ဝိညာဉ်ရေးခိုင်ခံ့သောမိသားစု တည်ဆောက်ခြင်း
ဝိညာဉ်ရေးခိုင်ခံ့သောမိသားစု တည်ဆောက်ခြင်း
“ယေဟောဝါ၏ ပဲ့ပြင်ဆုံးမခြင်းနှင့် စိတ်ပိုင်းဆိုင်ရာ ထိန်းကျောင်းခြင်းတို့နှင့်အညီ သူတို့ကို ဆက်၍ပြုစုပျိုးထောင်ပေးကြလော့။” —ဧဖက် ၆:၄၊ ကဘ။
၁။ မိသားစုအတွက် ဘုရားသခင့်ရည်ရွယ်ချက်ကား အဘယ်နည်း၊ သို့သော် ယင်းအစား အဘယ်အရာဖြစ်ပျက်ခဲ့သနည်း။
“များပြားစွာ မွေးဖွားကြလော့။ မြေကြီးကိုပြည့်စေ၍ နိုင်ကြလော့။” (ကမ္ဘာဦး ၁:၂၈) ယေဟောဝါဘုရားသခင်သည် အာဒံနှင့်ဧဝတို့အားမိန့်ဆိုခဲ့သော အဆိုပါစကားများဖြင့် မိသားစုအစီအစဉ်ကို အစပြုခဲ့သည်။ (ဧဖက် ၃:၁၄၊ ၁၅) ရှေ့ကိုရှုမျှော်သောအခါ ထိုပထမမောင်နှံသည် သူတို့၏သားမြေးများနှင့် ပြည့်နေသည့်ကမ္ဘာ၊ တိုးများလာသော စုံလင်သူများ ပရဒိသုမြေကြီးပေါ်တွင် ရွှင်လန်းစွာအသက်ရှင်ကာ ကြီးမြတ်သောဖန်ဆင်းရှင်အား စည်းလုံးစွာဝတ်ပြုနေကြခြင်းကို မြင်ယောင်ကြည့်နိုင်ကြသည်။ သို့သော် အာဒံနှင့်ဧဝသည် အပြစ်ပြုခဲ့ကြရာ ကမ္ဘာမြေကြီးသည် ဖြောင့်မတ်၍ ဘုရားသခင်ကိုကြောက်ရွံ့သည့်လူများနှင့် ပြည့်နှက်မလာခဲ့ချေ။ (ရောမ ၅:၁၂) ယင်းအစား မိသားစုဘဝသည် လျင်မြန်စွာ ဆုတ်ယုတ်ကျဆင်းလာကာ အထူးသဖြင့် ဤ “နောက်ဆုံးသောနေ့ရက်များ” တွင် မုန်းတီးမှု၊ မကောင်းမှုနှင့် “ပကတိချစ်ခင်ကြင်နာခြင်း” ကင်းမဲ့မှု လွှမ်းမိုးလျက်ရှိသည်။—၂ တိမောသေ ၃:၁-၅၊ ကဘ; ကမ္ဘာဦး ၄:၈၊ ၂၃; ၆:၅၊ ၁၁၊ ၁၂။
၂။ အာဒံ၏သားမြေးများတွင် အဘယ်အရည်အသွေးများရှိကြသနည်း၊ သို့သော် ဝိညာဉ်ရေးခိုင်ခံ့သော မိသားစုတည်ဆောက်ရန် မည်သည့်အရာလိုအပ်မည်နည်း။
၂ အာဒံနှင့် ဧဝသည် ဘုရားသခင်၏ပုံသဏ္ဌာန်တော်နှင့်အညီ ဖန်ဆင်းခံရကြသည်။ အာဒံသည် ယခု အပြစ်သားဖြစ်နေသော်လည်း ယေဟောဝါက သူ့ကို သားသမီးမွေးဖွားခွင့်ပေးခဲ့သည်။ (ကမ္ဘာဦး ၁:၂၇; ၅:၁-၄) အာဒံ၏သားစဉ်မြေးဆက်များသည် သူတို့၏ဖခင်နည်းတူ ကိုယ်ကျင့်တရားဆိုင်ရာ အရည်အချင်းရှိ၍ အမှားအမှန်ကို ပိုင်းခြားသိမြင်နိုင်စွမ်းရှိကြသည်။ သူတို့သည် မိမိတို့၏ဖန်ဆင်းရှင်ကို မည်သို့ကိုးကွယ်ရမည်နှင့် ကိုယ်တော်အား နှလုံး၊ စိုးလ်၊ စိတ်နှင့် ခွန်အားအကြွင်းမဲ့ဖြင့် ချစ်ခြင်း၏အရေးကြီးမှုကို သင်ယူနိုင်ကြသည်။ (မာကု ၁၂:၃၀; ယောဟန် ၄:၂၄; ယာကုပ် ၁:၂၇) ထို့ပြင် “တရားသဖြင့်ပြုခြင်း၊ ကရုဏာကိုနှစ်သက်ခြင်း၊ . . . ဘုရားသခင့်ရှေ့တော်၌ နှိမ့်ချသောစိတ်နှင့်ကျင့်နေ” ရန်လေ့ကျင့်ခံယူနိုင်ကြသည်။ (မိက္ခာ ၆:၈) သို့ရာတွင် အပြစ်သားများအနေနှင့် ဝိညာဉ်ရေးခိုင်ခံ့သောမိသားစုကို တည်ဆောက်နိုင်ရန်အတွက် အတော်အတန်အာရုံစိုက်ဖို့ လိုမည်ဖြစ်သည်။
အချိန်ကိုဝယ်ယူလော့
၃။ မိဘများသည် ခရစ်ယာန်သားသမီးများကိုမွေးမြူရန် မည်သို့ ‘အချိန်ဝယ်ယူ’ နိုင်သနည်း။
၃ ဤရှုပ်ထွေးခဲယဉ်းသောကာလအတွင်း သားသမီးများသည် “အဆိုးကိုမုန်း” ကာ “ယေဟောဝါအားချစ်သောသူများ” ဖြစ်လာနိုင်ကြဖို့ အကြီးအကျယ် အားထုတ်ကြရမည်။ (ဆာလံ ၉၇:၁၀၊ ကဘ) ပညာရှိမိဘများသည် ဤစိန်ခေါ်ချက်များကိုရင်ဆိုင်နိုင်ဖို့ ‘အချိန်ကိုဝယ်ယူ’ ကြရမည်။ (ဧဖက် ၅:၁၅-၁၇) သင်သည် မိဘတစ်ဦးဖြစ်ပါက ယင်းကို မည်သို့ပြုလုပ်နိုင်သနည်း။ ဦးဆုံး၊ သင့်သားသမီးများကို သွန်သင်ခြင်းနှင့် လေ့ကျင့်ပေးခြင်းအပါအဝင် “သာ၍အရေးကြီးသည့်အရာများ” ကိုအာရုံစိုက်ရန် ဦးစားထားရာများကို ချမှတ်ပေးပါ။ (ဖိလိပ္ပိ ၁:၁၀၊ ၁၁၊ ကဘ) ဒုတိယမှာ သင့်ဘဝပုံစံကို ရိုးရှင်းစေပါ။ အမှန်တကယ်မလိုအပ်သည့် လုပ်ငန်းဆောင်တာများကို ဘေးဖယ်ထားဖို့လိုပေမည်။ သို့မဟုတ် ထိန်းသိမ်းပေးရန် အချိန်စားသော မလိုအပ်သည့်ပစ္စည်းများကို ဖယ်ထုတ်လိုက်ဖို့လိုပေမည်။ ခရစ်ယာန်မိဘတစ်ဦးအနေနှင့် ဘုရားသခင်အားကြောက်ရွံ့သော သားသမီးများမွေးမြူရန် သင်ကြိုးစားအားထုတ်ခဲ့ခြင်းကို ဘယ်တော့မျှ သံဝေဂရလိမ့်မဟုတ်ပေ။—သု. ၂၉:၁၅၊ ၁၇။
၄။ မိသားစုစည်းလုံးမှုကို မည်သို့ဆက်ထိန်းသိမ်းထားနိုင်သနည်း။
၄ သင့်သားသမီးများနှင့်အတူ အသုံးပြုသည့်အချိန်၊ အထူးသဖြင့် ဝိညာဉ်ရေးကိစ္စရပ်များကို အဓိကထား အသုံးပြုခဲ့သောအချိန်သည် အကျိုးနပ်ပေသည်၊ ယင်းကား မိသားစုကို ဆက်စည်းလုံးစေသည့် အကောင်းဆုံးနည်းလမ်းတစ်ခုဖြစ်သည်။ သို့သော် ယင်းကို ဖြစ်ကတတ်ဆန်းမလုပ်ပါနှင့်။ အတူတကွအသုံးပြုကြမည့် အချိန်ကိုသတ်မှတ်ပြီး ဇယားဆွဲထားပါ။ ယင်းက တစ်အိမ်တည်းနေ၍ ကိုယ့်အလုပ်ကိုယ်လုပ်ကိုင်နေခြင်းကိုမဆိုလိုပါ။ သားသမီးများသည် နေ့စဉ် ဂရုစိုက်မှုခံရမှသာ အကောင်းဆုံးနည်းဖြင့် ဖွံ့ဖြိုးကြီးထွားလာကြမည်။ မေတ္တာနှင့် စိုးရိမ်မကင်းဖြစ်မှုကို ရက်ရက်ရောရော တင်ပြရန်လို၏။ သားသမီးယူရန် ဆုံးဖြတ်ချက်မချမီပင် အိမ်ထောင်သည်မောင်နှံများသည် ဤအရေးကြီးသောတာဝန်ကို အလေးအနက်ထားသုံးသပ်ရမည်။ (လုကာ ၁၄:၂၈) ထိုအခါ သားသမီးမွေးမြူခြင်းကို ခက်ခဲသောအလုပ်တစ်ခုအဖြစ် သဘောပိုက်လိမ့်မည်မဟုတ်။ ယင်းအစား ကောင်းချီးခံစားရသည့် အခွင့်ထူးတစ်ခုအဖြစ် ရှုမြင်ကြပါလိမ့်မည်။—ကမ္ဘာဦး ၃၃:၅; ဆာလံ ၁၂၇:၃။
အပြောနှင့် ပုံသက်သေအားဖြင့် သွန်သင်လော့
၅။ (က) ယေဟောဝါအားချစ်ရန် သားသမီးများကို သွန်သင်ပေးရေးသည် အဘယ်အရာနှင့် စတင်သနည်း။ (ခ) တရားဟောရာ ၆:၅-၇ တွင် မိဘများအား အဘယ်သွန်သင်ချက်ပေးထားသနည်း။
၅ သင့်သားသမီးများကို ယေဟောဝါအားချစ်ရန် သွန်သင်ပေးခြင်းသည် သင်ကိုယ်တိုင် ကိုယ်တော်အားချစ်မြတ်နိုးခြင်းဖြင့် စတင်သည်။ ဘုရားသခင်အား နှစ်နှစ်ကာကာ ချစ်ခြင်းသည် ကိုယ်တော့်သွန်သင်ချက်အားလုံးကို အပြည့်အဝတည်ကြည်စွာလိုက်လျှောက်ရန် သင့်အား လှုံ့ဆော်ပေးပါလိမ့်မည်။ ၎င်းတွင် “ယေဟောဝါ၏ ပဲ့ပြင်ဆုံးမခြင်းနှင့် စိတ်ပိုင်းဆိုင်ရာ ထိန်းကျောင်းခြင်းတို့နှင့်အညီ” သားသမီးများကို ပျိုးထောင်ပေးခြင်းပါဝင်သည်။ (ဧဖက် ၆:၄၊ ကဘ) မိဘများသည် သားသမီးများကို ပုံသက်သေပြရန်၊ သူတို့နှင့်ဆက်သွယ်ရန်နှင့် သွန်သင်ပေးရန် ဘုရားသခင်ညွှန်ကြားတော်မူ၏။ တရားဟောရာ ၆:၅-၇ တွင်ဤသို့ဖော်ပြထားသည်– “သင်၏ဘုရားသခင် ထာဝရဘုရားကို စိတ်နှလုံးအကြွင်းမဲ့၊ အစွမ်းသတ္တိရှိသမျှနှင့်ချစ်လော့။ ယနေ့ ငါမှာထားသောစကားကို နှလုံးသွင်းရမည်။ ထိုစကားကို သင်၏သားသမီးတို့အား ကြိုးစား၍သွန်သင်ရမည်။ အိမ်၌ထိုင်လျက်နေသည်ဖြစ်စေ၊ ခရီး၌သွားသည်ဖြစ်စေ၊ အိပ်လျက်၊ ထလျက်ရှိသည်ဖြစ်စေ ထိုစကားကိုပြောရမည်။” ထပ်တလဲလဲ ဆုံးမပဲ့ပြင်ပေးခြင်းနှင့် အထပ်ထပ်ပြန်ပြောခြင်းအားဖြင့် ဘုရားသခင့်ပညတ်တော်များကို သင့်သားသမီးများတွင် သွတ်သွင်းပေးနိုင်ပါသည်။ သို့ဖြင့် သင့်သားမြေးများသည် ယေဟောဝါအားချစ်သည့် သင့်မေတ္တာကို သဘောပေါက်မည်ဖြစ်ကာ ယင်းက တစ်ဖန် ယေဟောဝါနှင့်သူတို့ရင်းနှီးမှုရှိလာစေဖို့ ဩဇာလွှမ်းမိုးခံရကြလိမ့်မည်။—သု. ၂၀:၇။
၆။ သားသမီးများသည် ပုံသက်သေအားဖြင့် သင်ယူကြသည်ဟူသောအချက်မှ မည်သို့အခွင့်အရေးယူနိုင်သနည်း။
၆ ကလေးများသည် သင်ယူရန် စိတ်ထက်သန်ကြသည်။ သူတို့သည် ဂရုစိုက်နားထောင်ကြည့်ရှုတတ်ကြပြီး သင့်ပုံသက်သေကို လျင်မြန်စွာအတုယူတတ်ကြသည်။ သင်သည် ရုပ်ပစ္စည်းကိုအဓိကထားသူမဟုတ်ကြောင်း သူတို့တွေ့မြင်သည့်အခါ ယေရှု၏သွန်သင်ချက်ကို သူတို့မည်သို့လိုက်လျှောက်ရမည်ကို သူတို့အားသွန်သင်ပေးရာရောက်၏။ ရုပ်ပစ္စည်းများအတွက် စိုးရိမ်တကြီးဖြစ်ဖို့မဟုတ်ဘဲ ‘ဘုရားသခင့်နိုင်ငံတော်ကို ရှေးဦးထား’ ရန် သူတို့ကို သင်ကြားပေးသည်။ (မဿဲ ၆:၂၅-၃၃) ကျမ်းစာအမှန်တရား၊ ဘုရားသခင့်အသင်းတော်နှင့် ခန့်အပ်ခံအကြီးအကဲများအကြောင်း အကျိုးရှိသော၊ တည်ဆောက်မှုပေးသော စကားများကိုပြောဆိုခြင်းအားဖြင့် ယေဟောဝါကိုလေးမြတ်ရန်နှင့် ကိုယ်တော့်ဝိညာဉ်ရေးပြင်ဆင်ပေးချက်များကို တန်ဖိုးထားတတ်လာရန် သင့်သားသမီးများကို သင်ကြားပေးပါသည်။ ကလေးများသည် ရှေ့နောက်မညီညွတ်မှုကို ချက်ချင်းသတိပြုတတ်ကြသောကြောင့် နှုတ်တိုက်သွန်သင်ချက်ကို ဝိညာဉ်ရေးရာများအပေါ် သင်၏တန်ဖိုးထားမှုထင်ရှားစေသည့်အပြုအမူနှင့် သဘောထားတို့ဖြင့် အထောက်အထားခိုင်လုံစေရမည်။ မိဘများ၏ပုံသက်သေကောင်းက သူတို့၏သားသမီးများကို ယေဟောဝါအား စိတ်နှလုံးအကြွင်းမဲ့ချစ်စေခဲ့ကြောင်း မိဘများတွေ့ရှိကြသည့်အခါ ယင်းသည် တကယ့်ကောင်းချီးတစ်ရပ်ဖြစ်သည်တကား!—သု. ၂၃:၂၄၊ ၂၅။
၇၊ ၈။ ငယ်ရွယ်စဉ်မှ သားသမီးများလေ့ကျင့်ပေးခြင်း၏တန်ဖိုးကို အဘယ်ပုံသက်သေက ဖော်ပြသနည်း၊ ရရှိသည့်အောင်မြင်မှုအတွက် မည်သူ့ကို ဂုဏ်ပြုရမည်နည်း။
၇ သားသမီးများအား ငယ်ရွယ်စဉ်ကတည်းက လေ့ကျင့်ပေးခြင်း၏တန်ဖိုးကို ဗင်နီဇွဲလားနိုင်ငံမှ ပုံနမူနာတစ်ခုတွင် တွေ့ရှိနိုင်၏။ (၂ တိမောသေ ၃:၁၅) ယင်းသည် လူငယ်မောင်နှံ ဖဲလစ်နှင့် မေယာလင်တို့နှင့်ပတ်သက်သည်။ သူတို့သည် ရှေ့ဆောင်အမှုဆောင်များဖြစ်ကြသည်။ သူတို့၏သားလေး ဖေလီတိုမွေးလာသောအခါ သူ့အား ယေဟောဝါ၏စစ်မှန်သောကိုးကွယ်သူတစ်ဦးအဖြစ် ကြီးပြင်းလာစေရန် အစွမ်းကုန်ကြိုးစားလိုခဲ့ကြသည်။ မေယာလင်သည် ဖေလီတိုကို ယေဟောဝါသက်သေများထုတ်ဝေသော ကျွန်ုပ်၏ကျမ်းစာပုံပြင်စာအုပ်ကို အသံကျယ်ကျယ်ဖြင့် စဖတ်ပြသည်။ ဖေလီတိုသည် ငယ်စဉ်ကတည်းက ဤစာအုပ်တွင် ရေးဆွဲထားသော မောရှေနှင့် အခြားသူတို့ကို မှတ်မိပုံရသည်။
၈ ဖေလီတိုသည် အတော်အတန်ငယ်ရွယ်သေးစဉ်ပင် သူ့ဘာသာသူ စသက်သေခံခဲ့သည်။ ဘုရားသခင့်နိုင်ငံတော်ကြေညာသူတစ်ဦး ဖြစ်လိုသည့်ဆန္ဒ ပြည့်ဝခဲ့ပြီး နောက်ပိုင်းတွင် နှစ်ခြင်းခံခဲ့သည်။ အချိန်တန်သော် မှန်မှန်ရှေ့ဆောင်တစ်ဦးဖြစ်လာလေသည်။ သူ့မိဘများက ဤသို့မှတ်ချက်ချကြသည်– “သားလေးရဲ့တိုးတက်မှုကို ကျွန်တော်တို့တွေ့တဲ့အခါ ယေဟောဝါနှင့် ကိုယ်တော့်သွန်သင်ချက်ကြောင့်ဆိုတာကို အသိအမှတ်ပြုကြရတယ်။”
ဝိညာဉ်ရေးအရ ကြီးထွားလာရန် သားသမီးများကို ကူညီပါ
၉။ သစ္စာနှင့် သတိပညာရှိသောကျွန်အတန်းအစားမှတစ်ဆင့် ရရှိသော ဝိညာဉ်ရေးသွန်သင်ချက်အတွက် အဘယ်ကြောင့် ကျေးဇူးတင်သင့်သနည်း။
၉ သားသမီးမွေးမြူပျိုးထောင်ရေးနှင့်ပတ်သက်၍ မဂ္ဂဇင်းများစွာ၊ ရာချီသောစာအုပ်များနှင့် အင်တာနက်ဝက်ဘ်ဆိုက် ထောင်ပေါင်းများစွာတို့က အကြံဉာဏ်ပေးကြသည်။ များသောအားဖြင့် “အကြောင်းအချက်လက်များ ကွဲပြားခြားနား” လေ့ရှိသည်ဟု ကလေးအကြောင်း အထူးထုတ် နယူးစ်ဝိခ်မဂ္ဂဇင်းတစ်စောင်က ဆို၏။ “ထိုထက် ကသိကအောက်ဖြစ်စေသည်ကား ယုံကြည်စိတ်ချနိုင်သည်ဟု သင်ယူမှတ်ခဲ့သောအကြောင်းအချက်သည် လုံးလုံးမှားနေသည့်အခါဖြစ်သည်။” ယေဟောဝါသည် မိသားစုများအတွက်သွန်သင်မှုနှင့် ဝိညာဉ်ရေးတိုးတက်မှုအတွက် ညွှန်ကြားချက် အလျှံပယ်ပြင်ဆင်ပေးထားသဖြင့် ကိုယ်တော်အား ကျွန်ုပ်တို့ အလွန်ကျေးဇူးတင်ကြသည်တကား! သစ္စာနှင့်သတိပညာရှိသောကျွန် အတန်းအစားမှတစ်ဆင့် ပြင်ဆင်ပေးထားချက်အားလုံးမှ သင် အကျိုးအပြည့်အဝရယူနေပါသလော။—မဿဲ ၂၄:၄၅-၄၇။
၁၀။ ထိရောက်သော မိသားစုကျမ်းစာသင်အံမှုသည် မိဘများနှင် သားသမီးများကို မည်သို့အကျိုးပြုသနည်း။
၁၀ အလွန်အရေးကြီးသည့်အရာတစ်ခုမှာ သက်သောင့်သက်သာရှိအနေအထားမျိုးတွင် မိသားစုကျမ်းစာသင်အံမှုကို အချိန်မှန်၊ ပုံမှန်ကျင်းပပေးခြင်းဖြစ်သည်။ ၎င်းကို မှတ်သားဖွယ်ရာ၊ ပျော်စရာနှင့် အားရှိစရာဖြစ်စေဖို့အတွက် ကောင်းစွာပြင်ဆင်ထားဖို့လို၏။ မိဘများသည် မိမိတို့၏သားသမီးများ၏စကားကို နှိုက်ထုတ်ခြင်းအားဖြင့် သူတို့၏စိတ်နှလုံးထဲရှိအရာကို သိရှိနိုင်ကြသည်။ မိသားစုသင်အံမှု၏ထိရောက်မှုကို ပိုင်းဖြတ်နိုင်သည့်နည်းတစ်နည်းကား အိမ်သူအိမ်သားအားလုံးသည် ၎င်းကိုစောင့်မျှော်နေမနေ သတိပြုခြင်းအားဖြင့်ဖြစ်သည်။
၁၁။ (က) သားသမီးများတွင် အဘယ်ပန်းတိုင်များရှိကြရန် မိဘများကကူညီပေးနိုင်သနည်း။ (ခ) ဂျပန်နိုင်ငံမှမိန်းကလေးတစ်ဦးက ပန်းတိုင်မီအောင်ကြိုးစားခဲ့သောအခါ အဘယ်အကျိုးရလဒ်ရရှိခဲ့သနည်း။
၁၁ ကျမ်းစာဆိုင်ရာပန်းတိုင်များထားခြင်းသည် ဝိညာဉ်ရေးအရ ခိုင်ခံ့သောမိသားစုတစ်စုဖြစ်စေနိုင်ပြီး ယင်းတို့ကိုထားရှိရန် သားသမီးများကို မိဘများကူညီပေးသင့်သည်။ သင့်လျော်သောပန်းတိုင်များတွင် နေ့စဉ်ကျမ်းစာဖတ်ရှုခြင်း၊ သတင်းကောင်းကို မှန်မှန်ကြေညာသူတစ်ဦးဖြစ်လာခြင်းနှင့် ဆက်ကပ်အပ်နှံပြီး နှစ်ခြင်းခံဖို့အထိ တိုးတက်ခြင်းတို့ပါဝင်သည်။ အခြားပန်းတိုင်များတွင် ရှေ့ဆောင်တစ်ဦးအဖြစ်၊ ဗေသလတွင်၊ သို့မဟုတ် သာသနာပြုတစ်ဦးအဖြစ် အချိန်ပြည့်အမှုဆောင်ခြင်းလည်း ပါဝင်ပေမည်။ မူလတန်းကျောင်းတက်နေစဉ် ဂျပန်မိန်းကလေးတစ်ဦးဖြစ်သူ အာယူမီးသည် သူ၏အတန်းရှိသူတိုင်းကိုသက်သေခံရန် ပန်းတိုင်ထားခဲ့သည်။ သူ၏ဆရာနှင့် အတန်းဖော်များ၏စိတ်ဝင်စားမှုကိုနှိုးဆွပေးရန် စာကြည့်တိုက်တွင် ကျမ်းစာ စာပေများစွာ ထားရှိရန် ခွင့်ပြုချက်တောင်းခဲ့သည်။ ရလဒ်အနေနှင့် မူလတန်း ခြောက်နှစ်တာကာလအတွင်း အာယူမီးသည် ကျမ်းစာသင်အံမှု ၁၃ ခုကို ပြုလုပ်ခဲ့ရသည်။ သူနှင့်ကျမ်းစာသင်သူများထဲမှ တစ်ယောက်နှင့် ကျမ်းစာသင်သား၏မိသားစုမှ အခြားသူများလည်း နှစ်ခြင်းခံပြီးသောခရစ်ယာန်များ ဖြစ်လာခဲ့ကြသည်။
၁၂။ သားသမီးများသည် ခရစ်ယာန်အစည်းအဝေးများမှ အကြီးမားဆုံးအကျိုးကျေးဇူးကို မည်သို့ရရှိနိုင်သနည်း။
၁၂ ဝိညာဉ်ရေးဘက် ဒေါင်ဒေါင်မြည်ကျန်းမာဖို့အတွက် အစည်းအဝေးပုံမှန်တက်ဖို့လိုသည်။ တမန်တော်ပေါလုက ‘အချို့တို့၏ထုံးစံရှိသည်အတိုင်း၊ အချင်းချင်းစည်းဝေးခြင်းအမှုကို မရှောင်မလွှဲ’ ကြရန် ယုံကြည်သူချင်းတို့အား တိုက်တွန်းခဲ့သည်။ အသက်ကြီးငယ်မဟူသည် ခရစ်ယာန်အစည်းအဝေးများကို မှန်မှန်တက်ရောက်ကြခြင်းမှ ကြီးစွာအကျိုးရရှိကြသောကြောင့် စည်းဝေးပျက်ခြင်းသည် ကျွန်ုပ်တို့၏ထုံးစံမဖြစ်ပါစေနှင့်။ (ဟေဗြဲ ၁၀:၂၄၊ ၂၅; တရားဟောရာ ၃၁:၁၂) သားသမီးများကို ဂရုတစိုက်နားထောင်ရန် သွန်သင်ပေးသင့်သည်။ အစည်းအဝေးများအတွက် ပြင်ဆင်ခြင်းသည်လည်း အရေးပါ၏၊ အကြောင်းမှာ ပါဝင်ဖြေဆိုခြင်းအားဖြင့် အကျိုးအများဆုံးရသောကြောင့်ဖြစ်သည်။ ကလေးငယ်တစ်ဦးသည် စကားလုံးတစ်လုံးနှစ်လုံးပြော၍ဖြေဆိုခြင်း သို့မဟုတ် အပိုဒ်တစ်ပိုဒ်၏အပိုင်းတစ်ပိုင်းကို ဖတ်ပြခြင်းဖြင့် စတင်ဖြေဆိုနိုင်မည်ဖြစ်သော်လည်း ကလေးများသည် မိမိဘာသာ အဖြေကိုရှာဖွေတတ်ဖို့နှင့် ကိုယ်ပိုင်စကားဖြင့်ဖြေဆိုကြဖို့ လေ့ကျင့်ခံရလျှင် အကျိုးအများဆုံးရရှိပါမည်။ အသင် မိဘများသည် မှန်မှန်နှင့် အဓိပ္ပာယ်ပါသောအဖြေများပေးခြင်းဖြင့် ပုံသက်သေကောင်းချမှတ်ကြပါသလော။ မိသားစုဝင်တစ်ဦးစီတွင် ကျမ်းစာအုပ်၊ သီချင်းစာအုပ်နှင့် ကျမ်းစာဆွေးနွေးခန်းအတွက် အသုံးပြုသည့် ကိုယ်ပိုင်စာပေတစ်ခုစီရှိခြင်းသည်လည်း ကောင်းပါသည်။
၁၃၊ ၁၄။ (က) မိဘများသည် သားသမီးများနှင့်အတူ ခရစ်ယာန်ဓမ္မအမှုတွင် အဘယ်ကြောင့် အတူတကွအမှုဆောင်သင့်သနည်း။ (ခ) လယ်ကွင်းလုပ်ငန်းသည် သားသမီးများအတွက် အကျိုးရှိပြီး ပျော်စရာဖြစ်စေဖို့ အဘယ်အရာက ကူညီပေးမည်နည်း။
၁၃ ပညာရှိသောမိဘများသည် လူငယ့်အားမာန်ကို ယေဟောဝါအမှုတော်ဆောင်ခြင်းတွင်အသုံးပြုရန် မိမိတို့၏သားသမီးများကို ညွှန်ကြားပေးလျက် ဟောပြောခြင်းလုပ်ငန်းကို သူတို့၏အသက်တာတွင် အရေးကြီးသည့်ကဏ္ဍဖြစ်စေရန် ကူညီပေးကြပါလိမ့်မည်။ (ဟေဗြဲ ၁၃:၁၅) မိဘများသည် မိမိတို့သားသမီးများနှင့်အတူ ခရစ်ယာန်ဓမ္မအမှုတွင်လုပ်ဆောင်မှသာ “ရှက်ကြောက်စရာအကြောင်းမရှိဘဲ၊ [အမှန်] တရားကို မှန်ကန်စွာပိုင်းခြားတတ်သော” အမှုဆောင်များဖြစ်ကြလာဖို့ လိုအပ်သောလေ့ကျင့်မှုကို သားသမီးငယ်များအား အသေအချာ ရရှိစေနိုင်၏။ (၂ တိမောသေ ၂:၁၅) ထို့ကြောင့် သင်နှင့်ပတ်သက်၍ကော မည်သို့နည်း။ သင်သည် မိဘတစ်ဦးဖြစ်ပါက လယ်ကွင်းလုပ်ငန်းအတွက် သင့်သားသမီးများကို ပြင်ဆင်ပေးပါသလော။ ထိုသို့ပြုလုပ်ခြင်းက အမှုဆောင်ခြင်းသည် သူတို့အတွက် ရွှင်လန်းစရာ၊ အဓိပ္ပာယ်ပြည့်ဝ၍ အကျိုးဖြစ်ထွန်းပေမည်။
၁၄ မိဘနှင့် သားသမီးတို့သည် ခရစ်ယာန်ဓမ္မအမှုတွင် အတူတကွလုပ်ဆောင်ခြင်းသည် အဘယ်ကြောင့် အကျိုးရှိသနည်း။ ဤနည်းအားဖြင့် သားသမီးများသည် သူတို့မိဘများ၏ကောင်းသောပုံသက်သေကို သတိပြုမိကြကာ အတုယူနိုင်ကြသည်။ တစ်ကြိမ်တည်းတွင် မိဘများသည် သားသမီးများ၏သဘောထား၊ အပြုအမူနှင့် စွမ်းရည်တို့ကို အကဲခတ်နိုင်ကြသည်။ ခရစ်ယာန်ဓမ္မအမှု၏ကဏ္ဍအသီးသီးတွင် သင့်သားသမီးကို သင်နှင့်အတူပါဝင်စေပါ။ ဖြစ်နိုင်မည်ဆိုလျှင် ကလေးတစ်ဦးစီတွင် ကိုယ်ပိုင်အမှုဆောင်အိတ်တစ်အိတ်စီရှိစေ၍ ၎င်းကို သပ်သပ်ရပ်ရပ်နှင့် ရှုချင်စဖွယ်ဖြစ်အောင်ထားဖို့ သင်ကြားပေးပါ။ မှန်မှန်လေ့ကျင့်ကာ အားပေးခြင်းဖြင့် ခရစ်ယာန်ဓမ္မအမှုအတွက် စစ်မှန်သောတန်ဖိုးထားလေးမြတ်မှု တိုးပွားလာစေမည်ဖြစ်ပြီး ဟောပြောခြင်းလုပ်ငန်းအားဖြင့် ဘုရားသခင်နှင့် အိမ်နီးချင်းကိုချစ်သည့်မေတ္တာ တင်ပြနိုင်ကြောင်း သားသမီးများ သဘောပေါက်လာကြပါလိမ့်မည်။—မဿဲ ၂၂:၃၇-၃၉; ၂၈:၁၉၊ ၂၀။
ဝိညာဉ်ရေးကိုထိန်းသိမ်းလော့
၁၅။ မိသားစု၏ဝိညာဉ်ရေးကို ထိန်းသိမ်းခြင်းသည် အလွန်အရေးကြီးသဖြင့် ထိုသို့ပြုလုပ်ရန် နည်းလမ်းအချို့ကား အဘယ်နည်း။
၁၅ မိသားစု၏ဝိညာဉ်ရေးကို ထိန်းသိမ်းခြင်းသည် မရှိမဖြစ်လိုအပ်၏။ (ဆာလံ ၁၁၉:၉၃) ယင်းကိုပြုလုပ်နိုင်သည့် နည်းတစ်နည်းမှာ ဝိညာဉ်ရေးရာများကို အခွင့်အရေးရတိုင်း သင့်မိသားစုနှင့်ဆွေးနွေးခြင်းဖြစ်သည်။ နေ့စဉ်ကျမ်းချက်ကို သူတို့နှင့်အတူ ဆွေးနွေးပါသလော။ သင်သည် “လမ်းလျှောက်စဉ်” လယ်ကွင်းလုပ်ငန်းအတွေ့အကြုံများ သို့မဟုတ် နောက်ဆုံးထုတ် ကင်းမျှော်စင် နှင့် နိုးလော့! မဂ္ဂဇင်းများမှအချက်များကို ပြောပြသည့်အကျင့်ရှိပါသလော။ သင် “အိပ်ရာဝင်စဉ်နှင့် နိုးထစဉ်” နေ့စဉ်အသက်တာနှင့် အလျှံပယ်ပြင်ဆင်ပေးထားရာများအတွက် ယေဟောဝါအား ကျေးဇူးတင်ကြောင်း ဆုတောင်းရန် သတိရပါသလော။ (တရားဟောရာ ၆:၆-၉၊ သမ) သင်လုပ်ဆောင်သည့်အရာတိုင်းတွင် ဘုရားသခင်ကိုချစ်ကြောင်းထင်ရှားနေသည်ကို သင့်သားသမီးများ တွေ့ရှိသည့်အခါ ယင်းက အမှန်တရားကို သူတို့၏ကိုယ်ပိုင်ဖြစ်စေရန် ကူညီပေးပါလိမ့်မည်။
၁၆။ သားသမီးများအား မိမိတို့ဘာသာ ရှာဖွေလေ့လာမှုပြုလုပ်ရန် အားပေးခြင်း၏တန်ဖိုးကား အဘယ်နည်း။
၁၆ သားသမီးများသည် ပေါ်ပေါက်လာတတ်သော ပြဿနာများနှင့် အခြေအနေများကို အောင်မြင်စွာကိုင်တွယ်ဖြေရှင်းတတ်ရန် ရံဖန်ရံခါ လမ်းညွှန်မှုလိုအပ်ကြပေမည်။ အဘယ်အရာပြုလုပ်ရမည်ကို အမြဲတမ်းပြောပြမည့်အစား ကိစ္စရပ်များအပေါ် ဘုရားသခင်၏ရှုမြင်ပုံ မည်သို့ရှိကြောင်းကိုသိရှိရန် သူတို့ဘာသာသူတို့ ရှာဖွေလေ့လာမှုပြုလုပ်ရန် ပြသပေးပါလေ။ ‘သစ္စာရှိကျွန်’ မှတစ်ဆင့် ပြင်ဆင်ပေးထားသော ကိရိယာများနှင့် စာပေများအားလုံးကို ကောင်းစွာအသုံးပြုတတ်ရန် သားသမီးများကို သွန်သင်ပေးခြင်းက ယေဟောဝါနှင့် နီးကပ်သောဆက်ဆံရေးရှိရန် သူတို့ကို ကူညီပေးပါလိမ့်မည်။ (၁ ဓမ္မရာဇဝင် ၂:၂၁ခ) အခြားအိမ်သူအိမ်သားများနှင့်အတူ သူတို့၏ကျမ်းစာရှာဖွေတွေ့ရှိချက်များကို ဝေမျှပြောဆိုသောအခါ မိသားစု၏ဝိညာဉ်ရေးသည် ထပ်ဆင့်၍တိုးပွားလာပေသည်။
ယေဟောဝါအား လုံးလုံးလျားလျား အားထားခြင်း
၁၇။ ကြင်ဖော်မဲ့မိဘများသည် ခရစ်ယာန်များအဖြစ် မိမိတို့သားသမီးများကို ပြုစုမွေးမြူသည့်အခါ အဘယ်ကြောင့် စိတ်ဓာတ်မကျသင့်သနည်း။
၁၇ မိဘတစ်ဦးတည်းရှိသော မိသားစုများနှင့်ပတ်သက်၍ကော မည်သို့နည်း။ ဤသူတို့သည် သားသမီးမွေးမြူရာတွင် ထပ်ဆင့်စိန်ခေါ်ချက်များရင်ဆိုင်ကြရသည်။ သို့သော် ကြင်ဖော်မဲ့မိဘများ စိတ်ဓာတ်မကျပါနှင့်! သင်တို့အောင်မြင်နိုင်ကြောင်း ကိုယ်တော့်သွန်သင်ချက်များကို နာခံမှုရှိရှိလိုက်နာကာ ဝိညာဉ်ရေးကောင်းသော သားသမီးများကို ပြုစုပျိုးထောင်ခဲ့ကြသည့် ဘုရားသခင်ကိုကိုးစားသော ကြင်ဖော်မဲ့မိဘများစွာတို့က တင်ပြကြသည်။ (သု. ၂၂:၆) အမှန်မှာ ကြင်ဖော်မဲ့မိဘများဖြစ်ကြသော ခရစ်ယာန်များသည် ယေဟောဝါအား လုံးလုံးလျားလျား အားထားမှီခိုရန်လို၏။ ကိုယ်တော်အမှန်ကူညီမည်ဟု ယုံကြည်စိတ်ချရမည်။—ဆာလံ ၁၂၁:၁-၃။
၁၈။ သားသမီးများ၏ အဘယ်စိတ်ဓာတ်နှင့် ခန္ဓာပိုင်းလိုအပ်ရာများကို မိဘများအာရုံစိုက်သင့်သနည်း၊ သို့သော် အဘယ်အရာကို ဦးစားပေးသင့်သနည်း။
၁၈ ပညာရှိမိဘများသည် ‘ရယ်ရသောအချိန်နှင့် ကခုန်ရသောအချိန်လည်းရှိ’ ကြောင်း အသိအမှတ်ပြုကြသည်။ (ဒေ. ၃:၁၊ ၄) ကလေးငယ်တစ်ဦး၏စိတ်နှင့် ခန္ဓာကိုယ်ကိုတည်ဆောက်ပေးရာတွင် နားနားနေနေ နေသည့်အချိန်နှင့် မျှတပြီး အကျိုးပြုသောအပန်းဖြေမှုရှိဖို့လိုသည်။ တည်ဆောက်မှုပေးသော တေးဂီတနှင့် အထူးသဖြင့် ဘုရားသခင်အား ချီးမွမ်းသည့်သီချင်းများကို သီဆိုခြင်းသည် ယေဟောဝါနှင့် ကလေးငယ်၏ဆက်ဆံရေးကို ခိုင်ခံ့စေရာ၌ အရေးပါသောကဏ္ဍမှပါဝင်နိုင်သည့် ကျန်းခံ့သောသဘောထားကိုမွေးမြူရန် ကူညီပေးပါလိမ့်မည်။ (ကောလောသဲ ၃:၁၆) ငယ်ရွယ်ချိန်သည် ဘုရားသခင်ကိုကြောက်ရွံ့သည့် လူကြီးတစ်ဦးဖြစ်လာဖို့ ပြင်ဆင်ပေးသည့်အချိန်လည်းဖြစ်သည်၊ သို့ဖြင့် ပရဒိသုမြေကြီးပေါ်တွင် အသက်တာကို ထာဝစဉ်ပျော်မွေ့သွားနိုင်မည်ဖြစ်သည်။—ဂလာတိ ၆:၈။
၁၉။ သားသမီးမွေးမြူရေးဆိုင်ရာ မိမိတို့၏ကြိုးပမ်းမှုများကို ယေဟောဝါကောင်းချီးပေးမည်ဟု မိဘများ အဘယ်ကြောင့် ယုံကြည်စိတ်ချနိုင်သနည်း။
၁၉ ယေဟောဝါသည် ခရစ်ယာန်မိသားစုအားလုံးကို ဝိညာဉ်ရေးခိုင်ခံ့ပြီး စည်းလုံးစေလိုတော်မူ၏။ ဘုရားသခင်ကို ကျွန်ုပ်တို့အမှန်တကယ်ချစ်ပြီး ကိုယ်တော့်စကားတော်ကို အတတ်နိုင်ဆုံး လိုက်နာကြမည်ဆိုလျှင် ကျွန်ုပ်တို့၏ကြိုးပမ်းမှုများကို ကောင်းချီးပေးမည်ဖြစ်ပြီး ကိုယ်တော်၏မှုတ်သွင်းခံလမ်းညွှန်မှုကို လိုက်လျှောက်ရန် လိုအပ်သည့်ခွန်အားကိုလည်း ပေးပါလိမ့်မည်။ (ဟေရှာယ ၄၈:၁၇; ဖိလိပ္ပိ ၄:၁၃) ယခု သင့်သားသမီးများအား လေ့ကျင့်သွန်သင်ပေးရသည့်အခွင့်အရေးသည် အကန့်အသတ်သာရှိပြီး ထပ်ကျော့ရလိမ့်မည်မဟုတ်ကြောင်းကို သတိရပါ။ ဘုရားသခင့်စကားတော်သွန်သင်ချက်ကို အတတ်နိုင်ဆုံးလိုက်နာကျင့်သုံးပါ၊ သို့ပြုလျှင် ဝိညာဉ်ရေးခိုင်ခံ့သော မိသားစုကိုတည်ဆောက်ဖို့ သင့်ကြိုးပမ်းမှုများကို ယေဟောဝါကောင်းချီးပေးပါလိမ့်မည်။
ကျွန်ုပ်တို့အဘယ်ရာသင်ယူခဲ့ကြသနည်း
• သားသမီးများကို လေ့ကျင့်ပေးရာတွင် အချိန်ကိုဝယ်ယူရန် အဘယ်ကြောင့် အလွန်အရေးကြီးသနည်း။
• မိဘ၏ပုံသက်သေကောင်း အဘယ်ကြောင့် လိုအပ်သနည်း။
• သားသမီးများ ဝိညာဉ်ရေးတွင်ကြီးထွားလာရန် ကူညီပေးဖို့ အရေးပါသောနည်းလမ်းအချို့ကား အဘယ်နည်း။
• မိသားစု၏ဝိညာဉ်ရေးကို မည်သို့ထိန်းသိမ်းနိုင်သနည်း။
[လေ့လာရန်မေးခွန်းများ]
[စာမျက်နှာ ၂၄, ၂၅ ပါ ရုပ်ပုံ]
ဝိညာဉ်ရေးခိုင်ခံ့သော မိသားစုများသည် ဘုရားသခင့်စကားတော်ကို မှန်မှန်လေ့လာကြကာ ခရစ်ယာန်အစည်းအဝေးများကို တက်ရောက်ကြပြီး ခရစ်ယာန်ဓမ္မအမှုတွင် အတူတကွပါဝင်ကြသည်