည်မှုကြောင့် သူတို့က ထွက်သွားခွင့်ပြုခဲ့သည်။ အဲဒေါ့လ်ဖိုသည် အဖြစ်သနစ်များကို ပြန်သတိရပြီး ဤသို့ပြောပြ၏– “အဲဒီအဖြစ်အပျက်က ကျွန်တော့်ရဲ့ယုံကြည်ခြင်းကို တကယ်ခိုင်ခံ့စေခဲ့တယ်။”
နောက်ဆုံး၌ အခြေအနေသည် အေးချမ်းသွားသော်လည်း ထိုဒေသသည် စစ်အုပ်ချုပ်မှုအောက်၌ပင် ရှိနေသေးသည်။ သို့ဖြစ်စေကာမူ၊ အဲဒေါ့လ်ဖိုသည် ဤ
ဒေသရှိ သီးခြားခရစ်ယာန်အုပ်စုနှင့်အတူ အမှုဆောင်ရန် ဒေသခံအသင်းတော်အကြီးအကဲများ၏ ဖိတ်ခေါ်ချက်ကို ဝမ်းပန်းတသာလက်ခံခဲ့၏။ သူဖြတ်သွားရသည့် စစ်ဆေးရေးဂိတ်များ၌ မိမိသည် ယေဟောဝါသက်သေတစ်ဦးဖြစ်ကြောင်း ပြောပြသောအခါ စစ်သားများက သူ့ကိုလေးစားမှုပြခဲ့ကြသည်။ နောက်ပိုင်းတွင် နှစ်ခြင်းခံခဲ့ပြီး သီးခြားအုပ်စုကို ယေဟောဝါသက်သေအသင်းတော်ဖြစ်လာရန် ကူညီပေးရခြင်း၏ကျေနပ်ရောင့်ရဲမှုကို ရရှိခဲ့သည်။ “အခု ကျွန်တော်နှစ်ခြင်းခံပြီးပြီ၊ ကျွန်တော်ဟာ ယေဟောဝါသက်သေတစ်ယောက်ပါလို့ ယုံကြည်စိတ်ချမှုအပြည့်နဲ့ပြောနိုင်ပြီ!” ဟုအဲဒေါ့လ်ဖို အခိုင်အမာပြောခဲ့သည်။“ကျွန်တော်တို့ကို ယေဟောဝါခွန်အားပေးခဲ့”
အီးဇက်အယ်လ်အယ်န်က အစိုးရကို ရေဒီယိုမှတစ်ဆင့် စစ်ကြေညာပြီး မကြာမီ မြို့သူမြို့သားများ ထွက်ပြေးခဲ့သည်။ အချိန်ပြည့်အမှုဆောင် သို့မဟုတ် ရှေ့ဆောင်ဖြစ်သူ ဖရန်စစ္စကိုသည် သူနှင့်သူ၏ဇနီး ဖြတ်သန်းတွေ့ကြုံခဲ့ရသမျှကိုခံနိုင်ရည်ရှိရန် ယေဟောဝါခွန်အားပေးခဲ့ပုံကို ရှင်းပြခဲ့၏။
“သုံးနာရီကြာခြေကျင်လျှောက်ရတဲ့ ဒေသတစ်ခုမှာခိုလှုံဖို့ ကျွန်တော်တို့ဆုံးဖြတ်ခဲ့ကြတယ်။ အဲဒီမှာ အသင်းတော်တစ်ခုရှိတဲ့အတွက် ကျွန်တော်တို့ဟာ ညီအစ်ကိုတွေနဲ့ရှိနေမယ်။ မကြာခင်မှာ ပါလင်န်ကေးမှာ တိုက်နယ်စည်းဝေးကျင်းပချိန်ရောက်လာတယ်။ ကျွန်တော့်ဇနီးနဲ့ကျွန်တော်ဟာ ရှေ့ဆောင်တွေအတွက် အထူးအစည်းအဝေးကို မလွတ်ချင်ကြဘူး၊ ဒါပေမဲ့ အစည်းအဝေးသွားရမယ့်လမ်းကို အီးဇက်အယ်လ်အယ်န်က ပိတ်ထားတယ်ဆိုတာ ကျွန်တော်တို့သိခဲ့ရတယ်။ ကိုးနာရီကြာတဲ့တောလမ်းကနေ သွားဖို့ဆုံးဖြတ်ခဲ့ကြတယ်။ ရှေ့ဆောင်အစည်းအဝေး တက်ရောက်ဖို့ အချိန်မီ ကျွန်တော်တို့ရောက်ခဲ့တယ်၊ အဲဒီအစည်းအဝေးနဲ့ အစည်းအဝေးကြီးအစီအစဉ်တစ်ခုလုံးကို တက်ရောက်ရတဲ့အတွက် ကျွန်တော်တို့အရမ်းကိုပျော်ခဲ့ရတယ်။
“ပြန်လာတဲ့အခါမှာ ကျွန်တော်တို့အိမ်ဟာ ပြာကျနေပြီး တိရစ္ဆာန်တွေအခိုးခံရတာကို တွေ့ခဲ့ရတယ်။ အဝတ်အိတ်လေးကလွဲလို့ ဘာမှမရှိတော့ဘူး။ ပစ္စည်းဆုံးရှုံးမှုအတွက် ကျွန်တော်တို့ဝမ်းနည်းခဲ့ပေမဲ့ အိုကိုဆင်းဂိုမြို့ကညီအစ်ကိုတွေဟာ သူတို့အိမ်ဆီ ကြင်နာစွာခေါ်သွားပါတယ်။ ကျွန်တော်တို့တစ်ခါမှမလုပ်ဖူးတဲ့ လယ်သမားအလုပ်ကို ဘယ်လိုလုပ်ရမလဲဆိုတာလည်းပြပေးတယ်။ ညီအစ်ကိုတစ်ယောက်က ဓာတ်ပုံပညာသင်ပေးပြီး နောက်တစ်ယောက်က ဖိနပ်ချုပ်နည်းသင်ပေးခဲ့တယ်။ အဲဒါတွေကြောင့် ကျွန်တော်တို့ဇနီးမောင်နှံဟာ ခုထိ ရှေ့ဆောင်လုပ်ငန်းကို မရပ်တန့်ဘဲ ကိုယ့်ကိုယ်ကို ထောက်ပံ့နိုင်ခဲ့ကြတယ်။ ဖြစ်ပျက်ခဲ့သမျှကို ပြန်ပြောင်းတွေးကြည့်မယ်ဆိုရင် ခံနိုင်ရည်ရှိဖို့ ကျွန်တော်တို့အတွက်မလွယ်ပေမဲ့ ကျွန်တော်တို့ကို ယေဟောဝါခွန်အားပေးခဲ့တယ်ဆိုတာ သဘောပေါက်နိုင်တယ်။”
ဟောပြောခြင်းလုပ်ငန်း၏အသီးအပွင့်
ချီအာပါ့စ်ပြည်နယ်မှ သက်သေခံများသည် အခက်အခဲပြဿနာနှင့်အန္တရာယ်တို့ကြောင့် ဤဒေသရှိလူများထံ သတင်းကောင်းဝေငှရန် အထူးကြိုးစားမှုတွင်ပါဝင်ခြင်းကို အတားအဆီးမဖြစ်စေခဲ့ကြချေ။ ဥပမာ၊ သူတို့သည် လွန်ခဲ့သော ၁၉၉၅၊ ဧပြီနှင့်မေလတို့တွင် ဘဝသည် ပြဿနာများနှင့် အဘယ်ကြင့် ဤမျှပြည့်နှက်နေသနည်း ဟူသော အသင့်လျော်ဆုံးခေါင်းစဉ်ဖြင့် ဘုရားသခင့်နိုင်ငံတော်သတင်း နံပါတ် ၃၄ ကိုဝေငှသည့်ကင်ပိန်းတစ်ခုတွင် ကမ္ဘာချီခရစ်ယာန်ချင်းများနှင့် ပူးပေါင်းခဲ့သည်။
ကင်ပိန်းအတွင်း ဗွဲ့ဘလို နဝဲဘိုဟုခေါ်သောဒေသတွင် မှန်မှန်ရှေ့ဆောင်ဆီရိုသည် စိတ်ဝင်စားမှုပြခဲ့ကြသော မိသားစုတစ်စုကိုတွေ့ရှိခဲ့သည်။ သူသည် နောက်သုံးရက်အကြာတွင် ပြန်သွားကာ သူတို့နှင့်ကျမ်းစာသင်အံမှု စတင်နိုင်ခဲ့သည်။ သို့ရာတွင် ဆီရိုနှင့်အဖော်တစ်ဦးသည် ထိုမိသားစုကို သင်အံမှုဆက်လုပ်ရန် ပြန်သွားသောအခါ အိမ်၌ အိမ်ထောင်ဦးစီးမရှိချေ။ ယင်းအစား၊ မျက်နှာဖုံးစွပ်လူတစ်စုသည် သူ့ကိုအန္တရာယ်ပြုရန် စောင့်နေကြသည်။ ဘာလိုက်ရှာနေကြတာလဲဟုမေးပြီး သတ်ပစ်မည်ဟု ဆီရိုနှင့်အဖော်တို့ကို ခြိမ်းခြောက်ခဲ့သည်။ ထိုခရစ်ယာန်နှစ်ဦးသည် ယေဟောဝါထံ တိတ်ဆိတ်စွာဆုတောင်းပြီးနောက် မိမိတို့သည် ဤမိသားစုကို ကျမ်းစာသင်ပေးရန် ရောက်လာခြင်းဖြစ်သည်ဟု သတ္တိရှိရှိရှင်းပြခဲ့၏။ မျက်နှာဖုံးစွပ်လူတို့သည် သူတို့အား ပြန်လွှတ်လိုက်သည်။ အကြောင်းတစ်ခုခုကြောင့် အိမ်ထောင်ဦးစီးသည် ထိုနေ့တွင် အိမ်သို့လုံးဝပြန်မလာတော့ချေ။
နောက်သုံးနှစ်နီးပါးအကြာ တစ်နေ့တွင် ဆီရိုသည် မိမိ၏တံခါးပေါက်၌ ထိုလူရောက်လာသည်ကိုမြင်တွေ့ရသောအခါ အံ့သြခဲ့ရသည်။ မိသားစုတစ်စုလုံး နှစ်ခြင်းခံပြီး၍ ယခု ဂွာတီမာလာရှိ အသင်းတော်တစ်ခုနှင့်ပူးပေါင်းနေသည်ကို ဆီရိုသိရ၍ တကယ့်ကိုဝမ်းသာပီတိဖြစ်ခဲ့ရသည်! သမီးတစ်ဦးပင် မှန်မှန်ရှေ့ဆောင်လုပ်နေပြီ။
ဝိညာဉ်အစာကို လေးမြတ်တန်ဖိုးထားခြင်း
ချီအာပါ့စ်တွင် အခက်အခဲများဆက်ရှိသော်လည်း ထိုဒေသမှညီအစ်ကိုများသည် အတူတကွစည်းဝေးရခြင်း၏အရေးကြီးပုံကို အမှန်ပင်လေးမြတ်တန်ဖိုးထားကြကြောင်း ခရိုင်ကြီးကြပ်မှူးတစ်ဦးက မှတ်တမ်းပေးပို့ခဲ့သည်။ (ဟေဗြဲ ၁၀:၂၄၊ ၂၅) တက်ရောက်ကြသူများ နေ့အချိန်၌ လုံခြုံစွာအိမ်ပြန်နိုင်ဖို့ နံနက်စောစောစတင်ရန် စီစဉ်ခဲ့ရသည့် မကြာသေးမီက ကျင်းပသောအထူးအစည်းအဝေးနေ့အကြောင်းကို သူ ပြောပြသည်။ အများစုသည် စည်းဝေးသို့ တောလမ်းမှဖြတ်၍ သုံးနာရီကျော်ဖြတ်လျှောက်ရသော်လည်း လူတိုင်းသည် နံနက် ၇ နာရီတွင် ထိုင်ခုံတွင်ရှိနေကြပြီ။ ပရိသတ်ထဲတွင် အီးဇက်အယ်လ်အယ်န်အဖွဲ့ဝင်ခြောက်ဦးပါရှိပြီး သူတို့သည် ဤအစီအစဉ်ကို နားထောင်၍ ဩဘာပေးကာ နှစ်သက်နေကြကြောင်း ထင်ရှားပါသည်။ သူတို့လည်း အစည်းအဝေးကိုတက်ရောက်ရန် သုံးနာရီကြာ လမ်းလျှောက်ခဲ့ရ၏။ သူတို့ထဲမှအယောက်နှစ်ဆယ်သည် ဒေသခံဘုရားသခင့်နိုင်ငံတော်ခန်းမတွင်ကျင်းပသော ခရစ်တော်၏သေခြင်းသတိရအောက်မေ့ပွဲကိုလည်း တက်ရောက်ခဲ့ကြသည်။
ပြောက်ကျားလှုပ်ရှားမှုမှ လူငယ်နောက်တစ်ဦးကို သူ၏အထက်လူကြီးများက တောတွင်းဒေသတစ်ခုတွင် ကင်းလှည့်ရန်တာဝန်ပေးခဲ့သည်။ ထိုဒေသသို့ရောက်သောအခါ နေထိုင်သူများမှာ အများအားဖြင့် ယေဟောဝါသက်သေများဖြစ်ကြပြီး သူတို့ထွက်ပြေးသွားကြသည်ကို သူတွေ့ရှိခဲ့သည်။ ထို့ကြောင့် သူသည် စွန့်ပစ်ထားသောအိမ်တစ်အိမ်တွင် နေထိုင်ခဲ့၏။ လုပ်စရာများများစားစားမရှိသောကြောင့် သူသည် အိမ်ဝန်းကျင်တွင်တွေ့ရှိရသော စာအုပ်အချို့ကိုယူကာ စဖတ်ခဲ့သည်။ ဤစာအုပ်များမှာ သက်သေခံများကျန်ရစ်ခဲ့သော ကင်းမျှော်စင်စာပေများဖြစ်သည်။ ထိုလူငယ်တစ်ဦးတည်းရှိနေချိန်၌ သူဖတ်နေသောအကြောင်းအရာကို ဆင်ခြင်သုံးသပ်ချိန်ရခဲ့သည်။ မိမိ၏အသက်တာကိုပြောင်းလဲပြီး လက်နက်ချတော့မည်ဟု ဆုံးဖြတ်ချက်ချခဲ့သည်။ သူတတ်နိုင်သည်နှင့်တစ်ပြိုင်နက် သက်သေခံများကိုရှာတွေ့ကာ ကျမ်းစာသင်အံမှုစတင်ခဲ့၏။ ခြောက်လအတွင်း သူသည် အခြားသူများကို သတင်းကောင်းပြောနေလေတော့သည်။ ပြောက်ကျားလှုပ်ရှားမှုကို ထောက်ခံကြသော သူနှင့်သူ၏မိသားစုဝင်အခြားသုံးဦးတို့သည် ယခု နှစ်ခြင်းခံပြီးသောခရစ်ယာန်များဖြစ်နေကြပြီ။
အပြုသဘောဘက်မှရှုမြင်ခြင်း
အကြီးအကျယ်ခက်ခဲကျပ်တည်းမှုရှိသော်ငြားလည်း ဤပဋိပက္ခသည် ဟောပြောခြင်းလုပ်ငန်းနှင့်ပတ်သက်၍ လူတို့၏စိတ်သဘောထားကို အပြုသဘောပါလွှမ်းမိုးမှု အမှန်ပင်ရှိခဲ့သည်။ ရုန်းရင်းဆန်ခတ်စတင်ဖြစ်ပွားခဲ့သောမြို့မှ အကြီးအကဲတစ်ဦးက ဤသို့ပြောပြ၏– “တိုက်ခိုက်မှုဖြစ်ပွားပြီး ငါးရက်လောက်မှာ မြို့တွင်းမြို့ပြင်နှစ်ခုစလုံးမှာဟောပြောခြင်းလုပ်ငန်းကို စနစ်တကျဖွဲ့စည်းခဲ့တယ်။ လူတွေဟာ ထက်ထက်သန်သန်နားထောင်ခဲ့ကြတယ်။ ကျွန်တော်တို့ ကျမ်းစာစာပေအတော်များများကို ဝေငှခဲ့ပြီး ကျမ်းစာသင်အံမှုအချို့ စတင်ခဲ့တယ်။ ဒေသတစ်ခုကလူတွေဟာ အမှန်တရားကို အတိုက်အခံပြုခဲ့ကြပေမဲ့ အဲဒီရုန်းရင်းဆန်ခတ်မှုကြောင့် အခုဆိုရင် သူတို့နားထောင်တယ်၊ ကျမ်းစာလေ့လာတယ်၊ အစည်းအဝေးတွေနဲ့ အစည်းအဝေးကြီးများကို တက်ရောက်နေကြပြီ။”
အခြေအနေများမတည်ငြိမ်သော်လည်း သီအိုကရက်တစ်လုပ်ငန်းများကို ဆက်၍လုပ်ဆောင်နိုင်သောကြောင့် ညီအစ်ကိုများ ပျော်ရွှင်လျက်ရှိကြသည်။ သူတို့သည် အစိုးရတပ်နှင့် အီးဇက်အယ်လ်အယ်န်တို့၏ အသိအမှတ်ပြုမှုဖြင့် ဝိညာဉ်ခွန်အားပေးသည့် အစည်းအဝေးကြီးများကို ဆက်၍ကျင်းပလျက်ရှိသည်။ နယ်လှည့်ကြီးကြပ်မှူးများ၏လည်ပတ်ခြင်းကလည်း ဟောပြောခြင်းလုပ်ငန်းကို ဆက်လုပ်ဆောင်ရန် ထိရောက်ထက်မြက်သောစွမ်းအားဖြစ်စေခဲ့သည်။ စိတ်ဝင်စားစရာမှာ ထိပ်တိုက်တိုက်ခိုက်ခြင်းတွင်ပါဝင်သူများကပင် သက်သေခံများ၏ဟောပြောခြင်းလုပ်ငန်းကို ဆက်လုပ်ဆောင်ရန်တိုက်တွန်းလေ့ရှိကြခြင်းဖြစ်သည်။
အချိန်ကုန်လွန်သွားသည်နှင့်အမျှ ချီအာပါ့စ်မှလူတို့ခံရပ်ခဲ့ကြသော စမ်းသပ်မှုများနှင့်အခက်အခဲများ လျော့နည်းသွားသော်လည်း သူတို့သည် ရပ်တန့်မသွားခဲ့ကြချေ။ မည်သို့ပင်ဖြစ်ပါစေ၊ သေချာသောအချက်တစ်ချက်မှာ ယေဟောဝါသက်သေများသည် ဘုရားသခင့်နှုတ်မြွက်စကားတော် သမ္မာကျမ်းစာမှ ငြိမ်သက်ခြင်းသတင်းကောင်းကို လူတို့ထံသယ်ဆောင်ရန် မိမိတို့၏ကြိုးစားအားထုတ်မှုကို လက်မလျှော့ဘဲ ဆက်လုပ်ဆောင်သွားဖို့ သန္နိဋ္ဌာန်ချထားခြင်းဖြစ်သည်။ (တမန်တော် ၁၀:၃၄-၃၆; ဧဖက် ၆:၁၅) “လူသည် မိမိသွားရာလမ်းကိုအစိုးမရ။ သွားစဉ်အခါ မိမိခြေရာတို့ကို မစီရင်တတ်” ဟူသော ပရောဖက်ယေရမိပြောကြားချက်အတိုင်း သူတို့အသိအမှတ်ပြုကြသည်။ (ယေရမိ ၁၀:၂၃) ဘုရားသခင်၏သားတော် ယေရှုခရစ်လက်တွင်ရှိသော ဘုရားသခင့်နိုင်ငံတော်သာလျှင် ဤလောကရှိမတရားမှုနှင့်ဆင်းရဲမှုတို့ကို ဖြေရှင်းပေးနိုင်သည်။—မဿဲ ၆:၁၀။
[စာမျက်နှာ ၉ ပါ မြေပုံ]
(ကားချက်အပြအစုံကို စာစောင်တွင်ကြည့်ပါ)
မက္ကဆီကိုပင်လယ်ကွေ့
ချီအာပါ့စ်
ဂွာတီမာလာ
ပစိဖိတ်သမုဒ္ဒရာ
[Credit Line]
Mountain High Maps® Copyright © 1997 Digital Wisdom, Inc.
[စာမျက်နှာ ၉ ပါ ရုပ်ပုံ]
ချီအာပါ့စ်ကုန်းမြင့်များတွင် အမှုဆောင်နေကြသော သက်သေခံများ