ဘုရားသခင်ကို သင်အဘယ်ကြောင့် ဝတ်ပြုသနည်း
ဘုရားသခင်ကို သင်အဘယ်ကြောင့် ဝတ်ပြုသနည်း
ဘုရားသခင်ကိုကြောက်ရွံ့သောဘုရင်တစ်ပါးသည် တစ်ခါက မိမိသားတော်အား ဤသို့အကြံပေးခဲ့သည်– “သင့်အဘ၏ဘုရားသခင်ကိုသိလော့။ စုံလင်သောနှလုံး၊ ကြည်ညိုသောစိတ်သဘောနှင့်ဝတ်ပြုလော့။” (၁ ရာဇဝင်ချုပ် ၂၈:၉) ရှင်းနေသည်မှာ ကိုယ်တော့်ကျေးကျွန်များ ကိုယ်တော်အား ကျေးဇူးတင်လေးမြတ်သည့်နှလုံးနှင့်ဝတ်ပြုရန် ယေဟောဝါအလိုရှိတော်မူသည်။
ယေဟောဝါသက်သေများအနေနှင့် ကျွန်ုပ်တို့သည် ကျမ်းစာကတိတော်များအကြောင်းရှင်းပြသည်ကို ဦးဆုံးကြားရချိန်တွင် ကျွန်ုပ်တို့၏နှလုံးသည် ကျေးဇူးတင်စိတ်များနှင့်ပြည့်လျှံခဲ့သည်ကို အလွယ်တကူဝန်ခံကြပေမည်။ နေ့စဉ် ဘုရားသခင့်ရည်ရွယ်ချက်များနှင့်စပ်လျဉ်းသည့် အသစ်သောအရာကို ကျွန်ုပ်တို့သင်ယူခဲ့ရသည်။ ယေဟောဝါအကြောင်း ကျွန်ုပ်တို့ပို၍သိရှိလာလေ ကိုယ်တော်အား “စုံလင်သောနှလုံး၊ ကြည်ညိုသောစိတ်သဘောနှင့်” ဝတ်ပြုလိုစိတ် ပို၍ပြင်းပြလာလေဖြစ်သည်။
ယေဟောဝါသက်သေဖြစ်လာသည့် များစွာသောသူတို့သည် သူတို့အသက်တာတစ်လျှောက်လုံး အတိုင်းမသိရွှင်လန်းမှုနှင့် ယေဟောဝါကိုဆက်၍ဝတ်ပြုကြသည်။ သို့ရာတွင် ခရစ်ယာန်အချို့သည် အစကောင်းကြသော်လည်း ကျွန်ုပ်တို့ကိုလှုံ့ဆော်ပေးသော ဘုရားသခင်အားဝတ်ပြုစေသည့်အကြောင်းရင်းများကို တဖြည်းဖြည်း မျက်ခြည်ပြတ်သွားကြသည်။ ယင်းသို့ သင်ဖြစ်ခဲ့ပါသလော။ ဖြစ်ခဲ့လျှင် စိတ်မပျက်ပါနှင့်။ ပျောက်ဆုံးသွားသည့်ရွှင်လန်းမှုကို ပြန်ရယူနိုင်သည်။ မည်သို့အားဖြင့်နည်း။
သင့်ကောင်းချီးများကို ရေတွက်ကြည့်ပါ
ဦးစွာ ဘုရားသခင်ထံမှ နေ့စဉ်ရရှိသည့် ကောင်းချီးမင်္ဂလာများကို စဉ်းစားသုံးသပ်ကြည့်ပါ။ ယေဟောဝါ၏ ကောင်းမြတ်သည့်ဆုကျေးဇူးများကို တွေးကြည့်ပါ– လူမှုရေး သို့မဟုတ် စီးပွားရေးအဆင့်အတန်းမရွေး အားလုံးရရှိနိုင်သည့် ကိုယ်တော်၏အထူးထူးအပြားပြားသော ဖန်ဆင်းခြင်းလက်ရာတော်များ၊ သဘာဝအစားအသောက် ပြင်ဆင်ပေးရာများ၊ သင်ပျော်မွေ့နိုင်သည့် အတော်အတန်ကောင်းသောကျန်းမာရေး၊ သမ္မာကျမ်းစာအသိပညာနှင့် အဓိကအားဖြင့် သားတော်ကိုပေးဆက်မှုတို့ဖြစ်သည်။ ကိုယ်တော်၏သေခြင်းသည် ကြည်လင်သောကိုယ်ကိုကိုယ်သိသောစိတ်နှင့် ဘုရားသခင်ကိုဝတ်ပြုနိုင်ရန် လမ်းခင်းပေးသည်။ (ယောဟန် ၃:၁၆; ယာကုပ် ၁:၁၇) ဘုရားသခင်၏ကောင်းမြတ်ခြင်းများကို ပို၍ဆင်ခြင်သုံးသပ်လေ ကိုယ်တော်ကိုကျေးဇူးတင်လေးမြတ်စိတ် တိုးများလာလေဖြစ်မည်။ ထိုအခါ သင့်နှလုံးသည် ကိုယ်တော်ပြုလုပ်ပေးထားရာအားလုံးအတွက် ကျေးဇူးတင်စိတ်ဖြင့် ကိုယ်တော်ကိုဝတ်ပြုရန် လှုံ့ဆော်ပေးမည်ဖြစ်သည်။ ဤသို့ရေးသားခဲ့သောဆာလံဆရာကဲ့သို့ သင်တစ်ဖန်ခံစားလာရမည်သေချာသည်– “အကျွန်ုပ်၏ဘုရားသခင်ထာဝရဘုရား အကျွန်ုပ်တို့အဖို့ပြုတော်မူသော အံ့သြဖွယ်အမှုတို့နှင့် ကြံစည်တော်မူသောအကြံအစည်တို့သည် များလှပါ၏။ ရှေ့တော်၌ အစဉ်အတိုင်းလျှောက်၍မကုန်နိုင်ပါ။ . . . ရေတွက်၍မကုန်နိုင်အောင်များလှပါ၏။”—ဆာလံ ၄၀:၅။
ဤစကားများကိုရေးခဲ့သည့် ဒါဝိဒ်၏ဘဝသည် ပြဿနာများနှင့်မကင်းခဲ့ပါ။ လူငယ်တစ်ဦးအနေနှင့် ဒါဝိဒ်၏အချိန်အများစုမှာ မိမိအားသတ်ရန် ဆိုးညစ်သောဘုရင်ရှောလုနှင့် သူ၏ကိုယ်ရံတော်တို့၏လိုက်လံရှာဖွေမှုကြောင့် ထွက်ပြေးတိမ်းရှောင်ခြင်းဖြင့်ကုန်ခဲ့ရသည်။ (၁ ဓမ္မရာဇဝင် ၂၃:၇၊ ၈၊ ၁၉-၂၃) ဒါဝိဒ်တွန်းလှန်ရမည့် ကိုယ်ပိုင်အားနည်းချက်များလည်းရှိခဲ့သည်။ ဆာလံ ၄၀ တွင်ဤအရာကို သူအသိအမှတ်ပြုခဲ့သည်– “အတိုင်းမသိများစွာသောဘေးဥပဒ်တို့သည် အကျွန်ုပ်ကိုဝိုင်းကြပါပြီ။ အကျွန်ုပ်မျှော်၍ မကြည့်နိုင်အောင်ခံရသောအပြစ်တို့သည် အကျွန်ုပ်ကိုမီကြပါပြီ။ အကျွန်ုပ်ဆံပင်ထက်များပြားသည်။” (ဆာလံ ၄၀:၁၂) မှန်ပါသည်၊ ဒါဝိဒ်တွင်ပြဿနာများရှိခဲ့သော်လည်း ယင်းတို့က သူ့အားလုံးဝအနိုင်ယူလွှမ်းမိုးမသွားခဲ့ပါ။ သူ၏ပြဿနာများအစား မိမိအား ယေဟောဝါကောင်းချီးပေးသည့်လမ်းစဉ်များကိုအာရုံစိုက်ခဲ့ရာ ယင်းကောင်းချီးများက သူခံရသည့်ဆင်းရဲခြင်းထက် များစွာအလေးသာကြောင်းတွေ့ခဲ့ရသည်။
ကိုယ်ရေးကိုယ်တာပြဿနာများ သို့မဟုတ် အရည်အချင်းမပြည့်မီဟူသောခံစားချက်တို့ဖြင့် ဖိစီးခံရသောအခါ ဒါဝိဒ်ကဲ့သို့ ရပ်တန့်ပြီး သင်၏ကောင်းချီးများကိုရေတွက်ကြည့်ဖို့ကောင်းသည်။ ယင်းသို့သောကောင်းချီးများကို ကျေးဇူးတင်လေးမြတ်ခြင်းက ယေဟောဝါထံ သင့်ကိုယ်ကိုဆက်ကပ်အပ်နှံရန် လှုံ့ဆော်ခဲ့သည်မှာသေချာသည်; ယင်းသို့တွေးတောဆင်ခြင်ခြင်းက ပျောက်ဆုံးနေသောရွှင်လန်းမှုကို ပြန်ရရှိစေနိုင်ပြီး ကျေးဇူးတင်လေးမြတ်သည့်နှလုံးနှင့် ဘုရားသခင်ကို ဝတ်ပြုရန်ကူညီပေးသည်။
အသင်းတော်စည်းဝေးများက ကူညီပေးနိုင်
ယေဟောဝါ၏ကောင်းမြတ်ခြင်းကို တစ်ဦးတည်းဆင်ခြင်သုံးသပ်ခြင်းအပြင် ခရစ်ယာန်ချင်းတို့နှင့် ပေါင်းသင်းရန်လိုအပ်သည်။ ဘုရားသခင်ကိုချစ်ပြီး ကိုယ်တော်ကိုဝတ်ပြုရန်ဆုံးဖြတ်ထားကြသည့် အမျိုးသား၊ အမျိုးသမီး၊ လူငယ်များနှင့် မှန်မှန်တွေ့ဆုံခြင်းသည် အားရှိစရာဖြစ်၏။ သူတို့၏ပုံသက်သေက ကျွန်ုပ်တို့ကို ယေဟောဝါ၏အမှုတော်တွင် နှလုံးအပြည့်အဝလုပ်ဆောင်ရန် လှုံ့ဆော်ပေးနိုင်သည်။ ဘုရားသခင့်နိုင်ငံတော်ခန်းမတွင် ကျွန်ုပ်တို့ရှိနေခြင်းက သူတို့အတွက်လည်းအားပေးမှုဖြစ်နိုင်သည်။
ပင်ပန်းစွာလုပ်ကိုင်ရသောတစ်နေ့တာလုပ်ငန်းပြီး၍ အိမ်ပြန်ရောက်သည့်အခါမျိုး သို့မဟုတ် အချို့သောပြဿနာ၊ အားနည်းချက်များကြောင့် စိတ်ဓာတ်ကျသည့်အခါမျိုးတို့တွင် ကျွန်ုပ်တို့သည် ဘုရားသခင့်နိုင်ငံတော်ခန်းမ၌ စည်းဝေးသွားတက်ရန်စဉ်းစားဖို့ လွယ်ကူမည်မဟုတ်သည်မှာ မှန်ပါသည်။ ယင်းသို့သောအချိန်များတွင် ခရစ်ယာန်ချင်းများနှင့်အတူ စည်းဝေးခြင်းအမိန့်တော်ကို နာခံရန်အလို့ငှာ ‘ကျွန်ုပ်တို့၏ကိုယ်ကို ထိုးနှက်နှိပ်စက်’ ဘိသကဲ့သို့ ကိုယ့်ကိုယ်ကို ကြပ်မတ်ရပေမည်။—၁ ကောရိန္သု ၉:၂၆၊ ၂၇; ဟေဗြဲ ၁၀:၂၃-၂၅။
ယင်းသို့ပြုရန်လိုအပ်လာလျှင် ယေဟောဝါကိုကျွန်ုပ်တို့အမှန်တကယ်မချစ်ဟု ကောက်ချက်ချသင့်သလော။ မချသင့်ပါ။ ဘုရားသခင်ကိုချစ်သည့် အတိတ်က ရင့်ကျက်သည့်ခရစ်ယာန်များသည် ဘုရားသခင့်အလိုတော်ကိုဆောင်ရွက်ရန် ပြင်းထန်စွာဝီရိယစိုက်ထုတ်ခဲ့ရမည်မှာ မလွဲဧကန်ပင်။ (လုကာ ၁၃:၂၄) တမန်တော်ပေါလုသည် ယင်းသို့သောခရစ်ယာန်တစ်ဦးဖြစ်သည်။ ဤနည်းဖြင့်သူ၏ခံစားချက်များကို မကွယ်မထောင့်ဖော်ပြခဲ့သည်– “ငါ့အထဲမှာ ငါ့ဇာတိပကတိ၌ ကောင်းသောအရာတစ်စုံတစ်ခုမျှမတည်သည်ကို ငါသိ၏။ အကြောင်းမူကား၊ ငါသည် ကျင့်ချင်သောစိတ်ရှိသော်လည်း၊ ကောင်းစွာကျင့်တတ်သောအခွင့်ကို ရှာ၍မတွေ့နိုင်။ ငါသည် ကျင့်ချင်သောအကျင့်ကောင်းကိုမကျင့်၊ မကျင့်ချင်သောအကျင့်ဆိုးကိုကျင့်၏။” (ရောမ ၇:၁၈၊ ၁၉) ထို့အပြင် ကောရိန္သုမြို့သားများကို ဤသို့ပြောခဲ့သည်– “ငါသည်ဧဝံဂေလိတရားကိုဟောရုံပြုလျှင် ဝါကြွားခြင်းအကြောင်းမရှိသေး။ အဘယ်ကြောင့်နည်းဟူမူကား မဟောဘဲမနေနိုင်။ . . . သို့ဖြစ်၍ အမှုတော်ကို အလိုအလျောက်ဆောင်ရွက်လျှင် အကျိုးရှိ၏။ ကိုယ်အလိုကိုငြင်းဆန်၍ဆောင်ရွက်လျှင် အရာတော်၌ခန့်ထားသောသူဖြစ်၏။”—၁ ကောရိန္သု ၉:၁၆၊ ၁၇။
ကျွန်ုပ်တို့ကဲ့သို့ပင် ပေါလု၌ မှန်ရာလုပ်လိုသောဆန္ဒကိုတားဆီးသည့် အပြစ်ပြုလိုသောဉာဉ်ဆိုးရှိခဲ့သည်။ သို့ရာတွင် ယင်းသို့သောဉာဉ်ဆိုးများကို ပြင်းထန်စွာတွန်းလှန်ခဲ့ပြီး အများအားဖြင့် သူအောင်မြင်မှုရခဲ့သည်။ ပေါလုသည် သူ၏အစွမ်းအစဖြင့် ယင်းကို အောင်မြင်ခဲ့ခြင်းမဟုတ်ပါ။ သူဤသို့ရေးခဲ့သည်– “ငါ့ကိုခွန်အားနှင့်ပြည့်စုံစေတော်မူသော ခရစ်တော်အားဖြင့် ခပ်သိမ်းသောအမှုတို့ကို ငါတတ်စွမ်းနိုင်၏။” (ဖိလိပ္ပိ ၄:၁၃) ပေါလုကို အစွမ်းခွန်အားပေးခဲ့သည့်အရှင် ယေဟောဝါထံ အကူအညီအတွက် သင်အသနားခံလျှင် ကိုယ်တော်သည် သင့်အားလည်း မှန်ရာကိုလုပ်ဆောင်ရန် အစွမ်းခွန်အား ပေးတော်မူမည်။ (ဖိလိပ္ပိ ၄:၆၊ ၇) ထို့ကြောင့် “ယုံကြည်ခြင်းတရားဘက်မှာ . . . ကြိုးစား၍တိုက်လှန်” ပါ၊ သင့်အား ယေဟောဝါ ကောင်းချီးပေးမည်ဖြစ်သည်။—ယုဒ ၃။
ဤတိုက်ပွဲကို သင်တစ်ဦးတည်းတိုက်ဖို့မလိုပါ။ ယေဟောဝါသက်သေများ၏အသင်းတော်များတွင် “ယုံကြည်ခြင်းတရားဘက်မှာ . . . တိုက်လှန်” ခြင်း၌ စွဲမြဲစွာပြုလုပ်ခဲ့ကြသည့် ရင့်ကျက်သည့်ခရစ်ယာန်အကြီးအကဲများသည် သင့်ကိုကူညီရန် အသင့်ရှိကြသည်။ အကူအညီအတွက် အကြီးအကဲတစ်ဦးထံချဉ်းကပ်လျှင် သင့်ကို ကြိုးစား၍ “အားပေး” ကြမည်ဖြစ်သည်။ (၁ သက်သာလောနိတ် ၅:၁၄) သူ၏ရည်ရွယ်ရင်းသည် “လေလုံ၍ မိုးသက်မုန်တိုင်းကွယ်ရာအရပ်ကဲ့သို့” ပြုရန်ဖြစ်ပေလိမ့်မည်။—ဟေရှာယ ၃၂:၂။
“ဘုရားသခင်သည် ချစ်ခြင်းမေတ္တာဖြစ်တော်မူ” ၍ကိုယ်တော့်ကျေးကျွန်များ ကိုယ်တော်ကိုချစ်မြတ်နိုးစွာဝတ်ပြုရန် အလိုရှိတော်မူသည်။ (၁ ယောဟန် ၄:၈) ဘုရားသခင်ကိုချစ်သည့် သင့်မေတ္တာပြန်လည်ရှင်သန်ဖို့လိုလျှင် အထက်တွင်ဖော်ပြခဲ့သကဲ့သို့ သင့်လျော်သည့်ခြေလှမ်းများကိုလှမ်းပါ။ ထိုသို့ပြုလုပ်ခြင်းဖြင့် သင်ပျော်ရွှင်ပေလိမ့်မည်။