ယေဟောဝါ၏အဖွဲ့အစည်းနှင့်အတူ ရင်ပေါင်တန်းလျှောက်လှမ်းနေလော့
ယေဟောဝါ၏အဖွဲ့အစည်းနှင့်အတူ ရင်ပေါင်တန်းလျှောက်လှမ်းနေလော့
“ငြိမ်သက်ခြင်း၏အရှင်ဘုရားသခင်သည်၊ . . . အလိုတော်သို့လိုက်မည်အကြောင်း၊ ကောင်းသောအကျင့်အမျိုးမျိုး၌ သင်တို့ကိုပြုပြင်တော်မူပါစေသော။”—ဟေဗြဲ ၁၃:၂၀၊ ၂၁။
၁။ ကမ္ဘာ့လူဦးရေကား အဘယ်နည်း၊ မည်ရွေ့မည်မျှသည် တစ်စုံတစ်ရာသောဘာသာဝင်များအဖြစ် ဖော်ပြခံရသနည်း။
၁၉၉၉ ခုနှစ်တွင် ကမ္ဘာ့လူဦးရေသည် သန်းခြောက်ထောင်ပြည့်သွားပေပြီ! ထိုအရေအတွက်ထဲတွင် ၁,၁၆၅,၀၀၀,၀၀၀ သည်မွတ်ဆလင်; ၁,၀၃၀,၀၀၀,၀၀၀ သည် ရိုမန်ကက်သလစ်; ၇၆၂,၀၀၀,၀၀၀ သည် ဟိန္ဒူ; ၃၅၄,၀၀၀,၀၀၀ သည် ဗုဒ္ဓဘာသာ; ၃၁၆,၀၀၀,၀၀၀ သည် ပရိုတက်စတင့်များဖြစ်ပြီး ၂၁၄,၀၀၀,၀၀၀ သည် ဩသဒေါက်စ်များဖြစ်၏ဟု သည် ဝေါ အယ်လ်မနက်ကဖော်ပြထားသည်။
၂။ ယနေ့တည်ရှိသော ဘာသာရေးအခြေအနေများနှင့်ပတ်သက်၍ မည်သို့ဆိုနိုင်သနည်း။
၂ ယနေ့တည်ရှိနေသော ဘာသာရေးကွဲပြားမှုနှင့် ရှုပ်ထွေးမှုကိုထောက်ရှုသော် ဤသန်းနှင့်ချီသောလူအားလုံးသည် ဘုရားသခင့်အလိုတော်နှင့်အညီ လုပ်ဆောင်နေကြပါသလော။ မလုပ်ဆောင်ကြပါ၊ “[အကြောင်းမှာ] ဘုရားသခင်သည် ရုန်းရင်းခတ်သောအမှုကိုပြုစုတော်မမူ။ သန့်ရှင်းသူတို့၏ အသင်းတော်အပေါင်းတို့၌ဖြစ်သကဲ့သို့ အသင့်အတင့်ငြိမ်ဝပ်ခြင်းကို ပြုစုတော်မူ၏။” (၁ ကောရိန္သု ၁၄:၃၃) အခြားတစ်ဖက်တွင် ယေဟောဝါသက်သေများ၏ အပြည်ပြည်ဆိုင်ရာညီအစ်ကိုအသင်းအပင်းကော အသို့နည်း။ (၁ ပေတရု ၂:၁၇) ဂရုတစိုက်လေ့လာဆန်းစစ်မှုက ‘ငြိမ်သက်ခြင်း၏အရှင်ဘုရားသခင်သည် ကောင်းသောအကျင့်အမျိုးမျိုး၌ သူတို့ကိုပြုပြင်တော်မူ’ ကြောင်းသက်သေထူသည်။—ဟေဗြဲ ၁၃:၂၀၊ ၂၁။
၃။ စီ.အီး. ၃၃ ပင်တေကုတ္တေပွဲနေ့တွင် ယေရုရှလင်မြို့၌ အဘယ်အရာဖြစ်ပျက်ခဲ့သနည်း။ အဘယ်ကြောင့်နည်း။
၃ အမှန်မှာ ဘုရားသခင့်မျက်နှာသာရမရဆုံးဖြတ်ရန်အတွက် ယေဟောဝါသက်သေများ ပေါင်းသင်းဖွဲ့စည်းသူတို့၏အရေအတွက်သည် စံနှုန်းမဟုတ်; ကိန်းဂဏန်းသည်လည်း ယေဟောဝါအတွက် အထင်ကြီးစရာ မဟုတ်ချေ။ ဣသရေလလူမျိုးကို ကိုယ်တော်ရွေးချယ်ခဲ့ချိန်က သူတို့သည် လူမျိုးများတွင် ‘လူဦးရေအများဆုံး’ ဖြစ်သောကြောင့်မဟုတ်ပေ။ အမှန်ဆိုလျှင် သူတို့သည် ‘အနည်းဆုံး’ ဖြစ်ကြသည်။ (တရားဟောရာ ၇:၇) သို့သော် ဣသရေလလူမျိုးသည် ဘုရားသခင်အပေါ် သစ္စာမဲ့ခဲ့ကြသောကြောင့် ယေဟောဝါသည် စီ.အီး. ၃၃ ပင်တေကုတ္တေပွဲနေ့တွင် မိမိ၏မျက်နှာသာကို ယေရှုခရစ်၏နောက်လိုက်များ ပါဝင်ခဲ့သော အသင်းတော်သစ်သို့ လွှဲပြောင်းခဲ့သည်။ သူတို့သည် ယေဟောဝါ၏သန့်ရှင်းသောဝိညာဉ်တော်ဖြင့် ဘိသိက်ပေးခံခဲ့ရပြီး ဘုရားသခင်နှင့်ခရစ်တော်အကြောင်း အမှန်တရားကို အခြားသူများထံ ဇွဲဖြင့်ကြေညာခဲ့ကြသည်။—တမန်တော် ၂:၄၁၊ ၄၂။
အဆက်မပြတ်တိုးတက်နေ
၄။ အစောပိုင်းခရစ်ယာန်အသင်းတော်သည် အဆက်မပြတ်တိုးတက်နေခဲ့သည်ဟု အဘယ်ကြောင့် သင်ဆိုရသနည်း။
၄ ပထမရာစုရှိ ခရစ်ယာန်အသင်းတော်သည် အဆက်မပြတ်တိုးတက်လာခဲ့ပြီး ရပ်ကွက်အသစ်များဖွင့်ကာ တပည့်များဖြစ်စေကြပြီး ဘုရားသခင့်အလိုတော်နှင့် ရည်ရွယ်ချက်ကို ပိုပြီးနားလည်သဘောပေါက်လာအောင် ကြိုးစားခဲ့ကြသည်။ အစောပိုင်းခရစ်ယာန်များသည် ဘုရားသခင့်မှုတ်သွင်းခံစာစောင်များမှတစ်ဆင့် သိရှိခဲ့ရသော ပိုထွန်းလင်းလာသည့်အလင်းနှင့် ရင်ပေါင်တန်းလိုက်လျှောက်ခဲ့ကြသည်။ တမန်တော်များနှင့် အခြားသူများ လည်ပတ်ရောက်ရှိလာကြ၍ အားပေးတိုက်တွန်းခံခဲ့ကြရပြီး သူတို့၏ဓမ္မအမှုကို အပြည့်အဝထမ်းဆောင်ခဲ့ကြသည်။ ယင်းကို ခရစ်ယာန်ဂရိကျမ်းစာထဲတွင် ကောင်းစွာမှတ်တမ်းတင်ထားပါသည်။—တမန်တော် ၁၀:၂၁၊ ၂၂; ၁၃:၄၆၊ ၄၇; ၂ တိမောသေ ၁:၁၃; ၄:၅; ဟေဗြဲ ၆:၁-၃; ၂ ပေတရု ၃:၁၇၊ ၁၈။
၅။ ယနေ့ ဘုရားသခင့်အဖွဲ့အစည်းသည် အဘယ်ကြောင့် တိုးတက်နေသနည်း၊ ကျွန်ုပ်တို့သည် အဘယ်ကြောင့် ယင်းနှင့်ရင်ပေါင်တန်း လျှောက်လှမ်းနေသင့်သနည်း။
၅ အစောပိုင်းခရစ်ယာန်များကဲ့သို့ မျက်မှောက်ခေတ် ယေဟောဝါသက်သေများသည် သေးငယ်သည့်အစပြုမှုမှ တိုးပွားများပြားလာခဲ့ကြသည်။ (ဇာခရိ ၄:၈-၁၀) ၁၉ ရာစုနှောင်းပိုင်းမှစ၍ ယေဟောဝါ၏ဝိညာဉ်တော်သည် ကိုယ်တော့်အဖွဲ့အစည်းအပေါ်တွင်ရှိကြောင်း ထင်ရှားခဲ့သည်။ ကျွန်ုပ်တို့သည် လူ့အစွမ်းကိုမဟုတ်ဘဲ သန့်ရှင်းသောဝိညာဉ်တော်လမ်းညွှန်မှုကို အားထားခဲ့ကြသောကြောင့် ကျမ်းစာကိုပိုနားလည်လာပြီး ဘုရားသခင်အလိုတော်ဆောင်ရွက်ရာ၌လည်း ဆက်လက်တိုးတက်လာခဲ့ကြသည်။ (ဇာခရိ ၄:၆) ယခုအခါ ကျွန်ုပ်တို့သည် “နောက်ဆုံးကာလ” တွင်ရှိနေကြရာ ယေဟောဝါ၏တိုးတက်နေသောအဖွဲ့အစည်းနှင့် ရင်ပေါင်တန်းလျှောက်လှမ်းနေရန် အရေးကြီးသည်။ (၂ တိမောသေ ၃:၁-၅) ဤသို့လုပ်ဆောင်ခြင်းက ကျွန်ုပ်တို့၏မျှော်လင့်ချက်ကို ရှင်သန်နေစေပြီး ဤအစီအစဉ်စနစ်အဆုံးမတိုင်မီ တည်ထောင်ပြီးဖြစ်သော ဘုရားသခင့်နိုင်ငံတော်အကြောင်း သက်သေခံစေရန် စွမ်းဆောင်စေနိုင်မည်ဖြစ်သည်။—မဿဲ ၂၄:၃-၁၄။
၆၊ ၇။ ယေဟောဝါ၏အဖွဲ့အစည်း တိုးတက်နေသည့် အဘယ်ကဏ္ဍသုံးခုကို ကျွန်ုပ်တို့သုံးသပ်မည်နည်း။
၆ ကျွန်ုပ်တို့အုပ်စုထဲတွင် ၁၉၂၀၊ ၃၀၊ ၄၀ ပြည့်လွန်နှစ်များကတည်းက ယေဟောဝါ၏အဖွဲ့အစည်းနှင့် စတင်ပူးပေါင်းလာခဲ့ကြသူများ ပါဝင်ကြသည်။ ထိုအစောပိုင်းနှစ်များအတွင်း ကျွန်ုပ်တို့ထဲမှ မည်သူက အဖွဲ့အစည်းသည် ယနေ့အချိန်တိုင်အောင် ကြီးထွားလာမည်၊ အဆင့်ဆင့်တိုးတက်လာမည်ကို မျှော်လင့်ခဲ့ပါသနည်း။ မျက်မှောက်ခေတ်သမိုင်းတွင် ဖြစ်ပျက်တွေ့ကြုံခဲ့ကြရသည့် ထူးခြားသောအဖြစ်အပျက်များကို စဉ်းစားကြည့်ပါ! သီအိုကရက်တစ်နည်းလမ်းအရဖွဲ့စည်းထားသော မိမိလူမျိုးတော်အားဖြင့် ယေဟောဝါ၏ပြီးမြောက်အောင်မြင်မှုများကို စဉ်းစားဆင်ခြင်သုံးသပ်ခြင်းသည် ဝိညာဉ်ရေးဆုကျေးဇူးရရှိစေပါသည်။
၇ ရှေးခေတ်ကဒါဝိဒ်သည် ယေဟောဝါ၏အံ့သြဖွယ်ရာအမှုများကို စေ့စေ့စဉ်းစားဆင်ခြင်ပြီးသောအခါ အမှန်ပင်စွဲမှတ်သွားခဲ့သည်။ သူက ဤသို့ဆိုခဲ့သည်– “အကျွန်ုပ်၏ဘုရားသခင်ထာဝရဘုရား၊ အကျွန်ုပ်အဖို့ပြုတော်မူသော အံ့သြဖွယ်အမှုတို့နှင့် ကြံစည်တော်မူသောအကြံအစည်တို့သည် များလှပါ၏။ ရှေ့တော်၌ အစဉ်အတိုင်း လျှောက်၍မကုန်နိုင်ပါ။ အကျွန်ုပ်ထုတ်ဖော်ကြားပြောမည်ဟုဆိုသော်၊ ရေတွက်၍မကုန်နိုင်အောင် များလှပါ၏။” (ဆာလံ ၄၀:၅) ကျွန်ုပ်တို့သည် ထပ်တူကန့်သတ်မှုကို ရင်ဆိုင်ကြရာ ကျွန်ုပ်တို့ခေတ်တွင် ယေဟောဝါ၏ကြီးကျယ်ခမ်းနားပြီး ချီးမွမ်းထိုက်သည့်ပြီးမြောက်အောင်မြင်မှုများစွာကို မဖော်ပြနိုင်ဘဲဖြစ်နေကြ၏။ သို့ရာတွင် ယေဟောဝါ၏အဖွဲ့အစည်း တိုးတက်ခဲ့သည့် ကဏ္ဍသုံးခု (၁) အဆင့်ဆင့်တိုးတက်လာသောဝိညာဉ်ရေးထွန်းလင်းမှု၊ (၂) ပိုမိုတိုးတက်ပြီးကျယ်ပြန့်လာသည့် [ခရစ်ယာန်] ဓမ္မအမှုနှင့် (၃) အဖွဲ့အစည်းဆိုင်ရာလုပ်ထုံးလုပ်နည်းများကို အခန့်သင့် ပြုပြင်ပြောင်းလဲမှုတို့ကို သုံးသပ်ကြည့်ကြစို့။
ဝိညာဉ်ရေးထွန်းလင်းမှုအတွက် ကျေးဇူးတင်
၈။ နယပုံပြင် ၄:၁၈ နှင့်အညီ ဘုရားသခင့်နိုင်ငံတော်နှင့်စပ်လျဉ်း၍ ပိုင်းခြားသိမြင်စေရန် အဘယ်ဝိညာဉ်ရေးထွန်းလင်းမှုက ထောက်ကူသနည်း။
၈ တိုးတက်နေသော ဝိညာဉ်ရေးထွန်းလင်းမှုနှင့်စပ်လျဉ်း၍ နယပုံပြင် ၄:၁၈ သည်မှန်ကန်ကြောင်းသက်သေထူခဲ့ပြီ။ ယင်းကဤသို့ဆိုသည်– “ဖြောင့်မတ်သောသူတို့၏လမ်းသည် တက်သောအရုဏ်ကဲ့သို့ဖြစ်၍ နေထွက်သည်တိုင်အောင် တိုးပွားထွန်းလင်းတတ်၏။” တိုးပွားနေသောဝိညာဉ်ရေးထွန်းလင်းမှုကို ကျွန်ုပ်တို့ကြုံတွေ့ရခြင်းအတွက် မည်မျှကျေးဇူးတင်စရာပါတကား! ၁၉၁၉ ခုနှစ် စီဒါပွိုင့်၊ အိုဟိုင်အိုတွင်ကျင်းပခဲ့သော စည်းဝေးကြီး၌ ဘုရားသခင့်နိုင်ငံတော်အကြောင်း ပေါ်လွင်ခဲ့သည်။ ယေဟောဝါသည် မိမိ၏နာမတော် သန့်ရှင်းမြင့်မြတ်စေရန်နှင့် မိမိ၏ပိုင်သအုပ်စိုးမှု သံသယကင်းရှင်းစေရန် ဤနိုင်ငံတော်ကိုအသုံးပြုသည်။ အမှန်ပင်၊ ကိုယ်တော့်သားတော်အုပ်ချုပ်မည့် နိုင်ငံတော်အားဖြင့် ကိုယ်တော်၏နာမတော် သန့်ရှင်းမြင့်မြတ်စေရန် ယေဟောဝါ၏ ရည်ရွယ်ချက်ကို အတိအလင်းဖော်ပြပေးသော ကျမ်းစာ၊ ကမ္ဘာဦးမှ ဗျာဒိတ်ကျမ်းအထိ ပိုင်းခြားသိမြင်စေရန် ကျွန်ုပ်တို့ကိုကူညီပေးခဲ့ပြီ။ ၎င်းတွင် ဖြောင့်မတ်ခြင်းကိုချစ်မြတ်နိုးသူအားလုံးအတွက် ဘုန်းကျက်သရေရှိသောမျှော်လင့်ချက် ပါရှိသည်။—မဿဲ ၁၂:၁၈၊ ၂၁။
၉၊ ၁၀။ ၁၉၂၀ ပြည့်လွန်နှစ်များတွင် ဘုရားသခင့်နိုင်ငံတော်၊ ဆန့်ကျင်ဘက်ဖြစ်သောအဖွဲ့အစည်းနှစ်ခုနှင့်ပတ်သက်၍ အဘယ်အရာသိရှိရသနည်း၊ ယင်းသည် မည်သို့အထောက်အကူပြုသနည်း။
၉ ၁၉၂၂ ခုနှစ်၊ စီဒါပွိုင့်စည်းဝေးကြီးတွင် အဓိကဟောပြောသူ ညီအစ်ကိုရပ်သဖော့ဒ်က “ဘုရင်နှင့် သူ၏နိုင်ငံတော်ကို ကြေညာကြ၊ ကြေညာကြ၊ ကြေညာကြ” ဟူ၍ ဘုရားသခင့်လူမျိုးတော်ကို တိုက်တွန်းခဲ့သည်။ မတ်လ ၁၊ ၁၉၂၅ ကင်းမျှော်စင်တွင်ထုတ်ဝေခဲ့သော “နိုင်ငံတော်မွေးဖွားခြင်း” ဆောင်းပါး၌ ၁၉၁၄ ခုနှစ်တွင် ဘုရားသခင့်နိုင်ငံတော် တည်ထောင်မည့်ကိစ္စနှင့်ပတ်သက်သော ပရောဖက်ပြုချက်များကို ဝိညာဉ်ရေးအရ ပိုထိုးထွင်းသိမြင်လာနိုင်ရန် ညီအစ်ကိုအသင်းအပင်းကို အာရုံပြုစေခဲ့သည်။ ၁၉၂၀ ပြည့်လွန်နှစ်များတွင် ယေဟောဝါ၏အဖွဲ့အစည်းနှင့် စာတန်၏အဖွဲ့အစည်းဟူသော ဆန့်ကျင်ဘက်အဖွဲ့နှစ်ဖွဲ့ရှိကြောင်းကိုလည်း ခွဲခြားသိလာခဲ့ကြသည်။ ၎င်းတို့ကြားတွင် တိုက်ပွဲဖြစ်ပွားလျက်ရှိရာ ယေဟောဝါ၏အဖွဲ့အစည်းနှင့် ရင်ပေါင်တန်းလျှောက်လှမ်းနေမှသာလျှင် အောင်မြင်သည့်ဘက်တွင် ရှိနေပါလိမ့်မည်။
၁၀ အဆိုပါဝိညာဉ်ရေးထွန်းလင်းမှုက ကျွန်ုပ်တို့ကို မည်သို့အကူအညီပေးပါသနည်း။ ဘုရားသခင့်နိုင်ငံတော်နှင့် ဘုရင်ယေရှုခရစ်သည် ဤလောကနှင့်မဆိုင်သည့်အတွက် ကျွန်ုပ်တို့လည်း လောကနှင့်မဆိုင်နိုင်ကြပေ။ လောကနှင့်သီးခြားနေခြင်းဖြင့် ကျွန်ုပ်တို့သည် အမှန်တရားဘက်၌ရှိကြောင်းကို ပြသကြပါသည်။ (ယောဟန် ၁၇:၁၆; ၁၈:၃၇) ဤအစီအစဉ်စနစ်ဆိုး၏ ရှုပ်ထွေးပွေလီသောပြဿနာများ တိုးများလာခြင်းကို သတိပြုမိသောအခါ စာတန့်အဖွဲ့အစည်းတွင် ကျွန်ုပ်တို့မပါဝင်သည့်အတွက် တကယ်ကျေးဇူးတင်စရာပင်! ယေဟောဝါ၏အဖွဲ့အစည်းအတွင်း ဝိညာဉ်ရေးလုံခြုံမှုရရှိနေခြင်းသည် မည်မျှအခွင့်ထူးပါတကား!
၁၁။ ၁၉၃၁ ခုနှစ်တွင် ဘုရားသခင့်လူမျိုးတော်သည် ကျမ်းစာဆိုင်ရာ အဘယ်နာမည်ကို ခံယူခဲ့ကြသနည်း။
၁၁ ၁၉၃၁ ခုနှစ် အိုဟိုင်အို၊ ကိုလမ်ဘတ်စ်မြို့ စည်းဝေးကြီးတွင် ဟေရှာယ ၄၃:၁၀-၁၂ ၏သက်ဆိုင်ပုံကို လျော်ကန်စွာရှင်းပြခဲ့သည်။ ကျမ်းစာကျောင်းသားများသည် ယေဟောဝါသက်သေများဟူသော ခွဲခြားသိမှတ်စေသောနာမည်ကို ခံယူခဲ့ကြသည်။ အခြားသူများပါ ကယ်တင်ခံရဖို့အလိုငှာ ဘုရားသခင့်နာမတော်ကို လူသိရှင်ကြားသိရှိစေခွင့်ရခြင်းသည် တကယ်ထူးမြတ်သောအခွင့်အရေးပင်!—ဆာလံ ၈၃:၁၈; ရောမ ၁၀:၁၃။
၁၂။ ၁၉၃၅ ခုနှစ်တွင် ကြီးစွာသောလူအုပ်ကြီးနှင့်ပတ်သက်သော အဘယ်ဝိညာဉ်ရေးထွန်းလင်းမှုကို ပေးခဲ့သနည်း။
၁၂ ၁၉၃၀ ပြည့်လွန်နှစ်များမတိုင်မီက ယေဟောဝါ၏လူမျိုးများစွာသည် ၎င်းတို့၏အနာဂတ်အသက်တာမျှော်လင့်ချက်နှင့်ပတ်သက်၍ မသေမချာဖြစ်ခဲ့ကြသည်။ အချို့က ကောင်းကင်အသက်တာကို တွေးတောခဲ့ကြသော်လည်း မြေကြီးပရဒိသုနှင့်ပတ်သက်သော ကျမ်းစာသွန်သင်ချက်များကို စိတ်ဝင်စားခဲ့ကြသည်။ ၁၉၃၅ ခုနှစ် ဝါရှင်တန်၊ ဒီ.စီ. စည်းဝေးကြီးတွင် ကြားသိရသော စိတ်လှုပ်ရှားစရာသတင်းမှာ ဗျာဒိတ်ကျမ်းအခန်းကြီး ၇ ပါမြောက်မြားစွာသောလူများ၊ သို့မဟုတ် လူအုပ်ကြီးသည် မြေကြီးမျှော်လင့်ချက်ရှိသော မြေကြီးအတန်းအစားဖြစ်သည်ဆိုသောအချက်ပင်။ ထိုအချိန်ကတည်းက လူအုပ်ကြီးသည် အကြီးအကျယ်စုသိမ်းခံနေရ၏။ လူအုပ်ကြီးသည် မည်သူမည်ဝါဖြစ်ကြောင်း ကျွန်ုပ်တို့အတွက် နက်နဲရာမဟုတ်သောကြောင့် တကယ်ကျေးဇူးတင်စရာမဟုတ်ပေလော။ လူအမျိုးအနွယ်ခပ်သိမ်းမှ ဘာသာစကားအမျိုးမျိုးပြောသော လူများကို အကြီးအကျယ်စုသိမ်းနေသည့် အဖြစ်မှန်က ယေဟောဝါ၏အဖွဲ့အစည်းနှင့် ရင်ပေါင်တန်းလိုက်လျှောက်နေဖို့ ကျွန်ုပ်တို့၏ခြေလှမ်းကို ပိုမြန်စေရန် လှုံ့ဆော်ပေးပါသည်။
၁၃။ ၁၉၄၁ ခုနှစ် စိန့်လူးဝစ္စတွင်ကျင်းပသော စည်းဝေးကြီး၌ အဘယ်အရေးကိစ္စကြီးတစ်ခုကို ပေါ်လွင်စေခဲ့သနည်း။
၁၃ ၁၉၄၁ ခုနှစ်၊ မစ်ဆူရီပြည်နယ် စိန့်လူးဝစ္စမြို့တွင်ကျင်းပခဲ့သော စည်းဝေးကြီး၌ လူ့အဖွဲ့အစည်း အာရုံစိုက်သင့်သော အရေးကိစ္စကြီးတစ်ခုကို ပေါ်လွင်စေခဲ့သည်။ စကြဝဠာအုပ်စိုးမှု သို့မဟုတ် ပိုင်သအုပ်ချုပ်မှု အရေးကိစ္စတည်း။ ဤအရေးကိစ္စကို မကြာမီဖြေရှင်းရတော့မည်ဖြစ်ပြီး ယင်းကိုဖြေရှင်းဖို့ ကြောက်မက်ဖွယ်ရာနေ့ကြီးသည် အလျင်အမြန်ရောက်လာမည်ဖြစ်သည်! ၁၉၄၁ ခုနှစ်တွင် ဘုရားသခင့်ပိုင်သအုပ်စိုးမှုနှင့်ပတ်သက်ပြီး ကျွန်ုပ်တို့တစ်ဦးချင်းစီ မည်သည့်အနေအထားရှိကြောင်းကို ဖော်ပြခွင့်ပေးသော သမာဓိစောင့်သိမှု အရေးကိစ္စကိုလည်း ပေါ်လွင်စေခဲ့သည်။
၁၄။ ၁၉၅၀ ပြည့်နှစ်အပြည်ပြည်ဆိုင်ရာ စည်းဝေးကြီးတွင် ဟေရှာယ ၃၂:၁၊ ၂ တွင်ဖော်ပြထားသော မင်းသားများနှင့်ပတ်သက်၍ အဘယ်အရာသိရှိရသနည်း။
၁၄ ၁၉၅၀ ပြည့်နှစ်၊ နယူးယောက်မြို့တွင်ကျင်းပသော အပြည်ပြည်ဆိုင်ရာစည်းဝေးကြီး၌မူ ဆာလံ ၄၅:၁၆ ပါ မင်းသားမှူးမတ်များကို တိတိကျကျခွဲခြားသိမြင်စေခဲ့သည်။ ညီအစ်ကို ဖရက်ဒရစ်ခ် ဖရန့်ဇ်က ယင်းအကြောင်းနှင့် မြေကြီးသစ်ဆိုင်ရာမင်းသားမှူးမတ်များသည် ကျွန်ုပ်တို့အလယ်တွင်ရှိကြောင်း ရှင်းပြသောအခါ အမှန်ပင်စိတ်တက်ကြွခဲ့ကြသည်။ ထိုစည်းဝေးကြီးနှင့် နောက်ပိုင်းကျင်းပသောစည်းဝေးများတွင် ဝိညာဉ်ရေးအလင်း အကြီးအကျယ်ထွန်းလင်းခဲ့သည်။ (ဆာလံ ၉၇:၁၁) ကျွန်ုပ်တို့၏လမ်းသည် “တက်သောအရုဏ်ကဲ့သို့ဖြစ်၍ နေထွက်သည်တိုင်အောင် တိုးပွားထွန်းလင်း” နေသည်ဖြစ်ရာ မည်မျှကျေးဇူးတင်စရာပါတကား!
ကျွန်ုပ်တို့၏ခရစ်ယာန်ဓမ္မအမှုတွင် တိုးပွားခြင်း
၁၅၊ ၁၆။ (က) ၁၉၂၀ နှင့် ၁၉၃၀ ပြည့်လွန်နှစ်များအတွင်း ကျွန်ုပ်တို့၏ခရစ်ယာန်ဓမ္မအမှုတွင် ကျွန်ုပ်တို့မည်သို့ရှေ့ကိုတိုးတက်ခဲ့သနည်း။ (ခ) မကြာသေးမီ ဆယ်စုနှစ်များ၌ အဘယ်စာအုပ်စာတမ်းများသည် ခရစ်ယာန်ဓမ္မအမှုအတွက် တွန်းအားပေးမှုဖြစ်ခဲ့သနည်း။
၁၅ ယေဟောဝါ၏အဖွဲ့အစည်းတိုးတက်ခဲ့သော ဒုတိယနည်းမှာ ကျွန်ုပ်တို့၏အဓိကလုပ်ငန်းဖြစ်သော နိုင်ငံတော်သတင်းဟောပြောခြင်း၊ တပည့်ဖြစ်စေခြင်းနှင့် ပတ်သက်သည်။ (မဿဲ ၂၈:၁၉၊ ၂၀; မာကု ၁၃:၁၀) ဤလုပ်ငန်းပြီးမြောက်အောင်မြင်ရန်အတွက် အဖွဲ့အစည်းသည် ကျွန်ုပ်တို့၏ခရစ်ယာန်ဓမ္မအမှုကိုတိုးချဲ့ဖို့ အရေးကြီးကြောင်း ကျွန်ုပ်တို့အား အမြဲသတိပေးခဲ့သည်။ ၁၉၂၂ ခုနှစ်တွင် ခရစ်ယာန်တိုင်း ဟောပြောခြင်းလုပ်ငန်းတွင် ပါဝင်ကြရန် တိုက်တွန်းခံခဲ့ကြရသည်။ တစ်ဦးစီအနေနှင့် အလင်းကိုထွန်းလင်းဖို့တာဝန်ရှိပြီး ယင်းသို့အားဖြင့် အမှန်တရားကိုသက်သေခံခြင်းတွင် ကိုယ်တိုင်ကိုယ်ကျပါဝင်ကြဖို့ဖြစ်သည်။ (မဿဲ ၅:၁၄-၁၆) တနင်္ဂနွေနေ့ကို လယ်ကွင်းနေ့အဖြစ်သတ်မှတ်ရန် ၁၉၂၇ ခုနှစ်တွင် စီစဉ်ခဲ့ကြသည်။ ၁၉၄၀ ဖေဖော်ဝါရီလမှစ၍ စီးပွားရေးရပ်ကွက်လမ်းများပေါ်တွင် ကင်းမျှော်စင်နှင့် နှစ်သိမ့်မှု (ယခု နိုးလော့!) စာစောင်များကိုဝေငှသက်သေခံခြင်းသည် ပုံမှန်ဖြစ်လာခဲ့သည်။
၁၆ ၁၉၃၇ ခုနှစ်တွင် စံပြသင်အံမှုစာအုပ်ငယ်ကိုထုတ်ဝေခဲ့ပြီး အခြားသူများအား ကျမ်းစာသမ္မာတရားသင်ပေးရန်အလို့ငှာ ပြန်လည်ပတ်မှုများလုပ်ဖို့လိုကြောင်း အလေးပေးဖော်ပြခဲ့သည်။ ယင်းနှစ်များနောက်ပိုင်းတွင် ကျမ်းစာသင်အံမှုလုပ်ငန်းကို အကြီးအကျယ်အလေးပေးဖော်ပြခဲ့သည်။ ၁၉၄၆ ခုနှစ်တွင် “ဘုရားသခင်သစ္စာတော်တည်စေသတည်း” စာအုပ်နှင့် ၁၉၆၈ ခုနှစ်တွင် ထာဝရအသက်သို့ပို့ဆောင်သော သမ္မာတရားစာအုပ်များကို ထုတ်ဝေပေးခဲ့ရာ ခရစ်ယာန်ဓမ္မအမှု၏ ဤကဏ္ဍအတွက် တွန်းအားရလာခဲ့သည်။ လောလောဆယ်တွင် ထာဝရအသက်ကိုရစေသောအသိပညာစာအုပ်ကို ကျွန်ုပ်တို့အသုံးပြုနေကြပါသည်။ ထိုတွင်ပါသောအကြောင်းအရာများသည် တပည့်ဖြစ်စေခြင်းအတွက် ကျမ်းစာဆိုင်ရာအုတ်မြစ်ကောင်းချပေးပါသည်။
အဖွဲ့အစည်းဆိုင်ရာ ပြုပြင်ပြောင်းလဲချက်များနှင့်အတူ တိုးတက်ခြင်း
၁၇။ ဟေရှာယ ၆၀:၁၇ နှင့်အညီ ယေဟောဝါ၏အဖွဲ့အစည်းသည် မည်သို့ရှေ့ကိုတိုးခဲ့ပြီနည်း။
၁၇ ယေဟောဝါ၏အဖွဲ့အစည်းတိုးတက်မှု တတိယကဏ္ဍကား အဖွဲ့အစည်းဆိုင်ရာ ပြုပြင်ပြောင်းလဲချက်များနှင့် သက်ဆိုင်ပါသည်။ ဟေရှာယ ၆၀:၁၇ အရ ယေဟောဝါ ဤသို့ကတိပြုထားသည်– “ကြေးဝါအရာ၌ရွှေကိုလည်းကောင်း၊ သံအရာ၌ ငွေကိုလည်းကောင်း၊ သစ်သားအရာ၌ ကြေးဝါကိုလည်းကောင်း၊ ကျောက်အရာ၌ သံကိုလည်းကောင်း ငါဆောင်ခဲ့မည်။ သင်၏အရာရှိတို့ကို ငြိမ်သက်သောသဘော၊ အခွန်ခံတို့ကို ဖြောင့်မတ်သောသဘောနှင့်ပြည့်စုံစေမည်။” ဤပရောဖက်ပြုချက်နှင့်အညီ ဘုရားသခင့်နိုင်ငံတော်ဟောပြောခြင်းလုပ်ငန်းနှင့် သိုးတော်စုထိန်းကျောင်းခြင်းကို ပို၍ကောင်းစွာကြီးကြပ်ဖို့ စီစဉ်ခဲ့ကြသည်။
၁၈၊ ၁၉။ နှစ်များတစ်လျှောက် အဖွဲ့အစည်းဆိုင်ရာ အဘယ်ပြုပြင်ပြောင်းလဲမှုများရှိခဲ့သနည်း။
၁၈ ၁၉၁၉ ခုနှစ်တွင် လယ်ကွင်းလုပ်ငန်းကိုကြီးကြပ်ကွပ်ကဲရန် အသင်းတော်တစ်ခုစီအတွက် လုပ်ငန်းတော်ဒါရိုက်တာတစ်ယောက်ကို ခန့်အပ်ခဲ့သည်။ ယင်းက လယ်ကွင်းတွင် ကျွန်ုပ်တို့၏ခရစ်ယာန်ဓမ္မအမှုအတွက် တွန်းအားပေးမှုဖြစ်ခဲ့သည်။ ၁၉၃၂ ခုနှစ်တွင် အကြီးအကဲများနှင့် သင်းထောက်များကို မဲစနစ်ဖြင့်ရွေးကောက်ခြင်းအား ရပ်ဆိုင်းလိုက်ကာ ဒီမိုကရက်တစ်နည်းလမ်းများမှ ခွဲထွက်ခြင်းကိုမှတ်သားသည့်နှစ်ဖြစ်သည်။ အသင်းတော်အမှုထမ်းအားလုံးကို အသင်းမက စတင်ခန့်အပ်ခဲ့သော ၁၉၃၈ ခုနှစ်တွင် နောက်ထပ်သမိုင်းမှတ်တိုင်တစ်ခုစိုက်ထူခဲ့ရာ အစောပိုင်းခရစ်ယာန်အသင်းတော်ရှိ သီအိုကရက်တစ်ခန့်အပ်မှုအစီအစဉ်များနှင့် ပိုပြီးစေ့စေ့စပ်စပ်ကိုက်ညီလာသည်။ (တမန်တော် ၁၄:၂၃; ၁ တိမောသေ ၄:၁၄) ၁၉၇၂ ခုနှစ်တွင် ကြီးကြပ်မှူးများနှင့် ဓမ္မအမှုထမ်းများကို အစောပိုင်းခရစ်ယာန်များအလယ်ရှိ အမျိုးသားများကဲ့သို့ အမှုထမ်းရန် ခန့်အပ်ခံခဲ့ကြရသည်။ အသင်းတော်တစ်ခုတွင် ကြီးကြပ်မှူးတစ်ဦးတည်း အမှုထမ်းမည့်အစား ကြီးကြပ်မှူးများအတွက် ကျမ်းစာတောင်းဆိုချက်များကို ပြည့်မီသူများသည် အကြီးအကဲအဖွဲ့ဖြစ်ကြောင်း ဖိလိပ္ပိ ၁:၁၊ ၂ နှင့်အတူ အခြားကျမ်းချက်များက ဖော်ပြသည်။—တမန်တော် ၂၀:၂၈; ဧဖက် ၄:၁၁၊ ၁၂။
၁၉ ၁၉၇၅ ခုနှစ်တွင် ဘုရားသခင့်အဖွဲ့အစည်း၏ ကမ္ဘာချီလုပ်ငန်းဆောင်တာများကို အုပ်ချုပ်ရေးအဖွဲ့ကော်မတီများက ကြီးကြပ်ရန် အစီအစဉ်တစ်ခုစတင်ခဲ့သည်။ နယ်မြေဒေသအသီးသီးရှိ လုပ်ငန်းကိုကြီးကြပ်ဖို့ ဌာနခွဲကော်မတီများကို ခန့်အပ်ခဲ့သည်။ ထိုအချိန်ကတည်းက “သာ၍အရေးကြီးသောအရာများကို . . . သေချာစွာသိ” နိုင်ရန်အတွက် ကင်းမျှော်စင်ဌာနချုပ်နှင့် ဌာနခွဲများတွင် အလုပ်များကို ပိုလွယ်ကူစေရန် ဂရုတစိုက်စီစဉ်ခဲ့ကြသည်။ (ဖိလိပ္ပိ ၁:၉၊ ၁၀၊ ကဘ) ခရစ်တော်၏ လက်ထောက်သိုးထိန်းများထမ်းရသော တာဝန်များတွင် ဧဝံဂေလိလုပ်ငန်းကို ဦးဆောင်ခြင်း၊ အသင်းတော်တွင် သင်ကြားပေးခြင်းနှင့် ဘုရားသခင့်သိုးတော်စုကို ကောင်းစွာထိန်းကျောင်းပေးခြင်း ပါဝင်သည်။—၁ တိမောသေ ၄:၁၆; ဟေဗြဲ ၁၃:၇၊ ၁၇; ၁ ပေတရု ၅:၂၊ ၃။
ယေရှု၏တက်ကြွသောဦးဆောင်မှု
၂၀။ ယေဟောဝါ၏အဖွဲ့အစည်းနှင့်အတူ ရင်ပေါင်တန်းလျှောက်လှမ်းနေရန် ယေရှု၏အနေအထားနှင့်ပတ်သက်၍ အဘယ်အရာကို ကျွန်ုပ်တို့အသိအမှတ်ပြုရန် လိုသနည်း။
၂၀ ယေဟောဝါ၏တိုးတက်နေသောအဖွဲ့အစည်းနှင့်အတူ ရင်ပေါင်တန်းလျှောက်လှမ်းနေဖို့ ‘အသင်းတော်၏ဦးခေါင်း’ အဖြစ် ယေရှုခရစ်၏ ဘုရားသခင်ပေးအခန်းကဏ္ဍကို ကျွန်ုပ်တို့ အသိအမှတ်ပြုဖို့လိုပါသည်။ (ဧဖက် ၅:၂၂၊ ၂၃) ဟေရှာယ ၅၅:၄ ကိုလည်းသတိပြုထိုက်ရာ၊ ယင်းတွင်ကျွန်ုပ်တို့အား ဤသို့ဆိုထားသည်– “ကြည့်ရှုလော့။ ထိုသူကို . . . ဆရာဖြစ်စေခြင်းငှာလည်းကောင်း၊ စီရင်အုပ်စိုးသောအရှင်ဖြစ်စေခြင်းငှာလည်းကောင်း လူမျိုးတို့အားငါ [ယေဟောဝါ] ပေးပြီ။” မည်သို့ဦးဆောင်ရမည်ကို ယေရှုအသေအချာသိထား၏။ ကိုယ်တော်သည် သူ၏သိုးများနှင့် သူတို့၏ဆောင်ရွက်ချက်များကိုလည်းသိ၏။ အာရှမိုင်းနားရှိ အသင်းတော်ခုနစ်ခုကို ကိုယ်တော်စစ်ဆေးသောအခါ ငါးကြိမ် ဤသို့ဆိုခဲ့သည်– “သင်အကျင့်ကျင့်ခြင်း . . . ကိုငါသိ၏။” (ဗျာဒိတ် ၂:၁၊ ၁၉; ၃:၁၊ ၈၊ ၁၅) ယေရှုသည်လည်း ခမည်းတော်ယေဟောဝါကဲ့သို့ ကျွန်ုပ်တို့၏လိုအပ်ရာများကိုသိပါသည်။ စံပြုဆုတောင်းချက်ကို မဖော်ပြမီ ယေရှုဤသို့ပြောခဲ့သည်– “သင်တို့အလိုရှိသမျှတို့ကို သင်တို့မတောင်းမီ သင်တို့အဘသိတော်မူ၏။”—မဿဲ ၆:၈-၁၃။
၂၁။ ခရစ်ယာန်အသင်းတော်တွင် ယေရှု၏ဦးဆောင်မှု မည်သို့ထင်ရှားသနည်း။
၂၁ ယေရှုဦးဆောင်နေကြောင်း မည်သို့ထင်ရှားသနည်း။ တစ်နည်းမှာ “လူ့အသွင်ဆုလာဘ်များ” ဖြစ်သော ခရစ်ယာန်ကြီးကြပ်မှူးများအားဖြင့် ဖြစ်သည်။ (ဧဖက် ၄:၈၊ ကဘ) ဘိသိက်ခံကြီးကြပ်မှူးများသည် ခရစ်တော်၏လက်ယာလက်၊ ကိုယ်တော်၏ထိန်းချုပ်မှုအောက်တွင်ရှိကြောင်း ဗျာဒိတ် ၁:၁၆ ကဖော်ပြသည်။ ယနေ့ အဆိုပါအမျိုးသားများသည် ကောင်းကင်ဆိုင်ရာမျှော်လင့်ချက်ရှိသည်ဖြစ်စေ၊ မြေကြီးဆိုင်ရာမျှော်လင့်ချက်ရှိသည်ဖြစ်စေ အကြီးအကဲများအတွက်အစီအစဉ်ကို ယေရှုညွှန်ကြားလျက်ရှိသည်။ ရှေ့ဆောင်းပါးတွင် ရှင်းပြထားသကဲ့သို့ သူတို့သည် ကျမ်းစာတောင်းဆိုချက်များနှင့်အညီ သန့်ရှင်းသောဝိညာဉ်တော်၏ခန့်အပ်ခြင်းကို ခံရကြသည်။ (၁ တိမောသေ ၃:၁-၇; တိတု ၁:၅-၉) ပထမရာစုတွင် ယေရုရှလင်မြို့ရှိ အသက်ကြီးသူအုပ်စုကို အသင်းတော်များနှင့် ယေဘုယျအားဖြင့် ဘုရားသခင့်နိုင်ငံတော်ဟောပြောခြင်းလုပ်ငန်းကိုကြီးကြပ်သည့် အုပ်ချုပ်ရေးအဖွဲ့တစ်ဖွဲ့အဖြစ် ဖွဲ့စည်းခဲ့သည်။ ယနေ့ ယေဟောဝါ၏အဖွဲ့အစည်းသည် ထပ်တူပုံစံကိုလိုက်လျှောက်ပါသည်။
ရင်ပေါင်တန်းလျှောက်လှမ်းနေလော့!
၂၂။ အုပ်ချုပ်ရေးအဖွဲ့သည် အဘယ်အကူအညီကို ပြင်ဆင်ပေးသနည်း။
၂၂ မြေကြီးပေါ် ဘုရားသခင့်နိုင်ငံတော်အကျိုးစီးပွားသည် ယေဟောဝါသက်သေများ၏ အုပ်ချုပ်ရေးအဖွဲ့ကိုယ်စားပြုသော ‘သစ္စာနှင့်သတိပညာရှိသောကျွန်’ ကိုအပ်နှင်းထားပါသည်။ (မဿဲ ၂၄:၄၅-၄၇) အုပ်ချုပ်ရေးအဖွဲ့သည် ခရစ်ယာန်အသင်းတော်အတွက် ဝိညာဉ်ရေးသွန်သင်မှုနှင့် ညွှန်ကြားမှုပေးခြင်းကို အဓိကအလေးထားခဲ့သည်။ (တမန်တော် ၆:၁-၆) သို့ရာတွင် သဘာဝဘေးဒဏ်များကို ဝတ်ပြုသူချင်းများကြုံရသောအခါ အုပ်ချုပ်ရေးအဖွဲ့သည် ကယ်ဆယ်ရေးဆောင်ရွက်ရန်နှင့် ပျက်စီးသွားသောအိမ်များ၊ ဘုရားသခင်နိုင်ငံတော်ခန်းမများကိုပြုပြင်ဆောက်လုပ်ပေးရန် တရားဝင်အသုံးခံကိရိယာတစ်ခု သို့မဟုတ် ထိုထက်မကကို တောင်းဆိုသည်။ တစ်စုံတစ်ရာသောခရစ်ယာန်များသည် ကြမ်းတမ်းခက်ထန်စွာပြုမူခံရလျှင် သို့မဟုတ် နှိပ်စက်ညှဉ်းပန်းခံရလျှင် သူတို့ကိုဝိညာဉ်ရေးအရ တည်ဆောက်ပေးရန် စီစဉ်ကြသည်။ သို့နှင့် ‘ခဲယဉ်းကျပ်တည်းသောကာလ၌’ ဟောပြောခြင်းလုပ်ငန်းဆက်လက်တိုးတက်နေရန် အဘက်ဘက်မှကြိုးစားကြသည်။—၂ တိမောသေ ၄:၁၊ ၂။
၂၃၊ ၂၄။ မိမိလူမျိုးတော်အပေါ် မည်သည့်အခြေအနေမဆိုကျရောက်ပါစေ အဘယ်အရာကို ယေဟောဝါအဆက်မပြတ်ပြင်ဆင်ပေးသနည်း၊ ကျွန်ုပ်တို့၏သန္နိဋ္ဌာန်ကား မည်သို့ဖြစ်သင့်သနည်း။
၂၃ ကိုယ်တော်၏လူမျိုးအပေါ် မည်သည့်အခြေအနေမျိုးမဆိုကျရောက်ပါစေ ယေဟောဝါသည် ဝိညာဉ်ရေးအစာနှင့် လိုအပ်သောညွှန်ကြားမှုကို အဆက်မပြတ်စီစဉ်ပေးလျက်ရှိသည်။ သီအိုကရက်တစ်အဖွဲ့အစည်းတွင် နောက်ထပ်တိုးတက်မှုနှင့် ပြုပြင်ပြောင်းလဲမှုများကိုပြင်ဆင်ပေးရန် တာဝန်ရှိညီအစ်ကိုများကို ပိုင်းခြားသိမြင်မှုနှင့် ထိုးထွင်းမှုများကိုလည်း ယေဟောဝါပေးပါသည်။ (တရားဟောရာ ၃၄:၉; ဧဖက် ၁:၁၆၊ ၁၇) ကျွန်ုပ်တို့၏တပည့်ဖြစ်စေခြင်းတာဝန်ကို ကျေပြွန်ဖို့နှင့် ကမ္ဘာချီခရစ်ယာန်ဓမ္မအမှုကိုပြီးမြောက်စေရန် ယေဟောဝါမပျက်မကွက်စီစဉ်ပေးပါသည်။—၂ တိမောသေ ၄:၅။
၂၄ ယေဟောဝါသည် မိမိ၏သစ္စာရှိလူမျိုးတော်ကို ဘယ်တော့မျှစွန့်ပစ်မည်မဟုတ်ကြောင်း ကျွန်ုပ်တို့အကြွင်းမဲ့စိတ်ချကြပါသည်; ကိုယ်တော်သည် လာမည့် “ကြီးစွာသော [ဆင်းရဲခြင်း]” မှ သူတို့ကိုကယ်နုတ်ပါလိမ့်မည်။ (ဗျာဒိတ် ၇:၉-၁၄; ဆာလံ ၉၄:၁၄; ၂ ပေတရု ၂:၉) ကနဦးက ကျွန်ုပ်တို့၌ရှိခဲ့သော ယုံကြည်စိတ်ချမှုကို အဆုံးထိဆက်ရှိစေဖို့ အကြောင်းခိုင်လုံပါသည်။ (ဟေဗြဲ ၃:၁၄) ထို့ကြောင့် ယေဟောဝါ၏အဖွဲ့အစည်းနှင့်တူ ရင်ပေါင်တန်းလျှောက်လှမ်းနေဖို့ စိတ်ပိုင်းဖြတ်ထားကြစို့လေ။
သင်မည်သို့ဖြေဆိုမည်နည်း
• ယေဟောဝါ၏အဖွဲ့အစည်းသည် ရှေ့သို့ဆက်လက်တိုးနေသည်ဟု ကျွန်ုပ်တို့အဘယ်ကြောင့် ဆိုနိုင်သနည်း။
• ဘုရားသခင့်လူမျိုးတော်သည် အဆင့်ဆင့်တိုးတက်နေသောဝိညာဉ်ရေးထွန်းလင်းမှုကို ခံစားလျက်ရှိကြောင်း အဘယ်အထောက်အထားရှိသနည်း။
• ခရစ်ယာန်ဓမ္မအမှုတွင် ပိုမိုတိုးတက်မှုများ မည်သို့ ရှိခဲ့ပြီနည်း။
• ယေဟောဝါ၏ကျေးကျွန်များအလယ်တွင် အဖွဲ့အစည်းဆိုင်ရာလုပ်ထုံးလုပ်နည်းများ၌ အဘယ်အခန့်သင့်ပြုပြင်ပြောင်းလဲမှုများ ပြုခဲ့ပြီနည်း။
[လေ့လာရန်မေးခွန်းများ]
[စာမျက်နှာ ၁၇ ပါ ရုပ်ပုံ]
ဒါဝိဒ်ကဲ့သို့ ယေဟောဝါ၏အံ့ဖွယ်အမှုအားလုံးကို ကျွန်ုပ်တို့မရေတွက်နိုင်ပါ
[စာမျက်နှာ ၁၈ ပါ ရုပ်ပုံ]
ဘုရားသခင့်သိုးတော်စုသည် အဖွဲ့အစည်းဆိုင်ရာလုပ်ထုံးလုပ်နည်းများတွင် အခန့်သင့်ပြုပြင်ပြောင်းလဲမှုများမှ အကျိုးရရှိခဲ့