အထူးကြေညာချက်တစ်ရပ်
အထူးကြေညာချက်တစ်ရပ်
၂၀၀၀၊ အောက်တိုဘာ ၇ ရက်တွင် ပဲင်စီလ်ဘေးနီးယား ကင်းမျှော်စင် သမ္မာကျမ်းစာနှင့် ဝေစာအသင်း၏နှစ်ပတ်လည်အစည်းအဝေးနိဂုံး၌ အထူးကြေညာချက်တစ်ရပ်ကို အုပ်ချုပ်ရေးအဖွဲ့၏ သဘာပတိ ဂျွန် အီး. ဘားရ်က ထုတ်ပြန်ကြေညာခဲ့သည်။ ဤကြေညာချက်သည် ထိုနေ့အစောပိုင်းက သီအိုဒေါရ်ဂျဲရက်စ်နှင့် ဒယ်နီရယ်ဆစ်ဒလစ်ခ်တို့ပေးခဲ့သည့် ဟောပြောချက်များအပေါ် အခြေခံခဲ့သည်။—ဤမဂ္ဂဇင်း၏ စာမျက်နှာ ၁၂-၁၆ နှင့် ၂၈-၃၁ ကိုရှု။
အလွန်အရေးပါသောအချက်တစ်ခုကို ညီအစ်ကိုဘားရ်ကဖော်ပြခဲ့သည်– “‘သစ္စာနှင့်သတိပညာရှိသောကျွန်’ နှင့် ၎င်း၏အုပ်ချုပ်ရေးအဖွဲ့သည် တရားဝင်ကော်ပိုရေးရှင်းများကို ပေးအပ်ထားသည်ထက် ပိုမြင့်မားကာ ပိုမိုအကျုံးဝင်နေသည့် အမှုရေးကိစ္စများကို သူတို့အားအပ်နှင်းခဲ့သည်။ ထိုအဖွဲ့အစည်းတစ်ခုစီ၏ အမိန့်ပြန်တမ်းပါဦးတည်ချက်များသည် မိမိတို့နယ်ပယ်အတွင်း အကန့်အသတ်ရှိသည့် ကိစ္စရပ်များဖြစ်သည်။ သို့ရာတွင် ကျွန်ုပ်တို့၏သခင် ယေရှုခရစ်သည် မိမိ ‘ဥစ္စာ’ ရှိသမျှ သို့မဟုတ် ဤမြေကြီးပေါ်ရှိ နိုင်ငံတော်အကျိုးစီးပွားအားလုံးကို သစ္စာနှင့်သတိပညာရှိသောကျွန်၌ အပ်နှင်းထားသည်။”—မဿဲ ၂၄:၄၅-၄၇။
ပဲင်စီလ်ဘေးနီးယားကော်ပိုရေးရှင်းနှင့်စပ်လျဉ်း၍ ညီအစ်ကိုဘားရ်က ထပ်ဆင့်ဤသို့ပြောခဲ့သည်– “၁၈၈၄ တွင် ယင်းကိုဖွဲ့စည်းခဲ့ချိန်မှစ၍ ပဲင်စီလ်ဘေးနီးယား ကင်းမျှော်စင် သမ္မာကျမ်းစာနှင့် ဝေစာအသင်းသည် မျက်မှောက်ခေတ်သမိုင်းတွင် အရေးပါသောကဏ္ဍတစ်ခုမှ ပါဝင်ခဲ့ပေပြီ။ ၎င်းသည် တရားဝင်အဖွဲ့အစည်းတစ်ခုမျှသာဖြစ်သော်လည်း ယင်းကိုလိုအပ်သည့်အခါ ‘သစ္စာနှင့်သတိပညာရှိသောကျွန်’ ကအသုံးပြုနိုင်သည်။
သူတို့၏ဟောပြောချက်များတွင် ညီအစ်ကို ဆစ်ဒလစ်ခ်နှင့် ဂျဲရက်စ်တို့က “သစ္စာနှင့်သတိပညာရှိသောကျွန်” အား သခင်၏မြေကြီးဆိုင်ရာဥစ္စာရှိသမျှတို့ကို ပေးအပ်ထားခြင်းက လုပ်ရိုးလုပ်စဉ်စီမံခန့်ခွဲရေးတာဝန်များကိုဆောင်ရွက်ရန် “အခြားသိုး” ထဲမှ အရည်အချင်းပြည့်မီသော အမျိုးသားများအား ကျေးကျွန်အတန်းအစားကခွင့်ပြုခြင်းကို မဆီးတားကြောင်းရှင်းပြခဲ့သည်။ (ယောဟန် ၁၀:၁၆) ယေဟောဝါသက်သေများအသုံးပြုသော တရားဝင်အသင်းအဖွဲ့များ၏ ဒါရိုက်တာအားလုံး သို့မဟုတ် တစ်ဦးတစ်ယောက်သည် ဘိသိက်ခံခရစ်ယာန်များဖြစ်ရမည်ဟူသော ကျမ်းစာဆိုင်ရာမည်သည့်တောင်းဆိုချက်မျှမရှိပေ။
ညီအစ်ကိုဘားရ်က မကြာသေးမီက အမေရိကန်ပြည်ထောင်စုတွင် “သစ္စာနှင့်သတိပညာရှိသောကျွန်” ကအသုံးပြုသည့် ကော်ပိုရေးရှင်းအားလုံး၏ ဒါရိုက်တာဘုတ်အဖွဲ့များမှ မိမိတို့ရာထူးကို ဆန္ဒအလျောက်စွန့်လွှတ်သွားကြသော ဒါရိုက်တာနှင့် တာဝန်ခံများအဖြစ် ထမ်းဆောင်ခဲ့ကြသည့် ယေဟောဝါသက်သေများ၏ အုပ်ချုပ်ရေးအဖွဲ့ဝင်အချို့အကြောင်း ပရိသတ်အားပြောပြသည်။ အခြားသိုးအတန်းအစားမှ ယုံကြည်စိတ်ချရသောညီအစ်ကိုများကို အစားထိုးသူများအဖြစ် ရွေးချယ်ခဲ့သည်။
ဤဆုံးဖြတ်ချက်သည် အမှန်ပင်အကျိုးရှိပါသည်။ ယင်းက အုပ်ချုပ်ရေးအဖွဲ့ဝင်များကို ဝိညာဉ်အစာပြင်ဆင်ပေးခြင်းနှင့် ကမ္ဘာချီညီအစ်ကိုအသင်းအပင်း၏ ဝိညာဉ်ရေးလိုအပ်ရာများကို တစ်နည်းနည်းဖြင့် ကြည့်ရှုစောင့်ရှောက်ရာတွင် အချိန်ပို၍အသုံးပြုရန်ဖြစ်စေသည်။
နိဂုံးချုပ်ရာတွင် သဘာပတိက ဝမ်းပန်းတသာရှိသည့်ပရိသတ်ကို ဤသို့ပြောကြားခဲ့သည်– “အမျိုးမျိုးသော တရားဥပဒေနှင့် စီမံခန့်ခွဲရေးဆိုင်ရာတာဝန်များကို အတွေ့အကြုံရှိကြီးကြပ်မှူးများအား တာဝန်ပေးထားစဉ် . . . သူတို့အားလုံးသည် အုပ်ချုပ်ရေးအဖွဲ့၏ ဝိညာဉ်ရေးဆိုင်ရာလမ်းညွှန်မှုအောက်တွင် အမှုဆောင်ကြသည်။ . . . ကျွန်ုပ်တို့အားလုံးသည် ကိုယ်တော်၏မြင့်မြတ်သောနာမတော်၏ ဂုဏ်တော်နှင့် ဘုန်းတော်ထင်ရှားစေဖို့ အလိုတော်ကိုထမ်းဆောင်ကြရာတွင် ကျွန်ုပ်တို့၏စည်းလုံးစွာကြိုးပမ်းအားထုတ်မှုအပေါ် ယေဟောဝါကောင်းချီးပေးရန်အတွက် ကိုယ်တော်ကိုထက်သန်စွာရှုမျှော်ကြသည်။”