စစ်၏ဒဏ်ရာများကို ကုစားခြင်း
စစ်၏ဒဏ်ရာများကို ကုစားခြင်း
အာဗရာဟမ်သည် ပြောက်ကျားတပ်တွင် အနှစ် ၂၀ အမှုထမ်းခဲ့သည်။ * သို့သော် သူသည် စစ်မတိုက်တော့၊ စစ်ပွဲသို့ဘယ်တော့မျှထပ်သွားတော့မည်မဟုတ်။ အမှန်မှာ၊ ယခင်ကသူ၏ရန်သူအချို့သည် ယခုသူ၏အရင်းနှီးဆုံးမိတ်ဆွေများဖြစ်နေကြပြီ။ အဘယ်အရာက သူ့ကိုပြောင်းလဲစေခဲ့သနည်း။ သမ္မာကျမ်းစာပင်။ ယင်းက အာဗရာဟမ်ကို မျှော်လင့်ချက်နှင့် ထိုးထွင်းသိမြင်မှုပေးခဲ့ပြီး လူ့ကိစ္စရပ်များကို ဘုရားသခင့်ရှုထောင့်မှကြည့်မြင်ရန် ထောက်ကူပေးခဲ့သည်။ သမ္မာကျမ်းစာက သူ၏တိုက်ခိုက်လိုစိတ်ကို ဖယ်ရှားပစ်ခဲ့ပြီး သူသည် မိမိ၏ဝမ်းနည်းမှု၊ ပူဆွေးမှု၊ မုန်းတီးမှုနှင့် နာကြည်းမှုတို့ကို စတင်ကုစားခဲ့သည်။ သမ္မာကျမ်းစာသည် နှလုံးသားအတွက် ဆေးစွမ်းတစ်လက်ဖြစ်ကြောင်း သူတွေ့ရှိခဲ့သည်။
လူတစ်ဦး၏စိတ်လှုပ်ရှားမှုဆိုင်ရာဒဏ်ရာများကို ကုစားရန် သမ္မာကျမ်းစာကမည်သို့ထောက်ကူပေးသနည်း။ ၎င်းသည် အာဗရာဟမ်၌ဖြစ်ပျက်ခဲ့ရာတို့ကို ပြောင်းလဲမပေးနိုင်ခဲ့ပါ။ သို့သော် ဘုရားသခင့်နှုတ်မြွက်စကားတော်ကို ဖတ်ရှုခြင်းနှင့် စဉ်းစားဆင်ခြင်ခြင်းတို့က သူ၏အတွေးအခေါ်ကို ဖန်ဆင်းရှင်၏အတွေးအခေါ်နှင့် ကိုက်ညီစေသည်။ ယခု သူ့မှာအနာဂတ်အတွက်မျှော်လင့်ချက်ရှိပြီး အသစ်သောဦးစားထားရာများရှိ၏။ ဘုရားသခင်အတွက်အရေးပါရာများသည် သူ့အတွက်လည်း အရေးပါလာသည်။ ဤသို့ဖြစ်လာသည်နှင့် သူ့နှလုံးသားမှဒဏ်ရာများ ပျောက်ကင်းစပြုလာသည်။ ဤသည်ကား အာဗရာဟမ်အားပြောင်းလဲစေရန် ထောက်ကူပေးခဲ့ပုံဖြစ်သည်။
ပြည်တွင်းစစ်ထဲဝင်ရောက်ခြင်း
အာဗရာဟမ်သည် ၁၉၃၀ ပြည့်လွန်နှစ်များတွင် အာဖရိက၌ မွေးဖွားခဲ့သည်။ ဒုတိယကမ္ဘာစစ်ပြီးသည့်နောက် သူ၏နိုင်ငံသည် အင်အားကြီးသော အိမ်နီးချင်းနိုင်ငံ၏စိုးမိုးခြင်းကိုခံခဲ့ရသည်၊ သို့သော် အာဗရာဟမ်၏နိုင်ငံသားချင်းများစွာတို့မှာ လွတ်လပ်ရေးရလိုကြသည်။ ၁၉၆၁ ခုတွင် အာဗရာဟမ်သည် အင်အားကြီးသောအိမ်နီးချင်းနိုင်ငံကို ပြောက်ကျားစစ်ဆင်နွှဲခဲ့သည့် လွတ်လပ်ရေးအဖွဲ့သို့ ဝင်ရောက်ခဲ့သည်။
“သူတို့က ကျွန်တော်တို့ရဲ့ရန်သူတွေ။ သူတို့ကျွန်တော်တို့ကိုသတ်ဖို့ကြံစည်ခဲ့တယ်၊ ဒါကြောင့် သူတို့ကိုကျွန်တော်တို့သတ်ဖို့ကြံစည်တာ” ဟုအာဗရာဟမ်ရှင်းပြသည်။
အာဗရာဟမ်သည် အသက်အန္တရာယ်ကြုံရလေ့ရှိသည်၊ ထို့ကြောင့် အနှစ် ၂၀ ကြာ လက်နက်ကိုင်တိုက်ခိုက်ပြီးနောက် ၁၉၈၂ တွင် ဥရောပသို့ထွက်ပြေးခဲ့သည်။ ယခုအခါသူ့အသက် ၄၀ ကျော်လာပြီဖြစ်ရာ ကျန်ရှိနေသေးသည့်အချိန်ဖြင့် သူ့ဘဝကိုပြန်ပြောင်းစဉ်းစားလေသည်။ သူ့စိတ်ကူးယဉ်အိပ်မက်များ မည်သို့ဖြစ်သွားပြီနည်း။ အနာဂတ်ရေးကား အဘယ်သို့နည်း။ ယေဟောဝါသက်သေအချို့နှင့် အာဗရာဟမ်တွေ့ဆုံခဲ့ပြီး သူတို့၏အစည်းအဝေးများကို သူစတက်ခဲ့သည်။ နှစ်အနည်းငယ်အကြာက အာဖရိကတွင် သက်သေခံတစ်ဦးပေးခဲ့သော ဝေစာတစ်စောင်ကို သူဖတ်ရှုခဲ့ကြောင်း ပြန်အမှတ်ရခဲ့သည်။ မြေကြီးပေါ်ရောက်ရှိလာမည့်ပရဒိသုနှင့် လူသားတို့ကိုအုပ်ချုပ်မည့် ကောင်းကင်အစိုးရအကြောင်း ဝေစာကဖော်ပြထားသည်။ ယင်းသည်အမှန်ဖြစ်နိုင်မည်လော။
အာဗရာဟမ်ကဤသို့ဆိုသည်– “တိုက်ခိုက်ခြင်းမှာ အသုံးပြုခဲ့တဲ့နှစ်တွေအားလုံးဟာ အချည်းနှီးပဲဆိုတာ သမ္မာကျမ်းစာကနေကျွန်တော်သိလာခဲ့တယ်။ လူတိုင်းအတွက်တရားမျှတမှု ဆောင်ကြဉ်းပေးမယ့် တစ်ခုတည်းသောအစိုးရဟာ ဘုရားသခင့်နိုင်ငံတော်ဖြစ်တယ်။”
ယေဟောဝါသက်သေတစ်ဦးအဖြစ် အာဗရာဟမ်နှစ်ခြင်းခံပြီးမကြာမီ ရောဘတ်အမည်ရှိသူတစ်ဦးသည် အာဖရိကမှ အာဗရာဟမ်နေထိုင်လျက်ရှိသော ဥရောပမြို့သို့ထွက်ပြေးလာသည်။ ရောဘတ်နှင့်အာဗရာဟမ်တို့မှာ စစ်ပွဲတစ်ပွဲတည်းကို တိုက်ခိုက်ခဲ့ကြသူများဖြစ်သည်၊ သို့သော် တစ်ယောက်တစ်ဖက်စီဖြစ်သည်။ ရောဘတ်သည် ဘဝတွင် စစ်မှန်သောရည်ရွယ်ချက်နှင့်ပတ်သက်၍ မကြာခဏတွေးခဲ့သည်။ သူသည် ဘာသာရေးကိုင်းရှိုင်းသူဖြစ်ပြီး သမ္မာကျမ်းစာအပိုင်းအချို့ကို ဖတ်ရှုထားရာ ဘုရားသခင့်နာမတော်မှာ ယေဟောဝါဖြစ်ကြောင်း သူသိထားသည်။ အာဗရာဟမ်၏အသင်းတော်မှ သက်သေခံများက သမ္မာကျမ်းစာကိုပို၍နားလည်အောင် ရောဘတ်ကိုကူညီပေးဖို့ကမ်းလှမ်းသောအခါ သူတလိုတလားသဘောတူခဲ့သည်။
ရောဘတ်ဤသို့ရှင်းပြသည်– “ယေဟောဝါနဲ့ယေရှုတို့ရဲ့နာမကို သက်သေခံတွေအသုံးပြုပုံကို စစချင်းကတည်းကကျွန်တော်စွဲမှတ်ခဲ့ပြီး သူတို့ဟာသီးခြားပုဂ္ဂိုလ်တွေဖြစ်တယ်ဆိုတာသိထားတယ်။ အဲဒါက သမ္မာကျမ်းစာကနေ ကျွန်တော်သိထားနှင့်ရာနဲ့ ညီညွတ်တယ်။ ပြီးတော့ သက်သေခံတွေဟာ သပ်သပ်ရပ်ရပ်ဝတ်စားကြပြီး လူမျိုးမရွေးဘဲ တခြားသူတွေအပေါ်ကြင်နာကြတယ်။ ဒီအရာတွေက ကျွန်တော့်ကိုအတော်လေးထိမိခဲ့တယ်။”
ရန်သူများက မိတ်ဆွေများဖြစ်လာကြ
ယခင်ကရန်သူများဖြစ်ခဲ့ကြသော ရောဘတ်နှင့် အာဗရာဟမ်တို့သည် ယခုရင်းနှီးသောမိတ်ဆွေများဖြစ်နေကြပြီ။ အချိန်ပြည့်ဧဝံဂေလိဟောပြောသူများအဖြစ် သူတို့သည် ယေဟောဝါသက်သေများ၏အသင်းတော်တစ်ခုတည်းတွင် အမှုထမ်းကြသည်။ “စစ်ဖြစ်ချိန်အတောအတွင်းက အိမ်နီးချင်းနိုင်ငံသားတွေဟာ—အများစုက ဘာသာတစ်ခုတည်းကဖြစ်တော့—ဘယ်လိုများတစ်ယောက်ကိုတစ်ယောက် မုန်းနိုင်ကြတာလဲလို့ ကျွန်တော်မကြာမကြာစဉ်းစားခဲ့တယ်။ ရောဘတ်နဲ့ကျွန်တော်ဟာ ချာ့ခ်ျတစ်ခုတည်းကဖြစ်ခဲ့ကြပေမဲ့ စစ်ပွဲမှာတစ်ယောက်ကိုတစ်ယောက် တိုက်ခိုက်ခဲ့ကြတယ်။ အခု ကျွန်တော်တို့နှစ်ယောက်စလုံး ယေဟောဝါသက်သေတွေဖြစ်နေကြပြီး ကျွန်တော်တို့ရဲ့ယုံကြည်ခြင်းက ကျွန်တော်တို့ကိုစည်းလုံးစေခဲ့ပြီ” ဟုအာဗရာဟမ်ရှင်းပြသည်။
ရောဘတ်ကဤသို့ထပ်ဆင့်သည်– “ခြားနားချက်ကအဲဒါပဲ။ အခု ကျွန်တော်တို့ဟာ စစ်မှန်သောညီအစ်ကိုအသင်းအပင်းအဝင်ဖြစ်စေတဲ့ ယုံကြည်ခြင်းတူသူတွေ ဖြစ်နေကြပြီ။ ကျွန်တော်တို့ ဘယ်တော့မှ စစ်ပြန်တိုက်မှာမဟုတ်တော့ဘူး။” သမ္မာကျမ်းစာသည် ယခင်ကရန်သူများဖြစ်ခဲ့သူတို့၏နှလုံးသားများပေါ် အကြီးအကျယ်သြဇာသက်ရောက်ခဲ့ပြီ။ မုန်းတီးမှုနှင့် နာကြည်းမှုတို့နေရာတွင် ယုံကြည်စိတ်ချမှုနှင့် မိတ်ဆွေဖြစ်မှုတို့က တဖြည်းဖြည်းနေရာယူလာသည်။
အာဗရာဟမ်နှင့်ရောဘတ်တို့ စစ်တိုက်နေချိန်မှာပင် အခြားလူငယ်နှစ်ဦးတို့သည် အိမ်နီးချင်းနိုင်ငံနှစ်ခုဖြစ်ပွားသော အခြားတိုက်ပွဲတစ်ခုတွင် တစ်ဖက်စီမှတိုက်ခိုက်ခဲ့ကြသည်။ မကြာမီ သမ္မာကျမ်းစာသည် အလွန်ထက်သည့် ဆေးစွမ်းတစ်လက်ကဲ့သို့ သူတို့၏နှလုံးသားများကိုလည်း ကုစားပေးခဲ့သည်။ မည်သို့အားဖြင့်နည်း။
သတ်ဖြတ်—ထို့နောက် ထူးကဲစွာသေ
ဘာသာတရားကိုင်းရှိုင်းသော မိသားစုတစ်ခုတွင် ကြီးပြင်းလာသော ဂါဘရီရယ်လ်သည် မိမိ၏အမိမြေမှာ သန့်ရှင်းသောစစ်ကို အကြိတ်အနယ်တိုက်ပွဲဝင်နေသည်ဟုသွန်သင်ခံခဲ့ရ၏။ ထို့ကြောင့် အသက် ၁၉ နှစ်တွင် မိမိ၏ဆန္ဒအရစစ်မှုထမ်းဖို့ စစ်ထဲဝင်ကာ ရှေ့တန်းပို့ပေးရန် တောင်းခံခဲ့သည်။ တိုက်ပွဲအပြင်းထန်ဆုံးနေရာတွင် ၁၃ လကြာမျှနေခဲ့ရပြီး တစ်ခါတစ်ရံ ရန်သူနှင့်တစ်မိုင်သာကွာတော့သည်။ သူဤသို့ဆိုသည်– “ဖြစ်ရပ်တစ်ခုကို ကျွန်တော်ထူးထူးခြားခြားအမှတ်ရမိတယ်။ အဲ့ဒီညမှာရန်သူတွေတိုက်ခိုက်လိမ့်မယ်လို့ ကျွန်တော်တို့ရဲ့ဗိုလ်ကြီးကပြောတယ်။ ကျွန်တော်တို့စိတ်လှုပ်ရှားလွန်းလို့ တစ်ညလုံးအမြောက်နဲ့ပစ်ခဲ့ကြတယ်။” အိမ်နီးချင်းနိုင်ငံမှလူတို့ကို သေထိုက်သောရန်သူများအဖြစ် သူယူမှတ်ခဲ့သည်။ “သတ်ပစ်နိုင်သမျှသတ်ပစ်ဖို့ပဲကျွန်တော်သိတယ်။ ပြီးတော့ ကျွန်တော့်မိတ်ဆွေအများလို ထူးကဲသောသေခြင်းနဲ့ ကျွန်တော်သေချင်ခဲ့တယ်။”
သို့ရာတွင် အချိန်တန်သော် ဂါဘရီရယ်လ် အမှန်ကိုသိမြင်လာလေသည်။ တောင်တန်းသို့ထွက်ပြေးပြီး ကြားနေနိုင်ငံတစ်ခုသို့ နယ်စပ်မှတိတ်တဆိတ်ဝင်ရောက်ကာ ဥရောပသို့ခရီးထွက်ခဲ့သည်။ ဘဝသည် အဘယ်ကြောင့်ဤမျှခက်ခဲရသနည်း၊ ပြဿနာများသည် ဘုရားသခင်ထံမှဒဏ်စီရင်ချက်များဟုတ်မဟုတ် ဘုရားသခင်ကိုသူအဆက်မပြတ်မေးမြန်းနေခဲ့သည်။ ယနေ့ ဘဝတွင် အဘယ်ကြောင့်ဤမျှပြဿနာပြည့်နေကြောင်းကို သမ္မာကျမ်းစာမှသူ့ကိုပြခဲ့သူ ယေဟောဝါသက်သေတစ်ဦးနှင့် သူဆက်သွယ်မိခဲ့သည်။—မဿဲ ၂၄:၃-၁၄; ၂ တိမောသေ ၃:၁-၅။
ဂါဘရီရယ်လ်သည် သမ္မာကျမ်းစာကို များများသင်ယူလေလေ ၎င်း၌အမှန်တရားပါဝင်ကြောင်း သာ၍သိနားလည်လာလေလေဖြစ်သည်။ “မြေကြီးပရဒိသုပေါ် ကျွန်တော်တို့ထာဝစဉ်အသက်ရှင်နိုင်ကြောင်း ကျွန်တော်သိခဲ့ရတယ်။ ထူးဆန်းတာကတော့ အဲဒါဟာ ကျွန်တော်ကလေးဘဝကတည်းက တမ်းတခဲ့ရာတစ်ခုဖြစ်နေတာပါပဲ။” သမ္မာကျမ်းစာက ဂါဘရီရယ်လ်ကိုနှစ်သိမ့်ပေးခဲ့ပြီး ယခုအချိန်ထိ ခံစားနေရသော သူ၏နှလုံးအပူမီးကို ငြိမ်းသတ်ပေးခဲ့ပြီ။ သူ၏အနက်ရှိုင်းဆုံးစိတ်လှုပ်ရှားမှုဆိုင်ရာဒဏ်ရာများမှာ ပျောက်ကင်းစပြုလာသည်။ ထို့ကြောင့် ယခင်ကရန်သူတစ်ဦးဖြစ်သူ ဒယ်နီရယ်လ်နှင့်သူတွေ့ဆုံချိန်တွင် ဂါဘရီရယ်လ်၌ မုန်းတီးစိတ်နည်းနည်းမျှမရှိတော့ပါ။ သို့သော် အဘယ်အရာကြောင့် ဒယ်နီရယ်လ် ဥရောပရောက်ခဲ့ရသနည်း။
“ကိုယ်တော်အမှန်တည်ရှိရင် ကျေးဇူးပြု၍ ကျွန်တော့်ကိုကယ်မသနားပါ!”
ဒယ်နီရယ်လ်သည် ချာ့ခ်ျအသင်းသားတစ်ဦးအဖြစ်ကြီးပြင်းလာခဲ့ပြီး အသက် ၁၈ နှစ်တွင် စစ်မှုထမ်းဖို့ဆင့်ခေါ်ခံခဲ့ရသည်။ သူသည် ဂါဘရီရယ်လ်တိုက်သည့်စစ်ပွဲ၌ပင် တိုက်ပွဲဝင်ဖို့စေလွှတ်ခံခဲ့ရသည်၊ သို့သော် တစ်ဖက်စီတွင်ဖြစ်သည်။ ရှေ့တန်းစစ်မျက်နှာအနီး တင့်ကားတစ်စီး၌ ဒယ်နီရယ်လ်စီးနင်းနေခဲ့စဉ် ဗုံးထိမှန်ခဲ့သည်။ သူ့မိတ်ဆွေများသေဆုံးခဲ့ပြီး သူသည် အကြီးအကျယ်ဒဏ်ရာရကာ သုံ့ပန်းအဖြစ်ခေါ်ဆောင်ခံခဲ့ရသည်။ ကြားနေနိုင်ငံတစ်ခုသို့ နယ်နှင်ခြင်းမခံရမီ သူသည် ဆေးရုံနှင့် စခန်းတစ်ခုတွင် လပေါင်းများစွာနေခဲ့ရသည်။ အထီးကျန်လျက် ခိုကိုးရာမဲ့ဖြစ်နေရာ မိမိကိုယ်ကိုသတ်သေဖို့စဉ်းစားခဲ့သည်။ ဘုရားသခင်ထံ ဒယ်နီရယ်လ်ဤသို့ဆုတောင်းခဲ့သည်– “ကိုယ်တော်အမှန်တည်ရှိရင် ကျေးဇူးပြု၍ ကျွန်တော့်ကိုကယ်မသနားပါ!” နောက်တစ်နေ့မှာပင် သူ့ထံသို့ ယေဟောဝါသက်သေများ ရောက်ရှိလာပြီး သူ၏မေးခွန်းများစွာကို အဖြေပေးနိုင်ခဲ့ကြသည်။ နောက်ဆုံးတွင် သူသည် ခိုလှုံသူတစ်ဦးအဖြစ် ဥရောပသို့ခရီးထွက်ခဲ့၏။ ဒယ်နီရယ်သည် သက်သေခံများနှင့်တစ်ဖန်ပြန်ပေါင်းသင်းပြီး သမ္မာကျမ်းစာကိုလေ့လာခဲ့သည်။ သူသင်ယူခဲ့ရာများက သူ၏စိုးရိမ်ပူပန်မှုနှင့် နာကြည်းမှုတို့ကို သက်သာစေခဲ့သည်။
ယခု ဂါဘရီရယ်လ်နှင့် ဒယ်နီရယ်လ်တို့သည် မိတ်ဆွေကောင်းများဖြစ်ကြပြီး ယေဟောဝါ၏ နှစ်ခြင်းခံပြီးသောသက်သေများအဖြစ် ဝိညာဉ်ရေးရာညီအစ်ကိုအသင်းအပင်းတစ်ခုတွင် ပေါင်းစည်းလျက်ရှိသည်။ “ယေဟောဝါကိုချစ်တဲ့မေတ္တာနဲ့ သမ္မာကျမ်းစာအသိပညာက ကိစ္စရပ်များကို ကိုယ်တော်မြင်သလိုမြင်ဖို့ ကျွန်တော့်ကိုကူညီပေးခဲ့တယ်။ ဒယ်နီရယ်လ်ဟာ ကျွန်တော့်ရန်သူမဟုတ်တော့ပါဘူး။ လွန်ခဲ့တဲ့နှစ်တွေကဆို ကျွန်တော်ဟာ သူ့ကိုသတ်ဖို့အသင့်ရှိမှာပဲ။ သမ္မာကျမ်းစာက အဲဒါနဲ့တကယ့်ဆန့်ကျင်ဘက်ဖြစ်တဲ့—သူ့အတွက်သေဖို့အသင့်ရှိအောင် ကျွန်တော့်ကိုသင်ပေးခဲ့ပြီ” ဟုဂါဘရီရယ်လ်ဆိုသည်။
ဒယ်နီရယ်လ်ကဤသို့ဆိုသည်– “လူမျိုး၊ ဘာသာအသီးသီးကလူတွေ တစ်ယောက်ကိုတစ်ယောက်သတ်ဖြတ်နေကြတာ ကျွန်တော်တွေ့ခဲ့ရတယ်။ ဘာသာတစ်ခုတည်းကဖြစ်ပြီး စစ်ပွဲတစ်ဖက်စီကနေ တစ်ယောက်ကိုတစ်ယောက် သတ်နေကြတဲ့လူတွေလည်းရှိတယ်။ ဒါကိုကျွန်တော်တွေ့တော့ ဘုရားသခင်မှာတာဝန်ရှိတယ်လို့ ကျွန်တော်ထင်ခဲ့တယ်။ အခုတော့ . . . နောက်ကွယ်မှာ စာတန်ရှိတယ်ဆိုတာ ကျွန်တော်သိပြီ။ ခုဆိုရင် ဂါဘရီရယ်လ်နဲ့ကျွန်တော်က ယုံကြည်သူချင်းတွေဖြစ်တယ်။ ကျွန်တော်တို့ နောက်ဘယ်တော့မှ တိုက်ခိုက်ကြမှာမဟုတ်ဘူး!”
‘ဘုရားသခင်၏နှုတ်မြွက်စကားတော်သည် အသက်ရှင်၍ တန်ခိုးနှင့်ပြုပြင်၏’
အာဗရာဟမ်၊ ရောဘတ်၊ ဂါဘရီရယ်လ်နှင့် ဒယ်နီရယ်လ်တို့ အဘယ်ကြောင့်ဤမျှသိသိသာသာပြောင်းလဲခဲ့ကြသနည်း။ သူတို့၏နှလုံးများထဲမှ အမြစ်စွဲနေသောမုန်းတီးမှုနှင့် ပူဆွေးမှုတို့ကို သူတို့မည်သို့ဖယ်ရှားနိုင်ခဲ့ကြသနည်း။
ဤသူအသီးသီးတို့သည် ‘အသက်ရှင်၍ တန်ခိုးနှင့်ပြုပြင်’ တတ်သော သမ္မာကျမ်းစာမှအမှန်တရားကို ဖတ်ရှု၊ ဆင်ခြင်၍ သင်ယူခဲ့ကြသည်။ (ဟေဗြဲ ၄:၁၂) သမ္မာကျမ်းစာ၏အာဘော်ရှင်မှာ နားထောင်၍သင်ယူဖို့ အသင့်ရှိသူတစ်ဦး၏နှလုံးကို အကောင်းဘက်မည်သို့ပြုပြင်ပြောင်းလဲစေရမည်ကိုသိရှိထားသူ လူ့ဖန်ဆင်းရှင်ပင်ဖြစ်၏။ “ကျမ်းစာရှိသမျှသည် ဘုရား [သခင်] ဝိညာဉ်တော်မှုတ်သွင်းထား၍ သင်ကြားခြင်း၊ အပြစ်ဖော်ပြခြင်း၊ ပဲ့ပြင်ခြင်း၊ ဖြောင့်မတ်အောင်ဆုံးမခြင်းများ၌အကျိုးရှိ၏။” သမ္မာကျမ်းစာဖတ်ရှုသူတစ်ဦးသည် ၎င်း၏လမ်းညွှန်မှုကိုခံယူရန် မိမိကိုယ်ကိုခွင့်ပြုလိုက်သည်နှင့် စံနှုန်းများနှင့် မူများအသစ်တစ်စုံကိုရယူလေသည်။ ကိစ္စရပ်များအား ယေဟောဝါရှုမြင်ပုံကို သူစတင်သင်ယူသည်။ ဤလုပ်ဆောင်မှုက စစ်၏ဒဏ်ရာများကိုကုစားခြင်းအပါအဝင် အကျိုးကျေးဇူးများစွာရရှိစေသည်။—၂ တိမောသေ ၃:၁၆၊ ကဘ။
ဘုရားသခင့်နှုတ်မြွက်စကားတော်က မည်သည့်နိုင်ငံ၊ လူမျိုး သို့မဟုတ် လူမျိုးစုသည် အခြားတစ်ခုထက် သာ၍မြတ်သည် သို့မဟုတ် သာ၍ယုတ်သည်မရှိဟုရှင်းပြထားသည်။ “အကယ်စင်စစ် ဘုရားသခင်သည် လူမျက်နှာကိုမှတ်တော်မမူ။ လူအမျိုးမျိုးတို့တွင် ဘုရားသခင်ကိုကြောက်ရွံ့၍ တရားသဖြင့်ကျင့်ဆောင်သောသူသည် အထံတော်၌မျက်နှာရသည်။” ယင်းကိုသဘောတူလက်ခံသည့် ဖတ်ရှုသူမှာ လူမျိုးရေး သို့မဟုတ် နိုင်ငံရေးမုန်းတီးစိတ်များကို ကျော်လွှားအနိုင်ယူရန် တဖြည်းဖြည်းကူညီခံခဲ့ရသည်။—တမန်တော် ၁၀:၃၄၊ ၃၅။
မကြာမီ ဘုရားသခင်သည် မျက်မှောက်ခေတ်လူ့အုပ်ချုပ်မှုစနစ်ကို ကိုယ်တော်၏မေရှိယနိုင်ငံတော်ဖြင့် အစားထိုးမည်ဖြစ်ကြောင်း သမ္မာကျမ်းစာပရောဖက်ပြုချက်များကဖော်ပြသည်။ ၎င်းအစိုးရအားဖြင့် ဘုရားသခင်သည် “မြေကြီးစွန်းတိုင်အောင် စစ်မှုကိုငြိမ်းစေတော်မူ၏။” စစ်ပွဲများကိုဖြစ်စေပြီး တိုက်ခိုက်ဖို့လူတို့ကိုတိုက်တွန်းပေးသော အဖွဲ့အစည်းများ ဖယ်ရှားခံရလိမ့်မည်။ စစ်ကြောင့်သေဆုံးရသူတို့သည် ရှင်ပြန်ထမြောက်လာကြပြီး မြေကြီးပရဒိသုပေါ်အသက်ရှင်ဖို့ အခွင့်အလမ်းရရှိကြမည်။ ရန်လိုသူ သို့မဟုတ် နှိပ်စက်ညှဉ်းဆဲသူ၏လက်မှ မည်သူမျှပြေးစရာလိုတော့မည်မဟုတ်။—ဆာလံ ၄၆:၉; ဒံယေလ ၂:၄၄၊ ၄၅; တမန်တော် ၂၄:၁၅။
ထိုအချိန်၌အသက်ရှင်သည့် လူသားများနှင့်စပ်လျဉ်း၍ သမ္မာကျမ်းစာကဤသို့ဆိုသည်– “ထိုသူတို့သည် ကိုယ်ဆောက်သောအိမ်၌နေကြလိမ့်မည်။ ကိုယ်စိုက်သောစပျစ်ဥယျာဉ်အသီးကို စားကြလိမ့်မည်။ သူတို့သည် အိမ်ကိုဆောက်၍ အခြားသောသူနေရမည်မဟုတ်။ . . . သူတို့သည် အချည်းနှီးမလုပ်မဆောင်ရကြ။ အသက်တိုသောသားကို မဖွားမမြင်ရကြ။” ကု၍မပျောက်မည့် ပျက်စီးဆုံးရှုံးမှု သို့မဟုတ် ထိခိုက်ဒဏ်ရာရရှိမှုတို့ ရှိတော့မည်မဟုတ်။ ယင်းသို့သောမျှော်လင့်ချက်၌ယုံကြည်ခြင်းသည် လူတစ်ဦး၏နှလုံးမှ ဝမ်းနည်းပူဆွေးမှုတို့ကို တဖြည်းဖြည်းဖယ်ရှားပေးသည်။—ဟေရှာယ ၆၅:၂၁-၂၃။
သမ္မာကျမ်းစာသည် အမှန်ပင် နှလုံးအတွက် ဆေးစွမ်းတစ်လက်ဖြစ်သည်။ ယင်း၏သွန်သင်ချက်များသည် စစ်၏ဒဏ်ရာများကိုကုစားပေးနေပြီ။ ယခင်ကရန်သူများသည် အပြည်ပြည်ဆိုင်ရာညီအစ်ကိုအသင်းအပင်းတစ်ခုတွင် စည်းလုံးနေကြပြီ။ ဤကုစားမှုသည် ဘုရားသခင့်အစီအစဉ်စနစ်သစ်၌ ဆက်ရှိမည်၊ လူသားတို့၏နှလုံးသားထဲတွင် မုန်းတီးမှုနှင့် နာကြည်းမှု၊ ဝမ်းနည်းမှုနှင့် ပူဆွေးမှုတို့မရှိတော့သည့်အထိဖြစ်၏။ ဖန်ဆင်းရှင်ကဤသို့ကတိပြုသည်– “အရင်ဖြစ်ဖူးသောအရာများကို သတိမရ၊ မှတ်မိတော့မည်မဟုတ်။”—ဟေရှာယ ၆၅:၁၇၊ သမ္မာ။
[အောက်ခြေမှတ်ချက်များ]
^ အပိုဒ်၊ 2 ဤဆောင်းပါးရှိနာမည်အချို့ကိုပြောင်းထားသည်။
[စာမျက်နှာ ၄ ပါ အကျဉ်းဖော်ပြချက်]
“တိုက်ခိုက်ခြင်းမှာအသုံးပြုခဲ့တဲ့ နှစ်တွေအားလုံးဟာ အချည်းနှီးပဲဆိုတာ သမ္မာကျမ်းစာကနေ ကျွန်တော် သိရှိလာတယ်”
[စာမျက်နှာ ၅ ပါ အကျဉ်းဖော်ပြချက်]
သမ္မာကျမ်းစာသည် ရန်သူဖြစ်ခဲ့ကြသူများ၏ နှလုံးသားများပေါ် အကြီးအကျယ် ဩဇာသက်ရောက်နိုင်
[စာမျက်နှာ ၆ ပါ အကျဉ်းဖော်ပြချက်]
မုန်းတီးမှုနှင့်နာကြည်းမှုတို့နေရာတွင် ယုံကြည်စိတ်ချမှုနှင့် မိတ်ဆွေဖြစ်မှုတို့က တဖြည်းဖြည်း နေရာယူလာသည်
[စာမျက်နှာ ၆ ပါ အကျဉ်းဖော်ပြချက်]
သမ္မာကျမ်းစာ ဖတ်ရှုသူတစ်ဦးသည် ၎င်း၏လမ်းညွှန်မှုကိုခံယူရန် မိမိကိုယ်ကိုခွင့်ပြုလိုက်သည်နှင့် စံနှုန်းများနှင့် မူများအသစ်တစ်စုံကို သူရယူလေသည်
[စာမျက်နှာ ၇ ပါ ရုပ်ပုံ]
ယခင်ကရန်သူများသည် ယခု အပြည်ပြည်ဆိုင်ရာညီအစ်ကိုအသင်းအပင်းတစ်ခုတွင် စည်းလုံးနေကြပြီ
[Picture Credit Line on page 4]
Refugee camp: UN PHOTO 186811/J. Isaac