ချစ်ခြင်းမေတ္တာဖြင့် တည်ဆောက်ခံလော့
ချစ်ခြင်းမေတ္တာဖြင့် တည်ဆောက်ခံလော့
“သင်၏ဘုရားသခင်ယေဟောဝါကို သင့်နှလုံးအကြွင်းမဲ့၊ သင့်ဝိညာဉ်စိုးလ်တစ်ခုလုံး၊ သင့်စိတ်ရှိသမျှနှင့်ချစ်ရမည်။” —မဿဲ ၂၂:၃၇၊ ကဘ။
၁။ (က) ခရစ်ယာန်တစ်ဦး မွေးမြူပျိုးထောင်ရသည့် အရာအချို့ကားအဘယ်နည်း။ (ခ) အရေးကြီးဆုံး ခရစ်ယာန်အရည်အသွေးကား အဘယ်နည်း၊ အဘယ်ကြောင့်နည်း။
ခရစ်ယာန်တစ်ဦးသည် ထိရောက်သောအမှုတော်ဆောင်တစ်ဦးဖြစ်နိုင်ရန် မွေးမြူပျိုးထောင်စရာများစွာရှိ၏။ နယပုံပြင်ကျမ်းက အသိပညာ၊ သိမြင်နားလည်မှုနှင့် ဉာဏ်ပညာ၏တန်ဖိုးကို အလေးပေးဖော်ပြသည်။ (သု. ၂:၁-၁၁) တမန်တော်ပေါလုက ခိုင်ခံ့သောယုံကြည်ခြင်းနှင့် ခိုင်မြဲသောမျှော်လင့်ချက်တို့ လိုအပ်မှုကို ဆွေးနွေးခဲ့သည်။ (ရောမ ၁:၁၆၊ ၁၇; ကောလောသဲ ၁:၅; ဟေဗြဲ ၁၀:၃၉) ခံနိုင်ရည်နှင့် ချုပ်တည်းမှုလည်း အရေးပါသည်။ (တမန်တော် ၂၄:၂၅; ဟေဗြဲ ၁၀:၃၆) သို့သော် ၎င်းမပါလျှင် ကျန်အရာများအားလုံး တန်ဖိုးလျော့သွားသည်သာမက တန်ဖိုးပင်မရှိဖြစ်သွားနိုင်သော အရည်အသွေးတစ်ခုရှိ၏။ ၎င်းမှာ မေတ္တာတည်း။—၁ ကောရိန္သု ၁၃:၁-၃၊ ၁၃။
၂။ မေတ္တာ၏အရေးပါမှုကို ယေရှု မည်သို့ဖော်ပြခဲ့သနည်း၊ ယင်းက အဘယ်မေးခွန်းများ ပေါ်ထွက်စေသနည်း။
၂ ယေရှု ဤသို့မိန့်တော်မူရာတွင် မေတ္တာ၏အရေးကြီးမှုကို ကိုယ်တော်ဖော်ပြခဲ့သည်– “သင်တို့သည် အချင်းချင်းချစ်ကြလျှင်၊ လူအပေါင်းတို့သည် ထိုမေတ္တာကိုထောက်၍ သင်တို့သည် ငါ၏တပည့်ဖြစ်သည်ကိုသိရကြလိမ့်မည်။” (ယောဟန် ၁၃:၃၅) မေတ္တာသည် စစ်မှန်သောခရစ်ယာန်တစ်ဦးကို ခွဲခြားသိမြင်နိုင်သည့်အမှတ်အသားဖြစ်သောကြောင့် မေတ္တာဟူသည် အဘယ်နည်းဟူသည့် မေးခွန်းများကို ကျွန်ုပ်တို့မေးရန်လိုသည်။ မိမိတပည့်များအား သတ်မှတ်ဖော်ပြသည့် အရာခပ်သိမ်းတို့ထက် ယင်းသည် အလွန့်အလွန်အရေးကြီးသည်ဟု ယေရှု အဘယ်ကြောင့်မိန့်တော်မူခဲ့သနည်း။ မေတ္တာကို ကျွန်ုပ်တို့ မည်သို့ပျိုးထောင်နိုင်သနည်း။ ကျွန်ုပ်တို့ မေတ္တာထားသင့်သူတို့ကား မည်သူများနည်း။ ဤမေးခွန်းများကို ကျွန်ုပ်တို့ သုံးသပ်ကြည့်ကြစို့။
ချစ်ခြင်းမေတ္တာဟူသည် အဘယ်နည်း
၃။ မေတ္တာကို မည်သို့ ရုပ်လုံးဖော်ပြနိုင်သနည်း၊ ယင်းတွင် အဘယ်ကြောင့်စိတ်နှင့် နှလုံးနှစ်ပိုင်းစလုံးပါဝင်ရသနည်း။
၃ ချစ်ခြင်းမေတ္တာကို ‘ပုဂ္ဂိုလ်ချင်းလှိုက်လှိုက်လှဲလှဲတွယ်တာမှု သို့မဟုတ် နှစ်နှစ်ကာကာချစ်ခင်စုံမက်မှု၊ လှိုက်လှိုက်လှဲလှဲမြတ်နိုးမှု သို့မဟုတ် သူတစ်ထူးကို စွဲလမ်းမှုတို့၏ ခံစားမှုအာရုံတစ်ခုဖြစ်သည်ဟု ရုပ်လုံးဖော်ပြထားသည်။’ ယင်းသည် သူတစ်ထူး၏ကောင်းကျိုးအတွက် လုပ်ဆောင်ရန် လူတို့ကိုစေ့ဆော်ပေးသည့် အရည်အချင်းတစ်ရပ်ဖြစ်ပြီး ရံဖန်ရံခါ အကြီးအကျယ်ကိုယ်ကျိုးစွန့်ရသည်။ သမ္မာကျမ်းစာ၌ ရုပ်လုံးဖော်ထားသကဲ့သို့ ချစ်ခြင်းမေတ္တာတွင် စိတ်နှင့် နှလုံး နှစ်ပိုင်းစလုံးပါဝင်သည်။ စိတ် သို့မဟုတ် အသိဉာဏ်သည် တစ်ခန်းတစ်ကဏ္ဍမှ ပါဝင်သည်၊ အကြောင်းမှာ ချစ်ခြင်းမေတ္တာရှိသူတစ်ဦးသည် မိမိနှင့် မိမိချစ်သောအခြားသူများ၊ အားလုံးတို့၌ အားနည်းချက်များကော နှစ်သက်ဖွယ်ရာအရည်အချင်းများပါရှိကြောင်း အသိအမှတ်ပြုကာ သိလျက်နှင့်ချစ်သောကြောင့်တည်း။ အသိဉာဏ်တွင် ထပ်၍ပါဝင်သည့်အရာရှိသည်၊ အဘယ်ကြောင့်ဟူမူ ခရစ်ယာန်တစ်ဦးတွင် မေတ္တာထားရသောသူများ ရှိနေခြင်းကြောင့်တည်း—တစ်ခါတစ်ရံ ယင်းသို့ပြုရန် ပင်ကိုသဘောနှင့်ဆန့်ကျင်ကောင်းဆန့်ကျင်မည်ဖြစ်သော်လည်း ကျမ်းစာဖတ်ရှုရာမှ ဘုရားသခင်သည် မိမိအား ထိုသို့ပြုစေလိုကြောင်းသိရှိလာသည်။ (မဿဲ ၅:၄၄; ၁ ကောရိန္သု ၁၆:၁၄) ချစ်ခြင်းမေတ္တာသည် အရင်းခံအားဖြင့် နှလုံးသားမှပေါက်ဖွားလာသည်။ သမ္မာကျမ်းစာ၌ ဖော်ပြထားသည့်အတိုင်း စစ်မှန်သောချစ်ခြင်းမေတ္တာမှာ အသိဉာဏ်ပိုင်းသက်သက်မျှမဟုတ်ချေ။ ယင်းတွင် နက်ရှိုင်းသောစိတ်ရင်းခံနှင့် လုံးလုံးစိတ်ပိုင်းအပ်နှံမှု ရှိဖို့လိုသည်။—၁ ပေတရု ၁:၂၃။
၄။ မေတ္တာသည် အဘယ်နည်းဖြင့် အားကြီးသော နှောင်ကြိုးဖြစ်သနည်း။
၄ နှလုံးထဲ၌ တစ်ကိုယ်ကောင်းစိတ်ရှိသူတို့သည် အမှန်မေတ္တာပါသည့် ပေါင်းသင်းဆက်ဆံမှုမျိုး တည်ဆောက်နိုင်ခဲသည်၊ အကြောင်းမှာ ချစ်ခြင်းမေတ္တာရှိသူတစ်ဦးသည် မိမိအကျိုးထက် အခြားသူတို့၏အကျိုးကို ဦးစားထားရန်အသင့်ရှိသောကြောင့်တည်း။ (ဖိလိပ္ပိ ၂:၂-၄) မေတ္တာကြောင့်ပေးကမ်းသောအခါ “ခံယူခြင်းထက်ပေးကမ်းခြင်း၌ ပျော်ရွှင်မှုသာ၍ရှိ၏” ဟူသောယေရှု၏စကားများသည် အထူးမှန်ကန်၏။ (တမန်တော် ၂၀:၃၅၊ ကဘ) ချစ်ခြင်းမေတ္တာသည် အားကြီးသောနှောင်ကြိုးဖြစ်၏။ (ကောလောသဲ ၃:၁၄) ယင်းတွင် ခင်မင်မှုပါဝင်လေ့ရှိသော်လည်း ချစ်ခြင်းမေတ္တာ၏နှောင်ကြိုးများသည် ခင်မင်မှုနှောင်ကြိုးများထက် သာ၍ခိုင်၏။ ဇနီးမောင်နှံတို့၏ ချစ်ကြည်နူးပေါင်းသင်းဆက်ဆံမှုကို ချစ်ခြင်းမေတ္တာအဖြစ် တစ်ခါတစ်ရံရုပ်လုံးဖော်ကြ၏; သို့သော် သမ္မာကျမ်းစာက ကျွန်ုပ်တို့မွေးမြူရန် တိုက်တွန်းထားသော ချစ်ခြင်းမေတ္တာမှာ ကာယရုပ်ရည်ဆွဲဆောင်မှုထက် သာ၍ကြာရှည်ခံသည်။ မောင်နှံစုံတစ်စုံသည် တစ်ဦးကိုတစ်ဦး အမှန်တကယ်ချစ်ကြသောအခါ အသက်ကြီးရင့်ခြင်း၏ အိုမင်းမစွမ်းဖြစ်မှုများကြောင့်ဖြစ်စေ၊ သူတို့ထဲမှတစ်ဦးဦးက မစွမ်းမသန်ဖြစ်သောကြောင့်ဖြစ်စေ ကာယပေါင်းသင်းဆက်ဆံမှု မပြုနိုင်တော့လျှင်ပင် အတူဆက်၍နေထိုင်ကြ၏။
ချစ်ခြင်းမေတ္တာ—မရှိမဖြစ်လိုအပ်သောအရည်အချင်း
၅။ ခရစ်ယာန်တစ်ဦးအတွက် မေတ္တာသည် အဘယ်ကြောင့် မရှိမဖြစ်လိုအပ်သောအရည်အချင်းဖြစ်ရသနည်း။
၅ ခရစ်ယာန်တစ်ဦးအတွက် ချစ်ခြင်းမေတ္တာသည် အဘယ်ကြောင့် မရှိမဖြစ်လိုအပ်သောအရည်အချင်းတစ်ရပ် ဖြစ်သနည်း။ ပထမအချက်မှာ ယေရှုသည် မိမိ၏နောက်လိုက်များကို အချင်းချင်းချစ်ရန် မိန့်မှာခဲ့ခြင်းကြောင့်တည်း။ ကိုယ်တော် ဤသို့မိန့်တော်မူ၏– “သင်တို့သည် ငါပညတ်သမျှတို့ကိုကျင့်ဆောင်လျှင် ငါ၏အဆွေဖြစ်ကြ၏။ သင်တို့သည် အချင်းချင်းချစ်စေခြင်းငှာ ဤပညတ်တို့ကိုငါပေး၏။” (ယောဟန် ၁၅:၁၄၊ ၁၇) ဒုတိယအချက်မှာ ယေဟောဝါသည် ချစ်ခြင်းမေတ္တာ၏ပြယုဂ်ဖြစ်ပြီး ကိုယ်တော့်အား ဝတ်ပြုကိုးကွယ်သူများအနေဖြင့် ကျွန်ုပ်တို့သည် ကိုယ်တော့်ကိုအတုယူသင့်၍တည်း။ (ဧဖက် ၅:၁; ၁ ယောဟန် ၄:၁၆) သမ္မာကျမ်းစာက ယေဟောဝါနှင့် ယေရှုကိုသိကျွမ်းခြင်းသည် ထာဝရအသက်ဖြစ်၏ဟု ဆိုထားသည်။ ကိုယ်တော်နှင့်တူညီရန် ကျွန်ုပ်တို့မကြိုးစားလျှင် ဘုရားသခင်ကို ကျွန်ုပ်တို့သိကျွမ်းသည်ဟု မည်သို့ဆိုနိုင်မည်နည်း။ တမန်တော်ယောဟန်က ဤသို့ကျိုးကြောင်းဆင်ခြင်ပြခဲ့သည်– “ချစ်ခြင်းမရှိသောသူသည် ဘုရားသခင်ကိုမသိ။ အကြောင်းမူကား၊ ဘုရားသခင်သည် ချစ်ခြင်းမေတ္တာဖြစ်တော်မူ၏။”—၁ ယောဟန် ၄:၈။
၆။ ကျွန်ုပ်တို့အသက်တာ၏ကဏ္ဍအသီးသီးကို မေတ္တာက မည်သို့ဟန်ချက်ညီစေနိုင်သနည်း။
၆ မေတ္တာသည် တတိယအကြောင်းရင်းအတွက် အရေးပါသည်– ယင်းက ကျွန်ုပ်တို့အသက်တာ၏ ကဏ္ဍအသီးသီးကို ဟန်ချက်ညီရန် ထိန်းပေးပြီး ကျွန်ုပ်တို့ပြုလုပ်ရာပေါ်တွင် ရည်ရွယ်ချက်ကောင်းကို ထပ်ဆင့်ပေး၏။ ဥပမာ၊ ဘုရားသခင့်နှုတ်မြွက်စကားတော်၏ အသိပညာကို အဆက်မပြတ်ဆည်းပူးရန် အရေးကြီးသည်။ ယင်းသို့သောအသိပညာသည် ခရစ်ယာန်တစ်ဦးအတွက် အစားအစာနှင့်တူသည်။ ယင်းက သူ့အား ရင့်ကျက်ခြင်းသို့ ကြီးထွားလာစေရန်နှင့် ဘုရားသခင်၏အလိုတော်အတိုင်း ပြုမူစေရန် ကူညီပေးသည်။ (ဆာလံ ၁၁၉:၁၀၅; မဿဲ ၄:၄; ၂ တိမောသေ ၃:၁၅၊ ၁၆) သို့သော် ပေါလုက ဤသို့သတိပေးသည်– “အသိပညာသည် လူတို့ကို မာန်မာနထောင်လွှားစေတတ်၏။ မေတ္တာမူကား ဆောက်တည်မှုကိုပြုတတ်၏။” (၁ ကောရိန္သု ၈:၁၊ သတင်းကောင်း) မှန်ပါသည်၊ တိကျမှန်ကန်သောအသိပညာတွင် ချွတ်ယွင်းချက်မရှိချေ။ ချွတ်ယွင်းနေသည်မှာ ကျွန်ုပ်တို့—ကျွန်ုပ်တို့တွင် အပြစ်ပြုလိုသောသဘောရှိနေသည်။ (ကမ္ဘာဦး ၈:၂၁) ဟန်ချက်ညီစေသော ချစ်ခြင်းမေတ္တာ၏သြဇာလွှမ်းမိုးမှုမရှိပါက အသိပညာသည် လူတစ်ဦးကို မာန်မာနထောင်လွှားစေနိုင်ပြီး မိမိကိုယ်ကို အခြားသူတို့ထက် သာသည်ဟု ယူဆစေသည်။ အရင်းခံအားဖြင့် ချစ်ခြင်းမေတ္တာက သူ့ကိုလှုံ့ဆော်ပါက ထိုသို့ဖြစ်မည်မဟုတ်ချေ။ “မေတ္တာသည် . . . ဝါကြွားခြင်းမရှိ၊ မာန်မာနမရှိ။” (၁ ကောရိန္သု ၁၃:၄) ချစ်ခြင်းမေတ္တာအားဖြင့် လှုံ့ဆော်ခြင်းခံရသောခရစ်ယာန်တစ်ဦးသည် နက်နဲသောအသိပညာကို သူဆည်းပူးထားလင့်ကစား မာန်မာနတက်လာမည်မဟုတ်ချေ။ ချစ်ခြင်းမေတ္တာက သူ့အား ဆက်နှိမ့်ချစေပြီး မိမိနာမည်ရလိုစိတ်ကို တားဆီးပေးသည်။—ဆာလံ ၁၃၈:၆; ယာကုပ် ၄:၆။
၇၊ ၈။ မေတ္တာက သာ၍အရေးကြီးသောအရာများအပေါ် အာရုံစိုက်စေရန် ကျွန်ုပ်တို့ကို မည်သို့ကူညီပေးသနည်း။
၇ ပေါလုသည် ဖိလိပ္ပိသို့ ဤသို့ရေးသားခဲ့သည်– “ငါဆုတောင်းသောအချက်ဟူမူကား၊ သင်တို့၏မေတ္တာသည် တိကျမှန်ကန်သောအသိပညာနှင့် ပြည့်ဝစုံလင်သောပိုင်းခြားဝေဖန်နိုင်စွမ်းတို့ဖြင့် တိုး၍ကုံလုံကြွယ်ဝနေလျက် . . . သာ၍အရေးကြီးသောအရာများကို သင်တို့သေချာစွာသိနိုင်မည်အကြောင်းတည်း။” (ဖိလိပ္ပိ ၁:၉၊ ၁၀၊ ကဘ) ခရစ်ယာန်ချစ်ခြင်းမေတ္တာသည် သာ၍အရေးကြီးသောအရာများကို သေချာစေရန်ပြုပါဟူသည့် ဤအားပေးချက်ကိုလိုက်နာရန် ကျွန်ုပ်တို့ကို ကူညီပေးလိမ့်မည်။ ဥပမာအနေနှင့် တိမောသေထံ ပေါလုရေးသောစကားများကို သုံးသပ်ကြည့်ပါ– “ကြီးကြပ်မှူးအရာကို လှမ်းယူနေသောသူသည် ကောင်းသောအမှုအရာကိုတောင့်တနေ၏။” (၁ တိမောသေ ၃:၁၊ ကဘ) ၂၀၀၀ ပြည့်နှစ်လုပ်ငန်းတော်နှစ်အတွင်း ကမ္ဘာတစ်ဝန်းရှိအသင်းတော်အရေအတွက် ၁,၅၀၂ ခုတိုးလာရာ လက်ရှိစုစုပေါင်းမှာ ၉၁,၄၈၇ ခုဖြစ်သည်။ သို့ဖြစ်၍ အကြီးအကဲများ အလွန်ပင်ထပ်လိုအပ်နေရာ အဆိုပါအခွင့်အရေးကို လက်လှမ်းယူကြသူတို့သည် ချီးမွမ်းခံရသင့်သည်။
၈ သို့သော် ကြီးကြပ်ရေးဆိုင်ရာ အခွင့်ထူးများကို လက်လှမ်းယူနေသူတို့သည် ထိုသို့သောအခွင့်ထူးတစ်ခု၏ ရည်ရွယ်ချက်ကို သူတို့စိတ်တွင်ထားမည်ဆိုလျှင် ကောင်းသောဟန်ချက်ကို ထိန်းထားမည်ဖြစ်သည်။ အာဏာရရှိခြင်း သို့မဟုတ် ကျယ်ကျယ်ပြန့်ပြန့်ထင်ပေါ်ခြင်းမှာ အရေးပါသောအရာမဟုတ်ချေ။ ယေဟောဝါစိတ်တော်နှင့်တွေ့သောအကြီးအကဲများသည် ကိုယ်တော်နှင့် မိမိညီအစ်ကိုများအပေါ်ထားသည့်မေတ္တာ၏ လှုံ့ဆော်ပေးခြင်းကိုခံရသည်။ သူတို့သည် ထင်ပေါ်ကျော်ကြားမှုရရန် သို့မဟုတ် ဩဇာအရှိန်အဝါရှိရန် ရှာကြံနေကြခြင်းမဟုတ်။ တမန်တော်ပေတရုက စိတ်ရင်းကောင်းကိုထိန်းထားရန် အသင်းတော်ရှိအကြီးအကဲများကို ဆုံးမပြီးနောက် “နှိမ့်ချခြင်း” လိုအပ်မှုကို အလေးပေးဖော်ပြခဲ့၏။ အသင်းတော်ရှိသူအားလုံးကို သူဤသို့ ဆုံးမခဲ့သည်– “တန်ခိုးကြီးသောလက်တော်အောက်၌ ကိုယ်ကိုကိုယ်နှိမ့်ချကြလော့။” (၁ ပေတရု ၅:၁-၆) လက်လှမ်းယူသူမည်သူမဆိုသည် အလုပ်ကို ဂရုတစိုက်ကြိုးစားလုပ်ကိုင်ပြီး နှိမ့်ချမှုလည်းရှိသောကြောင့် သူတို့၏အသင်းတော်များအတွက် ကောင်းချီးတစ်ရပ်ဖြစ်စေသော ကမ္ဘာတစ်ဝန်းရှိ များပြားလှသည့်အကြီးအကဲများ၏ ပုံသက်သေကို ကောင်းစွာသုံးသပ်သင့်သည်။—ဟေဗြဲ ၁၃:၇။
ကောင်းသောရည်ရွယ်ချက်က ခံနိုင်ရည်ရှိရန် ကျွန်ုပ်တို့ကိုကူညီပေး
၉။ ခရစ်ယာန်များသည် ယေဟောဝါ၏ကတိထားရာ ကောင်းချီးများကို စိတ်တွင်အဘယ်ကြောင့် ထားရှိကြသနည်း။
၉ ချစ်ခြင်းမေတ္တာဖြင့် လှုံ့ဆော်ခံရခြင်း၏ အရေးပါမှုကို အခြားတစ်နည်းဖြင့် တွေ့မြင်ရသည်။ ချစ်ခြင်းမေတ္တာကြောင့် ဘုရားဝတ်၌မွေ့လျော်ခြင်းကို အမီလိုက်ရန်ကြိုးစားသူတို့အား သမ္မာကျမ်းစာက ယခုတွင်ကြွယ်ဝသောကောင်းချီးများနှင့် နောင်အနာဂတ်တွင်စဉ်းစား၍မကုန်နိုင်သော ထူးမြတ်လှသည့်ကောင်းချီးများကို ကတိပြုထားသည်။ (၁ တိမောသေ ၄:၈) ဤကတိတော်များကို ခိုင်မြဲစွာယုံကြည်၍ ယေဟောဝါသည် “ကိုယ်တော်ကိုရှာသောသူအား အကျိုးပေးတော်မူ” ကြောင်း စိတ်ချယုံကြည်သောခရစ်ယာန်တစ်ဦးသည် ယုံကြည်ခြင်းအခိုင်အမာဖြင့်ရပ်တည်ရန် ကူညီပေးခံရသည်။ (ဟေဗြဲ ၁၁:၆) ကျွန်ုပ်တို့အများစုမှာ ဘုရားသခင်၏ကတိတော်များ ပြည့်စုံခြင်းကိုတမ်းတကြပြီး တမန်တော်ယောဟန်၏ ဤသဘောထားမျိုး ရှိကြသည်– “အာမင်။ သခင်ယေရှုကြွလာတော်မူပါ။” (ဗျာဒိတ် ၂၂:၂၀-၂၁) မှန်ပါသည်၊ ရရှိလုဆဲကောင်းချီးများအပေါ် စဉ်းစားဆင်ခြင်ခြင်းသည် စိတ်နှလုံးထဲတွင် “မိမိရှေ့၌ထားသောဝမ်းမြောက်ခြင်းအကြောင်းကြောင့်” ယေရှုအား ခံနိုင်ရည်ရှိစေသကဲ့သို့ ကျွန်ုပ်တို့သစ္စာရှိမည်ဆိုလျှင် ခံနိုင်ရည်ရှိစေဖို့ ခွန်အားပေးသည်။—ဟေဗြဲ ၁၂:၁၊ ၂။
၁၀၊ ၁၁။ မေတ္တာအားဖြင့် လှုံ့ဆော်ခံရခြင်းက ကျွန်ုပ်တို့ခံနိုင်ရည်ရှိစေရန် မည်သို့ကူညီပေးသနည်း။
၁၀ သို့သော် မိမိတို့ ယေဟောဝါအား ဝတ်ပြုကိုးကွယ်ရခြင်း၏တစ်ခုတည်းသောရည်ရွယ်ချက်မှာ ကမ္ဘာသစ်တွင် အသက်ရှင်နေထိုင်လိုသည့်ဆန္ဒကြောင့်ဖြစ်နေလျှင်ကော အသို့နည်း။ ထိုသို့ဖြစ်လျှင် အခက်အခဲများကြုံရသောအခါ သို့မဟုတ် အဖြစ်အပျက်များသည် မိမိတို့မျှော်လင့်သလို သို့မဟုတ် မျှော်လင့်ချိန်၌ဖြစ်မလာသည့်အခါ ကျွန်ုပ်တို့သည် အလွယ်တကူပင် စိတ်မရှည်နိုင်၊ စိတ်မကျေမနပ်ဖြစ်လာနိုင်၏။ ကျွန်ုပ်တို့သည် ရွေ့လျော့လွင့်မျောသွားမည့် အန္တရာယ်ကြီးနှင့် ရင်ဆိုင်ရနိုင်သည်။ (ဟေဗြဲ ၂:၁; ၃:၁၂) ပေါလုက ဒေမအမည်ရှိ မိမိကိုစွန့်သွားခဲ့သော အပေါင်းအသင်းဟောင်းတစ်ဦးအကြောင်း ပြောခဲ့၏။ အဘယ်ကြောင့်စွန့်သွားသနည်း။ သူသည် “ယခုဘဝကိုနှစ်သက်သောစိတ်ရှိ” သောကြောင့်တည်း။ (၂ တိမောသေ ၄:၁၀) ကိုယ်ကျိုးအကြောင်းများအတွက်သာ ဝတ်ပြုသူမည်သူမဆို အလားတူလွင့်မျောသွားမည့်အန္တရာယ် ရှိသည်။ သူတို့သည် လောကမှ ကမ်းလှမ်းသော လက်ငင်းအခွင့်အလမ်းများဖြင့် ဆွဲဆောင်ခံရနိုင်ပြီး လာလတ္တံ့သော ကောင်းချီးဆိုင်ရာမျှော်လင့်ချက်ဖြင့် ယခု အနစ်နာခံမှုများပြုလိုစိတ် ပျောက်ကင်းသွားနိုင်သည်။
၁၁ အနာဂတ်ကောင်းချီးများရလိုသည့်ဆန္ဒနှင့် စမ်းသပ်မှုများမှ လွတ်ငြိမ်းဖို့ မျှော်လင့်ချက်ထားရှိခြင်းမှာ သင့်လျော်လျောက်ပတ်၍သဘာဝကျစဉ် ချစ်ခြင်းမေတ္တာက ကျွန်ုပ်တို့ဘဝတွင် အထွတ်အထိပ်ထားသင့်ရာအပေါ် ကျွန်ုပ်တို့၏တန်ဖိုးထားလေးမြတ်မှုကို တည်ဆောက်ပေးသည်။ အရေးကြီးသောအရာမှာ ကျွန်ုပ်တို့၏ဆန္ဒမဟုတ်၊ ယေဟောဝါ၏အလိုတော်ဖြစ်သည်။ (လုကာ ၂၂:၄၁၊ ၄၂) မှန်ပါသည်၊ မေတ္တာက ကျွန်ုပ်တို့ကိုဆောက်တည်ပေးသည်။ ယင်းက ကျွန်ုပ်တို့၏ဘုရားသခင်အပေါ် ကျေကျေနပ်နပ်နှင့် စိတ်ရှည်စွာစောင့်ဆိုင်းနေရန် ကိုယ်တော်ပေးသနားသော မည်သည့်ကောင်းချီးမဆိုဖြင့် ကျေနပ်ရောင့်ရဲနေကာ ကိုယ်တော်သတ်မှတ်ထားချိန်တွင် ကိုယ်တော်ကတိပေးတော်မူခဲ့သမျှသော အရာမှန်သမျှ—ထိုထက်မကပင် ကျွန်ုပ်တို့ ရရှိကြလိမ့်မည်ဖြစ်ကြောင်း ယုံကြည်စိတ်ချနေစေ၏။ (ဆာလံ ၁၄၅:၁၆; ၂ ကောရိန္သု ၁၂:၈၊ ၉) တစ်ချိန်တည်းတွင် “မေတ္တာသည် . . . ကိုယ်အကျိုးကိုမရှာတတ်” ခြင်းကြောင့် ကိုယ်ကျိုးကိုသာမကြည့်ဘဲ ဆက်အမှုတော်ဆောင်သွားရန် ချစ်ခြင်းမေတ္တာက ကျွန်ုပ်တို့ကိုထောက်ကူပေးသည်။—၁ ကောရိန္သု ၁၃:၄၊ ၅။
ခရစ်ယာန်တို့သည် မည်သူတို့ကို မေတ္တာထားသင့်သနည်း
၁၂။ ယေရှု၏စကားအရ မည်သူတို့ကို ကျွန်ုပ်တို့ချစ်သင့်သနည်း။
၁၂ ကျွန်ုပ်တို့သည် မည်သူတို့ကိုချစ်သင့်ကြောင်းနှင့်ပတ်သက်၍ ယေရှုက မောရှေ၏ပညတ်မှတင်ပြချက်နှစ်ရပ် ကိုးကားသောအခါ ယေဘုယျစည်းမျဉ်းမူတစ်ရပ်ကို ကိုယ်တော်ချပေးခဲ့၏။ ကိုယ်တော် ဤသို့မိန့်တော်မူသည်– “သင်၏ဘုရားသခင်ယေဟောဝါကို သင့်နှလုံးအကြွင်းမဲ့၊ သင့် ဝိညာဉ်စိုးလ်တစ်ခုလုံး၊ သင့်စိတ်ရှိသမျှနှင့်ချစ်လော့” နှင့် “ကိုယ့်အိမ်နီးချင်းကို ကိုယ်နှင့်အမျှချစ်လော့။”—မဿဲ ၂၂:၃၇-၃၉၊ ကဘ။
၁၃။ ယေဟောဝါအား မမြင်နိုင်သော်လည်း ကိုယ်တော့်ကို ချစ်မြတ်နိုးရန် ကျွန်ုပ်တို့မည်သို့သင်ယူနိုင်သနည်း။
၁၃ ယေရှု၏စကားမှ ပထမဆုံးနှင့် ဦးဆုံးကျွန်ုပ်တို့ချစ်သင့်သူမှာ ယေဟောဝါဖြစ်ကြောင်း ထင်ရှားပါ၏။ သို့သော် ကျွန်ုပ်တို့သည် ယေဟောဝါအပေါ် ချစ်ခြင်းမေတ္တာအပြည့်ဖြင့် မွေးဖွားလာကြသည်မဟုတ်။ ယင်းက ကျွန်ုပ်တို့မွေးမြူပျိုးထောင်ယူရမည့်အရာတစ်ခု ဖြစ်သည်။ ကိုယ်တော့်အကြောင်း ကျွန်ုပ်တို့ စကြားချိန်တွင် ကျွန်ုပ်တို့ကြားရသည့်အရာကြောင့် ကိုယ်တော်ထံ ဆွဲဆောင်ခြင်းခံခဲ့ရသည်။ တဖြည်းဖြည်းနှင့် လူသားတို့အတွက် မြေကြီးကို ကိုယ်တော်မည်သို့ပြင်ဆင်ခဲ့ကြောင်း ကျွန်ုပ်တို့သိလာခဲ့ကြ၏။ (ကမ္ဘာဦး ၂:၅-၂၃) လူသားတို့နှင့် ကိုယ်တော်မည်သို့ဆက်ဆံပုံ၊ လူ့မိသားစုသို့ ဦးဆုံးအပြစ်ဝင်ရောက်ခဲ့သောအခါ ကျွန်ုပ်တို့ကို မစွန့်ပစ်ဘဲ ရွေးနုတ်ရန် အဆင့်ဆင့်လုပ်ဆောင်ပုံတို့ကို ကျွန်ုပ်တို့ သိလာခဲ့ကြသည်။ (ကမ္ဘာဦး ၃:၁-၅၊ ၁၅) သစ္စာရှိသူတို့ကို သနားကြင်နာစွာဖြင့် ကိုယ်တော်ဆက်ဆံခဲ့ပြီး နောက်ဆုံး၌ ကျွန်ုပ်တို့၏အပြစ်မှ ခွင့်လွှတ်မှုရရန် မိမိ၏တစ်ပါးတည်းသောသားတော်ကို ကျွန်ုပ်တို့အား ပေးခဲ့သည်။ (ယောဟန် ၃:၁၆၊ ၃၆) တိုး၍သိလာသော ဤအသိပညာက ယေဟောဝါအပေါ် ကျွန်ုပ်တို့၏ ကျေးဇူးတင်လေးမြတ်မှုကို တိုးများလာစေသည်။ (ဟေရှာယ ၂၅:၁) ဘုရင်ဒါဝိဒ်က ယေဟောဝါ၏မေတ္တာပါသောဂရုစိုက်မှုကြောင့် ကိုယ်တော်အား သူချစ်မြတ်နိုးကြောင်းဆိုခဲ့သည်။ (ဆာလံ ၁၁၆:၁-၉) ယနေ့ ယေဟောဝါသည် ကျွန်ုပ်တို့ကို ဂရုစိုက်ပြီး လမ်းညွှန်၍ ခွန်အားပေးကာ အားတက်စေသည်။ ကိုယ်တော့်အကြောင်း သာ၍သိလာလေလေ ကျွန်ုပ်တို့၏ချစ်ခြင်းမေတ္တာမှာ ပိုမိုနက်ရှိုင်းလာလေလေဖြစ်သည်။—ဆာလံ ၃၁:၂၃; ဇေဖနိ ၃:၁၇; ရောမ ၈:၂၈။
ကျွန်ုပ်တို့၏မေတ္တာကို မည်သို့ပြနိုင်သနည်း
၁၄။ ဘုရားသခင်အပေါ်ထားသည့် ကျွန်ုပ်တို့၏မေတ္တာမှာစစ်မှန်ကြောင်း အဘယ်နည်းဖြင့် ပြနိုင်သနည်း။
၁၄ မှန်ပါသည်၊ ကမ္ဘာတစ်ဝန်းရှိသူတို့က မိမိတို့သည် ဘုရားသခင်ကိုချစ်သည်ဟုဆိုကြသော်လည်း သူတို့၏အပြောနှင့် အလုပ်မှာတခြားစီဖြစ်သည်။ ယေဟောဝါအား ကျွန်ုပ်တို့ အမှန်တကယ်ချစ်မြတ်နိုးကြောင်း ကျွန်ုပ်တို့ မည်သို့သိနိုင်ကြမည်နည်း။ ကိုယ်တော်ထံ ဆုတောင်းပြီး ကျွန်ုပ်တို့၏ခံစားချက်ကို ကိုယ်တော့်အား ပြောပြနိုင်သည်။ ထို့ပြင် ကျွန်ုပ်တို့၏မေတ္တာကို ဖော်ပြသောနည်းလမ်းတစ်ရပ်ဖြင့် ကျွန်ုပ်တို့ပြုမူနိုင်ကြ၏။ တမန်တော်ယောဟန်က ဤသို့ဆိုသည်– “ကိုယ်တော် [ဘုရားသခင်] ၏နှုတ် [မြွက်] တော်ကို စောင့်ရှောက်သောသူမည်သည်ကား ဘုရားသခင်ကို ချစ်ခြင်းမေတ္တာသည် ထိုသူ၌အမှန်စုံလင်၏။ ငါတို့သည် ကိုယ်တော်၌ရှိကြောင်းကို ထိုသို့အားဖြင့်သိရကြ၏။ (၁ ယောဟန် ၂:၅; ၅:၃၊ သမ္မာ) အခြားအရာများတွင် ဘုရားသခင့်နှုတ်မြွက်တော်က အတူတကွပေါင်းသင်းရန်နှင့် သန့်ရှင်း၍ ကောင်းသောအသက်တာဖြင့် အသက်ရှင်ရန် ကျွန်ုပ်တို့ကို မိန့်မှာထားသည်။ ဟန်ဆောင်ခြင်းကိုရှောင်၍ အမှန်တရားကိုပြောပြီး ကျွန်ုပ်တို့၏စဉ်းစားတွေးတောမှုကို သန့်ရှင်းနေစေပါ။ (၂ ကောရိန္သု ၇:၁; ဧဖက် ၄:၁၅; ၁ တိမောသေ ၁:၅; ဟေဗြဲ ၁၀:၂၃-၂၅) ချို့ငဲ့နေသူတို့အား ရုပ်ပစ္စည်းအကူအညီပေးခြင်းဖြင့် မေတ္တာကို ကျွန်ုပ်တို့ပြသကြ၏။ (၁ ယောဟန် ၃:၁၇၊ ၁၈) ထို့ပြင် ကျွန်ုပ်တို့သည် ယေဟောဝါအကြောင်း အခြားသူတို့ကို မပြောဘဲမနေကြပါ။ ယင်းတွင် ဘုရားသခင့်နိုင်ငံတော်သတင်းကောင်းကို ကမ္ဘာတစ်ဝန်း ဟောပြောခြင်း၌ပါဝင်နေခြင်းလည်း အကျုံးဝင်၏။ (မဿဲ ၂၄:၁၄; ရောမ ၁၀:၁၀) ယင်းသို့သောအရာများတွင် ဘုရားသခင့်နှုတ်မြွက်စကားကို နာခံခြင်းက ယေဟောဝါအပေါ်ထားသည့် ကျွန်ုပ်တို့၏ချစ်ခြင်းမေတ္တာမှာ စစ်မှန်ကြောင်း သာဓကဖြစ်သည်။
၁၅၊ ၁၆။ ယေဟောဝါအားချစ်သောမေတ္တာက လွန်ခဲ့သောနှစ်တွင် လူများစွာ၏အသက်တာအပေါ် မည်သို့သြဇာသက်ရောက်ခဲ့သနည်း။
၁၅ ယေဟောဝါအား ချစ်သောမေတ္တာက လူတို့ကို ဆုံးဖြတ်ချက်ကောင်းများချရန်ဖြစ်စေ၏။ လွန်ခဲ့သောနှစ်က ယင်းသို့သောမေတ္တာသည် ၂၈၈,၉၀၇ ဦးအား မိမိတို့၏ဘဝကို ကိုယ်တော်ထံဆက်ကပ်အပ်နှံကာ ရေတွင်နှစ်ခြင်းခံယူခြင်းဖြင့် ထိုဆုံးဖြတ်ချက်ကို အမှတ်အသားပြုဖော်ပြရန် စေ့ဆော်ပေးခဲ့သည်။ (မဿဲ ၂၈:၁၉၊ ၂၀) သူတို့ဆက်ကပ်အပ်နှံခြင်းမှာ အဓိပ္ပာယ်ရှိသည်။ ယင်းက သူတို့ဘဝအသက်တာ၌ အပြောင်းအလဲတစ်ခုကို မှတ်သားပြခဲ့သည်။ ဥပမာ၊ ဂေဇ်မန်သည် အယ်လ်ဘေးနီးယားနိုင်ငံရှိ ထိပ်တန်းဘတ်စကက်ဘောအားကစားအကျော်အမော် တစ်ဦးဖြစ်သည်။ သူနှင့် သူ၏ဇနီးသည် နှစ်အနည်းငယ်ကြာကြာ ကျမ်းစာသင်အံမှုပြုခဲ့ပြီး အခက်အခဲများကြားမှ နောက်ဆုံးတွင် ဘုရားသခင့်နိုင်ငံတော်ကြေညာသူများအဖြစ် အရည်အချင်းပြည့်မီလာခဲ့သည်။ လွန်ခဲ့သောနှစ်က ဂေဇ်မန်သည် နှစ်ခြင်းယူခဲ့ပြီး ၂၀၀၀ ပြည့်နှစ်လုပ်ငန်းတော်နှစ်တွင် အယ်လ်ဘေးနီးယား၌နှစ်ခြင်းခံသူ ၃၆၆ ဦးထဲမှ တစ်ဦးဖြစ်သည်။ သတင်းစာတစ်စောင်ရှိ ဆောင်းပါးတစ်ခုက သူနှင့်ပတ်သက်၍ ဤသို့ဆိုသည်– “သူ၏ဘဝတွင် ရည်ရွယ်ချက်တစ်ခုရှိပြီး ယင်းအတွက်ကြောင့် သူနှင့် သူ့မိသားစုသည် မိမိတို့၏ဘဝတွင် အပျော်ရွှင်ဆုံးနေ့ရက်များကို ခံစားနေကြသည်။ သူ့အတွက်ဆိုလျှင် ဘဝမှ အကျိုးအမြတ်မည်မျှထုတ်ယူနိုင်ခြင်းမှာ အရေးမပါတော့ဘဲ ယင်းအစား အခြားသူတို့ကို မည်မျှအထိ အကူအညီပေးနိုင်ခြင်းသည်သာ အရေးပါ၏။”
၁၆ အလားတူ ဂူအန် ရေနံကုမ္ပဏီတစ်ခုတွင်လုပ်ကိုင်နေသော နှစ်ခြင်းခံပြီးခါစညီအစ်မတစ်ဦးသည် မက်လောက်စရာကမ်းလှမ်းချက်တစ်ခုကို ရရှိခဲ့သည်။ နှစ်ချီပြီး ရာထူးအဆင့်ဆင့်တက်လာပြီးနောက် နောက်ဆုံးတွင် သူသည် ထိုကုမ္ပဏီ၏သမိုင်းတွင် ဦးဆုံးအမျိုးသမီးဒု-ဥက္ကဋ္ဌဖြစ်ခွင့်ကို ကမ်းလှမ်းခြင်းခံခဲ့ရ၏။ သို့သော် ယခု သူသည် မိမိ၏ဘဝအသက်တာကို ယေဟောဝါထံ ဆက်ကပ်အပ်နှံထားပြီးပြီ။ သို့ဖြင့် ကိစ္စရပ်များကို မိမိ၏ခင်ပွန်းသည်နှင့် တိုင်ပင်ဆွေးနွေးပြီးနောက် ဤညီအစ်မသစ်သည် အဆိုပါကမ်းလှမ်းချက်ကို ငြင်းလိုက်ကာ ယင်းအစား အချိန်ပြည့်အမှုတော်ဆောင်၊ ရှေ့ဆောင်တစ်ဦးအဖြစ်သို့ တိုးတက်လာနိုင်ရန် အချိန်ပိုင်းအလုပ်ကိုစီစဉ်ခဲ့သည်။ ယေဟောဝါအား ချစ်သောမေတ္တာက ဤလောကရှိ ငွေကြေးအကျိုးစီးပွားတိုးများရန် မကြိုးစားဘဲ ကိုယ်တော့်အတွက် ရှေ့ဆောင်တစ်ဦးအဖြစ် အမှုဆောင်လိုစိတ်ရှိရန် သူ့ကို လှုံ့ဆော်ပေးခဲ့သည်။ အမှန်မှာ ထိုမေတ္တာသည် ၂၀၀၀ ပြည့်နှစ်လုပ်ငန်းတော်နှစ်အတွင်း ရှေ့ဆောင်ဓမ္မအမှုလုပ်ငန်း၏ ခြားနားသောအသွင်အမျိုးမျိုး၌ ပါဝင်ကြရန် ကမ္ဘာတစ်ဝန်းရှိ ၈၀၅,၂၀၅ ဦးတို့ကိုလှုံ့ဆော်ပေးခဲ့သည်။ ထိုရှေ့ဆောင်များပြသခဲ့ကြသည့် မေတ္တာနှင့် ယုံကြည်ခြင်းတို့၏ သရုပ်သကန်တစ်ရပ်ပင်တည်း!
ယေရှုအားချစ်ရန် လှုံ့ဆော်ပေးခဲ့
၁၇။ ယေရှု၌ မေတ္တာနှင့်ပတ်သက်သည့် အဘယ်ကောင်းမွန်သောစံနမူနာကို ကျွန်ုပ်တို့တွေ့ရှိရသနည်း။
၁၇ မေတ္တာအားဖြင့်လှုံ့ဆော်ခံရခြင်း၌ အလွန်ကောင်းမွန်သောစံနမူနာရှင်မှာ ယေရှုဖြစ်သည်။ မိမိ၏လူသားဘဝမတိုင်မီက ကိုယ်တော်သည် ခမည်းတော်နှင့် လူသားအပေါင်းကို ချစ်ခင်ခဲ့သည်။ ဉာဏ်ပညာမြင့်မားသူအနေနှင့် ကိုယ်တော်က ဤသို့ဆိုသည်– “ငါသည်လုပ်သားချုပ်တစ်ဦးကဲ့သို့ [ယေဟောဝါ] အထံတော်ပါးတွင်ရှိ၏။ တစ်နေ့ထက်တစ်နေ့ငါသည် ကိုယ်တော်အထူးသဖြင့်ချစ်ခင်သောသူဖြစ်လာ၏။ ရှေ့တော်၌အစဉ်မပြတ်ရွှင်လန်းဝမ်းမြောက်လျက်၊ ဖန်ဆင်းတော်မူသောမြေကြီးတစ်ပြင်လုံးကြောင့်လည်း ဝမ်းမြောက်ရွှင်လန်းနေ၏။ ငါနှစ်ခြိုက်သောအကြောင်းအရာများသည် လူသားတို့နှင့်ပေါင်းဖော်၍ပျော်ပါးလျက်နေခြင်းဖြစ်သတည်း။” (သု. ၈:၃၀၊ ၃၁၊ ကဘ) ယေရှု၏မေတ္တာက ကိုယ်တော်အား ကောင်းကင်၌ကျိန်းဝပ်ရာနေရာကို စွန့်၍ ခိုကိုးရာမဲ့ကလေးငယ်တစ်ဦးအဖြစ် မွေးဖွားလာရန်လှုံ့ဆော်ပေးခဲ့သည်။ နှိမ့်ချ၍ နိမ့်ကျနေသူတို့ကို ကိုယ်တော်သည် စိတ်ရှည်စွာနှင့် သနားကြင်နာစွာ ဆက်ဆံခဲ့ပြီး ယေဟောဝါ၏ရန်သူများလက်ထဲတွင် ဝေဒနာခံခဲ့သည်။ နောက်ဆုံးတွင် လူသားအားလုံးအတွက် ညှဉ်းဆဲရာနှက်တိုင်၌ အသေသတ်ခြင်းခံခဲ့သည်။ (ယောဟန် ၃:၃၅; ၁၄:၃၀၊ ၃၁; ၁၅:၁၂၊ ၁၃; ဖိလိပ္ပိ ၂:၅-၁၁) မှန်ကန်သောစိတ်လှုံ့ဆော်မှုဆိုင်ရာ ကောင်းမွန်သောပုံသက်သေတစ်ရပ်ပါတကား!
၁၈။ (က) ယေရှု၏မေတ္တာကို ကျွန်ုပ်တို့ မည်သို့မွေးမြူကြသနည်း။ (ခ) ယေရှုအား ကျွန်ုပ်တို့ချစ်ကြောင်း အဘယ်နည်းဖြင့် ကျွန်ုပ်တို့ပြကြသနည်း။
၁၈ စိတ်ရင်းမှန်ရှိသူတို့သည် ခရစ်ဝင်ကျမ်းများရှိ ယေရှုဘဝ၏မှတ်တမ်းများကို ဖတ်ရှုကြည့်၍ ကိုယ်တော်၏သစ္စာရှိလမ်းစဉ်က များစွာသောကောင်းချီးများ ရရှိစေပုံကို ဆင်ခြင်သုံးသပ်ကြည့်သောအခါ ယင်းက သူတို့ထဲ၌ ကိုယ်တော့်အပေါ် နက်ရှိုင်းသောမေတ္တာတိုးပွားလာစေသည်။ ယနေ့ ကျွန်ုပ်တို့သည် ဤသို့ပေတရုလိပ်မူရေးသားခဲ့သူများကဲ့သို့ပင် ဖြစ်သည်– “ထိုသခင်ကို သင်တို့သည်မမြင်ဖူးသော်လည်း ချစ်ကြ၏။” (၁ ပေတရု ၁:၈) ကျွန်ုပ်တို့သည် ကိုယ်တော့်အား ယုံကြည်ကြောင်းတင်ပြ၍ ကိုယ်တော်၏ကိုယ်ကျိုးစွန့်သောဘဝအသက်တာကို အတုယူသောအခါ ကျွန်ုပ်တို့၏မေတ္တာကို ဖော်ပြသည်။ (၁ ကောရိန္သု ၁၁:၁; ၁ သက်သာလောနိတ် ၁:၆; ၁ ပေတရု ၂:၂၁-၂၅) ၂၀၀၀ ပြည့်နှစ်၊ ဧပြီလ ၁၉ ရက်တွင် စုစုပေါင်း ၁၄,၈၇၂,၀၈၆ ဦးတို့သည် ကိုယ်တော်၏သေခြင်း နှစ်ပတ်လည်သတိရအောက်မေ့ပွဲသို့တက်ရောက်ကြသောအခါ ယေရှုအား ကျွန်ုပ်တို့ချစ်ရသည့်အကြောင်းရင်းများကို သိရှိရန်နှိုးဆော်ပေးခြင်းခံခဲ့ရသည်။ အလွန်များပြားသော အရေအတွက်ပင်တည်း! ယေရှု၏ယဇ်သကာအားဖြင့် ကယ်တင်ခြင်းကို များစွာတို့စိတ်ဝင်စားကြကြောင်း သိရှိရခြင်းက အလွန်ခွန်အားဖြစ်စေသည်တကား! မှန်ပါသည်၊ ယေဟောဝါနှင့် ယေရှုတို့၏ ကျွန်ုပ်တို့အပေါ်ထားသည့်မေတ္တာနှင့် သူတို့အပေါ်ထားသည့် ကျွန်ုပ်တို့၏မေတ္တာတို့ဖြင့် ကျွန်ုပ်တို့တည်ဆောက်ခြင်းခံရသည်။
၁၉။ နောက်ဆောင်းပါးတွင် မေတ္တာနှင့်ပတ်သက်သော အဘယ်မေးခွန်းများကို ဆွေးနွေးသွားကြမည်နည်း။
၁၉ ကျွန်ုပ်တို့သည် ယေဟောဝါအား ကျွန်ုပ်တို့နှလုံး၊ စိုးလ်၊ စိတ်နှင့် ခွန်အားရှိသမျှဖြင့်ချစ်သင့်ကြောင်း ယေရှုမိန့်မှာတော်မူခဲ့သည်။ ထို့အပြင် ကျွန်ုပ်တို့၏အိမ်နီးချင်းကို ကိုယ်နှင့်အမျှချစ်သင့်ကြောင်းလည်း ကိုယ်တော်မိန့်မှာတော်မူခဲ့၏။ (မာကု ၁၂:၂၉-၃၁) ထိုသူတို့တွင် မည်သူများပါဝင်သနည်း။ အိမ်နီးချင်းကို ချစ်သောမေတ္တာက ကောင်းမွန်သောဟန်ချက်နှင့် မှန်ကန်သောရည်ရွယ်ချက်ကို ကျွန်ုပ်တို့ ဆက်ထိန်းထားရန် မည်သို့ကူညီပေးသနည်း။ ဤမေးခွန်းများကို နောက်ဆောင်းပါးတွင် ဆွေးနွေးသွားကြမည်။
သင်မှတ်မိသလော
• မေတ္တာသည် အဘယ်ကြောင့် အရေးပါသောအရည်အချင်းတစ်ရပ် ဖြစ်သနည်း။
• ယေဟောဝါကိုချစ်ရန် ကျွန်ုပ်တို့ မည်သို့သင်ယူနိုင်သနည်း။
• ကျွန်ုပ်တို့သည် ယေဟောဝါကိုချစ်ကြောင်း ကျွန်ုပ်တို့၏အပြုအမူက မည်သို့သက်သေထူသနည်း။
• ယေရှုအပေါ်ထားသည့် ကျွန်ုပ်တို့၏မေတ္တာကို မည်သို့ပြကြမည်နည်း။
[လေ့လာရန်မေးခွန်းများ]
[စာမျက်နှာ ၁၀, ၁၁ ပါ ရုပ်ပုံ]
မေတ္တာက သက်သာရာအတွက် စိတ်ရှည်စွာစောင့်ဆိုင်းရန် ကျွန်ုပ်တို့ကို ကူညီပေး
[စာမျက်နှာ ၁၂ ပါ ရုပ်ပုံ]
ယေရှု၏ကြီးမားလှသောကိုယ်ကျိုးစွန့်ခြင်းက ကိုယ်တော်အား ချစ်မြတ်နိုးရန် ကျွန်ုပ်တို့ကိုလှုံ့ဆော်ပေး