သင် အမှန် ပျော်ရွှင်နိုင်သလော
သင် အမှန် ပျော်ရွှင်နိုင်သလော
ဂျော့ဂျ်သည် လူတိုင်းကိုအပြုံးဖြင့်နှုတ်ဆက်တတ်သည်။ သူ့အတွက် ဘဝဟူသည် ပျော်မွေ့ဖွယ်ရာ အဖိုးထိုက်သောဆုတစ်ခုဖြစ်၏။ သူ၏ပျော်ရွှင်မှုနှင့် အကောင်းမြင်သဘောထားတို့သည် သူ၏မူပိုင်အကျင့်ဖြစ်ခဲ့သည်၊ အိုမင်းခြင်းဝေဒနာကို သူစတင်ခံစားရသည်နှင့် ထိုသို့ပို၍ပင်ဖြစ်လာလေသည်။ သူသေဆုံးသည့်နေ့အထိ ဂျော့ဂျ်ကို ပျော်တတ်သူအဖြစ် လူသိများခဲ့သည်။ အသင်သည် ဂျော့ဂျ်ကဲ့သို့ ပျော်ရွှင်တတ်သလော။ နေ့သစ်တစ်နေ့စီကို ပျော်မွေ့ဖွယ်ရာဆုတစ်ခုအဖြစ် သင်ရှုမြင်သလော။ သို့မဟုတ် နေ့သစ်တစ်နေ့စတင်ခြင်းကို သင်စိတ်မဝင်စား၊ သို့မဟုတ် စိုးရိမ်ပူပန်နေသလော။ တစ်စုံတစ်ရာက သင့်အား ပျော်ရွှင်မှုကင်းမဲ့နေစေသလော။
ပျော်ရွှင်မှုကို အတော်အသင့်မြဲမြံသည့် ချမ်းမြေ့သာယာသောအခြေအနေတစ်ခုအဖြစ် အဓိပ္ပာယ်ဖွင့်ထားသည်။ ၎င်း၏ဝိသေသလက္ခဏာမှာ အားရကျေနပ်ခြင်းမှ အူလှိုက်သည်းလှိုက် ဝမ်းမြောက်ဝမ်းသာဖြစ်သည့်အထိ စိတ်လှုပ်ရှားခြင်းနှင့် ထိုသို့သောအခြေအနေ ဆက်ရှိနေစေဖို့အတွက် ပင်ကိုဆန္ဒရှိခြင်းတို့ဖြစ်သည်။ ဤသို့သောပျော်ရွှင်မှုမျိုး အမှန်တကယ်ရှိသလော။
ယနေ့ လူ့အဖွဲ့အစည်းက အတော်အတန်ချမ်းသာမှသာလျှင် ပျော်ရွှင်နိုင်မည်ဟူသောအမြင်ကို လှုံ့ဆော်ပေးသည်။ သန်းပေါင်းများစွာသောသူတို့သည် ချမ်းသာကြွယ်ဝဖို့ မနားတမ်း၊ အကြိတ်အနယ်ဆက်ကြိုးပမ်းကြသည်။ ထိုသို့ပြုရာ၌ လူများစွာသည် လူလူချင်းပေါင်းသင်းဆက်ဆံရေးနှင့် ဘဝတွင်အရေးပါသော အခြားအရာများကို စွန့်လွှတ်ကြသည်။ သူတို့သည် ပုရွက်ဆိတ်တောင်ပို့တစ်ခုပေါ်ရှိ ပုရွက်ဆိတ်များကဲ့သို့ မနားတမ်းပြေးလွှားလှုပ်ရှားနေကြပြီး ပြန်လှန်စဉ်းစားဆင်ခြင်ဖို့သော်လည်းကောင်း၊ အခြားသူတစ်ဦးအတွက်သော်လည်းကောင်း အချိန်မရှိသလောက်ပင်။ ထို့ကြောင့် လော့စ် အိန်ဂျလိစ် တိုင်းမ်စ်မှ ဤသတင်းတစ်ပုဒ်ကို သဘောပေါက်နိုင်ပါသည်– “စိတ်ကျရောဂါရှိသူတို့၏အရေအတွက်မှာ တိုးများလာနေပြီး [စိတ်ဓာတ်ကျခြင်း] ကိုစတင်ခံစားရသည့်အသက်အရွယ်မှာ ပိုလျော့လာသည်။ . . . ဆေးဝါးကုမ္ပဏီတွင် စိတ်ကြွဆေးများသည် အရောင်းရဆုံးစာရင်း၌ရှိ၏။” သန်းပေါင်းများစွာတို့သည် ဥပဒေအရ ပိတ်ပင်ထားသောဆေးများကိုသုံးစွဲကြသည်၊ သို့မဟုတ် မိမိတို့၏ပြဿနာများကို အရက်ဖြင့်ဖြေဖျောက်ဖို့ကြိုးစားကြသည်။ အချို့သူတို့သည် စိတ်ကျဝေဒနာခံစားရသောအခါ အလွန်အကျွံသုံးဖြုန်းကြသည်။ စစ်တမ်းတစ်ခုအရ “အမျိုးသမီးများသည် လက်လီစနစ်ကုထုံး၌ စိတ်အပါဆုံးသူများဖြစ်ကြောင်း ထင်ရှားသည်။ စိတ်ဓာတ်ကျသောအခါ သူတို့သည် အမျိုးသားများထက် သုံးဆဈေးဝယ်ထွက်တတ်ကြသည်” ဟုဗြိတိသျှသတင်းစာ သည်ဂါးဒီးယန်း ကဆိုသည်။
သို့သော် စစ်မှန်သောပျော်ရွှင်မှုကို စတိုးဆိုင်တစ်ဆိုင်၊ အရက်တစ်ပုလင်း၊ ဆေးလုံးတစ်လုံး၊ ဆေးထိုးပြွန်တစ်ခု သို့မဟုတ် ဘဏ်စာရင်းတစ်ခုတို့၌ရှာ၍မတွေ့နိုင်ပါ။ ပျော်ရွှင်မှုကို ရောင်းဝယ်၍မရ; အခမဲ့သာဖြစ်သည်။ ယင်းသို့သောအဖိုးထိုက်သည့်ဆုကို အဘယ်နေရာ၌ ကျွန်ုပ်တို့ရှာတွေ့နိုင်မည်နည်း။ ယင်းကို နောက်ဆောင်းပါး၌သုံးသပ်ပါမည်။