တစ်ဦးကိုတစ်ဦး ဂရုစိုက်သော ကမ္ဘာချီ အသင်းအပင်း
တစ်ဦးကိုတစ်ဦး ဂရုစိုက်သော ကမ္ဘာချီ အသင်းအပင်း
လူများကို မျက်စိတစ်ဆုံးမြင်နေရသည်။ အများစုမှာ သက်ကြီးရွယ်အိုများဖြစ်ကြပြီး အချို့မှာမူ လမ်းပင်မလျှောက်နိုင်သည်အထိ မသန်မစွမ်းဖြစ်နေကြသည်။ ကိုယ်ဝန်ဆောင်အမျိုးသမီးများနှင့် ကလေးငယ်ရှိ ငယ်ရွယ်သောမောင်နှံစုံများလည်းပါသည်။ ဤသူအားလုံးသည် အိုးအိမ်မဲ့သူ—အမျိုးသား၊ အမျိုးသမီးနှင့် ကလေး—များဖြစ်ကြပြီး ပြည်တွင်းစစ်၊ သဘာဝဘေးဒဏ်များ သို့မဟုတ် အခြားအခြေအနေများကြောင့် အိမ်နီးချင်းနိုင်ငံတစ်ခုခုသို့ ထွက်ပြေးခိုလှုံနေရကြသူများဖြစ်သည်။ အချို့သူတို့မှာ မိမိတို့၏နေအိမ်များမှ အကြိမ်ကြိမ် ထွက်ပြေးခဲ့ရကြပြီ။ ဤသူတို့သည် ပြည်တွင်းဆူပူအုံကြွမှု သို့မဟုတ် သဘာဝဘေးဒဏ်၏အရိပ်အခြည်စတွေ့သည်နှင့် အိမ်အသုံးအဆောင်ပစ္စည်းအနည်းငယ်စုသိမ်း၍ ကလေးများကိုဆွဲပြီး ပိုလုံခြုံသောအရပ်သို့ ဦးတည်သွားကြရသည်။ ထို့နောက် အခြေအနေပုံမှန်ပြန်ဖြစ်လာသောအခါ ဤသို့ခိုလှုံသူများစွာသည် ကိုယ့်အိမ်ကိုယ်ပြန်ဆောက်ကာ ဘဝပြန်စကြသည်။
ဗဟိုအာဖရိကသမ္မတနိုင်ငံသည် နှစ်များတစ်လျှောက် နိုင်ငံအသီးသီးမှ လာရောက်ခိုလှုံသူများကို လက်ခံခဲ့သည်။ မကြာမီက ယေဟောဝါသက်သေများစွာအပါအဝင် ထောင်နှင့်ချီသောသူများသည် စစ်ဒဏ်ခံနေရသည့်ကွန်ဂိုဒီမိုကရက်တစ်သမ္မတနိုင်ငံမှ လုံခြုံမှုရှိရာ ဗဟိုအာဖရိကသမ္မတနိုင်ငံသို့ထွက်ပြေးတိမ်းရှောင်ခဲ့ကြရသည်။
ညီအစ်ကိုများ ကယ်ဆယ်ကြ
ဗဟိုအာဖရိကသမ္မတနိုင်ငံမှ သက်သေခံများသည် လူ့အကျိုးဆောင်ရန် စီစဉ်ရခြင်းကို အခွင့်ထူးအဖြစ် ယူမှတ်ခဲ့ကြသည်။ ရောက်ရှိလာကြသော ခရစ်ယာန်ညီအစ်ကိုများအတွက် နေရာထိုင်ခင်းများ စီစဉ်ပေးခဲ့ကြသည်။ အစအဦး၌ ကိုယ်ပိုင်အိမ်များတွင် အခန်းများဖွဲ့ပေးခဲ့သော်လည်း ခိုလှုံသူအရေအတွက်တိုးများလာသည်နှင့်အမျှ ပို၍အခိုင်အမာဖြစ်သော အစီအစဉ်များပြုလုပ်ပေးရန်လိုကြောင်း ထင်ရှားလာခဲ့သည်။ သို့ဖြစ်၍ ဘုရားသခင့်နိုင်ငံတော်ခန်းမအချို့ကို ယာယီညအိပ်ဆောင်များအဖြစ်စီစဉ်ကြသည်။ ဒေသခံသက်သေခံများသည် ထိုတွင် နေထိုင်ကြမည့်သူများ သက်သောင့်သက်သာရှိစေရန် မီးများထပ်၍တပ်ဆင်ပြီး ရေပိုက်များ ဆက်သွယ်ပေးကာ ကြမ်းပြင်များကို အင်္ဂတေကိုင်ပေးခဲ့ကြလေသည်။ ထိုဘုံအိပ်ဆောင်များကို ဆောက်လုပ်ကြရာတွင် ဒေသခံညီအစ်ကိုများနှင့်အတူ လာရောက်ခိုလှုံသူများကလည်း လက်တွဲညီညီလုပ်ကိုင်ခဲ့ကြသည်။ ဤသူတို့သည် အသက်ပေးဝိညာဉ်အစာကိုရရှိစေနိုင်ရန် လင်္ဂါလာစကားဖြင့် ခရစ်ယာန်အစည်းအဝေးအားလုံးကို စီစဉ်ပြုလုပ်ပေးခဲ့သည်။ ဒေသခံသက်သေခံများနှင့် ဧည့်သည်များ၏ ရင်းနှီးသောပူးပေါင်းဆောင်ရွက်မှုက အပြည်ပြည်ဆိုင်ရာညီအစ်ကိုများအသင်းအပင်း အမှန်တကယ်ရှိကြောင်း ထင်ရှားစေသည်။
ခိုလှုံသူမိသားစုများသည် အမြဲတစေ အတူတကွရောက်ရှိလာကြသည်မဟုတ်ပေ။ တစ်ခါတစ်ရံ တကွဲတပြားဖြစ်ခဲ့ကြသည့် မိသားစုများသည် ခရီးလမ်းဆုံး၌သာ ပြန်တွေ့ဆုံပေါင်းစည်းခဲ့ကြရသည်။ ဘေးမသီရန်မခ ရောက်ရှိလာကြသူများ၏နာမည်စာရင်းကို ဘုရားသခင့်နိုင်ငံတော်ခန်းမတစ်ခုစီ၌ စာရင်းယူထားသည်။ ပျောက်နေသေးသူများကို ပြန်ရှာတွေ့ရန် အစီအစဉ်များပြုလုပ်ကြပါသည်။ ယေဟောဝါသက်သေများ၏လုပ်ငန်းကို ထိုနိုင်ငံတွင် ဦး
စီးညွှန်ကြားသည့်ဌာနခွဲရုံးက လမ်းခရီး၌ရှိနေဆဲသက်သေခံများကို ကူညီပေးရန်နှင့် ပျောက်နေသောသူများကိုရှာဖွေရန်အတွက် ကားသုံးစီးကို နေ့စဉ်လွှတ်ပေးသည်။ “ကင်းမျှော်စင်—ယေဟောဝါသက်သေများ” ဟူသည့် စာတမ်းတို့ဖြင့် ထိုကားများကို ခွဲခြားသိမြင်နိုင်သည်။မိဘများနှင့်တကွဲတပြားဖြစ်ခဲ့ကြသော ကလေးငယ်ခုနစ်ယောက်အုပ်စုသည် ယေဟောဝါသက်သေများပိုင် ကားတစ်စီးကိုတွေ့လိုက်သောအခါ မည်မျှပျော်ရွှင်ခဲ့ကြမည်ကို မြင်ယောင်ကြည့်ပါ။ သူတို့သည် ကားရှိရာသို့ ချက်ချင်းပြေးသွားကြပြီး မိမိတို့သည် ယေဟောဝါသက်သေများဖြစ်ကြောင်း ဖော်ပြခဲ့သည်။ ညီအစ်ကိုများကလည်း သူတို့ကိုကားပေါ်တင်ပြီး ဘုရားသခင့်နိုင်ငံတော်ခန်းမတစ်ခုသို့ ခေါ်ဆောင်လာခဲ့ကြရာ နောက်ဆုံးတွင် သူတို့၏မိသားစုများနှင့် ပြန်လည်တွေ့ဆုံကြလေသည်။
တစ်ကြိမ်တစ်ခါသာမဟုတ်ဘဲ ကြိမ်ဖန်များစွာဖြစ်ပေါ်နေသော ယင်းအခြေအနေများကို ဤစိတ်ရင်းမှန်ခရစ်ယာန်များ ရင်ဆိုင်ဖြေရှင်းနိုင်ကြရန် အဘယ်အရာက ကူညီပေးသနည်း။ ကျွန်ုပ်တို့သည် နောက်ဆုံးသောကာလတွင်အသက်ရှင်နေရကြကြောင်း သမ္မာကျမ်းစာတွင် ကြိုတင်ဟောထားသည့်စကားကို သူတို့အပြည့်အဝလက်ခံယုံကြည်ကြသည်။—၂ တိမောသေ ၃:၁-၅; ဗျာဒိတ် ၆:၃-၈။
ထို့ကြောင့် ယေဟောဝါဘုရားသခင်သည် စစ်၊ မုန်းတီးမှု၊ အကြမ်းဖက်မှုနှင့် ပဋိပက္ခများကို မကြာမီအဆုံးတိုင်စေမည့်အကြောင်း သူတို့သိရှိကြသည်။ ထိုအခါ အိုးအိမ်မဲ့ရခြင်းပြဿနာသည် အတိတ်တွင်ကျန်ရစ်ပေလိမ့်မည်။ ဤအတောအတွင်း ၁ ကောရိန္သု ၁၂:၁၄-၂၆ ၌တမန်တော်ပေါလု၏ သတိပေးချက်နှင့်အညီ ယေဟောဝါသက်သေများသည် တစ်ဦးကိုတစ်ဦး ကြိုးစားဂရုစိုက်ကြည့်ရှုကြသည်။ သူတို့သည် မြစ်များ၊ နယ်နိမိတ်များ၊ ဘာသာစကားများနှင့် ကွာဝေးမှုများကြောင့် ကွဲကွာနေကြရသော်လည်း တစ်ဦးကိုတစ်ဦး စိတ်ဝင်စားကြသောကြောင့် တစ်စုံတစ်ယောက် အကူအညီလိုသောအခါ ချက်ချင်းကူညီပေးကြသည်။—ယာကုပ် ၁:၂၂-၂၇။
[စာမျက်နှာ ၃၀ ပါ မြေပုံ]
(ကားချက်အပြည့်အစုံကို စာစောင်တွင်ကြည့်ပါ)
အာဖရိက
ဗဟိုအာဖရိက သမ္မတနိုင်ငံ
ကွန်ဂိုဒီမိုကရက်တစ် သမ္မတနိုင်ငံ
[Credit Line]
Mountain High Maps® Copyright © 1997 Digital Wisdom, Inc.
[စာမျက်နှာ ၃၀ ပါ ရုပ်ပုံ]
ဧည့်လက်ခံဌာနများအဖြစ် အသုံးပြုခဲ့ကြသော ဘုရားသခင့်နိုင်ငံတော်ခန်းမသုံးခု
[စာမျက်နှာ ၃၁ ပါ ရုပ်ပုံ]
မီးဖိုချောင်အသုံးအဆောင်များကို ချက်ချင်းတပ်ဆင်ပေးခဲ့
[စာမျက်နှာ ၃၁ ပါ ရုပ်ပုံ]
ရောက်ရှိလာခဲ့ကြသူ များသည်ထက်များလာ
[စာမျက်နှာ ၃၁ ပါ ရုပ်ပုံ]
ဖွားခါစသာဖြစ်ကာ အိုးအိမ်မဲ့ဘဝရောက်ခဲ့ရကြ