‘ဘုရားသခင့်​စကားတော် တိုးပွားလျက်​ရှိ’

“မြေကြီး​သို့ အမိန့်တော်ကို​လွှတ်တော်​မူ​၏။ နှုတ် [မြွက်​စကား] တော်​သည် အလွန်​လျင်မြန်​စွာ​ပြေး​တတ်​ပါ​၏။” —ဆာလံ ၁၄၇:၁၅၊ သမ္မာ။

၁၊ ၂။ တပည့်တော်​များ​အား အဘယ်​တာဝန်​ကို ယေရှု​ပေး​တော်​မူ​ခဲ့​သနည်း၊ ယင်း​တွင် အဘယ်အရာ​ပါဝင်​ခဲ့​သနည်း။

သမ္မာကျမ်းစာ​၌ အံ့အားသင့်​ဖွယ်​အကောင်းဆုံး ပရောဖက်ပြုချက်​တစ်ခု​ကို တမန်​တော် ၁:၈ တွင် တွေ့ရှိ​ရ၏။ ယေရှု​ကောင်းကင်​သို့​မတက်ကြွမီ မိမိ၏​သစ္စာရှိ​နောက်တော်လိုက်​များ​ကို ဤသို့​မိန့်တော်မူ​ခဲ့​သည်– “သင်တို့​အပေါ်​သို့ သန့်ရှင်းသော​ဝိညာဉ်​တော်​ဆင်းသက်​သောအခါ၊ သင်တို့သည် တန်ခိုး​ကို​ခံရ​၍ . . . မြေကြီးစွန်း​တိုင်အောင် ငါ​၏​သက်သေ​ဖြစ်​ကြလိမ့်မည်။” ၎င်း​က အလွန်​ကြီးမားသော​တာဝန်​တစ်ရပ် ဖြစ်​လိမ့်​မည်​တကား!

^၂ ကမ္ဘာ​တစ်ဝန်း ဘုရားသခင့်​စကားတော်​ကို ကြွေးကြော်​ရခြင်း​သည် ထို​တာဝန်​ကို လက်ခံ​ရရှိခဲ့​သော​တပည့်တော် လက်တစ်ဆုပ်​စာ​အတွက် စိန်ခေါ်ချက်​ဖြစ်​ခဲ့​ပေမည်။ အဘယ်အရာ​ပါဝင်​ပတ်သက်​ကြောင်း သုံးသပ်ကြည့်​ပါ။ သူတို့သည် ဘုရားသခင့်​နိုင်ငံတော်​သတင်းကောင်းကို နားလည်စေ​ရန် လူ​တို့ကို​ကူညီပေး​ကြ​ရမည်​ဖြစ်သည်။ (မဿဲ ၂၄:၁၄) ယေရှု​အကြောင်း သက်သေခံ​ရာ​တွင် ကိုယ်တော်​၏​တန်ခိုး​ပါ​သော​သွန်သင်ချက်​များ​ကို အခြား​သူတို့အား​ဝေမျှပေး​ခြင်း​နှင့် ယေဟောဝါ​၏​ရည်ရွယ်တော်မူချက်တွင် ကိုယ်တော်​၏​အခန်းကဏ္ဍကို ရှင်းပြ​ပေးခြင်း​တို့ကို​လည်း ပြုလုပ်​ဖို့​လို​သည်။ ထို​ထက်​ကား အဆိုပါ​လုပ်ငန်း​တွင် လူ​တို့ကို တပည့်ဖြစ်​စေပြီး​နောက် နှစ်ခြင်း​ပေးခြင်း​တို့​ပါဝင်​၏။ ယင်းကို ကမ္ဘာ​တစ်ဝန်း​ထမ်းဆောင်​ရန် ဖြစ်​သတည်း!—မဿဲ ၂၈:၁၉၊ ၂၀။

၃။ ယေရှုသည် မိမိ၏​နောက်လိုက်​များ​အား အဘယ်အရာကို​အာမခံခဲ့​သနည်း၊ သူတို့အား ပေးအပ်​သော​လုပ်ငန်း​ကို သူတို့ မည်သို့​ဆောင်ရွက်​ခဲ့​ကြ​သနည်း။

^၃ မည်သို့​ပင်​ဖြစ်စေ ယေရှု​ပေးအပ်​သော လုပ်ငန်း​ကို သူတို့​ထမ်းဆောင်​ရာ​တွင် သန့်ရှင်းသော​ဝိညာဉ်တော်သည် သူတို့နှင့်​အတူ​ရှိ​လိမ့်​မည်​ဖြစ်​ကြောင်း မိမိ၏​နောက်တော်လိုက်​များ​ကို ကိုယ်တော်​အာမခံခဲ့​သည်။ သို့ဖြင့် အဆိုပါ​တာဝန်​၏​အရေးပါမှု​နှင့် သူတို့အား​နှုတ်ဆိတ်​သွားစေရန် ဆန့်ကျင်သူ​တို့၏ သနား​ညှာတာ​စိတ်​ကင်းမဲ့​၍ အကြမ်းဖက်​အားထုတ်မှု​များ​ကြား ယေရှု၏​အစောပိုင်း​တပည့်တော်​များသည် ကိုယ်တော်​ညွှန်ကြား​ခဲ့​သည့်​အလုပ်ကို အောင်မြင်စွာ​လုပ်ကိုင်​ခဲ့​ကြ​၏။ ယင်းသည် ငြင်း​၍​မရနိုင်​သော သမိုင်းဝင်​ဖြစ်ရပ်မှန်​တည်း။

၄။ အခြား​သူတို့အား ဟောပြော​သွန်သင်ခြင်း​တာဝန်​၌ ဘုရားသခင့်​မေတ္တာတော်​သည် မည်သည့်​နည်းဖြင့်​ထင်ရှား​သနည်း။

^၄ ကမ္ဘာချီ ဟောပြော​သွန်သင်ခြင်း​ကင်ပိန်း​သည် ကိုယ်တော်​အား မသိ​သူတို့​အပေါ် ဘုရားသခင်​ဖော်ပြ​သော မေတ္တာတော်​ပင်​တည်း။ ယင်းက သူတို့အား ယေဟောဝါ​ထံ​ချဉ်းကပ်​စေ​၍ အပြစ်လွှတ်ခြင်း​ခံရ​စေ​သည်။ (တမန်​တော် ၂၆:၁၈) ဟောပြော​၍ သွန်သင်ခြင်း​လုပ်ငန်း​တာဝန်​က​လည်း သတင်း​သယ်ဆောင်​သူတို့​အပေါ် ဘုရားသခင့်​မေတ္တာတော်ကို ထင်ဟပ်ပြ​ခဲ့​သည်၊ အကြောင်း​မှာ ထိုသို့​ပြုခြင်း​ဖြင့် ယေဟောဝါ​အား သူတို့၏​ဆည်းကပ်​ဝတ်ပြုခြင်း​ကို ဖော်ပြ​ခွင့်​ပေး​ပြီး လူသားချင်း​အပေါ် သူတို့၏​မေတ္တာကို ပြသ​စေ​သည်။ (မဿဲ ၂၂:၃၇-၃၉) တမန်​တော်​ပေါလု​သည် ခရစ်ယာန်​ဓမ္မ​အမှုကို အလွန်​တန်ဖိုး​ထားခဲ့​ရာ ယင်းကို “ဘဏ္ဍာ” တစ်ခု​အဖြစ် သူ​ရည်ညွှန်းခဲ့​၏။—၂ ကောရိန္သု ၄:၇။

၅။ (က) အစောပိုင်း​ခရစ်ယာန်​များ​၏ အား​အထား​ရ​ဆုံး​သမိုင်း​ဖြစ်ရပ်​ကို မည်သည့်​နေရာတွင် ကျွန်ုပ်​တို့​တွေ့ရှိ​ရသနည်း၊ ထို​တွင် အဘယ်​တိုးပွားမှု​ကို ဖော်ပြ​ထား​သနည်း။ (ခ) တမန်တော်ဝတ္ထု​သည် ယနေ့ ဘုရားသခင့်​ကျေးကျွန်​တို့အတွက် အဘယ်ကြောင့်​အဓိပ္ပာယ်​ပြည့်ဝ​သနည်း။

^၅ အစောပိုင်း​ခရစ်ယာန်​များ​၏ ဟောပြောခြင်း​လုပ်ငန်း​အကြောင်း အား​အထား​ရ​ဆုံး သမိုင်း​ဖြစ်ရပ်​ကို တပည့်တော်​လုကာ​ရေးသားသော မှုတ်သွင်းခံကျမ်း​စောင်​ဖြစ်သည့် တမန်​တော်​ကျမ်း​တွင်​တွေ့ရှိ​ရ၏။ ယင်းသည် အလွန်​အံ့အားသင့်​ဖွယ်​ကောင်း​သည့် အလျင်အမြန်​တိုးပွားခြင်း မှတ်တမ်း​တစ်ခု​ဖြစ်သည်။ ဘုရားသခင့်​စကားတော်​၏ အသိပညာ ဤသို့​တိုးပွားခြင်း​က “မြေကြီး​သို့​အမိန့်တော်ကို​လွှတ်တော်​မူ​၏။ နှုတ် [မြွက်​စကား] တော်​သည် အလွန်​လျင်မြန်​စွာ​ပြေး​တတ်​ပါ​၏” ဟု​ဆို​သော ဆာလံ ၁၄၇:၁၅၊ [သမ္မာ] ၌​ပါရှိ​သည့်​စကား​ကို ကျွန်ုပ်​တို့အား​သတိ​ရစေသည်။ သန့်ရှင်းသော​ဝိညာဉ်​တော်​တန်ခိုး​ကို ခံစား​ခဲ့​ကြ​ရသည့် အစောပိုင်း​ခရစ်ယာန်​များ​၏​မှတ်တမ်း​သည် ယနေ့ ကျွန်ုပ်​တို့အတွက် စိတ်​လှုပ်ရှား​စ​ရာ၊ အလွန်​အဓိပ္ပာယ်​ပြည့်ဝသော​အရာ​ဖြစ်သည်။ ယေဟောဝါသက်သေ​များသည် ပိုမို​ကျယ်ပြန့်​သော​ပမာဏ​တစ်ခု​မှ​လွဲ​၍ ထပ်တူ​ဖြစ်သည့် ဟောပြောခြင်း​နှင့် တပည့်​ဖြစ်စေ​ခြင်း​လုပ်ငန်း​၌ ပါဝင်​နေကြ​သည်။ ပထမ​ရာစု​ခရစ်ယာန်​များ ကြုံတွေ့​ခဲ့​ကြ​ရသော အလားတူ​ပြဿနာ မျိုးကို​လည်း ကျွန်ုပ်​တို့​ကြုံတွေ့ ကြ​ရသည်။ အစောပိုင်း​ခရစ်ယာန်​များ​ကို ယေဟောဝါ​ကောင်းချီး​ပေး​ပြီး ခွန်အား​ရှိစေခဲ့​ပုံ​ကို ကျွန်ုပ်​တို့​သုံးသပ်ကြည့်​ကြ​စဉ် ကိုယ်တော်​၏​ကျော​ထောက်​နောက်ခံ​ပြု​မှု​အပေါ် ယုံကြည်ခြင်း​တိုးပွား​လာ​ပေ​သည်။

တပည့်တော်​များ​အရေအတွက် တိုးများ​လာ​ခြင်း

၆။ တိုးပွားခြင်း​နှင့်​သက်ဆိုင်​သော အဘယ်​စကားစု​သည် တမန်တော်ဝတ္ထု​တွင် သုံးကြိမ်​တိုင်​ပါရှိ​သနည်း၊ ယင်းက အဘယ်အရာကို ရည်ညွှန်း​သနည်း။

^၆ တမန်​တော် ၁:၈ ၏​ပြည့်စုံချက်​ကို ဆန်းစစ်​သည့်​နည်းလမ်း​တစ်ရပ်​မှာ “ဘုရားသခင်​၏​သာသနာတော် [“ယေဟောဝါ​၏​စကားတော်၊” က​ဘ] သည်​တိုးပွား” ဟူသော ကျမ်းစာ​တွင် တမန်တော်ဝတ္ထု​တစ်ခု​တည်း​၌ အနည်းငယ်​ကွဲပြား​စွာ သုံးကြိမ်​သာ​တွေ့ရ​သည့် အသုံးအနှုန်း၊ စကားစု​တစ်ရပ်​ကို​သုံးသပ်ကြည့်​ခြင်း​ဖြစ်၏။ (တမန်​တော် ၆:၇; ၁၂:၂၄; ၁၉:၂၀) ဤ​စာပိုဒ်​များ​တွင်​ပါ​သော ‘ယေဟောဝါ​၏​စကားတော်’ သို့​မဟုတ် ‘ဘုရားသခင့်​စကားတော်’ သည် သတင်းကောင်း—ဘုရားသခင့်​အမှန်တရား​ဆိုင်ရာ စိတ်​လှုပ်ရှား​ဖွယ်​သတင်း​ဖြစ်​ပြီး ၎င်းကို လက်ခံသူ​တို့၏​ဘဝ​အသက်တာ​အား ပြောင်းလဲ​စေသည့် တန်ခိုး​ပါ​သော​သတင်း—ကို ရည်ညွှန်း​နေခြင်း​ဖြစ်၏။—ဟေဗြဲ ၄:၁၂။

၇။ တမန်​တော် ၆:၇ တွင် ဘုရားသခင့်​စကားတော်​တိုးပွားမှု​နှင့် အဘယ်အရာကို ဆက်နွှယ်​ထား​သနည်း၊ စီ.အီး. ၃၃ ပင်တေကုတ္တေ​ပွဲနေ့​တွင် အဘယ်အရာ​ဖြစ်ပျက်​ခဲ့​သနည်း။

^၇ ဘုရားသခင့်​စကားတော် တိုးပွားလျက်​ရှိ​ခြင်း​အကြောင်း ဦးဆုံး​ရည်ညွှန်းချက်​ကို တမန်​တော် ၆:၇ တွင်​တွေ့ရှိ​ရသည်။ ထို​တွင် ကျွန်ုပ်​တို့ ဤသို့​ဖတ်​ရသည်– “ဘုရားသခင်​၏​သာသနာတော်​သည် တိုးပွား​သဖြင့် ယေရုရှလင်​မြို့၌ တပည့်တော်​တို့သည် အလွန်​ပွား​များ​၍ ယဇ်ပုရောဟိတ်​အပေါင်းတို့သည် ယုံကြည်ခြင်း​တရားကို​နားထောင်​ကြ​၏။” ဤ​တွင် တိုးပွားခြင်း​ကို တပည့်တော်​အရေအတွက်​တိုးများ​လာ​ခြင်း​နှင့် ဆက်နွှယ်​ထား​သည်။ အစောပိုင်းက စီ.အီး. ၃၃ ပင်တေကုတ္တေ​ပွဲနေ့​တွင် အထက်ခန်း​မ​၌ စုရုံး​ခဲ့​ကြသောအခါ တပည့်တော် ၁၂၀ ခန့်​အပေါ် ဘုရားသခင့်​သန့်ရှင်းသော​ဝိညာဉ်​တော် သက်ရောက်​ခဲ့​၏။ ထို​အခါ တမန်​တော်​ပေတရု​သည် စိတ်​လှုပ်ရှား​စေသော ဟောပြောချက်​တစ်ခု​ကို​ပေး​ခဲ့​ပြီး နားဆင်​သူများ​ထဲ​မှ ၃,၀၀၀ ခန့်​မှာ ထို​နေ့​ချင်း​တွင် ယုံကြည်သူများ​ဖြစ်လာ​ခဲ့​ကြသည်။ လွန်ခဲ့သော​ရက်ပေါင်း ၅၀ ခန့်​က ရာဇဝတ်သား​တစ်ဦး​အဖြစ် နှက်တိုင်​တင်​ခံရ​သည့် ယေရှု၏​နာမ၌ နှစ်ခြင်း​ခံယူ​ကြ​ရန် ယေရုရှလင်​မြို့​နှင့် အနီးအနား​ရှိ ရေအိုင်​ငယ် သို့​မဟုတ် အိုင်​များ​သို့ ထောင်နှင့်ချီ​သော​သူများ သွားလာ​နေကြ​ရာ ထို​မြို့တွင် မည်မျှ​ရုတ်ရုတ်သဲသဲ​ရှိနေ​မည်​ဖြစ်​ခြင်း!—တမန်​တော် ၂:၄၁။

၈။ စီ.အီး. ၃၃ ပင်တေကုတ္တေပွဲ နောက်ပိုင်း​နှစ်များ​တွင် တပည့်တော်​များ​၏​အရေအတွက်​သည် မည်သို့​တိုးများ​လာ​သနည်း။

 ^၈ အမှန်​မှာ၊ ယင်း​ကား အစ​မျှ​သာ​ဖြစ်သည်။ ဟောပြောခြင်း​လုပ်ငန်း​ကို နှိမ်နင်း​ပစ်​ရန် ဂျူး​ဘာသာရေး​ခေါင်းဆောင်​တို့၏ အဆက်မပြတ်​ကြိုးပမ်း​အားထုတ်မှု​များ​မှာ အချည်းနှီး​ပင်။ “ကယ်တင်ခြင်း​သို့​ရောက်​သော​သူတို့ကိုလည်း နေ့စဉ်​မပြတ် သခင်​ဘုရား​သည် [တပည့်တော်​များ​ထံ] သင်း​ဝင်​စေတော်မူ” သောကြောင့် ထို​ခေါင်းဆောင်​များ စိတ်ပျက်​ခဲ့​ကြ​ရသည်။ (တမန်​တော် ၂:၄၇) မကြာမီ ‘ယုံကြည်ခြင်း​သို့​ရောက်​သူ အရေအတွက်​မှာ လူ​ငါး​ထောင်​မျှ​လောက်​ရှိ၏။’ ထို့နောက်​တွင် “သခင်​ဘုရား​၌​ယုံကြည်​သော ယောက်ျား​မိန်းမ​အပေါင်းတို့သည် သင်း​ဝင်​ကြ​၏။” (တမန်​တော် ၄:၄; ၅:၁၄) နောက်ပိုင်း​ကာလ​နှင့်​ပတ်သက်​၍ ကျွန်ုပ်​တို့ ဤသို့​ဖတ်​ရသည်– “ယုဒပြည်၊ ဂါလိလဲ​ပြည်၊ ရှမာရိ​ပြည်​အရပ်ရပ်​တို့​တွင် အသင်းတော်​တို့သည် ငြိမ်သက်​၍​တည်ဆောက်​ခြင်း​ရှိကြ​၏။ သခင်​ဘုရား​ကို​ကြောက်ရွံ့​ခြင်း​၌​လည်းကောင်း၊ သန့်ရှင်းသော​ဝိညာဉ်​တော်​၏​အဆုံးအမ​၌​လည်းကောင်း မွေ့လျော်​သော​အားဖြင့် ပွား​များ​ကြ​၏။” (တမန်​တော် ၉:၃၁) နှစ်​အတန်​ကြာသော် စီ.အီး. ၅၈ ခန့်​လောက်​တွင် ‘ယုံကြည်သူ​သောင်း​နှင့်​ချီ’ အကြောင်း​ရည်ညွှန်း​ထား​သည်။ (တမန်​တော် ၂၁:၂၀) ထို​အချိန်​တိုင်သော် ယုံကြည်သူ​တစ်ပါး​အမျိုးသားများစွာ​လည်း ရှိခဲ့​သည်။

၉။ အစောပိုင်း​ခရစ်ယာန်​များ​ကို သင်​မည်သို့​ဖော်ပြ​မည်​နည်း။

^၉ ဤသို့​အရေအတွက်​တိုးများ​လာ​ခြင်း​မှာ များသောအားဖြင့် ဘာသာ​ပြောင်း​ဝင်လာ​ခြင်း​ကြောင့်​ဖြစ်သည်။ ဤ​ဘာသာ​တရားသည် အသစ်​ဖြစ်သော်လည်း ၎င်းမှာ အင်တိုက်အားတိုက် တက်ကြွ​မှု​ရှိ၏။ တက်ကြွ​လှုပ်ရှားမှု​မရှိသော ချာ့ခ်ျ​အသင်းဝင်​များ​ဖြစ်​မည့်​အစား တပည့်တော်​များသည် ယေဟောဝါ​နှင့် ကိုယ်တော်​၏​နှုတ်မြွက်​စကားတော်​၌ မိမိတို့​ကိုယ်ကို အပြည့်အဝ​မြှုပ်နှံ​ခဲ့​ကြသည်၊ အချို့​မှာ တစ်ချိန်က ရက်စက်​စွာ​နှိပ်စက်​ညှဉ်းပန်း​ခံ​ခဲ့​ရသူ​များ​ထံ​မှ အမှန်တရား​သိရှိ​လာ​ခဲ့​၏။ (တမန်​တော် ၁၆:၂၃၊ ၂၆-၃၃) ခရစ်ယာန်​ဘာသာ​တရားကို လက်ခံ​လာ​သူတို့မှာ ယုတ္တိ​ရှိ​ရှိ​စဉ်းစား​ဆင်ခြင်​ပြီး အသိစိတ်​ရှိ​ရှိ ဆုံးဖြတ်ချက်​ချ​ခဲ့​ကြ​၍​ဖြစ်သည်။ (ရောမ ၁၂:၁) သူတို့သည် ဘုရားသခင့်​နည်းလမ်းတော်​များ​ကို​သင်ယူ​ခဲ့​ကြသည်; အမှန်တရားသည် သူတို့၏​စိတ်နှလုံး​ထဲ​တွင်​ရှိ၏။ (ဟေဗြဲ ၈:၁၀၊ ၁၁) သူတို့​ယုံကြည်​သော​အရာ​အတွက် အသက်​ပေးဖို့​အသင့်ရှိ​ကြ​သူများ​ဖြစ်သည်။—တမန်​တော် ၇:၅၁-၆၀။

၁၀။ အစောပိုင်း​ခရစ်ယာန်​များသည် အဘယ်​တာဝန်​ကို လက်ခံခဲ့​ကြ​သနည်း၊ ယနေ့ ကျွန်ုပ်​တို့သည် အဘယ်​အလားတူ တူညီမှု​ကို တွေ့ရှိ​ကြ​ရသနည်း။

^၁၀ ခရစ်ယာန်​သွန်သင်ချက်​များ​ကို သက်ဝင်​ယုံကြည်သူ​တို့သည် အခြားသူများ​အား အမှန်တရားကို​ဝေမျှပေး​ဖို့ မိမိတို့​၌​တာဝန်​ရှိကြောင်း အသိအမှတ်ပြု​ခဲ့​ကြသည်။ ယင်းက အရေအတွက် ထပ်ဆင့်​တိုးများ​လာ​စေ​ခဲ့​သည်။ ကျမ်း​ပညာရှင်​တစ်ဦး​က ဤသို့​ဆို​သည်– “ယုံကြည်ချက်ကို​တင်ပြ​ပြောဆိုခြင်း​သည် အလွန်​စိတ်​ထက်သန်​သော သို့​မဟုတ် တာဝန်​ခန့်အပ်​ခံရ​သော ဧဝံဂေလိတရား​ဟောပြောသူ​တို့​နှင့်​သာ သီးသန့်​ဆိုင်​သည်​ဟု​မယူမှတ်​ခဲ့​ကြ​ပေ။ ဧဝံဂေလိတရား​ဟောပြောခြင်းသည် ချာ့ခ်ျ​အဖွဲ့ဝင်​တိုင်း​၏ အထူး​အခွင့်အရေး​နှင့် တာဝန်​လည်း​ဖြစ်​ခဲ့​သည်။ . . . ခရစ်ယာန်​အသင်းအပင်း​တစ်ခုလုံး​က တလိုတလား​နှင့် သတင်း​ကမ်း​လှမ်းပေး​ခဲ့​ကြ​ခြင်း​ကြောင့် အသင်းအဖွဲ့​၏​လုပ်ဆောင်မှုကို အစ​ကတည်းက အကြီးအကျယ်​တွန်းအား​ပေး​ခဲ့​သည်။” သူက​ထပ်၍​ဤသို့​ရေးသားခဲ့​သည်– “ဧဝံဂေလိတရား​ဟောပြောခြင်းသည် အစောပိုင်း​ခရစ်ယာန်​များ​၏ အသက်သွေး​ကြော​ပင်​တည်း။” ယနေ့ စစ်မှန်သော​ခရစ်ယာန်​များ​အတွက်​ပါ အလားတူ​ပင်​ဖြစ်သည်။

နယ်မြေ​ကျယ်ပြန့်​တိုးပွားခြင်း

၁၁။ တမန်​တော် ၁၂:၂၄ တွင် အဘယ်​တိုးပွားမှု​မျိုးကို ဖော်ပြ​ထား​သနည်း၊ ယင်းသည် မည်သို့​ဖြစ်ပျက်​လာ​ခဲ့​သနည်း။

^၁၁ ဘုရားသခင့်​စကားတော် တိုးပွားခြင်း​နှင့်​ပတ်သက်သော ဒုတိယ​ရည်ညွှန်းချက်​ကို တမန်​တော် ၁၂:၂၄ [သမ္မာ] တွင် ဤသို့​တွေ့ရှိ​ရသည်– “ဘုရားသခင်​၏​နှုတ် [မြွက်​စကား] တော်​မူ​ကား တိုးတက်​နှံ့ပြား​လေ​၏။” ဤ​တွင် ယင်း​စကားစု​သည် နယ်မြေ​ကျယ်ပြန့်​တိုးပွားခြင်း​နှင့် ဆက်နွှယ်​လျက်​ရှိသည်။ အုပ်ချုပ်မှု​၏​ဆန့်ကျင်မှု​ကြား လုပ်ငန်းတော် ဆက်လက်​အောင်မြင်​တိုးပွား​ခဲ့​သည်။ ယေရုရှလင်​မြို့တွင် သန့်ရှင်းသော​ဝိညာဉ်​တော် သွန်းလောင်းခြင်း​ကို​ဦးဆုံး​ခံ​ခဲ့​ရပြီး ထို​နေရာ​မှ​တစ်ဆင့် သတင်းတရားသည်​အလျင်အမြန်​ပျံ့နှံ့​ခဲ့​၏။ ယေရုရှလင်​၌ နှိပ်စက်​ညှဉ်းပန်းမှု​ကြောင့် တပည့်တော်​များသည် ယုဒ​နယ်​နှင့် ရှမာရိ​နယ်​တစ်လျှောက် ကွဲလွင့်​ပျံ့နှံ့​သွားခဲ့သည်။ ရလဒ်​ကား​အဘယ်နည်း။ “အရပ်ရပ်​သို့​ကွဲပြား​သော​သူတို့သည် လှည့်လည်​၍ နှုတ် [မြွက်​စကား] တော်​တည်း​ဟူသော ဧဝံဂေလိတရား​ကို​ဟောပြောကြ​၏။” (တမန်​တော် ၈:၁၊ ၄) နှစ်ခြင်း​ခံ​ပြီး​နောက် အဲသယောပိ​ပြည်​သို့ သတင်းကောင်းကို သယ်ဆောင်​သွားခဲ့​သူ​ထံ သက်သေ​ခံရန် ဖိလိပ္ပု​ညွှန်ကြားခံ​ခဲ့​ရ၏။ (တမန်​တော် ၈:၂၆-၂၈၊ ၃၈၊ ၃၉) လုဒ္ဒ​မြို့၊ ရှာရုန်​လွင်ပြင်​နှင့် ယုပ္ပေ​မြို့​တို့​တွင် အမှန်တရားသည် လျင်မြန်​စွာ​အမြစ်တွယ်​ခဲ့​သည်။ (တမန်​တော် ၉:၃၅၊ ၄၂) နောက်ပိုင်း​တွင် တမန်​တော်​ပေါလု​သည် မိုင်​ပေါင်း​ထောင်နှင့်ချီ​၍ ရေ​လမ်း​နှင့် ကုန်း​လမ်းဖြင့် ခရီး​လှည့်လည်​ခဲ့​ပြီး မြေထဲပင်လယ်​တစ်လျှောက်​ရှိ နယ်မြေ​ဒေသ​များစွာ​တွင် အသင်းတော်များ​ကို​တည်ထောင်​ခဲ့​သည်။ တမန်​တော်​ပေတရု​သည် ဗာဗုလုန်​မြို့​သို့ သွားရောက်​ခဲ့​၏။ (၁ ပေတရု ၅:၁၃) ပင်တေကုတ္တေပွဲနေ့​၌ သန့်ရှင်းသော​ဝိညာဉ်​တော်​သွန်းလောင်း​ပြီး​နောက် နှစ်ပေါင်း ၃၀ အတွင်း သတင်းကောင်းကို ထို​အချိန်​က သိထား​ကြသော​ကမ္ဘာ​ဟု ရည်ညွှန်းခြင်း​ဖြစ်​နိုင်​သည့် “ကောင်းကင်​အောက်​၌​ရှိသမျှ​သော . . . သတ္တဝါ​တို့အား ဟောပြော” ခဲ့​ပြီး​ဖြစ်​ကြောင်း ပေါလု​က​ရေးသားခဲ့​သည်။—ကောလောသဲ ၁:၂၂၊ ၂၃။

၁၂။ ခရစ်ယာန်​ဘာသာ​တရားကို ဆန့်ကျင်သူ​တို့​က ဘုရားသခင့်​စကားတော်​၏ နယ်မြေ​ကျယ်ပြန့်​တိုးပွားခြင်း​နှင့်​ပတ်သက်​၍ မည်သို့​အသိအမှတ်ပြု​ခဲ့​ကြ​သနည်း။

^၁၂ ခရစ်ယာန်​ဘာသာ​တရားကို ဆန့်ကျင်သူ​များ​က​ပင် ရောမ​အင်ပါယာ​တစ်လျှောက်​၌ ဘုရားသခင်​၏​စကားတော်​သည် အမြစ်တွယ်​နေ ကြောင်း အသိအမှတ်ပြု​ခဲ့​ကြသည်။ ဥပမာ၊ တမန်​တော် ၁၇:၆ တွင် ဂရိ​နိုင်ငံ​မြောက်ပိုင်း၊ သက်သာလောနိတ်​မြို့​နေ ဆန့်ကျင်သူ​တို့​က ဤသို့​ဟစ်အော်​ခဲ့​ကြောင်းကို ဖော်ပြ​ထား​သည်– “လော [က] နိုင်ငံ​ကို​မှောက်လှန်​သော ဤ​သူတို့သည် ဤ​အရပ်​တိုင်အောင်​ရောက်​ကြ​ပါ​ပြီ။” ထို့​ပြင် ဒုတိယ​ရာစု​၏​အစပိုင်း​တွင် ပလင်နီ​အငယ်​သည် ခရစ်ယာန်​ဘာသာ​တရား​နှင့်​ပတ်သက်​၍ ဗိသုန်​ပြည်​မှ ဧကရာဇ်​ထ​ရာ​ဂျင်​ထံ​စာရေး​ခဲ့​သည်။ သူက ဤသို့​တင်ပြ​ခဲ့​သည်– “[ယင်းသည်] မြို့များ​၌​သာ မဟုတ်၊ အိမ်နီးချင်း​ရွာများ​နှင့် နိုင်ငံ​များ​အထိ ကူးစက်​ပျံ့နှံ့​လျက်​ရှိသည်။”

၁၃။ နယ်မြေ​ကျယ်ပြန့်​တိုးပွားမှု​က လူသား​တို့​အပေါ် ဘုရားသခင့်​မေတ္တာတော် ရောင်ပြန်ဟပ်​ခြင်း အဘယ်​နည်းဖြင့်​ဖြစ်သနည်း။

^၁၃ ဤသို့​နယ်မြေ​ကျယ်ပြန့်​တိုးပွားခြင်း​မှာ ရွေးနုတ်​ခံထိုက်သော​လူသားများ​အပေါ် ယေဟောဝါ​၏​နက်ရှိုင်း​သည့်​မေတ္တာ ထင်ရှား​ခြင်း​ဖြစ်သည်။ တစ်ပါး​အမျိုးသား​ဖြစ်သူ ကော်နေလိ​အပေါ် သန့်ရှင်းသော​ဝိညာဉ်​တော်​သက်ရောက်​ကြောင်းကို ပေတရု​သတိပြုမိ​သောအခါ သူက​ဤသို့​ပြော​ခဲ့​သည်– “ဘုရားသခင်​သည် လူ​မျက်နှာကို​မှတ်​တော်​မ​မူ။ လူအမျိုးမျိုး​တို့​တွင် ဘုရားသခင်​ကို​ကြောက်ရွံ့​၍ တရား​သဖြင့်​ကျင့်ဆောင်​သော​သူသည် အထံတော်​၌​မျက်နှာ​ရသည်ကို ငါ​သိမြင်​၏။” (တမန်​တော် ၁၀:၃၄၊ ၃၅) မှန်ပါသည်၊ သတင်းကောင်းသည် အမြဲတစေ​ပင် လူသား​အားလုံး​အတွက်​ဖြစ်​ခဲ့​ပြီး ဘုရားသခင့်​စကားတော်​၏ နယ်မြေ​ကျယ်ပြန့်​တိုးပွားမှု​က ဘုရားသခင့်​မေတ္တာတော်ကို တုံ့ပြန်​ရန် နေရာတိုင်း​တွင်ရှိသော​လူ​တို့အား အခွင့်အရေး​ရရှိစေ​သည်။ ဤ ၂၁ ရာစု​တွင် ဘုရားသခင့်​စကားတော်​သည် အမှန်တကယ်​ပင် ကမ္ဘာ​အနှံ့အပြား ရောက်​ရှိခဲ့​ပြီး​ဖြစ်သည်။

အနိုင်​ရအောင်​မြင်​စေသော​တိုးပွားမှု

၁၄။ တမန်​တော် ၁၉:၂၀ တွင် အဘယ်​တိုးပွားမှု​အကြောင်း ဖော်ပြ​ထား​သနည်း၊ ဘုရားသခင့်​စကားတော်​သည် အဘယ်အရာ​အပေါ် အနိုင်ယူ​အောင်မြင်​ခဲ့​သနည်း။

^၁၄ ဘုရားသခင့်​စကားတော် တိုးပွားခြင်း​၏​တတိယ​ရည်ညွှန်းချက်​ကို တမန်​တော် ၁၉:၂၀ တွင် ဤသို့​တွေ့ရှိ​ရသည်– “ထိုသို့​သခင်​ဘုရား​၏​သာသနာတော်​သည် တန်ခိုး​နှင့်​တိုးပွား​၍ အောင်မြင်​လေ​၏။” “အောင်မြင်” ဟု​ဘာသာ​ပြန်ဆို​ခဲ့​သော မူလ​ဂရိ​အသုံးအနှုန်း​မှာ “ခွန်အား​စိုက်ထုတ်” ဟူသော​သဘော​သက်ရောက်​သည်။ ရှေ့အခန်း​ငယ်​များ​က ဧဖက်​မြို့တွင်​ရှိသူ​များစွာမှာ ယုံကြည်သူများ​ဖြစ်လာ​ကြောင်း​နှင့် နတ်​ဝိဇ္ဇာ​အတတ်ကို​ကျင့်သုံး​ခဲ့​သူ အတော်များများ​သည် လူတိုင်း​ရှေ့တွင် သူတို့၏​စာအုပ်​များ​ကို မီးရှို့​ပစ်​ခဲ့​ကြ​ကြောင်း​ဖော်ပြ​သည်။ သို့​နှင့် ဘုရားသခင့်​စကားတော်​သည် မှားယွင်းသော​ဘာသာရေး​ယုံကြည်ချက်များ​အပေါ် အနိုင်ယူ​လွှမ်းမိုး​ခဲ့​သည်။ သတင်းကောင်း​က နှိပ်စက်​ညှဉ်းပန်းမှု​ကဲ့သို့​သော အခြား​အတားအဆီး​များ​အပေါ်လည်း အနိုင်ယူ​ခဲ့​သည်။ အဘယ်အရာကမျှ ၎င်းကို မ​ဟန့်တား​နိုင်​ချေ။ ဤ​တွင်​တစ်ဖန် ကျွန်ုပ်​တို့​အချိန်​၏ ခရစ်ယာန်​ဘာသာ​တရား​စစ်​နှင့်​သက်ဆိုင်​သည့် ထူးခြားသော​နှိုင်းယှဉ်​ချက်​ကို တွေ့ရှိ​ရ၏။

၁၅။ (က) သမ္မာကျမ်းစာ​သမိုင်း​ပညာရှင်​တစ်ဦး​က အစောပိုင်း​ခရစ်ယာန်​များ​အကြောင်း အဘယ်အရာ​ရေးသားခဲ့​သနည်း။ (ခ) တပည့်တော်​များသည် မိမိတို့၏​အောင်မြင်မှု​အတွက် မည်​သူ့ကို ဂုဏ်တင်​ချီး​မွှမ်း​ခဲ့​သနည်း။

^၁၅ တမန်​တော်​များနှင့် အစောပိုင်း​မှ​အခြား​ခရစ်ယာန်​များသည် ဘုရားသခင့်​စကားတော်​ကို ဇွဲ​ဖြင့်​ကြေညာ​ခဲ့​၏။ သူတို့နှင့်​ပတ်သက်​၍ ကျမ်းစာ​သမိုင်း​ပညာရှင်​တစ်ဦး​က ဤသို့​သတိပြုမိ​ခဲ့​သည်– “လူတို့သည် မိမိတို့၏​သခင်​အကြောင်း ပြောဆို​လို​စိတ်​ရှိသော​အခါ ထိုသို့​ပြုလုပ်​ရန် နည်းလမ်းများ​ကို မပြတ်​မလ​ပ်​ရှာဖွေ​ကြသည်။ အမှန်​မှာ သူတို့၏​နည်းလမ်းများ​ထက် ကျွန်ုပ်​တို့ကို သာ၍​စိတ်စွဲ​မှတ်​စေ​သည်​ကား ထို​အမျိုးသား၊ အမျိုးသမီးများ​၏ စိတ်​လှုံ့ဆော်မှု​ပင်​ဖြစ်သည်။” သို့​တိုင် ထို​အစောပိုင်း​ခရစ်ယာန်​များသည် မိမိတို့၏​ခရစ်ယာန်​ဓမ္မ​အမှု အောင်မြင်​ရခြင်း​မှာ သူတို့၏​ကြိုးစား​အားထုတ်မှု​ကြောင့်​သာ မဟုတ်​ကြောင်း အသိအမှတ်ပြု​ခဲ့​ကြ​၏။ သူတို့၏​လုပ်ငန်း​ကို​ဆောင်ရွက်ရန် ဘုရားသခင်​ပေး​သည့်​တာဝန်ရ​ရှိ​ထားပြီး ယင်းကို ပြီးမြောက်​စေရန် ဘုရားသခင့်​ထောက်မမှုကို ရရှိ​ကြသည်။ ဝိညာဉ်​ရေးရာ တိုးတက်​ကြီးပွားမှု​သည် ဘုရားသခင့်​ထံ​တော်​မှ​ဖြစ်သည်။ တမန်​တော်​ပေါလု​က ကောရိန္သု​အသင်းတော်​သို့​ရေး​သော သူ၏​စာ​တွင် ၎င်းကို အသိအမှတ်ပြု​ခဲ့​သည်။ သူက​ဤသို့​ရေးသားခဲ့​သည်– “ငါသည် စိုက်​ပျိုး​သော​သူ​ဖြစ်၏။ အာပေါလု​သည် ရေလောင်း​သော​သူ​ဖြစ်၏။ အပင်​ကို​ကြီးပွား​စေသော​သူ​ကား ဘုရားသခင်​ပေ​တည်း။ ငါ​တို့သည် ဘုရားသခင့်​ထံ​၌ အလုပ်လုပ်​သော​သူ​ချင်း​ဖြစ်​ကြ​၏။”—၁ ကောရိန္သု ၃:၆၊ ၉။

 သန့်ရှင်းသော​ဝိညာဉ်​တော် တန်ခိုး​သက်ရောက်

၁၆။ သန့်ရှင်းသော​ဝိညာဉ်တော်သည် တပည့်တော်​များ​ကို ရဲစွမ်းသတ္တိ​ရှိ​ရှိ​ဟောပြောရန် တန်ခိုး​ပေး​ခဲ့​ကြောင်း အဘယ်အရာက​ဖော်ပြ​သနည်း။

^၁၆ ဘုရားသခင့်​စကားတော် တိုးပွားမှု​တွင် သန့်ရှင်းသော​ဝိညာဉ်တော်သည် အခန်းကဏ္ဍ​တစ်ရပ်​၌​ပါဝင်​လိမ့်​ဟု မိမိ၏​တပည့်တော်​များ​ကို ယေရှု​အာမခံခဲ့​ကြောင်း​နှင့် ထို​သန့်ရှင်းသော​ဝိညာဉ်တော်သည် တပည့်တော်​များ​၏​ဟောပြောခြင်း​လုပ်ငန်း​၌ သူတို့ကို​ခွန်အား​ပေး​မည်​ဖြစ်​ကြောင်း သတိရပါ။ (တမန်​တော် ၁:၈) မည်သို့​ဖြစ်လာ​သနည်း။ ပင်တေကုတ္တေ​ပွဲနေ့​တွင် တပည့်တော်​များ​အပေါ် သန့်ရှင်းသော​ဝိညာဉ်​တော်​သွန်းလောင်းခဲ့​ပြီး​နောက် များ​မကြာမီ ပေတရု​နှင့် ယောဟန်တို့သည် ထို​နိုင်ငံ​ရှိ အမြင့်ဆုံး​သော​တရားရုံး၊ ယေရှု​အား ကွပ်မျက်ခြင်း​အတွက် တာဝန်ခံ​များ​ဖြစ်သည့် တရားသူကြီး​များနှင့်​ဖွဲ့​ထားသော ဂျူး​ဆဲန်ဟီဒရင်​ရှေ့မှောက်​သို့ ဆင့်ခေါ်​ခံ​ခဲ့​ကြ​ရ၏။ အလွန်​ခန့်ညား​၍ ရန်လို​နေသော​လွှတ်တော်​ရှေ့တွင် တမန်​တော်​များသည် ကြောက်ရွံ့​တုန်လှုပ်​ကြ​မည်​လော။ လုံးဝ​မကြောက်​ခဲ့​ပါ! ရဲစွမ်းသတ္တိ​ဖြင့် ပြောဆို​ရန် ပေတရု​နှင့် ယောဟန်​ကို သန့်ရှင်းသော​ဝိညာဉ်​တော်​က တန်ခိုး​ပေး​ခဲ့​သောကြောင့် သူတို့အား ဆန့်ကျင်သူ​တို့သည် အံ့အားသင့်​ခဲ့​ကြ​ကာ “ထို​သူ​နှစ်ယောက်​တို့သည် အထက်​က ယေရှု​နှင့်အတူ​ရှိသည်​ကို​သတိရ” လာ​ခဲ့​ကြသည်။ (တမန်​တော် ၄:၈၊ ၁၃) သန့်ရှင်းသော​ဝိညာဉ်တော်သည် သတေဖန်​ကိုလည်း ဂျူး​ဆဲန်ဟီဒရင်​ရှေ့တွင် ရဲရင့်စွာ​သက်သေ​ခံရန် လှုံ့ဆော်ပေး​ခဲ့​သည်။ (တမန်​တော် ၆:၁၂; ၇:၅၅၊ ၅၆) အစောပိုင်း​တွင် သန့်ရှင်းသော​ဝိညာဉ်တော်သည် ရဲစွမ်းသတ္တိ​ရှိ​ရှိ​ဖြင့် ဟောပြောရန် တပည့်တော်​များ​ကို​လှုံ့ဆော်ပေး​ခဲ့​သည်။ လုကာ​က ဤသို့​မှတ်တမ်းတင်​သည်– “ထိုသို့​ဆုတောင်း . . . ပြီး​မှ၊ စုဝေး​သော​အရပ်​သည် တုန်လှုပ်​၍၊ ထို​သူအပေါင်း​တို့သည် သန့်ရှင်းသော​ဝိညာဉ်​တော်​နှင့်​ပြည့်​သဖြင့်၊ ဘုရားသခင်​၏​နှုတ် [မြွက်] တရားတော်​ကို ရဲရင့်စွာ​ဟောပြောကြ​၏။”—တမန်​တော် ၄:၃၁။

၁၇။ သန့်ရှင်းသော​ဝိညာဉ်တော်သည် တပည့်တော်​များ​၏​ခရစ်ယာန်​ဓမ္မ​အမှု​တွင် အခြား​မည်သည့်​နည်းများဖြင့် သူတို့ကို​ထောက်ပံ့​ကူညီပေး​ခဲ့​သနည်း။

^၁၇ ယေဟောဝါ​နှင့် ရှင်ပြန်ထမြောက်​ခဲ့​သော​ယေရှု​ခရစ်​တို့သည် တန်ခိုး​ပါ​သည့်​သန့်ရှင်းသော​ဝိညာဉ်​တော်​အားဖြင့် ဟောပြောခြင်း​လုပ်ငန်း​ကို ညွှန်ကြား​ခဲ့​သည်။ (ယောဟန် ၁၄:၂၈; ၁၅:၂၆) ကော်နေလိ​နှင့်အတူ သူ၏​ဆွေမျိုး​များနှင့် ရင်းနှီးသော​မိတ်ဆွေများ​အပေါ် သန့်ရှင်းသော​ဝိညာဉ်​တော်​သက်ရောက်​ခဲ့​သောအခါ အရေဖျားလှီး​ခြင်း​မခံ​သည့် တစ်ပါး​အမျိုးသား​တို့သည် ယေရှု​ခရစ်​၏​နာမတော်​၌ နှစ်ခြင်း​ခံယူ​ရန် အရည်အချင်း​ပြည့်မီ​ကြောင်း တမန်​တော်​ပေတရု အသိအမှတ်ပြု​ခဲ့​၏။ (တမန်​တော် ၁၀:၂၄၊ ၄၄-၄၈) နောက်ပိုင်း​တွင် ဝိညာဉ်​တော်​က ဗာနဗ​နှင့် ရှောလု (တမန်​တော်​ပေါလု) ကို ခရစ်ယာန်​သာသနာပြု​လှုပ်ရှားမှု​အတွက် တာဝန်​ခန့်အပ်​ပေးခြင်း၊ သူတို့​သွား​သင့်​သော​နေရာ​နှင့် မသွား​သင့်​သော​နေရာကို ညွှန်ကြား​ပေး​ရာ​တွင် အဓိက​အခန်းကဏ္ဍ​တစ်ရပ်​၌ ပါဝင်​ဆောင်ရွက်​ခဲ့​သည်။ (တမန်​တော် ၁၃:၂၊ ၄; ၁၆:၆၊ ၇) ၎င်း​က ယေရုရှလင်​မြို့ရှိ တမန်​တော်​များနှင့် အသက်ကြီးသူ​များ​ကို ဆုံးဖြတ်ချက်​ချ​ကြ​ရာ​တွင် ညွှန်ကြား​ခဲ့​သည်။ (တမန်​တော် ၁၅:၂၃၊ ၂၈၊ ၂၉) သန့်ရှင်းသော​ဝိညာဉ်တော်သည် ခရစ်ယာန်​အသင်းတော်တွင် ကြီးကြပ်မှူး​များ ခန့်အပ်​ခြင်း​ကိုလည်း ညွှန်ကြား​ပေး​သည်။—တမန်​တော် ၂၀:၂၈။

၁၈။ အစောပိုင်း​ခရစ်ယာန်​များသည် မေတ္တာကို မည်သို့​ဖော်ပြ​ခဲ့​ကြ​သနည်း။

^၁၈ ထို​အပြင် ခရစ်ယာန်​များ​၌​လည်း သန့်ရှင်းသော​ဝိညာဉ်​တော်​ရှိကြောင်း ထင်ရှား​ခဲ့​သည်၊ သူတို့တွင် မေတ္တာ​ကဲ့သို့​သော ဘုရားသခင့်​ရေးရာ​အရည်အသွေးများ​ကို ပေါ်ထွက်​စေ​၏။ (ဂလာတိ ၅:၂၂၊ ၂၃) မေတ္တာက အချင်းချင်း​မျှဝေ​ကြ​ရန် တပည့်တော်​များ​ကို​လှုံ့ဆော်ပေး​ခဲ့​သည်။ ဥပမာ၊ စီ.အီး. ၃၃ ပင်တေကုတ္တေပွဲနေ့​ပြီး​နောက် ယေရုရှလင်​မြို့ရှိ တပည့်တော်​များ​၏​ကာယရေး​လိုအပ်ရာ​များ​ကို ထောက်ပံ့​ပေး​ရန် ရန်ပုံငွေ​တစ်ရပ်​ကို စီစဉ်​ခဲ့​ကြ​၏။ သမ္မာကျမ်းစာ​မှတ်တမ်းက ဤသို့​ဆို​သည်– “ထို​သူတို့တွင် ဆင်းရဲသော​သူ​တစ်ယောက်မျှ​မရှိ။ အကြောင်း​မူ​ကား၊ အိမ်၊ မြေကွက်​ကို​ပိုင်​သော​သူ​ရှိသမျှ​တို့သည် ရောင်းပြီး​လျှင်၊ ရသော​အဖိုးကို​ယူဆောင်​ခဲ့​၍၊ တမန်​တော်​တို့၏​ခြေရင်း​၌​ထား​ကြ​သဖြင့်၊ လူများ​ဆင်းရဲ​သည်​အတိုင်း အသီးအသီး​တို့အား ဝေငှ​ပေးကမ်း​ကြ​၏။” (တမန်​တော် ၄:၃၄၊ ၃၅) ဤ​မေတ္တာကို ယုံကြည်သူချင်း​တို့အား​သာ​ပြ​သည်မဟုတ်​ဘဲ အခြား​သူတို့အား​လည်း သတင်းကောင်း​ပေးဝေ​ခြင်း​နှင့် အခြား​ကြင်နာ​မှု​လုပ်ရပ်များ​ပြုလုပ်ခြင်း​ဖြင့် ဖော်ပြ​ခဲ့​ကြ​၏။ (တမန်​တော် ၂၈:၈၊ ၉) ကိုယ်ကျိုး​စွန့်​မေတ္တာက ယေရှု၏​နောက်တော်လိုက်​များ​ဖြစ်​ကြောင်း ထင်ရှားစေ​လိမ့်​မည်​ဟု ကိုယ်တော်​မိန့်တော်မူ​ခဲ့​သည်။ (ယောဟန် ၁၃:၃၄၊ ၃၅) အရေးကြီး​သည့်​အရည်အသွေး​ဖြစ်သော  မေတ္တာက ဘုရားသခင်​ထံ လူ​တို့ကို​ဆွဲဆောင်​ပြီး ပထမ​ရာစု​၌ တိုးပွား​လာ​စေ​သကဲ့သို့ ယနေ့လည်း ထို့​အတူ​ဖြစ်သည်​မှာ အမှန်ပင်။—မဿဲ ၅:၁၄၊ ၁၆။

၁၉။ (က) ပထမ​ရာစု​တွင် ယေဟောဝါ​၏​စကားတော်​သည် အဘယ်နည်း​လမ်း​သုံးရပ်​ဖြင့် တိုးပွား​ခဲ့​သနည်း။ (ခ) နောက်​ဆောင်းပါး​တွင် အဘယ်အရာကို ကျွန်ုပ်​တို့ ဆန်းစစ်​ကြည့်​ကြ​မည်​နည်း။

^၁၉ “သန့်ရှင်းသော​ဝိညာဉ်​တော်” ဟူသော​အသုံးအနှုန်း​ကို တမန်တော်ဝတ္ထု​တွင် ၄၁ ကြိမ်​တွေ့ရှိ​ရသည်။ ထင်ရှား​နေသည်​ကား ပထမ​ရာစု​၌ ခရစ်ယာန်​တိုးပွားမှု အစစ်အမှန်​ဖြစ်ပေါ်​လာ​ခြင်း​သည် သန့်ရှင်းသော​ဝိညာဉ်​တော်​၏​တန်ခိုးတော်​နှင့် ညွှန်ကြားမှု​ကြောင့်​ဖြစ်သည်။ တပည့်တော်​များ​၏​အရေအတွက် တိုးများ​လာ​ကာ ဘုရားသခင့်​စကားတော်​သည် နေရာအနှံ့​ကျယ်ပြန့်​သွားပြီး ထို​ဒေသ​ရှိ ဘာသာရေး​များနှင့် အတွေးအခေါ်​များ​အပေါ် အနိုင်ယူ​လွှမ်းမိုး​ခဲ့​သည်။ ဤ​ပထမ​ရာစု​ရှိ တိုးပွားမှု​သည် ယနေ့ ယေဟောဝါသက်သေ​များ​၏​လုပ်ငန်း​နှင့် တူညီ​ကြောင်း တွေ့ရှိ​ရသည်။ နောက်​ဆောင်းပါး​တွင် မျက်မှောက်ခေတ်​၌ ဘုရားသခင့်​နှုတ်မြွက်​စကားတော် ထပ်တူ​နည်းဖြင့် အထင်အရှား​တိုးပွား​နေခြင်း​ကို ကျွန်ုပ်​တို့​ဆန်းစစ်​ကြည့်​ကြ​မည်။

သင်​မှတ်မိ​သလော

• အစောပိုင်း​တပည့်တော်​များသည် အရေအတွက်​အားဖြင့် မည်သို့​တိုးပွား​ခဲ့​သနည်း။

• ဘုရားသခင့်​စကားတော်​သည် မည်သည့်​နည်းဖြင့် ပျံ့နှံ့​သွား​သနည်း။

• ပထမ​ရာစု​တွင် ဘုရားသခင့်​စကားတော်​သည် မည်သို့​လွှမ်းမိုး​ခဲ့​သနည်း။

• ဘုရားသခင့်​စကားတော်​၏ တိုးပွားခြင်း​၌ သန့်ရှင်းသော​ဝိညာဉ်တော်သည် အဘယ်​အခန်းကဏ္ဍ​မှ ပါဝင်​ခဲ့​သနည်း။

[လေ့လာ​ရန်​မေးခွန်းများ]

[စာမျက်နှာ ၁၂ ပါ ရုပ်ပုံ]

ဖိလိပ္ပုသည် အဲသယောပိ​ပြည်သား​အား ဟောပြောခဲ့​ရာ နေရာအနှံ့ သတင်းကောင်း​ပျံ့နှံ့​စေ​ခဲ့

[စာမျက်နှာ ၁၃ ပါ ရုပ်ပုံ]

သန့်ရှင်းသော​ဝိညာဉ်တော်သည် ယေရုရှလင်​မြို့ရှိ တမန်​တော်​များနှင့် အသက်ကြီးသူ​များ​ကို ညွှန်ကြား​ခဲ့

[Picture Credit Line on page 10]

အပေါ်​ညာဘက်​ထောင့်– Reproduction of the City of Jerusalem at the time of the Second Temple - located on the grounds of the Holyland Hotel, Jerusalem