သင့်ချစ်ခြင်းမေတ္တာသည် မည်မျှတာသွားသနည်း
သင့်ချစ်ခြင်းမေတ္တာသည် မည်မျှတာသွားသနည်း
“ကိုယ့်အိမ်နီးချင်းကို ကိုယ်နှင့်အမျှချစ်လော့။”—မဿဲ ၂၂:၃၉၊ ကဘ။
၁။ ယေဟောဝါအား ကျွန်ုပ်တို့ချစ်မည်ဆိုလျှင် ကျွန်ုပ်တို့၏အိမ်နီးချင်းကိုလည်း အဘယ်ကြောင့်ချစ်ရမည်နည်း။
အဘယ်ပညတ်သည် အကြီးမြတ်ဆုံးဖြစ်သနည်းဟု ယေရှုအမေးခံရသောအခါ ကိုယ်တော်က ဤသို့အဖြေပေးခဲ့သည်– “သင်၏ဘုရားသခင်ယေဟောဝါကို သင့်နှလုံးအကြွင်းမဲ့၊ သင့်ဝိညာဉ်စိုးလ်တစ်ခုလုံး၊ သင့်စိတ်ရှိသမျှနှင့်ချစ်ရမည်။” ထို့နောက် ကိုယ်တော်က ဒုတိယပညတ်ကို ပထမကဲ့သို့ အလားတူဤသို့ကိုးကားခဲ့သည်– “ကိုယ့်အိမ်နီးချင်းကို ကိုယ်နှင့်အမျှချစ်လော့။” (မဿဲ ၂၂:၃၇၊ ၃၉၊ ကဘ) မှန်ပါသည်၊ အိမ်နီးချင်းကို ချစ်သောမေတ္တာသည် ခရစ်ယာန်တစ်ဦး၏အမှတ်အသားတစ်ရပ် ဖြစ်သည်။ အမှန်မှာ ယေဟောဝါကို ကျွန်ုပ်တို့ချစ်လျှင် ကျွန်ုပ်တို့၏အိမ်နီးချင်းကို ချစ်ရမည်ဖြစ်သည်။ အဘယ်ကြောင့်နည်း။ အကြောင်းမှာ ဘုရားသခင်အပေါ်ထားသော ကျွန်ုပ်တို့၏ချစ်ခြင်းမေတ္တာကို ကိုယ်တော်၏နှုတ်မြွက်တော်ကို နာခံခြင်းဖြင့်ပြသရသည်ဖြစ်ရာ ကိုယ်တော်၏နှုတ်မြွက်တော်က ကျွန်ုပ်တို့၏အိမ်နီးချင်းကို ချစ်ရန်ပညတ်ထားသောကြောင့်တည်း။ သို့ဖြစ်၍ ကျွန်ုပ်တို့၏ညီအစ်ကို၊ ညီအစ်မများကို မချစ်လျှင် ဘုရားသခင်အပေါ်ထားသည့် ကျွန်ုပ်တို့၏ချစ်ခြင်းမေတ္တာမှာ အစစ်အမှန်မဖြစ်နိုင်ချေ။—ရောမ ၁၃:၈; ၁ ယောဟန် ၂:၅; ၄:၂၀၊ ၂၁။
၂။ ကျွန်ုပ်တို့၏အိမ်နီးချင်းကို အဘယ်မေတ္တာမျိုးဖြင့် ချစ်သင့်သနည်း။
၂ ကျွန်ုပ်တို့၏အိမ်နီးချင်းကို ချစ်သင့်ကြောင်း ယေရှုမိန့်တော်မူခဲ့သောအခါ ကိုယ်တော်သည် မိတ်ဆွေဖြစ်ခြင်းထက်မက မိန့်မှာနေခြင်းဖြစ်၏။ ထို့ပြင် မိသားစုအတွင်း သို့မဟုတ် အမျိုးသားတစ်ဦးနှင့် အမျိုးသမီးတစ်ဦးစပ်ကြားတည်ရှိသော အလိုအလျောက်မေတ္တာမျိုးနှင့်မတူသောမေတ္တာတစ်မျိုးကို ကိုယ်တော်ရည်ညွှန်းနေခြင်းဖြစ်၏။ ကိုယ်တော်၏ဆက်ကပ်အပ်နှံထားသောကျေးကျွန်များအပေါ် ယေဟောဝါထားရှိသောမေတ္တာမျိုးနှင့် ကိုယ်တော့်အပေါ် သူတို့ထားရှိသောမေတ္တာမျိုးကို ယေရှုမိန့်တော်မူနေခြင်းဖြစ်သည်။ (ယောဟန် ၁၇:၂၆; ၁ ယောဟန် ၄:၁၁၊ ၁၉) ဂျူးလူမျိုး ကျမ်းပြုဆရာတစ်ဦး—ပညာသတိနှင့်ပြန်လျှောက်ခဲ့သူအဖြစ် ယေရှုသတိထားမိသူ—က ဘုရားသခင်ကို “စိတ်နှလုံး၊ အသက်ဝိညာဉ်၊ ဉာဏ်သတ္တိ၊ အစွမ်းသတ္တိအကြွင်းမဲ့ချစ်” သင့်ကြောင်း ယေရှုနှင့်သဘောတူညီခဲ့သည်။ (မာကု ၁၂:၂၈-၃၄၊ ကဘ) သူမှန်နေသည်။ ဘုရားသခင်နှင့် အိမ်နီးချင်း နှစ်ဦးစလုံးအပေါ်ထားရန် ခရစ်ယာန်တစ်ဦးမွေးမြူရသည့် ချစ်ခြင်းမေတ္တာတွင် ကျွန်ုပ်တို့၏စိတ်လှုပ်ရှားမှုများနှင့် ဆင်ခြင်ဉာဏ်တို့ ပါဝင်သည်။ ယင်းကို နှလုံးသားဖြင့်ခံစား၍ စိတ်ကလမ်းညွှန်ပေးသည်။
၃။ (က) ယေရှုက “ကျမ်းတတ်တစ်ယောက်” အား သူ၏အိမ်နီးချင်း မည်သူဖြစ်သည်ကို အမြင်ကျယ်ကျယ်ထားသင့်ကြောင်း မည်သို့သွန်သင်ခဲ့သနည်း။ (ခ) ယေရှု၏ပုံဥပမာက ယနေ့ခရစ်ယာန်များနှင့် မည်သို့သက်ဆိုင်သနည်း။
၃ လုကာ၏မှတ်တမ်းအရ ကျွန်ုပ်တို့သည် မိမိတို့၏အိမ်နီးချင်းကို ချစ်သင့်သည်ဟု ယေရှုမိန့်တော်မူသောအခါ “ကျမ်းတတ်တစ်ယောက်” က “အဘယ်သူသည် အကျွန်ုပ်၏အိမ်နီးချင်း အမှန်ဖြစ်ပါသနည်း” ဟုမေးမြန်းခဲ့သည်။ ယေရှုက ပုံဥပမာတစ်ရပ်ဖြင့် အဖြေပေးခဲ့သည်။ လူတစ်ဦးသည် ရိုက်နှက်၊ ဓားပြတိုက်ခံရ၍ သေလုမြောပါးဖြင့် လမ်းဘေးတွင် ပစ်ထားခြင်းခံရသည်။ ဦးဆုံး ယဇ်ပုရောဟိတ်တစ်ဦး၊ ထို့နောက် လေဝိလူတစ်ဦးဖြတ်သန်းသွားခဲ့၏။ နှစ်ဦးစလုံးက သူ့ကိုလျစ်လျူရှုသွားခဲ့ကြသည်။ နောက်ဆုံးတွင် ရှမာရိလူတစ်ဦးရောက်လာပြီး ဒဏ်ရာရနေသူကိုတွေ့မြင်ရာ ထိုသူအပေါ် ကြင်နာမှုများစွာဖြင့် လုပ်ဆောင်ပေးခဲ့သည်။ ထိုသူသုံးဦးထဲမှ မည်သူသည် ဒဏ်ရာရနေသောသူ၏ အိမ်နီးချင်းဖြစ်ခဲ့ပါသနည်း။ အဖြေမှာရှင်းပါသည်။ (လုကာ ၁၀:၂၅-၃၇၊ ကဘ) ရှမာရိတစ်ဦးသည် ယဇ်ပုရောဟိတ်တစ်ဦးနှင့် လေဝိလူတစ်ဦးထက်စာလျှင် သာ၍ကောင်းသောအိမ်နီးချင်းတစ်ဦး ဖြစ်နိုင်ကြောင်း ယေရှုမိန့်မြွက်တော်မူသည်ကို ကြားလိုက်ရသောအခါ ကျမ်းတတ်ဖြစ်သူမှာ ထိတ်လန့်သွားခဲ့ပေမည်။ ထင်ရှားနေသည်မှာ မိမိအိမ်နီးချင်းအား သာ၍တာသွားသောနည်းဖြင့် ချစ်ခင်ရန် ထိုသူကို ယေရှု ကူညီပေးနေခြင်းဖြစ်သည်။ ခရစ်ယာန်များလည်း ထိုနည်းအတိုင်း ချစ်ကြသည်။ သူတို့၏ ချစ်ခြင်းမေတ္တာသက်ရောက်သူအားလုံးကို သုံးသပ်ကြည့်ပါ။
မိသားစုအတွင်း ချစ်ခြင်းမေတ္တာ
၄။ ခရစ်ယာန်တစ်ဦးသည် မေတ္တာကို မည်သည့်နေရာ၌ ဦးဆုံးကျင့်သုံးသနည်း။
၄ ခရစ်ယာန်များသည် မိမိတို့၏မိသားစုဝင်များကိုချစ်ကြသည်—ဇနီးသည်များက ခင်ပွန်းသည်များကို ချစ်၏၊ ခင်ပွန်းသည်များက ဇနီးသည်များကို ချစ်၏၊ မိဘများက သားသမီးများကို ချစ်သည်။ (ဒေ. ၉:၉; ဧဖက် ၅:၃၃; တိတု ၂:၄) မှန်ပါသည်၊ သဘာဝမေတ္တာနှောင်ကြိုးများသည် မိသားစုအများစုတွင် ရှိကြသည်။ သို့သော် အိမ်ထောင်ပြိုကွဲခြင်း၊ အိမ်ထောင်ဖက်ကို အကြမ်းဖက်ခြင်း၊ သားသမီးများကို လျစ်လျူရှု သို့မဟုတ် ကြမ်းတမ်းစွာဆက်ဆံခြင်းမှတ်တမ်းများက မိသားစုများသည် ယနေ့ ဖိစီးမှုခံနေရကြောင်းနှင့် ဆက်၍ပေါင်းစည်းနေရန် သဘာဝမိသားစုစိတ်ဓာတ်နှင့် မလုံလောက်တော့ကြောင်း ပြသည်။ (၂ တိမောသေ ၃:၁-၃) မိမိတို့၏မိသားစုဘဝကို အမှန်တကယ်အောင်မြင်မှုရစေရန် ခရစ်ယာန်များသည် ယေဟောဝါနှင့် ယေရှုတို့ထားရှိသောမေတ္တာမျိုးကို ကျင့်သုံးရန်လိုအပ်သည်။—ဧဖက် ၅:၂၁-၂၇။
၅။ မိဘဖြစ်သူတို့သည် မိမိတို့၏သားသမီးများကို မွေးမြူရာတွင် အကူအညီကို မည်သူ့ထံမျှော်ကိုးကြသနည်း၊ များစွာတို့ရရှိခဲ့သည့် ရလဒ်များကားအဘယ်နည်း။
၅ ခရစ်ယာန်မိဘများသည် မိမိတို့၏ကလေးများကို ယေဟောဝါထံမှပေးအပ်ထားရာအဖြစ် ရှုမြင်ကြပြီး သူတို့ကို မွေးမြူပျိုးထောင်ရာ၌ အကူအညီအတွက် ကိုယ်တော့်အား မျှော်ကိုးကြသည်။ (ဆာလံ ၁၂၇:၃-၅; သု. ၂၂:၆) ဤနည်းအားဖြင့် ခရစ်ယာန်မေတ္တာကို သူတို့မွေးမြူပျိုးထောင်ကြပြီး ယင်းက လူငယ်များ သားကောင်ဖြစ်သွားနိုင်သည့် ဖောက်ပြန်ယိုယွင်းသောသြဇာ၏လွှမ်းမိုးမှုမှ သူတို့၏သားသမီးများကို ကာကွယ်စောင့်ရှောက်ရန် ကူညီပေးသည်။ ရလဒ်အနေဖြင့် ခရစ်ယာန်မိဘများစွာသည် နယ်သာလန်နိုင်ငံရှိ မိခင်တစ်ဦးခံစားရသည့် ရွှင်လန်းမှုမျိုးကို ခံစားကြရသည်။ လွန်ခဲ့သောနှစ်က နယ်သာလန်တွင် နှစ်ခြင်းယူသူ ၅၇၅ ဦးမှတစ်ဦးအဖြစ် သားဖြစ်သူနှစ်ခြင်းခံသည်ကို ကြည့်ပြီးနောက် အောက်ပါအတိုင်းသူရေးခဲ့သည်– “ကုန်လွန်သွားတဲ့ အနှစ် ၂၀ လုံးလုံး ကျွန်မရင်းနှီးမြှုပ်နှံမှုရဲ့အကျိုးအမြတ် ထွက်လာပြီ။ အချိန်၊ ခွန်အား—စိတ်ထိခိုက်မှု၊ ကြိုးပမ်းအားထုတ်မှုနဲ့ ဝမ်းနည်းမှုတွေအပါအဝင်—အားလုံး အခုတော့ မေ့ပျောက်သွားပြီ။” ယေဟောဝါအား ဝတ်ပြုရန် သားဖြစ်သူသည် မိမိဆန္ဒအလျောက်ရွေးချယ်ခြင်းအတွက် သူအလွန်ဝမ်းမြောက်လေပြီ။ လွန်ခဲ့သောနှစ်က နယ်သာလန်နိုင်ငံတွင် မှတ်တမ်းသွင်းသည့် အများဆုံးကြေညာသူ ၃၁,၀၈၉ ဦးတွင် ယေဟောဝါအားချစ်ရန် သူတို့၏မိဘများထံမှသင်ယူခဲ့ကြသူ များစွာပါဝင်သည်။
၆။ ခရစ်ယာန်မေတ္တာသည် အိမ်ထောင်ရေးနှောင်ကြိုး ခိုင်မြဲစေရန် မည်သို့ကူညီပေးနိုင်သနည်း။
၆ ပေါလုက ချစ်ခြင်းမေတ္တာကို “စည်းလုံးခြင်း၏စုံလင်သောအနှောင်အဖွဲ့” ဟုခေါ်ဆိုထားပြီး ယင်းသည် မုန်တိုင်းထန်သောကာလကို ဖြတ်သန်းရချိန်တွင်ပင် အိမ်ထောင်၏စည်းလုံးမှုကို ဆက်၍ထိန်းထားပေးနိုင်သည်။ (ကောလောသဲ ၃:၁၄၊ ၁၈၊ ၁၉၊ ကဘ; ၁ ပေတရု ၃:၁-၇) တဟီတီမှမိုင်ပေါင်း ၄၅၀ ခန့်ရှိ ကျွန်းငယ်လေးဖြစ်သော ရူရူတူတွင် လူတစ်ဦးသည် ယေဟောဝါသက်သေများနှင့် ကျမ်းစာစတင်လေ့လာခဲ့ရာ သူ၏ဇနီးဖြစ်သူက ပြင်းထန်စွာကန့်ကွက်ခဲ့သည်။ နောက်ဆုံး သူ့ကိုထားခဲ့ကာ ဇနီးသည် မိမိကလေးများကိုခေါ်ဆောင်၍ တဟီတီတွင်နေထိုင်ရန် ထွက်သွားခဲ့သည်။ သို့တိုင် သူသည် ငွေပုံမှန်ပို့ပေးခဲ့ပြီး သူ သို့မဟုတ် ကလေးများအတွက် လိုအပ်ရာတစ်စုံတစ်ခုရှိ၊ မရှိကို ဖုန်းဆက်မေးခြင်းဖြင့် မိမိ၏မေတ္တာကိုပြသခဲ့သည်။ ထိုနည်းဖြင့် သူသည် မိမိ၏ခရစ်ယာန်တာဝန်များကို ကျေပွန်စေရန် အတတ်နိုင်ဆုံးပြုလုပ်ခဲ့သည်။ (၁ တိမောသေ ၅:၈) မိမိ၏မိသားစု ပြန်လည်ပေါင်းစည်းလာစေမည်အကြောင်း သူအမြဲပင်ဆုတောင်းခဲ့ပြီး နောက်ဆုံးတွင် သူ၏ဇနီးမှာပြန်လာခဲ့သည်။ ဇနီးသည်ပြန်ရောက်လာသောအခါ သူသည် “ချစ်ခြင်း၊ သည်းခံခြင်း၊ နူးညံ့သိမ်မွေ့ခြင်းတို့” ဖြင့်ဆက်ဆံခဲ့သည်။ (၁ တိမောသေ ၆:၁၁) ၁၉၉၈ ခုနှစ်တွင် သူနှစ်ခြင်းခံလိုက်ပြီး များမကြာမီ သူ၏ဇနီးသည် ကျမ်းစာလေ့လာရန်သဘောတူသောအခါ သူအလွန်ဝမ်းမြောက်ခဲ့သည်။ ထိုသင်အံမှုသည် လွန်ခဲ့သောနှစ်က တဟီတီဌာနခွဲလက်အောက်ရှိရပ်ကွက်တွင်ပြုခဲ့သည့် သင်အံမှု ၁,၃၅၁ ခုမှ တစ်ခုဖြစ်သည်။
၇။ ဂျာမနီနိုင်ငံရှိ လူတစ်ဦး၏စာအရ သူ၏အိမ်ထောင်ရေးကို အဘယ်အရာက ခိုင်မြဲစေခဲ့သနည်း။
၇ ဂျာမနီနိုင်ငံတွင် လူတစ်ဦးသည် သမ္မာကျမ်းစာအမှန်တရားအပေါ် မိမိဇနီးသည်၏စိတ်ဝင်စားမှုကို ဆန့်ကျင်ကန့်ကွက်ခဲ့ပြီး ယေဟောဝါသက်သေများသည် ဇနီးသည်အား လှည့်ဖြားလိုကြခြင်းဖြစ်သည်ဟု ယုံကြည်ထားခဲ့သည်။ သို့သော် နောက်ပိုင်းတွင် မိမိဇနီးနှင့် ဦးဆုံးဆက်သွယ်ခဲ့သောသက်သေခံထံ သူဤသို့စာရေးခဲ့သည်– “ယေဟောဝါသက်သေများနှင့် ကျွန်တော့်ဇနီးကို မိတ်ဆက်ပေးခဲ့သောကြောင့် ကျေးဇူးတင်ပါသည်။ သူတို့အကြောင်း မကောင်းသတင်းများစွာကြားခဲ့ရသောကြောင့် အစတွင် ကျွန်တော်စိတ်ပူမိခဲ့သည်။ သို့သော် ယခု ကျွန်တော့်ဇနီးနှင့်အတူ အစည်းအဝေးများတက်ရောက်ခြင်းကြောင့် ကျွန်တော်မှားသွားကြောင်းကို သိလာခဲ့သည်။ အမှန်တရားကို ကျွန်တော်ကြားနေခြင်းဖြစ်ကြောင်းနှင့် ယင်းက ကျွန်တော်တို့၏အိမ်ထောင်ရေးကို ပို၍ခိုင်မြဲလာစေကြောင်း သိလိုက်ပါပြီ။” ဂျာမနီနိုင်ငံရှိ ယေဟောဝါသက်သေ ၁၆၂, ၉၃၂ ဦး—နှင့် တဟီတီ ဌာနခွဲအောက်ရှိ ကျွန်းများမှ ၁,၇၇၃ ဦးတို့အပါအဝင် မိသားစုများစွာသည် ဘုရားသခင်ရေးရာမေတ္တာ၌ စည်းလုံးလျက်ရှိကြသည်။
ကျွန်ုပ်တို့၏ ခရစ်ယာန်ညီအစ်ကိုများအပေါ်ထားသည့် မေတ္တာ
၈၊ ၉။ (က) ကျွန်ုပ်တို့၏ညီအစ်ကိုများကိုချစ်ရန် မည်သူက ကျွန်ုပ်တို့ကိုသွန်သင်သနည်း၊ အဘယ်အရာကိုပြုလုပ်ရန် မေတ္တာက ကျွန်ုပ်တို့ကို လှုံ့ဆော်သနည်း။ (ခ) အပြန်အလှန်ထောက်ပံ့ပေးရန် မေတ္တာက ညီအစ်ကိုများကို အဘယ်သို့ကူညီပေးနိုင်ကြောင်း ဥပမာတစ်ရပ်ပေးပါ။
၈ ပေါလုက သက်သာလောနိတ်ခရစ်ယာန်များထံ ဤသို့ဆိုခဲ့သည်– “သင်တို့သည် အချင်းချင်းချစ်စေခြင်းငှာ၊ ဘုရားသခင်ဆုံးမသွန်သင်တော်မူသောသူဖြစ်ကြ၏။” (၁ သက်သာလောနိတ် ၄:၉) မှန်ပါသည်၊ ‘ယေဟောဝါဆုံးမသွန်သင်တော်မူသော’ သူတို့သည် အချင်းချင်း ချစ်ကြသည်။ (ဟေရှာယ ၅၄:၁၃) သူတို့၏ချစ်ခြင်းမေတ္တာကို လုပ်ရပ်ဖြင့်တင်ပြခဲ့ကြပြီ၊ ပေါလုဤသို့ပြောရာတွင် ထိုအတိုင်းသူဖော်ပြပေးခဲ့သည်– “အချင်းချင်းချစ်၍ အမှုချင်းကိုဆောင်ရွက်ကြလော့။” (ဂလာတိ ၅:၁၃; ၁ ယောဟန် ၃:၁၈) ဥပမာ၊ ဖျားနာနေသောညီအစ်ကိုနှင့် ညီအစ်မများထံ လည်ပတ်သောအခါ၊ စိတ်ငယ်သူတို့ထံ အားပေးကြသောအခါ၊ အားနည်းသောသူတို့ကို မစကြသောအခါ သူတို့ ထိုသို့ပြုလုပ်ကြ၏။ (၁ သက်သာလောနိတ် ၅:၁၄) ကျွန်ုပ်တို့၏စစ်မှန်သောခရစ်ယာန်မေတ္တာက ကျွန်ုပ်တို့၏ဝိညာဉ်ရေးပရဒိသုကို ကြီးထွားစေသည်။
၉ အာကိုအသင်းတော်—အီကွေဒေါရှိ အသင်းတော်ပေါင်း ၅၄၄ ခုမှတစ်ခု—တွင် ညီအစ်ကိုများသည် မိမိတို့၏မေတ္တာကို လက်တွေ့ကျသောနည်းလမ်းတစ်ခုဖြင့် ပြသခဲ့သည်။ ဘဏ္ဍာရေးကျပ်တည်းမှုကြောင့် သူတို့သည် အလုပ်လက်မဲ့ဘဝ သို့မဟုတ် ဝင်ငွေမရှိသည့်ဘဝရောက်ကြရလေသည်၊ သို့နှင့် ညဘက်ငါးဖမ်းထွက်ပြီးနောက် အိမ်သို့ပြန်လာကြသော ဒေသခံတံငါသည်တို့ကို အစားအသောက်ရောင်းချခြင်းဖြင့် ဝင်ငွေရှာဖို့ ကြေညာသူများက ဆုံးဖြတ်လိုက်ကြ၏။ ကလေးများအပါအဝင် လူတိုင်း ပူးပေါင်းဆောင်ရွက်ခဲ့ကြသည်။ သူတို့သည် တံငါသည်များပြန်လာချိန်ဖြစ်သည့် နံနက် ၄:၀၀ နာရီအချိန်တွင် အစားအသောက်များအသင့်ဖြစ်နေစေရန် နံနက် ၁:၀၀ နာရီအချိန်တွင် အလုပ်စကြရသည်။ ရှာ၍ရလာသောငွေများကို မိမိတို့လိုအပ်ရာနှင့်အညီ ညီအစ်ကိုများ မျှ၍သုံးကြသည်။ ယင်းသို့သော အပြန်အလှန်ကူညီမှုက စစ်မှန်သောခရစ်ယာန်မေတ္တာကို ဖော်ပြလေသည်။
၁၀၊ ၁၁။ ပုဂ္ဂိုလ်ချင်းမသိသောညီအစ်ကိုများအတွက် ကျွန်ုပ်တို့၏မေတ္တာကို မည်သို့ဖော်ပြနိုင်ကြသနည်း။
၁၀ သို့သော် ကျွန်ုပ်တို့၏မေတ္တာကို ပုဂ္ဂိုလ်ချင်းသိသောခရစ်ယာန်တို့ဖြင့်သာ ကန့်သတ်ထားရန်မဟုတ်ချေ။ တမန်တော်ပေတရုက ဤသို့ဆိုသည်– “ညီအစ်ကိုများအသင်းအပင်းတစ်ခုလုံးကို ချစ်ကြလော့။” (၁ ပေတရု ၂:၁၇၊ ကဘ) ကျွန်ုပ်တို့သည် ကျွန်ုပ်တို့၏ညီအစ်ကို၊ ညီအစ်မများအားလုံးကို ချစ်ကြ၏၊ အကြောင်းမှာ သူတို့အားလုံးသည် ယေဟောဝါဘုရားသခင်အား ကိုးကွယ်သူချင်းဖြစ်သောကြောင့်တည်း။ အကျပ်အတည်းကာလများက ဤမေတ္တာကိုပြသခွင့် ပေါ်စေနိုင်သည်။ ဥပမာ၊ ၂၀၀၀ ပြည့်နှစ်၊ လုပ်ငန်းတော်နှစ်အတွင်း မိုဇမ်ဘစ်နိုင်ငံတွင် အကြီးအကျယ်ရေလွှမ်းမိုးမှုကြောင့် များစွာပျက်စီးဆုံးရှုံးခဲ့ပြီး အင်ဂိုလာနိုင်ငံ၌ ဆက်ဖြစ်နေသောပြည်တွင်းစစ်က များစွာတို့ကို ချွတ်ခြုံကျစေခဲ့သည်။ မိုဇမ်ဘစ်ရှိ ညီအစ်ကို ၃၁,၇၂၅ ဦးမှ အတော်များများနှင့် အင်ဂိုလာရှိ ၄၁,၂၂၂ ဦးတို့သည် ဤဖြစ်ရပ်များကြောင့် ထိခိုက်ခဲ့သည်။ သို့နှင့် တောင်အာဖရိကရှိ အိမ်နီးချင်းသက်သေခံတို့သည် ဤနိုင်ငံများရှိ မိမိတို့ညီအစ်ကိုများ၏အခက်အခဲကို လျော့ပါးစေရန် စားနပ်ရိက္ခာအမြောက်အမြား ပေးပို့ခဲ့ကြသည်။ သူတို့၏ “စည်းစိမ်” ကို မိမိတို့၏လိုအပ်နေသောညီအစ်ကိုများအား စေတနာအလျောက်ပေးလိုစိတ်က သူတို့၏မေတ္တာကို အထင်အရှားဖော်ပြလိုက်သည်။—၂ ကောရိန္သု ၈:၈၊ ၁၃-၁၅၊ ၂၄။
၁၁ ကြီးပွားချမ်းသာမှုနည်းသော နိုင်ငံများတွင် ဘုရားသခင့်နိုင်ငံတော်ခန်းမများနှင့် အစည်းအဝေးခန်းမကြီးများ ဆောက်လုပ်ခြင်းတွင် နိုင်ငံများစွာမှညီအစ်ကိုများပါဝင်ကြသောအခါ၌လည်း မေတ္တာကိုတွေ့ရှိကြရသည်။ ပုံသက်သေတစ်ခုမှာ စော်လမွန်ကျွန်းစုတွင်ဖြစ်သည်။ မငြိမ်သက်မှုများစွာရှိလင့်ကစား စော်လမွန်ကျွန်းစု၌ လွန်ခဲ့သောနှစ်က အများဆုံးကြေညာသူအရေအတွက် ၁,၆၉၇ ဦးဖြင့် ၆ ရာခိုင်နှုန်းတိုးတက်လာသည်ကို တွေ့ရှိရသည်။ အစည်းအဝေးခန်းမကြီးတစ်ခု သူတို့လိုအပ်ခဲ့သည်။ ကျွန်းသားများစွာမှာ အဆိုပါနိုင်ငံမှစွန့်ခွာသွားကြသော်လည်း ဩစတြေးလျရှိ စေတနာ့ဝန်ထမ်းများစွာသည် ဆောက်လုပ်ရေး၌ ကူညီရန်ရောက်လာကြသည်။ နောက်ဆုံး၌ စေတနာ့ဝန်ထမ်းများ စွန့်ခွာရန်ဖြစ်လာခဲ့သည်၊ သို့သော် သူတို့မထွက်ခွာမီ ဆက်၍အုတ်မြစ်အပြီးအစီးချတတ်ရန် ဒေသခံညီအစ်ကိုများကို လေ့ကျင့်ပေးခဲ့၏။ အစိတ်အပိုင်းများကို အသင့်တပ်ဆင်ဆောက်လုပ်ရသော သံမဏိအဆောက်အအုံအား ဩစတြေးလျနိုင်ငံမှ သင်္ဘောဖြင့်တင်ပို့ခဲ့ပြီး—ဆောက်လုပ်မှုလုပ်ငန်းများစွာကို ရပ်ဆိုင်းထားရသည့်အခြေအနေတွင်ရှိနေစဉ်—ဝတ်ပြုကိုးကွယ်ရန်အတွက် ထိုကောင်းမွန်သောအဆောက်အအုံပြီးစီးသွားခြင်းက ယေဟောဝါ၏နာမတော်နှင့် ညီအစ်ကိုချင်းမေတ္တာအတွက် အလွန်ကောင်းသောသက်သေခံချက်တစ်ရပ်ဖြစ်ပေမည်။
ဘုရားသခင်ကဲ့သို့ ကျွန်ုပ်တို့သည် လောကကိုချစ်
၁၂။ ယုံကြည်ခြင်းမတူသူတို့အပေါ် ကျွန်ုပ်တို့၏သဘောထားတွင် ယေဟောဝါအား ကျွန်ုပ်တို့ မည်သို့အတုယူကြမည်နည်း။
၁၂ ကျွန်ုပ်တို့၏ချစ်ခြင်းမေတ္တာကို မိသားစုနှင့် ညီအစ်ကိုအသင်းအပင်းအတွက်သာ ကန့်သတ်ထားသလော။ “ဘုရားသခင်ကျင့်တော်မူသည်နည်းတူ” ကျွန်ုပ်တို့ကျင့်မည်ဆိုလျှင် ထိုသို့မကန့်သတ်ထားပါ။ ယေရှု ဤသို့မိန့်တော်မူသည်– “ဘုရားသခင်၏သားတော်ကို ယုံကြည်သောသူအပေါင်းတို့သည် ပျက်စီးခြင်းသို့မရောက်၊ ထာဝရအသက်ကိုရစေခြင်းငှာ၊ ဘုရားသခင်သည် မိမိ၌တစ်ပါးတည်းသောသားတော်ကို စွန့်တော်မူသည်တိုင်အောင် လော [က] သားတို့ကိုချစ်တော်မူ၏။” (ဧဖက် ၅:၁; ယောဟန် ၃:၁၆) ယေဟောဝါဘုရားသခင်ကဲ့သို့ပင် ကျွန်ုပ်တို့သည် ယုံကြည်ခြင်းမတူသူတို့အပါအဝင် လူအပေါင်းတို့အပေါ် မေတ္တာဖြင့်ပြုမူကြသည်။ (လုကာ ၆:၃၅၊ ၃၆; ဂလာတိ ၆:၁၀) အထူးသဖြင့် ယင်းနှင့်စပ်လျဉ်း၍ ဘုရားသခင့်နိုင်ငံတော်နှင့်ပတ်သက်သော သတင်းကောင်းကို ကျွန်ုပ်တို့ဟောပြောကြပြီး အခြားသူတို့အား သူတို့၏အကျိုးအတွက် ဘုရားသခင့်ကြီးမားလှသောမေတ္တာ၏လုပ်ရပ်ကို ပြောပြကြသည်။ ယင်းက နားထောင်သူမည်သူမဆိုအပေါ် ကယ်တင်ခြင်းရရှိစေနိုင်သည်။—မာကု ၁၃:၁၀; ၁ တိမောသေ ၄:၁၆။
၁၃၊ ၁၄။ အဆင်မပြေမှုများစွာ ကြုံတွေ့ရလင့်ကစား သက်သေခံမဟုတ်သူတို့အပေါ် မိမိတို့၏မေတ္တာကိုပြသပေးခဲ့ကြသည့် ညီအစ်ကိုများ၏တွေ့ကြုံမှုအချို့ကား အဘယ်နည်း။
၁၃ နီပေါလ်နိုင်ငံမှ အထူးရှေ့ဆောင်ဓမ္မအမှုဆောင်လေးဦးကို သုံးသပ်ကြည့်ပါ။ သူတို့သည် အဆိုပါနိုင်ငံ၏အနောက်တောင်ဘက် မြို့တစ်မြို့တွင် တာဝန်ကျခဲ့ပြီး လွန်ခဲ့သောငါးနှစ်တာတွင် ၎င်းမြို့နှင့် အစွန်အဖျားကျေးရွာများတွင် စိတ်ရှည်စွာသက်သေခံခြင်းဖြင့် သူတို့၏ချစ်ခြင်းမေတ္တာကို ဖော်ပြခဲ့ကြသည်။ မိမိတို့၏ရပ်ကွက်ကို ခြုံငုံမိစေရန် သူတို့သည် ၁၀၀ ဒီဂရီဖာရင်ဟိုက်အထက်ရှိ အပူထဲတွင် စက်ဘီးဖြင့် နာရီများစွာသွားကြလေ့ရှိ၏။ သူတို့၏မေတ္တာနှင့် “ကောင်းသောအကျင့်ကိုအမြဲကျင့်” ခြင်းကြောင့် ရွာတစ်ရွာ၌ စာအုပ်ကြီးသင်တန်းအုပ်စုတစ်စု ပေါ်ထွက်လာခြင်းဖြင့် ရလဒ်ကောင်းရရှိခဲ့သည်။ (ရောမ ၂:၇) ၂၀၀၀ ပြည့်နှစ်၊ မတ်လတွင် လည်ပတ်ရောက်ရှိလာသော တိုက်နယ်ကြီးကြပ်မှူး၏လူထုဟောပြောချက်ကို ကြားနာရန် လူပေါင်း ၃၂ ဦးရောက်ရှိလာခဲ့သည်။ နီပေါလ်နိုင်ငံတွင် လွန်ခဲ့သောနှစ်က အများဆုံးကြေညာသူမှာ ၄၃၀ ဖြစ်ပြီး ၉ ရာခိုင်နှုန်းတိုးတက်သည်။ ထိုနိုင်ငံရှိ ညီအစ်ကိုများ၏မေတ္တာပါသောဇွဲကို ယေဟောဝါ အထင်အရှားကောင်းချီးပေးလျက်ရှိသည်။
၁၄ ကိုလံဘီယာနိုင်ငံတွင် ယာယီအထူးရှေ့ဆောင်များသည် ဝိုင်းအားအင်ဒီးယန်းများကြား သွားရောက်ဟောပြောခဲ့ကြ၏။ ထိုသို့ပြုရန် သူတို့သည် ဘာသာစကားအသစ်ကို သင်ယူခဲ့ကြသည်၊ မိုးသည်းနေသည့်ကြားမှ လူထုဟောပြောချက်တစ်ခုကို ၂၇ ဦးတက်ရောက်ခဲ့သောအခါ သူတို့၏မေတ္တာပါစိတ်ဝင်စားမှုမှာ ကောင်းချီးရခဲ့သည်။ အဆိုပါရှေ့ဆောင်များပြသခဲ့ကြသော ဇွဲနှင့် မေတ္တာကြောင့် ကိုလံဘီယာ၌ ၅ ရာခိုင်နှုန်းတိုးတက်ခဲ့ပြီး အများဆုံးကြေညာသူ ၁၀၇,၆၁၃ ဦးဖြစ်လာခဲ့သည်။ ဒိန်းမတ်နိုင်ငံတွင် သက်ကြီးညီအစ်မတစ်ဦးသည် အခြားသူတို့ထံ သတင်းကောင်းဝေမျှပေးလိုသည်၊ သို့သော် သူသည် မသန်စွမ်းသူတစ်ဦးဖြစ်နေသည်။ ဇွဲမလျှော့ဘဲ သူသည် စာရေးခြင်းဖြင့် စိတ်ဝင်စားသူတို့ကို ဆက်သွယ်ခဲ့သည်။ လက်ရှိတွင် သူသည် ၄၂ ဦးကို စာဖြင့်ဆက်သွယ်နေပြီး ကျမ်းစာသင်အံမှု ၁၁ ခုကျင်းပလျက်ရှိသည်။ သူသည် လွန်ခဲ့သောနှစ်က ဒိန်းမတ်နိုင်ငံမှ မှတ်တမ်းပေးပို့ခဲ့သော အများဆုံးကြေညာသူ ၁၄,၈၈၅ ဦးတွင် တစ်ဦးဖြစ်သည်။
သင်၏ရန်သူတို့ကို ချစ်ပါ
၁၅၊ ၁၆။ (က) ကျွန်ုပ်တို့၏မေတ္တာကို မည်သည့်အတိုင်းအတာအထိ ထားသင့်ကြောင်း ယေရှုမိန့်တော်မူခဲ့သနည်း။ (ခ) ယေဟောဝါသက်သေများအား မှားယွင်းသောစွပ်စွဲမှုပြုခဲ့သူတစ်ဦးကို တာဝန်ရှိညီအစ်ကိုများက မေတ္တာပါသောနည်းလမ်းတစ်ရပ်ဖြင့် မည်သို့ ကိုင်တွယ်ဖြေရှင်းခဲ့သနည်း။
၁၅ ရှမာရိလူတစ်ဦးကို အိမ်နီးချင်းတစ်ဦးအဖြစ် ရှုမြင်နိုင်ကြောင်း ကျမ်းတတ်ဖြစ်သူအား ယေရှုမိန့်တော်မူခဲ့သည်။ ကိုယ်တော်၏တောင်ပေါ်တရားတော်တွင် ယေရှု ဤသို့မိန့်တော်မူရာ၌ ထိုမျှမကတာသွားခဲ့သည်– “‘မိတ်ဆွေ [“အိမ်နီးချင်း၊” ကဘ] ကို ချစ်လော့။ ရန်သူကိုမုန်းလော့’ ဟူသောပညတ်ကို သင်တို့ကြားသိရလေပြီ။ သို့ရာတွင် ရန်သူများကို ချစ်ကြလော့ဟု သင်တို့အား ငါဆို၏။ သင်တို့ကို နှိပ်စက်ညှဉ်းဆဲသူတို့အတွက် မေတ္တာပို့ကြလော့။ သို့မှသာ သင်တို့သည် ကောင်းကင်ဘုံရှင် သင်တို့အဘ၏သားများ ဖြစ်ကြလိမ့်မည်။” (မဿဲ ၅:၄၃-၄၅၊ သတင်းကောင်း) တစ်ဦးတစ်ယောက်က ကျွန်ုပ်တို့ကိုဆန့်ကျင်လင့်ကစား ကျွန်ုပ်တို့သည် “အကောင်းအားဖြင့် အဆိုးကိုနိုင်” ရန်ကြိုးစားကြသည်။ (ရောမ ၁၂:၁၉-၂၁) ဖြစ်နိုင်လျှင် ကျွန်ုပ်တို့၏တန်ဖိုးအရှိဆုံးပိုင်ဆိုင်ရာဖြစ်သည့် အမှန်တရားကို သူ့အား ကျွန်ုပ်တို့ဝေမျှကြသည်။
၁၆ ယူကရိန်းနိုင်ငံရှိ ခရစ်မစ်ချာ့ခ်သံတော်ဆင့်သတင်းစာ၏ ဆောင်းပါးတစ်ခုတွင် ယေဟောဝါသက်သေများကို အန္တရာယ်ရှိသောဂိုဏ်းအဖြစ် ဖော်ပြထားသည်။ ယင်းသည် အရေးကြီး၏၊ အကြောင်းမှာ ဥရောပတွင် အချို့သူတို့သည် ယေဟောဝါသက်သေများ၏ ဆောင်ရွက်မှုများကို ကန့်သတ်တားဆီး သို့မဟုတ် ပိတ်ပင်မှုပြုသင့်ကြောင်း လူတို့ကိုဖြားယောင်းနိုင်ရန် ယေဟောဝါသက်သေများ၏အကြောင်းကို ယင်းသို့ပြောဆိုကြသည်။ ထို့ကြောင့် အယ်ဒီတာထံချဉ်းကပ်ခဲ့ပြီး ထိုဆောင်းပါးကို အမှားပြင်ဆင်၍ပုံနှိပ်ထုတ်ဝေရန် တောင်းဆိုခဲ့သည်။ သူက သဘောတူညီခဲ့၏၊ သို့သော် ထုတ်ဝေရာတွင် မူလဆောင်းပါးသည် အမှန်တရားများအပေါ် အခြေခံထားကြောင်း ရှင်းလင်းဖော်ပြချက်တစ်ရပ်ကို သူပုံနှိပ်ခဲ့သည်။ သို့နှင့် တာဝန်ရှိညီအစ်ကိုများသည် ထပ်ဆင့်အချက်အလက်တို့ဖြင့် သူထံ တစ်ဖန်ချဉ်းကပ်ခဲ့ပြန်သည်။ နောက်ဆုံး မူလဆောင်းပါးမှာ သတင်းမှားဖြစ်ခဲ့ကြောင်းကို ထိုအယ်ဒီတာသိမြင်လာခဲ့ပြီး ရုပ်သိမ်းချက်တစ်ရပ် ထုတ်ပြန်ပေးခဲ့သည်။ သူနှင့် ပွင့်လင်းစွာ၊ ကြင်နာစွာဖြင့်ဆက်ဆံခြင်းသည် ဤအခြေအနေကို ကိုင်တွယ်ဖြေရှင်းရန် မေတ္တာပါသောနည်းလမ်းဖြစ်ခဲ့ပြီး ရလဒ်ကောင်းကို ဖြစ်စေခဲ့သည်။
ချစ်ခြင်းမေတ္တာကို ကျွန်ုပ်တို့ မည်သို့မွေးမြူပျိုးထောင်နိုင်သနည်း
၁၇။ အခြားသူတို့အပေါ် မေတ္တာဖြင့်ပြုမူရန် အမြဲလွယ်ကူမည်မဟုတ်ကြောင်း အဘယ်အရာကပြသနည်း။
၁၇ ကလေးငယ်တစ်ဦး မွေးဖွားလာသောအခါ သူ၏မိဘများသည် သူ့ကိုလျင်မြန်စွာမေတ္တာသက်ဝင်သွားကြ၏။ လူကြီးများကို မေတ္တာပါစွာဆက်ဆံရခြင်းမှာ အမြဲပင် ထိုအတိုင်းအလိုအလျောက်ပေါ်ထွက်မလာချေ။ ထိုကြောင့်ပင် သမ္မာကျမ်းစာက တစ်ဦးနှင့်တစ်ဦးချစ်ရန် ကျွန်ုပ်တို့ကို အထပ်ထပ်ပြောရခြင်းဖြစ်နိုင်သည်—ယင်းသည် ကျွန်ုပ်တို့ မွေးမြူပျိုးထောင်ရမည့်အရာတစ်ခု ဖြစ်၏။ (၁ ပေတရု ၁:၂၂၊ ၂၃; ၄:၈; ၁ ယောဟန် ၃:၁၁၊ ၁၂) ကျွန်ုပ်တို့၏ညီအစ်ကိုအား “အကြိမ်ခုနစ်ဆယ်ခုနစ်လီမြောက်အောင်” ခွင့်လွှတ်သင့်ကြောင်း ယေရှုမိန့်တော်မူရာတွင် ကျွန်ုပ်တို့၏မေတ္တာမှာ စမ်းသပ်ခံရမည်ဖြစ်ကြောင်း ကိုယ်တော်သိတော်မူသည်။ (မဿဲ ၁၈:၂၁၊ ၂၂) ပေါလုက ကျွန်ုပ်တို့ကို “အချင်းချင်းသည်းခံ” ရန်လည်း တိုက်တွန်းခဲ့သည်။ (ကောလောသဲ ၃:၁၂၊ ၁၃) ကျွန်ုပ်တို့ ဤသို့မှာကြားခံရခြင်းမှာ အံ့အားသင့်စရာမလိုချေ– “ချစ်ခြင်းမေတ္တာကို မီအောင်လိုက်ကြလော့”! (၁ ကောရိန္သု ၁၄:၁) ယင်းကို ကျွန်ုပ်တို့ မည်သို့ပြုနိုင်သနည်း။
၁၈။ အခြားတို့အပေါ် မေတ္တာစိတ်မွေးမြူရန် အဘယ်အရာက ကျွန်ုပ်တို့ကိုကူညီပေးမည်နည်း။
၁၈ ဦးဆုံးအနေနှင့် ယေဟောဝါအပေါ် ကျွန်ုပ်တို့ထားရှိသောမေတ္တာကို အမြဲပင်စိတ်တွင် ထားနိုင်ကြသည်။ ဤမေတ္တာသည် ကျွန်ုပ်တို့၏အိမ်နီးချင်းကိုချစ်ရန် အခိုင်အမာတိုက်တွန်းနှိုးဆော်မှုတစ်ရပ်ဖြစ်သည်။ အဘယ်ကြောင့်နည်း။ အကြောင်းမှာ ကျွန်ုပ်တို့ထိုသို့ပြုလုပ်သောအခါ ယင်းက ကျွန်ုပ်တို့၏ကောင်းကင်ခမည်းတော်ကို ကောင်းစွာထင်ဟပ်ပြပြီး ကိုယ်တော်အား ဘုန်းထင်ရှားစေ၍ ချီးမွမ်းခြင်းဖြစ်စေသောကြောင့်တည်း။ (ယောဟန် ၁၅:၈-၁၀; ဖိလိပ္ပိ ၁:၉-၁၁) ဒုတိယမှာ ကိစ္စရပ်များအပေါ်ယေဟောဝါရှုမြင်သကဲ့သို့ ကျွန်ုပ်တို့ရှုမြင်တတ်ရန် ကြိုးစားနိုင်သည်။ ကျွန်ုပ်တို့အပြစ်ပြုသည့်အခါတိုင်း ယေဟောဝါအား ကျွန်ုပ်တို့ပြစ်မှားကြသည်; သို့တိုင် ကိုယ်တော်သည် ကျွန်ုပ်တို့ကို အဖန်ဖန်အလီလီ ခွင့်လွှတ်တော်မူ၍ ကျွန်ုပ်တို့အပေါ် မေတ္တာထားမြဲထားသည်။ (ဆာလံ ၈၆:၅; ၁၀၃:၂၊ ၃; ၁ ယောဟန် ၁:၉; ၄:၁၈) ယေဟောဝါ၏ရှုမြင်ပုံကို ကျွန်ုပ်တို့မွေးမြူပျိုးထောင်ပါက အခြားသူတို့အပေါ် မေတ္တာစိတ်ဝင်လာကာ ကျွန်ုပ်တို့အပေါ် သူတို့၏ပြစ်မှားမှုများကို ခွင့်လွှတ်လိမ့်မည်။ (မဿဲ ၆:၁၂) တတိယအနေနှင့် ကျွန်ုပ်တို့ကို ပြုမူဆက်ဆံစေလိုသကဲ့သို့ အခြားသူတို့ကို ကျွန်ုပ်တို့ပြုမူဆက်ဆံနိုင်ကြသည်။ (မဿဲ ၇:၁၂) ကျွန်ုပ်တို့သည် မစုံလင်သည့်အလျောက် အခါအားလျော်စွာ ခွင့်လွှတ်ခံရရန်လိုသည်။ ဥပမာ၊ အခြားသူတို့အား စိတ်ထိခိုက်စေသောစကားများကို ကျွန်ုပ်တို့ပြောမိသောအခါ တစ်ချိန်မဟုတ်တစ်ချိန် လျှာဖြင့် လူတိုင်းမှားတတ်ကြောင်း သူတို့သတိရကြလိမ့်ဟု ကျွန်ုပ်တို့မျှော်လင့်တတ်ကြ၏။ (ယာကုပ် ၃:၂) အခြားသူတို့သည် ကျွန်ုပ်တို့ကိုမေတ္တာပါစွာ ပြုမူဆက်ဆံစေလိုလျှင် သူတို့အပေါ် ကျွန်ုပ်တို့သည် မေတ္တာပါစွာပြုမူဆက်ဆံသင့်သည်။
၁၉။ မေတ္တာစိတ်ကို မွေးမြူပျိုးထောင်ရာ၌ သန့်ရှင်းသောဝိညာဉ်တော်၏အကူအညီကို ကျွန်ုပ်တို့ မည်သို့ရှာဖွေနိုင်သနည်း။
၁၉ စတုတ္ထအနေနှင့် သန့်ရှင်းသောဝိညာဉ်တော်၏အကူအညီကို ကျွန်ုပ်တို့ရှာဖွေနိုင်သည်၊ အကြောင်းမှာ ချစ်ခြင်းမေတ္တာသည် ဝိညာဉ်တော်၏အသီးတွင် ပါဝင်သောကြောင့်တည်း။ (ဂလာတိ ၅:၂၂၊ ၂၃) ခင်မင်ရင်းနှီးမှုများ၊ မိသားစုစိတ်ဓာတ်များနှင့် စိတ်ယူးယဉ်မေတ္တာတို့မှာ အလိုအလျောက်ပေါ်လာလေ့ရှိ၏။ သို့သော် ယေဟောဝါ၌ရှိသောမေတ္တာမျိုး၊ စည်းလုံးမှု၏စုံလင်ခြင်းအနှောင်အဖွဲ့တည်းဟူသောမေတ္တာမျိုးကို ကျွန်ုပ်တို့မွေးမြူပျိုးထောင်ရန် ယေဟောဝါ၏ဝိညာဉ်တော်အကူအညီ လိုအပ်သည်။ မှုတ်သွင်းခံသမ္မာကျမ်းစာကို ဖတ်ရှုခြင်းဖြင့် သန့်ရှင်းသောဝိညာဉ်တော်၏အကူအညီကို ကျွန်ုပ်တို့ရှာဖွေနိုင်ကြသည်။ ဥပမာ၊ ယေရှု၏ဘဝကို ကျွန်ုပ်တို့လေ့လာကြည့်ပါက လူတို့နှင့် ကိုယ်တော် မည်သို့ပြုမူဆက်ဆံပုံကို ကျွန်ုပ်တို့တွေ့ရှိရမည်ဖြစ်ပြီ ကိုယ်တော့်အားအတုယူရန် ကျွန်ုပ်တို့သင်ယူနိုင်သည်။ (ယောဟန် ၁၃:၃၄၊ ၃၅; ၁၅:၁၂) ထို့အပြင် အထူးသဖြင့် မေတ္တာပါသောနည်းလမ်းတစ်ရပ်ဖြင့်လုပ်ဆောင်ရန် ကျွန်ုပ်တို့အတွက် အခက်အခဲဖြစ်သောအခြေအနေများ၌ ယေဟောဝါထံ သန့်ရှင်းသောဝိညာဉ်တော်ကို ကျွန်ုပ်တို့တောင်းခံနိုင်ကြ၏။ (လုကာ ၁၁:၁၃) နောက်ဆုံးတွင် ကျွန်ုပ်တို့သည် ခရစ်ယာန်အသင်းတော်နှင့် အနီးကပ်ရှိနေခြင်းအားဖြင့် မေတ္တာကိုအမီလိုက်နိုင်ကြသည်။ မေတ္တာရှိသော ညီအစ်ကို၊ ညီအစ်မများနှင့်အတူရှိနေခြင်းက မေတ္တာကိုမွေးမြူပျိုးထောင်ရန် ကျွန်ုပ်တို့အား ကူညီပေးသည်။—သု. ၁၃:၂၀။
၂၀၊ ၂၁။ ၂၀၀၀ ပြည့်နှစ်၊ လုပ်ငန်းတော်နှစ်အတွင်း ယေဟောဝါသက်သေတို့သည် အဘယ်ထူးခြားသောမေတ္တာ၏သရုပ်သကန်ကို ဖော်ပြခဲ့ကြပြီနည်း။
၂၀ လွန်ခဲ့သောနှစ်က ကမ္ဘာတစ်ဝန်းတွင် သတင်းကောင်းကြေညာသူ အများဆုံးမှာ ၆,၀၃၅,၅၆၄ ဦးဖြစ်ခဲ့သည်။ တစ်ဦးချင်းစီကိုရှာ၍ သူတို့အား သတင်းကောင်းကိုပြောပြရန် ယေဟောဝါသက်သေများ အသုံးပြုခဲ့သည့် စုစုပေါင်းနာရီမှာ ၁,၁၇၁,၂၇၀,၄၂၅ နာရီဖြစ်သည်။ ဤလုပ်ငန်းကို သူတို့လုပ်ဆောင်ရာ၌ နေပူ၊ မိုးရွာ၊ အအေးဒဏ်မရှောင် သူတို့အား ခံနိုင်ရည်ရှိရှိလုပ်ဆောင်စေသည့်အရာမှာ မေတ္တာပင်ဖြစ်သည်။ ကျောင်းနေဖက်များနှင့် လုပ်ဖော်ကိုင်ဖက်များ၊ လမ်းများပေါ်နှင့် အခြားနေရာများ၌ လုံးဝမသိသောသူစိမ်းတစ်ရံဆံများထံ ချဉ်းကပ်၍စကားပြောဆိုရန် သူတို့ကို လှုံ့ဆော်ပေးသည့်အရာမှာ မေတ္တာပင်ဖြစ်သည်။ သက်သေခံများ သွားရောက်လည်ပတ်ခဲ့ကြသူများစွာတို့မှာ စိတ်ပါဝင်စားမှုမရှိ၊ အချို့တို့ကား ဆန့်ကျင်ကန့်ကွက်ခဲ့ကြ၏။ သို့သော် အချို့သည် စိတ်ဝင်စားမှုပြသခဲ့ကြပြီ၊ သို့ဖြင့် ပြန်လည်ပတ်မှု ၄၃၃,၄၅၄,၀၄၉ ခုနှင့် ကျမ်းစာသင်အံမှု ၄,၇၆၆,၆၃၁ ကို ကျင်းပခဲ့ကြသည်။ *
၂၁ ဤအရာအားလုံးမှာ မိမိတို့၏ဘုရားသခင်အပေါ်နှင့် အိမ်နီးချင်းတို့အပေါ် ယေဟောဝါသက်သေများထားရှိခဲ့ကြသည့် မေတ္တာ၏သရုပ်သကန်တစ်ရပ်ပါတကား! ထိုမေတ္တာသည် ဘယ်သောအခါမျှ အေးစက်သွားမည်မဟုတ်။ ၂၀၀၁ ခု လုပ်ငန်းတော်နှစ်တွင် လူသားအပေါင်းအား သာ၍သက်သေခံဖြစ်မည်ကို တွေ့မြင်ရမည်ဖြစ်ကြောင်း ကျွန်ုပ်တို့ယုံကြည်စိတ်ချပါသည်။ သူတို့သည် “ခပ်သိမ်းသောအမှုတို့ကို ချစ်ခြင်းမေတ္တာစိတ်နှင့်ဆောင်ရွက်ကြစဉ်” ယေဟောဝါသည် မိမိ၏သစ္စာရှိ၍ ဇွဲရှိသောဝတ်ပြုကိုးကွယ်သူတို့အပေါ် ဆက်လက်ကောင်းချီးပေးပါလေစေ။—၁ ကောရိန္သု ၁၆:၁၄။
[အောက်ခြေမှတ်ချက်များ]
^ အပိုဒ်၊ 20 ၂၀၀၀ ပြည့်နှစ်၊ လုပ်ငန်းတော်နှစ်မှတ်တမ်း၏ ပြည့်စုံသောအသေးစိတ်အချက်အလက်များအတွက် စာမျက်နှာ ၁၈-၂၁ ရှိဇယားကိုရှု။
သင်ရှင်းပြနိုင်သလော
• ကျွန်ုပ်တို့၏အိမ်နီးချင်းကို ချစ်သောအခါ ကျွန်ုပ်တို့သည် မည်သူကိုအတုယူခြင်းဖြစ်သနည်း။
• ကျွန်ုပ်တို့၏မေတ္တာသည် မည်မျှအထိ တာသွားသင့်သနည်း။
• ခရစ်ယာန်မေတ္တာကို ဖော်ပြနေသည့် တွေ့ကြုံမှုအချို့ကားအဘယ်နည်း။
• ခရစ်ယာန်မေတ္တာကို ကျွန်ုပ်တို့မည်သို့ မွေးမြူပျိုးထောင်နိုင်သနည်း။
[လေ့လာရန်မေးခွန်းများ]
[စာမျက်နှာ ၁၈–၂၁ ပါ ဇယား]
ကမ္ဘာချီယေဟောဝါသက်သေများ၏ ၂၀၀၀ ပြည့်နှစ်လုပ်ငန်းတော်မှတ်တမ်း
[စာမျက်နှာ ၁၅ ပါ ရုပ်ပုံ]
ခရစ်ယာန်မေတ္တာသည် မိသားစုကို တစည်းတလုံးရှိစေနိုင်
[စာမျက်နှာ ၁၇ ပါ ရုပ်ပုံ]
မေတ္တာက ကျွန်ုပ်တို့၏မျှော်လင့်ချက်ကို အခြားသူတို့ထံဝေမျှရန် လှုံ့ဆော်ပေး