သင်သည် အမှန်တရားကို သင့်ကိုယ်ပိုင်ဖြစ်စေပြီလော

ဖွင့်ပါ

သင်သည် အမှန်တရားကို သင့်ကိုယ်ပိုင်ဖြစ်စေပြီလော

“ကောင်းမြတ်သောအရာ၊ နှစ်သက်ဖွယ်သောအရာ၊ စုံလင်သောအရာတည်းဟူသော ဘုရားသခင်အလိုတော်ရှိသောအရာသည် အဘယ်အရာဖြစ်သည်ကို သင်နိုင်မည်အကြောင်း၊ စိတ်နှလုံးကိုအသစ်ပြင်ဆင်၍ ပုံသဏ္ဌာန်ပြောင်းလဲခြင်းသို့ရောက်ကြလော့။” —ရောမ ၁၂:၂။

၁၊ ၂။ ယနေ့ စစ်မှန်သောခရစ်ယာန်တစ်ဦးဖြစ်ရန် အဘယ်ကြောင့်မလွယ်ကူသနည်း။

ဤနောက်ဆုံးသောနေ့ရက်များ—“ခဲယဉ်းသောကာလ”—တွင် စစ်မှန်သောခရစ်ယာန်တစ်ဦးဖြစ်ရခြင်းသည် မလွယ်ကူချေ။ (၂ တိမောသေ ၃:၁) အမှန်အားဖြင့် လူတစ်ဦးသည် ခရစ်တော်၏ပုံသက်သေကို လိုက်လျှောက်ရန် လောကကိုအောင်ရမည်ဖြစ်သည်။ (၁ ယောဟန် ၅:၄) ခရစ်ယာန်လမ်းစဉ်နှင့်ပတ်သက်၍ ယေရှုဤသို့မိန့်တော်မူခဲ့ရာကို ပြန်သတိရပါ– “ကျဉ်းသောတံခါးကိုဝင်ကြလော့။ ပျက်စီးခြင်းသို့ရောက်သော လမ်းနှင့်တံခါးသည် ကျယ်ဝန်းသည်ဖြစ်၍ ဝင်သောသူတို့သည် များကြ၏။ အသက်ရှင်ခြင်းသို့ရောက်သော လမ်းနှင့်တံခါးသည် အလွန်ကျဉ်းမြောင်းသည်ဖြစ်၍၊ တွေ့ဝင်သောသူတို့သည် နည်းကြ၏။” ဤသို့လည်း ကိုယ်တော်မိန့်မြွက်ခဲ့သည်– “ငါ၌ဆည်းကပ်လိုသောသူဖြစ်လျှင် ကိုယ်ကိုကိုယ်ငြင်းပယ်ရမည်။ ကိုယ်လက်ဝါးကပ်တိုင်ကို နေ့တိုင်းထမ်း၍ ငါ့နောက်သို့လိုက်ရမည်။”—မဿဲ ၇:၁၃၊ ၁၄; လုကာ ၉:၂၃။

^၂အသက်လမ်းသည် ကျဉ်းမြောင်းကြောင်း တွေ့ရှိရခြင်းက ယင်းပေါ်တွင်ဆက်ရှိနေရန်မှာ ခရစ်ယာန်တစ်ဦး၏ နောက်ထပ်စိန်ခေါ်ချက်တစ်ရပ်ဖြစ်သည်။ ယင်းသည် အဘယ်ကြောင့် စိန်ခေါ်ချက်တစ်ရပ်ဖြစ်ရသနည်း။ အကြောင်းမှာ ကျွန်ုပ်တို့၏ဆက်ကပ်အပ်နှံခြင်းနှင့် နှစ်ခြင်းခံခြင်းတို့က မိမိကိုယ်ကို စာတန်၏ ဉာဏ်နီဉာဏ်နက်များသောလုပ်ရပ်များ၊ သို့မဟုတ် ပါးနပ်သောပရိယာယ်များ၏ ပစ်မှတ်တစ်ခုဖြစ်စေခြင်းကြောင့်တည်း။ (ဧဖက် ၆:၁၁၊ ကဘ အောက်ခြေမှတ်ချက်) ကျွန်ုပ်တို့၏အားနည်းချက်များကို သူသတိပြုမှတ်သားကာ ယင်းအားနည်းချက်များတွင် အကွက်ကောင်းရှာကာ ကျွန်ုပ်တို့၏ဝိညာဉ်ရေးကို ဖြိုဖျက်ပစ်ရန် ကြိုးပမ်းအားထုတ်သည်။ ထိုထက်ကား ယေရှုကိုပင် ပြိုလဲသွားစေရန် သူကြိုးပမ်းခဲ့သည်ဖြစ်ရာ သူသည် ကျွန်ုပ်တို့ကို အဘယ်ကြောင့် ချမ်းသာပေးစရာရှိမည်နည်း။—မဿဲ ၄:၁-၁၁။

စာတန်၏ဉာဏ်နီဉာဏ်နက်များသော နည်းဗျူဟာများ

၃။ ဧဝ၏စိတ်ဝယ် သံသယမျိုးစေ့များကို စာတန်မည်သို့ပျိုးချခဲ့သနည်း။

^၃စာတန်အသုံးပြုသောပရိယာယ်တစ်ခုမှာ ကျွန်ုပ်တို့၏စိတ်ဝယ် သံသယမျိုးစေ့များကို စိုက်ပျိုးပေးခြင်းဖြစ်သည်။ ကျွန်ုပ်တို့၏ဝိညာဉ်ရေးရာချပ်ဝတ်တန်ဆာ၌ အားနည်းချက်များကို သူရှာဖွေသည်။ အစအဦးကတည်းက ဧဝနှင့်လည်း ထိုနည်းဗျူဟာကိုသုံးကာ သူဤသို့မေးသည်– “သင်တို့သည် ဥယျာဉ်၌ရှိသမျှသော အပင်တို့၏အသီးကိုမစားရဟု ဧကန်စင်စစ် ဘုရားသခင်မိန့်တော်မူသလော။” (ကမ္ဘာဦး ၃:၁) တစ်နည်းဆိုရသော် ‘ဘုရားသခင်က သင့်အပေါ် ဒီလိုမျိုး တားမြစ်ချက်တစ်ခုထားနိုင်တယ်ဆိုတာဟာ တကယ်ဖြစ်နိုင်ပါ့မလား၊ သင်ရရှိမယ့် အလွန်ကောင်းတဲ့အရာတစ်ခုခုကို သူထိန်ချန်ထားတာများ ဖြစ်နေမလား၊ အဲဒီသစ်ပင်ကနေ သင်ယူစားတဲ့နေ့မှာပဲ သင့်ရဲ့မျက်စိဟာပွင့်လင်းပြီး ဘုရားသခင်လို အကောင်းနဲ့အဆိုးကို သိလာမယ်ဆိုတာ ဘုရားသခင်သိထားတယ်လေ!’ ဟုစာတန်ပြောဆိုခဲ့ခြင်းဖြစ်သည်။ သံသယမျိုးစေ့ကို စာတန်ပျိုးချလိုက်ပြီး အညှောက်ပေါက်လာရန် စောင့်ဆိုင်းခဲ့သည်။—ကမ္ဘာဦး ၃:၅။

၄။ ယနေ့ အချို့တို့အပေါ် အဘယ်သံသယများ သက်ရောက်လျက်ရှိသနည်း။

^၄ယနေ့ ဤနည်းဗျူဟာကို စာတန်မည်သို့အသုံးပြုသနည်း။ ကျွန်ုပ်တို့၏ကျမ်းစာဖတ်ရှုခြင်း၊ ကိုယ်ပိုင်လေ့လာခြင်း၊ ဆုတောင်းခြင်းများ၊ ခရစ်ယာန်ဓမ္မအမှုနှင့် အစည်းအဝေးများကို ကျွန်ုပ်တို့လျစ်လျူရှုထားမည်ဆိုလျှင် အခြားသူများအားဖြင့် ပေါ်ထွက်လာသောသံသယများ မိမိတို့ထဲဝင်လာရန် အသင့်ဖွင့်ထားပေးရာကျနိုင်သည်။ ဥပမာ ဤသို့ဖြစ်သည်– “ယင်းသည် ယေရှုသွန်သင်ပေးခဲ့သည့် အမှန်တရားပင်ဖြစ်ကြောင်း ကျွန်ုပ်တို့ မည်သို့သိသနည်း။” “ဤနေ့ရက်တို့သည် အမှန်ပင်နောက်ဆုံးသောနေ့ရက်များလော။ အမှန်အားဖြင့် ကျွန်ုပ်တို့သည် ၂၁ ရာစုထဲရောက်နှင့်နေကြပြီ။” “အာမဂေဒုန်၏နှုတ်ခမ်းဝ၌ ကျွန်ုပ်တို့ရောက်ရှိနေသလော သို့မဟုတ် ယင်းသည် အလှမ်းဝေးနေသေးသလော။” ထိုသို့သောသံသယများ ပေါ်လာလျှင် ၎င်းတို့ကိုထုတ်ပစ်ရန် ကျွန်ုပ်တို့ အဘယ်အရာပြုလုပ်နိုင်သနည်း။

၅၊ ၆။ သံသယများပေါ်ထွက်လာတတ်လျှင် ကျွန်ုပ်တို့အဘယ်အရာပြုလုပ်ရမည်နည်း။

^၅ယာကုပ် ဤသို့ရေးသားခဲ့ရာတွင် လက်တွေ့ကျကျဆုံးမပေးခဲ့သည်– “သင်တို့တွင် တစ်စုံတစ်ယောက်သောသူသည် ပညာကိုလိုလျှင်၊ ကဲ့ရဲ့ပြစ်တင်ခြင်းကိုပြုတော်မမူဘဲ၊ ခပ်သိမ်းသောသူတို့အား စေတနာစိတ်နှင့်ပေးသနားတော်မူသော ဘုရားသခင်ကိုတောင်းစေ။ တောင်းလျှင်ရလိမ့်မည်။ သို့ရာတွင် တွေးတောခြင်းမရှိဘဲ ယုံကြည်သောစိတ်နှင့်တောင်းရမည်။ တွေးတောခြင်းရှိသောသူသည်ကား၊ လေခတ်၍လှုပ်ရှားတတ်သော လှိုင်းတံပိုးနှင့်တူ၏။ ထိုသို့သောသူသည် စိတ်နှစ်ခွရှိသောသူ၊ ပြုလေသမျှတို့၌ မတည်ကြည်သောသူဖြစ်၍၊ ထာဝရဘုရား၏လက်တော်မှ တစ်စုံတစ်ခုကိုရမည်ဟု မထင်မမှတ်စေနှင့်။”—ယာကုပ် ၁:၅-၈။

^၆ထိုသို့ဆိုလျှင် ကျွန်ုပ်တို့ ဘာလုပ်ရမည်နည်း။ ကျွန်ုပ်တို့သည် ယုံကြည်ခြင်းနှင့် သိနားလည်မှုရရှိရေးအတွက် ဆုတောင်းချက်ထဲ၌ ‘ဘုရားသခင်ထံဆက်တောင်းခံ’ သင့်ပြီး မည်သည့်မေးခွန်း သို့မဟုတ် သံသယမဆိုနှင့်ပတ်သက်၍ ကိုယ်ပိုင်လေ့လာမှုတွင် ကျွန်ုပ်တို့၏ကြိုးပမ်းအားထုတ်မှုများဖြင့် ကျားကန်ထားသင့်သည်။ ယုံကြည်ခြင်းသန်စွမ်းသောသူတို့ထံမှ အကူအညီကိုလည်း ကျွန်ုပ်တို့တောင်းခံနိုင်ကြပြီး ကျွန်ုပ်တို့လိုအပ်သောထောက်ပံ့မှုကို ယေဟောဝါပေးသနားတော်မူမည်ဖြစ်ကြောင်း ဘယ်တော့မျှသံယမဝင်ပါနှင့်။ ယာကုပ်က ဤသို့လည်းဆိုခဲ့သည်– “ဘုရားသခင်၏အလိုတော်သို့လိုက်ကြလော့။ [စာတန်] ကိုဆီးတားကြလော့။ သို့ပြုလျှင်၊ သူသည် သင်တို့ထံကပြေးသွားလိမ့်မည်။ ဘုရားသခင်၌ချဉ်းကပ်ကြလော့။ သို့ပြုလျှင်၊ သင်တို့၌ချဉ်းကပ်တော်မူလိမ့်မည်။” မှန်ပါသည်၊ လေ့လာခြင်းနှင့် ဆုတောင်းခြင်းအားဖြင့် ဘုရားသခင်ထံကျွန်ုပ်တို့ ချဉ်းကပ်ကြစဉ် ကျွန်ုပ်တို့၏သံသယများ ပျောက်လွင့်သွားပါလိမ့်မည်။—ယာကုပ် ၄:၇၊ ၈။

၇၊ ၈။ ယေရှုသွန်သင်ပေးခဲ့သော ဝတ်ပြုရေးပုံစံကို အဆုံးအဖြတ်ပေးသည့် အခြေခံစံညွှန်းအချို့ကားအဘယ်နည်း၊ ဤစံညွှန်းများကို မည်သူတို့ပြည့်မီသနည်း။

^၇ဤမေးခွန်းကို နမူနာအဖြစ် ယူဆကြည့်ပါ– ယေရှုသွန်သင်ခဲ့သောဝတ်ပြုခြင်းပုံစံကို ကျွန်ုပ်တို့ကျင့်သုံးနေကြကြောင်း မည်သို့ ကျွန်ုပ်တို့သိရှိနိုင်သနည်း။ ယင်းကိုဖြေရှင်းရန် အဘယ်စံညွှန်းများကို သုံးသပ်ကြရမည်နည်း။ စစ်မှန်သောခရစ်ယာန်များသည် သူတို့အလယ်တွင် မေတ္တာစစ်ရှိရမည်ဖြစ်ကြောင်း သမ္မာကျမ်းစာက ညွှန်ပြသည်။ (ယောဟန် ၁၃:၃၄၊ ၃၅) သူတို့သည် ဘုရားသခင့်နာမတော် ယေဟောဝါကို သန့်ရှင်းမြင့်မြတ်စေကြရမည်။ (ဟေရှာယ ၁၂:၄၊ ၅; မဿဲ ၆:၉) ထို့ပြင် ထိုနာမတော်ကို သူတို့ပြညွှန်ကြရမည်။—ထွက်မြောက်ရာ ၃:၁၅; ယောဟန် ၁၇:၂၆။

^၈စစ်မှန်သောဝတ်ပြုကိုးကွယ်မှု၏ နောက်ထပ်ထင်ရှားသောအသွင်အပြင်တစ်ခုမှာ ဘုရားသခင့်နှုတ်မြွက်စကားတော်၊ သမ္မာကျမ်းစာကို လေးမြတ်ခြင်းဖြစ်၏။ ၎င်းသည် ဘုရားသခင်၏ဂုဏ်ရည်တော်နှင့် ကိုယ်တော်၏ရည်ရွယ်တော်မူချက်များကို ဖော်ထုတ်ပြသော ထူးခြားသည့်စာအုပ်ဖြစ်သည်။ (ယောဟန် ၁၇:၁၇; ၂ တိမောသေ ၃:၁၆၊ ၁၇) ထို့အပြင် စစ်မှန်သောခရစ်ယာန်များသည် မြေကြီးပရဒိသုပေါ်တွင် ထာဝစဉ်အသက်ရှင်ရန်အတွက် တစ်ခုတည်းသောမျှော်လင့်ချက်အဖြစ် ဘုရားသခင့်နိုင်ငံတော်ကို ကြွေးကြော်ကြသည်။ (မာကု ၁၃:၁၀; ဗျာဒိတ် ၂၁:၁-၄) သူတို့သည် ဤလောက၏ ပျက်စီးယိုယွင်းနေသောနိုင်ငံရေးများနှင့် ယင်း၏ညစ်ညူးသည့် ဘဝလမ်းစဉ်မှ ဆက်၍သီးခြားနေကြသည်။ (ယောဟန် ၁၅:၁၉; ယာကုပ် ၁:၂၇; ၄:၄) ယနေ့ မည်သူတို့သည် ဤစံညွှန်းများနှင့် အမှန်တကယ်ကိုက်ညီသနည်း။ သက်သေပြစရာအဖြေ တစ်ခုတည်းသာရှိသည်—ယင်းမှာ ယေဟောဝါသက်သေများတည်း။

သံသယများမပျောက်နိုင်အောင်ရှိနေလျှင် အသို့နည်း

၉၊ ၁၀။ မပျောက်နိုင်အောင်ဖြစ်နေသောသံသယများကို အောင်မြင်ကျော်လွှားဖို့ ကျွန်ုပ်တို့ အဘယ်အရာပြုလုပ်နိုင်ကြသနည်း။

^၉သံသယများ၏လိုဏ်ခေါင်းအတွင်း ကျွန်ုပ်တို့ရောက်ရှိနေကြောင်း တွေ့မည်ဆိုလျှင် အသို့နည်း။ ထိုအခါ ကျွန်ုပ်တို့ အဘယ်အရာပြုလုပ်သင့်သနည်း။ ပညာရှိဘုရင်ရှောလမုန်က အဖြေကိုဤသို့ပေးထားသည်– “ငါ့သား သင်သည်ပညာစကားကိုနားထောင်၍၊ စေတနာစိတ်နှင့် ဉာဏ်ကိုရှာဖွေသည်တိုင်အောင် ငါ့စကားကိုနားခံ၍ ငါ့ပညတ်တို့ကို ကိုယ်အထဲ၌ သွင်းမိလျှင်လည်းကောင်း၊ သိပ္ပံအတတ်ကိုခေါ်၍ ဉာဏ်နောက်သို့အသံကိုလွှင့်လျှင်လည်းကောင်း၊ ငွေကိုရှာတတ်သကဲ့သို့ ပညာကိုရှာ၍ ဝှက်ထားသောဘဏ္ဍာကိုစူးစမ်းတတ်သကဲ့သို့ ဉာဏ်ကိုစူးစမ်းလျှင်လည်းကောင်း ထာဝရဘုရားကိုကြောက်သောသဘော၌ကျင်လည်၍ ဘုရားသခင်ကိုသိသောဉာဏ်နှင့် ပြည့်စုံလိမ့်မည်။”—သု. ၂:၁-၅။

^၁၀ယင်းသည် အံ့သြဖွယ်ရာ အကြံအစည်တစ်ရပ်မဟုတ်ပေလော။ ကျွန်ုပ်တို့သည် ဘုရားသခင်၏ဉာဏ်ပညာကို စိတ်ထက်ထက်သန်သန်ဖြင့်အာရုံစိုက်ရန် လိုလိုလားလားရှိမည်ဆိုလျှင် “ဘုရားသခင်ကိုသိသောဉာဏ်နှင့် ပြည့်စုံလိမ့်မည်။” မှန်ပါသည်၊ ကိုယ်တော်၏မိန့်တော်မူချက်များကို လက်ခံ၍ တန်ဖိုးထားရန် ကျွန်ုပ်တို့ လိုလိုလားလားရှိကြမည်ဆိုလျှင် စကြဝဠာ၏အကြွင်းမဲ့ပိုင်သအုပ်စိုးရှင်ကို သိကျွမ်းခြင်းအသိပညာမှာ ကျွန်ုပ်တို့လက်လှမ်းမီသောနေရာတွင်ရှိသည်။ ဆိုလိုသည်မှာ ဆုတောင်းခြင်းနှင့် ကိုယ်ပိုင်လေ့လာမှုပြုခြင်းဖြင့် ယေဟောဝါထံတော် လှည့်လာခြင်းဖြစ်သည်။ ကိုယ်တော့်နှုတ်မြွက်စကားတော်၏ ဝှက်ထားသောဘဏ္ဍာများက မည်သည့်သံသယမဆိုကို ပပျောက်စေနိုင်ပြီး အမှန်တရား၏အလင်းကို တွေ့မြင်ရန် ကျွန်ုပ်တို့ကိုကူညီပေးသည်။

၁၁။ ဧလိရှဲ၏ကျွန်သည် သံသယစိတ်ကြောင့် မည်သို့ထိခိုက်ခဲ့သနည်း။

^၁၁၄ ဓမ္မရာဇဝင် ၆:၁၁-၁၈ တွင် ကြောက်ရွံ့၍သံသယဝင်နေသော ဘုရားသခင့်ကျေးကျွန်တစ်ဦးအား ဆုတောင်းခြင်းက မည်သို့အကူအညီပေးခဲ့သည်ဟူသော ထင်ရှားသည့်ပုံနမူနာတစ်ရပ်ကို တွေ့ရှိရသည်။ ဧလိရှဲ၏ကျွန်သည် ဝိညာဉ်ရေးဆိုင်ရာအမြော်အမြင် ကင်းမဲ့ခဲ့သည်။ ရှုရိစစ်တပ်အားဖြင့် ဝန်းရံပိတ်ဆို့ခြင်းခံနေရသူ ဘုရားသခင်၏ပရောဖက်အား ထောက်မမှုပေးရန် ထိုတွင် ကောင်းကင်ဗိုလ်ခြေများရှိခဲ့ကြောင်း သူ၌ပိုင်းခြားသိမြင်နိုင်ခြင်းမရှိခဲ့ချေ။ ထိုကျွန်သည် ကြောက်ရွံ့လျက်ဤသို့ဟစ်အော်ခဲ့သည်– “အိုသခင်၊ အဘယ်သို့ပြုရပါမည်နည်း။” ဧလိရှဲက မည်သို့တုံ့ပြန်ခဲ့သနည်း။ “မစိုးရိမ်နှင့်။ ငါတို့ဘက်၌နေသောသူတို့သည် ရန်သူတို့ဘက်၌နေသောသူတို့ထက် သာ၍များကြသည်။” သို့သော် ထိုကျွန်ယုံကြည်လာဖို့ မည်သို့ဖြစ်ခဲ့သနည်း။ သူသည် ကောင်းကင်ဗိုလ်ခြေတို့ကို မမြင်တွေ့နိုင်ချေ။

၁၂။ (က) ထိုကျွန်၏သံသယမှာ မည်သို့ပြေပျောက်သွားခဲ့သနည်း။ (ခ) ကျွန်ုပ်တို့တွင် ရှိလာနိုင်သည့် မည်သည့်သံသယကိုမဆို မည်သို့ပြေပျောက်စေနိုင်သနည်း။

^၁၂“ ‘အိုထာဝရဘုရား ဤသူသည်မြင်နိုင်မည်အကြောင်း သူ၏မျက်စိကိုဖွင့်တော်မူပါ’ ဟု ဆုတောင်းသည်အတိုင်း ထာဝရဘုရားသည် ထိုလုလင်၏မျက်စိကိုဖွင့်တော်မူသဖြင့် ဧလိရှဲပတ်လည်၌ တစ်တောင်လုံးသည် မီးမြင်း၊ မီးရထားနှင့်ပြည့်သည်ကိုမြင်လေ၏။” ဤဖြစ်ရပ်တွင် ယေဟောဝါသည် ကောင်းကင်စစ်သည်ဗိုလ်ပါများက ဧလိရှဲကို အကာအကွယ်ပေးနေကြောင်း အဆိုပါကျွန်ကိုတွေ့မြင်စေခဲ့သည်။ သို့သော် ယနေ့တွင် ထပ်တူဘုရားသခင်၏ကူညီပေးခြင်းကို ကျွန်ုပ်တို့ မမျှော်လင့်သင့်ချေ။ ထိုပရောဖက်၏ကျေးကျွန်သည် မိမိ၏ယုံကြည်ခြင်းကို သန်စွမ်းစေရန်အတွက် လေ့လာမှုပြုဖို့ သမ္မာကျမ်းစာအပြည့်အစုံ သူ့တွင်မရှိကြောင်း သတိရပါ။ ကျွန်ုပ်တို့တွင် သမ္မာကျမ်းစာလက်ဝယ်ရှိထားကြ၏။ ယင်းကို ကျွန်ုပ်တို့များများအသုံးပြုမည်ဆိုလျှင် ကျွန်ုပ်တို့၏ယုံကြည်ခြင်းသည် အလားတူသန်စွမ်းလာနိုင်သည်။ ဥပမာ၊ ကျွန်ုပ်တို့သည် ကိုယ်တော်၏ကောင်းကင်တရားရုံးတွင်ရှိ ယေဟောဝါအကြောင်း ဖော်ပြထားသည့်မှတ်တမ်းအမြောက်အမြားကို စေ့စေ့တွေးတောနိုင်သည်။ ယင်းတို့က ယနေ့ ကမ္ဘာချီပညာပေးရေးလုပ်ငန်းတွင် မိမိ၏ကျေးကျွန်များကို ထောက်ပံ့ပေးနေသည့် ကောင်းကင်ဆိုင်ရာအဖွဲ့အစည်းတစ်ခု ယေဟောဝါ၌ရှိထားကြောင်း သံသယဝင်စရာအကြောင်း လုံးဝမရှိစေပါ။—ဟေရှာယ ၆:၁-၄; ယေဇကျေလ ၁:၄-၂၈; ဒံယေလ ၇:၉၊ ၁၀; ဗျာဒိတ် ၄:၁-၁၁; ၁၄:၆၊ ၇။

စာတန်၏နည်းပရိယာယ်များကို သတိပြုလော့!

၁၃။ အမှန်တရားအပေါ် ကျွန်ုပ်တို့၏ကိုင်စွဲထားမှုကို အားနည်းသွားစေရန် မည်သည့်နည်းအားဖြင့် စာတန်ကြိုးစားသနည်း။

^၁၃ကျွန်ုပ်တို့၏ဝိညာဉ်ရေးနှင့် အမှန်တရားကိုင်စွဲခြင်းကို အားနည်းသွားစေသည့် စာတန်၏အခြားနည်းလမ်းအချို့ကား အဘယ်နည်း။ ယင်းတို့ထဲမှတစ်ခုမှာ အကျင့်ယိုယွင်းခြင်းဖြစ်သည်၊ ယင်း၏အမျိုးမျိုးကွဲပြားသော ထင်ရှားပြသသည့်အရာအားလုံး ပါဝင်၏။ ယနေ့ လိင်ရူးထနေသည့်လောကတွင် ချစ်ကြိုက်မှုတစ်ခုဟုခေါ်ဆိုသောအရာ (ဖောက်ပြန်ခြင်းအတွက် စကားယဉ်တစ်လုံး) သို့မဟုတ် တစ်ညတာဆက်ဆံမှု (အလေးအနက်မထားသော မတရားမေထုန်) တို့မှာ ဘာပဲဖြစ်ဖြစ် ကောင်းကောင်းပျော်ပါးဖို့ စိတ်ပိုင်းဖြတ်ထားကြသည့် အပျော်အပါးကိုအဓိကထားသော လူမျိုးဆက်တစ်ဆက်အတွက် သမားရိုးကျဖြစ်လာလေပြီ။ ရုပ်ရှင်များ၊ တီဗွီနှင့် ဗီဒီယိုများက ဤဘဝပုံစံမျိုးကိုမြှင့်တင်ပေးသည်။ အပြာဓာတ်ပုံတို့သည် လူထုဆက်သွယ်ရေး၊ အထူးသဖြင့် အင်တာနက်တွင်းသို့ စိမ့်ဝင်ပျံ့နှံ့လေသည်။ ဖြားယောင်းသွေးဆောင်မှုက စူးစမ်းလိုသူကို စောင့်မျှော်နေသည်။—၁ သက်သာလောနိတ် ၄:၃-၅; ယာကုပ် ၁:၁၃-၁၅။

၁၄။ ခရစ်ယာန်အချို့တို့သည် စာတန့်နည်းပရိယာယ်များ၏ သားကောင်အဖြစ်သို့ အဘယ်ကြောင့် ကျရောက်သွားကြသနည်း။

^၁၄ခရစ်ယာန်အချို့သည် မိမိတို့၏စူးစမ်းလိုစိတ်ကို ခွင့်ပြုထားကာ အရှုံးပေးလိုက်ကြပြီး နူးညံ့သိမ်မွေ့သော သို့မဟုတ် ပီပြင်သောအပြာကားဆိုင်ရာပုံရိပ်များကို ကြည့်ရှုခြင်းအားဖြင့် မိမိတို့၏စိတ်နှလုံးကို ညစ်ညမ်းစေခဲ့ကြပြီ။ သူတို့သည် စာတန်၏ဖြားယောင်းသွေးဆောင်သော ထောင်ချောက်ထဲသို့ ကျရောက်စေရန် မိမိတို့ကိုယ်ကိုခွင့်ပြုလိုက်ကြ၏။ ထိုသို့ပြုခြင်းက ဝိညာဉ်ရေးရာသင်္ဘောပျက်ခြင်းသို့ ဦးတည်စေလေ့ရှိသည်။ ထိုသို့သောသူတို့သည် “မတရားသောအမှုအရာ၌ နို့စို့သူငယ်” ဆက်ဖြစ်ရန် ပျက်ကွက်ခဲ့ကြသည်။ သူတို့သည် “ဉာဏ်အရာ၌ အသက်ကြီးသောသူ” ဖြစ်မလာကြချေ။ (၁ ကောရိန္သု ၁၄:၂၀) နှစ်စဉ် ဘုရားသခင့်နှုတ်မြွက်စကားတော်မူများနှင့် စံနှုန်းများကို မလိုက်နာကြသည့်အတွက် ထောင်နှင့်ချီသောသူတို့သည် အခကိုပေးဆက်ကြရ၏။ သူတို့သည် မိမိတို့၏ “ဘုရားသခင်ပြင်ဆင်တော်မူသောလက်နက်စုံကို” ဝတ်ဆင်ရန်နှင့် ဆက်ထိန်းသိမ်းထားရန် လစ်ဟင်းခဲ့ကြသည်။—ဧဖက် ၆:၁၀-၁၃; ကောလောသဲ ၃:၅-၁၀; ၁ တိမောသေ ၁:၁၈၊ ၁၉။

ကျွန်ုပ်တို့တွင်ရှိသောအရာကို တန်ဖိုးထားပါ

၁၅။ အချို့တို့က မိမိတို့၏ဝိညာဉ်ရေးရာအမွေအနှစ်ကို တန်ဖိုးထားလေးမြတ်ရန်ခက်ခဲသည်ဟု အဘယ်ကြောင့် တွေ့မြင်ကြသနည်း။

^၁၅“သမ္မာတရားကိုလည်းသိကြသဖြင့်၊ ထိုတရားသည် သင်တို့ကိုလွှတ်လိမ့်မည်” ဟု ယေရှုမိန့်တော်မူ၏။” (ယောဟန် ၈:၃၂) သက်သေခံအများစုသည် မိမိတို့၏ယခင်ဘဝပုံစံနှင့် ဘာသာရေးအသင်းအဖွဲ့များမှ စွန့်ခွာခွဲထွက်ခဲ့ကြသည်။ သို့ဖြစ်၍ သူတို့သည် အမှန်တရားကဖြစ်ပေါ်စေသော လွတ်လပ်မှုကို သာ၍လွယ်လင့်တကူတန်ဖိုးထားကြပေမည်။ အခြားတစ်ဖက်တွင်မူ အမှန်တရားထဲ၌ရှိကြသောမိဘများ၏ ကျွေးမွေးပြုစုခြင်းဖြင့်ကြီးပြင်းလာကြသော လူငယ်အချို့သည် မိမိတို့၏ဝိညာဉ်ရေးရာအမွေအနှစ်ကို တန်ဖိုးထားရန် အခက်တွေ့ကြပေမည်။ သူတို့သည် မှားသောဘာသာရေး၏ အစိတ်အပိုင်းတစ်ခု သို့မဟုတ် ၎င်း၏ အပျော်အပါးလိုက်စားမှု၊ မူးယစ်ဆေးဝါးသုံးစွဲမှုနှင့် အကျင့်ယိုယွင်းမှုတို့ကိုအလေးပေးသော ဤလောက၏အစိတ်အပိုင်းတစ်ခုတွင် မည်သည့်အခါကမျှ မပါဝင်ခဲ့ဖူးချေ။ အကျိုးဆက်အနေနှင့် သူတို့သည် ကျွန်ုပ်တို့၏ဝိညာဉ်ရေးပရဒိသုနှင့် စာတန်၏ယိုယွင်းသောလောကအကြား လုံးဝကွာခြားချက်ကို တွေ့မြင်ရန် ပျက်ကွက်သွားကြပေမည်။ အချို့တို့မှာ မိမိတို့လက်လွတ်သွားရာကို သိမြင်ရန် ဤလောက၏အဆိပ်အတောက်ကို မြည်းစမ်းကြည့်ဖို့ ဖြားယောင်းသွေးဆောင်မှုကို အလျှော့ပေးလိုက်ကြသည့်အထိပင်ဖြစ်သည်တကား!—၁ ယောဟန် ၂:၁၅-၁၇; ဗျာဒိတ် ၁၈:၁-၅။

၁၆။ (က) ကျွန်ုပ်တို့ကိုယ်ကို မည်သည့်မေးခွန်းများ မေးသင့်သနည်း။ (ခ) ကျွန်ုပ်တို့ပြုလုပ်ရန် သွန်သင်အားပေးခံရသည့်အရာများကား အဘယ်နည်း။

^၁၆နာကျင်မှုနှင့် ဝေဒနာကိုသိရှိရန် ကျွန်ုပ်တို့၏လက်ချောင်းလေးများကို မီးရှို့ ကြည့်ဖို့ အမှန်တကယ်လိုအပ်သလော။ အခြားသူတို့၏ အပျက်သဘောပါသောအတွေ့အကြုံများမှ ကျွန်ုပ်တို့ သင်ယူ၍မရနိုင်သလော။ တစ်စုံတစ်ခုကို ကျွန်ုပ်တို့ လက်လွတ်၊ မလွတ်သိမြင်ရန် ဤလောက၏ “ရွှံ့” ထဲသို့ ကျွန်ုပ်တို့တစ်ဖန်ပြန်သွားရန် လိုအပ်မည်လော။ (၂ ပေတရု ၂:၂၀-၂၂) ယခင်က စာတန့်လောက၏အစိတ်အပိုင်းဖြစ်ခဲ့ကြသော ပထမရာစုရှိခရစ်ယာန်များကို ပေတရုက ဤသို့သတိပေးခဲ့သည်– “[ပြင်ပ] လူတို့၏အလိုသို့လိုက်၍၊ ကိလေသာညစ်ညူးခြင်း၊ ကာမတပ်မက်ခြင်း၊ စပျစ်ရည်နှင့်ယစ်မူးခြင်း၊ ပွဲလုပ်ခြင်း၊ သောက်ကြူးခြင်း၊ . . . ကိုကိုးကွယ်ခြင်း၌ကျင်လည်၍၊ ငါတို့လွန်စေပြီးသောအသက်ကာလသည် ငါတို့အားလောက်ပေ၏။” သေချာပါသည်၊ ဘဝတွင်မည်မျှအထိယုတ်ညံ့နိုင်ကြောင်း သိမြင်ရန် ကျွန်ုပ်တို့သည် ဤလောက၏ “ကာမဂုဏ်၌ လွန်ကျူးညစ်ညူး” မှုကို တွေ့ကြုံခံစားကြည့်ရန် မလိုအပ်ချေ။ (၁ ပေတရု ၄:၃၊ ၄) ယင်းနှင့်ဆန့်ကျင်လျက် ကျွန်ုပ်တို့သည် သမ္မာကျမ်းစာပညာရေးအတွက် အချက်အချာကျသော ကျွန်ုပ်တို့၏ဘုရားသခင့်နိုင်ငံတော်ခန်းမများ၌ ယေဟောဝါ၏မြင့်မားသော ကျင့်ဝတ်စံနှုန်းများကို သွန်သင်ခံရကြသည်။ ထို့ပြင် ကျွန်ုပ်တို့တွင် အမှန်တရားရှိကြောင်း၊ သို့နှင့် အမှန်တရားကို ကျွန်ုပ်တို့၏ကိုယ်ပိုင်ဖြစ်စေကြောင်း သက်သေပြဖို့ ကျွန်ုပ်တို့၏ ဆင်ခြင်နိုင်စွမ်းကိုအသုံးပြုရန် အားပေးခံရကြသည်။—ယောရှု ၁:၈; ရောမ ၁၂:၁၊ ၂; ၂ တိမောသေ ၃:၁၄-၁၇။

ကျွန်ုပ်တို့၏နာမည်မှာ အမည်ခံအမှတ်အသားသက်သက်မျှမဟုတ်

၁၇။ ကျွန်ုပ်တို့သည် ယေဟောဝါ၏ထိရောက်သောသက်သေများ မည်သို့ဖြစ်နိုင်ကြသနည်း။

^၁၇အမှန်တရားကို ကျွန်ုပ်တို့၏ကိုယ်ပိုင်ဖြစ်စေမည်ဆိုလျှင် ကျွန်ုပ်တို့သည် သင့်လျော်သည့်အချိန်အခါတိုင်းတွင် အခြားသူတို့အား ဝေမျှရန်ရှာကြံပါလိမ့်မည်။ ယင်းက ကျွန်ုပ်တို့သည် စိတ်ဝင်စားမှုမပြသောသူတို့အား ထိုသို့အတင်းအကျပ်ပြုရလိမ့်မည်ဟု ဆိုလိုနေခြင်းမဟုတ်ချေ။ (မဿဲ ၇:၆) ယင်းအစား ယေဟောဝါသက်သေများအဖြစ် ကျွန်ုပ်တို့ကိုယ်ကို ဖော်ပြရန်နှင့်ပတ်သက်၍ ကျွန်ုပ်တို့ရှက်ရွံ့လိမ့်မည်မဟုတ်ချေ။လူတစ်ဦးသည် စိတ်ရင်းမှန်ဖြင့်မေးခွန်းတစ်ခုမေးကာ စိတ်ဝင်စားမှုအရိပ်အခြည်ပြမည် သို့မဟုတ် ကျမ်းစာစာပေတစ်ခုခုကို လက်ခံလျှင် ကျွန်ုပ်တို့သည် မိမိတို့၏မျှော်လင့်ချက်ကို ဝေမျှရန်အသင့်ပြင်ဆင်ထားကြပေမည်။ မှန်ပါသည်၊ ယင်းက ကျွန်ုပ်တို့သည် မည်သည့်နေရာတွင်မဆို—အိမ်၌၊ လုပ်ငန်းခွင်၌၊ ကျောင်း၌၊ စတိုးဆိုင်၌ သို့မဟုတ် အပန်းဖြေရာနေရာများ၌—ရှိနေပါစေ စာပေတစ်မျိုးမျိုး အမြဲရှိထားကြရကြောင်းကို ဆိုလိုပေမည်။—၁ ပေတရု ၃:၁၃-၁၅။

၁၈။ ခရစ်ယာန်များအဖြစ် မိမိတို့ကိုယ်ကို အထင်အရှားဖော်ပြခြင်းက ကျွန်ုပ်တို့၏ဘဝတွင် အကျိုးပြုသောတွန်းအားတစ်ခု မည်သို့ဖြစ်မည်နည်း။

^၁၈ကျွန်ုပ်တို့သည် ခရစ်ယာန်များအဖြစ် မိမိတို့ကိုယ်ကို အထင်အရှားဖော်ပြကြသောအခါ စာတန်၏မသိမသာတိုက်ခိုက်မှုများအပေါ် ကျွန်ုပ်တို့၏ကာကွယ်မှုကို ပိုမိုခိုင်ခံ့စေသည်။ မွေးနေ့ပွဲတစ်ခု သို့မဟုတ် ခရစ္စမတ်ပါတီ သို့မဟုတ် ရုံးအလိုက်ထီထိုးမှုတို့ရှိလာလျှင် လုပ်ဖော်ကိုင်ဖက်ချင်းတို့က “သူ့ကိုသွားမနှောင့်ယှက်နဲ့၊ သူက ယေဟောဝါသက်သေတစ်ယောက်ပဲ” ဟုပြောကြလေ့ရှိပေမည်။ ထိုအကြောင်းကြောင့်ပင် လူတို့သည် ကျွန်ုပ်တို့၏ရှေ့မှောက်တွင် ယုတ်ညံ့သောပြက်လုံးများကို ပြောဆိုလိုစိတ်မရှိဖြစ်ပေမည်။ သို့ဖြစ်၍ တမန်တော်ပေတရုက ဤသို့ထောက်ပြခဲ့သကဲ့သို့ပင် ကျွန်ုပ်တို့၏ ခရစ်ယာန်ရပ်တည်မှုကိုသိရှိစေခြင်းက ကျွန်ုပ်တို့၏ဘဝတွင် အပြုသဘောပါသောတွန်းအားတစ်ခုဖြစ်သည်– “သင်တို့သည် ကောင်းသောတရားကိုကျင့်သောသူဖြစ်လျှင် အဘယ်သူညှဉ်းဆဲမည်နည်း။ ဖြောင့်မတ်ခြင်းတရားကြောင့်ဆင်းရဲခံရလျှင်မူကား မင်္ဂလာရှိ [“ပျော်ရွှင်၊” ကဘ] ကြ၏။”—၁ ပေတရု ၃:၁၃၊ ၁၄။

၁၉။ ကျွန်ုပ်တို့သည် နောက်ဆုံးသောကာလ၏ အတွင်းပိုင်းကျကျတွင်ရှိကြောင်း မည်သို့သိရှိကြသနည်း။

^၁၉အမှန်တရားကို ကိုယ်ပိုင်ဖြစ်စေခြင်း၏ နောက်ထပ်အကျိုးကျေးဇူးကား ဤကာလသည် အစီအစဉ်စနစ်၏နောက်ဆုံးနေ့ရက်များ အမှန်ဖြစ်ကြောင်း ကျွန်ုပ်တို့ကို ယုံကြည်စိတ်ချစေမည်ဖြစ်သည်။ သမ္မာကျမ်းစာ၏ပရောဖက်ပြုချက်များစွာသည် ကျွန်ုပ်တို့၏အချိန်တွင် ယင်းတို့၏အထွတ်သို့ရောက်လာကြောင်း ကျွန်ုပ်တို့သိရှိကြမည်။ * “နောင်ကာလသည် ခဲယဉ်းသောကာလဖြစ်မည်” ဟူသော ပေါလု၏သတိပေးချက်ကို လွန်ခဲ့သောရာစုနှစ်၏ ကြောက်မက်ဖွယ်ရာကောင်းသော ဖြစ်ရပ်များက ကောင်းစွာထောက်ခံပါသည်။ (၂ တိမောသေ ၃:၁-၅; မာကု ၁၃:၃-၃၇) မကြာသေးမီက သတင်းစာဆောင်းပါးတစ်ခုတွင် ၂၀ ရာစုနှင့်ပတ်သက်၍ “ရိုင်းစိုင်းကြမ်းတမ်းသောခေတ်ကာလအဖြစ် သတိရကြပေဦးမည်” ဟူသောခေါင်းစီးပါရှိခဲ့သည်။ အဆိုပါဆောင်းပါးက ဤသို့ဖော်ပြသည်– “လူသတ်မှုအများဆုံးရာစုနှစ်၏ ဒုတိယထက်ဝက် [၁၉၅၀-၂၀၀၀] တွင် ၁၉၉၉ သည် သေကျေမှုအများဆုံးနှစ် ဖြစ်ခဲ့သည်။”

၂၀။ ယခုအချိန်သည် အဘယ်အမှုကိုဆောင်ရွက်ရသည့်အချိန် ဖြစ်သနည်း။

^၂၀ယခုအချိန်သည် တိမ်းယိမ်းရမည့်အချိန်မဟုတ်ပါ။ လူမျိုးအပေါင်းတို့ထံ သက်သေအဖြစ် ကမ္ဘာတစ်ဝန်းလုံးတွင် တစ်ခါနှင့်မျှမတူအောင်ပြီးမြောက်လျက်ရှိသော အကြီးမားဆုံး ကျမ်းစာပညာပေးလုပ်ငန်းအပေါ် ယေဟောဝါ၏ကောင်းချီးမှာ ထင်ရှားသောသက်သေ သာဓကဖြစ်၏။ (မဿဲ ၂၄:၁၄) အမှန်တရားကို သင့်ကိုယ်ပိုင်ဖြစ်စေပြီး ယင်းကို အခြားသူတို့ထံဝေမျှပါ။ သင်၏ထာဝရအနာဂတ်မှာ အဘယ်အရာကို သင်ယခုပြုလုပ်သည်ဟူသည့်အပေါ် မူတည်သည်။ လက်အားလျှော့ခြင်းသည် ယေဟောဝါ၏ကောင်းချီးနှင့် ထိုက်တန်မည်မဟုတ်ချေ။ (လုကာ ၉:၆၂) ယင်းအစား ယခုအချိန်သည် “သခင်ဘုရား၏အမှုတော်ကိုဆောင်ရွက်၍ အကျိုးကြီးသည်ကိုသိမှတ်သဖြင့် တည်ကြည်သောစိတ်နှင့်ပြည့်စုံ၍၊ မရွေ့လျော့မတိမ်းယိမ်းဘဲလျက်၊ သခင်ဘုရား၏အမှုတော်ကို ကြိုးစားအားထုတ်ကြ” ရန်အချိန်ဖြစ်သည်။—၁ ကောရိန္သု ၁၅:၅၈။

[အောက်ခြေမှတ်ချက်များ]

^ အပိုဒ်၊ 19 ကင်းမျှော်စင် ၂၀၀၀၊ ဇန်နဝါရီ ၁၅၊ စာမျက်နှာ ၁၂-၁၄ ရှု။ အပိုဒ် ၁၃-၁၈ က ၁၉၁၄ ခုနှစ်မှစ၍ ကျွန်ုပ်တို့သည် နောက်ဆုံးနေ့ရက်များတွင် အသက်ရှင်နေရကြောင်း ဖော်ပြပေးသည့် ခိုင်လုံသောသာဓကခြောက်ခုကို သုံးသပ်ဖော်ပြသည်။

သင်မှတ်မိသလော

• ကျွန်ုပ်တို့သည်သံသယများကို မည်သို့ပြေပျောက်စေနိုင်သနည်း။

• ဧလိရှဲကျွန်၏ ပုံနမူနာမှ ကျွန်ုပ်တို့ အဘယ်အရာကိုသင်ယူနိုင်သနည်း။

• အဘယ်ကိုယ်ကျင့်တရားဆိုင်ရာ သွေးဆောင်မှုများကို ကျွန်ုပ်တို့ အမြဲတစေကာကွယ်ကြရမည်နည်း။

• ကျွန်ုပ်တို့သည် မိမိတို့ကိုယ်ကို ယေဟောဝါသက်သေများအဖြစ် အဘယ်ကြောင့် အထင်အရှားဖော်ပြသင့်သနည်း။

[လေ့လာရန်မေးခွန်းများ]

[စာမျက်နှာ ၁၀ ပါ ရုပ်ပုံ]

ပုံမှန်ကျမ်းစာလေ့လာခြင်းနှင့် ဆုတောင်းခြင်းက သံသယများပြေပျောက်သွားစေဖို့ ကျွန်ုပ်တို့ကို ကူညီပေးနိုင်

[စာမျက်နှာ ၁၁ ပါ ရုပ်ပုံ]

ဧလိရှဲ၏ကျွန်၌ သံသယများရှိခဲ့ပြီး အမြင်အာရုံတစ်ခုအားဖြင့် ဖြေရှင်းပေးခြင်းခံရ

[စာမျက်နှာ ၁၂ ပါ ရုပ်ပုံ]

ဘီနင်ရှိ ဘုရားသခင့်နိုင်ငံတော်ခန်းမများကဲ့သို့သော ဤနေရာတစ်ခုတွင် ယေဟောဝါ၏မြင့်မားသော ကျင့်ဝတ်စံနှုန်းများကို ကျွန်ုပ်တို့သွန်သင်ပေးခြင်းခံရ

ကင်းမျှော်စင်—လေ့လာရန် စာစောင်