အပျက်သဘောထားများကို ကိုင်တွယ်ဖြေရှင်းပုံ
အပျက်သဘောထားများကို ကိုင်တွယ်ဖြေရှင်းပုံ
အာသပ်က ဤသို့ညည်းညူခဲ့သည်– “အကယ်စင်စစ် ငါ့နှလုံးကိုငါသန့်ရှင်းစေသော်လည်း အကျိုးမရှိ။ အပြစ်ကင်းခြင်းနှင့် ငါ့လက်ကိုဆေးကြောသော်လည်း အကျိုးမရှိ။ နေ့တိုင်းနှောင့်ယှက်ခြင်းနှင့် နံနက်တိုင်းဆုံးမခြင်းကို ငါခံရ၏။”—ဆာလံ ၇၃:၁၃၊ ၁၄။
ဗာရုတ်က ဤသို့ညည်းတွားခဲ့သည်– “ငါသည် အမင်္ဂလာရှိ [ဝမ်းနည်းစရာအကြောင်းဖြစ်] ၏။ ထာဝရဘုရားသည် ငါဝမ်းနည်းစရာအကြောင်း တစ်ပါးအပေါ်မှာတစ်ပါးကို ထပ်ဆင့်တော်မူသောကြောင့် ငါသည် သက်သာမရ။”—ယေရမိ ၄၅:၂။
နောမိက ဤသို့မြည်တမ်းခဲ့သည်– “[အဆုံးမဲ့]တန်ခိုးရှင်သည် ငါ့အား အလွန်ခါးသောအရာကိုပေးတော်မူပြီ။ ငါသည် ကြွယ်ဝပြည့်စုံလျက်ထွက်သွား၏။ ယခုမူကား ဆင်းရဲလျက်တစ်ကိုယ်တည်းရှိမှ ထာဝရဘုရားသည် ငါ့ကိုပို့ပြန်တော်မူပြီ။ ထာဝရဘုရားသည် ငါ့ကိုနှိမ့်ချ၍ [အဆုံးမဲ့]တန်ခိုးရှင်သည် ငါ့ကိုဆင်းရဲစေတော်မူသည်ဖြစ်၍ နောမိအမည်ဖြင့် အဘယ်ကြောင့်ငါ့ကိုခေါ်ကြသနည်း။”—ရုသ ၁:၂၀၊ ၂၁။
တစ်ခါတစ်ရံ စိတ်ဓာတ်ကျခဲ့ကြသော ယေဟောဝါ၏သစ္စာရှိဝတ်ပြုသူများ၏ ပုံနမူနာများစွာ သမ္မာကျမ်းစာတွင်ပါရှိသည်။ အမှန်မှာ မစုံလင်သူများအနေနှင့် ကျွန်ုပ်တို့အားလုံးသည် အခါအားလျော်စွာ ဤသို့သောခံစားချက်များကိုခံစားရသည်။ အချို့သည် ဝမ်းနည်းဖွယ်ဖြစ်ရပ်များကို ကြုံတွေ့ခဲ့ရသောကြောင့် အခြားသူများထက်ပင် ပို၍စိတ်ဓာတ်ကျ—မိမိကိုယ်ကိုသနားခြင်းဖြစ်ကောင်းဖြစ်—နိုင်ပေမည်။
အဆိုပါခံစားချက်များကို ထိန်းချုပ်မထားလျှင် သူတစ်ပါးနှင့်လည်းကောင်း၊ ယေဟောဝါဘုရားသခင်နှင့်လည်းကောင်း သင်၏ဆက်ဆံရေး ပျက်စီးသွားနိုင်သည်။ မိမိကိုယ်ကိုသနားတတ်သော ခရစ်ယာန်အမျိုးသမီးတစ်ဦးက ဤသို့ဝန်ခံ၏– “ကျွန်မဟာ အသင်းတော်ကလူတွေအတွက် မထိုက်တန်တဲ့အပေါင်းအသင်းလို့ ခံစားနေရတာကြောင့် လူမှုရေးဖိတ်ခေါ်ချက်အတော်များများကို ကျွန်မငြင်းခဲ့တယ်။” ဤသို့သောခံစားချက်များသည် လူတစ်ဦး၏အသက်တာကို အကြီးအကျယ်ပျက်စီးသွားစေနိုင်ပါသည်တကား! ထိုခံစားချက်များ ပျောက်ပျက်သွားစေရန် သင်မည်သို့ပြုလုပ်နိုင်မည်နည်း။
ယေဟောဝါထံ ချဉ်းကပ်ပါ
အာသပ်သည် ဆာလံ ၇၃ တွင်သူ၏စိတ်ရှုပ်ထွေးမှုကို ပွင့်ပွင့်လင်းလင်းရေးခဲ့၏။ သူသည် မတရားသောသူတို့၏ ကြီးပွားချမ်းသာသောအသက်တာနှင့် မိမိ၏အခြေအနေကို နှိုင်းယှဉ်သောအခါ မနာလိုငြူစူမိလေသည်။ ဘုရားတရားမဲ့သူတို့သည် မာနထောင်လွှားကာ အကြမ်းဖက်ခဲ့ကြသော်လည်း အပြစ်ပေးခံရဖွယ်မရှိကြောင်းကို သူသတိပြုမိခဲ့သည်။ ထို့ကြောင့် အာသပ်သည် မိမိ၏ဘဝတွင် ဖြောင့်မတ်သောလမ်းစဉ် လိုက်လျှောက်ရခြင်း၏တန်ဖိုးကို သံသယဖြစ်လာကြောင်း ထုတ်ဖော်ပြောခဲ့သည်။—ဆာလံ ၇၃:၃-၉၊ ၁၃၊ ၁၄။
အာသပ်နည်းတူ သင်သည် အမှားများပြုလုပ်၍ဝင့်ဝါနေကြသော မတရားသောသူတို့၏လက်ရှိအောင်မြင်မှုကို သတိပြုမိသလော။ အာသပ်သည် သူ၏အပျက်သဘောထားကို မည်သို့ကိုင်တွယ်ခဲ့သနည်း။ “ထိုအမှုကို နားလည်ရအောင်ဆင်ခြင်သောအခါ အလွန်ခက်သည်ဟု ထင်ပါ၏။ နောက်မှ ဘုရားသခင်၏ သန့်ရှင်းရာဌာနထဲသို့ဝင်၍ သူတို့၏အဆုံးကို နားလည်ရပါ၏” ဟူ၍ အာသပ်ဆက်ပြောခဲ့သည်။ (ဆာလံ ၇၃:၁၆၊ ၁၇) အာသပ်သည် ဆုတောင်း၍ ယေဟောဝါထံသို့လှည့်လာခြင်းဖြင့် အပြုသဘောပါခြေလှမ်းများလှမ်းခဲ့သည်။ နောက်ပိုင်း၌ တမန်တော်ပေါလုအသုံးပြုခဲ့သော စကားဖြင့်ပြောရလျှင် အာသပ်သည် မိမိအတွင်းမှ “ဝိညာဉ်လူ” ကိုနှိုးထစေခြင်းဖြင့် “ဇာတိပကတိလူ” ကိုချိုးနှိမ်ခဲ့သည်။ အားသစ်လန်းသောအမြင်အာရုံဖြင့် ယေဟောဝါသည် မကောင်းမှုကိုမုန်းတီး၍ မတရားသောသူတို့ကို အချိန်တန်လျှင် ဒဏ်ခတ်လိမ့်မည်ကို သူနားလည်ခဲ့သည်။—၁ ကောရိန္သု ၂:၁၄၊ ၁၅။
ဘဝမှန်ကိုအာရုံစိုက်ရန် သမ္မာကျမ်းစာအကူအညီကိုယူခြင်းသည် အမှန်ပင်အရေးကြီးပါသည်တကား! မတရားသောသူတို့၏လုပ်ရပ်ကို ယေဟောဝါမသိဘဲမနေဟု ကျွန်ုပ်တို့ကိုသတိရစေသည်။ ကျမ်းစာက ဤသို့သွန်သင်ပေး၏– “အလွဲမယူကြနှင့်။ ဘုရားသခင်သည် မထီမဲ့မြင်ပြုခြင်းကိုခံတော်မမူ။ လူသည် မျိုးစေ့ကြဲသည်အတိုင်း အသီးအနှံကိုရိတ်ရလိမ့်မည်။ . . . ငါတို့သည် အားမလျော့၊ စိတ်မပျက်ဘဲ ကောင်းသောအကျင့်ကိုကျင့်ကြကုန်အံ့။” (ဂလာတိ ၆:၇-၉) ယေဟောဝါသည် မတရားသောသူတို့ကို “ချောသောအရပ်၌” ထားတော်မူလိမ့်မည်; “ဖျက်ဆီးရာအရပ်သို့ ချတော်မူ” မည်။ (ဆာလံ ၇၃:၁၈) အဆုံး၌ ဘုရားသခင့်တရားမျှတခြင်းသည် အောင်ပွဲခံရလိမ့်မည်။
ယေဟောဝါ၏စားပွဲတော်၌ ဝိညာဉ်အစာကျွေးမွေးခြင်းအစီအစဉ်ကို အဆက်မပြတ်သုံးဆောင်ခြင်းနှင့် ဘုရားသခင်၏လူမျိုးတော်နှင့် အကျိုးရှိရှိပေါင်းသင်းခြင်းတို့သည် သင်၏ယုံကြည်ခြင်းကို ခိုင်ခံ့စေပြီး စိတ်ဓာတ်ကျခြင်း သို့မဟုတ် အခြားအပျက်သဘောထားများကို ကျော်လွှားအောင်မြင်ရန် အထောက်အကူရလိမ့်မည်။ (ဟေဗြဲ ၁၀:၂၅) သင်သည် အာသပ်နည်းတူ ဘုရားသခင်ထံ ချဉ်းကပ်ခြင်းဖြင့် ကိုယ်တော်၏မေတ္တာပါသော ထောက်ပံ့ကူညီမှုကိုရနိုင်မည်။ အာသပ်က ဤသို့ဆက်၍ဆိုသည်– “အကျွန်ုပ်သည် ကိုယ်တော်ထံမှာအစဉ်ရှိ၍ အကျွန်ုပ်၏လက်ယာလက်ကို ဆွဲကိုင်တော်မူ၏။ အကျွန်ုပ်ကို ဉာဏ်ပေး၍ ပဲ့ပြင်တော်မူမည်။ နောက်တစ်ဖန် ဘုန်းအသရေ၌ သိမ်းယူတော်မူမည်။” (ဆာလံ ၇၃:၂၃၊ ၂၄) အဆိုပါစကားများ၌ ဉာဏ်ပညာရှိကြောင်းကို ငယ်စဉ်က မတော်မတရားပြုခံရသော ခရစ်ယာန်တစ်ဦးသိရှိခဲ့သည်။ “အသင်းတော်နဲ့ ဆက်ပြီးအနီးကပ်ပေါင်းသင်းတဲ့အတွက် ဘဝဟာ ကျွန်မထင်သလိုမဟုတ်ဘူးဆိုတာကို သိလာတယ်။ ခရစ်ယာန်အကြီးအကဲတွေဟာ မေတ္တာရှိကြတယ်၊ ရဲသားတွေမဟုတ်ကြဘဲ သိုးထိန်းတွေဖြစ်တယ်ဆိုတာကို ကွင်းကွင်းကွက်ကွက်သိမြင်လာတယ်” ဟုသူပြောပြသည်။ မှန်သည်၊ ထောက်ထားစာနာတတ်သော ခရစ်ယာန်အကြီးအကဲများသည် အကျိုးနည်းစေသောစိတ်ထားများ ပပျောက်သွားစေရန် အရေးကြီးကဏ္ဍမှ ပါဝင်ထမ်းဆောင်နေကြသည်။—ဟေရှာယ ၃၂:၁၊ ၂; ၁ သက်သာလောနိတ် ၂:၇၊ ၈။
ယေဟောဝါ၏ဆုံးမမှုကို ခံယူလော့
ပရောဖက်ယေရမိ၏ အတွင်းရေးမှူးဗာရုတ်သည် သူ၏တာဝန်ပိုင်းဆိုင်ရာစိတ်ဖိစီးမှုကြောင့် ညည်းတွားခဲ့သည်။ သို့သော် ယေဟောဝါသည် ကြင်နာစွာဖြင့် အဖြစ်မှန်အပေါ် ဗာရုတ်အား အာရုံစိုက်စေခဲ့သည်။ “‘သင်သည် ကြီးစွာသောအရာတို့ကို ကိုယ်အဖို့ရှာသလော။ မရှာနှင့်။ အကြောင်းမူကား ငါသည် ခပ်သိမ်းသောသတ္တဝါတို့အပေါ်သို့ ဘေးရောက်စေမည်။ သို့ရာတွင် သင်ရောက်လေရာရာအရပ်တို့၌ သင်၏အသက်ကို လက်ရဥစ္စာကဲ့သို့ သင့်အားငါပေးမည်’ ဟုထာဝရဘုရားမိန့်တော်မူ၏။”—ယေရမိ ၄၅:၂-၅။
ဗာရုတ်စိတ်ဓာတ်ကျခြင်းသည် သူ၏ကိုယ်ကျိုးရှာအတ္တကြီးခြင်းကြောင့်ဖြစ်သည်ဟု ပွင့်လင်းစွာ ယေဟောဝါရှင်းပြခဲ့၏။ ဗာရုတ်သည် သူ့အဖို့ ကြီးစွာသောအရာတို့ကို ရှာဖွေနေစဉ် တစ်ချိန်တည်းတွင် ဘုရားသခင်ပေးအပ်သောတာဝန်ကိုထမ်းဆောင်ရာ၌ ပျော်ရွှင်မှုမရနိုင်ပေ။ စိတ်ဓာတ်ကျခြင်းကို အောင်မြင်စွာအနိုင်ယူခြင်းငှာ အပြုသဘောပါသောခြေလှမ်းမှာ စိတ်ပျံ့လွင့်မှုများကိုရှောင်ရှားပြီး ဘုရားသခင့်ရေးရာရောင့်ရဲခြင်းမှဖြစ်ပေါ်လာသော စိတ်ငြိမ်သက်မှုရှိခြင်းဖြစ်ကြောင်း အသင်လည်းတွေ့ရှိပေမည်။—ဖိလိပ္ပိ ၄:၆၊ ၇။
မုဆိုးမနောမိသည် မောဘပြည်တွင် သူ၏ခင်ပွန်းနှင့်သားနှစ်ယောက် ဆုံးသွားသောအခါ ထီးထီးကြီးဖြစ်သွားရန် ဝမ်းနည်းကြေကွဲမှုကို ခွင့်မပြုခဲ့ချေ။ သို့သော် အတန်ကြာသည့်အထိ မိမိနှင့်မိမိ၏ချွေးမနှစ်ဦးအတွက် နာကြည်းစွာခံစားခဲ့ရပုံရှိသည်။ သူတို့ကိုစေလွှတ်ချိန်၌ နောမိက “ထာဝရဘုရားလက်တော်သည် ငါ့အပေါ်သို့ရောက်ရှိသည်ကို သင်တို့အတွက် ငါအလွန်ဝမ်းနည်းသောစိတ်ရှိသည်” ဟုပြောခဲ့သည်။ တစ်ဖန် ဗက်လင်မြို့သို့ရောက်သောအခါ သူဤသို့လေးနက်စွာပြောလေသည်– “နောမိ [“ကျွန်ုပ်၏သာယာခြင်း”] ဟူ၍မခေါ်ပါနှင့်။ မာရ [“ခါးသီးခြင်း”] ဟူ၍ခေါ်ပါ။ [အဆုံးမဲ့]တန်ခိုးရှင်သည် ငါ့အား အလွန်ခါးသောအရာကို ပေးတော်မူပြီ။”—ရုသ ၁:၁၃၊ ၂၀၊ သမ္မာ။
သို့သော် နောမိသည် ယေဟောဝါနှင့် ကိုယ်တော်၏လူမျိုးတော်ထံမှ သီးခြားကြေကွဲစွာမနေခဲ့ပါ။ မောဘပြည်၌ရှိစဉ် “ထာဝရဘုရားသည် မိမိလူတို့ကို အကြည့်အရှုကြွ၍ မုန့်ကိုပေးသနားတော်မူကြောင်း” သူကြားခဲ့သည်။ (ရုသ ၁:၆) မိမိအတွက်အကောင်းဆုံးနေရာသည် ယေဟောဝါလူမျိုးတော်နှင့် အတူရှိနေခြင်းဖြစ်သည်ကို သူသဘောပေါက်ခဲ့၏။ ထို့နောက် ချွေးမရုသနှင့်အတူ ယုဒပြည်သို့ နောမိပြန်လာကာ ရုသကိုပြန်ယူခဲ့သည့် ဆွေမျိုးပေါက်ဖော်ဗောဇအား မည်သို့ပြုမူသင့်သည်နှင့်ပတ်သက်၍ ကျွမ်းကျင်လိမ္မာစွာလမ်းညွှန်ပေးခဲ့သည်။
အလားတူ ယနေ့လည်း မိမိတို့၏အိမ်ထောင်ဖက်များ သေဆုံးသွားခဲ့သော သစ္စာစောင့်သိသူများသည် ခရစ်ယာန်အသင်းတော်တွင် ဆက်၍အလုပ်များနေခြင်းအားဖြင့် စိတ်ဖိစီးမှုကို အောင်မြင်စွာကိုင်တွယ်ဖြေရှင်းလျက်ရှိကြသည်။ နောမိနည်းတူ သူတို့သည် ဝိညာဉ်ရေးရာများတွင် အလုပ်များနေကြပြီး ဘုရားသခင့်စကားတော်ကို နေ့စဉ်ဖတ်ရှုလျက်ရှိသည်။
ဘုရားသခင့်ဉာဏ်ပညာကို ကျင့်သုံးခြင်းမှ အကျိုးကျေးဇူးများ
အဆိုပါကျမ်းစာမှတ်တမ်းများက အပျက်သဘောထားများ၏ ဆိုးကျိုးများကို မည်သို့ကိုင်တွယ်ဖြေရှင်းနိုင်ကြောင်း ထိုးထွင်းသိမြင်စေသည်။ အာသပ်သည် ယေဟောဝါ၏သန့်ရှင်းရာဌာနထဲဝင်၍ အကူအညီတောင်းခံပြီး ယေဟောဝါအား စိတ်ရှည်စွာစောင့်မျှော်ခဲ့၏။ ဗာရုတ်သည် ဆုံးမမှုကိုလက်ခံကာ ကြွယ်ဝချမ်းသာရန် စိတ်ပျံ့လွင့်စရာများကို ရှောင်ရှားခဲ့သည်။ နောမိသည် စစ်မှန်သောဘုရားသခင်၏ဝတ်ပြုရေးတွင် အမျိုးသမီးငယ်ရုသ အခွင့်အရေးများရဖို့အတွက် သူ့ကိုအသင့်ပြင်ဆင်ပေးခြင်း၌ ယေဟောဝါ၏လူမျိုးတော်အလယ် အလုပ်များနေခဲ့သည်။—၁ ကောရိန္သု ၄:၇; ဂလာတိ ၅:၂၆; ၆:၄။
ယေဟောဝါသည် မိမိလူမျိုးတော်ကို တစ်ဦးချင်းစီအနေနှင့်လည်းကောင်း၊ အုပ်စုလိုက်အနေနှင့်လည်းကောင်း ဘုရားသခင့်ရေးရာအောင်ပွဲများရစေခဲ့သည်ကို ဆင်ခြင်သုံးသပ်ခြင်းအားဖြင့် စိတ်ဓာတ်ကျခြင်းနှင့် အခြားအပျက်သဘောထားများကို ကျော်လွှားအောင်မြင်နိုင်မည်ဖြစ်သည်။ ထိုသို့ဖြစ်စေရန် သင့်အတွက် ရွေးနုတ်ဖိုးစီစဉ်ပေးထားခြင်းဖြစ်သည့် ယေဟောဝါ၏အမြင့်မြတ်ဆုံး မေတ္တာပါလုပ်ရပ်ကို ဆင်ခြင်တွေးတောပါ။ ခရစ်ယာန်ညီအစ်ကိုအသင်းအပင်း၏ စစ်မှန်သောမေတ္တာကို တန်ဖိုးထားလေးမြတ်ပါ။ ရှေ့နားလေးတွင်ရှိသည့် ဘုရားသခင့်ကမ္ဘာသစ်၌ သင့်အသက်တာဘဝအပေါ် အာရုံစိုက်ပါ။ ထို့ပြင် အာသပ်ကဲ့သို့ ဤသို့တုံ့ပြန်ပါလေ– “အကျွန်ုပ်မူကား ဘုရားသခင့်ထံတော်သို့ချဉ်းကပ်၍ အကျိုးရှိပါ၏။ အမှုတော်ရှိသမျှတို့ကို ကြားပြောခြင်းအလိုငှာ အရှင်ထာဝရဘုရား၌ ခိုလှုံလျက်နေပါ၏။”—ဆာလံ ၇၃:၂၈။