စာရှုသူများထံမှမေးခွန်းလွှာ
စာရှုသူများထံမှမေးခွန်းလွှာ
ခရစ်ယာန်စစ်များသည် လူအများပြုလုပ်နေကြသည့် စီးပွားဖြစ်ကွန်ပျူတာဆော့ဖ်ဝဲပရိုဂရမ်များကို မိတ္တူပွား၍ အခြားသူများအားပေးခြင်းကို မည်သို့ ရှုမြင်သင့်သနည်း။
အချို့က “သင်တို့သည် အဖိုးမပေးဘဲ ကျေးဇူးတော်ကိုခံရကြပြီဖြစ်၍ အဖိုးမခံဘဲပေးကမ်းကြလော့” ဟူသော ယေရှု၏စကားများကိုကိုးကား၍ အဆိုပါအလေ့အထကို လွဲမှားစွာဆင်ခြေပေးခဲ့ကြပေမည်။ အမှန်ဆိုရလျှင် ဥပဒေက အသုံးပြုဖို့သတ်မှတ်ပေးထားသည့် မူပိုင်စာပေ သို့မဟုတ် ကွန်ပျူတာပရိုဂရမ်များ (ဆော့ဖ်ဝဲ) ၏မိတ္တူတို့ကို အခမဲ့ပေးရန် ယေရှုရည်ညွှန်းနေခြင်းမဟုတ်။ ခရစ်ယာန်ဓမ္မအမှုပိုင်းဆိုင်ရာပေးခြင်းကို ကိုယ်တော်ဆိုလိုနေခြင်းဖြစ်သည်။ ဘုရားသခင့်နိုင်ငံတော်အကြောင်းဟောပြောရန်၊ နာမကျန်းသူများကိုကုသပေးရန်နှင့် နတ်ဆိုးများကိုနှင်ထုတ်ပေးရန် မြို့ရွာအသီးသီးသို့သွားဖို့ တမန်တော်များအား ယေရှုမိန့်ဆိုခဲ့၏။ တမန်တော်များသည် ၎င်းအတွက် အဖိုးအခယူမည့်အစား “အဖိုးမခံဘဲပေးကမ်း” ကြဖို့ဖြစ်သည်။—မဿဲ ၁၀:၇၊ ၈။
ကိုယ်ပိုင်နှင့်စီးပွားဖြစ်ကွန်ပျူတာများ တိုးများလာသည်နှင့်အမျှ လူအများတွင် ဆော့ဖ်ဝဲလိုအပ်လာသည်။ များသောအားဖြင့် ယင်းကို ဝယ်ယူကြရသည်။ မှန်၏၊ လူအချို့သည် အခမဲ့ရရှိနိုင်စေပြီး မိတ္တူပွား၍ အခြားသူများကိုတစ်ဆင့်ပေးခွင့်ပြုနိုင်သည့် ပရိုဂရမ်များကို ရေးဆွဲကြသည်။ သို့တိုင် ကွန်ပျူတာဆော့ဖ်ဝဲအများစုကို စီးပွားဖြစ်ရောင်းချလေ့ရှိသည်။ ဆော့ဖ်ဝဲအသုံးပြုသူများသည် အိမ်၌ကိုယ်ပိုင်အသုံးပြုရန်ဖြစ်စေ၊ စီးပွားဖြစ်အသုံးပြုရန်ဖြစ်စေ ယင်းကို အခပေးဝယ်ယူကြရန်ဖြစ်သည်။ တစ်ဦးတစ်ယောက်က ဆော့ဖ်ဝဲတစ်ခုကို အခမပေးဘဲယူမည် သို့မဟုတ် မိတ္တူကူးမည်ဆိုပါက တရားမဝင်ဖြစ်သွားလိမ့်မည်၊ စာအုပ်များကို မိတ္တူအမြောက်အမြားပွား၍ အခမဲ့ပေးလိုက်ဘိသကဲ့သို့ပင် ဖြစ်လိမ့်မည်။
(ကစားနည်းများအပါအဝင်) ကွန်ပျူတာပရိုဂရမ်အများစုတွင် လိုင်စင်ပါရှိရာ ပိုင်ရှင်/အသုံးပြုသူသည် ၎င်းတွင်ဖော်ပြထားသော စည်းကမ်းသတ်မှတ်ချက်များနှင့်အညီလုပ်ဆောင်ရန် တောင်းဆိုခံရသည်။ ဤသို့သောလိုင်စင်အများတွင် ထိုပရိုဂရမ်ကို တစ်ဦးတည်းသာ တပ်ဆင်အသုံးပြုနိုင်သည်ဟု ဖော်ပြထားသည်—အိမ်မှကွန်ပျူတာဖြစ်စေ၊ စီးပွားရေး သို့မဟုတ် ကျောင်းမှကွန်ပျူတာဖြစ်စေ ကွန်ပျူတာတစ်လုံး၌သာ တပ်ဆင်လေ့ရှိကြသည်။ အသုံးပြုသူသည် မိမိအတွက် အရန်တစ်ခုကူးယူထားနိုင်သော်လည်း အခြားသူများအတွက် မိတ္တူမကူးပေးရန် လိုင်စင်အချို့ကဆိုသည်။ အကယ်၍ ပိုင်ရှင်သည် ပရိုဂရမ်တစ်ခုလုံး (လိုင်စင်နှင့်ရှင်းလင်းဖော်ပြချက်စာတမ်းအပါအဝင်) ကိုလုံးလုံးပေးလိုက်လိုလျှင် သူသည် ထိုသို့ပြုလုပ်နိုင်သည်။ သို့သော် သူသည် ယင်းကို အသုံးပြုပိုင်ခွင့်မရှိတော့ချေ။ လိုင်စင်များသည် ကွဲပြားခြားနားသောကြောင့် ပရိုဂရမ်ဝယ်ယူသူ သို့မဟုတ် အပေးခံရသူသည် ထိုလိုင်စင်၏သတ်မှတ်ချက်များကို သိထားသင့်၏။
နိုင်ငံများစွာသည် ကွန်ပျူတာပရိုဂရမ်များကဲ့သို့သော “ဉာဏ်ရည်ဉာဏ်သွေး” ကိုကာကွယ်သည့် မူပိုင်သဘောတူညီချက်များတွင်ပါဝင်၍ မူပိုင်ဥပဒေများကို အတည်ပြုရန် ကြိုးစားအားထုတ်ကြသည်။ ဥပမာ၊ ကွန်ပျူတာပရိုဂရမ်များနှင့် ကစားနည်းများကို ကူးယူဖြန့်ဝေသည့်အပြင် အချို့ကိုပင် အင်တာနက်မှရောင်းချလျက်ရှိသည့် “ပင်မဆော့ဖ်ဝဲခိုးထုတ်သောဂိုဏ်းများဟုဆိုကြသော ဂိုဏ်းဝင်များကို ဂျာမန်နှင့်ဒိန်းမတ်ရဲအရာရှိများက ဖမ်းဆီးခဲ့ကြသည်” ဟူ၍ ၂၀၀၀၊ ဇန်နဝါရီ ၁၄ ရက်ထုတ် သည်နယူးယောက်တိုင်းမ် ကဖော်ပြခဲ့သည်။
ခရစ်ယာန်အသင်းတော်သည် ယင်းနှင့်ပတ်သက်၍ မည်သည့်အနေအထားတွင်ရှိသနည်း။ “ကဲသာဘုရင်၏ဥစ္စာကို ကဲသာဘုရင်အား ဆက်ပေးကြလော့။ ဘုရားသခင်၏ဥစ္စာကိုကား ဘုရားသခင်အား ဆက်ပေးကြလော့” ဟူ၍ ယေရှုမိန့်ဆိုခဲ့သည်မှာမှန်၏။ (မာကု ၁၂:၁၇) ခရစ်ယာန်များသည် ဘုရားသခင့်ပညတ်တော်နှင့်မဆန့်ကျင်သည့် နိုင်ငံတော်ဥပဒေများကို နာခံရန်လိုအပ်သည်။ အစိုးရမင်းများနှင့်စပ်လျဉ်း၍ တမန်တော်ပေါလုက ဤသို့ရေးခဲ့သည်– “အစိုးရသောမင်းအာဏာစက်၏အုပ်စိုးခြင်းကို လူတိုင်းဝန်ခံစေ။ . . . မင်းအာဏာကိုဆန်သောသူသည် ဘုရားသခင်စီရင်တော်မူရာကို ဆန်သောသူဖြစ်၏။ ထိုသို့ဆန်သောသူသည် ရာဇဝတ်ကိုခံရမည်။”—ရောမ ၁၃:၁၊ ၂။
ခရစ်ယာန်အသင်းတော်မှ အကြီးအကဲများသည် မူပိုင်ဥပဒေများကို ရှင်းပြ၍လိုက်နာခွင့်ရှိကြသကဲ့သို့ အခြားသူများ၏ကွန်ပျူတာများကို စစ်ဆေးလေ့လာခွင့်မရှိချေ။ သို့ရာတွင် ခရစ်ယာန်များသည် မိမိတို့နှင့်မဆိုင်သောအရာကိုမယူဖို့နှင့် ဥပဒေလိုက်နာသူများဖြစ်ကြရန် ကြိုးစားသင့်သည်ဟု သူတို့ယူမှတ်ကာသွန်သင်ပေးကြ၏။ ယင်းက ခရစ်ယာန်များကို ဥပဒေချိုးဖောက်သူများအဖြစ်မှ ကာကွယ်ပေးသည့်အပြင် ဘုရားသခင်ရှေ့တွင် ကြည်လင်သည့်ကိုယ်ကိုကိုယ်သိသောစိတ် ထားရှိနိုင်စေသည်။ ပေါလုက ဤသို့ရေးခဲ့သည်– “ထိုကြောင့် ရာဇဝတ်ကိုကြောက်သောကြောင့်သာ မင်းအာဏာစက်၏အုပ်စိုးခြင်းကို ဝန်ခံရမည်မဟုတ်။ ကိုယ်ကိုကိုယ်သိသောစိတ်ကိုထောက်၍ ဝန်ခံရမည်။” (ရောမ ၁၃:၅) ထိုနည်းတူစွာ ပေါလုသည် ဤစကားများဖြင့် ခရစ်ယာန်စစ်များ၏အလိုဆန္ဒကိုဖော်ပြခဲ့၏– “ငါတို့သည် ကိုယ်ကိုကိုယ်သိသောစိတ်ကြည်လင်လျက် အရာရာတို့၌ ကောင်းမွန်စွာကျင့်နေခြင်းငှာ အလိုရှိသောသူဖြစ်သည်ဟု စိတ်စွဲလမ်းခြင်းရှိကြ၏။”—ဟေဗြဲ ၁၃:၁၈။
[စာမျက်နှာ ၂၉ ပါ လေးထောင့်ကွက်]
အချို့သောစီးပွားရေးလုပ်ငန်းများနှင့် ကျောင်းများတွင် ပရိုဂရမ်တစ်ခုကို လူအမြောက်အမြား အသုံးပြုခွင့်ပြုထားသည့် အများသုံးလိုင်စင်များ ဝယ်ယူထားကြသည်။ ၁၉၉၅ ခုနှစ်၌ ယေဟောဝါသက်သေများ၏အသင်းတော်များတွင် ဤဆုံးမချက်ပါသည့် ဆောင်းပါးတစ်ပုဒ်ကို ဆွေးနွေးခဲ့ကြသည်–
“ကွန်ပျူတာပရိုဂရမ်များကို ပြင်ဆင်ရောင်းချသော ကုမ္ပဏီအများစုသည် ယင်းတို့၏မူပိုင်ဖြစ်ကာ ထိုပရိုဂရမ်များကို မည်သို့တရားဝင်အသုံးပြုနိုင်ပုံကို အကြမ်းဖျင်းဖော်ပြထားသည်။ ပိုင်ရှင်သည် ပရိုဂရမ်ကိုမိတ္တူပွား၍ အခြားသူများအား မပေးနိုင်ဟု လိုင်စင်ကဆိုလေ့ရှိသည်; အမှန်ဆိုရလျှင် အပြည်ပြည်ဆိုင်ရာမူပိုင်ဥပဒေအရ ထိုသို့ပြုလုပ်ခြင်းကို တရားဝင်တားမြစ်ထားသည်။ . . . အချို့သောကုမ္ပဏီကြီးများက အသင့်တပ်ဆင်ပြီး လိုင်စင်ရထားသော ပရိုဂရမ်များပါရှိသည့် ကွန်ပျူတာများကို ရောင်းချကြသည်။ သို့ရာတွင် ကွန်ပျူတာစတိုးဆိုင်အချို့သည် ပရိုဂရမ်များကို တရားမဝင်မိတ္တူကူးထားသောကြောင့် လိုင်စင်များမပေးကြချေ၊ ဆိုလိုသည်မှာ ဝယ်သူသည် ထိုပရိုဂရမ်များကို အသုံးပြုခြင်းဖြင့် ဥပဒေကိုချိုးဖောက်ရာရောက်သည်။ ယင်းနှင့်စပ်လျဉ်း၍ ခရစ်ယာန်များသည် (အသင်းမ၏စာပေများကဲ့သို့) မူပိုင်ပြုလုပ်ထားသောအရာနှင့် ပိုင်ရှင်များ၏ တရားဝင်ခွင့်ပြုချက်မရရှိဘဲ ကူးယူထားသော အီလက်ထရွန်နစ်သင်ပုန်းကြီးများပေါ်တွင် အကြောင်းအရာများကို ထည့်သွင်းခြင်း သို့မဟုတ် ယင်းမှဆွဲယူခြင်းတို့ကို ရှောင်ရှားသင့်၏။”