အလင်းကိုရွေးချယ်သူတို့အတွက် ကယ်တင်ခြင်း
အလင်းကိုရွေးချယ်သူတို့အတွက် ကယ်တင်ခြင်း
“ထာဝရဘုရားသည် ငါ၏အလင်း၊ ငါ၏ကယ်တင်ခြင်းဖြစ်တော်မူ၏။ အဘယ်သူကို ငါကြောက်ရအံ့နည်း။”—ဆာလံ ၂၇:၁၊ သမ္မာ။
၁။ ယေဟောဝါသည် အသက်ပေးသည့်အဘယ်ထောက်ပံ့မှုများကို ပြင်ဆင်ပေးတော်မူသနည်း။
ယေဟောဝါသည် ကမ္ဘာပေါ်၌ သက်ရှိများကို ဖြစ်ထွန်းစေနိုင်သော အလင်းရောင်၏ရင်းမြစ်ဖြစ်တော်မူသည်။ (ကမ္ဘာဦး ၁:၂၊ ၁၄) ကိုယ်တော်သည် စာတန်လောက၏ သေစေတတ်သောမှောင်မိုက်ကို ပပျောက်စေသည့် ဝိညာဉ်ရေးရာအလင်းကို ဖန်ဆင်းတော်မူသောအရှင်လည်းဖြစ်တော်မူ၏။ (ဟေရှာယ ၆၀:၂; ၂ ကောရိန္သု ၄:၆; ဧဖက် ၅:၈-၁၁; ၆:၁၂) အလင်းကိုရွေးချယ်သူတို့သည် ဆာလံဆရာနှင့်အတူ ဤသို့ဆိုနိုင်ကြသည်– “ထာဝရဘုရားသည် ငါ၏အလင်း၊ ငါ၏ကယ်တင်ခြင်းဖြစ်တော်မူ၏။ အဘယ်သူကို ငါကြောက်ရအံ့နည်း။” (ဆာလံ ၂၇:၁က) သို့သော် ယေရှုအချိန်က ဖြစ်ပျက်ခဲ့သကဲ့သို့ပင် မှောက်မိုက်ကိုရွေးချယ်သူတို့သည် မနှစ်မြို့ဖွယ်တရားစီရင်ချက်ကိုသာ မျှော်လင့်နိုင်ကြသည်။—ယောဟန် ၁:၉-၁၁; ၃:၁၉-၂၁၊ ၃၆။
၂။ ရှေးအချိန်က ယေဟောဝါ၏အလင်းကို ငြင်းပယ်သူတို့နှင့် ကိုယ်တော်၏စကားကိုနားထောင်သူတို့တွင် မည်သို့ဖြစ်ပျက်ခဲ့သနည်း။
၂ ဟေရှာယအချိန်က ယေဟောဝါနှင့် ပဋိညာဉ်ဖွဲ့ထားသောလူမျိုးမှ လူအများစုသည် အလင်းတော်ကို ငြင်းပယ်ခဲ့ကြ၏။ ရလဒ်အနေဖြင့် လူမျိုးတစ်မျိုးအဖြစ် မြောက်ပိုင်းဣသရေလနိုင်ငံ ဖျက်ဆီးခံရခြင်းကို ဟေရှာယတွေ့မြင်ခဲ့သည်။ ထို့ပြင် ဘီ.စီ.အီး. ၆၀၇ တွင် ယေရုရှလင်မြို့နှင့် ယင်း၏ဝတ်ပြုရာအိမ်တော် ဖျက်ဆီးခံခဲ့ရပြီး ယုဒပြည်သူပြည်သားများ ပြည်နှင်ခံခဲ့ရသည်။ သို့သော် ယေဟောဝါ၏စကားကို နားထောင်သူတို့သည် ထိုအချိန်က အယူဖောက်ပြန်သူတို့ကို တွန်းလှန်နိုင်ရန် ခွန်အားရရှိခဲ့ကြသည်။ ဘီ.စီ.အီး. ၆၀၇ နှင့်ပတ်သက်၍ ယေဟောဝါက မိမိစကားနားထောင်သူတို့သည် ကပ်ကျော်မည်ဟု ကတိပေးခဲ့၏။ (ယေရမိ ၂၁:၈၊ ၉) ယနေ့ အလင်းကိုချစ်မြတ်နိုးကြသော ကျွန်ုပ်တို့သည် ထိုအချိန်က အဖြစ်အပျက်မှ များစွာသင်ယူနိုင်ကြသည်။—ဧဖက် ၅:၅။
အလင်း၌ရှိသူတို့၏ပျော်ရွှင်မှု
၃။ ယနေ့ ကျွန်ုပ်တို့သည် အဘယ်အရာကိုယုံကြည်စိတ်ချနိုင်ကြသနည်း၊ အဘယ် “ဖြောင့်မတ်သောလူမျိုး” ကို ကျွန်ုပ်တို့ ချစ်မြတ်နိုးကြသနည်း၊ ထို “လူမျိုး” တွင် အဘယ် “ခိုင်ခံ့သောမြို့” ရှိသနည်း။
၃ “ငါတို့၌ ခိုင်ခံ့သောမြို့ရှိ၏။ [ဘုရားသခင်သည်] ကယ်တင်ခြင်းကျေးဇူးကို ပြအိုး၊ ရင်တားအရာ၌ စီရင်ခန့်ထားတော်မူလိမ့်မည်။ တံခါးတို့ကိုဖွင့်ကြလော့။ သစ္စာစောင့်၍ ဖြောင့်မတ်သောလူမျိုးဝင်ပါစေ။” (ဟေရှာယ ၂၆:၁-၃) ၎င်းသည် ယေဟောဝါကိုယုံကြည်ကိုးစားသူတို့၏ အလွန်ပျော်ရွှင်သောစကားများဖြစ်သည်။ ဟေရှာယခေတ်က သစ္စာရှိဂျူးများသည် တစ်ပြည်တည်းသားများ၏ မှားယွင်းသည့်ဘုရားများကိုမဟုတ်ဘဲ လုံခြုံမှု၏ တစ်ခုတည်းသောစစ်မှန်သည့်ရင်းမြစ်အဖြစ် ယေဟောဝါအား မျှော်ကိုးခဲ့ကြသည်။ ယနေ့ အလားတူယုံကြည်စိတ်ချမှုမျိုး ကျွန်ုပ်တို့တွင်ရှိသည်။ ထို့ပြင် ယေဟောဝါ၏ “ဖြောင့်မတ်သောလူမျိုး” ဖြစ်သည့် “ဘုရားသခင်၏ဣသရေလအမျိုး” ကိုကျွန်ုပ်တို့ချစ်မြတ်နိုးကြသည်။ (ဂလာတိ ၆:၁၆; မဿဲ ၂၁:၄၃) ဤလူမျိုး၏သစ္စာရှိမှုကြောင့် ယေဟောဝါသည်လည်း ချစ်တော်မူ၏။ ကိုယ်တော်၏ကောင်းချီးကြောင့် ဘုရားသခင်၏ဣသရေလအမျိုး၌ ၎င်းကို ထောက်မကာကွယ်ပေးသော “ခိုင်ခံ့သောမြို့၊” မြို့တစ်မြို့နှင့်တူသောအဖွဲ့အစည်းတစ်ခုရှိသည်။
၄။ အဘယ်စိတ်သဘောထားကို ကျွန်ုပ်တို့မွေးမြူသင့်သနည်း။
၄ “စိတ်နှလုံးတည်ကြည်သောသူသည် ကိုယ်တော် [ယေဟောဝါ] ၌ခိုလှုံသောကြောင့် ငြိမ်သက်ခြင်းသက်သက်ရှိမည်အကြောင်း [ယေဟောဝါ] စောင့်ရှောက်တော်မူလိမ့်မည်” ဖြစ်ကြောင်းကို ထို “မြို့” တွင်ရှိသူတို့သည် ကောင်းစွာသိရှိကြ၏။ ယေဟောဝါသည် ကိုယ်တော့်အား ယုံကြည်ကိုးစားစိတ်ရှိပြီး ကိုယ်တော်၏ဖြောင့်မတ်သောမူများကို လိုက်လျှောက်သူတို့အား ထောက်မတော်မူသည်။ သို့ဖြင့် ယုဒပြည်မှ သစ္စာရှိသူတို့သည် ဟေရှာယ၏ ဤတိုက်တွန်းချက်ကို ဂရုစိုက်ခဲ့ကြသည်– “ထာဝရဘုရား [“ယေဟောဝါ၊” ကဘ] ၌ အစဉ်အမြဲခိုလှုံကြလော့။ ထာဝရဘုရား [“ဂျားယေဟောဝါ၊” ကဘ] သည် နိစ္စထာဝရခိုလှုံရာဖြစ်တော်မူ၏။” (ဟေရှာယ ၂၆:၃၊ ၄; ဆာလံ ၉:၁၀; ၃၇:၃; သု. ၃:၅) ထိုစိတ်ထားရှိသူတို့သည် “ဂျားယေဟောဝါ” အားတစ်ပါးတည်းသော လုံခြုံစိတ်ချရာကျောက်အဖြစ် မျှော်ကိုးကြသည်။ သူတို့သည် ကိုယ်တော်နှင့် “ငြိမ်သက်ခြင်း” ကိုအမြဲခံစားကြရသည်။—ဖိလိပ္ပိ ၁:၂; ၄:၆၊ ၇။
ဘုရားသခင့်ရန်သူများ အရှက်ကွဲခြင်း
၅၊ ၆။ (က) ရှေးဗာဗုလုန်သည် မည်သို့အရှက်ခွဲခံခဲ့ရသနည်း။ (ခ) “မဟာဗာဗုလုန်” သည် အဘယ်နည်းဖြင့်အရှက်ခွဲခံခဲ့ရသနည်း။
၅ ယေဟောဝါကိုယုံကြည်ကိုးစားသူတို့သည် ကြီးစွာသောဆင်းရဲခြင်း ခံရလျှင်ကော အသို့နည်း။ သူတို့ ကြောက်စရာမလိုပေ။ ယေဟောဝါသည် ထိုသို့သောအရာများကို ခေတ္တခံစေသည်၊ သို့သော် နောက်ဆုံးတွင် ကိုယ်တော်သည် သက်သာမှုရရှိစေပြီး ဆင်းရဲခြင်းကိုဖြစ်ပွားစေသူတို့ကို ကိုယ်တော်တရားစီရင်ပေမည်။ (၂ သက်သာလောနိတ် ၁:၄-၈; ၂ တိမောသေ ၁:၈-၁၀) “မြင့်မြတ်သောမြို့” တစ်မြို့၏အဖြစ်အပျက်ကို သုံးသပ်ကြည့်ပါ။ ဟေရှာယက ဤသို့ဆိုသည်– “[ယေဟောဝါသည်] မြင့်သောအရပ်၌နေသောသူတို့ကို ရှုတ်ချတော်မူ၏။ မြင့်မြတ်သောမြို့ကိုဖြို၍ မြေတိုင်အောင်နှိမ့်ချလျက် မြေမှုန့်ထဲမှာထားတော်မူ၏။ ကျော်နင်းခြင်းကိုခံရလိမ့်မည်။ ဆင်းရဲသောသူနှင့် ငတ်မွတ်သောသူတို့သည် ကျော်နင်းကြလိမ့်မည်။” (ဟေရှာယ ၂၆:၅၊ ၆) ဤတွင်ဖော်ပြထားသည့် မြင့်မြတ်သောမြို့သည် ဗာဗုလုန်မြို့ဖြစ်ပေမည်။ ထိုမြို့သည် ဘုရားသခင့်လူတို့ကို အမှန်ပင်ဆင်းရဲစေခဲ့၏။ သို့သော် ဗာဗုလုန်မြို့သည် မည်သို့ဖြစ်သွားသနည်း။ ဘီ.စီ.အီး ၅၃၉ တွင် ထိုမြို့သည် မေဒိနှင့်ပေရသိတို့လက်ထဲ ကျရှုံးခဲ့သည်။ တကယ့်သိက္ခာကျဆင်းမှုပါတကား!
၆ ကျွန်ုပ်တို့အချိန်တွင် ဟေရှာယ၏ပရောဖက်ပြုချက်စကားများသည် ၁၉၁၉ ခုနှစ်မှစ၍ “မဟာဗာဗုလုန်” ၌မည်သို့ဖြစ်ပျက်ခဲ့သည်ကို ကောင်းစွာဖော်ပြသည်။ ထိုမြင့်မြတ်သောမြို့သည် ၎င်းနှစ်တွင် ယေဟောဝါ၏လူမျိုးတော်ကို ဝိညာဉ်ရေးသုံ့ပန်းဘဝမှ လွှတ်ပေးလိုက်ရသောအခါ အရှက်တကွဲပြိုလဲသွားခဲ့သည်။ (ဗျာဒိတ် ၁၄:၈) နောက်ထပ်ဖြစ်သောအရာမှာ သာ၍ပင် အရှက်ကွဲစရာဖြစ်ခဲ့သည်။ ထိုခရစ်ယာန်လူနည်းစုလေးသည် ယခင်က သူတို့အား ဖမ်းဆီးချုပ်နှောင်ခဲ့သူတို့ကို ‘ခြေဖြင့်နင်းခဲ့’ ကြ၏။ ၁၉၂၂ ခုနှစ်တွင် သူတို့သည် ခရစ်ယာန်ဘောင်၏ဆုံးခန်းရောက်လာတော့မည့်အကြောင်းကို စတင်ကြေညာကြရာ ဗျာဒိတ် ၈:၇-၁၂ တွင်ပါသော ကောင်းကင်တမန်လေးပါး၏ တံပိုးမှုတ်သည့်သတင်းများနှင့် ဗျာဒိတ် ၉:၁–၁၁:၁၅ တွင်ကြိုဟောထားသော အမင်္ဂလာ [သတင်းဆိုး]သုံးခုကို လူထုရှေ့ကြေညာခဲ့ကြသည်။
“ဖြောင့်မတ်သောသူသည် ဖြောင့်မတ်သောလမ်း၌သွားတတ်၏”
၇။ ယေဟောဝါ၏အလင်းတော်သို့ လှည့်ပြောင်းလာကြသူတို့သည် အဘယ်လမ်းညွှန်မှုကိုရရှိကြသနည်း၊ သူတို့သည် မည်သူ့ကိုမျှော်လင့်ကာ အဘယ်အရာကို မြတ်နိုးကြသနည်း။
၇ ယေဟောဝါသည် မိမိ၏အလင်းတော်သို့ လှည့်ပြောင်းလာသူတို့ကို ကယ်တင်တော်မူပြီး ဟေရှာယ ဆက်ဖော်ပြသကဲ့သို့ သူတို့၏လမ်းကို ညွှန်ကြားသည်– “ဖြောင့်မတ်သောသူသည် ဖြောင့်မတ်သောလမ်း၌သွားတတ်၏။ အိုဖြောင့်မတ်တော်မူသောဘုရား၊ ကိုယ်တော်သည် ဖြောင့်မတ်သောသူ၏လမ်းခရီးကို ပြင်ဆင်တော်မူ၏။ အိုထာဝရဘုရား အကျွန်ုပ်တို့သည် တရားတော်လမ်း၌သွားလျက် ကိုယ်တော်ကိုမျှော်လင့်၍ ကိုယ်တော်၏အမည်၊ ဘွဲ့နာမတော်ကို စိတ်နှလုံး၌ တသလျက်ရှိပါ၏။” (ဟေရှာယ ၂၆:၇၊ ၈) ယေဟောဝါသည် ဖြောင့်မတ်တော်မူသောဘုရားသခင်ဖြစ်တော်မူ၏၊ ကိုယ်တော့်အား ဝတ်ပြုကိုးကွယ်သူတို့သည် ကိုယ်တော်၏ဖြောင့်မတ်သောစံနှုန်းများကို လိုက်လျှောက်ကြရမည်။ ထိုသို့သူတို့ပြုကြသောအခါ ယေဟောဝါသည် သူတို့ကို လမ်းညွှန်ပေးပြီး သူတို့၏လမ်းစဉ်ကို ချောမွေ့စေတော်မူ၏။ ကိုယ်တော်၏လမ်းညွှန်မှုကို အလေးဂရုပြုခြင်းအားဖြင့် ဤစိတ်နှိမ့်ချသူတို့သည် ယေဟောဝါ၌ မျှော်လင့်လျက် ကိုယ်တော်၏နာမတော်—ကိုယ်တော်၏ “ဘွဲ့နာမ”—ကို စိတ်အားထက်သန်စွာစွဲလမ်းမြတ်နိုးကြကြောင်း ဖော်ပြသည်။—ထွက်မြောက်ရာ ၃:၁၅။
၈။ စံနမူနာထားလောက်သော အဘယ်သဘောထားကို ဟေရှာယတင်ပြခဲ့သနည်း။
၈ ဟေရှာယသည် ယေဟောဝါ၏နာမတော်ကို စွဲလမ်းမြတ်နိုးခဲ့သည်။ သူ၏ ဤနောက်ဆက်တွဲစကားများက ထင်ရှားစေသည်– “ညအခါ အကျွန်ုပ်သည် စိတ်နှလုံးနှင့် ကိုယ်တော်ကိုတောင့်တပါ၏။ နံနက်အခါ အကျွန်ုပ်သည် အတွင်းဝိညာဉ်အားဖြင့် ကိုယ်တော်ကိုရှာပါ၏။ မြေပေါ်မှာ အမှုကိုစစ်ကြောစီရင်တော်မူသောအခါ လောကီသားတို့သည် တရားကိုသင်ကြ၏။” (ဟေရှာယ ၂၆:၉) ဟေရှာယသည် ‘သူ၏စိုးလ်’—နှလုံးအကြွင်းမဲ့—ဖြင့် ယေဟောဝါအားတောင့်တခဲ့သည်။ ပရောဖက်သည် ယေဟောဝါထံဆုတောင်းရန် တိတ်ဆိတ်သောညအချိန်များကိုအသုံးပြုလျက် မိမိစိတ်ထဲရှိရာများကို ဖော်ပြကာ ယေဟောဝါ၏လမ်းညွှန်မှုကို စိတ်ထက်သန်စွာတောင်းခံခဲ့ခြင်းကို မြင်ယောင်ကြည့်ပါ။ အလွန်ကောင်းသောပုံသက်သေပါတကား! ထိုမျှမက ဟေရှာယသည် ယေဟောဝါ၏တရားစီရင်တော်မူချက်များမှ ဖြောင့်မတ်ခြင်းကို သိရှိလာခဲ့သည်။ ဤသို့ဖြင့် သူက အမြဲတစေသတိဝီရိယရှိခြင်းနှင့် ယေဟောဝါ၏အလိုတော်ကို သိမြင်လာရန် နိုးနိုးကြားကြားရှိနေဖို့လိုကြောင်း ကျွန်ုပ်တို့အား သတိပေးခဲ့သည်။
အချို့သူတို့သည် မှောင်မိုက်ကိုရွေးချယ်ကြ
၉၊ ၁၀။ ယေဟောဝါသည် သစ္စာမရှိသောလူမျိုးအတွက် သနားကြင်နာသည့်အဘယ်လုပ်ရပ်များကို ဆောင်ရွက်တော်မူခဲ့သနည်း၊ သို့သော် သူတို့ မည်သို့တုံ့ပြန်ခဲ့ကြသနည်း။
၉ ယေဟောဝါသည် ယုဒပြည်အပေါ် များပြားလှသောချစ်ခင်ကြင်နာမှုကို ပြသခဲ့သည်၊ သို့သော် ဝမ်းနည်းစရာမှာ အားလုံးထိုသို့မတုံ့ပြန်ခဲ့ချေ။ မကြာခဏပင် အများစုသည် ယေဟောဝါ၏အမှန်တရားအလင်းတော်ကို ရွေးချယ်ကြမည့်အစား ပုန်ကန်မှုနှင့် အယူဖောက်ပြန်မှုကိုရွေးချယ်ကြသည်။ ဟေရှာယက ဤသို့ပြောသည်– “မတရားသောသူသည် ကျေးဇူးကိုခံရသော်လည်း တရားကိုမသင်တတ်ပါ။ တရားကျင့်ရာပြည်၌ပင် အဓမ္မပြု၍ ထာဝရဘုရား၏ဘုန်းတော်ကို ပမာဏမပြုတတ်ပါ။”—ဟေရှာယ ၂၆:၁၀။
၁၀ ဟေရှာယအချိန်က ယေဟောဝါ၏လက်တော်သည် ယုဒပြည်၏ရန်သူများမှ သူ့ကိုကာကွယ်ခဲ့သောအခါ အများစုက ယင်းကို အသိအမှတ်မပြုလိုကြပါ။ ကိုယ်တော်၏ငြိမ်သက်ခြင်းဖြင့် သူတို့ကို ကောင်းချီးပေးသောအခါ ထိုလူမျိုးသည် ကျေးဇူးတင်လေးမြတ်မှုမတင်ပြခဲ့ကြချေ။ သို့ဖြစ်၍ ယေဟောဝါသည် သူတို့အား “အခြားသောသခင်တို့” အမှုဆောင်ရန် စွန့်ပယ်လိုက်သည်၊ နောက်ဆုံး ဘီ.စီ.အီး. ၆၀၇ တွင် ဂျူးတို့ကို သုံ့ပန်းအဖြစ် ဗာဗုလုန်သို့ခေါ်ဆောင်သွားစေရန် ခွင့်ပြုခဲ့လေသည်။ (ဟေရှာယ ၂၆:၁၁-၁၃) သို့ဖြစ်စေကာမူ နောက်ဆုံး၌ ထိုလူမျိုးမှကျန်ကြွင်းသူတစ်စုသည် မိမိတို့၏နေရင်းပြည်သို့ မာန်ကျကာ ပြန်လာခဲ့ကြသည်။
၁၁၊ ၁၂။ (က) ယုဒကို ဖမ်းဆီးချုပ်နှောင်သူတို့၏ အနာဂတ်ကား အဘယ်နည်း။ (ခ) ၁၉၁၉ တွင် ယေဟောဝါ၏ကောင်းကင်အတန်းအစားကျေးကျွန်များကို ယခင်ကဖမ်းဆီးချုပ်နှောင်ခဲ့သူ၏ အနာဂတ်ကားအဘယ်နည်း။
၁၁ ယုဒကိုဖမ်းဆီးသွားသူတို့ကော အသို့နည်း။ ဟေရှာယက ပရောဖက်ပြုကာ ဤသို့ဖြေဆိုသည်– “ထိုသခင်တို့သည် သေကြပါပြီ။ တစ်ဖန် အသက်မရှင်ရကြပါ။ သင်္ချိုင်းသားဖြစ်၍ ထမြောက်ခြင်းမရှိရကြပါ။ သူတို့ကိုကြည့်ရှုဖျက်ဆီး၍ သူတို့၏အမှတ်မျှမရှိစေခြင်းငှာ ပယ်ရှင်းတော်မူပြီ။” (ဟေရှာယ ၂၆:၁၄) မှန်ပါသည်၊ ဘီ.စီ.အီး. ၅၃၉ တွင် ဗာဗုလုန်ကျဆုံးသွားပြီးနောက် ယင်းအတွက် အနာဂတ်မရှိတော့ချေ။ အချိန်တန်သော် အဆိုပါမြို့ ရှိတော့မည်မဟုတ်။ ထိုမြို့သည် “သင်္ချိုင်းသား” ဖြစ်၍ ၎င်း၏ကြီးမားလှသောအင်ပါယာမှာ သမိုင်းစာအုပ်များတွင် ရောက်သွားပေမည်။ ဤလောက၏တန်ခိုးအာဏာရှင်တို့ကို မျှော်လင့်သူတို့အတွက် သတိပေးချက်တစ်ရပ်ပါတကား!
၁၂ ဘုရားသခင်သည် မိမိ၏ကောင်းကင်အတန်းအစားကျေးကျွန်များကို ၁၉၁၈ တွင်ဝိညာဉ်ရေးသုံ့ပန်းအဖြစ်သို့ ရောက်စေပြီး ၁၉၁၉ တွင် သူတို့ကို လွတ်မြောက်လာစေခဲ့သောအခါ ဤပရောဖက်ပြုချက်၏အပိုင်းကဏ္ဍအချို့ ပြည့်စုံခဲ့သည်။ ထိုအချိန်မှစ၍ သူတို့ကို ယခင်ကဖမ်းဆီးချုပ်နှောင်သူ၊ အဓိကအားဖြင့် ခရစ်ယာန်ဘောင်အတွက် မျှော်လင့်ချက်ကင်းမဲ့သွားခဲ့သည်။ သို့သော် ယေဟောဝါ၏လူများအတွက် ကောင်းချီးများမှာ အမှန်တကယ်ပင်ကြွယ်ဝခဲ့သည်။
“အကျွန်ုပ်တို့အမျိုးကို တိုးပွားစေတော်မူပြီ”
၁၃၊ ၁၄။ ၁၉၁၉ ကတည်းက ယေဟောဝါ၏ကောင်းကင်အတန်းအစားကျေးကျွန်များသည် အဘယ်ကြွယ်ဝသောကောင်းချီးများ ခံစားခဲ့ရပြီနည်း။
၁၃ ၁၉၁၉ တွင် ဘုရားသခင်သည် မိမိကောင်းကင်အတန်းအစားကျေးကျွန်၏ နောင်တရသောစိတ်ကို ကောင်းချီးပေးခဲ့ပြီး သူတို့ကို တိုးပွားများပြားစေတော်မူခဲ့သည်။ ဦးစွာ ဘုရားသခင့်ဣသရေလလူမျိုး၏ နောက်ဆုံးအဖွဲ့ဝင်တို့ကို စုသိမ်းရန် အာရုံစိုက်ခဲ့ပြီးနောက် “အခြားသိုး” မှ “လူအုပ်ကြီး” ကိုစတင်စုစည်းခဲ့သည်။ (ဗျာဒိတ် ၇:၉; ယောဟန် ၁၀:၁၆) ဤကောင်းချီးများကို ဟေရှာယပရောဖက်ပြုချက်တွင် ဤသို့တင်ကူးဖော်ပြထားခဲ့သည်– “အိုထာဝရဘုရား၊ အကျွန်ုပ်တို့အမျိုးကို တိုးပွားစေတော်မူပြီ။ အကျွန်ုပ်တို့အမျိုးကို တိုးပွားစေသဖြင့် ဘုန်းကြီးတော်မူ၏။ ပြည်တော်ကို ပတ်ဝန်းကျင်၌ ကျယ်စေတော်မူပြီ။ အိုထာဝရဘုရား၊ သူတို့သည် ဆင်းရဲခံရသောအခါ ကိုယ်တော်၌ဆည်းကပ်ကြပါပြီ။ ဆုံးမတော်မူသောအခါ ဆုတောင်းပတ္ထနာစကားကို သွန်းလောင်းကြပါပြီ။”—ဟေရှာယ ၂၆:၁၅၊ ၁၆။
၁၄ ယနေ့ ဘုရားသခင့်ဣသရေလလူမျိုး၏ပတ်ဝန်းကျင်နယ်နိမိတ်သည် ကမ္ဘာတစ်ဝန်းကျယ်ပြန့်လျက်နေပြီး ယခုစုစည်းခံခဲ့ရသော လူအုပ်ကြီး၏အရေအတွက်မှာ ခြောက်သန်းခန့်ရှိပြီဖြစ်၍ သတင်းကောင်းဟောပြောခြင်းလုပ်ငန်း၌ သူတို့ဇွဲရှိရှိပါဝင်နေကြသည်။ (မဿဲ ၂၄:၁၄) ယေဟောဝါထံတော်မှ ကောင်းချီးတစ်ရပ်ပါတကား! ယင်းက ကိုယ်တော်၏နာမတော်ကို ထင်ရှားကျော်ကြားစေသည်တကား! ထိုနာမတော်ကို ယနေ့ နိုင်ငံပေါင်း ၂၃၅ နိုင်ငံတွင် ကြားသိနေကြရပြီဖြစ်ရာ ကိုယ်တော့်ကတိတော်၏ အံ့ဖွယ်ကောင်းသောပြည့်စုံချက်တစ်ရပ်ပင်။
၁၅။ ၁၉၁၉ တွင် အဘယ်ပုံဆောင်ထမြောက်ခြင်း ဖြစ်ပျက်ခဲ့သနည်း။
၁၅ ယုဒသည် ဗာဗုလုန်တွင် သုံ့ပန်းဘဝမှလွတ်မြောက်လာရန် ယေဟောဝါ၏အကူအညီလိုအပ်ခဲ့သည်။ သူတို့ဘာသာသူတို့ လွတ်မြောက်နိုင်မည်မဟုတ်ချေ။ (ဟေရှာယ ၂၆:၁၇၊ ၁၈) အလားတူ ၁၉၁၉ တွင် ဘုရားသခင့်ဣသရေလလူမျိုး၏လွတ်မြောက်မှုသည် ယေဟောဝါ၏ထောက်ပံ့မှုကိုရရှိခြင်း၏ သက်သေဖြစ်ခဲ့သည်။ ကိုယ်တော်မပါဘဲ ထိုအမှုမဖြစ်လာနိုင်ခဲ့ချေ။ သူတို့အခြေအနေ၏ပြောင်းလဲမှုမှာ အလွန်ထူးခြားသောကြောင့် ဟေရှာယက ယင်းကို ရှင်ပြန်ထမြောက်ခြင်းနှင့် ဤသို့နှိုင်းယှဉ်ခဲ့သည်– “ကိုယ်တော်၏လူသေတို့သည် အသက်ရှင်ကြပါလိမ့်မည်။ ငါ၏အသေကောင်တို့သည်လည်း ထမြောက်ကြပါလိမ့်မည်။ မြေမှုန့်၌နေသောသူတို့ နိုး၍ သီချင်းဆိုကြလော့။ အကြောင်းမူကား ကိုယ်တော်၏နှင်းသည် မြက်ပင်တို့ကိုပေါက်စေသောနှင်းကဲ့သို့ဖြစ်၍ မြေသည်လည်း မိမိသင်္ချိုင်းသားတို့ကို ထုတ်ဖော်ရပါလိမ့်မည်။” (ဟေရှာယ ၂၆:၁၉; ဗျာဒိတ် ၁၁:၇-၁၁) မှန်ပါသည်၊ သေခြင်း၌အသက်မဲ့နေသူတို့သည် ပြန်လည်လှုပ်ရှားတက်ကြွလာခြင်းငှာ အသစ်တစ်ဖန်မွေးဖွားဘိသကဲ့သို့ ဖြစ်လာလိမ့်မည်တကား!
အန္တရာယ်ကာလတွင် ကာကွယ်မှု
၁၆၊ ၁၇။ (က) ဘီ.စီ.အီး. ၅၃၉ တွင် ဗာဗုလုန်ကျရှုံးခြင်းကို ကပ်ကျော်ရန် ဂျူးတို့သည် အဘယ်အရာပြုလုပ်ကြရန် လိုအပ်ခဲ့သနည်း။ (ခ) ယနေ့ “အတွင်းခန်း” များကား အဘယ်အရာဖြစ်ဖွယ်ရှိသနည်း၊ ၎င်းတို့က ကျွန်ုပ်တို့ကို မည်သို့အကျိုးပြုသနည်း။
၁၆ ယေဟောဝါ၏ကျေးကျွန်များသည် ကိုယ်တော်၏ကာကွယ်စောင့်မမှုကို အမြဲပင်လိုအပ်နေသည်။ သို့သော် များမကြာမီ ကိုယ်တော်သည် စာတန့်လောကကို နောက်ဆုံးအကြိမ် ဖျက်ဆီးပစ်တော်မူမည်ဖြစ်ပြီး ကိုယ်တော်အား ဝတ်ပြုကိုးကွယ်သူတို့သည် တစ်ကြိမ်တစ်ခါနှင့်မျှမတူ ကိုယ်တော့်အကူအညီကို လိုအပ်ပေလိမ့်မည်။ (၁ ယောဟန် ၅:၁၉) ထိုအန္တရာယ်ကာလနှင့်ပတ်သက်၍ ယေဟောဝါသည် ကျွန်ုပ်တို့ကို ဤသို့သတိပေးသည်– “ငါ၏လူတို့ လာကြ။ အတွင်းခန်းထဲသို့ဝင်၍ သင်တို့ကိုကွယ်ကာသောတံခါးများကို ပိတ်ထားကြ။ အမျက်ကာလလွန်သည်တိုင်အောင် ခဏသာပုန်းရှောင်၍နေကြလော့။ အကြောင်းမူကား ထာဝရဘုရားသည် မြေကြီးသားတို့ကို သူတို့ဒုစရိုက်ကြောင့် အပြစ်ပေးလိုသောငှာ မိမိအရပ်ဌာနထဲကထွက်တော်မူ၏။ ထိုအခါ မြေကြီးသည် မိမိ၌ရှိသောအသွေးကိုဖော်ပြရလိမ့်မည်။ မိမိ၌အသေခံရသောသူတို့ကို နောက်တစ်ဖန် ဝှက်၍မထားရ။” (ဟေရှာယ ၂၆:၂၀၊ ၂၁; ဇေဖနိ ၁:၁၄) ဤသတိပေးချက်က ဘီ.စီ.အီး. ၅၃၉ တွင် ဗာဗုလုန်ကျရှုံးသောအခါ မည်သို့ကပ်ကျော်နိုင်ကြောင်း ဂျူးတို့ကို ဖော်ပြပေးသည်။ ယင်းကို နာယူခဲ့ကြသူတို့သည် မိမိတို့၏အိမ်များတွင် ရှိနေကြမည်ဖြစ်ပြီး လမ်းပေါ်တွင်ရှိနေကြသည့် အနိုင်ရစစ်သားများ၏လက်ချက်မှ လုံခြုံမှုရကြပေမည်။
၁၇ ယနေ့ ပရောဖက်ပြုချက်၏ “အတွင်းခန်း” များမှာ ကမ္ဘာတစ်ဝန်းရှိ ယေဟောဝါလူမျိုး၏ ထောင်နှင့်ချီသောအသင်းတော်များကိုဆိုလိုနေပုံရှိသည်။ ထိုအသင်းတော်များသည် ယခုပင် ကာကွယ်မှုတစ်ရပ်ဖြစ်ပြီး ခရစ်ယာန်များသည် အကြီးအကဲများ၏ မေတ္တာပါဂရုစိုက်မှုအောက်တွင် ညီအစ်ကိုများအလယ်၌ လုံခြုံမှုရှာတွေ့ကြရသည်။ (ဟေရှာယ ၃၂:၁၊ ၂; ဟေဗြဲ ၁၀:၂၄၊ ၂၅) ယင်းသည် အထူးသဖြင့်မှန်ကန်ပေသည်၊ အကြောင်းမှာ ကပ်ကျော်ရေးသည် နာခံမှုအပေါ်မူတည်မည့် အစီအစဉ်စနစ်၏အဆုံး နီးကပ်လာနေသောကြောင့်ပင်။—ဇေဖနိ ၂:၃။
၁၈။ ယေဟောဝါသည် “ပင်လယ်၌ရှိသောနဂါးကို” မကြာမီ မည်သို့ “သတ်တော်မူ” လိမ့်မည်နည်း။
၁၈ ထိုအချိန်နှင့်ပတ်သက်၍ ဟေရှာယကဤသို့ပရောဖက်ပြုခဲ့သည်– “ထိုကာလ၌ ထာဝရဘုရားသည် ပြေးတတ်သောမြွေလဝိသန်ကိုလည်းကောင်း၊ လိမ်သောမြွေလဝိသန်ကိုလည်းကောင်း ခိုင်ခံ့ကြီးမားသောဓားတော်နှင့်ဒဏ်ပေး၍ ပင်လယ်၌ရှိသောနဂါးကိုလည်း သတ်တော်မူလိမ့်မည်။” (ဟေရှာယ ၂၇:၁) ခေတ်သစ် “မြွေလဝိသန်” ကားအဘယ်နည်း။ ထင်ရှားနေသည်ကား ၎င်းသည် “ရှေးမြွေဟောင်း” စာတန်ကိုယ်တိုင်နှင့်အတူ ဘုရားသခင့်ဣသရေလလူမျိုးကို ဆန့်ကျင်၍စစ်ဆင်နွှဲရန် သူအသုံးပြုသော သူ၏ဆိုးညစ်သောအစီအစဉ်စနစ်ဖြစ်သည်။ (ဗျာဒိတ် ၁၂:၉၊ ၁၀၊ ၁၇; ၁၃:၁၄၊ ၁၆၊ ၁၇) ၁၉၁၉ တွင် မြွေလဝိသန်သည် ဘုရားသခင့်လူမျိုးကို ချုပ်ကိုင်မထားနိုင်တော့ပေ။ အချိန်တန်သော် လုံးလုံးပျောက်ဆုံးသွားပေလိမ့်မည်။ (ဗျာဒိတ် ၁၉:၁၉-၂၁; ၂၀:၁-၃၊ ၁၀) သို့ဖြင့် ယေဟောဝါသည် “ပင်လယ်၌ရှိသောနဂါးကိုလည်း သတ်တော်မူ” လိမ့်မည်။ ဤအတောအတွင်း ယေဟောဝါ၏လူမျိုးကို မြွေလဝိသန်သည် မည်သို့ပင်ဆန့်ကျင်ဖို့ကြိုးစားပါစေ အောင်မြင်လိမ့်မည်မဟုတ်ချေ။ (ဟေရှာယ ၅၄:၁၇) ယင်းသည် စိတ်သက်သာရာရစေသော အာမခံချက်ပါတကား!
‘အမြှုပ်ထနေသောစပျစ်ရည်ထွက်သည့်စပျစ်ဥယျာဉ်’
၁၉။ ယနေ့ အကြွင်းအကျန်၏အခြေအနေကား အဘယ်နည်း။
၁၉ ယေဟောဝါထံတော်မှ ဤအလင်းဖြာမှုအားလုံးကြောင့် ကျွန်ုပ်တို့သည် ပျော်ရွှင်စရာအကြောင်းလုံးလုံးရှိသည်မဟုတ်ပေလော။ အမှန်ပင်ရှိသည်! ဟေရှာယက ဤသို့ရေးသားသောအခါ ယေဟောဝါလူမျိုး၏ ပျော်ရွှင်မှုကိုလှပတင့်တယ်စွာဖော်ပြလေသည်– “ထိုကာလ၌ စပျစ်ဥယျာဉ်ကိုအကြောင်းပြု၍ ဤသို့သီချင်းဆိုကြလော့။ ‘ငါထာဝရဘုရားသည် ဥယျာဉ်စောင့်ဖြစ်၏။ မခြားမလပ်ရေလောင်းမည်။ အဘယ်သူမျှမဖျက်စေခြင်းငှာ နေ့ညမပြတ်စောင့်ရှောက်မည်။’” (ဟေရှာယ ၂၇:၂၊ ၃) ယေဟောဝါသည် မိမိ၏ “စပျစ်ဥယျာဉ်၊” ဘုရားသခင့်ဣသရေလလူမျိုးမှအကြွင်းအကျန်နှင့် သူတို့၏ဝီရိယရှိအပေါင်းပါများကို ဂရုစိုက်တော်မူခဲ့ပြီ။ (ယောဟန် ၁၅:၁-၈) အကျိုးရလဒ်မှာ ကိုယ်တော်၏နာမတော် ထင်ရှားကျော်ကြားလာခဲ့ပြီး ကမ္ဘာမြေကြီးပေါ်ရှိ ကိုယ်တော့်ကျေးကျွန်များအတွက် ရွှင်လန်းအားရခြင်းဖြစ်သည်။
၂၀။ ယေဟောဝါသည် ခရစ်ယာန်အသင်းတော်ကို မည်သို့ကာကွယ်ပေးသနည်း။
၂၀ ယေဟောဝါသည် အစောပိုင်းတွင် မိမိ၏ကောင်းကင်အတန်းအစားကျေးကျွန်များကို အမျက်ထွက်ခဲ့ရာ ၁၉၁၈ ၌ သူတို့အား ဝိညာဉ်ရေးသုံ့ပန်းများဖြစ်ခွင့်ပြုခဲ့သော်လည်း ကိုယ်တော်၏အမျက်တော်ရပ်တန့်ခဲ့ခြင်းက ကျွန်ုပ်တို့ကို စိတ်ရွှင်လန်းစေနိုင်သည်။ ယေဟောဝါကိုယ်တော်တိုင်က ဤသို့မိန့်တော်မူသည်– “ငါ့အမျက်ငြိမ်းပြီ။ ဆူးပင်မျိုးကိုမူကား စစ်ပွဲ၌ငါတွေ့ပါစေသော။ ချက်ချင်းတိုက်၍ တစ်ပြိုင်နက်မီးရှို့မည်။ သို့မဟုတ် ငါ၏အစွမ်းသတ္တိကိုကိုးစား၍ ငါနှင့် မိတ်သဟာယဖွဲ့ကြစေ။ ငါနှင့် မိတ်သဟာယဖွဲ့ကြစေသော။” (ဟေရှာယ ၂၇:၄၊ ၅) ယေဟောဝါ၏စပျစ်နွယ်ပင်များသည် ‘အမြှုပ်ထသောစပျစ်ရည်’ များစွာထွက်နေစေရန် ၎င်းတို့ကို ပျက်စီးစေမည့် ပေါင်းပင်နှင့်တူသည့်အရာမှန်သမျှကို ကိုယ်တော်ချေမှုန်းဖျက်ဆီးပစ်၏။ သို့ဖြစ်၍ ခရစ်ယာန်အသင်းတော်၏အကျိုးကို မည်သူတစ်ဦးတစ်ယောက်ကမျှ အန္တရာယ်မပြုစေနှင့်! “ယေဟောဝါ၏အစွမ်းသတ္တိကိုကိုးစား” ကာ ကိုယ်တော်၏မျက်နှာသာနှင့် ကာကွယ်မှုကို အားလုံးရှာဖွေကြပါစို့။ ဤသို့ပြုခြင်းဖြင့် ဘုရားသခင်နှင့် မိတ်သဟာယဖွဲ့ရာကျသည်၊ ၎င်းမှာ အလွန်အရေးကြီးသဖြင့် ယင်းကို ဟေရှာယနှစ်ကြိမ်နှစ်ခါဖော်ပြခဲ့သည်။—ဆာလံ ၈၅:၁၊ ၂၊ ၈; ရောမ ၅:၁။
၂၁။ ဖြစ်ထွန်းသောမြေသည် အဘယ်နည်းအားဖြင့် “အသီး” နှင့်ပြည့်ခဲ့သနည်း။
၂၁ ကောင်းချီးများဆက်ခံစားရသည်– “နောင်ကာလ၌ ယာကုပ်သည် အမြစ်ကျလိမ့်မည်။ ဣသရေလသည် စိမ်းလန်း၍ အဖူးအငုံထွက်သဖြင့် လောကနိုင်ငံ [“ဖြစ်ထွန်းသောမြေ၊” ကဘ] ကို အသီးနှင့်ပြည့်စေလိမ့်မည်။” (ဟေရှာယ ၂၇:၆) ထိုအခန်းငယ်သည် ၁၉၁၉ ခုနှစ်ကတည်းက ပြည့်စုံလျက်ရှိပြီး ယေဟောဝါ၏တန်ခိုးတော်ကို အံ့ဖွယ်နည်းဖြင့်သက်သေထူခဲ့ပြီ။ ကောင်းကင်အတန်းအစားခရစ်ယာန်များသည် ကမ္ဘာမြေကြီးကို ဝိညာဉ်ရေးအရအာဟာရရှိအစားအစာ၊ “အသီး” ဖြင့်ပြည့်စေခဲ့ပြီ။ ယိုယွင်းပျက်စီးနေသော ဤလောကအလယ်တွင် ဘုရားသခင်၏မြင့်မားသောစံနှုန်းများကို သူတို့ပျော်ရွှင်စွာစောင့်ထိန်းနေကြသည်။ ယင်းကြောင့် ယေဟောဝါသည် သူတို့ကိုတိုးပွားစေခြင်းဖြင့် ဆက်၍ကောင်းချီးပေးတော်မူသည်။ ရလဒ်အနေနှင့် သန်းနှင့်ချီသောသူတို့၏အပေါင်းပါ၊ အခြားသိုးသည် “ဘုရား [သခင်] ဝတ်ကို နေ့ညမပြတ်ပြုရကြ၏။” (ဗျာဒိတ် ၇:၁၅) ကျွန်ုပ်တို့သည် “အသီး” စားသုံးခြင်းနှင့် ယင်းကို အခြားသူတို့အားဝေမျှခြင်း အခွင့်ထူးကို ဘယ်သောအခါမျှ မျက်ခြေမပြတ်ပါစေနှင့်!
၂၂။ အလင်းကိုလက်ခံသူတို့သည် အဘယ်ကောင်းချီးများခံစားရသနည်း။
၂၂ မြေကြီးပေါ် အမှောင်ဖုံးလွှမ်းနေပြီး လူမျိုးစုများအပေါ် ထူထပ်သောမှောင်မိုက်ဖုံးလွှမ်းနေသည့် ဤခဲယဉ်းသောကာလတွင် ယေဟောဝါသည် မိမိ၏လူမျိုးအပေါ် ဝိညာဉ်ရေးရာအလင်းဖြာပေးနေသည့်အတွက် ကျွန်ုပ်တို့ကျေးဇူးမတင်ကြပေလော။ (ဟေရှာယ ၆၀:၂; ရောမ ၂:၁၉; ၁၃:၁၂) ယင်းကို လက်ခံသူအားလုံးအတွက် ထိုအလင်းသည် ယခုအချိန်အခါတွင် စိတ်ငြိမ်သက်မှုနှင့် ပျော်ရွှင်မှုရှိစေပြီး အနာဂတ်တွင် ထာဝရအသက်ကိုပင် ရရှိစေပေမည်။ ထိုကြောင့် အကြောင်းကောင်းဖြင့် အလင်းကိုချစ်မြတ်နိုးကြသောကျွန်ုပ်တို့သည် ပျော်မြူးလျက် ဆာလံဆရာနှင့်အတူ ယေဟောဝါအား ဤသို့ချီးမွမ်းထောမနာပြုကြသည်– “ထာဝရဘုရား [“ယေဟောဝါ၊” ကဘ] သည် ငါ၏အသက်ခိုလှုံရာဖြစ်တော်မူ၏။ ငါသည် အဘယ်သူကိုကြောက်လန့်ရအံ့နည်း။ ထာဝရဘုရား [“ယေဟောဝါ၊” ကဘ] ကိုမျှော်လင့်လော့။ အားယူ၍ရဲရင့်သောစိတ်နှလုံးရှိလော့။ ထာဝရဘုရား [“ယေဟောဝါ၊” ကဘ] ကိုမျှော်လင့်လျက်နေလော့။”—ဆာလံ ၂၇:၁ခ၊ ၁၄။
သင်မှတ်မိသလော
• ယေဟောဝါ၏လူမျိုးကို ဖိနှိပ်ချုပ်ချယ်သူတို့အတွက် အဘယ်အနာဂတ်ရှိသနည်း။
• အဘယ်တိုးတက်မှုအကြောင်း ဟေရှာယ၌ ပရောဖက်ပြုထားသနည်း။
• အဘယ် “အတွင်းခန်း” များထဲတွင် ကျွန်ုပ်တို့ ရှိနေသင့်သနည်း၊ အဘယ်ကြောင့်နည်း။
• ယေဟောဝါလူမျိုး၏အခြေအနေက ကိုယ်တော်အား အဘယ်ကြောင့်ချီးမွမ်းစရာဖြစ်စေသနည်း။
[လေ့လာရန်မေးခွန်းများ]
[စာမျက်နှာ ၂၂ ပါ လေးထောင့်ကွက်]
စာအုပ်အသစ်
ဤလေ့လာရန်ဆောင်းပါးနှစ်ခုတွင် ဆွေးနွေးတင်ပြသောအကြောင်းအရာအများစုသည် ၂၀၀၀/၂၀၀၁ ခုနှစ် ခရိုင်စည်းဝေးကြီးတွင် ဟောပြောချက်တစ်ခုအဖြစ် တင်ဆက်ခဲ့သည်။ ဟောပြောချက်၏အဆုံးတွင် စာအုပ်အသစ်တစ်အုပ်ကိုထုတ်ဝေခဲ့ပြီး ခေါင်းစဉ်မှာ ဟေရှာယပရောဖက်ပြုချက်—လူခပ်သိမ်းအတွက်အလင်း အတွဲ ၁ ဖြစ်သည်။ စာမျက်နှာ ၄၁၆ မျက်နှာရှိ ဤစာအုပ်သည် ဟေရှာယကျမ်းစောင်၏ ပထမအခန်းကြီး ၄၀ ပါ အခန်းငယ်တစ်ခုပြီးတစ်ခုကို ဆွေးနွေးထားခြင်းဖြစ်၏။
[စာမျက်နှာ ၁၈ ပါ ရုပ်ပုံ]
ယေဟောဝါ၏ “ခိုင်ခံ့သောမြို့၊” ကိုယ်တော်၏အဖွဲ့အစည်းတွင် ဖြောင့်မတ်သောသူသာ ဝင်ခွင့်ရ
[စာမျက်နှာ ၁၉ ပါ ရုပ်ပုံ]
ဟေရှာယသည် ယေဟောဝါအား “ညအခါ” ၌ရှာဖွေခဲ့
[စာမျက်နှာ ၂၁ ပါ ရုပ်ပုံ]
ယေဟောဝါသည် မိမိ၏ “စပျစ်ဥယျာဉ်” ကိုကာကွယ်၍ အသီးသီးစေ