ကိုယ်တော့်အမျက်တော်နေ့မရောက်မီ ယေဟောဝါကိုရှာကြလော့
ကိုယ်တော့်အမျက်တော်နေ့မရောက်မီ ယေဟောဝါကိုရှာကြလော့
“ယေဟောဝါကို ရှာကြလော့။ ဖြောင့်မတ်ခြင်းနှင့် နူးညံ့သိမ်မွေ့ခြင်းကို ရှာကြလော့။ ယေဟောဝါအမျက်ထွက်တော်မူသောနေ့၌ သင်တို့သည် ပုန်းရှောင်ရာကို တွေ့ကောင်းတွေ့ကြလိမ့်မည်။”—ဇေဖနိ ၂:၃၊ ကဘ။
၁။ ပရောဖက်ပြုလုပ်ငန်းကို ဇေဖနိစတင်သောအခါ ယုဒပြည်၏ဝိညာဉ်ရေးအခြေအနေကား မည်သို့ရှိခဲ့သနည်း။
ဇေဖနိသည် ယုဒပြည်သမိုင်း၏ အရေးတကြီးအချိန်တွင် သူ၏ပရောဖက်ပြုလုပ်ငန်းကိုစတင်ခဲ့သည်။ လူမျိုးတော်၏ဝိညာဉ်ရေးအခြေအနေမှာ ကျဆင်းနေခဲ့သည်။ လူတို့သည် ယေဟောဝါအားယုံကြည်ကိုးစားကြမည့်အစား လမ်းညွှန်မှုရဖို့အတွက် အယူမှားယဇ်ပုရောဟိတ်များနှင့် နက္ခတ်ဗေဒပညာရှင်များကို မျှော်ကိုးခဲ့ကြသည်။ တိုင်းပြည်အတွင်း ဗာလဝတ်ပြုရေးနှင့် ၎င်း၏မျိုးအောင်အခမ်းအနားများ ပျံ့နှံ့ခဲ့သည်။ ပြည်သူ့ခေါင်းဆောင်များ—မင်းညီမင်းသားများ၊ မှူးမတ်များနှင့် တရားသူကြီးများ—သည် အကာအကွယ်ပေးရမည့်သူများကိုပင် ဖိနှိပ်ချုပ်ချယ်လျက်ရှိကြသည်။ (ဇေဖနိ ၁:၉; ၃:၃) ယေဟောဝါသည် ‘ကိုယ်တော်၏လက်ကိုဆန့်တန်း’ ပြီးယုဒပြည်နှင့် ယေရုရှလင်မြို့ကိုဖျက်ဆီးပစ်ဖို့ ဆုံးဖြတ်ခဲ့ခြင်းမှာ အံ့ဩစရာမဟုတ်ချေ!—ဇေဖနိ ၁:၄။
၂။ ယုဒပြည်ရှိ ဘုရားသခင့်သစ္စာရှိကျေးကျွန်များအတွက် အဘယ်မျှော်လင့်ချက်ရှိခဲ့သနည်း။
၂ သို့သော် အခြေအနေမည်မျှဆိုးဝါးနေခဲ့ပါစေ မျှော်လင့်ချက်ရောင်ခြည်ရှိသည်။ ယခု အာမုန်၏သားတော် ယောရှိနန်းထိုင်နေပြီ။ ယောရှိသည် လူငယ်လေးတစ်ဦးမျှသာဖြစ်သော်လည်း ယေဟောဝါအားအမှန်ချစ်မြတ်နိုးခဲ့သည်။ ဘုရင်အသစ်က ယုဒပြည်တွင် စစ်မှန်သောဝတ်ပြုရေးကို ပြန်လည်ထူထောင်ပေးမည်ဆိုပါက ဘုရားသခင်အားသစ္စာရှိစွာဝတ်ပြုနေကြသူ လူနည်းစုအတွက် အားရှိစရာပါတကား! အခြားသူများလည်း သူတို့နှင့်ပူးပေါင်းရန် လှုံ့ဆော်ခံရပြီး ယေဟောဝါ၏အမျက်တော်ထွက်ရာနေ့တွင် ကာကွယ်ခံရပေမည်။
ကာကွယ်စောင့်ရှောက်ခံရဖို့ တောင်းဆိုချက်များ
၃၊ ၄။ လူတစ်ဦးသည် ‘ယေဟောဝါအမျက်ထွက်တော်မူသောနေ့’ ၌အသက်ချမ်းသာရဖို့ အဘယ်တောင်းဆိုချက်သုံးခုကို လိုက်နာရမည်နည်း။
၃ ယေဟောဝါ၏အမျက်တော်နေ့တွင် လူအချို့ အမှန်အသက်ချမ်းသာရနိုင်သလော။ ဇေဖနိ ၂:၂၊ ၃ တွင်အချုပ်ဖော်ပြထားသော သတ်မှတ်ချက်သုံးခုကို သူတို့လိုက်နာကြပါက ရနိုင်ပါသည်။ ထိုအခန်းငယ်များကိုဖတ်ရှုစဉ် ၎င်းတောင်းဆိုချက်များကို အထူးမှတ်သားကြပါစို့။ ဇေဖနိက ဤသို့ရေးသားခဲ့သည်– “အမိန့်တော်အတိုင်းမစီရင်၊ သင်တို့အချိန်သည်ဖွဲကဲ့သို့မလွန်၊ ထာဝရဘုရား၏ပြင်းစွာသောအမျက်တော်သည် သင်တို့အပေါ်သို့မရောက်၊ ထာဝရဘုရား၏အမျက်တော်နေ့သည် သင်တို့အပေါ်သို့မရောက်မီ ကိုယ်ကိုစစ်ကြောကြလော့။ တရားတော်အတိုင်းကျင့်၍ စိတ်နှိမ့်ချသောပြည်သူပြည်သားအပေါင်းတို့၊ ထာဝရဘုရားကိုရှာကြလော့။ ဖြောင့်မတ်ခြင်းနှင့် စိတ်နှိမ့်ချခြင်း [“နူးညံ့သိမ်မွေ့ခြင်း၊” ကဘ] ကိုလည်းရှာကြလော့။ ထာဝရဘုရားအမျက်ထွက်တော်မူသောနေ့၌ သင်တို့သည် ပုန်းရှောင်ရာကိုတွေ့ကောင်းတွေ့ကြလိမ့်မည်။”
၄ သို့ဖြစ်၍ ကာကွယ်စောင့်ရှောက်ခံရရန် လူတစ်ဦးသည် (၁) ယေဟောဝါကိုလည်းကောင်း၊ (၂) ဖြောင့်မတ်ခြင်းနှင့် (၃) နူးညံ့သိမ်မွေ့ခြင်းတို့ကိုလည်းကောင်း ရှာရမည်ဖြစ်သည်။ ဤတောင်းဆိုချက်များသည် ယနေ့ကျွန်ုပ်တို့အတွက် အလွန်စိတ်ဝင်စားဖွယ်ဖြစ်သင့်သည်။ အဘယ်ကြောင့်နည်း။ အကြောင်းမူကား ယုဒပြည်နှင့် ယေရုရှလင်မြို့သည် ဘီ.စီ.အီး. ခုနစ်ရာစုတွင် စာရင်းရှင်းသည့်နေ့ကို ရင်ဆိုင်ခဲ့ကြရသကဲ့သို့ ခရစ်ယာန်ဘောင်နိုင်ငံများ—အမှန်မှာ လူဆိုးအားလုံးတို့—သည် လာမည့် “ကြီးစွာသော [ဆင်းရဲခြင်း]” ၌ယေဟောဝါဘုရားသခင်နှင့် နောက်ဆုံးစာရင်းရှင်းဖို့ ရှေးရှုနေကြရသောကြောင့်တည်း။ (မဿဲ ၂၄:၂၁) ထိုအချိန်၌ ပုန်းရှောင်ရာကိုတွေ့လိုသူ မည်သူမဆိုသည် ယခုပြတ်ပြတ်သားသားလုပ်ဆောင်ရပေမည်။ အဘယ်နည်းဖြင့်နည်း။ အချိန်မနှောင်းမီ ယေဟောဝါကိုလည်းကောင်း၊ ဖြောင့်မတ်ခြင်းနှင့် နူးညံ့သိမ်မွေ့ခြင်းတို့ကိုလည်းကောင်း ရှာခြင်းဖြင့်တည်း!
၅။ ယနေ့ ‘ယေဟောဝါကိုရှာခြင်း’ တွင်အဘယ်အရာပါဝင်ပတ်သက်သနည်း။
၅ ‘ကျွန်တော်ဟာ ဆက်ကပ်အပ်နှံ၊ နှစ်ခြင်းခံပြီးသား ဘုရားသခင့်ကျေးကျွန်၊ ယေဟောဝါသက်သေတစ်ယောက်ပဲ။ ဒီတောင်းဆိုချက်တွေကို ကျွန်တော်ပြည့်မီပြီးသားမဟုတ်လား’ ဟူ၍ သင်ဆိုကောင်းဆိုမည်။ အမှန်မှာ၊ ယေဟောဝါထံကျွန်ုပ်တို့ကိုယ်ကို ဆက်ကပ်အပ်နှံခြင်းထက် များစွာပါဝင်ပတ်သက်သည်။ ဣသရေလလူမျိုးသည် ဆက်ကပ်အပ်နှံထားသော လူမျိုးဖြစ်သော်လည်း ဇေဖနိခေတ်ရှိ ယုဒလူတို့သည် ထိုဆက်ကပ်အပ်နှံခြင်းနှင့်အညီ မနေထိုင်ခဲ့ကြပေ။ အကျိုးဆက်အနေနှင့် ထိုလူမျိုးတော်သည် နောက်ဆုံးတွင် ပစ်ပယ်ခံခဲ့ရသည်။ ယနေ့ ‘ယေဟောဝါကိုရှာခြင်း’ တွင် ကိုယ်တော်၏မြေကြီးဆိုင်ရာအဖွဲ့အစည်းနှင့် ပေါင်းသင်းရာ၌ ကိုယ်တော်နှင့်နှစ်ကိုယ်ကြား နွေးထွေးသောဆက်ဆံရေးကို ပြုစုပျိုးထောင်ခြင်းနှင့် ဆက်ထိန်းသိမ်းခြင်းတို့ပါဝင်သည်။ ၎င်းက ကိစ္စရပ်များအပေါ် ဘုရားသခင့်ရှုမြင်ပုံကိုသိရှိခြင်းနှင့် ကိုယ်တော်၏ခံစားချက်များကို ဂရုပြုခြင်းကိုဆိုလိုသည်။ ကိုယ်တော်၏နှုတ်မြွက်စကားတော်ကို စေ့စေ့လေ့လာ၊ ဆင်ခြင်သုံးသပ်ပြီး ယင်း၏အကြံပေးချက်ကို ဘဝတွင်ကျင့်သုံးသောအခါ ယေဟောဝါကိုကျွန်ုပ်တို့ရှာကြသည်။ ကျွန်ုပ်တို့သည် စိတ်အားထက်သန်စွာဆုတောင်းပြီး ယေဟောဝါ၏လမ်းညွှန်မှုကိုရှာယူကာ ကိုယ်တော်၏သန့်ရှင်းသောဝိညာဉ်တော်၏ ဦးဆောင်မှုကိုလိုက်လျှောက်နေစဉ် ကိုယ်တော်နှင့်ကျွန်ုပ်တို့၏ဆက်ဆံရေးသည် နက်ရှိုင်းလာပြီး “စိတ်နှလုံးအကြွင်းမဲ့၊ အစွမ်းသတ္တိရှိသမျှ” နှင့်ကိုယ်တော့်အမှုထမ်းဖို့ လှုံ့ဆော်ခံရကြသည်။—တရားဟောရာ ၆:၅; ဂလာတိ ၅:၂၂-၂၅; ဖိလိပ္ပိ ၄:၆၊ ၇; ဗျာဒိတ် ၄:၁၁။
၆။ ကျွန်ုပ်တို့သည် မည်သို့ ‘ဖြောင့်မတ်ခြင်းကိုရှာ’ ကြသနည်း၊ ဤလောက၌ပင်လျှင် အဘယ်ကြောင့်ဖြစ်နိုင်သနည်း။
၆ ဇေဖနိ ၂:၃ တွင်ဖော်ပြထားသော ဒုတိယတောင်းဆိုချက်မှာ ‘ဖြောင့်မတ်ခြင်းကိုရှာ’ ဖို့ဖြစ်သည်။ ကျွန်ုပ်တို့အများစုသည် ခရစ်ယာန်နှစ်ခြင်းအတွက် အရည်အချင်းပြည့်မီနိုင်ဖို့ အရေးပါသောပြောင်းလဲမှုများပြုခဲ့ကြ၏၊ သို့သော် ကျွန်ုပ်တို့၏ဘဝတစ်လျှောက်လုံးတွင် ဘုရားသခင့်ဖြောင့်မတ်သောစံနှုန်းများကို ဆက်လက်စွဲကိုင်ကြရမည်ဖြစ်သည်။ ဤအပိုင်းကဏ္ဍတွင် အစကောင်းခဲ့ကြသူအချို့သည် လောကကသူတို့ကိုညစ်ညမ်းစေဖို့ ခွင့်ပြုခဲ့ကြ၏။ လိင်အကျင့်ယိုယွင်းခြင်း၊ လိမ်လည်ခြင်းနှင့် အခြားအပြစ်တို့ကို သာမန်ကိစ္စအဖြစ်ရှုမြင်သူများနှင့် ကျွန်ုပ်တို့ဝိုင်းရံခံနေရသောကြောင့် ဖြောင့်မတ်ခြင်းကိုရှာဖို့ မလွယ်ကူချေ။ သို့တိုင် ယေဟောဝါ၏နှစ်သက်မှုကိုရရန် စိတ်ပြင်းပြမှုသည် လောကနှင့်ရောနှောဖို့ကြိုးစားခြင်းဖြင့် လောက၏နှစ်သက်မှုကိုရလိုသည့် မည်သည့်တိမ်းညွှတ်မှုကိုမဆို အနိုင်ယူစေသည်။ ယုဒပြည်သည် ဘုရားတရားမဲ့သည့်အိမ်နီးချင်းနိုင်ငံများကို တုပခြင်းကြောင့် ဘုရားသခင့်မျက်နှာသာတော်ကို ဆုံးရှုံးခဲ့သည်။ သို့ဖြစ်၍ ကျွန်ုပ်တို့သည် လောကကိုတုပမည့်အစား “မှန်သောဖြောင့်မတ်ခြင်း၊ သန့်ရှင်းခြင်း . . . အားဖြင့် ဘုရားသခင်နှင့်အတူအမျှ ဖန်ဆင်းသောလူသစ်ကို” ပြုစုပျိုးထောင်ကာ ‘ဘုရားသခင်ကိုအတုယူသူများ’ ဖြစ်ကြပါစို့။—ဧဖက် ၄:၂၄; ၅:၁။
၇။ ကျွန်ုပ်တို့သည် မည်သို့ ‘နူးညံ့သိမ်မွေ့ခြင်းကိုရှာ’ ကြသနည်း။
၇ ဇေဖနိ ၂:၃ တွင်ဖော်ပြထားသော တတိယအချက်မှာ ယေဟောဝါ၏အမျက်တော်နေ့တွင် ကျွန်ုပ်တို့ပုန်းရှောင်လိုလျှင် ‘နူးညံ့သိမ်မွေ့ခြင်းကိုရှာ’ ရမည်ဖြစ်သည်။ ကျွန်ုပ်တို့သည် နေ့စဉ်နေ့တိုင်း မာနကြီးသောယောက်ျား၊ မိန်းမ၊ လူငယ်များနှင့် ထိတွေ့ဆက်ဆံကြရသည်။ သူတို့အတွက် စိတ်နူးညံ့ခြင်းသည် ချွတ်ယွင်းချက်တစ်ခုပင်။ လက်အောက်ခံခြင်းကို တကယ့်ပျော့ညံ့မှုဟု ယူမှတ်ကြသည်။ သူတို့၏ကိုယ်ပိုင် “အခွင့်အရေး” နှင့် ကြိုက်နှစ်သက်ရာကို မည်သည့်နည်းဖြင့်မဆို ထည့်တွက်ပေးရမည်ဟု မှတ်ယူကြကာ မရမနေတောင်းဆိုတတ်ကြသည်၊ တစ်ကိုယ်ကောင်းဆန်ကာ တစ်ယူသန်များဖြစ်ကြသည်။ ထိုသဘောထားအချို့ ကျွန်ုပ်တို့ထံကူးစက်လာလျှင် ဝမ်းနည်းစရာဖြစ်မည်တကား! ယခုအချိန်သည် ‘နူးညံ့သိမ်မွေ့ခြင်းကိုရှာ’ ရန်အချိန်ဖြစ်သည်။ မည်သို့အားဖြင့်နည်း။ ဘုရားသခင်အားလက်အောက်ခံခြင်း၊ ကိုယ်တော်၏ဆုံးမပဲ့ပြင်ခြင်းကို နှိမ့်ချစွာလက်ခံခြင်းနှင့် ကိုယ်တော့်အလိုတော်ကိုဆောင်ခြင်းအားဖြင့်ဖြစ်သည်။
အဘယ်ကြောင့် ပုန်းရှောင်ရာကို “တွေ့ကောင်းတွေ့” မည်နည်း
၈။ ဇေဖနိ ၂:၃ တွင် “တွေ့ကောင်းတွေ့ . . . လိမ့်မည်” ဟူသောစကားလုံးကိုအသုံးပြုထားခြင်းက အဘယ်အရာကိုဖော်ပြသနည်း။
၈ ဇေဖနိ ၂:၃ က “ထာဝရဘုရား [“ယေဟောဝါ”၊ ကဘ] အမျက်ထွက်တော်မူသောနေ့၌ သင်တို့သည် ပုန်းရှောင်ရာကို တွေ့ကောင်းတွေ့ကြလိမ့်မည်” ဟုဆိုထားကြောင်း သတိပြုပါ။ ‘မြေကြီးပေါ်ရှိနူးညံ့သိမ်မွေ့သူများ’ ကိုပြောဆိုရာတွင် “တွေ့ကောင်းတွေ့ . . . လိမ့်မည်” ဟူသောစကားလုံးကို အဘယ်ကြောင့်အသုံးပြုရသနည်း။ ထိုနူးညံ့သိမ်မွေ့သူများသည် အပြုသဘောပါသောခြေလှမ်းများ လှမ်းခဲ့ကြသော်လည်း မိမိတို့ကိုယ်ကို ယုံကြည်စိတ်ချစရာအကြောင်းမရှိပါ။ သစ္စာရှိစွာဖြင့် သူတို့၏ဘဝလမ်းစဉ်၏အဆုံးသို့ မရောက်ကြသေးချေ။ သူတို့အထဲမှအချို့သည် အပြစ်ပြုနိုင်ပါသည်။ ကျွန်ုပ်တို့သည်လည်း အလားတူပင်။ ယေရှုက “အကြင်သူသည် အဆုံးတိုင်အောင်တည်ကြည်၏။ ထိုသူသည် ကယ်တင်ခြင်းသို့ရောက်လိမ့်မည်” ဟုဆိုခဲ့သည်။ (မဿဲ ၂၄:၁၃) မှန်ပါ၏၊ ယေဟောဝါ၏အမျက်တော်နေ့တွင် ကယ်တင်ခံရခြင်းသည် ကိုယ်တော့်မျက်မှောက်၌ ဟုတ်မှန်ရာကို ကျွန်ုပ်တို့ဆက်လုပ်ဆောင်ခြင်းအပေါ် မူတည်သည်။ ၎င်းသည် သင်၏ခိုင်မာသောအဓိဋ္ဌာန်ပြုချက်လော။
၉။ လူငယ်ဘုရင်ယောရှိသည် အဘယ်တည့်မတ်သော အရေးယူဆောင်ရွက်ချက်များကို ပြုလုပ်ခဲ့သနည်း။
၉ ယောရှိမင်းသည် ဇေဖနိ၏စကားများကြောင့် ‘ယေဟောဝါကိုရှာ’ ရန်လှုံ့ဆော်ခံခဲ့ရကြောင်း ထင်ရှားသည်။ ကျမ်းစာက ဤသို့ဆို၏– “[ယောရှိသည်] အသက်တော်ငယ်စဉ် [၁၆ နှစ်ခန့်]၊ နန်းစံရှစ်နှစ်တွင် အဘဒါဝိဒ်၏ဘုရားသခင်ကို ဆည်းကပ် [သို့မဟုတ်၊ ရှာဖွေ] စပြု၏။” (၂ ရာဇဝင်ချုပ် ၃၄:၃) ယောရှိသည် ‘ဖြောင့်မတ်ခြင်းကိုလည်း ဆက်၍ရှာဖွေ’ ခဲ့သည်၊ အကြောင်းမှာ ကျွန်ုပ်တို့ဤသို့ဖတ်ရသည်– “တစ်ဆယ့်နှစ်နှစ်တွင် [ယောရှိအသက် ၂၀ ခန့်ရှိသောအခါ] ယုဒပြည် ယေရုရှလင်မြို့၌ရှိသော ကုန်း၊ အာရှရပင်၊ ထုသောရုပ်တု၊ သွန်းသောရုပ်တုတို့ကို သုတ်သင်ပယ်ရှင်းစပြု၏။ ဗာလဘုရားတို့ယဇ်ပလ္လင်များကို ရှေ့တော်၌ဖြိုချ . . . ကြ၏။” (၂ ရာဇဝင်ချုပ် ၃၄:၃၊ ၄) ယောရှိသည် အရုပ်ကိုးကွယ်ခြင်းနှင့် အခြားမှားယွင်းသောဘာသာရေးထုံးတမ်းများကို တိုင်းပြည်မှ သန့်စင်ပစ်ခြင်းအားဖြင့် ယေဟောဝါ၏နှစ်သက်မှုရဖို့ နှိမ့်ချစွာလုပ်ဆောင်ကာ ‘နူးညံ့သိမ်မွေ့ခြင်းကိုလည်းရှာခဲ့’ သည်။ ဤလုပ်ဆောင်မှုများကြောင့် အခြားစိတ်နူးညံ့သိမ်မွေ့သူများသည် ပျော်ရွှင်ခဲ့လိုက်ကြမည်ဖြစ်ခြင်း!
၁၀။ ဘီ.စီ.အီး. ၆၀၇ တွင် ယုဒပြည်၌ အဘယ်အရာဖြစ်ပျက်ခဲ့သနည်း၊ သို့သော် မည်သူတို့အသက်ချမ်းသာရခဲ့ကြသနည်း။
၁၀ ယောရှိနန်းစံချိန်အတွင်း ဂျူးများစွာသည် ယေဟောဝါထံပြန်လှည့်လာကြသည်။ သို့သော်၊ ဘုရင်ကွယ်လွန်ပြီးနောက် လူအများစုသည် ဘုရားသခင်လုံးဝမနှစ်သက်ရာကိုပြုကျင့်ရန် လမ်းဟောင်းကိုပြန်လိုက်လျှောက်ခဲ့ကြသည်။ ယေဟောဝါစီရင်ချက်ချခဲ့သည့်အတိုင်း ဘီ.စီ.အီး. ၆၀၇ တွင် ဗာဗုလုန်လူမျိုးတို့သည် ယုဒပြည်ကိုဝင်ရောက်သိမ်းပိုက်ကာ ယေရုရှလင်မြို့တော်ကို ဖျက်ဆီးခဲ့ကြသည်။ သို့တိုင် အားလုံးပျက်စီးသွားသည်မဟုတ်ပါ။ ယေဟောဝါ၏ထိုနေ့တွင် ပရောဖက်ယေရမိ၊ အဲသယောပိလူမျိုးဧဗဒမေလက်၊ ယောနဒပ်မှဆင်းသက်လာသူများနှင့် ဘုရားသခင်အားသစ္စာရှိသည့်အခြားသူတို့သည် ပုန်းရှောင်ရာရခဲ့ကြသည်။—ယေရမိ ၃၅:၁၈၊ ၁၉; ၃၉:၁၁၊ ၁၂၊ ၁၅-၁၈။
ဘုရားသခင့်ရန်သူများ—သတိပြုကြ!
၁၁။ ယနေ့ ဘုရားသခင်အားဆက်၍သစ္စာရှိခြင်းသည် အဘယ်ကြောင့်စိန်ခေါ်ချက်တစ်ခုဖြစ်သနည်း၊ သို့သော် ယေဟောဝါလူမျိုးတော်၏ရန်သူများသည် အဘယ်အရာကိုသုံးသပ်လျှင် ကောင်းမည်နည်း။
၁၁ ဤစနစ်ဆိုးအပေါ် ယေဟောဝါ၏အမျက်တော်ထွက်ရာနေ့ကို စောင့်မျှော်နေကြစဉ် ကျွန်ုပ်တို့သည် “အထူးထူးအပြားပြားစုံစမ်းနှောင့်ယှက်ခြင်းနှင့်တွေ့ကြုံ” ကြရသည်။ (ယာကုပ် ၁:၃) လွတ်လပ်စွာဝတ်ပြုကိုးကွယ်ခွင့်ကို တန်ဖိုးထားပါသည်ဟုဆိုသော နိုင်ငံအတော်များများတွင် လိမ္မာပါးနပ်သောဓမ္မဆရာများသည် ဘုရားသခင့်လူမျိုးတော်ကို ပြင်းထန်စွာနှိပ်စက်ညှဉ်းပန်းစေရန် လောကအာဏာပိုင်များကို ဩဇာလွှမ်းမိုးခဲ့ကြသည်။ မသမာသောသူတို့သည် ယေဟောဝါသက်သေများကို “အန္တရာယ်ရှိသောဂိုဏ်း” ဟုရှုတ်ချဖော်ပြကာ သွားပုပ်လေလွင့်ပြောဆိုကြသည်။ သူတို့၏လုပ်ရပ်များကို ဘုရားသခင်သိရှိတော်မူပြီး ၎င်းတို့ကို ပြစ်ဒဏ်စီရင်ပါလိမ့်မည်။ ကိုယ်တော့်ရန်သူများသည် ဖိလိတ္တိလူမျိုးကဲ့သို့သော ရှေးခေတ်ကိုယ်တော့်လူမျိုးတော်၏ရန်သူများ မည်သို့ဖြစ်ပျက်ခဲ့ကြောင်းကို သုံးသပ်ကြည့်ကြလျှင်ကောင်းမည်။ ပရောဖက်ပြုချက်က ဤသို့ဆိုသည်– “အကယ်စင်စစ် ဂါဇမြို့သည် စွန့်ပစ်ရာ၊ အာရှကေလုန်မြို့သည် သုတ်သင်ပယ်ရှင်းရာဖြစ်လိမ့်မည်။ အာဇုတ်မြို့သားတို့ကို မွန်းတည့်အချိန်၌နှင်ထုတ်၍၊ ဧကြုန်မြို့ကိုလည်း ဖြိုဖျက်ကြလိမ့်မည်။” ဖိလိတ္တိမြို့တော်များဖြစ်သော ဂါဇမြို့၊ အာရှကေလုန်မြို့၊ အာဇုတ်မြို့နှင့် ဧကြုန်မြို့တို့သည် လုံးလုံးဖျက်ဆီးခံရကြမည်ဖြစ်၏။—ဇေဖနိ ၂:၄-၇။
၁၂။ ဖိလိတ္တိ၊ မောဘနှင့် အမ္မုန်လူမျိုးတို့ မည်သို့ဖြစ်ပျက်ခဲ့ပြီနည်း။
၁၂ ပရောဖက်ပြုချက်က ဤသို့ဆက်သွားသည်– “မောဘအမျိုးနှင့် အမ္မုန်အမျိုးသားတို့သည် ငါ၏လူမျိုးကိုကဲ့ရဲ့အပြစ်တင်၍ ငါ၏လူနေရာတစ်ဖက်၌ ဝါကြွားသောစကားကို ငါကြားပြီ။” (ဇေဖနိ ၂:၈) အီဂျစ်နှင့် အီသီယိုးပီးယားနိုင်ငံတို့သည် ဗာဗုလုန်လူမျိုးကျူးကျော်သူတို့လက်တွင် ဆင်းရဲခံခဲ့ရကြသည်မှာမှန်ပါသည်။ သို့သော် အာဗြဟံ၏တူလောတမှဆင်းသက်လာသော နိုင်ငံများဖြစ်သည့် မောဘနှင့် အမ္မုန်တို့အပေါ် ဘုရားသခင့်တရားစီရင်ချက်ကား အဘယ်နည်း။ ယေဟောဝါက ဤသို့ကြိုပြောသည်– “မောဘပြည်နှင့်အမ္မုန်ပြည်သည်၊ သောဒုံနှင့်ဂေါမောရမြို့ကဲ့သို့ . . . ဖြစ် . . . လိမ့်မည်။” သောဒုံနှင့် ဂေါမောရမြို့ဖျက်ဆီးခြင်းကို ကပ်ကျော်ခဲ့ကြသော လောတ၏သမီးနှစ်ဦးဖြစ်သူ သူတို့၏အဘွားများနှင့်မတူဘဲ မာနကြီးသောမောဘနှင့် အမ္မုန်တို့သည် ဘုရားသခင့်တရားစီရင်ခြင်းမှ ကာကွယ်ခံရကြမည်မဟုတ်ချေ။ (ဇေဖနိ ၂:၉-၁၂; ကမ္ဘာဦး ၁၉:၁၆၊ ၂၃-၂၆၊ ၃၆-၃၈) ယနေ့ ဖိလိတ္တိလူမျိုးများနှင့် သူတို့၏မြို့တော်များ အဘယ်တွင်ရှိသနည်း။ တစ်ချိန်ကမာနထောင်လွှားသော မောဘနှင့်အမ္မုန်လူမျိုးတို့ကော။ သင်မည်သို့ပင်ရှာစေကာမူ သူတို့ကိုမတွေ့နိုင်ပါ။
၁၃။ နိနေဝေမြို့တွင် အဘယ်ရှေးဟောင်းသုတေသနရှာဖွေတွေ့ရှိမှု ပြုခဲ့သနည်း။
၁၃ ဇေဖနိခေတ်တွင် အာရှုရိအင်ပါယာသည် အာဏာအထွတ်အထိပ်ရောက်နေချိန်ဖြစ်သည်။ အာရှုရိမြို့တော်ဖြစ်သည့် နိနေဝေမြို့တွင် သူတွေ့ရှိခဲ့သောနန်းတော်တစ်စိတ်တစ်ပိုင်းကို ဖော်ပြရာ၌ ရှေးဟောင်းသုတေသနပညာရှင် အော့စတင် လေယာ့ဒ်က ဤသို့ရေးသားခဲ့သည်– “မျက်နှာကြက်များကို စတုရန်းပုံအကန့်များဖြင့် ခွဲခြားထားပြီး ပန်းများ သို့မဟုတ် တိရစ္ဆာန်ရုပ်ပုံများ ရေးဆွဲထားသည်။ အချို့တို့ကို ဆင်စွယ်ဖြင့်မြှုပ်သွင်းစီခြယ်ထားပြီး အကန့်တစ်ခုစီကို လှပတင့်တယ်သောအနားသတ်များနှင့် ပုံသွန်းထားသည်။ ထုပ်တန်းများနှင့် အခန်းဘေးနံရံများကိုပါ ရွှေချထားသည်၊ သို့မဟုတ် ရွှေငွေဖြင့်ကွပ်ထားသည်; သစ်သားထည်ပိုင်းအတွက် အာရစ်ပင်အပါအဝင် အရှားပါးဆုံးသစ်များကို အသုံးပြုထားသည်။” သို့သော်၊ ဇေဖနိ၏ပရောဖက်ပြုချက်တွင် ကြိုပြောခဲ့သည့်အတိုင်း အာရှုရိနိုင်ငံသည် ဖျက်ဆီးခံရပြီး ၎င်း၏မြို့တော်နိနေဝေသည် “လူဆိတ်ညံရာအရပ်” ဖြစ်လာမည်။—ဇေဖနိ ၂:၁၃။
၁၄။ ဇေဖနိ၏ပရောဖက်ပြုချက်သည် နိနေဝေမြို့အပေါ် မည်သို့ပြည့်စုံခဲ့သနည်း။
၁၄ ထိုပရောဖက်ပြုချက်ကို ဇေဖနိပြောပြီး ၁၅ နှစ်သာကြာပြီးနောက် အင်အားကြီးနိနေဝေမြို့ ဖျက်ဆီးခံခဲ့ရပြီး ၎င်း၏နန်းတော်မှာ ကျိုးပဲ့ပျက်စီးသွားခဲ့သည်။ မှန်ပါသည်၊ မာန်တက်သောထိုမြို့တော်သည် လုံးဝပျက်စီးခဲ့သည်။ ဖျက်ဆီးခံရသောအတိုင်းအတာကို ဤသို့ကွက်ကွက်ကွင်းကွင်း ကြိုဟောခဲ့၏– “ဝံပိုနှင့်ဖြူတို့သည် [ပြိုလဲပျက်စီးနေသော] တံခါးထုပ်၌နေရာကျ၍ ပြတင်းပေါက်၌မြည်ကြလိမ့်မည်။ တံခါးခုံတို့သည် လူဆိတ်ညံလျက် . . . ရှိလိမ့်မည်။” (ဇေဖနိ ၂:၁၄၊ ၁၅) နိနေဝေမြို့၏ခမ်းနားသောအဆောက်အအုံများသည် ဖြူကောင်များနှင့် ဝံပိုငှက်များနေဖို့အတွက်သာ သင့်လျော်လိမ့်မည်။ မြို့လမ်းမပေါ်တွင် ကုန်ရောင်းဝယ်သံ၊ စစ်သည်များ၏ကြွေးကြော်သံ၊ ယဇ်ပုရောဟိတ်များ၏သီချင်းသံများ ကြားရတော့မည်မဟုတ်။ တစ်ကြိမ်က ပျားပန်းခတ်သွားလာခဲ့ကြသောလမ်းများပေါ်တွင် ငှက်တစ်ကောင်၏မြည်တမ်းသီဆိုသံ သို့မဟုတ် လေတဟူးဟူးတိုက်ခတ်သံဖြစ်ကောင်းဖြစ်မည့် စိုးရွံ့ထိတ်လန့်သံတစ်သံကိုသာ ပြတင်းပေါက်မှ ကြားကြရမည်။ ဘုရားသခင့်ရန်သူအားလုံး အလားတူဇာတ်သိမ်းသွားကြပါစေ!
၁၅။ ဖိလိတ္တိ၊ မောဘ၊ အမ္မုန်နှင့် အာရှုရိတို့၌ဖြစ်ပျက်ခဲ့ရာတို့မှ အဘယ်အရာသင်ယူနိုင်သနည်း။
၁၅ ဖိလိတ္တိ၊ မောဘ၊ အမ္မုန်နှင့် အာရှုရိတို့၌ ဖြစ်ပျက်ခဲ့ရာမှ ကျွန်ုပ်တို့အဘယ်အရာသင်ယူနိုင်သနည်း။ ယေဟောဝါ၏ကျေးကျွန်များအနေနှင့် ကျွန်ုပ်တို့၏ရန်သူများကို ကြောက်စရာအကြောင်းမရှိဟူသည့်အချက်ပင်။ မိမိ၏လူမျိုးတော်အား ဆန့်ကျင်သူတို့ပြုလုပ်ခဲ့ရာကို ဘုရားသခင်သိမြင်တော်မူ၏။ ယေဟောဝါသည် မိမိ၏ရန်သူများကို အတိတ်ကအရေးယူတော်မူခဲ့၏၊ မျက်မှောက်ခေတ်လောကတစ်ခုလုံးကိုလည်း ကိုယ်တော်တရားစီရင်ပါလိမ့်မည်။ သို့သော် ‘လူအမျိုးအနွယ်ခပ်သိမ်းတို့အထဲမှ လူအုပ်ကြီး’ ဖြစ်သော ကပ်ကျော်သူများရှိလိမ့်မည်။ (ဗျာဒိတ် ၇:၉) သင်သည် သူတို့တွင်ပါဝင်နိုင်ပါသည်—သို့သော် ယေဟောဝါကိုလည်းကောင်း၊ ဖြောင့်မတ်ခြင်းနှင့် နူးညံ့သိမ်မွေ့ခြင်းတို့ကိုလည်းကောင်း ဆက်ရှာနေမှသာလျှင်ဖြစ်သည်။
စော်ကားသောပြစ်မှားသူများ ဘေးသင့်ပါစေ!
၁၆။ ယုဒမင်းညီမင်းသားများနှင့် ဘာသာရေးခေါင်းဆောင်များနှင့်စပ်လျဉ်း၍ ဇေဖနိ၏ပရောဖက်ပြုချက်က အဘယ်သို့ဆိုခဲ့သနည်း၊ ထိုစကားများသည် ခရစ်ယာန်ဘောင်နှင့် အဘယ်ကြောင့်ကိုက်ညီသနည်း။
၁၆ ဇေဖနိ၏ပရောဖက်ပြုချက်က ယုဒပြည်နှင့် ယေရုရှလင်မြို့အပေါ် တစ်ဖန်အာရုံစူးစိုက်စေသည်။ ဇေဖနိ ၃:၁၊ ၂ က ဤသို့ဆိုသည်– “ဆန့်ကျင်ဘက်ပြု၍ ညစ်ညူးလျက် ညှဉ်းဆဲတတ်သောမြို့သည် အမင်္ဂလာရှိ၏။ နှုတ် [မြွက်စကား] တော်အသံကိုနားမထောင်၊ ဆုံးမတော်မူခြင်းကိုမခံ၊ ထာဝရဘုရားကိုမခိုလှုံ၊ မိမိဘုရားသခင့်ထံတော်သို့မချဉ်းကပ်” ဟုဆိုသည်။ မိမိ၏လူမျိုးတော်ကိုဆုံးမဖို့ ယေဟောဝါ၏ကြိုးပမ်းမှုများကို အရေးမစိုက်ကြခြင်းသည် ကြေကွဲစရာပင်! မင်းညီမင်းသားများ၊ မှူးမတ်များနှင့် တရားသူကြီးများ၏ အကြင်နာကင်းမဲ့မှုသည် အမှန်ဝမ်းနည်းစရာဖြစ်ခဲ့သည်။ ဘာသာရေးခေါင်းဆောင်များ၏ အရှက်ကင်းမဲ့မှုကို ဇေဖနိက ဤသို့ပြစ်တင်ရှုတ်ချခဲ့သည်– “ပရောဖက်တို့သည် လျှပ်ပေါ်သောသူ၊ သစ္စာဖျက်သောသူဖြစ်ကြ၏။ ယဇ်ပုရောဟိတ်တို့သည် သန့်ရှင်းရာဌာနတော်ကိုညစ်ညူးစေ၍ တရားတော်ကိုလည်းရှုတ်ချကြ၏။” (ဇေဖနိ ၃:၃၊ ၄) ထိုစကားများသည် မျက်မှောက်ခေတ် ခရစ်ယာန်ဘောင်ပရောဖက်များနှင့် ဆရာများ၏အခြေအနေနှင့် သင့်လျော်လိုက်လေခြင်း! စော်ကားသည့်အနေနှင့် သူတို့သည် ဘုရားသခင့်နာမတော်ကို သူတို့၏ဘာသာပြန်ကျမ်းများမှ ထုတ်ပယ်ခဲ့ကြပြီး သူတို့ဝတ်ပြုကိုးကွယ်ပါသည်ဟုဆိုကြသူအား တလွဲထင်စေသောအယူဝါဒများကို သွန်သင်ပေးကြသည်။
၁၇။ လူတို့နားထောင်သည်ဖြစ်စေ၊ နားမထောင်သည်ဖြစ်စေ ကျွန်ုပ်တို့သည် သတင်းကောင်းကို အဘယ်ကြောင့်ဆက်ကြေညာသင့်သနည်း။
၁၇ ယေဟောဝါသည် မိမိအရေးယူလုပ်ဆောင်တော့မည့်အမှုအကြောင်း မိမိ၏ရှေးခေတ်လူမျိုးတော်ကို ထောက်ထားစွာသတိပေးခဲ့သည်။ လူတို့နောင်တယူကြဖို့အတွက် မိမိ၏ကျေးကျွန်များဖြစ်ကြသော အခြားပရောဖက်များအပါအဝင် ဇေဖနိနှင့် ယေရမိတို့ကို ကိုယ်တော်စေလွှတ်ခဲ့သည်။ မှန်ပါ၏၊ “ထာဝရဘုရား [“ယေဟောဝါ”] သည် မြို့အလယ်၌ . . . မတရားသောအမှုကိုပြုတော်မမူ။ နံနက်အစဉ်အတိုင်း မိမိဖြောင့်မတ်ကြောင်းကို မချွတ်မယွင်းဖော်ပြတော်မူ၏။” တုန့်ပြန်မှုကားအဘယ်နည်း။ “သို့သော်လည်း အဓမ္မလူတို့သည် ရှက်ကြောက်ခြင်းမရှိကြ” ဟုဇေဖနိဆိုခဲ့သည်။ (ဇေဖနိ ၃:၅) ယခုအချိန်၌လည်း အလားတူသတိပေးချက် ပေါ်ထွက်နေသည်။ အသင်သည် သတင်းကောင်းကြေညာသူတစ်ဦးဖြစ်လျှင် ဤသတိပေးလုပ်ငန်းတွင် သင်ပါဝင်နေပါသည်။ သတင်းကောင်းကို လက်မလျှော့ဘဲ ဆက်ကြေညာနေပါ! လူတို့နားထောင်သည်ဖြစ်စေ၊ နားမထောင်သည်ဖြစ်စေ သင့်ဓမ္မအမှုကို သစ္စာရှိရှိထမ်းဆောင်နေသမျှကာလပတ်လုံး ဘုရားသခင့်ရှုထောင့်မှကြည့်လျှင် သင်အောင်မြင်နေသည်; ဘုရားသခင့်လုပ်ငန်းတော်ကို ဇွဲနှင့်သင်လုပ်ဆောင်နေစဉ် ရှက်စရာမလိုပါ။
၁၈။ ဇေဖနိ ၃:၆ သည်မည်သို့ပြည့်စုံမည်နည်း။
၁၈ ဘုရားသခင့်တရားစီရင်ချက်သည် ခရစ်ယာန်ဘောင်ကိုဖျက်ဆီးခြင်းသာ မဟုတ်ပါ။ ယေဟောဝါသည် လူမျိုးအပေါင်းတို့ကိုပါ ဤသို့ထည့်သွင်းရှုတ်ချခဲ့သည်– “လူအမျိုးမျိုးတို့ကို ငါပယ်ဖြတ်၍ သူတို့ရဲတိုက်များကို ဖျက်ဆီးလေပြီ။ လမ်းတို့၌ အဘယ်သူမျှမသွားမလာစေခြင်းငှာ လူဆိတ်ညံစေပြီ။ မြို့တို့ကိုလည်း လူတစ်စုံတစ်ယောက်မျှမနေစေခြင်းငှာ ဖျက်ဆီးလေပြီ။” (ဇေဖနိ ၃:၆) ဤစကားများကို လုံးဝယုံကြည်စိတ်ချနိုင်သောကြောင့် ဖျက်ဆီးခြင်းဖြစ်နှင့်ပြီးသကဲ့သို့ ယေဟောဝါမိန့်တော်မူသည်။ ဖိလိတ္တိ၊ မောဘနှင့် အမ္မုန်မြို့များ မည်သို့ဖြစ်သွားခဲ့သနည်း။ အာရှုရိမြို့တော် နိနေဝေမြို့ကော။ သူတို့ဖျက်ဆီးခံရခြင်းသည် မျက်မှောက်ခေတ်တိုင်းနိုင်ငံများအတွက် သတိပေးချက်တစ်ခုဖြစ်သည်။ ဘုရားသခင်အား မထီမဲ့မြင်ပြု၍မရချေ။
ယေဟောဝါကို ဆက်ရှာနေပါ
၁၉။ အဘယ်စဉ်းစားစရာမေးခွန်းအချို့ကို ကျွန်ုပ်တို့မေးနိုင်သနည်း။
၁၉ ဇေဖနိခေတ်တွင် ဆိုးသွမ်းစွာ “မှားယွင်းသောအကျင့်ကိုသာကျင့်” ကြသူတို့အပေါ် ဘုရားသခင့်အမျက်တော်ကျရောက်ခဲ့သည်။ (ဇေဖနိ ၃:၇) ကျွန်ုပ်တို့ခေတ်၌လည်း အလားတူဖြစ်ပျက်လိမ့်မည်။ ယေဟောဝါ၏အမျက်တော်နေ့နီးကပ်နေသည့် အထောက်အထားကို သင်မြင်သလော။ ကိုယ်တော့်စကားတော်ကို—နေ့စဉ်—မှန်မှန်ဖတ်ရှုခြင်းအားဖြင့် ဆက်၍ ‘ယေဟောဝါကိုရှာ’ နေသလော။ သင်သည် ဘုရားသခင့်စံနှုန်းများနှင့်အညီ ကိုယ်ကျင့်တရားသန့်ရှင်းစွာ နေထိုင်ခြင်းအားဖြင့် ‘ဖြောင့်မတ်ခြင်းကိုရှာ’ သလော။ ထို့ပြင် ဘုရားသခင်အပေါ်နှင့် ကယ်တင်ခြင်းအတွက် ကိုယ်တော့်အစီအစဉ်များအပေါ် နှိမ့်ချ၍ လက်အောက်ခံစိတ် တင်ပြခြင်းအားဖြင့် ‘နူးညံ့သိမ်မွေ့ခြင်းကိုရှာနေ’ သလော။
၂၀။ ဇေဖနိပရောဖက်ပြုချက်နှင့်စပ်လျဉ်းသည့် ဤအခန်းဆက်ဆောင်းပါးများ၏ နောက်ဆုံးဆောင်းပါးတွင် အဘယ်မေးခွန်းများကို ကျွန်ုပ်တို့သုံးသပ်ကြမည်နည်း။
၂၀ ယေဟောဝါကိုလည်းကောင်း၊ ဖြောင့်မတ်ခြင်းနှင့် နူးညံ့သိမ်မွေ့ခြင်းတို့ကိုလည်းကောင်း ဆက်၍ရှာနေမည်ဆိုလျှင် ယခုပင်လျှင်—မှန်ပါ၏၊ ယုံကြည်ခြင်းစမ်းသပ်ခံနေရသည့် ဤ ‘နောက်ဆုံးကာလ’ ၌ပင်—ကောင်းချီးများကို ကြွယ်ဝစွာခံစားရဖို့ မျှော်လင့်နိုင်ပါသည်။ (၂ တိမောသေ ၃:၁-၅; သု. ၁၀:၂၂) သို့သော်၊ ‘ယေဟောဝါ၏မျက်မှောက်ခေတ်ကျေးကျွန်များအနေနှင့် ကျွန်ုပ်တို့သည် အဘယ်နည်းများဖြင့် ကောင်းချီးများခံစားနေကြရသနည်း၊ အလျင်အမြန်ချဉ်းကပ်လာနေသော ယေဟောဝါ၏အမျက်တော်နေ့တွင် ကာကွယ်ခံရမည့်သူများအတွက် ဇေဖနိ၏ပရောဖက်ပြုချက်က အဘယ်အနာဂတ်ကောင်းချီးများကို ဖော်ပြသနည်း’ ဟု ကျွန်ုပ်တို့မေးလိုကြပေမည်။
သင်မည်သို့ဖြေဆိုမည်နည်း
• လူတို့သည် မည်သို့ ‘ယေဟောဝါကိုရှာ’ ကြသနည်း။
• ‘ဖြောင့်မတ်ခြင်းကိုရှာခြင်း’ တွင်အဘယ်အရာပါဝင်သနည်း။
• ကျွန်ုပ်တို့မည်သို့ ‘နူးညံ့သိမ်မွေ့ ခြင်းကိုရှာ’ နိုင်သနည်း။
• ကျွန်ုပ်တို့သည် ယေဟောဝါကိုလည်းကောင်း၊ ဖြောင့်မတ်ခြင်းနှင့် နူးညံ့သိမ်မွေ့ ခြင်းတို့ကိုလည်းကောင်း အဘယ်ကြောင့်ဆက်ရှာနေသင့်သနည်း။
[လေ့လာရန်မေးခွန်းများ]
[စာမျက်နှာ ၁၈ ပါ ရုပ်ပုံ]
သမ္မာကျမ်းစာလေ့လာခြင်းနှင့် စိတ်အားထက်သန်စွာဆုတောင်းခြင်းအားဖြင့် ယေဟောဝါကို သင်ရှာနေသလော
[စာမျက်နှာ ၂၁ ပါ ရုပ်ပုံ]
လူအုပ်ကြီးသည် ယေဟောဝါကို ဆက်ရှာနေကြသောကြောင့် ကိုယ်တော်၏အမျက်တော်နေ့တွင် သူတို့ကပ်ကျော်ကြမည်