ယေဟောဝါနှင့်ထိုက်တန်စွာလျှောက်လှမ်းဖို့ အခြားသူတို့ကိုကူညီပေး
ယေဟောဝါနှင့်ထိုက်တန်စွာလျှောက်လှမ်းဖို့ အခြားသူတို့ကိုကူညီပေး
“ငါတို့သည် . . . သင်တို့အဖို့အလိုငှာ အစဉ်မပြတ် ဆုတောင်းလျက် . . . ကောင်းမှုအသီးအမျိုးမျိုးကိုသီးသည့်အလျောက် စိတ်တော်နှင့်တွေ့ခြင်းငှာ ယေဟောဝါနှင့်ထိုက်တန်စွာလျှောက်လှမ်းမည့်အကြောင်း တောင်းလျှောက်နေကြ၏။”—ကောလောသဲ ၁:၉၊ ၁၀၊ ကဘ။
၁၊ ၂။ အဘယ်အရာက အထူးသဖြင့် ရွှင်လန်းမှုနှင့် စိတ်ကျေနပ်မှု၏ရင်းမြစ်တစ်ခု ဖြစ်နိုင်သနည်း။
“ကားနောက်တွဲအိမ်လေးနဲ့ ယာခင်းတစ်ခုမှာ ကျွန်တော်တို့နေထိုင်ကြတယ်။ ကျွန်တော်တို့ရဲ့ဘဝကို ရိုးရှင်းအောင်ထားခြင်းဖြင့် လူတို့ထံသတင်းကောင်းရောက်ရှိစေဖို့ ကျွန်တော်တို့ အချိန်ပိုရတယ်။ ယေဟောဝါထံ မိမိတို့ရဲ့ဘဝကို ဆက်ကပ်အပ်နှံဖို့ လူများစွာကို ကူညီပေးနေရတဲ့အခွင့်အရေးနဲ့ ကျွန်တော်တို့ဟာ ကောင်းချီးမင်္ဂလာကြွယ်ဝစွာရရှိခဲ့ကြပါတယ်။”—တောင်အာဖရိကတိုက်ရှိ အချိန်ပြည့်အမှုတော်ဆောင်များဖြစ်ကြသော မောင်နှံစုံတစ်စုံ။
၂ အခြားသူတို့ကို ကူညီပေးနေခြင်းက ရွှင်လန်းမှုဖြစ်စေကြောင်း သင်သဘောမတူပေလော။ အချို့သည် ဖျားနာနေသူ၊ လက်မဲ့ဘဝဖြစ်နေသူ သို့မဟုတ် အထီးကျန်နေသူတို့ကို ပုံမှန်ကူညီရန်ကြိုးစားခြင်းဖြင့် စိတ်ကျေနပ်ရောင့်ရဲမှု ရယူနေကြ၏။ စစ်မှန်သောခရစ်ယာန်များမူ ယေဟောဝါဘုရားသခင်၊ ယေရှုခရစ်တို့နှင့်ပတ်သက်သည့်အသိပညာကို အခြားသူတို့ထံ မိမိတို့ဝေမျှပေးနေခြင်းက မိမိတို့ပေးကမ်းနိုင်သော အကြီးမားဆုံးအကူအညီဖြစ်ကြောင်း ယုံကြည်စိတ်ချထားကြသည်။ ယင်းသာလျှင် အခြားသူတို့အား ယေရှု၏ရွေးနုတ်ဖိုးကိုလက်ခံစေရန်၊ ဘုရားသခင်နှင့်ကောင်းသောဆက်ဆံရေး တိုးတက်စေရန်နှင့် ထာဝရအသက်အတွက် လျာထားခံရရန် စွမ်းဆောင်ပေးနိုင်သည်။—တမန်တော် ၃:၁၉-၂၁; ၁၃:၄၈။
၃။ အဘယ်အကူအညီပေးမှုမျိုးကို ကျွန်ုပ်တို့အာရုံစိုက်သင့်သနည်း။
၃ သို့သော် ဘုရားသခင်အားဝတ်ပြုကိုးကွယ်လျက်ရှိသော၊ “လမ်းစဉ်တော်” ကိုလိုက်လျှောက်လျက်ရှိနှင့်သောသူတို့ကို ကူညီခြင်းနှင့်ပတ်သက်၍ အသို့နည်း။ (တမန်တော် ၁၉:၉၊ သတင်းကောင်း) သူတို့အပေါ် ယခင်ကထက် သင်ပို၍စိတ်ဝင်စားမည်ကားအမှန်၊ သို့သော် သာ၍မည်သို့ပြုလုပ်နိုင်ပုံ သို့မဟုတ် ပေးလျက်ရှိသောအကူအညီကို မည်သို့တိုးချဲ့နိုင်ပုံကို သင်မသိမြင်ဘဲနေပေမည်။ သို့မဟုတ် သူတို့ကို သင်ကူညီပေးရာတွင် သင်၏အခြေအနေက သင့်ကို ကန့်သတ်ထားပုံရှိပေရာ သို့နှင့် သင်ရရှိနိုင်သောစိတ်ကျေနပ်မှုကို ကန့်သတ်ထားပေမည်။ (တမန်တော် ၂၀:၃၅) လက္ခဏာနှစ်ရပ်စလုံးနှင့်ပတ်သက်၍ ကောလောသဲကျမ်းစောင်မှ ကျွန်ုပ်တို့သိနိုင်ကြသည်။
၄။ (က) အဘယ်အခြေအနေများအောက်တွင် ကောလောသဲသို့ ပေါလုစာရေးခဲ့ခြင်းဖြစ်သနည်း။ (ခ) ဧပဖြသည် မည်သို့ပါဝင်ပတ်သက်ခဲ့သနည်း။
၄ ကောလောသဲရှိ ခရစ်ယာန်များထံ တမန်တော်ပေါလုစာရေးချိန်တွင် သူသည် ရောမမြို့ရှိ အိမ်တစ်အိမ်တွင် အကျယ်ချုပ်ဖြင့်ရှိနေ၏၊ သို့သော် ဧည့်သည်များကို လက်ခံနိုင်ခွင့်ရှိသည်။ သင်ခန့်မှန်းလိမ့်မည့်အတိုင်း ပေါလုသည် သူ၏အကန့်အသတ်ရှိသောလွတ်လပ်မှုကို ဘုရားသခင့်နိုင်ငံတော်အကြောင်းဟောပြောရန် အသုံးပြုခဲ့သည်။ (တမန်တော် ၂၈:၁၆-၃၁) ခရစ်ယာန်ချင်းတို့သည် ပေါလုကို သွားရောက်ကြည့်ရှုနိုင်ကြပြီး ဖြစ်နိုင်သည်မှာ ထိုအချိန်က သူနှင့်အတူ အချို့လည်း အကျဉ်းကျနေသည်။ (ကောလောသဲ ၁:၇၊ ၈; ၄:၁၀) တစ်ဦးမှာ ဧဝံဂေလိတရားကို ဇွဲရှိရှိဟောပြောသူဧပဖြဖြစ်ပြီး အာရှမိုင်းနား (မျက်မှောက်ခေတ် တူရကီနိုင်ငံ) ရှိ ဧဖက်မြို့၏အရှေ့ဘက် ကုန်းပြင်မြင့်ဖြစ်သော ဖြူဂိအရပ်ဒေသ ကောလောသဲမြို့မှဖြစ်သည်။ ဧပဖြသည် ကောလောသဲမြို့ရှိ အသင်းတော်ကိုဖွဲ့စည်းရာ၌ အကူအညီရသူဖြစ်ပြီး အနီးအနားရှိ လောဒိကိနှင့် ဟေရပေါလိအသင်းတော်များအတွက် ကြိုးစားလုပ်ဆောင်ခဲ့သူဖြစ်၏။ (ကောလောသဲ ၄:၁၂၊ ၁၃) ရောမမြို့ရှိပေါလုကိုတွေ့မြင်ရန် ဧပဖြသည် အဘယ်ကြောင့်သွားခဲ့သနည်း၊ ပေါလု၏တုံ့ပြန်မှုမှ ကျွန်ုပ်တို့ အဘယ်အရာသင်ယူနိုင်သနည်း။
ကောလောသဲအသင်းတော်အတွက် ထိရောက်သောကူညီမှု
၅။ ကောလောသဲသို့ သူပို့ခဲ့သောစာကို ပေါလု အဘယ်ကြောင့်ရေးသားခဲ့ရသနည်း။
၅ ကောလောသဲအသင်းတော်ရှိ အခြေအနေများနှင့်ပတ်သက်၍ ပေါလုနှင့်တိုင်ပင်ဆွေးနွေးရန် ဧပဖြသည် ရောမသို့ ခရီးကြမ်းနှင်ခဲ့သည်။ သူက ထိုခရစ်ယာန်တို့၏ယုံကြည်ခြင်း၊ မေတ္တာနှင့် ဧဝံဂေလိဟောပြောခြင်းအတွက် အားထုတ်မှုတို့ကို တင်ပြခဲ့၏။ (ကောလောသဲ ၁:၄-၈) သို့တိုင် ကောလောသဲအသင်းတော်သားများ၏ဝိညာဉ်ရေးရာကို အန္တရာယ်ပြုနေသည့် အပျက်သဘောဆောင်သောလွှမ်းမိုးမှုများနှင့်ပတ်သက်၍ သူ၏စိုးရိမ်မကင်းဖြစ်မှုကိုလည်း မျှဝေပေးခဲ့သည်။ ပေါလုက မှားယွင်းသောဆရာများလိုက်ဖြန့်နေသည့် ရှုမြင်ချက်အချို့ကို ဆန့်ကျင်ဆီးတားသည့် မှုတ်သွင်းခံစာတစ်စောင်ဖြင့် တုံ့ပြန်ခဲ့သည်။ အထူးသဖြင့် သူက ယေရှုခရစ်ပါဝင်သင့်သော အဓိကအပိုင်းကဏ္ဍကို အာရုံစိုက်စေခဲ့သည်။ * သူ၏အကူအညီသည် အဓိကကျမ်းစာအမှန်တရားများကို အလေးပေးဖော်ပြရန်အတွက်သာ ကန့်သတ်ထားခဲ့သလော။ ကောလောသဲမြို့သားများကို အခြားမည်သို့ သူကူညီနိုင်ခဲ့သနည်း၊ အခြားသူတို့ကိုကူညီခြင်းနှင့်ပတ်သက်၍ အဘယ်သင်ခန်းစာများ ကျွန်ုပ်တို့ရယူနိုင်သနည်း။
၆။ ကောလောသဲသို့ပို့သော သူ၏စာတွင် အဘယ်အရာကို ပေါလုအလေးပေးဖော်ပြခဲ့သနည်း။
၆ သူ၏စာအစပိုင်းတွင် ကျွန်ုပ်တို့သတိမထားမိဘဲဖြစ်သွားနိုင်သော အကူအညီ၏အသွင်အပြင်တစ်ရပ်ကို ပေါလုက ထိုးထွင်းသိမြင်စေခဲ့သည်။ ယင်းသည် အဝေးတစ်နေရာမှနေ၍ ထိရောက်မှုရှိသော အကူအညီပေးနည်းတစ်ခုဖြစ်ပြီး ပေါလုနှင့် ဧပဖြတို့သည် ကောလောသဲမှ အဝေးတွင်ရှိနေကြသည်။ ပေါလုက ဤသို့အခိုင်အမာပြောခဲ့သည်– “ငါတို့သည် သင်တို့အတွက် ဆုတောင်း [ကဘ အောက်ခြေမှတ်ချက် “အမြဲဆုတောင်း”] . . . သည့်အခါတိုင်း ငါတို့အရှင်သခင်ယေရှုခရစ်၏ခမည်းတော် ထာဝရဘုရား၏ကျေးဇူးတော်ကို ချီးမွမ်းပါ၏။” မှန်ပါသည်၊ ယင်းသည် ကောလောသဲရှိ ခရစ်ယာန်များအတွက် သီးသန့်သက်ဆိုင်သောဆုတောင်းချက်များဖြစ်သည်။ ပေါလုက ထပ်ဆင့်၍ဤသို့ဆိုသည်– “သို့ဖြစ်ခြင်းကြောင့် သင်တို့၏သတင်းကိုကြားရသည့်နေ့မှစ၍ ငါတို့သည် သင်တို့အတွက် အစဉ်မပြတ်ဆုတောင်း . . . လျက်နေပါ၏။ သင်တို့သည် ဝိညာဉ်တော်ချပေးတော်မူသော ဉာဏ်ပညာနှင့်ပြည့်စုံသဖြင့် ထာဝရဘုရား၏အလိုတော်ကို ကောင်းစွာသိရှိကြစေရန် ထာဝရဘုရားအား ငါတို့ဆုတောင်းကြပါ၏။”—ကောလောသဲ ၁:၃၊ ၉၊ သတင်းကောင်း။
၇၊ ၈။ ကျွန်ုပ်တို့၏ကိုယ်ပိုင်နှင့် အသင်းတော်လိုက်ဆုတောင်းချက်များတွင် အဘယ်ကိစ္စထည့်တောင်းလေ့ရှိသနည်း။
၇ ယေဟောဝါသည် ‘ဆုတောင်းချက်ကိုနားထောင်သောဘုရားသခင်’ ဖြစ်တော်မူကြောင်း ကျွန်ုပ်တို့သိထားကြသည်၊ သို့ဖြစ်၍ ကိုယ်တော်၏အလိုတော်နှင့်အညီ တောင်းလျှောက်သော ကျွန်ုပ်တို့၏ဆုတောင်းချက်များကို နားထောင်ပေးရန် ကိုယ်တော်အသင့်ရှိတော်မူကြောင်း ကျွန်ုပ်တို့စိတ်ချနိုင်ကြသည်။ (ဆာလံ ၆၅:၂; ၈၆:၆; သု. ၁၅:၈၊ ၂၉; ၁ ယောဟန် ၅:၁၄) သို့ဖြစ်စေကာမူ အခြားသူတို့အတွက် ကျွန်ုပ်တို့ဆုတောင်းပေးသောအခါ ကျွန်ုပ်တို့၏ဆုတောင်းချက်မှာ မည်သို့ဖြစ်သင့်သနည်း။
၈ ကျွန်ုပ်တို့သည် ‘လူပြည်အရပ်ရပ်တို့၌ရှိသော ကျွန်ုပ်တို့၏ညီအစ်ကိုများ’ အကြောင်းစဉ်းစားကာ ဆုတောင်းပေးလေ့ရှိသည်။ (၁ ပေတရု ၅:၉) သို့မဟုတ် သဘာဝဘေး သို့မဟုတ် အဖြစ်ဆိုးနှင့်ကြုံနေရသည့်ဒေသရှိ ခရစ်ယာန်များနှင့် အခြားသူတို့နှင့်ပတ်သက်၍ ယေဟောဝါထံ ကျွန်ုပ်တို့ချဉ်းကပ်ပေမည်။ ပထမရာစုအချိန်၌ ယုဒနယ်တွင် အငတ်ဘေးကြုံကြိုက်ရကြောင်းကို အခြားအရပ်မှတပည့်တော်များ ကြားသိကြသောအခါ မိမိတို့ညီအစ်ကိုများအတွက် သူတို့သည် ကယ်ဆယ်ရေးရန်ပုံငွေများမပို့မီပင် အကြီးအကျယ်ဆုတောင်းပေးခဲ့ကြပေမည်။ (တမန်တော် ၁၁:၂၇-၃၀) ကျွန်ုပ်တို့အချိန်တွင် ညီအစ်ကိုအသင်းအပင်းတစ်ရပ်လုံး သို့မဟုတ် ညီအစ်ကိုအုပ်စုလိုက်နှင့်စပ်လျဉ်းသော ဆုတောင်းချက်များကို ခရစ်ယာန်အစည်းအဝေးများတွင် ကြားကြရလေ့ရှိကာ များစွာသောသူတို့ နားလည်ရန်လိုပြီး “အာမင်” ချနိုင်သောနေရာဖြစ်သည်။—၁ ကောရိန္သု ၁၄:၁၆။
ဆုတောင်းရာ၌ သတ်သတ်မှတ်မှတ်ရှိပါ
၉၊ ၁၀။ (က) တစ်ဦးစီအတွက် သတ်သတ်မှတ်မှတ် ဆုတောင်းပေးချက်များမှာ သင့်လျော်ကြောင်း အဘယ်ပုံသက်သေများက ဖော်ပြသနည်း။ (ခ) ပေါလုအတွက် သတ်သတ်မှတ်မှတ်ဆုတောင်းပေးရသည့်အခြေအနေမျိုး မည်သို့ရောက်ခဲ့သနည်း။
၉ ထို့ပြင် သမ္မာကျမ်းစာက သာ၍သတ်သတ်မှတ်မှတ်နှင့် တစ်ဦးချင်းကိုရည်စူးသော အခြားသူတို့အတွက် ဆုတောင်းချက်များနှင့်ပတ်သက်သည့် ပုံသက်သေများကို ကျွန်ုပ်တို့အား ဖော်ပြထားသည်။ လုကာ ၂၂:၃၁၊ ၃၂ ၌မှတ်တမ်းတင်ထားသော ယေရှု၏မိန့်မှာချက်ကို ပြန်သုံးသပ်ကြည့်ပါ။ ကိုယ်တော့်ဘေးတွင် သစ္စာရှိသောတမန်တော် ၁၁ ပါးရှိနေသည်။ သူတို့အားလုံး ရှေ့တွင်ရှိသော ခက်ခဲသည့်အချိန်၌ ဘုရားသခင်၏ထောက်မမှု လိုအပ်မည်ဖြစ်ရာ သူတို့အတွက် ယေရှုဆုတောင်းပေးခဲ့၏။ (ယောဟန် ၁၇:၉-၁၄) သို့တိုင် ယေရှုသည် ပေတရုကိုသီးခြားရွေးထုက်ကာ ထိုတပည့်တော်တစ်ဦးတည်းအတွက် သတ်သတ်မှတ်မှတ်အသနားခံဆုတောင်းပေးခဲ့သည်။ အခြားဥပမာများကား– ဧလိရှဲသည် သတ်သတ်မှတ်မှတ်ပုဂ္ဂိုလ်တစ်ဦးဖြစ်သော မိမိ၏နောက်လိုက်အတွက် ဘုရားသခင်ကူညီပေးရန် ဆုတောင်းခဲ့သည်။ (၄ ဓမ္မရာဇဝင် ၆:၁၅-၁၇) တမန်တော်ယောဟန်က ဂါယုသည် ကာယရေးရာနှင့် ဝိညာဉ်ရေးရာတွင် ဆက်လက်ကျန်းမာသန်စွမ်းနေစေရန် ဆုတောင်းပေးခဲ့သည်။ (၃ ယောဟန် ၁၊ ၂) ထို့ပြင် အခြားသောဆုတောင်းချက်များသည် သတ်သတ်မှတ်မှတ်အုပ်စုများအပေါ် အာရုံစိုက်ခဲ့သည်။—ယောဘ ၄၂:၇၊ ၈; လုကာ ၆:၂၈; တမန်တော် ၇:၆၀; ၁ တိမောသေ ၂:၁၊ ၂။
၁၀ ပေါလု၏စာများက အလွန်တရာသတ်သတ်မှတ်မှတ်ပြုသော ဆုတောင်းချက်များ၏အကြောင်း ထင်ရှားပေါ်လွင်စေ၏။ မိမိအတွက်လည်းကောင်း၊ မိမိနှင့် မိမိ၏အပေါင်းအဖော်များအတွက်လည်းကောင်း ဆုတောင်းပေးကြရန် သူတောင်းဆိုခဲ့သည်။ ကောလောသဲ ၄:၂၊ ၃ (သတင်းကောင်း) တွင် ဤသို့ဖတ်ရသည်– “မခြားမလပ် ဆုတောင်း . . . ကြလော့။ ဆုတောင်း . . . ရာတွင် နိုးနိုးကြားကြားရှိလျက် ကျေးဇူးတော်ကိုချီးမွမ်းကြလော့။ ဆုတောင်းသည့်အခါတိုင်း ငါတို့၏အတွက်လည်း ဆုတောင်းကြလော့။ ခရစ်တော်၏နက်နဲသည့် နှုတ် [မြွက်] တရားတော်ကို ဟောပြောသည့်အတွက် ငါသည် ယခု ထောင်ကျလျက်ရှိ၏။ ထိုတရားတော်ကို ငါတို့သည် လွတ်လပ်စွာဟောပြောနိုင်ခွင့်ကို ထာဝရဘုရားပေးတော်မူပါမည့်အကြောင်း ဆုတောင်းကြလော့။” ဖော်ပြပါ အခြားပုံသက်သေများကိုလည်း သုံးသပ်ကြည့်ပါ– ရောမ ၁၅:၃၀၊ ၃၁; ၁ သက်သာလောနိတ် ၅:၂၅; ၂ သက်သာလောနိတ် ၃:၁၊ ၂; ဟေဗြဲ ၁၃:၁၈။
၁၁။ ရောမ၌ရှိနေစဉ် ဧပဖြသည် မည်သူ့အတွက် ဆုတောင်းပေးနေခဲ့သနည်း။
၁၁ ရောမရှိ ပေါလု၏အပေါင်းအဖော်နှင့်စပ်လျဉ်း၍ အလားတူပင်ဖြစ်ခဲ့သည်။ “သင်တို့အထဲကဖြစ်သော ခရစ်တော်၏ကျွန် ဧပဖြသည် သင်တို့ကိုနှုတ်ဆက်၏။ . . . သူသည် သင်တို့အဖို့ ကာလအစဉ်ကြိုးစား၍ ဆုတောင်းတတ်၏။” (ကောလောသဲ ၄:၁၂) “ကြိုးစား” ဟုဘာသာပြန်ခဲ့သောစကားလုံးက ရှေးခေတ်ကစားနည်းများရှိ အားကစားသမားတစ်ဦးအတိုင်း “ရုန်းကန်ကြိုးပမ်းခြင်း” ဟု အဓိပ္ပာယ်သက်ရောက်နိုင်သည်။ ဧပဖြသည် ကမ္ဘာတစ်ဝန်းယုံကြည်သူတစ်စုလုံး သို့မဟုတ် တစ်နည်းဆိုသော် အာရှမိုင်းနားတစ်လျှောက်ရှိ စစ်မှန်သောဝတ်ပြုသူများနှင့်ပတ်သက်၍ စိတ်ထက်သန်စွာ ဆုတောင်းခဲ့ခြင်းမျှသာ ဖြစ်သလော။ ပေါလုက ဧပဖြသည် ကောလောသဲမြို့သားများအတွက် အထူးဆုတောင်းခဲ့ခြင်းဖြစ်ကြောင်း ဖော်ပြခဲ့၏။ ဧပဖြသည် သူတို့၏အခြေအနေကို သိထားသည်။ သူတို့အားလုံးကို အမည်ဖြင့်ဖြစ်စေ သို့မဟုတ် သူတို့ရင်ဆိုင်ခဲ့ရသောအခက်အခဲများကို ကျွန်ုပ်တို့မသိကြပါ၊ သို့သော် ဖြစ်နိုင်ခြေအချို့ကို စဉ်းစားကြည့်ပါ။ လူငယ်လိနုသည် ပျံ့နှံ့လျက်ရှိနေသော အတွေးအခေါ်များ၏လွှမ်းမိုးမှုကို ဆိုင်ပြိုင်တိုက်လှန်နေခဲ့ရပြီး ရုဖုသည် ယုဒဘာသာရှိယခင်ထုံးတမ်းများ၏ ဆွဲဆောင်မှုကိုတွန်းလှန်ရန် ခွန်အားလိုအပ်ပေမည်။ မယုံကြည်သူခင်ပွန်းရှိသော ပေရသိသည် သခင်ဘုရား၌ မိမိ၏ကလေးများကိုကြီးပြင်းလာစေရန် ခံနိုင်ရည်နှင့် ဉာဏ်ပညာလိုအပ်ပြီး သေလုမြောပါးဖျားနာမှုကို ခံစားနေရသောအသုံကြိတ်သည် ထပ်ဆင့်နှစ်သိမ့်မှုလိုအပ်သည်မဟုတ်ပေလော။ မှန်ပါသည်၊ ဧပဖြသည် မိမိ၏နေရင်းအသင်းတော်ရှိ ထိုသူတို့ကိုသိရှိပြီး ထိုသစ္စာရှိသောသူတို့ကို ယေဟောဝါနှင့်ထိုက်တန်စွာလျှောက်လှမ်းရန် သူနှင့် ပေါလုနှစ်ဦးစလုံးက အလိုရှိခဲ့ရာ သူတို့နှင့်စပ်လျဉ်း၍ စိတ်အားထက်သန်စွာဆုတောင်းပေးခဲ့သည်။
၁၂။ ကျွန်ုပ်တို့၏သီးသန့်ဆုတောင်းချက်များတွင် မည်သို့ပို၍သတ်သတ်မှတ်မှတ်ဖြစ်စေနိုင်သနည်း။
၁၂ ကျွန်ုပ်တို့အတွက် စံနမူနာဖြစ်သော အခြားသူတို့ကိုကူညီရန် နည်းလမ်းတစ်ရပ်ကို သင်တွေ့မြင်ပါသလော။ ဖော်ပြပြီးခဲ့သည့်အတိုင်း အထူးထူးအပြားပြားသောပရိသတ်ကို ထောက်ရှု၍ ခရစ်ယာန်အစည်းအဝေးများ၌ လူအများရှေ့ဆုတောင်းချက်များသည် အများအတွက်ဖြစ်လေ့ရှိသည်။ သို့သော် ကျွန်ုပ်တို့၏ကိုယ်ပိုင် သို့မဟုတ် မိသားစုဆုတောင်းချက်များမှာ အတော်အတန်သတ်သတ်မှတ်မှတ်ပြုနိုင်သည်။ နယ်လှည့်ကြီးကြပ်မှူးအားလုံး သို့မဟုတ် ဝိညာဉ်ရေးရာသိုးထိန်းများကို လမ်းပြညွှန်ကြား၍ ကောင်းချီးပေးရန် ဘုရားသခင်ထံ ကျွန်ုပ်တို့တောင်းလျှောက်စဉ်တွင် တစ်ခါတစ်ရံ အတိအကျဆုမတောင်းပေးနိုင်ပေလော။ ဥပမာ၊ သင်၏အသင်းတော်သို့ လာရောက်လည်ပတ်သော တိုက်နယ်ကြီးကြပ်မှူး သို့မဟုတ် သင့်အသင်းတော်၏စာအုပ်ကြီးသင်တန်းမှူးကို အမည်ဖြင့်ဖော်ပြ၍ ဆုတောင်းပေးပါလေ။ ဖိလိပ္ပိ ၂:၂၅-၂၈ နှင့် ၁ တိမောသေ ၅:၂၃ က တိမောသေနှင့် ဧပဖြတို့၏ကျန်းမာရေးနှင့်ပတ်သက်၍ တစ်ဦးချင်းစီအပေါ် ပေါလု၏စိုးရိမ်မှုကိုဖော်ပြသည်။ နာမည်ဖြင့် ကျွန်ုပ်တို့သိထားကြသော ဖျားနာသူတို့အပေါ် ထိုကဲ့သို့စိတ်ဝင်စားမှုမျိုးကို ကျွန်ုပ်တို့လည်း တင်ပြနိုင်မည်လော။
၁၃။ မည်သည့်အခြေအနေမျိုးတို့သည် ကျွန်ုပ်တို့၏ကိုယ်ပိုင်ဆုတောင်းချက်တွင် ထည့်သွင်းသင့်သောကိစ္စရပ်များ ဖြစ်သနည်း။
၁၃ မှန်ပါသည်၊ အခြားသူတို့၏ကိုယ်ရေးကိုယ်တာကိစ္စတွင် မဆိုင်ဘဲနှင့်ဝင်စွက်ခြင်းကို ကျွန်ုပ်တို့ရှောင်ရှားရပေမည်၊ သို့သော် ကျွန်ုပ်တို့သိ၍ ဂရုပြုရမည့်သူတို့၌ စစ်မှန်သောစိတ်ဝင်စားမှုကိုဖော်ပြရန် ကျွန်ုပ်တို့ဆုတောင်းပေးခြင်းမှာ သင့်လျော်ပါသည်။ (၁ တိမောသေ ၅:၁၃; ၁ ပေတရု ၄:၁၅) ညီအစ်ကိုတစ်ဦး အလုပ်ပြုတ်သွားခြင်းဖြစ်နိုင်ပြီး နောက်ထပ်အလုပ်ကို ကျွန်ုပ်တို့ရှာမပေးနိုင်ချေ။ သို့သော် ကျွန်ုပ်တို့၏ ကိုယ်ပိုင်ဆုတောင်းချက်တွင် သူ၏အခက်အခဲအပေါ် အာရုံစိုက်၍ အမည်ဖြင့်ဖော်ပြပေးနိုင်သည်။ (ဆာလံ ၃၇:၂၅; သု. ၁၀:၃) “သခင်ဘုရား၌သာ” လက်ထပ်ရန် ဆုံးဖြတ်ထားခြင်းကြောင့် ခင်ပွန်းနှင့် သားသမီးမရှိသော အသက်ကြီးရင့်လာပြီဖြစ်သည့် တစ်ကိုယ်ရေညီအစ်မတစ်ဦးကို ကျွန်ုပ်တို့ သိထားပါသလော။ (၁ ကောရိန္သု ၇:၃၉) သင်၏ကိုယ်ပိုင်ဆုတောင်းချက်များတွင် သူ့ကို ကောင်းချီးပေးရန်နှင့် သူ၏လုပ်ငန်းတော်၌ သစ္စာရှိရှိဆက်လုပ်ဆောင်ဖို့ ကူညီပေးရန် ယေဟောဝါထံ တောင်းလျှောက်ပေးပါလေ။ နောက်ဥပမာအနေဖြင့် အမှားကျူးလွန်သောညီအစ်ကိုတစ်ဦးကို အကြီးအကဲနှစ်ဦးက သွန်သင်ချက်ပေးပေမည်။ တစ်ဦးစီသည် အခါအားလျော်စွာ မိမိတို့၏ကိုယ်ပိုင်ဆုတောင်းချက်များတွင် သူ့ကို အမည်တပ်၍ ဖော်ပြဆုတောင်းပေးနိုင်သည်။
၁၄။ အခြားသူတို့ကိုကူညီပေးခြင်းနှင့် သတ်သတ်မှတ်မှတ်ဆုတောင်းချက်တို့သည် မည်သို့ဆက်စပ်လျက်ရှိသနည်း။
၁၄ ယေဟောဝါ၏ထောက်ပံ့မှု၊ နှစ်သိမ့်မှု၊ ဉာဏ်ပညာနှင့် သန့်ရှင်းသောဝိညာဉ်တော် သို့မဟုတ် ယင်း၏ မည်သည့်အကျိုးဖြစ်ထွန်းသောရလဒ်မဆို လိုအပ်နေကြောင်း သင်သိရှိထားသူတစ်ဦးချင်းစီကို သင်၏ကိုယ်ပိုင်ဆုတောင်းချက်၌ ထည့်သွင်းရန် သင့်အတွက် ဖြစ်နိုင်ခြေအမြောက်အမြားရှိသည်။ အလှမ်းကွာဝေးမှု သို့မဟုတ် အခြားအခြေအနေများကြောင့် သင်ပေးနိုင်သည့် ရုပ်ပစ္စည်းအရာ၌ဖြစ်စေ၊ တိုက်ရိုက်အကူအညီ၌ဖြစ်စေ အကန့်အသတ်ရှိနေသည်ဟု သင်ခံစားမိပေမည်။ သို့သော် သင့်ညီအစ်ကို၊ ညီအစ်မများအတွက် ဆုတောင်းပေးရန် ဘယ်တော့မျှမမေ့ပါနှင့်။ သူတို့သည် ယေဟောဝါနှင့်ထိုက်တန်စွာ လျှောက်လှမ်းလိုကြောင်း သင်သိထားသည်၊ သို့တိုင် သူတို့သည် ရေရှည်လျှောက်လှမ်းသွားစေရန် အမှန်တကယ် အကူအညီလိုအပ်ပေမည်။ ကူညီပေးရာတွင် အဓိကကျရာမှာ သင်၏ဆုတောင်းချက်များဖြစ်သည်။—ဆာလံ ၁၈:၂; ၂၀:၁၊ ၂; ၃၄:၁၅; ၄၆:၁; ၁၂၁:၁-၃။
အခြားသူတို့ခွန်အားရှိလာစေရန် လုပ်ဆောင်ခြင်း
၁၅။ ကောလောသဲကျမ်း၏ နိဂုံးပိုင်းကို ကျွန်ုပ်တို့ အဘယ်ကြောင့် စိတ်ဝင်စားသင့်သနည်း။
၁၅ အခြားသူများ၊ အထူးသဖြင့် သင့်အနီးအနားတွင်ရှိသူနှင့် သင်နှင့်စပ်ဆိုင်သောသူတို့အတွက် စိတ်ထက်သန်မှုဖြင့် သတ်သတ်မှတ်မှတ်ဆုတောင်းပေးခြင်းသည် ကူညီပေးရန် တစ်ခုတည်းသောနည်းလမ်းမဟုတ်သည်ကား အမှန်ပင်။ ကောလောသဲစာစောင်က ယင်းကို ပေါ်လွင်ထင်ရှားစေ၏။ ကျမ်းပညာရှင်များစွာက ပေါလုသည် အယူဝါဒဆိုင်ရာညွှန်ကြားချက်နှင့် လက်တွေ့ကျဆုံးမစကားကို ဖော်ပြပြီးနောက် တစ်ဦးချင်းထံ နှုတ်ခွန်းဆက်စကားမျှသာ ထပ်ဆင့်သည်ဟု ယူဆထားကြသည်။ (ကောလောသဲ ၄:၇-၁၈) ယင်းနှင့်ဆန့်ကျင်လျက် ဤစာစောင်၏နောက်ဆုံးပိုင်း၌ မှတ်သားဖွယ်ရာဆုံးမစကားပါရှိကြောင်းနှင့် ဤအပိုင်းတွင် သင်ယူစရာ သာ၍ပါရှိကြောင်းကို ကျွန်ုပ်တို့တွေ့ရှိထားခဲ့ပြီ။
၁၆၊ ၁၇။ ကောလောသဲ ၄:၁၀၊ ၁၁ ၌ဖော်ပြထားသော ညီအစ်ကိုများအကြောင်း ကျွန်ုပ်တို့ ဘာပြောပြနိုင်သနည်း။
၁၆ ပေါလုက ဤသို့ရေးသားခဲ့သည်– “ငါနှင့်အတူအကျဉ်းခံရသောသူ အာရိတ္တာခုမှစ၍ ဗာနဗ၏ညီအစ်ကိုတော် မာကု၊ ယုတ္တုဟုခေါ်ဝေါ်သော ယေရှုတို့သည် သင်တို့ကိုနှုတ်ဆက်ကြ၏။ မာကုအကြောင်းနှင့်ဆိုင်၍ သင်တို့ကိုငါမှာလိုက်ခဲ့ပြီ။ သူသည်သင်တို့ထံသို့ရောက်လာလျှင် လက်ခံကြလော့။ အရေဖျားလှီးခြင်းကိုခံသောသူတို့တွင် ဤသူတို့သာ ဘုရားသခင်၏နိုင်ငံတော်အဖို့ ငါ၏လုပ်ဖော်ဆောင်ဖက်ဖြစ်၍ ငါ့စိတ်ကိုနှစ်သိမ့်စေ [“ခွန်အားရှိစေသောအထောက်အကူဖြစ်၊” ကဘ] ကြ၏။”—ကောလောသဲ ၄:၁၀၊ ၁၁၊ သမ။
၁၇ ဤတွင်ပေါလုက အထူးမှတ်သားထိုက်သော ညီအစ်ကိုအချို့ကို ဖော်ပြပေးသည်။ သူတို့သည် ဂျူးနောက်ခံရှိ အရေဖျားလှီးခြင်းခံထားသူတို့ထဲတွင်ပါဝင်ကြောင်း သူကပြောပြသည်။ ရောမ၌ အရေဖျားလှီးခြင်းကိုခံသောဂျူးများစွာရှိပြီး ယခု အချို့သည် ခရစ်ယာန်များဖြစ်ခဲ့ကြသည်။ သို့တိုင် ပေါလုဖော်ပြသောသူတို့သည် သူ၏ကူဖော်လောင်ဖက်ဖြစ်လာခဲ့၏။ ဖြစ်နိုင်သည်မှာ သူတို့သည် တစ်ပါးအမျိုးသားနောက်ခံရှိသော ခရစ်ယာန်များနှင့် ပေါင်းသင်းရန် မတွန့်ဆုတ်ခဲ့ချေ၊ ထို့ပြင် တစ်ပါးအမျိုးသားများထံဟောပြောခြင်း၌ ပေါလုနှင့်အတူ သူတို့ ဝမ်းမြောက်စွာပါဝင်ခဲ့ကြမည်။—ရောမ ၁၁:၁၃၊ ၁၄; ဂလာတိ ၁:၁၆; ၂:၁၁-၁၄။
၁၈။ သူနှင့်အတူရှိသူတို့ကို ပေါလု မည်သို့ချီးမွမ်းခဲ့သနည်း။
၁၈ ပေါလု၏ပြောဆိုချက်ကို သတိပြုပါ– ‘သူတို့သည် ငါ၏ ခွန်အားရှိစေသောအထောက်အကူဖြစ်သည်။’ သမ္မာကျမ်းစာ၌ ဤတစ်ကြိမ်သာပါရှိသော ဂရိစကားလုံးတစ်လုံးကို သူအသုံးပြုခဲ့သည်။ ဘာသာပြန်များစွာသည် ယင်းကို “နှစ်သိမ့်မှု” ဟုဘာသာပြန်ကြသည်။ သို့သော် များသောအားဖြင့် “နှစ်သိမ့်မှု” ဟုဘာသာပြန်ခဲ့ကြသည့် နောက်ထပ်ဂရိစကားလုံး (ပါရာကာလဲအို) ရှိသည်။ ပေါလုသည် ယင်းကို ဤစာစောင်ရှိအခြားနေရာများတွင် အသုံးပြုခဲ့သော်လည်း ကောလောသဲ ၄:၁၁ တွင်မူအသုံးမပြုခဲ့ချေ။—မဿဲ ၅:၄; တမန်တော် ၄:၃၆; ၉:၃၁; ၂ ကောရိန္သု ၁:၄; ကောလောသဲ ၂:၂; ၄:၈။
၁၉၊ ၂၀။ (က) ရောမ၌ သူ့အား ကူညီလျက်ရှိသောညီအစ်ကိုများကိုရည်စူးသည့် ပေါလုဖော်ပြချက်၏ ဆိုလိုရင်းကား အဘယ်နည်း။ (ခ) ထိုညီအစ်ကိုများသည် ပေါလုကို အဘယ်နည်းများဖြင့် ကူညီပေးခဲ့ဖွယ်ရှိသနည်း။
၁၉ အမည်ဖြင့် ပေါလုထုတ်ဖော်သူတို့သည် နှုတ်ဖြင့်မက နှစ်သိမ့်မှုပေးခဲ့ကြရမည်။ ကောလောသဲ ၄:၁၁ ၌ “ခွန်အားရှိစေသောအထောက်အကူ” ဟူ၍ ဘာသာပြန်ဆိုသော ဂရိအသုံးအနှုန်းကို ရံဖန်ရံခါ လောကစာပေများတွင် စိတ်ဖိစီးမှုကိုသက်သာစေသော ဆေးတစ်မျိုးအတွက် အသုံးပြု၏။ ဘဝသစ်ဘာသာပြန်ကျမ်း၌ ဤသို့ဖတ်ရသည်– “သူတို့သည် ငါ့ကို အလွန်အကူအညီပေးခဲ့ကြပြီတကား!” သတင်းကောင်းကျမ်းက ထိုစကားစုကို ဤသို့ဖော်ပြထားသည်– “ဤသူတို့သည်ကား ငါ့အား များစွာကူညီသူများဖြစ်သည်။” ပေါလုအနီးအနားတွင် ရှိနေကြသော ထိုခရစ်ယာန်ညီအစ်ကိုများသည် သူ့အားအကူအညီပေးရန် ဘာပြုလုပ်နိုင်ခဲ့သနည်း။
၂၀ ပေါလု၌ ဧည့်သည်များရှိနိုင်သည်၊ သို့သော် မိမိ၏အခြေခံလိုအပ်ရာများဖြစ်သည့် အစားအသောက်နှင့် ဆောင်းတွင်းအတွက် အဝတ်အစားများ ဝယ်ခြမ်းခြင်းကဲ့သို့သော မိမိမလုပ်နိုင်သည့်အရာများစွာ ရှိသည်။ လေ့လာရန်အတွက် ကျမ်းလိပ်များကို သူမည်သို့ရရှိမည်နည်း၊ သို့မဟုတ် စာရေးပစ္စည်းများကို မည်သို့ဝယ်ယူမည်နည်း။ (၂ တိမောသေ ၄:၁၃) သူ၏လိုအပ်ရာများ၊ ဈေးဝယ်ခြမ်းခြင်းနှင့် သူစေခိုင်းရာကို အပြေးအလွှားပြုလုပ်ပေးခြင်းကဲ့သို့သော အခြေခံအရာများကို လုပ်ဆောင်ပေးခြင်းဖြင့် ထိုညီအစ်ကိုများသည် ပေါလုကိုကူညီပေးနေကြသည်ကို သင်မြင်ယောင်ကြည့်၍ မရနိုင်ပေလော။ အသင်းတော်တစ်ခုသို့ သွားရောက်ကြည့်ရှုစစ်ဆေးကာ တည်ဆောက်မှုပေးစေလိုပေမည်။ အကျဉ်းကျနေသဖြင့် သူမသွားနိုင်သောကြောင့် ပေါလုအတွက် သတင်းပို့ဆောင်ခြင်းနှင့် မှတ်တမ်းများပြန်ယူဆောင်လာခြင်းငှာ ထိုညီအစ်ကိုများသည် သွားရောက်လည်ပတ်ပေးခဲ့ပေမည်။ မည်မျှခွန်အားဖြစ်စေမည်တကား!
၂၁၊ ၂၂။ (က) ကောလောသဲ ၄:၁၁ ၌ဖော်ပြထားသောစကားများကို ကျွန်ုပ်တို့ အဘယ်ကြောင့် စိတ်ဝင်စားသင့်သနည်း။ (ခ) ပေါလုနှင့်အတူရှိသူတို့၏ ပုံသက်သေကို ကျွန်ုပ်တို့ကျင့်သုံးနိုင်သည့် နည်းလမ်းအချို့ကားအဘယ်နည်း။
၂၁ “ခွန်အားရှိစေသောအထောက်အကူ” ဖြစ်ခြင်းနှင့်ပတ်သက်၍ ပေါလုရေးသားခဲ့ရာက အခြားသူတို့အား ကျွန်ုပ်တို့ မည်သို့အကူအညီပေးနိုင်ပုံကို ထိုးထွင်းသိမြင်စေသည်။ သူတို့သည် ကိုယ်တော်၏ကျင့်ဝတ်စံနှုန်းနှင့်အညီ ယေဟောဝါနှင့်ထိုက်တန်စွာလျှောက်လှမ်းနိုင်ကြကာ ခရစ်ယာန်အစည်းအဝေးများကို တက်ရောက်နိုင်၊ ဟောပြောခြင်းလုပ်ငန်းတွင် ပါဝင်နိုင်ကြပေမည်။ ထိုအတွက်ကြောင့် ကျွန်ုပ်တို့၏ကျေးဇူးတင်လေးမြတ်သည့်စကားကို သူတို့ရရှိထိုက်သည်။ သို့သော် ‘ခွန်အားရှိစေသောအထောက်အကူများ’ ဖြစ်ခြင်း၌ ပေါလုနှင့်အတူရှိခဲ့ကြသူများကဲ့သို့ ကျွန်ုပ်တို့ သာ၍ပြုလုပ်နိုင်ကြမည်လော။
၂၂ မိသားစုမှာ သူ့အနားတွင်မရှိသော ၁ ကောရိန္သု ၇:၃၇ ကို ပညာရှိစွာလိုက်နာစောင့်စည်းသည့် ညီအစ်မတစ်ဦးကို သင်သိရှိပါက သူ့အား ထမင်းစားဖိတ်ရန် သို့မဟုတ် မိတ်ဆွေများနှင့်ဖြစ်စေ၊ ဆွေမျိုးများနှင့်ဖြစ်စေ မိတ်ဆုံပွဲငယ်လေးသို့လာရန် ခေါ်ဖိတ်ခြင်းမျိုးဖြစ်မည့် မိသားစုဆောင်ရွက်မှုအချို့တွင် ပါဝင်စေနိုင်မည်လော။ စည်းဝေးကြီး သို့မဟုတ် အားလပ်ရက်တွင်လည်ပတ်ခြင်း၌ သင့်မိသားစုနှင့်အတူသွားရန် ခေါ်ဖိတ်လျှင်ကော အသို့နည်း။ သို့မဟုတ် အဆင်ပြေသောအချိန်တွင် အစားအစာဝယ်ခြမ်းဖို့ သင်နှင့်ဈေးဝယ်လိုက်ရန် ခေါ်ကြည့်ပါ။ မုဆိုးမ၊ မုဆိုးဖိုများ သို့မဟုတ် ယခု ကားမမောင်းနိုင်သူများကို အလားတူ ကမ်းလှမ်းကြည့်နိုင်သည်။ သူတို့၏တွေ့ကြုံမှုများကြားရခြင်း သို့မဟုတ် သစ်သီးကောင်း ရွေးချယ်ပုံ၊ ကလေးသူငယ်အဝတ်အထည်များရွေးချယ်ပုံကဲ့သို့သော လုပ်ရိုးလုပ်စဉ်ကိစ္စများနှင့်ပတ်သက်၍ သူတို့သိရှိထားရာမှ အချက်အလက်ရယူခြင်းတို့သည် အကျိုးများကြောင်း သင်တွေ့မြင်နိုင်သည်။ (ဝတ်ပြုရာ ၁၉:၃၂; သု. ၁၆:၃၁) သာ၍ရင်းနှီးမှုကို အလိုလိုရရှိလာနိုင်သည်။ သို့နှင့် သူတို့သည် ဆေးဆိုင်မှဆေးအချို့ဝယ်ယူလိုလျှင် သို့မဟုတ် အလားတူဆင်တူသောအရာ၌ သင်၏အကူအညီကိုတောင်းခံရန် ပို၍ဝံ့ဝံ့ရဲရဲရှိလာပေမည်။ ရောမတွင် ပေါလုနှင့်အတူရှိခဲ့ကြသည့်ညီအစ်ကိုများသည် သင်ပေးနိုင်သကဲ့သို့သော လက်တွေ့ကျ ခွန်အားဖြစ်စေသည့်အထောက်အကူများ ပေးခဲ့ကြမည်။ ထိုအချိန်နှင့် ယခုအချိန်၌ပါ မေတ္တာနှောင်ကြိုးခိုင်မြဲစေပြီး ယေဟောဝါအား သစ္စာရှိရှိအတူတကွဝတ်ပြုရန် စိတ်ပိုင်းဖြတ်မှုကို တိုးမြှင့်စေသည့်ကောင်းချီးများ ထပ်ဆင့်ရရှိကြသည်။
၂၃။ အဘယ်အရာကိုလုပ်ဆောင်ခြင်း၌ ကျွန်ုပ်တို့ယောက်တိုင်း အချိန်ကိုအသုံးပြုရန် ကောင်းမည်နည်း။
၂၃ ဤဆောင်းပါး၌ဖော်ပြထားခဲ့သော အခြေအနေများကို ကျွန်ုပ်တို့ယောက်တိုင်း သုံးသပ်နိုင်ကြ၏။ ၎င်းတို့မှာ လိုက်လျှောက်နိုင်သောနမူနာမျှသာဖြစ်သည်၊ သို့သော် ယင်းတို့က ကျွန်ုပ်တို့ညီအစ်ကို၊ ညီအစ်မများအတွက် ကျွန်ုပ်တို့သည် “ခွန်အားဖြစ်စေသောအထောက်အကူ” တစ်ဦး ပို၍ဖြစ်လာနိုင်သည့် တကယ့်အခြေအနေများနှင့်ပတ်သက်၍ သတိရစေနိုင်သည်။ လိုရင်းချက်မှာ ကျွန်ုပ်တို့သည် လူ့အကျိုးဆောင်များ၌ရှိသောစိတ်ဓာတ်မျိုး လိုက်တုမွေးမြူနေကြခြင်းမဟုတ်။ ယင်းသည် ကောလောသဲ ၄:၁၀၊ ၁၁ တွင် ဖော်ပြထားသော ညီအစ်ကိုများ၏ရည်မှန်းချက် မဟုတ်ချေ။ သူတို့သည် ‘ဘုရားသခင်၏နိုင်ငံတော်အဖို့ လုပ်ဖော်ဆောင်ဖက်’ များဖြစ်ခဲ့ကြသည်။ ခွန်အားဖြစ်စေခြင်းအကျိုးဆက်မှာ ယင်းနှင့် တိုက်ရိုက်ဆက်နွှယ်ခဲ့သည်။ ကျွန်ုပ်တို့၏ကိစ္စတွင်လည်း အလားတူဖြစ်ပါစေ။
၂၄။ ကျွန်ုပ်တို့၏ဆုတောင်းခြင်းနှင့် အခြားသူတို့ကို ခွန်အားရှိစေရန်တောင်းခံခြင်း၏ အဓိကအကြောင်းရင်းကား အဘယ်နည်း။
၂၄ ကျွန်ုပ်တို့၏ကိုယ်ပိုင်ဆုတောင်းချက်တွင် အခြားသူတို့ကို အမည်ဖြင့်ဖော်ပြခြင်းနှင့် ယင်းအတွက်ကြောင့် သူတို့ကိုခွန်အားရှိစေရန် ကြိုးစားအားထုတ်မှုများ ပြုကြရသည်– ကျွန်ုပ်တို့၏ ညီအစ်ကို၊ ညီအစ်မများသည် ကိုယ်တော့် “စိတ်တော်နှင့်တွေ့ခြင်းငှာ ယေဟောဝါနှင့်ထိုက်တန်စွာလျှောက်လှမ်း” ရန် ဆန္ဒရှိကြကြောင်း ကျွန်ုပ်တို့ယုံကြည်ကြသည်။ (ကောလောသဲ ၁:၁၀၊ ကဘ) ထိုအချက်သည် “ဘုရားသခင်၏အလိုတော်ရှိသမျှ၌ ခိုင်မြဲသောစိတ်ချမှုဖြင့် အဆုံးတွင်အပြည့်အဝရပ်တည်” နိုင်စေရန် ကောလောသဲအသင်းတော်အတွက် ဧပဖြ၏ဆုတောင်းချက်များအကြောင်း ရေးသားချိန်၌ ပေါလုဖော်ပြခဲ့သည့် အခြားအကြောင်းတစ်ခုနှင့် ဆက်စပ်နေသည်။ (ကောလောသဲ ၄:၁၂၊ ကဘ) ယင်းကို ကျွန်ုပ်တို့ကိုယ်တိုင် မည်သို့ကြိုးစားရယူနိုင်သနည်း။ ဆက်၍ကြည့်ကြစို့။
[အောက်ခြေမှတ်ချက်များ]
^ အပိုဒ်၊ 5 နယူးယောက်၊ ကင်းမျှော်စင်သမ္မာကျမ်းစာနှင့်ဝေစာအသင်းမှထုတ်ဝေသော ကျမ်းစာစောင်များအပေါ်ထိုးထွင်းသိမြင်ခြင်း အတွဲ ၁၊ စာမျက်နှာ ၄၉၀-၁ နှင့် “ကျမ်းစာတစ်ကျမ်းလုံး ဘုရား[သခင်]မှုတ်သွင်းရာဖြစ်ပြီး အကျိုးလည်းပြု” စာမျက်နှာ ၃၁၇-၂၃ ရှု။
သင်မှတ်သားမိသလော
• ကျွန်ုပ်တို့၏ကိုယ်ပိုင်ဆုတောင်းချက်များတွင် ကျွန်ုပ်တို့သည် သာ၍ကူညီပေးတတ်သူတစ်ဦး မည်သို့ဖြစ်လာနိုင်သနည်း။
• ပေါလုအတွက် ခရစ်ယာန်အချို့သည် မည်သို့သောသဘောမျိုးဖြင့် ‘ခွန်အားရှိစေသောအထောက်အကူများ’ ဖြစ်လာကြသနည်း။
• မည်သည့်အခြေအနေမျိုးတို့တွင် ကျွန်ုပ်တို့သည် ‘ခွန်အားရှိစေသောအထောက်အကူများ’ ဖြစ်နိုင်ကြသနည်း။
• ကျွန်ုပ်တို့ဆုတောင်းခြင်းနှင့် ကျွန်ုပ်တို့ညီအစ်ကို၊ ညီအစ်မများခွန်အားရှိစေရန် ရှာကြံခြင်းနောက်ဝယ်ရှိ ပန်းတိုင်ကားအဘယ်နည်း။
[လေ့လာရန်မေးခွန်းများ]
[စာမျက်နှာ ၁၈ ပါ ရုပ်ပုံ]
အခြားခရစ်ယာန်တစ်ဦးကို သင့်မိသားစု၏ အပျော်ခရီးထွက်ခြင်း၌ သင်ပါဝင်စေနိုင်သလော
[Credit Line]
Courtesy of Green Chimney’s Farm