ဝိညာဉ်သဘောရှိ၍ အသက်ရှင်လော့!

ဖွင့်ပါ

ဝိညာဉ်သဘောရှိ၍ အသက်ရှင်လော့!

“ဝိညာဉ်ပကတိစိတ်သဘောသည် အသက်ရှင်ခြင်းအကြောင်း . . . ဖြစ်၏။”—ရောမ ၈:၆။

၁၊ ၂။ သမ္မာကျမ်းစာက “ဇာတိ” နှင့် “ဝိညာဉ်” အကြားအဘယ်ခြားနားချက်ကို ယှဉ်ပြသနည်း။

ဇာတိအလိုဆန္ဒများပြည့်ခြင်းကို အမွှမ်းတင်သော အကျင့်ပျက်သည့်လူ့အဖွဲ့အစည်းအလယ်တွင် ဘုရားသခင်ရှေ့ ကိုယ်ကျင့်တရားသန့်ရှင်းသောအနေအထားဖြင့် ဆက်နေထိုင်သွားရန်မှာ မလွယ်ကူချေ။ သို့ရာတွင် ကျမ်းစာစောင်များက အပြစ်ပြုလိုသောဇာတိ၏လွှမ်းမိုးမှုကိုခံရန် မိမိကိုယ်ကိုခွင့်ပြုခြင်း၏ ထိတ်လန့်ဖွယ်အကျိုးဆက်များနှင့် ဘုရားသခင့်သန့်ရှင်းသောဝိညာဉ်တော်၏လွှမ်းမိုးမှုကိုခံခြင်းဖြင့် ရရှိသောကောင်းချီးများအကြား ထင်ရှားသောနယ်ခြားစည်းကိုဆွဲကာ “ဇာတိ” နှင့် “ဝိညာဉ်” ကွဲပြားကြောင်းနှိုင်းယှဉ်ပြသည်။

^၂ဥပမာ၊ ယေရှုခရစ်ကဤသို့ဆိုသည်– “ဝိညာဉ်သာလျှင် အသက်ရှင်စေ၏။ ကိုယ်ကာယသည် အလျှင်းမတတ်နိုင်။ ငါပြောသောစကားသည် ဝိညာဉ်ဖြစ်၏။ အသက်လည်းဖြစ်၏။” (ယောဟန် ၆:၆၃) ဂလာတိမြို့ရှိခရစ်ယာန်များထံ တမန်တော်ပေါလုဤသို့ရေးသားခဲ့သည်– “ဇာတိပကတိနှင့်ဝိညာဉ်ပကတိသည် တစ်ပါးနှင့်တစ်ပါးဆန့်ကျင်သောအလိုရှိကြ၏။ တစ်ပါးနှင့်တစ်ပါး ဆန့်ကျင်ဘက်ဖြစ်” ၏။ (ဂလာတိ ၅:၁၇) ပေါလုကဤသို့လည်းဆိုသည်– “မိမိဇာတိပကတိ၌မျိုးစေ့ကြဲသောသူသည် ဇာတိပကတိအားဖြင့် ပုပ်ပျက်ခြင်းအသီးအနှံကို ရိတ်ရလိမ့်မည်။ ဝိညာဉ်ပကတိ၌မျိုးစေ့ကြဲသောသူသည် ဝိညာဉ်ပကတိအားဖြင့် ထာဝရအသက်ရှင်ခြင်းအသီးအနှံကို ရိတ်ရလိမ့်မည်။”—ဂလာတိ ၆:၈။

၃။ မှားယွင်းသောဆန္ဒများနှင့် စိတ်ထားများမှ လွတ်မြောက်ဖို့ အဘယ်အရာလိုအပ်သနည်း။

^၃ယေဟောဝါ၏သန့်ရှင်းသောဝိညာဉ်တော်—ကိုယ်တော်၏လှုပ်ရှားသောစွမ်းအား—သည် မသန့်ရှင်းသော “ကိုယ်ကာယတပ်မက်ခြင်း” နှင့်ကျွန်ုပ်တို့၏အပြစ်ပြုလိုသောဇာတိ၏ ဖျက်ဆီးတတ်သောလွှမ်းမိုးခြင်းတို့ကို အမှန်ပင်အမြစ်မှနုတ်ပစ်ပေးနိုင်သည်။ (၁ ပေတရု ၂:၁၁) မှားယွင်းသောစိတ်ထားများ၏အချုပ်အနှောင်မှ လွတ်မြောက်ရန် ဘုရားသခင့်ဝိညာဉ်တော်အကူအညီရရှိခြင်းသည် အရေးပါ၏၊ အကြောင်းမှာ ပေါလုဤသို့ရေးသားခဲ့သည်– “ဇာတိပကတိစိတ်သဘောသည် သေခြင်းအကြောင်းဖြစ်၏။ ဝိညာဉ်ပကတိစိတ်သဘောသည် အသက်ရှင်ခြင်းအကြောင်းနှင့် ငြိမ်သက်ခြင်းအကြောင်းဖြစ်၏။” (ရောမ ၈:၆) ဝိညာဉ်စိတ်သဘောရှိခြင်းဟူသည် အဘယ်နည်း။

“ဝိညာဉ်ပကတိစိတ်သဘော”

၄။ “ဝိညာဉ်ပကတိစိတ်သဘော” ဟူသည် အဘယ်နည်း။

^၄“ဝိညာဉ်ပကတိစိတ်သဘော” နှင့်ပတ်သက်၍ရေးသားရာတွင် ပေါလုသည် “စဉ်းစားပုံ၊ စိတ် (စွဲလမ်းမှု)၊ . . . ချိန်ရွယ်ချက်၊ ရည်မှန်းချက်၊ ကြိုးစားခြင်း” ဟုသဘောသက်ရောက်သော ဂရိစကားလုံးကိုအသုံးပြုခဲ့သည်။ သက်ဆိုင်ရာကြိယာသည် “တစ်စုံတစ်ရာသောနည်းဖြင့် စဉ်းစားသည်၊ စိတ်ရှိသည်” ဟုအဓိပ္ပာယ်ထွက်သည်။ ထို့ကြောင့် ဝိညာဉ်စိတ်သဘောရှိခြင်းဟူသည် ယေဟောဝါ၏လှုပ်ရှားတတ်သောစွမ်းအားဖြင့် ထိန်းချုပ်မှု၊ လွှမ်းမိုးမှုနှင့် လှုံ့ဆော်မှုတို့ကိုခံခြင်းဖြစ်သည်။ တလိုတလားဖြင့် ကျွန်ုပ်တို့၏အတွေးအခေါ်များ၊ စိတ်ထားများနှင့် ရည်မှန်းချက်များတို့ကို ဘုရားသခင့်သန့်ရှင်းသောဝိညာဉ်တော်၏ လွှမ်းမိုးမှုအောက် လုံးလုံးလျားလျားရောက်ရှိစေသည့် အဓိပ္ပာယ်သက်ရောက်သည်။

၅။ သန့်ရှင်းသောဝိညာဉ်တော်၏လွှမ်းမိုးမှုကို အဘယ်အတိုင်းအတာအထိ ကျွန်ုပ်တို့ခံယူသင့်သနည်း။

^၅‘ဝိညာဉ်တော်၏ကျွန်’ ဖြစ်ခြင်းအကြောင်း ပေါလုပြောဆိုသောအခါ သန့်ရှင်းသောဝိညာဉ်တော်၏လွှမ်းမိုးမှုကို ကျွန်ုပ်တို့ခံယူသင့်သည့်အတိုင်းအတာအား အလေးပေးဖော်ပြခဲ့သည်။ (ရောမ ၇:၆) ယေရှု၏ရွေးဖိုးပူဇော်သကာ၌ ယုံကြည်ခြင်းပေါ်အခြေပြုလျက် ခရစ်ယာန်များသည် အပြစ်တရား၏စိုးမိုးခြင်းမှ လွတ်မြောက်ခဲ့ကြပြီး ဤနည်းအားဖြင့် ယင်း၏ကျွန်များဖြစ်သည့် ယခင်အခြေအနေမှ “အသေဖြစ်” သွားကြပြီ။ (ရောမ ၆:၂၊ ၁၁) ပုံဆောင်သဘောအရ ထိုနည်းဖြင့်သေဆုံးခဲ့ကြသူတို့သည် ကာယပိုင်း၌ အသက်ရှင်ဆဲဖြစ်ပြီး ယခုတွင် “ဖြောင့်မတ်ခြင်းတရား၏ကျွန်” များအဖြစ် ခရစ်တော်နောက်လိုက်ရန် လွတ်လပ်နေကြသည်။—ရောမ ၆:၁၈-၂၀။

ထူးခြားသည့်ပြောင်းလဲခြင်း

၆။ “ဖြောင့်မတ်ခြင်းတရား၏ကျွန်” ဖြစ်လာကြသူတို့သည် အဘယ်အပြောင်းအလဲ ဖြစ်ခဲ့ကြသနည်း။

^၆“အပြစ်တရား၏ကျွန်” ဘဝမှ “ဖြောင့်မတ်ခြင်းတရား၏ကျွန်” အဖြစ်ဘုရားသခင်အားဝတ်ပြုခြင်းသို့ ပြောင်းလဲခြင်းသည် အမှန်ပင်ထူးခြားထင်ရှားသည်။ ယင်းသို့ပြောင်းလဲခဲ့ကြသူအချို့နှင့်ပတ်သက်၍ ပေါလုဤသို့ရေးသားခဲ့သည်– ‘သင်တို့သည် သခင်ယေရှု၏နာမတော်အားဖြင့်လည်းကောင်း၊ ငါတို့ဘုရားသခင်၏ဝိညာဉ်တော်အားဖြင့်လည်းကောင်း ဆေးကြောသန့်ရှင်း၍ ဖြောင့်မတ်ရာသို့ရောက်ကြပြီ။’—ရောမ ၆:၁၇၊ ၁၈; ၁ ကောရိန္သု ၆:၁၁။

၇။ ကိစ္စရပ်များကို ယေဟောဝါကဲ့သို့ ရှုမြင်ရန် အဘယ်ကြောင့်အရေးကြီးသနည်း။

^၇ယင်းသို့သောထူးခြားသည့်ပြောင်းလဲမှုပြုရန် ကိစ္စရပ်များနှင့်ပတ်သက်၍ ယေဟောဝါ၏ရှုမြင်ပုံကို ကျွန်ုပ်တို့ဦးဆုံးသင်ယူဖို့လိုသည်။ လွန်ခဲ့သောရာစုနှစ်များစွာက ဆာလံဆရာဒါဝိဒ်သည် ဘုရားသခင်ထံ စိတ်ထက်သန်စွာ ဤသို့အသနားခံခဲ့သည်– “အိုထာဝရဘုရား ကိုယ်တော်၏လမ်းတို့ကို အကျွန်ုပ်အားပြညွှန် . . . တော်မူပါ။ ကိုယ်တော်၏ [အမှန်] တရားကိုပြ၍ အကျွန်ုပ်ကိုသွန်သင်တော်မူပါ။” (ဆာလံ ၂၅:၄၊ ၅) ယေဟောဝါသည် ဒါဝိဒ်ကိုနားထောင်ခဲ့ပြီး မျက်မှောက်ခေတ်မိမိ၏ကျေးကျွန်များ၏ဆုတောင်းချက်ကိုလည်း ကိုယ်တော်ဖြေကြားပေးနိုင်ပါသည်။ ဘုရားသခင့်လမ်းစဉ်များနှင့် ကိုယ်တော်၏အမှန်တရားတို့သည် စင်ကြယ်သန့်ရှင်းသည်ဖြစ်၍ မသန့်ရှင်းသောဇာတိဆန္ဒများပြေစေရန် သွေးဆောင်ခံရမည်ဆိုလျှင် ၎င်းတို့ကို စဉ်းစားဆင်ခြင်ခြင်းက အထောက်အကူဖြစ်စေပါလိမ့်မည်။

ဘုရားသခင့်နှုတ်မြွက်စကားတော်၏ အရေးပါသောအခန်းကဏ္ဍ

၈။ သမ္မာကျမ်းစာလေ့လာခြင်းကို ကျွန်ုပ်တို့အဘယ်ကြောင့် မဖြစ်မနေပြုဖို့လိုသနည်း။

^၈ဘုရားသခင့်နှုတ်မြွက်စကားတော် သမ္မာကျမ်းစာသည် ကိုယ်တော့်ဝိညာဉ်တော်၏လက်ရာဖြစ်၏။ ထို့ကြောင့် ထိုဝိညာဉ်တော်ကို ကျွန်ုပ်တို့အပေါ်သို့ အကျိုးသက်ရောက်စေသည့် အရေးပါသောနည်းတစ်နည်းမှာ သမ္မာကျမ်းစာကို—ဖြစ်နိုင်မည်ဆိုလျှင် နေ့စဉ်—ဖတ်ရှုလေ့လာခြင်းအားဖြင့်ဖြစ်သည်။ (၁ ကောရိန္သု ၂:၁၀၊ ၁၁; ဧဖက် ၅:၁၈) ကျွန်ုပ်တို့၏စိတ်နှင့် နှလုံးတို့တွင် သမ္မာကျမ်းစာအမှန်တရားများနှင့် မူများ ဖြည့်ပေးထားခြင်းက ဝိညာဉ်ရေးရာတိုက်ခိုက်မှုများကိုခံရပ်ဖို့ ထောက်ကူပေးမည်။ မှန်ပါသည်၊ အကျင့်ပျက်စေသည့်သွေးဆောင်မှုများပေါ်လာသောအခါ ဘုရားသခင့်ဝိညာဉ်တော်သည် ဘုရားသခင့်အလိုတော်နှင့်အညီကျင့်ရန် ကျွန်ုပ်တို့၏စိတ်ပိုင်းဖြတ်ချက်ကို တိုး၍ခိုင်ခံ့စေနိုင်သည့် ကျမ်းစာသတိပေးချက်များနှင့် လမ်းညွှန်သည့်မူများကို ပြန်အမှတ်စေနိုင်သည်။ (ဆာလံ ၁၁၉:၁၊ ၂၊ ၉၉; ယောဟန် ၁၄:၂၆) သို့ဖြစ်သောကြောင့် မှားယွင်းသောလမ်းစဉ်လိုက်ရန် ကျွန်ုပ်တို့ အလှည့်စားမခံရကြပါ။—၂ ကောရိန္သု ၁၁:၃။

၉။ ယေဟောဝါနှင့် ကျွန်ုပ်တို့၏ဆက်ဆံရေးကိုထိန်းသိမ်းဖို့ ကျွန်ုပ်တို့၏စိတ်ပိုင်းဖြတ်ချက်ကို သမ္မာကျမ်းစာလေ့လာခြင်းက မည်သို့ခိုင်ခံ့စေသနည်း။

^၉သမ္မာကျမ်းစာအခြေပြုစာပေများအကူအညီဖြင့် ကျမ်းစာစောင်များကို စိတ်ရင်းမှန်ဖြင့် ဇွဲရှိရှိဆက်၍လေ့လာနေစဉ် ဘုရားသခင့်ဝိညာဉ်တော်သည် ကျွန်ုပ်တို့၏စိတ်နှင့်နှလုံးကို ဩဇာလွှမ်းမိုးကာ ယေဟောဝါ၏မူများကို တိုး၍လေးစားစေသည်။ ဘုရားသခင်နှင့်ကျွန်ုပ်တို့၏ဆက်ဆံရေးသည် ဘဝတွင် အရေးအပါဆုံးအရာဖြစ်လာသည်။ သွေးဆောင်မှုများကြုံတွေ့ရသောအခါ အမှားပြုရာ၌ပါဝင်ခြင်းသည် မည်မျှပျော်စရာကောင်းလိုက်မည်နည်းဟူသောအတွေးများကို နှလုံးမပိုက်ထားပေ။ ယင်းအစား၊ ကျွန်ုပ်တို့၏လတ်တလောအရေးကိစ္စမှာ ယေဟောဝါအပေါ် တည်ကြည်မှုကို ဆက်ထိန်းထားဖို့ဖြစ်သည်။ ကိုယ်တော်နှင့်ကျွန်ုပ်တို့၏ဆက်ဆံရေးကို အလွန်တရာလေးမြတ်ခြင်းက ၎င်းဆက်ဆံရေးကို ထိခိုက်စေ သို့မဟုတ် ပျက်စီးစေနိုင်သော မည်သည့်စိတ်ထားမျိုးကိုမဆိုတွန်းလှန်ရန် ကျွန်ုပ်တို့ကိုလှုံ့ဆော်ပေးသည်။

“ကိုယ်တော်၏တရားကို အကျွန်ုပ်သည်အလွန်နှစ်သက်ပါ၏!”

၁၀။ ဝိညာဉ်စိတ်သဘောရှိရန် ယေဟောဝါ၏ပညတ်တော်ကိုနာခံဖို့ အဘယ်ကြောင့်လိုအပ်သနည်း။

^၁၀ဝိညာဉ်စိတ်သဘောရှိဖို့ဆိုလျှင် ဘုရားသခင့်နှုတ်မြွက်စကားတော်အသိပညာနှင့် မလုံလောက်ချေ။ ရှောလမုန်ဘုရင်သည် ယေဟောဝါ၏စံနှုန်းများကို ကောင်းကောင်းသဘောပေါက်နားလည်ခဲ့သည်၊ သို့သော် သူ့ဘဝနှောင်းပိုင်းတွင် ယင်းအတိုင်းနေထိုင်ဖို့ ပျက်ကွက်ခဲ့သည်။ (၃ ဓမ္မရာဇဝင် ၄:၂၉၊ ၃၀; ၁၁:၁-၆) ဝိညာဉ်ရေးသဘော ကျွန်ုပ်တို့၌ရှိမည်ဆိုလျှင် သမ္မာကျမ်းစာ၏ပြောဆိုချက်များကို သိရှိခြင်းသာမက ဘုရားသခင့်ပညတ်တော်ကို စိတ်နှလုံးအကြွင်းမဲ့နာခံခြင်းလည်း လိုအပ်ကြောင်း ကျွန်ုပ်တို့သိမြင်မည်။ ယင်းက ယေဟောဝါ၏စံနှုန်းများကို အသိစိတ်ရှိရှိဆန်းစစ်ကြည့်ကာ ၎င်းတို့ကိုလုံ့လရှိစွာလိုက်လျှောက်ဖို့ ကြိုးပမ်းခြင်းကိုဆိုလိုသည်။ ယင်းသို့သောစိတ်သဘောမျိုး ဆာလံဆရာ၌ရှိခဲ့သည်။ သူဤသို့သီဆိုခဲ့သည်– “ကိုယ်တော်၏တရားကို အကျွန်ုပ်သည်အလွန်နှစ်သက်ပါ၏။ တစ်နေ့လုံး ဆင်ခြင်အောက်မေ့လျက်နေပါ၏။” (ဆာလံ ၁၁၉:၉၇) ဘုရားသခင့်ပညတ်တော်ကို အမှန်အလေးထားလိုက်လျှောက်သောအခါ ကျွန်ုပ်တို့သည် ဘုရားသခင်ရေးရာအရည်အချင်းများကို တင်ပြစပြုလာသည်။ (ဧဖက် ၅:၁၊ ၂) အပြစ်ပြုရာသို့ ဆွဲဆောင်ခြင်းကို ခေါင်းငုံ့ခံနေမည့်အစား ဝိညာဉ်အသီးကို ကျွန်ုပ်တို့တင်ပြကြသည့်အပြင် ယေဟောဝါ၏မျက်နှာသာရလိုသောဆန္ဒက ဆိုးညစ်သော “ဇာတိပကတိအကျင့်တို့” နှင့် ဝေးဝေးရှောင်စေသည်။—ဂလာတိ ၅:၁၆၊ ၁၉-၂၃; ဆာလံ ၁၅:၁၊ ၂။

၁၁။ မတရားသောမေထုန်ကိုတားမြစ်သော ယေဟောဝါ၏ပညတ်သည် ကျွန်ုပ်တို့အတွက်အကာအကွယ်ဖြစ်ကြောင်း သင်မည်သို့ရှင်းပြမည်နည်း။

^၁၁ယေဟောဝါ၏ပညတ်တော်ကို အလွန်လေးစားမြတ်နိုးသည့်စိတ် ကျွန်ုပ်တို့မည်သို့တိုးပွားစေနိုင်သနည်း။ နည်းတစ်နည်းမှာ ယင်း၏တန်ဖိုးများကို အသေအချာဆန်းစစ်ကြည့်ခြင်းဖြင့်ဖြစ်သည်။ လိင်ဆက်ဆံခြင်းကို အိမ်ထောင်အတွက်သာကန့်သတ်ထားပြီး မတရားသောမေထုန်နှင့် သူ့သားအိမ်ရာပြစ်မှားခြင်းကိုတားမြစ်သည့် ဘုရားသခင့်ပညတ်ကိုသုံးသပ်ကြည့်ပါ။ (ဟေဗြဲ ၁၃:၄) ဤပညတ်ကိုနာခံခြင်းဖြင့် ကျွန်ုပ်တို့ထံမှ ကောင်းသောအရာတစ်ခုခု လက်လွတ်သွားပါသလော။ မေတ္တာရှင်ကောင်းကင်ခမည်းတော်သည် ကျွန်ုပ်တို့အား အကျိုးရှိရာတစ်စုံတစ်ခု မရစေလိုသည့် ပညတ်တစ်ခု ထုတ်ဆင့်ပါမည်လော။ ဝေးလေစွ! ယေဟောဝါ၏ကိုယ်ကျင့်တရားစံနှုန်းများအတိုင်း မနေထိုင်ကြသူများစွာ၏ဘဝ မည်သို့ဖြစ်နေသည်ကိုကြည့်လိုက်ပါ။ မလိုချင်သောကိုယ်ဝန်များကို ဖျက်ချရသည့်အခြေအနေရောက်ခြင်း သို့မဟုတ် စောစောစီးစီး ပျော်ရွှင်မှုမဲ့စွာ အိမ်ထောင်ပြုရသည့်အခြေဆိုက်စေလေ့ရှိသည်။ အများအပြားမှာ လင်သား သို့မဟုတ် ဇနီးမယားမရှိဘဲ ကလေးကို ပြုစုပျိုးထောင်ရကြသည်။ ထို့ပြင် မတရားသောမေထုန်ပြုကျင့်သူတို့သည် လိင်ဆိုင်ရာကူးစက်ရောဂါများရဖို့ အကြောင်းများသည်။ (၁ ကောရိန္သု ၆:၁၈) ယေဟောဝါ၏ကျေးကျွန်တစ်ဦးသည် မတရားသောမေထုန်ကျူးလွန်ပါက စိတ်ပိုင်းဆိုင်ရာထိခိုက်မှုသည် ဆိုးရွားနိုင်၏။ အပြစ်ရှိနေသည်ဟူသည့် အသိစိတ်၏ တစ်ချိန်လုံးအနှောင့်အယှက်ပေးမှုကို ကြိုးစားဖယ်ထုတ်နေရခြင်းကြောင့် အိပ်မပျော်သောညများနှင့် စိတ်ဝေဒနာတို့ ဖြစ်ပေါ်စေနိုင်သည်။ (ဆာလံ ၃၂:၃၊ ၄; ၅၁:၃) သို့ဖြစ်၍ မတရားသောမေထုန်ကိုတားမြစ်သော ယေဟောဝါ၏ပညတ်သည် ကျွန်ုပ်တို့ကိုကာကွယ်ပေးရန်ဖြစ်ကြောင်း မထင်ရှားပေလော။ ကိုယ်ကျင့်တရားသန့်ရှင်းမှုကို ထိန်းသိမ်းထားခြင်းသည် အမှန်ပင်အကျိုးကြီးလှသည်တကား!

ယေဟောဝါ၏အကူအညီအတွက်ဆုတောင်းပါ

၁၂၊ ၁၃။ အပြစ်ပြုလိုသည့်ဆန္ဒများ ပြင်းပြလာသောအခါ ဆုတောင်းခြင်းသည် အဘယ်ကြောင့်သင့်လျော်သနည်း။

^၁၂ဝိညာဉ်စိတ်သဘောရှိရန် နှလုံးပါပါဆုတောင်းဖို့ အမှန်ပင်လိုသည်။ ဘုရားသခင့်ဝိညာဉ်တော်အကူအညီအတွက် တောင်းခံသင့်သည်၊ အကြောင်းမှာ ယေရှုက “သင်တို့သည် . . . ကိုယ်သားတို့အား ကောင်းသောအရာကိုပေးတတ်လျှင်၊ ထိုမျှမက ကောင်းကင်ဘုံ၌ရှိတော်မူသော သင်တို့အဘသည် ဆုတောင်းသောသူတို့အား သန့်ရှင်းသောဝိညာဉ်တော်ကို သာ၍ပေးတော်မူမည်မဟုတ်လော” ဟုမိန့်ဆိုခဲ့သည်။ (လုကာ ၁၁:၁၃) ဆုတောင်းရာ၌ ကျွန်ုပ်တို့၏အားနည်းမှုနှင့်ပတ်သက်၍ အကူအညီအတွက် ဝိညာဉ်တော်ကိုအားထားကြောင်း ဖော်ပြနိုင်သည်။ (ရောမ ၈:၂၆၊ ၂၇) ကျွန်ုပ်တို့၌အပြစ်ပြုလိုသောဆန္ဒများ သို့မဟုတ် သဘောထားများဖြစ်ပေါ်နေကြောင်း သိရှိလျှင် သို့မဟုတ် မေတ္တာရှိသောယုံကြည်သူချင်းတစ်ဦးက ယင်းကိုထောက်ပြလာလျှင် ကျွန်ုပ်တို့၏ဆုတောင်းချက်များတွင် ထိုပြဿနာနှင့်ပတ်သက်၍ အတိအကျဖော်ပြကာ ဤအစွဲအလမ်းများကို ဖျောက်ဖျက်ရာ၌ ဘုရားသခင့်ထောက်မမှုကို အသနားခံခြင်းသည် ပညာရှိရာရောက်မည်။

^၁၃ဖြောင့်မတ်သောအရာ၊ စင်ကြယ်သောအရာ၊ မွန်မြတ်သောအရာနှင့် ချီးမွမ်းဖွယ်သောအရာများကိုအာရုံပြုရန် ကျွန်ုပ်တို့ကိုယေဟောဝါကူညီနိုင်သည်။ “ဘုရားသခင်၏ငြိမ်သက်ခြင်း” သည်ကျွန်ုပ်တို့၏နှလုံးနှင့် စိတ်စွမ်းအားတို့ကို ကာကွယ်စောင့်ရှောက်ရန် ကိုယ်တော်ထံဇွဲရှိရှိတောင်းလျှောက်ဖို့ မည်မျှသင့်လျော်လှသည်တကား! (ဖိလိပ္ပိ ၄:၆-၈) ထို့ကြောင့် “ဖြောင့်မတ်စွာကျင့်ခြင်း၊ ဘုရား[သခင်]ဝတ်၌မွေ့လျော်ခြင်း၊ ယုံကြည်ခြင်း၊ ချစ်ခြင်း၊ သည်းခံခြင်း၊ နူးညံ့သိမ်မွေ့ခြင်းတို့ကို မီအောင်လိုက်” ရန်ယေဟောဝါထောက်မပေးဖို့ ဆုတောင်းကြပါစို့။ (၁ တိမောသေ ၆:၁၁-၁၄) ကျွန်ုပ်တို့၏ကောင်းကင်ခမည်းတော်၏ ကူညီမစမှုကြောင့် စိုးရိမ်ပူပန်မှုများနှင့် သွေးဆောင်မှုများသည် မထိန်းချုပ်နိုင်သည့်အထိ ကြီးထွားလာမည်မဟုတ်ပါ။ ယင်းအစား ကျွန်ုပ်တို့၏ဘဝအသက်တာတွင် ဘုရားသခင်ပေးသည့်ငြိမ်သက်မှုကို ခံစားနေရမည်။

ဝိညာဉ်တော်ကိုစိတ်မနာစေနှင့်

၁၄။ ဘုရားသခင့်ဝိညာဉ်တော်သည် အဘယ်ကြောင့်သန့်ရှင်းမှုအတွက် တွန်းအားဖြစ်သနည်း။

^၁၄ယေဟောဝါ၏ရင့်ကျက်သောကျေးကျွန်များသည် “ဝိညာဉ်တော်၏အရှိန်ကို မငြိမ်းစေကြနှင့်” ဟူသောပေါလု၏အကြံပေးချက်ကို ကိုယ်တိုင်ကျင့်သုံးကြသည်။ (၁ သက်သာလောနိတ် ၅:၁၉) ဘုရားသခင့်ဝိညာဉ်တော်သည် “သန့်ရှင်းသောဝိညာဉ်တော်” ဖြစ်သောကြောင့် ယင်းသည် သန့်ရှင်း၊ စင်ကြယ်၊ မြင့်မြတ်သည်။ (ရောမ ၁:၃) ထို့ကြောင့် ကျွန်ုပ်တို့အပေါ်သို့ ထိုဝိညာဉ်တော်သက်ရောက်သောအခါ သန့်ရှင်းမှု သို့မဟုတ် စင်ကြယ်မှုအတွက်တွန်းအားဖြစ်သည်။ ဘုရားသခင်အားနာခံမှုပြသော သန့်ရှင်းသည့်ဘဝလမ်းစဉ်၌ရှိနေစေရန် ကျွန်ုပ်တို့ကိုထောက်ကူပေးသည်။ (၁ ပေတရု ၁:၂) မည်သည့်မသန့်ရှင်းသောအကျင့်မဆိုသည် ထိုဝိညာဉ်တော်ကို လျစ်လျူရှုခြင်းဖြစ်ရာ ယင်းက ဆိုးကျိုးများရရှိနိုင်သည်။ မည်သို့အားဖြင့်နည်း။

၁၅၊ ၁၆။ (က) ဘုရားသခင့်ဝိညာဉ်တော်ကို ကျွန်ုပ်တို့မည်သို့စိတ်နာစေနိုင်သနည်း။ (ခ) ယေဟောဝါ၏ဝိညာဉ်တော်အားစိတ်နာစေခြင်းကို ကျွန်ုပ်တို့မည်သို့ရှောင်ကြဉ်နိုင်သနည်း။

^၁၅ပေါလုကဤသို့ရေးသားခဲ့သည်– “ရွေးနုတ်ခြင်းနေ့ရက်တိုင်အောင် သင်တို့ကိုတံဆိပ်ခတ်တော်မူသော ဘုရားသခင်၏သန့်ရှင်းသောဝိညာဉ်တော်ကို စိတ်မနာစေကြနှင့်။” (ဧဖက် ၄:၃၀) ကျမ်းစာစောင်များက ယေဟောဝါ၏ဝိညာဉ်တော်သည် တည်ကြည်သောကောင်းကင်အတန်းအစားခရစ်ယာန်များအတွက် တံဆိပ် သို့မဟုတ် ‘လာလတ္တံ့သောအရာ၏စရန်’ အဖြစ်ဖော်ပြသည်။ ယင်းသည် မသေနိုင်သောကောင်းကင်အသက်တာဖြစ်၏။ (၂ ကောရိန္သု ၁:၂၂; ၁ ကောရိန္သု ၁၅:၅၀-၅၇; ဗျာဒိတ် ၂:၁၀) ဘုရားသခင့်ဝိညာဉ်တော်သည် ကောင်းကင်အတန်းအစားများနှင့် သစ္စာရှိအသက်တာဖြင့် မြေကြီးမျှော်လင့်ချက်ရှိကြသော သူတို့၏အပေါင်းပါများကို လမ်းပြညွှန်ကြားပေးနိုင်ပြီး အပြစ်ရှိသောအကျင့်များကိုရှောင်ကြဉ်ရန် ကူညီပေးနိုင်သည်။

^၁၆တမန်တော်က မုသာစကားပြောခြင်း၊ ခိုးခြင်း၊ ရှက်ဖွယ်သောအမူအကျင့်အစရှိသည်တို့ ပြုလိုသည့်စိတ်ထားကို သတိပေးတားမြစ်ခဲ့သည်။ ဤအကျင့်များနောက် တရွေ့ရွေ့လိုက်ပါသွားရန် မိမိတို့ကိုယ်ကိုခွင့်ပြုနေမည်ဆိုလျှင် ဘုရားသခင့်နှုတ်မြွက်စကားတော်၏ ဝိညာဉ်တော်မှုတ်သွင်းခံဆုံးမမှုကို ဖီဆန်နေရာကျမည်ဖြစ်သည်။ (ဧဖက် ၄:၁၇-၂၉; ၅:၁-၅) ဤနည်းအားဖြင့် ကျွန်ုပ်တို့သည် အတိုင်းအတာတစ်ခုအထိ ဘုရားသခင့်ဝိညာဉ်တော်ကို စိတ်နာစေရာကျမည်ဖြစ်ရာ ယင်းသည် ကျွန်ုပ်တို့အမှန်ပင် ရှောင်ကြဉ်လိုသည့်အရာဖြစ်၏။ ထိုအကြောင်းကြောင့် ကျွန်ုပ်တို့တစ်ဦးဦးသည် ယေဟောဝါ၏နှုတ်မြွက်စကားတော်၏ဆုံးမမှုကို စတင်၍လျစ်လျူရှုလာလျှင် တမင်တကာပြစ်မှားခြင်းနှင့် ဘုရားသခင့်မျက်နှာသာကို လုံးလုံးဆုံးရှုံးခြင်း အကျိုးဆက်ရနိုင်သည့် သဘောထားများ သို့မဟုတ် ဝသီများကိုစတင်မွေးမြူလာနိုင်သည်။ (ဟေဗြဲ ၆:၄-၆) ချက်ချင်း အပြစ်ကိုအကျင့်တစ်ခုအနေနှင့် ပြုနေချင်မှပြုမည်ဖြစ်သော်လည်း ထိုအခြေအနေသို့ဦးတည်နေနိုင်သည်။ ဝိညာဉ်တော်၏ဦးဆောင်လမ်းပြမှုကို ဆန့်ကျင်ခြင်းအားဖြင့် ကျွန်ုပ်တို့သည် ယင်းကိုစိတ်နာအောင်ပြုနေရာကျနေမည်။ သန့်ရှင်းသောဝိညာဉ်တော်၏မူလအမြစ်ဖြစ်သော ယေဟောဝါကိုလည်း အံတုရာ၊ စိတ်နာစေရာကျမည်။ ဘုရားသခင်ကိုချစ်မြတ်နိုးသူများအနေနှင့် ကျွန်ုပ်တို့သည် ထိုသို့ဘယ်သောအခါမျှပြုလိုကြမည်မဟုတ်။ ယင်းအစား ကိုယ်တော်၏ဝိညာဉ်တော်ကို စိတ်မနာစေဘဲ ဝိညာဉ်စိတ်သဘောဆက်ရှိခြင်းအားဖြင့် ကိုယ်တော်၏သန့်ရှင်းသောနာမတော်ကို ဂုဏ်တင်နိုင်ဖို့ ယေဟောဝါ၏အကူအညီအတွက် ကျွန်ုပ်တို့ ကောင်းကောင်းဆုတောင်းကြပေမည်။

ဝိညာဉ်စိတ် သဘောဆက်ရှိနေလော့

၁၇။ ကျွန်ုပ်တို့ချမှတ်နိုင်သည့် ဝိညာဉ်ရေးပန်းတိုင်အချို့ကား အဘယ်နည်း၊ ဤသို့ချမှတ်ခြင်းသည် အဘယ်ကြောင့်ပညာရှိရာကျမည်နည်း။

^၁၇ဝိညာဉ်စိတ်သဘောဆက်ရှိရန် ကျွန်ုပ်တို့ မှတ်သားထိုက်သောနည်းတစ်နည်းမှာ ဝိညာဉ်ရေးပန်းတိုင်များချမှတ်ကာ ၎င်းတို့ကိုပြည့်မီရန်လုပ်ဆောင်ခြင်းဖြစ်သည်။ ကျွန်ုပ်တို့၏လိုအပ်ချက်များနှင့် အခြေအနေများပေါ်မူတည်၍ ကျွန်ုပ်တို့၏ပန်းတိုင်များတွင် လေ့လာသည့်အကျင့်ကိုတိုးတက်စေခြင်း၊ ဟောပြောခြင်းလုပ်ငန်း၌ တိုး၍ပါဝင်ခြင်း သို့မဟုတ် အချိန်ပြည့်ရှေ့ဆောင်ဓမ္မအမှု၊ ဗေသလလုပ်ငန်း သို့မဟုတ် ခရစ်ယာန်သာသနာပြုလုပ်ငန်းစသည့် လုပ်ငန်းတော်ဆိုင်ရာအထူးအခွင့်အရေးကို လက်လှမ်းခြင်းတို့ပါဝင်ပေမည်။ ယင်းက ကျွန်ုပ်တို့၏စိတ်ကို ဝိညာဉ်ရေးအကျိုးစီးပွားများဖြင့်နေရာယူစေကာ လူ့အားနည်းမှုများကို လက်လျှော့အရှုံးပေးခြင်း သို့မဟုတ် ဤအစီအစဉ်စနစ်အတွက် သာမန်ကိစ္စဖြစ်နေသော ရုပ်ပစ္စည်းပန်းတိုင်များ သို့မဟုတ် ကျမ်းစာနှင့်မညီသော လိုအင်ဆန္ဒများနောက်လိုက်ရန် ဖိအားပေးမှုတို့ကို တွန်းလှန်ရန်ထောက်ကူပေးပါလိမ့်မည်။ ယင်းသည် အမှန်ပင်ပညာရှိလမ်းစဉ်ဖြစ်သည်၊ အကြောင်းမှာ ယေရှုကဤသို့တိုက်တွန်းခဲ့သည်– “သံချေး၊ ပိုးရွဖျက်ဆီး၍ သူခိုးထွင်းဖောက်ခိုးယူရာ မြေကြီးပေါ်မှာ ဘဏ္ဍာကိုမဆည်းပူးကြနှင့်။ သံချေး၊ ပိုးရွမဖျက်ဆီး၍ သူခိုးမထွင်းမဖောက် မခိုးမယူရာ ကောင်းကင်ဘုံ၌ဘဏ္ဍာကို ဆည်းပူးကြလော့။ အကြောင်းမူကား၊ အကြင်အရပ်၌ သင်တို့၏ဘဏ္ဍာရှိ၏။ ထိုအရပ်သို့ သင်တို့၏စိတ်နှလုံးရောက်တတ်၏။”—မဿဲ ၆:၁၉-၂၁။

၁၈။ ဤနောက်ဆုံးကာလ၌ ဝိညာဉ်စိတ်သဘောဆက်ရှိနေဖို့ အဘယ်ကြောင့်ဤမျှအရေးကြီးသနည်း။

^၁၈ဝိညာဉ်စိတ်သဘောရှိ၍ လောကဆန္ဒများကိုချိုးနှိမ်ခြင်းသည် ဤ ‘နောက်ဆုံးကာလ’ တွင် ပညာရှိလမ်းစဉ်ဖြစ်သည်အမှန်။ (၂ တိမောသေ ၃:၁-၅) အမှန်ဆိုလျှင် “လောကနှင့်လော [က] တပ်မက်ခြင်းသည် ရွေ့သွားကွယ်ပျောက်တတ်၏။ ဘုရားသခင်၏အလိုတော်နှင့်အညီ ကျင့်သောသူမူကား၊ . . . ထာဝရတည်၏။” (၁ ယောဟန် ၂:၁၅-၁၇) ဥပမာ၊ ခရစ်ယာန်လူငယ်တစ်ဦးသည် အချိန်ပြည့်လုပ်ငန်းတော်ပန်းတိုင်ကို လိုက်မည်ဆိုပါက ၎င်းသည် ကြီးကောင်ဝင်ချိန် သို့မဟုတ် လူငယ့်ဘဝဆိုင်ရာ ခက်ခဲသောနှစ်များအတွင်း လမ်းပြမီးအဖြစ် လုပ်ဆောင်ပေးပါလိမ့်မည်။ ထိုသို့သောသူတစ်ဦးသည် အလျှော့ပေးလိုက်လျောဖို့ ဖိအားပေးခံရသောအခါ ယေဟောဝါ၏လုပ်ငန်းတော်၌ သူပြီးမြောက်လိုသည့်အရာအပေါ် ရှင်းလင်းသောအမြင်ရှိပါလိမ့်မည်။ ထိုသို့သောဝိညာဉ်ရေးရာလူတစ်ဦးသည် ရုပ်ပစ္စည်းလိုက်စားခြင်း သို့မဟုတ် အပြစ်တရားက ကတိပြုသောသာယာမှုတစ်ခုခုအတွက် ဝိညာဉ်ရေးပန်းတိုင်များလှမ်းမီခြင်းကို လက်လွှတ်ဆုံးရှုံးခံခြင်းသည် ပညာမဲ့၍ မိုက်မဲသည်ဟုပင်ယူမှတ်ပါလိမ့်မည်။ ဝိညာဉ်ရေးစိတ်သဘောထားရှိသူမောရှေသည် “အပြစ်ရှိသောခဏတာပျော်ပါးမှုကိုခံစားရန်ထက် ဘုရားသခင့်လူတို့နှင့်အတူညှဉ်းဆဲခြင်းကို ရွေးချယ်ခဲ့” ကြောင်းသတိရပါ။ (ဟေဗြဲ ၁၁:၂၄၊ ၂၅၊ ကဘ) ကျွန်ုပ်တို့ကြီးသည်ဖြစ်စေ၊ ငယ်သည်ဖြစ်စေ အားနည်းသောဇာတိစိတ်အစား ဝိညာဉ်စိတ်သဘောဆက်ရှိသောအခါ အလားတူရွေးချယ်မှုပြုကြသည်။

၁၉။ ဝိညာဉ်စိတ်သဘောဆက်ရှိနေမည်ဆိုလျှင် အဘယ်အကျိုးကျေးဇူးများ ကျွန်ုပ်တို့ခံစားရမည်နည်း။

^၁၉“ဇာတိပကတိစိတ်သဘောသည် ဘုရားသခင်နှင့်ဆန့်ကျင်ဘက်ဖြစ်၏၊” သို့သော် “ဝိညာဉ်ပကတိစိတ်၊ သဘောသည် အသက်ရှင်ခြင်းအကြောင်းနှင့် ငြိမ်သက်ခြင်းအကြောင်းဖြစ်၏။” (ရောမ ၈:၆၊ ၇) ဝိညာဉ်စိတ်သဘောဆက်၍ရှိမည်ဆိုလျှင် အဖိုးတန်သောငြိမ်သက်မှုကို ကျွန်ုပ်တို့ခံစားရပါလိမ့်မည်။ ကျွန်ုပ်တို့၏နှလုံးနှင့် စိတ်စွမ်းအားများသည် အပြစ်ရှိသောအခြေအနေ၏သြဇာမှ သာ၍အပြည့်အဝကာကွယ်ခံရလိမ့်မည်။ အမှားပြုခြင်း၌ပါဝင်ဖို့သွေးဆောင်မှုများကို ကျွန်ုပ်တို့တိုး၍တွန်းလှန်နိုင်ပါလိမ့်မည်။ ထို့ပြင် ဇာတိနှင့်ဝိညာဉ်စပ်ကြား အဆက်မပြတ်ဆိုင်ပြိုင်တွန်းလှန်ခြင်းကို ကျွန်ုပ်တို့အောင်မြင်ကျော်လွှားရန် ဘုရားသခင့်အကူအညီရရှိကြမည်။

၂၀။ ဇာတိနှင့်ဝိညာဉ်တိုက်ပွဲကို အနိုင်ရနိုင်ကြောင်း ကျွန်ုပ်တို့အဘယ်ကြောင့်စိတ်ချနိုင်သနည်း။

^၂၀ဝိညာဉ်စိတ်သဘောဆက်ရှိခြင်းအားဖြင့် အသက်နှင့် သန့်ရှင်းသောဝိညာဉ်တော်တို့၏ရင်းမြစ် ယေဟောဝါနှင့်အရေးပါသောဆက်သွယ်မှုဆက်ရှိစေသည်။ (ဆာလံ ၃၆:၉; ၅၁:၁၁) ယေဟောဝါဘုရားသခင်နှင့် ကျွန်ုပ်တို့၏ဆက်ဆံရေးကိုဖျက်ဆီးရန် စာတန်နှင့်သူ၏ကိုယ်စားလှယ်များသည် သူတို့တတ်နိုင်သည့်အရာမှန်သမျှကိုပြုနေကြသည်။ ကျွန်ုပ်တို့အရှုံးပေးလျှင် အဆုံး၌ ဘုရားသခင်နှင့်ရန်သူဖြစ်စေပြီး သေခြင်းသို့ရောက်မည်ကို သူတို့သိရှိထားရာ ကျွန်ုပ်တို့၏စိတ်ကိုလွှမ်းမိုးရန် ကြိုးစားကြသည်။ သို့သော် ဇာတိနှင့်ဝိညာဉ်တိုက်ပွဲတွင် ကျွန်ုပ်တို့အနိုင်ရနိုင်ပါသည်။ ထိုသို့ပေါလုကြုံတွေ့ခဲ့သည်၊ အကြောင်းမှာ သူကိုယ်တိုင်၏တိုက်ပွဲအကြောင်းရေးသားရာ၌ ဦးဆုံးသူဤသို့မေးခွန်းထုတ်ခဲ့သည်– “ဤအသေကောင်မှ ငါ့ကိုအဘယ်သူကယ်လွှတ်မည်နည်း။” ထို့နောက် ထိုကယ်လွှတ်မှု ဖြစ်နိုင်ကြောင်းကို ဤသို့ဖော်ပြပြောဆိုခဲ့သည်– “ငါတို့သခင်ယေရှုခရစ်အားဖြင့် ကယ်လွှတ်တော်မူသော ဘုရားသခင်၏ ကျေးဇူးတော်ကြီးလှပေ၏။” (ရောမ ၇:၂၁-၂၅) ကျွန်ုပ်တို့လည်း လူ့အားနည်းမှုများကိုအောင်နိုင်ကာ ထာဝရအသက်ဆိုင်ရာ အံ့ဖွယ်မျှော်လင့်ချက်နှင့် ဝိညာဉ်စိတ်သဘောဆက်၍ရှိရန် နည်းလမ်းများကို ခရစ်တော်အားဖြင့် ပေးသနားသည့်အတွက် ဘုရားသခင်ကိုကျေးဇူးတင်နိုင်ကြသည်။—ရောမ ၆:၂၃။

သင်မှတ်မိသလော

• ဝိညာဉ်စိတ်သဘောရှိခြင်းဟူသည် အဘယ်နည်း။

• ကျွန်ုပ်တို့အပေါ်၌ ယေဟောဝါ၏ဝိညာဉ်တော်ကို မည်သို့သြဇာလွှမ်းစေနိုင်သနည်း။

• အပြစ်တရားကိုကျွန်ုပ်တို့ဆိုင်ပြိုင်တိုက်လှန်ရာ၌ သမ္မာကျမ်းစာကိုလေ့လာခြင်း၊ ယေဟောဝါ၏ပညတ်ကိုနာခံခြင်းနှင့် ကိုယ်တော့်ထံဆုတောင်းခြင်းတို့သည် အဘယ်ကြောင့်အရေးကြီးကြောင်း ရှင်းပြပါ။

• ဝိညာဉ်ရေးပန်းတိုင်များချမှတ်ခြင်းက အသက်လမ်းစဉ်၌ ကျွန်ုပ်တို့ကို မည်သို့ဆက်ရှိစေနိုင်သနည်း။

[လေ့လာရန်မေးခွန်းများ]

[စာမျက်နှာ ၁၆ ပါ ရုပ်ပုံ]

ဝိညာဉ်ရေးရာတိုက်ခိုက်မှုများကိုခံရပ်ဖို့ သမ္မာကျမ်းစာလေ့လာခြင်းက ကျွန်ုပ်တို့ကိုထောက်ကူပေး

[စာမျက်နှာ ၁၇ ပါ ရုပ်ပုံ]

အပြစ်ပြုလိုသောဆန္ဒများကို အောင်မြင်ကျော်လွှားဖို့ ယေဟောဝါ၏ အကူအညီအတွက် ဆုတောင်းခြင်းသည် သင့်တော်

[စာမျက်နှာ ၁၈ ပါ ရုပ်ပုံ]

ဝိညာဉ်စိတ်သဘောဆက်ရှိရန် ဝိညာဉ်ရေးပန်းတိုင်များကထောက်ကူနိုင်

ကင်းမျှော်စင်—လေ့လာရန် စာစောင်