သင်မည်သို့ပင် ပြုစုပျိုးထောင်ခံခဲ့ရပါစေ အောင်မြင်နိုင်
သင်မည်သို့ပင် ပြုစုပျိုးထောင်ခံခဲ့ရပါစေ အောင်မြင်နိုင်
နီကိုလပ်စ်သည် ငယ်စဉ်ကတည်းက ကလန်ကဆန်လုပ်လိုသောဉာဉ်ရှိခဲ့သည်။ * အတန်ကြာလေသော် သူ၏အာခံလိုစိတ်က သူ့အား မူးယစ်ဆေးဝါးစွဲကာ အလွန်အကျွံအရက်သောက်စေသည်။ “ကျွန်တော့်အဖေက အရက်သမား၊ ကျွန်တော့်ညီမနဲ့ကျွန်တော့်ကို အရမ်းနှိပ်စက်ခဲ့တယ်” ဟူ၍ နီကိုလပ်စ်က ရှင်းပြသည်။
မလီန်ဒါ၏မိဘများသည် သူတို့ရပ်ကွက်ထဲ၌ ဂုဏ်အသရေရှိ ချာ့ခ်ျတက်သူများဖြစ်ပုံရှိသည်။ သို့သော် သူတို့သည် ဂိုဏ်းတစ်ခုတွင်လည်း အလွန်ပါဝင်ပတ်သက်နေကြ၏။ ယခု အသက် ၃၀ ကျော်ရှိသော မလီန်ဒါက “သူတို့ဂိုဏ်းရဲ့ဓလေ့ထုံးစံအချို့က ကျွန်မအပေါ်မတော်မတရားဖြစ်စေတဲ့အတွက် ကလေးတစ်ယောက်အနေနဲ့ ကျွန်မရဲ့စိတ်ကို ကြေမွပျက်စီးစေခဲ့တယ်” ဟူ၍မြည်တမ်းလေသည်။ “ကျွန်မစိတ်ထဲသွင်းထားပေးတဲ့ မျှော်လင့်ချက်ကင်းမဲ့ပြီး တန်ဖိုးမရှိတဲ့စိတ်ဟာ ကျွန်မမှတ်မိနိုင်တဲ့ကာလပတ်လုံး ကျွန်မကိုအဆက်မပြတ်ထိုးနှက်နေတယ်” ဟူ၍သူဆက်ဆိုသည်။
လူများစွာ၏ကလေးဘဝသည် အကြမ်းဖက်မှု၊ မတော်မတရားပြုခံရမှု၊ မိဘဝတ္တရားပျက်ကွက်မှုနှင့် အခြားအကျိုးနည်းစေသောအရာများကြောင့် ပျက်စီးနေသည်ကို မည်သူငြင်းဆိုနိုင်မည်နည်း။ စိတ်ဆင်းရဲခဲ့ရသော ကလေးဘဝ၏ ဒဏ်ချက်များသည် လွန်စွာနက်ရှိုင်းနိုင်သည်။ သို့ရာတွင် ဤသို့သောဒဏ်ချက်များသည် ဘုရားသခင့်စကားတော်အမှန်တရားကို သက်ဝင်ယုံကြည်ဖို့နှင့် ပျော်ရွှင်မှုအတော်အတန်ရှာတွေ့နိုင်ခြင်းကို လုံးဝဆုံးရှုံးသွားစေရမည်လော။ နီကိုလပ်စ်နှင့် မလီန်ဒါတို့ ကြီးပြင်းလာပုံသည် မည်သို့ပင်ဖြစ်ပါစေ သမာဓိစောင့်သိသူများအဖြစ် အောင်မြင်ခဲ့ကြသလော။ ဦးစွာ ယုဒဘုရင်ယောရှိ၏ပုံသက်သေကို သုံးသပ်ကြည့်ပါ။
ကျမ်းဆိုင်ရာပုံသက်သေတစ်ခု
ယောရှိသည် ဘီ.စီ.အီး. သတ္တမရာစု (ဘီ.စီ.အီး. ၆၅၉-၆၂၉) တွင်ယုဒပြည်ကို ၃၁ နှစ်ထိတိုင် အုပ်ချုပ်ခဲ့၏။ ဖခင်လုပ်ကြံခံရပြီးနောက် ယောရှိနန်းတက်ချိန်၌ ယုဒပြည်၏အခြေအနေမှာ လွန်စွာဆိုးဝါးလျက်ရှိသည်။ ယုဒနှင့်ယေရုရှလင်မြို့တွင် ဗာလဝတ်ပြုသူများနှင့် အမ္မုန်တို့၏ အဓိကဘုရားမာလခံကို တိုင်တည်ကိုးကွယ်သူများ ပြည့်နှက်နေသည်။ ယုဒမင်းတို့သည် “ဟောက်သောခြင်္သေ့” များဖြစ်ကြ၍ တရားသူကြီးတို့သည် “ည၌လှည့်လည်တတ်သော တောခွေး” များဖြစ်ကြသည်ဟု ထိုခေတ်က ဘုရားသခင်၏ပရောဖက်ဇေဖနိဟောခဲ့သည်။ သို့ဖြင့် တိုင်းပြည်တွင် အကြမ်းဖက်မှုနှင့်လှည့်ဖြားမှုတို့ နှံ့ပြားလေသည်။ လူအများက “ထာဝရဘုရားသည် ကျေးဇူးကိုလည်းမပြု၊ အပြစ်ကိုလည်းမပေး” ဟုအောက်မေ့ကြသည်။—ဇေဖနိ ၁:၃–၂:၃; ၃:၁-၅။
ယောရှိသည် မည်သို့သောဘုရင်ဖြစ်ကြောင်း ထင်ရှားလာသနည်း။ ကျမ်းစာရာဇဝင်ရေးသူ ဧဇရက ဤသို့ရေးသည်– “[ယောရှိ] သည်ထာဝရဘုရားရှေ့တော်၌ တရားသောအမှုကိုပြု၍ လက်ယာဘက်၊ လက်ဝဲဘက်သို့မလွှဲ အဘဒါဝိဒ်လိုက်သောလမ်းသို့ လိုက်လေ၏။” (၂ ရာဇဝင်ချုပ် ၃၄:၁၊ ၂) ယောရှိသည် ဘုရားသခင့်ရှေ့မှောက်၌ မှန်ကန်ရာကို အောင်မြင်စွာပြုလုပ်ခဲ့ကြောင်းထင်ရှား၏။ သို့တိုင် သူ၏မိသားစုနောက်ခံကား အဘယ်နည်း။
ဆုံးမသွန်သင်ခံရသောကလေးဘဝလော၊ မတော်မလျော်သောကလေးဘဝလော
ဘီ.စီ.အီး. ၆၆၇ တွင်ယောရှိမွေးဖွားချိန်၌ ဖခင်ဖြစ်သူအာမုန်အသက်မှာ ၁၆ နှစ်သာရှိပြီး အဖိုးဖြစ်သူမနာရှေသည် ယုဒပြည်ကို အုပ်ချုပ်လျက်ရှိ၏။ မနာရှေသည် ယုဒပြည်ကိုအုပ်ချုပ်ခဲ့သမျှ အဆိုးဆုံးဘုရင်များတွင် တစ်ဦးပါဝင်သည်။ သူသည် ဗာလယဇ်ပလ္လင်များကို တည်ဆောက်ကာ “ထာဝရဘုရား၏အမျက်တော်ကို နှိုးဆော်ခြင်းငှာ ရှေ့တော်၌များစွာသောဒုစရိုက် [မကောင်းမှု] ကိုပြု၏။” သူသည် မိမိ၏သားများကိုမီးဖြင့်ပူဇော်ခြင်း၊ မှော်အတတ်ပညာလိုက်စားခြင်း၊ အနာဂတ်ဟောခြင်း၊ နတ်ဝိဇ္ဇာအတတ်ကိုအားပေးခြင်းနှင့် အပြစ်မရှိသူများစွာကို သတ်ပစ်ခြင်းတို့ပြုလုပ်ခဲ့သည်။ မနာရှေသည် အာရှရပင်ရုပ်ကိုထုလုပ်ကာ ယေဟောဝါ၏အိမ်တော်သို့လည်း ဆောင်သွင်းခဲ့သည်။ သူသည် “ဣသရေလအမျိုးသားတို့ရှေ့မှာ ထာဝရဘုရားဖျက်ဆီးတော်မူသော လူမျိုးတို့ပြုသည်ထက် သာ၍ဆိုးသောအမှုကိုပြုစေ” ရန်ယုဒပြည်သူနှင့် ယေရုရှလင်မြို့သားတို့ကို လမ်းလွဲစေခဲ့၏။—၂ ရာဇဝင်ချုပ် ၃၃:၁-၉။
မနာရှေသည် အလွန်ဆိုးသွမ်းသောကြောင့် ယေဟောဝါသည် အာရှုရိဘုရင်၏မြို့တော်တစ်ခုဖြစ်သည့် ဗာဗုလုန်သို့ သူ့ကိုခြေချင်းခတ်ခေါ်သွားစေခဲ့သည်။ မနာရှေသည် သုံ့ပန်းဘဝတွင် နောင်တရသောအခါ ကိုယ်ကိုနှိမ့်ချ၍ ခွင့်လွှတ်ပါရန် ယေဟောဝါအား အသနားခံတောင်းပန်လေသည်။ ထိုအခါ ဘုရားသခင်၏မျက်နှာသာရရှိရန် သူ၏အသနားခံချက်ကို ကိုယ်တော်နားညောင်းတော်မူပြီး ယေရုရှလင်မင်းရိုက်ရာကို ပြန်လည်ရရှိစေတော်မူသည်။ ထိုနောက် မနာရှေသည် အတော်အတန်အောင်မြင်စွာဖြင့် ပြုပြင်ပြောင်းလဲမှုများပြုခဲ့သည်။—၂ ရာဇဝင်ချုပ် ၃၃:၁၀-၁၇။
မနာရှေ၏ဆိုးသွမ်းမှုနှင့် နောက်ပိုင်း၌ သူ၏နောင်တတရားက သူ၏သားအာမုန်အပေါ် အဘယ်အကျိုးသက်ရောက်ခဲ့သနည်း။ သူသည် အလွန်ဆိုးသွမ်းခဲ့၏။ မနာရှေသည် နောင်တယူပြီး မိမိကိုယ်တိုင်ပြုလုပ်သည့် ညစ်ညမ်းမှုများကင်းစင်စေရန် ကြိုးစားအားထုတ်ပြုလုပ်သောအခါ အာမုန်သည် တုံ့ပြန်လုပ်ဆောင်ခြင်းမရှိခဲ့ချေ။ အာမုန်သည် အသက် ၂၂ နှစ်တွင် နန်းတက်သောအခါ “ခမည်းတော်မနာရှေပြုသကဲ့သို့ ထာဝရဘုရားရှေ့တော်၌ ဒုစရိုက် [မကောင်းမှု] ကိုပြု၏။” ယေဟောဝါရှေ့မှောက်တွင် မိမိကိုယ်ကိုနှိမ့်ချမည့်အစား ‘အာမုန်သည် အပြစ်များစွာပြုလုပ်သည်။’ (၂ ရာဇဝင်ချုပ် ၃၃:၂၁-၂၃) အာမုန် ယုဒဘုရင်ဖြစ်လာသောအချိန်၌ ယောရှိသည် ခြောက်နှစ်သာရှိသေး၏။ ယောရှိ၏ငယ်စဉ်ဘဝသည် အလွန်ဆိုးဝါးလိုက်မည်ဖြစ်ခြင်း!
အာမုန်၏ကျွန်တို့သည် သင်းဖွဲ့၍ သူ့ကိုလုပ်ကြံလိုက်သောအခါ နှစ်နှစ်အကြာတွင် သူ၏ဆိုးညစ်သောနန်းသက် ကုန်ဆုံးလေသည်။ သို့သော် ပြည်သူပြည်သားတို့သည် အာမုန်ကို သင်းဖွဲ့လုပ်ကြံသူများကိုကွပ်မျက်၍ သားတော်ယောရှိကို နန်းတင်လိုက်သည်။—၂ ရာဇဝင်ချုပ် ၃၃:၂၄၊ ၂၅။
ယောရှိ၏ငယ်စဉ်တောင်ကျေးဘဝသည် မကောင်းခဲ့သော်လည်း ယေဟောဝါ၏ရှေ့မှောက်တွင် သူကောင်းမှုပြုခဲ့၏။ သူ၏နန်းသက်သည် အလွန်အောင်မြင်သောကြောင့် ကျမ်းစာကဤသို့ဖော်ပြသည်– “မောရှေတရား၌ပါသမျှကိုကျင့်သဖြင့် စိတ်နှလုံးအကြွင်းမဲ့ အစွမ်းသတ္တိရှိသမျှနှင့် ထာဝရဘုရားအထံတော်သို့ပြောင်းလဲ၍ ယောရှိမင်းနှင့်တူသော ရှင်ဘုရင်တစ်ယောက်မျှမဖြစ်စဖူး။ နောင်ကာလ၌လည်းမပေါ်မရှိ။”—၄ ဓမ္မရာဇဝင် ၂၃:၁၉-၂၅။
ကလေးဘဝတွင် ဆိုးဆိုးဝါးဝါးခံစားခဲ့ရဖွယ်ရှိသူများအတွက် ယောရှိ၏ပုံသက်သေသည် အားရှိစရာပါတကား! သူ၏ပုံသက်သေမှ ကျွန်ုပ်တို့ အဘယ်အရာသင်ယူနိုင်သနည်း။ ဖြောင့်မတ်သောလမ်းစဉ်ကိုရွေးချယ်၍ ဆက်လက်လျှောက်လှမ်းနေရန် ယောရှိကို အဘယ်အရာက ထောက်ကူပေးခဲ့သနည်း။
ယေဟောဝါအားသိကျွမ်းရန် ကြိုးစားအားထုတ်ခြင်း
ယောရှိ၏ငယ်စဉ်ဘဝအတွင်း သူ့ကိုလွှမ်းမိုးခဲ့သော အပြုသဘောပါသြဇာမှာ အဖိုးဖြစ်သူ မနာရှေ၏နောင်တတရားပင်ဖြစ်သည်။ မနာရှေသည် သူ၏လမ်းစဉ်ကိုပြုပြင်ချိန်၌ သူတို့နှစ်ဦးမည်မျှထိတွေ့မှုရှိခဲ့ကြောင်း၊ ယောရှိအသက်မည်မျှရှိကြောင်း ကျမ်းစာကမဖော်ပြထားချေ။ ဂျူးမိသားစုများသည် ရင်းနှီးမှုရှိကြသောကြောင့် မနာရှေသည် စစ်မှန်သောဘုရားသခင်ယေဟောဝါနှင့် ကိုယ်တော်၏စကားတော်ကို ရိုသေလေးစားရန် မိမိမြေး၏နှလုံးထဲသို့ ရိုက်သွင်းပေးခြင်းဖြင့် ပတ်ဝန်းကျင်၏ယိုယွင်းသောသြဇာမှ ကြိုးစားကာကွယ်ပေးခဲ့ပေမည်။ ယောရှိ၏နှလုံးတွင် မနာရှေစိုက်ပျိုးနိုင်ခဲ့သော အမှန်တရားမျိုးစေ့များအပါအဝင် အခြားအပြုသဘောပါသြဇာများက နောက်ဆုံးတွင် သီးပွင့်လာလေသည်။ ယုဒပလ္လင်ပေါ်နန်းသက်ရှစ်နှစ်မြောက်တွင် ၁၅ နှစ်သားယောရှိသည် ယေဟောဝါနှင့် ကိုယ်တော်၏အလိုတော်ကိုသိကျွမ်းရန် ကြိုးစားခဲ့ပြီး လုပ်ဆောင်ခဲ့၏။—၂ ရာဇဝင်ချုပ် ၃၄:၁-၃။
လူအချို့၏ငယ်စဉ်ဘဝက ဝိညာဉ်ရေးအဆက်အသွယ်မှာ ရပ်ဝေးဆွေမျိုး၊ အသိမိတ်ဆွေ သို့မဟုတ် အိမ်နီးချင်းတစ်ဦးသာဖြစ်သည်။ သို့သော် ပြုစုပျိုးထောင်ပေးလျှင် စိုက်ပျိုးထားသောမျိုးစေ့များသည် နောက်ပိုင်းတွင် ကောင်းစွာသီးပွင့်နိုင်သည်။ အစပိုင်းတွင်ဖော်ပြထားသည့် မလီန်ဒါ၌ သူ၏အိမ်သို့ ကင်းမျှော်စင် နှင့် နိုးလော့!ကို မှန်မှန်ယူလာပေးသော အဘိုးအရွယ်အိမ်နီးချင်းတစ်ဦးရှိခဲ့သည်။ သူ့ကို တမ်းတသတိရကာ မလီန်ဒါက ဤသို့ဆိုသည်– “ကျွန်မရဲ့အိမ်နီးချင်းက အခါကြီးရက်ကြီးတွေမကျင်းပတာဟာ ကျွန်မအတွက်စိတ်စွဲမှတ်စရာပဲ။ ကျွန်မမိဘတွေရဲ့ကိုးကွယ်နည်းမှာ ဘာသာရေးထုံးတမ်းစဉ်လာတွေဖြစ်တဲ့ ဟယ်လိုဝီန်းနဲ့ အခြားအခါကြီးရက်ကြီးအချို့ကို ကျင်းပတာကြောင့် အဲဒါတွေဟာ ကျွန်မအတွက်အရေးပါခဲ့တယ်။” နောက်ဆယ်နှစ်အကြာတွင် မိတ်ဆွေတစ်ဦးက မလီန်ဒါကို ယေဟောဝါသက်သေများ၏ ဘုရားသခင့်နိုင်ငံတော်ခန်းမ၌ ခရစ်ယာန်အစည်းအဝေးတစ်ခုကို တက်ရောက်ရန် ဖိတ်ခေါ်သောအခါ သူသည် အဆိုပါအိမ်နီးချင်းကို သတိရကာ ထိုဖိတ်ခေါ်ချက်ကို တလိုတလားလက်ခံလိုက်သည်။ ယင်းက အမှန်တရားကို သူရှာဖွေရာတွင် ထောက်ကူပေးခဲ့၏။
ဘုရားသခင်ရှေ့ နှိမ့်ချမှုရှိပါ
ယောရှိ၏နန်းသက်အတွင်း ယုဒပြည်တွင် ဘာသာရေးပြုပြင်ပြောင်းလဲမှုများစွာ ပြုလုပ်ခဲ့သည်။ ယောရှိသည် ရုပ်ပုံတိုက်ဖျက်ရေးနှင့် ယုဒပြည်သန့်ရှင်းစင်ကြယ်ရေးတို့ကို ခြောက်နှစ်ကြာ ရဲဝံ့စွာလုပ်ဆောင်ပြီးနောက် ယေဟောဝါ၏အိမ်တော်ကို ပြန်လည်မွမ်းမံခဲ့လေသည်။ ထိုလုပ်ငန်းကိုဆောင်ရွက်နေစဉ် တကယ်အဖိုးတန်သောအရာတစ်ခုကို ယဇ်ပုရောဟိတ်မင်းဟိလခိတွေ့ရှိခဲ့သည်! ‘ယေဟောဝါ၏ပညတ္တိကျမ်း’ မူရင်းကို သူတွေ့ရှိခဲ့၏။ ဟိလခိပေးအပ်သော ဤစိတ်လှုပ်ရှားဖွယ်တွေ့ရှိချက်ကိုရသူ စာရေးတော်ရှာဖန်သည် ဖြစ်ပျက်သမျှကို ရှင်ဘုရင်အား ကြားလျှောက်လေသည်။ ထိုသို့သောဖြစ်မြောက်အောင်မြင်မှုများကြောင့် ၂၅ နှစ်အရွယ်ယောရှိသည် မိမိကိုယ်ကိုအထင်ကြီးခဲ့သလော။—၂ ရာဇဝင်ချုပ် ၃၄:၃-၁၈။
“ရှင်ဘုရင်သည် တရားစကားကိုကြားလျှင် မိမိအဝတ်ကိုဆုတ်” လေသည်ဟု ဧဇရကရေးသားသည်။ ဘိုးဘေးများသည် ဘုရားသခင်၏ပညတ်တော်ရှိရှိသမျှကို မလိုက်နာခဲ့သည့်အတွက် အလွန်ဝမ်းနည်းကြောင်း ဖော်ပြချက်ဖြစ်သည်။ အမှန်ပင် စိတ်နှိမ့်ချမှုအမှတ်လက္ခဏာတစ်ခုပါတကား! ရှင်ဘုရင်သည် ပရောဖက်မဟုလဒမှတစ်ဆင့် ယေဟောဝါအားမေးမြန်းရန် ကိုယ်စားလှယ်ငါးဦးကို ချက်ချင်းခန့်အပ်လိုက်သည်။ ကိုယ်စားလှယ်အဖွဲ့က ဤသတင်းကို ပြန်ပို့ပေးပုံရှိသည်– ‘ယေဟောဝါ၏ပညတ်တော်ကို မလိုက်လျှောက်သောကြောင့် ဘေးရောက်မည်။ သို့သော် အသင်ရှင်ဘုရင်ယောရှိသည် နှိမ့်ချမှုရှိသောကြောင့် ငြိမ်ဝပ်စွာသင်္ချိုင်းသို့ရောက်ရမည်။ ကျရောက်သောဘေးကို မတွေ့မမြင်ရချေ။’ (၂ ရာဇဝင်ချုပ် ၃၄:၁၉-၂၈) ယောရှိ၏စိတ်ထားကို ယေဟောဝါနှစ်သက်တော်မူခဲ့သည်။
ကျွန်ုပ်တို့၏နောက်ခံမည်သို့ပင်ဖြစ်ပါစေ၊ ကျွန်ုပ်တို့သည်လည်း စစ်မှန်သောဘုရားသခင်ယေဟောဝါရှေ့တွင် မိမိကိုယ်ကိုနှိမ့်ချပြီး ကိုယ်တော်နှင့် ကိုယ်တော်၏စကားတော် သမ္မာကျမ်းစာအပေါ် လေးစားသည့်သဘော ပြသနိုင်ပါသည်။ အစတွင်ဖော်ပြထားသော နီကိုလပ်စ်သည် ထိုသို့ပင်ပြုလုပ်ခဲ့၏။ “ကျွန်တော့်ဘဝဟာ ဆေးစွဲပြီး အရက်အလွန်အကျွံသောက်တာကြောင့် ပြဿနာပေါင်းသောင်းခြောက်ထောင်တက်နေပေမဲ့ ကျမ်းစာကို ကျွန်တော်စိတ်ဝင်စားပြီး ဘဝမှာ ရည်ရွယ်ချက်ရှိချင်လာတယ်။ နောက်ဆုံး ယေဟောဝါသက်သေတွေနဲ့ အဆက်အသွယ်ရပြီး ကျွန်တော့်ဘဝပုံစံကိုပြောင်းလဲလိုက်ရုံမက အမှန်တရားကိုသက်ဝင်ယုံကြည်လာတယ်” ဟူ၍ သူပြောပြ၏။ မှန်ပါသည်၊ ကျွန်ုပ်တို့၏ဝန်းကျင်အခြေအနေ မည်သို့ပင်ဖြစ်ပါစေ ဘုရားသခင်နှင့် ကိုယ်တော်၏စကားတော်ကို လေးမြတ်သည့်သဘောထားရှိနိုင်ပါသည်။
ယေဟောဝါ၏အစီအစဉ်မှ အကျိုးခံစားပါလေ
ယောရှိသည် ယေဟောဝါ၏ပရောဖက်များကိုလည်း အလွန်လေးစားသည်။ ပရောဖက်မဟုလဒကိုသာ သူမေးမြန်းသည်မက သူ့ခေတ်သူ့အခါမှ အခြားပရောဖက်များ၏သြဇာလည်း အလွန်လွှမ်းမိုးခံခဲ့သည်။ ပမာဆိုရသော်၊ ယုဒပြည်တွင်ပြုနေကြသော ရုပ်ပုံ၊ ကိုးကွယ်မှုအပေါ်၊ ရှုတ်ချကြွေးကြော်မှု၌ ယေရမိနှင့် ဇေဖနိပါ အလုပ်များခဲ့ကြသည်။ ယောရှိသည် မှားယွင်းသောဝတ်ပြုရေးကို တိုက်ဖျက်ရာတွင် သူတို့၏သတင်းတရားကိုသတိပြုခြင်းကား သူ့ကို တကယ်အားရှိစေခဲ့မည်ဖြစ်ခြင်း!—ယေရမိ ၁:၁၊ ၂; ၃:၆-၁၀; ဇေဖနိ ၁:၁-၆။
“အရှင်” ယေရှုခရစ်သည် အချိန်တန်ဝိညာဉ်အစာကျွေးမွေးရန် ကိုယ်တော်၏ဘိသိက်ခံနောက်လိုက်များ—‘သစ္စာနှင့်သတိပညာရှိသောကျွန်’—အဖွဲ့ကို ခန့်အပ်ထားသည်။ (မဿဲ ၂၄:၄၅-၄၇) ကျမ်းစာအခြေပြုစာပေများနှင့် အသင်းတော်အစီအစဉ်အားဖြင့် ကျေးကျွန်အတန်းအစားသည် သမ္မာကျမ်းစာသွန်သင်ချက်ကိုလိုက်နာခြင်း၏ အကျိုးကျေးဇူးများကို သိမြင်စေပြီး ကျွန်ုပ်တို့၏နေ့စဉ်ဘဝအသက်တာတွင် ယင်းကိုကျင့်သုံးခြင်းနှင့်ပတ်သက်၍ လက်တွေ့အကြံပြုချက်များကို ပေးသည်။ အမြစ်စွဲနေသော မကောင်းသည့်စိတ်ထားဟူသမျှကို အနိုင်ယူဖို့ အကူအညီရရန် ယေဟောဝါ၏အစီအစဉ်ကို အသုံးပြုခြင်းသည် တကယ်လျောက်ပတ်လိုက်လေခြင်း! နီကိုလပ်စ်သည် ငယ်စဉ်ကတည်းက အခွင့်အာဏာကို ခါးခါးသီးသီးမုန်းတီးခဲ့သည်။ ဘုရားသခင်၏စကားတော် အမှန်တရားကို သိရှိပြီးနောက်၌ပင် ဤအားနည်းချက်ကြောင့် ယေဟောဝါ၏အမှုတော်ကို အပြည့်အဝထမ်းဆောင်ခြင်းမှ တွန့်ဆုတ်နေခဲ့သည်။ ၎င်းစိတ်ထားကိုပြောင်းလဲခြင်းသည် သူ့အတွက် မလွယ်ကူချေ။ သို့တိုင် အချိန်တန်သော် သူအောင်မြင်ခဲ့၏။ မည်သို့အားဖြင့်နည်း။ “စာနာတတ်တဲ့အကြီးအကဲနှစ်ယောက်ရဲ့အကူအညီကြောင့် ကျွန်တော့်အခက်အခဲကိုဝန်ခံပြီး သူတို့ရဲ့မေတ္တာပါကျမ်းစာအကြံပြုချက်တွေကို စကျင့်သုံးခဲ့တယ်” ဟူ၍ နီကိုလပ်စ်က ရှင်းပြသည်။ “တစ်ခါတလေ မခံချင်တဲ့စိတ်ပေါ်လာတတ်ပေမဲ့ အခုဆိုရင် ကျွန်တော့်ရဲ့ပုန်ကန်တတ်တဲ့သဘောကို ထိန်းချုပ်နိုင်ပါပြီ” ဟုဆက်၍ရှင်းပြသည်။
မလီန်ဒါသည်လည်း သူ၏ဘဝအသက်တာတွင် အရေးကြီးဆုံးဖြတ်ချက်များချသောအခါ အကြီးအကဲများ၏အကြံပြုချက်ကို တောင်းဆိုသည်။ သူ၏ကလေးဘဝတွင်စဖြစ်ပေါ်ခဲ့သည့် မျှော်လင့်ချက်ကင်းမဲ့ခြင်းနှင့် တန်ဖိုးမရှိဟူသောခံစားချက်များကို ကိုင်တွယ်ဖြေရှင်းရာတွင် အဖိုးမဖြတ်နိုင်အောင် အထူးသဖြင့် အကူအညီဖြစ်ခဲ့သည်ကား ကင်းမျှော်စင် နှင့် နိုးလော့! ဆောင်းပါးအမျိုးမျိုးဖြစ်သည်။ သူကဤသို့ဆို၏– “တစ်ခါတလေ ကျွန်မနှလုံးကိုထိမိခဲ့တာ ဆောင်းပါးတစ်ပုဒ်ထဲက စာပိုဒ်တစ်ပိုဒ် ဒါမှမဟုတ် စာကြောင်းတစ်ကြောင်း—တစ်ပိုင်းတစ်စ—လေးသာဖြစ်တယ်။ လွန်ခဲ့တဲ့ကိုးနှစ်လောက်က အဲဒီဆောင်းပါးတွေကို အလွယ်တကူပြန်ကြည့်နိုင်ဖို့အတွက် ထုတ်သွင်းလုပ်နိုင်တဲ့မှတ်စုစာအုပ်ဖိုင်တစ်အုပ်ထဲမှာ ကျွန်မစပြီးစုဆောင်းခဲ့တယ်။” ယနေ့ သူ၏မှတ်စုသုံးအုပ်တွင် ဆောင်းပါးပေါင်း ၄၀၀ ခန့်ရှိနေပြီ!
လူတို့သည် ဆိုးသွမ်းသောမိသားစုဘဝ၏သားကောင်များအဖြစ် အစဉ်အမြဲဖြစ်နေစရာမလိုချေ။ သူတို့သည် ယေဟောဝါ၏အကူအညီဖြင့် ဝိညာဉ်ရေးဘက်အောင်မြင်နိုင်ကြပါသည်။ ကောင်းစွာဆုံးမသွန်သင်ခံခဲ့ရခြင်းက လူတစ်ဦး၏သမာဓိကို အာမ,မခံနိုင်သကဲ့သို့ ဆိုးဝါးသောကလေးဘဝသည် ဘုရားသခင်ကိုကြောက်ရွံ့လာသူအဖြစ်မှ မတားဆီးချေ။
ဗိမာန်တော်ကို ပြန်လည်မွမ်းမံနေစဉ် ပညတ္တိကျမ်းကိုတွေ့ရှိခဲ့ပြီးနောက် ယောရှိသည် ‘စိတ်နှလုံးအကြွင်းမဲ့ ယေဟောဝါနောက်တော်သို့လိုက်၍ နာခံပါမည်အကြောင်း ယေဟောဝါမျက်မှောက်တော်တွင် ပဋိညာဉ်ပြုလေသည်။’ (၂ ရာဇဝင်ချုပ် ၃၄:၃၁) ထို့ပြင် သူ၏အသက်ကုန်ဆုံးသည်အထိ အဆိုပါသန္နိဋ္ဌာန်မှ မယိမ်းယိုင်ခဲ့ချေ။ မလီန်ဒါနှင့်နီကိုလပ်စ်တို့လည်း သမာဓိရှိသူများအဖြစ် အောင်မြင်ကြရန် ယေဟောဝါဘုရားသခင်အပေါ် ဆက်၍သစ္စာစောင့်သိဖို့ သန္နိဋ္ဌာန်ချထားကြပြီ။ အသင်လည်း ဘုရားသခင်နှင့်နီးကပ်စွာရှိပြီး ကိုယ်တော့်အမှုတော်ကို သစ္စာရှိရှိထမ်းဆောင်ရန် သန္နိဋ္ဌာန်ချနိုင်ပါစေ။ ယေဟောဝါ၏ဤကတိတော်ကြောင့် သင်သည် အောင်မြင်မည်ဟု ယုံကြည်စိတ်ချနိုင်သည်– “မစိုးရိမ်နှင့်။ ငါသည် သင့်ဘက်မှာရှိ၏။ မကြောက်နှင့်။ သင်၏ဘုရားသခင် ငါသည် သင့်ကိုခိုင်ခံ့စေမည်။ သင့်ကိုစောင့်မမည်။ ငါ့သစ္စာလက်ယာလက်ဖြင့် ထောက်ပင့်မည်။”—ဟေရှာယ ၄၁:၁၀၊ ၁၃။
[အောက်ခြေမှတ်ချက်]
^ အပိုဒ်၊ 2 အမည်အချို့ ပြောင်းထားသည်။
[စာမျက်နှာ ၂၆ ပါ ရုပ်ပုံ]
ကလေးဘဝအခြေအနေသည် ဆိုးဝါးလင့်ကစား ယောရှိသည် ယေဟောဝါအား သိကျွမ်းရန် ကြိုးစားအားထုတ်ခဲ့ရာ သူ၏အသက်တာဘဝ အောင်မြင်ခဲ့
[စာမျက်နှာ ၂၈ ပါ ရုပ်ပုံ]
အမြစ်စွဲနေသော ပင်ကိုဉာဉ်ကို အနိုင်ယူနိုင်ရန် အကြီးအကဲများက သင့်ကိုကူညီပေးနိုင်
[စာမျက်နှာ ၂၈ ပါ ရုပ်ပုံ]
“ကင်းမျှော်စင်” နှင့် “နိုးလော့!” တို့က သင့်ကို သမာဓိစောင့်သိရန် ကူညီပေးနိုင်