လူ့အားနည်းချက်အပေါ် အနိုင်ယူခြင်း
လူ့အားနည်းချက်အပေါ် အနိုင်ယူခြင်း
“ဇာတိပကတိစိတ်သဘောသည် သေခြင်းအကြောင်းဖြစ်၏။”—ရောမ ၈:၆။
၁။ အချို့က လူ့ကိုယ်ခန္ဓာကို မည်သို့ရှုမြင်ကြသနည်း၊ အဘယ်မေးခွန်းကို ဆင်ခြင်သုံးသပ်ထိုက်သနည်း။
“အကျွန်ုပ်သည် ကြောက်မက်ဖွယ်သောလက္ခဏာ၊ ထူးဆန်းသောလက္ခဏာတို့နှင့်ပြည့်စုံသည်ဖြစ်၍ ကိုယ်တော်ကိုချီးမွမ်းပါမည်။” (ဆာလံ ၁၃၉:၁၄) ဆာလံဆရာဒါဝိဒ်သည် ယေဟောဝါ၏ဖန်ဆင်းရာတစ်ခုဖြစ်သော—လူ့ကိုယ်ခန္ဓာကို စေ့စေ့ဆင်ခြင်နေစဉ် ထိုသို့သီဆိုခဲ့၏။ ခြေမြစ်ခိုင်လုံမှုရှိသော ၎င်းချီးမွမ်းစကားနှင့်ဆန့်ကျင်လျက် ကိုယ်ခန္ဓာကို အပြစ်ခိုအောင်းရာနေရာနှင့် အပြစ်တရား၏အသုံးခံပစ္စည်းအဖြစ် ယူမှတ်ကြသော ဘာသာရေးခေါင်းဆောင်များရှိသည်။ ၎င်းကို “အသိဉာဏ်ကင်းမဲ့မှုကို ဖုံးကွယ်ထားသည့်ဝတ်ရုံ၊ အကျင့်ဆိုး၏အခြေတည်ရာ၊ ဖောက်ပြန်ယိုယွင်းမှု၏ အချုပ်အနှောင်၊ အမှောင်ဖုံးနေသော လှောင်ချိုင့်၊ ရှင်လျက်နှင့်အသေဘဝရောက်နေခြင်း၊ သက်ရှိအသေကောင်၊ ရွေ့ရှားနေသောသင်္ချိုင်းဂူ” ဟု သမုတ်ထားကြသည်။ “ငါ့အထဲမှာ ငါ့ဇာတိပကတိ၌ ကောင်းသောအရာတစ်စုံတစ်ခုမျှမတည်” ဟူသော တမန်တော်ပေါလု၏အဆို မှန်လှပေသည်။ (ရောမ ၇:၁၈) သို့သော် ယင်းက ကျွန်ုပ်တို့သည် အပြစ်ရှိသောကိုယ်ခန္ဓာ၌ မျှော်လင့်ချက်မဲ့စွာ ထောင်ချောက်ကျနေပြီဟုဆိုလိုသလော။
၂။ (က) “ဇာတိပကတိသဘော” ဟူသည် အဘယ်အရာကိုဆိုလိုသနည်း။ (ခ) ဘုရားသခင့်နှစ်သက်မှုရလိုသည့် လူသားများအထဲတွင် “ဇာတိ” နှင့် “ဝိညာဉ်” တို့စပ်ကြား အဘယ်ဆိုင်ပြိုင်မှုရှိသနည်း။
၂ တစ်ခါတစ်ရံ ကျမ်းစာစောင်များက ပုန်ကန်သူအာဒံ၏ အပြစ်ပါသောသားစဉ်မြေးဆက်တစ်ဦးအဖြစ် မစုံလင်သည့်အခြေအနေတွင်ရှိသော လူကိုပုံတင်ပြရန် ‘ဇာတိ’ ကိုအသုံးပြုသည်။ (ဧဖက် ၂:၃; ဆာလံ ၅၁:၅; ရောမ ၅:၁၂) သူ့ထံမှကျွန်ုပ်တို့ရခဲ့သောအမွေက ‘ဇာတိအားနည်းမှု’ ကိုဖြစ်ပေါ်စေခဲ့ပြီ။ (ရောမ ၆:၁၉) ထို့ပြင် ပေါလုက “ဇာတိပကတိစိတ်သဘောသည် သေခြင်းအကြောင်းဖြစ်၏” ဟုသတိပေးခဲ့သည်။ (ရောမ ၈:၆) “ဇာတိပကတိစိတ်သဘော” ဟူသည် အားနည်းသောဇာတိဆန္ဒများ၏ ချုပ်ကိုင်မှုနှင့် လှုံ့ဆော်မှုတို့ကိုခံနေရခြင်းကိုဆိုလိုသည်။ (၁ ယောဟန် ၂:၁၆) ထို့ကြောင့် ကျွန်ုပ်တို့သည် ဘုရားသခင့်နှစ်သက်မှုရဖို့ ကြိုးစားနေသူများဖြစ်မည်ဆိုလျှင် ကျွန်ုပ်တို့၏ဝိညာဉ်ရေးရာစိတ်ထားနှင့် “ဇာတိပကတိအကျင့်တို့” ကိုကျင့်ရန် ဖိအားပေးဖို့မရပ်မနားကြိုးပမ်းသည့် ကျွန်ုပ်တို့၏အပြစ်ပြုလိုသည့် ပင်ကိုဇာတိစိတ်တို့စပ်ကြား အဆက်မပြတ်ဆိုင်ပြိုင်မှုရှိသည်။ (ဂလာတိ ၅:၁၇-၂၃; ၁ ပေတရု ၂:၁၁) သူ့အထဲ၌ရှိသော စိတ်ထိခိုက်စေသည့် ဤဆိုင်ပြိုင်မှုကိုဖော်ပြပြီးနောက် ပေါလုကဤသို့ပြောဆိုခဲ့သည်– “ငါသည် ငြိုငြင်သောသူဖြစ်ပါသည်တကား။ ဤအသေကောင်မှ ငါ့ကိုအဘယ်သူကယ်လွှတ်မည်နည်း။” (ရောမ ၇:၂၄) ပေါလုသည် အပြစ်သွေးဆောင်မှုကို မခုခံနိုင်သောသားကောင်တစ်ဦးဖြစ်ခဲ့သလော။ မဖြစ်ခဲ့ပါဟူ၍ ကျမ်းစာကပြတ်ပြတ်သားသားဖြေဆိုသည်!
အပြစ်သွေးဆောင်မှုနှင့် အပြစ်တရားတို့၏အဖြစ်မှန်
၃။ အပြစ်တရားနှင့် အပြစ်သွေးဆောင်မှုကို အများကမည်သို့ရှုမြင်ကြသနည်း၊ သို့သော် ယင်းသို့သောသဘောထားကို ကျမ်းစာကမည်သို့သတိပေးသနည်း။
၃ ယနေ့ များစွာသောသူတို့အတွက် အပြစ်တရားသည် လက်မခံနိုင်ဖွယ်အယူအဆဖြစ်၏။ အချို့က “အပြစ်တရား” ကို လူ့ချို့တဲ့မှုများကိုဖော်ပြသော ခေတ်ဟောင်းအသုံးအနှုန်းတစ်ခုအဖြစ် ပေါ့ပေါ့တန်တန်သုံးကြသည်။ “ငါတို့ရှိသမျှသည် ကိုယ်ခန္ဓာ၌ကျင့်သောအကျင့်၊ ကောင်းမကောင်းရှိသည်အတိုင်း အကျိုးအပြစ်ကိုအသီးအသီးခံခြင်းငှာ၊ ခရစ်တော်၏တရားပလ္လင်ရှေ့၌ ပေါ်လာရကြမည်” ကိုသူတို့မသိကြချေ။ (၂ ကောရိန္သု ၅:၁၀) အခြားသူတို့မူ “သွေးဆောင်မှုကလွဲလို့ ဘာမဆိုတွန်းလှန်နိုင်တယ်” ဟုခနဲ့တဲ့တဲ့ပြောဆိုပေမည်။ လူအချို့သည် အစားအစာ၊ လိင်၊ ပျော်ရွှင်မှုနှင့်ပတ်သက်သည်ဖြစ်စေ ပြီးမြောက်အောင်မြင်မှုနှင့်ပတ်သက်သည်ဖြစ်စေ ချက်ချင်းအလိုဆန္ဒပြည့်မှုကို အဓိကထားသော လူမှုအသိုင်းအဝိုင်းတွင်နေထိုင်ကြသည်။ အရာရာကိုသူတို့အလိုရှိရုံမျှမက ၎င်းကို ချက်ချင်းလိုချင်ကြသည်! (လုကာ ၁၅:၁၂) လတ်တလောပျော်မွေ့မှုကိုကျော်လွန်၍ “မှန်သောအသက်” ဆိုင်ရာအနာဂတ်ဝမ်းမြောက်မှုကို သူတို့မမျှော်လင့်ကြချေ။ (၁ တိမောသေ ၆:၁၉) သို့သော် ဝိညာဉ်ရေးဘက် သို့မဟုတ် တစ်ဖက်ဖက်တွင် ကျွန်ုပ်တို့ကို အန္တရာယ်ပြုမည့် မည်သည့်အရာကိုမဆို ရှောင်ရှားကာ အသေအချာစဉ်းစားဆင်ခြင်ပြီး အမြင်ကျယ်ဖို့ ကျမ်းစာက ကျွန်ုပ်တို့ကိုသွန်သင်ပေးသည်။ မှုတ်သွင်းခံနယပုံပြင်ကျမ်းတစ်ချက်က ဤသို့ဆို၏– “[ကောင်းသော] သတိရှိသောသူသည် အမှုကိုမြော်မြင်၍ ပုန်းရှောင်လျက်နေတတ်၏။ ဉာဏ်တိမ်သောသူမူကား အစဉ်အတိုင်းသွား၍ အမှုနှင့်တွေ့တတ်၏။”—သု. ၂၇:၁၂။
၄။ ၁ ကောရိန္သု ၁၀:၁၂၊ ၁၃ တွင်အဘယ်ဆုံးမစကားကို ပေါလု မှာကြားခဲ့သနည်း။
၄ ကိုယ်ကျင့်တရားပျက်ပြားမှုဖြင့်နာမည်ကြီးနေသော ကောရိန္သုမြို့ရှိခရစ်ယာန်များထံစာရေးသောအခါ ပေါလုသည် သွေးဆောင်မှုနှင့် အပြစ်တရား၏စွမ်းအားတို့နှင့်စပ်လျဉ်း၍ လက်တွေ့ကျသောသတိပေးချက်တစ်ခုကို ကမ်းလှမ်းခဲ့သည်။ သူဤသို့ဆိုခဲ့သည်– “အကြင်သူသည် မိမိတည်ကြည်လျက်နေသည်ဟု မိမိထင်မှတ်၏။ ထိုသူသည် မလဲခြင်းငှာသတိပြုစေ။ လူ၌ဖြစ်တတ်သော စုံစမ်းနှောင့်ယှက်ခြင်း [“သွေးဆောင်မှု၊” ကဘ] ကိုသာ သင်တို့သည်ခံရကြ၏။ ဘုရားသခင်သည် သစ္စာနှင့်ပြည့်စုံတော်မူသည်ဖြစ်၍၊ သင်တို့မခံနိုင်သောစုံစမ်းနှောင့်ယှက်ခြင်း [“သွေးဆောင်မှု၊” ကဘ] ကို သင်တို့၌ရောက်စိမ့်သောငှာ အခွင့်ပေးတော်မမူ။ သင်တို့သည် ခံနိုင်မည်အကြောင်း စုံစမ်းနှောင့်ယှက်ခြင်းအရာနှင့်တကွ၊ ထွက်မြောက်သောလမ်းကိုလည်း စီရင်ပြုပြင်တော်မူလိမ့်မည်။” (၁ ကောရိန္သု ၁၀:၁၂၊ ၁၃) ကျွန်ုပ်တို့—လူကြီးလူငယ်၊ ယောက်ျားမိန်းမ—အားလုံးသည် ကျောင်းတွင်၊ အလုပ်ခွင်တွင် သို့မဟုတ် အခြားတစ်နေရာရာတွင် သွေးဆောင်မှုများစွာနှင့်ရင်ဆိုင်တိုးကြသည်။ ထို့ကြောင့် ပေါလု၏စကားများကို ဆန်းစစ်ကြည့်ကာ ၎င်းတို့သည် ကျွန်ုပ်တို့အတွက်အဘယ်အဓိပ္ပာယ်ရှိကြောင်း ကြည့်ကြပါစို့။
ကိုယ့်ကိုယ်ကိုယုံကြည်စိတ်ချလွန်းခြင်းမရှိပါနှင့်
၅။ ကိုယ့်ကိုယ်ကိုစိတ်ချလွန်းခြင်းသည် အဘယ်ကြောင့်အန္တရာယ်ရှိသနည်း။
၅ ပေါလုကဤဆို၏– “အကြင်သူသည် မိမိတည်ကြည်လျက်နေသည်ဟု မိမိထင်မှတ်၏။ ထိုသူသည် မလဲခြင်းငှာသတိပြုစေ။” (၁ ကောရိန္သု ၁၀:၁၂) ကျွန်ုပ်တို့၏ကိုယ်ကျင့်တရားဆိုင်ရာခွန်အားနှင့်ပတ်သက်၍ မိမိတို့ကိုယ်ကိုယုံကြည်စိတ်ချလွန်းခြင်းသည် အန္တရာယ်ရှိ၏။ ယင်းက ပင်ကိုဇာတိစိတ်နှင့် အပြစ်တရား၏စွမ်းအားတို့ကို နားလည်မှုကင်းမဲ့ကြောင်းဖော်ပြသည်။ မောရှေ၊ ဒါဝိဒ်၊ ရှောလမုန်နှင့် တမန်တော်ပေတရုတို့ကဲ့သို့သောသူများပင် အပြစ်တရားလက်တွင်း ကျဆင်းခဲ့ကြသည်ဖြစ်ရာ ကျွန်ုပ်တို့ကိုမထိခိုက်ဟု ယူမှတ်သင့်သလော။ (တောလည်ရာ ၂၀:၂-၁၃; ၂ ဓမ္မရာဇဝင် ၁၁:၁-၂၇; ၃ ဓမ္မရာဇဝင် ၁၁:၁-၆; မဿဲ ၂၆:၆၉-၇၅) နယပုံပြင် ၁၄:၁၆ [သမ] က “ပညာသည် အဆိုးကိုကြောက်ရွံ့၍ ကြဉ်ရှောင်တတ်၏။ မိုက်သောသူမူကား မောက်မာ၍စိတ်ချစွာနေတတ်၏” ဟုဆိုသည်။ ထို့ပြင် ယေရှုက “စိတ်ဝိညာဉ်ကား စေတနာရှိငြားသော်လည်း၊ ကိုယ်မူကားအားနည်းသည်” ဟုမိန့်ဆိုခဲ့၏။ (မဿဲ ၂၆:၄၁) မစုံလင်သောလူသားများသည် ဆိုးညစ်သောအာသာဆန္ဒများနှင့် မကင်းလွတ်ကြသဖြင့် ပေါလု၏သတိပေးချက်ကို အလေးအနက်ထားကာ သွေးဆောင်မှုကိုတွန်းလှန်ဖို့လိုသည်၊ သို့မဟုတ်လျှင် ကျွန်ုပ်တို့ကျရှုံးသွားနိုင်သည်။—ယေရမိ ၁၇:၉။
၆။ သွေးဆောင်မှုအတွက် မည်သည့်အချိန်၌ မည်သို့အသင့်ပြင်ထားသင့်သနည်း။
၆ မမျှော်လင့်ဘဲကျရောက်လာနိုင်သော ပြဿနာများအတွက် အသင့်ပြင်ထားခြင်းသည် ပညာရှိရာရောက်၏။ ငြိမ်သက်သောအချိန်ကာလသည် ခံတပ်များကိုတည်ဆောက်ဖို့အချိန်ဖြစ်ကြောင်း ဘုရင်အာသအသိအမှတ်ပြုခဲ့သည်။ (၂ ရာဇဝင်ချုပ် ၁၄:၂၊ ၆၊ ၇) တိုက်ခိုက်ခံရချိန်၌ ပြင်ဆင်ရန်အချိန် မရှိတော့ကြောင်းကို သူသိခဲ့သည်။ အလားတူ သွေးဆောင်မှုများပေါ်လာချိန်၌ အဘယ်သို့ပြုရမည်နှင့်ပတ်သက်သော ဆုံးဖြတ်ချက်များကို အပူအပင်မရှိငြိမ်သက်ချိန်များတွင် ခေါင်းအေးအေးထားစဉ်းစားပြုလုပ်ခြင်းသည် အကောင်းဆုံးဖြစ်သည်။ (ဆာလံ ၆၃:၅) ဒံယေလနှင့် ဘုရားသခင်ကိုကြောက်ရွံ့သော သူ၏မိတ်ဆွေများသည် ဘုရင့်ခဲဖွယ်စားဖွယ်ကိုစားသုံးဖို့ ဖိအားပေးမခံရမီကတည်းက ယေဟောဝါ၏ပညတ်တော်ကိုစောင့်ရှောက်ဖို့ ဆုံးဖြတ်ချက်ချခဲ့ကြသည်။ ထို့ကြောင့် မိမိတို့၏ခံယူချက်များအတိုင်းစွဲမြဲစွာနေဖို့ ဆုတ်ဆိုင်းမနေကြဘဲ မသန့်ရှင်းသောအစာကိုမစားခဲ့ကြချေ။ (ဒံယေလ ၁:၈) သွေးဆောင်သည့်အခြေအနေများ မပေါ်ပေါက်မီ ကိုယ်ကျင့်တရားသန့်ရှင်းစွာနေထိုင်ဖို့ ကျွန်ုပ်တို့၏စိတ်ပိုင်းဖြတ်ချက်ကို အားဖြည့်ပေးကြပါစို့။ သို့ပြုလျှင် အပြစ်ကိုတွန်းလှန်ဖို့ခွန်အားကို ကျွန်ုပ်တို့ရရှိကြမည်။
၇။ အခြားသူများသည် သွေးဆောင်မှုကို အောင်မြင်စွာတွန်းလှန်ခဲ့ကြကြောင်းသိရခြင်းသည် အဘယ်ကြောင့်စိတ်သက်သာစရာဖြစ်သနည်း။
၇ “လူ၌ဖြစ်တတ်သော စုံစမ်းနှောင့်ယှက်ခြင်းကိုသာ သင်တို့သည်ခံရကြ၏” ဟူသောပေါလု၏စကားမှ ကျွန်ုပ်တို့အမှန်စိတ်သက်သာမှုရရှိကြသည်တကား! (၁ ကောရိန္သု ၁၀:၁၃) တမန်တော်ပေတရုက ဤသို့ရေးခဲ့သည်– “လူပြည်အရပ်ရပ်တို့၌ရှိသော သင်တို့ညီအစ်ကိုများတို့သည် ထိုသို့သောဆင်းရဲကိုခံရသည်ဟု သိမှတ်လျက်၊ ယုံကြည်ခြင်း၌တည်၍ [စာတန်] ကိုဆီးတားကြလော့။” (၁ ပေတရု ၅:၉) အခြားသူများသည် အလားတူသွေးဆောင်မှုများကို ရင်ဆိုင်ခဲ့ကြပြီး ဘုရားသခင့်အကူအညီဖြင့် အောင်မြင်စွာတွန်းလှန်ခဲ့ကြသည်ဖြစ်ရာ ကျွန်ုပ်တို့လည်း ထိုသို့ပြုနိုင်ပါသည်။ သို့သော် ခရစ်ယာန်စစ်များသည် ကိုယ်ကျင့်တရားပျက်ပြားသောလောက၌ အသက်ရှင်နေကြသောကြောင့် ကျွန်ုပ်တို့အားလုံး အနှေးနှင့်အမြန်သွေးဆောင်ခံရဖို့ မျှော်လင့်နိုင်သည်။ သို့ဖြစ်၍ လူ့အားနည်းမှုနှင့် အပြစ်တရားသို့သွေးဆောင်မှုတို့ကို အနိုင်ယူနိုင်ကြောင်း မည်သို့ယုံကြည်စိတ်ချနိုင်သနည်း။
သွေးဆောင်မှုကိုကျွန်ုပ်တို့တွန်းလှန်နိုင်!
၈။ သွေးဆောင်မှုကိုရှောင်ဖို့ အခြေခံကျသောနည်းတစ်နည်းကား အဘယ်နည်း။
၈ ‘အပြစ်တရား၏အစေခံများဖြစ်’ ရခြင်းမှကင်းလွတ်ရန် အခြေခံကျသည့်နည်းတစ်နည်းမှာ သွေးဆောင်မှုကိုတတ်နိုင်သရွေ့ ရှောင်ကြဉ်ခြင်းဖြစ်၏။ (ရောမ ၆:၆) နယပုံပြင် ၄:၁၄၊ ၁၅ [သမ္မာ] ကဤသို့တိုက်တွန်းသည်– “လူဆိုးတို့လမ်းထဲသို့မဝင်နှင့်။ ဆိုးယုတ်သူတို့လမ်း၌ မလျှောက်မသွားနှင့်။ သူတို့လမ်းကိုရှောင်လော့။ မလိုက်မသွားနှင့်။ လွှဲသွားလော့။” အချို့သောအခြေအနေများသည် အပြစ်သို့ဦးတည်နိုင်မည့်ပုံစံဟုတ်မဟုတ် ကျွန်ုပ်တို့ကြိုသိထားလေ့ရှိသည်။ ထို့ကြောင့် ခရစ်ယာန်များအနေနှင့် အထင်အရှားပြုလုပ်ရမည့်အရာမှာ မှားယွင်းသောဆန္ဒများနှင့် မသန့်ရှင်းသောစိတ်စွဲလမ်းရာများဖြင့် ကျွန်ုပ်တို့ကိုဆွပေးနိုင်သော မည်သူ့ကိုမဆို၊ မည်သည့်အရာ၊ မည်သည့်နေရာကိုမဆိုနှင့် ဝေးဝေးနေကာ “လွှဲသွား” ရန်ဖြစ်၏။
၉။ အန္တရာယ်မကင်းဖွယ်အခြေအနေများမှ ထွက်ပြေးခြင်းကို ကျမ်းစာစောင်များက မည်သို့ဖော်ပြသနည်း။
၉ သွေးဆောင်မှုကိုအနိုင်ယူသော အခြေခံကျသည့် အခြားခြေလှမ်းတစ်ခုမှာ သွေးဆောင်မှုဖြစ်စေသည့်အခြေအနေတစ်ခုမှ ထွက်ပြေးခြင်းဖြစ်သည်။ ပေါလုက “မတရားသောမေထုန်မှ ပြေးကြလော့” ဟုအကြံပေးခဲ့သည်။ (၁ ကောရိန္သု ၆:၁၈၊ ကဘ) “[ရုပ်] ကိုးကွယ်ခြင်းအမှုမှ ပြေးကြလော့” ဟုသူရေးသားခဲ့သည်။ (၁ ကောရိန္သု ၁၀:၁၄၊ ကဘ) ထို့ပြင် စည်းစိမ်ဥစ္စာကို အလွန်အမင်းတပ်မက်ခြင်းနှင့် “လူပျိုတို့၏တပ်မက်ခြင်းကိလေသာစိတ်” တို့မှရှောင်ပြေးဖို့ တိမောသေအား တမန်တော်ကသတိပေးခဲ့သည်။—၂ တိမောသေ ၂:၂၂; ၁ တိမောသေ ၆:၉-၁၁။
၁၀။ သွေးဆောင်မှုမှထွက်ပြေးခြင်း၏တန်ဖိုးကို အဘယ်ဆန့်ကျင်ဘက်ဥပမာနှစ်ခုက တင်ပြသနည်း။
၁၀ ဣသရေလဘုရင်ဒါဝိဒ်၏အဖြစ်ကို သုံးသပ်ကြည့်ပါ။ သူ၏နန်းတော်အမိုးပေါ်မှ ကြည့်လိုက်သည့်အခါ လှပသောအမျိုးသမီးတစ်ဦးရေချိုးနေသည်ကို သူမြင်တွေ့ခဲ့ပြီး သူ့နှလုံးတွင် မှားယွင်းသောဆန္ဒများနှင့်ပြည့်နှက်လာသည်။ သူသည် ထိုနေရာမှထွက်သွားပြီး သွေးဆောင်မှုမှ ဝေးဝေးထွက်ပြေးသင့်သည်။ ယင်းအစား သူသည် ဤအမျိုးသမီး—ဗာသရှေဘ—အကြောင်းစုံစမ်းခဲ့ပြီး အကျိုးဆက်များမှာ ယူကျုံးမရဖြစ်ခဲ့ရသည်။ (၂ ဓမ္မရာဇဝင် ၁၁:၁–၁၂:၂၃) အခြားတစ်ဖက်တွင်မူ သူ့သခင်၏အကျင့်ပျက်သောဇနီးက သူနှင့်အတူအိပ်ရန်နားချသောအခါ ယောသပ်မည်သို့ပြုမူခဲ့သနည်း။ မှတ်တမ်းကဤသို့ပြောပြသည်– “ထိုသို့သခင်မသည် နေ့တိုင်းသွေးဆောင်သော်လည်း၊ ယောသပ်သည် သူ၏စကားကိုနားမထောင်၊ သူနှင့်အတူအိပ်ခြင်း၊ နေခြင်းအမှုကိုရှောင်လေ၏။” မောရှေပညတ္တိကျမ်းပါပညတ်များမရှိသေး၊ မပေးသေးသော်လည်း ယောသပ်က “အပြစ်ကြီးသောဤအမှုကိုကျွန်တော်ပြု၍ ဘုရားသခင်ကို အဘယ်သို့ပြစ်မှားနိုင်သနည်း” ဟုဖြေဆိုခဲ့သည်။ တစ်နေ့တွင် သခင်မသည် သူ့ကိုကိုင်ဆွဲလျက် “ငါနှင့်အတူအိပ်ပါ” ဟုဆို၏။ ယောသပ်သည် ထိုနေရာတွင်ဆက်နေကာ သူ့ကိုကျိုးကြောင်းပြော၍ ဖျောင်းဖျဖို့ကြိုးစားခဲ့သလော။ မကြိုးစားခဲ့ပါ။ သူသည် “မိမိအဝတ်ကိုစွန့်၍ ပြင်သို့ထွက်ပြေး” လေ၏။ ယောသပ်သည် လိင်ဆိုင်ရာသွေးဆောင်မှုကို ဖြစ်ပျက်ဖို့အခွင့်မပေးခဲ့ပါ။ သူထွက်ပြေးခဲ့သည်။—ကမ္ဘာဦး ၃၉:၇-၁၆။
၁၁။ ထပ်တလဲလဲသွေးဆောင်မှုကို ကြုံတွေ့နေရလျှင် ကျွန်ုပ်တို့အဘယ်အရာ လုပ်နိုင်ဖွယ်ရှိသနည်း။
၁၁ တစ်ခါတစ်ရံ ထွက်ပြေးခြင်းကို သူရဲဘောနည်းခြင်းဟုယူမှတ်ကြသည်၊ သို့သော် အခြေအနေတစ်ခုမှ ရုပ်ပိုင်းအရထွက်ခွာသွားခြင်းသည် ပညာရှိလမ်းစဉ်ဖြစ်လေ့ရှိသည်။ အလုပ်တွင် ထပ်တလဲလဲသွေးဆောင်မှုကို ကျွန်ုပ်တို့ကြုံတွေ့နေရကောင်း ကြုံတွေ့နေရပေမည်။ အလုပ်ပြောင်းဖို့မဖြစ်နိုင်သော်လည်း သွေးဆောင်မှုဖြစ်စေသည့်အခြေအနေများမှ ထွက်ခွာသွားဖို့ ကျွန်ုပ်တို့၌အခြားနည်းလမ်းများရှိနိုင်သည်။ ကျွန်ုပ်တို့သိရှိထားသော မည်သည့်အမှားမဆိုမှ ထွက်ပြေးဖို့လိုသည်၊ ထို့ပြင် မှန်ရာကိုသာပြုလုပ်ဖို့ စိတ်ပိုင်းဖြတ်ထားသင့်သည်။ (အာမုတ် ၅:၁၅) အခြားနေရာများတွင်မူ သွေးဆောင်မှုမှထွက်ပြေးခြင်းတွင် ညစ်ညမ်းသောအင်တာနက်ဆိုက်များနှင့် ဒွိဟဖြစ်ဖွယ်အပန်းဖြေသည့်နေရာများကို ရှောင်ဖို့လိုပေမည်။ ယင်းက မဂ္ဂဇင်းတစ်စောင်ကို လွှင့်ပစ်ခြင်း သို့မဟုတ် ဘုရားသခင်ကိုချစ်ပြီး ကျွန်ုပ်တို့အားကူညီပေးနိုင်သော မိတ်ဆွေသစ်များရှာဖွေခြင်းကိုလည်း ဆိုလိုနိုင်သည်။ (သု. ၁၃:၂၀) ကျွန်ုပ်တို့ကိုအပြစ်သို့သွေးဆောင်သော မည်သည့်အရာကိုမဆို ယတိပြတ်ကျောခိုင်းပစ်မည်ဆိုလျှင် ပညာရှိရာရောက်၏။—ရောမ ၁၂:၉။
ဆုတောင်းခြင်းက ထောက်ကူပေးနိုင်ပုံ
၁၂။ “အပြစ်သွေးဆောင်ရာသို့ မလိုက်ပါစေ” နှင့်ဟုကျွန်ုပ်တို့ဆုတောင်းသောအခါ ဘုရားသခင်ထံမှအဘယ်အရာကိုတောင်းခံခြင်းနည်း။
၁၂ ပေါလုက အားရှိစေသော ဤအာမခံချက်ကိုပေးသည်– “ဘုရားသခင်သည် သစ္စာနှင့်ပြည့်စုံတော်မူသည်ဖြစ်၍၊ သင်တို့မခံနိုင်သောစုံစမ်းနှောင့်ယှက်ခြင်းကို သင်တို့၌ရောက်စိမ့်သောငှာ အခွင့်ပေးတော်မမူ။ သင်တို့သည်ခံနိုင်မည်အကြောင်း စုံစမ်းနှောင့်ယှက်ခြင်းအရာနှင့်တကွ၊ ထွက်မြောက်သောလမ်းကိုလည်း စီရင်ပြုပြင်တော်မူလိမ့်မည်။” (၁ ကောရိန္သု ၁၀:၁၃) ကျွန်ုပ်တို့ကိုယေဟောဝါထောက်ကူပေးသည့်နည်းတစ်နည်းမှာ သွေးဆောင်မှုကိုဆိုင်ပြိုင်တိုက်လှန်ရာ၌ ကိုယ်တော့်ထောက်မမှုအတွက် ကျွန်ုပ်တို့၏ဆုတောင်းချက်များကိုဖြေကြားခြင်းဖြင့်ဖြစ်သည်။ “အပြစ်သွေးဆောင်ရာသို့ မလိုက်မပါစေဘဲ၊ မကောင်းသောအမှုအရာမှလည်း ကယ်နုတ်တော်မူပါ” ဟုကျွန်ုပ်တို့ဆုတောင်းကြရန် ယေရှုခရစ်သင်ကြားပေးခဲ့သည်။ (မဿဲ ၆:၁၃) နှလုံးပါသည့်ယင်းသို့သောဆုတောင်းချက်ကိုဖြေကြားပေးရာ၌ ယေဟောဝါသည် ကျွန်ုပ်တို့ကို အပြစ်သွေးဆောင်မှုထဲတွင် စွန့်ပစ်ထားမည်မဟုတ်ပါ; စာတန်နှင့် သူ၏ စဉ်းလဲသောလုပ်ရပ်များမှ ကျွန်ုပ်တို့ကိုကိုယ်တော်လွတ်မြောက်စေပါလိမ့်မည်။ (ဧဖက် ၆:၁၁၊ ကဘ အောက်ခြေမှတ်ချက်) သွေးဆောင်မှုများကိုကျွန်ုပ်တို့သိရှိပြီး ၎င်းတို့ကိုတွန်းလှန်ရန်ခွန်အားရှိဖို့ ဘုရားသခင်ထံမှမစမှုတောင်းခံသင့်သည်။ သွေးဆောင်ခံရသောအခါ ကျရှုံးခွင့်မပြုဖို့ ကျွန်ုပ်တို့အသနားခံမည်ဆိုလျှင် ‘မကောင်းသောသူ’ စာတန်၏လှည့်စားမှုမခံရဖို့ ကိုယ်တော်ကူမပါလိမ့်မည်။
၁၃။ စွဲမြဲနေသောသွေးဆောင်မှုကို ကျွန်ုပ်တို့ရင်ဆိုင်ရသောအခါ အဘယ်အရာပြုသင့်သနည်း။
၁၃ သဲသဲမဲမဲမနားတမ်းသွေးဆောင်မှုကို ကျွန်ုပ်တို့ရင်ဆိုင်ရသောအခါ စိတ်အားထက်သန်စွာဆုတောင်းဖို့ အထူးလိုအပ်သည်။ အချို့သောသွေးဆောင်မှုများသည် အတွေးအခေါ်၊ သဘောထားများနှင့် ပြင်းထန်သော အတွင်းပိုင်းရုန်းကန်တိုက်လှန်မှုကို ပေါ်ပေါက်စေနိုင်ကာ ကျွန်ုပ်တို့အမှန်မည်မျှအားနည်းကြောင်း သိသာစွာသတိပေးနှိုးဆော်မှုဖြစ်စေသည်။ (ဆာလံ ၅၁:၅) ဥပမာ၊ ယခင်ကအကျင့်ဆိုးတစ်ခုခုကို ပြန်အမှတ်ရကာ စိတ်ဆင်းရဲနေမည်ဆိုလျှင် ကျွန်ုပ်တို့အဘယ်သို့ပြုနိုင်သနည်း။ ၎င်းတို့ကိုပြန်ပြုဖို့ သွေးဆောင်ခံရလျှင်ကော။ ထိုသို့သောခံစားချက်များကို ကြိုးစားမျိုသိပ်ထားရုံထားမည့်အစား ထိုကိစ္စနှင့်ပတ်သက်၍ ယေဟောဝါထံဆုတောင်းပါ—လိုအပ်မည်ဆိုလျှင် အကြိမ်ကြိမ်တောင်းပါ။ (ဆာလံ ၅၅:၂၂) ကျွန်ုပ်တို့၏မသန့်ရှင်းသောစိတ်သဘောထားကို သန့်ရှင်းစေဖို့ ကိုယ်တော်၏နှုတ်မြွက်စကားတော်နှင့် သန့်ရှင်းသောဝိညာဉ်တော်တို့၏တန်ခိုးအားဖြင့် ထောက်မပေးနိုင်သည်။—ဆာလံ ၁၉:၈၊ ၉။
၁၄။ လူ့အားနည်းမှုကို အောင်မြင်ကျော်လွှားရန် ဆုတောင်းခြင်းသည် အဘယ်ကြောင့်မရှိလျှင်မဖြစ်သနည်း။
၁၄ ဂေသရှေမန်ဥယျာဉ်တွင် တမန်တော်များ၏ငိုက်မြည်းခြင်းကို သတိပြုမိကာ ယေရှုဤသို့တိုက်တွန်းခဲ့သည်– “စုံစမ်းနှောင့်ယှက်ခြင်းနှင့်ကင်းလွတ်မည်အကြောင်း ဆုတောင်းလျက်စောင့်နေကြလော့။ စိတ်ဝိညာဉ်ကား စေတနာရှိငြားသော်လည်း၊ ကိုယ်မူကားအားနည်းသည်။” (မဿဲ ၂၆:၄၁) သွေးဆောင်မှုကို အောင်မြင်ကျော်လွှားရန် နည်းတစ်နည်းမှာ သွေးဆောင်မှုဖြစ်ပေါ်နိုင်သောပုံစံအမျိုးမျိုးကို မျက်စိရှင်ရှင်ထားကာ ယင်း၏ကောက်ကျစ်မှုများကို အကင်းပါးပါးသတိရှိရှိနေရန်ဖြစ်၏။ သွေးဆောင်မှုကိုတိုက်လှန်ဖို့ ဝိညာဉ်ရေးအရအသင့်ပြင်ထားနိုင်ရန် အချိန်မဆွဲဘဲ ယင်းနှင့်ပတ်သက်၍ ဆုတောင်းဖို့လည်းအရေးကြီးသည်။ အကြောင်းမှာ သွေးဆောင်မှုသည် ကျွန်ုပ်တို့၏အားအနည်းဆုံးနေရာကို ထိုးနှက်တတ်ရာ ၎င်းကို ကျွန်ုပ်တို့တစ်ဦးတည်းမတွန်းလှန်နိုင်ပါ။ စာတန်အားခုခံတွန်းလှန်ရာ၌ ဘုရားသခင်၏ခွန်အားက ထောက်ကူပေးနိုင်သောကြောင့် ဆုတောင်းခြင်းမရှိလျှင်မဖြစ်ချေ။ (ဖိလိပ္ပိ ၄:၆၊ ၇) ‘အသင်းတော်အသက်ကြီးသူများ’ ၏ဝိညာဉ်ရေးရာထောက်မမှုနှင့် ဆုတောင်းချက်များကိုလည်း ကျွန်ုပ်တို့လိုအပ်ပေမည်။—ယာကုပ် ၅:၁၃-၁၈။
သွေးဆောင်မှုကို နိုးကြားတက်ကြွစွာတွန်းလှန်လော့
၁၅။ သွေးဆောင်မှုကိုတွန်းလှန်ခြင်း၌ အဘယ်အရာပါဝင်သနည်း။
၁၅ သွေးဆောင်မှုကို တတ်နိုင်သ၍ တိမ်းရှောင်သည့်အပြင် ၎င်းကျော်လွန်သွားသည့်အထိ သို့မဟုတ် အခြေအနေပြောင်းသွားသည့်အထိ နိုးကြားတက်ကြွစွာတွန်းလှန်ရမည်။ စာတန်၏သွေးဆောင်မှုကိုခံခဲ့ချိန်တွင် ယေရှုသည် စာတန်ထွက်ခွာသွားသည့်အထိ တွန်းလှန်ခဲ့၏။ (မဿဲ ၄:၁-၁၁) တပည့်တော်ယာကုပ်က “[စာတန်] ကိုဆီးတားကြလော့။ သို့ပြုလျှင်၊ သူသည် သင်တို့ထံကပြေးသွားလိမ့်မည်” ဟုရေးသားခဲ့သည်။ (ယာကုပ် ၄:၇) ခုခံတွန်းလှန်ခြင်းသည် ဘုရားသခင့်နှုတ်မြွက်စကားတော်ဖြင့် ကျွန်ုပ်တို့၏စိတ်သဘောကို ခိုင်ခံ့စေခြင်းနှင့် ကိုယ်တော့်စံနှုန်းများကိုစွဲကိုင်မည်ဟု အခိုင်အမာဆုံးဖြတ်ခြင်းတို့ဖြင့်စတင်သည်။ ကျွန်ုပ်တို့အထူးအားနည်းရာကို ကိုင်တွယ်ဖြေရှင်းပေးသော အဓိကကျမ်းချက်များကို အလွတ်ကျက်မှတ်ကာ စဉ်းစားဆင်ခြင်သင့်သည်။ ကျွန်ုပ်တို့၏စိုးရိမ်ပူပန်မှုများကိုဝေမျှ၍ သွေးဆောင်မှု ထိုးနှက်ခံရချိန်တွင် အကူအညီတောင်းခံနိုင်သော အကြီးအကဲတစ်ဦးဖြစ်ကောင်းဖြစ်မည့် ရင့်ကျက်သည့်ခရစ်ယာန်တစ်ဦးကို ရှာကြံခြင်းသည် ပညာရှိရာရောက်မည်။—သု. ၂၂:၁၇။
၁၆။ ကျွန်ုပ်တို့သည် ကိုယ်ကျင့်တရားဖြောင့်မှန်စွာ မည်သို့နေထိုင်နိုင်သနည်း။
၁၆ ကျမ်းစာစောင်များက ဥပဓိရုပ်သစ်ကိုယူတင်ဝတ်ဆောင်ရန် ကျွန်ုပ်တို့ကိုတိုက်တွန်းသည်။ (ဧဖက် ၄:၂၄) ယင်းက ကျွန်ုပ်တို့အားပြုပြင်ပုံသွင်းရန် ယေဟောဝါအားခွင့်ပြုခြင်းကိုဆိုလို၏။ မိမိ၏လုပ်ဖော်ဆောင်ဖက်ဖြစ်သူ တိမောသေထံစာရေးရာ၌ ပေါလုဤသို့ဆိုခဲ့သည်– “ဖြောင့်မတ်စွာကျင့်ခြင်း၊ ဘုရားဝတ်၌မွေ့လျော်ခြင်း၊ ယုံကြည်ခြင်း၊ ချစ်ခြင်း၊ သည်းခံခြင်း၊ နူးညံ့သိမ်မွေ့ခြင်းတို့ကို မီအောင်လိုက်ကြလော့။ ယုံကြည်ခြင်းနှင့်ဆိုင်၍ ကောင်းစွာသောတိုက်လှန်ခြင်းကိုပြုလော့။ ထာဝရအသက်ကိုကိုင်ယူလော့။ ထိုအသက်ကိုရမည်အကြောင်း၊ သင်သည်ခေါ်တော်မူခြင်းကိုခံရ၍၊ သက်သေအများတို့ရှေ့၌ ကောင်းမွန်စွာဝန်ခံပြီ။” (၁ တိမောသေ ၆:၁၁၊ ၁၂) ကိုယ်တော်၏ဥပဓိရုပ်ကို အတွင်းကျကျသိရှိဖို့ ဘုရားသခင့်နှုတ်မြွက်စကားတော်ကို လုံ့လရှိစွာလေ့လာကာ ကိုယ်တော့်တောင်းဆိုချက်များနှင့်အညီ ပြုမူကျင့်ကြံခြင်းအားဖြင့် ကျွန်ုပ်တို့သည် ‘ဖြောင့်မတ်ခြင်းကို မီအောင်လိုက်’ နိုင်သည်။ သတင်းကောင်းဟောပြောခြင်းနှင့် အစည်းအဝေးများတက်ခြင်းစသည့် ခရစ်ယာန်လုပ်ဆောင်မှုဇယားအပြည့်ရှိခြင်းလည်း အရေးပါ၏။ ဘုရားသခင်ထံချဉ်းကပ်ပြီး ကိုယ်တော်၏ဝိညာဉ်ရေးရာထောက်မမှုများမှ အကျိုးအပြည့်အဝရယူခြင်းက ဝိညာဉ်ရေးတွင်တိုးတက်ရန်နှင့် ကိုယ်ကျင့်တရားဖြောင့်မှန်စွာနေထိုင်ရန် ကျွန်ုပ်တို့ကိုထောက်ကူပေးပါလိမ့်မည်။—ယာကုပ် ၄:၈။
၁၇။ သွေးဆောင်ခံရစဉ်အတောအတွင်း ကျွန်ုပ်တို့ကိုဘုရားသခင်စွန့်ပယ်မည်မဟုတ်ကြောင်း မည်သို့သိနိုင်သနည်း။
၁၇ ကျွန်ုပ်တို့ကြုံတွေ့ရသော မည်သည့်သွေးဆောင်မှုမဆိုသည် ယင်းကိုဖြေရှင်းနိုင်သည့် ဘုရားသခင်ပေးအစွမ်းထက် ဘယ်တော့မျှမသာကြောင်းကို ပေါလုကစိတ်ချစေသည်။ ယေဟောဝါသည် ‘ကျွန်ုပ်တို့ခံနိုင်မည်အကြောင်း ထွက်မြောက်သောလမ်းကို စီရင်ပြုပြင်’ ပေးပါလိမ့်မည်။ (၁ ကောရိန္သု ၁၀:၁၃) အမှန်မှာ ကျွန်ုပ်တို့သာ ဘုရားသခင်ကို ဆက်၍မှီခိုအားထားလျှင် ကျွန်ုပ်တို့ဆက်သစ္စာတည်ကြည်ရန် ဝိညာဉ်ခွန်အားမလုံမလောက်ဖြစ်စေသည်အထိ သွေးဆောင်မှုလွှမ်းမိုးလာစေရန် ကိုယ်တော်ခွင့်မပြုချေ။ ကိုယ်တော့်မျက်မှောက် အမှားပြုလုပ်ဖို့ သွေးဆောင်ခံရခြင်းကို နိုးကြားတက်ကြွစွာတွန်းလှန်ရာ၌ ကျွန်ုပ်တို့ကိုကိုယ်တော်အောင်မြင်စေလိုသည်။ ထို့ပြင် “ငါသည်သင့်ကိုမစွန့်၊ သင့်ကိုအလျှင်းပစ်၍မထား” ဟူသောကိုယ်တော်၏ကတိတော်၌ ကျွန်ုပ်တို့ယုံကြည်နိုင်သည်။—ဟေဗြဲ ၁၃:၅။
၁၈။ ကျွန်ုပ်တို့သည် လူ့အားနည်းမှုကို အနိုင်ယူဖို့ အဘယ်ကြောင့် သေချာနိုင်သနည်း။
၁၈ လူ့အားနည်းမှုကို မိမိကိုယ်တိုင်ခုခံတွန်းလှန်ခြင်း၏ရလဒ်ကို ပေါလု မသေချာမရေရာ မဖြစ်ခဲ့ပါ။ ဇာတိလိုအင်ဆန္ဒများကို မခုခံနိုင်သော သနားစရာသတ္တဝါအဖြစ် မိမိကိုယ်ကို မယူမှတ်ခဲ့ချေ။ ယင်းနှင့်ဆန့်ကျင်လျက် သူဤသို့ဆိုခဲ့သည်– “ငါပြေးသောအခါ အမှတ်တမဲ့ [“မသေချာမရေရာနှင့်၊” ကဘ] ပြေးသည်မဟုတ်။ လက်ပွေ့သတ်သောအခါ အာကာသကောင်းကင်ကိုသာ ထိုး၍သတ်သည်မဟုတ်။ သူတစ်ပါးကိုဆုံးမပြီးမှ ကိုယ်တိုင်ရှုံးသောသူမဖြစ်ရမည်အကြောင်း၊ ကိုယ်ကိုထိုး၍နှိပ်စက်လေ့ရှိ၏။” (၁ ကောရိန္သု ၉:၂၆၊ ၂၇) ကျွန်ုပ်တို့လည်း မစုံလင်သောဇာတိသဘောကို အောင်မြင်စွာတိုက်လှန်နိုင်ပါသည်။ ကျွန်ုပ်တို့၏မေတ္တာရှင်ကောင်းကင်ခမည်းတော်သည် ကျမ်းစာစောင်များ၊ သမ္မာကျမ်းစာအခြေပြုစာပေများ၊ ခရစ်ယာန်အစည်းအဝေးများနှင့် ရင့်ကျက်သောခရစ်ယာန်ချင်းများအားဖြင့် ဖြောင့်မှန်သောလမ်းကို ဆက်လျှောက်ရန် ကျွန်ုပ်တို့ကိုထောက်ကူပေးသော သတိပေးချက်များကို မပြတ်ပေးသနားတော်မူ၏။ ကိုယ်တော်၏အကူအညီဖြင့် လူ့အားနည်းမှုကို ကျွန်ုပ်တို့ အနိုင်ယူနိုင်ပါသည်!
သင်မှတ်မိသလော
• ‘ဇာတိပကတိသဘောရှိခြင်း’ ဟူသည် အဘယ်အရာကိုဆိုလိုသနည်း။
• သွေးဆောင်မှုအတွက် ကျွန်ုပ်တို့မည်သို့ အသင့်ပြင်ထားနိုင်သနည်း။
• သွေးဆောင်မှုကို အောင်မြင်ကျော်လွှားရန် ကျွန်ုပ်တို့အဘယ်အရာပြုနိုင်သနည်း။
• သွေးဆောင်မှုကိုရင်ဆိုင်ဖြေရှင်းရာ၌ ဆုတောင်းခြင်းသည် အဘယ်ကဏ္ဍ၌ပါဝင်သနည်း။
• လူ့အားနည်းမှုကို အနိုင်ယူရန်ဖြစ်နိုင်ကြောင်း ကျွန်ုပ်တို့ အဘယ်ကြောင့်သိရသနည်း။
[လေ့လာရန်မေးခွန်းများ]
[စာမျက်နှာ ၁၀ ပါ ရုပ်ပုံ]
ကျွန်ုပ်တို့သည် ဇာတိလိုအင်ဆန္ဒများ၏ အားကိုးရာမဲ့သားကောင်ဖြစ်သည်ဟု သမ္မာကျမ်းစာကမသွန်သင်ပါ
[စာမျက်နှာ ၁၂ ပါ ရုပ်ပုံ]
အပြစ်ကိုရှောင်ရန် အခြေခံကျသော နည်းတစ်နည်းမှာ သွေးဆောင်မှုမှ ထွက်ပြေးခြင်းဖြစ်၏