အုပ်ချုပ်ရေးအဖွဲ့နှင့် တရားဝင်ကော်ပိုရေးရှင်း ခြားနားပုံ
အုပ်ချုပ်ရေးအဖွဲ့နှင့် တရားဝင်ကော်ပိုရေးရှင်း ခြားနားပုံ
၁၈၈၅၊ ဇန်နဝါရီလမှစ၍ ပဲင်စီလ်ဘေးနီးယား ကင်းမျှော်စင် သမ္မာကျမ်းစာနှင့် ဝေစာအသင်း၏ နှစ်ပတ်လည်အစည်းအဝေးများကို ကျင်းပခဲ့သည်။ ၁၉ ရာစုနောက်ပိုင်း ကောင်းကင်အတန်းအစားခရစ်ယာန်များကိုစုသိမ်းသောအခါ ဤကော်ပိုရေးရှင်း၏ဒါရိုက်တာများနှင့် တာဝန်ခံများသည် ကောင်းကင်မျှော်လင့်ချက်ရှိကြသူများဖြစ်၏။ အမှန်မှာ ထိုသို့ပင်အမြဲလိုလိုဖြစ်ခဲ့သည်။
ထိုတွင် ခြွင်းချက်တစ်ခုရှိသည်။ ၁၉၄၀ ပြည့်နှစ်တွင် ထိုအချိန်က အသင်းမ၏တရားရေးအကြံပေးပုဂ္ဂိုလ်ဖြစ်ပြီး မြေကြီးမျှော်လင့်ချက်ရှိသော “အခြားသိုး” ဖြစ်သူ ဟေဒင် စီ. ကာဗင်တန်သည် အသင်းမ၏ဒါရိုက်တာအဖြစ် ရွေးချယ်ခံရသည်။ (ယောဟန် ၁၀:၁၆) သူသည် ၁၉၄၂ ခုနှစ်မှ ၁၉၄၅ ခုနှစ်အထိ အသင်းမ၏ဒု-ဥက္ကဋ္ဌအဖြစ် အမှုထမ်းခဲ့သည်။ ညီအစ်ကိုကာဗင်တန်သည် ထိုအချိန်က ယေဟောဝါ၏အလိုတော်ဖြစ်ပုံရှိသည်နှင့်အညီ ဒါရိုက်တာအဖြစ်မှ နုတ်ထွက်ခဲ့သည်—ပဲင်စီလ်ဘေးနီးယားကော်ပိုရေးရှင်း ဒါရိုက်တာများနှင့် တာဝန်ခံများအားလုံးတို့သည် ကောင်းကင်အတန်းအစားခရစ်ယာန်များဖြစ်ကြသည်။ လိုင်မယ်န် အေ. စွင်ဂယ်လ်သည် ဒါရိုက်တာဘုတ်အဖွဲ့တွင် ဟေဒင် စီ. ကာဗင်တန်၏နေရာတွင် အစားဝင်ခဲ့ပြီး ဖရက်ဒရစ် ဒဗလျူ. ဖရဲန့်ဇ်ကို ဒု-ဥက္ကဋ္ဌအဖြစ် ရွေးချယ်ခဲ့သည်။
ပဲင်စီလ်ဘေးနီးယား ကင်းမျှော်စင် သမ္မာကျမ်းစာနှင့် ဝေစာအသင်း၏ ဒါရိုက်တာများနှင့် တာဝန်ခံများအားလုံးတို့သည် ကောင်းကင်အတန်းအစားခရစ်ယာန်များဖြစ်သင့်ကြောင်း ယေဟောဝါကျေးကျွန်များက အဘယ်ကြောင့် ယူမှတ်ခဲ့ကြသနည်း။ အကြောင်းမှာ ထိုအချိန်က ပဲင်စီလ်ဘေးနီးယားကော်ပိုရေးရှင်း ဒါရိုက်တာများနှင့်တာဝန်ခံများဘုတ်အဖွဲ့သည် ဝိညာဉ်တော်ဖွားကောင်းကင်အတန်းအစားများဖြင့် အစဉ်ဖွဲ့စည်းထားသော ယေဟောဝါသက်သေများ၏အုပ်ချုပ်ရေးအဖွဲ့နှင့် နီးကပ်စွာဆက်စပ်ခဲ့သောကြောင့်ဖြစ်သည်။
သမိုင်းဝင်နှစ်ပတ်လည်အစည်းအဝေးတစ်ခု
၁၉၄၄၊ အောက်တိုဘာ ၂ ရက် ပစ္စဘတ်မြို့၌ကျင်းပသော နှစ်ပတ်လည်အစည်းအဝေးတွင် ပဲင်စီလ်ဘေးနီးယားကော်ပိုရေးရှင်းအဖွဲ့ဝင်များသည် ၎င်းတို့၏အမိန့်ပြန်တမ်းကိုပြုပြင်သည့် ဆုံးဖြတ်ချက်ခြောက်ခုကို ခံယူခဲ့ကြ၏။ အမိန့်ပြန်တမ်းတွင် အသင်းမ၏လုပ်ငန်းအတွက် ရန်ပုံငွေထည့်ဝင်သောအလှူရှင်များကို မဲပေးပါဝင်ရန်ပြဋ္ဌာန်းသော်လည်း ပြုပြင်ထားသောတတိယအချက်က ထိုအစီအစဉ်ကိုပယ်ဖျက်ခဲ့သည်။ ထိုနှစ်ပတ်လည်အစည်းအဝေးနှင့်စပ်လျဉ်း၍ မှတ်တမ်းက ဤသို့ဖော်ပြခဲ့သည်– “အသင်းမ၌အဖွဲ့ဝင်များကို ၅၀၀ ထက်မပိုရန် ကန့်သတ်ထားမည် . . . ရွေးချယ်ခံရသောသူတိုင်းသည် အသင်းမ၏အချိန်ပြည့်ကျေးကျွန် သို့မဟုတ် ယေဟောဝါသက်သေအုပ်စု [အသင်းတော်] ၏အချိန်ပိုင်းကျေးကျွန်တစ်ဦးဖြစ်ရမည့်အပြင် သခင်၏စိတ်ကိုလည်း တင်ပြရမည်။”
၎င်းနောက် အသင်းမ၏ဒါရိုက်တာများကို ဘုရားသခင့်နိုင်ငံတော်လုပ်ငန်းတိုးတက်ရန် လှူဒါန်းသည့်ငွေပမာဏကို ထည့်သွင်းစဉ်းစားခြင်းမပြုဘဲ ယေဟောဝါအား အကြွင်းမဲ့ဆက်ကပ်ထားသူများက မဲဆန္ဒပေးခဲ့ကြသည်။ ၎င်းသည် “ကြေးဝါအရာ၌ ရွှေကိုလည်းကောင်း၊ သံအရာ၌ငွေကိုလည်းကောင်း၊ သစ်သားအရာ၌ ကြေးဝါကိုလည်းကောင်း၊ ကျောက်အရာ၌သံကိုလည်းကောင်း ငါဆောင်ခဲ့မည်။ သင်၏အရာရှိတို့ [“ကြီးကြပ်မှူးများ၊” ကဘ] ကို ငြိမ်သက်သောသဘော၊ အခွန်ခံတို့ [“တာဝန်လွှဲအပ်ခံရသူများ၊” ကဘ] ကို ဖြောင့်မတ်သောသဘောနှင့်ပြည့်စုံစေမည်” ဟူ၍ ကျွန်ုပ်တို့ဖတ်ရသော ဟေရှာယ ၆၀:၁၇ တွင်ကြိုဟောခဲ့သည့် အဆင့်ဆင့်တိုးတက်မှုများနှင့်အညီဖြစ်ခဲ့သည်။ “ကြီးကြပ်မှူးများ” နှင့် “တာဝန်လွှဲအပ်ခံရသူများ” ကိုရည်ညွှန်းရာ၌ အဆိုပါပရောဖက်ပြုချက်သည် ယေဟောဝါလူမျိုးအလယ် အဖွဲ့အစည်းဆိုင်ရာလုပ်ထုံးလုပ်နည်းများတွင် တိုးတက်မှုများကို ညွှန်ပြခဲ့သည်။
အဖွဲ့အစည်းကို သီအိုကရက်တစ်ချိန်ညှိမှုသို့ ရောက်ရှိစေရာတွင် အရေးကြီးဆုံးအဆင့်သည် ဒံယေလ ၈:၁၄ တွင်ဖော်ပြထားသော “ရက်ပေါင်းနှစ်ထောင်သုံးရာ” အဆုံး၌ ဖြစ်ပေါ်ခဲ့သည်။ ထိုအချိန်တွင် “သန့်ရှင်းရာဌာန” ကို ‘မှန်ကန်ရာအခြေအနေသို့ရောက်ရှိစေ’ ခဲ့သည်။
သို့သော် ၁၉၄၄ ခုနှစ်က သမိုင်းဝင်နှစ်ပတ်လည်အစည်းအဝေးပြီးနောက် အရေးကြီးသောမေးခွန်းတစ်ခုကျန်ရှိနေသေးသည်။ ၎င်းအချိန်က အုပ်ချုပ်ရေးအဖွဲ့သည် ပဲင်စီလ်ဘေးနီးယားကော်ပိုရေးရှင်း ဒါရိုက်တာဘုတ်အဖွဲ့ဝင်ခုနစ်ဦးနှင့် နီးကပ်စွာဆက်စပ်ခဲ့သောကြောင့် အုပ်ချုပ်ရေးအဖွဲ့သည် ကောင်းကင်အတန်းအစားခရစ်ယာန်ခုနစ်ဦးထက်ပို၍ ဘယ်သောအခါမျှမဖွဲ့စည်းနိုင်ဟု ဆိုလိုနေခြင်းလော။ ထို့ပြင် ဒါရိုက်တာများကို ကော်ပိုရေးရှင်းအဖွဲ့ဝင်များက ရွေးကောက်သောကြောင့် ကော်ပိုရေးရှင်းအဖွဲ့ဝင်များသည် နှစ်စဉ် နှစ်ပတ်လည်အစည်းအဝေး၌ အုပ်ချုပ်ရေးအဖွဲ့ဝင်များကို ရွေးကောက်နေခြင်းလော။ ပဲင်စီလ်ဘေးနီးယား ကင်းမျှော်စင် သမ္မာကျမ်းစာနှင့် ဝေစာအသင်း၏ ဒါရိုက်တာများနှင့် တာဝန်ခံများသည် အုပ်ချုပ်ရေးအဖွဲ့ဝင်များနှင့် ထပ်တူထပ်မျှဖြစ်သလော၊ သို့မဟုတ် ခြားနားကြသလော။
မမေ့နိုင်ဖွယ် နောက်ထပ်နှစ်ပတ်လည်အစည်းအဝေး
အဆိုပါမေးခွန်းများကို ၁၉၇၁၊ အောက်တိုဘာ ၁ ရက်တွင်ကျင်းပခဲ့သော နှစ်ပတ်လည်အစည်းအဝေး၌ ဖြေဆိုပေးခဲ့သည်။ ထိုသမယ၌ ဟောပြောသူတစ်ဦးက ‘သစ္စာနှင့်သတိပညာရှိသောကျွန်’ ၏အုပ်ချုပ်ရေးအဖွဲ့သည် နှစ်ပေါင်းရာနှင့်ချီ၍ ပဲင်စီလ်ဘေးနီးယား ကင်းမျှော်စင် သမ္မာကျမ်းစာနှင့် ဝေစာအသင်းထက် အလျင်ဖြစ်ပေါ်ခဲ့ကြောင်း ဖော်ပြခဲ့သည်။ (မဿဲ ၂၄:၄၅-၄၇) ပဲင်စီလ်ဘေးနီးယားကော်ပိုရေးရှင်း မတည်ရှိမီ ၁၈ ရာစုထက်မကသော စီ.အီး. ၃၃ ခုနှစ်၌ အုပ်ချုပ်ရေးအဖွဲ့ကိုဖွဲ့စည်းခဲ့သည်။ ကနဦး၌ အုပ်ချုပ်ရေးအဖွဲ့တွင် ၇ ဦးမဟုတ်ဘဲ တမန်တော် ၁၂ ပါးပါဝင်ခဲ့သည်။ “ယေရုရှလင်မြို့၌ရှိသော တမန်တော်တို့နှင့် သင်းအုပ်တို့” ကဦးဆောင်ခဲ့ကြသောကြောင့် နောက်ပိုင်းတွင် အရေအတွက်များပြားလာသည်မှာ ထင်ရှားသည်။—တမန်တော် ၁၅:၂။
၁၉၇၁ ခုနှစ်တွင် ထိုဟောပြောသူကပင် ကင်းမျှော်စင်အသင်းဝင်များသည် ကောင်းကင်အတန်းအစားအုပ်ချုပ်ရေးအဖွဲ့ဝင်များကို မဲပေးမရွေးကောက်နိုင်ဟု ရှင်းပြခဲ့သည်။ အဘယ်ကြောင့်နည်း။ အကြောင်းမှာ “‘ကျွန်’ အတန်းအစား၏ အုပ်ချုပ်ရေးအဖွဲ့ကို မည်သည့်လူသားကမျှ ခန့်အပ်ထားခြင်းမဟုတ်သောကြောင့်ဖြစ်သည်။ စစ်မှန်သောခရစ်ယာန်အသင်းတော်၏ဦးခေါင်း၊ ‘သစ္စာနှင့်သတိပညာရှိသောကျွန်’ အတန်းအစား၏ အရှင်သခင်ဖြစ်သော ယေရှုခရစ်က . . . ခန့်အပ်ထားခြင်းဖြစ်သည်” ဟုသူပြောခဲ့သည်။ ထိုကြောင့် အုပ်ချုပ်ရေးအဖွဲ့ဝင်များကို မည်သည့်တရားဝင်ကော်ပိုရေးရှင်းအဖွဲ့ဝင်များကမှ မဲဆန္ဒဖြင့်မရွေးကောက်နိုင်သည်မှာ ထင်ရှားပါသည်။
ဆက်လက်၍ ဟောပြောသူက အလွန်အရေးကြီးသော ဤဖော်ပြချက်ကို ပြောခဲ့သည်– “အုပ်ချုပ်ရေးအဖွဲ့တွင် အသင်းမ၏ဒါရိုက်တာဘုတ်အဖွဲ့မှာကဲ့သို့ ဥက္ကဋ္ဌ၊ ဒု-ဥက္ကဋ္ဌ၊ အတွင်းရေးမှူး-ဘဏ္ဍာရေးမှူးနှင့် လက်ထောက်အတွင်းရေးမှူး-ဘဏ္ဍာရေးမှူးဟူသော တာဝန်ခံများမရှိချေ။ သဘာပတိတစ်ဦးသာရှိသည်။” နှစ်ပေါင်းများစွာအထိ ပဲင်စီလ်ဘေးနီးယားကော်ပိုရေးရှင်းဥက္ကဋ္ဌသည် အဦးအကျဆုံးအုပ်ချုပ်ရေးအဖွဲ့ဝင်လည်းဖြစ်ခဲ့သည်။ ယင်းသို့ဖြစ်တော့မည်မဟုတ်ချေ။ အုပ်ချုပ်ရေးအဖွဲ့ဝင်များသည် အတွေ့အကြုံ သို့မဟုတ် စွမ်းရည်တို့တွင် တူညီကြမည်မဟုတ်သော်လည်း တန်းတူညီတူတာဝန်ရရှိကြသည်။ ဟောပြောသူက ဤသို့ထပ်ဆင့်ဆိုသည်– “မည်သည့်အုပ်ချုပ်ရေးအဖွဲ့ဝင်မဆိုသည် အသင်းမ . . . ၏သဘာပတိဖြစ်နိုင်ကာ တစ်ချိန်တည်း၌ ဥက္ကဋ္ဌမဟုတ်ချေ။ . . . ယင်းတို့အားလုံးသည် အုပ်ချုပ်ရေးအဖွဲ့တွင် သဘာပတိရာထူးအတွက် အလှည့်ကျစနစ်အပေါ်မူတည်သည်။”
၁၉၇၁ ခုနှစ်၊ ထိုမမေ့နိုင်ဖွယ်နှစ်ပတ်လည်အစည်းအဝေးတွင် ဝိညာဉ်တော်ဖွားကောင်းကင်အတန်းအစား အုပ်ချုပ်ရေးအဖွဲ့ဝင်များနှင့် ပဲင်စီလ်ဘေးနီးယားကော်ပိုရေးရှင်းဒါရိုက်တာများအကြား ခြားနားချက်တစ်ခုရှိသည်ကို ရှင်းလင်းစွာဖော်ပြခဲ့သည်။ သို့တိုင် အုပ်ချုပ်ရေးအဖွဲ့ဝင်များသည် အသင်းမ၏ဒါရိုက်တာများနှင့်တာဝန်ခံများအဖြစ် ဆက်၍အမှုထမ်းဆောင်ခဲ့ကြသည်။ သို့သော် ယနေ့ ဤမေးခွန်းပေါ်ပေါက်လာ၏– ပဲင်စီလ်ဘေးနီးယား ကင်းမျှော်စင် သမ္မာကျမ်းစာနှင့် ဝေစာအသင်း၏ဒါရိုက်တာများသည် အုပ်ချုပ်ရေးအဖွဲ့ဝင်များဖြစ်ရမည်ဟူသော ကျမ်းစာအကြောင်းရင်းတစ်စုံတစ်ရာရှိပါသလော။
အဖြေမှာ မရှိပါဟူ၍ဖြစ်သည်။ ပဲင်စီလ်ဘေးနီးယားကော်ပိုရေးရှင်းကို ယေဟောဝါသက်သေများက တစ်ခုတည်းသောတရားဝင်အသင်းအဖွဲ့အဖြစ် အသုံးပြုနေခြင်းမဟုတ်ပါ။ အခြားကော်ပိုရေးရှင်းများလည်းရှိသည်။ တစ်ခုမှာ ဖွဲ့စည်းတည်ထောင်ထားသော နယူးယောက် ကင်းမျှော်စင် သမ္မာကျမ်းစာနှင့် ဝေစာအသင်းဖြစ်၏။ ၎င်းသည် အမေရိကန်ပြည်ထောင်စုရှိ ကျွန်ုပ်တို့၏လုပ်ငန်းကို အဆင်ပြေချောမောစေသည်။ ထိုကော်ပိုရေးရှင်း၏ ဒါရိုက်တာများနှင့်တာဝန်ခံများသည် အများအားဖြင့် “အခြားသိုး” များဖြစ်ကြသော်လည်း ယင်းအပေါ် ယေဟောဝါ၏ကောင်းချီးသက်ရောက်လျက်ရှိသည်မှာ ထင်ရှားပါသည်။ ဗြိတိန်နိုင်ငံတွင် အပြည်ပြည်ဆိုင်ရာကျမ်းစာကျောင်းသားများအသင်းကို အသုံးပြုလျက်ရှိသည်။ တခြားနိုင်ငံများတွင်လည်း ဘုရားသခင့်နိုင်ငံတော်အကျိုးစီးပွားတိုးပွားရန် အခြားတရားဝင်အသင်းအဖွဲ့များကို အသုံးချလျက်ရှိသည်။ ယင်းတို့အားလုံးသည် ကမ္ဘာအနှံ့ သတင်းကောင်းဟောပြောခြင်း၌ တညီတညွတ်တည်းကူညီဆောင်ရွက်ကြသည်။ ၎င်းတို့သည် မည်သည့်နေရာတွင်ရှိပါစေ သို့မဟုတ် မည်သူသည် ဒါရိုက်တာအနေနှင့်ရော၊ တာဝန်ခံအနေနှင့်ပါ လုပ်ဆောင်နေသူဖြစ်ပါစေ၊ အုပ်ချုပ်ရေးအဖွဲ့မှ အဆိုပါအသင်းအဖွဲ့များကို သီအိုကရက်တစ်နည်းအရ ညွှန်ကြား၍အသုံးပြုသည်။ ထိုကြောင့် ထိုသို့သောအသင်းအဖွဲ့များသည် ဘုရားသခင့်နိုင်ငံတော်အကျိုးစီးပွားတိုးပွားစေရန် တာဝန်များရရှိထားကြသည်။
တရားဝင်အသင်းအဖွဲ့များရှိခြင်းသည် ကျွန်ုပ်တို့အတွက်အကျိုးရှိပါသည်။ ထိုသို့အားဖြင့် ကျွန်ုပ်တို့သည် ဘုရားသခင့်နှုတ်မြွက်စကားတော်က တောင်းဆိုထားသည်အတိုင်း ဒေသန္တရနှင့်နိုင်ငံဆိုင်ရာဥပဒေများကို လိုက်နာကြသည်။ (ယေရမိ ၃၂:၁၁; ရောမ ၁၃:၁) တရားဝင်အသင်းအဖွဲ့များသည် သမ္မာကျမ်းစာများ၊ စာအုပ်များ၊ မဂ္ဂဇင်းများ၊ ဘရိုရှာများနှင့် အခြားစာပေများကို ပုံနှိပ်ပေးခြင်းဖြင့် ကျွန်ုပ်တို့၏ဘုရားသခင့်နိုင်ငံတော်သတင်း ပျံ့နှံ့ခြင်းလုပ်ငန်းကို အဆင်ပြေချောမောစေသည်။ ဤသို့သောအသင်းအဖွဲ့များသည် ပစ္စည်းပိုင်ဆိုင်ခွင့်၊ ကယ်ဆယ်ရေးလုပ်ငန်းများ၊ စည်းဝေးကြီးအဆောက်အဦများကိုအသုံးပြုရန်အတွက် စာချုပ်ချုပ်ဆိုမှုများ အစရှိသည်တို့နှင့်သက်ဆိုင်သော ကိစ္စရပ်များကိုကိုင်တွယ်ရန် တရားရေးအသုံးခံကိရိယာအဖြစ်လည်း လုပ်ဆောင်ပေး၏။ ထိုသို့သောတရားဝင်အသင်းအဖွဲ့များ၏လုပ်ဆောင်မှုများအတွက် ကျွန်ုပ်တို့သည် ကျေးဇူးတင်ကြသည်။
ယေဟောဝါ၏နာမတော်ကိုဦးထိပ်ထား
၁၉၄၄ ခုနှစ်တွင် ပဲင်စီလ်ဘေးနီးယား ကင်းမျှော်စင် သမ္မာကျမ်းစာနှင့် ဝေစာအသင်း၏ ဦးတည်ချက်များကိုအလေးအနက်ထားရှိရန် ဤကော်ပိုရေးရှင်း၏ အမိန့်ပြန်တမ်းစာပိုဒ် ၂ ကို ပြုပြင်ပြောင်းလဲခဲ့သည်။ အမိန့်ပြန်တမ်းအရ အသင်းမ၏ရည်ရွယ်ချက်များတွင် ဤအဓိကရည်ရွယ်ချက်ပါရှိ၏– “အဆုံးမဲ့တန်ခိုးရှင်ဘုရားသခင် ယေဟောဝါ၏နာမတော်၊ နှုတ်မြွက်စကားတော်နှင့် ပိုင်သအုပ်စိုးမှုကို သက်သေခံသူတစ်ဦးအနေဖြင့် တိုင်းနိုင်ငံရှိသမျှတွင် ခရစ်တော်ယေရှုလက်အောက်ရှိ ဘုရားသခင့်နိုင်ငံတော်နှင့်ယှဉ်သော ဝမ်းမြောက်ဖွယ်သတင်းကို ဟောပြောရန်။”
၁၉၂၆ ခုနှစ်ကတည်းက ‘သစ္စာရှိကျွန်’ သည်ယေဟောဝါ၏နာမတော်ကို ဦးထိပ်ထားခဲ့၏။ အထူးသဖြင့် မှတ်သားဖွယ်ရာကား ကျမ်းစာကျောင်းသားများသည် ယေဟောဝါသက်သေများဟူသောအမည်ကိုခံယူခဲ့သည့် ၁၉၃၁ ခုနှစ်ဖြစ်သည်။ (ဟေရှာယ ၄၃:၁၀-၁၂) ဘုရားသခင်၏နာမတော်ကို အလေးထားထင်ရှားစေသည့် အသင်းမ၏စာပေများတွင် ယေဟောဝါ (၁၉၃၄)၊ “နာမတော်အား ရိုသေလေးမြတ်ခြင်းရှိပါစေသော” (၁၉၆၁) နှင့် “ငါသည် ယေဟောဝါဖြစ်ကြောင်း လူမျိုးတို့သိရကြလိမ့်မည်”—မည်သို့အားဖြင့်နည်း (၁၉၇၁) စာအုပ်တို့ပါဝင်သည်။
၁၉၆၀ ပြည့်နှစ်တွင် အင်္ဂလိပ်ဘာသာဖြင့် တစ်အုပ်လုံးထုတ်ဝေခဲ့သော သန့်ရှင်းသောကျမ်းစာစောင်များ၏ကမ္ဘာသစ်ဘာသာပြန်ကျမ်း ကိုအထူးဖော်ပြရပေမည်။ ယင်းသည် ဟေဗြဲကျမ်းစာစောင်များတွင် တက်တြာဂရမ်မီတန်ပါရှိသည့်နေရာတိုင်း၌ ယေဟောဝါ၏နာမတော်ကို ထည့်သွင်းထား၏။ ထို့ပြင် ဤပြန်ဆိုချက်တွင် ခရစ်ယာန်ဂရိကျမ်းစာစောင်များရှိ ၂၃၇ နေရာ၌ မြင့်မြတ်သောနာမတော်ပါဝင်သည်၊ အသေအချာလေ့လာဆန်းစစ်ချက်က ယင်းသည် ခြေမြစ်ခိုင်လုံကြောင်းဖော်ပြသည်။ ယေဟောဝါသည် မိမိ၏နာမတော်ကို ကမ္ဘာအနှံ့ထင်ရှားစေရာ၌ နည်းအမျိုးမျိုးဖြင့် ပုံနှိပ်ထုတ်ဝေခြင်း အရင်းအမြစ်များနှင့် တရားဝင်အသင်းအဖွဲ့များကို အသုံးချရန် “ကျွန်” နှင့်ယင်း၏အုပ်ချုပ်ရေးအဖွဲ့ကို ခွင့်ပြုထားသည့်အတွက် မည်မျှကျေးဇူးတင်စရာပါတကား!
ဘုရားသခင့်နှုတ်မြွက်စကားတော်ဖြန့်ဝေခြင်းကို တိုးမြှင့်ခဲ့
ဘုရားသခင့်လူမျိုးတော်သည် ကိုယ်တော်၏နာမတော်ကို တညီတညွတ်တည်း သက်သေခံကြပြီး သမ္မာကျမ်းစာအပြင် ကျမ်းစာအခြေပြုစာပေများကို သန်းနှင့်ချီ၍ထုတ်လုပ်ဖြန့်ဝေခြင်းအားဖြင့် ကိုယ်တော်၏နှုတ်မြွက်စကားတော်ကို ထောက်ခံခဲ့ကြသည်။ ၁၉၀၀ ပြည့်နှစ်အစောပိုင်းတွင် ကင်းမျှော်စင်အသင်းသည် ဘင်ဂျမင်ဝေလ်စင်၏ ခရစ်ယာန်ဂရိကျမ်းစာစောင်များကို ဂရိ-အင်္ဂလိပ်ကြားညှပ်အဖြစ်ထုတ်ဝေသော သည်အဲန်းဖက်တစ် ဒိုင်ဂလော့ထ် ၏မူပိုင်ဖြစ်လာခဲ့သည်။ နောက်ဆက်တွဲစာမျက်နှာ ၅၀၀ ပါဝင်သော ကျမ်းစာကျောင်းသားများထုတ် ဂျိမ်းစ်ဘုရင်ဘာသာပြန်ကျမ်း ကိုအသင်းမက ပုံနှိပ်ဖြန့်ချိခဲ့သည်။ ၁၉၄၂ ခုနှစ်တွင် ဘေးကွက်လပ်တွင်အညွှန်းပါသော ဂျိမ်းစ်ဘုရင်ဘာသာပြန်ကျမ်း ကိုထုတ်ဝေခဲ့သည်။ ထိုနောက် အသင်းမက ၁၉၄၄ ခုနှစ်တွင် မြင့်မြတ်သောနာမတော်ကို အသုံးပြုထားသည့် ၁၉၀၁ ခုထုတ် အမေရိကန်စံတင်ဘာသာပြန်ကျမ်း ကိုစတင်ပုံနှိပ်ခဲ့၏။ ယေဟောဝါ၏နာမတော်သည် စတီဗင် တီ. ဘိုင်ရင်တန်ပြုစုသော အင်္ဂလိပ်သက်ဝင်ကျမ်း တွင်လည်း ဖော်ပြထားပြီး ၎င်းကို ၁၉၇၂ ခုနှစ်တွင် အသင်းမကပုံနှိပ်ထုတ်ဝေခဲ့သည်။
ယေဟောဝါသက်သေများက အသုံးပြုသောတရားဝင်အသင်းအဖွဲ့များသည် အဆိုပါကျမ်းစာဘာသာပြန်ကျမ်းအားလုံးကို ပုံနှိပ်ဖြန့်ဝေရာ၌ ကူညီပံ့ပိုးပေးခဲ့၏။ သို့သော် မှတ်သားဖွယ်အကောင်းဆုံးမှာ ကင်းမျှော်စင်အသင်းနှင့် ကမ္ဘာသစ်ဘာသာပြန်ကျမ်းကော်မတီတွင်ပါဝင်သော ကောင်းကင်အတန်းအစားယေဟောဝါသက်သေအုပ်စုတို့ အနီးကပ်ပူးပေါင်းဆောင်ရွက်ခြင်းပင်ဖြစ်သည်။ ယခုအချိန်အထိ ဤဘာသာပြန်ကျမ်းကို ၁၀၆,၄၀၀,၀၀၀ ကျော်ဖြင့် တစ်အုပ်လုံးနှင့်ရော တစ်စိတ်တစ်ပိုင်းအနေနှင့်ပါ ၃၈ ဘာသာဖြင့် ပုံနှိပ်ခဲ့သောကြောင့် ကျွန်ုပ်တို့ဝမ်းသာအားရကြသည်။ ပဲင်စီလ်ဘေးနီးယား ကင်းမျှော်စင် သမ္မာကျမ်းစာနှင့် ဝေစာအသင်းသည် အမှန်ပင် ကျမ်းစာအသင်းဖြစ်ပါသည်!
‘သစ္စာရှိကျွန်’ သည် ‘သူ၏သခင်ဥစ္စာရှိသမျှကိုအပ်နှင်း’ ခံခဲ့ရ၏။ ယင်းတို့တွင် ယူ.အက်စ်.အေ. နယူးယောက်မြို့မှ ဌာနချုပ်အဆောက်အဦများအပြင် ယခု ကမ္ဘာအနှံ့အပြားတွင် လည်ပတ်လုပ်ဆောင်နေသော ဌာနခွဲ ၁၁၀ လည်းပါဝင်သည်။ ကျွန်အတန်းအစားဝင်များသည် မိမိတို့အားအပ်နှင်းခဲ့ရာများကို အသုံးပြုပုံနှင့်ပတ်သက်၍ စာရင်းရှင်းခံရလိမ့်မည်ကို သိရှိကြသည်။ (မဿဲ ၂၅:၁၄-၃၀) သို့တိုင် ယင်းက ဥပဒေဆိုင်ရာနှင့် စီမံခန့်ခွဲရေးတာဝန်များကို ကြည့်ရှုလုပ်ဆောင်ရန် “အခြားသိုး” များမှ အရည်အချင်းပြည့်မီသော ကြီးကြပ်ရေးမှူးများအား ခွင့်ပြုခြင်းကို ‘ကျွန်’ အား အဟန့်အတားမဖြစ်စေပါ။ အမှန်မှာ ယင်းက အုပ်ချုပ်ရေးအဖွဲ့ဝင်များအတွက် ‘ဆုတောင်းရန်၊ နှုတ်မြွက်စကားတော်အတွက် အမှုဆောင်ရန်’ အချိန်ပို၍ရရှိစေသည်။—တမန်တော် ၆:၄။
ဤလောက၏အခြေအနေများက ခွင့်ပြုနေသရွေ့ ‘သစ္စာနှင့်သတိပညာရှိသောကျွန်’ ကိုကိုယ်စားပြုသည့် အုပ်ချုပ်ရေးအဖွဲ့သည် တရားဝင်အသင်းအဖွဲ့များကို အသုံးပြုသွားမည်ဖြစ်သည်။ ၎င်းတို့ရှိခြင်းက အဆင်ပြေလွယ်ကူစေသော်လည်း မရှိမဖြစ်သောအရာမဟုတ်ချေ။ အစိုးရဥပဒေက တရားဝင်အသင်းအဖွဲ့တစ်ဖွဲ့ကို ပယ်ဖျက်လိုက်ပါက ဟောပြောခြင်းလုပ်ငန်းမှာမူ ဆက်တည်ရှိပါလိမ့်မည်။ ယခုတွင်ပင် ကန့်သတ်ချုပ်ချယ်ထားပြီး တရားဝင်အသင်းအဖွဲ့များကို အသုံးမပြုရသောနိုင်ငံများတွင် ဘုရားသခင့်နိုင်ငံတော်သတင်း ဟောပြောလျက်၊ တပည့်ဖြစ်စေလျက်၊ ဆက်၍သီအိုကရေစီတိုးပွားလျက်ရှိသည်။ ထိုသို့ဖြစ်ရခြင်းမှာ ယေဟောဝါသက်သေများသည် စိုက်ပျိုး၊ ရေလောင်းပြီး ‘ဘုရားသခင်သည် ဆက်၍ကြီးပွားစေတော်မူ’ သောကြောင့်ဖြစ်သည်။—၁ ကောရိန္သု ၃:၆၊ ၇။
အနာဂတ်ကိုမျှော်ကြည့်လိုက်သော် ယေဟောဝါသည် မိမိလူမျိုးတော်၏ဝိညာဉ်ရေးနှင့် ကာယရေးလိုအပ်ရာများကို ကြည့်ရှုပေးမည်ဟု ကျွန်ုပ်တို့သည် ယုံကြည်စိတ်ချကြ၏။ ကိုယ်တော်နှင့်ကိုယ်တော်၏သားတော်ယေရှုခရစ်သည် ကောင်းကင်မှညွှန်ကြားနေပြီး ဘုရားသခင့်နိုင်ငံတော်ဟောပြောခြင်းလုပ်ငန်းကို အပြီးသတ်ရန် လိုအပ်ရာကို ဆက်လက်ထောက်ပံ့နေမည်ဖြစ်သည်။ အမှန်မှာ ဘုရားသခင့်ကျေးကျွန်တစ်ဦးအနေနှင့် ကျွန်ုပ်တို့လုပ်ဆောင်ပြီးမြောက်သမျှသည် ‘ဗိုလ်ခြေအားဖြင့်မဟုတ်၊ အာဏာတန်ခိုးအားဖြင့်မဟုတ်၊ ယေဟောဝါ၏ဝိညာဉ်တော်အားဖြင့်’ ဖြစ်သည်။ (ဇာခရိ ၄:၆) သို့ဖြစ်၍ ယေဟောဝါထောက်ပံ့သည့်ခွန်အားဖြင့် ကျွန်ုပ်တို့သည် ဤဆုံးခန်းကာလတွင် ကိုယ်တော်ပေးအပ်သည့်လုပ်ငန်းကို ပြီးစီးစေနိုင်မည်ဟုသိရှိထားကြရာ ဘုရားသခင်အကူအညီအတွက် ကျွန်ုပ်တို့ဆုတောင်းကြသည်!