ယေဟောဝါ၏တရားစီရင်ရာနေ့နီးပြီ!

ဖွင့်ပါ

ယေဟောဝါ၏တရားစီရင်ရာနေ့နီးပြီ!

“ထာဝရဘုရား၏နေ့ရက်ကြီးသည်နီးပြီ။ နီးလျက်၊ အလျင်အမြန်လာလျက်ရှိ၏။”—ဇေဖနိ ၁:၁၄၊ သမ္မာ။

၁။ ဘုရားသခင်သည် ဇေဖနိမှတစ်ဆင့် အဘယ်သတိပေးချက်ကိုထုတ်ဆင့်ခဲ့သနည်း။

ယေဟောဝါဘုရားသခင်သည် လူဆိုးတို့ကိုအရေးယူခါနီးပြီ။ နားထောင်ပါ! ကိုယ်တော့်သတိပေးချက်ကား ဤသို့– “လူနှင့်တိရစ္ဆာန်တို့ကိုပယ်ရှင်းမည်။ . . . မြေတစ်ပြင်လုံး၌ရှိသော လူသတ္တဝါတို့ကိုလည်း ငါပယ်ရှင်းမည်။” (ဇေဖနိ ၁:၃) အကြွင်းမဲ့ပိုင်သအုပ်စိုးရှင်ယေဟောဝါ၏ ဤအမိန့်တော်ကို တည်ကြည်သောဟေဇကိမင်းကြီး၏ တီတော်ဖြစ်ကောင်းဖြစ်မည့် ပရောဖက်ဇေဖနိမှတစ်ဆင့် ကိုယ်တော်မိန့်တော်မူ၏။ မင်းကောင်းယောရှိလက်ထက်တွင် ကြေညာခဲ့သော ၎င်းကြေညာချက်သည် ယုဒနိုင်ငံရှိဆိုးသွမ်းသူများအတွက် နိမိတ်ဆိုးဖြစ်သည်။

၂။ ယောရှိ၏လုပ်ရပ်များသည် ယေဟောဝါ၏တရားစီရင်ရာနေ့ကို အဘယ်ကြောင့်မတားဆီးခဲ့သနည်း။

^၂ဇေဖနိ၏ပရောဖက်ပြုချက်က ယုဒနိုင်ငံမှ မသန့်ရှင်းသောဝတ်ပြုကိုးကွယ်မှုကို သုတ်သင်ရှင်းလင်းဖို့လိုကြောင်း လူငယ်ယောရှိ၏အသိစိတ်ကို ပြင်းပြစေခဲ့သည်မှာသေချာသည်။ သို့သော် မှားယွင်းသောဘာသာရေးကို တိုင်းပြည်မှပယ်ရှင်းသည့် ဘုရင့်လုပ်ရပ်များသည် ပြည်သူပြည်သားတို့အကြားရှိ ဆိုးသွမ်းမှုအားလုံးကို မဖယ်ရှားနိုင်ခဲ့ချေ၊ ‘အပြစ်မဲ့သူတို့၏အသွေးနှင့် ယေရုရှလင်မြို့ကိုပြည့်စေ’ ခဲ့သော သူ၏ဘိုးတော်မနာရှေမင်း၏အပြစ်များကိုလည်း မချေဖျက်နိုင်ခဲ့ပေ။ (၄ ဓမ္မရာဇဝင် ၂၄:၃၊ ၄; ၂ ရာဇဝင်ချုပ် ၃၄:၃) ထို့ကြောင့် ယေဟောဝါ၏တရားစီရင်ရာနေ့ အမှန်ရောက်လာလိမ့်မည်။

၃။ ‘ယေဟောဝါအမျက်ထွက်တော်မူသောနေ့’ ကိုကပ်ကျော်နိုင်ကြောင်း ကျွန်ုပ်တို့မည်သို့သေချာနိုင်သနည်း။

^၃သို့တိုင် ထိုကြောက်မက်ဖွယ်ရာနေ့ကိုကပ်ကျော်သူများရှိမည်။ ထို့ကြောင့် ဘုရားသခင့်ပရောဖက်က ဤသို့တိုက်တွန်းခဲ့သည်– “အမိန့်တော်အတိုင်းမစီရင်၊ သင်တို့အချိန်သည် ဖွဲကဲ့သို့မလွန်၊ ထာဝရဘုရား၏ပြင်းစွာသောအမျက်တော်သည် သင်တို့အပေါ်သို့မရောက်၊ ထာဝရဘုရား၏အမျက်တော်နေ့သည် သင်တို့အပေါ်သို့မရောက်မီ ကိုယ်ကိုစစ်ကြောကြလော့။ တရားတော်အတိုင်းကျင့်၍ စိတ်နှိမ့်ချသောပြည်သူပြည်သားအပေါင်းတို့ ထာဝရဘုရားကိုရှာကြလော့။ ဖြောင့်မတ်ခြင်းနှင့် စိတ်နှိမ့်ချခြင်းကိုလည်းရှာကြလော့။ ထာဝရဘုရားအမျက်ထွက်တော်မူသောနေ့၌ သင်တို့သည် ပုန်းရှောင်ရာကို တွေ့ကောင်းတွေ့ကြလိမ့်မည်။” (ဇေဖနိ ၂:၂၊ ၃) ယေဟောဝါ၏တရားစီရင်ရာနေ့အတွင်း ကယ်တင်ခံရဖို့မျှော်လင့်ချက်ကို စိတ်စွဲလျက် ဇေဖနိကျမ်းစာစောင်ကို ဆွေးနွေးသုံးသပ်ကြည့်ကြပါစို့။ ၎င်းကို ဘီ.စီ.အီး. ၆၄၈ မတိုင်မီကရေးသားခဲ့ပြီး ကျွန်ုပ်တို့အားလုံး စိတ်နှလုံးအကြွင်းမဲ့ အာရုံစူးစိုက်သင့်သော ဘုရားသခင့် ‘ပရောဖက်ပြုချက်စကားတော်’ ၏တစ်စိတ်တစ်ပိုင်းဖြစ်သည်။—၂ ပေတရု ၁:၁၉။

ယေဟောဝါ၏လက်တော်ဆန့်တန်းခဲ့

၄၊ ၅။ ဇေဖနိ ၁:၁-၃ သည် ယုဒပြည်ရှိဆိုးသွမ်းသူတို့အပေါ် မည်သို့ပြည့်စုံခဲ့သနည်း။

^၄ဇေဖနိထံရောက်လာသော ‘ယေဟောဝါ၏စကားတော်’ ကိုအစောပိုင်း၌ဖော်ပြခဲ့သော သတိပေးချက်ဖြင့်စတင်သည်။ ဘုရားသခင်က ဤသို့ကြေညာသည်– “‘ပြည်တစ်ပြည်လုံး၌ရှိလေသမျှတို့ကို အကုန်အစင်ငါသုတ်သင်ပယ်ရှင်းမည်’ ဟု ထာဝရဘုရားမိန့်တော်မူ၏။ ‘လူနှင့်တိရစ္ဆာန်တို့ကို ပယ်ရှင်းမည်။ မိုးကောင်းကင်ငှက်နှင့် ပင်လယ်ငါးတို့ကိုလည်းကောင်း၊ အဓမ္မလူတို့နှင့်တကွ ပြစ်မှားစရာအကြောင်းတို့ကိုလည်းကောင်း ငါပယ်ရှင်းမည်။ မြေတစ်ပြင်လုံး၌ရှိသော လူသတ္တဝါတို့ကိုလည်း ငါပယ်ရှင်းမည်’ ဟု ထာဝရဘုရားမိန့်တော်မူ၏။”—ဇေဖနိ ၁:၁-၃။

^၅မှန်ပါ၏၊ ယေဟောဝါသည် ယုဒနိုင်ငံရှိ ကမ်းကုန်သောဆိုးသွမ်းမှုကို အဆုံးတိုင်စေပါလိမ့်မည်။ ဘုရားသခင်သည် “ပြည်တစ်ပြည်လုံး၌ရှိလေသမျှတို့ကို အကုန်အစင် . . . သုတ်သင်ပယ်ရှင်း” ဖို့မည်သူ့ကိုအသုံးပြုမည်နည်း။ ဇေဖနိသည် ဘီ.စီ.အီး. ၆၅၉ တွင်စတင်အုပ်စိုးသော ယောရှိမင်း၏နန်းသက်အစပိုင်းအတွင်း ပရောဖက်ပြုခဲ့ပုံရှိသောကြောင့် ထိုပရောဖက်ပြုချက်စကားများသည် ဘီ.စီ.အီး. ၆၀၇ တွင်ဗာဗုလုန်လက်ချက်ဖြင့် ယုဒပြည်နှင့် ယေရုရှလင်မြို့တော်ဖျက်ဆီးခံရခြင်းဖြင့် ပြည့်စုံခဲ့သည်။ ထိုအချိန်တွင် ယုဒပြည်ရှိဆိုးသွမ်းသူတို့ကို ‘အကုန်အစင်သုတ်သင်’ ခဲ့သည်။

၆-၈။ ဇေဖနိ ၁:၄-၆ တွင်အဘယ်အရာကိုကြိုဟောထားသနည်း၊ ထိုပရောဖက်ပြုချက်သည် ရှေးခေတ်ယုဒပြည်၌ မည်သို့ပြည့်စုံခဲ့သနည်း။

^၆မှားယွင်းသောဝတ်ပြုသူများနှင့်ပတ်သက်၍ ဘုရားသခင့်လုပ်ဆောင်မှုများကို ကြိုပြောရာ၌ ဇေဖနိ ၁:၄-၆ [သမ္မာ] ကဤသို့ဆိုသည်– “ယုဒပြည်သူ၊ ယေရုရှလင်မြို့သားအပေါင်းတို့တစ်ဖက်၌ ငါသည်လက်ဆန့်တန်း၍၊ ဤအရပ်မှ ဗာလဘုရားနှင့် ၎င်းဆိုင်ရာ ယဇ်ပုရောဟိတ်အမျိုးမျိုးတို့ကိုလည်းကောင်း၊ အိမ်မိုးပေါ်တွင် ကောင်းကင်တန်ဆာများအား ပျပ်ဝပ်ကိုးကွယ်သောသူ၊ ထာဝရဘုရားအား ပျပ်ဝပ်ကိုးကွယ်လျက်၊ မိလကုံဘုရားကို တိုင်တည်ကျိန်ဆိုသောသူတို့ကိုလည်းကောင်း၊ ထာဝရဘုရား၏နောက်တော်သို့မလိုက်၊ ဆုတ်သွားသောသူ၊ ထာဝရဘုရားကိုမရှာမဖွေ မမေးမလျှောက်သောသူတို့ကိုလည်းကောင်း ငါရှင်းရှင်းပယ်ရှားမည်။”

^၇ယုဒပြည်နှင့် ယေရုရှလင်မြို့ရှိလူတို့တစ်ဖက် ယေဟောဝါ၏လက်တော်ဆန့်တန်းခဲ့သည်။ ခါနာန်လူမျိုးတို့၏ မျိုးပွားဘုရားဗာလအား ဝတ်ပြုကိုးကွယ်သူများကို ပယ်ရှင်းရန် ကိုယ်တော်သတ်မှတ်ပြီးဖြစ်သည်။ ဗာလဘုရားများသည် နေရာဒေသအချို့ကိုပိုင်ဆိုင်၍ ဩဇာလွှမ်းမိုးကြ၏ဟု ၎င်းတို့ကိုဝတ်ပြုကိုးကွယ်သူများက ယူဆကြသောကြောင့် ဒေသခံဘုရားသခင်အသီးသီးကို ဗာလဘုရားများဟု ခေါ်ဆိုခဲ့ကြသည်။ ဥပမာ၊ ပေဂုရတောင်တွင် မောဘလူမျိုးနှင့် မိဒျန်လူမျိုးတို့ကိုးကွယ်ကြသော ဗာလဘုရားရှိခဲ့သည်။ (တောလည်ရာ ၂၅:၁၊ ၃၊ ၆) ယုဒပြည်တစ်ခွင်လုံးရှိ ဗာလ၏ယဇ်ပုရောဟိတ်များအပြင် သူတို့နှင့်ပေါင်းဖော်ကာ ဘုရားသခင့်ပညတ်များကို ကျူးလွန်ကြသော ဖောက်ပြန်သည့်လေဝိယဇ်ပုရောဟိတ်များကိုပါ ယေဟောဝါပယ်ရှင်းပစ်ပါလိမ့်မည်။—ထွက်မြောက်ရာ ၂၀:၂၊ ၃။

^၈ဘုရားသခင်သည် နက္ခတ်ဗေဒင်ကြည့်ခြင်းနှင့် နေကိုးကွယ်ခြင်းဖြစ်ဖို့သေချာသော “ကောင်းကင်တန်ဆာများအား ပျပ်ဝပ်ကိုးကွယ်သောသူ” တို့ကိုလည်း ပယ်ရှားပစ်လိမ့်မည်။ (၄ ဓမ္မရာဇဝင် ၂၃:၁၁; ယေရမိ ၁၉:၁၃; ၃၂:၂၉) ‘ယေဟောဝါနှင့် မိလကုံကို တိုင်တည်လျက်ကျိန်ဆို’ ခြင်းအားဖြင့် စစ်မှန်သောဝတ်ပြုရေးနှင့် မှားယွင်းသောဘာသာရေးကို ရောနှောဖို့ကြိုးစားနေကြသူတို့အပေါ်၌လည်း ဘုရားသခင့်အမျက်တော် ပွင့်အန်လာတော့မည်။ မိလကုံမှာ အမ္မုန်လူမျိုးတို့၏အကြီးဆုံးဘုရား မောလုတ်၏အခြားအမည်ဖြစ်ဖွယ်ရှိ၏။ မောလုတ်အားကိုးကွယ်ခြင်းတွင် ကလေးယဇ်ပူဇော်ခြင်းပါဝင်သည်။—၃ ဓမ္မရာဇဝင် ၁၁:၅; ယေရမိ ၃၂:၃၅။

ခရစ်ယာန်ဘောင်၏ ဇာတ်သိမ်းနီးပြီ!

၉။ (က) ခရစ်ယာန်ဘောင်၌ အဘယ်အပြစ်ရှိသနည်း။ (ခ) ယုဒပြည်၏သစ္စာမဲ့သူတို့နှင့်မတူဘဲ အဘယ်အရာကိုပြုလုပ်ဖို့ ကျွန်ုပ်တို့စိတ်ပိုင်းဖြတ်သင့်သနည်း။

^၉၎င်းတို့အားလုံးက မှားယွင်းသောဝတ်ပြုရေးနှင့် နက္ခတ်ဗေဒင်ပညာကိုလိုက်စားကြသည့် ခရစ်ယာန်ဘောင်ကို သတိရစေပေမည်။ ဓမ္မဆရာများထောက်ခံအားပေးသော စစ်ယဇ်ပလ္လင်ပေါ်တွင် သန်းပေါင်းများစွာသော သူတို့၏အသက်များကိုပူဇော်သည့် သူ၏အခန်းကဏ္ဍမှာ အမှန်နှလုံးနာစရာပင်! လျစ်လျူရှုသူများဖြစ်လာကြကာ ကိုယ်တော်နှင့် ကိုယ်တော်၏လမ်းညွှန်မှုကို မရှာဖွေတော့သည့် ‘ယေဟောဝါ၏နောက်တော်သို့မလိုက်၊ ဆုတ်သွားသော’ သစ္စာမဲ့ဂျူးများကဲ့သို့ ဘယ်သောအခါမျှမဖြစ်ကြစို့နှင့်။ ယင်းအစား ဘုရားသခင်အား ဆက်၍တည်ကြည်ကြစို့လေ။

၁၀။ ဇေဖနိ ၁:၇ ၏ပရောဖက်ပြုချက်ဆိုင်ရာထူးခြားချက်ကို သင်မည်သို့ရှင်းပြမည်နည်း။

^၁၀ပရောဖက်၏နောက်ဆက်တွဲစကားများသည် ယုဒပြည်၏အပြစ်ပြုသူများကော ကျွန်ုပ်တို့ခေတ်ရှိဆိုးသွမ်းသူများနှင့်ပါ ဆီလျော်သည်။ ဇေဖနိ ၁:၇ ကဤသို့ဆို၏– “အရှင်ထာဝရဘုရား၏ရှေ့တော်၌ ငြိမ်ဝပ်စွာနေကြလော့။ ထာဝရဘုရား၏နေ့နီးပြီ။ ထာဝရဘုရားသည် မိမိယဇ်ပွဲတော်ကိုပြင်ဆင်၍ ပွဲဝင်သောသူတို့ကို သန့်ရှင်းစေတော်မူပြီ။” ဤ “ပွဲဝင်သောသူတို့” မှာယုဒပြည်၏ ခါလဒဲရန်သူများဖြစ်ကြောင်းထင်ရှား၏။ “ယဇ်ပွဲတော်” မှာသူ၏မြို့တော်အပါအဝင် ယုဒပြည်ကိုယ်၌ဖြစ်သည်။ ဤသို့ဖြင့် ဇေဖနိသည် ယေရုရှလင်မြို့ကိုဖျက်ဆီးဖို့ ဘုရားသခင့်ရည်ရွယ်ချက်ကိုကြေညာခဲ့ပြီး ၎င်းပရောဖက်ပြုချက်သည် ခရစ်ယာန်ဘောင်ဖျက်ဆီးခံရခြင်းကိုလည်း ညွှန်ပြသည်။ အမှန်မှာ၊ ယနေ့ ဘုရားသခင့်တရားစီရင်ရာနေ့ အလွန်နီးကပ်နေပြီဖြစ်ရာ လောကသားအားလုံးသည် ‘အရှင်ယေဟောဝါ၏ရှေ့တော်၌ ငြိမ်ဝပ်စွာနေ’ ၍ ယေရှု၏ဘိသိက်ခံနောက်လိုက်များဖြစ်သည့် “သိုးစုငယ်” နှင့်သူတို့၏အပေါင်းပါ “အခြားသိုး” တို့မှတစ်ဆင့် ကိုယ်တော်မိန့်တော်မူရာကို နားထောင်သင့်သည်။ (လုကာ ၁၂:၃၂; ယောဟန် ၁၀:၁၆) နားမထောင်ခြင်းဖြင့် ဘုရားသခင့်နိုင်ငံတော်အုပ်ချုပ်မှုကို ရန်ဘက်ပြုရာရောက်သူအားလုံးကို ဖျက်ဆီးခြင်းကစောင့်မျှော်နေသည်။—ဆာလံ ၂:၁၊ ၂။

မကြာမီ—ငိုကြွေးမြည်တမ်းခြင်းနေ့!

၁၁။ ဇေဖနိ ၁:၈-၁၁ ၏လိုရင်းချက်ကားအဘယ်နည်း။

^၁၁ယေဟောဝါ၏နေ့နှင့်ပတ်သက်၍ ဇေဖနိ ၁:၈-၁၁ ကဤသို့ထပ်ဆင့်သည်– “‘ထာဝရဘုရားပွဲခံတော်မူသောနေ့၌ မင်းများ၊ ဆွေတော်မျိုးတော်များနှင့် ထူးခြားစွာ [“လူမျိုးခြားအဝတ်၊” သမ္မာ] ဝတ်သောသူများအပေါင်းတို့ကို ငါစစ်ကြောမည်။ သူတစ်ပါး၏အိမ်တံခါးခုံကိုကျော်၍ အနိုင်အထက်ပြုခြင်း၊ လှည့်စားခြင်းအားဖြင့်ရသောဥစ္စာနှင့် မိမိသခင်၏အိမ်ကိုပြည့်စေသောသူအပေါင်းတို့ကိုလည်း ထိုနေ့၌ငါစစ်ကြောမည်။’ ထာဝရဘုရားမိန့်တော်မူသည်ကား၊ ‘ထိုနေ့၌ ငါးတံခါးဝမှာ အော်ဟစ်သံကိုလည်းကောင်း၊ ဒုတိယမြို့၌ ငိုကြွေးမြည်တမ်းသံကိုလည်းကောင်း၊ တောင်ရိုး၌ပြင်းစွာချိုးဖျက်သံကိုလည်းကောင်း ကြားရ၏။ မတ္တေရှအရပ်သားတို့ ငိုကြွေးမြည်တမ်းကြလော့။ ကုန်သည်အပေါင်းတို့သည်ပြတ်ကြပြီ။ ငွေကိုဆောင်သောသူအပေါင်းတို့သည် ဆုံးကြပြီ။’”

၁၂။ ‘လူမျိုးခြားအဝတ်ဝတ်လျက်’ အချို့ကိုတွေ့ရခြင်းမှာ မည်သို့နည်း။

^၁၂ယောရှိမင်းကို ယောခတ်၊ ယောယကိမ်နှင့် ယေခေါနိတို့က နန်းဆက်ခံကြမည်ဖြစ်သည်။ ထို့နောက် ယေရုရှလင်မြို့ပျက်စီးခြင်းဖြင့် မှတ်သားခံခဲ့ရသော ယောယကိမ်နန်းစံချိန်ရောက်လာမည်။ ထိုဘေးကိုရင်ဆိုင်နေရကြသော်လည်း အချို့သူတို့သည် ‘လူမျိုးခြားအဝတ်ဝတ်လျက်’ ရှိခြင်းဖြင့် အိမ်နီးချင်းနိုင်ငံများ၏နှစ်သက်လက်ခံမှုကို ရှာခဲ့ကြဟန်ရှိသည်။ အလားတူ၊ ယနေ့ လူအများက မိမိတို့သည် ယေဟောဝါ၏အဖွဲ့အစည်းအဝင်များမဟုတ်ကြောင်း နည်းအမျိုးမျိုးဖြင့်ထင်ရှားစေကြသည်။ စာတန့်အဖွဲ့အစည်း၏အစိတ်အပိုင်းအဖြစ် ထင်ရှားစေသဖြင့် သူတို့ဒဏ်စီရင်ခံရကြမည်။

၁၃။ ဇေဖနိ၏ပရောဖက်ပြုချက်နှင့်အညီ ဗာဗုလုန်လူမျိုးတို့သည် ယေရုရှလင်မြို့ကိုတိုက်ခိုက်ကြသောအခါ အဘယ်သို့ဖြစ်ပျက်ရန်နည်း။

^၁၃ယုဒပြည်ကိုစာရင်းရှင်းသော “ထိုနေ့” သည် ကိုယ်တော့်ရန်သူများကိုတရားစီရင်ရန်၊ ဆိုးသွမ်းမှုကိုအဆုံးတိုင်စေရန်နှင့် ကိုယ်တော်၏ပိုင်သအုပ်စိုးမှုကိုသက်သေထူရန် ယေဟောဝါ၏နေ့ကြီးနှင့်အလားတူသည်။ ယေရုရှလင်မြို့ကို ဗာဗုလုန်လူမျိုးတို့တိုက်ခိုက်သည်နှင့် ငါးတံခါးဝမှအော်ဟစ်သံကိုကြားရလိမ့်မည်။ ၎င်းတံခါးဝသည် ငါးဈေးအနီးတွင်ရှိသောကြောင့် ထိုအမည်ရခဲ့ခြင်းဖြစ်နိုင်သည်။ (နေဟမိ ၁၃:၁၆) ဗာဗုလုန်စစ်တပ်ကြီးသည် ဒုတိယမြို့ဟုခေါ်သော စစ်ဆင်ရေးနယ်မြေသို့ဝင်ရောက်ကြမည်ဖြစ်ပြီး “တောင်ရိုး၌ပြင်းစွာသောချိုးဖျက်သံ” က ချဉ်းနင်းဝင်ရောက်လာနေသော ခါလဒဲပြည်သားတို့၏အသံကိုဆိုလိုခြင်းဖြစ်နိုင်သည်။ တိုက်ရိုဘိုရောချိုင့်ဝှမ်းအထက်ဘက် ဖြစ်ကောင်းဖြစ်မည့် မတ္တေရှအရပ်သားများ၏ “ငိုကြွေးမြည်တမ်းသံ” ရှိလိမ့်မည်။ သူတို့အဘယ်ကြောင့်ငိုကြွေးမြည်တမ်းကြမည်နည်း။ ထိုတွင် “ငွေကိုဆောင်သောသူ” များအပါအဝင် စီးပွားရေးလုပ်ဆောင်မှု အဆုံးတိုင်မည်ဖြစ်သောကြောင့်ပင်။

၁၄။ ကိုယ်တော်အားဝတ်ပြုသည်ဟုဆိုကြသူများကို ဘုရားသခင်စစ်ကြောခြင်းသည် မည်မျှအတိုင်းအတာအထိဖြစ်မည်နည်း။

^၁၄ယေဟောဝါအားဝတ်ပြုသည်ဟုဆိုကြသူများကို ကိုယ်တော်၏စစ်ကြောခြင်းသည် မည်မျှပြင်းထန်မည်နည်း။ ပရောဖက်ပြုချက်က ဤသို့ဆက်ပြောသည်– “ထိုကာလ၌ ငါသည်မီးခွက်ကိုကိုင်၍ ယေရုရှလင်မြို့ကိုစစ်ကြောမည်။ ‘ထာဝရဘုရားသည် ကျေးဇူးကိုလည်းမပြု၊ အပြစ်ကိုလည်းမပေး’ ဟု အောက်မေ့လျက် မိမိတို့အနည်အဖတ်ပေါ်၌ နေရာကျသောသူတို့ကို ငါစစ်ကြောမည်။ ထိုသူတို့၏ဥစ္စာကို သူတစ်ပါးလုယူ၍ သူတို့၏နေရာသည် လူဆိတ်ညံလျက်ရှိလိမ့်မည်။ အိမ်ကိုဆောက်သော်လည်းမနေရကြ။ စပျစ်ဥယျာဉ်ကိုစိုက်သော်လည်း စပျစ်ရည်ကိုမသောက်ရကြ။”—ဇေဖနိ ၁:၁၂၊ ၁၃။

၁၅။ (က) ယေရုရှလင်မြို့၏အယူဖောက်ပြန်သော ယဇ်ပုရောဟိတ်များ မည်သို့ဖြစ်ပျက်ကြမည်နည်း။ (ခ) ယနေ့ မှားယွင်းသောဘာသာရေးကို လိုက်စားကြသူများအတွက် အဘယ်အရာသိုထားသနည်း။

^၁၅ယေရုရှလင်မြို့ရှိ အယူဖောက်ပြန်သော ယဇ်ပုရောဟိတ်များသည် ယေဟောဝါအားဝတ်ပြုကိုးကွယ်ခြင်းကို မှားယွင်းသောဘာသာရေးနှင့်ရောပြွမ်းစေခဲ့ကြသည်။ ဘေးကင်းလုံခြုံသည်ဟု သူတို့ထင်မှတ်ကြသော်လည်း ဘုရားသခင်သည် သူတို့ပုန်းကွယ်ခိုအောင်းနေကြသော ဝိညာဉ်ရေးအမှောင်ထုကို ထိုးဖောက်ထွန်းလင်းမည့် တောက်ပသောမီးအိမ်ဖြင့် သူတို့ကိုဖော်ထုတ်စစ်ကြောလိမ့်မည်။ ဘုရားသခင့်တရားစီရင်ချက်သတင်းစကားနှင့် စီရင်ချက်ချမှတ်ခြင်းကို မည်သူမျှလွတ်မြောက်မည်မဟုတ်။ ကျေနပ်ရောင့်ရဲနေကြသော ထိုအယူဖောက်ပြန်သူများသည် ဝိုင်စည်ပိုင်း၏အောက်ခြေရှိ အနည်အနှစ်များကဲ့သို့ အခြေကျခဲ့ကြသည်။ လူ့ကိစ္စရပ်များတွင် ဘုရားသခင်ကြားဝင်ဆောင်ရွက်မှုဆိုင်ရာ မည်သည့်ကြေညာချက်နှင့်မျှ သူတို့အနှောင့်အယှက်မခံလိုကြချေ၊ သို့သော် ဘုရားသခင့်တရားစီရင်ချက်ချမှတ်ခြင်းကို သူတို့လွတ်မြောက်မည်မဟုတ်ချေ။ ခရစ်ယာန်ဘောင်အဖွဲ့ဝင်များနှင့် ယေဟောဝါ၏ဝတ်ပြုရေးမှ သွေဖည်သွားကြသူများအပါအဝင် မှားယွင်းသောဘာသာရေးကို လိုက်စားကြသူများလည်း လွတ်မြောက်ကြမည်မဟုတ်။ ယခုအချိန်သည် ‘နောက်ဆုံးကာလ’ ဖြစ်ကြောင်းငြင်းပယ်ကာ “ထာဝရဘုရားသည် ကျေးဇူးကိုလည်းမပြု၊ အပြစ်ကိုလည်းမပေး” ဟုအောက်မေ့ကြသည်။ မှားလိုက်လေခြင်း!—၂ တိမောသေ ၃:၁-၅; ၂ ပေတရု ၃:၃၊ ၄၊ ၁၀။

၁၆။ ယုဒပြည်အပေါ် ဘုရားသခင့်တရားစီရင်ချက်ကျရောက်သောအခါ မည်သို့ဖြစ်ရမည်နည်း၊ ၎င်းကိုသိရှိထားခြင်းက ကျွန်ုပ်တို့ကို မည်သို့သက်ရောက်မှုရှိသင့်သနည်း။

^၁၆ဗာဗုလုန်လူမျိုးများက သူတို့၏စည်းစိမ်ဥစ္စာများကို လုယူတိုက်ခိုက်မည်၊ နေအိမ်များကိုလူဆိတ်ညံရာဖြစ်စေပြီး သူတို့၏စပျစ်ဥယျာဉ်အသီးကို ယူသွားကြလိမ့်မည်ဟု အယူဖောက်ပြန်သောယုဒလူမျိုးတို့ သတိပေးခြင်းခံခဲ့ကြရသည်။ ယုဒပြည်အပေါ် ဘုရားသခင့်တရားစီရင်ချက် ပြစ်ဒဏ်ချမှတ်သောအခါ ရုပ်ပစ္စည်းများ အသုံးကျတော့မည်မဟုတ်။ လက်ရှိအစီအစဉ်စနစ်အပေါ် ယေဟောဝါ၏တရားစီရင်ရာနေ့ ရောက်လာသောအခါ အလားတူဖြစ်ပါလိမ့်မည်။ ထို့ကြောင့် ဝိညာဉ်ရေးအမြင်ရှိပြီး ယေဟောဝါ၏လုပ်ငန်းတော်ကို ကျွန်ုပ်တို့၏ဘဝတွင်ရှေးဦးထားခြင်းဖြင့် “ကောင်းကင်ဘုံ၌ဘဏ္ဍာကို ဆည်းပူးကြ” ပါစို့!—မဿဲ ၆:၁၉-၂၁၊ ၃၃။

‘ယေဟောဝါ၏နေ့ရက်ကြီးနီးပြီ’

၁၇။ ဇေဖနိ ၁:၁၄-၁၆ အရ ယေဟောဝါ၏တရားစီရင်ရာနေ့သည် မည်မျှနီးကပ်နေသနည်း။

^၁၇ယေဟောဝါ၏တရားစီရင်ရာနေ့သည် မည်မျှနီးကပ်နေသနည်း။ ဇေဖနိ ၁:၁၄-၁၆ အရ ဘုရားသခင်သည် ဤအာမခံချက်ကိုပေးထားသည်– “ထာဝရဘုရား၏နေ့ကြီးနီးပြီ။ နီးပြီ။ အလျင်အမြန်လာ၏။ ထာဝရဘုရား၏နေ့သတင်းသည် နား၌ခါး၏။ ထိုနေ့၌ သူရဲသည်အော်ဟစ်လိမ့်မည်။ ထိုနေ့သည် အမျက်ထွက်သောနေ့၊ ဆင်းရဲပူပန်ခြင်းကိုခံရသောနေ့၊ သုတ်သင်ပယ်ရှင်းဖျက်ဆီးရာနေ့၊ အလင်းကွယ်၍ မှောင်မိုက်သောနေ့၊ မိုးအုံ့၍ထူထပ်သောမှောင်မိုက်ဖုံးလွှမ်းသောနေ့၊ ခိုင်ခံ့သောမြို့၊ မြင့်သောရဲတိုက်တို့တစ်ဖက်၌ တံပိုးမှုတ်၍ကြွေးကြော်ရာနေ့ဖြစ်၏။”

၁၈။ ယေဟောဝါ၏တရားစီရင်ရာနေ့သည် အလှမ်းဝေးပါသေးသည်ဟု အဘယ်ကြောင့်ကျွန်ုပ်တို့မတွက်သင့်သနည်း။

^၁၈ယုဒပြည်၏ထင်ရာစိုင်းယဇ်ပုရောဟိတ်များ၊ မင်းညီမင်းသားများနှင့် လူများတို့သည် ‘ယေဟောဝါ၏နေ့ကြီးနီးပြီ’ ဖြစ်ကြောင်း သတိပေးခံခဲ့ကြရသည်။ ယုဒပြည်အတွက် ‘ယေဟောဝါ၏နေ့သည် အလျင်အမြန်လာ’ လိမ့်မည်။ အလားတူ ကျွန်ုပ်တို့ခေတ်တွင် ဆိုးသွမ်းသူများအပေါ် ယေဟောဝါ၏တရားစီရင်ချက်သည် အလှမ်းဝေးသောအနာဂတ်၌ဖြစ်မည်ဟု အဘယ်သူမျှမထင်ပါစေနှင့်! ယင်းအစား ယုဒပြည်ကို ဘုရားသခင်အမြန်အရေးယူခဲ့သကဲ့သို့ ကိုယ်တော်၏တရားစီရင်ရာနေ့ကို ‘အလျင်အမြန်’ ရောက်စေပါလိမ့်မည်။ (ဗျာဒိတ် ၁၆:၁၄၊ ၁၆) ယေဟောဝါ၏သက်သေများအားဖြင့် ဘုရားသခင်ပေးသော သတိပေးချက်များကို လျစ်လျူရှုကာ စစ်မှန်သောဝတ်ပြုရေးကိုမလိုက်စားသူအားလုံးအတွက် ထိုအချိန်သည် ခံရခက်သောအချိန်ဖြစ်လိမ့်မည်တကား!

၁၉၊ ၂၀။ (က) ယုဒပြည်နှင့် ယေရုရှလင်မြို့အပေါ် ဘုရားသခင့်အမျက်တော်စီရင်ချက်၏ အသွင်အချို့ကား အဘယ်နည်း။ (ခ) ဤအစီအစဉ်စနစ်ရင်ဆိုင်ရမည့် ရွေးချယ်ဖျက်ဆီးခြင်းကိုထောက်၍ အဘယ်မေးခွန်းများပေါ်လာသနည်း။

^၁၉ယုဒပြည်နှင့် ယေရုရှလင်မြို့အပေါ် ဘုရားသခင့်အမျက်တော်စီရင်ချက်ချခြင်းသည် “ဆင်းရဲပူပန်ခြင်းကိုခံရသောနေ့” ဖြစ်ခဲ့သည်။ ဗာဗုလုန်မှကျူးကျော်သူများက ယုဒပြည်သူပြည်သားတို့ကို သေခြင်းနှင့် ဖျက်ဆီးခြင်းရင်ဆိုင်စေ၍ စိတ်ဆင်းရဲခြင်းအပါအဝင် ဆင်းရဲခြင်းအမျိုးမျိုးကို ဖြစ်စေခဲ့ကြသည်။ နေရာတကာတွင် မီးခိုးနှင့် ရက်စက်စွာသတ်ဖြတ်မှုများစွာရှိသောကြောင့် ထို “သုတ်သင်ပယ်ရှင်းဖျက်ဆီးရာနေ့” သည် ပုံဆောင်သဘောအရသာမက စာသားအရပါဖြစ်နိုင်သည့် အလင်းကွယ်၊ မိုးအုံ့ပြီး မှောင်မိုက်ထူထပ်သောနေ့ဖြစ်ခဲ့သည်။ ၎င်းနေ့သည် “တံပိုးမှုတ်၍ကြွေးကြော်ရာနေ့” ဖြစ်ခဲ့သည်၊ သို့သော် သတိပေးချက်များမှာ အချည်းနှီးဖြစ်ခဲ့သည်။

^၂၀ဗာဗုလုန်လူမျိုးတို့၏ခံတပ်ဖြို တင်းပုတ်ကြီးများက “မြင့်သောရဲတိုက်တို့” ကိုပြိုလဲကျစေခဲ့ရာ ယေရုရှလင်မြို့ကင်းစောင့်များသည် အကူအညီမဲ့ဖြစ်ခဲ့ကြသည်။ ကိုယ်တော်ရွေးချယ်ဖျက်ဆီးရာတွင် အသုံးပြုဖို့ အသင့်ရှိသော ဘုရားသခင့်ကောင်းကင်လက်နက်တိုက်ရှိ လက်နက်များနှင့်ယှဉ်လျှင် လက်ရှိအစီအစဉ်စနစ်၏ ခံတပ်များသည် အချည်းနှီးသက်သက်ဖြစ်လိမ့်မည်။ အသက်ချမ်းသာရာရဖို့ သင်မျှော်လင့်သလော။ ‘ကိုယ်တော်အားချစ်သောသူအပေါင်းတို့ကို ကြည့်ရှုစောင်မတော်မူပြီး ဆိုးသောသူအပေါင်းတို့ကိုမူကား ဖျက်ဆီးတော်မူမည့်’ ယေဟောဝါဘက် သင်မားမားမတ်မတ်ရပ်တည်ပြီးပြီလော။—ဆာလံ ၁၄၅:၂၀။

၂၁၊ ၂၂။ ဇေဖနိ ၁:၁၇၊ ၁၈ သည်ကျွန်ုပ်တို့ခေတ်တွင် မည်သို့ပြည့်စုံမည်နည်း။

^၂၁ဇေဖနိ ၁:၁၇၊ ၁၈ တွင်ကြိုပြောထားသော တရားစီရင်ရာနေ့သည် အမှန်ထိတ်လန့်စရာပင်! “သူတို့သည် ထာဝရဘုရားကိုပြစ်မှားသောကြောင့် သူတို့ကို ငါညှဉ်းဆဲသဖြင့် မျက်စိမမြင်သောသူကဲ့သို့ သွားကြလိမ့်မည်။ သူတို့အသွေးကို မြေမှုန့်ကဲ့သို့သွန်း၍ အသားကိုလည်း မစင်ကဲ့သို့မှတ်ကြလိမ့်မည်။ ထာဝရဘုရားအမျက်ထွက်တော်မူသောနေ့၌ သူတို့ရွှေငွေသည် သူတို့ကိုမကယ်တင်နိုင်ရာ။ ဒေါသအမျက်တော်မီးသည် တစ်ပြည်လုံးကိုလောင်လိမ့်မည်။ ပြည်သူပြည်သားအပေါင်းတို့ကို အလျင်အမြန်စီရင်၍ အကုန်အစင်သုတ်သင်ပယ်ရှင်းတော်မူလိမ့်မည်” ဟုယေဟောဝါဘုရားသခင်မိန့်တော်မူ၏။

^၂၂ဇေဖနိခေတ်တွင် ယေဟောဝါပြုလုပ်ခဲ့သည့်အတိုင်း မကြာမီ ကိုယ်တော်သည် သတိပေးချက်ကို လိုက်နာဖို့ငြင်းဆိုကြသော “ပြည်သူပြည်သားအပေါင်း” တို့အပေါ် ဘေးသင့်ရောက်စေပါလိမ့်မည်။ ဘုရားသခင်ကိုသူတို့ပြစ်မှားကြသောကြောင့် မျက်မမြင်များကဲ့သို့ လွတ်မြောက်ဖို့လမ်းမတွေ့နိုင်ဘဲ အကူအညီမဲ့လျှောက်ကြလိမ့်မည်။ ယေဟောဝါ၏တရားစီရင်ရာနေ့တွင် သူတို့၏အသွေးသည် တန်ဖိုးမဲ့သော ‘မြေမှုန့်ကဲ့သို့သွန်းခြင်းခံရလိမ့်မည်။’ ဘုရားသခင်သည် မြေကြီးပေါ်ရှိလူဆိုးများ၏ ခန္ဓာကိုယ်များ—အူများကိုပင်—“မစင်ကဲ့သို့” ကြဲဖြန့်မည်ဖြစ်ရာ သူတို့၏အဆုံးသည် အမှန်ရှက်ဖွယ်ဖြစ်လိမ့်မည်။

၂၃။ အပြစ်ပြုသူများသည် ‘ယေဟောဝါအမျက်ထွက်တော်မူသောနေ့’ တွင်လွတ်မြောက်မည်မဟုတ်သော်လည်း ဇေဖနိ၏ပရောဖက်ပြုချက်က အဘယ်မျှော်လင့်ချက်ကို ကမ်းလှမ်းသနည်း။

^၂၃ဘုရားသခင်နှင့် ကိုယ်တော်၏လူမျိုးတော်အား ရန်ဘက်ပြုသူများကို မည်သူမျှမကယ်နိုင်ပါ။ ယုဒပြည်၏အပြစ်ပြုသူများကို ရွှေနှင့်ငွေတို့က မကယ်တင်နိုင်ခဲ့သကဲ့သို့ ခရစ်ယာန်ဘောင်နှင့် ကျန်ရှိသောဤအစီအစဉ်စနစ်အပေါ် ‘ယေဟောဝါအမျက်ထွက်တော်မူသောနေ့’ ကျရောက်သောအခါ စုဆောင်းထားသောစည်းစိမ်ဥစ္စာနှင့် တံစိုးလက်ဆောင်များပင်လျှင် အကာအကွယ်၊ လွတ်မြောက်မှုပေးမည်မဟုတ်။ ၎င်းဆုံးဖြတ်ရာနေ့တွင် ဆိုးသွမ်းသူများကို ကိုယ်တော်သုတ်သင်ပယ်ရှင်းသောအခါ ကိုယ်တော်၏ဒေါသအမျက်တော်မီးသည် “တစ်ပြည်လုံးကိုလောင်လိမ့်မည်။” ကျွန်ုပ်တို့သည် ဘုရားသခင့်ပရောဖက်ပြုချက်စကားတော်ကို ယုံကြည်ကြသောကြောင့် ယခု “အမှုကုန်ရသည်ကာလ” တွင်ကျွန်ုပ်တို့ရောက်ရှိနေကြောင်း လက်ခံယုံကြည်ကြသည်။ (ဒံယေလ ၁၂:၄) ယေဟောဝါ၏တရားစီရင်ရာနေ့နီးပြီ၊ မကြာမီ ကိုယ်တော်၏ရန်သူများကို ကိုယ်တော်လက်စားချေတော့မည်။ သို့တိုင် ဇေဖနိ၏ပရောဖက်ပြုချက်က လွတ်မြောက်ခြင်းဆိုင်ရာမျှော်လင့်ချက်ကို ကမ်းလှမ်းထားသည်။ သို့ဖြစ်၍ ယေဟောဝါအမျက်ထွက်တော်မူသောနေ့တွင် ပုန်းရှောင်ရာရကောင်းရရန် ကျွန်ုပ်တို့ထံမှ အဘယ်အရာတောင်းဆိုသနည်း။

သင်မည်သို့ဖြေဆိုမည်နည်း

• ယုဒပြည်နှင့် ယေရုရှလင်မြို့အပေါ် ဇေဖနိ၏ပရောဖက်ပြုချက် မည်သို့ပြည့်စုံခဲ့သနည်း။

• ခရစ်ယာန်ဘောင်နှင့် ကျွန်ုပ်တို့ခေတ်ရှိ ဆိုးသွမ်းသူအားလုံး အဘယ်အဖြစ်ကြုံရဖို့ ရှိသနည်း။

• ယေဟောဝါ၏တရားစီရင်ရာနေ့သည် အလှမ်းဝေးသောအနာဂတ်၌ဖြစ်မည်ဟု အဘယ်ကြောင့် ကျွန်ုပ်တို့မထင်မှတ်သင့်သနည်း။

[လေ့လာရန်မေးခွန်းများ]

[စာမျက်နှာ ၁၃ ပါ ရုပ်ပုံ]

ယေဟောဝါ၏တရားစီရင်ရာနေ့နီးပြီဟု ဇေဖနိရဲရင့်စွာကြေညာခဲ့

[Credit Line]

From the Self-Pronouncing Edition of the Holy Bible, containing the King James and the Revised versions

[စာမျက်နှာ ၁၅ ပါ ရုပ်ပုံ]

ဘီ.စီ.အီး. ၆၀၇ တွင်ဗာဗုလုန်လူမျိုးတို့၏လက်ချက်ဖြင့် ယုဒပြည်နှင့် ယေရုရှလင်မြို့အပေါ် ယေဟောဝါ၏နေ့ကျရောက်ခဲ့

[စာမျက်နှာ ၁၆ ပါ ရုပ်ပုံ]

ဆိုးသွမ်းသူတို့ကို ယေဟောဝါ ဖျက်ဆီးသောအခါ လွတ်မြောက်ဖို့ သင်မျှော်လင့်သလော

ကင်းမျှော်စင်—လေ့လာရန် စာစောင်