သင့်အတွက် ယင်းသည် အကောင်းဆုံးဘဝလုပ်ငန်း ဖြစ်နိုင်မည်လော
သင့်အတွက် ယင်းသည် အကောင်းဆုံးဘဝလုပ်ငန်း ဖြစ်နိုင်မည်လော
သင်သည် နှစ်ခြင်းခံပြီးသောခရစ်ယာန်တစ်ဦးဖြစ်လျှင် ဘုရားသခင်ကိုချစ်သည့်မေတ္တာက ကိုယ်တော့်အလိုတော်ဆောင်ရန် သင့်အားအမှန်လှုံ့ဆော်ပေးမည်။ ထို့အပြင် ခရစ်ယာန်ဓမ္မအမှုသည် သင့်ဘဝလုပ်ငန်းပင်ဖြစ်ရမည်။ အမှန်မှာ ယေရှုခရစ်သည် မိမိ၏နောက်တော်လိုက်အားလုံးကို တပည့်ဖြစ်စေခြင်းလုပ်ငန်းတွင်ပါဝင်ရန် တာဝန်ပေးခဲ့သည်။ (မဿဲ ၂၈:၁၉၊ ၂၀) မှန်ပေသည်၊ သင့်ကိုယ်ကိုထောက်ပံ့ရန် ယခုလောကအလုပ်ကို သင်လုပ်ကိုင်နေပေမည်။ သို့သော် သင်သည် ယေရှု၏နောက်လိုက်တစ်ဦးအနေနှင့်ရော ယေဟောဝါသက်သေတစ်ဦးအနေနှင့်ပါ ပထမဦးဆုံးအနေနှင့် သင်သည် ခရစ်ယာန်ဓမ္မအမှုဆောင်တစ်ဦး၊ ဘုရားသခင့်နိုင်ငံတော်သတင်းဟောပြောခြင်းလုပ်ငန်းကို ဦးစားထားသူတစ်ဦးဖြစ်သည်။—မဿဲ ၂၄:၁၄။
သင်သည် ဆယ်ကျော်သက်နှောင်းပိုင်း သို့မဟုတ် ၂၀ ကျော်ခါစဖြစ်ကောင်းဖြစ်မည်။ ဘဝတွင်အဘယ်လမ်းစဉ်အတိုင်း လျှောက်လှမ်းမည်ကို အမြောက်အမြားစဉ်းစားသုံးသပ်ခဲ့ပြီးဖြစ်နိုင်သည်။ လမ်းပွင့်လျက်ရှိသော ရွေးချယ်စရာများကို သင်ချင့်ချိန်သုံးသပ်ရာတွင် ကိုယ်ကိုယ်တိုင်အားရကျေနပ်မှုရှိခြင်းသည် သင့်အတွက် အရေးကြီးဆုံးဖြစ်ဖွယ်ရှိသည်။
ထို့ကြောင့် ဒိန်းမတ်နိုင်ငံမှ ယိုအဲန်၏ရွေးချယ်မှုနှင့်ပတ်သက်၍ သူပြောပြသည်ကိုသုံးသပ်ကြည့်ပါ။ “ရှိရှိသမျှအလုပ်တွေထဲမှာ အရေးအပါဆုံးအလုပ်ကို အာရုံစိုက်နိုင်တဲ့ စံထားထိုက်တဲ့ဘဝလမ်းစဉ်ပဲ” ဟုယိုအဲန်က မိမိရွေးချယ်ခဲ့သည်ဘဝလုပ်ငန်းကို ဖော်ပြသည်။ ဂရိနိုင်ငံမှအသက် ၃၁ နှစ်အရွယ်အမျိုးသမီးတစ်ဦးဖြစ်သူ အေဗာက ဤသို့ဆိုသည်– “ရွယ်တူချင်းတွေရဲ့ဘဝနဲ့ ကျွန်မဘဝကိုနှိုင်းယှဉ်လိုက်ရင် ကျွန်မဘဝဟာ ပိုပြီးအဓိပ္ပာယ်ပြည့်ဝတယ်၊ ပိုပြည့်စုံတယ်၊ ပိုစိတ်လှုပ်ရှားဖွယ်ဖြစ်တယ်လို့ ကျွန်မအမြဲပဲကောက်ချက်ချတယ်။” အဘယ်ဘဝလုပ်ငန်းက ထိုသို့သောကျေနပ်မှုကိုပေးသနည်း။ ယင်းသို့သောဘဝပုံစံမျိုးကို သင်မည်သို့ရနိုင်မည်နည်း။
ဘုရားသခင် လမ်းညွှန်သလော
ဘဝလုပ်ငန်းတစ်ခုကိုရွေးချယ်ခြင်းသည် အတော်အတန်ခက်ခဲနိုင်ပေသည်။ အမှန်မှာ၊ အချို့သူတို့သည် မိမိတို့အား ဘုရားသခင် အဘယ်အရာလုပ်ဆောင်စေလိုကြောင်းကို ကိုယ်တော်အတိအကျ လမ်းညွှန်ပေးစေလိုပေမည်။
မိဒျန်ပြည်တွင် မောရှေရှိနေစဉ် ယေဟောဝါသည် သူ့အား အီဂျစ်ပြည်သို့ပြန်၍ ဣသရေလလူများကို ကျွန်ဘဝမှနုတ်ဆောင်ရန် ညွှန်ကြားခဲ့သည်။ (ထွက်မြောက်ရာ ၃:၁-၁၀) ဖိနှိပ်ခံနေရခြင်းမှ ဣသရေလလူမျိုးကိုကယ်တင်ရန် ခန့်အပ်ခံရသောဂိဒေါင်ရှေ့ ဘုရားသခင်၏ကောင်းကင်တမန်ထင်ရှားခဲ့သည်။ (တရားသူကြီး ၆:၁၁-၁၄) ဣသရေလလူများ၏ နောက်တက်မည့်ဘုရင်အဖြစ် ဒါဝိဒ်ကိုဘိသိက်ပေးရန် ရှမွေလအား ဘုရားသခင်မိန့်မှာခဲ့စဉ် ဒါဝိဒ်သည် သိုးကျောင်းနေ၏။ (၁ ဓမ္မရာဇဝင် ၁၆:၁-၁၃) ယနေ့ ကျွန်ုပ်တို့ကို ထိုသို့သောနည်းများဖြင့် လမ်းညွှန်မပေးချေ။ ယင်းအစား ကျွန်ုပ်တို့သည် ကိစ္စရပ်များကိုဂရုတစိုက်ချင့်ချိန်ကာ ဘုရားပေးအရည်အသွေးများကို မည်သို့အသုံးပြုမည်ကို ဆုံးဖြတ်ရန်လိုသည်။
ယေဟောဝါသည် ယနေ့ခရစ်ယာန်လူငယ်များအတွက် “ဆောင်ရွက်စရာလုပ်ငန်းတံခါးကြီး” ကိုဖွင့်ထားသည်။ (၁ ကောရိန္သု ၁၆:၉၊ ကဘ) မည်သို့အားဖြင့်နည်း။ လွန်ခဲ့သောဆယ်စုနှစ်အတွင်း ဘုရားသခင့်နိုင်ငံတော်ကြွေးကြော်သူအရေအတွက်သည် ကမ္ဘာတစ်ဝန်းတွင် ၂,၁၂၅,၀၀၀ ကျော်မှ ၆,၀၀၀,၀၀၀ ကျော်အထိ တိုးတက်လာခဲ့ပြီ။ ဝိညာဉ်အစာနှင့် ကမ္ဘာချီသတင်းကောင်းဟောပြောခြင်းလုပ်ငန်းအတွက်လိုအပ်သည့် သန်းနှင့်ချီသော ကျမ်းစာများ၊ စာအုပ်စာတမ်းများ၊ ဘရိုရှာများ၊ မဂ္ဂဇင်းများနှင့် ဝေစာများရှိစေရန် မည်သူများကထောက်မကူညီနေသနည်း။ ဤအခွင့်ထူးကို ကမ္ဘာချီဗေသလမိသားစုဝင်များ ခံစားနေကြရသည်။
အကျိုးဖြစ်ထွန်းသောအသက်တာ
ဗေသလအဓိပ္ပာယ်မှာ “ဘုရားသခင်၏အိမ်တော်” ဖြစ်၏၊ ဗေသလအိမ်များသည် ဌာနချုပ်နှင့် ကင်းမျှော်စင်အသင်း၏ ဌာနခွဲရုံးများ၌ အမှုဆောင်နေကြသော ခရစ်ယာန်စေတနာ့ဝန်ထမ်းများ နေထိုင်ကြသည့်နေရာများဖြစ်သည်။ (ကမ္ဘာဦး ၂၈:၁၉၊ ကဘ၊ အောက်ခြေမှတ်ချက်) မျက်မှောက်ခေတ် ဗေသလမိသားစုများကို ‘ဉာဏ်ပညာအားဖြင့် တည်ဆောက်ထား’ ၍စည်းစနစ်ကျပြီး ယေဟောဝါအားချစ်ခြင်းအပေါ်အခြေပြုသောအိမ်ထောင်စုများနှင့် ပုံခိုင်းနိုင်ပါသည်။—သု. ၂၄:၃။
ဗေသလရှိ မိသားစုကဲ့သို့သောဝန်းကျင်နှင့်ပတ်သက်၍ အဘယ်သို့ပြောနိုင်သနည်း။ အက်စတိုးနီးယားမှ ၂၅ နှစ်အရွယ် ဗေသလမိသားစုဝင်တစ်ဦးက ဤသို့ပြောပြသည်– “ယေဟောဝါရဲ့မိတ်ဆွေတွေကြားမှာ အမြဲရှိနေရတာ ကျွန်မပျော်တယ်။ ဗေသလမှာ အဲဒါကို ကျွန်မအခုထိ တန်ဖိုးထားတုန်းပဲ။”—ဆာလံ ၁၅:၁၊ ၂။
ယခု ကမ္ဘာတစ်ဝန်းတွင် ၁၉,၅၀၀ ခန့်သောသူများသည် ဗေသလလုပ်ငန်းတော်အခွင့်ထူးကို ရထားကြသည်။ (ဆာလံ ၁၁၀:၃) အမေရိကန်ပြည်ထောင်စုတွင် ဗေသလရှိသူများ၏ ၄၆ ရာခိုင်နှုန်းသည် အသက် ၁၉ နှစ်နှင့် ၂၉ နှစ်ကြားရှိ၏။ ဟေရှာယကဲ့သို့ သူတို့က “အကျွန်ုပ်ရှိပါ၏။ အကျွန်ုပ်ကိုစေလွှတ်တော်မူပါ” ဟုပြောခဲ့ကြပြီ။ (ဟေရှာယ ၆:၈) ယေဟောဝါထံဆက်ကပ်အပ်နှံပြီးသူ ဟေရှာယသည် လုပ်ငန်းတော်အခွင့်ထူးနောက်တစ်ခုရရှိရန် စေတနာအလျောက်တောင်းခံနေသည်။ ယင်းအတွက် ကိုယ်ကျိုးတစ်စုံတစ်ရာကို စွန့်လွှတ်ရမည်မှာ ထင်ရှားသည်။ ဗေသလလုပ်ငန်းတွင်လုပ်ဆောင်သူများသည် မိမိတို့အိမ်နှင့် ရင်းနှီးကျွမ်းဝင်သောဝန်းကျင်ကိုသာမက အမိ၊ အဖ၊ ညီအစ်ကိုညီအစ်မနှင့် သူငယ်ချင်းများကိုလည်း စွန့်ခွာခဲ့ကြရသည်။ ‘သတင်းကောင်းအဖို့အလို့ငှာ’ ယင်းသို့သောစွန့်လွှတ်မှုများကို တလိုတလားစွန့်ခဲ့ကြသည်။—မာကု ၁၀:၂၉၊ ၃၀။
တစ်ဖန် ဗေသလ၌ ဝိညာဉ်ရေးကောင်းချီးများစွာ ရှိပါသည်တကား! ရုရှားမှ ငယ်ရွယ်သောဗေသလမိသားစုဝင်တစ်ဦးက ဤသို့ရှင်းပြသည်– “ကိုယ်ကျိုးစွန့်တာကနေ ကမ္ဘာသစ်မှာနေထိုင်ဖို့ အထောက်အကူပြုမယ့်အရာတွေကို ကျွန်မတို့သင်ယူနိုင်တယ်။ ကျွန်မအတွက်တော့ ကျွန်မစွန့်လွှတ်ခဲ့တာတွေထက် ယေဟောဝါပေးတဲ့ကောင်းချီးတွေက ပိုများတယ်လို့ပြောနိုင်ပါတယ်။”—မာလခိ ၃:၁၀။
ဗေသလအသက်တာ
ဗေသလတွင်နေထိုင်ခြင်းသည် အဘယ်သို့ဖြစ်သနည်း။ ဗေသလမိသားစုဝင်များက ယင်းသည် အကျိုးဖြစ်ထွန်းပြီး ကျေနပ်မှုရရှိရုံမက စိတ်လှုပ်ရှားဖွယ်ရာပင်ဖြစ်သည်ဟု သဘောတူကြသည်။ အသက် ၄၃ နှစ်ရှိသောယန်းစ်သည် ဗေသလလုပ်ငန်းတော်တွင် ပျော်သည်။ အဘယ်ကြောင့်နည်း။ သူကဤသို့ပြောပြသည်– “ကျွန်တော်တို့ဟာ အရေးကြီးတဲ့လုပ်ငန်းတစ်ခု ပြီးမြောက်ဖို့ ကြီးမားတဲ့အားထုတ်မှုထဲမှာ တစ်စိတ်တစ်ပိုင်းပါဝင်နေတယ်ဆိုတဲ့ ခံစားချက်ကြောင့်ပါပဲ။ ယေဟောဝါလုပ်ငန်းတော်ဟာ ဘယ်လောက်ကြီးကျယ်ပြီး ဘယ်လောက်အရေးပါတယ်ဆိုတာကို ကျွန်တော်နားလည်နိုင်တယ်။”
တနင်္လာနေ့မှ စနေနေ့အထိ ဗေသလ၌တစ်နေ့တာသည် နံနက်ဝတ်ပြုမှုနှင့်အစပြု၏။ ယင်းသည် အတွေ့အကြုံရှိအကြီးအကဲတစ်ဦး ဦးစီးသော ကျမ်းစာဆွေးနွေးမှုတစ်ရပ်ဖြစ်သည်။ တနင်္လာနေ့ညနေပိုင်းတွင် ကင်းမျှော်စင်အကူအညီဖြင့် မိသားစုကျမ်းစာလေ့လာမှုကို တစ်နာရီခန့်ပြုလုပ်ပြီးနောက် တစ်ခါတစ်ရံ ဗေသလမိသားစုနှင့် အထူးသင့်လျော်သည့် ကျမ်းဆိုင်ရာအဓိကအချက်တစ်ခုအပေါ်အခြေခံသော ဟောပြောချက်တစ်ခုကို ဆက်ဟောပြောပါသည်။
လူတစ်ဦးသည် ဗေသလသို့ရောက်ခါစတွင် အဘယ်အရာတွေ့ကြုံရသနည်း။ ဗေသလသို့ရောက်လာခါစ လူသစ်တစ်ဦးအား ဗေသလတွင်နေထိုင်ခြင်းအကြောင်းသိစေရန် မိသားစုမှရင့်ကျက်သောညီအစ်ကိုများက ဗေသလလုပ်ငန်း၏အသွင်အမျိုးမျိုးနှင့်ပတ်သက်၍ သွန်သင်ချက်များပေးကြသည်။ ဗေသလမိသားစုဝင်လူသစ်တစ်ဦးသည် ပထမနှစ်အတွင်း ရက်သတ္တပတ်အနည်းငယ်တွင် ကျမ်းစာကို သူတိုးသိနားလည်လာစေရန်စီစဉ်ထားသော အလွန်ကောင်းသည့်အပတ်စဉ်ကျောင်းကို တက်ရသည်။ လူသစ်များသည် ကျမ်းစာဖတ်ရှုခြင်းအထူးအစီအစဉ်ကိုလည်း ပြုလုပ်ရကြသည်။ သူတို့၏ဗေသလလုပ်ငန်းတော်ပထမနှစ်အတွင်း မိသားစုဝင်လူသစ်များသည် ကျမ်းစာတစ်အုပ်လုံးကို ဖတ်ရှုကြရသည်။
ထိုလေ့ကျင့်မှုအားလုံး၏အကျိုးကျေးဇူးကား အဘယ်နည်း။ ဟောင်ကောင်မှ အသက် ၃၃ နှစ်အရွယ်ဗေသလမိသားစုဝင် ဂျော့ရှ်ဝါက ဤသို့ဖြေသည်– “ဗေသလဟာ ယေဟောဝါအပေါ် ကျွန်တော့်ရဲ့ကျေးဇူးတင်လေးမြတ်စိတ်ကို တကယ်နက်ရှိုင်းစေခဲ့တယ်။ သူတို့အသက်တာ အတော်များများကို ယေဟောဝါအမှုတော်မှာအသုံးပြုခဲ့ကြတဲ့ အတွေ့အကြုံရှိညီအစ်ကိုတွေနဲ့ ကျွန်တော်ပေါင်းသင်းနိုင်တယ်။ အထူးသဖြင့် နံနက်ဝတ်ပြုမှုနဲ့ မိသားစုကင်းမျှော်စင်သင်တန်းလိုမျိုး ဝိညာဉ်ရေးအစီအစဉ်တွေကို နှစ်သက်တယ်။ ဒီအပြင် စည်းစနစ်ကျနပြီး ရိုးရှင်းတဲ့ဘဝပုံစံကို ကျွန်တော်ကြိုက်တယ်။ အဲဒါက မလိုအပ်တဲ့စိုးရိမ်စရာ မရှိစေဘူး။ ပြီးတော့လည်း ခရစ်ယာန်နည်းလမ်းအတိုင်း ဘယ်လိုလုပ်ရမယ်ဆိုတာကိုတတ်လာပြီး အဲဒါက ကျွန်တော့်ကိုအမြဲအကျိုးပေးတယ်။”
ဗေသလမိသားစုဝင်များသည် သူတို့၏အချိန်နှင့်ကြိုးစားအားထုတ်မှုအများစုကို စေတနာ့ဝန်ထမ်းရန် ကတိပြုခဲ့သည်အတိုင်းပြုလုပ်ကြ၏။ ဆိုလိုသည်မှာ ဗေသလတွင် သူတို့ပေးအပ်ခံရသောတာဝန်ကို အဓိကလုပ်ဆောင်ရန် သူတို့၏ကာယနှင့် စိတ်ပိုင်းဆိုင်ရာစွမ်းအားများကို အသုံးပြုခြင်းဖြစ်သည်။ အလုပ်အမျိုးမျိုးကို လုပ်ဆောင်ရန်လိုအပ်သည်။ အချို့သည် ပုံနှိပ်စက်များကိုကိုင်တွယ်ရ၏၊ သို့မဟုတ် အသင်းတော်များစွာထံသို့တင်ပို့သည့် စာအုပ်များပြုလုပ်သော စာအုပ်ချုပ်ခြင်းကိုလုပ်ဆောင်ကြရသည်။ အခြားသူများသည် စားဖိုဆောင်၊ ထမင်းစားခန်း သို့မဟုတ် အဝတ်လျှော်ဌာနတွင် အမှုထမ်းကြသည်။ တာဝန်များတွင် သန့်ရှင်းရေး၊ လယ်ယာလုပ်ငန်း၊ ဆောက်လုပ်ရေးလုပ်ငန်း အစရှိသည်တို့လည်းပါဝင်သည်။ အချို့သည် ၎င်းဌာနများရှိ ပစ္စည်းကိရိယာများကို ကြည့်ရှုပြုစုရသည့်တာဝန် ရရှိထားကြသည်။ အခြားသူများမှာမူ ကျန်းမာရေးကိုဂရုစိုက်ပေးရသည်၊ သို့မဟုတ် ရုံးတွင်အလုပ်လုပ်ကိုင်ကြရသည်။ ဗေသလလုပ်ငန်းတာဝန်အားလုံးတွင် နှစ်သက်ဖွယ်စိန်ခေါ်ချက်များပါဝင်ကာ ယင်းတို့သည် အံ့ဖွယ်နည်းဖြင့်အကျိုးပေးသည်။ ဗေသလတွင်လုပ်ကိုင်သောအလုပ်သည် ဘုရားသခင့်နိုင်ငံတော်အကျိုးစီးပွားကို တိုးပွားစေ၍ ယေဟောဝါအားချစ်သည့်မေတ္တာကြောင့် ပြုလုပ်ကြသဖြင့် အထူးကျေနပ်မှုပေး၏။
ဗေသလမိသားစုဝင်များသည် သူတို့လုပ်ဆောင်မှု၏အကျိုးကျေးဇူးများကို ကိုယ်တိုင်တွေ့ကြုံခံစားကြရသည့် အသင်းတော်များတွင် တာဝန်ခန့်အပ်ခံရကြသည်။ အသင်းတော်အစည်းအဝေးများတက်ခြင်းနှင့် ဟောပြောခြင်းလုပ်ငန်းတွင်ပါဝင်ခြင်းကို သူတို့ပျော်ပိုက်ကြသည်။ ရလဒ်အနေနှင့် ဗေသလမိသားစုဝင်များသည် ဒေသခံအသင်းတော်များရှိ ညီအစ်ကို၊ ညီအစ်မများနှင့် ခိုင်မြဲသောနှောင်ကြိုးများ ဖွဲ့ခဲ့ကြပြီ။—မာကု ၁၀:၂၉၊ ၃၀။
ဗြိတိန်နိုင်ငံမှ ဗေသလမိသားစုဝင်တစ်ဦးဖြစ်သော ရီတာကဤသို့ဆိုသည်– “အသင်းတော်ရှိတဲ့အတွက် ကျွန်မကျေးဇူးအရမ်းတင်တယ်! စည်းဝေးတွေတက်ပြီး ခရစ်ယာန်ဓမ္မအမှုမှာ ကျွန်မပါဝင်တဲ့အခါ ချစ်ခင်ဖို့ကောင်းတဲ့ ညီအစ်ကိုညီအစ်မတွေ၊ ကလေးတွေနဲ့ သက်ကြီးရွယ်အိုတွေကို အဲဒီမှာတွေ့ရတာ ကျွန်မရဲ့ယုံကြည်ခြင်းတိုးပွားစေတယ်! ဘယ်လိုပဲဖြစ်ဖြစ် သူတို့လာကြတာပဲ။ အဲဒါက ဗေသလလုပ်ငန်းတော်မှာ ကျွန်မကိုပိုဇွဲရှိစေတယ်။”
ဗေသလတွင်နေထိုင်ခြင်းသည် အလုပ်လုပ်ကိုင်ခြင်း၊ အစည်းအဝေးများတက်ခြင်း၊ လယ်ကွင်းလုပ်ငန်း၌ပါဝင်ခြင်းနှင့် လေ့လာမှုပြုခြင်းမျှသာမဟုတ်ပါ။ ထိုမိသားစုသည် အပန်းလည်းဖြေကြပါသည်။ ရံဖန်ရံခါ ဖျော်ဖြေမှုနှင့် ဝိညာဉ်ရေးရာအကျိုးဖြစ်ထွန်းမှုအတွက် “မိသားစုညချမ်း” အစီအစဉ်များရှိပါသည်၊ ယင်းက ဗေသလတွင်အမှုဆောင်နေသူတို့၏ ပင်ကိုစွမ်းရည်များမှ ကြည်နူးမှုရရှိရန်နှင့် သူတို့၏အသက်တာများနှင့်စပ်လျဉ်း၍ အားရှိဖွယ်ရာများကိုကြားသိရန် အခွင့်အလမ်းများရရှိစေသည်။ အကျိုးဖြစ်ထွန်းပြီး တည်ဆောက်မှုဖြစ်စေသော အချင်းချင်းပေါင်းသင်းလည်ပတ်ခြင်းတို့သည်လည်း ပျော်ရွှင်ဖွယ်ဖြစ်သည်။ အပန်းဖြေဖို့အတွက်အစီအစဉ်များနှင့် ဖတ်ရှုလေ့လာရေးအတွက် စာကြည့်တိုက်များကိုလည်းထားပေးပါသည်။ ထို့ပြင် ထမင်းစားချိန်များ၌ ထမင်းစားပွဲဝိုင်းတွင် စကားစမြည်ပြောဆိုကြခြင်းလည်း ရှိသေးသည်။
အက်စ်တိုးနီးယားမှ ဗေသလမိသားစုဝင်တစ်ဦးဖြစ်သူ တောမ်ကဤသို့ဆိုသည်– “ဗေသလအနားမှာ ပင်လယ်ရှိတယ်၊ အဲဒီအနားမှာ သာယာတဲ့သစ်တောတစ်ခုရှိတယ်၊ အဲ့ဒီမှာ ကျွန်တော်တို့ဇနီးမောင်နှံ ခရီးတိုလမ်းလျှောက်ကြရတာပျော်စရာကောင်းတယ်။ တစ်ခါတလေ အသင်းတော်နဲ့ ဗေသလကမိတ်ဆွေတွေနဲ့အတူ ဂေါက်သီးရိုက်တယ်၊ ဟော်ကီနဲ့ တင်းနစ်လည်းကစားတယ်။ နောက်ပြီး ရာသီဥတုသာယာတဲ့အခါ စက်ဘီးစီးထွက်ကြတယ်။”
အရည်အချင်းပြည့်မီရန် သင်အဘယ်အရာပြုလုပ်နိုင်သနည်း
ဗေသလသည် အဓိကအားဖြင့် ယေဟောဝါ၏ မြင့်မြတ်သောလုပ်ငန်းတော်ကိုထမ်းဆောင်၍ ကမ္ဘာတစ်ဝန်းမှ ယုံကြည်သူချင်းများ၏အကျိုးအတွက် ရင့်ကျက်သောခရစ်ယာန်များအမှုဆောင်ကြသည့် နေရာတစ်ခုဖြစ်သည်။ ဗေသလမိသားစုဝင်ဖြစ်လာကြသူများသည် အရည်အချင်းအချို့ကိုပြည့်မီရကြသည်။ ဗေသလလုပ်ငန်းတော်အတွက် အရည်အချင်းပြည့်မီရန် သင်အဘယ်အရာပြုလုပ်နိုင်သနည်း။
တမန်တော်ပေါလုနှင့်အတူ အမှုတော်ဆောင်ရွက်ခဲ့သည့် တိမောသေကဲ့သို့ ဗေသလလုပ်ငန်းတော်ကို လက်ခံခဲ့ကြသူများသည် အသင်းတော်တွင် ကောင်းသောအနေအထားရှိရကြမည်။ (၁ တိမောသေ ၁:၁) တိမောသေသည် “လုတ္တရမြို့၊ ဣကောနိမြို့၌ရှိသောညီအစ်ကိုတို့တွင် အသရေရှိသောသူဖြစ်၏။” (တမန်တော် ၁၆:၂) တိမောသေသည် ငယ်ရွယ်သော်လည်း သမ္မာကျမ်းစာကိုသိကျွမ်းကာ အမှန်တရားတွင် ကောင်းစွာအခြေချထားသည်။ (၂ တိမောသေ ၃:၁၄၊ ၁၅) အလားတူစွာ ဗေသလလုပ်ငန်းတော်ကို ထမ်းဆောင်ရန် လက်ခံခံရကြသူများ၌ သမ္မာကျမ်းစာအသိပညာရှိဖို့ မျှော်လင့်သည်။
ဗေသလမိသားစုဝင်များသည် ကိုယ်ကျိုးစွန့်စိတ်ဓာတ်ရှိရန်လိုသည်။ တိမောသေ၏ ကိုယ်ကျိုးစွန့်စိတ်ဓာတ်နှင့် မိမိအကျိုးထက် ဘုရားသခင့်နိုင်ငံတော်အကျိုးစီးပွားကို ရှေ့ဦးထားရန် သူတလိုတလားရှိခဲ့သောကြောင့် သူနှင့်ပတ်သက်၍ ပေါလုကဤသို့ပြောနိုင်ခဲ့ခြင်းဖြစ်သည်– “ထိုသူသည် သင်တို့အကျိုးကိုကြည့်ရှုချင်သော စေတနာစိတ်ရှိသကဲ့သို့ စိတ်သဘောတူသောသူတစ်ယောက်မျှ ငါတို့၌မရှိ။ လူခပ်သိမ်းတို့သည် ယေရှုခရစ်၏အကျိုးကိုမရှာ၊ ကိုယ်အကျိုးကိုသာရှာကြ၏။ သို့သော်လည်း သားသည်အဘနှင့်အတူဆောင်ရွက်သကဲ့သို့ သူသည် ငါနှင့်အတူ ဧဝံဂေလိတရားအမှုကို အမှန်ဆောင်ရွက်သည်ဟု သူပြသောသက်သေကို သင်တို့သိကြ၏။”—ဖိလိပ္ပိ ၂:၂၀-၂၂။
ဗေသလလုပ်ငန်းအတွက် ဝိညာဉ်ရေးအမျိုးသား၊ အမျိုးသမီးများဖြစ်ရန်လိုသည်။ ဗေသလမိသားစုဝင်များအတွက် ပြုလုပ်ထားသည့် ကျမ်းစာလေ့လာခြင်း၊ ခရစ်ယာန်အစည်းအဝေးများနှင့် လယ်ကွင်းဓမ္မအမှုတွင် မှန်မှန်ပါဝင်ခြင်း၊ ရင့်ကျက်သောခရစ်ယာန်များနှင့်ပေါင်းသင်းခြင်း အစရှိသောအစီအစဉ်များက ဝိညာဉ်ရေးဘက်တိုးတက်စေသည်။ သို့ဖြင့် ဗေသလရှိသူများသည် ပေါလု၏ဤအကြံပေးချက်ကိုလိုက်လျှောက်ရန် အထောက်အကူရကြသည်– “ထိုသခင်၌ စိုက်ပျိုးခြင်း၊ တည်ဆောက်ခြင်းရှိလျက်၊ နည်းဥပဒေသကိုခံပြီးသည်အတိုင်း ယုံကြည်ခြင်း၌ မြဲမြံစွာစွဲလမ်းလျက်၊ ကျေးဇူးတော်ကိုချီးမွမ်းခြင်းနှင့်တကွ ယုံကြည်ခြင်းတိုးပွားပြည့်စုံလျက် [ယေရှုခရစ်] ၌ကျင်လည် [“လျှောက်လှမ်းလျက်နေ၊” ကဘ] ကြလော့။”—ကောလောသဲ ၂:၆၊ ၇။
ဗေသလရှိ လုပ်ငန်းအမျိုးအစားကြောင့် ဤလုပ်ငန်းတော်အခွင့်ထူးကိုရသူများသည် ခွန်အားရှိ၍ ကျန်းမာရေးကောင်းကြရပေမည်။ ဖော်ပြခဲ့သည့် အရည်အချင်းများကိုသင်ပြည့်မီမည်၊ အသက် ၁၉ နှစ် သို့မဟုတ် ၁၉ နှစ်ကျော်မည်၊ နှစ်ခြင်းခံပြီးသည်မှာ အနည်းဆုံးတစ်နှစ်ပြည့်ပြီးလျှင် ဗေသလလုပ်ငန်းတော်ကိုစဉ်းစားရန် သင့်အားတိုက်တွန်းပါသည်။
ကျွန်ုပ်တို့အားလုံးပါဝင်ခွင့်ရ
ခရစ်ယာန်များအနေနှင့် ကျွန်ုပ်တို့အားလုံးသည် ဘဝအသက်တာတွင် ဘုရားသခင့်နိုင်ငံတော်အကျိုးစီးပွားကိုဦးစားထားကာ ယေဟောဝါအမှုတော်ကို စိုးလ်အကြွင်းမဲ့ထမ်းဆောင်လိုကြသည်မှာအမှန်ပင်။ (မဿဲ ၆:၃၃; ကောလောသဲ ၃:၂၃) ဗေသလတွင်အမှုဆောင်နေကြသူများကိုလည်း ထိုတွင်မြင့်မြတ်သောလုပ်ငန်းတော်ကို ဆက်လက်ထမ်းဆောင်နေရန် အားပေးနိုင်ပါသည်။ အထူးသဖြင့် ဗေသလလုပ်ငန်းတော်အတွက် အရည်အချင်းပြည့်မီသည့် ငယ်ရွယ်သော အသင်ညီအစ်ကိုငယ်များသည် ထိုအခွင့်ထူးကိုလက်လှမ်းယူကြရန် အားပေးတိုက်တွန်းပါသည်။
ဗေသလလုပ်ငန်းတော်သည် ဝိညာဉ်ရေးအရ နှစ်သက်ဖွယ်ကောင်းသော ဘဝလမ်းစဉ်ဖြစ်၏၊ သင့်အတွက် အကောင်းဆုံးသောဘဝလုပ်ငန်း အမှန်တကယ်ဖြစ်နိုင်သည်။ အသက် ၂၀ မှစ၍ဗေသလတွင်အမှုဆောင်ခဲ့သူ နစ်ခ်အတွက် ထိုသို့ဖြစ်ခဲ့သည်။ ဗေသလလုပ်ငန်းတော်ကို ဆယ်နှစ်ထမ်းဆောင်ပြီးနောက် သူကဤသို့ပြောသည်– “ယေဟောဝါရဲ့မခံစားထိုက်တဲ့ကြင်နာမှုအတွက် ကိုယ်တော့်ကိုကျေးဇူးတင်ကြောင်း ကျွန်တော်မကြာမကြာဆုတောင်းတယ်။ နောက်ထပ်ဘာကိုတောင်းနိုင်ဦးမှာလဲ။ ဒီနေရာမှာ ကျွန်တော်တို့ဟာ ယေဟောဝါအမှုတော်ကို အတတ်နိုင်ဆုံးဆောင်ရွက်နေကြတဲ့ သစ္စာတည်ကြည်သူခရစ်ယာန်တွေနဲ့ ဝိုင်းရံနေတယ်။”
[စာမျက်နှာ ၂၂ ပါ လေးထောင့်ကွက်]
အကြီးအကဲများနှင့်မိဘများ အဘယ်အရာပြုလုပ်နိုင်သနည်း
အကြီးအကဲများနှင့် နယ်လှည့်ကြီးကြပ်မှူးများသည် လူငယ်များကို ဗေသလအတွက်လျှောက်ရန် အထူးသဖြင့်အားပေးသင့်သည်။ မကြာမီက ဗေသလမိသားစုဝင်လူငယ်များကို အလွတ်သဘောမေးမြန်းခဲ့ရာ ၎င်းတို့ထဲမှ ၃၄ ရာခိုင်နှုန်းသည် ဗေသလပန်းတိုင်ထားရန် ခရစ်ယာန်ကြီးကြပ်မှူးများ၏တိုက်တွန်းမှုကို အဓိကခံခဲ့ရကြောင်းပြောပြသည်။ မှန်သည်၊ သူတို့၏ ဒေသခံအသင်းတော်များက သူတို့ကိုလွမ်းကြပေမည်။ သို့သော် လုတ္တရနှင့်ဣကောနိရှိ အခြားလူငယ်များအပေါ် တိမောသေသည် ကောင်းသောသြဇာဖြစ်ခဲ့သော်လည်း ထိုတွင်ရှိ အကြီးအကဲများက သူ့အား ပေါလုနှင့်အတူအမှုဆောင်ခြင်းကို မဟန့်တားခဲ့ကြောင်း သတိရလျှင်ကောင်း၏။ တမန်တော်နှင့်အတူ တိမောသေလိုက်ပါသွားခြင်းက မိမိတို့အသင်းတော်အတွက် ဆုံးရှုံးမှုကြီးတစ်ခုဖြစ်မည်ဟု သူတို့မယူဆခဲ့ပေ။—၁ တိမောသေ ၄:၁၄။
ဤကိစ္စတွင် အထူးသဖြင့် ခရစ်ယာန်မိဘများသည် မိမိတို့သားသမီးများအပေါ် အပြုသဘောပါသြဇာသက်ရောက်မှုဖြစ်စေရန် ကြိုးစားအားထုတ်သင့်သည်။ ဖော်ပြပါမေးမြန်းမှုတွင် အမေးခံရသူတို့မှ ၄၀ ရာခိုင်နှုန်းက ဗေသလလုပ်ငန်းကို သူတို့ဝင်ရန် အဓိကအားပေးမှုမှာ မိဘများထံမှဖြစ်ကြောင်းဖော်ပြခဲ့ကြသည်။ ဗေသလ၌ နှစ်အနည်းငယ်အမှုတော်ဆောင်ခဲ့ပြီးဖြစ်သော ညီအစ်မတစ်ဦးက ဤသို့ပြောပြသည်– “ယေဟောဝါရဲ့လုပ်ငန်းတော်မှာ ကျွန်မမိဘတွေရဲ့အသက်တာက ဗေသလလုပ်ငန်းကိုဝင်ဖို့ အစွမ်းထက်တဲ့တွန်းအားတစ်ခုဖြစ်ခဲ့တယ်။ အချိန်ပြည့်ခရစ်ယာန်ဓမ္မအမှုမှာ သူတို့ရဲ့ပုံသက်သေကိုကြည့်ပြီး အဲဒါဟာ ရွေးချယ်ဖို့အတွက် အကောင်းဆုံးနဲ့ ကျေနပ်မှုအပေးနိုင်ဆုံးဘဝလမ်းစဉ်ဖြစ်မယ်ဆိုတာကို ကျွန်မအသေအချာသိခဲ့တယ်။”
[စာမျက်နှာ ၂၄ ပါ လေးထောင့်ကွက်]
ဗေသလလုပ်ငန်းကို သူတို့တန်ဖိုးထားလေးမြတ်ကြ
“ဗေသလမှာအမှုဆောင်ရတာကို ကျွန်မမြတ်နိုးတယ်။ ယေဟောဝါအမှုတော်ကို တစ်နေ့လုံးထမ်းဆောင်ခဲ့ပြီး မနက်ဖြန်၊ သန်ဘက်ခါ စတဲ့နေ့တွေမှာလည်း အဲဒီအတိုင်းလုပ်ဆောင်နိုင်မယ်ဆိုတဲ့အသိက ကျေနပ်မှုကိုဖြစ်စေတယ်။ အဲဒါက ကျွန်မကို ကြည်လင်တဲ့ကိုယ်ကိုကိုယ်သိတဲ့စိတ်ရှိစေပြီး အပြုသဘောထားတွေနဲ့ပြည့်နေစေတယ်။”
“ဗေသလဟာ စိတ်ပျံ့လွင့်မှုမရှိစေဘဲ ယေဟောဝါရဲ့အမှုတော်ကို အချိန်ပြည့်၊ ခွန်အားအပြည့်နဲ့လုပ်ကိုင်နိုင်တဲ့ နေရာတစ်ခုဖြစ်တယ်။ အဲဒါက အတွင်းပျော်ရွှင်မှုရှိစေတယ်။ ယေဟောဝါရဲ့အဖွဲ့အစည်းကိုလည်း ရှုထောင့်တစ်ဖက်ကနေ မြင်စေတယ်။ အဖွဲ့အစည်းရဲ့ဗဟိုနဲ့ ပိုမိုနီးကပ်လာစေတဲ့အတွက် စိတ်အားတက်ကြွစရာဖြစ်စေတယ်။”
“ဗေသလကိုလာတာ ကျွန်မဘဝမှာဖြစ်ပျက်ခဲ့သမျှတွေထဲက အကောင်းဆုံးအဖြစ်အပျက်ပဲ။ ဒီမှာ ပညာဆည်းပူးခြင်း ဘယ်တော့မှမရပ်တန့်သွားဘူး။ နောက်ပြီး ဒီပညာရေးက ကျွန်မရဲ့ကိုယ်ပိုင်အောင်မြင်မှုအတွက်မဟုတ်ဘဲ ယေဟောဝါအတွက်ဖြစ်တယ်။ ဒီမှာအမှုဆောင်ရတာ ဘယ်တော့မှအချည်းနှီးဖြစ်မှာမဟုတ်ဘူး။”
“ဗေသလမှာ ကျွန်မရဲ့ပင်ကိုစွမ်းရည်တွေကို ယေဟောဝါနဲ့ ညီအစ်ကိုတွေအတွက် အသုံးပြုနေရလို့ ကျေနပ်မှုနဲ့ ငြိမ်သက်မှုရှိစေတယ်။”
“ကျွန်တော့်ရဲ့အရင်အသက်မွေးလုပ်ငန်းမှာ စစ်မှန်တဲ့ကျေနပ်မှုနဲ့ပျော်ရွှင်မှု မရရှိခဲ့ဘူး။ ညီအစ်ကို၊ ညီအစ်မတွေအတွက် သူတို့နဲ့အတူ တွဲအလုပ်လုပ်ဖို့ နှစ်နဲ့ချီကျွန်တော်စိတ်ကူးယဉ်ခဲ့တယ်။ အဲဒါကြောင့် ဗေသလကို ကျွန်တော်လာတာ။ ကျွန်တော်ကြိုးစားအားထုတ်သမျှဟာ တခြားသူတွေရဲ့ ဝိညာဉ်ရေးအတွက်ဖြစ်ပြီး ယေဟောဝါကို ချီးမွမ်းရာရောက်မယ်ဆိုတာကိုသိရတာက တကယ့်ကိုကျေနပ်မှုပေးတယ်။”